<a href="https://kyzylorda-news.kz/">Kyzylorda-news.kz</a> Өткен жылы аймақтың бас қаласында абаттандыру және көркейту шараларына ерекше маңыз беріліп, игілікті істердің бірі орталық алаңда бастау алған болатын. Жоба бойынша алаңға субұрқақтар, брусчаткалар, жолжиек тастар орнатылып, жарық диодты шамдар қойылып, газон, көпжылдық жасыл көшеттер отырғызылады. Сонымен қатар шағын архитектуралық пішімдемелер қою да жоспарланған.Мұнда жаңа үлгідегі орындықтар, жарық бағаналары және балалар ойын алаңы да қойылатын болады. Ыбырай Жақаев көшесінің Қорқыт ата көшесінен Орталық алаңға дейінгі аралығы да толықтай абаттандырылады. Осылайша шаһар келбеті жыл санап көріктене түспек. Бұл бағыттағы жұмыстар қала тұрғындарына қолайлы жағдай жасау мақсатында жүзеге асырылуда. Көпшілікке көзайым боларлық жобаны бұл салада мол тәжірибесі бар «Техоснастка-Ремсервис» жауапкершілігі шектеулі серіктестігі жүзеге асырады.<blockquote>– 2023 жылдың күз мезгілінде Орталық алаңды абаттандыру жұмыстары басталғаны өздеріңізге белгілі. Қазіргі таңда құрылыс жұмысының 70 пайызы бітті. Маусым айына дейін жөндеу жұмысы толықтай аяқталып, қала тұрғындарына пайдалануға беріледі. Орталық алаңға енген өзгерістер қала тұрғындары мен жастардың талап-тілектерін ескере отырып жасалды. Сырдың перзенті, меценат Асқар Әубәкіровтің қолдауымен 1 млрд теңге бөлініп, қызу жұмыс басталып кеткен еді. Алаңдағы ашық жатқан жерлер жасыл екпелермен көмкерілетін болады. Қалада бұрын болмаған, арнайы тапсырыспен алынған ағаш түрлері егіледі. Ерекше архитектуралық формалар мен тұрғындарға арналған демалатын орындар да қарастырылуда, – дейді қала әкімінің орынбасары Ғалымжан Еркебай.</blockquote>Фото: СЫр бойы&nbsp;

Орталық алаң жаңа кейіпке енуде

<a href="https://kyzylorda-news.kz/">Kyzylorda-news.kz</a>&nbsp; Танымал актриса, продюсер Баян Алагөзованың бір кешке киетін образының бағасы айтылды. Бұл туралы<a href="https://stan.kz/alkasi-97-million-sirgasi-7-million-bayan-maksatkizinin-398929/"> Stan.kz</a> ақпарат агенттігі хабарлайды.Жансая Махабаева есімді блогер отандық продюсердің көйлегінен бастап, аяқ киімінің бағасына дейін жариялады.“Баян Алагөзованың мына образы қанша теңге тұрады деп ойлайсыз? Үстіне киген көйлегінің өзі – Dior брендінен 3,1 миллион теңге. Ал туфлиі – Jimmy Choo брендінен 450 мың теңге. &nbsp;Сөмкесі – Dolce&amp;Gabbana 1,5 миллион теңге. Ал енді қыздар, өз-өздеріңізді ұстаңыздар, өйткені қазір шок боласыздар. Мына алқа – Magic Alhambra топтамасынан 18 караттық ақ алтыннан жасалған, толық гауһар таспен апталған, бағасы – 97 миллион теңге. Сырғасы –да дәл осы топтамадан, толық гауһар таспен апталған, бағасы – 7,5 миллион теңге. Сонымен, барлығы – 109 миллион 550 мың теңге", – дейді блогер.Желі қолданушыларының пікірі екіге бөлініп жатыр. Бірі қалталы продюсерді қолдаса, енді бірі ысырап, мақтаншақ деп сөгіп жатыр.“Күйеуінің денсаулыққа зиян суын күнде алып ішеміз, сосын бұлар байып отыр”, “Баян, жарайсыз! Су тасқыны кезінде көп ақша аударды”, “Байлықпен мақтанған дұрыс емес”, “Басымызға келсін, күлейік”, “Баянға бренд не керек, өзі бренд”, – деп жазып жатыр желі қолданушылары.&nbsp;Фото: https://www.instagram.com/bayanmaxatkyzy/

"Алқасы – 97 миллион, сырғасы – 7 миллион": Баян Мақсатқызының бір күндік образының бағасы белгілі болды

<a href="https://kyzylorda-news.kz/">Kyzylorda-news.kz</a> Жаһанды дүрліктірген жасанды интеллект пен IT саланың өзге де цифрлық құзыреттілігі Қазақстанға да бейтаныс емес. «Кезінде электр жарығы мен интернетті ойлап табу тіршілігімізді қалай түбегейлі өзгертсе, жасанды интеллекті технологиясының ықпалы да дәл сондай орасан зор. Ол адамзаттың тұрмыс салтын мүлдем басқа арнаға бұрып, жұмыс үдерістерін автоматтандырады. Сондықтан қысқа мерзім ішінде жасанды интеллектіні дамыту үшін барлық жағдайды жасау қажет» деді Президент Қасым-Жомарт Тоқаев.Аталған сала бойынша Сыр өңірінде де жаңа бастамалар мен жақсы жаңалықтар күн санап артуда. Мәселен, жақында Түркістанда өткен «Recodetau» республикалық хакатонына қатысқан резиденттер Үндістан мемлекетіне тағылымдамаға жолдама ұтып алды.<blockquote>– 13-14 сәуір күндері Түркістан қаласында «Respublica» партиясының ұйымдастыруымен өткен «Recodetau» республикалық хакатонына қатыстық. Байқауға 18-25 жас аралығындағы жастар келді. Бір ерекшелігі, қатысушыларға жаңа жобаларды жүзеге асыру, бірегей бизнес жоба жасау, шетелдік компаниялардан тәжірибеден өту мүмкіндіктері қарастырылған. «Recodetau» хакатоны туралы хабар алғаннан кейін Қорқыт ата атындағы Қызылорда университетінің білім алушыларынан және мектеп оқушыларынан құралған «Neo Nomad» командасын құрып, қатысуға шешім қабылдадық. Мен веб-сайттың интерфейсін жасауға, Жұлдызай Мұңайтбасова аппараттарды құру бөлігіне, Асылжан Абдуллаев жоба презентациясын әзірлеуге және команда жетекшісі Темірлан Абжанов жобаны идея сатысынан mvp сатысына дейін жүзеге асыруға жауап бердік.Хакатонға еліміздің әр аймағынан 150-ге жуық адам қатысты. Байқаудың шарты бойынша берілген бизнесті цифрландыруға бағытталған 8 тақырып және қосымша табиғи апаттар кезінде жедел әрі оңтайлы шешім шығаруға бағытталған жоба ұсыну керек. Командамен ақылдаса отырып, соңғы жылдары елімізде жиілеп кеткен табиғи апаттар мәселесін шешуге бел будық. Нәтижесінде «ReDabyl» жобасын әзірледік. Су тасқыны секілді табиғи апат кезінде жұмыс істеуге арналған мониторинг және алдын ала болжауға арналған кешенді жүйені құрастыру өзімізге де қызықты әрі ізденіске толы болды, – дейді Kyzylorda Hub бизнес-инкубаторының резиденті, Қызылорда қаласындағы Назарбаев Зияткерлік мектебінің оқушысы Раушан Тұрғанбай.</blockquote>Айта кетейік, жаңа жобаның нәтижесінде сенсорлар нақты уақыт режимінде өзен арналарының бойында орналасқан су деңгейін және басқа параметрлерді үздіксіз бақылайды. Су тасқынын көрсететін шекті мәннен асқан кезде сенсорлар автоматты түрде жауапты органдарға дабыл туралы ақпаратты жібереді де, осылайша мамандандырылған бригадаларды қажетті жерге жіберу арқылы жұмыс күшін азайтуға және автоматизациялауға көмектеседі.<blockquote>– Зерттеуіміз бойынша мұндай цифрланған жүйе жалпы Қазақстанда жоқ және осыған дейін ашық түрде ақпарат алып, анализін көруге мүмкіндік болмады. Ал біз пайдаланған сервер арқылы телефонға дабыл жіберуге, яғни, ашық түрде ақпаратпен танысуға мүмкіндік бар. Идея хакатон ережесі бойынша берілген тақырыптарды көргеннен кейін туындады. Екі күн ішінде жүйенің аппараттық бөлігін, веб сайт пен бизнес анализін жасап үлгердік. Respublica және Codetau ұйымдарының мүшелерімен нетворкинг арқылы үлкен тәжірибе жинақтадық. Сонымен қатар Kyzylorda Hub бизнес-инкубаторының ұжымына алғысымыз шексіз. Бұл жоба – бүгінге дейін жинаған тәжірибеміздің жемісі. Командалық жұмыстың арқасында &nbsp;жүлделі І орын иеленіп, Үндістан мемлекетіне 10 күн тәжірибе алмасуға да мүмкіндік алдық. Қуанышымызда шек жоқ! – дейді ол.</blockquote>Өңірде аталған салаға қызығушы жастарға қолдау да, ойлағанын іске асыруға мол мүмкіндік те бар екенін атап өттік. Қорқыт ата атындағы Қызылорда университеті Kyzylorda Hub бизнес-инкубаторының жетекшісі Жанарыс Алтынбекұлының айтуынша, әр ай сайын жоспарлы түрде жаңа іс-шаралар ұйымдастырылады.<blockquote>– Бұйырса, 3 мамырда облыс тұрғындары арасында «Kyzylorda Hack» облыстық хакатоны өтеді. 500 000 теңгелік жүлде қоры және 1 оқу гранты қарастырылған байқау оқушыларға жақсы мүмкіндік деп ойлаймын. Биылғы ерекшелік – хакатон секциялары бойынша жеке-жеке байқау өткізу жоспарлануда. Жыл соңына дейін 4 хакатон ұйымдастырылатын болады. Айта кетейік, былтыр облыс әкімінің қолдауымен «Smart City Kyzylorda Hackathon» идеялар байқауы өтті. Бесінші мәрте өткізілген байқауға 350 қатысушы, 120-ға жуық жоба тіркелген болатын. Үш секция бойынша әр жеңімпазға қаржылай сыйлықтар табысталды. Сонымен қатар біршама оқушылар Қорқыт ата атындағы Қызылорда университетінің білім грантын иеленді. Биыл да талантты, талапты жастарды күтеміз! – дейді ол.</blockquote>Фото: Сыр бойы &nbsp;

Қызылордалық зияткерлер су тасқынына қарсы жүйе ойлап тапты

<a href="https://kyzylorda-news.kz/">Kyzylorda-news.kz</a> &nbsp;Бұл туралы Мәжіліс депутаты Асхат Аймағабетов Телеграм каналында жазды, деп хабарлайды<a href="https://baq.kz/mektep-direktorlaryna-ayyppul-salu-problemasy-ushygyp-barady-aymagambetov-329622/"> BAQ.KZ.</a>Мектеп, аурухана, балабақша, колледж сияқты бюджеттік мекемелердің директорларына жүз мыңдаған айыппұл салу проблемасы ушығып барады. Кейін сол 500-600 мың айыппұлды директор қалай және кімнен жинайтыны айтпаса да түсінікті ғой.Мектеп директорларын мектептің үш ауысымды болғаны үшін немесе құрал-жабдықтары мен лабораториялары жеткілікті деңгейде болмағаны үшін айыппұл төлеуге мәжбүрлеу әділетсіз. Өйткені, егер мектеп үш ауысымды болса, бұл директордың кінәсі емес, әкімшіліктің кемшілігі. Бұған қоса, мемлекет тарапынан мектептердің жеткіліксіз қаржыландырылуы да осы мәселелерге әкеледі, - деп жазды ол.Депутаттың пікірінше, &nbsp;құзыретіне жатпайтын, яғни тікелей әсер ете алмайтын мәселелер үшін айыппұл салуды тоқтату қажет.Сондай-ақ, дәрігерлерді өз мамандығынан тыс жұмыс істеуге тартқан, қажетсіз есептерді талап еткен үшін жауаптылыққа тарту құзыретін полициядан алып, бұл өкілеттікті Денсаулық сақтау министрлігінің комитетіне беру ұсынысымды білдірдім.Кезінде біз дәл осындай шешім қабылдап, соның арқасында қағазбасылықпен, мұғалімдерді өзіне тән емес жұмысқа тарту проблемасымен күрес нәтижесін берген болатын. Сонда біз мыңдаған заңды бұзған басшыларды жауапкершілікке тартып, осылайша беттерін қайтарып, жағдайды өзгерткенбіз. Тиісті түзетулерді бердік, - деп жазды Аймағамбетов.Фото: Телеграм каналынан

Мектеп директорларына айыппұл салу проблемасы ушығып барады – Аймағамбетов

<a href="https://kyzylorda-news.kz/">Kyzylorda-news.kz</a>&nbsp; "Анаға тағзым" орталығында "Қыз тәрбиесі – ұлт болашағы" атты шара ұйымдастырылды. &nbsp;«Мансап» мектебімен бірлескен кездесуге жоғары сынып оқушылары қатысып, өздерін толғандырған мәселелерді ашық талқылады. Еркін форматтағы жиында мектептің ішкі тәртібі мен оқушы қалауы, қыз баланың құқығы және қауіпсіздігі сынды актуалды тақырыптар сөз болды.Кездесуде қатысушылар өзекті сауалдарға орталық психологымен бірлесе жауап іздеді. Маңызды мәселелердің шешімін табуда қыздар барынша белсенділік танытып, өз ойларын еркін жеткізуі үшін Аруна Асылбекқызы психологиялық жаттығулар ұйымдастырып, кәсіби кеңесімен бөлісті.Айта кету керек, Алаш жұртының қызды қырдағы құралайға теңеп, төрден орын бергені баршаға белгілі.&nbsp;Тарихқа көз жүгіртсек, сонау сақ заманында мемлекет тізгінін ұстаған Тұмар патшайым мен Зарина сұлудан бастап, Алаша ханның ханымы Ханбибі, Абылай ханның ержүрек қызы Айтолқын, Қаракерей Қабанбай батырдың жары жары Гауһар, Сүйіндік Олжабай батырдың анасы Есенбике, Кенесары Қасымұлының қайраткер қарындасы Бопай ханым ерлермен бірдей ержүректік танытып, ел іргесін жаудан қорғаған.&nbsp;Ал бертін келе қазақтан шыққан ағартушылар қыздардың білім алуына ерекше көңіл бөлген. Ыбырай Алтынсариннің қазақ даласында алғаш рет қыздарға мектеп ашуы сол заманда жасалған көреген шешім, батыл қадам болды. Кеңес үкіметі тұсында да қазақ қыздары білім мен ғылым, медицина, мәдениет, ауылшаруашылығы, авиация, экономика және өзге де салаларда қызмет етіп, ерен еңбектің үлгі көрсетті.Қазіргі уақытта да қыздардың білімді, өз құқығын білетін сауатты болуы өте маңызды.&nbsp;&nbsp;Фото:facebook.com/anagatagzym.kzo

"Анаға тағзым" орталығында мектеп оқушыларының қатысуымен шара өтті

Байқоңырдың әлеуеті артып келеді

<a href="https://kyzylorda-news.kz/">Kyzylorda-news.kz</a> &nbsp;Көктем келіп, күн жылынған шақта түрлі зиянкестер де бас көтере бастайды. Соның ішінде кенелердің белсенділігі артатын шақ&nbsp;– осы көктем мен жаз айлары. Кененің адам мен малды шағуы көптеген жұқпалы ауруларға алып келеді. Атап айтар болсақ, кене инцифалиті, кене сүзегі, кене боррелиозы, геморрагиялық қызба секілді қауіпті жұқпалы аурулар. Әсіресе, көп таралған әрі қауіпті саналатын Конго-Қырым геморрагиялық қызбасының алдын алу мақсатында Шиелі аудандық санитарлық эпидемиялогиялық бақылау басқармасының басшысы Гүлзада Әйтекеевамен сұхбаттасқан болатынбыз.–&nbsp;Гүлзада Садықбекқызы, өзіңізге мәлім, Қызылорда&nbsp; облысы Конго-Қырым геморрагиялық қызбасының табиғи ошағында орналасқан. Бұған өңірдің климаттық жағдайының қолайлы болуы басты себеп. Жыл сайын өткізілетін эпидемиологиялық маусымда аурудың алдын&nbsp; алу шаралары қалай жүргізілуде?–&nbsp;Біріншіден, кенеден келер қауіптің алдын алу шараларына үлес қосқаныңыз үшін алғыс білдіремін. Ауданның биылғы көктемгі эпидмаусымында Конго-Қырым геморрагиялық қызбасы ауруының таралуында 20 елді мекен қауіпті болып отыр. Қазіргі уақытта бұл аурудың алдын алу мақсатында заласыздандыру жұмыстары кесте бойынша, I кезеңі 9 сәуір мен 27 сәуір аралығында жүргізілсе, II кезең мамыр айының 9-ы мен 27-күндері аралығында жүзеге асады.–&nbsp;Былтырғы жылы кене шағып, осы ауру түріне шалдыққандар болды ма? Ал биылғы ахуал қалай?–&nbsp;Жыл басталғалы 14 кене шағу жағдайы тіркеліп, жақында 1 адамнан КҚГҚ ауруы анықталып, Майлытоғай ауылының тұрғыны қайтыс болды. 2023 жылы ауданда эпидемиологиялық ахуал өте күрделі болып қалыптасып, облыс бойынша аурушаңдықтың 30 пайызын, өлім-жетімнің 66,6 пайызын құрады. Өткен жылы ауданда 17 күдікті науқас тіркелсе, оның 4-інің диагнозы расталып, өкінішке қарай, 2 өлім жағдайымен аяқталды.&nbsp;2023 жылы аудан бойынша зерттеуге 6 345 кене жиналып, 810 сынама зерттеліп, оның 51-інен оң нәтиже анықталды. Оның 12 пайызы елді мекеннен, 68 пайызы ауылшаруашылық малдарынан алынған кенелерден анықталса, 20 пайызы табиғаттан алынған. Яғни, құрамында КҚГҚ вирусы бар кенелердің 80 пайызы ауылшаруашылық жануарлары мен елді мекендерден табылған кенелер болып отыр. Сондықтан алдағы эпидемиологиялық маусымда аудан бойынша тұрақты жағдай қалыптастыруда кенеге қарсы өңдеу алдында мал қораларының тазалығына, мал бастарының өңдеумен толық қамтылуына, тұрғындарға кенеден сақтану шараларын насихаттап, аурудың алдын алу шараларына аса назар аударамыз.–&nbsp;Адам бойына инфекция қалай жұғады? Одан сақтану жолдарына тоқталсаңыз.–&nbsp;Инфекция жұқтыру көп жағдайда кене шағумен, мал күтімімен, ауылшаруашылық жануарларын союмен, науқасқа күтім жасаумен байланысты болады. Сол себепті тұрғындарға айтарым, сақтық шараларын қатаң сақтау керек. Далаға, егістікке немесе фазендаға, мал күтіміне қатысатын кезде міндетті түрде ұзын жеңді, ашық түсті киім киген дұрыс. Мысалы, шалбар киіп, оның балағын етіктің немесе шұлықтың ішіне салып алған жөн. Сондай-ақ 1-2 сағат сайын үсті-басын қағып, қарап отыру қажет. Егер екі адам болса, бірінің үстін бірі қарап, байқағаны дұрыс. Кене адам денесіне жабысқан жағдайдың өзінде бірден шағуға кіріспейді, кем дегенде 2-3 сағат ішінде өзіне қолайлы орын, яғни адам терісінің жұқа, қантамырларының өте жиі шоғырланған жерін іздейді. Содан соң, қоректенуге жабысады. Сондықтан кешкілік далалық жұмыстан келгенде, киімді сыртқа шешіп, қағып, жабысқан кене бар ма, жоқ па деп, денесін мұқият қарап, кене жабысқан жағдайда міндетті түрде жалаң қолмен емес, қолғаппен, жаймен ғана, ешқандай сұйықтық, май тамызбай, тұмсық тұсынан тері қабатына саусақты батырыңқырап, ырғамай, тергемей, денесін қатты қыспай, жоғары жұлып алу қажет.–&nbsp;Қырым гемморрагиялық қызбасының алғашқы белгілері қандай?–&nbsp;Ауру температураның кенеттен 40 градусқа дейін көтерілуінен басталады. Күшті безгектің аясында науқастар бүкіл денеде әлсіздік пен ауырсынуды сезеді. Оған бет, мойын, жоғары кеуде қуысының гиперемиясы, склера тамырларының және конъюнктиваның инъекциясы тән. Егер емделмеген болса, өлімге әкелуі мүмкін. Егістікке шыққан жағдайда, шөп орғанда, отын шапқанда, далалықта денеге зақымдалған кене жүріп өтсе, оны адам өзі байқамай қалуы мүмкін. Оның сілекейі, нәжісі болсын, кез келген зақымдалған кененің сұйығы адамның сау зақымдалмаған денесіне тиген жағдайда, ол 100% ауруға шалдығады. Сонымен қатар мал қырқымы мен мал сою барысында мал ауырмайды, бірақ оның денесінде кене өте көп болса, оның ішінде зақымдалған кене болса, вирус оның денесіне, ағзасына өтеді де, одан шыққан кез келген қан, биологиялық, т.б. сұйықтықтары адамды 100% ауруға шалдығуға алып келеді. Сол себепті мал қырқымы барысында қолға қолғап киіп жұмыс істеу, жалаң қолмен малдың терісіндегі кенені жұлып алмау, сондай-ақ мал сою барысында ауырып тұрған немесе әлсіз малдарды ветеринария маманының анықтамасы арқылы сою қажет. Мал сою барысында міндетті түрде қорғаныс құралдары, резеңке қолғапты пайдаланған жөн.–&nbsp;Кене кеселінен сақтану үшін тұрғындарға қандай кеңес бересіз?–&nbsp;Ең қауіпті болып есептелетін мамыр, маусым, шілде айларында кененің, әсіресе, геоломо тұқымдас кенелердің пайда болуы өте жоғары деңгейде. Осы кезеңде мүмкіндігінше барлық сақтық шараларын қатаң түрде сақтауға шақырамын. Клиникалық белгілерден кене шағу-шақпауы міндетті емес. Бірақ өте жоғары температурада болып, қалшылдап, дірілдеп тұмау тәріздес немесе құсып, жүрек айнып, іші кеткен жағдайлар орын алса, үйде өз-өзін емдеумен айналыспай, міндетті түрде медициналық көмекке жүгініп, дәрігерлер бақылауында болғаны дұрыс.–&nbsp;Сұхбатыңызға көп рақмет. Жұмысыңызға сәттілік тілейміз.&nbsp;Сұхбаттасқан Мейіржан ИБРАГИМОВФото:freepik.com&nbsp;

Шиеліде кенемен күрес қарқынды жүргізілуде

Қызылорда кітапханашылары оқырманмен тығыз байланыста

<a href="https://kyzylorda-news.kz/">Kyzylorda-news.kz</a> Көктемгі санитарлық-тазалық жұмыстары басталғалы жалағаштықтар көшелерді күл-қоқыстан тазартып, сенбіліктерде белсенділік танытуда. Бұдан аудан жұртының тазалық ортақ абырой екенін жақсы білетінін аңғаруға болады. Кешегі аптаның соңында да Жалағаш кенті және ауылдық округтерде жаппай сенбілік шаралары ұйымдастырылды.&nbsp;Жалағаш ауданының әкімі Ардақ Ибраимов сенбілік жұмыстарымен танысып, аяқ су жүретін қарықтарды қазу жұмыстарын жылдамдатып, тұрғындар тарапынанда тазалық жұмыстарына белсенділік болу қажеттігін айтты. Сондай-ақ, аудан әкімі қоғамдық жұмыста жүрген қызметкерлермен кездесіп, туған жердің келбетін көркейтуде қосып жатқан үлестеріне алғысын білдірді.&nbsp;Айта кетейік, сенбілік жұмыстарына аудан бойынша меншік нысанына қарамастан барлығы 145 мекемеден 1800-ге жуық адам қатысып, 20 дана техника жұмылдырылды. Сенбілікте көшелер мен саябақтардағы қоқыстар тазартылып, қураған талдар кесіліп, аяқ су жүретін арықтар қураған жапырақтардан тазартылып, 12 тоннаға жуық күл-қоқыстар белгіленген орындарға шығарылды. Сондай-ақ, сенбілік жұмыстарының аясында көшелер, аллеялар мен саябақтарда 1500 түп ағаш отырғызылды. &nbsp;

Жалағаш ауданы: 12 тоннаға жуық күл-қоқыс белгіленген орындарға шығарылды

<a href="https://kyzylorda-news.kz/">Kyzylorda-news.kz</a> &nbsp;Мұндай қылмыс жасайтындарды «адам» деп айтуға болмайды, «ауру», азғындарды ешқашан өзгертуге болмайды.Тұрмыстық зорлық-зомбылықпен күресуге бағытталған заңға, яғни халық арасында «Салтанат заңы» деп аталып кеткен заң қабылданды деп бөркімізді аспанға атып жатырмыз. Жауапкершілікті қатаңдатумен енді мәселе шешіле ме? Заң неге өзгере береді осы? Бишімаев бұл заңның көзді ашып-жұмғанша қабылдануына әсер етті ме? Ата-анасы қол көтеріп, баласына ұрысса ата-ана құқығынан айрылады дегені рас па? Мәжіліс депутаты Асхат Аймағамбетов Qasqa Jol жобасында қонақта болып, қазір қоғам арасындағы ең өзекті мәселелерді түсіндіріп, сұрақтарға жауап береді, деп хабарлдайды <a href="https://sn.kz/o-am/111948-azgyndar-omir-boiy-bas-bostandygynan-aiyrylu-kerek-aimagambetov-video">Skifnews.kz </a>ақпарат порталы.Естеріңізге сала кетсек, 2024 жылғы 15 сәуірде Қазақстан Республикасының Президенті Қасым-Жомарт Тоқаев тұрмыстық зорлық-зомбылықпен күресуге бағытталған заңға қол қойды.Жаңа заң әйелдер мен балаларға қатысты қылмыстар үшін жазаны күшейтуді көздейді.Мәжіліс депутаты Асхат Аймағамбетовтың түсіндіруінше, бұл арнайы дайындалған жеке заң емес. Қылмыстық кодекске, неке мен отбасы заңнамасына және әкімшілік құқықбұзушылық кодексіне өзгеріс енгізілген. Өзгерістер бір жинақ ретінде басылып шықты. Президент оған 15 сәуір күні қол қойды. Оны кез-келген адам интернеттен оқи алады.«Бұл заң тек отбасылық мәселеге қатысты заң емес. Соның ішінде педофилдерді өмір бойы бас бостандығынан айыру нормасы қарастырылды. Әлеуметтік желіде пікір білдірушілердің қоятын сұрағы бір «неге оларды тек бас бостандығынан айырамыз, неге өлім жазасын кесілмейді» дейді. Біздің конституциямызда ең ауыр жаза – өмір бойы бостандығынан айыру. Бұған дейін 15-20 жыл болды. Олар сол 15-20 жыл отырады да шығады.Мұндай қылмыс жасайтындарды «адам» деп айтуға болмайды, «ауру», азғындарды ешқашан өзгертуге болмайды. Олар мұндай құқықбұзушылыққа барса, ол өмір бойы отыру керек, ешқашан шықпау керек, қоғамнан алыстату керек.Біз тіпті хирургиялық кострацияны да ұсынғанбыз. Бірақ, біздің елдің өзіне алған халықаралық міндеттемелеріне толығымен келмейді деп түсіндірді. Екіншісі кішкентай сәбилерді өлтіргенін үшін», - дейді Асхат Қанатұлы.Фото: Нұрболат Нұржаубай<figure class="media"><div data-oembed-url="https://youtu.be/HAWYiBuy19E"><div style="position: relative; padding-bottom: 100%; height: 0; padding-bottom: 56.2493%;"><iframe src="https://www.youtube.com/embed/HAWYiBuy19E" style="position: absolute; width: 100%; height: 100%; top: 0; left: 0;" frameborder="0" allow="autoplay; encrypted-media" allowfullscreen=""></iframe></div></div></figure>

Азғындар өмір бойы бас бостандығынан айырылу керек – Аймағамбетов

<a href="https://kyzylorda-news.kz/">Kyzylorda-news.kz</a> Түнеукүні Шиелінің кеші өлеңмен батып, теріскейден соққан салқын самал сол өлеңмен тербеліп тұрды. Көкшоқы мөлтек ауданында орын тепкен «Арман» мәдениет үйінде оқылған өлең мен шырқалған ән, ойналған күйдің дауысы Шиелінің көгінде шалқып, бейнебір айналасына шуағын шашып, тіршілік біткенге рухани күш-қуат, жігер беріп тұрғандай болды. Осыншалық сиқырдың себепшісі, ақын, журналист, жазушы Сәрсенбек Бекмұратұлы мен әнші-сазгер, журналист Өркен Исмаилдың 75 жылдығына арналған «Қатар жанған қос шырақ» атты кеші еді. Шиелі аудандық әкімшілік пен мәдениет бөлімінің ұйымдастыруымен өткен поэзия кешіне жиналғандар қос замандас Сәрсенбек пен Өркен ақынды мүлде басқа қырынан танып, ақынның сөзіне жазылған әндерді тыңдап, өлеңдеріне қанығып қайтты. Әуелден сөз құдіретін түсініп, ақын-жазушыларын төбесіне көтеріп, құрметтің ең үлкенін жасай білетін аудан халқы үшін, оның ішінде өлең сүйер қауымға бұл кеш ерекше көңіл-күй сыйлады.Жалпы мынау он сегіз мың ғалам, оның ішіндегі жаратылыс, төселген жер, қазықтай қағылған тау, сәулесін төккен күн, аспандағы ай, жерді мекендеген жан жануар түгел бір әлем болса, ақындар қауымы өзінше бір әлем. Ал киелі өңірден шыққан Сәрсенбек Бекмұратұлы мен Өркен Әзімханұлы – сол әлемде өмір сүріп, жалындай жанған, жұлдыздай жарқыраған, жауһар жырларымен елге танылып, оймақтай ойлары арқылы оқырманның оң бағасын алып жүрген азамат.&nbsp;Иә, ақынын құрметтеген ел азбайды десек, жаңылыспаймыз. Арнайы шығармашылық кештің шымылдығын түру үшін сахнаға Шиелі аудандық мәслихат төрағасы Айтбай Жандарбеков көтерілді.Қос қалам иесіне ықыласын білдірген төраға Шиелі ауданы басшысы Нұржан Ахатовтың құттықтауын жеткізіп, ақындардың иығына шапан жауып, ізгі құрметін білдірді.&nbsp;Сәрсенбек ақын 1949 жылы Шиелі ауданының Еңбекші ауылында дүниеге келіп, №45 «Ақ Орда» мектебін, Қазақ мемлекеттік университетінің журналистика факультетін бітірген. 1967-1985 жылдары аудандық «Өскен өңір» газетінде әдеби қызметкер, жауапты хатшы, бас редактордың орынбасары болды. 1985 жылдан Алматы облыстық «Жетісу» газетінде жауапты хатшының орынбасары, бөлім меңгерушісі қызметін атқарды. 1989 жылдан республикалық Қазақ радиосында комментатор, бөлім меңгерушісі, «Шалқар» ұлттық бағдарламасында редакция меңгерушісі болып қызметтер атқарды. Бүгінде Алматы қалалық «Алматы ақшамы» газетінде қызмет атқарып келеді. Ақын ағамыз бұқаралық ақпарат құралдарында ұзақ жылдар қызмет атқара жүріп, өлең жазуды да жанына серік етеді. «Жалын» баспасынан әр жылдары жарық көрген «Балауса», «Дария жыры» және «Қарлығаш» жыр жинақтарына топтама өлеңдері енген. 1986 жылы «Қайнар» баспасынан «Малды ауылдың өрендері» атты деректі повесі, 1991 жылы «Жан жұпары» жыр жинағы жарық көрді. Көркем очерктерінің басын құрап «Ел перзенттері» атты қос кітабы жарық көрді. Қазақстанның «Құрметті журналисі», Қазақстан Жазушылар одағының мүшесі.&nbsp;Әсерлі кеште, ағынан жарылған Сәрсенбек Бекмұратұлы өзінің туған жерге деген сағынышы мен құрметін өлеңмен өріп, сөз арасында осында өткен күндерін сағынышпен есіне алып отыратынын айтты. «Менің түсіме туған жерім жиі кіріп тұрады. Кейде ұйықтап жатып, баяғы аға-апаларыммен баспаханада «Өскен өңірді» басып жатамын. Содан оянып кетсем, «Алматы ақшамында» жүремін. Осындай қызықты сәттер көп кездеседі», – дейді ақын. Ақын әңгіме арасында бұдан бөлек, «Өскен өңір» газетінде қызмет еткен уақыттағы қызықты оқиғалары мен өмір жолында кездестірген тау тұлғалармен өткізген күндерін де сөз етіп, көпшіліктің көкейіндегі сауалдарға жауап берді.&nbsp;Қос замандастың жастық шақтан, кемел жасқа жеткенге дейінгі өмір жолы көз алдымызда осылайша белең берді. Қазақстан Журналистер одағының мүшесі Өркен Исмаил пайым-парасаты мен біліктілігінің арқасында №50 мектепте еңбек жолын ұстаздықтан бастап, ауданда ішкі істер бөлімінің саяси тәрбие жөнінде орынбасары, аудандық паспорт столының бастығы, аудан әкімінің әлеуметтік салалары бойынша орынбасары сияқты лауазымды қызметтерде жұмыс істеген. Мұнымен қоса, Шиелі аудандық «ХАҚ» КМК директоры, комсомол комитетінің бюро мүшесі, Шиелі, Жаңақорған аудандарының атынан депутат болып сайланған жанның сондайақ, милиция подполковнигі деген шені бар. Одан бөлек шығармашылыққа жақын өнер иесі 30-дан аса ән жазған композитор. Бүгінгі оның туған жерге арнаған «Шиелім» атты өлеңі аудан халқының әнұранына айналған. Сондай-ақ республикада тұңғыш милиция қызметкерлерінен «Жалын» ансамблін құрып, әлі күнге көркемдік жетекшісі болып жүр. Шығармашылыққа жақын жан екенінің тағы бір дәлелі – аудандық «Өскен өңір» газетінің бас редакторлығын абыроймен атқарған және бүгінгі таңда тұрақты автор. Рухани кеште Сәрсенбек аға өлең-жырын оқыса, Өркен аға «Қыздың жасын сұрама, қыздың жасы 18» деген өлеңді сырнаймен орындап көрерменнің көңілін көтерді.&nbsp;Шығармашылық кешке арнайы келген әнші, сазгер, Қазақстан Республикасына еңбегі сінген қайраткер Әлмырза Ноғайбаев, Журналистер одағының мүшесі, белгілі сатирик, Шиелі ауданының «Құрметті азаматы» Нұрмахан Елтай, Ы.Жақаев атындағы күріш өсіру музейінің директоры Құттықыз Ыханова ыстық лебіздерін білдіріп, естеліктерден сыр шертті.&nbsp;Осы ретте айта кетуіміз керек, аудан халқының рухани жаңғырып, тұрғындарды күнделікті күйбең тірліктен бір мезгіл ажыратып, поэзия әлемімен өткенге саяхат жасауына бірден-бір ұйытқы болған «Арман» мәдениет үйінің еңбегі еселі. Қашан да ізденіс үстінде жүретін Нұргүл Шалекеева осы жолы да өнердің шын жанашыры екенін көрсетіп, дүйім елге ерекше кеш сыйлауға мұрындық болды.Гүлнәр ДҮЙСЕБАЙ

Шиелінің қос шырағы

<a href="https://kyzylorda-news.kz/">Kyzylorda-news.kz</a> Fingramota.kz сіздердің назарларыңызға апаттан зардап шеккен қарыз алушыларға көмек көрсету шеңберінде банктер мен микроқаржы ұйымдары жүзеге асырып жатқан шаралар туралы азаматтардың өзекті сұрақтарына жауаптар ұсынады. Бұл сұрақтар ҚР Қаржы нарығын реттеу және дамыту агенттігінің кері байланыс арналары – «Fingramota Online» мобильдік қосымшасы және «1459» нөмірі бойынша сall-орталық арқылы келіп түсуде.«Fingramota Online» мобильдік қосымшасы Агенттікте халықтың қаржы реттеушісімен жедел өзара іс-қимылын және кері байланысын нығайту мақсатында жұмыс істейді. Онда 14 тақырыптық бөлім бар, оларда реттеушіге қаржы өнімдері мен көрсетілетін қызметтер, алаяқтық жағдайларында қаржы ұйымдарымен, МҚҰ, коллекторлық агенттіктермен өзара іс-қимыл жасау жөнінде сұрақтар қоюға болады. Мобильдік қосымша іске қосылған сәттен бастап «Fingramota Online» арқылы пайдаланушылардан 10 мыңнан аса сұрақ қабылданып, өңделді.Қаржы реттеушісінің қызметі туралы қолжетімді әрі толық ақпарат алу үшін Агенттікте call-орталық жұмыс істейді, ол арқылы бүгінгі күні азаматтардан 53,3 мыңнан астам қоңырау келіп түсті. Call-орталықтың жұмыс уақыты: жұмыс күндері сағат 10.00 – 17.00 аралығы, түскі үзіліс сағат 13.00 – 14.30.Сұрақ: Су тасқынынан зардап шеккен аймақтардағы қарыз алушылар қандай көмек ала алады? &nbsp;Жауап: Мемлекет басшысы Қасым-Жомарт Кемелұлы Тоқаевтың өңірлердегі су тасқынынан зардап шеккендерге көмек көрсету туралы тапсырмасы шеңберінде ҚР Қаржы нарығын реттеу және дамыту агенттігі банктермен және микроқаржы ұйымдарымен (МҚҰ) бірлесіп табиғи апаттан зардап шеккен азаматтарға, шағын және орта бизнес субъектілеріне қолдау көрсету іс-шараларын іске асыруда. Мәселен, жергілікті атқарушы органдардың тізімдеріне сәйкес су тасқынынан зардап шеккендер санатына жатқызылған барлық азаматтардың кредиттері бойынша төлемдер 2024 жылғы 1 сәуір – 30 маусым аралығында 3 ай мерзімге кейінге қалдырылады.Зардап шеккен азаматтардың кредиттері бойынша су тасқыны салдарының ықпалына байланысты туындаған, төлемдердің кешіктірілгені үшін айыппұлдар мен өсімпұлдар есептелмейді.Зардап шеккен барлық дара кәсіпкерлерге, сондай-ақ су тасқыны шаруашылық қызметтің бұзылуына әкеп соққан шағын және орта бизнес субъектілеріне олардың берген өтініштері ескеріле отырып, кредиттер бойынша төлемдерді кейінге қалдыру мүмкіндігі берілетін болады.Банктер мен МҚҰ қарыз алушылардың мүлкі мен жеке шаруашылығына, табысы мен қаржылық жағдайына келтірілген зиянның әсерін бағалау үшін әрбір зардап шеккен қарыз алушының жағдайына жеке талдау жүргізеді, оның негізінде кредиттер бойынша дербес қолдау көрсетудің қосымша шаралары айқындалатын болады.Сұрақ: Су тасқынынан зардап шеккен барлық жеке қарыз алушыларға кейінге қалдыру қарастырылған ба?Жауап:&nbsp;Өңірлік әкімдіктер қалыптастыратын апаттан зардап шеккен қарыз алушылардың тізімі негізінде аталған азаматтарға ағымдағы жылғы 1 сәуір – 30 маусым аралығында банктік қарыздар мен микрокредиттер бойынша төлемдер кейінге қалдырылады. Қарыз алушының аталған тізімде болу-болмауын тексеру үшін тұрғылықты жері бойынша жергілікті атқарушы органға немесе өзіңіздің кредит берген ұйымыңызға жүгінуге болады.Сұрақ: Бизнес өкілдері кредиттері бойынша төлемді қалай кейінге қалдыра алады?Жауап: Төлемді кейінге қалдыру туралы өтініш жазып, оны өз банкіңізге немесе МҚҰ-ға беру керек. &nbsp;Зардап шеккен қарыз алушыларды көмек шаралары туралы хабардар ету мақсатында кредиттік ұйымдардың ресми сайттары мен әлеуметтік желілердегі аккаунттарында тиісті өтініштерді берудің нақты алгоритмдері және кредиттерді қайта құрылымдау тәртібі жарияланады.Сұрақ: Кейінге қалдыру кезеңінде өсімпұлдар мен айыппұлдар есептеле ме?Жауап: Кейінге қалдыру кезеңінде өсімпұлдар мен айыппұлдар есептелмейді.Сұрақ: Кредиттік ұйым қарыз алушыларға қайта құрылымдау жүргізуден бас тартса не істеу керек?Жауап: Егер қарызды қайта құрылымдау шарттары бойынша кредитормен келісімге қол жеткізу мүмкін болмаса, қарыз алушы ҚР Қаржы нарығын реттеу және дамыту агенттігіне немесе аумақтық тиістілігі бойынша Агенттіктің өңірлік өкілдік басқармаларына ресми өтінішпен жүгінуге құқылы. Өтініш жазбаша нысанда болуы не e-Otinish жолданым жүйесі арқылы жіберілуге тиіс. Бұл ретте қарыз алушының банкке немесе МҚҰ-ға жолданымын және өзара қолайлы шешімге қол жеткізілмегенін растауды міндетті түрде ұсыну қажет.Сұрақ: Су тасқынынан &nbsp;зардап шеккен азаматтар расында Еңбек министрлігінен өтемақы ала ма?Жауап:&nbsp;Жоқ, 100 АЕК мөлшеріндегі біржолғы өтемақы төлемін және жоғалған және/немесе бүлінген мүлікке өтемақы алу үшін әкімдікке жүгіну қажет. Еңбек министрлігінен және жекелеген банктерден 3 млн теңге және одан астам сомада берілетін өтемақы туралы интернетте, әсіресе әлеуметтік желілерде таратылатын ақпарат – фейк.Адамдарды жаңылыстыру үшін алаяқтар әрбір жарнама постының астына: «Жедел төлем үшін рақмет», «Сома сол күні түседі», «Өтінімді жедел беріңіздер» деген мәтіндері бар боттардың түсіндірмелерін орналастырады.Алаяқтардың басты мақсаты – &nbsp;азаматтарды «Толық» немесе «Өз өтемақымды тексеру» дегенді баса отырып, фишингтік сілтемеге басуға мәжбүрлеу. Одан әрі пайдаланушы алаяқтық сайтқа тап болады, ол жерде оған ақша алу үшін тіркелу ұсынылады. Ал бұл үшін ЖСН, банктік картаның деректемелері, SMS-хабарлама сияқты дербес деректерді енгізу қажет.Азаматтар аталған талапты орындай салысымен олардың деректері автоматты түрде алаяқтарға түседі. Қаскүнемдер өз құрбанының шоттарындағы барлық ақша қаражатын есептеп шығарып немесе «бөтен» кредит ресімдей алады. Сондай-ақ, күмәнді сайттарға өткеннен кейін хакерлік шабуылға тап болу қаупі болады, ол пайдаланушының құрылғысына шпиондық бағдарлама орнатуға негізделеді. Осы қосымшалар арқылы алаяқтар онлайн-банкингке және басқа да құпия ақпаратқа қол жеткізеді.Оның атынан жалған ақпарат таратылатын ұйымға жүгіну арқылы алдау жағдайын білуге болады. Мысалы, Еңбек және халықты әлеуметтік қорғау министрлігі жалған ақпаратқа жедел ден қойып, хабарда көрсетілген сілтеменің қаскүнемдер пайдаланушының жеке деректерін алу мақсатында қолданатын тәсіл болуы мүмкін екенін хабарлады. «Тиісті мемлекеттік қолдау шаралары туралы ресми ақпарат 1414 нөмірінен тек SMS-хабар арқылы таратылады. Азаматтардан тек ресми дереккөздерден алынған ақпаратқа ғана сенуді сұраймыз», - деп атап өтті ведомство өкілдері ресми баспасөз релизінде.Алаяқтардың кез келген, оның ішінде төрт таңбалы нөмірлерді жасай алатынын естен шығармаған жөн, сондықтан SMS-хабарлама арқылы жіберілетін нөмірлерге қоңырау соқпай және ондағы сілтемелерге өтпей, дербес түрде ұйымдардағы жедел желілердің нөмірін теру қажет.Алаяқтарға алданып қалмау үшін қауіпсіздіктің мына қарапайым қағидаларын сақтау қажет:Төлемдер туралы ақпаратты әрқашан банктердің, мемлекеттік органдардың ресми сайттарынан тексеріп отырыңыз; Өзіңіздің жеке және банктік деректеріңізді, әсіресе картаның оның жарамдылық мерзімін және арғы бетіндегі үш таңбалы санды күмәнді сайттарда жарияламаңыз; Ақша туралы әңгіме қозғайтын бөтен адамдардың қоңыраулары мен хабарларына сенбеңіз; Төлем картасындағы 3D-Secure функциясын өшірмеңіз. Барлық транзакцияларды көріп отыру үшін мобильді қосымшадағы SMS &nbsp;және push-хабарламаларды қосып қойыңыз; Электрондық поштаға және мессенджерлерге жіберілген белгісіз файлдарды ашпаңыз;&nbsp; Алаяқтардың сайттарына өтуге мүмкіндік бермейтін вирусқа қарсы сенімді бағдарламаны орнату қажет; Ақшалай қаражатыңызды ұрлаған жағдайда, құқық қорғау органдарына өтінішпен жүгініңіз.Фото: Fingramota.kz

Қазақстан және Қызылорда облысының жаңалықтары