Kyzylorda-news.kz. Мемлекеттік және жергілікті бағдарламалар аясында Жалағаш ауданында бірқатар маңызды әлеуметтік жоба іске асырылуда. Атап айтқанда «Өңірлерді дамыту» бағдарламасы шеңберінде Жалағаш кентінің кіреберісі, орталық алаң және ішкі көшелер абаттандырылуда. Елді мекендерде тұрмыстық қатты қалдықтар полигоны қоршалып, аяқ су жүргізіліп, насос сатып алынды.Ұлттық қор есебінен халықтың әлеуметтік жағынан осал топтарына 50 тұрғын үй сатып алуға &nbsp;480 млн. теңге бөлінді. Қазір жеке кәсіпкерлер аудан орталығынан тұрғын үйлер құрылысын салуда.«Учаскелік полиция инспекторларын тұрғын үймен қамтамасыз етуге биыл аудандық бюджеттен 40 млн. теңге бөлініп, қазір мемлекеттік сатып алу рәсімдері жүргізілуде. Нәтижесінде 10 елді мекеннен тұрғын үй табысталады. Бюджет қаражаты есебінен жүзеге асырылатын жобалар жыл аяғына дейін толық аяқталады. Сапасы жеке бақылауымда», - деді аудан әкімі Асқарбек Есжанов.Ауданда жалпы құны &nbsp; &nbsp;13,1 млрд. теңгені құрайтын 35 нысанның жоба-сметалық құжаттары дайындалып, республикалық және облыстық бюджеттен қаржыландыру үшін &nbsp;салалық басқармаларға бюджеттік өтінім тапсырылды.

Баспанаға мұқтаж  жалағаштық отбасыларына 50 тұрғын үй беріледі

Kyzylorda-news.kz. Мәжіліс депутаттары ұлт саулығына қауіп төндіретін вейп пен электронды темекі мәселесін бірнеше жылдан бері ұдайы көтеріп келеді, деп хабарлайды ҚазАқпарат.Депутаттар Еділ Жаңбыршин, Жұлдыз Сүлейменова, Ғалымжан Елеуов, Дәулет Тұрлыханов және Гүлдара Нұрымова осы мәселеге қатысты Үкімет басшысына бірнеше депутаттық сауал жолдап, «AMANAT» партиясы жанындағы Білім беру және денсаулық сақтау мәселелері жөніндегі республикалық кеңесте кеңінен талқылаған болатын,Депутаттардың айтуынша, вейп пен электронды темекінің ұлт саулығына келтіретін залалы кәдімгі темекіден асып түспесе, кем емес. Сондықтан оған болашақ ұрпақтың денсаулығы үшін заңнамалық шаралармен қарсы тұратын уақыт жетті.Кеңес төрағасы Жұлдыз Сүлейменова атап өткендей, партиялықтар бұған дейін де жаңа жаман әдетке қарсы күресу үшін Үкіметке бірқатар жүйелі іс-шара ұсынған болатын.<blockquote>«Түркістанда өткен Ұлттық құрылтайда Президент Қасым-Жомарт Тоқаев вейп және түрлі электронды темекілерді ұлт саулығына қауіп төндіретін кесел деп атап өтті. Ол электронды темекінің бәріне қолжетімді және оның зиянсыздығы туралы түрлі жарнаманың көбейіп кеткеніне алаңдаушылық білдірді. Мемлекет басшысы осы қауіпті үрдіспен күресу үшін жүйелі және шұғыл шаралар қабылдау қажет екенін айтты. Осыған байланысты біз Денсаулық сақтау, Оқу-ағарту министрліктерінің, Прокуратураның, «Атамекен» ҰКП және басқа да мекемелердің өкілдерімен жан жақты талқыладық», - деді Ж.Сүлейменова.</blockquote>AMANAT партиясы жанындағы білім беру және денсаулық сақтау мәселелері жөніндегі республикалық қоғамдық кеңес отырысында Қазақстан Парламенті Мәжілісінің Экология және табиғи ресурстар комитетінің төрағасы, Мәжіліс депутаты Еділ Жаңбыршин вейп және электронды шылымдардың сұйықтығына, оларды тауар ретінде енгізуге және оның айналымына толық тыйым салу туралы ұсынысты Үкіметке жолдады.Осы мәселеге қатысты пікір білдірген Оқу-ағарту вице-министрі Еділ Оспан вейп шегуді жастар арасында белең алған өзекті мәселелердің қатарына қосуға болатынын айтты.<blockquote>«Өкінішке қарай, бүгінде жастар түрлі жаман әдетке бой алдыруға бейім. Нашақорлық, ойын құмарлық, буллинг және кибербуллингпен қатар вейпинг те үлкен проблемаға айналды. Қазақстан тұтынушылар лигасының ақпараты бойынша, Астана мен Алматыда соңғы 6 айда вейп сатылымы 372%-ға өсті. Елімізде вейп сататын 6 мыңнан астам сауда нүктесі бар. Оларға толықтай тыйым салуды Мәжіліс депутаттары мен еліміздің Денсаулық сақтау министрлігінің өкілдері қолдады. Бұл жерде біз балаларымыздың болашағын басты орынға қойып отырмыз», - деді ол.</blockquote>Денсаулық сақтау министрлігінің мәліметінше, Қазақстанда 2018 жылы жүргізілген зерттеудің нәтижесіне сәйкес, 15 жастағы ұлдардың 14%-ы және қыздардың 6%-ы вейп шегіп көрген. Бұл зерттеуді 2022 жылы қайталаған кезде вейпті тұтыну көрсеткіші 3,6%-ға күрт өскені анықталды.Айта кету керек, оқушылар арасындағы «Аналар кеңесінің» өкілі, Қоғамдық кеңес мүшесі Баян Ахатай вейпке қарсы қозғалысты белсенді түрде көтеріп келеді. Бірнеше жылдан бері жұмыла атқарған жұмыстың нәтижесінде Үкіметтің ведомствоаралық комиссиясы Қазақстан Парламенті Мәжілісі депутаттарының вейп және электронды шылымдардың сұйықтығына, оларды тауар ретінде енгізуге және оның айналымына толық тыйым салу туралы нормасын қолдады.

Елімізде вейп пен электронды темекіге толық тыйым салынуы мүмкін

Kyzylorda-news.kz. "Қазгидромет" РМК 30 шілдеге арналған Қазақстан аумағындағы синоптикалық жағдай мен қауіпті ауа райы құбылыстары туралы болжамын жариялады.Ауа райы болжамына сәйкес, Қазақстанда тұрақсыз ауа райы сақталады.Атмосфералық фронтальды учаскелердің өтуімен Қазақстан Республикасының басым бөлігінде ауа райы тұрақсыз болады, найзағай ойнап, жаңбыр жауады. Қазақстан Республикасының батысында шаңды дауыл күтіледі. Тек республиканың оңтүстігінде күн райы жауын-шашынсыз болады, республика бойынша жел күшейеді болжанды.Алматы, Түркістан, Ақтөбе, Қарағанды, Қызылорда, Шығыс Қазақстан, Ұлытау, Абай, Жетісу облыстарының басым бөлігінде, Қостанай облысының оңтүстігінде, Павлодар облыстарының оңтүстігінде, шығысында төтенше өрт қаупі бар.

30 шілдеге арналған күн райы болжамы жарияланды

<a href="https://kyzylorda-news.kz/ru">Kyzylorda-news.kz.</a> Қазалы – қазақ жеріндегі алғашқы мектеп ашылған санаулы тарихи мекеннің бірі саналады. Жақында осы тақырып төңірегінде ой қозғамаққа бекіндім. Журналистік жолда материал дайындау барысында деректік құжаттар мен мұрағаттық жазбаларға жүгінетін әдетім бұл жолы нәтижесін бермеді. Тұңғыш білім ошағы туралы білетіндер де болмады, мардымды мағлұмат та табылмады. Бізге аудандағы ұстаздар қауымына арналып шығарылған қалың энциклопедиядан бұл білім шаңырағының бірінші ұстазы Момын Байдосов болғаны туралы бір ауыз сөзбен жазылған жолды місе тұтуға тура келді.&nbsp;Шынында Момын Байдосов кім? Жергілікті жердің тумасы ма? Оның Қазылыға сіңірген еңбегі қандай?&nbsp;Алғаш болып бас сұққан орнымыз– аудандық орталықтандырылған кітапхана болды. Мұндағы мамандар өтінішіме орай ауданда шығарылған мұғалімдер жайлы қос қалың кітапты ұсынды. Өңірден шыққан сала озаттары туралы жинақты қайта-қайта ақтарып, кіріспеде келтірілгеннен өзге Момын Байдосов жайындағы жазбаны кезіктіре алмадық. Ұжымдық, ізденіске толы еңбектіңбасқы бетіне «Қазалыдағы алғашқы ағартушы Момын Байдосов» болды деген сөзді жазудың әбестігі болмас еді деген пікір ойымызға оралды.&nbsp; Бір білсе, тарихышылар біледі деген сеніммен тәжірибесі толысқан, осы пәннен дәріс беретін және зейнеткерлікке шыққан бірнеше мұғалімге қоңырау шалғанымызбен, ешбірінен мардымды жауап ала алмадық.&nbsp;Аудан орталығының бастауы Қазалы қаласында қаланғанын негізге алып, ондағы Ғани Мұратбаев атындағы мемориалдық музейге хабарластық. Біз сұратқан ақпар негізгі жұмыстарына кірмесе де, мұрағаттағы ғылыми қызметкерлер қала тарихы туралы кітап көшірмелерін жолдады. Ал өлекетану ісімен тікелей айналысатын Әйтеке би кентіндегі музейдегілер: «Бұл бізде әлі зерттелген жоқ», – деген қысқа жауаппен ғана шектелді.&nbsp;Сонда осы уақытқа дейін қазақтың ағартушылық саласында тыңнан түрен салып, ұлт мектебінің қалыптасуында із қалдырған адам туралы сұрау салудың қажеттілігі болмағаны ма?&nbsp;Ізденісімізді одан әрі тоқтатпай, ғаламтор мен бұқаралық ақпарарт құралдары қызметіне жүгіндік. Ол жерден тақырып турасында сана саңлауын сәулелендірген Молдахмет Қаназдың мақаласына кезіктік. Алғашқы мектеп тарихымен бірге сол кездегі әлеуметтік ахуал жайы кеңінен тарқатылған еңбекте дәйекті дерекке иек артқан жазушы: «…Момын Байдосов мұғалімдікпен қатар, қоғамдық жұмыстарға да тартылған. 1873 жылыҚазалы уезі басқармасының аудармашы сыр етінде қамқа шапанмен марапатталған. Тағы бір құжат: «на основание предписания управляющего туземными населениями правого фланга туркестанской области от 21 декабря 1868 года за 1435 выдано учителю киргизской школы Байдосову за усердную и ревностную его службу сто рублей»», – деген жолдарды келтірген.&nbsp;Сондай-ақ Момын Байдосов туралы 1878 жылдың 24 қаңтарында Сырдария облысының әскери губернаторы полковник Маевский Түркістан генерал-губернаторы атына жазылған хатта: «Хотя Мумун Байдусов, по происхождению на поступление на государственную службу право не имеет, но принимая во внимание с одной стороны хорошее его поведение и весьма добросовестное исполнение им объязанностей вольнонаемного переводчика при Казалинском уездном управлении с 1868 года и смотрителем, и учителя Казалинской русско-киргизской народной школы с 1864 года, и с другой, что Байдусов успешно окончивший полный курс наук русско-киргизской школы (7 летний) в Оренбурге при бывшей Оренбургской пограничной комиссии », – депмәлімет келтіреді.&nbsp;Автор мақаласының соңында: «Жетпісінші жылдары Момын негізін қалаған 17 мектепке Ғани атын беру мәселесі туындаған», – дегенді айтса, журналист Нұрперзент Домбай «Қасиетті Қазалы» атты 2010 жылы «Ана тілі» газетінде жарияланған еңбегінде «Қазалы қаласындағы қазіргі Ғани Мұратбаев атындағы 17 қазақ орта мектебі М.Байдосов ашқан мектеп негізінде қалыптасты деуге толық негіз бар», – деген тұжырым айтады. Мұны оқыған бойда аталған оқу ордасына телефон соқтық. Мұнан білгеніміз, біз айтып отырған жайттың мектепке қатысы жоқтығы. Құжат бойынша 1938 жылы салынған оқу орнығимараты тарихын сол кезден бастайтын білім ұясындағылар Момын Байдосов ашқан мектепті өздерінің жұмыс істейтін орындарына телудің негізсіздігін жеткізді.&nbsp;Тарихққа жүгінсек, 1850-1869 жылдары жұмыс істеген Орынбор шекаралық комиссиясы жанынан ашылған қазақ мектеп-интернаты ерекше рөл атқараған.Оқушыларға білім берумен бірге писерлер мен тілмәштар дайындауды мақсат тұтқанорында тағылым алғандар туралы тізімдеме Орынбор мемлекеттік мұрағатында сақталған. Ол жерден алты Алашқа аты мәшһүр қазақтың көрнекті ағартушылары Ыбырай Алтынсарин, Нұрым Мұңсызбаев пен Шахмұрат Құлыбековтермен бірге біз айтып отырған қостанайлық Момын Байдосов та бітіріп шыққан.&nbsp;Қазақстан Республикасы Орталық музей мұрағатында тіркелген материалда: «Қазалыда қазақ мектебін ашу қарекеті 1860 жылы басталғанмен, қаржы тапшылығы, құрылыс саймандарының жер түбіндегі орыс қалаларынан жеткізілуі, дайын мұғалім де жоқ, баяу жүзеге аса бастады. 1862 жылдың 3 қарашасында Орынбор генерал-губернаторы А.А.Катенин сенімді инженер Геннрихке 25 оқушыға арналған қазақ мектебінің сызбасын дайындауды тапсырды. Үй – алты бөлме. Бір сынып, оқытушыларға арналған екі бөлме, асханасы да бар (ҚРОММ. 382 қор, 11 іс). Сызба Қазалыға губернатордың 2413 қатынасымен жетті. Оқу – төрт жылдық. Жылына 1703 рубль жұмсалуға тиіс. Тек сенімді қазақтардың балаларын ғана оқыту керектігі де қатаң тапсырылған», – деп көрсетілген.&nbsp;Генерал-губернатор Қазалы қаласының комендантына 1862 жылдың 20 қарашасында жолдаған сол қатынасында оған қарауындағы офицерлер, қала тұрғындарымен жиын өткізіп, осы мектептің салыну жайын талқылап, 1863 жылы ашылуын нықтаған.&nbsp; 1862 жылы мектептің іргетасы қаланған.&nbsp;1863 жылдың 24 мамырында Орынбор әкімшілігі 1 форттың қазақ мектебінің смотритель-мұғалімдігіне 100 рубль еңбекақымен Жолмұхаммед Байжановты бекіткен. Ол Қазалыдағы қазақ мектебін ашуға бір жерде сол жылдың 23 маусымында, екіншісінде 11 шілдеде келді деп көрсетілген. Мұғалім өзімен бірге араб, парсы, татар тілдерін оқытатын 12 кітап ала келген. 1 форттың бастығы смотрительге пәтер, қажетті қызметші бермеген.Қазалыдағы тұңғыш қазақ мектебі 1863 жылдың 1 қыркүйегінде ашылған. Сол жылы форт басшылығында қазақ мектебінің смотрителі Жолмұхаммед Байжанов орыс тілін нашар меңгерген, орыс балаларын үйрете алмайды деген шағым түскен.&nbsp;1864 жылдың 14 қаңтарында Жолмұхаммед Байжанов Сырдария жүйесінің бастығы Веревкинге өз арызы бойынша Орынборға жіберуін өтінеді.&nbsp;1864 жылдың 12 қарашасында Қазалыға Орынбор қырғыз мектебінің түлегі «учитель киргизской школы» болып Момын Байдосов келеді. Орынбордан шығарда оған 16 рубль 36 тиын «прогон», жүз рубль «подъемный» беріледі.&nbsp;Ол ұйымдастыру кезеңіндегі қиыншылықтарға қарамастан, бұл мектепте 1877 жылдың 1 қыркүйегіне дейін үзбей 13 жыл ұстаздық қызмет атқарған. Аудармашылық қызметіне 1873 жылы 600 рубль алған. Момын бос уақытында қала маңынан екі десятина жер алып, егін салған. Алайда ұстаздың кейінгі өмірі беймәлім.&nbsp;Осылайша ұлағат иесі қиын-қыстау кезеңде патша қызметкерлерінің көңілін таба жүріп, қазақ мектебінің отын өшірмеді. Әлі түсініктері толық қалыптаспаған ортада дала жұртын төзімділікпен сауаттандыра біліп, өз бойындағы қуатын халық мақсаты үшін аямай жұмсап, Қазалыға білім шамшырағын жағып, өмір шындығын озық идея тұрғысынан таныта білген аса қажырлы қоғам қайраткері атанды. Сыр өңірінде тұңғыш қазақ мектебін ашып, балалар зердесіне білім дәнін сепкен атпал азаматтың есімі тарихта қалғанымен, саналы ғұмырын арнап, тер төккен орнында ешқандай белгі сақталмаған. Оған қандай ықылас-ынта бөлінсе де талассыз, даусыз. Себебі қазаққа Ыбырай Алтынсариннің абыройлы есімі қандай қастерлі болса, Момын Байдосов та сондай биіктен орын алуға лайық тұғырлы тұлға.

Қазалыдағы алғашқы ағартушы 

<a href="https://kyzylorda-news.kz/ru">Kyzylorda-news.kz.</a> Жалағаш ауданында мәдениет саласы тың серпінмен дамып келеді. Бұған аудан өнерпаздарының шығармашылығын ұдайы дамытуға басымдық беруі басты себеп болса керек. Аудандағы мәдениет ұйымдары ағымдағы жылдың І жартыжылдығында ұлттық мәдениетті ілгерілетуге және дәстүрлерді жаңғыртуға, салауатты өмір салтын насихаттауға бағытталған түрлі форматтағы 363 іс-шара, оның ішінде театр қойылымдары, шығармашылық конкурстар, фестивальдер, конференциялар, акцияларды ұйымдастырып, өткізді. Оған 62 401 көрермен тартылған. Оның ішінде 12-сі онлайн режимде өткізіліп, 2 370 қаралым болған. Есепті кезеңде өткізілген іс-шарлардың 2-еуі облыстық шаралар болса, мұнан бөлек ақындар айтысы мен оқырмандар конференциясы да ұйымдастырылған.&nbsp;Аудан үшін биылғы жылдың басты ерекшелігі мемлекет және қоғам қайраткері Т.Жүргеновтің 125 жылдық мерейтойын 22 қыркүйекте атап өту жоспарлануда. Бұл бағытта «Түркі әлемінің Темірбегі» атты облыстық ақындар айтысы өткізілсе, Түркістан облыстық Ы.Алтынсарин атындағы балалар кітапханасымен бірлесіп, онлайн Zoom платформасы арқылы «Түркі әлемінің тарланы» атты тарихи конференция ұйымдастырылды. Қазақ руханиятының дамуына зор үлес қосқан тұлғаның есімін халық жадында сақтап, өнегелі ісін жастарға үлгі ету мақсатында жыл басынан бері 45 мәдени-көпшілік шара ұйымдастырылып, 1 206 көрермен қамтылған.«Ұлттық рухани жаңғыру» жобасы аясында «Dombyra» ұлттық телеарнасынның тарихи-танымдық мәдени бағдарламасында Жалағаш ауданының тарихы мен мәдениеті туралы екі бөлімнен тұратын арнайы шығарылымы көрермен назарына ұсынылған. Сонымен қатар «Abai TV» мәдени-ағарту телеарнасының ұлы тұлғалардың өмірі мен шығармашылығын насихаттау мақсатында &nbsp;«Тарих. Тағдыр. Тағлым» бағдарламасының арнайы шығарылымына Бұқарбай батыр Естекбайұлының жары Шынар туралы деректі фильм түсірілімі ұйымдастырылған. Қ.Қазантаев атындағы мәдениет үйінің жанындағы Халық театры Ерсайын Төлеубайдың «Жеңгетай» комедиясын Нартай Бекежанов атындағы академиялық қазақ музыкалық театрында сахналады. &nbsp;Ауданда жас таланттарды табу, балалар мен жасөспірімдерге шығармашылық және көркем-эстетикалық білім беруді қолдау бағытында мәдениет үйлері мен клуб кәсіпорындарында 95 үйірме жұмыс жасауда. Үйірмелерге қатысушылар саны 1073-ке жетіп отыр. Мәдениет үйлері мен клубтарының көркемөнерпаздары 2023 &nbsp;жылдың І жартыжылдығында облыстық байқаудан 34, республикалық байқаудан 9, халықаралық байқаудан 8 жүлделі орындарды иеленді. &nbsp;Кәсіпорындардың 2023 жылдың І жартыжылдығында ақылы қызмет жоспары 5070 мың теңге, орындалуы 3251,0 мың теңге, яғни 64,1 пайызға орындалған.&nbsp; Кітапханалардағы қызмет көрсету жұмыстарының жай-күйі және жаңа ақпараттық технологияларды енгізу барысы өз дәрежесінде жүргізілуде. Аудандық орталықтандырылған кітапханалар жүйесінің жалпы кітап қоры 373930 дана кітапты құрайды. Жалпы оқырмандар саны 9511-ге жетіп отыр. Аудан кітапханаларында кітап басылымдарын цифрлық форматқа көшіру жұмыстары жалғасуда. Аудандық кітапхана қорындағы 907 дана жергілікті ақын-жазушылардың кітаптары мен 2256 дана жергілікті мерзімді басылымның электрондық көшірмелерін санды форматқа көшіріп, бүгінгі күнге дейін 740 оқырманның &nbsp; пайдалануына мүмкіндік берілген.&nbsp;Мәдениет саласы қызметінің негізгі бөлігі тарихи-мәдени ескерткіштерді қорғау болып табылады. Ауданда есепке алынған 71 тарих және мәдениет ескерткіштердің 1-еуі республикалық &nbsp;маңызы &nbsp;бар, 30-ның жергілікті маңызы бар, 40 алдын ала есепке алу тізіміне енгізілген. Аудан бойынша 17 ескерткішке QR-код тақтайшалары орнатылды. Аудан көлеміндегі тарих және мәдениет ескерткіштерінің табиғи ландшафты аймақтарының бұзылуына, заңсыз қазба жұмыстары және өзге де заң бұзушылық әрекеттерге жол бермеу мақсатында бақылау шараларын күшейту, қолданыстағы заң талаптарының өз деңгейінде орындалуы туралы түсіндірме жұмыстары жүргізіліп, әдістемелік көмектер көрсетілді. Сонымен қатар, алдын ала есепке алу тізіміне енгізілген ескеркіштерге сараптама жұмыстарын жүргізу мақсатында аудандық экономика және қаржы бөліміне 2 млн теңгеге бюджеттік өтінім берілген.Кент орталығында орналасқан мемлекет және қоғам қайраткері Темірбек Жүргеновтің бюстін Т.Жүргенов ауылындағы жаңадан ашылатын аллеяға ауыстыруға тарихи және мәдени ескерткіштерін қорғау жөніндегі облыстық комиссияның оң қорытындысы алынды. Ескерткіштерді күтіп-ұстау мақсатында «Ескерткіштер – ел тарихы» акциясы ұйымдастырылған. Аудандағы мәдениет және спорт бөлімі қызметінің маңызды бағыттарының бірі – мемлекеттік тіл саясаты. Тілдік ахуалды бейнелейтін басты көрсеткіш – құжат айналымы. Осы ретте мемлекеттік органдардағы тілдік ахуалға жүргізілген мониторинг нәтижесінде мемлеткеттік &nbsp;тілдегі шығыс құжатының үлесі 100 пайызды құрап отыр. Көрнекі ақпараттың пайдалануын бақылаудың өңірлерді қамту дәрежесі басты назарда. Тоқсан сайын мәдениет және спорт бөлімі мен «Қызылорда облыстық тілдерді оқыту орталығының» мемлекеттік тіл мамандарының қатысуымен көрнекі ақпараттарға түсіндірме жұмыстарын &nbsp;жүргізіп келеді. Жыл басынан 12 кәсіпкерлік субъектілеріне (дүкендер, жарнама агенттігі, мейрамхана, сән салондары, т.б.) Қазақстан Республикасының «Тіл туралы» Заңының 21-баптың талаптары түсіндіріліп, әдістемелік көмек көрсетілді. Атап айтқанда, 4 мейрамхана мен фастфудтардың ас мәзірілеріне аударма үлгілері әзірленіп, қолданысқа берілсе, 1 сауда нүктесі мен 1 кәуапхананың тек қана орыс тілінде ілінген жарнама мәтіндері алынды.&nbsp;Аудандағы шағын және орта бизнес өкілдеріне көрнекі ақпараттар мен жарнамалардың сауаттылығын қадағалау және реттеу мақсатында whatsapp, телеграмм әлеуметтік желілері арқылы әдістемелік көмек &nbsp;көрсету ұсынылған. Деректемелер мен көрнекі ақпарат мәтіндерін орфография нормаларына сәйкес жазу, қазақ тіліндегі мәтіндердің сапалы жазылуына, қателіктерді алдын алу мақсатында мәдениет және спорт бөлімі мен жарнама агенттіктері арасында бірлескен жұмыстар жүргізілуде.2023 жылы ономастика мәселесі бойынша 9 өтініш түскен, оның 4-еуі объектіге атау беру, 1-еуі ауыл атауын кісі есімімен өзгерту, 4-еуі көшеге атау беру туралы өтініштер. Объектіге атау беру туралы 1 өтініш, ауыл атауын өзгерту туралы 1 өтініш, көшеге атау беру туралы 1 өтініш кері қайтарылды. Тарихи тұлғаларға енгізу бағытында облыстық ономастикалық комиссияның қарауына ұсынылған 3 өтініштің 1-еуі қолдау тауып, 2-еуі кері қайтарылды. Идеологиялық тұрғыдан ескірген атаулары бар елді мекендер мен олардың құрамдас бөліктерін қайта атау жөніндегі 2022-2025 жылдарға арналған облыстың жол картасына сәйкес, 3 көше қайта аталды (Дружба-Қаракұм, ЛСП-Қараөзек, Карл Маркс – Ә.Қоңыратбаев). Жол картасына сәйкес &nbsp;идеологиялық тұрғыдан ескірген 1 елді мекен,1 көшені қайта атау бағытында жұмыстар жүргізілуде.Биылғы жылы жалпы саланы қаржыландыруға жергілікті бюджеттен – 1 318 780,6 мың теңге қаржы бөлінді. Бөлімге &nbsp;қарасты мәдениет мекемелеріне &nbsp;бөлінген қаржы &nbsp;613 592,0 мың теңгені құрайды, ауылдық мәдениет &nbsp;мекемелеріне &nbsp;бөлінген &nbsp;қаржы 448 621,6 мың &nbsp;теңге болса, спорт саласына &nbsp;бөлінген қаржы 256 567,0 мың теңгені құрайды. Оның ішінде мәдениет саласының материалдық-техникалық базасын &nbsp;нығайтуға – 24365,5 мың теңге қаржы бөлініп, Жаңаталап, Далдабай, Жаңадария ауылдық клубтарына, Еңбек ауылдық мәдениет үйіне, Руханият орталығына дыбыс күшейіткіш аппаратуралар, ұйымдастыру техникалары алынды. 2023 жылы «Ауыл – Ел бесігі» жобасы арқылы кітапхана ғимаратын табиғи газға ауыстыру жолымен қазандықты қайта жаңғырту жұмыстары &nbsp;жүргізілуде. Қ.Қазантаев атындағы мәдениет үйі ғимаратының сыртқы бетіне ағымдағы жөндеу жұмыстары жүргізілуде. Жөндеу жұмыстары 2023 жылдың 31 шілдесінде аяқталады деп күтілуде. Таң ауылдық мәдениет үйі ғимаратының сыртына жай жөндеу жұмыстары жүргізілуде. Жөндеу жұмыстары келісім-шарт бойынша &nbsp;ағымдағы жылдың &nbsp;22 тамызында аяқталады.Жалпы, Жалағашта мәдениет саласына қолдау бар, сол қолдауғ сай салада серпін де қалыптасқан.

Жалағаш: 6 айда 363 шара ұйымдастырылған

<a href="https://kyzylorda-news.kz/ru">Kyzylorda-news.kz.</a> Сексен жылдық тарихы бар Жалағаш жері талай талантты шыңдаған шежіренің ордасы, мәдени мұраға бай киелі мекен. Қазірдің өзінде ауқымды істердің, игі бастамалар қолға алынған өңірдің дамуы, көркейіп, келбетінің артуы көрген көзге қуаныш сыйлайды. Қай саланы алып қарасақ та, алға жылжу бар. Өнер руханияттың айнасы десек, сол өнер тарландарының, май-талмандарының басын қосқан мәдениет саласы руханияттың мәйегі. Аудандағы осы саланың дамуында аудандық мәдениет және тілдерді дамыту бөлімінің де істеп жатқан жұмысы нәтижелі деуге болады.&nbsp;Ал осы бөлімнің қызметкері, мәдениет – халықтың ең үлкен рухани азығы екенін ұғынған бүгінгі кейіпкеріміз аудандағы осы саланың дамуына айрықша үлес қосқан жандардың бірі. Оның сахна сыртындағы еңбегі көпке көрінбесе де, ауқымды шаралар мен жүйелі жұмыстардың жасалуына ықпалын тигізуде. Әсіресе өңірде Бибіәсия Дүйсенбиеваның бастамасымен мәдениет пен өнердің дамуында, мемлекеттік тіл саясатының жүзеге асырылуында және ұлтаралық қатынастың нығаюында келелі істер де қолға алынды. Бибіәсия Аманжолқызы 1976 жылы Қызыл¬орда облысы, Жалағаш ауданы, Мәдениет ауылында дүниеге келіп, кейіннен М.Х.Дулати атындағы Тараз мемлекеттік университетінде «Қазақ тілі мен әдебиеті» мамандығы бойынша жоғары білім алған. Мәдениет саласындағы еңбек жолын 2004 жылы Жалағаш аудандық мәдениет бөлімінде бас маман болып бастаған ол, 2005 жылы Жалағаш аудандық мәдениет, ішкі саясат және тілдерді дамыту бөлімінің же-текші маманы, 2006 жылы Жалағаш аудандық мәдениет және тілдерді дамыту бөлімінің жетекші маманы, 2008 жылы бас маманы, 2017 жылдан бастап бөлімнің сек¬тор меңгерушісі қызметін атқарып келеді. Ауданда мәдениет пен өнердің дамуына, мемлекеттік тіл саясатының жүзеге асырылуына және ұлтаралық қатынастың нығаюына зор үлес қосып келеді. Бибіәсия Аманжолқызымен әңгімелесіп отырып, кәсібіне риясыз берілгенін және осы саланың алға басуына аянбай еңбек етіп жүргенін білдік. Мәселен сала маманы қызметте жүріп аудандағы әкімшілік-аумақтық бірліктердің құрамдас бөліктері туралы деректерді, тарихи-географиялық атауларды зерттеу, жинақтау бағытындағы жұмыстарды ұйымдастырды, деректер қорын, «Жалағаш ауданындағы тарих және мәдениет объектілерінің экскурсиялық жол картасын» әзірлеп, облыстық жобалық кеңсе арқылы «Шабыт-Арт студиясы» жобасын іске асырды, кітапханалар жанынан коворкинг орталықтарының ашылуын да қамтамасыз еткен.&nbsp;Сонымен бірге ауданның ұлттық өнері мен рухани мұрасын насихаттау мақсатында «Жалағаш жауһарлары» атты сегіз дискіден тұратын Жалағаш ауданының ән-жыр мұрасы антологиясын үйлестіріп, С.Иманғалиевтің «Жалағаш көшелері» кітабының құрастырылуына қатысқан. Республикалық деңгейде аталып өтілген Бұқарбай батыр Естекбайұлының 200 жылдық, Жалағаш ауданының 80 жылдық, Мемлекет және қоғам қайраткерлері Т.Жүргенов, І.Қабыловтың және Социалистік Еңбек Ері Ұзақ Еспановтардың мерейтойларын және басқа да республикалық, облыстық &nbsp;деңгейде өткізілген іс-шаралардың жоғарғы деңгейде ұйымдастырылуына да тікелей қатысқан екен. 2020 жылы пандемия кезеңінде «YouTube» арнасынан «Өнерлі өлке: Жалағаш ауданы» атты Жалағаш аудандық мәдениет және тілдерді дамыту бөлімінің арнайы парақшасын ашып, мәдениет үйлері мен клубтардың үздік концерттері мен &nbsp;мұрағат қорындағы үздік қойылымдарының жариялануын қамтамасыз еткен. Сондай-ақ 2003-2012 жылдары аралығында Қ.Қазантаев атындағы мәдениет үйі жанындағы Халық театрының белді мүшесі ретінде Ш.Айтматовтың «Ана – Жер Ана», Қ.Мұхамеджановтың «Бөлтірік бөрік астында», Т.Ахметжановтың «Қараторғай немесе аман бол ақ жайлау» атты спектакльдерінде басты рольдерді сомдап, көрермен көзайымына айналып та үлгерген екен. &nbsp; – Мен алғаш мәдениет саласына 2004 жылы келдім. Негізінде менің бұл салаға келуіме себепші болған 2003 жылы желтоқсан айында «Үздік оқырман-2003» ау-дандық оқырмандар байқауы болатын. Кітапхана тарапынан ұйымдастырылған осы байқауда Бас жүлдеге ие болдым. Бұл уақытта мен №202 орта мектепе қазақ тілі мен әдебиеті пәнінің мұғалімі едім. Осы байқаудан кейін аудандық мәдениет үйі жанындағы Халық театрының негізін қалаушы режиссер Мәдиев Тынымбай ағай мені Шыңғыс Айтматовтың «Ана – Жер Ана» спектакліндегі басты рөлді сомдауға шақырды. Мен Әлиманың рөлін сомдадым. Қызылорда қаласында өткен Халық театрлары байқауына қатысып, үздік атандық. Мектепте мұғалім болып жүріп түрлі аудандық қоғамдық іс-шаралардың бел ортасында жүрдім. Осы кезеңде мәдениет бөлімінде бас маманның орны бос болатын. 2004 жылы аудан әкімінің орынбасары Болат Жекенов пен мәдениет бөлімінің басшысы Гүлнәр Дихамбаева мені осы орынға шақырды. Менің мәдениет саласына келуімнің басы осылай басталды, – деген кейіп¬керіміз мамандығы мұғалім болғанымен өнерге жақын болғанын айтады. &nbsp;Ұлы мамандық ұстаздық жолды игерсе де, табиғат сыйлаған өнер әлеміне деген ерекше ықыласы Бибіәсияны осы салаға жетелеп келді. Содан бері мәдениет саласында қаншама еңбек етті, жауапкершілік жүгін арқалап, артынан ерген жас мамандардың тәжірибе жинауына септігін тигізді. Мамандығына деген адалдығы әрқашан нақты мақсаттар қойып, жетістіктер шыңына шығуға талпындырды. Қолға алған әрбір ісінің берекелі әрі нәтижелі болуы да маманның кәсібилігінен деп білеміз. Бибіәсия Аманжолқызы мәдениет саласында жиырма жылға жуық ғұмырын сарп етті және бұл уақыттардағы еңбегі елеусіз қалмады. Биік белестерді бағындыруда да, жетістікке жетуде де жұмыстың нәтижеге бағытталуы аса маңызды. Мәдениет саласының майталманы, жерлесіміз, кейіпкеріміз Бибіәсия Дүйсенбиеваның Мәдениет және өнер саласына қосқан үлесі үшін жеткен жетістіктері біршама. Ол 2008 жылы аудан әкімінің «Үздік мемлекеттік қызметші» номинациясын, Халықаралық Қазақ тілі қоғамының “Құрмет” грамотасын, ҚР-ның Мәдениет және спорт министрінің алғысын, ҚР-ның Қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының алғысын, Қызылорда қаласының 200 жылдық, Жалағаш ауданының 80 жылдық мерекелік төсбелгісін және Қазақстан Республикасы Конституциясының 25 жылдық мерекелік медалін иеленсе, жуырда Қазақстан Республикасы Мәдениет және спорт министрлігінің «Мәдениет саласының үздігі» төсбелгісімен наградталды. Әрине бұл төсбелгі ойлаған ісін орындалған іске айналдыра білетін талапты қызметкердің жеңіс тұғырындағы соңғы марапаты демейміз. Кәсіби маманның атқарған әрбір ісіне, салаға қосқан үлесі мен нәтижеге бағытталған жүйелі жұмысына алғыстан басқа айтарымыз жоқ.«Жалпы мәдениет саласындағы жетістіктер мәдениет мекемелерінің жұмыс-тарымен, статистикалық сандық көрсеткіштерімен және белгілі есімдердің болуымен ғана өлшенбейді. Бүгінгі күні мәдениет – тұлғаның рухани-эстетикалық дамуының, жалпыұлттық бірлікті қалыптастырудың және елді әлемдік қоғамдастыққа ықпалдас-тырудың қуатты құралы болуы тиіс» деген маманның салмақты сөзі де алда әлі талай жетістіктерге қол жеткізері сендірді. Бөлім қызметкерімен сұхбаттасқанда балалар жылында атқарылатын жұмыстардың да шет жағасынан хабардар болдық. Бибіәсия апайымыз жылдың балаларға арналуы өте маңызды дейді. Себебі оның айтуынша, балалар әдебиетіне қолдау қашанда толастамауы керек. Бұл өз кезегінде саланың кенжелеп немесе тоқырап қалуының алдын алады. &nbsp;Естіп білгеніміздей, биылғы жылы шаралардың басым бағыты балалардың оқу сауаттылығын арттыруға бағытталмақ. Сонымен қатар балалар шығармашылығын дамыту бағытында конкурстар, фестивальдер ұйымдастыру және балаларға арналған қойылымдар іске асырылмақ.Биылғы жылы «Саяхат» жобасы іске асырылатынын, жоба аясында аудандағы жер-су атауларының шығу тарихы жинақталатын, сондай-ақ тарихи орындар мен туған өлкенің тарихын зерделеуге қызығушылықты арттыру мақсатында деректі материалдар топтамасының арнайы шығарылымы ұйымдастырылатынын жеткізген кәсіби маманның ой-өресі, тұлғалық дамуы мен жүріп өткен жолы талай жасқа бағдаршам болуға әбден лайықты. Мақаламызға арқау болған нәзікжанды жаңа толқын жас буынға бағыт-бағдар беріп, өнердегі өмірлік тәжірибесімен бөлісіп отырады. Сондай-ақ өнер атты өлкеге қадам басқан жас мамандар белгілі қоғам қайраткері Ілияс Омаровтың «Мәдениет – халықтың ең үлкен рухани азығы. Бұл салаға кез келген жан келе бермейді, халыққа мәдени қызмет көрсететін маманның өзі мәдениет пен білімді кемел игерген адам болуы тиіс. Жеңіл ойлы адамға жұмысы оңай көрінетін бұл салаға қызығып келушілердің ұзақ уақыт тұрақтап қалуы сирек құбылыс. Осы саланың ыстығына күйіп, суығына тоңуға шыдауға әзір адамдар ғана мәдениет пен өнерді көркейтуге өз үлестерін қоса алады» деген сөзін үнемі естен шығармаса екен деген ой толғанысын да жеткізді.

Мәдениет – ұлттың айнасы 

<a href="https://kyzylorda-news.kz/ru">Kyzylorda-news.kz.</a> Қазіргі кезде наны жүріп тұрған кәсіптің бірі – жылыжай десек, қателеспейміз. Тірнектеп істеген тірліктің табыссыз қалмайтынын түсінген Жандос бүгінде жылыжай жайын жетік меңгеруге кіріскен. Жылыжай салу, оның бабын табу оңай шаруа емес. Десек те, кәсіптің көзін білсең, құпиясына қанықсаң, алынбайтын қамал жоқ.&nbsp;Қазір ауданда кәсіптің бұл түрін қолға алғандар саусақпен санарлықтай. Тіпті аудан әкімінің төрағалығымен өткен жиындарда әрбір елді мекенде кемінде 1 жылыжайдан ашуға жұмыс жасау төңірегіндегі тапсырма да өз деңгейінде орындалмай отыр. Ал кейіпкеріміз жылыжай ашып, мол табысқа қол жеткізуге болатынын айтады. Оның алдағы уақытта кәсібінің көкжиегін кеңейтуге күш саламын деуі де сондықтан.Қызанақ пен қиярдың нарықтағы бағасы қазір 1000 теңгеге жуықтайды. Ал маусымында оның құны арзандайтыны тағы да анық. Сондықтан Жандос Карбоз биыл жылыжайға қияр, тұщы бұрыш секілді бірқатар көкөніс көшеттерін ақпан айының басында-ақ отырғыза бастапты. Қазір мұндағы қиярдың түйнегі жарты қарысқа жуық¬тайды. Демек, алдағы 2 аптада жергілікті кәсіпкердің жылыжайында күтіп-бапталған көкөністер нарыққа шығарылады.&nbsp; – Бұрын үйдегі үлкендер бір жұмысты бастау үшін бәрі қаражатқа келіп тіреледі дейтін. Ол тұста расында қаржы тапшылығы тек кәсіп ашуға ғана емес, барлық саланың серпін алуына қолбайлау болды. Ал қазір ше, қазір мүлде басқа. Сен тек мақсатыңды айтсаң болды, сол төңіректе жобаңды дайындауға да мемлекет жәрдем береді. Мұнан бөлек қаржылай қолдауы тағы бар. Сол мүмкіндікке қол жеткізген жандардың бірі – өзім. Маған да осы жобаны жүзеге асыруға қаржы тапшылығы қиынға соққан. Мемлекеттік бағдарламаның көмегімен оны былтырдан бері жүзеге асырып келемін. Кәсіптің бұл түрінде пайда көп. Сондықтан алдағы уақытта жылыжай көлемін ұлғайтуды жоспарлап отырмын. Былтыр нарыққа шығарған күннен бастап тұтынушылар мұнда пісіп-жетілген өнімді таласып алды. Осыдан-ақ көкөніске көктем және күз айларында сұраныс жоғары болатынын аңғардым, – дейді жас кәсіпкер.&nbsp;Жерлесіміз былтыр жылыжай ашу үшін мемлекеттік бағдарламамен 6 млн теңге несие алған. Пайыздық үстемақысы 6 пайызға дейін субсидияланған қаржылай қолдау кәсібінің алға басуына үлкен көмек болыпты. Тіпті былтыр мұнда орналастырылған көшеттердің бір ауысымында-ақ 4,5-6 тоннаға дейін өнім жиған. Кәсіпкердің бұл жобаны жүзеге асыруға үлкен ізденіспен аяқ басқанын аңғару қиын емес. Себебі ол жылыжайда орналасқан көкөністерді күтіп-баптауда неғұрлым үлкен шығынға жол бермейді. Қарапайым судың өзін үнеммен, яғни тамшылатып суару әдісімен береді. “Серпін” индустриалды аймағында орналасқан жылыжайдың болашағы жарқын. Былтырдың өзінде өз өнімін нарыққа шығарған кәсіпорынның алдағы уақытта көкжиегі кеңейсе, мұнда өндірілген өнім көлемі де ұлғаяры анық. Ал кәсіптің бұл түрін қолға алғандардың қатары артса, көкөністің нарықтағы бағасы да халықтың қалтасына салмақ болмас еді. Ол үшін бұл жобаға Жандос секілді үлкен ізденіспен қадам басу керек.Кейіпкеріміз қазір жылыжай орналасқан аумақта тағы бір ғимараттың құрылыс жұмыстарын бастап кетті. Бұл алдағы уақытта жылыжайда егін орналастыру жұмыстарын ертерек бастауға үлкен мүмкіндік береді екен. Себебі бұған дейін көшет егу жұмыстары да жылыжай ішінде жүзеге асса, алдағы уақытта көшеттер осы нысанда дайындалады. Қыс айларында пешпен жылытылған кәсіпорынға көгілдір отын жеткізу де жоспарда бар.

Жүйесің тапсаң, жұмыс бар

<a href="https://kyzylorda-news.kz/ru">Kyzylorda-news.kz.</a>&nbsp;Бүгін Қазалы ауданының әкімі Мұхтар Оразбаев пен аудандық мәслихат төрағасы Ғазиз Әліш Әйтеке би кентіндегі салынып жатқан 250 орындық мектепке арнайы барып, құрылыс жұмыстарымен танысты.Бүгінде Достық көшесінің бойындағы білім ошағында қарқынды жұмыстар жүріп жатыр. Аудан басшысы мердігер мекеме қызметкерлеріне сапасына мән беру қажет екенін және нысанның қатаң бақылауда болатынын ескертті. Сондай-ақ, адам санын көбейтіп, екі ауысыммен жұмыс жасауды тапсырды.&nbsp;Өз кезегінде Ғазиз Әлмәмбетұлы да нысанның әрбір жұмысына ұқыптылықпен қарауды жүктеді. Мұнан соң аудан басшысы мен аудандық мәслихат төрағасы Қ.Пірімов ауылындағы Қ.Күлетов атындағы №92 мектептің күрделі жөндеу жұмыстарын көрді.&nbsp;Ғимараттың іші-сыртындағы жұмыстарды толық аралап көрген Мұхтар Әуесұлы шатырын жабудағы кейбір кемшіліктерді атап өтті. Соған сәйкес мердігер мекеме мамандарына қатаң тапсырма беріп, назарда болатынын жеткізді.&nbsp;Сонымен қатар, құрылыс жұмыстарын жеделдетіп, &nbsp;нысанды тамыз айының 20-сына дейін тапсыру керектігін ескертті.Бозкөл ауылында дәрігерлік амбулатория бой көтерудеАудан әкімі Мұхтар Оразбаев Бозкөл ауылына барып, жаңадан бой көтеріп жатқан дәрігерлік амбулаторияның құрылысымен танысты.Мердігер мекеме – «Болашақ» ЖШС қызметкерлерімен кездескен аудан басшысы құрылысқа асқан жауапкершілікпен қарау қажет екенін айтып, жыл соңына дейін ел игілігіне беру қажет екенін ескертті.Өз кезегінде ауыл ақсақалдары округте жүріп жатқан жұмысқа алғысын айтып, ендігі кезекте балабақша мәселесін шешіп беруді сұрады.Мұхтар Әуесұлы тұрғындардың көкейінде жүрген түйткілдердің кезең-кезеңдерімен шешім табатынын тілге тиек етті.Айта кетейік, ауыл халқын қуанышқа кенелткен нысан үшін – 400 млн.теңгеге жуық қаржы қаралған.Мұнан соң аудан басшысы аудандық маңыздағы «Қазалы-Қожабақы-Бозкөл-Кәукей» автомобиль жолын орташа жөндеу жұмысын көрді. Жауаптыларға тиісті тапсырмаларды жүктеп, жеделдетуді тапсырды.Ауданда жылу беру маусымына дайындық барысы пысықталдыАудан әкімі Мұхтар Оразбаевтың төрағалығымен 2023-2024 жылдардағы жылу беру маусымына дайындық жұмыстарын пысықтау жөнінде жиын өтті.Жалпы, аудан көлемінде 165 әлеуметтік-мәдени нысан жылу беру маусымына дайындық жұмыстарын жүргізуде. Ал алдағы жылу маусымына 20,0 мың тонна қатты отын және 2,3 мың тонна сұйық отынға қажеттілік жоспарланып отыр.&nbsp;Басқосуда аудан басшысы білім, мәдениет және спорт және денсаулық салалары бойынша жылу қазандықтарының дайындығын &nbsp;сұрады. Сондай-ақ, әрбір сала жылу беру маусымына дайындықты күшейтуді тапсырды. Бұдан бөлек, жауапты бөлім басшыларына жуық арада көмір тасымалдаушылармен кездесу ұйымдастыруды тапсырды.&nbsp;Маңызды мәселелер жан-жақты талқыланғаннан кейін аудан әкімі аудан әкімінің орынбасарлары, қала, кент және тиісті сала басшыларына нақты тапсырмалар жүктеді.&nbsp;Әдеп жөніндегі уәкілмен кезекті құқықтық оқыту өттіҚазалы аудан әкімі аппаратының басшысы, Әдеп жөніндегі уәкіл Ринад Тілептің төрағалығымен құқықтық оқыту өтті.Басқосу барысында «Сыбайлас жемқорлыққа қарсы іс-қимыл туралы» ҚР Заңы және оған енгізілген өзгерістер мен толықтырулар туралы түсіндірілді.Ринад Ібайдуллаұлы сыбайлас жемқорлықтың алдын алу шаралары бойынша жұмыстарды күшейту мен қызметкерлер арасында құқықтық сауаттылықты арттыру жұмыстарының маңыздылығына тоқталып, аталған Заңға енгізілген өзгерістер мен толықтырулар бойынша нақты шаралар қабылдауды тапсырды.Әдеп жөніндегі уәкілдің қатысуымен мемлекеттік қызметшілерге сыбайлас жемқорлыққа қарсы іс-қимыл мәселелері жөнінде ай сайынғы түсіндіру және оқыту іс-шараларын өткізудің 2023 жылға арналған кестесіне сәйкес жиынға аудандық кәсіпкерлік, өнеркәсіп және туризм бөлімінің қызметкерлері қатысты.Қаладағы жолдар жақсарып келедіЖыл санап аудандағы жолдардың жағдайы жақсарып келеді. Оның ішінде Қазалы қаласындағы тұрғындар үшін жағымды жаңалықтар аз емес. Өйткені, биыл «Шағын және моноқалаларда бюджеттік инвестициялық жобаларды жүзеге асыру» бағдарламасымен Қазалы қаласындағы 15 көше асфальтталады.&nbsp;Бұған дейін аудан әкімі Мұхтар Оразбаев аудандағы жүріп жатқан құрылыстардың барлығы тікелей &nbsp;өзінің бақылауында болатынын айтқан еді. Соған сәйкес бүгін Қазалы қаласына арнайы барып, Жәкеев, Жанұзақов 2 және Қазалы 2 көшелеріндегі жолдың құрылысымен танысты.&nbsp;Жауаптыларға бірінші кезекте жолдың сапасына қатты көңіл бөлу қажет екенін айтқан аудан басшысы тиянақты жұмыс жасап, уақытында аяқтауды тапсырды.&nbsp;Сондай-ақ, аудан әкімінің орынбасары Жалғас Сүйеубаев пен аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтановқа жұмысты ұдайы назарда ұстауды жүктеді.<img src="https://knadmin.beoblood.kz/uploads/357543084_3706836286203958_3051030192758534809_n_13cd876771.jpg" alt="357543084_3706836286203958_3051030192758534809_n.jpg"><img src="https://knadmin.beoblood.kz/uploads/363368701_3707041656183421_8532764045958129072_n_759f142baf.jpg" alt="363368701_3707041656183421_8532764045958129072_n.jpg"><img src="https://knadmin.beoblood.kz/uploads/358687145_3706906849530235_680870479362800528_n_a4150905f3.jpg" alt="358687145_3706906849530235_680870479362800528_n.jpg"><img src="https://knadmin.beoblood.kz/uploads/363367882_3706771089543811_2293474968759539838_n_66da4ccb6c.jpg" alt="363367882_3706771089543811_2293474968759539838_n.jpg">

Қазалы ауданында құрылыс жұмыстары қарқынды

Kyzylorda-news.kz. Бүгін ҚР Премьер-министрі Ә.Смайыловтың төрағалығымен Президенттің сайлауалды бағдарламасын іске асыру жөніндегі республикалық штаб отырысы өтті. Министрлер мен өңір әкімдері студенттік жатақханалардағы орын тапшылығы мәселесін шешу, «Ауыл аманаты» жобасын іске асыру барысын баяндады.Республикалық штаб отырысынан кейін облыс әкімі Нұрлыбек Нәлібаев Үкімет басшысының тапсырмаларын іске асыру жөнінде мәжіліс өткізіп, жауапты сала басшыларына бірқатар тапсырма берді.<blockquote>«Бүгінгі республикалық штаб отырысында Үкімет басшысы студенттік жатақханалардағы орын тапшылығы мәселесін шешу үшін тиісті шаралар қабылдауды тапсырды. 2022-2023 оқу жылында облыстағы жоғары оқу орындарында, техникалық және кәсіптік білім беру ұйымдарында 36 238 студент білім алды. Оның ішінде 5 793 студент жатақханамен қамтылған. Аймақтың 30 колледжіндегі 20 672 студенттің 3646-сына жатақхана берілген. Облыс орталығы мен аудандардағы колледждер жатақханаларында орын тапшылығы мәселесі болмауы тиіс. Жергілікті кәсіпкерлермен бірлесіп, колледждердегі жатақхана қажеттілігі мәселесін жедел шешу үшін &nbsp;шара қабылдаңыздар», - деді аймақ басшысы.</blockquote>Жаңа оқу жылында Қорқыт ата атындағы Қызылорда университетіне шетелдік студенттердің қабылдануы, студенттер санының өсуіне орай жатақханаларда &nbsp;орын тапшылығы болуы ықтимал.Осыны ескеріп, &nbsp;жаңа оқу жылы басталғанға дейін мәселені жедел шешу тапсырылды. Мемлекеттік-жекеменшік әріптестік аясында кәсіпкерлермен келіссөздер жүргізіп, жаңа жатақханалар салу мәселесін &nbsp;қарау қажет. Облыстық білім басқармасына Арал индустриалды-техникалық колледжінің 75 орындық жатақханасын жаңа оқу жылына дейін пайдалануға беру тапсырылды. Мұнан бөлек, Қазалы аграрлы-техникалық және Қызылорда көпсалалы жоғары колледждеріне қажетті жатақхана құрылыстарын кәсіпкерлермен бірлесіп жүргізуді қолға алу жүктелді.Күн тәртібіндегі екінші мәселе - «Ауыл аманаты» жобасы бойынша сенім білдірген өкіл (агент) &nbsp;«Байқоңыр» ӘКК-не осы жылға қаралған 3 млрд. теңге қаржы &nbsp;аударылды. Құжаттар қабылдау биылғы 20 шілдеден басталды. Облыс әкімі бағдарламаны тиімді және мақсатты пайдаланып, ауыл халқының табысын арттыруда жоғары көрсеткіштерге қол жеткізуді тапсырды.

Қызылорда: Мемлекет басшысының тапсырмаларын орындалу барысы талқыланды

<a href="https://kyzylorda-news.kz/ru">Kyzylorda-news.kz.</a> Театрды халықты тәрбиелейтін жер ретінде көрсек, ондағы сахналатын қойылымның сапасы мен бағыты ұлттың салт-дәстүріне сай ықшамдалғаны дұрыс. «Театр көбейсе, түрме азаяды», – дейді Шерхан Мұртаза. Театр өнерінің қалыптасуы, дамуы жайлы Т.Жүргенов атындағы өнер академиясынан «театртанушы» мамандығының түлегі, аудандық мәдениет бөлімінің режиссері, жас драматург Хан Асанмен әңгімелестік.– Театр түсінігі туралы пікіріңіз қандай?–Театр – синтездік өнердің жиынтығы. Театр мәдениеті деген кірпияз дүние. Қоғамда қалыптасқан: «Театр киімілгіштен басталады» деген түсінік бар. Бұл сөздің мән-мағынасы зор. Киімілгіш адамның сыртқы болмысын тастап, жан дүниесімен рухани ортаға бас-тайтын табалдырығы. Бір өкініштісі, қазақ тілді көрермендер арасында бұл ұғым толық қалыптаса қоймаған. Жалпыұлттық мәдениетті орташа деңгейге жеткізу үшін қарапайым халықты театрға көптеп тарту керек.– Театрдың қалыптасуы мен ежелгі үлгілеріне тоқталсаңыз?– Оның пайда болу тарихына келсек, әңгімені әріден бастаймыз. Ежелгі грек наным-сенімінде Құдайларға құрбандық шалып, мерекелер ұйымдастырып отырған. Дионис құдайға арналған мерекеден театр тарихы басталады. Көктем мен күзде ұйымдастырылатын тойда шаруадан шаршаған егінші халық демалып, шарап ішіп, текенің тұлыбын киіп ән айтып, билеп көңіл көтереді. Соның арасында байларды әжуалап, күлкіге айналдырудан «комос», яғни комедия пайда болды. Осыны дәстүрге айналдырған олар қайғы мен қуаныш қатар жүретініндей, енді мұң мен көңілсіздікті көрсетуді ойлайды. Бұл уақытта соғыс жиі болады, әр отбасыдан кем дегенде бір еркек қаза табады. Соның өзін сипаттап, сахналау қолға алына бастайды. Бұдан «трагос» мұңлы ән дегенді білдіретін трагедия шығады.Театр да дін секілді. Әр жерге көшкен сайын сол аймақтың салтына, әдет-ғұрпына бейімделеді. Мұнан соң театрдың даму кезеңі Римде жүреді.Рим халқы реализмді қатты жақсы көрген. Әртістік өнердің шыңы деп 100 процент рөлді алып шығып, егер сахнада шын өлу керек болса кейіпкерлер ажалға басын байлайтын қойылымдарды атаған. Осындай көріністерге халық арасында сұраныс та көп болған. Антикалық театр толықтай дерлік далада орналасты. Онда 20 мыңнан 44 мыңға дейін адам отыратын бөлік ойластырылған. Біздің заманымызға дейінгі IV ғасырда ғана тастан қаланған театрлар салына бастады. Периклдің тұсынан бастап, билік қойылымдарды көруге қаражаты жетпейтін кедей халық үшін мүмкіндік жасайды. Яғни оларға бір реттік субсидия жариялаған. Осы арқылы барлық адам бірдей рухани толысып отырды.Ол кездегі әртістер өзіндік мимиканы рөлде пайдаланбаған. Барлығы дерлік рөлді бетпердемен ойнап шығатын. Киім мен қимыл-қозғалысқа қатты мән берген. Әртістердің барлығы еркектер болды, әйел адамның бейнесін де солар ойнап шығатын. Алғашқы драматургиялық туындыларды Эсхил, Софоклдер алып келді. Аристофан атты драматург «Бақалар» деген шығармасында Гомердің мифтік құдайларын комедиялық кейпікерлерін жасап шығарды.– Қазақстан жеріне театрдың келуі, қазақ драматургиясын қалыптастырған есімдер туралы айтып өтсеңіз?– Қазақ жеріне театр өнері Еуропадан Ресей арқылы XVIII, XIX ғасырларда жете бас¬тады. 1925 жылы Қызылордада тұңғыш кәсіби ұлт театры ұйымдастырылды. 1928 жылы астана ауысқанда Алматыға көшірілді. Сол уақытта қазақ драматургтерді іздеу қолға алынды. Салт-дәстүрді насихаттап, мәдениетімізді көркемдік деңгейде жеткізе алатын өнер адамдары жиналды. Ең алғаш Мұхтар Әуезов, Сәбит Мұқанов, Ілияс Жансүгіров сынды ақын-жазушылар театрдың талқылауына қатысып, шығармаларды ықшамдап беріп отырған. 30-жылдардың бас кезінде Алматы, Қарағандыда жұмысшы-жастар театры құрылды. Бұларды ұйымдастыруға Қ.Бадыров, К.Қармысов, С.Телғараев бірігіп еңбек сіңірді. Қазақ театры өнерін одан әрі өркендету ісінде “Ұлт өнерін дамыту шаралары” туралы қаулының рөлі ерекше болды. Осыған орай 1934 жылы облыстарда қазақ театрлары ашылып, халыққа мәдени қызмет көрсете бастады. Кәсіби дайындығы бар орыс режиссерлері қазақ актерлерін орыс театрының бай тәжірибесімен және К.С.Станиславский жүйесімен таныстырып, кәсіби сахна өнеріне шыңдады. Әсіресе орыс, шетел классикасы мен осы заман драматургиясының озық үлгілерін театр репертуарына енгізіп байытуда айтарлықтай жұмыс атқарды.Соғыс жылдарында қаһармандық драматургия көп сахналанды. Театр ұжымдары бірқатар әскери-патриоттық тақырыптағы пьесаларды сахнаға шығарды.1970-1980 жылдардан бастап қазақ драматургиясына аударма келе бастады. Еуропа классикасын өз сахнамызға әкеліп, көрерменге жеткізу қазақ театрының бір ұтқан тұсы болып саналады.– Жас дарынды драмтургтер мен талантты әртістерден кімдерді атар едіңіз?– Тәуелсіз Қазақстан драмасында жақсы авторлар баршылық. Айдана Аламан, Қолғанат Мұрат, Ықылас Шалғынбай, Әлішер Рахат, Мерей Қосым сынды қаламгерлер қазақ тілді көрерменге алдағы уақытта жақсы туындылар жазады. Ықылас Шалғынбайдың «Бекет» атты пьесасы, Қолғанат Мұраттың «Түнек» деген пьесасы ТМД елдерінің арасындағы конкурсқа қатысып, орыс тіліне аударылды. Бірақ сахналанған жоқ. Себебі қазақ театры мұндай шығармаларға дайын емес. Көрермен осындай қойылымдарды күтіп жүр деп ойлаймын. Бірақ театрдың көпшілігі тек пайда табу жағын ғана ойлап кеткен.Мен осы ретте қазақ театрының мықты әртістері Берік Айтжанов, Дулыға Ақмолда сынды таланттарды ерекше атағым келеді. Комедия королі ретінде Бекжан Тұрысты айта аламын.– Әлемдік театрдың қазіргі бағыты туралы не айтасыз?– Театр дүниеге келгеннен бастап үш кезеңді басынан өткерді. Ең бірінші авторлар кезеңі. Ол Эсхил мен Шекспирге дейінгі аралықты қамтыды. Яғни авторлар бұл жерде барлық шығармашылық еркіндікте болды. Одан кейін актерлар кезеңі. Әртістер қандай шығарманы, қандай кейіпкерді ойнайтынын өздері таңдады. Осы екеуінен кейін режиссерлер келді. Станиславскийдің кезінде театрдың тынысы кеңейе түсті. Режиссер жоқтан бар жасай алды. Олар халықты иллюзиямен тарта білді.XXI ғасырдағы әлемдік сахнада қойылып жатқан спектакльдерді саралайтын болсақ, басты элемент шоу болып тұр. «Суперменнің» өзіне спектакль қойылған. Оның басты сиқыры көрерменнің үстінде ұшып жүруі.Жапонияда ұлттық кабуки театрлары жұмыс істейді. Сол баяғы XVII ғасырдағы киімі мен бетпердесін киіп алып, өнер көрсетеді.Самурайлардың жекпе-жектері ширма артында көлеңке арқылы көрсетіледі. Бірақ осының бәрі үйлесімді, көркем көрінеді.– Драма.кз байқауына қатысып келдіңіз. Осы жайлы оқырманды құлағдар етсеңіз…– Бұл үшінші рет ұйымдасытырылып отырған драматургиялық конкурс. Жыл сайын сапасы өсіп келеді. Өзім қанағаттанатын фестивальдердің бірі. Мұны ұйымдастырып жүрген Олжас Жанайдаров есімді Ресейде тұратын қазақ бауырымыз. Жобаны Ресей театр қайраткерлері Одағы мен Қазақстан театр қайраткелері Одағы бірігіп, атқарып отыр.Мен үш жыл бойына осы конкурстың басы-қасында жүрдім. Алғашында көрермен ретінде бардым. Екінші жылы «Мұңлы Арлекин» деген шығармамен қатыстым. Комедия жанрының дель-арте театрының кейіпкері сайқымазақ Арлекиннің мұңы туралы болды. Конкурстан кейін тәуелсіз театрда сахналанды. 2019 жылы «Әулие ағаш» атты пьесамды ұсындым. Осы жолы 48 шығарма қатысып, соның 9-ы финалға өтті. Конкурста 9 шығарманың оқылымы болды. Қазақстанның белді режиссерлері, авторлар келіп бәйгеге түскен туындыларды жан-жақты талдады. Бұл конкурсқа барып келу арқылы үлкен тәжірбие жинақтадым.– Әңгімеңіз рахмет!

Хан Асан: Театр – синтездік өнердің жиынтығы

<a href="https://kyzylorda-news.kz/ru">Kyzylorda-news.kz.</a> Шахмат – ақыл-ойды дамытатын спорт түрі. Адамның бәсекеге қабілеттілік қасиетінің дамуына бұл ойынның пайдасы өте көп. Соңғы уақытта аталған спорт түрі ел ішінде жыл сайын жоғары деңгейде өткізіліп келеді. Шиелі &nbsp;спортшылары да одан қалыс қалған емес. Оған Шиелі ауданының 95 жылдық мерейтойына орай орталық спорт кешенінде ерлер арасында шахматтан өткен аудандық турнир дәлел.Турнирге аудан әкімінің орынбасары Ерсұлтан Әпетов, аудандық мәдениет және спорт бөлімінің басшысы Аруна Өркенқызы, аудандық «Жастар ресурстық орталығының» қызметкерлері, зиялы қауым өкілдері мен жас жеткіншектер, БАҚ өкілдері қатысты.Турнир барысында аудан әкімінің орынбасары Ерсұлтан Әпетов сөз алып, турнирге қатысушы жандарға ақжарма тілегін білдірді.<blockquote>«Бұл фестивальді ауданымызда шахматты спорт түрі ретінде танымал ету және дамыту, салауатты өмір салтын насихаттау, сондай-ақ жас спортшылардың шеберлігін арттыру мен жас таланттарды іздеу мақсатымен өткізіп отырмыз. Бүгінде елімізде шахмат спорты өзіндік қайта түлеуді, танымалдылықтың жаңа кезеңін бастан кешіруде. Бұған жерлестеріміздің Азия және әлем чемпионатындағы нәтижелері ықпал етуде. Әрқайсыңызға біздің турнирде жеңіске жетуге шын жүректен тілектеспін», – деді Ерсұлтан Әпетов.</blockquote>Айта кетейік, шағын ғана шахмат тақтасы ойыншылар үшін көптеген айла-тәсілді орындайтын негізгі «соғыс алаңы» десек болады. Ойын кезінде егер шахматшы бірінші болып жүретін болса, онда ол ойынды бастау үшін 20 түрлі тәсілді пайдалана алады. Ал қарсыласы жауап қайтару үшін 400 түрлі төтеп беру жолдарын қарастыруға мүмкіндік туады. Сол себептен шахматшылар әр қадамын байыппен орындайды. Қалт кеткен ойыншының тасы, мүлт кетеді.Жарысқа қатысушы азаматтар Шиелі ауданының 95 жылдық мерейтойы аясында ұйымдастырылып отырған шараға алғыстарын айтып, алдағы уақытта да осындай турнир өз жалғасын тапса деген ұсыныстарын білдірді.Тартысты өткен турнирге 20-ға жуық ер азамат қатысты. Ал жарыс нәтижесі бойынша I орынды Олжас Азатжанұлы, II орынды Құдайберген Жұмабек, III орынды Қаһарман Ерболат иеленді. Турнирге қатысқан жеңімпаздар аудан әкімінің алғыс хаттарымен марапатталып, бағалы сый-сияпаттар табысталды.

Шиеліде ерлер арасында шахматтан аудандық турнир өтті

<a href="https://kyzylorda-news.kz/ru">Kyzylorda-news.kz.</a> «Білекке сенген заманда ешкімге есе бермедік, білімге сенген заманда қапы қалып жүрмелік». Үш жүздің басын қосқан хан Абылайдың осы бір өміршең өсиеті бүгінгі күнге дейін өзектілігін жоғалтқан емес. Өйткені заман талабы сол, біліммен ғана күш сынасып, бәсекеге түсетін кезең бұл. Сондықтан әлемде болып жатқан қиындықтарға қарамастан білім беру саласы өз жұмысын жүйелі түрде жалғастырып, керісінше, дамудың жаңа сатысына көтерілгендей. Жаңа оқу жылына білім ошақтарының дайындығы қалай?Материалдық-техникалық база сын көтере ме? Бұл оқу жылы немен ерекшеленеді? Осы сынды сұрақтарға аудандық білім бөлімінің басшысы Жібек Баймұратовадан жауап алған болатынбыз.– Жібек Орынбайқызы, бұл саланың жауапкершілігі жоғары, көтерер жүгі ауыр. Өзіңіз осы білім саласында қаншама өнімді еңбек еттіңіз. Ұзақ жыл мектеп басқарғаныңыз тағы бар. Алдағы уақытта осы саланың тәжірибелі маманы ретінде білім саласында қандай жоспар, жаңашыл жұмыс жүзеге асады?– Институт қабырғасынан білім бөлімінің әдістемелік кабинетіне қазақ тілі мен әдебиеті пәні бойынша әдіскер болып қабылданып, ширек ғасыр білім саласында қызмет атқардым.Жалпы білім саласы – ауқымды да күрделі сала. Мұнда мемлекеттің болашағы қалыптасып жатыр. ХХ ғасырдың көрнекті ағартушыларының «Елдің болашағының қандай болмағы мектебіне байланысты» деген ұстанымдары әлі өзектілігін жойған жоқ. Сондықтан білім саласында қабылданған әрбір шешім, жоспарланған әрбір әрекет ерекше маңызға ие. Білім саласындағы ең маңызды міндет – балалардың білім сапасы мен зияткерлік қабілеті, тәрбие бағытының, оның ішінде отансүйгіштік, адамзаттық құндылықтар, зиянды әдеттерден қашық болу қасиеттерінің дұрыс қалыптасуы. Бөлім басшысы болып келгеніме аз ғана уақыт болса да, зерделеу, пікірлесу, саралау қорытындысымен, білім беру ұйымдарының бағытын, мақсатын бүгінгі талаптарға сәйкестендіру керек деп ойладым. Қазіргі білім саласындағы басты қадам – ауыл мектебі мен қала мектебінің айырмашылығын азайту.Ол тек сыртқы формада емес, ішкі мазмұнға, нәтижеге бағытталуы қажет. Сол себепті, мектептердің жұмыс мазмұнына жобалармен жұмыс жасауды енгізу, атап айтқанда, «Жаратылыстану бағытындағы пәндерді тереңдете оқыту», «Агробиологиялық кешен», «Жасыл мектеп», «Компьютерлік білім беру жүйесі», «Мектеп жұмысын цифрландыру» т.б. жобалар. Бұл жобалар оқушылардың зерттеушілік мәдениетін қалыптастырып, мектеп оқушыларына кәсіби бағдар беру жұмыстарына да игі әсер етер еді.Екінші, білім беру мекемелерінің педагог кадрларының әдістемелік, біліктілік құзіреттілігін арттыру мақсатында аудандық тәжірибе алаңы жұмысын дәстүрлі өткізу. Ата-аналармен байланысты нығайту мақсатында «Ата-аналар» оқу-тәжірибелік орталығын құру. Мұнан бөлек, Ұлттық бірыңғай тестілеуге дайындау, ғылыми-зерттеу жобаларына дайындау орталықтарын құрып, олимпиада резерв мектебін қалыптастыру жұмыстары да күн тәртібінде тұр. Жас мамандар мектебін құрып, кадр резервін қалыптастыру да ойда бар. Мектептердің материалдық-техникалық базасын нығайту мәселелері үнемі назарда болады.– Тағы бір оқу жылын тәмамдадық. 2022-2023 оқу жылында сала қандай жетістіктерге қол жеткізді?– Шиелі ауданы бойынша 2022-2023 оқу жылында 40 білім беру мекемелерін 1-11 сынып аралығында 18730 оқушымен бастап, 18553 оқушымен аяқтады. Ағымдағы оқу жылында аудан мектептерінің 9-сыныбын 1766 оқушы бітіріп, оның ішінде 194 бітірушісі негізгі орта білім туралы «Үздік аттестатқа» ие болды. 11-сыныптар бойынша 65 түлек «Алтын белгі» белгісіне және 94 түлек жалпы орта білім туралы «Үздік аттестатқа» ие болды. 2022-2023 оқу жылында жалпы орта білім беру курсын аяқтайтын 961 бітірушінің 791 оқушысы Ұлттық бірыңғай тестілеуге қатысты. ҰБТ-дің ІІ легінің қорытындылары бойынша орташа балы - 77,75 балл (Өткен жылы 74,77) 100 баллдан жоғары жинаған оқушы саны – 80. Жалпы білім беретін пәндер -бойынша республикалық олимпиаданың ІІІ (облыстық) кезеңіне 24 оқушы қатысып, оның төртеуі – ІІІ орын, біреуі – ІІ орын, біреу – І орын, төртеуі алғыс хатпен марапатталған. «Үздік мектеп» бағамына №47 мектеп – лицей ұжымының жұмысын ұсынып отырмыз.– 1 айдан соң жаңа оқу жылы басталады. Дайындық барысы қалай? Жалпы биыл қанша шәкірт мектеп табалдырығын аттамақ?– Аудан бойынша жалпы білім беретін 43 мектеп, оның ішінде 34 орта мектеп, 3 негізгі мектеп, 3 бастауыш мектеп, 1 кешкі мектеп және «Samgau school» және «Ziyatker School» жеке мектептері жұмыс істейді. Шиелі ауданы бойынша 2023-2024 оқу жылында 1 сыныпқа 1644 оқушы қабылданады деп күтілуде. Өздеріңізге белгілі, білім беру ісіндегі маңызды қадам Мемлекет басшысының қолдауымен «Жайлы мектеп» Ұлттық жобасының жүзеге асырылуы. Осыған орай, Шиелі ауданында да 900 орынды «Жайлы мектеп» құрылысы жоспарлануда. Байсын елді мекеніндегі жобалық құны 853,4 млн теңге болатын 250 орындық мектептің құрылыс жұмыстары ағымдағы жылы беріледі. (Мердігер мекеме – «АВАНГАРД ПГС» ЖШС). Сондай-ақ, алдағы жылы Жансейіт елді мекенінде 100 орындық заманауи мектеп құрылысы басталмақ. Білім беру ұйымдарының қауіпсіздігін қамтамасыз ету мәселесі басты назарда болуы тиіс. Осы сала бойынша 40 білім беру ұйымыдарының 14-не орнатылған бейнебақылау камерасы аудандық полиция бөлімімен интеграцияланған. Биыл 16 мектепке турникет және 30 мектепке «дабыл түймесі» жүйелері орнатылды. Оқушылардың қауіпсіздігін қамтамасыз ету мақсатында жаңа оқу жылынан бастап 10 білім беру ұйымында мамандандырылған арнайы күзет қызмет атқаратын болады. Балаларды қауіпсіз тасымалдау үшін облыс әкімінің қолдауымен 3 мектепке (№270, №251, №153 орта мектептер) 2 дана 20 (жиырма) орындық және 1 дана 40 (қырық) орынды балалар автобусы алынды. 4 ауыл мектебіне жаңа үлгідегі модификациялық физика, биология пәні кабинеттері алынбақ.– Жібек ханым, қалай ойлайсыз «Педагог мәртебесі туралы» Заң мұғалім мәртебесін көтере алды ма?– «Педагог мәртебесі туралы» Заң өте дұрыс қабылданған құжат деп есептеймін. Мұнда мұғалімдерді көтермелеу, ынталандыру, марапаттау мәселелері қамтылған. Дүние жүзінің дамыған елдерінде мұғалім – ол өте сыйлы адам. Себебі ол рухани құндылықтардың дәнін егуші. Ал рухы мықты, тәрбиелі ұлт, білімді ұрпақ - мемлекет үшін үлкен қазына. «Ел мен елді, халық пен халықты теңестіретін – білім» деп ұлы жазушы Мұхтар Әуезов айтқандай, білім беретін ұстаздардың біліктілігі мен білігіне әсер ететін, тек біліммен, тәрбиемен айналысуына негіз болды. Заң қабылданғалы, ҚР Үкіметінің 26.10.2022 жылғы №850 Қаулысымен жылма – жыл білім беру педагогтарының еңбекақысына 1,25 мөлшерінен 2,0 мөлшеріне дейін қосымша қаржы бөлінді. Педагог кадрларды марапаттау жүйесіне өзгерістер енгізілді. Педагог – зерттеуші, педагог – сарапшы, педагог – модератор біліктіліктері енгізілді. Білім арттыру курстарынан өткізу жұмыстары жүргізілуде. Педагог кадрлардың сапалық, сандық құрамына жаңарулар жүріп жатыр. Жүктеме 18-ден 16 сағат болып бекітілді. 5 күндік оқу аптасына көшірілді. Білім саласын цифрландыру жүргізіліп келеді.– Жалпы кез келген ата-ананы «Балабақша балаға бас-көз бола ма?» деген сауал толғандырады. Осы тұста мектепке дейінгі білім беру ұйымдарының жұмысына тоқталайықшы. Балабақша тәртібі қалай?– Бүгінгі таңда ауданда 101 мектепке дейінгі ұйым жұмыс істейді. Оның 18-і мемлекеттік балабақша, 74 жекеменшік балабақшалар, 9 шағын орталық. Онда 813 педагог жұмыс атқарады. Ауданымыздағы «Айналайын» бөбекжай-бақшасы «Орта – үшінші педагог» атты республикалық жобасы бойынша құзіреттілік орталықтарының құрамына кірді. Осындай әдістемелік жұмыстармен қатар балабақшалардағы балалардың қауіпсіздігі бойынша атқарылып жатқан жұмыстарға, тамақтандыру мәселесіне, кадрлық құрамына жалпы мониторинг жасалып, зерделеніп отырады. Арнайы жұмысшы тобы құрылды. Жұмысшы топ құрамына қоғамдық ұйымдар, аудандық мәслихат депутаттары, қоғамдық кеңес мүшелері, үкіметтік емес ұйым жетекшілері енгізілді. Жұмысшы топтың міндеті – мектепке дейінгі ұйымдардың талапқа сай жұмыс жүргізуін қадағалау. Жалпы балабақшалар мектеп жасына дейінгі балаларды толық қамтып отыр. Мемлекеттік тапсырыс орындалуда.– Ауданда ақылы мектептер ашылып жатыр. Ол жердегі білім сапасын кім бақылайды? Сіздердің ақылы мектептермен байланыстарыңыз қандай?– Қазіргі уақытта аудан көлемінде «Samgau school» жауапкершілігі шектеулі серіктестігі және «Ziyatker School» жауапкершілігі шектеулі серіктестігі жеке мектептері жұмыс істейді. Өткен оқу жылында 1-4 сыныптар аралығында 288 оқушы осы мектептерде білім алып шықты. Бұл мектептерді қаржыландыру Оқу-ағарту министрілігі жанындағы «Қаржы орталығы» АҚ арқылы жүргізіледі. Бұл мектептердің жалпы орта білім беру стандарты талаптарын орындау барысын Қызылорда облысының білім саласындағы сапаны қамтамасыз ету департаменті бақылайды. Бұл мектептермен жақсы әріптестік қатынас орнатылған. Әрине, жеке мектептердің әлеуеті де өсіп келеді. Білімде бәсеке болғаны жақсы. Оның үстіне, білім алуға құйылған қаржы, инвестиция қайтарымды дейді ғой. Ұлы дала философы Абай: «Балам адам болсын десең, мал аяма, оқыт» деген. Сондықтан берілген білім, тағылымды тәрбие бірнеше жылдан кейін өз жемісін береді. Тек бала – кәсіптің көзі емес, болашақтың бағдарына айналса деген тілек қана бізде.– Енді соңғы сұрақты жолдасам... Өзіңізді білім саласындағы қандай өзекті мәселелер толғандырады?– Қазіргі таңдағы ең өзекті мәселе – бала тәрбиесі. Ғалым, ойшыл әл-Фараби: «Адамға ең әуелі, тәрбие берілуі керек. Тәрбиесіз берілген білім – адамзаттың қас жауы» дейді. Тәрбие беруде білім саласының үш тұғыры ата – ана, мектеп, мұғалім бірлігі үзіліп бара жатқандай. Ата-ана да балаға деген жауапкершілігін мектепке жүктеуден аса алмай отыр. Педагог қай жерде жүрсе де, педагог болып қалуы керек. Қазір педагогика саласында әдеп кеңесі құрылған. Педагогтың өн бойы әдептіліктен тұрмай ма? Ы.Алтынсарин: «Мұғалім – мектептің жүрегі» деген. Сондықтан білім саласында таза, ұқыпты, әдепті қызмет атқарсақ, «Әділетті қоғам» орнайды деп сенемін.– Әңгімеңізге рақмет!

Қазақстан және Қызылорда облысының жаңалықтары

Баспанаға мұқтаж жалағаштық отбасыларына 50 тұрғын үй беріледі