<a href="https://kyzylorda-news.kz/">Kyzylorda-news.kz</a>&nbsp; Сырдария аудандық ауруханасының&nbsp;мамандары 1 ай көлемінде дүниежүзілік туберкулезге қарсы күніне орай жүзеге асқан айлыққа өз үлестерін қоса білді.&nbsp;Күн сайын әрбір елді мекенде медицина мамандары арнайы акция, семинар өткізіп,&nbsp; дерттің алдын алу жолдарын қарастырды. Өз кезегінде бүгін Шіркейлі ауылында «Біз туберкулезді жеңе аламыз!» атты ұранымен Сырдария аудандық санитариялық-эпидемиологиялық бақылау басқармасымен бірлесіп, ауқымды акция ұйымдастырылды.&nbsp;Акцияның шымылдығын ашу үшін сөз алған Сырдария аудандық санитариялық-эпидемиологиялық бақылау басқармасының басшысы Самалбек Өмірбаев жыл бойы және айлық барасында атқарылған жұмыстарға тоқталды. Сонымен қатар Сырдария аудандық ауруханасының фтизиатр-дәрігерлері Ләззат Ибраймова, Анар Ибраймова және Шіркейлі дәрігерлік амбулатория дәрігері Бақыткүл Қайбылда туберкулез дертіне байланысты маңызды ақпараттармен бөлісті.&nbsp;<blockquote>– Негізінен, туберкулез дертімен күреске арналған іс-шаралар аясында жүйелі жұмыстар жүргізілді. Мектеп оқушылары арасында шығармалашылық байқаулар өткізіліп, жеңімпаздар анықталды. Ал сала мамандарының біліктілігін арттыру мақсатында арнайы оқытулар жүргізілді. Медицина мамандары әрбір елді мекенде болып, аталған дертке қатысты мониторингтік талдау жасалды. Науқастармен кездесіп, ем алу шараларын қатаң бақылауға алды. Аудан тұрғындарына арнайы үнпарақтар таратылып, туберкулезге қарсы тұрудың негізгі амалдары түсіндірілді. Айта кетейік, тұрмысы төмен отбасыларға арнайы азық түлік себеті табысталды, – деді фтизиатр-дәрігер&nbsp; Ләззат Ибраймова.</blockquote>Аудандық акция барасында ауыл өнерпаздары өнер көрсетті. Шығармашылық байқаулардың жеңімпаздары анықталып, бағалы сыйлықтар табысталды.

Шіркейліде ауқымды акция өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгін наурызнаманың «18 наурыз – ұлттық киім күні» мерекесі аясында аудандық &nbsp;аурухана ұжымы &nbsp;«Наурыз – берекем, наурыз – мерекем» тақырыбында &nbsp;мерекелік іс-шара ұйымдастырды. Аталған іс-шара Сырдария аудандық ауруханасының бас дәрігері Жалғасбек Үсенов, салалық орынбасарлар, дәрігерлер, медицина мамандары қатысты.Аудандық емхананың авто тұрағына үлкен киіз үй тігіліп, мерекелік іс-шарасы жарасым тапты. Өз кезегінде Сырдария аудандық ауруханасының бас дәрігері Жалғасбек Үсенов жиналған жұртшылықты мерекемен құттықтады.– Бүгін Ұлыстың ұлы күнін шад-шадыман көңіл-күйде тойлаған барша аудан жұртшылығын мерекемен шын жүректен құттықтаймын! Адам жанының арашасы бола білген медицина мамандары &nbsp;жаңару мен жаңғырудың мерекесін ерекше атап өтуде. «18 наурыз – ұлттық киім күні» мерекесі ел көлемінде ауқымды түрде аталып өтілуде. Біздің мамандарымыз қазақы әдет-ғұрыпты берік сақтап, ұлттық киімдерді киіп, дәстүр сабақтастығын жаңғыртуда. Барша сала мамандары мен ардагерлердің отбасына береке-бірлік, зор табыс, ынтымақ тілеймін, – деді бас дәрігер.Іс-шара барасында талай жыл медицина саласында өзіндік қолтаңбаларын қалдырған сала ардагерлері Сейітхан Дәужанов,&nbsp;Рүстем Садықұлы, &nbsp;Шынтай Зетов, &nbsp;Абдулла Арғынбаев көпшілікке ақжарама тілегін жеткізді. Мереке қарсаңында ардагерлерге «Сырдария аудандық ауруханасының ардагері» куәлігі табысталды.– Аудан медицинасы қашанда алдыңғы қатарда тұруы – білікті мамандардың еңбегінің жемісі деп білемін. &nbsp;Көгінен нұр төгілген, жеріне гүл егілген елімізде&nbsp;Ұлыстың ұлы күні – Наурыз мерекесі ерекше форматта тойланып жатқанына бек қуаныштымыз. Сала мамандары қашанда халық денсаулығын жақсарту үшін аянбай еңбек етуде. Барша ізімізден ерген жастарды, білікті де білгір дәрігерлерді, аудан тұрғындарын мерекемен құттықтаймын, – деді сала ардагері Сейітхан Дәужанов.Аудандық мәдениет үйінің өнерпаздары &nbsp;әннен шашу шашып, &nbsp;көпшілікке көтеріңкі көңіл-күй сыйлады. Бұл ретте &nbsp;сала мамандары арасында &nbsp;сәнді, жарасымды ұлттық киіммен келген жандар марапат төрінен көрінді. Ал аудандық спорт клубының мамандарының ұйымдастыруымен &nbsp;қол күрес, арқан тартыс, кір тасын көтеруден жарыс өткізілді. Барлық жеңімпаздар мен жүлдегерлерге Сырдария аудандық ауруханасының кәсіподақ ұйымының бағалы сыйлықтары тапсырылды.

Медицина мамандары жаңару мен жаңғыру күнің атап өтті 

&nbsp;<a href="https://kyzylorda-news.kz/">Kyzylorda-news.kz</a>&nbsp; Ауыл – біз үшін алтын бесік! Қаншама жыл, қаншама ғасыр өтсе де, бұл қағида ешқашан өзгермейді. Халқымыз үшін ұлттық құндылықтардың алтын тамыры іспетті болған ауыл береке мен байлықтың, ырыстың да бастауы еді. Сондықтан ауылды көркейту, ауыл кәсіпкерлігін дамыту мәселесі сөз болғанда елең ете түспейтін адам жоқ. Өйткені әрқайсымыздың көңіл түкпірімізде бір кездері шаруашылығы қыз-қыз қайнаған ауылдың тірлігі қайта оралса деген арман жатқаны анық қой.Мемлекет басшысы Қасым-Жомарт Кемелұлы Тоқаев Қазақстан халқына Жол¬дауларының бірінде: «Ауыл шаруашылығын дамытпай, бәсекеге қабі-летті экономика құру мүмкін емес» деген еді. Шындығында, әртүрлі табиғи-климаттық аймақтарда орналасқан біздің ұлан-байтақ жер ресурстарымыз – бәсекеге қабілетті табиғи артықшылығымыз. Қазірде ауылдық жерлердің бүгінгі ахуалы қандай? Онда тұратын халықтың тұрмыс-тіршілігі, әлеуметтік жағдайы қандай деңгейде? Қармақшы ауданына қарасты Ақтөбе ауылдық округінің жағдайымен танысып көрдік.Бүгінде Ақтөбе ауылдық округінде барлығы – 11 616 бас ауылшаруашылығы жануарлары тіркелген. &nbsp;Атап айтқанда, мүйізді ірі қара – 2155 бас, жылқы – 1854 бас, ұсақ мал – 5476 бас, түйе – 101 бас, құс – 2030 басты құрайды.&nbsp;Егілген егіс көлемі барлығы – 5459 гектар. Оның ішінде, күріш &nbsp;– 3801 гектар, жаңа жоңышқа – 703 гектар, ескі жоңышқа – 859 гектар, картоп – 32 гектар, бақша – 32 гектар, көкөніс – 32 гектар.&nbsp;Ауылдағы кәсіпкерлікті дамыту – ел игілігін еселеу. Иә, қазірде ауыл кәсіпкерлігін дамыту бағытында мемлекеттік деңгейде түрлі бағдарламалар қабылданды. Ақтөбе ауылдық округінде бүгінде 76 кәсіпкер бар. Кәсіпкерлікті қолдау мақсатында несие мен грант бойынша – 16 &nbsp;жоба қаржыландырылған (306,5 мың теңге). Оның ішінде, аграрлық несие бойынша – 1 жоба, құны 220,0 мың теңге, аграрлық несие 2,5% – 8 жоба, құны 38,8 мың теңге, Байқоңыр ӘКК несие бойынша – 5 жоба, құны 39,9 мың теңге, гранттық қаржыландыру бойынша – 2 жоба, құны 2,8 мың теңге иеленді. Ал кәсіпкерлік негіздеріне 18 адам оқытылды. &nbsp;<blockquote>Ауылдық округте атқарылып жатқан ілкімді істер көп. Айталық, «Оңталап» шаруа қожалығының демеушілігімен былтырғы жылы құрылысы басталған ойын алаңының құрылысы аяқталып, пайдалануға берілді. Жалпы құны – 30 000, мың теңгені құрайды. Сонымен қатар Т.Салқынбайұлы көшесіне 49 867,7 мың теңгеге орташа жөндеу жұмыстары жүргізілді. Мұнан өзге балалар ойын алаңына 12 350,1мың теңге қаражат қаралып, құрылысы аяқталды. Ы.Сейтенов көшесіне 2,0 мың &nbsp;теңгеге жарықтандыру жұмыстары жүргізілді. &nbsp;Кеңсе көшесінің бойындағы жарық шамдарына қайта жөндеу жұмыстары жүргізілді.Өткен жылғы атқарылған жұмыстардың бір парасын тілге тиек еттік. Ендігі кезекте биылғы жылы атқарылатын ауқымды жобаларға тоқталсақ. &nbsp;– Биыл ауылымызда бірнеше көшені жөндеуден өткізуді жоспарлап отырмыз. 2024 жылға бюджет қаражаты есебінен І.Мүсірбаев, Б.Қасқырбаев көшелерін қайта жаңғыру және Ы.Сейтенов көшесін орташа жөндеуге жалпы құны 272 187,1мың теңге бюджеттік өтінім тапсырылды. Алдағы уақытта осы жұмыстар негізінде іске кірісеміз – дейді ауылдық округ әкімі Қанат Аралбаев.&nbsp;</blockquote>Сондай-ақ ауылдық клуб үйінде есептік кезеңде 44 іс-шара өткізілді, 4 үйірме және 91 мүше бар. Ауылдық кітапхана тарапынан есепті кезеңге 21 рухани танымдық іс-шара атқарылып, 24 кітап көрмесі өткізілді. Спорттық үйірмелер бойынша қазақша күрес түрінен 42, ұлттық асық ату үйірмесіне 42 бала қатысады.Ауылдық округте – 39 жұмыссыздар қатарында. «Қармақшы-Құс» ЖШС ашылуына байланысты – 35 адам тұрақты жұмыспен қамтылды. Қоғамдық жұмыспен қамтылғандар – 37 адам, жастар тәжірибесі бойынша – 8 адам қамтылған.

Қармақшы: Ақтөбе ауылында 35 адам тұрақты жұмыспен қамтылған

<a href="https://kyzylorda-news.kz/">Kyzylorda-news.kz</a> Аманқосовтар әулетінің жылыжай ісін қолға алғанына бірнеше жыл болған. Аудан жұртын көкөніс көшеттерімен қамтамасыз етіп отырған отбасы кәсіптің бұл түрінде пайда көп екенін айтады. Алайда бейнеті де аз емес көрінеді. Сондықтан Айдана Бағдатқызы салаға тыңғылықты дайындықпен келген дұрыс дейді.&nbsp;Бастапқыда бұл отбасы қызанақ пен қиярды ақпан айының аяғында жылыжайда баптап, ерте көктемде сатылымға шығара бастаған. Кейін сұраныстың артуына байланысты олар мұндағы өнім көлемінде өсіп қалыптастырған. Яғни көкөністен бөлек басқа да түрлі гүлдердің көшетін сатуға кіріскен.&nbsp;Шындығында «олар кәсіптің бұл түрін дамытып жатыр» десе де болады. Оған себеп те жоқ емес, қай өнімнің шығымына қандай күтім қажет екенін жетік білетін Аманқосовтар алдағы уақытта тек өнім сатуға бел буып отыр. Бұл жобаны осыған дейін жүзеге асыруға қолбайлау болған қаражат тапшылығын мемлекет шешіп беріпті.&nbsp;Биыл Айдана Пұсырманова қолда бар қаражатқа жылыжайға қажетті материалдар сатып алған, басқа да қажетті құрал-саймандар алу үшін мемлекеттік бағдарлама көмегіне жүгінеді. Осылайша ол 1 млн 380 мың теңге қайтарымсыз қаржылай қолдауға ие болған. Қазіргі таңда Аманқосовтар отбасы жылыжай құрылысын бастап кетті. Егер бұл жобасы сәтімен жүзеге асса, келер жылы маусымында жалғаштықтарды көкөніспен қамтамасыз етпек.&nbsp;– Інім әскери салада жұмыс жасайды. Мен қаладан көкөніс тұқымдарын әкеліп, әкеммен бірге оны жылыжайға егеміз. Ерте көктемде көшеттерді халық таласып алып кетеді. Тұтынушымыз жетерлік, оның барлығын қамтамасыз етуге шыны керек, соңғы жылдары шамамыз келмеді. Сондықтан тек халықтың тапсырысымен ғана көшет дайындауға көштік. Тіпті бір жылдары оның өзін отырғызатын жер таппадық. Осыдан-ақ ауданда көшетке сұраныстың қандай екенін бағамдай беріңіз. Биыл мемлекеттік бағдарлама көмегіне жүгініп, қайтарымсыз қаржыға ие болдым. Оған жылыжайға қажетті басқа да құрал-саймандарға тапсырыс бердім, алдағы айдың аяғында затымыз келсе, жылыжай жұмысын ерте бастауға бел буып отырмыз, – дейді кәсіпкер.&nbsp;Кейіпкеріміз Мөрәлі Шәменов ауылында тұрады. Аядай ауылда кәсібін жандандырып, өзінің тұрақты тұтынушыларын да қалыптастырып алған. Бір жағынан ауылдың аудан орталығына жақын орналасқаны да тиімді дейді. Себебі өнім көп болған жағдайда қалғанын аудан орталығына барып, сатылымға шығармақ.&nbsp;– Біздің ауыл кенттің іргесінде ғой, сондықтан «жылыжай өнімі алдағы уақытта ысырап болады» деген бізде уайым жоқ. Бір жылдары көптеп көшет сатқанда да аудан орталығындағы тұтынушыларымыз таласып алған. Негізінен бізге келіп те басқа ауылдардан көшет алып кететіндер бар. Бірақ аудан орталығына көптеп көшет алып кетсек, бір күнде 25-30 мың теңгедей табыс табатын күндер болады. Ал алдағы жылы өнім сатсақ, табыс еселене түседі, – дейді ол.Жалпы ауылдағы Аманқосовтарды «бағбандар отбасы» десе де болады. Себебі оларға қай өнімге қандай күтім қажет, қай өнімді қай уақытта суару керек, мұның бәрі таңсық емес. Жылыжай өніміне сұраныстың артуына бұл да себеп шығар.&nbsp;Алдағы уақытта кәсіпкер жылыжайда қызанақ пен қиярдан бөлек басқа да өнімдер егуді жоспарлап отыр. Кешегі аптада 100 мың теңгеге жуық қаражатқа қажетті тұқымдарды да алдырып қойған. Демек, жылыжай жуырда іске қосылады деген сөз.&nbsp;Айта кетейік, қазіргі таңда қызанақ пен қиярдың нарықтағы бағасы мың теңгеге жуықтайды. Ал жазға дейін бұл баға көтерілмесе, арзандамайтыны анық. Кейіпкеріміздің «келер жылы табысымыз еселенеді» дегенін осыдан-ақ аңғаруға болады.

Жалағаштықтар үшін мол өнімді жылыжай

<a href="https://kyzylorda-news.kz/">Kyzylorda-news.kz</a> &nbsp;Моңғолияның Баян-Өлгий қаласында өткен ақын-жазушы, белгілі қоғам қайраткері Мұрат Пұшатайұлының 70 жас мерейтойына арналған «Бай өлкем – бай бесігім» атты халықаралық ақындар айтысында жерлесіміз, айтыскер ақын Мөлдір Айтбай бас бәйгені қанжығасына байлаған болатын. Сұлу сөзден жыр кестелеген сөз зергерлерінің додасында аламанның алдын бермеген қазақтың ару қызымен сұқбаттасудың сәті түскен еді.– Баян-Өлгейден шалқар шабытпен қанжығаңыз майланып келіпті. Әңгіменің әлқиссасын осы айтыстан бастасақ. Қалай болды? Кімдер қатысты?<blockquote>– Айтыс өте тартысты өтті. Баян-Өлгийдің аспанын жырмен әуелеттік. Бұл айтыстың бірнеше ерекшелігі бар. Ең әуелгісі туған күнімде өткені. Айтыс басталатын кезде Моңғолияның әнұранымен басталды. Ондай нәрсені бұрын-соңды көрмегенмін. Қазақтың ұлттық киімі мен үкілі домбыраны ұстап отырып, өзге елдің әнұранын тыңдап отыру деген енді… Оны сөзбен айтып жеткізе алмайсыз. Төрт мемлекеттің туы тұрған соң, төрт елдің әнұраны қатар шырқалады деп ойлаған едім, қателесіппін. Олай болмады. Солай айтыс басталды, әуелі жергілікті ақын Ақтілеу Кеңшілікпен айтыстым. Сонан соң алматылық Шұғаев Сезімханмен сайысқа түстік. Финалда мен сөз соңын әнұранмен аяқтадым. Олай етпеске болмады. Сол жерде жүрегі қазақ деп соққан қанша жанның еңсесі көтерілді, мақтанышы оянды. Бір ауыз әнұран туралы әдепкі жайды айтып өттім де «Сіздерге азаттықтың таңы атқандай етіп, мен бір әнұранның әніне салып айтайын» дедім де әуелете жөнелдім. Халықтың ыстық ықыласы шабыттандырды. Осылайша әрі туған күнім, әрі бас бәйгем қуаныш сыйлағаны былай тұрсын, атажұртты аңсаған, қазақылықты сағынған бір қауым елді көріп, Отан деген төрт әріптен құралған ұлы сөздің қадір-қасиетін тағы бір түсініп келдім.</blockquote>– Өзге елге барып, ұлттық өнерді айшықтау – үлкен жауапкершілік. Әнұранды әуелеткендегі сезім қалай болды?<blockquote>– Бұған дейін алыс-жақын елдерге көп бармайтынмын. Бірақ енді түбі бір түркіміз ғой, өзіміздің салт-дәстүр, әдет-ғұрып, тілімізге, ділімізге жақын елдер. Ал Баян-Өлгий – сан ғасырлар бойы қазақтар қоныстанған жер. Халықтың 95 проценті – қазақ. Қалған көлемі кейіннен көшіп келген моңғолдар. Қанша жерден қазақтар тұрғанмен Моңғолия мемлекетінің шекарасында тұр. Бәрібір, ауыр екен. Тәуелсіз еліміздің төсінде, көк тудың астында, қалың қазақтың ортасында өмір сүріп жүрген біз бақытты екенбіз. Бұл айтыста мен өнердің алдындағы жауапкершіліктен гөрі Отан алдындағы жауапкершілікті қатты сезіндім. Халық өте ыстық қабылдады, тоқтамай қол созып, қошемет көрсетіп, ерекше көңіл аударды. Оның үстіне әнұранды әнге салып айтқаннан кейін мені әлеуметтік желіден тауып, жазып жатқандар көп. Ақжолтай тілегін жаудырып жатыр әлі. Иә, қазақ қай жерде де қазақ. Біздің ұлттың рухы биік. Ол – дәлелдеуді қажет етпейтін аксиома.</blockquote>– Алда қандай жоспар бар? Айтыскер ақын Мөлдір Айтбайдан қандай жақсы жаңалықтар күтейік?<blockquote>– Бұған дейін 2015 жылы «Мөлдір өлең», 2017 жылы «Сыйлық» атты кітаптарым жарық көрді. Байқап отырсам, арада біраз үзіліс болыпты. Көптеген өлеңдерім жиналып қалды. Алла амандық берсе, алдағы көктемде үшінші кітабымды жарыққа шығарғым келіп отыр. Әрі бұл кітаптың тұсаукесері ретінде тәуелсіз қазақ елінің барлық облысын аралап шығамын деген жоспар да бар.</blockquote>– Әңгімеңізге рақмет! Шығармашылық табыс тілейміз!&nbsp;

Мөлдір Айтбай: «Үшінші кітабымды жарыққа шығару ойда бар»

<a href="https://kyzylorda-news.kz/">Kyzylorda-news.kz</a> &nbsp;Сыр өңіріндегі қай салада болса да игі бастама мен оң өзгерістер жетерлік.&nbsp;Әлбетте, оның барлығын жіпке тізгендей айтып беруге болар, бірақ бір атанға жүк болардай осынау жетістіктер жолына қысқаша шолу жасағанды жөн көрдік.<h2 style="margin-left:0cm;">Білім – бақтың жібермейтін қазығы</h2>Елдің бола­шағына барар төте жол, сапалы ұрпақ­тың алтын кілті – білімде. Көзі ашық, көкірегі ояу тұлға­ларды қалып­тастыру – аға ұрпақ­тың мой­нындағы жүк. Осы саладағы&nbsp;жетіс­тік те аз емес. Әрине, ұстаздар мен оқу­шылардың ішінара жетіп жүрген белесі мен биіктері – өз алдына бір төбе. «Білім беруге жағдай жасамаған ел түрмені көптеп салуға мәжбүр болады» деген ойды оқыған едім. Ал өңірде ашылып жатқан мектеп пен жаңарып жатқан білім ошақтарын санауға саусақ жетпейді. Оның барлығы да қара орман халықтың көз алдында өтіп жатыр. Мәселен, қаланың шет бөліктерінің бірі – «Сабалақ» саяжайы тұрғындарының басты мұңы мектеп болатын. Білім алуға ынта-ықыласы мол әрбір шәкірттің санасына сәуле шашатын мықты ұстаздар шоғырланған білім ошағы –&nbsp; 150 орындық №285 мамандандырылған мектеп-лицей-интернаты&nbsp;есігін айқара ашты.«Бәйтерек» шағын ауданында да №287 жаңа мектеп пайдалануға беріліп, жақын аудандағы №261, 280 мектептердің жүктемесі азайды.&nbsp;Оқушылар заман талабына сай, сапалы білім ошағында оқи бастады. Қызылорда қаласының өзінде 2 жаңа мектеп ашылса, 4 мектепке қосымша ғимарат пайдалануға беріліп, ұрпақтың сапалы білім нәрімен сусындауына барынша жағдай жасалды. Мектеп құрылысы туралы тақырып тіні ағытылса, «Жайлы мектеп» жобасы ойға оралады. Осы ұлттық жоба аясында&nbsp;да тындырымды тірлік бар.&nbsp;Айтпақшы, білім ошағында балаларды тасымалдау үшін жаңа үлгідегі 30 автобус сатылып алынып, ең қажет деген білім ошақтарына үлестірілді. Мұның өзі сан жылдан бері қол жеткізіп отырған басты жетістіктер. Тіпті өткен жылы 102 оқушы республикалық, халықаралық деңгейдегі пәндік олимпиадалар мен ғылыми жобалар байқауының жеңімпазы атанды. Ал ұстаздардың өзі сан алуан жетістікке қол жеткізіп келеді. Жерлесіміз, білікті ұстаз Әсел Пірмағанбетованың республикалық деңгейде «Үздік педагог» атануы Сыр ұстаздарының мерейін үстем, абыройын асқақ етті.<h2 style="margin-left:0cm;">Халық денсаулығы басты назарда</h2>Адамзат үшін қоғамдағы ең қажетті, ең маңызды екі сала болса, оның бірі – білім, екіншісі – медицина. Ұстаз ұлттың жанын емдесе, дәрігер тәнін емдейді. Сыр медицинасы да тың серпін алды.&nbsp;Мемлекет адам капиталын басты байлық санайды. Денсаулық сақтау саласына қолдау аз болмады.&nbsp;Өткен жылы медицина саласына 138, 6 млрд теңге бөлінді. Қызылорда қаласында 36,4 млрд теңгеге бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы басталды.&nbsp;Өңірде тапшы мамандарды даярлау ісі де жалғасуда. Өткен жылы жылға арнайы 24 грант бөлінген.&nbsp;575 дәрігер, 738 орта буын қызметкерінің білімін жетілдіруге 88 млн теңге қаралды. Ал денсаулық сақтау ұйымдарын материалдық-техникалық жабдықтармен қамтамасыз етуге 4,0 млрд теңге қаржы бөлінді. Оған МРТ, УЗИ, рентген, видеогастроскоп, фибробронхоскоп аппараттары алынды. «Қазақстан халқына» қоры республика бойынша 3 облыста бар, құны 1,1 млрд. теңге (1 091,0 млн. теңге) тұратын онкологиялық скрининг жүргізуге арналған жылжымалы медициналық кешенмен қамтамасыз етті. Мұнда компьютерлі томограф, цифрлық рентген, ультрадыбыстық аппарат қаралған. Бұл өз кезегінде шалғай елдімекендердегі облыс тұрғындарының жоғары мамандандырылған медициналық көмекке қолжетімділігін арттыруға, орташа өмір сүру жасын ұлғайтуға мүмкіндік береді.Айта кету керек, бұған дейін облыстық онкология орталығы көпбейінді облыстық ауруханасының емханалық ғимаратында орналасып, көлемінің жеткіліксіздігінен, химиотерапия алатын онкологиялық науқастарға және отадан кейінгі кезеңдерде үлкен қиындық туғызған болатын. Осы орайда, облыстық жұқпалы аурулар ауруханасының модульдік бөлімшесінің ғимаратын материалдық-техникалық жабдықтарымен бірге облыстық онкология орталығына беріліп, қалыпты жұмысын жалғастыруда.&nbsp;Бүгінгі күні жүкті әйелдерге, босанатын, босанған әйелдерге, жаңа туған нәрестелерге және гинекологиялық науқастарға перинаталдық көмек көрсететін жалғыз медициналық ұйым – облыстық перинаталдық орталық. Осыған орай, орталық жүктемесін азайту және тар буынды мамандардың консультациясын шұғыл және дер кезінде ұйымдастыру мақсатында да тиісті жұмыстар атқарылды.Сондай-ақ балаларға арнайы мамандандырылған стационарлы соматикалық, нейрохирургиялық және хирургиялық медициналық көмек көрсететін жалғыз медициналық ұйым – 200 төсек орынға арналған көпбейінді облыстық балалар ауруханасы. Аурухана 200 төсек орынға арналғанымен, 360 төсек болып үстемемен жұмыс жасауда. Аталған аурухана базасында даму бұзылыстары бар 3 жасқа дейінгі балаларға арналған ерте араласу орталығын ашу үшін 124,6 млн теңгеге құрал-жабдықпен «Қазақстан халқына қоры» арқылы қамтамасыз етілді. Өткен жылы «Ауылдық денсаулық сақтауды жаңғырту» ұлттық жобасы аясында 4 (Арал, Қазалы, Шиелі, Жаңақорған) көпбейінді аудандық орталық ауруханаға қосымша құрылыс салу арқылы қайта жаңғырту үшін жобалық-сметалық құжаттамасы әзірленді. 2025 жылы аса қымбат медициналық техника алуға 5 млрд. теңге қаржы бөліну жоспарлануда.&nbsp;Ұлттық жоба аясында өңірде құны 11,0 млрд теңгені құрайтын 27 нысан тізімі енгізілді.<h2 style="margin-left:0cm;">Спорт саңлақтары серпінді дамудағы жолын жалғады</h2>Сырда спорт қарқынды дамуға бет алды. Әсіресе, жекпе-жек бағытындағы жетістіктер қоржыны толайым. Ал қазақ футболының көсегесін көгертемін деп шынашақтай сәтінен арман қуып өсіп келе жатқан өрендердің бар екені қуантады. Әйтсе де, спорт саласында елді бір серпілтіп тастаған ерекше оқиғаның бірі осы футболда болды. Бүгінде ел құрамасы аутсайдерден фаворитке айналды. Еуропа біріншілігінің іріктеу кезеңінде сәтті өнер көрсетіп, Германиядағы кәрі құрлықтың басты аламанының жолдамасын жеңіп алуға мүмкіндік алды. Бұл&nbsp; – басты сенсация. Сондай-ақ қызылордалық «Қайсар» да ел чемпионатында тәп-тәуір нәтиже көрсетті. Бірінші лигадан жаңа шыққан ұжым премьер-лигада көпшілік күтпеген сәттерге ие болды. 17 жылдан кейін Алматыда «Қайратты» 3:0 есебімен жеңіп, қызылордалық жанкүйерлерді қуантқаны ел есінде.<h2 style="margin-left:0cm;">Сыр мәдениеті тұғырда</h2>Мәдениет саласы қашанда ерекше мәнге ие. Бұл салада қыруар тірлік атқарылуда. Аймақ басшысының бастамасымен көпфункционалды 1000 орындық «Өнер» орталығының құрылысы қарқынды жүргізіліп, ашылу салтанаты өтті. Өңірде классикалық өнерді дамыту, көрермендерге концерттерді кәсіби әрі жанды дауыста ұсыну мақсатында облыстық филармонияда кәсіби музыканттардан құралған симфония оркестрі жұмысын бастады.&nbsp;Оркестр құрамына ішекті, үрмелі және ұрмалы аспаптар бойынша 50 кәсіби музыкант қабылданып, музыкалық аспаптармен қамтамасыз етілді. Оркестрдің көркемдік жетекшісі және бас дирижері – Қазақстанның еңбек сіңірген қайраткері, профессор Мүсілім Әмзе.Аймақ басшысының қолдауымен 13 маман шет елдерде біліктілігін арттырды.&nbsp;Өткен жылы облыстық филармонияның солистері Италия мемлекетінің Анкона қаласындағы Озимо опера академиясында біліктілігін арттырса, театр, филармония және халық шағармашылығы орталығының шығармашылық және техникалық мамандары шеберлік дәріске қатысу үшін Беларусь Республикасының Витебск қаласына іссапармен барды. Аймақ басшысының қолдауымен араға 17 жыл салып, Н.Бекежанов атындағы қазақ академиялық музыкалық драма театрының Алматы қаласында гастрольдік сапары ұйымдастырылды. Шығармашылық сапар аясында театр репертуарындағы 4 үздік қойылым алматылық көрермендерге ұсынылды. Шыңғыс Айтматовтың повесі желісінде «Жәмилә» драмасы, С.Раевтың «Ақ ләйлек» психологиялық драмасының, О.Нұрмахановтың «Көрұғлы» рухнамасының, А.Елгезектің «Болмаған балалық шақ» және бірқатар балалар қойылымдарының премьералары өтті. Мүмкіндігі шектеулі өнерпаздардың шығармашылығын шыңдауға арналған «Арман» инк­лю­зивті театры іске қосылды. Бұ­ған дейін Қы­зылорда қаласы әкімдігі жанында үйірме ретінде жұмыс жасап келген «Жастар театры» өз алдына кәсіби ұжым ретінде қайта құрылды. Отбасылық құндылықтарды нығайту, жас ұрпаққа рухани-адамгершілік тәрбие беру және заманауи қазақ ана­сы­ның бей­несін қалып­тастыруға ба­ғыт­талған «Анаға тағзым» және «Отбасы» орталықтары пайдалануға берілді.Ай­мақ бас­шы­сының қол­дауымен облыстың 85 жыл­ды­ғына орай тарихи деректердің көшірмесін алу мақсатында облыстық архив қызметкерлері Ресей Федерациясы Орынбор біріккен мемлекеттік архивінде зерделеу жұмыстарын жүргізді. Нәти­жесінде ХVІІІ-ХІХ ғасыр­лар­дағы облыс тари­хына қатысты құжаттардың 2000-нан аса парақ көшірмелері алынды. Бұл құжаттар толық зерделеніп, заңнама талаптарына сәйкестелгеннен кейін жалпы жұртшылықтың пайдалануы үшін қолжетімді болады. Ерекше атап өтер жаңалық, биыл Сыр өңірінде бірнеше жылдар бойы жүргізілген археологиялық жұмыстардың нәтижесінде «Шірік Рабат сақ жауынгері», «Сығанақ ханшайымы» реконструкциялары жасалды.&nbsp;Фото: kzvesti.kz

Өңірдегі оң өзгеріс, берекелі бастама

Қорғанбектің қой етімен тұтастай ауданды қамтамасыз етуге қауһары бар. Еттің келісін 1900 теңгеден өткізсе, 1 қойды мал базарда 45-50 мың теңгеден пұлдайды. Елде ет бағасы шарықтаған шақта кәсіпкердің мұндай қолжетімді баға қойғаны көңіл көншітеді&nbsp;Күткеніміз – кәнігі қойшы. Ауыл әкімі «қойшымыз да келе жатыр» деп шаңдатқан көлік бағытына қарап қояды. Ақ джиппен жүйткіп келген ол да уақ малдың бабын білген кәнігі шопан екен.&nbsp;«Қойды өрістен түгел айдап әкелу үлкен жауапкершілік болатын. Қой кезек біз үшін кәдімгідей жұмыс еді. Қазір ойлап отырсам, сонда мал бағу, төрт түліктің қадірін білу деген қасиеттің асыл дәнегі бізге сонау бала күннен бойымызға егіліпті. Мал бағудың қыр-сырын бала кезімізден үйренген екенбіз ғой» деп бастады әңгімесін.&nbsp;Бұл – томаға-тұйық тірлігімен ерекшеленіп, мамыражай ауыл шаруасымен күнелткен қаракеткендік еңбек адамы Қорғанбек Ералиев. Әрине мемлекеттің негізгі күретамыры – ауыл. Қаншалықты қиын кездерді бастан кешсе де ауылдың қайнаған тірлігі өз жалғасын таба береді. Шыны керек, соңғы жылдары ауыл халқы кәсіппен айналысуға машықтанып келеді. Бұрын қолда бар малды түгел сатып, қалаға қарай ағылатын жұрт қазір қорасындағы төрт түлігін көбейтіп, шаруашылық ашуға бет бұруда.&nbsp;Бала кезінен ауылда өсіп, атакәсіптің қыр-сырын жақсы білетін Қорғанбек мал шаруашылығының ішінде қой басын көбейтуге ықыласы ауыпты. Мемлекеттен «Сыбаға» бағдарламасы арқылы 14 пайызбен 37 млн теңге несие алып, кәсібін бастап кетеді. Бір қызығы, сол 14 пайыздың 4 пайызын кәсіпкер өзі төлесе, қалған 10 пайызын мемлекет субсидиялаған. Осылайша ол қаржыға 480 қой сатып алып, «Жанель» шаруа қожалығын құрады. Тірлік бастаудан сескенбеген еңбек адамының шаруасы ширап кетті. Төккен тер зая кеткен жоқ, бүгінде қой саны 1000-ға жуықтаған.<blockquote>– Ақыры мал баққан соң кәсібім өнімді, табысты болса деген мақсат қойдым. «Мал баққанға бітеді» деп қазақ бекер айтпаған. Мал бағу оңай шаруа емес. Бейнетсіз зейнет болмайтыны белгілі. Ыстық-суығына төзсең ғана табысың еселене түседі. Бұрынғыдай емес, қазір ауыл тұрғындары малдың қадірін білді. Мен қойларымды ауылдан 20 шақырымда орналасқан жайылымдық жерде бағамын. Ауыл тұрғындарына да жұмыс беріп отырмын. Қазір шаруашылықта 5-6 ауыл азаматы еңбек етеді, – дейді кәсіпкер.</blockquote>Шаруақор кісінің айтуынша, баққан адамға қойдың пайдасы ұшантеңіз. Сатсаң &nbsp;пұл, сойсаң ас, кисең киім болады. Бірақ ауылда қойды мыңдап бағуға жем-шөптен мәселе бар. Кейіпкеріміз қол қусырып отырмай, жаз келсе, қолдан келгенше мал азығын қамдап алуға машықтанған. Жетпегенін ауыл шаруаларынан сатып алады екен.&nbsp;Жасыратыны жоқ, соңғы жылдары мал азығының да құны шарықтап тұр. Осыдан 3-4 жыл бұрын 400-500 теңгеден пұлданатын 1 пресс жоңышқа бүгінде 1000 теңгеге бірақ шыққан. Сонымен қатар мал баққан шаруаларға мемлекеттен мал азығына бөлінетін субсидияданың да қысқартылғанына 2 жыл болыпты. Мұның малшыларға оңай тимей тұрғаны рас. .&nbsp;Мал баққан ата-бабамыз тұрмыс-тіршілігінде әсіресе қойдың терісі мен жүнін көбірек пайдаланып, киім қылып, төсеніш қылып, баспанасын сонымен жауып, барлық керегіне жарата білген. Бүгінде сол жүн мен тері қадірсіз қоқымға айналып, қай жер болса сол жерде құрттап, шіріп, керексіз үйінді болып жатыр. Шаруа адамының айтуынша, бұл бағытта жасалып жатқан жұмыстар жоқтың қасы, тіпті аймағымызда қой жүнін іске жарататын өндіріс ошағы жоқ. Мәселен, жылына 2 рет мал қырқатын кәсіпкер, қой жүні мен терісін өртейді, басқа амалы да жоқ.Иә, ауылдағы халық осы мал үшін отыр емес пе? Мал өсіріп, күн көріп жатыр. Әрине мынадай қымбатшылық заманда мал баққан оңай шаруа емес. Олардың жем-шөбінің өзі қыруар ақша. Алайда бұл кәсіпті мықтап қолға алған Қорғанбек аға бұлай ойламайды. Ол «келешекте кәсібімді кеңейту – басты жоспарым» дейді. Мемлекеттен қаржылай қолдау болса, ауыл маңынан мал бордақылайтын кешен ашу ойында бар.<blockquote>– Еңбек етемін деген адамға қашанда жұмыс табылады. Мал күтіміне баса мән берілсе, мол өнім алуға болатынын айтып келеміз. Шаруалардың өндірген өнімдерін өткізуде, мал азығын дайындауда, материалдық-техникалық жабдықталуда, мал басы өнімділігін жетілдіруде мемлекет әрқашан қаржылай көмек беруге дайын. Оның бір дәлелі, қазір қаладан ауылға көшкен тұрғындар саны артты. Қаракеткенде мал шаруашылығының қарқынды дамуы ауылда жаңа жұмыс орындарын ашуға, ауыл тұрғындарының әл-ауқатының артуына, қалаға көші-қон легінің тежелуіне айтарлықтай оң ықпал етеді, – дейді ауыл әкімі Әділ Тоқтаров.</blockquote>«Адам еңбегімен бағалы» деген рас екен. Қой баққан Қорғанбек Ералиевтың мақсаты – айқын, межесі – биік. Оған біз осы сапарымызда көз жеткіздік.

Жалағаштық еңбек адамының 1000 қойы бар 

&nbsp;<a href="https://kyzylorda-news.kz/">Kyzylorda-news.kz</a>&nbsp; Қармақшы аудандық Шәмшат Төлепова атындағы мәдениет үйінде аудандық ардагерлер Кеңесінің кезекті ІІ пленумы өтті. Іс-шараға Қармақшы ауданының әкімі Жандос Еркінбек, аудандық мәслихат төрағасы Әділ Қошалақов, облыстық ардагерлер кеңесінің төрағасы Серік Дүйсенбаев, облыстық ардагерлер кеңесінің алқа мүшесі, Қармақшы ауданының Құрметті азаматы Шәкизат Төребаев, Қазақстан Республикасы Журналистер одағының мүшесі Жүзбай Ибрагимұлы және аудандық бастауыш ардагерлер ұйымдарының төрағалары, мекеме басшылары қатысты.Пленумда аудан басшысы қасиетті Рамазан айы мен Наурыз мерекесімен құттықтап, өткен жылдың жетістіктері мен алдағы міндеттерді атап өтті.<blockquote>– &nbsp;Үлкенді сыйлау, оларға құрмет көрсету – ата-бабадан келе жатқан салтымыз. Сіздердің ауданның өсіп-өркендеуіне қосқан үлестеріңіз бен еңбектеріңіз ерен. Өмірлік тәжірибелеріңіз бен ақыл-кеңестеріңіз ел экономикасының дамуына өлшеусіз үлес қосуда. Біз соңғы жылдары аға буынның еселі еңбек жолы мен ғибратты ғұмырын жастарға үлгі етіп, лайықты құрмет көрсетуді жақсы дәстүрге айналдырдық. Бұл бағыттағы жұмыстар жалғасын табады. Қай кезде де өткеннен өнеге алып, бүгінмен өмір сүріп, келешекке қызмет етуді парыз санаймыз. Жыл сайын ауданымыздың әлеуметтік-экономикалық жағдайы өркендеп, өсіп келеді. Былтыр ауданда біршама ауқымды жұмыстар атқарылса, биыл да қолға алған міндеттер жалғасын табатын болады. Елдің ұйытқысы болып отырған сіздердің орындарыңыз біз үшін маңызды. Ардагерлер – халықтың үні, биліктің кеңесшісі, қоғамда туындаған түйткілді мәселелердің сарапшысы. Сіздер мемлекеттік бастамаларға қолдау білдіріп, саяси реформалардың жүзеге асуына атсалысады деп сенемін, – деді аудан әкімі Жандос Еркінбек.</blockquote>Мемлекет басшысы Қасым-Жомарт Тоқаев «Ардагерлер ұйымы – Үкімет пен халықтың арасын байланыстыратын звенолардың бірі» деп айтқан-ды. Осы тұста аға буын өкілдері Президенттің бастамаларына қолдау білдіріп, халық бірлігін, қоғам тұтастығын түсіндіру мен насихаттау жұмыстарына белсене араласып жүр. Түйіткілді мәселелерді шешуде зор үлес қосып отырған ардагерлер ұйымының азаматтық қоғам секторында алатын орны ерекше.Дәстүрлі түрде жыл басында өткен жылды қорытындылап, ардагерлер ұйымының жұмысын одан әрі жандандыру бағытында жаңа міндеттер қойылған. Жиында аудандық ардагерлер кеңесінің төрағасы Асқар Мереков ұйымның өткен жылы атқарған жұмысына баяндама жасады.&nbsp; Ардагерлер ұйымы өзге өңірлердегідей аудан халқының, мәдени-тұрмысын жақсарту мен түрлі әлеуметтік топтардың әлеуетін көтеруде көптеген игі іс атқарып келеді.<blockquote>– Президентіміз Қасым-Жомарт Тоқаевтың жыл сайынғы Жолдаулары мен қабылданған мемлекеттік бағдарламаларды жүзеге асыруда жасап жатқан жұмысынан елдегі экономикалық және саяси жүйенің жаңа арнаға бет бұрғанын сезініп отырмыз. Аудандық ардагерлер кеңесі былтыр елеулі жұмыстарды атқарды. Бала біздің болашағымыз дейтін болсақ аудандық білім бөлімімен тығыз жұмыс жасадық. Өткен жылы 17 рет мектептерде іс-шараларға қатыстық. Мамандық таңдау, жас өспірімдердің арасындағы құқықбұзушылықтың алдын алу, ата-аналар жиналысына қатысып, ақыл-кеңесімізді айттық. Ардагерлеріміз полиция қызметкерлері, ұстаздармен бірге кезекшілікке шығып, құқықбұзушылықтың алдын алуға өз үлестерін қосты. Осы жылы аудандық білім бөлімен меморандумға отырып, бұл жұмыстар біздің негізгі бағытымыздың бірі болады. Бүгінгі күннің ардагерлері кемел келешегіне сенген, баянды болашақ жолында осы жаңа толқынмен бірге болатын, қоғамда орын алып жататын түрлі кертартпалық пен кемшіліктерге бей-жай қарамай дұрыс жол сілтеп отыратын, жандармыз деп ойлаймын, – деді аудандық ардагерлер кеңесінің төрағасы.</blockquote>Мұнан соң ауданның зиялы ардагерлері Қаршыға Есдәулетов, Әмидулла Нағыметұлы, Дәмелі Жалғасбаева, Жарылқасын Ноғайұлы, Жұпаркүл Рысқұлбекқызы баяндаманы талқылау бойынша сөз сөйлеп, пікірлерін білдірді.&nbsp;Жиын соңында өңірдегі ардагерлер қозғалысының жұмысын ілгерілетуде, ауданның әлеуметтік-экономикалық және рухани дамуына үлес қосып жүрген бірқатар ардагер облыстық және аудан әкімінің Алғыс хатымен марапатталды.

Қармақшылық ардагерлер келелі кездесу өткізді

<a href="https://kyzylorda-news.kz/">Kyzylorda-news.kz</a> &nbsp;Әрбір жас – келешек кепілі. Тарих қойнауындағы құндылықты, тәуелсіздік пен бейбіт өмірді дәріптеу ұлт жанашырларының міндеті. Сондықтан болар, жерлесіміз Асылжан Абдуллаев «Тарихнама» атты медиа-жобасын жүзеге асырып, медиа саласы арқылы тарихты насихаттауды көздеуде. Жуырда «Kyzylorda Hub» технопаркінің резидентімен жолығып, жобаға қатысты сауалдарға жауап алған едік.– Асылжан, «Тарихнама» жобасының басты мақсаты не? Жоба Сыр жастарына қандай әсер қалдырды?<blockquote>– Қазіргі таңда медиа саласы танымал. Ал үгіт-насихатты аталған бағытта жүргізу тиімді екені түсінікті. Біз де толыққанды ойластырып, «Тарихнама» медиа алаң болады деп шештік. Сондықтан ол әлеуметтік желідегі платформаларда жүргізілді.Жастар тағылымға толы бірнеше томдық кітап, документалды фильм, жәдігерлерге толы музейді аралауға уақыт таппайды. Себебі қарбалас. Алайда Instagram, Telegram, TikTok секілді платформалар атағын жоғалтпақ емес. «Тарихнаманы» да осы әлеуметтік желілерді пайдалану арқылы жүзеге асырып, көптеген жастың қазақ тарихына қызығушылығын оята алдым. Оған дәлел, 1 жылда TikTok желісіндегі аккаунттағы контентті 50 млн-ға жуық көрермен тамашалады. Тарихқа қатысты құнды деректі қарауға ұмтылыс артып, 163 мың жазылушы жиналды.Қызығы, жоба тек Қазақстан емес, Орталық Азия, Еуропа және Батыс Еуропа мемлекеттерін қызықтыра алды. Сонымен қатар Түркия мемлекетінен бірлесіп жұмыс істеуге ұсыныс түсуде. Алдағы уақытта халықаралық деңгейде бейнеконтент жасау ойда бар. Бұл – жоба жеткен бірегей жетістік. Әрбір азамат тарихты білуге міндетті. Сол міндетімді мүдірмей атқарудамын деген үміттемін.</blockquote>– TikTok әлеуметтік желісі арқылы 15 секундтық бейнеролик тарих туралы ақпарат бере алады деген ойды алға тартасыз. Аз ғана уақытты қамтитын «тез білім» көзі есте қалатынына қандай кепілдік бар?<blockquote>– Жоба ұтымды болу үшін зерттеу жұмысын жүргізіп отырдым. Яғни, «қандай мәлімет қызық, оны қалай ұсынуға болады?» және «қандай әлеуметтік желі ұтымды?» деп, сауалдарға жауап іздедім. Жүйелі нәтижеге жету үшін ғалымдар пікірін саралау да тиімді.Жалпы, ғалымдар қысқа ақпарат есте тез сақталады деген тоқтамға келген. Сонымен қатар, адамның жады сөзге қарағанда суреттегі ақпаратты жылдам есте сақтауға бейім. Сол себепті TikTok желісінде кез келген тарихи мәліметті арнайы оқиғаға қатысты суретпен тоғыстырып, қысқаша ақпарат беремін. Жобаның басты мақсаты да сапалы түрде аз уақытты қамтитын ақпарат көзін ұсыну екенін ескерсек, дұрыс жолдамыз деп ойлаймын. Тәжірибе мен кеңес алға жетелейді.</blockquote>– Тарихи деректерді қайдан аласыз? Дереккөз ретінде қай ғалымның еңбегін жиі пайдаландыңыз?<blockquote>–&nbsp;«Тарихнама» жобасының жоспарын құру барысында әртүрлі ізденіске бардым. Дәстүрлі білім көзімен қатар заманауи ресурстарды да пайдалануға мүмкіндік туды. Яғни тарихи-ғылыми сайттарды қарап, электронды дереккөздерге түбегейлі зерттеу жұмысын жүргіздім. Сонымен қатар мектептен алған жүйелі білім пайдаға асты.</blockquote>– Алдағы уақытта да платформалы жобаларды жүзеге асыру жоспарда бар ма?<blockquote>– Қазіргі таңда жасанды интеллект – әлем назар аударып отырған интеллектуалды ғылым. Көптеген жоба осы бағытта жұмыс істейді. «Тарихнама» жобасы стартап-экосистемада алдыңғы қатарда. Бірақ алдағы уақытта жасанды интеллект саласына бар күш-жігерімді салуды жоспарлаудамын. Астаналық достармен бірге Қызылордадағы алғашқы 2 жасанды интеллект жобасын іске асыруды қолға алдық. Ал «Тарихнама» жобасы белсенді түрде жұмысын жалғастырады .</blockquote>– Сұхбатыңызға рақмет!&nbsp;

Қызылордалық ІТ маманның жобасы Еуропа мемлекеттерін қызықтырды

<a href="https://kyzylorda-news.kz/">Kyzylorda-news.kz</a>&nbsp; Наурызнама онкүндігі - төл мерекемізді тойлаудың жаңа дәстүрлерін қалыптастыруға, ең жақсы адами қасиеттерді – ашықтықты, шынайылықты, жауаптылықты, қайырымдылықты ашуға бағытталған. Ұлттық киімге арналған бүгінгі күн Қылмыстық-атқару жүйесі департаментінің №60 мекемесіндегі әр қызметкер үшін ұлттық дизайнның көркемдігі мен қайталанбас өрнегіне тамсанып, бай мұраны зерттеп, одан шабыт алатын күн. Ғасырлар бойы қазақтың ұлттық киімі қарапайымдылығымен және ұтымдылығымен ерекшеленіп келді. Тіпті, заманауи сән талғамы да оның маңызын кеміте алмақ емес. Қазіргі заманғы ұлттық киім ұлттық мінез бен ұлт бірлігін айшықтай отырып, ел мәдениеті мен тарихының ажырамас бөлігіне айналды. &nbsp;Атаулы күн бұл салада жаңашыл көзқарас пен шығармашылық тұрғыда дәстүр мен стильді ұштастыруға ынталандыратын “Ұлттық киім” күнін ұйымдастыруға себеп болды. Мұндай іс-шара ұлттық мәдениетті сақтауға және насихаттауға үлес қосып, сонымен қатар халық мұрасының маңыздылығын еске түсіріп, бірлігімізді арттыра түседі. Бұл күнді мекеме қызметкерлері өз мәдениеті мен ұлттық бірегейлігі үшін мақтануға, озық дәстүрлерімізді қазіргі заманға жалғауға арнады.

Наурызнама: Ұлттық киім – халықтың мәдени мұрасы

<a href="https://kyzylorda-news.kz/">Kyzylorda-news.kz</a> &nbsp;ХХІ ғасыр – жаңа заман жетістіктерінің жемісін көретін кезең.&nbsp;Ғылым мен білім, медицина, сондай-ақ технология саласының қарыштаған уақыт десек болады. Роботтар мен жасанды интеллект күші тұрмыстағы көп қиындықты жеңілдетті. Ұялы телефон, кір машинасы, шаңсорғыш, тіпті тоңазытқыш пен үтіктің өзі жеткен жетістіктің бір парасы. Қазір білім беру саласында бұл ғылымға аса қызығушылық білдіретін – мектеп оқушылары мен студенттер. Олардың еңбегі назардан тыс емес және әрбір туынды бағалы. Темірге жан бітіріп, балаларды ғылымға бейімдеушілер арасында Аян Жақсыбайұлы бар.<h2 style="margin-left:0cm;">Робот жұмысты жеңілдетеді</h2>Те­хно­логиялық жаңалықтардың оң жағы, кері әсері де барын білеміз. Алайда адамның жұмысын жеңілдету үшін жасалған бұл процесстер көз қуантарлық болғанымен, еңбекке деген құлшыныстың әлсіреуіне әсер ететіні рас.&nbsp; Себебі технологиялық жетістіктер жұмысты жеңілдеткенмен, адамдар табыс көзінен айырылу қауіпіне мән береді. Бұл – орынды реакция. Бірақ&nbsp; ғылым адамзаттың жақсы өмір сүруі үшін зерттеу жұмыстарын жүргізіп, ғаламдық прогресстердің өркендеуі үшін қызмет етеді. Тағы да айта кететін жайт, технологияны жастайынан меңгерген бала логикалық тұрғыдан қабілетті, озық ойлы болып қалыптасады. Ғылым дамыған сайын адамдар тұрмыстық қажеттіліктерге қарағанда, тұлғалық қызығушылықтарымен айналысып, қоршаған ортаның&nbsp; игілігіне жарайтын дүниелерді жасап шығаруға ден қоймақ.<h2 style="margin-left:0cm;">Робототехниканы мектепте&nbsp;оқыту керек</h2>Себебі жаңа технология бағытына аса назар аударып, осы бағытта іздену маңызды. Егер дамыған, азуы алты қарыс мемлекеттермен терезе теңестіргіміз келсе, осы бастан балалардың ғылымды игеруіне жағдай жасау қажет. Білім саласына бұл пәннің келуі мені қуантады. Өйткені қазіргі Z заманының ұрпақтары робот жасау, компьютерлік, гаджеттік ақпараттарды тез қабылдайды. Сондықтан бұл тақырып балалардың қызығушылығын оятып, білімін ары қарай жетілдіруге көмектеседі. Бірақ алдымен осы саланы меңгерген мамандар санын арттырып, педагогтардың біліктілігін жетілдіру маңызды. Қажет болған жағдайда тәжірибе алмасуға сырт елдердің озық технологиялық базасының қалай құрастырылатынын, қалай қарыштап дамитынын көзбен көрген артық емес.<h2 style="margin-left:0cm;">Адам жасаған дүние&nbsp;адамға қарсы шықпайды</h2>Саланы жетік меңгермейінше қауіпті болатыны рас.&nbsp;Алайда тетігін білмей, теріс пікірде болмау керек. Американдық фантаст жазушы роботтардың адамдарға зияны тимейді деген идеяны алға тартқан. Адам қолымен жасалған дүние адамның өзіне қарсы шығуы мүмкін емес деп есептейді. Расымен адам ақылмен роботтарды пайдаға жаратса, технологиялар тек үздік нәтижелер көрсетеді. Жаратылыстану бағытындағы пәндерді қауіпсіздік ережелерін сақтай отыра меңгеру маңызды, сол себепті әр процесті жіті бақылауда ұстап, нұсқаулықтардың көмегімен жүргізген абзал.<h2 style="margin-left:0cm;">Елде мықты мамандар қалыптасса…</h2>Сыр дарындары&nbsp; республикалық, облыстық, қалалық дәрежеде жетістіктерге жетіп жүр. Мұғалімнің шеберлігі оқушының жетістігімен бағаланады демекші, әрбір шәкірттің биігі шыңдалуға шабыт береді. Осы орайда ізбасар бүлдіршіндердің жеткен жетістігін атап өтсем. 2019 жылы Арман Сүгірәлі&nbsp; М.Х.Дулати атындағы Тараз Мемлекеттік университетінің “Үздік ғылыми жоба – 2019” байқауынан жүлделі І орын иеленіп, тегін білім грантын жеңіп алды. «Ұлы өнертапқыштыққа алғашқы қадам» инновациялық идеялардың республикалық байқауының қалалық кезеңінен Нұрсұлтан Жақсыбай ІІ орын иеленді. «Білім – Ғылым – Инновация» атты инновациялық идеялар мен ғылыми жобалар байқауынан Бердібек Мереев ІІ орын иеленсе, «Ғаламдық беталыстар және ақпараттық технологиялар саласындағы жаңа мүмкіндіктер» атты облыстық ғылыми жобалар байқауынан Ерхан Тастыбай мен Нұржан Омаров робототехника бағыты бойынша жүлделі І орынды қанжығасына байлады.Қазір өзім Қорқыт Ата университетінің магистранты атанып, “Академиялық ұтқырлық” (Erasmus) бағдарламасы бойынша Польшада білімімді толықтырудамын. Алған білім ел кәдесіне жарайды деп сенемін, иннова­циялық жоба­ларды ілгерілетуге өз үлесімді қоссам деймін. Себебі заман­дастардың әлемдік&nbsp; аренада дарынын паш еткенін көру бөлек сезім. Ғылыми жоба, пәндік олимпиада, кәсіби байқаулардан жүлделі орындарды қанжығалап жүрміз, алайда бұл тек бастамасы деп білемін. Елде мықтылар қалыптастыру керек.

Қызылордалық мұғалім Польшада білім алуда

<a href="https://kyzylorda-news.kz/">Kyzylorda-news.kz</a> Ақиқат пен шындықтың аражігін ажыратып, өзекті мәселелердің басын ашумен қатар, олардың шешімін табуда дебат маңызды рөл атқарады. Толеранттылық, әдеп пен логикалық шеберлік, қырағылық іспеттес адам бойындағы асыл қасиеттердің қалыптасуына үлес қосатын жарыссөздің басқа да берер мүмкіндігі көп. Зияткерлік ойлау қабілетті арттырып, жағдайды сыни көзқараспен талдауды үйретеді. Елімізде 4 мыңнан астам дебат клубтары ашылып, бұл қозғалыс күшейді.<blockquote>«Дебат – пікірсайыс ордасы. Әрбір білім беру мекемелерінде, колледждер мен ЖОО-да дебат клубтары белсенді жұмыс істейді. Әлемдік деңгейден қалыс қалмаған. Қазақстандағы дебат тек қазақ тілінде ғана емес, орыс және ағылшын тілінде де өтіп жүр. Бұл дебат ойындарының халықаралық дәрежеде бақ таластыруға дайын екенін дәлелдейді. Мысалы, Қызылордадағы «Ақиқат» дебат клубы 2014 жылы құрылып, 10 жыл үздіксіз дебат саласын жандандыруға үлес қосып келеді. Өткен жылы Қазақстанның түкпір-түкпірінен 18 университет қатысқан республикалық турнир өтті. Аймақтағы мектептерде филиал ашты. Жасөпірімдерді дебатқа үйретуге арналған тәрбие сағаттарын өткізуде белсенділік танытты. Қорқыт Ата атындағы Қызылорда университетінің қолдауымен көптеген жарыстар мен байқауларда бой көрсетіп жүрміз. Атап айтсақ, Түркістан облысында өткен дебат турнирінде жүлделі I орын, Тараз қаласында өткен турнирде де көш басынан көрініп, I жүлделі орынды қанжығалаған едік. Сондай-ақ оқушылар Жамбыл облысында өткен байқаудан III орын, Атырау қаласында өткен «Atyrau cup» республикалық турнирінің жартылай финалында британдық форматта өнер көрсетті. Қазір ауданаралық балаларды дебат клубтарына бейімдеу қолға алынуда. Алдағы уақытта үздік дебатшы-оқушылардың санын көбейтіп, шешен сөздің шыңына шығар ұрпақ қалыптастыруға үлес қоссақ дейміз», – дейді облыстық «Ақиқат» пікірсайыс клубының төрағасы Айжан Орынбасар.</blockquote>Шынында, дебат – мүмкіндіктер бастамасы. Шығармашыл бағытқа бейім оқушылардың шыңдалуына айрықша үлес қосатын шеберлік білім беру саласындағы қолданыста.<blockquote>«Мектептегі оқушылардың дамуына мүмкіндік жасау үшін олардың қабілетін түрлі тәсіл қолдана отырып, ашуға тырысамыз. Осы тұста дебат клубының берер пайдасы зор. Ең әуелі, дебат оқушыларға орта қалып-тастыруға көмектеседі. Білімге, жан-жақты, көшбасшылыққа құштар оқушылармен достық алаң құрайды. Ойын көптеген тақырыпты қамтиды. Екі жақты пікірге сыни ой білдіре отыра, түйткілді шешуге қабілетті болып машықтанатыны сөзсіз. Дебаттың тағы бір септігі қоғамдық ортамен коммуникацияға түскенде тиеді. ЖОО-ға, жұмысқа тұрғанда, арнайы ұйымдарға қабылданған сәтте өзінің мықты тұсын көрсете алатын тұлға болып қалыптасады», – деген пікірімен бөлісті Абылай хан атындағы №140 қазақ орта мектебі директорының тәрбие ісі жөніндегі орынбасары Бақытжан Сапарғалиұлы.</blockquote>ЖОО-ның білім беру әдістемесінде дебатқа айрықша мән беріліп жүр. Себебі пікірталас студенттерді бәсекеге құштар, ізденімпаз етеді. Нақты тұжырым жасай білетін, тіл мәдениетін игерген болашақ маман келешектің кепілі бола алады.<blockquote>«Дебат клубына 1 курстан бастап барамын. Ораторлық қабілетімді оңтайлы қолдануға, бойымдағы қасиетімді ашуға бірден-бір себеп болған – дебат ұйымы. Бұл таңдаулылардың ойыны, себебі терең ой, ұшқыр логика, төзімділік іспеттес ұғымдар көптің бойынан табыла бермейді. Оған қатысқалы қоғамда орын алған әрбір жағдайға тұлға ретінде пікір қалыптастыруға бейімделесің. Талдау жасап, ақ пен қараның арасындағы айырмашылықты аңғарасың. Жинаған білім қоры мен біліктілікті дұрыс пайдалануға айрықша септігін тигізеді. Мен бұл жақтан жақын дос, ақыл мен парасат ұғымдарын ұштастырған орта таптым», – дейді студент Мағжан Бекхожаев.</blockquote>Дебат – пікір таластыра, сөз жарыстыра отырып, сөз мәдениетін қалыптастыратын шешендік өнер. Жүйелі ой мен алтын қағидалар алаңы. Өмірдің әр шағында дебаттан аларымыз көп. Көңілсіз ортаны қызыққа толы ететін, кейде ой салатын, табандылыққа жаттықтыратын бұл қозғалыс дами береді. &nbsp;

Қазақстан және Қызылорда облысының жаңалықтары