<a href="https://kyzylorda-news.kz/">Kyzylorda-news.kz</a>&nbsp; &nbsp;Бүгінде гипспен жұмыс жасау дамып келе жатқан қолөнер түрі саналады. Халық сұранысына байланысты кәсіптің көзін тапқандар жеткілікті. Кез келген жаста кәсіп бастауға ешкім шектеу қойған жоқ. «Кәсіп нан сұрамайды, ол өзі тамақтандырады» деген, нағилық Аянат Қуанышқызы гипстен түрлі кәде-сый, заманауи үлгідегі тойтабақ, түрлі қобдиша, қыз-келіншектерге арналған жиынтық жасауды табыс көзіне айналдыра білген.Аянат – Нағи Ілиясов ауылындағы ғасырлық тарихы бар білім ордасы №132 Түймебай Айтбаев атындағы орта мектептің 10 сынып оқушысы. Мектебінің мақтанышы білім алумен қатар қолөнермен айналысатын ең жас кәсіпкер десек те болады.– Бала күнімнен анам қолөнер жасауға үйретті. Анам да негізгі жұмысынан бөлек қолөнермен айналысады екен. Қолөнерге деген қызығушылығымды кәсіпке айналдыруды жөн көрдім. Содан соң ғаламтордан гипстен түрлі бұйым жасау жолын үйреніп, өз бетімше жасай бастадым. Бүгінде жеке парақшаға дайын өнімдерді салу арқылы тапсырыс қабылдап отырмын. Ең алғашқы тапсырысым 50 дана қобдиша болған еді. Кәсіпті бастағаныма алты ай болса да ауыл тұрғындарынан басқа аудан, еліміздің әр аймағынан да тапсырыс беретіндер көп. Көбіне той жасайтын кісілер заманауи үлгідегі тойтабақтарға тапсырыс жасап жатады. Ең көп жасаған тапсырысым – 250 дана қобдиша. Айналысып жатқан қолөнер кәсібі төзімділікті, сабырлықты, әсемдікті қажет етеді. Тапсырыс берген әрбір адамның талғамына сай дүние жасау үлкен жауапкершілік. Сондықтан әр кезде ізденіс үстінде жүремін. Мен ең бірінші оқушы екенімді, білім алу керек екендігін естен шығарған емеспін. Болашақта дәрігер болғым келеді. Және де бастаған кәсібімді одан әрі қарай дамытамын деген ойдамын, – дейді жас кәсіпкер.Өз ісінің шебері Аянат Қуаныш­қызы түрлі қолөнер байқауларына қатысып, өзі жасаған жұмыстарын насихаттап жүр. Атап айтқанда, «Мамандықтар әлемін ашамыз» республикалық форумының аудандық кезеңінде «Менің кәсібім – менің бизнесім» номинациясы бойынша ІІ орын, «Дәстүр TREND» атты аспаздар мен қолөнершілер сайы­сында ІІІ орын, «Табиғатты аяла» жас өлкетанушылар, экологтар мен табиғат зерттеушілерінің респуб­ликалық форумының аудандық кезеңін­де «Үздік арт-нысан» номинациясы бойынша гипстен, смоладан жасалған бұйымдарды таныстырып І орын, облыстан ІІІ орын иеленді.Жасап жатқан кәсібіңе отбасының қолдауы аса қажет. Аянаттың кәсібіне қолдау білдіріп, демеу болып отырған – әкесі Қуаныш Смайлов пен анасы Алуа Мәлібекова. Тапсырыстарды уақы­тылы орындауға бауырлары да көмек көрсетеді.

Жас кәсіпкер гипстен қобдиша жасаумен айнылысады

<a href="https://kyzylorda-news.kz/">Kyzylorda-news.kz</a>&nbsp; Ауа райының жылынуымен қатар қыз-келіншектер кілем жууға асығатыны мәлім. Күннің шуақты күндерін қалт жібермеуге тырысатын келіншектер үшін бұл – жауапты жұмыстың бірі саналады. Тазалықты жаны қалайтындар көктемнің жылымық мезгілінен бастап қара күзге дейін бел жазбай кілем жуып, әбігерге түссе, енді бұл қызметті арнайы орталықтар атқартын болады. Анығын айтқанда, Тереңөзек кентінен жерлесіміз Бағдат Болатұлы клинингтік қызметін ашқанын бірі білсе, бірі білмес. Негізінен 2019 жылдан бері аудан халқына қалтқысыз қызмет көрсетіп келетін орталық жұмысы жыл сайын кеңейіп, қызмет аясы да өсіп келеді екен.Еңбеккеш азамат бұл кәсіп түрін елде пандемия болған уақытта бастауға бел буған екен. Мемлекеттен кәсіпкерлікті қолдауға арналған 500 мың грант қаражатына ие болып, кәсібін бастауға мүмкіндік алыпты. Ауданда бұрын мұндай орталық болмағандықтан сапалы қызмет көрсету үшін еңбекпен тапқан қаржысын да қосып, түрлі құрал-жабдық алуға қол жеткізген екен.– Кілем жуу кәсібін біреше жыл бұрын бастадым. Бұл салаға келмес бұрын мал шаруашылығымен айналысқан едім. Бірақ тұрғындардың сұранысына сай осы кәсіпті бастап, одан әрі кеңейтуге тырысып келемін. Бұрын тұрғындар қалаға барып, осындай орталық қызметіне жүгінсе, енді алысқа бармай-ақ біздің қызметімізді пайдаланатын болды. Арнайы орынды үйіміздің жанынан салып алған цехта жылдың барлық мезгілінде атқара береміз, – дейді жеке кәсіпкер Бағдат Иттугулов.Қазір кәсібін толық іске қосып, қажетті құрылғының барлығын жасақтап алған кәсіпкер «Байқоңыр» Әлеуметтік кәсіпкерлік корпорациясы арқылы өткен жылы 2,5 пайызбен бизнесті дамытуға 3 млн теңге несиеге қол жеткізген еді Бұл қаржыға кілем жуу орталығын түрік технологиясымен жабдықтаған еді. Ең қажетті деген роторлық жуу құралы және кілемді сығатын, кептіретін центрифуга сатып алып, қызметінің сапасын одан сайын арттырды. Әрбір тұтынушының қажеттілігін қанағаттандыру мақсатында ізденіп, жұмсақ жиһаздарды химиялық тазалау қызметін де жүзеге асырды. Бұл қызметпен жұбайы Жазира айналысады. Кілемнің түсін, сапасын сақтау үшін кілем жуу процесінде тек қана сапалы кір жуатын ұнтақ пен сусабындар, парфюмдер пайдаланады. Ондай заттарды арнайы тапсырыспен сатып алады. Кәсіпкердің тапсырыс көлемі ұлғайғандықтан, қосымша бір адамды жұмысқа тартқан. Күніне 15-20 кілемді жууға қабілетті орталық жұмысы аптаның 7 күнінде де жұмыс жасайды. Тапсырыс берушілерге ыңғайлы болу үшін алып кету, жеткізу қызметі тегін қарастырылған.– Кілемнің барлық түрін жуамыз. 1-2 күнде дайын болады. Химиялық тазалау қызметін де ұсынамыз. Жұмсақ жиһаз, диван, матрас, плед, көрпе, көрпеше тазалаймыз. Кент бойынша алып кету, жеткізу қарастырылған. Жұмыс процесіне келер болсақ, көріп тұрғандарыңыздай цех заманауи аппараттармен жабдықталған. Кілемді алдымен шаңын қағып, сонан соң жуамыз. Арнайы сусабындарды, парфюм, дақ кетіргіш ұнтақтарды қолданамыз. Түрік технологиясы кілемді сапалы етіп жуады. Тарақпен тарап, кілемді жап-жаңа етіп шығарамыз. Дайын болған кілемді арнайы целлофан қаптамамен жеткізіп береміз, – дейді кәсіпкер Бағдат Болатұлы.Ал екі қолына бір жұмыс таба алмай отырғандар жайында жас кәсіпкер «Қазір мемлекет тарапынан бизнес бастауға берілетін көмекті тиімді пайдалану қажет екенін айтады. Әсіресе, жастар, әлеуметтік осал топ өкілдері қайтарымсыз грантқа қол жеткізіп, азын-аулақ мал алып, күн көруге болады» дейді. Бүгінде жас кәсіпкер өзінің адал еңбегінің арқасында табыс тауып, халыққа қызмет көрсетіп отырғаны көпке үлгі. Ең бастысы қызметінің сапасына аса мән беретін ерлі-зайыптылар осы күні бұл салада тәжірибесі толығып, әбден машықтанған. Отбасылық бизнес иелері үшін бастысы – тұрғындардың сенімі мен алғысы. Сондықтан тұрғындарға қалтқысыз қызмет көрсетіп отырған клинингтік орталық қызметіне деген сұраныс көп екенін жақсы білеміз.

Сырдариялық кәсіпкер клинингтік орталық ашқан

<a href="https://kyzylorda-news.kz/">Kyzylorda-news.kz</a> Өткен ғасырдың 80-жылдарынан бастап Арал аймағы «Экологиялық апат аймағына» айналған болатын. Аз уақыттың ішінде жер бетінен аумағы 6 млн гектарға созылған, тереңдігі 69 метр теңіз жоғалып кеткені мәлім. Адамзаттың табиғатсыз күні жоқ екені анық, десек те сол табиғатты тоздырып, зардап келтіретін де – адам екені даусыз.Атап айтар болсақ, су ресурстарын дұрыс пайдаланбау, экологияның өзгеруі сынды себеп-салдардан теңіз суы тартыла бастаған еді. Аз уақыттың ішінде бір өңірдің асаудай тулаған теңізі суалып, табаны қаңсып қалғаны өкінішті. Әлемнің әр түкпірінде тіршілік нәріне қатысты экологиялық проблема көп. Соның бірі көлемі жағынан әлемде төртінші орында болған Аралдың қа­зір­гі күйі тым мүшкіл болып тұр.Айта кетейік, 1993 жылы елімізде Халықаралық Аралды құтқару қоры құрылды. Қор­дың бастамасымен бірқатар маңыз­­ды жұмыстар жасалғаны да аян. Бірақ Үлкен Арал 2014 жылы толықтай суал­ды. Арал мәселесі тек Сыр өңірі немесе Қазақстанның ғана емес, жарты әлемге кері әсерін тигізетін проблема. Аралдан ұшқан тұз түйіршіктерінің Антарктида, Гренландия, Тянь-Шань мұздықтарынан табылуы – сөзімізге дәлел. Ал бұл химикаттары бар тұз бен құм өз кезегінде адам денсаулығына өте зиянды болып табылады.2005 жылы Көкарал бекеті салынып, солтүстіктегі кіші Арал құрғап кетуден аман қалды. Айтпақшы, осы ретте атқарылған жұмыс Аралды құт­қару­­дың қазақстандық тәжірибесі ата­нып, көп елге үлгі болды. Суалған теңіз­дің бір бөлігін сақтап қалып қана қой­май, су деңгейін көбейту расында да нәтижелі жұмыстың көрінісі саналады.Қазақстан биылдан бастап Халық­ара­лық Аралды құтқару қоры­на төрағалық етпек. Қордың ресми мәліметіне сүйенсек, бүгінде бірша­ма тұралап қалған экологиялық жағдай­ды жақсартуға болады. Ол үшін Арал теңізіне құятын қос өзен суын тиімді пайдаланудың маңызы зор. Бұл ретте алқаптарды тамшылатып суару әдісі­мен суарудың ұтымды тұсы көп. Одан кейін Үлкен Аралдың құрғап қалған табанына ыстыққа, құрғақшылыққа төзімді сексеуіл өсімдігін жерсіндіру қажет. Бұл әдіс бірнеше жылдан бері қолға алынып, нәтижесін көрсетіп келеді. Сондай-ақ ғалымдар Кіші Арал­­дағы суды көбейту үшін кезінде салынған бөгетті биіктету, тіпті мүм­кіндік болса, жаңадан биік әрі берік бөгет салу қажеттігін назарға алып отыр. Бірақ бұл – ең болмаса кіші Аралды құтқару әрекеті. Үлкен Аралдың арнасын суға толтыру бірнеше жылдың ішінде шешіле салатын мәселе емес, тіпті үміт аз. Тек құрғаған теңіздің зиянды тұзы мен құмын бір орында ұстап тұру үшін сексеуіл секілді ыстық­қа төзімді өсімдік пен ағаштарды жерсіндіру қажет. Мамандардың пікі­рін­ше, бұл өз кезегінде зиянды құм мен тұздың жер-көкке таралуының алдын алады.Жақында облыс әкімі Нұрлыбек Нәлібаев АҚШ-тың Қазақстандағы Төтенше және Өкілетті Елшісі Дэниел Розенблюммен және USAID Халық­аралық даму агенттігі өңірлік мис­сия директорының орынбасары Моник Мосольфпен кездескен еді. Бас­қосу барысында бүгінде әлем ел­деріне ортақ ауқымды экологиялық мәселеге айналған Арал теңізінің жай-күйі сөз болды. Әлемдік қауымдастық Арал теңізінің тар­тылуын адамзат тарихындағы экологиялық дағдарыстың бірі ретінде бағалады. Сондай-ақ іссапарда Аралдың қазіргі жағдайымен және атқарылған жұ­мыс­тармен арнайы танысты. Айта кетейік, 2021-2023 жылдары USAID Халықаралық даму агенттігінің «Оазис» жобасы шеңберінде Арал теңізінің құрғаған ұлтанындағы экожүйені қал­пына келтіру мақсатында 150 гектар жерге сексеуіл тұқымы себіліп, көшеттер отырғызылды, 500 метр тереңдікте су ұңғымасы қазылып, пайдалануға берілді. Сондай-ақ Мемлекет басшысы 2021-2025 жылдар аралығында Арал теңізінің құрғаған ұлтанындағы 1,1 млн гектарға сексеуіл екпелерін егуді тапсырған болатын. Биыл 276,2 мың гектар аумақта осы бағыттағы жұмыстар жоспарланса, қазір 65 мың гектар ұлтанға 19,4 млн сексеуіл көшеті отырғызылған. Бұл көрсеткіш алдағы жылы 280 мың гектар алқапқа жеткізілмек. Өңірге жұмыс сапары барысында АҚШ елшісі облыстың су шаруашылығы нысандарымен, USAID Oasis жобасының жүзеге асырылу барысымен танысып, Америка мен Қазақстанның өзара тиімді әріптестігін әрі қарай дамытуға мүдделі екенін айтты. Және Еуроодаққа мүше 19 мемлекеттің елшілері Арал ауданына арнайы іссапармен барып, өңірдің тыныс-тіршілігімен танысты.Айта кетейік, Қазақстанда Аралды сақтауды қолдау мақсатында «Araldy Saqta» төлем картасы іске қосылды. Бұл қайырымдылық бастаманы Freedom Bank және Mastercard халықаралық төлем жүйесі қолға алып отыр. Аталған картамен төлем жасалғанда әрбір сатып алудан 10 па­­йызға дейін кэшбэк Қазақстандағы Халықаралық Аралды құтқару қорына аударылады. Freedom Bank бұл бас­таманы Freedom Holding Corp пен Қазақстандағы Халықаралық Аралды құтқару қорының атқарушы дирекция­сымен ынтымақтастығы шеңберінде іске асырды. Freedom Bank Директор­лар кеңесі төрағасының кеңесшісі Айдос Жұмағұлов картаның басқа да қыз­меттері мен негізгі мақсаты туралы айтып өтті. «Арал теңізінің құрғауы – үлкен қасірет. Су айдынын құтқарудың маңызы жоғары және біз де барлық қазақстандық сияқты теңіз тағдырына алаңдаймыз. Сондықтан Арал­ды құтқаруды қолдауға үлес қос­қымыз келді. Сондықтан Freedom Bank Mastercard-пен бірлесіп арнайы Araldy Saqta картасын шығару­ға бастамашылық етті. Оның артық­шылығы – қайырымдылық жарнасын жасау үшін әр уақытта осы ұйымдарды іздеу және аударым жасау үшін қосым­шаға кірудің қажеті жоқ. Сіз картаны бір-ақ рет ашасыз да, содан кейін әрбір сатып алуыңыздан жоғары кэшбэк автоматты түрде Қазақстандағы Халықаралық Аралды құтқару қорына жіберіледі. Мұндай бастамалар біздің ғаламшарымыздың осы бұрышын бо­ла­­шақ ұрпақ үшін сақтап қалуға көмек­теседі деп сенеміз» деді ол.Аружан МҰХАНБЕТҚАЛИ&nbsp;

Аралдың сарқылуы –  экологиялық апатқа ұшыратады

<a href="https://kyzylorda-news.kz/">Kyzylorda-news.kz</a> «Достық үйінде» облыстық ардагерлер кеңесінің ұйымдастыруымен «Денсаулық сақтау &nbsp;басқармасының ардагерлерге қызмет көрсету, сауықтыру, денсаулығын жақсарту бағытындағы жұмыстары» тақырыбында дөңгелек үстел өтті.Басқосуға облыс әкімінің бірінші орынбасары Данияр Жаналинов, ардагерлер қозғалысының белсенділері, денсаулық сақтау саласының ардагерлері мен қызметкерлері қатысты. Сонымен қатар аудандық ардагерлер кеңестерінің белсенділері мен аурухана басшылары онлайн режимде қосылды. Дөңгелек үстел отырысын облыстық ардагерлер кеңесінің төрағасы Серік Дүйсенбаев жүргізді.Облыс әкімінің бірінші орынбасары ардагерлердің қоғамдағы, &nbsp;ұлттық құндылықтарды сақтаудағы, насихаттаудағы орнына тоқталып, аға буын өкілдеріне қай кезде де қолдау көрсетілетінін жеткізді.<blockquote>– Халқымыз «Қарты бар үйдің қазынасы бар» деп бекер айтпаған. Елдің бірлігін сақтауда, ұлтты ұйыстыруда аға буын өкілдері, сіздердің еңбектеріңіз зор. Осы орайда ардагерлер денсаулығын сақтауға жеткілікті деңгейде көңіл бөлінуі керек екенін білеміз. Сондықтан бүгінгідей &nbsp;іс-шараның өтуі өте орынды. Қай саланың да өзіне тән қиындығы мен түйткілді мәселелері бар. Сол секілді денсаулық сақтау саласының да қиыншылығы жетерлік. Әйтсе де тұрғындар денсаулығын сақтауда атқарылып жатқан ауқымды жұмыс көп. Облыс бюджетінің 60 пайыздан астамы әлеуметтік салаға жұмсалады. Оның ішінде білім мен денсаулық саласы бірінші кезекте. Осыдан-ақ жанашырлықты, жасалып жатқан жұмыстардың ауқымын білуге болады. Әрине, кемшілік те жоқ емес. Оны білеміз. Сын айтылуы керек. «Сырт көз – сыншы» демекші, біз қанша бақылап отырсақ та кейбір нәрселерді көрмей қалуымыз мүмкін, ал сіздер байқайсыздар. Сондықтан шынайы сын айтылуы қажет. Алайда түйткілді мәселелерді бірден, аз уақытта шешіп тастаймыз деп айта алмаймыз. Бәрі кезең-кезеңімен шешімін табады. Ол үшін жүйелі жұмыстар атқарылып келеді. Бүгін сіздермен салаға қатысты, оның ішінде ардагерлер денсаулығына қатысты ой-пікірлерді ортаға салып, орын алған мәселелерді бірге талқылайтын боламыз, – деді Д. Жаналинов.</blockquote>Басқосуда облыстық денсаулық сақтау басқармасының басшысы Олжас Ысқақов баяндама жасап, &nbsp;салада атқарылып жатқан жұмыстарға, оның ішінде ардагерлерді сауықтыру, денсаулығын жақсарту бағытындағы шаруаларға &nbsp;тоқталды.<blockquote>– Өткен жылдың қорытындысымен облыс бойынша 816476 тұрғын емханаларға тіркелген. Оның 11 пайызын, яғни, 89600-ін 60 жастан асқандар құрайды. 2022 жылмен салыстырғанда егде жастағы тұрғындар 4795 адамға артық. Жалпы Дүниежүзі денсаулық сақтау ұйымының мәліметі бойынша 18-44 жас аралығындағылар жастар болып саналса, 45-59 жас аралығы – орта жас, 60-74 жас аралығындағылар егде жас, 75-90 жас аралығы – кәрілік, 90 жастан асқандар ұзақ өмір сүруші болып саналады.Халықтың денсаулығын нығайту – саланың басты міндетінің бірі. Облыста Мемлекет басшысының тұрғындарға медициналық көмек көрсетудің тиімділігін арттыру жөнінде тапсырмаларын орындау мақсатында бірқатар кешенді жұмыстар жүргізіліп, нәтижесінде негізгі көрсеткіштер бойынша оң өзгерістер байқалды. Мәселен, жалпы өлім-жітім көрсеткіші бір деңгейде сақталса, ана өлімі 5,7 есе, сәби өлімі 13,4 пайыз төмендеді. Егде жастағы тұрғындардың денсаулығын нығайтуда сапалы медициналық қызметтің рөлі ерекше. Осы ретте жыл сайын профилактикалық тексеру мақсатында бастапқы медициналық ұйымдарда нысаналы топтарды қарап-тексеру жүргізіледі. Нақтырақ айтқанда, алты нозология бойынша скринингтік тексеруден өтеді. Облыста былтыр 348345 тұрғын тексеруден өткізілсе, оның 99 000-ы, яғни, 28,4 пайызын егде жастағылар құрады. Қазіргі кезде әрбір емханада қарттар денсаулық мектебі жұмыс істейді. Облыста созылмалы аурулармен 163 000 науқас есепте тұрса, оның ішінде 60 жастан жоғары науқас саны – 52589. Былтыр 480535 жедел жәрдем шақыртуы орындалған. Оның 110 мыңы 60 жастан асқандардың үлесінде. Егде жастағылар арасында жиі кездесетін ауру – көз аурулары. Көп арыз-шағым осы көз ауруларын емдеуге қатысты түсетін. Мәселені шешу үшін Қазалы теміржол ауруханасынан көз аурулары бөлімшесі ашылып, жұмысына кірісті. Екінші бөлімше Арал ауданынан және жыл соңына дейін Жаңақорғаннан ашылады деп отырмыз, – деді басқарма басшысы.</blockquote>Сондай-ақ ол саланы құрал-жабдықтармен қамтамасыз ету, мамандар тарту, жаңа нысандар құрылысын жүргізу бойынша атқарылып жатқан жұмыстарды саралады.Дөңгелек үстел отырысында &nbsp;Сайлаубай Әбішев, Асылбек Тоғызбаев, Күләй Ермағанбетова, Олжабай Тобағабылов, тағы басқа ардагерлер сөз алып, бірқатар мәселені ортаға салды. Мәселен, есепте тұратын зейнеткерлерге дәрі-дәрмектің уақытылы берілуі, медициналық қызметтің сапасын көтеру, ауруханаларда ардагерлерге арнайы палаталар бөлу, МӘМС арқылы ардагерлердің сауықтырылуы үшін шипажайларға жолдама беру, &nbsp;зейнеткерлерге &nbsp;экологиялық коэффициенттің төленбейтіні туралы айтты.Облыс әкімінің бірінші орынбасары Данияр Жаналинов пен денсаулық сақтау басқармасының басшысы Олжас Ысқақов сұрақтарға жауап беріп, ұсыныстар назарға алынатынын жеткізді.Соңында ардагерлерге қолдау көрсетуді жалғастыру үшін облыстық ардагерлер кеңесі мен облыстық денсаулық сақтау басқармасы арасында екіжақты меморандумға қол қойылды.&nbsp;

Данияр Жаналинов: Ардагерлердің денсаулығын сақтауға көңіл бөлінуі керек

<a href="https://kyzylorda-news.kz/">Kyzylorda-news.kz</a> Шиелі ауданында ынтымағы жарасқан, қарияларына қарасқан, «жақсы ауылдың балалары бірін-бірі батыр...» дейтін, жастары саналы, әйелдері көпбалалы, Алла қолдап, ырыс пен құт қонған, ақсақалдары ақылман болған, адамдары уәдесіне берік, таймайтын жолдан, ұстаздары білімді, айбатты, кемпіршалдары қайратты, тұрғындары еңбек десе, асын жерге қоятын, бір ауыз сөзге тоқтап тоятын, ауыл басшылары қарапайым, сауатты, имамдары түсінетін сауапты ауылдар жеткілікті. Сондай орны бар байырғы елді мекендердің бірі – 1928 жылы алғаш «Тегісшіл», кейін «Ортақшыл» болып, тарының атасы Шығанақ Берсиев шықпаса да, қазір «майсөкті ауыл» атанған, жұрты дархан, үнемі күліп-ойнап жүретін, қонағын құдасындай күтетін, іргесіндегі Сырдария өзенінен күш пен қайрат алып отырған «Ортақшыл» ауылы десек, мүлт кетпейміз.Бұл ауылдан ұстаздардың ұстазы, «Еңбек Қызыл Ту» орденінің иегері, «Халық ағарту ісінің үздігі» атағын екі рет алған Мінәт Қалдыбаев, танымал ғалымдар Ә.Алдабергенов, Ж.Қожантаев, Ә.Ибрагимов, И.Сарбасов, білікті ұстаз А.Ақпанбетов шыққан. Еңселі, әдемі соғылған №150 қазақ орта мектебі мен Алланың үйі – мешіт ауыл сәнін келтіріп тұрса, ауыл әкімдігінің ғимараты алыстан менмұндалап, әсем көрініс беріп тұрғандай. Ауыл тыныш, тірліктері жүріп жатыр. Қай жерде болсын, ауыл басшыларының орны бөлек. Қабілетті басшылар елді алға жетелейді, ауылдың атын шығарады. Ақылдасып пішкен тон келте болмайды. Мысалы, ауылдық округ әкімі Жақсылық Ноғайбаев, ардагерлер кеңесінің төрағасы Әбіласан Жүсіпов, әйелдер кеңесінің төрайымы Базаркүл Ақпанбет, №150 орта мектептің директоры Нұрлан Батырбеков, ауылға қарайтын аудандық мәслихат депутаты, «Qaz-Project Stroy» ЖШС-нің директоры Қанат Сәулебеков – ауыл тұрғындарының ұйтқысы.&nbsp;Ауылда жастар тәрбиесіне, білімге, отансүйгіштікке, еңбекке, мамандық таңдауға арналған іс-шаралар үзбей өткізіліп тұрады. Осындай игі істер басынан біз үнемі аузы дуалы, сөз парқы құнарлы, сексеннің сеңгіріндегі ардагер-ұстаз, осы ауылдың төл тумасы, тарихшы-мұғалім, Ортақшылдың құрметті де қадірлі, ардақты ақсақалы Асанхан Ақпанбетов ағамызды жолықтырамыз. Ұзын бойлы, денесі мәуелі, саялы теректей тіп-тік, еңкіш тартпаған, біреуге жүк артпаған, жүріс-тұрысы ширақ, қимылы өзіне жарасқан, сөзге талмайтын тарихшы Асанхан ағайды біз түгілі, замандас кемпірлер де сексен жаста деп ойламайды. Шерімбет шамамен алпыстың талтүсіндей көрінетін қараторы шалдардан алда десіп қалады. Жіптіктей тап-таза киініп жүретін бұл кісіні мектеп ұстаздары, өзінің шәкірттері мен ауылдың үлкен-кішілері өнеге тұтып отырады. Жөнді қартая білу де – өнер. Асанхан ағай бар болмысымен соны дәлелдеп келеді.&nbsp;Асанхан Кемелұлы 1944 жылы 7 мамыр күні «Ортақшыл» ауылында дүниеге келген. 1950 жылы ауыл мектебінің табалдырығын аттайды. Жетіжылдықты бітірісімен, Шиелі орталығына келіп, М.Ломоносов атындағы мектепте 9-сыныпқа дейін оқиды. Оны аяқтасымен, Байгеқұмдағы кеңейтілген кәсіптік-техникалық училищеге оқуға барып, 1963 жылы тракторист-машинист мамандығы бойынша бітіріп шығады. Содан ауылға келіп, пульгадашы, одан соң тракторшы болып жұмыс істейді. Ол кезде трактордың артындағы соқаға отырып, соқаны түсіріп-көтеріп отыратын адамды «пульгадаш» деген. Тынымсыз еңбегінің арқасында ауыспалы Қызыл Туды трактор кабинасына желбірете іледі. Еңбекқорлығына тиісті сыйлық та алады.&nbsp;Бейнеткеш жігіт Асанхан 1964 жылы Кеңес армиясы қатарына шақырылып, 3 жыл Венгрия Республикасында борышын өтеп оралады. 1967 жылы ауылға келісімен, тракторға жайғасып, жұмысын жалғастырады. Оның бар арманы – педагогикалық институттың тарих факультетіне түсіп, тарихшы болу еді. Содан 1968 жылы №150 Ортақшыл қазақ орта мектебіне тәрбиеші болып қызметке орналасады. Бойындағы ұстаздық қасиеттерін сезсе керек, Асанхан тез арада мектеп ұжымының белсенді бір мүшесіне айналады.&nbsp;1970 жылы Рая Мінатқызымен отбасын құрып, 2 ұл, 3 қыз тәрбиелеп өсіреді. Барлығы – жоғары білім алған, отбасылы, жан-жақта өз қызметтерін атқарып жүрген бақытты жандар. Бұл жерде әке жолын қуған, қазіргі аудандық білім бөлімі басшысының орынбасары қызметіндегі Марат Ақпанбетовті айтып өтсек жетер дейміз. Ұлағатты ұстаз ағаның ұлының аудан ұстаздарына басшылық жасауы – әкесінің зор қуанышы, мәртебесі, тәрбиесі деп білеміз.&nbsp;Мақсатынан таймаған Асанхан Кемелұлы 1972-1976 жылдары Шымкенттің педагогикалық институтының тарих факультетін бітіріп, қолына тарихшы мамандығы бойынша диплом алады. 1976 жылы мектеп директорының тәрбие жөніндегі орынбасары болып тағайындалады. Осы қызметті 1988 жылға дейін абыроймен атқарады. Ізденістің, талпыныстың, білімін көтерудің арқасында жоғары санатты мұғалім атағын алады. 1988-2007 жылдары мектепте тарих пәнінің мұғалімі ретінде аянбай еңбек етеді. Педагогикалық зерттеулерге көңіл бөледі. Асанхан Ақпанбетов «Қазақстан тарихы пәні бойынша оқушыларға отансүйгіштік тәрбие беру» тақырыбында еңбек жазып, педагогика проблемасына үлес қосты. Асанхан Кемелұлы 33 жыл білім саласында тер төгіп, 2007 жылы құрметпен зейнетке шығады.&nbsp;Асыл ағамыз бейнеттің зейнетін көре жүріп, қоғам жұмысына белсене араласады. Жуырда Асанхан Кемелұлының тарихшы екендігін дәлелдеген құнды игі ісінің куәсі болдық. Ол мектеп директоры Н.Батырбековтің қолдауымен ауылда мектеп ашып, оның тұңғыш директоры болған Мінәт Қалдыбаевқа арнап музей ашқан. Мектеп ішіндегі музей құнды құжаттармен, сирек кездесетін суреттермен, Мінәт ұстаздың отбасы, мектеп ұжымымен түскен сурет-бейнелері, сол тұстағы ауылдың басшылары мен жақсы-жайсаң азаматтарының мәліметі суреттерімен берілген. Музейдің мол мұрасын, кітаптар жинақтап бүгінгі ұрпаққа жеткізіп отырған Асанхан ағайға біздің де алғысымыз шексіз.&nbsp;Айта берсек, әңгіме көп дегендей, А.Кемелұлының қоғамдық жұмысының бір парасын ғана жеткіздік. Туасы әр ауылдың бетке тұтар айбарлы, арлы ақсақалдары болады. Жақында «Ардагерлер ұйымы» Қызылорда облыстық ардагерлер кеңесінің III Пленумы болып, оған облыс әкімі Н.Нәлібаев қатысып, ардагерлерге арнап сөз сөйледі. Осы жиында Шиелі ауданының белсенді ардагері А.Кемелұлы республикалық ардагерлер ұйымының Құрмет грамотасымен марапатталды. Қуанышқа кенеліп қайттық. А.Ақпанбетов – «ҚССР оқу ісінің үздігі», «Еңбек ардагері» медалінің иегері. КССР Оқу министрінің, облыстық білім басқармасының «Құрмет грамотасымен», сондай-ақ «Ұлы Отан Соғысындағы Жеңістің 20 жылдық», «Қызылорда облысына 70 жыл», «Ы.Жақаевтың 120 жылдық», «Шиелі ауданының 80 жылдық» мерекелік медальдарын кеудесіне тағып, Қазақстан Республикасы Призидентінің «Алғыс хатын» алған. Бұл Асанхан ағамыздың ерен еңбегіне берілген зор баға десек, жаңылыспаймыз. Сексеннің сеңгіріне шығып, селт етпей келе жатқан А.Кемелұлы – қандай марапатқа болса да лайық жан. Оның ұстаздық жолы, қоғамға сіңірген ұланғайыр еңбегі келешек ұрпаққа өнеге, үлгі болып қала береді.&nbsp;Тары дақылының отанына айналған «Ортақшыл» ауылының тарихын түгендеп жүрген тарихшы-ұстаз Асанхан Ақпанбетов ағамыз әлі тың. Ол еліміздің болашағына сеніммен қарайды.

Шиеліде ғұмырын еңбекке арнаған жандар жеткілікті

<a href="https://kyzylorda-news.kz/">Kyzylorda-news.kz</a>&nbsp; Қызылорда қалалық орталықтандырылған кітапханалар жүйесіне қарасты № 20 кітапхананың ұйымдастыруымен жалпы жастардың, соның ішінде мектеп оқушыларының денсаулығының алдын алу мақсатында «Дұрыс тамақтану денсаулық кепілі» атты дәрігер сағаты болып өтті.&nbsp;Қазіргі уақытта жастар арасында да көптеген аурулардың белең алуы көпшілікті алаңдатуда. Жастар еліміздің болашағы десек олардың жаман әдеттен аулақ болуын бүгіннен қамтамасыз ету керек-ақ. Сондықтан да дәрігер мамандармен осындай бас қосу өткізіп, сұхбаттасу, мәліметтер алу оқушыларға аса маңызды.&nbsp;Денсаулық сағатына қаладағы № 3 емхананың «Салауатты өмір салтын қалыптастыру» маманы Жандарбекова Ағжан Исатайқызы қатысып жастардың көкейіндегі сұрақтарына жауап берді. Денсаулықты осы кезден сақтауүшін салауатты өмір салтын ұстану керектігін атап өтті.Шара барысында оқушыларға арнайы дайындалған бейнебаян көрсетіліп кітапхана қорындағы денсаулықты сақтау туралы кітаптар таныстырылды.Денсаулық шарасына қатысқан оқушылар салауатты өмір салтын ұстану жолдары туралы ақпарат алып, зиянды әрекеттердің, астың адам ағзасына әсері туралы танымдарын кеңейтті.сурет massaget.kz

Қызылордада оқушыларға «Дұрыс тамақтану денсаулық кепілі» атты дәрігер сағаты өтті 

<a href="https://kyzylorda-news.kz/">Kyzylorda-news.kz</a> Қызылорда қаласында «Сыбайлас жемқорлыққа қарсы волонтерлік» пен «Құқықтық мәдениетті қалыптастыру және құқықтық түсіндіру» мобильді тобы тұрғындарға құқықтық кеңес берді.&nbsp;Оннан астам түрлі сала мамандарынан құралған мобильді топ өкілдері Қызылорда қаласының Қызылөзек және Талсуат ауылдық округі тұрғындарын қабылдап, көкейлерінде жүрген сауалдарына заң аясында жауап берді.Мобильді топтың құрамына заңгерлер, мемлекеттік кіріс, әділет, денсаулық сақтау, білім салаларының мамандары мен адвокаттар, волонтерлер сондай-ақ, басқада сала өкілдері қосылды. Тұрғындардың негізгі мәселелері жұмысқа орналасу, жергілікті жолдардың жай-күйі, өңірдегі газ тарату мәселесі, елді мекендердің аумақтарын абаттандыру, отбасылық-тұрмыстық қатынастар, мемлекеттен несие, жеңілдіктер мен субсидиялар алу және азаматтық-құқықтық мәселелерге қатысты болды.Мамандар 50-ге жуық ауыл тұрғындарының жеке мәселелері мен дауларына қатысты кеңестерін беріп, тиісті көмектерін көрсетті. Сонымен қатар, қабылдау барысында азаматтардың жүгінген мәселелері ҚР СЖҚІА Қызылорда облысы бойынша департаменті Превенция басқармасының бақылауына алынды.Мобильді топ алдағы уақытта облыстың барлық аудандары мен шалғайдағы елді мекендерін аралауды жоспарлауда. Шара барысында тұрғындардан «құқықтық мәдениетті қалыптастыру және құқықтық түсіндіру» жұмыстарына байланысты сауалнама алынды.

Қызылордада ауыл тұрғындарына құқықтық кеңес берілді

<a href="https://kyzylorda-news.kz/">Kyzylorda-news.kz</a> Қызылорда қаласы бойынша білім бөлімінің ұйымдастыруымен №39 «Қызылөзек» орта мектебінде 8-10 сынып оқушылары арасында жергілікті ақын, ауыл мектебінде ұзақ жылдар бойы ұстаздық қызмет атқарып, ел құрметіне бөленген ақынжанды ұстаз Бозымбай Қоқыбасұлының шығармашылығына арналған «Өмірін өлеңімен өрнектеген» атты қалалық мәнерлеп оқу сайысы өтті.Жергілікті ақын-жазушылардың құнды мұраларын ел арасына насихаттауды көздейтін сайыс арқылы көркем шығарманың оқырмандар жүрегінен жол табуына ықпал ету, өз елін,тарихын,туған тілін құрметтейтін, халқымыздың мол рухани құндылықтарын бағалай білетін тұлға болуына ықпал жасау,&nbsp; шығармашыл, өнерлі, талантты жастарды анықтау, қолдау мақсатында өткізілшген сайысқа қала бойынша 13 білім ошағының білімді оқушылары қатысты. Байқауға әділ қазылар төрелік етіп, үздіктерді анықтады.&nbsp;Сайыс қорытындысымен І орынды А.Хангелдин атындағы №179 орта мектеп оқушысы Хакім Айзере, ІІ орынды №178 орта мектебінің оқушысы Баяндаева Ақерке, №145 «Бірқазан» орта мектебінің оқушысы Балғабай Нұржігіт алса, ІІІ орынды №268 мектеп-лицейінің оқушысы Абзалқызы Гузель, №128 орта мектебінің оқушысы Қуантай Ақсезім, №280 орта мектебінің оқушысы Абдулла Қарақат місе тұтты.&nbsp;Сайыс соңында қалалық білім бөлімінің бас маманы Қанат Әлібекұлы, қалалық білім бөлімінің ардагерлер кеңесінің төрағасы Мылтықбай Мұстафаұлы, «Өрлеу» біліктілікті арттыру ұлттық орталығының маманы Маржан Бертайқызы сөз сөйлеп, бүгінгі шараның мән-маңызына тоқтала өтті. Мектеп директоры Жасұлан Махмутұлы бүгінгі шараға қатысушылар мен жетекші ұстаздарға, сонымен қатар барша келген қонақтарға өз алғысын білдірді. Жарысқа қатысушы оқушылар арнайы білім бөлімінің дипломымен, алғыс хаттарымен марапатталып, жүлделі сыйлықтарға ие болды.

Қызылөзекте ақын Бозымбай Қоқыбасұлының шығармашылығына арналған кеш өтті

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласы бойынша білім бөлімі және Қызылорда облысы «Жас Сарбаз» орталығы, Қызылорда облысы қорғаныс департаментінің ұйымдастыруымен Б.Ермекбеав атындағы №271 мектеп ғимаратында мектеп оқушылары арасында әскери қолданбалы спорт түрлерінен республикалық «Айбын-2024» әскери-патриоттық жастар жиынының қалалық іріктеу кезеңі өткізілді.&nbsp;Шараны ұйымдастырудағы басты мақсат жастар арасында әскери-патриоттық жұмысты жетілдіру, Қазақстан Қарулы Күштерінің беделін көтеру және әскери қызметті насихаттау, салауатты өмір салтын ұстанып, туған жер мен Отанға деген жастардың патриоттық сезімін арттыру болатын. Қызылорда облысы қорғаныс істері департаментінің тәрбие және идеологиялық жұмыстары бойынша бастығының орынбасары подполковник Жақыпов Алмат Алмасұлы: «Айбын» әскери-патриоттық жиыны – отаншыл жастарды адал қызмет етуге, ел қорғаны болуға тәрбиелейтін бірегей алаң» деп атап көрсетті.&nbsp;Қалалық білім бөлімінің әдіскері Қөпжасаров Қуандық Қараманұлы «Айбын-2024» әскери-патриоттық жастар жиынының қатысуышларына сәттілік тіледі.&nbsp;Қала мектебінен жасақталған команданың оқушылары пневматикалық мылтықтан нысана ату, АК-74 оқу қаруын толық емес бөлшектеу және жинақтау, арқада жатып кеудені көтеру, биік белтемірге тартылу, арқан тарту, жеңіл атлетикалық кросс (ұл балалар – 3000м, қыз балалар – 1000м) сынды сайыстардан өзара сынға түсті. Сайыс қорытындысымен пневматикалық винтовкадан нысана атудан қызлар арасында І орынды №12 мектептен А.Сүгірбаева, ІІ орынды №101 мектептен М.Тұрғанбай, ІІІ орынды Дарын мектебінен С.Сабитқызы алса, ұлдар арасынан І орын №261 мектептен Е.Сухрапұлына, ІІ орын №235 мектептен Д.Ибраевқа, ІІІ орын №120 мектептен Д.Бұхарбаевқа бұйырды.&nbsp;Ал «АК-74 оқу қаруын толық емес бөлшектеу және жинақтау» бағытында қыздар арасында І орын- М.Тұрғанбай (№101 мектеп), ІІ орын- А.Әділханқызы (№2 мектеп), ІІІ орын К.Сермаханова (№6 мектеп) бұйырса, ұлдар арасында І орынды Д.Ибраев (№235 мектеп), ІІ орынды Е.Сухрапұлы (№261 мектеп), ІІІ орынды Серікбай Ернұр (№7 мектеп) иеленді.&nbsp;сондай-ақ, арқада жатып кеудені көтеру, (1 минут) қыздар арасындаІорын-М.Тұрғанбай №101 мектепІІ орын- А.Сүгірбаева №12 мектеп&nbsp;ІІІ орын- К.Сермаханова №6 мектеп иеленсе, биік белтемірге тартылудан ұлдар арасында Іорын - Д.Ибраев №235 мектеп, ІІ орын - О.Қалдашбаев №2 мектеп, ІІІ-орын -&nbsp; М.Айдарбек №2 мектеп місе тұтты. 3000 метрге жүгіруден ұлдар арасында І орын Д.Ибраев №235 мектеп, ІІ орын Д.Қанжарбекұлы №143 мектеп, ІІІ-орын Н.Ақдаулет Дарын мектебі, қыздар арасында&nbsp; 1000 метрге жүгіруден І орын А.Әділханқызы № 2 мектеп, ІІ орын М.Сабыралы №211 мектеп, ІІІ-орын А.Қоңысбекова №143 мектеп, ІІІ-орын- А.Мейрамбекқызы №1 мектеп иеленді.&nbsp;Жалпы командалық есепте жүлделі орын алған Д.Ибраев №235 мектеп, Е.Сухрапұлы №261 мектеп, Серікбай Ернұр №7 мектеп, Д.Бұхарбаев №120 мектеп, Д.Қанжарбекұлы №143 мектеп, А.Исатаев №211 мектеп, Н.Омаров №6 мектеп, Н.Берікұлы №271 мектеп, А.Нұрлан Дарын мектебі, Е.Мұратбек №101 мектеп, М.Тұрғанбай №101 мектеп, К.Сермаханова №6 мектеп, А.Әділханқызы №2 мектеп, А.Қоңысбекова №143 мектеп, А.Сүгірбаева №12 мектеп&nbsp; облыстық кезеңге жолдама алды.&nbsp;Жүлдегерлер мен жеңімпаздар қалалық білім бөлімінің дипломдарымен,«Жас Сарбаз» әскери патриоттық қозғалысы РҚБ-нің Қызылорда облыстық филиалының төрағасының арнайы кубоктарымен және медальдарымен марапатталды.

Қызылордада «Айбын-2024» әскери-патриоттық жастар жиынының қалалық кезеңі өтті

<a href="https://kyzylorda-news.kz/">Kyzylorda-news.kz</a> &nbsp;Қызылорда облыстық Қазақстан халқы ассамблеясы жанындағы Аналар кеңесі және «Отбасын қолдау орталығы» КММ ұйымдастыруымен «Қоғамдағы әйел мәртебесі» тақырыбында ашық алаң өтті.Ашық алаңға әлеуметтік аз қамтылған, көп балалы, мүмкіндігі шектеулі бала асырап отырған аналар қатысты. Оларға арнайы түрлі сала мамандары әлеуметтік, құқық, заң, психологиялық кеңестер берді. Аналардың қоғам алдындағы жауапкершілігі, отбасындағы дұрыс қарым-қатынас туралы ақпарат алып, қолдау көрсетілді.Іс-шара «Қазақтың қайсар қыздары» атты прологпен басталды. Аналар кеңесінің төрағасы Айгүл Мұсабаева алғы сөзінде ашық алаң жұмыс жоспарына сәйкес 12 мамыр –Аналар күніне арналғандығын айтты.<blockquote>− Отбасындағы түрлі мәселелер – мемлекет назарында» тақырыбында «Әділдік жолы» РҚБ-нің Қызылорда облыстық филиал төрағасы, облыстық ҚХА жанындағы Медиаторлар Кеңесінің төрағасы, Халықаралық дәрежедегі тренер-медиатор Ләззат Бақтыбаева «Қазіргі таңда ана да, әке де ақша табу жағын көбірек ойлап, ал бала болса интернет әлемінде өмір сүріп жатыр. Тәуелсіздігіміздің 30 жылдығы ішінде, аналарға деген қолдау мемлекеттен әркез де болған. Несие алса да, кәсіп ашам десе де барлық жағынан жеңілдіктер қарастылыған. Дегенмен, бұл жеңілдіктерді қолданбай, басқа бағытпен, мәселен ажырасу арқылы баспана мен атаулы көмектерге ие болып жүргендер қаншама, – деді.</blockquote>Сонымен бірге, жасөспірімдер мен әйелдер арасындағы зорлық-зомбылық болған жағдайда, заң тарапынан қандай жазалар қолданылатынын айтып өтті.«Әйел азаматтарының қоғамдағы рөлі» тақырыбына «Қазақстандағы орыс қауымдастығы» ҚБ Қызылорда облыстық филалының төрағасы Наталья Мишукова тоқталды. Жалпы қаржылық сауаттылықтың жоқтығы көптеген кедергілер мен қиыншылықтар тудыратындығын атап өтті. Әйелдер арасында қаржылық білімдерін арттыру бағытындағы жұмыстарды үйлестіруге даяр екендігін ескеріп, «Қарызсыз қоғам» жобасының маңыздылығын түсіндірді. «Қазақ әйелдерінің ұстанымы – ұлт ұстанымы, қазақ әйелдерінің бейнесі – ұлт бейнесі» тақырыбында даналық мектебінің жетекшісі Тамаша Әбілқасымова, «Ұлы даланың қыздары – құндылықтардың сенімді сақтаушылары» ұстаз Нағира Қонысова және «Дәстүрлі мәдениеттің бесігінде тербелген – қазақ әйелі» қалалық әйелдер кеңесінің төрағасы Назиға Кенжеғараева сөз қозғап, халыққа қамқор ісімен, ұрпаққа мейірімді аналық үлгісімен, жанды тәрбиесімен, көзге көркем, ұнамды, жағымды бейнесімен дараланған қазақ аналары туралы кеңінен ой толғады.Ашық алаңға келген аналар сала мамандарына өздерін толғандырған сауалдар қойып, осындай бағыттағы басқасулар жиі болып тұрса деген ұсыныс-пікірлерін ортаға салды.Фото: Сыр бойы&nbsp;

Қоғамдағы қазақ әйелінің орны

<a href="https://kyzylorda-news.kz/">Kyzylorda-news.kz</a> «AMANAT» партиясының «2023-2027 жылдарға арналған бағдарламаcында» ерекше қажеттіліктері бар адамдарды қамқорлыққа алу, олардың өмір сүру жағдайларын жақсартуға айрықша көңіл бөлінген. «Кедергісіз келешек» партиялық жобасын іске асыру шеңберінде 4 басымдық белгіленген. Соның екінші басымдығы – инклюзивті білім беруге жәрдемдесу болып табылады.&nbsp;Осыған орай, «AMANAT» партиясының «Кедергісіз келешек» жобасы аясында ұйымдастырылған «Тең мүмкіндіктер» спорт фестиваліне қалалық білім бөліміне қарасты алты аймақтан 16 білім беру ұйымдарынан құралған 18 командасынан 54 оқушы қатысты.&nbsp;Спорт фестиваліне «AMANAT» партиясы Қызылорда қалалық филиалының атқарушы хатшысы Гүлшат Исақызы Мұсаева мен партияның қалалық филиалының депутаттық фракция жетекшісінің орынбасары, «Кедергісіз келешек» жобасының Қызылорда қаласы бойынша жетекшісі Раушан Жәдігерқызы Ысқақова қатысып, жас спортшыларға сәттілік тіледі.Екі кезеңнен тұратын спорт фестивалінде ересек және кіші санаттағы командалар бақ сынады. Сайыс «Біз жеңімпаз боламыз!» және «Жеңіл атлетика» деп аталатын 2 тур бойынша өтті.&nbsp;Жарыс қорытындысымен «Біз жеңімпаз боламыз!» бағдарламасы бойынша ересек топтардан 1 орын - № 268 мектеп-лицейі, 2 орын - №280 орта мектебі, 3 орын – М. Сужиков атындағы №6 орта мектебі иеленді. Ал кіші топтар арасынан аталған сайыс бойынша 1 орын – №218 орта мектебі, 2 орын - №282 мектеп- лицейі, 3 орын – Ғ. Мұратбаев атындағы №171 мектебінен қатысқан топ иеленді.&nbsp;Сондай-ақ «Жеңіл атлетика» бағдарламасы бойынша ересек топтар арасында1 орын – Т. Рысқұлов атындағы №222 мектебі алса, 2 орын - №218 орта мектебі, 3 орын - №2 Абай атындағы мектебі иеленді. Аталған бағдарлама бойынша кіші топтар арасында 1 орын – Ж.Махамбетов атындағы №43 орта мектебі иеленсе, 2 орын – С. Әлжіков атындағы №144 орта мектебі, 3 орын – Б. Ермекбаев атындағы №271 орта мектебі иеленді.&nbsp;Айта кетейік, «Тең мүмкіндіктер» фестивалінен бірінші орын иеленген топтар сайыстың облыстық кезеңіне жолдама алды.

Қызылордада «Тең мүмкіндіктер» спорт фестивалінің қалалық кезеңі өтті

<a href="https://kyzylorda-news.kz/">Kyzylorda-news.kz</a> Жалағаш аудан әкімінің орынбасары Ғани Сүлейменовтің қатысуымен Қызылорда облыстық прокуратурасының бастамасы бойынша «Тұрмыстық зорлық-зомбылық» мәселелеріне қатысты ықпалдасу және кеңесу тәртібінде атқарылатын іс-шаралар туралы» Жалағаш ауданының прокуратурасы, аудандық ардагерлер кеңесі және аудандық әйелдер кеңесі арасында үшжақты меморандумға отыру рәсімі өтті. Жиынға Жалағаш аудандық полиция бөлімі, Жалағаш ауданы бойынша білім бөлімі, аудандық аурухана, аудандық пробация қызметі және басқа жауапты қызметкерлер қатысып, үшжақты меморандум бойынша атқарылатын іс-шаралармен танысты.&nbsp;<blockquote>–&nbsp;Бүгінде елімізде белең алған тұрмыстық заңбұзушылық өзекті мәселелердің бірі болып табылады. Отбасындағы жанжалдың кесірінен болатын қылмыстардың жиілеп кетуіне қоғам алаңдаулы. Зерттеулер бойынша оның басты себептерінің біріне – маскүнемдік, жұмыссыздық, соған байланысты тұрмыс жағдайының ауырлығы сияқты әлеуметтік жағдайлар жатады. Тұрмыста жапа шегетіндер негізінен әйел адамдар. Ал, біздің мемлекетіміз үшін әйел-ананы қорғау ерекше мәселе, – деді жиында сөз алған аудандық әйелдер кеңесінің төрайымы Эльмира Абсатова.</blockquote>Жиын қорытындысымен үшжақты меморандумның мақсаты мен алда атқарылатын шаралар талқыланып, тұрмыстық зорлық-зомбылықпен күресті одан әрі күшейту мәселелері қаралды.

Қазақстан және Қызылорда облысының жаңалықтары