<a href="https://kyzylorda-news.kz/ru">Kyzylorda-news.kz.</a> АИТВ/ЖИТС &nbsp;– қауіпті індет. Бұл – бір қарағанда қарапайым ауру секілді көрінгенімен, оны жұқтырған адамның дерттен айығуы екіталай. Дүниежүзілік денсалық сақтау ұйымының өзі мұнымен күресудің оңай емес екенінін растап отыр. Хош. Әріге ұзамай-ақ қоялық. Сыр өңірінің өзінде спидпен ауыратын сырқаттардың саны көп. Мақтанатын жағдай емес, әрине. Дегенмен, бүгінде Шиелі ауданы облыс аудандары бойынша аталған аурумен көш басында тұр. Біз де бүгінгі тақырыпты тереңірек зерттеп біліп, көп сұрақтың жауабына қанық болу үшін ЖИТС-тің алдын алу және оған қарсы күрес жөніндегі облыстық орталықтың Шиелі ауданындағы филиалының эпидемиолог-көмекшісі Балабек Қапанұлымен сұхбаттасуды жөн көрдік.– Балабек мырза, жалпы ЖИТС қайдан келген және қандай ауру түрі? Толығырақ тоқталып өтсеңіз.– Тілге тиек етіп отырғанымыз – АИТВ/ЖИТС індеті. Қарапайым тілмен айтқанда, АИТВ (адамның иммун тапшылығы вирусы) жұқпасы ЖИТС-тің (жұқтырылған иммун тапшылығы синдромы) басты себебі болып саналады. Ол АИТВ жұқтырған адамның қаны, шәуеті, қынап сұйықтары, ана сүті, дені сау адамға басқа да биологиялық сұйықтықтар арқылы берілуі мүмкін. Нашақорлардың ине мен шприцті бірнеше рет пайдалануы да АИТВ-ның есірткі қолданушылар арасында таралуына әкеліп соғады.Сонымен қатар АИТВ – адамның иммундық жүйесінің тапшылығынан туындайды. Бұл – қазіргі таңда ғасыр дертіне айналып отыр. Аталған ауру түрі ең алғаш АҚШ-та табылды. Әлем ғалымдары АИТВ жұқпасына қарсы тиімді дәріні жасауға жұмыстар жүргізіп, көптеген жетістіктерге жеткенімен, өкінішке қарай әлі күнге дейін дертке қарсы екпе табылған жоқ. Жоғарыда АИТВ жұқпасының қауіптілігін айттық. Дегенмен, көптеген тұрғындар бұл дертке бей-жай қарайтынын жасыруға келмес. Иә, біз үнемі халықты ақпараттандыру мақсатында көптеген іс-шаралар жұргізіп отырамыз. Ел арасында «Бұл аурдың маған қатысы жоқ» деген түсінік қалыптасқан. Дегенмен, аталған ауру адамның жас мөлшеріне, әлеуметтік статусына қарамайды. Кез келген адамның жұқтыру қаупі өте жоғары. Сондықтан әр адам бұған салғырт қарамай, сақтандыру шараларын жүргізіп отыруы керек.– Әлгінде ғана бұл дерт иммундық жүйенің әлсіреуінен туындайды деп айтып қалдыңыз. Дей тұрғанмен, адамдар иммундық жүйесі әлсіресе, оны қарапайым тұмау немесе әлсіздік пен шаршаудың белгілері деп ойлайды. Қала берді маусымдық өзгеріс деп жылы жауып қоя салады. Айтыңызшы, АИТВ ауруының бұдан басқа қандай нақты белгілері бар?– Вирус жұқтырған кез келген адамды сырт келбетіне қарап АИТВ жұқтырған деп айту қиын. Себебі оны жұқтырған адам сіз бен біз сияқты дені сау болып жүре береді. Алайда, вирус тасымалдаушы адамның вирус жұқтырғаннан бастап басқа адамға жұқтыру қабілеті жоғары болады. Вирус адам ағзасындағы иммунитетті зақымдағаннан кейін бірінші кезекте өкпенің қабынуы, дене қызуының көтерілуі, көп мөлшерде салмақ жоғалту, іштің жиі өтуі сынды белгілері кездеседі.– Бұл дерт қандай жолдармен беріледі?– Ауру негізі үш жолмен беріледі. Бірінші кезекте – қан арқылы. Яғни, науқас қан құйдырғанда, ағзалар мен тіндерді ауыстырғанда, жасанды ұрық салдырғанда және залалсыздандырылмаған медициналық құрал-жабдықтар арқылы беріледі. Екінші кезекте – жыныстық жолмен жұғады. Мәселен, АИТВ тасымалдаушы адаммен қорғанышсыз жыныстық қатынаста болғанда. Үшінші – жүкті анадан балаға берілу жолы болып табылады. Яғни, жүктілік кезінде, босану кезінде және емізген кезде беріледі.– Кез келген ауруды анықтау үшін тексеру жүргізілетіні белгілі. Сіздерде АИТВ-ға тексеру қалай жүргізіледі?– Қазақстан Республикасының кез келген азаматы ел аумағындағы медициналық ұйымдарда СПИД орталықтарында ақысыз АИТВ-ға тексерілу мүмкіндігі бар. АИТВ-ға тестілеу СПИД орталықтары мен филиалдарының ИФА зертханаларында жүргізіледі. АИТВ-ға тестілеу ерікті, міндетті, құпия және клиникалық көрсеткіштер бойынша жүргізіледі. СПИД орталықтарында жасырын тексеру кабинеттері жұмыс істейді. Бұл кабинеттің мақсаты – АИТВ статусын білгісі келетін кез келген азаматтың құпия (анонимді) түрде тексерілуіне мүмкіндік береді.– Түсінікті. Сіздерде аталған дерттің қауіптілігін ұғындыру мақсатында арнайы профилактикалық жұмыстар қалай жүргізіледі?– АИТВ-нің алдын алу шаралары аудандық білім саласы бойынша білім бөлімімен бірлескен іс-шаралар жоспары негізінде мектептерде, колледждерде және тынығу лагерьлерінде жүргізіледі. Шиелі аудандық медицина ұйымдарымен бірлесе отырып АИТВ-нің алдын алу мақсатында профилактикалық әдістемелік көмектер көрсетіліп, медицина қызметкерлері арасында семинар-кеңестер жүргізіледі. Сондай-ақ жастар ресурстық орталығы және жастар денсаулығы орталығымен бірлесіп жастар арасында түрлі іс-шаралар жүргізіп отырамыз. Бұдан бөлек, бұқаралық ақпарат құралдары көздерінде түрлі тақырыптық мақалалар жариялап отырамыз.– Осы аурумен ауырған адамдарға нақты емнің жоқ екені мәлім. Десек те АИТВ жұқтырған адамдарды емдеу шаралары қай деңгейде жүргізіледі?– ҚР халық денсаулығы және денсаулық сақтау жүйесі туралы кодекстің 160-бабында толық көрсетілгендей, АИТВ жұқтырған адамдарға тегін медициналық көмектің кепілдік берілген көлемі шеңберінде олар медициналық көмек және дәрі-дәрмекпен қамтамасыз етіледі.– СПИД орталығының мәліметіне сүйенсек, еліміз бойынша АИТВ дертін жұқтырған науқастарың жалпы саны – 52 533 адамды құрап отыр. Бірақ біз әріге ұзамай-ақ облыстағы статистиканы сөйлетсек…– Жалпы республикада да, біздің облыста да АИТВ-ның індеттік жағдайы күрделеніп келеді. Атап айтқанда, облыс бойынша АИТВ жұқтырғандардың саны 316 адамға жетіп отыр. Оның ішінде шетел азаматтары – 35, баспанасыздар – 3, Қазақстан азаматтары – 278, облыс тұрғындары – 256, басқа облыстан келгендер – 22 адамға жетіп отыр. Ал Арал ауданында АИТВ жұқтырғандар – 16, Қазалы – 19, Қармақшы –13, Жалағаш – 4, Сырдария –5, Жаңақорған –21, Байқоңыр –25, Қызылорда қаласы – 141 адам болып тіркелген. Соның ішінде Шиелі ауданында СПИД жұқтырғандардың саны – 22 адамға жетіп отыр. Бұл – басқа аудандармен салыстырғанда айтарлықтай көп. Шиелідегі мұндай науқастарды әлеуметтік жағдайы мен жас мөлшеріне қарай талдайтын болсақ, 22 адамның 5-уі жұмысшы, 1-уі әскери қызметкер, 10-ы жұмыссыз, 1-уі зейнеткер, 4-уі жүкті әйел, 1-уі бір жасқа дейінгі бала. Соңғы бес жылда ауданда АИТВ дертін жұқтырғандардың саны – 11 адамды құрады. Биылдың өзіне соңғы алты айлықта аталған дертті жұқтырған бір адам анықталды. Оның барлығы расында алаңдатарлық жағдай.– Өзінің АИТВ мәртебесін білгісі келген адам қайда барып, кімнен кеңес ала алады?– Шиелі кенті, Досбол датқа көшесі №13 үйде орналасқан СПИД орталығында ИФА зертханасы жұмыс істейді. Көрсетілген мекен-жайға келіп, тегін ерікті немесе құпия түрде АИТВ-ға қан тапсырып, мамандардан толық кеңес ала алады.– Маңызды мәліметпен бөліскеніңіз үшін, рақмет!

Балабек Қапанұлы: Қауіпті дерттен қорғана біліңіз

<a href="https://kyzylorda-news.kz/">Kyzylorda-news.kz.</a> Өмір бір орында тұрмайды. Ұрпақ алмасады, бір толқынды келесі бір толқын алмастырады. Сол секілді бүгінгі жас – ертеңгі елдің тұтқа ұстары. Сондықтан олардың тәртіп мәселесі қашан да өзекті. Бақылауды күшейтпесек, босаңсытудың пайда әкелмейтіні белгілі.&nbsp;Қармақшы ауданы әкімінің орынбасары Жұлдызхан Байназарұлының төрағалығымен кәмелетке толмағандардың ісі және олардың құқықтарын қорғау жөніндегі аудандық комиссия отырысы өтті. Алдымен, аудан әкімінің орынбасары комиссия құрамына аудандық мәслихат шешімімен өзгерістер енгізілуіне байланысты жаңа комиссия құрамымен таныстырып өтті. Мұнан кейін, күн тәртібіне сәйкес «2023 жылдың 6 айында кәмелетке толмағандармен оларға қарсы жасалған қылмыстардың алдын алу бағытында атқарылған жұмыстары туралы» аудандық полиция бөлімінің Жергілікті полиция қызметі бөлімшесінің аға инспекторы Гүлмира Исмайлованың, «Отбасы тұрмыстық қарым-қатынастағы зорлық-зомбылықтың алдын алу мақсатында қабылданған және қабылданатын шаралар туралы» аудандық полиция бөлімінің әйелдерді зорлық-зомбылықтан қорғау тобының инспекторы Айнұр Касимованың баяндамалары тыңдалды.Мәжіліс соңында комиссия төрағасы ағымдағы жылдың шілде айының 15-і күні Маңғыстау облысы, Бейнеу ауданында орын алған жастар арасында топтық төбелесті тілге тиек етіп, мектеп оқушылары мен жастар арасындағы топтық төбелестердің алдын алу бойынша профилактикалық жұмыстарды күшейту бойынша тиісті сала басшыларына нақты тапсырмалар берді. Сондай-ақ, балалардың бос уақытын тиімді пайдалануға жағдай жасап, түрлі форматтағы спорттық, мәдени іс-шаралар ұйымдастыруды міндеттеді.

Кәмелетке толмағандардың ісі жөнінде комиссия отырысы өтті

<a href="https://kyzylorda-news.kz/ru">Kyzylorda-news.kz.</a> Мал шаруашылығы – ауыл халқының күн көрісі, нәпақа, берекесі. Ол азық қана емес бүгінгі күні нағыз табыс көзінің өзі. Нарықтағы еттің бағасы қымбаттаған сайын, мал басының өз құны да бұрынғымен салыстырғанда әлдеқайда өскен. Осы орайда оңай жолмен олжалы болғысы келетіндердің де қатары артып келеді. Яғни, өзгенің өрісіндегі түлікке барымташылардың көз тігуі тиылмай тұр.Жасыруға келмес, соңғы уақытта ауылдық жерлерде мал ұрлығы орын алуда. Осыған байланысты 2019 жылдың 27 желтоқсанында Мемлекет басшысы «Қазақстан Республикасының кейбір заңнамалық актілеріне қылмыстық-процестік заңнаманы жетілдіру және жеке адам құқықтарының қорғалуын күшейту мәселелері бойынша өзгерістер мен толықтырулар енгізу туралы» Заңға қол қойды. Аталған Заңға сәйкес Қазақстан Республикасының Қылмыстық Кодексіне 188-1 «мал ұрлығы» деген арнайы бап енгізілген болатын. Заңға сәйкес мал ұрлағандарға 7 жылдан 12 жылға дейін бас бостандығынан айыру жазасы тағайындалған.<blockquote>– Мен ауылдың шетінде емес, ортасында тұрамын. Өзімнің кәсібіме айналдырып отырған 50-ге жуық уақ малым бар. Алдынғы жылы қорадан бір уақ мал жоғалды. Одан кейін бір түнде 3-4 бас уақ мал жоғалып кетті. Дереу полиция қызметкерлеріне арыз бердім. Орын алған қылмысты іздестірді. Тиісті жұмыстар атқарылды. Бірақ, ауладағы қорада тұрған мал осылай жоғалса, жайылымдық жердегі малдың отар-отарымен, үйір-үйірімен жоғалып кетсе таң қалмайтын күйге жеттім. Бұл белең алып бара жатқан ұрлыққа қандай заң шығару керектігін білмеймін, алайда 12 жылға дейін бас бостандығынан айыратын жаза әлі де жеңіл болып тұрған сияқты. Ұрлық үлкен-кіші деп бөлінбейді. Жалпы айтқанда, тапқан-таянғанын малдың жем-шөбіне жұмсап, бірінің басын екеуге жеткізе алмай, нәпақасын адал еңбекпен тауып отқан малшылардың тірнектеп жиғанын ұрлап кететіндері көңіл алаңдатады. Сондықтан, ұрлық түбі – қашанда қорлық екенін ұғынып, қоғамның діндеп кеткен бұл індетін қалай болса да тоқтату керекпіз, – дейді Еңбекші елді мекенінің тұрғыны Мұқағали Әуезханұлы.</blockquote>Өткен жылы елімізде 500-ден астам мал ұрлығы деректері анықталған. Ұрланған 5 мың бас ірі қараның 3 мыңға жуығы табылып, заңды иелеріне қайтарылған. 60 қылмыстық топ ұсталған. Ал өткен жылы ауданда мал ұрлығы дерегі бойынша 12 қылмыс анықталған. Тиісті жұмыстардың нәтижесінде бұл 33,3 төмендеген. Яғни, биыл ауданда 8 мал ұрлығы дерегі тіркелген.Облыстық прокуратураның мәліметінше, биыл аймақта құқық бұзушылық біршама азайған. Нақтылайтын болсақ, кісі өлтіру – 50, денсаулыққа қасақана ауыр зиян келтіру – 22, алаяқтық – 11, қарақшылық – 50, мал ұрлығы – 54 процентке төмендеген. Сондай-ақ, қадағалаудың арқасында жол апатының да саны едәуір кеміген. Кісі өліміне соқтырған жол апаттары да 39 процентке азайыпты. Аудан көлемінде мал ұрлығы Қоғалы ауылық округінде – 5, Жуантөбеде – 1, Сұлутөбе мен Тұран ауылдық округінде де – 1 дерек тіркелген. Осыған байланысты жыл басынан бері мал ұрлығының алдын алу бағытында 4 мобильдік топ құрылып, қырағылық танытуда. P.S. Иә, десе де маңдай термен жинаған төрт-түлік малдың, оңай жолда барымташыларға олжа болып кеткені кімнің болмасын кеудесіне зіл, көңіліне мұң ұялайтыны белгілі. Қазақтың ұлы ойшыл ақыны Абай Құнанбаев «Адал еңбекпен мал іздемек – ол арлы адамның ісі» деп бекер айтпаса керек-ті. Адал еңбек адамды адалдық, табандылық, жауапкершілік сияқты қасиеттерге баулып игілікке жеткізеді. Ал оңай жолдағы олжа адамға ешқашан опа алып бермесі анық. Адал іспен нан табайық, арам іске жоламайық!

Шиелілік полицейлер мал ұрлығының 8 дерегін тіркеді

<a href="https://kyzylorda-news.kz/ru">Kyzylorda-news.kz.</a> Аудан әкімдігінің мәжіліс залында өткен сегізінші шақырылған аудандық мәслихаттың тұрақты комиссияларының біріккен отырысында күн тәртібіндегі бірқатар мәселелер талқыланды. Олардың барлығы депутаттардың қолдауымен бекітілді.Жиынға аудан әкімінің орынбасары Алмат Аладабергенов, ауылдық округ әкімдерімен қатар дербес бөлім басшылары да қатысты. Оған аудандық мәслихат төрағасы Айтбай Жандарбеков төрағалық етіп, талқыға түсетін мәселелерді атап өтті.Оның алғашқысы Шиелі ауданында шағын және орта кәсіпкерлік саласында атқарылған жұмыстар. Оған қатысты ақпаратты аудандық кәсіпкерлік, өнеркәсіп және туризм бөлімінің басшысы Бақберген Әбсадық баяндады. Бөлім басшысы ұсынған мәлімет бойынша, ауданда бүгінге дейін 7523 шағын және орта кәсіпкерлік субъектілері тіркелген. Бұл тиісті кезеңмен салыстырғанда 141,2 процентке артып отыр. Ал ауданның өнеркәсіп өнімдерін өндіруші мекемелері мен кәсіпорындары осы жылдың 6 айында 36 млрд 178 млн теңгені құрайтын өнеркәсіп өнімдерін өндіріпті.<blockquote>– Ауданымызда өңдеу өнеркәсібінің көлемі 1,6 процентке төмендеуінің негізгі себебі – резеңке және пластмасса бұйымдары мен құрылыс материалдары көлемінің төмендеуі есебінен орын алды. Себебі «КНК Кемикал» ЖШС ф-630 диаметрлі құбырлары «Казатомпром» мекемесіне сатылған болатын. Құрылыс материалдары бойынша «Гежуба Шиелі Цемент Компаниясы» ЖШС-ның маусым айының 11-17 аралығы «Кигок» электр желісінің жыл сайынғы жоспарлы ремонты салдарынан орын алдын. Бұған дейін жоспарлы ремонт қыс айларында жүргізілген болатын. Жыл соңына дейін өңдеу өнеркәсібінің көрсеткіштері 100 проценттен аса орындалатын болады, – деп бөлім басшысы сенімді түрде жеткізді.</blockquote>Күн тәртібіндегі екінші мәселе – ауданда кәсіпкерлікті дамыту жөніндегі «Ұлттық жобаның» жүзеге асырылу деңгейі. Оны аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі басшысының міндетін атқарушы Бақытжан Байділдаев баяндады. Биыл халықты жұмыспен қамту орталығына 4344 азамат жұмыс іздеуші ретінде тіркеліп, 679-і тұрақты жұмыс орындарына орналастырылған. Ал 2228-і азамат жұмыспен қамтудың белсенді шараларына тартылыпты. Биыл жұмыспен қамтудың мемлекеттік қолдау шараларын ұйымдастыруға субвенциялар есебінен 1 млрд 501 млн 061 мың теңге, облыстық бюджет есебінен 58 млн 919 мың теңге, жалпы 1 млрд 559 млн 980 мың теңге қаржы бөлінген. Осы жылдың 6 айында игерілген қаржы көлемі 779 млн 683 мың теңгені құрап отыр.&nbsp;<blockquote>– Аудан бойынша Ұлттық жобалар аясында «Қазақстан Республикасы Үкіметінің жанындағы Халықты жұмыспен қамту мәселелері жөніндегі ведомствоаралық комиссиямен» мақұлданған 35 инфрақұрылымдық жобалар бекітілді. Осы жобалар бойынша жұмыспен қамту жоспары – 281 адам болса, оның ішінде тұрақты – 197, уақытша – 84 жұмыс орны белгіленді. Бүгінде жұмысы басталған 10 жоба бойынша 137 адам жұмысқа жолданып, 123 азамат тұрақты және 14 азамат уақытша жұмыс істеуде. Оның 116-ның еңбек шарты тіркеліп, 108 адамға міндетті зейнетақы жарналары аударылды, – дейді Бақытжан Байділдаев.&nbsp;</blockquote>Ал отырыстың күн тәртібіндегі үшінші мәселесінде аудандық ішкі істер бөлімінің атқарып отырған жұмыстары және алдағы міндеттері туралы айтылды. Оған қатысты толық ақпаратты Шиелі аудандық полиция басқармасының бастығының міндетін атқарушы полиция майоры Қ.Өсербайұлы жан-жақты түсіндірді. Осы жылы жүзеге асырылатын профилактикалық шаралардың басым бағыттарын нақты атап өтті. 2023 жылдың 6 айында жалпы тіркелген қылмыстардың саны 89-ды құрап, өткен жылмен бір деңгейде қалыптасса, олардың ашылу көрсеткіші 4,9 процентке жоғарылаған. Онша ауыр емес және орта санаттағы қылмыстардың саны 38-ді құрап, өткен жылмен салыстырғанда 32,1 процентке төмендепті. Тиісінше аталған санаттағы қылмыстардың ашылу көрсеткіші 2 процентке жақсарған.<blockquote>– Жылдамдықтың әсерінен жол-көлік оқиғалары жиі орын алатын жолдардың бойына Полиция департаментіне қарасты бүгінгі күні 6 түрлі функциясы бар «Экин-патруль» жылжымалы бекеттерін кенттің орталығына кіргізу арқылы жол қауіпсіздігін қамтамасыз ету тәжірибесі қолға алынды. Жалпы аудан көлемінде барлығы 580 көше, жол тораптары бар. Кент орталығында – 210, ауылдарда – 370 көше бар. Олардың барлығын полицияның 1 ғана жылжымалы экипажымен қамту мүмкін еместігін білесіздер. Сондықтан заманауи техникалардың көмегімен жол қауіпсіздігін бақылауға көшу қажет. Өздеріңізге белгілі биыл қаңтар айынан бастап Қызылорда қаласы осындай заманауи техникалардың күшімен қала көшелерін қалыпқа келтіруде. Осыған байланысты «Экин-патруль» жылжымалы бекеттің бір данасын ауданымызға сатып алу жоспарланды. Қажетті құжаттар аудан әкіміне жолданды. Ендігі сол ұсыныстар өздеріңізбен қолдау тауып, тиісті қаражат мәселесі шешілсе, жылжымалы бекеттің ауданымызда тиімді нәтижесін көреміз деп сенемін, – деді Қ.Өсербайұлы.</blockquote>Күн тәртібінде соңғы болып пошта байланыс торабының жұмысы пысықталды. Салаға қатысты ақпаратты аудандық пошта байланыс торабының басшысы Ерлан Алтынбеков айтты. Комиссия отырысында пошта саласында біршама олқылықтың бары анықталды. Оның барлығы рет-ретімен шешімін тауып, тұрғындарды тиімді жағдай жасалады деген сенім бар.&nbsp;Жиында комиссия тарапынан қойылған сұрақтарға жауап берілді.

Шиеліде тұрақты комиссия отырысы өтті

<a href="https://kyzylorda-news.kz/ru">Kyzylorda-news.kz.</a> Елімізде ат әбзелдерін жасайтын ұсталар санаулы болғанымен, олардың қолынан шыққан бұйымдары қазір брендке айналды. Өйткені сұраныс та жоғары, екінші жағынан аймақтағы жылқы жануарының басым көбі біздің ауданға тиесілі. Бұрынғы Бесарықтағы Байкісі мен аудан орталығында кәсібін дөңгелетіп отырған Нұрқанаттың да тігін шеберханасында талай рет болғанбыз. Олардың қолынан шыққан бұйымдары көрші облыстардың нарығына шыға бастады. Алдымен аудан сұранысын қамтамасыз етуді көздеген Нұрқанат Нұрлыбекұлының шеберханасы көздің жауын алады.Қазір жылқы жетектейтін жастар да қайта еңсе көтеруде. Оның үстіне ат спортынан облыс құрамасын толықтай дерлік біздің жігіттер құрайды. Көкпар, аударыспақ, теңге ілу, садақ ату сынды спорт түрлерінен жаңақорғандық жігіттер Сыр намысын қорғап келеді. Әр спорттың жануары бөлек болады, сондықтан оларға дайындалатын әбзелдер де болуы шарт. Қазақта «аттан айырылсаң да, ер-тоқымнан айырылма» деген аталы сөз бар. Осының өзі кешегі көшпелі қазақ халқының ат-әбзелдеріне деген құрметін көрсетеді. Өйткені әбзелдерді тұрмыстық, сәндік, жауынгерлік мақсатқа орай пайдаланып отырған. Жүйрік ат, алтын жалатылған ер-тұрман, сұлу жар – ер-азаматтың ажары деген сөз осыдан қалса керек. ХХІ ғасырда техника қарыштап дамыса да, жылқы әбзелдеріне деген сұраныс азайған емес. Әсіресе бүгінгі кейіпкеріміз Нұрқанат Тұрғанбектің шеберханасына келетіндердің қатары көп.– Жалпы жылқының жабдығын жасау үшін кейде бір айдан да астам уақыт кетеді. Ер-тұрман, үзеңгі, ноқта, тартпа, тоқым, жүген және өзге де әбзелдерін жасай беремін. Тапсырысқа сай жұмыс жасаймын. Заманға сай ат-әбзелдерін жасау кәсібін қолға алғаныма екі жылдан асты. Осы уақытқа дейін мемлекеттен еш көмек сұраған емеспін. Өз күшіммен келемін, – деп бастады әңгімесін.Ер-тұрман жасау үшін білек күшіпен қатар рухани байлық пен парасат керек. Ат әбзелдерінің қыр-сырына зер салған сайын осы кәсіпке деген қызығушылық артады. Мұны жас шебер де мойындады. Жастайынан әкесінің қасында жүріп, жылқы малына жақын өскен жігіт өмірлік кәсібінің кілтін тапты. Жуырда аудан әкімі Руслан Рүстемов оның шағын шеберханасында болып, отандық кәсіпкерлікті дамытуға барынша қолдау жасау маңызды екенін айтып, жас шебердің мерейін асырды. Ел қолдаған ерді біз де қуаттап, мақалаға арқау еткеніміз осыдан.Жалпы қазақ халқының өмірінде ағаштан жасалатын үй және тұрмыстық бұйымдарының алатын орны ерекше. Атқа міну мәдениеті мен жылқы шаруашылығы жер жүзіне Ұлы даладан тарағаны тарихтан белгілі. Сол себепті ат әбзелдері қазақ үшін құнды бұйым. Ел арасында сапалы ер-тұрманға деген сұраныстың жылдан-жылға артып келе жатқаны қуантпай қоймайды. Бізге әбзелдердің бағасынан бұрын қай өңірге экспортталатыны қызық болды.– Көбіне Алматы, Қарабұлақ және Түркістан өңірлеріне өткіземін. Тапсырыс аз емес, қазір інім және досым үшеуміз қызметтеміз. Әлі де тәжірибемді толықтыруым керек. Қазір көзін тапсаң барлық кәсіптен теңге табуға болады. Бұйырса шеберханамды кеңейтіп, қосымша қызметкерлер алу ойда бар. Егер икемі бар жігіттер болса үйретуге дайынмын, – деді ол.– Ал, бағасы қаншадан?– Сапасына байланысты, негізінен ер-тұрмандар 60 мың немесе одан да жоғары болады, жүген 15 мың, тартпа 10 мың, осылай кете береді. Әбзелдерді екпе талдан жасаймыз. Бұл ағаш бізде өседі, тек Өзбекстаннан жіп, былғары терілер (кожа) алдырамыз. Кейде Өскемен қаласына да тапсырыс береміз, көбіне Қарабұлақтан көптеп алуға тырысамын, – деді кейіпкеріміз. Күз бен қыста тапсырыс көп түсетін көрінеді. Өйткені көкпарды елдің Оңтүстік өңірі көбіне күз бен көктем айларында шабады екен. Ер-тұрман жасайтын адамды ерші дейді. Ершілердің ер-тұрманды жасау әдісі әр түрлі. Ердің ағаштан жасалған негізгі бөлегін сүйегі деп атайды. Ағаш тапшы жерлерде ердің сүйегін бірнеше бөліктен қиюластырып, құрап, желімдеп жасайды. Оны «құранды ер» деп атайды. Сол сияқты жуан ағаш дөңбекті екіге жарып, әр бөлігінен ер сүйегін тұтас шауып шығуға да болады. Құралды ер жасауға қайың ағашының безі өте қолайлы екен. Өйткені ол өте берік, әрі жарылып шытынамайды, қаңсымайды, өңделген кезде ағаштың табиғи өрнектері ашыла түсіп, өте әдемі болады. Ер сүйегін тұтас шабу үшін тал, киіз терек тәрізді ағаштар қолайлы.Қарап тұрсақ, бір ерді жасауға қаншама күш, уақыт кететінін білдік, ал толық әбзелдерді жасау шынымен шыдамдылық пен ұзақ уақытты қажет етеді. Байкісінің күні-түні адал еңбегінен осыны көрдік.– Қазір ат әбзелдерін жасау технологиясы дамыған уақыт. Бәсеке де бар, сондықтан өзге өңірлерде сапа мен нарық айтарлықтай рөл ойнайды. Байкісінің жасаған бұйымдарына біздің көңіліміз толады. Бағасы да қолжетімді, ол әлі жас, шыңдала түсуі керек. Бабабдан келе жатқан кәсіпке дем беріп, заманға сай икемдеп жатқан оның қызметіне көңілім толады, – деді ұлттық ат спорты түрлерінен облыстың аға жаттықтырушысы Исламхан Боранбаев.Кішкентайынан атқа мініп, қажетті заттарды тігіп үйренген шебер 17 жасында облыс әкімінің қолдауымен «ЕХРО» көрмесіне қатысып, «Ең жас шебер» номинациясын еншілеген Нұрқанаттың мақсаты айқын. Қазіргі таңға әртүрлі көрмелерге қатысып жүрген шебердің қолынан 50 түрлі зат шығады.

Жаңақорғандық шебер ат әбзелдерінің 50 түрін жасайды

Жаңақорғандық жастар «Банктерге қашанғы жем боламыз» тақырыбында дөңгелек үстел өткізді

<a href="https://kyzylorda-news.kz/ru">Kyzylorda-news.kz.</a> Жаңақорған ауданында облыстық әйелдер күші альянсының «Әйелдер – елдің көркі» атты жобасы жалғасуда. Бүгін жоба ұйымдастырушылары "Қызылорда облысының әйелдер күші альянсы" ҚБ-нің төрайымы Рахима Ахметова мен облыстық мәслихат депутаты Аида Абибулаеваны Жаңақорған ауданы әкімінің орынбасары Бектас Балғабайұлы қабылдап, аудан басшысының ыстық ықыласын жеткізіп, гүл шоқтарын тасбыс етті. Жиында қолға алынып жатқан жаңа бастамалар жайлы ойларын ортаға салды. Қызу естеліктер айтылған басқосу жиыны әрі қарай пікір алмасулармен жалғасты.Мақсаты – әйел адам бір қолымен бесікті, бір қолымен әлемді тербетеді деген сөздің парқын түсіндіріп, отбасы қамымен қатар әртүрлі салада жемісті еңбек етіп жүрген қыз-келіншектердің жұмысын насихаттау.Қоғамдағы әр салада жетістікке жеткен, іскер әйелдердің басын қосқан жиында әйелдердің қоғамдағы белсенділігін тілге тиек етіп, әлемдегі әйелдердің рөлін талқылау арқылы жүйелік мәселелерді шешудің жалпы тәсілдерін әзірлеуді ортаға салды.Халқымыз «бір қолымен әлемді, екінші қолымен бесікті тербеткен» деп ананы ерекше құрмет тұтқан. Мемлекет басшысы Қасым Жомарт Кемелұлының «Қоғамның даму барысын өмірде – нәзік, көңілде – биік, ал істе – мығым әйелдер қауымынсыз көзге елестету мүмкін емес» деген сөзінен-ақ әйелдердің қоғамдағы рөлінің жоғары екенін аңғарасыз. Қазіргі таңда әйелдер Тәуелсіздіктің тірегіне айналды. Іскер әйелдер форумында жаңақорғандық нәзік жандылардың қоғамдағы белсенділігін білдік.&nbsp;Тамыры тереңге тартқан саялы бәйтеректей аналарымыз елдің өсіп-өркендеп, қанат жаюына қомақты үлес қосты. Мұндай көргені мен түйгені мол аналар Жаңақорғанда да көп. Ел болып қалыптасуда еңбек сіңіріп, ірі істерге араласып, кезінде түрлі саланың басшылық құрамында қызмет атқарған Хадиша Баязитова, Фатима Тілеубаева, Зоя Өрғараева, Кенжекүл Көпесова, Хатира Қасқабаева, Азия Қыстаубаева, Ғалия Тұрабаева, Айсара Нәлібаева, Айзада Сақтағанова, Зада Исаева, Зәуреш Шоманова және т.б ауданның әлеуметтік-экономикалық, мәдени-рухани дамуына қосқан үлесі қомақты. Олардың ізбасарлары бүгінде аудан өміріне белсенді араласып жүр.Одан кейін «Іскер әйелдер» қауымдастығының төрайымы Баян Егізбайқызы сөз алып:– Республикада «Іскер әйелдер» қауымдастығының құрылғанына 27 жыл толды. Ал облыста 2018 жылдың қараша айында құрылып, кәсіпкер, меценат Манат Алмашова басшылық тізгінді алды. Әрине ұйымның аудандар мен ауылдық округтерде ашылуы заңдылық. 1997 жылдан кәсіппен айналысып келемін. Бастапқы уақытта қиыншылықтар болды. Осы кәсіпкерлік саласының арқасында бірнеше шет елдерде тәжірибе алмасып, істі дамытудың көзіне қанықтым. Солардың бірі 2012 жылы «Даму» бағдарламасымен Америка Құрама Штаттарына сегіз дәрігер бардық. Онда бізге роботпен ота жасауды көрсетті. Сондағы менің түйгенім, ешқашан бір жұмыспен шектелмей жан-жақты ізденіп, алға ұмтылу қажет, – деді.Аудан әкімінің әйелдер ісі отбасылық гендерлік саясат жөніндегі кеңесшісі Роза Исаева қазақ әйелдерінің отбасы мен қызметті қатар ұстап түрлі дәрежедегі қызметтерді атқара алатынына мүмкіндік бар, бірақ ер азаматты биік ұстаған әйел жолдан жаңылмайтынын айтты.– Ана – шаңырақтың шырақшысы, мемлекеттің тірегі. Ана – отбасының беріктігін сақтаушы, баланы тәрбиелеуші, ерлерін рухани қолдау көрсетуші, елдің дамуына мүдделі жандар. Демек, аналармен дидарласып, кеңесіп тұрғандар ұтады. Өмірде – нәзік, көңілде – биік, істе – мығым әйелдердің бизнесте де, мемлекеттік қызметте де, ағартушылық салада да өзіндік қолтаңбалары бар. Олардың белсенділігімен, жаңашылдығымен, іскерлігімен даму даңғылына түстік. Міне, сондай жауапкершілік жүгін көтеріп жүрген әйелдер аудан әкімімен болған жылы жүздесудің мәнін арттыра түсті. Талап ауылдық округінен келген батыр ана Аманкүл Жұмабекова ауданда жаңа бастамалар қолға алынып, істің сапасына көңіл бөлініп жатқандығын тілге тиек етті. Ал, сунақаталық Шолпан Құлмұратова әйелдер қоғамның тірегі екенін, бүгінгі жетістіктерде әйелдердің үлесі мол екендігін айтты. Иә, қандайда жақсы істің артында әйелдер тұратыны ақиқат, – деді.Айналаға бір сәт зер салып қарасақ, жылдан жылға кәсібін бастап жатқан қыз-келіншектер жетерлік. Шара соңында модератор түрлі салаға өз үлесін қосып жүрген нәзік жандылардыларға жүрекжарды лебізін білдіріп, кеш қонақтарына әр бастаған қадамдарына құт, ісіне сәттілік тіледі. Расымен дәстүрлі дала мәдениетінде қазақ әйелдері өздерінің отбасылық қана емес, қоғам мүшесі ретіндегі әлеуетін өнер-білім саласында, сондай ақ, қоғам кайраткерлері ретінде көрсетіп, өзін-өзі дамытуға мүмкіндігі болды. Сайып келгенде қазақы ортада қарақан басынан гөрі отбасылық мүдденің жоғары тұруы әйелдердің қоғамдықәлеуметтік белсенділігіне кедергі болған жоқ. Оны тарихта есімдері қалған Болған ана, Домалақ ана, Дарабоз ана секілді бүтіндей бір елдің ынтымағына қызмет еткен қайраткер тұлғалар мен Қарқабат, Абақ, Қызай сияқты аналардың бір елдің ұранына айналғанынан байқауға болады. Міне, осындай аналарымыздың ізін жалғаған еліміздің бүгінгі қызкеліншектері де осы күні түрлі салада қызмет етіп, табысқа жетіп келеді. Демек халқымыздың әйел адамды сұлулықтың символына балап қана қоймай, «әлемді құтқаратын» тартылыс күші бар әдемілік деп баға бергенінің өзі жай сөз емес. Бұл жөнінде президентіміз ҚасымЖомарт Тоқаевтың өзі: «Әйелдердің қоғамдағы рөлін кеңейте түсу мемлекетіміздің алдында тұрған негізгі міндеттің бірі» деген болатын. Ендеше ел дамуындағы әйелдердің рөлі, оларды қолдау, жалпы әйелдер қауымының экономикалық белсенділігін арттыру тақырыбы талқыға түскен басқосу ауылдық жердегі аналардың да түйткілді мәселелерінің шешілуіне жол ашады деп үміттенеміз.Аталмыш жоба ауданымыздан түрлі салада жемісті еңбек етіп, қоғамдық жұмыстарда белсенділік танытып жүрген бір топ нәзік жандылар да қатысты. Олар жобаның басты мақсатын дәріптеуде, кешегі қазақ әйелінің даналығы арқылы қазіргі заман әйелінің, анасының, әжесінің бейнесін ашып, болашақ қазақ әйелінің болмысын қалыптастыруға серпін беруде, қоғамда белең алған әйелдерге көрсетілетін зорлық-зомбылықтың, әйел құқығының тапталуының алдын алуға ықпал жасауда қандай қадамдарға бару керектігін өзара сарапқа салды.&nbsp;Сонымен қатар, ауданның бас имамы Сайдулла қажы Сүнетуллаұлы әйелдің қоғамдағы орнын шариғатпен үйлестіре қозғады. Имамның сөзінше, «Бір күні, бір адам Аллаһтың Елшісіне (с.а.с) келіп, былай деп сұрады: «Уа, Аллаһтың Елшісі (с.а.с), адамдардың ішінде жақсы қарым-қатынас қылуға, жақсы сөз айтуға лайықтырағы кім?» Ол кісі: «Анаң» деді, одан кейін деп сұрағанда, «Анаң» деп жауап берді, ал одан кейінше деп сұрағанда, тағы да «Анаң» деп жауап берді. Одан кейін кім деп тағы да сұрағанда, Пайғамбар (с.а.с) «Әкең» деп жауап береді». Абу Хурайрадан Байхақи риуаят еткен хадисте: «Әйелдердің еркектерден артықшылығы Аллаһ оларды сезімтал етіп жаратқан. (Еркектерге қарағанда 99 есе сезімтал келеді), делінген. Міне, осының өзі исламдағы әйелдің орнын әспеттейді. Қазақ халқы әйелге деген мұндай құрметті өмір салтында ұстанып отыр.Жылы жүздесу соңында қожакенттік зейнеткер Тұрғанкүл Шонтукова бата берді.

Жаңақорғанда «Әйелдер – елдің көркі» атты жоба жалғасуда

<a href="https://kyzylorda-news.kz/ru">Kyzylorda-news.kz.</a> Мемлекет бюджетін молайтып, кіріс көздіктерін заңдастыруда салық саясаты маңызды роль атқарады. Қазынаның бүйірін тұтынушылардың салығымен толықтырып отырудың да өзіндік ережесі, мәдениеті әлімсақтан қалыптасқан. Жаңақорған ауданы облыстағы еті ауданның ішінде алғашқы қатарда келе жатқанын, жергілікті жер табысының өзі 4 миллиард теңгеден асып отырғаны алқалы жиында ерекше атап өтілді. . Бүгінде 400-ге жуық заңды тұлға, 7 мыңнан аса кәсіпкер, 60 мыңға жуық жеке тұлға салық төлейді. Салық төлеуші азаматтарымыздың белсенділігі де маңызды дей келе, &nbsp;сала ардагерлері «Жаңақорған салықшылары» кібатының тұсауын кесті.Қазақ республикасы қаржы органдары 1920 жылы 11 қазанда өткен сьезде бекітті. Бұл комиссариаттың негізгі миссиясы – бюджеттің шығыс бөлігін бақылаумен қатар бюджетке салықтық және міндетті төлемдерді толық және уақтылы түсіріп отыруды бақылап, қамтамасыз етіп отыруды міндетіне алды.Ал 1991 жылы 9 шілдеде Қазақ КСР Президентінің «Қазақ КСР Мемлекеттік салық қызметін құру туралы» жарлығымен Бас салық инспекциясы құрылып, өз алдына отау тікті. Оның негізгі міндеттері – салық салу заңдылық тарын сақтау, салықты және басқа да міндетті төлемдерді дұрыс есептеуді назарға алады.&nbsp; Біз осы кездері Жаңақорған аудандық салық инспекциясы тұңғыш құрылғанда басшысы болып, он екі жыл басқарған Айдарбек Жұматовты арнайы әңгімеге тарттық.Қыраш ауылында орта мектепті бітірген ол Ауыл шаруашылық институтын бітірген екен. Аудандық мемлекеттік сақтандыру мекемесінде қызмет атқарған. Ол өзінің сөзінде мекемені алғаш аяққа қою оңай болмағанын айтады. Астана күні мерекесінде салық саласының ардагерлері және бүгінде салада тер төгіп келе жатқан тұлғалар мекеменің құрылғанына отыз үш жыл толуына орай Жаңақорған агротехникалық колледждің мәжіліс залында бас қосты. Осы күні мекеме қызметкерлері болып, әрбірі өз естеліктерін жазып, сала тарихының шежіресін хатқа түсірген «Жаңақорғандық салықшылар» кітабының тұсауы кесілді.&nbsp;Мәдени шараны аудан әкімінің орынбасары Бекболат Шәріпбеков ашты. Ол өзі де еңбек жолын осы мекемеде бастаған маман ретінде естеліктерімен бөлісіп, әріптестерін аудан салық саласында жарық көрген тұңғыш кәсіби жинақтың оқырман қолына жол тартқан қуанышымен құттықтады. Осы істің басы-қасында ұйымдастырып, естеліктерді жинақтап, мекеме тарихының тасқа басылып қалуына үлес қосқан азаматтарға рахметін айтты. Әсіресе іс басында жүрген азаматтар Айдарбек Жұматов, Тұрғанбек Оразәлиевтерге ерекше рахметін жеткізді. Одан әрі Жаңақорған аудандық кірістер басқармасының басшысы Нұрлан Нұрсейітов сөз алып, аталмыш мекеменің аудан экономикасын тіктеуде орны ерек екенін, бүгінгі күні жеті ауданның ішінде Жаңақорған алғашқы қатарда келе жатқанын, жергілікті жер табысының өзі 4 миллиард теңгеден асып отырғанын жеткізді. Бүгінде 400-ге жуық заңды тұлға, 7 мыңнан аса кәсіпкер, 60 мыңға жуық жеке тұлға салық төлейді. Салық төлеуші азаматтарымыздың белсенділігі де маңызды, – деді ол. Одан әрі сөз алған сала ардагері Айдарбек Жұматов тоқсаныншы жылдары өз алдына отауын тігіп, тұғырын тіктеген салық инспекциясының бірінші басшысы ретінде сол кезеңнің қиындықтарына тоқталып өтті. Сол кезде ең бірінші жұмысты бастаған он кісіні мінберге шығарып құрмет көрсетті&nbsp; Кешегі күн естеліктеріне кезек берген қаржы саласының ардагері Дәулет Қалыбаев ауыр кезеңде ауданда салық мекемесін басқарған Айдарбек ағаның жұмысқа деген терең жанашырлығын көптеген мысалдармен жеткізді. Сол кезде кейбір жағдайы төмен азаматтарға өзінің қалтасынан төлеп, демеп жіберуге тырысқан жомврттықтарына да тоқталды. Өзінің іскерлігінің арқасында кейін қалалық қаржы басқармасын абыройлы басқарып зейнетке шыққан Айдар аға өзінің туған жері-Қыраш ауылында әкелері отырғызған бауға егелік жасап, көркейтуге бар күш-жігерін арнап келе жатқанын да айтып өтті. Сонымен қатар, айтулы шарада ауданның әлеуметтік экономикалық дамуының осы жылдың 6 айындағы орындалуы бойынша ауданның экономика және бюджеттік жоспарлау бөлімінің басшысы Семсер Әсенов баяндама оқыды. – Ауданымызда 2022 жылдың 5 айында жалпы экономикалық тұрғыдан алғанда тұрақты жағдай қалыптасып, 7 көрсеткіштің 6 көрсеткіші бойынша өсу қарқыны байқалды. Атап айтқанда, өсім өнеркәсіп өнімі, өңдеу өнеркәсібі, ауыл шаруашылығы, құрылыс жұмыстары саласында, тұрғын үйді пайдалануға беру мен бөлшек сауда саласында байқалса, негізгі қорға салынған инвестицияда төмендеу көрсеткіші тіркелген. Жалпы ауданда 2023 жылдың 1 мамырына халық саны – 86 731 адамды құраса, оның ішінде экономикалық белсенді халық саны – 34952. Бұл былтырғы жылмен салыстырғанда 0,9 пайызға кем. Мәселен, өткен жылдың осы кезеңінде аудан халқының саны 86,7 мың болып, жалпы өсу қарқыны 1,6 мың адамға жетіп, көрсеткіш 101,9 пайызды құраған. Дегенмен алаңдатарлық жағдай да жоқ емес. Аудан халқының өсуі байқалғанымен көші-қон бойынша теріс сальдо, яғни аудан халқының сыртқа кетіп жатқаны да орын алуда. Ал ауданымыз күнкөріс деңгейі төмен санатындағы халық саны бойынша облыста көш басында. Бұл дегеніміз әр бір он екінші адамның күнкөріс деңгейі төмен дегенді білдіреді. Жұмыссыздар саны 1731 болса, атаулы әлеуметтік көмек алушылар саны – 6941. Демек жалпы халықтың 8 пайызы атаулы әлеуметтік көмек (АӘК) алып отыр. Сондай-ақ өздеріңізге белгілі, халықтың тұрмыс тіршілігіне қазіргі инфляция деңгейі де қатты әсер етуде. Инфляция 2021 жылдың сәйкес кезеңімен салыстырғанда 13,1 пайызға артып, мемлекет тарапынан халықтың әлеуметтік жағдайын жақсартуға жасалынып отырған қадамдары оң нәтиже бермей отыр. Соған сәйкес әлеуметтік маңызы бар 19 түрлі азықтүлік бағалары да көтерілген. Негізінен көкөніс өнімдері, яғни қырыққабат 63 пайызға, жуа 89 пайызға, сәбіз 6, картоп 7, құмшекер 80 пайызға қымбаттаған. Күнделікті тұтынатын ас атасы нанның бағасы басқа аудандармен салыстырғанда 15 пайызға қымбат. Ал 2023 жылдың 1 маусымына аудан бюджетінің жалпы кірістері 104,5 пайызға, соның ішінде аудан бюджетінің өз кірісі 152,1 яғни 51,1 пайызға орындалды, – дей келе алдағы уақытта атқарылуға тиісті жұмыстарға тоқталып өтті.Баяндаманы мұқият тыңдаған аудан басшысы биылғы жылы халық санының өсуін айтқанда қуанғанын, артынша тұрғындардың басқа облыс, қалаларға көшу салдарынан азаюын естігінде көңілі су сепкендей басылғанын жасырмады. Мұның себептерін анықтау үшін орынбасары Дархан Есалыұлына нақты тапсырма жүктеді. Қойын дәптеріне берілген тапсырманы түртіп алған орынбасар алдағы уақытта жұмыс жасайтынын, нақты шешімін жақын арада айтатынынан хабардар етті.– Бүгінде Жаңақорған ауданы дамудың даңғыл жолында. Атқарылып жатқан жұмыстар да аз емес. Соған қарамастан қазіргідей дағдарыс кезінде ел еңсесін тіктеуге бағытталған түрлі мемлекеттік бағдарламалардың қабылданып жатқандығы болашаққа деген сенімімізді нығайта түсетіні анық. Осы бағытта ауыл әкімдері мен бөлім басшылары өздеріне жүктелген жұмысқа жауапкершілікпен қарау керек. Тұрғындар мәселесін шешу мемлекет ұсынатын қызметтер сапасының артуынан көрінеді. Сондықтан сіздердің атқарған қызметке баға беретін халық, – деді әкім. Одан әрі Аққорған ауылдық округінің әлеуметтік-экономикалық дамуы туралы ауыл әкімі Серік Сәрсенбайұлы баяндама жасады.Ол өз сөзінде, бекітілген жұмыс жоспарына сәйкес ауылішілік жолдарға тас төсеуге 3,8 млн теңге, Түгіскен көшесіне асфальт төсеуге 11,3 млн теңге, ауылішілік аяқ су арықтарын тазалауға 1,3 млн теңге, «Аллея» салуға 4,6 млн теңге, санитарлық тазалық жұмыстарына 1,4 млн теңге жұмсалғанын айтты. Сонымен қатар ауыл тұрғындарының өтінішіне байланысты №209 орта мектепке қатынау үшін ұзындығы 340 метр жаяу жүргіншілер жолы, яғни тротуар салынып, шаруашылық құрылымдарына су жеткізуге арналған Р-11 каналы 5,0 млн теңгеге тазаланған. К-1 су қашыртқысының үстінен өтетін жаяу жүргіншілерге арналған көпірге Б.Момышұлы көшесі тұрғындарының қолдауымен жөндеу жұмыстары жүргізіліп, 13 жарық шамы қойылғанын мәлімдеді.Сондай-ақ кәсіпкерлікті дамытуда «Еңбек» мемлекеттік бағдарламасы арқылы 23 жоба қорғалып, 13,4 млн теңгенің грантына қол жеткізілгенін, «Қамқоршы» несие серіктестігі арқылы 5 азамат 37,3 млн теңге, егін шаруашылығы үшін 90,5 млн мал шаруашылығы үшін 15,9 млн теңге, техника сатып алуға 12,3 млн теңге несие алынып жұмыс жасалып жатқанын айтты.&nbsp; Ал ауылшаруашылығы саласы, шаруаларға көрсетілген мемлекеттік қолдау шаралары, білім мен балалардың мектепке дейінгі тәрбиемен қамтылуына, мәдениет және жастар саясаты, сондайақ спорт, денсаулық саласынан хабардар еткен ауыл әкімі сөз соңында салық түсімдерін кеңейту мақсатында ауылдық округтегі жеке тұрғын үй құрылысы және өзіндік қосалқы шаруашылығын жүргізу үшін берілген жер учаскелеріне түгендеу жұмыстары жүргізілгенін айтып, жеке кәсіпкерлікпен заңды түрде айналысу үшін кәсіпкерлікпен айналысатын азаматтарды аудандық мемлекеттік кірістер басқармасына тіркеуге қоюға жұмыстар жасалғанынан хабардар етті.Осы ретте аудан әкімі Мұрат Жолкелдіұлы жиында бас қосқан ауыл әкімдеріне ауыл шаруашылығы жерлерін тиімді пайдалану, оның жұмысын үйлестіріп қосалқы шаруашылықты дамытуда ең бастысы халықтың әл-ауқатын арттыру мен өмір сапасын көтеру бағытындағы жұмыстарды жандандыру қажеттігіне екпін салды. Бөлім басшыларына да жүктелген тапсырма бойынша жұмысты босаңсытпай, ширақ қимылдауға мән беру керектігін нақтылады.Кезек Келінтөбе ауылдық округінің әкімі Абылай Досжановқа келді. Ауылдың әлеуметтік-экономикалық дамуы жағынан баяндама оқыған әкімнің сөзі орта жолдан кілт үзілді. Өйткені аудан басшысы баяндамада жазылғандай әкімгершілік ғимаратты темір қоршаумен қоршауға республикалық қаражат есебінен ешқашан қаржы бөлінбейтінін, оқитынын қағазға түсіргенде осындай өрескел қателіктерге неге назар салмағанын сұрады. Әдеттегіше, ауыл әкімі баяндаманы есепші дайындағандықтан мұндай қателік сол қызметкердің тарапынан кеткенін айтып ақталды. Ашуға мінген аудан басшысы жіберілген қателік есепші тарапынан кетсе де оның бүтіндей бір елді басқарып отырғанын, әкім деген атқа лайық болуда сауатты жұмыс жасау керектігін еске салып, бүгінгі жиынға дайын еместігін айтып, ескерту жасады.Бұл күнгі жиын өзгеше форматта өтті. Жаттанды жүгіртпе цифр мен ұзын сонар баяндаманың нүктесін қойған аудан басшысы алдағы уақытта аудан үшін қызмет етіп отырған әр ауыл әкімі мен бөлім басшыларының белгіленген кесте бойынша жеке-жеке есеп тапсыратынын нақты айтты. Осылайша ашықтыққа көшуді қолға алған Мұрат Жолкелдіұлы мұндай басқосулар нәтижесі алдағы уақытта әлеуметтік желіде жарияланатынын, бағасын халық таразылайтынын жеткізді.

«Жаңақорғандық салықшылар» кітабының тұсауы кесілді

<a href="https://kyzylorda-news.kz/">Kyzylorda-news.kz.</a> Қазақстан Республикасының Үкіметі мен цифрлық даму министрлігінің қолдауымен 2023 жылдың 1 шілдесінен бастап мемлекеттік корпорацияның өңірлік филиалдары қызметкерлерінің жалақысын 50%-ға көтерілетін болады.2022 жылы Мемлекеттік корпорация қызметкерлерінің жалақысын екі рет көтерілген болатын. Осылайша, былтырғы өсімді есепке алғанда, жалақының жалпы өсімі 100 пайыздан астам мөлшерді құрады.<blockquote>«Адами капитал – ел экономикасының өсуі мен тиімді жұмыс істеуінің ең маңызды факторы. Біз қызметкерлеріміздің ел игілігі жолындағы еңбегі баға жетпес екенін және сол үшін тиісті бағасын алу керектігін түсінеміз. Сондықтан қазіргі уақытта біз корпоративтік функцияларды орталықсыздандыру бойынша жобаны іске асырып жатырмыз. Бұл филиал қызметкерлеріне сыйақыны дербес төлеуге мүмкіндік береді», - деді Мемлекеттік корпорацияның Басқарма Төрағасы Сүйеніш Әбділдин.</blockquote>Осылайша, Мемлекеттік корпорация бірқатар корпоративтік функцияларды жеңілдетіп, филиалдардың шешім қабылдауда жауапкершілігі мен дербестігін арттыра алды. Негізгі мақсаттардың бірі үнемделген қаражаттан филиал қызметкерлеріне берілетін сыйақы төлемдері үшін шығындарды оңтайландыру. Олардың мөлшері филиал басшылығы деңгейінде &nbsp;анықталалатын болады. Бұл жұмысшыларды тиімді жұмыс істеуі үшін сыйақымен қолдаудың қосымша құралы болып есептеледі.Айта кетер болсақ, қазіргі таңда Мемлекеттік корпорацияда 22 мыңға жуық қызметкер жұмыс істейді. Бұл еліміз бойынша 20 филиал, 327 фронт-офис және 671 бэк-офис, 33 мобильді халыққа қызмет көрсету орталықтары қызметкерлерінің жалпы саны. &nbsp;

Мемлекеттік корпорация қызметкерлерінің жалақысы көтерілді

<a href="https://kyzylorda-news.kz/">Kyzylorda-news.kz.</a> Әлеуметтік желіден түрлі ұлттың киімін киген қуыршақтар көзге түсті. Алақандай ғана қуыршақтар түрлі-түсті киімдерімен-ақ тартымды, көздің жауын алатындай. Әр ұлттың киімін киіп, қаз қатар тізілген қуыршақтарға қызыға түстік. Бұл қаланың жас тұрғыны Сабина Темірболатованың туындысы екен.Сабинаның негізгі мамандығы – информатик, жоғары білімді жас маман. Дәл қазір ол өз мамандығы бойынша жұмыс істемесе де, қол қусырып қарап отырған жоқ. Оның қолөнерге ден қоюы өзінің ғана емес, өзгелердің де қызығушылығын оятты. Алғашында түрлі түсті маталардан құрақ құрап, сәнді жастықшалар тігуден бастаған Сабина кейіннен қуыршақтарды киіндіруге көшті. Иә, кәдімгі қуыршақ. Бала күнімізде қуыршағымызды өз талғамымызға сай киіндіріп, бояндырып мәз болатынымыз есімізде. Ал есейген Сабинаның қуыршақты киіндіруі бала кездегідей емес, кәдуілгі маман, қолөнер шебері ретінде, талғаммен жасалуда. Ол кішкентай қуыршақтарға түрлі ұлттың киімін кигізуді жөн көрді. Айтуға оңай болғанмен, ойға алған идеяны жүзеге асыру оңай болған жоқ. Ізденіс, әр ұлттың ерекшелігін табу, бояу үйлесімділігін дөп басу үшін оқу, тану, білу қажет екен.<blockquote>«Алғашқы қуыршағымның киімі де, тігісі де қарапайым болды. Көз тартар дүние шығу үшін шыңдалу қажеттігін түсіндім. Ісмерлік өнердің қыр-сырын, ою-өрнек салудың құпиясын ғаламтордан іздей бастадым. Тіпті шетелдік дизайнерлерден матаға жаңа рең берудің алуан түрін меңгердім. Өз жұмысымның нәтижесін көріп, қолымнан келетініне көз жеткен соң мұны кәсіпке айналдыруды мақсат етіп отырмын. Алғашқы ұлттық киімдегі 10 қуыршақ лезде сатылып кетті. Әлеуметтік желі арқылы тапсырыс бергендер де бар. Негізінен менің қуыршақтарымды туристер және қарапайым адамдар сыйлық үшін сатып алады. Сондай-ақ өз ұлтының киімін қызықтап сатып алатындар да бар. Мәселен, аймағымыздағы корейлер &nbsp;нағыз ұлттық киімді көрсете алғаныма ризашылығын білдірді. Ал өзіміздің ұлттық киімдеріміз мазмұнға бай екені сонша, оны бір қуыршақпен көрсету мүмкін емес. Бір ғана бас киімнің өзін әбден зерттедім. Мәселен, қыз бала тақия кисе, жас келіннің сәукеле киетіні, сондай-ақ жас ананың баскиімі, әжелердің кимешегіне дейінгі аралықтағы киімдерді &nbsp;киюдің өзіндік мәнісі бар екен. Мен қуыршақтарды сату үшін ғана емес, өз қызығушылығыммен және өзімді осы салада дамыту үшін жасаймын. Қазір қолөнердің қыр-сырын біраз меңгеріп қалдым. Тіпті менің қуыршақтарымның киім үлгісіне америкалық танымал дизайнер, модельер Ник Верреос жоғары баға берді. Бұл мен үшін бір жетістік екені даусыз», – дейді Сабина Хайруллақызы.</blockquote>Ісмер жас қуыршақтарға киім тігуден бөлек, матадан түрлі әшекейлер, сәнді жастықшалар тігеді. Оның қолынан шыққан бұл өнімдер де сұранысқа ие. Қуыршақтар арқылы әлемді тануға, әр ұлттың мәдениеті мен тарихын зерделеуді мақсат еткен Сабинаның бұл игі ісі алдағы уақытта тек кәсіп көзі ғана емес, қоғам үшін де пайдалы болмақ.

Қуыршақ тігуді кәсіпке айналдырған қыз

<a href="https://kyzylorda-news.kz/">Kyzylorda-news.kz.</a> «AMANAT» партиясы облыстық филиалы жанындағы Сыбайлас жемқорлыққа қарсы іс-қимыл жөніндегі Кеңестің кеңейтілген отырысы өтті.Жиынға төрағалық еткен Мақсұт Нәлібаев күн тәртібіне өзекті екі мәселені ұсынды. Оның бірі ҚР Сыбайлас жемқорлыққа қарсы саясатының 2022-2026 жылдарға арналған тұжырымдамасын іске асыру бағытындағы шараларды жүзеге асыруда аймақта орын алып отырған проблемалық мәселе болса, екіншісі денсаулық сақтау басқармасы мен оған қарасты мекемелерінде сыбайлас жемқорлыққа қарсы жұмыстардың жүргізілуі, туынтайтын проблемалық мәселелер мен олардың шешілу жолдары туралы мәселе болды.Күн тәртібіндегі мәселеге жауапты департамент пен басқарма басшылықтары қатысып, хабарлама жасады. Сыбайлас жемқорлық көріністерінің алдын алу шараларына баса мән бере отырып, жемқорлық тәуекелдері мен олардың көріністерін болдырмау туралы, азаматтарға қолайлы жағдай жасауда денсаулық сақтау саласында бірқатар мәселелерді қозғады.Партия алаңында облыстық және қалалық әкімдіктеріне қарасты ірі квазимемлекеттік мекемелерінде құрылған комплаенс – қызметтерінің атқарған жұмыстары, сыбайлас жемқорлыққа қарсы іс-қимыл туралы есептерін тындау тәжірибесін кезеңімен қалыптастыру, мекемелерде құрылған комплаенс – қызметтерінің жұмыстарының тиімділігін бақылауға алу туралы ұсыныстар түсті.&nbsp;Кеңес мүшелерінің ұсыныстары да орынды болды. Оның бірі осы уақытқа дейін облыстық бюджет есебінен бөлінген қаражатқа сатып алынған «БКДҚ «112» пилоттық жобаны іске асыру, оның өңірімізде жұмыс істеуі және дамуын үйлестіру бойынша ішкі істер, цифрлық даму, инновациялар және аэроғарыш өнеркәсібі министрлігі, денсаулық сақтау, еңбек және халықты әлеуметтік қорғау министрлерінің бірлесіп, жұмыс жасаудың қажеттігін алға тартты. Одан бөлек шалғайдағы кейбір елді мекендерде ауылдық ауруханалардың мәселелерін көтеріп, тұрғындармен кездесу ұйымдастырып, түсіндірме жұмыстарын жүргізуді ұсынды.Сонымен қатар «112 – Бірыңғай кезекшілік - диспетчерлік қызметі» пилоттық жобасы жұмысының жүйеленуіне ықпал ету үшін әр қызметтік сала бойынша жауапты мамандар бірігіп жұмыс істеу қажеттігін айтты. Адам өміріне тікелей байланысты маңызды жобаны іске асыруда Үкімет тарапынан қатаң бақылау, ұтымды үйлестіру болуы қажет деп тарқасты отырысқа қатысушылар.

Маңызды жобаны іске асыруда қатаң бақылау, ұтымды үйлестіру болуы қажет

<a href="https://kyzylorda-news.kz/">Kyzylorda-news.kz.</a> Елімізде бизнесті қорғау саласы түбегейлі жаңғырғалы тұр. Қазір мүдделері қозғалған бизнес субъектілеріне аудит қорытындыларымен танысуға және шағымдану құқығын беру мәселесі заңнамалық тұрғы-да реттелген.Бұған қоса кәсіпкерлерге қатысты салық бұйрықтарын шығарудың және фискалдық органның бақылау-кассалық машиналарды қолдану мәселелері бойынша тексеру жүргізудің, сондай-ақ әкімшілік жаза қолданудың заңсыз тәжірибесі тоқтатылған екен. Кәсіпкерлер құқығы қалай қорғалуда? Бүгінгі күні де бұл проблема күн тәртібінен түсе қойған жоқ. Аталған мәселе жөнінде Қармақшы ауданы прокурорының міндетін атқарушы Ануар Мұратов аудан кәсіпкерлерімен кездесті.Ашық отырыс, еркін пікір алмасу нысанында өткізілген жиында кәсіпкерлер көкейлерінде жүрген сұрақтарын қойып, ұсыныс-ойларын жеткізді. Кездесуге қатысқан уәкілетті орган өкілдерімен бірге кәсіпкерлердің сұрақтары мен көтерген мәселелері жан-жақты талқыланып, тиісті жауаптар берілді. Сонымен қатар, кәсіпкерлердің құқығын қорғау, кәсіпкерлер жобаларын сүйемелдеу және қаржылық емес көмек көрсету, міндетті жарналық төлемдер жасаған кәсіпкерлік субъектілері, коммуналдық қызметтің жағдайы және салық мәселелері талқыланды.Отырыс барысында Ануар Мұратов кездесудің маңыздылығына тоқталып, кез келген уақытта азаматтарды қабылдауға және уәкілеттік шегінде құқықтық көмек көрсетуге дайын екендігін жеткізді. Жиын соңында кәсіпкерлерге өз құқықтарын жүзеге асыруға қатысты заңнама нормаларына түсіндірулер жүргізілді.

Қазақстан және Қызылорда облысының жаңалықтары