<a href="https://kyzylorda-news.kz/">Kyzylorda-news.kz.</a> Көктемнің алғашқы күнінде алғыс айтсақ, орта шенінде көрісу күнін қарсы алып, тіршілікке нәр берген шұғылалы мезгілдің кереметін сезіне түстік. Иә, қазақ халқы үшін көктем жаңа өмірдің бастауы іспетті. Сондықтан бұл мезгілді қазақтар ежелден ерекше тұтады. наурыз мерекесінен басқа көктемнің құрметіне арнап жасалатын көне наным-сенімдер негізінде қалыптасқан дәстүр мен амалдың бірі – «көрісу» күні, яғни «амал» мерекесі.«Көрісу» немесе «Амал» мерекесі хақында не білеміз? Әсіресе еліміздің батыс өңірінде сақталып қалған бұл дәстүрдің тарихы бірнеше ғасырдан бастау алады. Сол уақыттан бері наурыз айының 14-і «Көрісу күні» болып белгіленген. Ал ұлттық мереке Наурызды халық «Көрісу» амалынан кейін тойлайды.&nbsp;Тарихшылар бұл айтулы күннің шығу тарихын былайша түсіндіреді. Төрт түлік малының жайын жасаймын деп ұлан-ғайыр даланың әр пұшпағын қыстап отырған көшпенді халық қаһарлы боранда бірінің үйіне бірі бара алмай, жүзін көре алмай, тек қар көбесі сөгіліп, күн ұзарып, көктем шыққанда ғана көріскен көзайым қуанышынан қалыптасып дәстүрге айналып кеткен деседі. Сондай-ақ тарихшылар «Амал» күнінің дәл 14 наурызда атап өтілу себебін де Шығыс елдерінің &nbsp;күнтізбесінде наурыздың басталуы амал айының 1 жұлдызы болып есептелетінін, ал амал – Тоқты шоқжұлдызының ескі парсыша атауы екенін, Тоқты шоқжұлдызы күн мен түн теңелгенде туатынын, яғни осы күні амал кіріп және бұл мереке наурыз айының соңына дейін жалғасатынын айтады.Бұл күні ағайын-туыс, көрші-көлем, ауыл-аймақ бір-бірінің үйіне кіріп сәлем беріп, құшақтасып көрісіп, мәре-сәре болып жатады. Әсіресе жасы кішілер үлкен шаңырақтағы қарт кісілерге арнайы барып, сәлем беріп батасын алса, балалардың өзі бір-біріне сый-кәде ұсынады. Иә, қанша уақыт өтсе де айтулы күнді атап өтудің маңызы артпаса, мерекенің бұл түрі өз құнын жоғалтпасы анық. Бұл сөзімізге өткен сан ғасырлар дәлел болары сөзсіз. Себебі «Амал» мерекесі немесе «Көрісу» күні – қазақ халқының ежелден келе жатқан мерекелерінің бірі. Бұл – халқымыздың ұлттық болмысын паш ететін, жастарға ұлағатты тәрбие беретін ұлық мереке. Бұлай дейтініміз көрісу, қауышу деген – қай заманда да, қай қоғамда да қасиетті ұғым, жақсылықтың, ізгіліктің нышаны. Бірі-бірін сыйлайтын, құрметтейтін, бірін-бірі сағынған адамдар ғана көріседі. Күнделікті өмірдегі бірі-бірінің ренішін кешіреді, өкпе-назын көтереді, ұмытады.&nbsp;Жалпы Наурыз мейрамы ежелден жаңару мен жасампаздықтың, ырыс пен берекенің арқауы болған. Көктің тынысын тыңдап, жердің тамырын басқан, тұрмыс-тіршілігін табиғатпен байланыстырған халқымыз наурызды жақсылықтың бастауы деп білген. Ежелгі тәуелсіз мемлекетіміздің қалыптасуымен бірге жаңғырған наурыз мейрамы көпұлтты Қазақстан халқы үшін сүйікті мерекеге айналып, бірлік пен ынтымақтың, саяси тұрақтылықтың нығаюының негізі болды. Бұл күн мен түннің теңелген күні, молшылықтың мерекесі елімізге береке, байлығын ала келсін. Қазақтың салт-дәстүрі мен әдет-ғұрпы, ұлттық ерекшелігі айқындалатын бұл мейрамды жыл сайын асыға күтеміз. Бір-бірімізге ақ тілек тілеп, ұлыс оң болсын, ақ мол болсын, қайда барсаң жол болсын деп алдағы келер күндерден ырыс пен молшылық, береке-бірлік, татулық пен шынайы мейірімділіктің ыстық ықыласын ақтаратын да осы – Наурыз мейрамы. Қашаннан халқымыз күн мен түннің теңелгенін жақсылыққа жорып, жыл басы деп санаған.&nbsp;Әдетте жұрт бар жақсысын мейрам күні көрсетеді, жаңасын иығына іледі, дәмдісін дастарқанға қойып, өнерін ортаға салады. Дәл бүгін салт-дәстүрлеріміздің жаңғыратын күні. Осының аясында Наурыз айының 14-і күні жалағаштықтар ерекше мән-маңызға ие «Амал» күнін қарсы алды. Мереке қарсаңында екі күн қатарынан Жалағаш кентіндегі орталық алаңда «Көне дәстүр күмбезі» атты мерекелік шара ұйымдастырылды. Ұлттық нақышта безендірілген сахна мен сән-салтанаты келіскен өнерпаздардың өнеріне, қойылымдарына куә болған аудан халқы «Амал» мерекесінің мән-маңызын тереңінен түсіне түсті. Алғашқы күні ауданға қарасты Аққұм, Жаңадария, Есет батыр, Еңбек ауылдық мәдениет үйлері «Сүйіндір» салтын сахналаса, Т.Жүргенов, Мәдениет, Аққыр мен Жаңаталап ауылдарының клуб ұжымы «Қазық майлау» салтының тарихы мен қолданыстағы маңызын қойылыммен жеткізе білді.&nbsp;Мәселен «Сүйіндір» салты бойынша келіншек босанғаннан кейін оның анасы кәде, &nbsp;жорасын алып &nbsp;әдейі &nbsp;келуге тиіс. &nbsp;Бұл – қалыптасқан &nbsp;салт және &nbsp;ананың міндетті парызы. Мұны &nbsp;қызын &nbsp;қияға &nbsp;қондырған әр қазақ әйелі &nbsp; білуге &nbsp;және орындауға &nbsp;міндетті. &nbsp;Ана болған &nbsp;өз баласының қасында болып, оған &nbsp;рухани &nbsp;күш беріп, сенім туғызып, күту жолдарын үйретеді, ақылшысы, сүйеніші, қамқоры болады. Құда-құдағиларының немерелі болған &nbsp;қуанышына &nbsp;ортақтасады, &nbsp;нәрестеге &nbsp;арнаған &nbsp;бұйымдардың, сәлем-сауқатын ұсынады. Құрметті қонағы болады. Перзентті болған қызына &nbsp;анасының &nbsp;баруы &nbsp;ежелден &nbsp;келе жатқан жоралғы екенін &nbsp;жұрт¬тың &nbsp;бәрі де растайды. &nbsp;Бізде осы салтты «сүйіндір» деп атады.&nbsp;Қазақта босанған жас анаға арналатын тағы бір жақсы салт – келінге қалжа жегізу екенін білеміз. Бұрынырақта келін босанған соң қырық күн бойы оны күтіп, күнде жақсы, құнарлы тағамдармен тамақтандырған. Сорпа ішіп, тамағының тойымды болуы қадағаланған. Мұны жаңа туған сәбидің де денсаулығын, сау болып өсуін ойлағаннан жасаған. Өйткені ана сүтінің құнарлы, құнарсыз болуы баланың денсаулығына тікелей әсер етеді. &nbsp;Қалжаның күнделікті желінетін еттен айырмашылығы – ол жас босанған ана мен баланың сыбағасы. Қалжа, біріншіден, дүниеге келген нәрестенің құрметіне арналса, екіншіден, жас анаға дүниеге перзент әкелгені үшін арнайы сойылатын болған. Күнде келінге сорпасын ішкізіп, етін жегізіп отырғандықтан, жас босанған ана өзінің жоғалтқан күш-қуатын осы қалжа арқылы қалпына келтіреді. Босанғаннан кейінгі күтімге қалжаның тигізер пайдасы ұшан-теңіз. Қалжа жеп, жас сорпа ішкен келіншектің сүті де маңызды, құнарлы болады. Баланың тез ет алып өсуіне әсер етеді. Қалжаның келінге қырық күн бойы берілуін енесі қадағаласа, ал аудан жұртшылығы тамашалаған «Сүйіндір» салтын босанған жас ананың өз анасы орындайды.&nbsp;Орталық алаңда азан-қазан мерекелік көңіл-күймен, ұлттық салт-дәстүрлерді жаңғыртқан елді мекендердің мәдениет үйлерінің ұжымы ұлттық тағам «Наурыз көжеден» де дәм татырды. Жиылған жұртшылық тіршілік жаңарып, жақсылыққа бастайтын Ұлыстың Ұлы күнінің алғашқы көжесінен де ауызтиіп, ұмытыла бастаған дәстүрлердің маңызын тағы бір еске алды. Ел мерейін үстем еткен өнерпаздарға көрермендер ықыласы ерекше болды. Қазан асылып, жеті күлше таратылып, ұлттық дәм наурыз көже барша көрермендерге үлестірілді. &nbsp;

Жалағашта амал мерекесі тойланды

<a href="https://kyzylorda-news.kz/">Kyzylorda-news.kz.</a> Көктемнің алғашқы сенбісінен бері аудан орталығында және ауданға қарасты кент, ауылдық округтерде жаппай санитарлық тазарту іс-шарасы ұйымдастырылуда. Сенбілікке мекеме қызметкерлері мен аудан тұрғындары бір кісідей атсалысып, әрбір ұжым бөлінген аумақтарда, көшелерде тазалық жұмыстарын жүргізіліп келеді. Өңірдің өркендеуін, елді мекеннің мұнтаздай таза болуын ортақ абырой деп білетін аудандағы барлық мекеме ұжымы жол жиегіндегі арықтарды күл-қоқыстан арылтып, сенбілік жұмыстарының қарқын алуына өз үлестерін қосуда.Жалпы бала күнімізде анамыздан жиі еститініміз «Тазалықты әуелі есіктің алдынан, кіреберістен бастаңдар!» деген сөз еді. Сонда «Адам бірінші анау төрден бастап ауызға дейін жинастырмайды ма?» дейтінбіз іштей. Ол кездегі үлкендердің осы сөзі біз үшін қате сияқты көрініп, реттілікпен тазалаған дұрыс емес пе деп өзімізше айтушы едік. «Ананың көңілі балада» деп тегін айтылмаған ғой, сонда әлгі сөздің өзі біз үшін үлкен тәрбиенің өзегі екенін түсінбеппіз.&nbsp;Иә, тазалықты кіреберістен, өз аулаңнан бастаудың өзі тегін емес. Сырт көз сыншы демекші, көзге томпақ келетін кедір-бұдырды, аяғыңа оралатын күл-қоқысты, болмашы кемшілікке біздің көзіміз үйреніп кеткенімен, сырттан келген адам үшін айна-қатесіз көрініп тұратыны рас. Мейман келе жатқаннан аулаңа, кіреберісіңе қарайды. Егер тап-тұйнақтай болса сүйсініп келіп, сүйсініп кетеді. Ал осындай абырой бәрімізге ортақ. Өйткені бұл киелі мекенде сіз бен біз өмір сүрудеміз. Артығы да, кемшілігі де, сын да бізге айтылады, сөз де өзімізге тиеді. Сондықтан әр тазалық маусымы болған сайын «Тазалықты өз аулаңнан баста» деген қағиданы, ұранды үндеуді көп айтатынымыз, жиі еститініміз де содан. Қазақ «Көп түкірсе көл» дейді ғой, әрбір тұрғынның өз ауласынан бастаған тазалық жұмысы кентіміздің гүлденуіне үлкен үлес қосады.&nbsp;Аудан орталығындағы көркейту-көгалдандыру жұмыстары, тазалық айлығы басталып кетті бүгінде. Тазалыққа тастай талап керек екенін, өзіміз тұратын өлкенің күл-қоқыстан таза болуын, кез келген келеңсіздіктің ұяты өзімізге келетінін жете түсінетін кент тұрғындары тазалық маусымында бір кісідей атсалысуда. Осының ізімен әр сенбі сайын аудан орталығында және ауданға қарасты кент, ауылдық округтерде жаппай санитарлық тазарту іс-шарасы өтіп келеді. &nbsp;Әрбір ұжым бөлінген аумақтарда, көшелерде тазалық жұмыстарын жүргізуде. Өңірдің өркендеуін, елді мекеннің мұнтаздай таза болуын ортақ абырой деп білетін аудандағы барлық мекеме ұжымы жол жиегіндегі арықтарды күл-қоқыстан арылтып, сенбілік жұмыстарының қарқын алуына өз үлестерін қосуда. Біріміз беліміз еңкейгенше жерді тырмаласақ, енді біріміз жанымызды салып сол қоқысты тасимыз. Тіпті отбасындағы тірлігін жиып қойып сенбілікте белсенділік танытып жүретін аналарымыз да аз емес. Әрине, мұның бәрі тазалық үшін, түптеп келгенде өзіміз үшін. Алайда бір биеден ала да туады, құла да туады демекші, қоғам болғасын әртүрлі көзқарастың болуы да заңдылық. Тазалық барлығына ортақ екенін білсе де, жауапкершіліктен жалтаруды құп көретіндер табылып жатады. &nbsp;Халық тарапынан кентті абаттандыру жұмысы туралы сөз болғанда айтылатын бір ғана жауап ол – әрбір үй иесінің тазалықты өз ауласынан бастауы. Бірақ қол қусырып қарап отырмау керек, әрекет етуге тиіспіз. Кенттің көркейіп-көгалдануы тек қаражатқа келіп тірелмейтінін түсінуіміз керек. Яғни өңірдің әрбір күл-қоқысын тазарту екі қолдың көмегімен жасалатын іс. Біле білсек, сол күл-қоқысты тастайтын өзіміз, әр ауланың айналасына тұрмыстық қалдықтарды жинап қоятын да өзіміз, қала берді адам аяғы басуға болмайтын кір суын да төге салатын сол тұрғындардың өздері. Қазір аудандағы әрбір мекеме ұжымы тазалық маусымында табандылық танытып жатқанын көріп отырмыз. Енді әрбір сенбілікке жергілікті тұрғындар да өз үлестерін қосқаны абзал. Әрбір адам өзі тұратын үйдің ауласы мен көшелердің көркеюіне және тазалығына мән берсе, күл-қоқыстармен келетін түрлі инфекциялық аурудың болмасы да анық. Әсіресе көше бойына қойылған қоқыс жәшігіне салынатын қалдықтардың тиісті жәшіктің ішіне салынуы, жәшік толған жағдайда жауапты мекеменің уақытында тазартып отыруы да үлкен септігін тигізеді.&nbsp;Жалпы жеке тұрғынның меншігіне қарасты аула әркез таза болса, сенбілік жұмыстарына білек сыбана кіріскен мекеме қызметкерлерінің де жұмысы жеңілдейді. Ал ауламыз таза, кентіңіз көркейіп тұрса онда бәріміз үшін ортақ мақтаныш. Ал тазалықты өз ауламыздан бастау, сенбілік жұмыстарына бір кісідей атсалысу ең бастысы жауапкершіліктен жалтармау керек.

Жалағаш ауданында санитарлық тазарту іс-шарасы ұйымдастырылуда

<a href="https://kyzylorda-news.kz/">Kyzylorda-news.kz.</a> Кеше Жалағаш аудандық «Иманқұл» мешітінде игі шара өтті. «Қайырымдылық жасасаң, қайырын өзің көресің» дегендей, жақсы жандардың жанына жылулық сыйлаған азаматтардың бұл ісі көпке үлгі боларлықтай. «Наурыз шапағаты» атты қайырымдылық акциясы аясында бірнеше отбасы қуанышқа кенелді. Игі шараға қатысқан аудан әкімі Асқарбек Есжанов та акцияға атсалысқан үлкенжүректі азаматтарға алғысын айтып, қайырымдылық жасау ең ізгі ықыластан болатынын айтты.Иә, расымен жүрекпен жасалатын амалдардың ең әуелгісі – ықылас. Бұл – құлшылықтың негізі. Жасаған амалыңыздың қабыл болуы не кері қайтарылуы да осы ықыласқа байланысты. Бір сауапты істі бастарда ниеттің дұрыс болуы маңызды. Мұсылман адам бұл амалдарды атқару алдында Жаратушының разылығынан, сауабынан үміттенуі керек. Ал адам баласының бойында адамгершілік пен ізгілік ұштасқанда жүректен игі істер туады. Сол игі істердің бастамашысы бола білу үлкен жүректі азаматтардың қолынан келмек.&nbsp;<blockquote>«Әлемдегі барлық жаратылыс адамзаттың игілігіне берілгенімен, бүкіл жаратылыстың иесі – Алла. Ол біздерге мал-мүлік берсе, Алланың берген нығметіне шүкіршілік етіп, орнымен жұмсап, шүкіршілігі ретінде Алла разылығы үшін белгілі бір мөлшерін мұқтаждарға беру керектігін де ескертеді. Алла Тағала қасиетті Құран Кәрімде де қайыр-садақа ретінде не берсеңдер де өздерің үшін жақсы болады. Не берсеңдер де, тек Алланың разылығы үшін берулерің керек. Ізгілік жолында не жұмсасаңдар да, соның бәрі өздеріңе толық қайтарылады және сендер әділетсіздікке ұшырамайсыңдар деген. Расымен әр адамның істеген ізгі амалы өзіне пайда береді», – деген мешіттің бас имамы &nbsp;қанша отбасыға қуаныш сыйлап, осындай игі істерде бастамашы болып жүретін азаматтарға алғысын білдірді. &nbsp;</blockquote>«Наурыз шапағаты» қайырымдылық шарасы – аудан азаматтарының ауызбіршілігі мен ынтымағын, қамқор көңілі мен мейірбандығын көрсететін рухани шара. Әр күні жылға азық болар берекелі мезгілде жақсылықтың тілекшісі болған жомарт жандар ата-баба рухына құран бағыштап, құрбандық шалды. Ақ түйенің қарны жарылған, тіршілік жаңарып, Жер-Ана бусанған Ұлыстың Ұлы күнімен тұспа-тұс жасалған игі іске куә болған аудан халқы да бірлік пен берекенің мекені болған өңіріміз тек жақсылықтың жаршысы болсын деген ізгі тілектерін жаудырды.&nbsp;Біле білсеңіз, игі іс жасау деген міндетті түрде біреуге дүниеңнің жартысын бөліп беру деген түсінік емес. Түсінгенге сауапты іс, бұл – үлкен жүректен шығатын кішкене ғана іс-әрекет. Адам бойында жақсы қасиеттер көп болса, оған бақ та, бақыт та қонады.

Жалағаштағы «Иманқұл» мешітінде қайрымдылық шарасы өтті

<a href="https://kyzylorda-news.kz/">Kyzylorda-news.kz.</a> &nbsp;Жердің тоңы жібіп, ауылдағы ағайын ақ егісті бастап кетті. Қыстай кетпенін мұзға қайраған диқандардың қырманды дәнге толтырудың қамына кіріскеніне де бірнеше аптаның жүзі болды. Күрежолдың бойында егіс алқабы бар жалағаштық «Байтабын» ЖШС ұжымы өткен аптада ақ егісті бастады.&nbsp;Жалағаш ауданына қарасты Бұқарбай батыр ауылындағы шаруашылық ұжымы көктемгі науқан жұмыстарын елден бұрын бастауды дәстүрге айналдырған. Есесіне ала жаздай күтіп баптаған егінді жауынға қалдырмай қырманға құйып алады. Биыл да шаруашылық ұжымының дала жұмысы әдеттегідей айналасынан бұрын басталды.&nbsp;«Батыр атындағы ауылда ақ егіс басталды» дегеннен шаруашылықтың егіс алқабына атбасын бұрдық. Үлкен жолдың бойында бізді тосқан «Нива» автокөлігі шаруашылыққа тиесілі екен. Аман-саулық сұрасып, егіс басына бір-ақ тарттық.&nbsp; Артында тіркемесі бар қос трактор алқапқа айтарлықтай сән беріп тұр. Бірі атыздың басынан соңына дейін тіркемеден тұқым тастаса, келесі механизатор оған жанаса кетеді. Бас-аяғы 20-30 минутта атыздан-атызға ауысқан қос механизатордың санаулы күнде ақ егісті сеуіп тастайтыны көрініп-ақ тұр. Оның үстіне биыл егілетін жоңышқаның көлемі де айтарлықтай көп емес.Былтыр шаруашылық 200 гектардан астам алқапқа жаңа жоңышқа сепкен. Биыл да оның көлемінде айтарлықтай айырмашылық жоқ. Бастысы, шаруашылық ұжымының ротацияны қатаң сақтайтыны көрініп-ақ тұр. Әлбетте күріштен тү¬сетін табыс жоңышқаға қарағанда айтарлықтай жоғары. Алайда төраға Болат Ділдабеков үшін өнімнің көлемінен сапасы маңызды. Тіпті әлі жерге дән түспей агроном Сұлтанбек Үсейіновты егіс басына қойғаны да сондықтан.&nbsp;Бұрын ауылдағы үлкендер пысықай біреуді сөз еткенде әңгімесін «оның білмейтіні жердің астында» деп бастайтын. Сұлтекең жердің астындағы дәннің де қай уақытта қалай пісіп-жетілетінін жетік біледі екен. Қазір ауыл шаруашылығы дақылдарының қайсысына қандай күтім қажет, ол жағы серіктестіктің бас агрономына таңсық емес. Бүгін олар 207 гектар алқапқа жаңа жоңышқаны бидаймен араластырып септі. Әзірге егіс басында 10-15 адам бар, негізгі жауапкершілік механизаторларға жүктелген. Брига¬дир Болат Жетпісбайұлы наурыздың аяғында жерді сүдігерлеуге кірісетінін айтады. Ол басшылық ете¬тін бригада биыл 500 гектар күріш пен 100 гектар жоңышқаның шығымына жауапты.&nbsp;Айта кетейік, былтыр шаруашылық 800 гектарға жуық алқаптан жоңышқа өнімін жиған. Оның 210 гектары жаңа жоңышқа болса, 580 гектар ескі жоңышқаны күтімге алған. Биыл да 207 гектарға жаңа жоңышқа егіп отыр. Сыр салысын былай қойғанда, жоңышқаның тұқымына дейін өздері дайындайды. Өнім өздерінен бөлек басқа да шаруашылықтарға сатылады екен. Мәселен, биыл дайындалған 10 тонна жоңышқа тұқымының өздері тек 4 тоннасын пайдаланып, қалғанын сатылымға шығарады. Жоңышқа сұрпының сапасы жоғары болса керек, тіпті басқа да облыстардан сұраныс болады екен. Оны дайындайтын германиялық аппарат 2018 жылы 48 млн теңгеге сатып алынған.Агроном Сұлтанбек Қабылбекұлы көктемде «Байтабын» ЖШС 500 тоннадай күріш пен 4 тонна жоңышқа тұқымын себетінін айтады. Ал қалғаны жергілікті шаруашылықтарға сатылады. «Байтабын» ЖШС былтыр 1 100 гектар алқапқа Сыр салысын сепкен. Сыр салысының әр гектарынан 70 центнерден орташа өнім жиса, диқан¬дардың алды әр гектардан 86 центнер астық алған.&nbsp; Былтыр аяқ судың мәселесі жергілікті шаруашылықтардың ешқайсысын айналып өткен жоқ. Уақыт өткен сайын мәселе күрделеніп келеді. Егер келер жылы мұндай мәселе қайталанбаса, «Байтабын» ЖШС 1390 гектарға күріш егетінін айтқан. Биыл мамандар су тапшылығы айтарлықтай қиын болмайды деп болжам жасады. Жақсы жаңалықтан құлағдар болған шаруашылық ұжымы биыл 1300 гектарға күріш егуді межелеп отыр.&nbsp;Шаруашылық бүгінде 107 адамды жұмыспен қамтиды. 3 өндіріс бригадасы биыл науқанды оң нәтижемен қорытындылауға ниетті. Техникадан да мәселе жоқ, төраға Болат Ділдабеков «ала жаздай бапталған өнім жауын-шашынға қалады» деп уайымдамайды. Себебі ол шаруашылық базасын толық заманауи соңғы үлгідегі техникалармен жарақтаған. Ал мұның еңбек өнімділігіне де оң әсері болатыны айтпаса да анық.Соңғы жылдары серіктестік егінді әртараптандыруға да басымдық берген. Былтыр ауыл халқына бақша салу үшін біршама жер ашып берген еді. Жергілікті тұрғындар қыстай тұтынатын картоп-сәбізін, қызылша, асқабын өздері өсіріп, жинап алды. Болат Ділдабеков ағамыз бұл жылдағы қалыптасқан дәстүр екенін айтады. Әрине шаруашылық қолға алған бұл бастаманың жергілікті халыққа тиімді екені айтпаса да белгілі. Ал биыл мақсары, соя секілді суды аз қажет ететін дақылдарға да басымдық беріледі екен.Шаруашылық өз кәсіптерінен бөлек ауылдың болашағы үшін де жарқын жобаларды жүзеге асырғанын аудан жұрты жақсы біледі. 100 млн теңгеден астам қаражатқа спорт кешенін салды. Бүгінде батыр атындағы ауылдың жастары оның игілігін көріп отыр. Одан бөлек бірнеше жылдан бері ауылда тұралаған интернет байланысына қатысты мәселені де түбегейлі шешіп берді. Үлкен балалар ойын алаңының өзі бүгінде ауыл балақайларына айтарлықтай базарлық болғаны көрініп-ақ тұр. Табысын жұртымен бөлісетін осындай ұжымның жұмысында береке болатынын «Байтабындықтардың» бүгінгі ты¬ныс-тіршілігі айқындап тұрғандай. Жұмысы жүйелі, мақсаты айқын.

Жалағаштық диқандар 1300 гектарға күріш екпек

<a href="https://kyzylorda-news.kz/">Kyzylorda-news.kz.</a> Отбасының ұйытқысы бола біліп, ізгілік қасиетімен да­раланған аналар қауымы қоғамдық жұмысқа да бел­сене атсалысады. Жекелеген елдімекенде бір­неше жылдан бері әже­лер ансамблі құрылып, көпшілікке өз өнер­лерін арнап келеді. Жа­қын­да­­ Қызылорда қаласын­да ән өнеріне машықтанған ақ жаулықты аналар арасында «Ұлағатты әже» та­қырыбында облыстық фестиваль өтті. Атал­ған бай­қауда Сырдария ауданының&nbsp;Асқар Тоқмағам­бетов ауылдық клуб үйі жанынан құрылған «Асыл ана» әже­лер ансамблі бақ сынады.Бір күнге созылған фестиваль барысында ұйымдастыру алқасы ұлттың өзегі саналатын рухани құндылықты дәріптей білген аналарға алғысын айтты.Ұлттық өнердің нағыз ұлық­таушысына айналған бірнеше әжелер ан­самблі ән айтып, ауылдың алты ауызын көрсетті. Жылдар бойы қазақы нақыштағы халық әндерін шырқап келе жатқан «Асыл ана» әжелер ансамблінің жетекшісі – Әсел Ибраева. Ал құрамында ауылдың алты ауызын шырқайтын Орынбасар Үмбетова, Манат Есенбаева, Роза Төлепова, Бисенкүл Маха­нова, Қалмақгүл Үсенова, Гүлжаһан Ибрае­­ва, Патыма Қошқарова, Дана Омарова, &nbsp;Ләззат Есенаманова, Серіккүл Бау­бекова, Назнуш Абибуллаева, Айжамал Дәрменова бар.Ардақты аналар 10 ұжымның ішінен жүлделі ІІ орынды жеңіп алды. Жүлдегер­лерге арнайы диплом мен бағалы сыйлық тапсырылды.Өз кезегінде фестиваль аясында аналар форумы өткізіліп, әйелдердің гендерлік саясаттағы орны, әлеуметтік жағынан қам­тылуы, олардың белсенділігін арттыру жө­нінде мәселелер қозғалды. «Асыл ана» әже­лер ансамблінің мүшесі, еңбек ардагері Роза Төлепова сөз сөйлеп, қыз-келіншектерге өсиет-өнегесін жеткізді.<blockquote>– Біздің қоғамда аналардың алатын орны ерекше. Ардақты жандар отбасының ұйытқысы болып, ұрпағына тәлім-тәрбиесін беруде. Қашанда &nbsp;айналасын ізгілік нұрына малшындырып, мейірім-шуағына бөлейтін асыл аналарға құрметіміз ерекше. Қазіргі &nbsp;уа­қыт­та салиқалы болмысынан таймайтын менің замандастарым қыз-келіншектерге өне­сін үйретуден жалықпайды. Жастарға &nbsp; қай кез­де де, отбасы құндылықтарын ұғын­­ды­руы­мыз керекпіз, – деді ардақты ана.</blockquote>&nbsp;&nbsp;&nbsp;

«Асыл ана» әжелер ансамблі облыстық фестивальдің жүлдегерлері

<a href="https://kyzylorda-news.kz/">Kyzylorda-news.kz.</a> Биыл көктемде Қазақстандағы киіктердің жалпы саны 1 млн 318 мыңға жетті. Бұның үштен екісі, яғни 800 мыңнан аса киік Еділ мен Жайық арасын мекендейді екен. Ақбөкендерден «шаршаған» жұрттың дені де – осы өңірден. Батыс Қазақстан облысының фермерлері былтырдан бері байбалам салып, киіктердің егістік пен шабындық жерлерін таптап жатқанын айтып жиі шағымданды. Ал, біздің ауданда ақбөкен мен киік құмда бар. Бірақ, өте аз. Сол себекті арнайы акция аясында үнемі қадағалау шараларын жүргізіп отырады.Ал, аталған жағдай аяқсыз қалмай, оны шешудің түрлі жолдары қарастырылып, жан-жақты талқыланды. Соның ішінде оңтайлы жолы көбіне киіктің санын атып азайтып, мәселені реттеуге боладыға саяды. Мұндай шешім биологиялық негіздеме нәтижесінде қабылданған екен. Бұл туралы 29 маусымда Экология, геология және табиғи ресурстар министрі Серікқали Брекешевтің Парламент Мәжілісінде БАҚ өкілдеріне айтқанынан кейін ел іші дүрлігіп кетті.Себебі, көп емес, жай ғана табиғат заңдылығын сақтап, дала мекендеушілерін ұрпақтан-ұрпаққа мирас етіп қалдыру. Шыны керек, егер атуға толық рұқсат беріп, бұл мәселе тендер арқылы жүзеге асса онда соңы не болатыны бәрімізге аян. Ал, 80 мың киікті құрбандыққа шалдық дейік, оны санап, есеп-қисабын шығаратынына халық сенбейді, сенгісі деп келмейді. Дұрысы, табиғи тепе-теңдікті реттеудің басқа жолын іздеген дұрыс. Өйткені адамның араласуымен тепе-теңдік заңдылықтарын реттеу мүмкін емес. Мақаланы мысалмен жүйелейік. Әріптесіміз, журналист Нұрлат Байгенже бір жазбасында былай деп жазады.«Алматы қаласында өткен Еуразиялық медиа форумға бір қатысқанымда News-Decoder білім беру сервисінің негізін қалаушы Нельсон Грейвстің (Франция) «Экологиялық журналистика» тақырыбындағы дәрісі қызықтырды» дейді ол.Ол АҚШ-тағы бір паркке (атауы есте қалмапты) бұғылар жіберілгенін, олардың ауа райы жайлы, шөбі шүйгін арнайы аймақта бірнеше жылда тез көбейгенін айтты.2010 жылы 32 010 басқа жетіпті. Бұғы санының күрт артуы табиғи тепе-теңдік заңдылығын бұзады. Қалай? Бұған бұғының қандай қатысы бар? Тағы басқа осы сынды сұрақтар туындайтыны анық.мСебебі, парк бақа-шаян, құрт-құмырсқа және сан түрлі құстарымен ерекшеленеді екен. Бірақ, түз жануарының күрт көбейу салдарынан шөптің кейбір түрлері жойылып, өзеннің су тартылады. Бұл жәндіктерге де әсер етеді. Құстар өздеріне қажетті қорек түрлері азайғандықтан басқа жақтарға кете бастайды. Содан америкалық ғалымдар арасында ұлттық парктегі бұғыларды атып, санын азайтуды ұсынады. Бұған келіспейтін екінші тарап өз ұсынысын алға тартады. Не керек, ұзаққа созылған айтыс-тартыстан кейін паркке қасқыр жіберіледі. Түз тағысы парктегі ақсақ-тоқсақ, кәрілерін жеп, аз уақытта бұғының санын азайтады. Соның нәтижесінде өзеннің деңгейі қалпына келіп, бақа-шаян мен құстар да келеді. Құстар мен жәндіктердің келуімен шөптердің көп түрі қайта шыға бастайды.Міне, өркениетті қоғамда табиғи тепе-теңдік осылай реттеледі. 80 мың киікті атамыз деп популяциясын жойып жіберсек, жауапкершілікті мойнына алатын тұлға бар ма? Қысқасы, киіктің санын табиғаттың өзі реттеуі керек… Ол да дұрыс, дегенмен істің насырға шаппай тұрғаны елдің сабырлығында. Ауданға оралайық. Жалпы Жаңақорған ауданы аумағында да бұл жануарлар кездеседі. Олар көбіне құмды жерлерде өмір сүреді. Олардың нақты саны белгісіз.<blockquote>«Негізінен бізде ақбөекенге қарағанда қарақұйрық көп кездеседі. Оларды да атуға заңмен тыйым салынған. Киіктер қазір мемлекеттің қатаң бақылауында. Жыл сайын «Киік» акциясы аясында рейдтік шаралар ұйымдастырылады. Белгіленген режимде, кейде одан тыс уақытта тиісті органдармен құмға жол жүріп, жануарлардың бағыт-бағдарын, олардың қауіпсіздігін бақылап тұрамыз. Жергілікті тұрғындар арасында үгіт-насихат жұмыстары жүргізіліп, сирек кездесетін және жойылып бара жатқан аңдарды браконьерлерден қорғау бойыша аудандық полиция бөлімінің жергілікті полиция қызмет бөлімшесінің табиғатты қорғау полиция тобының инспекторы және «Охотозоопром ӨБ» РМҚК-нің жедел тобымен жиі жұмыс жасаймыз», – деді орман және жануарлар дүниесін қорғау жөніндегі мемлекеттік мекемесі директорының орынбасары Ермұхамед Баязитов.</blockquote>Ақбөкендер негізінен мамыр айында төлдейді. Сол мезетте бақылау күшейеді, сосын тамыз айының соңынан бастап, қыс мезгіліне дейін қатаң қорғалады, – дейді ол.– Жалпы ақбөкендердің басына қаншама зобалаң туғанмен, миллиондаған жылдар бойы тұқымын сақтап қала алды. Осының өзі ақбөкендердің өмірге өте бейімділігін, өсімталдығын аңғартады.– Оларды заңсыз атып алғандарға қандай жаза бар?– Қазіргі таңда, қолданыстағы заң талаптарына өзгерістер енгізіліп, заңсыз аңшылықпен айналысу немесе тасымалдау, сақтау, сатып алумен айналысатын тұлғаларға қатысты ҚР Қылмыстық Кодексінің 337 және 339 бабына сәйкес, аңшылықпен айналысу құқығынан 5 жылға дейінгі мерзімге айы¬рады. Әрі мүлкі тәркіленіп, 3000 ай¬лық есептік көрсеткішке дейінгі мөлшер-де айыппұл салуға немесе сол мөлшер¬де түзету жұмыстарына жіберіледі. Ең қаталы, 3 жылдан 12 жылға дейінгі мерзімге бас бостандығынан шектеуге немесе сол мерзімге бас бостандығынан айыру жазалары көзделген.Бір бас ақбөкен аңының серкесі үшін табиғатқа келген залалды өтеу үшін 6 млн 563 мың 250 теңге, аналығы мен төліне 4 млн 594 мың 275 теңге айыппұл төлейді. Сонымен қатар, сотты болған азаматтардың қылмыстық әрекеттер объектісі, қылмыс жасау қаруы, пайдаланылған көлік құралдары тәркіленеді.Аудан тарихына бір сәт үңілсек, аға буынның айтуынша Жаңақорғанда 1993-1995 жылдары батыстық ағайынның басындағы әурешілік бізде де болған екен. Киіктер егіннің басы былай тұрсын, қораның қасында тұратын дейді. Бұл уақытша құбылыс, өйткені, олар түз мекендеушілері болған соң көшіп отырады. Құм мен киікті неге егіз санайды. Өйткені ақбөкендер құмды мекендейді, сондықтан олар да жиі көшіп отырады. Бірақ, Оралдағы ахуал күрделі екен. Жақында ғана Оралға арнайы барып, болып жатқан жайтты көзбен көріп қайттым. Рас, киіктер өрісте қоймен жайылып, ауылдан ары кетсе 10 шақырым жерде топ-тобымен, үйір-үйірімен адам баласынан үрікпей өмір сүруде. Ал, ауылдағы ағайын бұл көрініске көзі үйреніп қалғандай мән бермей өтіп кетеді. Қалай десек те, бұл өте күрделі процес, барлығын уақыт көрсетеді, – деді Ермұхамед.Иә, жасыратыны жоқ, киіктің адал еті, қымбат бағаланатын мүйізі – бизнес көзі. Бір жылдары киіктің мүйізі сұранысқа қатты ие болып, шетелге өткізіп пайда тапқандар аз болған жоқ. Естуімізше, құрамынан түрлі дәрі-дәрмек жасайды. Ал қазір ауланған киіктің еті, мүйізі және терісі қайда кететіні жұмбақ, сондықтан түрлі қиял ойға келеді. Құрамында майы, холестерині аз, жеңіл әрі адал болғандықтан етін ас ретінде тұтынуға болады, мүйізі бағалы бұйым, демек киікті өсіріп, саны көбейген соң белгілі шектік санын сақтай отырып, өнімін мемлекеттік қажеттілік ретінде пайдалануға не кедергі? Мысалы, етін өңдеп халық тұтынуына ұсынып, мүйізінен дәрі жасау отандастарымыздың қолынан келмей ме, әлде оған еш қажеттілік жоқ па? Киіктерді атуға шешім шығару ақбөкендерге деген аяусыздыққа, оңай олжаға құнығуға, көңіл көтеріп желігуден туған жапа тармағай жабайы атуға жол ашу болып жүрмей ме?!Түйінін айтқанда, киіктің бізге киесі ме, әлде кесірі тие ме, соны зерделейік

Жаңақорған ауданында «киік» акциясы өтті

<a href="https://kyzylorda-news.kz/">Kyzylorda-news.kz.</a> Жаңақорған &nbsp;ауданында әлемдік рейтингте көш бастаған «UFC» додасындасының іргетасы қалана бастады. Келінтөбелік Нұрсұлтан Бекзілдаев есімді жас жолға қойды.Жаңақорғанда Келінтөбе деген ауыл бар, шаруашылық құрылымдары мен гандбол спортынан озып келеді. Қол добынан аядай ауылдан шыққан арулардың дені аймақ абыройын қорғап жүрсе, екі-үш қыз ұлттық құрама сапында. Міне, осындай спорты биік ауылдан енді ережесізжекпе жектен ел чемпиондары шығатын болады.– 2020 жылы ауылға арнайы келіп, шәкірт тәрбиелеуде мақсат тұттым. Негізі бұл ісіме бастамашыл болған Әбдісаттар Садықов бапкер болатын. Қазір греплинг, қоянқолтық ұрыс, самбо мен дзюдодан балалар тәрбиелеудемін. Әзірге турнирлерге оқушылар қоян-қолтық ұрыс пен самбодан қатысып келеді. Бүгінде 30 оқушым бар. Барлығы Келінтөбенің тумалары, бұйырса №8 спорт мектебіне тіркеліп, штаттық жүйеде жұмыс жасайтын болсам өзге ауылдардан да шәкірт іздейтін боламын.– ММА, Греплинг, панкратион, яғни ережесіз жекпе-жек дегенді естіген ата-аналар балаларын жіберуге қарсы болмай ма?– Бұл балалар бірден төбелеске тартылып, жекпе-жекке араласып кете алмайды. Біріншіден жасы жетпейді, оның үстіне турнирлерге тек жоғарыда айтқандай қоян-қолтық ұрыстарға бара алады. Спорттың қай түрінен болмасын өзіндік ережесі болады, сондықтан барлығын алдынала ата-аналарға түсіндіреміз. Қазір дамыған заман, әрі спорттың әлеуеті артып тұр. Шыны керек, елдің бір еңсесін көтеретін осы спорт қой, сондықтан бұл спортқа да көңіл бөліне бастады. Барлығына уақыт керек. Негізінен мен 2020 жылға дейін де ауылда жастарды жаттықтырдым. Мен дайындаған сол жастар қазір Алматы қаласында жүр.– Сіздің мектепке қабылдану үшін балалар жасына қарай бөліне ма?– Мектеп жасынан бастап қабылдай береміз, яғни 7 жасынан бастап қатысуға мүмкіндік бар. Қазір демалыстамыз, қыркүйектен бастап жаттығуды бастаймыз. Біздің клубтың аты «Олжас» деп аталады. Биылғы жетістігіміздің бірі Әлия Ысқақова есімді шәкіртім облыста қоян-қолтық ұрыстан чемпион атанды. Одан бөлек жасөспірімдер самбо мен дзюдо турнирлерінде олжалы оралып жүр.Жалпы, бұл спорт дүйім қазақ жұртына жақсы таныс. Дегенмен, біздің ауданда арнайы спорт түріне әлі ене қоймады. Ауылдағы жалынды жастар Алматы шаһарына барып дайындалып, жарыстарда төбе көрсетіп келеді. Нұрсұлтан да осыдан оншақты жыл бұрын арман қуалап Алматыға барып, «ММА» турниріне қатысуды мақсат тұтты. Жаттығу залдарын жағалап, демеушілік іздейді. Тамшы тер, еңбектің арқасында өзі қалаған «ММА» турниріне тап болады.«Алмас қырандары» деген клубқа келіп қосылдым. Ел және халықаралық турнирлерде бақ сынап, жеңісті жолым басталды. Көбіне қырғыз оғландарымен кездесіп, мықтылығымды дәлелдеп жүрдім. Ауылға келсем де жаттығудан қол үзбедім, өйткені, шақырту келсе кез келген турнирлерге, рейтингтік жарыстарға баруға әзірмін. Ауылға екі себеппен келдім, ең алдымен, отбасылық жағдайға байланысты шаңырақта болуым керек болса, екіншіден, өзім жете алмаған, өзім бағындыра алмаған биіктерді шәкірттерім жетсін деген мақсатта оқушы тәрбиелеуді мақсат тұттым», – деді чемпион.Иә, бұл спортты естігенде бұрындары көбісі үрки қарайтын еді. Бірақ, қазір қазақ қоғамының да қызығушылығы артты. Жауынгерлік өнер біздің қанымызда бабадан бері бар, әу бастан батырдың ұрпағы болған ұлттың жекпе-жектен жеңілуі, бұл спорттан тайсалуы дұрыс емес. Сондықтан, Нұрсұлтан сынды жастар жауынгерлік спорттың рухын көтеріп, елде дамуына үлес қосып келеді. Арманын ауылдан бастаған азаматтың артынан ерген сайыпқырандары ауданның ғана емес, өңірдің, жалпы алаш жұртының айбынын асқақтатар Шавкат, Жалғас, Дамир сынды чемпион болады деп сенейік. Алға, Нұрсұлтан!

Ережесіз жекпе-жек Жаңақорғанда

Kyzylorda-news.kz. Ұлыстың ұлы күнін атап өту аясында облыс әкімі Нұрлыбек Нәлібаев ел ағаларымен, белсенді жастармен бірге жаңадан ашылған «Достық» аллеясы жанындағы «Наурыз жаңару» экологиялық акциясына қатысты.Аймақ басшысы &nbsp;Жаңа жыл толайым табыстармен басталғанын айтты. Ең бастысы, өңіріміздің өзегі - &nbsp;Сырдарияға жоғарыдан мол су түсті. Кіші Арал суға толып, халық молшылықтың берекесіне қуанды.<blockquote>«Мемлекет басшысы «Бірге: Таза Қазақстан» экологиялық акциясын жүйелі түрде өткізуге тапсырма берген. Соған сәйкес, жыл сайын облыс аумағында наурыз айының алғашқы онкүндігінен бастап тазалық, көркейту-көгалдандыру, абаттандыру жұмыстары жүргізіледі. Халқымызда «Мың шыбық шаншып өсірсең, халқыңа орман &nbsp;салғаның. Халқыңа орман салғаның, өзіңе қорған салғаның» &nbsp;деген дана сөз бар. Ел Президенті Қасым-Жомарт Кемелұлы өз Жолдауында «бес жыл ішінде орман алқабында 2 миллиард, елді мекендерде 15 миллион ағаш отырғызу қажет» - деп, экологиялық ахуалды жақсартуға басымдық берген болатын. Өткен жылы облыс аумағында 160 мың түп ағаш отырғызылса, биыл 220 мың түп ағаш егуді жоспарлаудамыз», - деді Нұрлыбек Машбекұлы.</blockquote>Іс-шара барысында облыс әкімі жуырда Сырдария өзеніндегі мол судың өңір аумағынан қауіпсіз өтуіне белсенді атсалысқан жауапты мекеме қызметкерлеріне алғыс айтып, марапаттады. Еске салсақ, биылдан бастап Сыр өңірінде экологиялық шараларға, көркейту көгалдандыру, абаттандыру жұмыстарына белсенді араласқан &nbsp;"Үздік аудан орталықтары", "Үздік ауылдар" және "Үздік мөлтек аудандар" конкурс арқылы анықталады. Аталған номинацияларға ие болған &nbsp;жеңімпаздарға арнайы көліктер мен түрлі &nbsp;құрал-жабдықтар табысталады.Биыл Ұлыстың ұлы күнін атап өту аясында Сыр өңірінде 300-ге жуық мәдени-көпшілік іс-шара ұйымдастырылды. Бейсенбі күні аймақ басшысы әуежайдың жаңа терминалының іргетасын қалау рәсіміне қатысып, апатты тұрғын үй иелеріне жаңа пәтер кілттерін табыстады. Күні кеше орталық «Ақмешіт-Сырдария» мешітінде «Наурыз шапағаты» қайырымдылық науқанында аз қамтылған отбасыларға азық-түлік жинақтары таратылды. Ал бүгін облыс орталығы мен барлық аудандарда мерекелік ауыл шаруашылығы өнімдері жәрмеңкесі өткізілді.<img src="https://knadmin.beoblood.kz/uploads/FB_IMG_1679117929420_b7bdf5ab36.jpg" alt="FB_IMG_1679117929420.jpg"><img src="https://knadmin.beoblood.kz/uploads/FB_IMG_1679117931944_7b3bc0c9cf.jpg" alt="FB_IMG_1679117931944.jpg"><img src="https://knadmin.beoblood.kz/uploads/FB_IMG_1679117934461_1b3642c892.jpg" alt="FB_IMG_1679117934461.jpg"><img src="https://knadmin.beoblood.kz/uploads/FB_IMG_1679117926338_6f2bc84e1f.jpg" alt="FB_IMG_1679117926338.jpg"><img src="https://knadmin.beoblood.kz/uploads/FB_IMG_1679117937808_fa1323e28d.jpg" alt="FB_IMG_1679117937808.jpg"><img src="https://knadmin.beoblood.kz/uploads/FB_IMG_1679117945326_6c279b6714.jpg" alt="FB_IMG_1679117945326.jpg">

Қызылордада «Наурыз жаңару» экологиялық акциясы өтті

Kyzylorda-news.kz. &nbsp;Арал ауданының әкімі Серік Сермағамбетов Арал қаласы тұрғындарымен кездесуде білім саласына ерекше тоқталды.&nbsp;<blockquote>«Өткен жылы Арал &nbsp;қаласында №71 мектеп-интернаты пайдалануға &nbsp;беріліп, апатты &nbsp;жағдайдағы Тоқабай &nbsp;елді &nbsp;мекеніндегі №248 &nbsp;орта &nbsp;мектептің құрылысы облыс әкімінің қолдауымен демеушілер есебінен салынуда. Сондай-ақ, былтыр &nbsp;5 балабақша пайдалануға берілді.&nbsp;</blockquote><blockquote>2025 жылға дейін аудан бойынша 12 мектеп салынса, оның 4-еуі «Жайлы мектеп» бағдарламасы аясында жүзеге асады. Бұған қоса алдағы 2 жылда 4 орта мектепке &nbsp;күрделі жөндеу жұмыстары жүргізілетін &nbsp;болады»,- деді С. Сермағамбетов.</blockquote>Арал қаласы тұрғындарымен кездесуде аудан әкімі жыл басы жақсы жаңалықпен басталғандығын айтты. Темір жол үстінен аспалы көпір салу үшін республикалық бюджеттен қаржы қаралып, құрылыс жұмыстары жақын күндері басталатындығын жеткізді.Қала тұрғындарымен есепті кездесуде аудан әкімі халық көкейіндегі сұрақтарға жауап беріп, ең алдымен елді мекендерде күнделікті тіршілік қамтамасыз ететін обьектілер мен әлеуметтік нысандардың кезектілігі бойынша салынатындығын жеткізді. &nbsp;Сондай-ақ тұрғындар көтерген мәселелерді саралап, қажетті шараларды атқару үшін тиісті бөлімдерге тапсырма жүктеді. Кездесуден соң аудан әкімі ауыл тұрғындарын жекелеген мәселелер бойынша қабылдады.<img src="https://knadmin.beoblood.kz/uploads/FB_IMG_1679117526716_805956f58a.jpg" alt="FB_IMG_1679117526716.jpg"><img src="https://knadmin.beoblood.kz/uploads/FB_IMG_1679117537952_65475e72b1.jpg" alt="FB_IMG_1679117537952.jpg"><img src="https://knadmin.beoblood.kz/uploads/FB_IMG_1679117531319_553e24a96c.jpg" alt="FB_IMG_1679117531319.jpg"><img src="https://knadmin.beoblood.kz/uploads/FB_IMG_1679117548748_9f67f614ae.jpg" alt="FB_IMG_1679117548748.jpg">

Серік Сермағамбетов Арал қаласының тұрғындарымен кездесті

Kyzylorda-news.kz. &nbsp;Бүгін Наурыз мерекесі қарсаңында облыс орталығында ауыл шаруашылығы өнімдерінің жәрмеңкесі өтуде. Облыс әкімі Нұрлыбек Нәлібаев сауда орындарын аралап, тұрғындармен пікірлесті.Жәрмеңке Қызылорда қаласының халық көп шоғырланған 3 аумағында ұйымдастырылды. Атап айтқанда, сауда-саттық қатарлары «Шанхай» мөлтек ауданында Жанқожа батыр мен Құлтекенов көшелерінің қиылысында, «Мерей» мөлтек ауданында Журба көшесі мен Саламатов көшелерінің қиылысында және Астана даңғылының бойында Жеңіс көшесіне дейін орналасты.Қала тауарөндірушілері мен «Байқоңыр» ӘКК» АҚ-ның кәсіпкерлері 90 жүк көлігіне тиелген 150 тоннаға жуық тауарды тұтынушыларға ұсынды. Оның ішінде 15 тонна күріш, 30 тоннадан астам ет пен балық өнімдері, &nbsp;20 тонна картоп, 13 тонна сәбіз, 20 тонна пияз, 30 тоннаға жуық көкөніс пен жеміс, 1 тонна күнбағыс майы, 7200 дана жұмыртқа, 6 тонна кондитер өнімдері, 4 тонна сүт өнімдері, &nbsp;3 тонна ас тұзы және тұрмыстық заттар бар.Мерекелік жәрмеңкеде жұртшылық &nbsp;наурыз көжеден дәм татты. Сонымен қатар, Ұлыстың ұлы күні қарсаңында тұрғындардың көңіл-күйін көтеру үшін концерттік бағдарлама ұйымдастырылды.Бұдан бөлек, жәрмеңкеде аймақта өндірілетін отандық өнімдерді қолдау үшін арнайы көрме ұйымдастырылды. Атап айтқанда, Сыр маржаны – ақ күріш, сүт өнімдері, жемістер мен көкөністер, кондитерлік өнімдер ұсынылды.Мұндай жәрмеңкелер облыс орталығынан бөлек, барлық аудандарда да өтуде.Айта кетейік, жыл басынан бері Қызылорда облысында 40 жәрмеңке өткізіліп, азық-түлік өнімдері тұрғындарға нарықтағыдан төмен бағамен сатылды.Еске салсақ, биыл Ұлыстың ұлы күнін атап өту аясында Сыр өңірінде 300-ге жуық мәдени-көпшілік іс-шара ұйымдастырылды. Бейсенбі күні аймақ басшысы әуежайдың жаңа терминалының іргетасын қалау рәсіміне қатысып, апатты тұрғын үй иелеріне жаңа пәтер кілттерін табыстады. Ал күні кеше орталық «Ақмешіт-Сырдария» мешітінде «Наурыз шапағаты» қайырымдылық науқаны аясында аз қамтылған отбасыларға азық-түлік жинақтары таратылды.<img src="https://knadmin.beoblood.kz/uploads/FB_IMG_1679117000731_2060b305be.jpg" alt="FB_IMG_1679117000731.jpg"><img src="https://knadmin.beoblood.kz/uploads/FB_IMG_1679117013720_2c74c518ff.jpg" alt="FB_IMG_1679117013720.jpg"><img src="https://knadmin.beoblood.kz/uploads/FB_IMG_1679117018399_88a3930a99.jpg" alt="FB_IMG_1679117018399.jpg"><img src="https://knadmin.beoblood.kz/uploads/FB_IMG_1679117005908_5ea299b2ca.jpg" alt="FB_IMG_1679117005908.jpg"><img src="https://knadmin.beoblood.kz/uploads/FB_IMG_1679117009831_3ec0ab561b.jpg" alt="FB_IMG_1679117009831.jpg">

Наурыз мерекесі қарсаңында облыс орталығында ауыл шаруашылығы өнімдерінің жәрмеңкесі өтуде

Kyzylorda-news.kz. 23 наурызда қасиетті Рамазан айы басталады. Қасиетті айда әлем мұсылмандары Ислам дініндегі бес парыздың бірі – Ораза ұстап, ауыз бекітуге ниет етеді. Осыған орай ҚазАқпарат тілшісіне Алматы қалалық N11 емхананың дәрігері Әсел Құдайбергенова Рамазан айында денсаулыққа зиян тигізбей, дұрыс тамақтанудың 9 жолын айтып берді.«Рамазан айында ораза тұтқан әрбір мұсылман тән мен жан саулығын ойлайды. Бірақ, көпшілігі сәресі мен ауызашар мәзіріндегі ерекшеліктен хабарсыз. Айлардың сұлтанында ораза ұстаған жандар денсаулыққа зиян тигізбейтіндей дұрыс тамақтану жолдарын білген дұрыс. Ендеше оразада дұрыс тамақтанудың тоғыз әдісін білген жөн», - дейді дәрігер.Қасиетті айда дұрыс тамақтанудың дәрігер айтқан 9 кеңесіАуыз ашуды құрмамен бастаған жөнРамазан айында ауызашар мен сәресіге ас дайындау кезінде жаңа піскен өнімдерді пайдалану қажет. Мәселен, жеміс-жидек, көкөніс таңдаған кезде осыны ескеріңіз. Құрма мен суды ауыз ашқанда пайдаланудың бір пайдасы - ас ішер алдында адамға өзінің ағзасында тамаққа деген қосымша қажеттіліктің бар не жоғын анықтауына мүмкіндік туады.Суды көбірек ішу керекАуыз ашқан соң суды көбірек ішіңіз. Алайда, суды тамақтанып болған соң ішкен абзал. Тамақты да асықпай, аз-аздан жеңіз, қарным ашады деп тойып алмау керек.Тез шөлдететін тағамдардан бас тартқан жөнРамазан айында ас мәзіріңізді уақытша өзгертуге тура келеді. Күнделікті қолданатын тұзды өнімдерден, тұздалған қияр, қызанақ, тұзды салаттар мен балықтан бас тартыңыз. Оның орнын жеміс-жидектермен, сумен көбірек толықтырыңыз.Асықпай тамақтану қажетКүні бойы тамақтанудан бас тартқан адам ішкі күйзеліске түседі. Бұл әсіресе, оразаны алғаш ұстаған жандар үшін маңызды. Ауыз ашқан кезде құрмамен, сумен немесе сорпа, ет қосылған көкөніс тағамы сияқты жеңіл тағамдарды ішіп, жеу керек.Тәттіден бас тарту керекАс мәзіріңізден тәттілерді (кондитерлік өнімдер, торт, тәтті бәліштер) алып тастаңыз. Себебі, бұлар ағзаңызды әлсіретіп, қарныңызды тез аштырады. Сондай-ақ, Рамазан айында тәттілерді көбірек қолдану қан қысымыңызды көтереді. Тек ауызашардан соң екі-үш сағат өткен соң тәттілердің орнына – құрма, кептірілген өрік, мейіз, жаңғақ қолданыңыз.Кофе ішпеген дұрысЕгер сіз таңыңызды жұмыспен емес, кофемен бастар болсаңыз, Рамазан айында кофені қоя тұрыңыз. Өйткені, кофе ағзаға көптеген зиянды әсерлерін тигізуі мүмкін.Тамақтану тәртібіне мұқият болу қажетӘдетте біз күніне үш рет тамақтанамыз. Рамазан айында да осы әдіспен жүріңіз. Ол үшін ауызашардың бірінші бөлігінде – ыстық тағамдарды, екінші бөлігінде майсыз тағамдар мен балықты, ал сәресіде – жеміс-жидектерді қолданыңыз. Бұл әдіс сіздің денсаулығыңыз үшін өте маңызды.Пайдалы ас ішу керекШайды көп ішетін болсаңыз, бұл айда жалбыз шайы мен көк шайды көбірек ішіңіз. Сондай-ақ, сүт өнімдерін (сүт, айран, қатық, ірімшік) көбірек қолданыңыз. Сүт, айран, ірімшік, құрт секілді азықтар сапалы протеин, кальций, фосфор, мырыш секілді минералдар мен В6, В12 секілді маңызды дəрумендерге бай.Сәресіге сергек болып ояну қажетОл үшін жатар алдында майлы тағамдар қолданбаңыз. Оның орнын жеміс-жидектермен (жүзім, алма, алмұрт, құлпынай) ауыстырыңыз. Аты аталған жемістер мидың қалыпты жұмыс жасауына және жақсы тынығуыңызға әсер етеді. Сәресі уақытында да күндіз қарным ашады деп тоя тамақтанбаңыз.

Ораза ұстағандар қалай дұрыс тамақтануы керек

Kyzylorda-news.kz. Асқар Тоқмағамбетов атындағы қалалық мәдениет үйінде облыстық білім бақсармасының ұйымдастыруымен «Наурыз нұры» салтанатты шарасы өтті.Білім саласының ардагерлері, басқармаға қарасты мекеме басшылары және ұстаздар қауымы қатысқан мерекелік жиында басқарма басшысы Мейрамбек Шермағанбет Әз-Наурыз мейрамымен құттықтап, ізгі ниетін білдірді.<blockquote>Баршаңызды көктемнің ең тамаша мерекесімен шын жүректен құттықтаймын! Наурыз ықылым заманнан бері ырыс пен ынтымақтың, татулық пен тазалықтың, бірлік пен кісіліктің мейрамы болып есептеледі. Табиғат иіген, көк тас жібіген Наурызда мейірім шаттыққа ұласып, барша жұрт ырыздыққа кенеледі. Бұл күні барша жұрт ақ дастархан жайып, ренішті жандар қайта табысады. Сол үшін түсіністікті ту етіп, елді бірлік пен ынтымаққа шақыратын Наурыз мерекесінің еліміз үшін маңызы ерекше. Өткен жыл көлемінде ауқымды жұмыстар атқарылды. Алда жүзеге асырылатын жобалар бұдан да ауқымды. Біз бұл жұмыстарды бірлесіп жүзеге асыратын боламыз. Бұл жолда Сіздердің еңбектеріңіздің ерекше екенін атап өткім келеді» - деді басқарма басшысы.</blockquote>Салтанатты шарада аймақтың білім саласын дамытуға ерекше үлесін қосып жүрген бірқатар педагог басқарма басшысының «Құрмет грамотасымен» және «Алғыс хатымен» марапатталды.Мейрамбек Шермағанбет ұстаздардың білім берудегі ерен еңбегін сөз етіп, алғысын білдірді. Сондай-ақ, атқарылған жұмыстарды баяндап, жүйелі жоспарларымен бөлісті.Мерекелік шарада ұлағатты ұстаздар концерттік бағдарламаны тамашалады.<img src="https://knadmin.beoblood.kz/uploads/FB_IMG_1679115935488_bbf8adbde1.jpg" alt="FB_IMG_1679115935488.jpg"><img src="https://knadmin.beoblood.kz/uploads/FB_IMG_1679115925311_6754c846e4.jpg" alt="FB_IMG_1679115925311.jpg"><img src="https://knadmin.beoblood.kz/uploads/FB_IMG_1679115930611_5a4c9426ff.jpg" alt="FB_IMG_1679115930611.jpg">

Қазақстан және Қызылорда облысының жаңалықтары