<a href="https://kyzylorda-news.kz/">Kyzylorda-news.kz</a>&nbsp; Қазақ қашанда қайырымды іс қылғанды құп көреді. Қайырымдылық – адам бойындағы асыл қасиетінің бірі саналады. Өйткені көмекті қажет етушілерге білдірілетін сүйіспеншілік пен нақты көмек көрінісі осы қасиет арқылы байқалады. Мұқтаж жандарға жақсылық жасау – бұл адам баласының ең ізгі амалы. Сондықтан жақсылыққа жаны құмар жандар өмірдегі бақытты адамдар екені анық.&nbsp;Қазақта «Кең болсаң, кем болмайсың» деген нақыл бар. Мұның астарына үңілсеңіз, адам бойындағы жомарттық, қайырымдылық қасиеттерді меңзейді. Осы орайда Ұлыстың Ұлы күні – Наурыз мерекесі аясында «Наурызнама» онкүндігінің екінші күні қайырымдылық шараларымен жалғасты.«Қармақшы ата» мешіті алаңында «Наурыз мейірімі» атты қайырымдылық акциясы ұйымдастырылды. Осындай игі іс-шараға Қармақшы ауданы әкімінің орынбасары Самат Смағұлов, Қармақшы аудандық мәслихат төрағасы Әділ Қошалақов, Қармақшы аудандық қоғамдық кеңес төрағасы Әбдірахман Құлдүйсенов және «Қармақшы ата» мешітінің бас имамы Рахат Қожанов қатысып, ізгі тілектерін білдірді. Акция барысында әлеуметтік қолдауды қажет ететін 50 отбасыға азық-түлік қоржындары таратылды. &nbsp;Сонымен қатар акция ауданның барлық елді мекендерінде жалғасын табуда. Мұнан бөлек жоспар бойынша қосымша 100 отбасыға азық-түлік қоржындары таратылуда.

Қармақшы ауданында «Наурызнама» онкүндігі аясында қайырымдылық акциясы өтті

<a href="https://kyzylorda-news.kz/ru">Kyzylorda-news.kz</a> &nbsp;Ауылда да кәсіпті гүлдендіруге болады. Мемлекеттік бағдар­ламалардың басты бағыты осы төңіректі дамытуға негізделген. Сырдариялық жас кәсіпкер Гүлзат Құдайбергенқызы ізденім­паздығының арқасында «Өрлеу» жастар сыйлығын жеңіп алды. Жалынды жас бүгінгі кәсіпке жаңа көзқарас пен еңбекқорлық керек екенін айтады.<blockquote>«Кез келген кәсіпті ауылда, ел ішінде дамытуға мүмкіндік мол. Ол үшін еңбектену керек, іздену керек. Шаршадым демеңіз. Елде жоқ нәрсені жасауға ұмтылыңыз. Халықтың қажетіне жарау үшін ең алдымен мұқым елдің мұқтажын өтеуге атсалысу керек. Маған әкем үнемі елге пайдаң тисін деп айтып отыратын. Әрине, әр адамның өзінің дамуына өмірлік ұстанымы, қабілеті және адами қасиеттері сеп болады», – дейді жас кәсіпкер.</blockquote>Өзгелер жүрген жолмен жүруді емес, өзінің жолын қалыптастыруды дағдысына айналдырған Гүлзат бұрын да кәсіптің бірнеше түрімен айналысқан.&nbsp;Жақында ғана ол мақтаны қайта өңдеу ісін бастады. Аталған кәсіп көнені жаңғыртуға, үнемдеуге және қолда барды ұқсатуға үйретеді. Ел ішіндегі халықтың пайдаға асар дүниелерді ысырап етіп лақтырмай, қайта қолданысқа енгізілуіне атсалысып жүр.<blockquote>«Қалада болсын, ауылда болсын қолданыстағы көрпе-төсектің реңі қашса, оны қоқысқа лақтыруға асығамыз.&nbsp;Үнемдеуге, жақсы нәрсені тастамауға дағдылану керек. Өйткені ысырапқа шариғатта да жол берілмейді. Осыны ойлана келе халық арасында сұранысы жоғары кәсіпті бастап кеттік. Ауыл халқына тиімді бағада, жеткізіп беру қызметімен жұмыс істеп жүрміз. Алдағы уақытта ауқымын арттырып, мұнан да жақсы жобаларды қолға алғым келеді», – дейді ынталы кәсіпкер.</blockquote>Гүлзаттың қолөнер ісіне ертеден бейімі бар. Кішкентайынан анасының жанында отырып, тігін тігуді меңгерді. Он саусағынан өнер тамып, талантын кәсіпке де айналдырғалы қашан. Қазақтың бас ақыны ұлы Абайдың «Еңбек етсең, ерінбей, тояды қарның тіленбей» деген сөзін өмірлік ұстанымына айналдырып, табандылықпен тер төгіп келеді. Таяуда ғана алған «Өрлеу» жастар сыйлығы осы ізденімпаздығының жемісі болса керек-ті.<blockquote>«Бұл сыйлықты алу үшін екі жыл қатарынан қатысып, біраз еңбектендім.&nbsp;Еңбектің нәтижесі деп ойлаймын. Қазір жас кәсіпкерлерге қолдаудың қарасы қалың. Бастысы, тиімді тетігін тауып, бағдарламаны өзіңнің кәдеңе асыра білуің керек. Иә, сол өз кәдеңнің ар жағында міндетті түрде елге қызмет көрсету ұғымы тұрғаны ләзім. Елдің батасынан артық ешнәрсе жоқ. Сонымен көгересің, сонымен көктейсің. Осы тігін саласын анамнан үйрендім. Ол маған «Білгенге маржан» деп, білген бар жақсысын үйретіп отырады. Анам – өмірлік ұстазым. Өне­ріңді кә­сіпке айнал­дырып, өмірлік табысыңа айналдыр деп ең бірінші ақыл айтқан адам», – дейді Гүлзат.</blockquote>Әрине, бүгінде ауданда жеке кәсіпкерлік саласы қарқын алған. Олардың қатарына жыл сайын Гүлзат тәрізді өзіндік көзқарасы бар, ұстанымына сай ұлтқа қызмет етуді ой­лай­тын та­банды жастар қосылып келеді. Бойдағы қажыр-қайратын тәуелсіз елдің ертеңі жо­лын­да жұмсай алатын болсаңыз, өмірге босқа келмегеніңіз. Гүлзат бүгінгі өзі қатарлас кәсіпкерлерге еңбекқорлық жетіспейтінін айтады. Әлбетте, оған бастаған ісін аяғына дейін жеткізу қасиеті де болу керек.<blockquote>«Кәсіпкер дегеніңіз бұрынғы түсініктегі коммерсант деңгейі емес.&nbsp;Кәсіпке жаңа көзқарас керек. Кәсіпкер – ең алдымен еңбек етуге қабілетті, тәуекел ете алатын, алдына мақсат қоя білетін жан. Егер де кәсіп бастасаңыз, осы қасиеттер бойыңызда болу керек. Өз маңдай теріңмен жасалған жұмыс қана қашан да берекелі болады. Жеке кәсіпке жеңіл қарауға болмайды. Жеке деп аты айтып тұрға­нымен, елдік мүдде тұр­ғы­сынд­а еңбек ет­пе­сеңіз бәрі бекер. Тек кәсіп­керлік қана емес, елдегі барлық са­ладағы жастардың бойында ұлттық иммунитет болса екен деймін. Егер ұлттық иммунитет болса, өзгенің қаңсығын таңсық деп қабылдамас едік», – дейді&nbsp;ол.</blockquote>Бүгінде Гүлзат кәсіптің бірнеше түрімен айналысады. Алақандай ауылдың қажетіне жарап, тігін шеберханасының ісін жүргізіп жүр. Халыққа компьютерлік сауаттылық қызметтерін көрсетіп те ауқымын арттыруда. Оған іске қосылған мақта өңдеу шеберханасын қосыңыз. Бар өнерді бойына сыйдырған дарынды жастың таңдайына бұлбұл ұя салған әншілік қабілеті де бар. Ол өнерімен көпшілікке танылып, талай өнер додаларында топ жарып келеді.<blockquote>«Көпшілік менен мұның бәріне қалай уақыт табасыз деп сұрап жатады.&nbsp;Жұмысқа барып-келіп, күнделікті күйбеңмен шектелетін стереотипті бұзу керек. Уақыт – жүйрік. Оның жалына жармасып, барлық іске үлгеріп қалу – ең бірінші адамның ниетінен. Мен әрбір ісімді тиянақтап, ұқыптап, ерекше махаббатпен жасағанды жақсы көремін. Өз ісіңді ерекше сүю, әрбір жасаған ісіңді ең ұлы жұмыс ретінде қабылдау, бірақ оған тоқмейілсімеу, өзіңе сын көзбен қарап, қателіктеріңді түзету – адамды өсіретін дағды. Мінсіз адам – ол ешқашан қателеспейтін адам емес, қатесін түсініп, оны жөндеген адам. Кейде қаншалықты тыраштанып, тер төгіп, еңбектенсең де бір жағыңнан тартып тұратын қиыншылықтар болады. Ол сәтте шаршамау керек, өзіңді шыңдай түсуің қажет, өмірлік сабақ ретінде қабылдаған жөн. Өмір тек қана сәтті қадамнан тұрмайды, кей сәтсіздіктер жаныңды жабырқатса да, сағыңды сындырмағаны дұрыс. Өйткені, біз, қазақ деген ұлы елдің перзентіміз», – дейді Гүлзат Құдайбергенқызы.</blockquote>Қазір әлем алақаныңызда тұр.&nbsp;Өзіңізді дамытамын десеңіз де, шағын зауыт, кәсіпорын ашқыңыз келсе де құрал-жабдықтарды дүние жүзінің қай түкпірінен де алдыра аласыз. ХХІ ғасыр – мүмкіндіктер алаңы. Тек осы мүмкіндіктерді өзіңді, айналаңды, еліңді дамытуға қолдана білу керек.&nbsp;&nbsp;

Гүлзат Құдайбергенқызы: "Кәсіпкер дегеніңіз коммерсант деңгейі емес"

&nbsp;<a href="https://kyzylorda-news.kz/">Kyzylorda-news.kz</a> &nbsp;Осы күні елімізде міндетті әлеуметтік медициналық сақтандыру жүйесі енгізілгеніне 5 жылдай уақыт болғаны белгілі. Жүйе бойынша барлық жұмыс беруші өз қызметкеріне қорға белгілі мөлшерде жарна аударып тұруы тиістігін жақсы білеміз. Медициналық сақтандыруы бар адамдар мемлекет есебінен медициналық көмек алып келеді. Нақты айтқанда МӘМС арқылы 100-ден аса қызмет түрін тегін пайдалануға мүдделі. Ал әлеуметтік жағынан әлжуаз топтағылар үшін медициналық көмек тегін берілетіні сөзсіз.Дүниежүзілік денсаулық сақтау ұйымы келтірген мәлімет бойынша ел азаматтары табысының жартысына жуығын емдеуге жұмсайтыны анықталған. Сондықтан міндетті әлеуметтік медициналық сақтандыру жүйесі енгізілгенге дейін ақылы болып келген бірқатар медицина көмегін тегін алуға мүмкіндік берді.МӘМС туралы қарапайым түсінік – ол жұмыс істейтін азаматтар ай сайын жалақысынан сақтандыру жарнасын төлеуі тиістігімен байланысты. Ал балалар, жұмыссыз деп тіркелгендер, үш жасқа дейінгі бала бағып отырғандар, жүктілікке байланысты декреттегі әйелдер, зейнеткерлер, түзеу мекемелерінде жазасын өтеп жатқандар, оралмандар, «Алтын алқа», «Күміс алқа» марапаттарына, «Батыр ана» атағына, «Ана даңқының» I және II дәрежелі ордендеріне ие көпбалалы аналар, студенттер, жалпы 15 топ атынан жарнаны мемлекет төлеуге мүдделі. Ортақ қорға түсетін қаржы әрбір азамат емделген медициналық мекемеге түсіп отырады.МӘМС жүйесінде азаматтардың сақтандырылуын өзектендіру бойынша өңірдегі ахуал жайында Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов:– Биылдан бастап бірыңғай жиынтық төлем жойылып келеді. Яғни, өзін-өзі жұмыспен қамтып отырған адамдар не жеке кәсіпкер есебінде, не дербес төлеуші ретінде төлем жасауға құқылы. БЖТ төлеген азаматтар әрі қарай дербес төлеуші ретінде төлем жасай алады (2024 жылы – 4 250 теңге). Осы жерде ескеретін жайт, азаматтардың сақтандырылған мәртебесі болуы үшін, МӘМС туралы заңға сәйкес, 12 айға төлемі болуға тиіс. Егер БЖТ төлеушілердің өткен 1 жылға төлемі болса, 2024 жылдан бастап әр ай сайын дербес төлеуші ретінде төлем жасай алады. Ал толық 12 айға төлем жасалмаса, мысалы ағымдағы жылы 7 айға төлемі болса, азаматтар төленбеген 5 айға дербес төлеуші ретінде әр айға 3500 теңгеден төлеп шыға алады. Тұрақты табысы жоқ ауыл тұрғындарының МӘМС жүйесінен тыс қалу қаупі бар. Қазір осыған байланысты ауылдық аймақтарда түсіндіру жұмыстары жүргізіліп жатыр, – дейді филиал директоры биылғы жылдың ерекшелігі туралы.2024 жылы сақтандырылған мәртебесін жоғалтпау үшін азаматтар жеке кәсіпкер ретінде тіркеліп немесе дербес төлеуші ретінде жарна төлейтінін де айта кеткен жөн.«МӘМС туралы» Заңға 2022 жылдың 5 қыркүйегінде енгізілген өзгерістерге сәйкес, МӘМС жүйесінің қатысушысы болу үшін алдағы 12 ай үшін төлем жасауға болатындығын ескере кетейік. Бұл жыл бойына сақтандырылуға мүмкіндік береді. 12 айға төлемді дұрыс жасаған азаматтарға 3 күннің ішінде «сақтандырылған» мәртебесі берілетіні сөзсіз.МӘМС жарналар мен аударымдар Ұлттық банктің арнайы шотына түседі. Олардың едәуір бөлігі – мемлекеттің шамамен 11 млн адам үшін төлейтін ай сайынғы жарналары. Сол себепті олар «сақтандырылған» мәртебесіне ие және МӘМС тізіміне кіретін медициналық қызметтердің барлық спектрін ала алатыны жасырын емес.Егер сіз жоғарыда айтылған 15 санаттың біріне кірсеңіз, бірақ «сақтандырылмаған» болсаңыз, растайтын құжаттар тізімін жинап, халыққа қызмет көрсету орталығына тапсыру керек. Ақпарат мемлекеттік органдарға бағытталып, тиісті шаралардан соң мемлекет сіз үшін жарна төлей бастайды және «сақтандырылған» мәртебесі беріліп отырады.– МӘМС төлемдері төлеушілердің әр санаты үшін әр түрлі мөлшерде болады. Жұмыс берушілердің аударымдары қызметкерлер жалақысының 3 пайызын құрайды, аударымдардың ең жоғары сомасы 25500 теңгеден аспайды, бұл 10 ЕТЖ-нің 3 пайызы. Өздеріңізге белгілі 2024 жылдан бастап, 1 ЕТЖ 85 000 теңгені құрайды. Азаматтық-құқықтық сипаттағы шарттар (АҚС) бойынша табыс алатын қызметкерлер мен жеке тұлғалардың жарналары 2024 жылы олардың табысының 2 пайызын құрайды. Бұл ретте, егер жалақы мөлшері 10 ЕТЖ жоғары болса, онда тек осы сомаға ғана салық салынады және жарнаның ең жоғары сомасы 17000 теңге болады. Сонымен қатар жеке кәсіпкерлер мен жеке практикамен айналысатындардың жарналары 5950 теңгені немесе 1,4 ЕТЖ-нің 5 пайызын құрайды. Дербес төлеушілер үшін жарна сомасы 4 250 теңгеге тең (1 ЕТЖ-дан 5%). Дербес төлеушілер дегеніміз ресми түрде жұмыс істемейтіндер, жеке кәсіпкер емес тұлғалар.2024 жылдың 1 қаңтарына ауданда сақтандырылмағандардың саны 7008-ді құраса, түсіндіру жұмыстары жүргізі­ліп, 3502 адам сақтандырылғандар санатын алды, – дейді аудандық аурухана бас дәрігерінің аудит жөніндегі орынбасары Жұлдызай Баймишова.МӘМС жүйесінің жұмысына, яғни медициналық көмек көрсетуге байланысты азаматтар тарапынан шағым­данушылар да бар. Шағым білдірушілердің дені медициналық көмектің сапасыздығына наразы.– Арыз-шағымның басым бөлігі медициналық көмек көрсетуге қатысты болып отыр. Оның жартысына жуығы (41,5%) медициналық көмектің сапасыз көрсетілгеніне наразылық білдірсе, медициналық көмек көрсетуден бас тартқан жағдайлар төрттен бір бөлігін құрайды (29,7%). Ал 9,2%-ы диагностикалық қызметтерді алу мерзімдерінің ұзақтығына шағымданса, 5,1%-ы дәрі-дәрмектерді беруден бас тартуына байланысты.Сарапшылар ресми түрде шағым түскен соң, осы факт бойынша жос­пардан тыс мониторинг жүргізеді. Бекітілген ақаулардың бірыңғай жіктегішіне сәйкес клинхаттамалардан негіз­сіз ауытқу, медициналық көмек көрсету­­ді ұйым­дасты­ру стандарттарын сақтамау, ақпарат­тық жүйелерге медициналық ұйым­дарда көрсетілмеген қыз­меттерді енгізу кезінде қаржы­лық ықпал ету шаралары – айыппұлдар салынады, – дейді Б.Исмаханбетов.Егер тұрғындарда қосым­ша сұрақтар немесе медициналық көмекке қатысты мәселелер туындаса, өзіңіздің клиникаңыздағы «Пациенттерді қолдау қыз­метіне» жүгінуіне болады. Ал жағдайды жергілікті жерде шешу мүмкін болмаса, онда Әлеуметтік медициналық сақтандыру қоры­на өтініш жібереді.Дегенмен осы уақытқа дейін МӘМС-ке бір де бір рет жарна төлемеген немесе өткен 12 айда берешегі көп азаматтар болса, олар алдағы бір жылға төлем жасап, сақтандырылған мәртебесін ала алады. Ал бірнеше ай берешегі барлардың қарызды ғана жауып, МӘМС қатысушысы болуына мүмкіндік бар. Осы ретте жарнаға аударылған жарна мөлшерінің көлеміне қарамастан, медициналық көрсеткіштері болса, барлық көмекті толық көлемде алуға құқылы екенін назарға сала кетейік.Себебі МӘМС пакеті пациенттерге қажет негізгі медициналық қызметтерді қамтиды. Атап айтар болсақ, бейінді мамандардың кеңесі, қымбат анализдер, диагностикалық зерттеулер, консультациялар, сонымен қатар жоғары технологияларды пайдалана отырып жасалатын операциялар және тағы басқа қызметтер кіреді. Бұндай операциялардың көбі бірнеше миллион теңге тұрады. Ал азаматтар ай сайын дербес төлеуші ретінде жарна төлеп, осы қызмет­терді қосымша қаржы төлемей-ақ ала алады. Бұл атал­ған жүйенің басты артық­шылығы.Негізінен МӘМС қорына қыз­меткер үшін төлемнің екі түрі түседі. Біріншісі, аударымдар – жұмыс беруші өз қаражаты есебінен төлейді. 2023 жылы оның мөлшері қызметкер жалақысының 3 пайызын құрайды. Екіншісі, жарналар – жұмыс беруші қызметкердің жалақысынан 2 пайызын ұстайды.Жарнаны қалай төлейді деген сұраққа келсек, МӘМС жарналарын екінші деңгейдегі кез келген банктердің мобильді қосымшалары, жылдам төлем терминалдары және «Қазпошта» кассалары арқылы төлеуге болады.

«МӘМС» – денсаулықты жақсартудың кепілі

<a href="https://kyzylorda-news.kz/">Kyzylorda-news.kz</a> Қазір қоғамда мінберден түспей жүрген мәселе көп. Соның өзектісі – жасөспірімдер арасындағы құқық бұзушылық. Ашығын айтқанда, топтық төбелес. Кезінде үлкендер арасында тыныш қана шешілетін кикілжіңнің бүгінде жұрнағы жастар арасында үлкен дауға айналып барады. Аймаққа бөлініп, топтасып төбелесетін жастардың ісі қылмыс дәрежесіне жетіп отыр.Осыған орай Жосалы кенті әкімшілігінде кәмелетке толмағандар арасындағы құқық бұзушылық пен топтық төбелестің алу бағытында мәжіліс өтті. Оған арнайы облыстық полиция департаменті бастығының бірінші орынбасары Шамшадин Амитов қатысты. Жиынды Қармақшы ауданы әкімінің орынбасары Самат Смағұлов жүргізіп, мәжілісте көтеріліп отырған мәселенің талқыланатынын жеткізді. Сондай-ақ алғашқы сөз кезегін Шамшадин Егенбердіұлына берді.Құзырлы органның өкілі аймақта тыйылмай тұрған жастар арасындағы топтық төбелестің қоғамға кері әсерін тигізіп жатқанын, жаға жыртысудың арты қайғылы жағдайға дейін баратынын сөз етті. Осыған тосқауыл ретінде құқық бұзушылық профилактикасы бағытындағы жұмыстарды күшейту қажеттілігін көтерді.Бүгінде бозбалалық қателіктің салдарынан қаншама жастың сал болып, қаншама ананың баласынан айырылып жатқанын көз көріп жүр. Бет көгеріп, жаға жыртылса бір жөн, бірақ кей төбелестің арты өлімге дейін баратыны жүректі қынжылтады. Бұрындары ер мінезді қалыптастыру үшін намысты қолдан бермей, керек кезде ғана қарсылық көрсетіп, бірге-бір шығып жеке шекісетін. Әрине ол да мақтанарлық дүние емес. Қазір бұл төбелестің мәнісі кетті. Бір адамды жабыла жұдырықтау ол жігіттікке жатпас. Тіпті ақтауға сай келмейді. Мұны түсінетін бұзақы топтар тым аз. Жалған намысты арқалаған жастардың жаппай төбелесті қалыпты жағдай санағаны, қылмыстың белең алуына да сеп болуы содан. Кейде үлкендерінің айдап салуымен топ мүшелері төбелесті бастап, бұзақы әрекеттерге барады.Жиынға аудан прокуроры, ардагерлер, үкіметтік емес ұйым өкілдері, білім беру ұйымдарының басшылары және ата-аналар қатысып, ашық пікір алмасты. Мәселе төңірегінде ұсыныс-пікірлер тыңдалып, басшылық тарап көтерілген жайтты назарға алды.

Полиция департаменті бастығының бірінші орынбасары Қармақшыға жұмыс сапарымен барды

&nbsp;<a href="https://kyzylorda-news.kz/">Kyzylorda-news.kz</a> Сан мамандықтың ішіндегі ең мейірімді әрі мәртебелісі – медбике. Науқас жанның тезірек сауығып кетуіне көмек көрсетіп, сөзімен де, ісімен де демеу болатын – ақ халатты абзал жан. Қоғамға қажет мамандық иесі атану үшін медбикенің бойында адалдық, жұмысына деген жауапкершілік және кішіпейілділік болуы міндетті. Себебі медбикенің қызметі ең қымбат адам өмірімен байланысты, әр минуты мен секунды халыққа пайда тигізумен өтетіндіктен аялы алақан иесінің басты қасиеті – оның мейірімді жүрегінде.&nbsp; &nbsp; &nbsp;Жанына дауа іздеген әрбір науқасқа сүйіспеншілікпен қарау да өте маңызды. Мұны кез келген мамандық иесі сезіне алмауы да әбден мүмкін. Ал медбикелер үшін аса қажет қасиеттің бірі – жылы шырай мен адамдармен жақсы қарым-қатынас орната білу. Осындай үлкен жауапкершілікпен өз ісіне деген адалдық танытып жүрген медбикелердің қатарында аудандық емхана жанындағы күндізгі стационарда бірнеше жылдан бері еңбек ететін білікті медбикенің бірі де бірегейі Ақбота Наматулланы ерекше айтып өткеніміз жөн.&nbsp; &nbsp; &nbsp;Жас маман алғашқы еңбек жолына қадам басып, қызметіне кіріскен 2020 жылдан бастап дертіне шипа іздеген науқастың жан дүниесін түсінуге тырысып, әрбір адамға құрметпен қарауды өзіне парыз деп санайды. Әсіресе бөлімше меңгерушісі, терапевт-дәрігер Қайрат Ерманов тағайындаған ем-шараны тыңғылықты атқаруға барын салады, күш-жігерін аямайды. Әр күн сайын қиындығы мен қызығы қатар жүретін абыройлы міндетті атқаруға медбике асыға, білек сыбана кіріседі. Қарбаласқа толы әр күнінде науқастардан алғыс алып, еңбегінің зая кетпегеніне қуанады.&nbsp; &nbsp; &nbsp;– Бала кезімдегі арманым медбике болу болатын. Қыз балаға тән мамандық деп білетінмін. Шиелі ауданындағы Ботабай ауылында туып-өстім. Үйдің үлкені болған соң өзімнен кейінгі екі сіңілім мен бір ініме қамқор болдым. «Болашақ» медициналық колледжінің емдеу ісі мамандығы бойынша оқуды бітірген соң тұрмысқа шығып, алғашқы еңбек жолымды осында емхана жанындағы күндізгі стационарда бастадым. Медбикенің жұмысы таңнан басталып, кешке дейін жалғасады. Ем-шараға келген науқастың уақытылы емін аяқтап болғанша тыным таппаймын. Бұл ретте біз секілді жас маманға қамқор болып жүрген дәрігерімізге және аға медбике Ләззат Әлімбетоваға алғысымды білдіремін, – дейді медбике Ақбота Уматуллақызы.&nbsp; &nbsp; &nbsp;Бала күнінен жаны жабырқағанға қол созып, қамқор болуды санасына тоқып өскен Ақбота мамандық таңдағанда жаңылыспағанына дән риза. Әрі өзінен кейінгі сіңлісіне де бағыт-бағдар беріп, медбике болуына қамқор болғанын айтады. Тұрмыс құрған Ғазират бауыры да Ақжарма ауылында медбике болып жұмыс істейді.&nbsp; &nbsp; &nbsp;Қазір кезде біраз тәжірибе жинаған Ақботаның еңбегін аға медбике өте&nbsp; жоғары бағалайды.&nbsp; &nbsp; &nbsp;– Ақбота – жақсы медбике. Жұмысына да жауапкершілікпен қарайды. Күніге қанша науқас келсе, соның барлығына ем-шара жасауға үлгереді. Дәрігер тағайындаған емге аса мұқият әрі ыждағаттылықпен қарайды, жұмысына тиянақты маман. Дертіне шипа іздеген науқастар да жылы лебіз білдіріп, алғыстарын жаудырып жатады. «Ақботаның қолы жұмсақ әрі жеңіл» деп мақтайды. Ал медбике үшін мұнан асқан марапат жоқ деп ойлаймын, – дейді бөлімшенің аға медбикесі Л.Әлімбетова.&nbsp; &nbsp; &nbsp; Медбике күн сайын адам жанына араша түсіп, денсаулықтың оңалуына атсалысуға асығады. Науқас жанға шипалы емімен, ақ жарқын көңілімен дем беретінін сезінеді. Төзімділік танытып, барынша мейірім мен жылы лебіз білдіріп, дертінен айығуға себепкер болуға тырысады. Жауапкершілігі зор жұмысының қызығы мен қиындығын қатар көреді. Жүктелген міндетті абыроймен атқаруға білек сыбана кіріседі. Осы күні жан қалауымен таңдаған саланың ыстығы мен суығының қаншалықты екенін біліп қалды. Өзге әріптестері секілді ұзақ жылғы тәжірибесі болмаса да, мамандығының қыры мен сырын ұғынып, меңгерді. Алғашқы еңбек жолы басталған ұжымда абырой мен беделге ие болып келеді. Ерік-жігерің мықты болса, алынбайтын қамал, аса алмайтын асудың болмайтынына сенеді. Әрбір күнін жүйелі әрі ұтымды ұйымдастыруда жәрдем беретін дәрігері мен аға медбикесі бар. Шағын болса да атқарып отырған қызметі ұшан-теңіз ұжымның әрбір мүшесі ем іздеп келген науқастардың аяғына тік тұрып кетуіне уақытпен санаспай қызмет етеді.&nbsp; &nbsp; &nbsp;– Өзімнің мамандығыма деген адалдық ең бірінші кезекте тұрады. Дертіне дауа іздеген науқас жандар өз алғысын айтып, айналып, толғанғанда шаршағаныңды бірден ұмытып кетесің. Дертінен айығып, жақсарғанын көргенімде жұмысыма деген құлшынысым одан әрі арта түседі. Әлемдегі ең мейірімді мамандық иесі атанғанымды мақтан тұтамын. Әрбір келушіні жылы жүзбен, шынайы көңілмен қарсы алу басты міндетіміз. Қызметте қандай да бір жетістікке жетсем, ол осы қарапайым еңбегімнің жемісі деп білемін, – дейді медбике.&nbsp; &nbsp; &nbsp;Мерейі артқан Ақбота мейірімді медбике болумен қатар отбасында сүйікті жар, ибалы келін, аяулы ана. Ол С.Сейфуллин ауылында тұрады. Жолдасы Бекзат Фазылов шаруашылықта күрішші. Жас отбасына әрдайым қолдау көрсетіп отырған аналары Айсұлу қос немересі Расул мен Айжұлдызға қарап, келіні Ақботаның алаңдамай жұмыс істеуіне жағдай жасап отырғанын айтып өткеніміз жөн.

Жүрегі мейірімге толы медбике

<a href="https://kyzylorda-news.kz/ru">Kyzylorda-news.kz</a> Қазалы ауданының әкімі Мейрамбек Шермағанбет егін шаруашылығымен айналысатын шаруашылық басшыларымен кездесіп, алдағы уақытта атқарылуға тиісті бірқатар маңызды мәселелерді талқылады.Атап айтқанда, жиында көктемгі дала жұмыстарына дайындық шаралары пысықталып, тұқым дайындау, минералды тыңайтқыштар мен жанар-жағармай қорын қалыптастыру, техникаларды әзірлеу сынды өзге де проблемалық мәселелер талқыланды.Басқосуда аудандық ауыл шаруашылығы мен жер қатынастары бөлімінің басшысы Еркін Сейітов пен «Қазалысушар» өндірістік учаскесінің директоры Нұрлан Әбілдаев көктемгі дала жұмыстарының дайындық барысы мен егу жұмыстарын суармалы сумен қамтамасыз ету жағдайы бойынша хабарлама жасады.Мейрамбек Зинабдинұлы «Қазалысушар» өндірістік учаскесінің директоры Нұрлан Әбілдаевқа су беру жоспары нақты болуы қажет екенін айтып, осы бастан тиісті шаруашылықтармен тығыз жұмыс жасап, су лимитін бөлу мәселесін қолға алуды тапсырды.Сонымен қатар шаруашылық басшыларына Сырдария өзеніндегі судың аз болуына байланысты орналастырылатын күріш егісінің көлемін азайтып, әртараптандыру бағытында арпа, бидай, картоп, көкөніс сынды бақша мен мал азықтық дақылдардың көлемін ұлғайту қажет екенін жеткізді.&nbsp;Кездесу барысында шаруашылық басшылары да су шаруашылығына қатысты өз ойларын ортаға салып, бекітілген егіс көлеміне сәйкес ауданға белгіленген су лимитінің әділ бөлінуі жөнінде облыстық мекемелерден талап етуді сұрады.<img src="https://knadmin.beoblood.kz/uploads/86580130_7ebc_429c_8bd8_1049e70c46ea_99bf9418d1.jpg" alt="86580130-7ebc-429c-8bd8-1049e70c46ea.jpg">

Мейрамбек Шермағанбет: Су беру жоспары нақты болуы қажет

<a href="https://kyzylorda-news.kz/">Kyzylorda-news.kz</a>&nbsp; Негізінен, «Дені сау адам – табиғаттың ең қымбат жемісі» екені даусыз. Дертіне дауа іздеген көпшілік дәрігер тағайындаған емнің шапағатын қай кезде де көргісі келетіні бесенеден белгілі. Қазіргі уақытта денсаулығында кінәраты бар жандар жылына 2-3 мәрте ауруханаға жатып, ем-шара қабылдау үшін ауруханаға келеді. Осындайда Сырдария аудандық ауруханасының «Күндізгі стационар» бөлімшесі созылмалы және белгілі бір сырқатқа шалдыққан дертті жандарға есігін айқара ашып келеді. Білікті дәрігер Қайрат Ерманов жетекшілік ететін аталған бөлімше мамандарының қызметімен жан-жақты танысу мүмкіндігін алдық.Аудандық аурухана жанындағы «Күндізгі стационар» бөлімшесі 16 жылдан бері жергілікті халыққа қалтқысыз қызмет етіп келеді. Ең алғаш 20 төсек орын ретінде жұмысын бастаған бөлімше Тереңөзек кентіндегі Абай Құнанбайұлы көшесінде орналасқан болатын. Кейіннен 250 орындық емхана ашылған уақытта бөлімше емдеу мекемесіне көшіріліпті. Бүгінде бөлімшенің құрылымы кеңейіп, тәулігіне 30 төсек орынға жататын жергілікті халыққа қызмет көрсетуге мүмкіндік ала білген. Өткен жылы «Күндізгі стационар» бөлімшесіне 909 адам жоспарлы емдеуге жатқызылған еді. Бұл көрсеткіш – 2022 жылмен салыстырғанда 56 науқасқа артық екен. Медицина саласында терапевт дәрігер ретінде 30 жылдық тәжірибесі бар Қайрат Жоламанұлының айтуынша, жыл өткен сайын кез келген нозология бойынша шағым келтіретін сырқаттанушы қатары көбейіп келе жатыр екен.– «Басы ауырып, балтыры сыздаған» жұртшылық денсаулығының жағдайы бір қалыпта тұра бермесі анық. Осы күні созылмалы дерті бар жандар біздің бөлімшеден уақытылы ем қабылдап келеді. Негізінен, «Күндізгі стационар» бөлімшесінде ем қабылдаудың өзіндік ережесі бар. Ең алдымен, емделуші аймақтық дәрігер диагнозы бойынша дайындайтын жолдаманы портал арқылы арнайы базаға енгізетіні жасырын емес. Аймақтық дәрігер нұсқаған емделушінің сырқатының қай деңгейде екенін анықтау үшін зертханалық сараптама қорытындысы шығарылады. Өз кезегінде дәрігер ретінде менің міндетім – әрбір диагноз бойынша бекітілген нұсқаулық негізінде науқасқа ем-шара тағайындаймын. Дегенмен дәрігер хаттамада көрсетілген дәрі-дәрмектің науқасқа тигізер пайдасын, жағымсыз әсерін анықтап алу керек. «Күндізгі стационар» бөлімшесінің бір артықшылығы – жергілікті халық емдеу мекемесіне қонбастан, қажетті ем-шараны таңғы және түскі мезгілде қабылдай алады. Біздің тарапымыздан науқастарға массаж, физиотерапияға жолдама беріледі. Әрқашан бас дәрігер Жалғасбек Үсеновке бөлімше тынысы баяндалып отырылады, – дейді Қайрат Жоламанұлы.Шын мәнінде, кез келген диагноз бойынша науқасты 7 жұмыс күнінде емдеу көзделген екен. Бөлімшеде меңгеруші, аға медбике, орта және кіші буын, маманы жұмыс жасайды. Өз кезегінде бөлімшенің арнайы дайындалған нұсқаулығы бар. Нұсқаулық аясында күндізгі стационарда емделуші науқастардың тексерілуі мен ем жүргізілуі хаттама стандартына сәйкес, жүзеге асырылады. Бұл ретте, тәжірибелі дәрігер Қайрат Жоламанұлынан осы күні науқастар арасында жиі кездесетін диагноздарды сұраған болатынбыз.– Шындығын айту керек, жергілікті халықтың басым көпшілігі – жүрек, қан тамырлары аурулары бойынша шағым келтіреді. Науқастың көбінде тамыр көздері бітеліп, қан қоюлануы жиі кездесетіндігі айта кетейік. Қан қысымы жоғарылап, жүрек қызметі тежеліп, инсульт, инфаркт алған жандар жоспарлы емге жүгінеді. Сонымен қатар экологияның әсернен болар, жастар мен егде тартқан жандарда бүйрек аурулары біршама көбейген. Неврологиялық дерті бар кісілер уақытылы ем алатындар қатарында. Ішкі ағзасы зақымданған жандар қаншама. Қазіргі уақытта көпшілік тез дайындалатын кез келген тағамға әуестігін жақсы білеміз. Энергетикалық сусынға тәуелділік басым. Күнделікті тамақтану режимін ұстанбайтын сырқаттар арасында бауыр, өт, асқазан, ұйқы безі қызметінің бұзылуы жиі байқалады. Қант диабеті, онкологиялық аурулар қатаң бақылауды талап етеді. Қашанда денсаулықты барынша күтіп ұстау маңызды рөл ойнайды. Кей жағдайда 7 күндік ем-шарадан кейін тағайындалатын дәрі-дәрмекті уақытылы тұтынбайтын жандар баршылық. Ақырында олар денсаулығындағы кінәратты асқындырып алып жатады, – дейді білікті дәрігер.Расында денсаулықтың жақсаруы – әрбір адамның өз қолында екені даусыз.

Қайрат Ерманов: «Күндізгі стационар» бөлімшесінде ем қабылдаудың өзіндік ережесі бар

<a href="https://kyzylorda-news.kz/">Kyzylorda-news.kz.</a> Кең дүниені өз көзіңмен көру, әлемді тану арқылы өзіңді тану, тұлға ретінде даму – кез келген саяхаттың ажырамас бөлігі. «Саяхат – өзімізді қайтадан іздеп табуға арналған ең ұлы ғылым» дейді француз философы Альбер Камю. Қазақшаласақ, «ауылдан шықпағанның ақылы ауласынан аспайды».Қазір үйден бір қадам аттап баспай-ақ әлеуметтік желіге шолу жасасаңыз, саяхатқа қызығатындар да, тиімді қызмет ұсынатын туристік агенттіктер де көп. Қызылордалық Жансәулет Әбілдаева – «Ordatour» турагенттігінің ұйымдастырушысы. Cаяхат үшін қыр асып қана қоймай, талай қызылордалықтың шетелге шығуына себепкер болған кейіпкерімізден саяхаттау тәжірибесі, турагенттіктің тиімді тұстары мен жерлестеріміз жиі баратын Топ-3 мемлекет туралы пікірін білген едік.«Шетелге шығу қымбат» деген түсінік бар&nbsp;Саяхатқа деген құштарлықтың нәтижесінде қос құрылтайшы турагенттікті бірге құрып, өңір тұрғындарының шетелге шығу мәдениетін қалыптастыруға қызмет етіп келеді. Сырт мемлекеттерге, курорттарға тур, билет сатумен, жұмысқа арналған, туристік визаларды жасаумен айналысады. Авиабилеттерді брондайтын қаладағы бірден-бір сенімді агенттік те осы. 2019 жылы ашылған агенттіктің атқарған ісі мен шетелге аттанған туристерінің алғыстан басқа айтары жоқ екенін білгенде, оның қалай ашылғаны, алғашқы қадамдары қызықтыра түсті.<blockquote>– Өз басым бұрыннан саяхаттасам, әлемнің түкпір-түкпіріндегі елдерді көрсем деп армандайтынмын. Әрі қызылордалықтарда саяхаттау қымбат деген стереотип бар. Осы екі дүние турагенттік ашуға себеп болды. Алғашқы турларды аз қаражат жұмсалатын жақын елдерден бастап, тұрғындарға саяхаттаудың қымбат емес екенін түсіндіргіміз келді. Сенесіз бе, қазір саяхаттағысы келетін, шетелге шығуды жоспарлап жүргендер көп, қызылордалықтардың көбісі шетелге шыққысы келеді. Аяғы баспаған жақсы, жаңа жерлерді көруге құштар. Соңғы кезде ер адамдар отбасына, жастар ата-аналарына сыйлық ретінде шетелге саяхаттауға арнайы сертификат сыйлау үшін көп тапсырыс беруде. Бір айда 10-15 тур сыйлыққа сатып алынады. Сертификат – жақын жандарға сыйлауға таптырмас, қайталанбайтын сыйлық. Әрине, сертификат сыйлағанда көп ата-ана қарсы болып, ақшаны босқа шығындап деп немесе шетелге шығуға қорқып, қарсылық танытып жатады. Бірақ брондалған тур кері қайтарылмайтындықтан, қанша қарсыласса да барады. Алайда бір рет саяхаттап келген соң үлкендер немесе ата-аналар «Неге ертерек шықпадым екен?! Тағы да шетелге шықсам ғой» деген әсерін бөлісіп жатады, – дейді Жансәулет Ақзадақызы.</blockquote>Топ-3 мемлекетКейінгі екі жылдағы қызылордалықтар үшін Топ-3 мемлекеттің тізімін жасайық. Бірінші орында Түркия тұрса, одан кейінгі орында БАӘ орналасқан, оның ішінде Дубайға баратындар қатары қалың. Үштікті Тайланд қорытындылап тұр. Тәжірибелі саяхатшының айтуынша, аталған елдерге аймақ тұрғындарының көп саяхаттайтын себебі – өмір қауіпсіздігі &nbsp;мен жайлылығы. Отбасымен баруға, алғашқы саяхатқа да Түркия мен Дубай – таптырмас таңдау. Ал қыс мезгілінде суықтан шаршап, қатты ыстық емес, жайлы ауа райына асыққандықтан Тайландқа тартып кететіндер де көбейген. Турагенттіктің тарихына қарасақ, ең аз таңдалатын ел – Үндістан. Тазалығы мен тағамдары жағынан көп турист бұл елді ұнатпайды. Сонымен қатар осы жылы бірнеше тур брондалса да, Қытай елін ұнатпайтындар қатары да көп. Жұмыс бабымен, саудаға қатысты болмаса, демалыс ретінде барлық жағдай жасалса да, дамыған ел болса да, тамақ пен тіл жағынан қиналатындықтан қызылордалықтардың көңілі Қытайға тартпайды.<blockquote>&nbsp;«Ordatour»-мен шетелге шыққан туристерге статистика жүргізу ойға келмепті. Бірақ осы уақытқа дейін тұрақты түрде айына 100-150 тур брондалып келеді. Биыл ашылғанымызға – 5 жыл. Ең кемі айына 100 турдан келеді деп есептейтін болсақ, осы күнге дейін 6000-нан аса турист біздің турмен саяхаттаған екен. Осы күнге дейін қаншама туристі шетелге аттандырдық. Бірінші рет шығатындар бар. Әрине, естен кетпейтін оқиғалар орын алып жатады. Ең жиі кездесетін жағдай – туристердің рейстен қалып қоюы, 15 шақты адамда рейстен, ұшақтан қалып қою оқиғасы кездесті. Кері қайтатын кезде ұйықтап қалып, ұмытып кетіп, сол елде қалып қойып жатады. Кейін жаңа билет алып, елге оралады. Тағы бір жиі кездесетін нәрсе – туристердің уақытқа дұрыс мән бермеуі. Мәселен, 15 ақпан күні түнгі 12-де ұшатын болса, ертеңіне күндізгі 12:00 кезінде барып отырады, яғни, түнгі уақыт ауысымынан шатасып жатады. Тамақ өткізбейтін жағдайлар да көп. Қазы мен етімді алып қойды деп жылап хабарласатындар бар. Мұның бәрі білместіктен, – дейді Жансәулет Әбілдаева.</blockquote>Ертерек бастаңыз…Алғаш саяхаттайтын адамға ғана емес, барша қызылордалық тұрғынға турагенттіктің айтары бар.<blockquote>&nbsp;Саяхаттауды барынша ертерек бастаңыз дегім келеді. Өйткені есейген соң алатын әсер, сезінетін күй жас кездегіден бөлек болады. Егде жастағы туристердің тез шаршап қалатынын байқаймын. Экскурсиялардың соңына дейін жүруге жарамайды, қан қысымы көтеріліп не түсіп кетіп жатады. Ал жастардың сезінуі басқа. Жас болсаң, аяғың баспаған жерді басқың келіп, көзің көрмегенді көргің келіп, жаңа дүниелерді естігің келіп, алып-ұшып тұрасың. Әлемге ашықсың. Ақша жұмсайсың, бірақ кедей болып қалмайсың, яғни, алатын әсерге, Құдайдың түрлі жаратылысына тамсану, ғашық болу үшін саяхатқа жұмсаған ақшаң босқа жұмсалған дүние емес, болашағыңа инвестиция, – дейді ол.</blockquote>Саяхаттаған кезде адамның санасы өзгереді. Түрлі мәдениетті көріп, өзгермеймін деген адамның өзі ойының, белгілі бір нәрселерге қатысты қалыпты көзқарасының ауыса бастағанын байқамай қалады. Тіпті Қазақстанда жағдай нашар, өмір сүру қауіпті немесе дамымай қалған деп ойлайтын адамдар көбіне шетелден келген соң шүкіршілігін айтып жатады. Немесе бізден бірнеше есе артық, дамудың даңғыл жолына түскен елдерді көріп, талпынатын, өзімізге алатын дүниелер көп екенін ұғынып келеді. Мотивация алады. Кейбір туристер басқа елден, бизнес идея тауып, іздену үшін барады, яғни, туристердің де мақсаты түрліше.Фото: Freepik

Қызылордалықтар қайда саяхаттайды?

<a href="https://kyzylorda-news.kz/ru">Kyzylorda-news.kz</a> &nbsp;Мұғалім – бала жанының бағбаны. Иә, ұлылардан қалған сөз осылай дейді. Әсілінде бұл саланы таңдаған жан уақытпен санаспайды, бар уақытын шәкірттің шыңдалуына арнап, мектеп бағдарламасынан тыс өмір мектебінің де дәрістерін оқушы санасына сіңіруге еңбектенеді. Ол үшін ізденіс пен қажырлы еңбек керек.Сырдариялық жас маман Тұрар Жағыпаровтың бойынан осы қасиеттер табылып, тыңнан түрең салуға ерекше талаптанып жүр. Ол таяуда ғана аудан әкімінің «Өрлеу» жастар сыйлығын иеленді.Жас маман №44 орта мектепте информатика пәнінің мұғалімі болып жұмыс істейді. Білім ошағында еңбектеніп жүргеніне де көп болды. Әйтсе де, ол мұғалім деген ұғымның астарында не жатқанын және нағыз ұстаздың қандай болуы керек екенін жақсы түсінеді.<blockquote>«Мұғалім болу тек бала оқытудан тұрмайды. Оның мойнында ұшан-теңіз жауапкершілік бар. Қазіргі балалар ерекше. Жай ғана сабақ барысында таңғалдыра алмайсыз. Сондықтан мақсат үдесінен шығу үшін мұғалім күнделікті ізденіп, сабақ өту процесінде өзінің идеясымен ерекшелену керек. Әйтпесе, жүрдім-бардым қарап, көптің бірі болсаңыз, уақытыңыздың босқа өтіп жатқаны. Жатпай-тұрмай еңбектеніп, ізденгеннің арқасында ғана ұстаз баланың жүрегіне жол таба алады», – дейді Тұрар.</blockquote>Жас мұғалім аудандық, облыстық деңгейдегі көптеген іс-шараларда белсенділік танытып келеді. Алақандай ауылдағы мектептің аясынан шығып, жұмыстан тыс уақытында аймақтың белсенді жастарымен бірге уақытын тиімді өткізіп, республикалық іс-шараларға дейін ат басын бұрып жүр. Онысын өзін-өзі дамытуға балайды. Әрине еңбегі қай кезде де жемісін беріп келеді. Ол «Қазақстанның үздік ұстаздары – 2020» респуб­ликалық бай­қауының жеңімпазы атанды. «Жалын­даған жастық – жаңа белесі» жас педагогтардың жазғы лагерінде «Үздік топ басшысы» атағын жеңіп алды. «Жастар жылы» аясында аудан мұға­лімдері ара­сындағы «Жай­дарман» сайы­сында І орынды олжалады. Спорттық сайыста да мектеп қызметкер­лерінен құралған команданың белсенді ойыншысы ретінде сан мәрте марапат мінберіне көтеріліп жүр.<blockquote>«Менің ойымша, жас мұғалім еңбек демалысын күтіп, уақыт өткізуге асығатын адам болмау керек. Иә, ауыл баласымын. Менің де ауладағы ұсақ-түйек тіршілігім бар. Бірақ соның бәрінің қиюын келтіріп, уақытты үйлестіре білуім керек. Сондықтан еңбек демалысымды өзімді-өзім да­мытуға арнаймын. Түрлі форумдарға қатысамын, аймақтың белсенді жастарымен бірге түрлі іс-шараларда белсенділік танытамын. Әсіресе жазғы лагерьден көпшілігі басын алып қашады. Мен керісінше, соған атса­лысуға асығамын. Өйткені жұмыс ортаңнан ғана емес, түрлі ортадан мамандар келеді. Түрлі сала өкілдерімен бас қосатын форумдардан да алатыным көп. Өзімді-өзім дамытамын дегенім сол. Пікір алмасамыз. Мұғалім жан-жақты болу керек. Кез келген мәселеде пікір білдіре алатын, ойын айта алатын және соған сай білімі мен тәжірибесі бар адам болған жөн. «Мұғалімнің өмірі оқумен өтеді» деген сөздің жаны бар. Осылайша тәжірибелі ұстаз деңгейіне ұялмай жете аламын», – дейді жас ұстаз.</blockquote>Әлбетте, мұғалім еңбегі бір жапырақ қағаз емес. Сан алуан жетістіктерге қол жеткізіп, әркез марапат мінберіне шығып жүрген Тұрар осы бір жапырақ қағаздың артында еселі еңбек, маңдай тер тұрғанын айтты.&nbsp;<blockquote>«Әрбір жеткен жетістігім – маңызы жоғары, мен үшін құнды құрмет. Өйткені сол құрметке лайықты болудың өзі үлкен бір деңгей. Сегіз сағаттық жұмысты қиынсынатындар бар, ал тәулігіне жиырма төрт сағат жұмыс, ол мұғалімге тиесілі. Қоғам мұғалімнің мойнына көп жұмыс артып қойды. Бірақ соған қарамастан артылған жауапкершіліктің үдесінен шығу табандылық пен қажырлы еңбек.&nbsp;Қазіргі мұғалім осыған талпынып келеді», – дейді Тұрар Жағыпаров.</blockquote>&nbsp;

Тұрар Жағыпаров: Әр жеткен жетістігім – құнды құрмет

<a href="https://kyzylorda-news.kz/">Kyzylorda-news.kz</a> Биылғы Наурыз жылдағыдан өзгеше. Оған себеп Мемлекет басшысының тапсырмасына сәйкес Ұлыстың ұлы күні – Наурыз мейрамын тойлаудың жаңа тұжырымдамасы әзірленді. 14-23 наурыз аралығында халықтық мерекені тойлауға арналған Наурызнама онкүндігі жарияланды.&nbsp;Жаңа қабылданған тұжырымдамаға сәйкес, «Наурызнаманың» әр күні жекелеген тақырыптар мен құндылықтарға бөлінген. Жеке-жеке аталып өтілетін әр күннің мән-мағынасы қазақ халқының, Қазақстан қоғамының мәдениеті мен дәстүр-салтын, әдет-ғұрпы мен қоғамдық құндылықтарын айшықтайды. «Наурызнама» онкүндігінің алғашқысы 14 наурыз – «Көрісу күні – Амал мерекесі». Амал мейрамында «амал кірді», «амал келді» деп қуанамыз. Шығыс елдеріндегі күн (шәмси) күнтізбесі бойынша, наурыздың басталуы – хамал (амал) айының 1 жұлдызы есептеледі. Ежелден келе жатқан дәстүр бойынша, халық бұл күні қыстан аман-есен шыққанына, көктемге аяқ басып, туыс-туған, көрші-көлеңмен жүздескеніне қуанып, қол алысып, төс қағысады. Бір-біріне деген араздық, өкпе-ренішті ұмытып, амандық тілейді.Наурыз &nbsp;парсыша «Жаңа күн». Ертеде қазақ бұл күнді «Наурыз» демей, «Амал» деп атаған. Амал мерекесі немесе Көрісу дәстүрі – еліміздің батыс өңірлерінде ежелден сақталып, жыл сайын аталып өтілетін. Ал биыл бұл күн «Наурызнама» онкүндігіне орай еліміздің барлық аймағында тойланды. Қармақшы ауданында да мерекені лайықты түрде тойлады. Аудандық жыраулар үйінің алаңы мерекеге орай безендіріліп, «Көрісу күніне» арналған жиын өтті. Қыстың соңғы тоқсаны шығып, жылылық лебін алып келетін мерекеде жиылған жұрт бір-біріне ыстық ықыластарын білдірді. Қазақы үлгіде киінген көпшілікке қарасаңыз көз тояды. Жас жігіттер арқан тартып, тоғызқұмалақ ойнаса, келіншектер қауымы бауырсақ пісіріп мерекенің көркін қыздырды. Қыстан аман шығып, бір-бірімен қауышқан көпшіліктің көңілі көтеріңкі. Бір-бірін мерекемен құттықтап, мәре-сәре болды. Тағылымды іс-шараға арнайы қатысқан Қармақшы аудандық ардагерлер кеңесінің төрағасы Асқар Мереков, әйелдер кеңесінің төрайымы Гүлжауһар Раева, Қармақшы аудандық қоғамдық даму бөлімінің басшысы Ғарышбек Нысанбаев мерекемен құттықтап, Амал мейрамының мән-мағынасы мен тарихына, оның құндылықтарына айрықша тоқталып өтті.&nbsp;<blockquote>– Ертеректе аталарымыз осы мерекені ең жақсы мейрамның бірі ретінде жоғары дәрежеде тойлаған. Кейін Кеңес уақытында қыспаққа ұшырап, ұлттық тәлім-тәрбие, ұлттық мейрамдарымыздың көбі ұмытылып кеткен-ді. Тәуелсіздік алып, елімізге егемендік орнаған соң Амал мерекесі тойланып жатыр. Жыл сайын батыста ғана тойланатын мереке, енді бізге де келді. Биылдан бастап Наурызды бұрынғы ата-бабаларымыздай он күн атап өтетін болдық. Ертеректе жол болмаған, атты көлік еткен уақытта ағайын бір-бірімен қар көбесі сөгіліп, күн жылынған осындай кезеңде «Қыстан аман шықтың ба?», «Мал-жаның аман ба?» деп көрісетін болған. Қыстың қытымыр аязынан түгел шыққан туысқанын жаңа жасымен құттықтап, ізгі лебіздерін білдірген. Түп төркіні осылай бастау алған Амал мерекесі баршаңызға құтты болсын! Басыңызға бас, жасыңызға жас қосылсын, – деді Қармақшы аудандық ардагерлер кеңесінің төрағасы Асқар Мереков.</blockquote>Сондай-ақ мерекелік жиында ауданның ақжаулықты аналарына облыс әкімі Нұрлыбек Нәлібаевтың құттықтауы табысталды. Іс-шараға келген қонақтарға ақ дастарқаннан шұбат, ыстық бауырсақ пен басқа да қазақтың ұлттық тағамдары ұсынылып, мерекелік іс-шара өнерпаздардың концерттік бағдарламасына ұласты. Ән мен жыр тербеліп, көрікті алаң көңілге шаттық ұялатты. Күннің ызғарын көңілдің жылуы алмастырған, мерекенің лебін, көктемнің самалын сездірген тамаша іс-шара болды.&nbsp;Тағы бір айта кетерлігі, ауданға қарасты III Интернационал ауылдық округінде де түрлі ұлт өкілдерінің қатысуымен Амал мерекесі жоғары дәрежеде ұйымдастырылып, ұлтаралық достық пен бірліктің үлгісін көрсетті.&nbsp;Амандық сұраудан бастау алатын, шығу төркіні тереңде жатқан айтулы күн Алаш баласына етене жақын. Бұл мерекенің бастауы ғана. Алдағы уақытта 23 наурызға дейін Наурызнама онкүндігіне сәйкес түрлі бағыттағы ауқымды іс-шаралар ұйымдастырылатын болады.

Қармақшылықтар Амал мерекесін атап өтті 

&nbsp;<a href="https://kyzylorda-news.kz/">Kyzylorda-news.kz</a>&nbsp; Қалалық мәслихаттың алдағы сессия отырысында «Қызылорда қаласы мен ауылдық елді мекендерде бұқаралық спортты дамыту және қолдау туралы» мәселесі қаралмақ. Осы орайда аталған мәселені алдын-ала зерделеу үшін депутаттар бірқатар спорт нысандарының жай-күйімен танысты.&nbsp; Комиссия жұмысына қалалық мәслихат төрағасы И.Құттықожаев жетекшілік етті. Депуттар назарындағы алғашқы нысан Қызылорда қаласының мәдениет және спорт бөліміне қарасты Қажымұқан Мұңайтпасұлы атындағы спорт клубында спорттың 13 түрінен (еркін күрес, дзюдо, таеквандо, қоян-қолтық ұрыс, джиу-джитсу, каратэ-до, бокс, панкратион, қазақ күресі, тоғызқұмалақ, президенттік көпсайыс, футбол) үйірмелер ұйымдастырылып, 1396 жасөспірімдер мен қала тұрғындары шұғылданып келеді.&nbsp; Кездесу барысында спорт клубының жетекшісі палуан, халықаралық дәрежедегі спорт шебері Жамал Бозова клубтың жетістіктерін атап өтіп, шешімін табуды қажет ететін мәселелерді ортаға салды. Басты мәселенің бірі – қалалық деңгейде дербес спорт ғимараты қажет.&nbsp; Қажымұқан спорт клубының ғимараты көп қабатты үйдің астыңғы қабатында орналасқандықтан жылу мәселесіне қатысты тұрғындармен келіспеушіліктер орын алып тұрады. Бұл мәселені жою үшін аталған ғимаратқа жылу элеваторын және жылу есептеуіш құралын орнату жылу шығындарын азайтады дейді мамандар.&nbsp; Сонымен қатар, спортшылардың республикалық, халықаралық жарыстарға шығуын қаржыландыру мәселесі де назар аударуды қажет етеді.&nbsp; Депутаттар тоқтаған келесі нысан, Абай даңғылындағы №47 А, Б, В көпқабатты тұрғын үйлердің аулаларында орналасқан ашық спорт-ойын алаңы болды. Аталған нысанды өткен жылы «Қыран» компаниясы демеушілік есебінен абаттандыру жұмыстарын жүргізіп, аулаішілік жолдарын асфальттап, балалар ойын алаңын салып, сәулеттік құрылғылар орнатқан. Ендігі кезекті аталған нысанды күтіп ұстап, қалалық мәдениет және спорт бөлімінің спорт нұсқаушыларын бекіте отырып, тұрғындардың спортпен шұғылдануына қолайлы жағдай жасау қажеттігі көтерілді.&nbsp; Сонымен қатар, 2019 жылдан осы кезеңге дейін «Тарлан» спорт кешенінде Қажымұқан Мұңайтпасұлы атындағы спорт клубының пара пауэрлифтинг бөлімшесі мүгедектігі бар жандарды қолдау мақсатында тегін жаттығу жұмыстарын жүргізіп келген. 2023 жылдың желтоқсан айынан бастап «Тарлан» спорт кешенінде туындаған қаржылық қиындықтарын ескерте отырып, биылғы жылдан бастап, мүгедектігі бар азаматтардың жаттығу залы ақылы негізге өтетіні белгілі болуда. Көптеген ел абыройын қорғаған спортшылардың жаттығатын орын мәселесі алдағы уақытта шешімін табуды және жаттығу залына заманауи спорттық құрал жабдықтар қажет етілуде.&nbsp; Депутаттық аралау жұмысы, қалалық мәслихатта уақытша комиссия отырысына жалғасып, спорт саласының өзекті мәселелері ортаға салынды. Комиссия отырысы барысында қалалық мәслихат төрағасы И.Құттықожаев тұрғындармен бірлесіп, ашық спорт ойын алаңдарын салуды «Халық қатысатын бюджет жобасы» енгізу, елді мекендерде, спорт түрлерінен шыққан жеңімпаздарды насихаттау, қала көлемінде жұмыс жасайтын спорт нұсқаушыларының жыл көлемінде үздіксіз қызмет атқаруы үшін, қаржылық мәселелерін түбегейлі шешуді ұсынды.&nbsp; Өз кезегінде қалалық мәдениет және спорт бөлімінің басшысы Жағыпар Тажмаханов өзекті мәселелерді шешу бағытында атқарылып отырған жұмыстарды ортаға салды.&nbsp; Комиссия жұмысына облыстық дене шынықтыру, спорт және туризм басқармасы мен облыстық спорт мектептері мен қалада орналасқан жеке спорт нысандарының жауапты өкілдері, қаладағы колледждер мен кәсіптік мектептер өкілдері, қалалық дербес бөлім басшылары мен кент және ауылдық округ әкімдері қатысты.&nbsp; Мәжілісте көтерілген ұсыныстар мен пікірлер биылғы жылдың наурыздың соңғы онкүндігінде өтетін қалалық мәслихаттың кезекті сессиясына шығарылатын болады.

Қызылорда: Спорт саласындағы мәселе депуттар назарында

<a href="https://kyzylorda-news.kz/">Kyzylorda-news.kz</a> Мейірбике ісі – тарихы тереңнен тамыр тартатын мамандықтың бірі. Ресейде І Петр заманында госпитальдерде, лазареттерде әйелдер еңбек еткен. Сол кезде&nbsp; қайырымды мейірбикелер халықтың арасынан шығып, өздерінің қалауынша науқастарға күтім жасауды ұйғарған. Мейірбикенің наукастарды демеу жолындағы еңбектері орасан зор. Мейірімділік пен жылулықтың символына айналған&nbsp; маманның бірі – №1-ші қалалық емхананың аға аяжаны Қуаныш Омарова.Ол 1976 жылы Қызылорда қаласында дүниеге келген. 1983 жылы Қызылорда қаласындағы №43 Ж.Махамбетов атындағы орта мектепке барып, оны1993 бітіреді. Сол жылы Қызылорда медициналық училищидегі мейірбике ісі мамандығына оқуға түседі. Оқуды бітіргеннен кейін алғашқы еңбек жолын №1 қалалық емханада аймақтық мейірбике жұмысынан бастаған.Қуаныш Омарова 2016 жылдан бастап №2-ші жалпы тәжірибелік дәрігерлік бөлімінің аға мейіргері қызметінде. Жанына ыстық көрінетін алғашқы еңбек жолының бастауы болған № 1-ші емханада жұмыс істегеніне бүгінде 25 жыл. Осы жылдар ішінде тұрғындардың арасында сыйлы болып қана қоймай, ел алғысын да алып келеді.&nbsp;– Бұл өмірде басты&nbsp; құндылықтардың бірі – сіз бен біз, яғни сыйластық. Адамдармен жақсы қарым-қатынас жасау бұл келесі адамның оміріне, күнделікті тіршілігіне күннің нұры тәрізді өз жарығын, шуағын тигізеді, тіпті&nbsp; қиындықтарының&nbsp; түйінін шешуге&nbsp; мұрындық болады. Міне, осындай&nbsp; жанашыр,&nbsp;мейірімді жан – Омарова Қуаныш. Ауырған адамның жаны шүберекте дегендей, Қуаныш Қалмаханқызы&nbsp; әр ем алушының алдынан шығып, жағдай сұрап,&nbsp; тиісті кабинеттерге апарып, дәрігерлердің берген емін түсіндіріп кеңесін береді. Сондай-ақ ол жумысына адал, мейірімді, ауы­рып&nbsp; барған адамдардың тән&nbsp; жарасын, жан жарасын басуға, қолынан келген көмегін көрсетуге&nbsp; &nbsp;дайын тұрады, – дейді қала тұрғыны С.Абдрахимова.&nbsp;Қуаныш Омарованың атқарған еңбегіне сай алған марапаты да аз емес. Ол 2018 жылы министрліктің «Құрмет грамотасын», 2022 жылы облыстық денсаулық сақтау басқармасының «Алғыс хатын», 2023 жылы облыс әкімінің орынбасарының «Алғыс хатымен» марапатталған.

Қазақстан және Қызылорда облысының жаңалықтары