<a href="https://kyzylorda-news.kz/ru">Kyzylorda-news.kz.</a> Қазалы жерінде аудандық орталық ауруханадан бөлек теміржол ауруханасы да күн-түн халыққа аянбай қызмет көрсетеді. Ғасырдан астам тарихы бар емдеу мекемесінің өңірдегі алар орны айрықша. Ақхалаттылар ордасының бүгінгі тыныс-тіршілігі туралы мекеме басшысы Құбыл Ршымбетовпен сұхбат жүргізуді жөн көрдік.– Құбыл Ршымбетұлы, аурухананың 120 жылдығына да аз қалыпты. Сондықтан алдымен өткенге көз жіберсек...– 1904 жылы Қазалы уезінде халыққа медициналық қызмет көрсету мақсатында амбулатория ашылды. Онда ең әуелі фельдшер және акушер жұмыс істеген. 1905 жылы Орынбор теміржол бөлімінің құрылуына байланысты теміржол ауруханасы ашылды. Осы жылы амбулатория 5 орындық болып қайта құрылады. Басында ауруларды фельдшер маманы ат арбамен аралап, медициналық қызмет көрсеткен. 1917 жылы теміржол ауруханасы 40 төсектік орынға көбейтіледі. Бұл сол кездің өзінде теміржол жұмысшыларының денсаулығына көп көңіл бөлінгенін көрсетеді.Ұлы Отан соғысы жылдарында теміржол ауруханасы госпитальға айналған. Түрлі жарақатпен түскен солдаттарды қабылдап, ем жасаған. Төсек саны 1970 жылы 220-ға дейін көбейтілді. 2000 жылдан бастап «Көліктік медицина қызметі» АҚ Қазалы филиалы теміржол ауруханасы, 2005 жылы қайта тіркеуден өтуіне байланысты «Көліктік медицина қызметі» АҚ Қазалы филиалы теміржол ауруханасы болды. 2017 жылдың 20 қыркүйегінде «Апаттар медицинасының теміржол госпитальдары» ЖШС филиалы «Қазалы теміржол ауруханасы» болып қайта құрылды. Қазіргі таңда «Қазалы теміржол ауруханасы» ЖШС болып аталады.– Сіздерде қызмет көрсету аясы шектеулі ме, әлде сырттан келгендерді де қабылдай бересіздер ме?– Біздің ұжым Қазалы, Арал, Қармақшы аудандарында тұратын теміржолшыларға, олардың отбасыларына, теміржол зейнеткерлерін көпсалалы мамандандырылған, алғашқы медико-санитарлық, консультациялық-диагностикалық медициналық көмек көрсетеді. Профилактикалық шаралар жүргізеді. Емделушілердің қолжетімді медициналық көмек алу құқығы қамтамасыз етілген. Жоспарлы емдеу кезінде ауруханаға жатқызбай, бас тарту жағдайлары жоқ. Науқастарды жатқызу «Портал бюросы» арқылы қабылданады, қалғаны күндізгі ауруханада емделеді.Аурухананың жаңа үлгiдегi ғимараты 1994 жылдан бастап жұмыс істеп келеді. Ондағы жер телiмiнiң ауданы – 5137,3 шаршы метрді құрайды. Үш қосалқы корпустағы дәрiхана, ас бөлiмі, кiр жуатын үй және басқалары санитарлық талаптарға сәйкес жабдықталған. Жоспарлы түрде 140 кереуетке есептелген. Филиал құрылымында консультациялық-диагностикалық қызмет көрсету үшін бір ауысымда 350 адамды қабылдауға арналған теміржол емханасы жұмыс істейді. Консультациялық-диагностикалық бөлімде 3 терапиялық, 4 педиатриялық, 6 жалпы тәжірибелік және 2 өндірістік дәрігер қызмет етеді. Емханаға қарасты жеті медициналық бекетте – 7 фельдшер және Сексеуіл, Төретам денсаулық пункттерінде – 2 линиялық дәрігер қызмет етеді.Мұнда ересектер мен балаларға амбулаториялық-емханалық, шұғыл алғашқы, ересектер мен балаларға көрсетілетін стационарды алмастыратын, мамандықтар бойынша консультациялық-диагностикалық және стационарлық медициналық көмектер көрсетіледі. Сондай-ақ, анестезиология және реаниматология, нефрология, жалпы терапия, хирургия, акушерлік және гинекология, невропатология, оториноларингология, эндокринология, педиатрия, жалпы дәрігерлік тәжірибе, кардиология, гастроэнтерология, дерматовенерология, стоматология, офтальмология, травматология және ортопедия, аллергология, пульмонология, онкология, рентгенология, гирудотерапия, нейрохирургия, медициналық реабилитология, дәстүрлі медицина, урология, трансфузиология, психиатрия, наркология, физиотерапия, емдік дене шынықтыру, массаж, эксперттік медициналық көмек жасалады.&nbsp;Сонымен бірге, ауруханада балалар мен ересек арасында нысаналы мақсаттағы топта «В», «С» гепатитке, әйелдер арасында жатыр обырына, колоноскоптық әдісімен ересектер арасында тік ішек, тоқ ішек обырына, ерлер арасында қуық безі, асқазан, өңеш және бауыр обырына, қан айналым жүйесі ауруларына, су қараңғылыққа, қант диабетіне тексеру жүргізіледі.– Тағы қандай қызметтерді жүзеге асырасыздар?– Аурухана құрамында бейінді бөлімшелер қызмет атқарады: хирургия бөлімінде 12, оның ішінде травматологиялық төсек, жоғары технологиялы медициналық көмек төсегі, гинекология бөлімінде 12 терапия бөлімінде 20, неврология бөлімінде 12, балалар бөлімінде 12, нейроинсульт бөлімінде 20, реанимация бөлімінде 8, ақылы қызмет бөлімінің керует саны 12, күндізгі стационарда 40, оның ішінде емханалық 15 төсек қойылған. Сонымен қатар, параклиникалық бөлімдер – клиника-диагностикалық, бактериологилық, биохимиялық, иммун-ферменттік зертхана, функционалдық диагностика жүргізу (рентгенологилық, рентгеноскопиялық зерттеулер, маммография, рентген, компьютерлік томография, «С-дуга» рентгенодиагностикалық аппарат, доплерография, барокамера, УДТ-диагностика, эхо-энцефалоскопиялық, фиброгастроскопиялық, эхоэнцефаллографиялық, доплерографиялық зерттеулер), физиотерапиялық бөлім емдік денешынықтыру, соққылы толқын терапиясы, үгу столы, мойын массажын жасау аппараты, парафин, емдік массаж, емдік тұзды және 10 түрлі дәрілік ванналар, кедр саунасы, су асты массажы, джакузи, мануалдық емдеу, Су-Джок емдеу, барокамера жұмыс істейді. Компьютерлік томография аппаратымен Арал, Қазалы және Қармақшы аудандарының халқына қызмет көрсетіледі. Айта кетсек, ауруханаға бекітілген стационарлық науқастар, мүгедектер, зейнеткерлер, жасөспірімдер, «Батыр ана» орденімен, «Алтын алқа», «Күміс алқа» белгілерімен марапатталған әйелдер және медициналық ұйымдардың жолдамасы бойынша пациенттер тегін өткізіледі.– Қазалы теміржол ауруханасының дамуына өзіндік қолтаңбасын қалдырған білікті мамандар жеткілікті. Соларды атап өтсеңіз…– Аурухананың даму тарихында көптеген бас дәрігерлер алмасты. Атап айтқанда, А.Заколодкин, Глушко, Е.Степанова, Б.Есмагамбетова, Ж.Қазмағамбетов, В.Лим, Қ.Сансызбаев аурухана ісінің ілгерілеуіне тер төгіп, халықтың ықыласына бөленді. Көп жылдар бойы медицина саласында еңбек етіп, зейнет демалысына шыққан дәрігерлер – А.Сейсенов, Г.Канатова, А.Жұбатов, А.Тлекешова, Қ.Сәрсенбаев, Қ.Каликов та өз ісінің мамандары болды. Ауруханада еңбек ететін тәжірибесі мол дәрігерлер – С.Артықбаев, Ж.Елеуов, М.Төребай, Е.Дәрібаев, С.Ахмет, Ш.Байбазарова, С.Төлегенов, Ш.Медетбаева, Б.Айжарықова, А.Кулбаева, Ж.Досбергенованың есімі теміржолшылар арасында ғана емес, бүкіл ауданға белгілі. Мекеменің есеп бөлімін жүргізетін бас есепші – К.Жақсылықова қаражаттың кіріс-шығысын орнымен реттейді. Ауруханада жалпы саны 410 маман, оның ішінде 66 дәрігер (6 жоғары санатты, 10 бірінші санатты, 2 екінші санатты, 202 (2 жоғары санатты, 38 бірінші санатты, 31 екінші санатты) орта медициналық қызметкер, 78 кіші медициналық қызметкер, 72 өзге қызметкерлер еңбек етеді.– Білуімізше, 2016 жылы нейроинсульттік бөлім ашылды. Бұның қазіргі аяқ алысы қалай?–2016 жылдың 15 ақпанынан Қызылорда облыстық денсаулық сақтау басқармасының бұйрығына сәйкес, аурухананың төсек қоры шеңберінде 24 төсектік нейроинсульттік орталық ашылды. Науқастарды дер кезінде қабылдап, жедел медициналық көмек көрсету үшін тиісті құрал-жабдықтар, құрылғылармен, дәрі-дәрмектермен, тасымалдауға арналған арбалар және лифтімен жарақталды. Үлкен және кіші операциялық залдар тәулік бойы нейрохирургиялық операциялар жасау үшін дайындалып, арнайы құралмен қамтамасыз етілген. Реанимациялық-анестезиологиялық бөлімше 9 төсекке кеңейтіліп, осы заманғы қондырғылармен қамтылып, нейрохирургиялық операциялардан кейінгі қосымша реанимациялық 4 төсектік палата ашылды.Сонымен қатар, аурухананың травматологиялық қызметі жоғары мамандандырылған медициналық көмек көрсетуге дайын және көрсетілген медициналық қызметті ақылы негізде жасауға толық мүмкіндігі бар. Бүгінгі таңда аурухананың материалдық-техникалық базасы жақсартылған, барлық бөлімдерге пластикалық терезелер орнатылып, жергілікті бу қазандығынан ыстық су келуі қамтамасыз етілді. Газбен жылытылады, ішкі су жүйесі пластикалық құбырларға ауыстырылды. Сондай-ақ, стационар ғимаратының сыртқы қабырғасы плиталармен көмкерілді.Тұрғындар денсаулығын жақсартуда мақсат еткен әріптестердің халыққа қызмет жолында мерейлі міндеттер үдесінен табыла береріне сенім мол.– Сұхбатыңызға рахмет!

Құбыл Ршымбетов: Халыққа жан-жақты консультациялық-диагностикалық медициналық көмек көрсетеміз

<a href="https://kyzylorda-news.kz/">Kyzylorda-news.kz.</a>&nbsp; Бұрнағы күні аудандық қоғамдық даму бөлімінің ұйымдастыруымен, «Еңбек даңқы» музейінде «31 мамыр – саяси қуғын-сүргін және ашаршылық құрбандарын» еске алу күніне орай саяси қуғын-сүргін құрбандарының ұрпақтарымен және нәубет жылдары Сыр өңіріне қоныс аударған этнос өкілдерінің ұрпақтарымен кездесу өткізілді. Іс-шараға аудан әкімінің орынбасары Талғат Нұртазаев, аудандық қоғамдық даму бөлімінің басшысы Бейбіт Смайлов, «Қызылорда облысының мемле¬кет¬тік архиві» КММ-нің «Сырдария аудандық архиві» филиалының басшысы Жәнібек Сейлов, аудандық тарихи-өлке¬тану музейінің директоры Салтанат Қуандықова, саяси қуғын-сүргін құрбандарын ақтау бойынша аудандық жұмысшы топ мүшелері, өзге этнос өкілдері, саяси қуғын-сүргін құрбандарының ұрпақтары, БАҚ өкілдері мен жастар қатысты.Іс-шарада аудандық орталық кітапхананың кітапханашысы Динара Пазылбекова «Тарихтан тағылым-өткенге тағзым» атты кітап көрмесі таныстырды. Сонымен бірге аудандық мұражай экскурсоводы Айжан Жұмабекова аудандық тарихи өлкетану музейінің «Жаралы жылдар жаңғыры» тақырыбындағы тарихи-құжаттық көрмесін тізбектеп жиналғандарға айтып берді. Ал аудандық мәдениет үйі өнерпаздарының &nbsp;«Алаш арыстары» атты театрландырылған қойылымы ұсыныды.Аталған іс-шара барысында сөз алған аудан әкімінің орынбасары Талғат Нұртазаев тарихи күннің маңыздылығына тоқталды.&nbsp;<blockquote>– &nbsp;ХХ ғасырда бірнеше қайталана орын алған репрессия жылдары және батыр халқымыздың басым бөлігінің жаны қиылған ашаршылық жылдарындағы ауыр да азапты күндер қазақ халқының тарихында қалғаны ел есінде. Әрбір күндер желісінде ата-бабымыздың бастан өткерген қиындықтары тізбектеліп жатыр. Шын мәнінде, Алаш қайраткерлерінің күрескерлігі, жанқиярлық табандылығы келер ұрпаққа үлгі-өнеге. Сонымен бірге талай жылдар бойы қуғын-сүргінге ұшыраған азаматтарды ақтау жұмыстары жүргізілуде. Осы күні саяси қуғын-сүргін құрбандарын ақтау бойынша аудандық жұмысшы топ мүшелері әрбір мәселенің тереңнен зерттеуде. Азаматтарымызды ақтауға күш салуда. Сол жылдары өзге ұлт өкілдері ауданымызға қоныс аударды, – деді аудан әкімінің орынбасары.&nbsp;</blockquote>Мұнан соң, саяси қуғын-сүргін құрбанының ұрпағы Айту Байдосов, Ссыр еліне қоныс аударған Кан Мила, аудандық жұмысшы топ мүшесі, Қазақстан Журналистер одағының мүшесі, өлкетанушы Жәнібек Маханбетов халқымыздың басына түскен нәубет-зобалаң халық жадынан ешқашан өшпейтіндігін, өткен тарихымызды ұмытпай, біздің болашағымыз үшін күрескен ата-баба рухына тағзым ету парызымыз екендігін айтып өтті.&nbsp;<blockquote>– Сол күндер, зұлматты жылдар қаншама жанның өмірін қиды. Біз аудандық жұмысшы топ мүшелері әрбір азаматтың өмірін мұқият зерделеуге көңіл бөлдік. Ұлт тарихында ойып тұрып орын алатын «31 мамыр – саяси қуғын-сүргін және ашаршылық құрбандарын еске алу күні» өз мән-мағынасын жоғалтпауы тиіс. Осы күні біздер өткен тарихымызға шолу жасап, Алаш қайраткерлерін еске аламыз. Олардың жазған еңбектеріне зер салсақ, сол күннің өзінде қазақты сауаттандыруға, ұлттық идеологияны жаңғырутуға күш салғандығын байқаймыз, – деді Жәнібек Маханбетов.&nbsp;</blockquote>Қаншама зобалаң жылдарды бастан кешкен қазағымның әрқайсысының айтқан зары, кешкен мұңы, жүріп өткен тар жолдары – бәрі-бәрі бүгінгі ұрпақтың құлағында, жүрегінде, мәңгі есінде! Ел тағдыры жолында жаны қиылған азаматтардың рухына тағзым ету, олардың еңбектері үшін алғыс білдіру тәуелсіз елдің кез-келген тұрғынының парызы!&nbsp;Аудан көлемінде «31 мамыр – саяси қуғын-сүргін және ашаршылық құрбандарын еске алу күні» кеңінен аталып өтілді. Мәселен, аудандық мәдениет үйінде 31 мамыр – Саяси қуғын сүргін және ашаршылық құрбандарын еске алуға арналған «Ызғарлы жылдар жаңғырығы...» атты еске алу іс-шарасы өткізілді.&nbsp;Танымдық іс-шара барысында жазықсыз жапа шеккен, елдің болашағы, ұрпақтың бақыты үшін күрескен асыл азаматтарды көпшілік бір минут үнсіздікпен еске алды. Сонымен қатар аудан өнерпаздары патриоттық әндер шырқады. Аудан жұртшылығы саяси қуғын-сүргін құрбандарын еске алды.&nbsp; &nbsp;

Сырдариялықтар саяси қуғын-сүргін құрбандарын еске алды

<a href="https://kyzylorda-news.kz/ru">Kyzylorda-news.kz.</a> Қазақтың ғасырлар бойы қалыптасқан тұрмысында ата-ананың ұрпаққа аманаты, баланың перзенттік парызы, олардың бір-біріне қатысты тәрбие үлгілері бар. Алайда қазір осы құндылықтардың өміршеңдігі жойылып бара жатқандай. Осыны назарға ала отырып, аудан әкімдігінде ­аудан әкімінің орынбасы Болат Ысмағұловтың төрағалығымен отбасылық-демографиялық саясат жөнінде аудандық комиссия отырысы өтті.Оған кент және ауыл әкімдері, комиссия мүшелері мен сала басшылары, ауылдық әйелдер кеңесінің төрайымдары мен БАҚ мүшелері қатысты.Комиссия отырысын аудан әкімінің орынбасары Б.Ысмағұлов ашып беріп, отбасылық құндылықтарды насихаттау, елдің келешегі – балалардың аман, салауатты, білімді болып өсуіне кепілдік беру мақсатында түрлі бағыттағы жұмыстары туралы баяндады. Содан соң білім саласы бойынша жастар арасындағы ертежүктілік, суицид мәселелері, ерлердің әйелдерге қатысты күтілетін өмір сүру ұзақтығындағы гендерлік алшақтық, ана мен бала өлімінің алдын алу бойынша атқарылған жұмыстары, Керделі ауылдық округіндегі әйелдер кеңесінің атқарылған жұмыстары, әлеуметтік көмек алушылар бойынша атқарылған жұмыстары айтылды.Күн тәртібіндегі мәселені алғаш болып баяндаған аудандық білім бөлімінің басшысы Жібек Баймұратова балалар мен жасөспірімдер арасындағы суицид пен ертежүктілік қоғамымыздың ең өзекті әлеуметтік проблемаларының бірі болып отырғанын атап өтті. Бұл өз кезегінде алдын алу шаралары кешенін қалыптастырудың жаңа тәсілдерін іздеуді, сондай-ақ уәкілетті органдардың балалар суицидінің алдын алуға, ертежүктілікке тосқауыл қоюға бағытталған іс-қимылдарындағы проблемалық аймақтарды анықтауды және шешуді талап етеді. Көптеген сарапшылардың пікірінше, суицидтің өсуіне психологтардың, тәуекел тобындағы ¬балалармен жұмыс жасайтын мамандардың біліктілігі мен дайындық деңгейінің жеткіліксіздігі ықпал етеді.Ал екінші мәселе бойынша аудандық көпбейінді орталық ауруханасы бас дәрігерінің ана мен бала денсаулығын қорғау жөніндегі орынбасары Гүлназира Сүлейменова отбасылық-гендерлік саясат саласындағы ағымдағы жағдай туралы баяндама жасады.<blockquote>«2023 жылдың 4 айының қорытындысы бойынша ауданда 78 167 мың адам тұрады. Бұл өткен жылға қарағанда 0,6 процентке төмендеген. Оның ішінде ерлер саны – 0,4 процентке, әйелдер ерлерге қарағанда – 0,8 процентке өскен. Гендерлік бөліністе аудан бойынша ерлерде күтілетін өмір сүру ұзақтығы – 64,1 жас, ал әйелдерде – 67,1 жас. Өмір сүру ұзақтығындағы айырмашылық – 3,4 жас», – деді Г.Сүлейменова.</blockquote>Рас, гендерлік тепе-теңдік әлі де болса қоғамда шешімін таппай отырған мәселе. Конституцияда әйелдер мен ерлердің тең құқықтары және еркіндіктері басты қағидат ретінде көрсетілген. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның құрылуы еліміздегі гендерлік саясатты жүзеге асырудың маңызды бір қадамы болып саналады.Тиісінше, комиссия отырысында қатысушылар ана мен бала өлімінің деңгейі, отбасы институтын нығайту, ерлер мен әйелдердің мүмкіндіктерінің теңдігі, әйелдердің көшбасшылығын дамыту және басқа да көптеген өзекті мәселелерді талқыға салды.Басқосуда үшінші болып Керделі ауылдық округінің әйелдер кеңесінің төрайымы Разия Ысқаққызы сөз кезегін алды. Ол аталған елді мекенде әйелдер кеңесінің атқарған жұмыстарын, отбасы құндылығы турасында біраз ақпарат айтты. Отбасы тәрбиесіне бағытталған шараларды да тілге тиек етті.Күн тәртібінде тұрған төртінші мәселені яғни, әлеуметтік көмек алушылар бойынша атқарылған жұмыстарды «аудандық жұмыспен қамту, әлеуметтік бағдарламалар және АХАТ бөлімі» КММ басшысы Ағыбай Төлегенов сөз етіп, ¬жиынды қорытындылады.Комиссия мүшелері әр баяндамашы берген ақпаратты талқылап, көкейдегі ¬сауалдарын жодап, тиісті жұмыс істеуге шақырды.

«Отбасы – қоғамның алтын діңгегі»: Шиеліде комиссия отырыс өтті

<a href="https://kyzylorda-news.kz/">Kyzylorda-news.kz.</a> Биыл Қызылорда облысында кәсіпкерлердің саны 32,8 пайызға ұлғайды. Сәйкесінше, жұмыс істеп тұрған белсенді кәсіпкерлердің саны 39,2 пайызға артты. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық кәсіпкерлік және өнеркәсіп басқармасы басшысының орынбасары Ринат Сұлтангереев мәлімдеді.<blockquote>«Шағын және орта кәсіп экономиканы дамытуда айрықша рөл атқарады. Бүгінде аймағымызда шағын және орта кәсіпкерлікте 121 мыңнан астам адам жұмыспен қамтылып, облыстың экономикалық белсенді халқының үштен бір бөлігін құрады. Осы жылы аталмыш кәсіпкерлікті 125 мың адамға жеткізу жоспарлануда. Бұл бастаманы іске асыруда Кәсіпкерлікті дамыту жөніндегі ұлттық жоба шеңбері дайындалып, 168 жоба субсидияланды. Сондай-ақ, «Қызылорда» өңірлік инвестициялық орталығы 273 жобаны қаржыландырды. Сонымен қатар өңіріміздегі өңдеу өнеркәсібі 1,9%–ға өсім көрсетті. Бұл ретте жиһаз өнеркәсібі мен жеңіл өнеркәсіп айрықша өсім көрсеткен. Биыл бірыңғай индустрияландыру картасы аясында 4 жоба іске қосылып, жергілікті тұрғындар 125 жаңа жұмыс орындарымен қамтылады. Аталмыш жобалар аймақ экономикасын дамытуда елеулі үлес қосарына сеніміміз мол. «Қармақшы құс» серіктестігінің қуаттылығы жылына 1500 тонна құс етін өндіруге қауқарлы құс фабрикасы іске қосылмақ. Ал, «Айғасар» серіктестігі жылына 36 мың тонна бие сүтін өңдесе, «Казах камел» зауыты 700 тонна түйе сүтінен құрғақ ұнтақ өндірмек. Сондай-ақ, «Арал кварц» зауыты 172,8 мың тонна құрғақ құрылыс қоспаларын өндіретін болады. Мұнан өзге шикізаттық емес экспорт көлемі 18,8%-ға өскен», - деді Ринат Қалдыбекұлы.</blockquote>Брифингте сала маманы биыл инвестиция саласы бойынша көрсеткіште оң динамика қалыптасқанын айтты. Яғни, былтырғы жылмен салыстырғанда өсім 42,1 пайызды құрады. Сондай-ақ, жеке инвестициялардың көлемі де жыл сайын артуда. Биылдың өзінде 70 млрд. теңгеге жеке инвестиция тартылып, өткен жылмен салыстырғанда 71 пайызға өскен.

Қызылорда облысында кәсіпкерлер саны артып келеді

<a href="https://kyzylorda-news.kz/">Kyzylorda-news.kz.</a> Қызылорда облыстық перинаталдық орталығы базасында пренатальды диагностиканың инвазивті әдістері жүргізіледі. Мамандар Қызылорда облысында тәжірибеге бірегей әдісті енгізіп қана қоймай, оны өңір тұрғындары үшін қолжетімді ете алды.Пренатальды диагностика – ұрықтың хромосомалық патологиясына күдік болған кезде пренатальды кариотиптеуді жүргізу үшін ұрық материалын (хорионбиопсия, амниоцентез, кордоцентез) алу мақсатында ультрадыбыстық бақылаумен жүргізілетін жатырішілік операция. Инвазивті зерттеу әдістері хромосомалық ауруларды, хромосомалық ауытқуларды, сондай-ақ моногендік ауруларды анықтау үшін ұрық материалын алу мақсатында генетик дәрігердің нұсқауы бойынша жүргізіледі.<blockquote>«ДДҰ мақұлдаған инвазивті диагностикаға жіберудің стандартты көрсеткіштері келесі талаптарды қамтиды — жүкті әйелдің жасы 37 жастан асқан болуы керек, жүктіліктің алғашқы апталарында кем дегенде 2 өздігінен түсік болуы, отбасында баланың Даун синдромы болуы, бірнеше туа біткен ақаулар, хромосомалық патологияның жоғары қаупі анықталған инвазивті емес сынақтардың нәтижелері және биохимиялық немесе ультрадыбыстық маркерлер. Мұндай диагностиканың мерзімі тоғызыншы апта мен жиырма бірінші апта аралығында жасалады», — дейді акушер-гинеколог Майра Әжібайқызы.</blockquote>Айта кетейік, инвазивті әдістер ұрықтың жасушалары мен тіндерін және провизорлық мүшелерді (хорион, плацента) алуға мүмкіндік береді. Материалды алу ультрадыбыстық бақылаумен трансабдоминальды түрде (іш қабырғасы арқылы) жүзеге асырылады

Қызылордадағы перинаталдық орталықта пренатальды диагностиканың инвазивті әдістері жүргізілуде

<a href="https://kyzylorda-news.kz/ru">Kyzylorda-news.kz.</a> Таяуда аудандық мәслихат хатшысының төрағасы Айтбай Жандарбеков аудандық партия филиалы жанындағы партиялық бақылау комиссиясының мүшелерімен бірге Көкшоқы мөлтек ауданындағы ашық алаңда (стадион) күрделі жөндеуден өтіп жатқан құрылыс жұмыстарын аралап қайтты.Оған қоғамдық кеңестің төрағасы Қаблеш Бекшеев, Насырбек Мырзабеков, партиялық бақылау комиссиясының мүшесі Ғани Есімов, «AMANAT» партиясы &nbsp;депутаттық фракциясының мүшелері Болат Сыздық, Нұргүл Шалекеева, Болат Сүлейменов, аудандық мәслихат депутаты Қанат Жүсіпов, аудандық мәдениет және спорт бөлімінің басшысы Аруна Әзімхан қатысты.Аралау барысында Насырбек Мырзабеков ашық алаңының күрделі жөндеу жұмыстарының баяу жүріп жатқанын тілге тиек етіп, басталған құрылыстың сапалы болуын айтып, жүргізіліп жатқан құрылыс жұмыстарына бірқатар ескертпелер жасады. Айта кетейік, Көкшоқы мөлтек ауданындағы ашық алаңының күрделі жөндеу жұмыстарына облыстық бюджеттен 224 630 000, аудандық бюджеттен 11 940 000 теңге қаржы қаралған. Бас мердігер компания «Корпорация – Алем құрылыс» ЖШС. Бас жобалаушы «Қызылорда Дос Строй Проект» ЖШС, Авторлық қадағалау «Темирлан Проект» ЖШС, Техникалық қадағалаушы «Қабылан эксперт» ЖШС.Күрделі жөндеуден өтіп жатқан нысан үстіміздегі жылдың маусым айында ел игілігіне пайдалануға беріледі деп көзделген. Одан кейін депутаттар Көкшоқы мөлтек ауданында жаңадан салынып жатқан 18 пәтерлік 4 тұрғын үйдің құрылыс нысанына бет алды.Депутаттар жаңадан салынған көпқабатты тұрғын үйді толық аралап, ендігі қалған жұмыстарына бақылау жұмыстарын жүргізіп, тұрғын үйді нақты қай уақытта пайдалануға берілетінін сұрады.&nbsp;<blockquote>«Шиелі кентіндегі 18 пәтерлік 4 тұрғын үйге 2020 жылдың мамыр айында құрылыс-монтаж жұмыстары басталғаны белгілі. Бас мердігері компания «Жабдықтау» ЖШС-і. Келісім-шарт сомасы – 709 737 410,59 теңге. Авторлық қадағалаушы «Сартөбе» ЖШС. Техникалық қадағалаушы «Крез-Сервис» ЖШС-і. Жоба бойынша әр тұрғын үйде 12 пәтер 2 бөлмелі, 6 пәтер 3 бөлмелі. Қарқын алған бұл құрылыстың баяулап, бәсеңдеп қалғаны құрылыс материалдарының қымбаттауына байланысты жобаға қайта түзету жұмыстары енгізіліп, жергілікті бюджеттен қосымша 113 миллион теңге көлемінде қаржы қаралып, қайтадан құрылыс жұмыстары жүргізілген. Көпті күттірген көпқабатты тұрғын үй тамыз айында пайдалануға беріледі деп жоспарлануда», – деді аудандық құрлыс-сәулет бөлімінің басшысы Дана Аман.</blockquote>Аралау соңында аудандық мәслихат хатшысы Айтбай Жандарбеков құрылыс сапасына жіті мән беріліп, бөлінген қаражаттың тиімді игерілуін және жұмысшылардың қауіпсіздік ережелерінің қатаң сақталуын, &nbsp;жалақының уақытылы берілуі қажет екенін айтты.

Шиеліде депутаттар құрылыс нысандарын аралады

<a href="https://kyzylorda-news.kz/">Kyzylorda-news.kz.</a> Ұлт ұстазы Ахмет Байтұрсынұлының: «Білімді болуға оқу керек. Бай болуға кәсіп керек. Күшті болуға бірлік керек. Осы керектердің жолында жұмыс істеу керек»-деп айтқан өсиеті қазіргі кезде де өз мәнін жойған жоқ. Бүгінде ауданның көпшілік білім ордаларында балаларды кәсіпке баулуға бағытталған жұмыстар жүйелі жүргізілуде.26 мамыр күні осындай мектептің бірі М.Горький атындағы №16 мектеп-лицейде «Ынта, талап, еңбек – кәсіпке апаратын жол» тақырыбында аудандық семинар өтті. Оқушыларды кәсіби тұрғыда құзіреттілігін дамыту, заманауи дағдылардың практикалық базасын қалыптастыру, мамандық таңдауға бағыт беруді көздеген семинарға мектеп директорлары, орынбасарлары, психологтар &nbsp;мен ұстаздар қауымы қатысты.&nbsp;Жиынға келген қонақтарды бастауыш сынып оқушылары салтанатты түрде қарсы алып, семинардың ашылуы болды. Мектеп ауласында оқушылар қызанақты егу, өсіру, баптау жұмысы туралы &nbsp;ағылшын, орыс, қазақ тілдерінде практика жүзінде көрсетті. &nbsp;9 «В» сынып оқушысы Оспан Айберен жылыжайда қорғалған топырақта өсімдіктерді өсіру технологиясы туралы таныстырды. Жиынға қатысушылар білім беру ісінің үздігі –Игіліков Жұмабек Әбдіразақұлының есімі берілген физика кабинетінің ашылуының куәсі болды.&nbsp;Бұдан кейін «Инклюзивті білім беруді қыш өнермен интеграциялау-табыс кепілі» тақырыбында кешенді шаралар өтті. Мәселен, «Экологиялық таза қыш кірпішін алу-экономикалық тиімді технология» тақырыбында жоба жұмысымен химия пәні мұғалімі Жексембиева Эльмира таныстырды. Сонымен бірге «Саздан денсаулыққа пайдалы емдік қасиеттерін тұтыну перспективалары» тақырыбында жұмысын баяндаған биология пәні мұғалімі Жұма Нафиса, тәжірибе жүзінде саздың адам терісіне пайдасын көрсетіп, қонақтардың қызығушылығын тудырды.Сондай-ақ, «Қыш мүсін, каллиграфия өнеріне баулу арқылы оқушыларға кәсіптік бағдар беру» жұмысы бойынша &nbsp;қазақ тілі мен әдебиеті пәні мұғалімі Абдулла Алия мен ағылшын тілі пәні мұғалімі Бердалиева Жадыра ЕББҚЕ оқушымен бірге &nbsp;жасалынған, қыштан жасалған бұйымдардан құралған көрмені көрсетті. Технология пәні мұғалімі Көпжасар Тілектес &nbsp;жергілікті табиғи өнімді пайдалану арқылы сапалы саздан бұйымдар дайындауға болатынын өзі жасаған көрмедегі заттары &nbsp;арқылы &nbsp;танытса, «Менің кәсібім-менің бизнесім» (жергілікті өңімдерді өңдеу, сақтау технологиясы бизнес жобасы) &nbsp;«Көкөністер консервілеу» - 9 «Б» сынып оқушысы Таңсықбай М., «Жемістерді консервілеу» - 9 «В» сынып оқушысы Иманқұлова М., «Бизнес план сушки и заморозки фруктов и овощей» &nbsp;11 «А» сынып оқушысы Садуакасова Н. еңбектерін жария етті.&nbsp;Ал заман талабына сай білім ордасында құрылған «Меdia&amp;Film School» мектеп киностудиясы жұмысымен ( Қазалы қаласының тарихы) 10 «Б» сынып оқушысы Тастыбай Нұрила, «100 жылдық тарихы бар мектептің Қазақстанға еңбегі сіңген түлектерінің өмір жолы» жайлы 3 «В» сынып оқушысы Мырзахмет Інжу, Нұрғиса Тілендиевтің «Ата толғау» күйін «Өнер» үйірмесінің мүшелері орындап шықты.&nbsp; Сонымен қатар меймандар ерекше білім беруді қажет ететін балалармен жұмыс жасауда мәні зор &nbsp;«ART TIME клубы» жұмысын көрді. Психолог Тілеуқабылова Алияның жетекшілігімен жасалған жоба қонақтарға ерекше әсер етті.Қорытынды бөлімде Ш. Айтматовтың «Найман Ана» шығармасы бойынша «Жас таланттар» драма театрының мүшелерінің қатысуымен сахналық қойылым көрсетті.&nbsp;Шара &nbsp;соңында &nbsp;аудандық білім және ғылым қызметкерлері кәсіподағы комитетінің төрағасы Әбілқасым Роман мен әдістемелік кабинет меңгерушісі Лаура Ізбасарова сөз сөйлеп, қорытындылады. Ал білім ордасының басшысы Дархан Сәдуақасов өз ұжымдастарының ізденімпаздығы мен табанды еңбектеріне, жаһандану дәуірінің өзгерістеріне сай кәсіпті дәріптеп, дамытуды көздейтін мектеп-лицей ұстаздарына алғысын айтты.

Қазалы мектептерінде балаларды кәсіпке баулуға бағытталған жұмыстар жүйелі жүргізілуде 

<a href="https://kyzylorda-news.kz/">Kyzylorda-news.kz.</a> «AMANAT» партиясы облыстық филиалы білім беру ұйымдарын бітіргелі жатқан жас мамандарды жұмыспен қамту және жеке кәсібін ашу үшін мемлекет тарапынан беріліп жатқан жеңілдіктер мен мүмкіндіктер жайлы ақпараттар беру үшін «Ашық есік» күнін &nbsp;тұрақты ұйымдастыруда.&nbsp;Ақпараттық шараға партия филиалының атқарушы хатшысының орынбасары А.Жарылқасынов, қалалық жұмыспен қамту орталығының бөлім басшысы Абылай Самыратов, «Қызылорда өңірлік инвестициялық орталығы» ЖШС-нің маманы Е.Нұрахметов және «Аграрлық несие корпорациясы» аймақтағы филиалының кредиттеу бөлімінің басшысы Қ.Садақбаев қатысып, жас мамандарды еңбекке баулу, кәсіппен айналысуына мемлекет тарапынан беріліп жатқан жеңілдіктер жайлы мәліметтермен бөлісті.<blockquote>«АМАNАТ» партиясының халықтың сұранысы негізінде 2023-2027 жылдарға жоспарланған «Халықпен бірге» атты сайлауалды бағдарламасында айқындалған басым бағыттардың бірі жастарға жан-жақты жағдай жасау. Яғни олардың жұмыспен қамтылуына, өмір сүру жағдайын жақсартуына басымдықтар көзделген. Осы бағытта ұйымдастырылып отырған бүгінгі ашық есік күнінің мақсаты оларға дұрыс бағыт - бағдар беру, жұмысқа орналасуына ықпал ету және мемлекет тарапынан жасалып жатқан жеңілдіктер мен мүмкіндіктер жайлы кеңінен ақпарат беру», – деді алғаш сөз алған партияның облыстық филиалы атқарушы хатшысының орынбасары А.Жарылқасынов.</blockquote>Қызылорда қаласы бойынша биыл 11624 жаңа жұмыс орындарын құру жоспарланса, бүгінгі күні 5948 жұмыс орны ашылған. Оларға «Электронды еңбек биржасы» порталы арқылы 232 жас тұрақты жұмысқа орналасып отыр. Мұнан бөлек жыл көлемінде ұйымдастырылған 6 бос жұмыс орындары жәрмеңкесі нәтижесінде 27 жас тұрақты жұмыспен қамтылған. Шара барысында «Қызылорда қалалық жұмыспен қамту орталығы" КММ-нің бөлім басшысы Абылай Самыратов сөз алып, жастарды жұмыспен қамту аясында жүргізіліп отырған жұмыстар бойынша кеңінен ақпарат беріп өтті.&nbsp;<blockquote>«Жыл басынан жастар практикасын бойынша 232 мекемемен келісім шарт жасалып, 358 жас маман жұмыс жасап жатыр. Әлеуметтік жұмыс орындарын ұйымдастыру арқылы 165 азамат жұмысқа жолданды, оның 50 жастар санатына кіретін азаматтар. Қоғамдық жұмыс орындарында уақытша 569 жас жұмыс жасауда. Алғашқы жұмыс орны бойынша 29 жас жұмыс орынмен қамтамасыз етілді. Бұл жұмыстар алдағы уақытта да жалғасын табады», - дейді ол.</blockquote>«Ашық есік» шарасына жоғарғы, арнаулы орта, кәсіптік оқу орындарын бітіргелі жатқан түлектер қатысып, сала мамандарының таныстырған хабарламаларына сәйкес сұрақтар қойып, тиісінше жауаптар алды.

Қызылордада «AMANAT» партиясы жастарды жұмыспен қамтуда кездесу өткізді

<a href="https://kyzylorda-news.kz/">Kyzylorda-news.kz.</a> Сыр елінде Саяси қуғын-сүргін және ашаршылық құрбандарын, тарих қатпарындағы қасіретті кезеңді еске алуға арналған арнайы іс-шара Қызылорда қаласы «Арай» шағын ауданындағы қуғын-сүргін және ашаршылық құрбандарына арнап орнатылған ескерткіш басында өтті.&nbsp;Елімізде 31 мамыр – Саяси қуғын-сүргін және ашаршылық құрбандарын еске алу күні. Сыр жұртшылығы атынан облыс әкімі Нұрлыбек Нәлібаев зиялы қауым өкілдерімен бірге нәубетке ұшыраған боздақтар рухына тағзым етті.&nbsp;Айта кету керек, Президенттің Жарлығымен 2020 жылдың қараша айында ХХ ғасырдағы саяси қуғын-сүргін құрбандарын толық ақтау жөнінде мемлекеттік комиссия құрылды. Мемлекеттік комиссияның жұмысына қолдау көрсету мақсатында 2021 жылы ХХ ғасырдағы саяси қуғын-сүргін материалдарын зерттеу орталығы ашылды.ХХ ғасырдың 30-50 жылдарындағы саяси қуғын-сүргін тарихына қатысты материалдар Орталыққа ІІМ, ҰҚК, Бас прокуратураның арнаулы мұрағаттарынан беріледі. Орталық таяу уақытта барлығы 715 мыңға жуық істі қабылдап алады деп жоспарланып отыр. Мұнда құжаттарды құпиясыздандыру, қалпына келтіру жұмыстары жүзеге асырылады. Оларды зерттеу және ғылыми айналымға енгізу үшін тиісті жағдай жасалған.Іс-шарада облыс әкімі Нұрлыбек Нәлібаев бастаған зиялы қауым өкілдері, қуғын-сүргін құрбандарын ақтау жөніндегі облыстық жұмысшы топ өкілдері және тарихшы-ғалымдар, қала тұрғындары ескерткішке гүл шоқтарын қойды.Мұнан кейін аймақ басшысы «Ақмешіт-Сырдария» мешітінде қуғын-сүргін және ашаршылық құрбандардың рухына құран бағыштады.&nbsp; Әрине, жазықсыз жапа шеккен боздақтарды ұрпағы ұмытпақ емес. Жыл сайын жерлестеріміз дәл осы күні арнайы ескерткіш алдына жиылады.<img src="https://knadmin.beoblood.kz/uploads/350791264_206087365164221_1542875396111198167_n_e9d5fa36c1.jpg" alt="350791264_206087365164221_1542875396111198167_n.jpg">

Облыс әкімі саяси қуғын-сүргін және ашаршылық құрбандарының рухына тағзым етті

<a href="https://kyzylorda-news.kz/">Kyzylorda-news.kz.</a> Қазалы ауданы бойынша білім бөлімінің ұйымдастыруымен 1 маусым – Халықаралық балаларды қорғау күніне арналған «Музыка әлемі» атты аудандық ән байқауының ақтық кезеңі өтті. Сайыста ән әлеміне қанат қағып, өнер өлкесінде өзіндік орын қалдыруға бет алған балғындар тыңдарман жүрегіне жол табуға тырысты.&nbsp;Байқаудың аймақтық іріктеу кезеңінен іркілмей өткен 13 талапкер бақ сынады. Қорытындысына сәйкес, бағы мен бабы қатар шапқан №100 орта мектептің 6-сынып оқушысы Дәрменова Ырысалды бірінші орынды жеңіп алды. Сондай-ақ, Жамбыл Жабаев атындағы №234 орта мектептің 6-сынып оқушысы Жеткербай Минура мен №97 орта мектептің 5-сынып оқушысы Баймұрат Кәусар екінші орынды місе тұтса, №182 орта мектептің 4-сынып оқушысы Қалдыбек Қарақат пен №225 орта мектептің 5-сынып оқушысы Алданбай Нұрмұхаммед үшінші орынды бөліске салды.&nbsp;Байқауда жеңіске деген жігері үшін Қалжан Нұрмаханов атындағы №95 орта мектептің 2- сынып оқушысы Оңталап Әмина, Сәкен Сейфуллин атындағы №165 орта мектептің 5-сынып оқушысы Қыпшақбай Мерей, Ғани Мұратбаев атындағы №17 орта мектептің 5-сынып оқушысы Қанибай Нұрдаулет алғыс хатпен марапатталды.

Қазалыда «Музыка әлемі» мәресіне жетті

<a href="https://kyzylorda-news.kz/">Kyzylorda-news.kz.</a> Жер бетінде ең көп тараған ауру түрлерінің қатарына буын аурулары да жатады. Дүниежүзілік денсаулық сақтау ұйымының мәліметіне жүгінсек, әлемдегі адамзаттың әрбір үшіншісі буыннан зардап шегуде. Алдын алмаса, соңы мүгедектікке соқтыратын қауіптің қарқындауына себеп не?Буын ауруларының түрлері қандай? Аурудың алдын алу үшін не істемек керек? Осы және тақырып турасындағы өзге де сұрақтарды Қазалы аудандық емханасының ревматолог дәрігері Жанар Қожағұловадан сұрап, білдік.– Жанар Жаңабергенқызы, буын аурулары біртіндеп дендейтін ауру түріне жатады. Көзге көрінбейтін өзгерісті алғаш қалай байқауға болады? Жалпы, буынның ағзадағы қызметі туралы айтып өтсеңіз…– Буын сүйектердің ағзадағы бір-бірімен байланысатын басты жері. Буынның бұзылысы әдетте қалыпты қозғалысқа кедергісін келтіріп, қиындық тудырады. Буын ауруының белгілеріне қозғалыс қиындауынан өзге қызу қимылдаған уақытта аурудың қозуы, ісініп қызаруы, температура көтеріліп, асқа тәбет жоғалуы, таңертең тұрғанда, буындардың қақсауы, әлсіздік, дене салмағы азаюы, бұлшық еттер ісініп, буындар қара, қызыл түске енуін жатқызуға болады.Қазір бұл сала зерттелген. Жағдайы мен салдарына орай түрліше жіктеледі, топтастырылады. Оларға нақты мына нәрсе себеп болады деп дөп басып айту қиын. Мәселен, буындардағы шеміршекаралық майдың таусылуы, сүйектердің қисық бітуі, жарақат салдарынан сынған сүйектердің дұрыс бітпеуі, ревмотологиялық аурулар негіз болуы мүмкін. Артық салмақ және шамадан тыс желінген ас, тұтынатын су сапасыздығы да ауруға соқтыруға себеп бола алады.Аяқтың ауруы, қолдың қақсауын салқын тигенге балап, дер кезенде мән бермей жүретіндер қатары қалың. Немқұрайлық салдары неге ұшырататынын көбі біле бермейді. Сондықтан уақытылы тесеруден өту кез-келген адамның ертеңгі күніне септесетінін айтудан жалықпаймыз.– Статистикаға жүгінсек, бұл аурумен ересек адамдардың 50 проценті ауыратын көрінеді. Сіз айтып отырған тексеруден өткен тексерілушілердің үштен бір бөлігі буындардың қатты ауырғанынан және олардың ісінуінен, қисаюынан зардап шеккенін айтып шағымданады екен. Бұрын бұндай белгілер үлкендерге тән болатын. Қазіргі жағдай қандай?– Оныңыз рас. Буын аурулары бейжайлықты көтермейді. Қазір ауру түрлері жасарып келеді. Осыдан бірнеше жыл бұрын үлкендер шағымданса, соңғы кезде жасы жиырмадан асқан жандардың арасында да белең ала бастады.Мәселен, остеоартроз, коксартроз, остеохондроз секілді аурулар кезінде адамның жүруі қиындайды. Жамбас, тізе буындағы буынаралық шеміршек майы азайып, қос сүйек бір-біріне қажалады. Алғашқыда аздаған ауырсыну еленбегенімен, кейде ауыр жұмыс істегенде, көп жүргенде, бір жерде ұзақ отырғанда, баспалдақпен жоғары көтерілгенде, сырқырап, бел мен жамбас сүйектерде ауырсынулар болады. Бірақ демалғаннан кейін, ауырғаны басылады. Сүйектер қажалған сайын ауырсыну күшейіп, адам тізесін бүге алмайды, ақсаңдайды. Бірте-бірте ауру үдеп, тіпті қарыс қадам жүрудің өзі мұңға айналады. Өкініштісі, аурудың соңғы сатысында дәрі-дәрмек те, жақпа май да көмектеспей, буын ауыстыру, яғни эндопротез салдыруға апарады.– Сандарды сөйлетсек…– 2019 жылы бізге 608 науқас тіркелсе, 2020 жылы – 654, 2021 жылы 681 адам есепке алынған.Остеоартроз ауры көп таралған. Ол жастар арасында да жиі кездеседі. Ревмотойдты артрит екінші орында. Сондай-ақ жүйелі қызыл жегі (СКВ), жүйелі склеродермия (ССД), дерматомиозит, анкилоздаушы спондилоартрит (Бехтерев ауруы) бар.Жыл басынан бері 88 адам жалпы ем алса, 48 науқас күндізгі бөлім қызметін тұтынды. 40 емделуші ауруханаға жатты. Жыл санап еліміздегі басты орталықтарға тексерілу, емделу аясы ауқымын кеңітіп келеді. Бұл бізге белгілісі. Ал өздігінен ем қабылдап жүргендері қаншама.– Буын ауырмас үшін оның алдын алу және бастапқы сатысында қандай қарапайым ережелерді қолданған дұрыс?– Буын ауруынан құлан-таза айығып кету қиын. Бірақ сырқатқа шалдыққан адамдар барынша ауыр салмақты зат көтермей, биік өкшелі аяқ киімнен бас тартып, тым ұзақ жаяу жүрмеуге мейлінше көңіл бөлгені дұрыс. Басты ескеретін нәрсе, дұрыс тамақтану. Мәселен, тәтті бұрыш, сарымсақ пен пияз, шпинат пен ақжелек секілді көкөністер буынға өте пайдалы. Буынға ыстық басу да зиян. Егер қабынған болса, кері әсерін тигізуі мүмкін. Салауатты өмір салтын ұстану буын ауруларының алдын алуға көмектеседі. Әрдайым жаттығулар жасап, рационыңызға табиғи нәрлі тағамдарды қосу маңызды. Дене жаттығуларын жасап, құрамында дәрумендері мол табиғи тағамдарды пайдаланған дұрыс.– Сөзіңізде «құлан-таза айығып кету мүмкін емес» деп қалдыңыз. Бүгінде «Буын ауруынан бір аптада арылтамын», «Үш күнде буын қиындығынан құтыласыз» деген сынды жарнамадан көз сүрінеді. Осы туралы тереңірек түсіндіріп өтсеңіз…– Аурудың алғашқы сатысында жағдайды біршама қалыпты күйге жақындатуға мүмкіндік бар. Ал созылмалы сипат алғанында, біз барынша сол қалпында ұстап қалуға күш жұмылдырамыз. Соңғы сатысында ағза ауыстырылуға жіберіледі. Бірақ науқасының созылмалығын естіп: «Менің буыным ауырады. Бәрібір кейіннен мүгедек болып қаламын» , – деп жерінуге болмайды. Қазір түрлі жаңалықтар, жаңа дәрі-дәрмектер шығуда. Олардың денсаулықтағы кінәратты түбегейлі жоймаса да, жақсартуға атсалыса алатынын тәжірибе көрсетіп келеді.– Уақыт бөлгеніңізге рахмет!

Жанар Қожағұлова, Қазалы аудандық емханасының ревматолог дәрігері: Буын аурулары бейжайлықты көтермейді

<a href="https://kyzylorda-news.kz/">Kyzylorda-news.kz.</a> Апта басында жалағаш ауданына қарасты аққұм ауылдық клубында алаш қозғалысының қайраткері, ақын, қазақ әдебиетінің жарқын жұлдызы мағжан жұмабаевтың 130 жылдығына орай «мен жастарға сенемін» көркемсөз оқу шеберлерінің аудандық байқауы өтті. Байқауға қатысқан барлық үміткерлер ақынның шығармаларынан сыр шертіп, өлеңді көркемдеп оқу арқылы сөзден маржан терді. ал аталған байқауға куә болған аққұмдықтар сыршыл ақынның өлеңдерінен рухани азық алды. Жалпы, қазақ поэзиясында лирикалық сыршылдықтың шыңына лайық, поэмаларында суреткерлік пен ойшылдығы қат-қабат келіп жататын өлең өлкесінде өшпес мұра қалдырған ұлы ақын – Мағжан Жұмабаев. Мағжан поэзиясының тақырыбы әр алуан. Өзі өмір сүрген жаңа ғасыр басында Мағжан бармаған, ол жырламаған тақырып жоқ деуге болады. XX ғасырдың басында әдебиет әлемінде қатар қанат қаққан ақындардан Мағжан Жұмабаевтың басты ерекшелігі өлең өрімінің өзгеше сұлулығы мен саздылығының ерекше үйлесім табуында. Мағжан Жұмабаев – қазақ поэзиясының жарық жұлдызы ұлы – Абайға еліктей отырып, ұлы ұстаз жолын ұстанғанмен өзінше жол табудан әсте жалықпай, көп ізденген жан.Ал қазақ өлеңінің ұлттық бояуыменен рухын ұстана отырып, оны түрлендіріп айтқан, адам жанының сұлулығы мен сыр сымбатын жырлаған, осылайша қалың оқырманның жүрегіне жол ашқан халқының білікті де парасатты ақыны Мағжан Жұмабаевтың 130 жылдығына орай өткен «Мен жастарға сенемін» көркемсөз оқу шеберлерінің аудандық байқауында 15 үміткер өлең оқып, екі кезең бойынша бақтарын сынады. Байқау шымылдығы Мағжан Жұмабаевты сомдаған өнерпаздың өлең оқуымен ашылды. Мұнан соң «Бал-бала» би тобының «Наркескен» биін тамашалап, онан ары үміткерлердің өнеріне кезек берілді. Ал қазақ өлеңін зергерлеп, елдің жүрегінен орын тапқан, жастардың жігеріне қанат бітіріп «Мен жастарға сенемін» деп жырлаған Мағжан ақынның шығармашылығына тоқталған Аққұм ауылының әкімі Алтынбек Асанбеков байқау қатысушыларына сәттілік тіледі.&nbsp;Ақынның 130 жылдығына арналған көркемсөз оқу шеберлерінің байқауына «Руханият орталығы» коммуналдық мемлекеттік қазыналық кәсіпорнының бөлім басшысы, аудандық мәслихат депутаты, Қазақстан жазушылар орталығының мүшесі, әділ-қазы алқа төрағасы Қуат Адисұлы, Алдаберген Бисенов атындағы № 38 орта мектептің қазақ тілі және әдебиет пәнінің мұғалім Жанар Шілдебаева, Мәдениет саласының үздігі, аудандық мәслихат депутаты Гүлжайна Айтжанова қазылық етті.&nbsp;Байқау нәтижесімен Бас жүлдені Мәдениет ауылынан Мақсұт Ақзере, жүлделі І орынды Аққыр ауылынан Бекасыл Дінмұхаммед, жүлделі ІІ орынды Аққұм ауылынан Жандосұлы Думан, жүлделі ІІІ орынды Далдабай ауылынан Алдаберлі Айда және Таң ауылынан Жасұлан Нұрдидар иеленсе, С.Торайғыров атындағы арнайы жүлдені Ақсу ауылынан Мұхамбетжанқызы Зияда, Т.Жүргенов атындағы арнайы жүлдені Есет батыр ауылынан Әділбек Сұлтан иеленді. Қатысушы өнерпаздардың барлығы 1986 жылы туылған түлектердің демеушілігімен Диплом және бағалы сыйлықтармен марапатталды. Айта кету керек, байқаудың өз дәрежесінде өтуіне 1986 жылы туылған 2003 жылғы мектеп бітіруші түлектер демеушілік етті. 200 000 теңге көлемінде сыйлықтар мен қаржылай демеушілік жасап, барлық қатысушыларды құралақан қалдырмады.&nbsp;Мағжан Жұмабаев – поэзия әлеміндегі жарық жұлдыз, қайталанбас құ¬былыс. Оның қуатты, бойға жігер, жүрекке от беретін рухты үні, ізденістері мен жаңашылдығы қазақ әдебиетін ХХ ғасырдың басында-ақ Еуропа, орыс әдебиетінің биік деңгейіне көтерді. Ақынның егемен еліміздің ертеңгі қызметін атқарар лайықты тұлға – ол жастар екенін ескеріп, «Мен жастарға сенемін» өлеңінде елдің қалыптасуына жастардан үлкен үміт күтіп, аманат сенім артқанын білеміз. Кеше ақыны «Мен жастарға сенемін» деп жырласа, байқау барысында бүгінгі буын ақын аталарының сенімінен шығуда, қазақ өлеңінің қалың қазақ жүрегінен орын табуы үшін барын салды. Шеберліктерін, талантын, ынта-жігерін қабілетімен ұштастыра білген үміткерлердің қай-қайсысы да бас жүлдеге лайықты болды. Бірақ байқау болған жерде жеңіс те, жеңіліс те болады. Бастысы қазақ әдебиетінің, поэзиясының тереңдігіне, құдіреттілігіне тағы бір куә болдық.

Қазақстан және Қызылорда облысының жаңалықтары