<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Өкпедегі ауруды, денедегі түрлі сынық жарақатты анықтайтын медицина саласында бөлім бар. Жалпақ тілмен айтқанда оның көмегімен аурудың сипатын анықтап, сол арқылы дәрігер маман дәл әрі нақты диагноз қояды. Бәлкім біліп те отырған боларсыз. Осы бір мамандықтың қыр сырын білмекке аудандық емхананың флюорография және рентген бөлімінің жұмысымен танысып қайтқан едік.</h4>Бала күнімізде ауруханаға тексеруден өтуге барғанда дәрігердің «бірінші флюороға түсіп кел» деп жіберетіні сол кезде көңілге қорқыныш ұялататын. Кабинаның ішіне кіруге жүрексініп, «қазір тоқ соғады» деген неше түрлі ойдың жетегіне еріп кеткеніміз әлі күнге есімде. Ал бұл жолы дәрігер мамандардың қызметіне қызыға қарап, қарбаласқа толы қауырт жұмыстарына бізде ілестік. Ең алдымен аудандық аурухананың туберкулезге қарсы бөлімшесінің бөлім меңгерушісіне жолығып, бөлімнің қызметі жайында аз-кем әңгімелестік.<blockquote>– Флюорография – бұл өкпе ауруларының диагностикасындағы бірінші қадам. Туберкулез де бұл тізімнен орын алады. Біз аппарат арқылы туберкулезді, сұйықтықты, кейінгі қабынуларды, бөгде заттарды, талшықтар склерозын, әртүрлі этиология ісіктерін, қабырғалар, иық, жүрек тағы басқа аурулардың диафрагмасын көруге мүмкіндік аламыз. Жалпы бұл процедурадан адам жылына бір рет ғана өтеді. Флюороға түскен өкпенің суретіне қарап, оның туберкулезге шалдыққан, шалдықпағанын анықтаймыз. Соған қарай диагнозын қойып, емдеу шараларын жүргіземіз, – дейді дәрігер Хамит Әлиев.</blockquote>Білікті дәрігердің бұл салада қызмет істеп жүргеніне 30 жылдан аса уақыт болыпты. Одан бөлек бұл бөлімде екі лаборант және бір медбике халыққа қызмет көрсетеді. Ең негізгі аппарат орнатылған кең бөлмеге бас сұғып, жұмыс барысымен таныстық. Қазіргі заманға сай орнатылған цифрлы құрылғы үздіксіз қызмет көрсетіп тұр. Аппараттың тікелей жұмыс істеуіне жауапты маман Жеңіс Есмаханов жаңа құрылғының жұмысын былай түсіндірді.<blockquote>– Қазір технология жылдан жылға дамып келе жатыр. Олай дейтінім бұрын біз жұмыс істеген аппарат қолмен басқарылатын. Ал қазір бәрі компьютер. Бірден үлкейтіп көрсетеді және ол сақталады, – дейді ол.</blockquote>Айбол Іскендіров те осы құрылғыны басқарушы маман. Көбіне жылжымалы рентген көлігімен ауыл аймақты аралап, егіс басындағыларды тексеруден өткізеді. Ал медбике Роза Әбдірахманқызы болса флюороға түскендерді компьютерге тіркеуші. Дәл осыдан шығып жалпы рентген бөліміне бас сұқтық. Мұндағы жұмыс барысы да солай. Тек бір айырмашылығы бұл жердегі мамандар күн-түн демей кез келген ауыр жағдайдағы науқастармен жұмыс жасайды. Мәселен ота жасалған, қозғалуға келмейтін науқастарды рентгенге түсіріп, суретін дер кезінде шығарып береді. Елімізде болған пандемия кезінде де білікті дәрігерлер табанынан тік тұрыпты. «Пневмонияға шалдыққандардың қарасы көп болды» дейді рентгенолог дәрігер Серік Дастанбаев.<blockquote>– Пневмонияның алғашқы толқынында халықтың көбі осы дертке шалдыққан. Біз бір күнде 70-80 адам қабылдадық десем артық айтқаным емес. Екі өкпесі бірдей пневмония болғандар көп. Кішкене жөтел басталса бірден бізге келіп тексеріліп жатты. Қайта біздің жігіттер барлығына үлгеріп, қалтқысыз қызмет көрсетті. Тіпті арамызда сол ауруға шалдыққандар да бар. Қазір шүкір бәрі басылды. Тексерілуге келгендердің ішінде бірлі-жарымы ғана пневмония болып шығып жатыр. Жалпы науқасты рентгенге түсіргенде біз оның снимкасын әбден тексеріп қараймыз. "Бір көзден екі көз жақсы" деген бар ғой. Мен тексерсем менен кейін екінші дәрігер тексереді. Тіпті кейде қасымдағы Өмірбек, Ержан, Самат деген жігіттерге де көрсетіп аламын. Себебі пленканың бетінде неше түрлі дақ тұрып қалуы мүмкін. Сондықтан бұл істе аса жауапкершілікті ұстанамыз, – дейді білікті дәрігер.</blockquote>Біз әңгімелесіп болғанда өзін нашар сезінген науқас рентгенге келіп өкпесін түсірді. Диагнозы қалай болар екен деген оймен аздап күттік. Дайын болған пленканы дәрігер жарыққа көтеріп "Міне қара, мына жігітте аздап пневмония бар. Сол өкпесінде жиналып тұр, емделу керек" деді. Осылайша өз көзімізбен пневмонияның қалай болатынын көрдік. Қазір бәрі бітті деп бетпердесіз жүруге тым ерте. Дәрігерлер әлі де сақтанып жүруге шақырады. Денсаулықтың қадірін қазірден ойлайық.Ерсін СӘДУҰЛЫ

 Бірлескен ұжымда береке бар

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Қармақшы аудандық Шәмшат Төлепова атындағы аудандық мәдениет үйінде «Халық Заңгері» республикалық акциясы өтті. Науқанның мақсаты – халықтың құқықтық сауаттылығын арттыру және азаматтарға тегін заң көмегін көрсету. Кез-келген азамат келіп, елдің ең үздік заң өкілдерінен тегін қажет кеңес ала алады. Олардың арасында – белгілі адвокаттар, нотариустар, прокурорлар, тергеушілер, сот орындаушылар, мемлекеттік органдар басшылары мен басқалар.</h4><h4 style="margin-left:0px;text-align:justify;">Науқанды ұйымдастырушылар Қазақстан Республикасының Сыбайлас жемқорлыққа қарсы іс-қимыл Агенттігі, zakon.kz жүйелі басылым, «Параграф» ақпараттық жүйесі, Қазақстанның мемлекеттік билік органдары және ең үздік заңгерлер мен адвокаттар.&nbsp;</h4><h4 style="margin-left:0px;text-align:justify;">Акция аясында аудан прокуроры, аудандық полиция бөлімі, ауданаралық Әділет департаменті, аудандық мемлекеттік кірістер департаменті және аудан әкімдігінің бөлім басшылары, заңгерлер мен адвокаттар халыққа ақысыз заңгерлік көмек көрсетті.</h4><h4 style="margin-left:0px;text-align:justify;">Акцияның негізгі мақсаты – халықтың құқықтық сауаттылығын арттыру. Іс-шарада 30-ға жуық маман әр түрлі сала бойынша тұрғындардың сұрақтарына жауап беріп, заңгерлік кеңес берді. Шараға қатысушылар қажетті заңгерлік кеңес, сондай-ақ мемлекеттік орган өкілдерінен өзіне қажетті мәселелер бойынша түсіндірме алды. &nbsp;</h4>

Қармақшыда «Халық заңгері» акциясы өтті

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Мемлекеттік рәміздер – біздің сонау ғасырлар қойнауынан сыр шертер тағылымды тарихымыздың шынайы көрінісі. Оның мазмұнды нышандары кешегі өткенімізді айшықтап, ертеңгі мақсатымызды айқындап тұр. Рәміздердегі нышандар арқылы қазақстандық қоғамның әлем алдындағы бейнесі қалыптасады. Рәміздерге деген құрмет – азаматтардың өз елінің азаматы екендіктерін қаншалықты деңгейде түйсінуінің, ел болашағына деген сенімінің және патриоттық сезімдерінің өлшемі.&nbsp;</h4>Бүгін қармақшы аудандық кітапханада Қармақшы аудан әкімшілігінің қолдауымен 4 маусым – Қазақстан Республикасы Мемлекеттік Рәміздері күніне орай «Тіл және Рәміз – Тәуелсіздік жаршысы» атты мәдениет саласы қызметкерлері арасында интеллектуалды сайыс болып өтті.&nbsp;Сайыстың мақсаты – оқырмандарға ана тілінің қадір-қасиетін ұғындыру, оған деген сүйіспеншілігін арттыру, Елтаңба, Ту, Әнұран туралы түсініктерін кеңейту. Рәміздердің пайда болуы және тарихтағы маңызы жайлы түсініктерді, танымдық ой-өрісін, қызығушылығын дамыту. Әрбір азаматты Отансүйгіштікке адамгершілікке, Отанына, халқына адал қызмет етуге, елінің Туын, Елтаңбасын, Әнұранын қастерлеп, құрметтеуге, халқының тегін, ел тарихын тани білуге құрметтеуге, ұлтжандылыққа тәрбиелеуге бағытталды.&nbsp;Сайыстың шарты Қармақшы аудандық мәдениет және тілдерді дамыту бөлімінің ұйымдастыруымен өткен «Тіл және Рәміз – Тәуелсіздік жаршысы» атты интеллектуалды сайысқа әр қатысушы жеке телефонымен «Google» интернет желісімен «КАХУД» бағдарламасы бойынша 20 тест сұрақтарына жауап беріп, соңында 30 секунд ішінде жылдамдық пен дұрыс жауап ескеріліп, бағдарлама жеңімпазды өзі анықтады. Сұрақтар мемлекеттік рәміздер және тіл туралы қойылды.&nbsp;Сайыс соңында кітапхана директоры Қаниева Күлшара Бөгенбайқызы қорытынды сөз сөйлеп, Қармақшы аудандық мәдениет және тілдерді дамыту бөлімінің Диплом, Алғыс хаттары және арнайы сыйлықтарымен қатысушыларды марапаттады.

Қармақшыда Рәміздер күні аталып өтілді

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Бүгінгі баланы кітап емес, телефон тәрбиелеп жатқаны бүгінгі күннің өзекті мәселесі. Смартфонда сағаттап уақыт өткізген баланың нендей ақпарат алып жатқаны да беймәлім.</h4>Мемлекет басшысы Қасым-Жомарт Тоқаевтың тапсырмасымен «Оқуға құштар мектеп», «Балалар кітапханасы» бағдарламасы аясында Қызылорда қаласындағы дарынды балаларға арналған мамандандырылған сыныптары бар мектепте «Шығармашылық интеллигенция – балаларға» атты басқосу өтті.&nbsp;Қр &nbsp;Оқу-ағарту министрі Ғ. Бейсембаевтың арнайы тапсырмасымен Тәрбие және қосымша білім беру департаментінің директоры Медетбекова Меруерт Аскербекқызы &nbsp;жиын барысында бірінші онлайн сөз алды.Жиынға республикадағы белгілі балалар басылымының редакторлары, атап айтқанда, «Айгөлек» журналының бас редакторы Қымбат Әбілдәқызы, «Мөлдір бұлақ» журналының бас редакторы Дәулетбек Байтұрсынұлы, «Ақ желкен» журналының бас редакторы Есей Жеңісұлы, «Алан кіds» журналының бас редакторы Әсел Тыныбаева, «Сыр медиа» ЖШС бас директоры Марат Аралбаев және тағы басқа балаларға арналған басылымдардың редакторлары және мектеп директорлары, кітапханашылар, мұғалімдер қатысты.ҚР Оқу-ағарту министрлігінің Республикалық ғылыми педагогикалық кітапханасы директорының орынбасары Асанова Райхан Файзуллақызы шараны жүргізді.Кездесуде жас буынның кітап, газет-журнал оқу мәдениетін қалыптастыру, балаларды оқуға қызықтыру жайы кеңінен талқыланды. Жасыратыны жоқ, медиа нарығында бәсекеге қабілетті, сапалы, мазмұнды балаларға арналған кітап та, журнал да аз емес. Алайда оқитын бала азайып бара жатқаны дабыл қағатын мәселе. Бала күнінен газет-журнал оқып, редакцияға хат жазып үйренбеген бала ертеңгі күні кітап оқымайтыны белгілі. Жас буынның ана тілінде сауатты жазып, өз ойын анық жеткізуі бүгінде ойланарлықтай мәселеге айналып бара жатқанын алға тартқан «Айгөлек» журналының бас редакторы Қымбат Әбілдақызы қоғам болып ұлт болашағын тәрбиелеуге үлес қосу керек екенін айтты. «Ақ желкен» журналының бас редакторы Есей Жеңісұлы қазіргі жастардың сауатты жазу деңгейі төмен екенін қынжыла айтқаны көпке ой салды.&nbsp; Басқосуда сөз алған «Сыр медиа» ЖШС бас директоры Марат Аралбаев мекеме арқылы балалар басылымына жазылуға мүмкіндік жасалғанын жеткізді. Бүгінгі баланы кітап пен журнал тәрбиелесін десек, ата-ана бұл мәселеге ерекше мән беру қажет. Аға буын үлгі болып, балалардың кітап, газет-журнал оқуына ықпал ете білсек, ұлт тәрбиелеуде ұтарымыз аз болмасы анық. Бүгінгі басқосудың түйіні осы болды.<img src="https://knadmin.beoblood.kz/uploads/6_M4_A8671_56de229ae8.JPG" alt="6M4A8671.JPG"><img src="https://knadmin.beoblood.kz/uploads/6_M4_A8654_6f0044d116.JPG" alt="6M4A8654.JPG"><img src="https://knadmin.beoblood.kz/uploads/6_M4_A8632_0da556838c.JPG" alt="6M4A8632.JPG"><img src="https://knadmin.beoblood.kz/uploads/6_M4_A8587_605367b1c0.JPG" alt="6M4A8587.JPG">

Қызылордада «Шығармашылық интеллигенция – балаларға» атты басқосу өтті

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Ардақты ақсақалдың да, жалынды жастың да жүрек толқынысымен қарсы алатын мемлекеттік мерекесі 4 маусым – Қазақстан Республикасының Рәміздер күні. Мемлекеттік рәміздер – ұлттық байлығымыз, ел тарихына, мемлекеттік тілге, мәдениет пен салт-дәстүрге деген терең құрметтің қайнар көзі. Отан тағдырындағы ең маңызды сәттерде бізді біріктіретін де мемлекеттік рәміздер. Дүние жүзіне айқындайтын да Ту мен Елтаңба. Ресми халықаралық іс-шараларда Отанымыздың Әнұраны шырқалғанда немесе көк Туымыз көтерілгенде әрбір қазақстандық мақтаныш пен патриоттық сезімді сезінеді.</h4>Талай дарын иесі шыққан біздің өңірден спорт саңлақтары да қалыс қалмайды. Оған әлемдік аренада туымызды көкке көтеріп, Әнұранымызды асқақтата орындап жүрген жерлес жастарымыз дәлел. Иә, ауданда жастар арасында спортқа деген құлшыныс жоғары. Сондай спортқа жаны жақын жанның бірі қармақшылық&nbsp;–&nbsp;Еркебұлан Кәжденбек. Ол жақында Тайвань мемлекеті, Тайбэй қаласында гір спортынан Азия чемпионатында аудан намысын қорғап, жеңіс төрінен көрінді. Онда 14 мемлекеттің спортшысы өзара бақ сынасты. Осы байрақты бәсекеде Еркебұлан 73 келі салмақ дәрежесінде өткен серпе көтеруден І орын, жұлқа көтеруден ІІ орын иеленді. Қос сайыстың нәтижесінде &nbsp;І орынды қанжығасына байлады.Оның бала күнінен бастап спортқа қызығушылығы оянады. 13 жасынан бері спортқа қатысып, талай додаларда топ жарып жүр.&nbsp;Қазіргі таңда ауданға қарасты №186 қазақ орта мектебінің 10 сыныбын аяқтап жатыр. Спортқа құмар жалынды жас өткен жылы Өзбекстан Республикасы Хиуа қаласында өткен гір спортынан жасөспірімдер арасында Әлем чемпионатының қола жүлдегері атанған болатын.«Ұстазы жақсының ұстанымы жақсы» дегендей, спортта баланы баптайтын жаттықтырушының еңбегі жоғары.&nbsp;Себебі түрлі тартыста бақ пен бап қатар жүреді. Ал баптың жақсы болуы бірінші кезекте ұстазға байланысты.Еркебұлан табанды жігіттердің бірі, спорт шеберіне үміткер. Азия чемпионатына қатысқан шақта «Жеңіске жету сенің басты мақсатың болу керек. Сен бұл белдесуде жеңесің» деп бойына жігер беруге тырыстым. Аллаға шүкір еңбек ақталып жатыр. Әрине, бұл басы да, соңы да емес. Алда талай жарыстар күтіп тұр. Тамыз айында Қырғызстан Республикасында өтетін Әлем Чемпионатына жолдама алдық. Қазір осы жарысқа дайындықты бастап та кеттік, – дейді жаттықтырушысы Бекмұрат&nbsp;Нысанбаев.Қазақта «Болар елдің баласын бетін қақпай, белін бу» деген тәмсіл бар. Сондықтан Еркебұлан секілді ертеңінен зор үміт күттіретін жастарға тілекші болып, оның әрбір жетістігіне қуанамыз. Әрине, үздіксіз дайындық биік шыңдарға жетелейді. Біздің жас спортшының алдында әлі де талай дүбірлі жарыстардан жеңіспен оралатынына сеніміміз мол.

Қармақшылық жас спортшы Азия чемпионы атанды

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> «Кітапхана – мемлекеттің, ұлттың негізгі жады. Еліміз үшін құнды тарихи деректер мен материалдардың дені кітапханада сақталады. Сондықтан кітапхана ісін дамытуға бей-жай қарауға болмайды» деп Мемлекет басшысы Қасым-Жомарт Тоқаевтың Ұлттық құрылтайдың «Адал адам – Адал еңбек – Адал табыс» атты Атырау қаласында өткен үшінші отырысында айтқандай, кітапхана – ғылым, білім және мәдениет орталығы, ал кітап оқу – тұлға биігіне баспалдақ.</h4>Қармақшы ауданына қарасты Дүр Оңғар ауылдық кітапханасында жырау, ақын, Сыр өңірі ақындарының ұстазы Дүр Оңғар Дырқайұлының 165 жылдығына «Жыр дүлейі – Дүр Оңғар» атты жыр кеші және Мәдениет және өнер қызметкерлері күніне орай кітапханашылар арасында «Кітапхана – ақпарат пен шығармашылық орталығы» атты зерделі кеңес өтті. Бұл жиынның басты мақсаты – қазіргі ақпараттық қоғамда кітапхананың алар орнын айқындау, алға қойған міндеттерін мүлтіксіз атқаруда басқа барлық мекемелер мен ұйымдар арасындағы мәдени байланысты нығайта түсу, кітапханашылардың ұлттық рухын биіктетіп, мәдениеттілігімен ой-өрісінің дамуына ықпал жасауға бағыттау.Дүр Оңғар Дырқайұлы – 1859-1902 жылдар аралығында өмір сүрген жырау. Ол Сыр аймағына тән жыраулық дәстүрді алдыңғы толқыннан бойына дарыта отырып, кейінгі толқын ізбасарларына ұлағаттап, өшпес өнерін дарыта білді. Жырау шығармашылығы – қазақ әдебиетіндегі ғасырлар бойы үздіксіз даму жолында келе жатқан ақындық поэзиядағы көркемдік дәстүр жалғасы.Жыр кеші Жаңажол ауылдық округінің әкімі Әбимүсілім Қоқанов пен аудандық орталықтандырылған кітапханалар жүйесінің директоры Күлшара Қаниеваның алғы сөзімен ашылды. Тәлімді іс-шара Қазақстан Жазушылар одағының мүшесі, ақын, ұстаз Достық Тілеубергеновтің арнауымен және «Жыр – терме» үйірме мүшелері, жас термешілердің термелерімен жалғасты.Сонымен қатар, ауылдық кітапханада бас қосқан кітапханашылардың зерделі кеңесінде балалардың шығармашылығын дамытуға және кітапханалық-ақпараттық қызмет көрсетуге кітапханашылардың үлесі мол екені туралы мәлімет беріліп, әдістеме-библиография бөлімінің ұйымдастырған «БиблиоQUIZ» және «Kahoot» интеллектуальды ойын ойнатылды. Бұл сайысқа кітапханашылар белсенді қатысты.Артында сұлу сөз бен өлместей мұра қалдырған атақты тұлғаларды қалай құрметтесек те артықтық етпейді. Қалай болғанда да Дүр Оңғар сынды қазақтың қасиетті сөз өнерінің мәңгіліктігін өзінің шығармалары өрнектеп өткен дүлділдеріміздің өмір жолы мен келер ұрпаққа ұлағат етіп қалдыру парызымыз болып қала бермек.&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;

Жаңажол ауылындағы жыр кеші өтті

&nbsp;<a href="https://kyzylorda-news.kz/">Kyzylorda-news.kz</a>&nbsp; Мемлекеттік рәміздер – бұл кез келген мемлекеттің егемендігі мен біртұтастығын бейнелейтін нышандарының бірі. Олар мемлекет имиджінің ажырамас бөлігін құрайды, азаматтардың патриотизмін білдіреді. Мемлекеттің басты рәміздері – Ту, Елтаңба және Гимн.Ту – мемлекеттің егемендік пен біртұтастықты білдіреді. «Флаг» термині «vlag» деген нидерланд сөзінен шыққан және белгіленген көлем мен түстегі, әдетте елтаңба немесе эмблема түрінде бейнеленген, діңгекке немесе бауға бекітілген мата ұғымын білдіреді. Ту ежелден елдің халқын біріктіру және оны белгілі бір мемлекеттік құрылымға сәйкестендіру міндетін атқарып келеді. Елтаңба – («герб») термині немістің «erbe» (мұра) деген сөзінен шыққан. Мемлекеттің мәдени және тарихи дәстүрін бейнелейтін символдық мәні бар үйлесімді пішіндер мен заттардың мирастық ерекшелік белгісін білдіреді. Гимн – гректің «gimneo» сөзінен шыққан «гимн» термині «салтанатты ән» деген мағынаны білдіреді. Гимн ел азаматтарын тиімді әлеуметтік-саяси тұрғыдан топтастырып, этномәдени тұрғыдан теңдестіру үшін негізгі мәнге ие, маңызды дыбыстық рәміз саналады.Қазалыда 4 маусым – Қазақстан Республикасының Мемлекеттік рәміздер күніне орай марафон жарысы өтті. Жарысқа қатысушылар 10 шақырымға жүгірді. Марафон басталмас бұрын Қазалы ауданы әкімінің орынбасары Дәурен Тлеумбетов спортшыларды мерекемен құттықтап, сәттілік тіледі.Мерекеге орай ұйымдастырылған марафонда қазалылықтармен қатар Қызылорда облысының әр түкпірінен келген желаяқтарда бақ сынады.Аудандық жастар ресурстық орталығының ұйымдастыруымен өткен жарыстың жеңімпазы қазалылық Нұртуған Сазанбай атанды. Жүлделі екінші орынды аралдық Мейірбек Файзуллаев иеленсе, жүлделі үшінші орын қазалылық марафоншы Ерасыл Қожақметке бұйырды.Жеңімпаздар мен жүлдегерлерді аудан әкімі Мейрамбек Шермағанбет Мемлекеттік рәміздер күніне орай өткен салтанатты шарада құттықтап, қаржылай сыйақыларды табыс етті. Сондай-ақ, алғашқы болып келген спортшылар мен ең жас марафоншы аудан әкімінің «Алғыс хатына» ие болды.

Қазалыда марафон ұйымдастырылды

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> 2024 жылғы 15 мамыр мен 15 маусым аралығында жыл сайынғы «Мерейлі отбасы-2024» ұлттық конкурсына қатысуға өтінім қабылдау жалғасуда. «Мерейлі отбасы» ұлттық конкурсы өнегелі құндылықтарды жаңғыртуға, отбасы мен некенің жағымды үлгісін дәріптеуге, отбасы мәртебесін арттыруға және отбасы құндылықтарын нығайтуға бағытталған.</h4><h4 style="margin-left:0px;text-align:justify;">Конкурсқа отбасылар өзін-өзі ұсыну жолымен, сондай-ақ кент, ауылдық округ әкімдерінің, заңды тұлғалардың ұсынуы бойынша қатысады.</h4><h4 style="margin-left:0px;text-align:justify;">Конкурсқа еңбекте, спортта, шығармашылық, зияткерлік салада, ғылымда жоғары жетістіктерге жеткен отбасылар қатыса алады. Барлық мәліметті қалалық, аудандық қоғамдық даму бөлімдерінен алуға болады. Байланыс телефондары: Қызылорда қаласы: (8 7242 27-20-81) Арал ауданы: (8 72433 32-19-21) Қазалы ауданы: (8 72438 79-2-80) Қармақшы ауданы: 8 72437 2-28-33 Жалағаш ауданы: (8 72431 31-9-99) Сырдария ауданы: (8 72436 22271) Шиелі ауданы: (8 72432 4-45-24) Жаңақорған ауданы: (8 72435 22-2-90) #Otbasym2024, #Мерейліотбасы, #МерейліотбасыKZO2024</h4>

«Мерейлі отбасы-2024» ұлттық конкурсына қатысуға өтінім қабылдау жалғасуда

<a href="https://kyzylorda-news.kz/">Kyzylorda-news.kz</a> Қызылорда қалалық орталықтандырылған кітапханалар жүйесіне қарасты №17 Қызылжарма ауылдық кітапханасында ҚР Мемлекеттік рәміздер күніне орай Қызылжарма Мәдениет үйінің қызметкерлерінің қатысуымен «Менің елімнің рәміздері» тақырыбында дөңгелек үстел өтті.Шара ҚР Әнұранымен басталды. Шараға арнайы «Үмітін елдің арқалап, арманнан туған рәміздер» атты кітап көрмесі ұйымдастырылып, кеңінен насихатталды. Кітап көрмесіне ұлттық мақтанышымызға айналған рәміздеріміз жайлы жазылған әдебиеттер, мақалалар қойылды. Атап айтқанда оқырмандар ҚР Конституциясы, үш тілде жазылған Е.Шаймерденовтың «Қазақстан Республикасының тәуелсіздік рәміздері» және А.Жолдыбекованың «Ел рәміздері рухты шыңдайды», Ш.Байкенованың «Мен Қазақстан азаматымын», «Менің Отаным тәуелсіз Қазақстан», Ш.Уәлиханның «Тәуелсіздік нышандары» атты кітаптар мен мерзімді басылым бетіне жарияланған мақалалар тереңірек таныстырылып, библиографиялық шолу жасалды.Шараның мақсаты – тарихи асыл мұрамызға бағаланатын мемлекеттік рәміздеріміздің терең мән-мағынасын түсіндіру арқылы жастарымыздың бойына патриоттық сезімді қалыптастыру, кітапханаға оқырман тарту, ұлттық құндылықтарымызды қастерлеп, қадірлеу болып табылды.

Қызылордада «Менің елімнің рәміздері» тақырыбында дөңгелек үстел өтті

<a href="https://kyzylorda-news.kz/">Kyzylorda-news.kz</a> Бүгін Жаңақорған ауданына жұмыс сапарымен ҚР Президентінің кеңесшісі Мәлік Отарбаев келіп ардагерлер, зиялы қауым, жастар, дін өкілдерімен кездесті.Мәлік Отарбаев алдымен сапары барысында Хорасан ата мазарына барып, зиярат етті. Жергілікті шырақшы Хорасан ата жайлы мазмұнды әңгімемен бөлісіп, рухына арнайы дұға бағышталды.Келесі кезекте Түгіскен ауылдық клубының «Адал адам» мәдени тәрбие орталығы жұмысымен танысты.Еске сала кетсек, «Адал адам» мәдени-тәрбие беру орталығы облыс мәдениет үйлері мен клубтардың жанында жоба ретінде жүзеге асатын болады. Тұжырымдаманың мақсаты - елді мекендердегі халықтың мәдениет нысандарына қолжетімділігін арттыру, балалар мен жасөспірімдерді мәдени тәрбиемен қамту, олардың бос уақыттарында шығармашылық үйірмелермен айналысуына жағдай жасау. Жобада «Кино-тайм», «Әлем BOOK» , «ART уақыт», «Жанұя шуағы», Еріктілер тобы, Сыр сұхбат, Креативті хаб және арнайы мамандардың қатысуымен медиация, кеңес беру бағыттары қарастырылады.Одан соң, аудан әкімдігінің мәжіліс залында ауданның зиялы қауым өкілдерімен кездесті.Президент кеңесшісі жиынды Мемлекет басшысы Қасым-Жомарт Тоқаевтың ыстық сәлемі мен зор ықыласын жеткізуден бастады. Сондай-ақ Ұлттық құрылтайдың «Адал адам – Адал еңбек – Адал табыс» атты үшінші отырысында көтерілген мәселелерге жан-жақты тоқталып, кең көлемде түсіндіріп өтті. Ауданның зиялы қауым өкілдерімен ашық әңгімелесіп, ұсыныстарын тыңдады.Сонымен бірге, рухани ұйымдарды біріктіретін типтік үлгідегі «Руханият» орталығының құрылыс барысымен танысты.Бұл орталық - музей, кітапхана, мұрағат, неке қию залы, ардагерлер және аналар, жастар бас қосатын рухани орталыққа айналмақ.Келесі кезекте Мәлік Отарбаев Қазақстан мұсылмандары діни басқармасының аудандағы діни қызметкерлерімен кездесіп, елімізде орын алған жағдайларға тоқталып, ішкі және сыртқы тұрақтылықты сақтауда имамдардың үлесі барын атап өтті.Мәлік Нұржанұлы Президенттің құрылтайда айтқан ұлттық бірегейлікті сақтаудағы ойларымен бөлісті. Халықпен өткен әрбір кездесуде ұлттық құныдылықпен қатар, мемлекеттік құндылықтарды көтеру, тарихымыздағы ұлы тұлғалардың еңбек жолдары мен ел үшін жасаған ерліктерін, батырлығын, даналығын дәріптеу қажеттігін ұсынды.Жиын соңында аудан имамдары ҚР Президентінің кеңесшісі Мәлік Отарбаевқа өз баталарын беріп, алғыстарын жеткізді. Дін өкілдерімен жүздесу мәдениет үйінің ғимаратында аудан жастарымен кездесуге ұласты.Президент құрылтайдағы сөзінде: «Озық ойлы ұлт болу үшін бүкіл қоғам сана-сезімін өзгертіп, жаңа құндылықтарды орнықтыруы керек. Әрбір адам «адал азамат» деген атқа лайық болса, елімізде әділ қоғам орнайды. «Адал адам – адал еңбек – адал табыс» – бір-бірінен ажырамайтын ұғымдар. Осы үш таған – озық әрі табысты елге айналудың басты кілті», – деп атап өткен болатын.Мәлік Отарбаев кездесуде жастармен Мемлекет басшысы Қасым-Жомарт Тоқаевтың Ұлттық құрылтайда көтерген бастамалары мен ұсыныстары туралы әңгімелесті. Өз сөзінде Президент кеңесшісі құрылтайда айтылған мәселелерді жүзеге асыруда жастардың қосар үлесі зор екенін және осы бағытта қоғам болып ұйысып, бірлесіп жұмыс атқару қажет екенін айтты.Кездесу барысында Мәлік Отарбаев жастарға мемлекет тарапынан көрсетіліп жатқан көмектер туралы ақпарат берді. Сондай-ақ өз сөзінде Мәлік Нұржанұлы жастарға қолдау білдіру Президенттің басты назарында екенін жеткізді. Жиында барысында пайымды пікірлер айтылып, орнықты ұсыныстар ортаға салынды.

 ҚР Президентінің кеңесшісі Жаңақорған ауданына жұмыс сапарымен барды 

<a href="https://kyzylorda-news.kz/">Kyzylorda-news.kz</a> Бүгін Мемлекеттік рәміздер алаңында Мемлекеттік Рәміздер күніне орай салтанатты шара өтті. Шара барысында Тәуелсіз Қазақстанның және аймақтың дамуына үлес қосқан сырбойылықтар марапатталды. Іс-шара концерттік бағдарламамен, автошерумен жалғасты.&nbsp;Айта кетейік, мерекеге орай облыстағы ірі сауда орталықтарында, халық көп жиналатын орындарда, теле-радио арналарда, мемлекеттік және жергілікті атқарушы органдарда және бюджеттік мекемелерде Мемлекеттік Гимн бір мезгілде орындалды.Қала және аудандарда ғимарат терезелеріне, балкондарда Мемлекеттік Ту ілінетін «Туымыз - төрімізде» флэшмобы ұйымдастырылуда.Әлеуметтік желілерде «Менің туым – менің мақтанышым!» челленджі іске қосылды.Өңірде Елтаңба авторларының бірі, жерлесіміз, танымал сәулетші Жандарбек Мәлібековтің, Мемлекеттік Тудың авторы, суретші Шәкен Ниязбековтің еңбектерін насихаттауға арналған іс-шаралар кең көлемде өткізілуде.Жазғы балалар лагерлерінде «Отанды сүю-жүректен» атты патриоттық шаралар ұйымдастырылды.Сонымен бірге, барлық елді мекендердегі «ҚР Рәміздері аллеялары» мен «ҚР Рәміздері алаңдарында» тұрғындардың, жастар мен волонтерлердің қатысуымен шаралар өтті.<img src="https://knadmin.beoblood.kz/uploads/447634742_757946279859952_8306320073763192268_n_3354f9028b.jpg" alt="447634742_757946279859952_8306320073763192268_n.jpg"><img src="https://knadmin.beoblood.kz/uploads/447777687_757945463193367_737480288501162165_n_d12e494922.jpg" alt="447777687_757945463193367_737480288501162165_n.jpg">

Қызылордада «Көк тудың желбірегені»  дәстүрлі жалпыұлттық акциясы өтті

<a href="https://kyzylorda-news.kz/">Kyzylorda-news.kz</a> Интернет-алаяқтар сіздің шотыңызды, әсіресе сіз фишингітік сайттың «тұзағына» түсіп қалсаңыз лезге бір тиынсыз қалдырады. Бұл қаржылық алаяқтықтың көп түрлерінің бірі, қаскүнемдер Сіздің төлем карталарыңыздың деректемелерін алу мақсатында белгілі интернет-дүкендердің, банк сайтының не әлеуметтік желінің фишингтік сайт деп аталатын, солардың клонын жасап шығарады. Соған пошта мекенжайларының базасы арқылы сілтемелерді таратып жатыр, олардың ішінде Сіздің мекенжайыңыз да болуы мүмкін.Фишингтік сайттармен қалай күресудің жолын білу үшін Интернет жайлы, оны пайдалану және ақпаратты қорғау әдістемелері туралы біраз білгеніңіз жөн. Сонымен, мысалы интернет-дүкен туралы сөз қозғалған болса, оның мекенжайы http://-тен емес, https://-тен басталатына қараңыз. Алғашқыда сіз, тіптен фишингті білмей қалсаңыз, қаржылық тұзаққа түспеудің қарапайым базалық ережелері бар. Біріншіден, егер сіз, дегенмен сол сайтқа кіріп кетсеңіз, өзіңіздің жеке деректеріңізді, оның ішінде CVV-кодты (картаның сыр жағындағы үш мәнді нөмірі) қоса, төлем картаңыздың деректемелерін енгізуді сұрағанынан абай болуыңыз қажет. Сол кезеңде-ақ дереу тоқтатып, пароліңізді өзгерте отырып сайттан шығып кету керек.Кибералаяқтардың құрықтарына түспеу үшін, бірнеше ережелер есте сақтаңыздар:&nbsp;· өз дербес деректеріңізді еш жерде көрсетпеңіз;&nbsp;· сайтта рәсімдеген кезде зер салыңыз;&nbsp;· адрестік жолында сілтеменің дұрыстығын тексеріңіз;&nbsp;· https қорғалған желілерін пайдаланыңыз; күдікті хаттарды іріктеу;&nbsp;· банк аккаунттарға кіру үшін Wi-Fi ашық рұқсат нүктелерін пайдаланбаңыз;&nbsp;· өз құпия деректеріңіз: төлқұжат деректер, аударма деректемелерді (әсіресе аудару жасаудың құпия коды).Сол сияқты алаяқтар банктердің клиенттеріне ұялы телефондарына жиі қоңырау шалады және банк қызметкері деп өздерің таныстырады. Бұл ретте олар банктік терминологиясын пайдаланып сауатты және сенімді түсіндіреді. Мысалы алаяқтар төлем картасы бойынша күдікті операциялар анықталғаны туралы және оның «бұғаттау» үшін карта иесінің деректерін: ЖСН, картада көрсетілген телефон нөмірін, банктік карта нөмірін, ағымдағы немесе жинақ шоттың нөмірін енгізу қажет деп мәлімдейді. Клиент деректемелерді көрсеткен кезде олар ақша аудармасын бұғаттау үшін деп клиенттің нөміріне жіберілген SMS-хабарламадан кодты айтуды немесе оны тондық режимде алуды сұрайды. Мәліметті алғаннан кейін әдетте алаяқтар клиенттің интернет-банкингінде телефон нөмірін ауыстырады және шоттардан ақша алады.&nbsp;Мұндай жағдайда не істеу қажет?&nbsp;Дұрысы – тұтқаны қойып, әңгімені тоқтату және ақпаратты нақтылау үшін қызмет көрсететін банкке қоңырау шалу. Банктің жақын маңдағы бөлімшесіне барып, шотыңызға алаяқтық шабуылдар жасауға әрекет ету туралы өтініш жазған жөн.Банк қызметкерлері іс-қимылдарының регламенті бар, соған сәйкес банктердің қызметкерлері ешқашан карта не алынған SMS бойынша деректер беруді талап етіп клиентке бірінші болып қоңырау шалмайды.Егер алаяқ сіз туралы жеткілікті түрде ақпаратқа ие болса, ол сіздің атыңыздан тауарлар мен қызметтерді сатып алуы, жаңа шоттар ашуы, ақша аударуы немесе кредит алуға өтінім беруі мүмкін.Мына жағдайларда:· өз шоттарыңызда қалыптан тыс белсенділікті байқасаңыз;· өз шоттарыңызға қашықтан кіре алмасаңыз;· сіздің картаңызды қызмет көрсетуге қабылдамаса, өз банкіңізге жедел хабарласыңыз.Осындай қарапайым, алайда тиімді ережелерді сақтау ақшаңызды алаяқтардан қорғауға мүмкіндік береді. Достарыңыз бен туған-туыстарыңыз ешқашан алаяқтардың қармағына ілінбеуі үшін, олармен осы ақпаратты бөлісіңіздер.Fingramota.kz-мен бірге қаржылық сауаттылықтарыңызды арттырыңыздар!

Қазақстан және Қызылорда облысының жаңалықтары