<a href="https://kyzylorda-news.kz/">Kyzylorda-news.kz.</a> Қазалы ауданы әкімдігінің қолдауымен қолға алынған «Жастар керуені» ауданға қарасты барлық ауылдық округтерге жол тартатын болады.&nbsp;Ұйымдастырушы – аудандық жастар ресурстық орталығы. Бұл жолғы кезек Қызылқұм ауылдық округіне келді.&nbsp;Таңертеңнен басталған жоба аясында Кәукей ауылынан солтүстік шығысқа 2 шақырым жерде орналасқан республикалық санаттағы архитектуралық ескерткіш Сараман-Қоса мұнарасы таныстырылды.&nbsp;Мұнан соң Кәукей ауылында Тасарық және Бозкөл ауылдық окгругтерінен келген ауыл жастары арасында салауатты өмір салтын қалыптастыру, спортқа деген қызығушылықтарын арттыру мақсатында волейболдан жарыс ұйымдастырылып, «Жастар кубогы» сарапқа салынды.&nbsp;Ауыл тұрғындары мен жастары үшін кеңес беру алаңы жұмыс жасап, қойылған сауалдар бойынша тиісті сала қызметкерлері түсіндіріп берді.Кешкілік округте гала концерт ұйымдастырылып, өнерпаздармен қатар, жастардың арасында танымал әншілер, жерлестеріміз Ринат пен Асылжан Шамшырақтар өнер көрсетіп, жиналғандарға көтеріңкі көңіл-күй сыйлады.Шараға аудан әкімінің орынбасары Дәурен Тілеумбетов арнайы барып, жобаның мақсат-міндеттеріне тоқталды. Сондай-ақ, өткен жарыстарда жеңімпаз атанғандар мен жүлдегерлерді марапаттады. Бұдан бөлек, ашық аспан астында жастармен бейресми кездесу өтіп, Дәурен Оңғарбайұлы жасөспірімдердің ұсыныс-пікірлеріне құлақ түрді.

Қазалы: Жан жадыратқан жастар керуені

<a href="https://kyzylorda-news.kz/">Kyzylorda-news.kz.</a> Жалағаш ауданындағы шаруалардың жұмысы ширақ. Мәселен, мұнда суды үнемдеп пайдаланудың жаңа әдістерін жүзеге асырып жатқан орындар бар.&nbsp;Жалпы Жалағаш ауданында 21 дана су тоспа құрылыстары бар. 2022 жылы №278, №142 бекеттеріне, 2023 жылы №75, №505 бекеттеріне ағымдағы жөндеу жұмыстары жүргізілді. Шаруалардың ұсынысына сәйкес 2024 жылы №312 бекетке ағымдағы жөндеу жұмыстары жүргізіледі. Су тоспа бекетінің жағдайы жақсы.&nbsp;Ал «Ер Әлі» шаруа қожалығының 30 гектар күріш егістігі алқабына орнатылған суды үнемдеудің жаңа технологиясы көз қуантып тұр. Бұл Қызылорда облысындағы бірінші автоматтандырылған тоспа. Жаңа құрылғы әр литр сайын өзі арқылы өтетін судың мөлшерін есептеп, автономды түрде күн сәулесінен қуат алатын батареяларымен жұмыс істейді екен.Сонымен қатар, «Оңтүстік» коллектор арнасындағы суды қайта пайдалану үшін орнатылған насос қондырғылары да бар. Айта кету керек, су тапшылығы жағдайын ескерген аудандағы шаруашылықтар насос қондырғыларын пайдалану арқылы егінді сумен қамтамасыз етуде. Шаруашылықтарда барлығы 14 дана насос қондырғысы бар. Оның ішінде 8 дана насос қондырғысы «Жалағашсушар» өндірістік учаскесінен үлестірілсе, 6 дана насос қондырғысын шаруашылықтар өз қаражаты есебінен алған.Жалағаш ауданындағы егін науқанының қызу тіршілігі бүгінде қайнап тұр. Ал «Агрохимсервис-С» ЖШС-нің түйіршіктелген азот тыңайтқыштарын өндіру зауытының жұмысы жүйелі екенін де айта кеткен жөн.«Агрохимсервис-С» ЖШС-нің түйіршіктелген азот тыңайтқыштарын өндіру зауыты «Бизнестің жол картасы - 2020» бағадарламасы арқылы 2020 жылы іске қосылған. Зауыт жылына 50 мың тонна түйіршіктелген азот тыңайтқыштарын өндіреді. Қазіргі таңда зауытта 15 адам тұрақты жұмыспен қамтылған.

Жалағаштағы зауыт жылына 50 мың тонна түйіршіктелген азот тыңайтқыштарын өндіреді

<a href="https://kyzylorda-news.kz/">Kyzylorda-news.kz.</a> Қармақшы ауданында әлеуметтік маңызы бар азық-түлік тауарларының бағасына мониторинг жүргізіліп келеді. Аудандағы азық-түлік тауарларына баға белгілеудің бүкіл тізбегі бойынша делдалдық схемаларды тексеру жөнінде комиссия отырысының тапсырмасына сәйкес құрылған жұмысшы топ сауда нысандарын аралады.Сондай-ақ, әлеуметтік маңызы бар азық-түлік тауарларының баға үстемесін негізсіз көтермеу, шекті бағадан асырған жағдайда "Әкімшілік құқық бұзушылық" фактісі бойынша шаралар қолданылатындығы туралы түсіндірме жұмыстары жүргізілді. Қармақшы ауданы көлемінде әлеуметтік маңызы бар азық-түлік бағаларын қалыпты ұстап тұру мақсатында аудандық жұмысшы топ апта сайын азық-түлік сататын сауда дүкендеріне және сауда базарына мониторинг жұмыстарын жүргізіп отырады.Осы ретте, жұмысшы топ «Бибінұр» сауда базары маңындағы бау-бақша өнімдерін сататын сауда қатарларына бағаға қатысты Заң бұзушылықтарға (Шекті сауда үстемесінің жол берілетін мөлшері өндірушінің босату бағасының немесе көтерме сауда берушінің сатып алу бағасының он бес пайызынан аспайды. 9-баптың 2-тармағының бірінші бөлігіне сәйкес белгіленетін, әлеуметтік маңызы бар азық-түлік тауарларына рұқсат етілген шекті бөлшек сауда бағаларының мөлшері асып кеткен кезде ішкі сауда субъектісі Қазақстан Республикасының заңдарына сәйкес жауаптылықта болады. «Сауда қызметін реттеу туралы» Қазақстан Республикасы Заңы) тиісті жауапкершіліктер көзделгенгендігі туралы түсіндірме жұмыстарын және ескертпе хаттарын таратты.Бау-бақша өнімдерін сатушы жеке кәсіпкерлер Түркістан облысына қарасты Шардара ауданынан және Жаңақорған ауданынан қарбыз, қауын өнімдерін жеке көліктерімен тасымалдап, жергілікті тұрғындарға қолжетімді бағада сатып отырғандығын жеткізді.Айта кеткен жөн, биылғы жылдың қаңтар-мамыр айларына Қармақшы ауданы бойынша макроэкономикалық өсім көрсеткіштер бойынша анықтама берілді. Нәтижесінде, Қармақшы ауданындағы өнеркәсіп саласының кәсіпорындары 2023 жылдың қаңтар-мамыр айында 2293,0 миллион теңге өнім өндіріп, өткен жылдың тиісті кезеңімен салыстырғанда 130,0 пайызды құраған. Өңдеу өнеркәсібі бойынша1884,0 миллион теңгеге өнімі өндірілген. Өткен жылдың тиісті кезеңімен салыстырғанда 132,0 пайызды құрапты. Ал бөлшек сауда көлемі 3635,9 миллион теңгені құрап, өткен жылдың тиісті кезеңімен салыстырғанда 152,4 пайызды құрады. &nbsp;

Қармақшылық кәсіпкерлерге баға тұрақтығы жайында түсіндірме жұмыстары жүргізілді

<a href="https://kyzylorda-news.kz/">Kyzylorda-news.kz.</a> «Білектінің заманы өтті, білімдінің заманы келді». Бұл хан Абылай­дың осыдан бірнеше ғасыр бұрын айтқан сүбелі сөзі. Расында да қа­зір біліммен, парасатпен, жаңаша ойлаумен ғана өзгеден көш іл­ге­рі озуға болады. Мемлекеттік қызметшінің бойында білім мен біліктілік ұштасса, ел жарқын жетістіктерге жетіп, биік белестерді бағындырады. Сондықтан бұл салада тек білімі мен білігі ұштасқан мамандар қызмет атқаруы қажет. Осы орайда «23 маусым – Мемлекеттік қызметшілер күні» мерекесіне орай аудан әкімі аппаратының басшысы Рысбек Болатұлы Шайхиевпен сұхбаттасудың сәті түсті.– Рысбек Болатұлы, Мемлекет басшысы соңғы үш жылда мемлекеттік басқаруға қатысты бірқатар саяси реформаны жария етті. Оның бәрі әрбір мемлекеттік қызметшіге, қала берді әр азаматқа жауапкершілік жүктейді. Сіздің пікіріңізше, Жаңа Қазақстандағы мемлекеттік қызмет қалай ұйымдастырылуы керек? Бүгінгі сұхбатымызды мемлекеттік қызмет саласындағы жаңалықтар мен басым бағыттардан бастасақ.– Байқасаңыз әр Жолдауда міндетті түрде мемлекеттік қызмет саласы туралы айтылады. Мемлекет басшысы өткен жолғы Жолдауында «Біздің мұратымыз – Жаңа Қазақстанды құру. Жаңа Қазақстан дегеніміз – егемен еліміздің болашақтағы бейнесі» деп атап өтті. Бұл қоғамдық санаға серпін беріп, елдің ертеңгі күнге сенімін арттыруда. Президент атап өткендей, біз мемлекет пен қоғамның өзара сеніміне және құрметіне негізделген жаңа саяси мәдениетті қалыптастыруға міндеттіміз. Ал бұл мақсатқа жету үшін әрбір адам және бүкіл қоғам, құндылықтарымыз түбегейлі жаңаруға тиіс.Президент «Адам мемлекет үшін емес, мемлекет адам үшін» деп үнемі айтып келеді. Осыған сәйкес, Жаңа Қазақстандағы мемлекеттік қызмет бюрократияға жол бермейтін, сервистік сипатта ұйымдастырылуы керек. Бұл – халықтың талабына сай болу, елдің қажетінен шыға білу деген сөз. Бүгінде халық тарапынан мемлекеттік органдардың қызмет көрсетуіне қатысты кейбір көңіл толмаушылықтардың бары жасырын емес. Осы олқылықтардың орнын толтыру – біздің қызметіміздің басты бағдары. Ол үшін ашық, әділ, адал, адамға бағдарланған мемлекеттік аппарат қалыптастыруымыз қажет. Мақсатымыз – ел игілігіне қызмет ету. Жаңа Қазақстандағы мемлекеттік қызметті ұйымдастыру осы бағытта жүргізілуі тиіс деп есеп­теймін.– Ауданда қанша мемлекеттік қызметші бар? Олардың кәсіби білімі мен тәжірибесін арттыру мақсатында қандай жұмыстар жүргізілуде?– Ауданда жергілікті бюджеттен қаржыландырылатын мемлекеттік әкімшілік қызметшілердің жалпыштаттық саны 128 бірлікті құрайды. Мемлекеттік қызметшілердің орташа жасы қазір 40 жас болса, орташа еңбек өтілі 10 жыл. Аудан әкімдігіне қарасты мемлекеттік мекемелерде жұмыс жасайтын мемлекеттік қызметшілердің 48-і әйел. Қазіргі уақытта 119 мемлекеттік қызметші нақты жұмыс жасауда. Ағымдағы жылы 12 мемлекеттік қызметшіні қайта даярлау, 37 мемлекеттік қызметшіні біліктілігін арттыру курстарынан өткізу жоспарланған, оқу семинарларына қатысу жоспарға сәйкес жүргізілуде. 2023 жылы 12 мемлекеттік қызметшіні тағылымдамадан өткізу жоспарланып, жоспарға сәйкес тиісті жұмыстар жүргізілуде, есепті кезеңде 6 мемлекеттік қызметші тағылымдамадан өткен. 2023 жылдың есепті кезеңінде бос мемлекеттік әкімшілік лауазымдарға барлығы 3 конкурс өткізіліп, нәтижесінде 3 азамат қызметке қабылданған, оның ішінде мемлекеттік қызметке алғаш рет орналасқандар 2 азамат бар.– Сізге Әдеп жөніндегі уәкіл қызметі де қатар жүктелген. Осы туралы айтып өтсеңіз?– Соңғы жылдары Әдеп жөніндегі уәкіл қызметі қолданысқа енді. Бұл қызмет заңнамалық тұрғыдан да реттелді. Сырдария ауданы бойынша Әдеп жөніндегі уәкіл қызметі аудан әкімі аппаратының басшысы ретінде маған жүктелген. Әдеп жөніндегі уәкілдер институтын нығайту, халықтың мемлекеттік органдарға деген сенімінің артуына, мемлекеттік қызметте өзара қатынастар мәдениетінің қалыптасуына, сондай-ақ сыбайлас жемқорлыққа қарсы заң­наманың және қызметтік әдеп нормаларын бұзудың алдын алуға мүмкіндік береді. Жалпы Әдеп жөнiндегi уәкiл қызметтiк әдеп нормаларының сақталуын қадағалайтын және мемлекеттiк қызмет, сыбайлас жемқорлыққа қарсы iс-қимыл туралы заңнама мен Қазақстан Республикасы мемлекеттiк қызметшiлерiнiң Әдеп кодексi талаптары бұзылуының алдын алуды назарда ұстайды. Сондай-ақ өз функциялары шегiнде мемлекеттiк қызметшiлер мен азаматтарға кеңес беретiн мемлекеттiк қызметшi болып табылады. Биыл мемлекеттік қызмет саласы бойынша Әдеп жөніндегі уә­кілдің қатысуымен дербес бөлімдер мен ауыл әкімі аппараттарында кездесулер, семинарлар, тақырыптық талқылаулар ұйымдастырылуда. Аудан әкімдігінің ресми интернет ресурсында, барлық мекемелерде Әдеп жөніндегі уә­кілдің байланыс нөмерлері, электронды пош­тасы, қабылдау күндері орналастырылған. Мемлекеттік қызмет департаментімен бірлесіп 6 құқықтық оқыту семинары өткізілді. Сондай-ақ 12 мемлекеттік қызметшіге және 4 азаматқа жеке консультативтік көмек көрсетілді. Бұдан бөлек, түсіндірме жұмыстарын жүргізу мақсатында ҚР Мемлекеттік қызмет істері агенттігінің Қызылорда облысы бойынша департаментімен бірлесіп құқықтық оқу семинарлар ұйымдастырылуда. Мемлекеттік органның оң имиджін және ұжымда жағымды ахуалды қалыптастыруға елеулі үлес қосқан тұлғаларды көтермелеу туралы мемлекеттік орган басшыларына ұсыныстар енгізіліп қазіргі таңда 50-ге жуық мемлекеттік қызметші марапатталды.– Мемлекет басшысының басшылық штатты азайту бойынша тапсырмасы бар.­ Бұл тапсырма ауданда қалай орындалуда?– Мемлекет басшысы Қасым-Жомарт Тоқаевтың мемлекеттік аппаратты оңтайландыруға қатысты тапсырмасына және «Қызылорда облысының мемлекеттік органдарын басқару схемасының» жаңа жобасы аясында ағымдығы жылы Сырдария ауданында әкімшілік шығындарды азайтып, басшылық құрамды оңтайландыру жұмыстары жүргізілді. Осы орайда, Сырдария ауданы әкімдігіне қарасты 12 аудандық дербес бөлім 8 бөлімге дейін азайды. Яғни, 12 бөлім басшысы 8-ге дейін қысқарды. Бұл шешім мемлекеттік қызметтердің сапасы мен ұтқырлығына оң әсер етіп, жұмыс сапасын бұрынғыдан төмендетпей, жоғарылату бағытында өз нәтижесін беруде. Осы ретте тоқсан сайын жергілікті атқарушы орган­дардағы моральдық-психологиялық ахуалды анықтау мақсатында мемлекеттік қызмет істері және сыбайлас жемқорлыққа қарсы іс-қимыл агенттігі бекіткен нұсқада анонимдік сауалнама жүргізілуде. Есепті кезеңде аудан әкімдігіне қарасты барлық мем­лекеттік органдардың мемлекеттік қызметшілері қамтылды. Оның қорытындысы барлық атқарушы органдарда өткізілген семинар-кеңестерде қаралып, ұжымдарда алдағы уақытта жүргізілуге тиісті жұмыстар нақтыланды.– Саладағы әкімшілік құқық бұзушы­лықты алдын алу және болдырмау бо­йынша қандай жұмыстар жүргізілуде? Сондай-ақ Әдеп кодексінің нормаларын сақтау бойынша қандай шаралар атқарылды?– Сұрағыңыз өте орынды. Бұл – облыс әкім­дігінің және прокуратураның қатаң бақылауында тұрған мәселе. ҚР Бас прокуратурасының Құқықтық статистика және арнайы есепке алу жөніндегі комитетінің базасында қалыптастырылатын әкімшілік жазалар банкіне тоқсан сайын мониторинг жүргізілуде. Әкімшілік құқық бұзушылық жасаған мемлекеттік қызметшілерге қатысты тиісті шаралар қабылдау бойынша тиісті мемлекеттік органдар басшыларына ұсыныстар енгізілуде. Аудан әкімі аппараты тарапынан мемлекеттік қызметшілердің Әдеп кодексінің нормаларын сақтауы бо­йынша әлеуметтік желілерге күнделікті мониторинг жасалуда. Нақты кезеңде аудан әкімі аппараттары мен жергілікті бюджеттен қаржыландырылатын атқарушы органдары мемлекеттік қызметшілерінің әлеуметтік желілерлегі парақшаларына жүргізілген мониторингтің нәтижесінің бірқатар қызметшілердің «facebook», «vk», «instagram» әлеуметтік желілеріндегі парақшаларында Әдеп кодексінің нормаларын сақтамау деректері анықталған жоқ.ҚР Президентінің 2015 жылғы 29 желтоқсандағы №153 Жарлығымен бекітілген Қазақстан Республикасы мемлекеттік қызметшілерінің Әдеп Кодексінің 5-тармағының талаптарына сәйкес, мемлекеттік қызметшілер өзінің іс-әрекетімен және мінез-құлқымен қоғам тарапынан айтылған сынға себепкер болмауға тиіс екендігі көрсетілді. Қазіргі таңда аталған мәселе Әдеп жөніндегі уәкілдің тікелей бақылауында және үнемі қатаң қадағалануда. Осыған орай, барлық мемлекеттік қызметшілердің қызметтік әдепті сақтаудағы жауапкершілік деңгейін арттыру жүктелді. Сондай-ақ мемлекеттік қызметке алғаш қабылданған Әдеп кодексінің мәтінімен және мемлекеттік қызметтегі шектеулермен формальды түрде танысып қана қоймай, оларды толыққанды ұғыну үшін мекеме басшыларына және тәлімгерлерге мемлкеттік қызметке алғаш қабылданған тұлғаларға Әдеп кодексін және шектеулерді егжей-тегжей түсіндіру жұмыстарын жүргізу тапсырылған.– Кейде мемлекеттік қызметшілер жұмыстан тыс уақытта да жұмыс істейді деген ақпарат айтылып жатады. Бұның алдын алу үшін ауданда қандай шаралар қабылданған?– Мемлекеттік қызметшілердің артық жұмыс істеуінің және қызметтік автокөліктерді мақсаттан тыс пайдалану фактілерінің алдын алу мақсатында рейд жұмыстарын жүргізу үшін жұмысшы топ құрылған болатын. Топ мүшелері тұрақты түрде рейд жүргізуде. Сырдария ауданы әкімдігінің мемлекеттік мекемелерінде жұмыс уақыты аяқталғанда компьютерлерді автоматты түрде өшіру бағдарламасы орнатылған. Аудан әкімі аппаратының ғимаратында және аудандық бюджеттен қаржыландырылатын мемлекеттік органдар орналасқан мекемелер үйі ғимараттарында мемлекеттік қызметшілердің жұмысқа кіріп-шығуін бақылайтын СКУД жүйесі жұмыс жасауда.– Сұхбатыңызға рақмет.&nbsp; &nbsp;

Сырдарияда 119 мемлекеттік қызметкер жұмыс істейді

<a href="https://kyzylorda-news.kz/">Kyzylorda-news.kz.</a> Сыр өңірі бағзым заманнан бері балық шаруашылығына өте қолайлы аймақ саналады. Сыр мен Әмударияны жағалай қоныстанған жұрт үшін балық өнімдері таптырмас деликатес, денсаулыққа пайдалы тағам ретінде жоғары бағаланады. Қолдан жасалған геноцидтің кезінде бір жұтым нан таппаған талайқазақтың аш құрсағын тойдырып, екінші дүниежүзілік соғыста жүз мыңдаған сарбазға Арал теңізінің табанындағы жақұт азық болғанын да тарихтан жақсы білеміз. Қазіргі күні өзен тартылып, өзек жұпыны күйге түссе де Қазалыда балық етін кәсіп қылып отырған ірі серіктестіктер баршылық. Олардың экспортқа шығарып жатқан тауарлары жөнінде сан мәрте айтылды. Жақында осы салада толағай табысқа жетіп, миллиондардың қаласы – Алматыда кәсібін өрге домалатып отырған Мейрамбек Пазылбековпен байланысқан едік.&nbsp;– Мейрамбек Жалғасбекұлы, алдымен туып-өскен жеріңіз, балалық шағыңыз туралы сыр шертсеңіз. Балық шаруашылығына қызығушылығыңыз қалай оянды?&nbsp;– 1984 жылдың қазанында Әйтеке би кентінде дүниеге келдім. Мұндағы бақытқа толы бала кездерім сағымдай көрінетіні бар. Неге десеңіз, 5 жасымда ата-анамының жұмыс бабына байланысты Жамбыл облысы, Меркі ауданына қоныс аудардық. Тек 2001 жылы туған жерге оралудың сәті түсті. Бұл ба қызық оқиғамен өрбіді. Меркіде 7 сынып оқып жүргенімде осындағы ағамның үйлену тойына келдім. Не себепті барғаным есімде жоқ, Б.Кеулімжаев атындағы 226 гимназияның ішін аралап, балалардың оқу процесімен таныстым. Маған қатты ұнады. Атамның баласы болғасын: «Ата, мен осы мектепте оқығым келеді», – дедім. Араға 1-2 жыл салып, 10 сыныпты осында оқу үшін қара шаңыраққа келдім.&nbsp;Гимназия қабылдануым да оңай болған жоқ. Құжат тапсыру уақыты өтіп кетіпті. Сол тұстағы директор Күләш Мергенбаеваға өзім кіріп, сапалы білім алып, жақсы маман атанғым келетінін айттым. Апайдың көрегендігі десем жарасар, бір сөзге келмей, мен үшін емтихан ұйымдарып берді. Абырой болғанда сынақтан сүрінбей өтіп, екі жыл керемет білім алдым. Бұл үшін ұстаздарыма айтар алғысым шексіз.&nbsp; Әлгінде атамның баласы екенімді айттым. Ол кісі «Автовазда» жүргізуші болып жұмыс істеді. Бос уақында қармақ арқалап Әмударияны жағалай кететін. Қасынан бір елі қалмаймын. Алғаш рет қармағым майланғаны да есте. Бөлмемде 200 шабаққа арналған аквариум болды. Сол кездің өзінде балық өсіріп, ауыл балаларына сататын едім. Мектепте де биология пәнін таңдап, Алматы қаласындағы аграрлық университетке Өнеркәсіптік балық аулау және балық шаруашлығы мамандығы бойынша грант негізінді білімімді шыңдадым. Екі жылдан кейін Әл-Фараби атындағы қазақ ұлттық университетіне ауыстым. Бұдан кейін Алматы облысындағы көлдерді зерттеу бойынша ғылыми қызметкер болып тәжірибе жинадым. Алайда елдегі ғалымдардың жағдай мәз емес екені көзім жетті. Осылайша елдің патриот азаматы ретінде халыққа қызмет ету үшін кәсіпкерлік бағытын таңдадым. Қазіргі күні Қазақстандағы ең ірі компанияның бірі «Halyq Balyq»-тың бас директорының орынбасары, бас технолог болып қызмет атқарып жатырмын.&nbsp;– Қазақстан бойынша бренд қалыптастыруға не нәрсе жігер берді? Мемлекет қолдауын сезіндіңіз бе?&nbsp;– Кеңес үкіметі кезіндегі Қазақстанның да, қазіргі тәуелсіз еліміздің де балық шаруашылығындағы әлеуеті өте зор. Бірақ мамандар мен тәжірибенің жетіспеуіне байланысты тоқырау болып жатқаны рас. Өзім осы саладағы ғалым ретінде халықтың балығынан серпіліс жасағым келді. Осы сәтте компания өсіріп отырған шабақтар жақын шетелдерге экспортталып жатыр. Көп ұзамай Еуропа мен Грузияға тауар жіберуді ойлап отырмыз. Мұндайда Қазақстанның есімі алдымен аталатынын білесіздер. Бренд қалыптастырып, бүкіл әлем сұраныс салатындай бренд қалыптастыруды мақсат еттік. Соған ақырындап жылжып келеміз.&nbsp;Ал мемлекеттен субсидия немесе жеңілдетілген несие сияқты көмек алып көрген жоқпыз. Ақырындап бір тиынды екеу қылып, адал еңбекпен дамып келе жатқан жайымыз бар.&nbsp;– Енді ғылыми тұрғыда пікіріңізді тыңдайық. Қандай балық немесе шабақ сұранысқа ие? Оның денсаулыққа пайдасы шынымен көл-көсір ме?&nbsp;– Балықтың өмір сүрген ортасы, тазалығы, аурудан амандығы туралы бас қатыру керек. Әйтпесе, кез келген балықтың адам денсаулығына пайдасы мол. Балғын ет адамның қартаюын тежеп, өмір жасының ұзаруына сеп болады. Сонымен бірге мидың, жасқа сәйкес көз жанарының жетік жұмыс істеуіне тигізер үлесі аз емес. Бұған қарапайым әрі бұлтартпас дәлел келтіруге болады. Әлемдегі балық өнімін көп тұтынатын ел Жапония екенін білесіздер. Өмір сүру ұзақтығы жөнінен де солай. Ол ағзаға сіңімді, жеңіл және керекті дәрумендерге бай болғандықтан балықты жиі тұтынатын адамды 80-90 жасында сергек сезіндіреді.&nbsp;Мына бір жайтқа мән беру керек. Қазақстандағы әрбір азамат орташа есеппен 3 килограмм балық етін тұтынады. Ал халықаралық денсаулық сақтау ұйымының берген ұсынысына сәйкес, әрбір азамат 12 айда 18 килограмм балық өнімін тұтынуы керек. Ал жапондар аталған көрсеткіштен 4 есе көп теңіз маржанын тұтынады. Тағы бір айта кететін мәселе, Каспий су айдынын қоспағанның өзінде елімізде 5 миллон гектар су айдыны бар. Солай бола тұра балық шаруашылығымен сауатты айналысатын азаматтар кемде кем. Бұл тұрғындардың жеткілікті деңгейде балық тұтынбауына себеп болып отыр десек қателеспейміз.&nbsp;Ал сұранысқа келер болсақ, қазақстандықтар сазанды көп тұтынады. Бұдан бөлек таулы, қырлы жердің тұрғындары қолдан өсірілген фарельді жегенді жақсы көреді. Ал экспорттағы сұраныстың көшін көксерке бастайды. Қазалыда мұны тісті деп атайды. Еуропада қазақтың валютасы ретінде жақсы бағаланады.&nbsp;– Тұтынушылардың көп бөлігі Қазақстанның қай өңірінен сұрау салдырады? Жасырын болмаса бұдан түсетін пайда көлемі жайында тарқатып берсеңіз.&nbsp;– Әлеуметтік желіде жеке парақшаларым бар. Әсіресе, Facebook-те балық шаруашылығына, шабақ өсіруге байланысты тегін кеңес беремін. Ғылыми тұрғыда балық баптаудың дәлелдерімен бөлісіп тұрамын. Бұдан қалтам толған дәнеңесі жоқ. Маған керегі сол кеңестер арқылы бір қазақ кәсібін дөңгелетіп әкетсе, халықты сапалы өніммен қамтамасыз етсе, бір мақсатыма қол жеткізгенім деп есептеймін.&nbsp;Келер жылы, амандық болса, «Halyq Balyq» академиясын ашуды жоспарлап отырмын. Онда он бес жылдық тәжірибемде көрген-білгенімді, Чехия елінен алған білімімді, көп маман кездесе бермейтін, шешімін білмейтін мәселелерді оқытатын боламын.&nbsp;– Қазалыдағы балық шаруашылығы жайынан хабарыңыз бар ма? Сала бойынша аудан келешегін қалай бағалайсыз?&nbsp;– Егін шаруашылығы гүлденген жерде су да балық та мол болады. Көлдер көптеп саналады. Бұл жағынан Қазалының бағы бар. Кезінде Басықарада тоған шаруашылығы болды. Ол құрдымға кетті. Ал сала бойынша 10 балдық шкаладан 1 балл берер едім. Шаруашылық жағы дамымаған. Мұны жан-жақты қолдаудың жоғтығынан көрер едім. Бір азаматтар көл алып, шабақ салса, екінші бір мықтылар соған көз алартатын жағдайлар да ел ішінде аз емес. Содан да болар осы іске іскерлер инвистиция құйғысы келмейді. Ал егер осы мәселе бойынша ірі кәсіпкерлер бас қосып, шаруашылықты дамытуға ден қояр болса маман ретінде туған елдегі жүктің бір бұрышын көтерісуге әрқашан дайынмын.&nbsp;– Қазіргі күні балық баптап, тірлік жасағасы келетін жастар көптеп кездеседі. Оларға қандай кеңес берер едіңіз?&nbsp;– «Кәсіп бастайтының туралы ешкімге айтпа» деп кеңес беретіндерге таңғаламын. Неге десеңіз, білімсіз, тәжірибесіз бастаған істің шикілігі көп болады. Сол үшін сала бойынша үлкен компаниялар мен тұлғалардың ақыл кеңесіне жүгінген абзал. Балық шаруашылығы қомақты қаржыны талап ететіндіктен шығынға бату қауіпі де жоқ емес. Үйін тігіп, несие алған, оны суға сіңіріп жіберген таныстарым көп. Ал тәжірибе жинақтап, білімді жетілгендердің қалтасы қалыңдайтыны түсінікті.&nbsp;Бір ғана мысал айтайын, Қазалыда сапалы сазан сатылмайды. Елге барғанда әдейі базар аралап, көріп қайтамын. Уылдырық шашпаған, қара сазандардан көз сүрінеді. Сұраныстағы балық болғасын алып келетін шығар. Бірақ бұлай сазанның санының өсуіне мұрша берілмей жатыр. Әйтпесе, балықтың бағасы Алматыға қарағанда Қазалыда біршама қымбат. Ебін тауып, еңбек етер жан болса пайдаға кенелері сөзсіз. Әрі баяғы бренд Сырдың сазанын қайта тірілтер еді.&nbsp;– Бала кездегі арманыңызбен бөлісе кетсеңіз...&nbsp;– Бұл сұрақ төңірегінде көсіле шабуға болады. Соңғы екі жыл ішінде мемлекеттік қаулы шығару үшін көп жүгірдім. Қаншама қаражат жұмсадым. Бұл еңбек Арал-Сырдария су алабындағы Арал бекіресін қолдан өсіруді көздеген еді. Қызыл кітапқа енген балықты көбейтуге Үкімет басшысынан рұқсат алып, өсіріп жатырмыз. Біреу білсе, біреу білмес Арал бекіресі бұдан 55 жыл бұрын жойылып кеткен. Мемлекет қорғауына алған балықты бренд қылу – менің көп жылғы арманым, алдағы күндерге ұмтылдыратын үмітім. Құдай бұйырса, санын көбейтіп, Арал мен Сырдарияға саламын. Балықсүйер қауымның, ағайын-туыстың дарияға салған қармағынан бекіре шығып тұрғандағы таңғалысын, ризашылық сезімін көру бақытын аңсаймын.&nbsp;– Уақыт бөліп, әңгіме өрбіткеніңіз үшін ризашылық білдіреміз!

Мейрамбек Жалғасбекұлы: Арал бекіресін тірілтуді армандаймын

<a href="https://kyzylorda-news.kz/">Kyzylorda-news.kz.</a> Маусым айының әр үшінші жексенбісі – медицина саласының қызметкерлері күні екені мәлім. Жыл сайын өз деңгейінде тойланатын бұл айтулы дата шиелілік ақ халаттылар үшін де мереке. Өйткені бұл күн – жан саулығын қорғай білетін дәрігер еңбеңінің еленетін күні. Иә, дәрігерлік – аса жауапты, әрі қиын мамандық. Сондықтан да бұл іске екінің бірінің ебі келе бермейді. Майталман маман болу үшін – темірдей төзім мен мықтылық керек. Өкінішке қарай, біздің арамызда темірдей төзімді тал бойына тұрақ етіп, тіпті салқын қандылықты жанына серік еткен ақ халаттылар көп-ақ. Аладайда «Дәрігер – сөзбен емдейді» деген тәмсілді негізге алар болсақ, ақ халатты абзал жандарға ең әуелі мейірбандық пен қарапайымдылықтың, дертке жылы сөз арқылы дауа таба білудің аса қажет екенін ұғынған болар едік. Арамызда да науқасты бірінші дәрі-дәрмек арқылы емес, жылы сөзімен емдей білетіндер баршылық. Солардың бірі – еңбекшілік Ернұр Өмірзақ.Дәрігерлік сала – тек іспен ғана емес, сөзбен де терең тамырлас. Жоғарыда айтқанымыздай, «Дәрігер – жартылай сөзбен емдесе, жартылай іспен емдейтіні» &nbsp;даусыз. Ал көне Иран даналығында «Дәрігердің үш қаруы бар: сөз, шөп және пышақ» деп айтылады. Мұндағы сөздің бірінші орынға қойылуы жай емес. Демек, «дәрігердің науқас психикасына, оның ойына, көңіл күйіне, ерік-жігеріне ықпал етуі – ең басты қаруы» екені анық. Қай кезеңде де ақ халаттылар бұл қағидатты санаға сақтап, науқастармен тиісті дәрежеде сөйлесіп, қарым-қатынас құра білген. Бірақ қазір бәрін олай деп айта алмаймыз. Көптеген науқастардың өзі медицина қызметкерлерінің салыңқы қабағы мен тұнжыр, немқұрайлы көзқарасынан дертіне дерт қосып, көңілі жараланып жататынын айтады. Ал біз Ернұр Жандарбекұлын көргенде мейірім иесінің нақ өзі екенін аңғарамыз. Еңбекші ауылының тұрғындары да Ернұрды өз саласының нағыз маманы екенін айтады. Тіпті, ол елден алғыс алып қана қоймай, мейірімді жүзімен кез келген науқасты аурудан айықтыратын көрінеді. Ендеше, біз де жүрегінде жылулығы, көзінде нұры бар өз мамандығын өзідей сүйетін Ернұрды мақаламызға арқау етпекпіз.Ернұр Өмірзақ – Еңбекші ауылының епті азаматы. Олай деуімізге себеп көп. 2002 жылы дүние дидарына келген ол бала күнінен ақ халатты абзал жан болуды арман еткен. Мектепте оқып жүрген күннің өзінде оның медицина саласына деген махаббаты оянып, 9 сыныпты тәмамдаған соң 2018 жылы Түркістан жоғары медицина колледжіне «Емдеу ісі» мамандығына оқуға түседі. Аталған оқу орнында жүріп ол мақтаулы жанға айналып үлгереді. 2022 жылы төрт жылдық оқуын аяқтаған Ернұр туған жеріне келіп еңбек етуді мақсат тұтқан.&nbsp;Мақсатына бір қадам табан тіреген ол 2023 жылдың ақпан айынан бастап «Жастар тәжірибесі» арқылы Еңбекші ауылына жұмысқа орналасады. Өз саласына білек сыбана кіріскен жігіт сол уақыттан бері ауыл халқының саулығы үшін қалтқысыз қызмет етіп келеді. Алты ай уақыт бойы абыройлы қызмет етіп, «Жастар тәжірибесінен» өткен жас маман жуырда ғана сол ауылдағы медицина орталығына штаттық негізде тұрақты жұмысқа орналасқан.&nbsp;Қазіргі таңда Ернұр Жандарбекұлы аймақтық мейіргер қызметін ойдағыдай атқаруда. Және өзіне берілген тапсырмаларға жауапкершілікпен қарап, көше тұрғындарының саулығын бақылап, қан-қысымын өлшеп тұрады. Ауыл халқы да Ернұрдың атқарған жұмысына, тынымды тірлігіне дән риза. Ендеше, біз де оның алдағы жоспарлары мен жұмыстарына сәттілік тілейміз!

Еңбекшілік дәрігер өз ісінің маманы

<a href="https://kyzylorda-news.kz/">Kyzylorda-news.kz.</a>&nbsp; Астанада Қазақстанның барлық 166 өңірінен 824 дарынды оқушының жинайтын IQanat республикалық олимпиадасының финалының ашылуы өтеді. Бұл олимпиада алтыншы жыл қатарынан өткізіліп, осы жылдар ішінде 160 мыңнан астам ауыл оқушысын қамтыды.2022-2023 оқу жылының олимпиадасы 8-сынып ауыл оқушылары арасында 3 кезеңде өткізілді. 2022 жылғы 31 қазан мен 17 қараша аралығындағы 1-кезеңге еліміздің ауыл мектептерінен 37 692 оқушы, 17-22 наурыз аралығында өткен 2-кезеңге 7,7 мыңнан астам бала қатысты.3-кезеңнің ашылуы 2023 жылғы 18 маусым мен 22 маусым аралығында IQanat олимпиадасы финалистерінің республикалық слетінің аясында өткізілді. Бұл күндері балалар соңғы іріктеуден өтеді. Логикаға, математикалық және кеңістіктік ойлауға, сыни тұрғыдан ойлауға, ағылшын тілін қабілеттерін тексеруге арналған тесттер құрастырылған. Сондай-ақ, балалар 6 пәннің ішінен таңдау үшін бір пәнді таңдай алады: биология, химия, физика, география, математика, тарих. Осылайша, жеңімпаз атану мүмкіндігі мектепте жақсы баға алғандарға ғана емес, барлығына беріледі.Іріктеуден басқа, балалар білім беру модульдері мен жеке тұлғалық даму жайында тренингтерінен &nbsp;өтеді. Қазақстандық кәсіпкерлер, қоғам қайраткерлері, саяси элита өкілдері мотивациялық сөз сөйлеп, ынталандырады. Бұл кездесулердің негізгі хабары - шекаралар тек санада және қол жетпейтін мақсаттар жоқ, бастысы-оларға жүйелі түрде қол жеткізуді үйрену.IQanat – бұл ауыл оқушыларын қолдауға және сапалы білім алуға мүмкіндік беруге бағытталған қазақстандық кәсіпкерлердің әлеуметтік және білім беру жобасы.<blockquote>«Сіздердің әрқайсысыңыз қазірдің өзінде жеңімпазсыз, сіз Астанада өз мектебіңіздің, ауылыңыздың, отбасыңыздың атынан шықтыңыз. Келгеннен кейін достарыңыз бен туыстарыңызға жақсы болуға тырысудың қаншалықты маңызды екенін жеткізе алатыныңызға сенімдіміз. білім алып, өз-өзіне сену керек, осылайша кішкентай Отаныңа көмектесуді бастау керек.Сізге сәттілік және үлкен де мейірімді IQanat отбасына қош келдіңіз!», - деді жобаның сенімді өкілі Нұрасыл Жарбасов</blockquote>«Қордың қамқоршылары ауыл балаларына үлгі. Әрқайсысының өз тарихы бар, түрлі өмірлік кедергілерге тап болғанымен, ауылды, ауданды, облысты қолдап, қала балаларымен тең дәрежеде мүмкіндік бергісі келетіні көп нәрсеге тұрарлық. Бұл дұрыс үлгі, кәсіпкерлер бірігіп, шағын Отанына қолдау көрсетсе, балаға да осындай тәрбие береміз. Ең бастысы, барлық жұмыс пен қолдау жүйелі және тұрақты түрде құрылады», - дейді IQanat қорының атқарушы директоры Әлия Саликова.<figure class="image"><img src="https://knadmin.beoblood.kz/uploads/aec70258_d352_4368_9622_7b64fa32842d_d10a8f081c.jpg" alt="aec70258-d352-4368-9622-7b64fa32842d.jpg"></figure> &nbsp;

Ауылдан-Арманға: Астана қаласында 800-ден астам дарынды ауыл оқушылары бас қосты

Мұхтар Ниязов: Мақсатым - әр адамның бас жағында жататын дұрыс дүние қалдыру

<a href="https://kyzylorda-news.kz/">Kyzylorda-news.kz.</a>&nbsp; Астана күні қазақстандықтар бес күндік жұмыс аптасы үшін 6, 7, 8 және 9 шілдеде демалады. Демалыс күні 1 шілдедегі сенбіден 7 шілдеге, яғни жұмаға ауыстырылды, ал 1 шілде жұмыс күні болады.Осылайша қазақстандықтар 6-9 шілде аралығында 4 күн, жалпы шілде айында аптасына 5 күн жұмыс істейтіндер 11 күн демалады.

Қазақстандықтар Астана күнінде төрт күн демалады

<a href="https://kyzylorda-news.kz/">Kyzylorda-news.kz.</a> Исі қазақтың ұлттық ойындарының бірі – асық ойыны. Бұл ойын бұрындары әр қазақтың баласы мен жасының бас қосуының негізінде асық көптеп ойналатын болған. Себебі оның баланың тәні мен жанына пайдасы мол. Баланың ой-қабілетін, дәлдікке, қырағылыққа, ширақтық пен ұстамдылыққа шыңдайды. Бүгінде ұлттық ойынды балалар смартфондағы атыс-шабыс, ала шапқын өштесу ойындарына айырбастап тұрғаны қоғамның білек сыбана күресетін дертінің бірі болып отыр. Дегенмен бұл дертпен күресіте орасан зор үлесін қосып, ұлттық ойынды ұлықтап жүрген азаматтар аз емес. Солардың бірі – 170 мектептің дене шынықтыру пәнінің мұғалімі, қазақылықты қанына сіңірген Жарас Әбілқасымұлы.&nbsp;Соңғы уақытта асық ойыны мемлекеттің қолдауына ие болып, өзінің мәртебесін ала бастады. Тіпті асық ойынының федерациясы құрылып, оған белгілі дәреже де түбегейлі зерттеліп, зерделенген ойын ережелері де бекітілді. Сондай-ақ елімізде асық атудан жарыстар, ел біріншіліктері өтіп тұрады.&nbsp;Оған 170 мектеп оқушылары ұлттық спортты ұлықтап келе жатқан ұстаз Жарас Жарекеновтің күрделі дайындығынан өтіп, жыл сайын бағы менен дәлдігін сынап келеді.&nbsp;Бала күнінен бұл ойынды жаны сүйген Жарас 2018 жылы аталған мектепте арнайы үйірме ашып, оқушылар жинай бастаған. Сөйтіп, бір жыл тыңғылықты дайындық өз жемісін беріп, 2019 жылы аудандық спартакиададан оқушылар жүлделі бірінші орынды иеленіп, тікелей облысқа жолдама алған. Нәтижесінде, үйірме қатысушылары облыста да көш бастап, ауданның қоржынын толытырп қайттқан екен.&nbsp; Мергендер мұнымен тоқтамай, бірнеше мәрте Ұлттық мектеп лигасында жоғары орындардан көрінген.&nbsp;Бүгінде Жарас білім ошағындағы 5-6 мен 7-8 және 9-10-11 сынып оқушыларынан үш команда жасақтап, талмай-тұрмай екі мезгіл дайындықпен жаңа белестерді бағындыруға жұмыс жасап жатыр.&nbsp;<blockquote>«Ерте де ата-бабаларымыз асық ойынын балаларына жас кезінен бастап үйрете бастаған. Тіпті сәби дүниеге келмей жатқанда, жас нәрестенің ойнайтын асықтарын жинаған. Асық ойындары тек қана қазақ халқына ғана таныс ойын түрі емес. Бұл ойынды Орта Азия халықтары, оның ішінде өзбек, қырғыз, тәжік ұлттары да әлі күнге дейін ойнап келеді. Асық ойындарының тәрбиелік мәні зор. Бұл ата-бабадан қалған асыл мұра. Оның ұмыт қалғанын қаламаймын. Сол себепті ұлттық ойынның осы түрін қолға алуды жөн көрдім. Бұйырса басқа да ләңгі, бес асық сынды ойындарды да үйірме сабақтарына қосып, мүмкіндік болса спорттың сол түрлерінен де белестерді бағындырамыз деген мақсатымыз бар», – дейді Жарас Әбілқасымұлы.&nbsp;</blockquote>Уақыт өткен сайын ұлттық ойындарының үйірмесінің қадамы қарыштап келеді. Қазіргі таңда мұнда қызығушылық танытып, сайыстардан жүлделі оралып жүрген жиырма оқушы бар. Жарас жеткен жетістіктерге қарап тек пай-пайламасқа амал жоқ.&nbsp;Себебі ол ұлтын сүйген ұлтшыл ұрпақты даярлаумен қатар оларды ұлттық құндылықтарды құрметтеуге үйретуде. Біздің мақсат та осыны түсіндіру еді.&nbsp;Әрбіріміз кейінгі ұрпаққа ұлттық ойын үйретіп, ойнап өсуіне ықпал етуіміз қажет. Сондай ұрпақтан елін, жерін, отанын сүйетін, халқына адал ұлттық құндылықтарды қастерлейтін азамат шығары сөзсіз.

Ұлттық ойынды ұлықтаған ұстаз

<a href="https://kyzylorda-news.kz/">Kyzylorda-news.kz.</a> Қазалы аудан әкімі Мұхтар Оразбаев аудан орталығы - Әйтеке би кенті мен Қазалы қаласындағы жолдардың құрылысын көрді.&nbsp;Аудан басшысы ең әуелі В.Счастнов көшесінде жүріп жатқан жолдың жайымен танысты. Құрылысқа жауапты мердігер мекеме - «Строймодуль Астана» ЖШС мамандарымен кездесіп, басты мәселе сапада екенін еске салды. Яғни, жолдың сапасына басымдық беріп, уақытында аяқтауды жеткізді.Мұнан соң Мұхтар Әуесұлы Қазалы қаласы мен Әйтеке би кенті аралығындағы төрт жолақты жолға ат басын бұрды. Мердігер мекеме басшысын құрылыс басына шақырып, жолдың сапалы болуын, мерзімінде тапсырылуын қатаң ескертті. Сонымен қатар, құрылыс аудан әкімінің тікелей бақылауында болатынын ескертіп, жұмыстарды жеделдетуді тапсырды.&nbsp;Қазіргі таңда аяқ судың тапшылығына байланысты Қазалы қаласындағы Әйтеке би көшесіне “Дәулет арық” каналынан су тарту үшін арық қазу жұмыстары жүріп жатыр. Аудан басшысы аталған көшеге аялдап, құрылыстың жай-күйін көрді.Айта кетейік, бүгінде Қазалы қаласындағы Бөлекбаев көшесінде жол құрылысы жұмыстары жүріп жатыр. Мұнда аудан әкімі мердігер мекеме - “Қыран” ЖШС мамандарына жолдың сапалы болуына қатты мән беру қажеттігін айтты.

Қазалыда жол сапасы қатаң қадағаланады

<a href="https://kyzylorda-news.kz/">Kyzylorda-news.kz.</a> 1931-1933 жылдардағы қолдан ұйымдастырған жаппай қырғында Украина мен Қазақстанның көп жапа шеккені тарихтан белгілі. Сол зұлматқа толы жылдардан кейінгі халықтың жағдайы тез оңалмады. Араға уақыт салып, фашистер соғыс ашты. Сондай уақытта ел-жұрт болып, майдандағы жауынгерлерді қолдау мақсатында ауыл-аймақтағылар тылға азық-түлік, киім-кешек, басқа да қажетті дүниелер жіберіп тұрды.Солардың қатарында Сақыпжамал Қожақ та бар. Сол кезде бұғанасы қатаймаған, тұлымшағы желбіреген қыз тылда тер төкті. Сақыпжамал Төлешқызы 1933 жылдың желтоқсанында дүниеге келген. Қазір тоқсанды алқымдаған кейуана республикалық, облыстық және аудандық басылымдарды үзбей оқиды. Көкірегі ояу, көзі ашық әжей кез келген тақырыпта әңгіме өрбітеді. Әкесі ашаршылық тыйылған кезде жарыққа шыққан сәбиін Тоқшылық деп атапты. Кейін арнайы молда алдыртып, кітап ашқызған деседі. Кітап ашқан дін өкілі жаңа туған нәрестеге Сақыпжамал есімін қояды.<blockquote>«Бала кезімде үлкендердің айтқан әңгімесінен есімде қалғандары – жарты, кейде бір уыс арпа-бидай қолдарына түссе, ашаршылық кездері соны егіп күнелтеді екен. Құдайдың қарасқаны болар ексе, жайқалып жеміс берген. Ауыл болып жиналған дәннің бір бөлігін келесі жылға қалдыратын көрінеді. Осылайша, қиын-қыстау шақтан бірлесе аман-есен шығыпты. Әкем атқа мініп, ел аралап жүретін сопы болған. Халыққа кеңесін айтып, сый-құрметке бөленген. Дегенмен, сұрапыл соғыс басталып, ол майданға аттанады. Сол кеткеннен одан хабар-ошар алмадық, елге оралмады. Біз 6 ағайынды ата-әжеміздің қарауында болдық», – деп ағынан жарылды кейуана.</blockquote>Оның айтуынша, ерте жастан ата-әжесі балаларды еңбекке баулыған. Ол 5 жасында ұршық иіріп, тоқу өнерін меңгерген. Кейін соғыс басталған кезде егістікке үлкендермен шығып, масақ терген. Ал, өте кішілерін бір қараша үйге жиып, басқалары бір-біріне бас-көз болып бағады-мыс.<blockquote>«Қайсібірін айтайын бала болып, жөнді асыр салып ойнамадық. Ерте есейдік. Оның есесіне еңбекпен шыңдалдық. Қырман сыпырдық. Қыз болып та серуен құрмадық. Мектепке де кеш бардым. Бірақ алғыр болдық. Кітапты іздеп жүріп, жастана оқитынбыз. Өз басым дәрігер болуды, кіршіксіз ақ халатты киіп, науқастарға ем-дом жүргізуді аңсайтынмын. Содан Медициналық институтқа оқуға түстім. Сол кезде Ақмолаға целинаға апарды. Молотилкаға бидай аттық. Тұрмыс құрып, 13 перзентті дүниеге әкелдім. Солардан қазір үш ұл, бес қыз бар», – деп өткен күндерді еске алды Сақыпжамал Төлешқызы.</blockquote>Есін білгеннен еңбектен қол үзбеген әжей қазір 36 немере мен 60-тан аса шөбересін сүйіп отыр. Бүкіл өмірін бірінен соң бірі дүниеге келген балаларына арнап, армандаған оқу орнын бітіре алмаған. Кейін олар аяқтанғаннан кейін есепші мамандығын техникумда оқыған. Дей тұрғанмен, ол жұмысты алып жүру оңайға түспеген соң, сылақ сылап, үй салу ісіне бет бұрады. Себебі, жұбайы Ахмет Қожақов білікті зоотехник болған.Өмірі үлгіге толы кейуанадан ұзақ жасаудың сырын сұрағанымызда ол кезде құнарлы ас ішіп, таң атқаннан кеш батқанға дейін қара жұмысқа араласатындығын меңзеді. Ештеңеден үрейленбей, тайсалмай кез келген істі еңсеретінін жеткізді. Бірнеше ауылға отағасының жұмыс бабына орай көшіп-қонғандығын да тілге тиек етті. Ал, бұның барлығы әйел адамның мойнына артылатын жүк екенін алға тартты. Тар баспанада тұрған кездерінде де, кең үйде болғанда да шаңырақтарынан қонақ үзілмей, дастарқан жайған. Министр де күткен батыр ананың ұзақ жасауының сыры осында болса керек.

Қазақстан және Қызылорда облысының жаңалықтары