<a href="https://kyzylorda-news.kz/">Kyzylorda-news.kz.</a> Қызылорда облысы, Сырдария ауданына қарасты Н.Ілиясов ауылдық округінде дзюдодан республикалық турнир өтті. Аталған жарысқа 11 облыстан 334 спортшы және 27 команда қатысты. Бұл туралы Өңірлік коммуникациялар қызметінің ақпараттық алаңында өткен брифингте облыстық мәдениет және спорт басқармасы басшысының орынбасары &nbsp;Асылжан Жаманқұл мәлімдеді.&nbsp;<blockquote>«Қазақстанда дзюдо 1973 жылдан бастап дами бастады. Дзюдо ең алдымен, жауынгерлік өнердің лақтыру стилі. Оны бөліп көрсететін басты ерекшеліктердің бірі - оларға қарсы қарсыластың күшін қолдану тәжірибесі. Осындай тәжірибелерді жинақтаған спортшы жастар елімізде өте көп. Көпшілікке үлгі етіп, батылдығын айқындау мақсатында біраз жарыстар да өтіп жатыр. Соның бірі «Абзал және К» ЖШС-нің ұйымдастыруымен өткен дзюдодан республикалық турнирі. 19-21 мамыр аралығында болған турнир өте жоғары дәрежеде өтті»,-деді Асылжан Зұлфқарұлы.&nbsp;</blockquote>Жарысқа жалпы 4 миллионға жуық қаражат жұмсалған.<blockquote>«Турнирге қатысушыларға барлық жағдай жасалды. Нақтырақ айтқанда, транспорт және жатын орны, 3 мезгіл тамағы қарастырылды. Айта кететін жайт, жарысқа жалпы 4 миллионға жуық қаражат жұмсалды. Жыл сайын өз деңгейінде өтіп жатқан бұл жарыс ауыл халқы үшін маңызды шаралардың бірі. Осындай мүмкіндікке қолдау көрсетіп отырған «Абзал және К» мекемесінің рөлі зор. Ауылымызда күріш алқаптарының дамып жатқанын ескерсек, &nbsp;басқа өңірлерден келген қатысушылар денсаулыққа пайдалы, сапалы күріш тек шет елде ғана емес өз өңірімізде өндірілетіндігі жөнінде біраз ақпаратпен таныс болды. Сондықтан бұл жарыс спорт саласына баулып қана қоймай, ауыл шаруашылығын және &nbsp;туризмді дамытуға үлкен үлес қосқаны хақ , - деді "Абзал және К" ЖШС-і директорының орынбасары Айгүл Қосмұратова.&nbsp;</blockquote>Бұл жарысты алдағы уақытта халықаралық деңгейде ұйымдастыру көзделген.<blockquote>«Турнирге арнайы халықаралық, ұлттық төрешілер шақыртылды. Себебі, шын мықтыны әділ түрде айқындау негізгі мақсаттың бірі. Жеңімпаздарға ақшалай сыйлықтар және ҚР спорт шеберіне үміткер атағы берілді. Биыл он екінші рет өткізілген турнирді алдағы уақытта халықаралық деңгейге дейін көтеру жоспарда бар», - деді Н.Ілиясов ауылының спорт кешенінің меңгерушісі Бағлан Мығымбаев.</blockquote>

Қызылордада дзюдодан республикалық турнир өтті

<a href="https://kyzylorda-news.kz/">Kyzylorda-news.kz.</a> Жастарға қолдау көрсету мемлекетіміздің басты міндеттерінің бірі. Биыл республикада отбасылық цифрлық картасы іске қосылды. Бүгінде осы бағдарлама аясында облыста ауқымды жұмыстар атқарылуда. Сәйкесінше, жастар арасындағы жұмыссыздық деңгейі 3,4 пайызға төмендеді. Бұл бағдарламаның оң динамика қалыптастырғанының айқын көрінісі. Бұл жөнінде Өңірлік коммуникациялар қызметінің ақпарат алаңында өткен брифингте облыстық «Жастар ресурстық орталығы» КММ директоры Талғат Тлес хабарлады.&nbsp;<blockquote>«Жастарды кәсіпке баулу, оларды жұмыспен қамтамасыз етудің нақты шаралары қабылданды. Жастарды бизнеске тартуда мемлекет тарапынан қайтарымсыз гранттар, жеңілдетілген 2,5 пайызбен несие қарастырылып келеді. Бұл жастарға деген үлкен мүмкіндік. Жастар арасындағы жұмыссыздық деңгейін төмендету, кәсіпкерлікті дамыту, жастар арасындағы сұранысқа ие мамандықтарды қажеттілікті қамтамасыз етуде мүмкіндіктер керуені, кеңес беру, мәдени көпшілік шаралар өткізіліп келеді. Сондай-ақ бос жұмыс орны жәрмеңкелері ұйымдастырылып, 303 жас жұмыспен қамтылды», - деді Талғат Оспанұлы.</blockquote>Жастар - мемлекеттің болашағы. Жастар жылы аясында еңбек бригадалары құрылып, бүгінде өз жұмыстарын бастаған болатын.<blockquote>«Бұл бригадаларды құрудың басты мақсаты - аудандағы жастардың жұмыссыздық деңгейін төмендету. Бүгінде аудан әкімінің қолдауымен Сырдария ауданына қарасты кенттер мен ауылдық округтерле жастар бригадалары құрылды. Аталмыш бригада қатарында жұмыссыз, NЕЕТ санатындағы және пробация есебінде тұратын жастар жұмыс жасауда. Осы уақытта басталған егін науқанына бригада құрамындағы жастарды тарту қарастырылып отыр. Сонымен қатар жастарды Жаңақорған ауданы, Жайылма ауылдық округіне тәжірибе алмасуға жіберіп, егін егу тәсілдері үйретілді. Қазіргі таңда мемлекет тарапынан берген егіндік жерлерде дайындық барыстары жүргізіліп, бақша егу жоспарлануда. Сондай-ақ, Шіркейлі ауылдық округінде құрылыс материалдарын шығаратын "Шіркейлі" жастар бригадалары жұмыс жасайды. Нәтижелі жұмыс жасаған еңбек жастары жыл соңында лайықты марапатқа ие болады. Атқарылып жатқан жұмыстар алдағы уақытта да өз жалғасын табады», - деді Сырдария аудандық жастар ресурстық орталығының директоры Нұрман Абдрасилов.</blockquote>

Қызылордада жастар арасында жұмыссыздық деңгейі 3,4 пайызға төмендеді

<a href="https://kyzylorda-news.kz/">Kyzylorda-news.kz.</a> Үкімет қаулысына сәйкес, Құрбан айттың бірінші күні – демалыс. Қазақстан халқы 28 маусым, сәрсенбіде демалады.Маусым айында бес күндік жұмыс аптасы үшін барлығы тоғыз демалыс күні бар.

Қазақстандықтар маусым айында 9 күн демалады

<a href="https://kyzylorda-news.kz/">Kyzylorda-news.kz.</a> Биылғы жылдың 1 маусым – 31 қазан аралығында республика аумағында кең ауқымды «Қарасора-2023» жедел профилактикалық іс-шарасын өткізу жоспарлануда. Бұл кең ауқымды операция жыл сайын маусым мен қазан аралығында қарасора өсетін кезде өткізіледі.«Қарасора» жедел алдын алу іс-шарасын өткізудегі негізгі мақсат – елдің оңтүстік өңірлерінен каннабис тобының есірткілерін дайындаумен және әкетумен айналысатын адамдарды анықтау, героин трафигі арналарының жолын кесу, сондай-ақ синтетикалық есірткіні таратуға мамандандырылған ұйымдасқан қылмыстық топтардың қызметін, заңсыз есірткі зертханаларын жою.Қызылорда облысының полиция департаментінде есірткіні тасымалдау барысында пайдалануы мүмкін жерлерді, ауылдық жолдарды ескере отырып, патрульдеу бағыттары әзірленді. Құрамында есірткі бар өсімдіктерді өсіру орындарын анықтау мақсатында арнайы мақсаттағы бөлімшелердің күштері мен құралдарын тарта отырып, Қызылорда облысы мен оған шекаралас аумақтарда әуе барлауы жүзеге асырылады.&nbsp;Облыс аумағында 120 күндік мерзімде пісіп-жетілетін «үнді» қарасорасынан бөлек, соңғы 4-5 жыл көлемінде 55-60 күндік мерзімде пісіп-жетілетін «голландтық» сорты пайда болды. Осыған байланысты осы кезден бастап, есірткі өсіру деректерін анықтау жолында тиісті жұмыстар атқарылуда.&nbsp;Жалпы, 2023 жылдың 4 ай 21 күнінде облыс көлемінде есірткінің заңсыз айналымына байланысты сотқа дейінгі тергеп-тексерудің бірынғай тізіліміне 74 қылмыстық құқық бұзушылық тіркелген, оның 9 дерегі есірткі затын сату, 6 дерегі есірткі затын аса ірі мөлшерде заңсыз сақтау және 5 дерегі құрамында заңмен тыйым салынған есірткі құралы бар сора өсімдігін егу, 1 дерегі есірткі жарнамалау. Сонымен қатар, ҚР ҚК-нің 296-бабында (Есірткі, психотроптық заттармен, сол тектестермен, прекурсорлармен өткізу мақсатынсыз заңсыз жұмыс істеу) көзделген қылмыстық теріс қылықтың 53 дерегі анықталған.Заңсыз айналымнан барлығы 10 кг-нан аса есірткі заты алынды, оның 61 гр. гашиш, 109 гр. «меф», «PVP» синтетикалық есірткі заттары. Есірткі алқаптарын анықтауда әуеден барлау үшін Ұлттық Ұланның әскери тік ұшағы жұмылдырылып, 15 рет әуеден шолу жүргізіліп, 6 есірткі алқабы анықталды. Оның ішінде Шиеліден – 3, Сырдариядан – 2, Қызылорда қаласынан (Тасбөгет) – 1 есірткі алқабы анықталды.Нашақорлық &nbsp;пен &nbsp;есірткі &nbsp;қылмыстарының &nbsp;алдын &nbsp;алу &nbsp;мақсатында &nbsp;Есірткі қылмысына қарсы іс-қимыл басқармасы &nbsp;тарапынан &nbsp;алдын алу &nbsp;жұмыстары &nbsp;іске &nbsp;асырылуда.Облыс &nbsp;көлемінде түрлі шаралар, оның ішінде кездесулер, спорттық шаралар, сайыстар, барлығы 216 шара өткізілді. Атқарылған &nbsp;іс-шаралардың &nbsp;128 – үкіметтік &nbsp;емес &nbsp;ұйымдармен, &nbsp;184 – мектеп &nbsp;инспекторларымен, &nbsp;ал 494 – жоғарғы және &nbsp;арнаулы &nbsp;орта &nbsp;оқу &nbsp;орындарында ұйымдастырылды. Жалпы ұйымдастырылған барлық іс-шараларға 8мыңға жуық адам қатысты. Айте кетерлігі, есірткі &nbsp;сату &nbsp;және &nbsp;тағыда &nbsp;басқа &nbsp;есірткі &nbsp;заттарына &nbsp;байланысты &nbsp;жасалып &nbsp;жатқан &nbsp;қылмыстар мен құқық бұзушылықтар жайлы &nbsp;хабарламаларды &nbsp;қабылдау &nbsp;үшін Қызылорда облысының полиция департаментінің Есірткі қылмысына қарсы іс-қимыл басқармасында 27-55-42 «Сенім &nbsp;телефоны» қолданысқа енгізілген.&nbsp;Қызылорда облысының полиция департаменті ескертеді: құрамында есірткі заттары бар, тыйым салынған өсімдіктерді заңсыз өсіргені үшін қылмыстық жауапкершілік, сонымен қатар есірткі құралдары мен жабайы өсетін сораның тізбесіне енгізілген өсімдіктерді жоюға шаралар қолданбағаны үшін әкімшілік жауапкершілік қарастырылған. Сондай-ақ, полиция қызметкерлері заңсыз егістер мен өсетін жерлер, құрамында есірткі бар жабайы өсімдіктер анықталған жағдайда дереу полицияға хабарлау қажеттігін ескертеді.

Қызылордада «Қарасора-2023» жедел алдын алу іс-шарасы басталады

<a href="https://kyzylorda-news.kz/ru">Kyzylorda-news.kz.</a> Қазалы ауданы кәсіпкерлік саласында қарқынды дамуда. Мұнда шағын және орта кәсіпкерлікті дамытуға айрықша мән берілуде. Бұған қатысты қыруар шарулар қолға алынып, бірқатар жұмыстар атқарылды. Бүгінде шағын және орта кәсіпкерлік субъектілерінің даму көрсеткіші жоғары. Статистикалық мәліметтерге сәйкес, 2023 жылдың 1 сәуіріне тіркелген шағын және орта кәсіпкерлік субъектілерінің саны өткен жылмен салыстырғанда 6472 бірлікті құрады. Оның ішінде – 294 заңды тұлға, 4541 жеке кәсіпкер, 1637 шаруа қожалығы болып табылады.Жыл басынан жаңадан – 1133 кәсіпкер тіркеліп, 782 кәсіпкер жабылды. Дегенмен шағын және орта кәсіпкерлік субъектілерінің саны – 351 бірлікке артты. Жұмыс істеп тұрған шағын және орта кәсіпкерлік субъектілер – 6289 бірлікті құрап тұр. Өнеркәсіп өнімі мен өңдеу өнеркәсібінде және бөлшек сауда көлемі бойынша 11289,3 миллион теңге құралған.&nbsp;Сала мамандарының мәліметінше, Қазалы ауданының шағын және орта кәсіпкерлігін дамыту бағытында мемлекет тарапынан ұдайы қаржылай қолдау көрсетіліп тұрады. Атап айтқанда, аудан кәсіпкерлеріне сауда айналымын және өндіріс түрлерін ашу мен дамыту мақсатында қаржы ұйымдары тарапынан 131 жобаға қажетті сомадағы несие, грант қаражаты берілген.Кәсіпкерлікті дамытудың 2021-2025 жылдарға арналған Ұлттық жобасының негізінде қаржылық қолдау шаралары бойынша «Бизнестің жол картасы – 2025» бизнесті қолдау мен дамытудың мемлекеттік бағдарламасына орай аудандағы 17 жобаға қомақты несие қаражаты берілген. «Іскер», «Агробизнес», «Кең дала», «Микробизнес Қызылорда» бағдарламасы аясында 48 жоба қаржыландырылды. Яғни, «Қызылорда» өңірлік инвестициялық орталығы «Іскер» бағдарламасымен 27 жоба іске қосылды. Оның ішінде, 16 мал шаруашылығы, 3 нан және кондитерлік өнім, 3 ағаш бұйымдары, 1 көлік жуу, 2 дүкен, 1 сауда айналымы, 1 ойын-сауық орталығы ашылды.&nbsp; КС «Қазалы-Несие» арқылы «Кең дала» бағдарламасымен егін шаруашылығына қатысты 3 жобаға қаржы құйылды. «Сырдария-1» кредиттік серіктестігі, «Агробизнес», «Ауыл» кредиттік серіктестігі арқылы «Агробизнес», «Іскер» бағдарламасымен мал шаруашылығын дамытуға 12 жоба жүзеге асырылуда. Аграрлық Несие корпорациясы арқылы «Іскер» жобасымен тағы 4 мал шаруашылығы мен 2 жүк көлігіне қаржы қарастырылды.&nbsp;Бүгінде аталған бағдарламалар аясында 34 өтініштің жобалары қаржылық ұйымдарда қаралуда. Гранттық қаржыландыру бойынша 24 үміткерге қомақты қаржы берілді. Сондай-ақ мемлекеттік бағдарламадан тыс, яғни екінші деңгейлі банктердің өз бағдарламалары бойынша 42 кәсіпкер несие қаражатына қол жеткізді.&nbsp;Сонымен қатар туризм саласына да үлес қосып жүрген іскер жандар бар. Нақты дерек келтірсек, ауданда «Батыс Еуропа - Батыс Қытай» автокөлік дәлізінің бойынан кәсіпкерлік қызмет көрсетуге белгіленген 5 учаскеде 5 нысан пайдалануға берілген. Олар «Арзан Сити 1», «Арзан Сити 2», «Мирас», кешендері, «Sinooil», «TS Қызылорда мұнай өнімдері» жанар-жағар май бекеттері. Барлық нысандар заманауи форматта салынған, ұлттық стандартқа сәйкес жұмыс істеуде.Сонымен бірге Қазалы ауданының аумағынан өтетін «Самара-Шымкент» автотрассасының («Қашқан су» учаскесі) бойынан табысталған көлемі 3,0 гектар жер учаскесіне жеке кәсіпкер Бақыт Ерхатовтың көпсалалы қызмет көрсету «Baqyt» кешенінің құрылыс жұмыстарының 90 проценті жүргізіліп, жол бойындағы сервис ішінара қызметін атқаруда. Жоба құны 650,0 миллион теңгені құрады.&nbsp; Жол бойы кешенінде қонақ үй, монша, кафе, жеңіл және жүк автомобильдеріне арналған автотұрақ, техникалық жөндеу орталығы, шиномонтаж шеберханасы және жазғы демалыс орны – шомылу, әуесқойлық балық аулау мен қыс мезгілінде мұз айдыны кіреді. Сондай-ақ алдағы уақытқа автожанармай құю станциясының құрылысы жоспарланған.<blockquote>«Жоба бастамашысы осы кешенге жетіспейтін инфрақұрылым түрі электр желісі бойынша әзірленген жоба-сметалық құжаттары мен өтінімі кәсіпкерлікті дамыту жөніндегі ұлттық жоба шеңберінде өндірістік (индустриялық) инфрақұрылым жүргізу бойынша өңірлік үйлестіру кеңесінде оң шешімі шығарылған. Облыстық энергетика және тұрғын үй-коммуналдық шаруашылық басқармасына салалық қорытынды мен тиісті бюджеттік өтінімдері ұсынылғанымен бюджеттің қаржы тапшылығына байланысты қаржыландырылмады. Сондықтан 2023 жылға қажетті инфрақұрылыммен жобаны қаржыландыру үшін қолданыстағы заңнамалар шеңберінде облыстық энергетика және тұрғын үй-коммуналдық шаруашылық басқармасына тиісті бюджеттік өтінімдері қайта ұсынылатын болады. Қазалы ауданында орналастыру орындарын «E-qonaq» ақпараттық жүйесіне енгізуге қатысты тиісті жұмыстар жүргізілді. Ауданымызда статистикалық базасында тіркелген 8 орналастыру орындары бар. «E-qonaq» ақпараттық жүйесі туралы жұмыс істеп тұрған орналастыру орындары мен «Батыс Еуропа – Батыс Қытай» автокөлік дәлізінің бойындағы нысандарға арнайы хат &nbsp;жолданды. Нәтижесінде ақпараттық жүйеге 4 қонақ үй, 1 қонақ жайлы үйі және 2 кемпинг нысандары енгізілді», – дейді Қазалы ауданының кәсіпкерлік, өнеркәсіп және туризм бөлімі басшысы Ақтілеу Бөріқұлақов.</blockquote>Сала басшысының мәліметіне сүйенсек, ҚР Үкіметінің қаулысына сәйкес, шетелдіктер үшін туристік жарна мөлшерлемелерін 2023 жылға бекітуге қатысты тиісті жұмыстар кезең-кезеңімен жүргізілді. Қорытындылай келгенде, Қазалы аудандық мәслихатының кезекті II сессиясында қабылданып, «Қазалы ауданы бойынша шетелдіктер үшін 2023 жылға арналған туристік жарна мөлшерлемелерін бекіту туралы» шешімі шығарылды.Қазалыда кәсіпкерлерді қолдау шарасы өз деңгейінде жүргізілуде. Қазалы ауданы бойынша «Кәсіпкерлікті қолдау» бағытында 2023 жылы аудандық бюджеттен бөлінген қаржыға Қазалы ауданының кәсіпкер әйелдер, жас кәсіпкерлер, туризм күніне арналған бизнес форумдар өткізу жоспарлануда. Осы жылдың 3 наурызында әйел кәсіпкерлер үшін өздерінің мәселелерін қозғап, жетістіктерімен бөлісетін, тәжірибе алмасатын еркін сөйлесу алаңын құруға мүмкіндік алу бағытында ауқымды басқосу өткізілді.&nbsp;Айтулы шараға облыстық басқарма және қаржы институттары шақыртылып, мемлекеттік бағдарламалар шеңберінде бизнестерін дамыту мүмкіндіктері жайында жан-жақты түсіндіру, ақпараттандыру жұмыстары жүргізілді.ҚР Үкіметінің қаулысымен әлеуметтік кәсіпкерлік субъектілерінің тізілімін жүргізу қағидасына сәйкес, Қазалы ауданынан «Рауан» мектепке дейінгі шағын орталық» жауапкершілігі шектеулі серіктестігі әлеуметтік кәсіпкерлік субъектілерінің тізіміне енгізілу үшін өз өтінішін тапсырды. ҚР Ұлттық экономика министрінің бұйрығымен мектепке дейінгі білім беру саласы бойынша 1-ші санатпен тізілімге енгізілді.Жалпы ауданның әлеуметтік-экономикалық дамуына қазалылық іскер жандардың қосқан үлесі зор. Бір қуантарлығы, биыл 17 адамды жұмыспен қамтитын 5 кәсіпкерлік нысан пайдалануға берілді. Олар «Ali-Nur» сауда үйі, «Рабия» шағын маркеті, «Олжа» тұрмыстық заттар дүкені, «Амира» караокебары мен «Rockstar»караоке -лаунж бар.

Қазалыда кәсіпкерлер саны күн санап артып келеді 

<a href="https://kyzylorda-news.kz/">Kyzylorda-news.kz.</a> Бүгін Қызылорда облыстық білім басқармасының басшысы «Ustudy» аймақтық тестілеу орталығына барып, Ұлттық бірыңғай тестілеуге қатысып жатқан түлектерге сәттілік тіледі. Бұл туралы Қызылорда облысының білім басқармасының баспасөз қызметі хабарлады.&nbsp;Басқарма басшысы өткен жылдан бастап ҰБТ электронды форматқа көшірілді. Басқарма басшысы мұның ең басты артықшылығы – барлық процестің ашықтығы мен азаматтарға қолайлы жағдай жасалуында екенін айтты.Биыл&nbsp;облыста 8 210 мың бала мектеп бітірсе, оның 7 421-і ұлттық сынаққа қатысады. Ұлттық біріңғай тестілеудің кешегі алғашқы күнінде 286 түлек қатысса, бүгін 481 оқушы он бір жылғы білімін тезге салуда.Өңірде ҰБТ 3 мамандандырылған тестілеу пунктте өтуде. Олардың бірі осы «Ustudy» орталығы болса, қалған екеуі Қазалы және Жаңақорған аудандарында орналасқан. Орталық қызметкерлері тестілеу пунктінің негізгі талаптарға сай жабдықталғанын, қазіргі уақытта ҰБТ өткізілетін орындарда барлық талаптар сақталғандығын жеткізді.Орталықтың жұмыстарымен танысқан сала басшысы тестілеу кезінде түлектерге барлық жағдай жасалауын тапсырып, олардың қауіпсіздік шараларын да басты назарда ұстау қажеттігін ескертті.<figure class="image"><img src="https://knadmin.beoblood.kz/uploads/348839831_689817716190718_7471513046564250527_n_188d5ef66a.jpg" alt="348839831_689817716190718_7471513046564250527_n.jpg"></figure>

 Қызылорда облысында ұлттық сынаққа 7 421 талапкер қатысады

<a href="https://kyzylorda-news.kz/">Kyzylorda-news.kz.</a> Бүгін облыстық білім басқармасы мен оқу орталығының ұйымдастыруымен №264 мектеп-лицейінде “Кітапхана озық тәжірибе зертханасы” тақырыбында облыстық тәжірибе алаңы өткізілді.&nbsp;Тәжірибе алаңына облыстық білім басқармасының басшысы Мейрамбек Шермағанбет және барлық аудандардағы білім бөлімінің әдіскерлері мен кітапханашылары қатысып, өзара тәжірибе алмасты.Кітапханашылардың кәсіби шеберлігін шыңдай отырып, балалар мен жасөспірімдердің арасында кітап оқу мәдениетін арттыруды мақсат еткен тәжірибе алаңында Мейрамбек Зинабдинұлы қатысушыларға сәттілік тілеп, аймағымызда “Оқуға құштар мектеп” жобасы аясында атқарылып жатқан жұмыстарға тоқталып өтті.<blockquote>«Кітап - адамзат баласының баға жатпес асыл қазынасы болып табылады. Балаларды кітап оқуға баулу мәселесі күн тәртібінен түскен емес. Биыл осы мақсатта облыстық бюджеттен бөлінген 120 млн. теңгеге 70 аталым бойынша 30 мыңнан астам көркем әдебиет алынып отыр. Бұл оқушыларымыздың кітапқа деген қызығушылығын оятуға және “Оқуға құштар мектеп” жобасын тиімді жүргізуде өз септігін тигізетін болады», - деді басқарма басшысы.</blockquote>Жиын соңында қатысушылар кітапханашылар арқылы кері байланыс білдіріп, алдағы уақытта бүгінгі семинардан алынған әдіс-тәсілдер мен тәжірибелерді өз жұмыстарынан көрініс табатындарын айтып, өз алғыстарын білдірді.<img src="https://knadmin.beoblood.kz/uploads/347239876_787659092773726_7966984081188700082_n_ebbc2f90ad.jpg" alt="347239876_787659092773726_7966984081188700082_n.jpg"><img src="https://knadmin.beoblood.kz/uploads/347402017_6123016447785060_8858805479887545325_n_3794aff3f4.jpg" alt="347402017_6123016447785060_8858805479887545325_n.jpg">

Қызылордада кітапханашылардың тәжірибе алаңы өтті

<a href="https://kyzylorda-news.kz/ru">Kyzylorda-news.kz.</a> Қазалы ауданының әкімі Мұхтар Оразбаевтың тұрғындарымен кездесуі Қарашеңгел мен Ғ.Мұратбаев ауылдық округтерінде жалғасты.&nbsp;Жалаңтөс батыр ауылында өткен кездесуде Мұхтар Әуесұлы ауданымызда жыл басынан бері атқарылып келе жатқан жұмыстарға тоқталып, алдағы мақсат-міндеттерді де тілге тиек етті.&nbsp;Мұнан соң тұрғындар сөз алып, ұсыныс-пікірлерін жеткізді. Нақтыласақ, елді мекен ішінде жол мәселесі көтерілді. Бұл жөнінде аудан басшысы тиісті жұмыстар жүргізіліп жатқанын айтып, барлығы кезең-кезеңімен шешім табатынын жеткізді.&nbsp;Жиында ауыл ақсақалдары әрбір отбасындағы бала тәрбиесіне қатысты ойларын ортаға салды. Сонымен қатар, округтегі атқарылып жатқан жұмыстарға алғыстарын айтып, батасын берді.&nbsp;Айта кетейік, Қарашеңгел ауылдық округіндегі тұрғындармен кездесуден соң аудан басшысы бірқатар ауыл тұрғындарын жеке-жеке қабылдап, өтініш-тілектерін тыңдады.&nbsp;Ғ.Мұратбаев ауылдық округіндегі орталық саябақта өткен кездесуде аудан әкімі Мұхтар Оразбаев ел ішіндегі жүйелі жүріп жатқан жұмыстарды айтып, алдағы күннің еншісінде тұрған жоспарлармен де бөлісті. Сондай-ақ, ауыл халқының мұң-мұқтажын тыңдап, пікірлеріне құлақ асты.&nbsp;Ауыл ақсақалдары Әйтеке би кенті мен округ арасындағы жолдың сапалы болуын әрі уақытылы аяқталуын сұрап отыр. Бұл жөнінде аудан басшысы жолдың ұдайы бақылауда болатынын және жуырда ғана өзі құрылыс басына арнайы барып, жауапты мамандарға тиісті тапсырмалар жүктегенін жеткізді.&nbsp;Сонымен қатар жиында тұрғындар тарапынан мал шаруашылығына қатысты сауалдар да қойылды. Сұрақтар бойынша аудан әкімі мен тиісті сала басшылары жан-жақты түсіндіріп берді.

Қазалы ауданының әкімі Мұхтар Оразбаев ауылдық округтерді аралады 

<a href="https://kyzylorda-news.kz/">Kyzylorda-news.kz.</a> Қызылордада пробация есебіндегі азаматтар қайтарымсыз гранттың көмегімен кәсіптерін ашып жатыр. Қызылорда облысы бойынша Қылмыстық атқару жүйесі департаментінің аудандық, қалалық пробация қызметтеріндегі пробациялық бақылау белгіленген азаматтар жеке кәсіп ашып, ісін дөңгелетіп отыр. Соның бірі – Сырдария аудандық пробация есебіндегі &nbsp;29 жастағы Самат есімді сотталған азамат.Ол ҚР ҚК-нің &nbsp;188 бабының 3 –бөлігімен &nbsp;2 жыл шектеу жазасына сотталып, оған пробациялық бақылау белгіленген. 2022 жылдың мамыр айында пробация есебіне алынған Самат &nbsp;жеке кәсіп ашсам деген ниетпен пробация қызметкерлерінен көмек сұрайды.Пробация қызметкерлері &nbsp;құқықтық көмек көрсетіп, нәтижесінде 2023 жылдың сәуір айында «Бастау Бизнес» жобасы аясында кәсіпкерлік негізінде Атамекен кәсіпкерлік палатасында оқытылып, мал шаруашылығын дамыту &nbsp;бойынша бизнес жобасын дайындап, 1 млн 380 мың теңге көлемінде &nbsp;мемлекет тарапынан қайтарымсыз грант ұтып алды. Қазіргі таңда ол &nbsp;мал басын көбейту жұмыстарымен айналысып жатыр.<blockquote>«Жеке кәсібімді ашу көптен арманым еді. Сол арманым жүзеге асып, бүгінде отбасымды табыспен қамтамасыз ету мүмкіндігін алдым. Алдағы уақытта – мал басын көбейтіп, кәсібімді кеңейтуді жоспарлап отырмын. Мемлекет тарапынан біз секілді азаматтарға көрсетіліп жатқан осындай қолдауларға өз ризашылығымды білдіремін», - дейді сотталған азамат.</blockquote><blockquote>«Жалпы пробациялық бақылау белгіленген сотталғандарды тіркелген күннен бастап зерделеу жұмыстарын жүргіземіз. Жұмыссыз болса жұмысқа орналастыруға, жеке кәсіп ашқысы келетіндерге құқықтық көмек беріп құжаттарын жинақтауға көмектесеміз. Түрлі мәдени –спорттық шараларға қатыстырып, облыстағы мұражайларға, кітапханаларда өтетін шараларға жиі қатыстырамыз. &nbsp;Жеке кәсіппен айналысуға ұмтылғандардың қатары артып келе жатқандығы бізді де қуантады», - деді Сырдария аудандық пробация қызметінің инспекторы Ермек Шанжаров.</blockquote>

Қызылордада пробация есебіндегі азамат кәсібін ашты

<a href="https://kyzylorda-news.kz/">Kyzylorda-news.kz.</a> Ел іші – өнер кеніші. Шиелі өнерпаздары республиканың мәдениет министрлігі тарапынан өнер ұжымдарына берілетін «халықтық» деген абыройлы атақты алпысыншы жылдардың аяғынан бастап ала бастады. Мұндай мәртебелі дәрежеге жеткен жеті өнер ұжымы бар. Бұл бір аудан үшін аз көрсеткіш емес.Алғаш рет мұндай атақты 1969 жылы аудандық мәдениет үйінің халық аспаптар оркестрі, кейін осындағы театр жеңіп алған. Содан соң «Қазақстанның 30 жылдығы» атанып келген қазіргі Бала би ауылының өнерпаздары да халық театры атанып, гастрольдерге шығып, таланттарымен таңырқатып жүрді. Өнер көрсетіп жүргендердің бірі күрішші, бірі механизатор, енді бірі шопан, мұғалім деген сияқты ауыл еңбеккерлері еді. «Нартай сазы» фольклорлық ансамблі, «Жас дәурен» ән-би ансамблі, Ноғайбаевтардың отбасылық ансамблі де осындай абыройға жеткен. Бұл айтуға оңай, ал ол үшін қаншама ізденіс, ұйымдастырушылық және өзгелерді қайталамайтын өзіндік мәнер, келбет, ең бастысы – көрген жан қайта көргісі, тыңдағысы келетіндей іңкәрлік туғызатын талант қажет. Бұл ұжымдардың осындай дәрежеге көтерілуіне ағайынды Әшімхан, Әлімхан Оспановтар да көп еңбек сіңірді.Бір кездегі Нартай Бекежановтан бастап, кейінгі театр әртістері Мейірман Нұрекеев, Ғазиза Әбдінәбиева, Шайтұрсын Әбдібаев, сазгер, өнер зерттеуші Мүлкаман Қалауов, республикалық «Гүлдер» ансамблін ұйымдастырушылардың бірі – Серік Елеусізов, Құрманғазы атындағы оркестрдің бас концертмейстері, «Отырар сазы» оркестрінің дирижері Қошқарбек Тасболатов, жыршы Шымболат Ділдебаев, әнші Әлмырза Ноғайбаев, айтыскер ақын Махамбетқали Тұрсанов Шиеліден шыққан таланттар екенін ауыз толтырып айта аламыз және бұл тізімді жалғастыра беруге болады. Олардың арасында ұзақ жылдар ауданның мәдениет саласын басқарған Әшімхан Оспанов та бар. Биыл «Мәдениет қайраткері» төсбелгісінің иегері көзі тірі болғанда 70 жасқа толар еді.Сәрсенбі күні аудандық мәдениет үйінде Әшімхан Оспановты еске алу кеші өтті. Алдымен мәдениет майталманына ¬арнап ескерткіш тақтайшаның ашылу рәсімі жасалды. Одан соң шара «Өмірі – өнер, ғұмыры – ғибрат» атты облыстық үздік клуб қызметкерлерінің байқауымен жалғасты.&nbsp;Шараны ашып берген аудандық мәслихат төрағасы А.Жандарбеков саналы ғұмырын ауданның мәдениет саласына арнаған Ә.Оспановтың өмір жолына тоқталып, байқауға қатысушыларға сәттілік тіледі.Мәдениет қызметкерлерінің кәсіби біліктілігін арттырып, үздік тәжірибелерін анықтау әрі тарату, шығармашыл мамандарды қолдау жұмысының инновациялық әдіс-тәсілдері мен жаңа идеяларды қолданысқа енгізуді мақсат еткен сайысқа облысқа қарасты жеті ауданнан 10 клуб қызметкері қатысты. Олар өзін таныстырып, профайл дайындау, Ә.Оспановтың 70 жылдығына орай ұйымдастырылатын шараның сценарийін ұсыну, өз өнерін көрсету секілді үш кезеңнен тұратын сыннан өтті.Байқау қорытындысы бойынша әріптестерінен оқ бойы оза шыққан Шиелі кенті «Арман» мәдениет үйінің аккомпаниаторы Өміржан Мінуаров бас жүлдені жеңіп алды. І орын Жалағаш ауданы, Аққыр ауылдық клубының әдіскері Сандуғаш Жұбанова мен Жаңақорған ауданы, Түгіскен ауылдық мәдениет үйінің директоры Бақыт Тасходжаеваға, ІІ орын Қармақшы ауданы Шәмшат Төлепова атындағы аудандық мәдениет үйі халық театрының режиссері Мадияр Махамбетұлына, ІІІ орын Арал ауданы, Аралқұм ауылдық клубының әдіскері Ақмарал Серікбаева мен Сырдария ауданы, Қалжан ахун ауылдық клубының әдіскері Гүлжанат Сырғабаеваға бұйырды. Барлық қатысушыларға алғыс хаттар мен бағалы сыйлықтар табысталды.

Өмірін өнермен өрнектеген - Әшімхан Оспанов

<a href="https://kyzylorda-news.kz/ru">Kyzylorda-news.kz.</a> Бүгін Қазалы аграрлы-техникалық колледжінде «Qaisar» партиялық жобасы аясында «Отанды қорғау – отты жастар мақсаты» тақырыбында әскерге шақыруды насихаттау, жастардың әскерге деген қызығушылығын арттыру мақсатында колледж жастарымен кездесу өткізілді.&nbsp;Кездесуге аудандық қорғаныс бөлімі бастығының орынбасары Серік Саянов, «AMANAT» партиясы Қазалы аудандық филиалы Атқарушы хатшысы Нұрғиса Жалғасбаев, аудандық жастар ресурстық орталығының директоры, «Жастар рухы» жастар қанатының аудандық бөлімше басшысы Нұрбек Ақпанбетов, Қазалы қалалық жастар ресурстық орталығының директоры Асқар Масақов қатысты.&nbsp; Жалпы «Qaisar» партиялық жобасының басты мақсаты – жастардың бойында патриоттық сананы және әскери қызметке деген қызығушылықты қалыптастыру, Отанға деген сүйіспеншілікті арттыру, әскери-патриоттық рух қалыптастыру.&nbsp;Шараға қатысқан аудандық қорғаныс бөлімі бастығының орынбасары Серік Саянов Отан алдындағы парызын өтеу әрбір ер жігіттің азаматтық борышы, тәуелсіз еліміздің қауіпсіздігін қамтамасыз ету, көк туымызды әрдайым биікке көтеру бойында Отансүйгіштік қасиет пен патриоттық сезімі бар жастардың қолында екендігін айта келе, әскерге шақырудың талаптары мен тәртібін жастарға кеңінен түсіндіріп берді.&nbsp;Бұдан соң аудандық филиал Атқарушы хатшысы Жалғасбаев Нұрғиса сөз алып, әрбір азамат Отан алдындағы борышын басты парызым деп сезініп, Тәуелсіз еліміздің тұғырлы болуына атсалысудың маңыздылығына тоқталып, бүгінгі кездесудің жастардың бойында сондай қасиеттерді қалыптастыруға үлкен септігін тигізетінін атап өтті. Кездесу соңында болашақ сарбаздардың ұсыныс-пікірлеріне жауап берілді.

Қазалыда «Qaisar» партиялық жобасы аясында жастармен кездесу

<a href="https://kyzylorda-news.kz/">Kyzylorda-news.kz.</a> ​Бүгін Қызылорда облысы әкімінің бірінші орынбасары Серік Қожаниязов қаладағы электрмен қамту нысандарын аралап, жұмысымен танысты.Айта кетейік, облыста барлығы 10121 шақырым электр желілері мен 1867 қосалқы станция бар. Олардың негізгі бөлігі өткен ғасырдың 60-шы, 70-ші жылдары қолданысқа берілген. Бүгінде тозу деңгейі 70 пайызға жеткен.Осы күндері облыстың бір тәуліктегі электр тұтыну көлемі 120 МВт шамасында. Бұл көрсеткіш шілде-тамыз айларында 150-170 МВт-тан асып, электр желілерінің жүктемесі артады.Алдын-ала есептеулерге қарағанда, электр жүйелерінің тозу деңгейін 30 пайызға төмендету үшін 153 млрд. теңге қаржы қажет. Бұл ауқымды қаражат болғандықтан, облыстық бюджет есебінен былтыр 548 млн. теңге бөлініп, «КРЭК» АҚ-ның жарғылық капиталы ұлғайтылды. Қызылорда қаласының 35/10 кВ-лық «Силикатная», «Промышленная» және «Комсомол» қосалқы станцияларындағы күштік трансформаторлар ауыстырылды.Жыл басында жауын-шашын салдарынан облыс орталығы мен бірқатар елді мекенде жарық өшкені белгілі. Облыстағы жөндеуді қажет ететін электрмен қамту нысандары анықталып, жаңғырту-жөндеу, ауыстыру жоспары жасалды. Оның бірінші кезеңіне облыстық бюджеттен 1,6 млрд. теңге қаражат бөлінді.Бұл қаржыға кернеулігі 10/0,4 кВ 35 қосалқы станция ауыстырылып, 27 дана кірпіштен жасалған ескі күштік трансформатор күрделі жөнделеді. Оған қоса 32 шақырым желі ауыстырылып, апаттық бригадалардың жедел әрекет етуі үшін 16 дана УАЗ автокөлігі сатып алынады.

Қазақстан және Қызылорда облысының жаңалықтары