<a href="https://kyzylorda-news.kz/">Kyzylorda-news.kz.</a>&nbsp;«Мал–баққанға бітеді» деген аталы сөз бар халқымызда. Қазір байқап қарайтын болсақ, көптеген жан береке малда екенін ұғынып келе жатқандай. Оның үстіне кәсіп қыламын, мал бағамын деуші жандарға мемлекет те көмегін аянып қалып жатқан жоқ. Түрлі несие ұйымдары арқылы қаржы берудің жеңіл әрі қолайлы тетіктерін қарастырып келеді. Міне, осы бағытқа бет бұрып, өзінің барлық ынта-ықыласымен мал бағуға кіріскен жандардың бірі – Зейнет Әжіғұлов. Әсте, адам баласына есім де тегін берілмесе керек-ті.Зейнет ағамыз жас кезінде бейнет көргенімен, бүгінде өз есіміне сай сол бейнеттің зейнетін көріп отырған жандар қатарынан. Сонау жас күнінде ел қатарлы механик, жүргізуші болып еңбек еткен кейіпкеріміз, сол бірқалыпты тірліктің келешегі баянды бола қоймасын сезінсе керек. Уақыт өте осы мал шаруашылығы бағытына бет бұра бастады. Алдымен, мал ұстайтын жайылымдық жердің шаруасын ретке келтірді. Өзінің ұстанған бағытынан таймаған ол 2011 жылы әупірімдеп мал алып, оны баға бастады. Бүгінде Зейнет ағамыздың төрт түлік малы сонау Жіңішкеқұм елді мекені жағындағы «Қаратүзген» жерін жайылым еткен. Кейіпкеріміз алғаш үкіметтен ауыл шаруашылығы бағытына қолдау білдірілген кездерде-ақ, шағын несие ұйымдары арқылы пайызы аз несиеге қол жеткізгендердің бірі. Нақты айтар болсақ, 2013 жылы «Арал ырысы» шағын несие ұйымы арқылы 3 млн. теңгедей несие рәсімдеп, оған түйе малын алған. Сол кездерден бастап өзінің адал еңбегінің жемісін татқан Зейнет ағамыз шаруа қожалықтың төрағасы ретінде және сол әулеттің отанасы Нұрсұлу да өздеріне қарасты қалыпты тірлікке сырттай бақылау жасап келеді. Екі адамды тұрақты жұмыспен қамтып та отыр. Балалары да адал еңбек жемісін беретініне сенімді.«Сапақазған» базы Әжіғұловтар әулетінің берекелі өңіріне айналғалы Зейнет ағамыздың ойынан қазақтың ақбас сиырын өсіріп, одан өнім алу мақсаты күні кешеге дейін бір шыққан емес. Мемлекет берген мүмкіндікті пайдаланып, сол бір қадамға бірден аяқ басқысы да келеді. Десе де, үкіметтің көмегіне иек артатын ол аз-кем ойланып, райынан қайтып қалатын. Міне, сол бір ұзаққа созылған ойдың іс жүзінде жүзеге асар сәтін де өткен жылы келтірді. Кәсіптің көзін тапқан жан тағы да сол аталған шағын несие ұйымы арқылы тәуекелге бел байлап, ет бағытындағы қазақтың ақбас сиырының басын ұлғайтпақ ниетпен жылжымайтын мүліктерін кепілге қойып, несие алды. Бұл жолғы несиенің жалпы көлемі алғашқыдан екі есе көп. Есесіне, бұл қожалықтың меншігінде бүгінде асыл тұқымды ақбас сиырлар бар. Соның арқасында Зейнет ағамыз осы жылы қазақтың ақбас асыл тұқымды бұқасын өзгеге сататын жағдайға жетіп отыр. Еліміздің беріп отырған осындай мүмкіндіктерін алға тартқан кейіпкеріміз Зейнет Қайыңбайұлы:<blockquote>–Қазіргі заманда жұмыс жасап, тұрмыс түзеймін деген жандарға мүмкіндіктер толып жатыр ғой. Мәселен, мен де бір кездері бір айлыққа күнім қараған қарапайым жұмысшы едім. Бүгінде жұмыс берушімін. Қазір шүкір. Осы төрт түліктің арқасында бала оқытып, оларды құтты орындарына қондырып жатырмын. Өзіне сенімді, қолға алған кәсібін одан әрі дөңгелетіп кете алатын жандарға «Арал ырысы» сынды шағын несие ұйымдарының берер көмегі мол болып отыр. Бүгінде сол аталған серіктестік 100-ден астам шаруаларға қажетті мөлшердегі қаражатын аздаған пайызбен беріп отыр. Біз елімізде мұндай мүмкіндіктердің барына дән ризамыз. Бастысы, ниет керек екен. Қазіргі уақытта екі балам да өз алдарына еңбек етіп, үкімет берген сол мүмкіндіктер арқылы өз алдарына мал бағып, тіршілік етпек. Ерінбей еңбек еткен жанға Алла несібесін молынан береді, – дейді.</blockquote>Иә, «Мал-жаның аман ба?» дейтін қазаққа мұнан асқан аталы сөз болмаса керек-ті. Міне, сондай тілекпен таң атырып, кеш батыратын Зейнет ағамыз үнемі мал-жанының амандығын бір Алладан тілеп отырады. Осы шаруаға бетбұрыс жасағалы, дастарқанынан да ақ үзілген емес.&nbsp;«Келінім түйе сауған құрлы сауғандай болмайсың, мардымды сүт шықпайды деген соң, өткен жылы Қарақалпақстаннан әр басы 700 мың теңге тұратын 3 бас сүтті аруана сатып әкелдім. Бүгінде олардың әрқайсысы күніне 5 литрден сүт береді» – дейді қожалық төрағасы. Шынайы еңбек әр кез адамды абыройға бөлері анық. Қай заманда болмасын береке малда. Мұны қазақ халқы ерте заманнан ұққан.

Арал ауданы: Төрт түлігі өріске толы қожалық 

<a href="https://kyzylorda-news.kz/">Kyzylorda-news.kz.</a>&nbsp; Өмірде бізге, яғни адамзатқа не жетіспейді? Бұл сұраққа жауап іздемеген саналы адам жоқ шығар. Адам өмірін зерттеумен айналысатын әлемдегі іргелі ғылыми орталықтар ХХІ ғасырдың басында адамзаттың өмірлік сұраныстарын материалдық қажеттілікпен байланыстырды. Кейін бұл тұжырым өзгерді. Тіпті жыл санап құбылды десек те болады. Құбылғаны соншалық «әлемді сұлулық құтқарады» дегендердің таяз ойы сезіммен ұштасып, адамдар арасындағы ақылға қонымсыз қарым-қатынастар қайғылы жағдайлармен аяқталды. Содан соң «әлем мейірімге мұқтаж» деген түсінік қалыптасты. Бұл түсініктің қалыптасуына адамның ойына кіріп-шықпайтын, үш ұйықтаса түсімізге енбейтін, естіп-білгенде сай-сүйегіміз сырқырап, төбе шашымыз тік тұратын жағдайлар себеп болды. Алайда, біз «сол мұқтаж мейірімді кім-кімге береді, қалай береді» дегенге тереңірек үңілмейміз. Үңілсек, адамзат баласы мейірімге мұқтаждықтан құтылар еді.Бұл тақырыпта мақала жазып, қолға қалам алуымызға оқушылар арасындағы топтық төбелестердің, әлімжеттіктің, үлкеннің кішіге «салық» салып, үстемдік құрғысы келетін заңға қайшы іс-әрекеттерінің көбейіп кетуі себеп болды. Бір қарағанда бұл бұрын да болған, қазір де болып жатқан құбылыс секілді. Бірақ қазіргі қарым-қатынас, заң үстемдік құрған демократиялы қоғам бұрын, бүгін деген көзқарастан арылатын кездің келгенін көрсетіп отыр. Бұған өмірден көп мысал келтіруге болады. Жақында облыс тұрғындарын дүр сілкіндіріп, әлеуметтік желіде қоғамдық резонанс туғызған Қазалыдағы жағдайдың өзі жетіп жатыр. Кеше көрші ауданда болған ауыр жағдай бүгін біздің ауданда болмасына кім кепіл? Әрине, ешкім кепілдік бере алмайды.<blockquote>Жерде құлап жатқан оқушының басынан тепкілеу, өлімші етіп сабау және бұл оқиғаны ешкімнен қорықпай, заңнан сескенбей, тәртіпке бағынбай бейнежазбаға түсіріп, тарату – нағыз жауыздың қолынан ғана келетін іс. Жауыз деп жай айтып отырмыз. Қатыгез, қанішер, бұзық, тіпті тәлім-тәрбиеден жұрдай тексіз деуге де болады. Ал осынау жағымсыз теңеулерге ие жастар бірімізге бауыр, бірімізге таныс, енді бірімізге жақын туыс болғаны қандай өкінішті. Олар өздеріне ғана емес, ата-аналарына, шыққан тектеріне кір келтіріп, ұят іс, кешірілмес қателік жасады. Оған заң алдында да, ар алдында да жауап берері анық. Қазақ мұндай арам ниетті, ойы бұзықтардың бетіне түкіріп, елден аластатып, көшіріп жіберген. Өйткені қателіктің кешірілетіні, кешірілмейтіні бар. Жүгенсіз, бір сөзбен айтқанда Құдайды ұмытқан жастардың бұл әрекеті ешқандай ақтауға келмейді, – аудандық мешіттің бас имамы Асхат Асқаров.</blockquote>Өмір туралы ойлана қалсақ, Конфуцийдің ой-пікірлері қызық әрі мағыналы екенін түсінеміз. Данышпан бір еңбегінде «мейірім мен махаббат жоқ жерде өмір сүрмеген абзал» деп жазыпты. Конфуцийдің әлгі пікіріндегі «өмір сүрмеген абзал» деген сөз ешкімді ол ортадан кетіп қалуға меңзеп тұрған жоқ. Керісінше, сол ортаны мейірімге қарық қылып, махаббатқа, шапағатқа толтыруға шақырып тұр. Өйткені, дәл осы тұжырымының соңында ұлы ойшыл өз ой-пікірін «мейірімді ортада өмір сүруге ұмтылу – өмірдегі ең үлкен ұмытылыс» деп аяқтайды. Бұдан біз мейірімді болуды өзімізден бастауымыз қажет екенін түсінеміз.Халқымыздың арғы-бергі тарихында мейірімділік, жанашырлық, қамқор-лық қасиеттерінің алатын орны ерекше екені белгілі. Ата-бабаларымыз сан ғасырдан бері ұстанған Ислам діні де бізді ең алдымен мейірімді болуға шақырады. Ал мейірімнің адам бойына сіңісті болуы отбасындағы тәлім-тәрбиеге, ата-ананың балаға көрсететін үлгі-өнегесіне тікелей байланысты.&nbsp;<blockquote>Баланың қателігіне бірінші кезекте ата-ана жауап беруі қажет. Бұл пікірге «кім баласына жаман болсын» дейді деп пікір айтушылар табылуы мүмкін. Әрине, ешкім «жаман бол» демейді. Бірақ көп ата-ана баласын бақылаусыз қалдырады, тәртібіне мән бермейді, олар үшін уақыт бөлмейді. Сосын бақылаусыз бала бассыздыққа барады. Толып, тасынады, өзгені басынады. Сөйтіп жүріп құқық бұзады, қылмысқа ұрынады. Оған өкінеді де. Бірақ бәрі кеш болады. Кеш болмауы үшін әр ата-ана баласының тәрбиесіне бүгіннен, тіпті дәл қазіргі сәттен бастап мән беруі керек, – дейді ардагер-ұстаз Сұлупан Шамшадинова.</blockquote>Хакім Абайдың «Адамзаттың бәрін сүй, бауырым деп» деген өлеңі бар. Қандай тамаша сөз, орнықты ой. Егер біз, адамзаттың бәрін сүйіп, бәріне мейіріммен, сүйіспеншілікпен, жанашырлықпен қарай алсақ, онда бүгініміз шуақты, ертеңіміз нұрлы болады. Шуақ пен нұр жанымызға жақсылық ұялату үшін өзіміз мейірімді болайық. Ал дөрекі сөз, ғайбат, өті¬рік, қатыгездік өмірімізді астан-кестен етеді. Сол үшін де жақсыдан үйреніп, жаманнан жиреніп, барынша көркем мінез танытуға тиістіміз. Баламыз көркем мінезді болуы үшін өзіміз көркем мінезді болуымыз қажет. Сонда ғана жастар арасындағы топтық төбелестер, әлімжеттік, үлкеннің кішіге «салық» салып, үстемдік құрғысы келетін заңға қайшы іс-әрекеттері азаяды. &nbsp;

Әлімжеттік және бопсалауға жол бермейік

<a href="https://kyzylorda-news.kz/">Kyzylorda-news.kz.</a>&nbsp; Тереңөзектік Әлия Бақытбекқызының тігіншілікпен айналысып жүр­геніне отыз жылдан асты.&nbsp;Тәжірибелі тігіншіге кент тұрғын­дарымен қатар аудан орталығына жақын орналасқан елді мекен тұрғындары арнайы іздеп келіп, тапсырыс беріп келеді.&nbsp;Тігіншінің қолынан шық­қан киім үлгілерін еліміздің танымал өнер жұлдыздары да киіп жүр. Әлия – сәнді көйлектер тігумен қатар, түрлі сән үлгілерін шығаратын керемет дизайнер.Әлия Бақытбекқызы бала кезінен қолөнерге жақын болып өсті. Әжесі Зәйпін де өз заманында неше түрлі киім тіккен екен. Ал анасы Қалдыгүл қызметте жүрсе де өзінен кейінгі же­ті сіңлісіне көйлекті өз қолымен тігіп беретін болған. Анасының айтуынша, Әлияның нағашы атасы марқұм Сейітмұрат Ембергеновтың анасы соғыс кезінде тылда еңбек еткен. Жауынгерлерге арнап көпәйке тігіп, майдан даласына жөнелтіп отырған. Сондықтан болар тігіншілік Әлия үшін жат өнер емес. Анасының жанында отырып, сабақтан бос уақытында киім тігіп, үйге қажетті көрпе-жастықты оюлап құрақ құраған. Он саусағынан өнер тамған қызының талабына анасы сүйсініп отырған. Кішкентай саусақтары иіліп, ине-жіпті икемге келтірген шебердің ісін көріп анасының қуанған сәті Әлия үшін күні кеше болғандай. Жоғары сыныпта оқып жүргенде інісіне алғаш рет көк түсті жейде тігіп беріп қуанғаны арада қанша уақыт өтсе де балалық шақтың естелігі ретінде ешқашан ұмытылмақ емес.Тігіншілікпен айналысуға Әлия Әбдіқалық мектеп бітірген жылы кірісті. Алдымен, аудан орталығындағы тұрмыс қажетін өтеу комбинатында тігіншілерге үйренуші болып жұмысқа орналасты. Алты ай бойы Әлия Асқарова, Құ­ралай Омарова есімді шеберлерден үйреніп, кәнігі тігінші атанды. Әлияның тігінге ғана емес, киім пішуге бейімі бар екендігі сол комбинатта жұмыс істеп жүрген кезден-ақ байқалады. Тапсырыс берушілерге неше түрлі киім үлгісін көрсетіп, пішіп, керемет көйлек тігетін. Кейін жұмыс істейтін мекемесі тарап кеткен соң, үй­де қол қусырып отырғанды жөн көрмей жан-жақтан ізденеді. Шымкент қаласындағы «Сымбат» ательесінде 4 ай бойы тәжірибеден өтіп, арнайы курс­ты бітіріп шығады.&nbsp;<blockquote>– Тігінші ретінде ұлттық нақыштағы киім ті­гуге қызығатынмын. Уақыт өте келе бұл қы­зығушылығым кәнігі шебер атануыма септігін тигізді. Күніге әдемі әрі сәнді бір ұлттық көй­лек тігуге барымды салатынмын. Тәжірибем то­­лысқан кезде өзімді одан әрі шыңдау үшін Қы­зылорда қаласындағы брэнд киімдер тігетін «Ақ­маду» этникалық стиль ательесіне жұмысқа орналастым. Ательеде киім пішуші әрі тігінші ретінде 3 жылдай жұмыс істедім. «Ақмаду» ательесі – Қазақстанның бірнеше қаласында өз орнын нықтаған, этникалық стильде киім тігетін үлкен ұжым. Онда қыз-келіншектерге, ерлерге арналған ұлттық киімдер, бас киімдер тігіледі. Бір күнде 14-17 сағатқа дейін жұмыс істедім. Дайын киімдер тойға жалға берілді, – дейді тігінші Әлия Бақытбекқызы.</blockquote>Ұлттық киім тігудің шебері Әлия бүгінгі күні этно-стиль өте танымал болғанын айтады. Мұндай үлгі қашанда сәннен қалған емес. Қайта жаңғырып, жанданып келеді. Оның тіккен ұлттық киімдерін бүгінде танымал өнер жұлдыздары Досхан Жолжақсынов пен жұ­байы Қаракөз ханым, айтыскер-ақын Айнұр Тұрсынбаева, термеші Айгүл Елшібаева киіп, үлкен сахнаға шыққаны шебер үшін еңбегінің жемісі.Иә, көз майын тауысып, «жеті рет өлшеп, бір рет кесіп» дегендей, қазақы нақыштағы киім тігу – нағыз өнер. Кез келген адамның қо­лынан келе бермейтін өнердің бұл түрі біздің елде жақсы дамығанмен, ауданда ұлттық киім тігетіндер көп емес. Сондықтан өнерін табыс көзіне айналдырып, кәсіпкерлікпен айналысу үшін Әлия жұмыссыз ретінде мемлекет тарапынан қолдауға ие болды.Қолөнер шебері осы күні қайтарымсыз несие алды.&nbsp;Кәсіпкерлікті қолдауға байланысты мемлекеттік&nbsp;бағ­дарлама арқылы қатысып, өзінің жаңа бизнес идеясын іске асыруға арналған мемлекеттік грантқа қол жеткізді. Әлия берілген қаржыға электр тоғымен жұмыс істейтін жаңа тігін машинасын сатып алды. Сонымен қатар, қажетті манекен, үтік, үстел – қол жеткізген қаражатқа келген дүниелер. Әлия жеке кәсіпкер ретінде тіркеліп, «Сыр сұлуы» атты тігін шеберханасын ашты.&nbsp;<blockquote>– Әзірге тігін шеберханам үйдің бір бөлме­сінде. Болашақта тағы да кә­сіп­керлікті қол­дау­ға бай­ланысты жеңіл­де­тіл­ген несиеге қол жет­­кіз­сем, шеберхананы ке­ңей­тіп, жұмысқа қыз-ке­лін­­шектерді алсам деген мақ­сатым бар. Ау­данда ұлттық киім­ге деген сұра­ныс жо­ға­ры. Ер адам­­­­­­дар­ға, әйел­ адам­дар­­ға ар­­­налған сән­ді кеу­­дешеге тапсы­рыс­­­тар көп. Барлы­ғына бірдей үлгеру үшін күніне 10 сағаттан артық жұмыс істеу керек, – дейді шебер Әлия Бақыт­бекқызы.</blockquote>Әлияның сүйікті ісімен айналысуына анасы Қалдыгүл апа бар жағдайын жасап отыр. Анасының еңбегі зор. Қашанда қызының кәсібін қолдауға дайын тұратын анасы тапсырыс келіп түскенде өзі де көмек қолын созады. Бесік жасауын, қыз жасауын тігуге, тапсырысты уақытылы дайындауға атсалысып, қол­ға­­быс етеді. Ал үйдегі ба­ла-ша­ғаның қамын келіні үлгер­теді. Әлия – бұл күнде 2 ұл, 1 қыздың анасы. Кәусар мен Інжудің сүйікті әжесі.Әлияның нағашы атасы кезінде: «Талабың да оңға басып келеді, Қолөнер ғой қыз балаға керегі, Шеберлікті шыңдай білсең, шырағым, Сарқылмастай қазына-кен береді» деп бата-тілек айтқан екен. Атасының сөзі шын мәнінде қабыл болды деген осы шығар.&nbsp;

Ұлттық киім тігудің шебері

<a href="https://kyzylorda-news.kz/">Kyzylorda-news.kz.</a> Қызылорда облысының психикалық денсаулық орталығына қарасты психиатриялық стационар ғимараты өткен ғасырдың 70-жылдары пайдалануға берілген. Сол уақыттан бері нысан әбден тозығы жеткен болатын. Шатыры мен кәріз жүйелері ескірген ғимарат науқастардың сапалы медициналық көмек алуына қолайсыздық тудыратын. Енді міне, бұл мәселе өз шешімін тапты.&nbsp;Қызылорда облысы әкімдігі мен облыстық денсаулық сақтау басқармасының қолдауымен, ғимараттың күрделі жөндеу жұмыстарына тиісті қаражат бөлінді. Бұл жұмыстың атқарылуына орталық басшылығы зор үлесін қосты. Табандылық танытып, құзырлы мекемелерге проблеманың өзектілігін жеткізе білді.Бүгінде күрделі жөндеу жұмыстары басталды. Құрылыс кезінде орталықтың шатыры, есік-терезелері, кәріз жүйелері, ғимараттың іші мен сырты және т.б. жаңартылатын болады. Заман талабына сай құрал-жабдықтар алынып, егу бөлмелері қайта жасақталады. Сонымен қатар, қосалқы ғимараттар да күрделі жөндеуден өтпек. Орталық айналасындағы қоршаулар ауыстырылып, аула ішін көгалдандыруға көңіл бөлінеді.<blockquote>«Жасыратыны жоқ, бұл күні орталық қызметкерлері ұзақ күтті. Қазір құрылысшылардың ыңғайлы жұмыс жасауына қолдау көрсетіп жатырмыз. Ұйымдастыру шараларын өзімнің қатаң қадағалауымда. Әрбір атқарылған жұмыстың сапасы тікелей бақылауымызда болады. Қазір науқастарды жедел жағдайда қабылдап жатырмыз. Науқастардың қолайлығы үшін тиісті жұмыстар атқарылуда», – деді орталық директоры Әділбай Медетбаев.</blockquote>

Қызылордадағы психикалық денсаулық орталығы күрделі жөндеуден өтеді

<a href="https://kyzylorda-news.kz/">Kyzylorda-news.kz.</a> Бүгін Сырдария ауданында облыс әкімі Нұрлыбек Нәлібаевтың төрағалығымен өткен актив отырысында аудан әкімі таныстырылды.Облыс әкімінің өкімімен Қазақстан Республикасы Президенті Әкімшілігі және Сырдария аудандық мәслихатының келісімдері бойынша Сырдария ауданының әкімі лауазымына Сәрменбаев Берік Әбдіғаппарұлы тағайындалды.<blockquote>«Берік Әбдіғаппарұлы аудан жұртына етене таныс. Ауданның әлеуметтік-экономикалық, қоғамдық-саяси ахуалын жетік білетін, мемлекеттік қызметтің барлық сатысынан өткен, әлеуеті жоғары кадр. Түрлі салаларда жинаған мол тәжірибесі мен басшылық қызметтегі ұйымдастырушылық қабілетінің арқасында өзін ел дамуы жолында аянбай еңбек ететін мықты маман ретінде көрсете білді. Мемлекет басшысының бастамаларынан туындайтын тапсырмалар мен алға қойған міндеттерді жоғарғы деңгейде жүзеге асырып, Өздеріңізбен бірге нәтижелі жұмыс жасайтынына сенемін», – деді облыс әкімі.</blockquote>Актив отырысында аудандық ардагерлер кеңесінің төрағасы Мұса Келдібаев, Мәдениет саласының үздігі Алмагүл Бақтиярова мен облыстық Қоғамдық кеңес төрағасы Әріп Хожбанов жаңадан тағайындалған аудан әкімін құттықтап, Ұлы Отан соғысының ардагері Яхия Тасыров бата берді.Берік Әбдіғаппарұлы 1963 жылы Қызылорда қаласында дүниеге келген. Алматы архитектура-құрылыс институтын «Өнеркәсіптік және азаматтық құрылыс» мамандығы бойынша бітірген. Еңбек жолын 1985 жылы «Казторгстрой» тресінің тасқалаушысы болып бастаған. Әр жылдары мемлекеттік және жеке секторда қарапайым маманнан басшылық лауазымға дейінгі қызметтерде болған. 2005-2010 жылдары Қызылорда қалалық сәулет және құрылыс бөлімінің бас маманы, бөлім бастығы және Қызылорда қаласы әкімінің орынбасары. 2010-2011 жылдары «Нұр Отан» партиясы Қызылорда облыстық филиалының қоғамдық қабылдау бөлімінің меңгерушісі. 2011-2019 жылдары Қызылорда қаласы мен Қармақшы, Шиелі ауданы әкімінің орынбасары, тұрғын үй-коммуналдық шаруашылығы, жер қатынастары салаларында жауапты басшылық қызметтерді абыроймен атқарған. 2021-2022 жылдары Қызылорда облысының энергетика және тұрғын үй-коммуналдық шаруашылық басқармасы басшысының орынбасары қызметінде нәтижелі жұмыс көрсетті. 2022 жылдың мамыр айынан бастап осы кезге дейін Сырдария ауданы әкімінің орынбасары қызметін абыроймен атқарып келді.

Сырдария ауданының әкімі тағайындалды

<a href="https://kyzylorda-news.kz/">Kyzylorda-news.kz.</a>&nbsp; Бүгінде кәсіпкерліктің көкжиегі кеңейіп келеді. Әсіресе жастардың кәсіпке ден қоюы көңіл қуантады. Мемлекет тарапынан жас кәсіпкерлерді қолдауға арналған түрлі бағдарламалар әзірленуде. Мұндай қолдауларды жастар оңтайлы пайдаланып, өздерінің ойға алған кәсіптерін ашуда. Соның арқасында жұмыссыздық деңгейі азайды. Тіпті шалғай ауылдағы жастар да кәсіпкерлікке ден қойып, ауыл халқының қажетін өтеп отыр. Сондай жандардың бірі – Мергенсай ауылының тұрғыны, жас кәсіпкер Бағлан Қалмағанбетов.Бағлан бала кезден теңізді өлкенің ата кәсібіне айналған балық шаруашылығының қыр-сырымен таныс болып өсті. Балық шаруашылығын басты табыс көзіне айналдырған ауылда туып-өскендіктен болар, ол үшін балық аулау ең оңай іс болды. Әкесі де, ағасы да теңіз маржанын сүзген балықшы еді. «Алма ағашынан алыс түспейді» демекші, Бағлан да теңіз төңіректеуге құмартты.<blockquote>– Көкшетау қаласынан жоғары оқу орнын аяқтадым. Қазір қолда дипломым бар. Дене шынықтыру пәнінің мұғалімі мамандығын алғанмын. Бірақ дипломмен жұмыс істеген жоқпын. Мен еркіндікті жақсы көретін адаммын. Тіпті студент кезімнің өзінде үлкен бір дүкенді жалға алып, дос баламмен сол жақта кәсіпкерлікті бастаған болатынмын. Кейіннен ауылға келіп, балық аулап жүрдім. Бұл кәсіп – жанымызға етене жақын кәсіптің бірі. Мектеп жасында-ақ қайыққа мініп, ау салуды меңгеріп алғанбыз, – деді Бағлан.</blockquote>Балық аулауды кәсіп етіп жүріп, Бағланға тың идея келеді. Ауылдан балық өнімдерін алуан түрлендіріп әзірлейтін цех ашуды қолға алады. Осылайша кәсіпкерлік жоспарын әзірлейді. Оның бұл бастамасы мыңның ішінен дараланып, жас кәсіпкерлерге берілетін қайтарымсыз грантты жеңіп алады.<blockquote>&nbsp;Балықтан түрлі өнім жасауға болады. Оның қайсыбірін алсаң да, халық арасында сұранысқа ие. Соның бәрін ескеріп, осы жобаны қолға алдым. Бастамам үздік деп танылып, 2 миллион теңге грантты жеңіп алдым. Бұл қаражатқа балық өнімдерін даярлайтын аппараттар алдым. Қазір өнімдерді заңдастыру жұмыстарын жасап жатырмын. Әзірге тәжірибе жүзінде ысталған балықты шығарып отырмын. Сұраныс жоғары, – деді жас кәсіпкер.</blockquote>Бағланның бизнес жобасында ысталған, консервіленген балық өнімдерімен қоса, балықтың фаршын шығару, тұзға пісірілген балық өнімін өндіру де бар. Бірақ қазіргі күні балықтың аз шығуына байланысты бұл өнімдерді кеңінен шығаруға мүмкіндік болмай отыр.&nbsp;Шынымды айтсам, мемлекеттік бағдарламаның арқасында мен өзімнің ойға алған мақсатыма қол жеткіздім. Бұл біз сияқты жастарға жасалған үлкен қолдау деп білемін. Менің бастамам ауылдағы қатарлас достарыма үлгі болды. Қазіргі күні кәсіп бастауға ниеттілер қатары артқан, – деген Бағлан кәсіпкерлікті дамытуға жасалған қолдаулардың оң нәтиже беріп жатқандығын айтты.Бағлан ысталған балық өнімін тапсырыспен дайындап жүр. Әсіресе Алматы, Ақтөбе, Көкшетау өңірлері Аралдың балығын алуға құмартқан. Сырттан бөлек, ішкі қажеттілікті де өтеуде. Тек шикізат көзінің аздығы қолбайлау болып отырғандығын айтады. Алдағы уақытта балық өнімдерінің алуан түрін шығаруды қолға алып отырған кәсіпкер ішкі нарықты да қамтамасыз етпек.<blockquote>&nbsp;Нарыққа шығу үшін өнімдердің сертификаты, заңды құжаттары болуы тиіс. Бұл халық тұтынатын өнім болған соң, мұндай заңдылықтар орындалуы керек. Сол себепті әзірге өнімді көпшілікке ұсынып отырған жоқпын. Осы мәселе шешілген соң, еркін саудаға шығаруға болады, – дейді кәсіпкер.</blockquote>Ата кәсіпті жаңаша түлетіп, кәсіптің көзін тапқан жанның ойға алған жоспары көп. Ол балық өнімдерін шығаратын цехты толықтай жұмысқа қосқанда, ауылдастарының жұмыссыздық мәселесін шешіп, аудан халқының балық өніміне деген қажеттілігін өтемек. Мұндай жарқын бастамамен танылған жас кәсіпкердің алдағы жұмысына сәттілік тіледік.

Жас кәсіпкер қайтарымсыз грант алып кәсібін жандандырды 

 Сырдария ауданы экономика саласы бойынша көш ілгері

<a href="https://kyzylorda-news.kz/">Kyzylorda-news.kz.</a> Бүгін Қармақшы ауданында аудан әкімі аппаратының басшысы, Әдеп жөніндегі уәкіл Самат Қыдырбекұлының төрағалығымен құқықтық оқыту өткізілді.&nbsp;Құқықтық оқытуға облыс әкімі аппаратының өтініштерді қарауды бақылау бөлімінің бас маманы Әлібек Алмағамбетов, өтініштерді қарауды бақылау бөлімінің инспекторы Назира Ишанбек, «Азаматтарға арналған үкімет мемлекеттік корпорациясы» коммерциялық емес АҚ Қызылорда облысы бойынша филиалының сарапшысы Жанасыл Балтабай арнайы қатысты.&nbsp;Семинарда «Е-өтініш» ақпараттық жүйесімен жұмыс жасау барысында Қазақстан Республикасы Әкімшілік-рәсімдік Кодексінің талаптарын сақтау мәселесі түсіндірілді.&nbsp;Семинарға қатысушылар хабарламашыларға күн тәртібіндегі мәселелерге байланысты өз сауалдарын жолдап, жауаптарын алды. Сондай-ақ, қатысушылардың ұсыныс-пікірлері тыңдалды.&nbsp;Жиын соңында аудан әкімі аппаратының басшысы Самат Смағұлов жауапты мамандарға заң бұзушылықтарды болдырмау мақсатында қатаң бақылау орнатып, қолданыстағы заңнама талаптарына сәйкес нақты шаралар қабылдауды тапсырды. Жалпы мұндай шаралардың барлығы аудан тұрғындардың тарапынан келіп түскен өтініштерді дер кезінде тіркеп, оларды мерзімінде мазмұны бойынша тиісті органдарға жолдап, тұрғындарды әуре сарсаңға салмай мәселелерін тез арада шешу үшін ұйымдастырылып жатқан шаралар деп айтуға болады. Алдағы уақытта да әкімдік тарапынан осы бағыттағы жұмыстар жалғасын таба беретін болады. &nbsp;

Қармақшы ауданында құқықтық оқыту өтті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Нұрлыбек Нәлібаевтың төрағалығымен өткен актив отырысында облыстық полиция департаментінің бастығы Мұхтар Қожабаевты жаңа қызметке шығарып салды.2022 жылғы тамыз айынан бастап Қызылорда облысының полиция департаментінің бастығы қызметін атқарып келген Қожабаев Мұхтар Аманқұлұлы басқа жұмысқа ауысуына байланысты ҚР Ішкі істер министрінің бұйрығымен атқаратын қызметінен босатылды.&nbsp;Аймақ басшысы департамент бастығының адал қызметі мен көпжылдық еңбек тәжірибесін атап өтіп, оған алғыс білдірді.<blockquote>«Өздеріңіз білесіздер, Мұхтар Аманқұлұлы – еңбек жолын қарапайым жол-патрульдік инспекторы қызметінен бастап, жоғары басшылық лауазымға дейін сатылап өскен, еліміздегі ішкі істер органдары қызметін дамытуға елеулі үлес қосқан азаматтардың бірі. Облыстық полиция департаментінің бастығы лауазымына тағайындалғалы облысымызда белсенді жұмыс атқарып, қоғамдық тәртіп пен қауіпсіздікті қамтамасыз ету, қылмыстың алдын алу бағытында шаралар қабылдады. Өзге құқық қорғау және жергілікті атқарушы органдармен бірлесіп атқарған жұмыстар нәтижелі болып, 2022 жылдың қорытындысымен өңірде тіркелген қылмыстық құқық бұзушылық 14 пайызға азайды. Мемлекет басшысының тапсырмасына сәйкес полиция жұмысына сервистік тәсілдерді енгізудің пилоттық жобасы да өңірімізде сәтті іске асырылып, оны Ішкі істер министрлігі оң бағалады», – деді Нұрлыбек Машбекұлы.</blockquote>Айта кетейік, өткен жылы Қызылорда облысында ауыр қылмыстар 10 пайызға, кәмелет жасына толмағандар арасындағы қылмыс 44 пайызға, ұрлық 21 пайызға, тонау 18 пайызға, бұзақылық 13 пайызға төмендеді. Осы жылдың 3 айының қорытындысына зер салсақ, тіркелген қылмыстық құқық бұзушылықтар 18 пайызға азайған. Республикада Қызылорда өңірі тіркелген қылмыстық құқық бұзушылықтар көрсеткіші бойынша Ұлытау облысынан кейін ең төменгі позицияда екенін ерекше екпін түсіріп айтуға болады. Бұл –жергілікті атқарушы және құқық қорғау органдарының орнықты шешімдері мен үйлесімді жұмысының нәтижесі.Осы күрделі салада атқарған еңбегі үшін Мұхтар Аманқұлұлына Сыр жұртшылығы атынан Қызылорда облысының Құрмет грамотасы табысталды.&nbsp;Актив отырысында облыстық мәслихат төрағасы Наурызбай Байқадамов, облыстық ардагер кеңесінің төрағасы Серік Дүйсенбаев және ҰҚК Қызылорда облысы және Байқоңыр қаласы бойынша департаментінің бастығы Болат Қалмұрзаев Мұхтар Қожабаевқа жаңа қызметте сәттілік тіледі.Өз кезегінде, Мұхтар Аманқұлұлы әріптестеріне көрсетілген құрмет үшін ризашылығын білдірді.<figure class="image"><img src="https://knadmin.beoblood.kz/uploads/340948414_1149929395852979_8727066359741536983_n_4ec913a541.jpg" alt="340948414_1149929395852979_8727066359741536983_n.jpg"></figure><figure class="image"><img src="https://knadmin.beoblood.kz/uploads/341247632_1674827309656468_399926495527830939_n_aea9dd9c16.jpg" alt="341247632_1674827309656468_399926495527830939_n.jpg"></figure>

Нұрлыбек Нәлібаев аймақтың бас тәртіп сақшысын жаңа қызметке шығарып салды

<a href="https://kyzylorda-news.kz/">Kyzylorda-news.kz.</a> Қызылөзек ауылдық округінің халық саны 3536 адамды, оның ішінде экономикалық белсенді халық саны 1802 адамды құрайды. Өткен 2022 жылы ауылдық округтің бюджеті 94 миллион 183мың теңге болып бекітілген. Салық түсімдерінің жоспары 6 миллион 259 мың теңгеге бекітіліп, жыл соңына дейін 7 миллион 844 мың теңге түсім түсіп, жылдық жоспар 125 пайызға орындалған.&nbsp;Бүгінде «Өңірлерді дамыту» бағдарламасы аясында бөлінген3 миллион 620 мың теңге қаражатқа ауылдық округтегі Айнакөл ауылының 3 көшесіне түнгі жарық бағаналары орнатылса, мекеменің үнемделген қаражаты есебінен қаралған 3 миллион 997 мың теңгеге Жамбыл Жабаев көшесінің аяғына жарық бағаналары орнатылып, өткен жылғы есепті кездесулерде жарықтандыру бойынша көтерілген мәселелер толық шешімін тауып отыр. Бұдан бөлек, елді мекендердегі көшелердің түнгі жарық бағаналарын күтіп ұстау жұмыстарына жергілікті бюджеттен 7 миллион 010 мың теңге бөлінген. Соңғы жылдары Қызылөзек ауылдық округінде аяқ су тапшылығы орын алып отыруына байланысты, қала басшылығының қолдауымен 18 миллион 852 мың теңге қаражатқа 2 дана жаңа «СНП-500/10» дизельдік насостық қондырғысы сатып алынып, егістіктер мен 3 елді мекенге аяқ су берілген. Сонымен қатар, аяқ су мәселесін шешу мақсатында мақсатында 4 дана техникалық су тарту ұңғымасы қазылды.Желтоқсан айынан бастап, тұрғындардың өтінішіне орай, бұрын күніне бір рет қатынап келген шағын автобустың орнына «Қызылорда» автобус паркі» мекемесінен «Қызылорда – Қараөзек» бағытына қатынайтын жаңа №29 қоғамдық көлік бағыты ашылып, орта сыйымдылықтағы автобус күніне 3 мезгіл тұрақты қатынап келеді. Жақын арада тағы да сыйымдылығы үлкен жаңа автобус жүргізу жоспарланып отыр.Ауылдық округте сондай-ақ елді мекендерді көркейту, көгалдандыру және санитарлық тазарту жұмыстары тұрақты түрде жүргізіліп келеді. Есепті жылы тұрғындардың сұранысына байланысты 2 миллион 999 мың теңге қаражатқа орталық Абылайхан көшесінен «Демалыс аллеясы» бой көтерді.Бүгінгі таңда ауылдық округте 156 шағын және орта кәсіпкерлік субъектілері жұмыс істеп келеді. Өткен жылдың көлемінде шағын және орта бизнесті қолдау мен дамытудың мемлекеттік бағдарламалары шеңберінде атқарылған жұмыстардың нәтижесінде жаңадан 20 кәсіпкерлік субьектісі тіркеліп, 20 тұрақты жұмыс орны ашылды.&nbsp;Айта кетерлік жайт, өткен жылы ауылдық округ тұрғындарының кәсіпкерлік саладағы өрісін кеңейту мақсатында барлығы 95 миллион 300 мың теңгені құрайтын 14 жобаға несие берілген. Соның ішінде «Еңбек» бағдарламасы шеңберінде 2 миллион 400 мың теңгені құрайтын 1 жоба, «Бизнестің жол картасы-2025» бағдарламасымен 20 миллион 800 мың теңгені құрайтын 2 жоба, «Іскер» бағдарламасымен 39 миллион 500 мың теңгені құрайтын 8 жоба және несие ұйымдарының ішкі бағдарламаларымен 32 миллион 600 мың теңгені құрайтын 3 жоба қаржыландырылған. Сонымен қатар, 6 тұрғын жаңа бизнес идеяларын іске асыру мақсатында 7 миллион 351 мың теңге қайтарымсыз грантқа ие болды. &nbsp;Ауыл шаруашылығы саласында төрт түлік мал басы өткен жылғы көрсеткіштен 115-ке артып, 10 020 басқа жеткен. 507 гектар жерге егін егіліп, картоптың әр гектарынан 129, көкөністен 131, бақша өнімдері бойынша 128 центнерден өнім алынды. Оның ішінде, «Үміт» шаруа қожалығы «тамшылатып суару» технологиясымен 8 гектар жерге картоп дақылын өсірді.Жем-шөп өндірісін ұйымдастыру мақсатында «Жарықкөл» шаруа қожалығы 150 гектар жерді инженерлік жүйеге келтіре отырып, 70 гектар жерге жоңышқа дақылын өсіріп, тұрғындарға нарық бағасынан арзанға сатты.Ауылдық округте экономикалық белсенді халық саны - 1802 адамды құрайды. Оның ішінде, жұмыс істейтіндер саны 1183 адам болса, өзін-өзі жұмыспен қамтып отырған 598 адам бар. Ауыл тұрғындарын жұмыспен қамтудың белсенді шараларына қатыстыру арқылы 5 азамат жастар тәжірибесімен, &nbsp;26 азамат қоғамдық ақылы жұмыспен, 25азамат тұрақты жұмыспен қамтылып, жыл соңында жұмыссыздар саны 21 адамды, жұмыссыздық деңгейі 1,17 пайызды құраған.&nbsp; Есепті мерзімде мемлекет тарапынан 65 отбасына 24 миллион теңге көлемінде атаулы әлеуметтік көмек тағайындалды. Сонымен қатар, жергілікті кәсіпкерлердің демеушілігімен әлеуметтік жағынан аз қамтылған 66 отбасыға азық-түлік және отын түрінде көмек көрсетілді. Одан бөлек «Мектепке жол» акциясы барысында 122 балаға оқу құралдары мен киімдер таратып берілген.Білім саласы бойынша өткен оқу жылы ұстаздар қауымының табысты еңбегінің нәтижесінде мектеп бітірген 42 түлектің 35-і ҰБТ-ға қатысып, 29 бітіруші мемлекеттік грант бойынша жоғарғы оқу орындарына түсті. Соның ішінде 5 бітіруші «Алтын белгіге», 1 түлек «Үздік аттестатқа» ие болды.&nbsp;Облыстық бюджеттен бөлінген 45 миллион 325 мың теңге қаражатқа Айнакөл ауылындағы №175 мектепке жылу беру автономды бу қазандығы салынды. Айта кетерлік жайт, облыс әкімдігінің қаулысымен №175 және №128 негізгі мектептерге жалпы орта білім беретін мектеп мәртебесі берілді.&nbsp;Денсаулық сақтау саласы аясында ауылдық округте 2 дәрігер және 12 медицина қызметкерлері тұрғындарға қызмет көрсетіп келеді. Есепті жылы округте 51 нәресте дүниеге келсе, қайтыс болғандар саны 15 адамды құрап отыр.&nbsp; Ал мәдениет және спорт саласы бойынша ауылдық клубта 8 үйірме қызмет етіп, 96 жас тұрғындар клубтағы үйірмелерге қатысады. Өткен жылдың тамыз айында Сыр бойына белгілі жырау Мұхамедияр Жабағыұлының ұрпақтарының демеушілігімен Қараөзек ауылындағы «Тағзым алаңынан» жыраудың атына ескерткіш белгі орнатылып, «Мұхамедияр жырау» кітабының тұсаукесер рәсімі болып өтті.&nbsp;Қызылөзек ауылдық округіне қарасты 3 елді мекенде 3 шағын спорт және балалар ойын алаңдары бар. Мұнда спорттың 6 түрінен 157 жас шұғылданады. Өткен жыл соңында «Жастар бастамаларын қолдау» жобасы аясында жастар арасында салауатты өмір салтын қалыптастыру және бұқаралық спортты дамыту мақсатында үстел теннисі орталығы ашылды. Қоғамдық тәртіп бойынша ауылдық округтің учаскелік полиция пунктінің әкімшілік аймағында есепті мерзімде 5 қылмыс тіркеліп, 3 қылмыс ашылып отыр. Осылайша қылмыстың ашылу көрсеткіші 60 пайызды құрады. Сонымен қатар, әртүрлі әкімшілік құқық бұзушылықтар бойынша 63 азаматқа әкімшілік хаттама толтырылған.Алдағы уақытта елді мекен көшелерінің жолдарына жөндеу жүргізу мақсатында өткен жылы бірінші кезекте жөндеуді қажет ететін 6 көшеге жоба-сметалық құжаттары әзірленіп, облыстық жолаушылар көлігі және автомобиль жолдары басқармасына бюджеттік ұсыныс берілген болатын. Соған сәйкес, биылғы жылы «Ауыл - ел бесігі» бағдарламасы аясында қаражат бөлініп, Абылайхан және Айнакөл-2 көшелеріне асфальт, Жаңаарық, Арғын, Қорқыт Ата, және Қараөзек бекеті-3 көшелеріне малта тас төсеу жұмыстары жүргізілетін болады.Сонымен қатар, Абылайхан және Шамгүл Ибраева көшелеріне жаяю жүргіншілер жолын салуды жоспарлап отырмыз. Бұл жұмыстардың жоба-сметалық құжаттамалары әзірленіп, тиісті бюджеттік өтінімдері ұсынылып, қазіргі уақытта қаражаттың бөлінуі күтілуде. &nbsp;Жарықтандыру жұмыстары да биылғы жылы жалғасын тауып, Айнакөл ауылының жарық бағаналары орнатылмаған 2 көшесіне жаңа үлгідегі жарық бағаналары орнатылатын болады. Сол сияқты, жыл басында бюджеттік өтінімдері ұсынылған Қараөзек ауылындағы М.Жабағыұлы жәнеАрғын көшелерін толық жарықтандыру жұмыстарына қаржы күтілуде.Үстіміздегі жылы Қараөзек ауылынан балалар ойын алаңын салуға тиісті қаражат бөлініп, қазіргі уақытта мемлекеттік сатып алу рәсімдері жасалуда. Алдағы уақытта ойын алаңы Е.Дәуітбаев көшесінен салынатын болады.Сондай-ақ, өткен жылғы есепті кездесулер барысында көтерілген «Қожақ» автомобиль көпірін күрделі жөндеу және Электр тарату желілерін қайта жаңғырту жұмыстарына жоба-сметалық құжаттарын әзірлеу үшін жобалық зерттеу жұмыстары (ПИР) жасалып, бюджеттік өтінім ұсынылған болатын. Үстіміздегі жылы бұл ұсыныстар бойынша қажетті қаражат бөлініп, жобалау жұмыстары басталуда. Жоба-сметалық құжаттары әзірленіп, мемлекеттік сараптама қорытындылары алынған соң құрылыс жұмыстарына қаражат бөлуге жұмыстар жасалмақ.

Қызылөзек ауылдық округі қарқынды дамып келеді

<a href="https://kyzylorda-news.kz/">Kyzylorda-news.kz.</a> Өңірлік коммуникациялар қызметінің ақпараттық алаңында «Қаржы орталығы» АҚ ілгерілету және сыртқы коммуникациялар департаменті директорының орынбасары Диас Жамбылов мемлекеттік қолдау шеңберінде студенттік жатақхана, жекеменшік мектептер салудың жай-жапсары туралы айтты.<blockquote>«2018-ші &nbsp;жылдан бастап студенттерді жатақханалардағы орындармен қамтамасыз ету бойынша мемлекеттік тапсырыс механизмі жұмыс істейді. Бұл механизм кәсіпкердің құрылысқа кеткен инвестициялық шығыстарын кезең-кезеңімен өтейді. Республика бойынша қажеттілік 62 000, ал облыс бойынша 425 орынды құрайды. Мемлекеттен төлем мерзімі өткеннен кейін объект құрылыс салушының меншігінде қалады. Жалғыз шарт 20 жыл мерзімге объектінің нысаналы мақсатын өзгертуге болмайды.Осы механизм іске асқаннан бастап Кызылорда облысында 1805 төсек-орынға арналған 6 жатақхана енгiзiлдi», - деді Диас Жангелдіұлы.&nbsp;</blockquote>Аймақта алдағы уақытта 7 жекеменшік мектеп ашу жоспарланған.&nbsp;<blockquote>«Бүгінгі таңда, облыста 31 жекеменшік мектеп қаржыландырылса, жеті жекеменшік мектепті ашу жоспарлануда. Ел дамуының маңызды межесі студенттік жатақханалар мен оқу ошақтарының тапшылығын жою екендігі мәлім. Басты мақсат – жастар үшін жайлы әрі қауіпсіз орта қалыптастыру, олардың өмір сүру сапасын жақсарту және сапалы әрі қолжетімді білім алуына жағдай жасау. Ағымдағы есептеулер бойынша елімізде тапшылық 270 мыңнан астам оқушы орнын құрайды және әр өңірде тіркелген. Бұл ретте Қызылорда облысында қажеттілік 8 589 орын. Қазіргі таңда, осындай әлеуметтік мәселелерді шешу бағытында нәтижелі жұмыстар атқарылып жатыр», - деді «Қаржы орталығы» АҚ ілгерілету және сыртқы коммуникациялар департаментінің жетекшісі Азамат Амангелдіұлы.</blockquote><img src="https://knadmin.beoblood.kz/uploads/341018279_1277335879860570_5753838831717621804_n_9f77823916.jpg" alt="341018279_1277335879860570_5753838831717621804_n.jpg">

Қызылордада студенттік жатақханалар мен мектеп тапшылығын жою мәселесі айтылды

<a href="https://kyzylorda-news.kz/">Kyzylorda-news.kz.</a>&nbsp; Бүгін Қармақшы ауданында орталық алаңда ауыр атлетикадан жасөспірімдер арасындағы әлем чемпионатының екі дүркін жеңімпазы Ерасыл Сәулебеков пен бапкері Айдар Ералиев Қармақшы жұрты зор құрметпен қарсы алды.Өздеріңізге белгілі, Ерасыл Сәулебеков 2022 жылы Мексика мемлекетінде өткен жасөспірімдер арасындағы ауыр атлетикадан Әлем біріншілігінде 3 алтын медальға қол жеткізсе, міне биыл Албания мемлекетінде өткен ауыр атлетикадан жасөспірімдер арасындағы Әлем чемпионатында 73 кг салмақ дәрежесінде екінші мәрте Әлем чемпионы атанды.&nbsp;Аудан әкімі күллі қазақ елінің абыройын асқақтатып, көк туымызды көкке көтерген жас спортшы Ерасыл Аянұлы мен бапкері Айдар Қойшыбекұлына барша аудан халқының атынан алғыс білдіре отырып, Ерасыл Сәулебековке 1 млн теңге көлемінде қаржылай сыйақы табыстады.Өз кезегінде әлем чемпионы Ерасыл Сәулебеков пен спортшының бапкері Айдар Қойшыбекұлы тілектес болған аудан халқына рақмет айтып, ризашылықтарын білдірді.Аудандық ардагерлер кеңесінің төрағасы Асқар Мереков жас спортшыға ақ батасын беріп, ауданымыздың барша ардагерлері атынан ізгі тілегін жеткізді. Жерлестеріміздің спорттағы жетістіктері мен табыстары арта берсін! &nbsp;

Қазақстан және Қызылорда облысының жаңалықтары