<a href="https://kyzylorda-news.kz/">Kyzylorda-news.kz.</a>&nbsp;Қашаннан ат ерттеп, атан қомдаған қазақ жұрты үшін ауыл шаруашылығы әу, бастан қалыптасқан кәсіп. Бүгінгідей ғылым мен техника дамыған тұста ауыл шаруашылығы қоса дамып, заманға сай өнімін өндіріліп, ел экономикасының өркен жаюына әлі де септігі тиіп келеді.&nbsp;Бұл ретте, Сыр өңірі елімізде мал және егін шаруашылығын игеріп, жіті дамытып келе жатқан өңірдің бірі деуге болады. Сөзіміз жалаң болмас үшін, қолда бар көрсеткішті алға тарта аламыз. Мәслене, биыл жыл басынан бері ауылшаруашылығының жалпы өнімінің көлемі 1 миллион 846,5 мың теңгені құрап, өнімнің нақты көлемінің индексі өткен жылдың салыстырмалы кезеңімен 105,3 пайызды құраған. Оның ішінде, мал шаруашылығында меншіктің барлық нысандары бойынша 35 544 бас ірі қара мал, оның ішінде 16 983 бас сиыр, 17 046 бас жылқы, 3 411 бас түйе, 40 339 бас қой мен ешкі, 15 213 құс өсірілген. Бұл көрсеткіш өткен жылдың салыстырмалы кезеңіне қарағанда ірі қара мал 129,3 процентке, сиыр 102,0 процентке, жылқы 142,7 процентке, түйе 87,1 процентке, қой мен ешкі басы 125,2 процентке, құс 102,3 процентке артқан.&nbsp;Мал шаруашылығы саласында өнім өндіру кәсібінде де ілшгерілеушілік байқалады. Мәселен, жыл басынан бері қалада 845,2 тонна ет (тірідей салмақпен), 1 330 тонна сүт, 57,4 мың дана жұмыртқа өндірілген. Мұның өткен жылдың салыстырмалы кезеңіне қарағанда ет өндіру &nbsp;106,0 процентке, жұмыртқа өндіру 101,4 процентке, сүт өндіру 100,3 процентке артқанын байқауға болады.&nbsp;Ал, егін ұшаруашылығы саласы бойынша да мынадай көрсеткіштерді алға тартуға болады. Мәселен, Қызылорда қаласына қарасты ауыл шаруашылығы құрлымының барлық нысандарында 2023 жылы барлығы 9036 гектарға ауыл шаруашылық дақылдарын орналастыру жоспарланған. Оның ішінде күрішті 3610 гектарға, көкөністерді 1330 гектарға, ескі жоңышқаны 1849 гектарға, жаңа жоңышқаны 575 гектарға, бау-бақша дақылдарын 990 гектарға, картопты 500 гектарға, жаздық бидайды 107 гектарға және 75 гектарға сорго &nbsp;егуді жоспарлап отыр.

Қызылордада ата кәсіпті игергендер көп

<a href="https://kyzylorda-news.kz/">Kyzylorda-news.kz.</a>&nbsp;Қазалы аудандық орталық кітапхананың ұйымдастыруымен 31 мамыр саяси қуғын – сүргін құрбандарын еске алу күніне орай «Азалы жылдар жаңғырығы» атты кітап көрмесі өткізілді. Мақсаты Зұлмат жылдардың оқиғасын, оның жазықсыз құрбаны болған азаматтардың есімдерін ұмытпау, оларды мәңгі есте сақтау, қуғын-сүргінге ұшыраған халықтардың тарихын таныстыру.&nbsp;Кітап көрмесінде сол кезеңдегі тоталитарлық жүйенің жазықсыз құрбаны болған қайғылы оқиғалар мен деректер көрсетілген. Кітапхананың қорынан ұсынылған деректі материалдар және XX ғасырдың басындағы ұлт-азаттық қозғалысы жетекшілерінің бірі, мемлекет қайраткері, қазақ тіл білімі мен ағартушы Ахмет Байтұрсынұлы, халқымыздың тұңғыш саяси Алаш партиясының ұйымдастырушысы және ұлттық Алашорда автономиялы үкіметінің төрағасы, ғұлама ғалым, әдебиеттанушы, аудармашы әрі дарынды публицист Әлихан Бөкейхан және қазақтың аса көрнекті ағартушысы, қоғам қайраткері, ақын, жазушы, жалынды көсемсөз шебері Міржақып Дулатұлы сынды қазақ зиялыларының еңбектері туралы кітаптар қойылды. &nbsp;Кітап көрмесіндегі басылымдарда халқымыздың тарихындағы ең қасіретті жылдар – XX ғасырдың басындағы ашаршылық пен саяси қуғын-сүргін кезеңі баяндалады. Саяси қуғын-сүргін құрбандарының қайғылы тағдырын баяндайтын фотосуреттер, құжаттар, кітаптар, журналдар, газеттер жинақтары ұсынылды. &nbsp;Сондай-ақ қуғын-сүргінге ұшыраған адамдардың ерекше табандылығы мен еліне деген адалдығын көрсететін құжаттар мен материалдар, атап айтқанда, кітапхананың қорындағы жаппай жазалаудың сол бір қиын-қыстау жылдарындағы зерттеулерде тағдырлары тәлкекке түскен саяси қуғын-сүргін құрбандары туралы «Аза: Қызылорда облысы» (Құрбан болған боздақтар туралы мәлімет), «Алаш қозғалысы: дерек пен дәйек, &nbsp;Сағат Жүсіптің «Ашаршылық ақиқаты» және Т.Омарбековтың «20-30 жылдардағы Қазақстан қасіреті», М.Қозыбаевтың «Ақтаңдақтар ақиқаты», С.Өзбекұлының «Арыстары Алаштың» тағы да басқа көптеген саяси деректі кітаптар және басқа әдебиеттер қойылды. Көрмеге аудандық мәслихат депутаттары Нұрғиса Жалғасбаев, Есет Табынбай және «Өнерпаз» БПҰ төрағасы Совет Бабанаев қатысты.

Саяси қуғын-сүргін құрбандарын еске алукүніне орай көрме ұйымдастырылды

<a href="https://kyzylorda-news.kz/">Kyzylorda-news.kz.</a>&nbsp; Сырдария аудандық ауруханасында «1 маусым – Халықаралық балаларды қорғау күні» мерекесіне арналған «Мен өмірдің гүлімін!» атты іс-шара өткізілгнен болатын. Іс-шараға денсаулық сақтау саласы мамандарының балалары қатысты.&nbsp; Іс-шара барысында бас дәрігер Жалғасбек Үсенов сөз сөйлеп, балаларды мерекемен құттықтады.<blockquote>– Біздің көңіліміздің гүлі, көзіміздің нұры, болашағымыз – сендерсіңдер! Сондықтан да, Сіздер, сапалы білім алып, еліміздің дәулетті, жеріміздің сәулетті болуы үшін белсенділік танытып, еліміздің одан әрі гүлденуіне өз үлестеріңізді қосуларыңыз керек. Отбасынан басталған бақытты балалық шақтарың Отанның адал азаматы болуға жетелесін. Болашақтарың жарқын, аспандарың ашық болсын! Елімізді өркендетер келешектің кемеңгері болыңдар! Әрқашан жүздеріңізден күлкі, жүректеріңізден мейірім кетпесін. Сендердің оқуда озат болуларыңа, жарқын болашаққа нық қадам басып, еңсесі биік ел азаматтары атануларыңа тілектеспін, - деді бас дәрігер.&nbsp;</blockquote>Аталған іс-шарада арнайы шақырылған аниматорлар қойылымдар мен ойындар ұйымдастырды. Қызықты ойындарға балғын балақайлар белсене атсалысты.&nbsp; Ел ертеңі мен үміті – &nbsp;балаларымыздың бейбіт күнде ұйқысы тыныш, күлкісі шат, болашағы жарқын, келешегі кемел болсын деп тілейміз!&nbsp;

Сырдариялық дәрігерлер балаларға шаттық сыйлады

<a href="https://kyzylorda-news.kz/">Kyzylorda-news.kz.</a> Әне-міне дегенше биылғы оқу жылы да өз мәресіне жетті. Соңғы қоңыраудың үні естіліп, барша оқушылар жазғы демалысына &nbsp;шықты. Сабақ деп сергелдеңге түскен жасөспірімдер үшін кітап оқып, жора-жолдастармен асыр салып ойнау үшін таптырмас уақыт болып табылады. Алайда, кей бүлдіршіндер аталған мүмкіндікті жөнді пайдалана алмай, уақытының көп бөлігін босқа кетіріп жатыр. Күні бойы электронды гаджетке телміріп, уақытын текке өткізген балаларды аңғарып &nbsp;жүрміз.&nbsp;Елімізде жасөспірімдер арасындағы ауқымды аталмыш мәселені шешу үшін, жазғы демалысты пайдалы әрі қызықты өткізу мақсатында көптеген лагерлер маусымның алғашқы күнінен өз жұмыстарын бастап кетті. Сырдария ауданында балалардың игілігі үшін «Жалын» сауықтыру &nbsp;лагері жұмыс істейді.&nbsp;Аудан басшысы Берік Сәрменбаев лагерде болып, бүлдіршіндерге көрсетілетін қызмет сапасына баға берді. Лагерді аралау барысында сала басшыларына мейлінше балалар үшін қолайлы орта қалыптастыру керек екенін тілге тие кетті. &nbsp;Айта кететін жәйт, биылғы жазғы маусымда «Жалын» лагерінде 681 оқушы, 6 маусымда демалмақ. Өз кезегінде лагерь меңгерушісі &nbsp;Мира Момбаева тынығу орнының тыныс-тіршілігімен таныстырды.&nbsp;Негізінен, сауықтыру орталығы 1988 жылдан бастап оқушылар игілігі үшін қызмет етеді. Мәдени әрі спорттық шаралар ұйымдастырылып, балалардың ментальді денсаулығы үшін барлық жағдай жасалған. &nbsp;

Аудан әкімі «Жалын» сауықтыру лагерінің жұмысымен танысты

<a href="https://kyzylorda-news.kz/">Kyzylorda-news.kz.</a> «Өлген» елдің тілінің белгілі бір мөлшерде «тірі» қалатын жағдайы да болады. Тілдің ондай мықтылығына латын (түпнұсқасы: «Ал Өн») тілі дәлел. Керісінше, тіліне мықты қайбір қайсар елдер өз тірлігін ешқандай атамекенсіз-ақ, мемлекеттіліксіз-ақ жаманды-жақсылы жалғастыра бермекке қауқарлы. Оған бір дәлел – сонау курд халқы. Ондай ел құлдыққа түссе де құрып кетпейді. Бірақ, тілі болмаса, кез келген ел бір сәтке де өмір сүре алмайды. Тіл құдіреті дегеніңіз сол, әне! Енді ежелден мәлім сол қарапайым қағидатты астанадағы әр министрлікке ауылда отырған біз барып түсіндіріп жүруіміз керек пе?!Тіл мәселесіне келгенде түйіні тарқатылмай жүрген түйіткілдерді қаламымен түртіп жүретін жазушы Т.Әбдікәкімовтың сөзі бұл. Мемлекеттік тілдің мәртебесіне келгенде маңдытып айтар хабарымыз жоқ әзірге. Содан болар өткенге елеңдеп, бұрынғы тіл жанашырларының жан айқайын қайта-қайта еске аламыз. Мәселен, 1905 жылғы Ұлт-азаттық қозғалыстың алғашқы қадамында Алаштың ардақты азаматы Әлихан Бөкейхановтың қазақ тіліне бостандық берілуін көтеруі тектен-тек емес. 1989 жылдың 22 қыркүйегінде еліміздің тарихында тұңғыш рет «Тіл туралы» заң қабылданып, қазақ тілі мемлекеттік мәртебеге ие болды. Ал, тәуелсіздік орнағаннан кейін, 1995 жылы Конституция қабылданған соң өмірге келген 1997 жылғы «Тіл туралы» заңы да бекітілгені белгілі. Содан бергі жиырма төрт жылда мемлекеттік тілді қоғамдық өмірде дамыту және қолдану бағытында елеулі жұмыстар жүзеге асты. Бұрын қасаң тартқан мемлекеттік ұйымдар мен өзін-өзі басқару органдары қазақ тілі төңірегінде оң өзгеріске бет бұрды. Білім, бұқаралық ақпарат құралдары, мәдениет, өнер, экономика, ғылым, саясат, қорғаныс салаларында да елеулі өзгеріс байқалды. Білім беру жүйесінде қазақ мектептерінің саны артты. Алайда, қайта құрудан басталған тіл үшін күрес, ұлттық рухтың қарқыны егемендікке жету мен тәуелсіздік алудан әрі өрісті дамытылмады. Елімізде белсенді құрылған және көп істерге ұйытқы болған «Қазақ тілі» қоғамдары көп ұзамай қалың ұйқыға кеткені де жасырын емес. Ең өкініштісі, 1995 жылғы Ата Заңның 7-бабындағы «Қазақстан Рес­публикасында мемлекеттік тіл – қазақ тілі», сондай-ақ 1997 жылы қабылданған Қазақстан Республикасының «Тіл туралы» заңындағы «Мемлекеттік тіл – мемлекеттің бүкіл аумағында, қоғамдық қатынастардың барлық саласында қолданылатын мемлекеттік басқару, заң шығару, сот ісін жүргізу және іс-қағаздарын жүргізу тілі» – деген құқықтық нормалар тиісті жұмыс істемей отыр.Осы арада өткен ғасырдың 30-шы жылдарындағы қазақ зиялыларының қайсар мінезі еске түседі. Белгілі композитор Е.Брусиловский өзінің «Дүйім дүлдүлдер» атты өмірбаяндық кітабында Халық ағарту комиссары Темірбек Жүргеновтың өз кабинетінде өткізген бір мәжілісін мысалға келтіреді: «Наркомның өзі де, басқа сөйлеушілер де қазақ тілінде сөйлеп отыр. Бір кезде Борис Николаевич (қарағандылық Орлов) орнынан тұрды да Жүргеновтен қазақша сөйлемеуін өтінді, мұнда не жайында әңгіме болып жатқанын өзі ұқпай отырғанын, сөйлеушілерді түсінетіндей болуы үшін орысша сөйлеу жөн екенін айтты. Бір кезде Жүргеновтың қара көздері ұшқындап кетті. Жұрттың бәрі бүкшие түсіп, тым-тырыс бола қалды. «Сіз қайда отырсыз, Орлов жолдас! Сіз Қазақстанға келдіңіз екен, егер де мұнда жұмыс істегіңіз келсе, сіз республиканың мемлекеттік тілін білуге міндеттісіз! Сіз қазақ әндерін де орыс тілінде зерттемексіз бе?» – дейді.Ештен кеш жақсыБұл осыдан сексен жылдан астам уақыт бұрын қазақ тілінің мемлекеттік мәртебесі туралы конституциялық қағида да, заң да жоқ болғанымен ұлттық рухы күшті Алаш ардақтыларының ашық әрекеті болатын. Ал, қазір ше? Мінберге шыққан министр, сөз сөйлеген депутат, биліктегі шенеуніктер тілі енді шыққан сәбидей шүлдірлеп қазақша сөйлей алмайды. Жиындардың басым бөлігі орыс тілінде өтеді. Неге? Орыс тілі – Ата Заңда мемлекеттік тілмен тең дәрежедегі статусқа ие. Орысша сауал қойған адамға қазақша жауап қата алмайтын біздер ғана ма?Ал, осыдан 15 жыл бұрын Н.Назарбаевтың мемлекеттік Тілді меңгеруге қатысты «он бес жылда аюға да тіл үйретуге болады ғой!» деген тарихи сарказмдық мәтелінің де оянуға түрткі бола алмағаны жанға батады. Одан бері тағы да 15 жыл өтті. Мемлекеттік тілдің мәртебесін арттыру туралы қаншама ой толғамдар болғанымен нақты әрекеттің көрініс таппағаны болар, «ештен кеш жақсы» дестік. Иә, жуырда Мемлекет басшысы Қ.Тоқаев «Тәуелсіздік бәрінен қымбат» атты мақаласында мемлекеттік тілді меңгеруге әлі де кеш еместігін жеткізді. Т.Әбдікәкімов «25 жылдық сабырға 5 жылдық тағатты қоссақ, бақандай 30 жылдық шыдам шығады» дейді. Бір білеріміз «шыдамның да шегі бар». Расында, қазақ өзінің мемлекеттік тілінің мәртебесін арттырмаса, жерін біздікі деп кім көрінген талан-таражға салады. Азат елдің 30 жылдағы тіл саясатының салмағы енді қалай өлшенбек? Қазақ өзінің ана тілін үйрену үшін 30 жылын жоғалтуы керек пе? «Ештен кеш жақсы» деп еркіне салғаннан мемлекеттік тілді меңгеруге талпынып тұрғандарды және көрмедік.P.S. Қазақ жерін 130-дан астам ұлт өкілдері мекен етеді. Әрбірі өзінің тілі мен дінін ұстануға құқылы. Егемен Қазақстанның еркіндігі мен бауырмалдығының көрінісі бұл дейміз. Алайда өзінің мемлекеттік тілін меңгере алмай жүріп, өзгеден талап ету де ақылға қонымсыз тірлік болмай ма? Осындай да «қалауын таппас қайран тіл» деп күрсініп қана қоямыз.

Қалауын таппас қайран тіл

<a href="https://kyzylorda-news.kz/">Kyzylorda-news.kz.</a> Инвестициялық жобалар жергілікті тұрғындардың әлеуетін көтеріп, экономиканың тұрақты дамуына, жергілікті тұрғындардың жұмыспен қамтылуына оң әсерін береді. «Өнеркәсіптік-инновациялық жобалардың бірыңғай индустрияландыру» картасы аясында Қызылорда қаласы бойынша «Бірыңғай индустрияландыру картасына» енгізілген жалпы құны 68,2 млрд. теңгені құрайтын 12 жоба жүзеге асырылуда. Оның бүгінгі күнге 3 жобасы іске қосылып, жұмыс жасауда. Мамандар бұл жобалар жүзеге асса 824 жұмыс орны ашылады дейді.&nbsp;Елдегі, өңірдегі инвестициялық климатты жақсарту – стратегиялық міндеттің бірі. Бұл – аймақтың қалай жұмыс істеп жатқанының нақты индикаторы. Мамандар біздің өңірдің ұстанған бағыт-бағдары дұрыс дейді. Мәселен, &nbsp;былтыр өңір экономикасына инвестиция тарту жоспары артығымен орындалған. Биыл да сол биіктен табылу көзделіп отыр. 2021 жылдың желтоқсан айында «Orda Glass LTD» ЖШС-ның Қызылорда қаласында қуаттылығы жылына 197 100 тонна табақша шыны шығару және өңдеу зауыты іске қосылды.«Вега Пром» ЖШС-ның «Құрғақ құрылыс қоспаларын өндіру бойынша цехты кеңейту» жобасы да инвест жобалар қатарында. Бүгінде құрылыс жұмыстарының 80 пайызы атқарылып, жаңа цех іске қосылып, жұмыс жасауда. «Нұр Орда» ЖШС-ның «Қызылорда қаласында асфальтбетон зауытының құрылысы» жобасы да бар. Былтырғы жылдың маусым айында бетон зауыты іске қосылып, жұмыс жасауда.&nbsp; Сондай-ақ, «ТриМо» серіктестігінің &nbsp;қуаттылығы жылына 500 &nbsp;тонна екі окись молибден ұнтағын үшокись молибден ұнтағына техникалық айналдыру өндірісін ұйымдастыру», &nbsp;«Кызылорда Рефайнэри» ЖШС-ның «К4, К5 экологиялық кластағы мотор майларын өндіру», «Poom Trade KZ» ЖШС-ның «Қызылорда қаласында «КОМАЗ» шағын арматура зауытын салу, «Сыр-Маржаны» ЖШС-ның &nbsp;ет және ет өнімдерін өндіру және сақтау , «Orda TEXC» ЖШС-нің «Түйе жүнін өңдеу және төсеніш көрпе өндіру цехы, «Қызылорда композиттік материалдар зауыты» ЖШС-ның шыны талшықты және композитті материалдарды өндіру зауыты, «Айғасар» ЖШС-ның ерекше балаларға арналған иппотерапия жылқылы-сауықтыру клубын ашу және бие сүтін өңдеу цехын салу, «Dana Quartz» ЖШС-ның айна шығару, «Кәусар» ШҚ-нің құс фабрикасының құрылысы жобалары жүзеге асырылмақ.&nbsp;Қалада &nbsp;жыл басынан бері жалпы сомасы 2076,4 млн. теңгені құрайтын 204 жобаны қаржыландыру көзделген.<blockquote>«Кәсіпкерлікті дамытудың 2021-2025 жылдарға арналған Ұлттық жоба» аясында субсидиялау бағыты бойынша құны 1529 млн. теңгені құрайтын 44 жоба, жаңа бизнес-идеяларды іске асыруға гранттар беру бағыты бойынша 131,1 млн. теңгені құрайтын 95 жоба қолдау алды. Сондай-ақ &nbsp;«Іскер» бағдарламасы бойынша жоба құны 289,3 млн. теңгені құрайтын 49 жоба қаржыландырылды. &nbsp;«Қызылорда» өңірлік инвестициялық орталығы микроқаржы ұйымы ЖШС арқылы өз қаражаты есебінен жалпы құны 103,6 млн. теңгені құрайтын 11 жоба қаржыландырылды. «Аграрлық несие корпорация» АҚ арқылы «Жастарға арналған несие» бойынша жалпы құны 23,4 млн. теңгені құрайтын 5 жоба қолдау алды», – дейді қалалық кәсіпкерлік, өнеркәсіп және туризм бөлімінің басшысы Бағлан Амангелдиев.&nbsp;</blockquote>Бөлім басшының айтуынша, биыл ірі инвестициялық жобаны іске асыру жоспарда бар. Наурыз айында «Қорқыт ата» әуежайының құрылысы басталған. Бұл ретте жеке инвестор Болат Өтемұратовтың қоры әуежай терминалының жұмыс жобасын әзірлеуде. &nbsp;Құрылыс нысаны қаланың коммуналдық меншігіне тегін беріледі. Жаңа әуежай терминалы үздік халықаралық тәжірибеге сай салынып жатыр. Шыныдан жасалған витражды қасбеті бар екі қабатты терминалдың жалпы ауданы 7500 шаршы метр. Халықаралық және ішкі ұшу аймағы 160 қонақты қабылдай алады. Онда телескопиялық өтпе жол, эскалатор мен лифт, жүктерді тапсыру мен өңдеудің автоматтандырылған жүйесі, транзиттік жолаушыға арналған зал, CIP залы бар. Жаңа ғимаратта өзін-өзі тіркеу пункті, намазхана, Duty Free аймағы, сондай-ақ шекара және кеден қызметі, фитосанитарлық және ветеринария, санитарлық-эпидемиологиялық бақылау қыз-меткерлері мен желілік полиция бөлімшелері үшін мамандандырылған орын ашылады. Құрылыста халықаралық бренд жабдығы, технологиялық және жобалық материал пайдаланылады. Әуежайды &nbsp;2024 жылдың ІІІ тоқсанында пайдалануға берілу &nbsp;жоспарлануда.Инвестициялық ірі жобаның бірі – Қызылордада түрік инвесторларымен бірлесіп, электр қуаты 240 МВт болатын және жылу қуаты 277 Гкал болатын жаңа бу-газ қондырғысының құрылысын бастау. Құрылысты жүргізу 2023-2025 жылдарға жоспарланған. Сала мамандарының айтуынша, бу-газ қондырғысының игілігін 25-30 жылға дейін көреміз деген болжам бар. Осы мақсатта &nbsp;жылу-электр орталығының аумағынан жер учаскесі бөлінген. &nbsp;Аталған жоба сәтті жүзеге асса, электр және жылу қуатының тапшылығы проблемасы шешіліп, тұтынушылар сапалы, әрі сенімді жылумен қамтамасыз етіледі. Бөлім &nbsp;басшысының айтуынша, бұл жоба соңғы жылдары шетелдік инвесторлардың қаражатына салынып жатқан еліміздегі ең ауқымды жобаның бірі.Инвестицияның қарқынды дамуына &nbsp;Қызылорда облысының даму орталығы айтар-лықтай ықпал етіп отырғанын да айта кеткен жөн.

Қызылорда: Өңір өміріне өң берген инвест жобалар

<a href="https://kyzylorda-news.kz/">Kyzylorda-news.kz.</a> Қазалы көлік-техникалық жоғары колледжінің оқу материалдық базасында 410 орындық оқу корпусы, оқу-өндірістік шеберхана мен зертханалар, 100 орындық асхана және жатақхана, жазғы спорт алаңы, оқу-жаттығу залы, фитнес клуб және жылыжай бар.&nbsp;Жас жұмысшыларды өз мамандығына тәрбиелеуде слесарлық, ағаш ұстасы, газэлектрмен дәнекерлеу және токарлық шеберханалар, физикалық және химиялық лабораториялық кабинеттер, компьютерлік орталық,мамандықты оқытуға арналған 36 оқу кабинеті, оның ішінде, 24 арнаулы пән (заманауи құрылғылармен жабдықталған 6 арнайы пән) кабинеттері, 12 жалпы білім беретін пән кабинеттері, 6 шеберхана, 4 зертхана және 3 полигон, 150 орынды мәдени орталық, 100 орындық ғылыми-әдістемелік орталық, 19287кітап қоры бар 10 орынды электронды кітапхана жұмыс жасайды. Теориялық білімді практикамен ұштастыру мақсатында 31 әлеуметтік серіктестіктермен келісімшарт жасалды. Инженер-педагогтар өз біліктіліктерін Корея, Франция, Германия, Чехия елдерінде және Мәскеу, Минск қалаларында арттырды.Осы орайда аталған оқу орыны келер жылы «Компьютерлік аппараттық қамтамасыз ету операторы», «Желілік және жүйелік әкімшілендіру технигі», «Ақпараттық қауіпсіздік технигі», «Бағдарламалық қамтамасыздандыруды құрастырушысы», «Токарь», «Фрезерлеуші», «Электргазымен дәнекерлеуші», «Техник-механик», «Локомотивті жөндеу жөніндегі слесарі (түрлері бойынша)», «Вагон жөндеу слесары», «Техник-электромеханик», «Кең бейінді құрылыс жұмыстарының шебері», «Ағаш ұстасы және паркет жұмыстарының шебері», «Құрғақ құрылыс шебері», «Құрылыс-әрлеу жұмыстарының шебері», «Техник-құрылысшы», «Техник-электронщик», «Кондитер-безендіруші», «Аспазшы», «Электр жабдықтарын жөндеу жөніндегі электр слесарі (түрлері және салалары бойынша)» мамандықтары бойынша студенттер қабылдайтындығын айта кеткен жөн.&nbsp;<blockquote>«Қазалы көлік-техникалық жоғары колледжі «Жас маман» жобасына қатысып, республикалық үздік 180 колледждің қатарына енгізілді. 2021 жылы республикалық бюджеттен 320 000 000 теңге бөлінді. Аталған қаржыға «Локомотивті жөндеу жөніндегі слесарына»-142 млн, «Вагон &nbsp;жөндеу слесарына-133 млн және «Электр жабдықтарын жөндеу жөніндегі электр слесары» біліктілігі бойынша-45 млн теңгеге заманауи құрал-жабдықтар сатып алынды. Жоба аясында үш шеберхана, үш арнайы пән кабинеті, бір интерактивті класс, бір мультимедиялық орталық жабдықталып, 22 электрленген стенд, 6 электрленген макет, 3 тренажерлық кешен, 6 виртуалды 3Д конструктор, 8 оқу-лабораториялық кешен, виртуалды очки және 14 станок сатып алынды. Заманауи құрал жабдықтарды игеруде 25 инженер-педагог өз біліктіктерін көтеріп сертификатталды», – дейді колледж лиректоры Болат Ахметов.</blockquote>

Оңтайлы жағдай жасалған оқу ордасы

<a href="https://kyzylorda-news.kz/">Kyzylorda-news.kz.</a> Соңғы 5 жылдың ішінде кент тұрғындарының саны артты. Бейресми дерек көздерінде, аудан орталығындағы халық саны 40 мыңнан асқан деген мәлімет бар. Осыған орай, отбасылардың да, оның ішінде жас отау қатары да еселеніп келеді. Әрине, бұл қуанарлық жағдай. Өйткені, ауданның келбеті күн сайын жаңарып, жаңғырып, әлеуметтің әлеуеті артып келеді. Бірақ баспана салуға мемлекеттен берілетін 10 сотық тегін жердің жайы жыр болып тұр.&nbsp;Иә, кенттің келбеті көркейіп, әлеуметтік мәселелер де кезеңкезеңімен шешіліп келеді. Әр салада серпін бар, әсіресе, өндіріс өркендеп келеді. Алайда жалдамалы пәтер мен тұрғын үйдің бағасы қалтаны қағып барады. Сондықтан әрбір шаңырақ баспаналы болуды армандайды. Тек тегін жер берілсе деген тілек бар. Осы тақырыпты зерделеу кезінде мынандай заңдылықты көзіміз шалды. Мемлекеттен берілетін жерді кезегі келіп, алған кез келген тұрғын электронды түрде тізімге тіркеле алады. Кезегі келеді, бірақ екінші мәрте тегін берілмейді, тек сатып алады. Ол аз ғана мөлшерде екенін ішіңіз сезіп отырған болар...Алдымен аудандық жер қатынастары бөлімінің есігін қақтық. Заңдылыққа сүйенейік, Қазақстан Республикасының Жер Кодексінің 50-бабына сәйкес жер учаскелері ҚР-ның азаматтарына жеке тұрғын үй құрылысы үшiн – 0,10 гектар жер тегін беріледі. Ал ауылдық жерлерде өзiндiк қосалқы шаруашылық (үй маңындағы және егiстiк телiмдердi қоса алғанда) жүргiзу үшiн суарылмайтын жерде 0,25 гектар және суармалы жерде 0,15 гектар ел азаматтарына жеке меншікке тегін беріледі. Ол үшін құжат тапсырасыз, бірақ биылдан бастап тек электронды түрде.<blockquote>«Жер учаскесін алу үшін кезектілікке тіркелмегендігі анықталса ҚР Ауыл шаруашылығы министрінің №301 бұйрығының 15-қосымшасына сәйкес «Жер учаскесін алу үшін кезекке қою» мемлекеттік қызметін көрсету қағидасы арқылы egov.kz порталына жеке электрондық цифрлық кілтіңіз арқылы кіресіз. «Жылжымайтын мүлік» батырмасын басып, «Жер қатынастары» тізілімін таңдап, «Жеке тұрғын үй құрылысына жер учаскесін (10 сотық жер) алуға кезекті қарау немесе кезекке тұру» бөлімшесіне өтесіз. Жаңақорған кенті немесе республиканың кез-келген аймағын таңдап өтініш білдіруге болады. Тағы айтамын, тіркелуге тек электронды түрде», – деді бөлімнің жетекші маманы Ерболат Шайдаров.</blockquote>Ал, кезегіңізді білгіңіз келсе электронды түрде көре аласыз. Иә, қазір құжаттың басым бөлігі электронды жүйеге көшті. Ол үшін тиісті мекеме немесе кент есігін сығалап жүрмейсіз. Жаңақорған кенті бойынша 2015 жылдан 2022 жылдың аяғына дейін жер кезегі тізімінде 7894 адам тіркелсе, қазіргі таңда, жыл басынан бері 2350 адам тіркелген. Бас-аяғы қазір 10 244 адам жер кезегі тізілімін қалыптастырды. Бұл өте көп көрсеткіш. Кенттің өзінде осынша отбасы бар деу қисынсыз.<blockquote>«Қазіргі таңда мониторинг жүргізіліп, түгендеу жұмыстары аяқталып, 2016 жылы тіркелген азаматтарға жер берілуде. Осы уақытқа дейін 265 азаматқа уақытша өтеулі жер пайдалану (жалдау) 3 жыл мерзімге берілді. Жұмыс алдағы уақытта да атқарылып, жер берілу кезектілікпен жүзеге асады», – деді жауапты сала маманы.</blockquote>Жер қатынастары бөлімі құжат тапсыру бойынша және атқарылған жұмыстарды жүйеледі. Ал, жаңақорғандықтар асыға күтіп жүрген «Саяжай 1» мөлтек ауданының құрылысының жай-күйі қалай? Бұл бойынша аудандық сәулет, қала құрылысы және құрылыс бөлімінен жауап іздедік.– Жеке тұрғын үйге арналған жер учаскесімен қамтамасыз ету мақсатында 2021 жылы Жаңақорған кентінде Саяжай аумағынан 300 гектар учаскеге егжей-тегжей жоспарлау жобасын (ПДП) әзірлеуге аудандық бюджеттен 24903,301 мың теңге қаржы бөлінді. Жаңақорған кентінің Саяжай-1 мөлтек ауданына нақты көлемі 300 гектар болатын егжей-тегжей жоспарлау жобасы (ПДП) жасалды.Бұл егжей-тегжей жоспарлау жобасында Саяжай-1 мөлтек ауданынан жеке тұрғын үй құрылысына арналған 1597 жер учаскесі, 180 орындық балабақша, 1100 орындық орта мектеп, май құю станциясы салыну жоспары бар. Сонымен қатар бұл аумақтағы жолдар мен көшелердің ұзындығы – 52 шақырым, ауыз су құбырының ұзындығы – 48,3 шақырым, кәріз жүйесінің ұзындығы – 19,9 шақырым, газбен жабдықтау желісінің ұзындығы – 51,8 шақырымды құрайды. 10 газ тарату пункті, 1 автоматты газ тарату пункті салынады. Электр желілері, станциялар салынуы тиіс. Яғни, инфрақұрылымы толық жүргізіледі, – деді бөлімнің бас маманы Шыңғыс Маханов.Бұл мәлімет, келешекте түсетін Саяжай 1 мөлтек ауданының инженерліккоммуникациялық инфрақұрылымымен қамтамасыз етуге арналған құжатта көрсетілген. Биыл құжат толық жасалынып, мақұлданса, келер жылы құрылысына қаражат бөлініп қалар деген үміт бар мамандарда. Егер қаражат толық шешілсе, онда жауапты сала бір жылдың ішінде шағын ауданның шырайын келтіреміз дейді. Яғни, 1600-ға жуық кезегін күткен тұрғын жер алып, баспана құрылысын бастауына болады. Бұл жобамен 2015 пен 2016 жылы кезекке тұрғандарды толық қамтиды деген сөз. Мүмкіндік болса 2017 жылды да еңсеріп тастауы керек. Ендеше келер жылдан үміт күтейік. Ең бастысы, жер кезегінің қашан жылжитынын жобалап түсіндік. Қалғаны уақыттың еншісінде.

Жаңақорғанда жер кезегі қашан жылжиды?

<a href="https://kyzylorda-news.kz/">Kyzylorda-news.kz.</a> Қазалы аудандық мәслихаттың депутаты Нұрмағанбетова Эльмира Жалпақбайқызы өз сайлау округіне қарасты учаскелерін аралап жұмыс атқаруда.&nbsp;Аудандық мәслихат депутаты Эльмира Жалпақбайқызының ықпалымен Асан қайғы көшесінің қиыршық тасы, асфальты жоба-сметалық құжаты бойынша талапқа сай салынды. Тұрғындар өтініші негізінде М.Матаев атындағы №170 орта мектептің жанындағы су толы каналға балалар қауіпсіздігін сақтау мақсатында аудандық мәслихаттың кезектен тыс сессиясының шешімімен қаржысы бөлінді. &nbsp; &nbsp; &nbsp; &nbsp;Көне аурухана тұрғыны жалғызбасты қарт кісінің өтініші бойынша қарттар үйіне орналасуына тікелей ықпал жасады. Қамқорлық жасауды азаматтық борышы ретінде қабылдап, бірнеше рет ауруханаға жатқызып, мерзімі өтіп кеткен жеке куәлігін, өз қаржысынан жасатып, толықтай киіммен және азық-түлікпен қамтамасыз етсе, екінші бір тұрғынның денсаулығына байланысты жеке сақтандыруы төленбей тұрғандықтан қаржылай көмек көрсетіліп, ауруханаға емделуіне жағдай жасады.Сонымен қатар, депутат Эльмира Жалпақбайқызы баспанасы ескірген жалғызбасты анаға үй салу &nbsp;мақсатында бастама көтеріп, «Сауаптан құр қалмайық» қорымен біріккен түрде үй салу жұмысы басталды. Ағымдағы жылдың &nbsp;мамыр айында ігетасы құйылды, қалған жұмыстарын «Сауаптан құр қалмайық» қорымен бірігіп ұйымдастыруда.

Қазалылық депутат сайлаушылармен бірлесіп жұмыс атқаруда

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданының әкімі Асқарбек Есжановтың төрағалығымен аппарат мәжілісі өтті. Мәжіліске ауылдық аймақтарды дамыту мәселесі қаралды.<blockquote>«Мемлекет басшысының Жарлығымен «Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасы» қабылданды. Ауылдық аумақтарды дамыту және тиімділігін арттыру, сондай-ақ ауылдық жерлерде өмір сүру сапасын жақсарту мақсатында қабылданған шешімдерді жүзеге асыруымыз тиіс. Ағымдағы жылы ауданда 32 жобаны іске асыруға бюджет есебінен 4,8 млрд. теңге бөлінді. Оның ішінде, аудандық бюджеттен абаттандыру жұмыстарын жүргізу үшін 8 жобаға 131,8 млн. теңге қаралды. Бұдан бөлек, жыл басында кент және ауылдық округтерді дамыту мақсатында «Өңірлерді дамыту» бағдарламасы аясында 20 жобаны жүзеге асыру үшін аудандық бюджеттен 158,3 млн. теңге бөлінді», - деді аудан басшысы.</blockquote>Бұдан бөлек, кент және ауылдық округ әкімдеріне ауылдың дамуына, көркеюіне жұмыс жасауды, уақытылы жұмысқа келіп кетуді емес, халыққа қажетті жағдайды жасау үшін барлық тетіктерді қолдану қажеттігін айтты.Аудан әкімі орынбасарлары мен тиісті сала басшыларының және кент, ауылдық округ әкімдері тарапынан атқарылып жатқан жұмыстардың нәтижелі болуы үшін бірқатар тапсырмалар берілді.Күн тәртібінде қаралған мәселені және жіберілген кемшіліктерді сараптай келе, жыл аяғына дейін белгіленген кәсіпкерлік субъектілерінің ашылуын қамтамасыз етіп, мемлекеттік және өңірлік бағдарламалар шеңберінде кәсіпкерлікті дамыту бағытында несие немесе грант алу көрсеткіштерін орындауға, аудан бойынша «Ауыл аманаты» жобасымен қаржыландыруға кемінде 2 млрд. теңгенің жобаларын жасақталуын қамтамасыз етіп, жоспарланған қаржыларды мерзімінде толық игеруді, оның ішінде республикалық бюджет қаражаттарын 100 пайызға орындап, дебиторлық және кредиторлық берешектерге жол бермеу керектігі жөнінде және кент, ауылдық округтерде барлық нормативтік талаптарға сәйкес қатты қалдықтар тастайтын орындардың болуын 2023 жылғы 1 шілдеге дейін қамтамасыз ету үшін сала бойынша жетекшілік ететін аудан әкімінің орынбасарларына және аудан әкімі аппаратының басшысына тиісті тапсырмалар жүктелді.

Жалағашта өткен мәжілісте жоба бойынша қаржыландыру мәселесі қаралды

<a href="https://kyzylorda-news.kz/">Kyzylorda-news.kz.</a> Диқандар үшін дәл қазіргі сәт нағыз қауырт кезең. Көктемде дән сепкен алқаптарын суға бастыру үшін, ала таңнан күн батқанға дейін тіршілік қамында.&nbsp;Себебі биыл шаруашылықтарға әлден су тапшылығы сезілуде. Осыған алаңдаған диқандар себілген дән далада ысырап болмас үшін тынымсыз еңбек етуде. Бүгінде егіннің жайын ойлағандардың бірі – Тельман Ақжанов. Ол Ақтөбе ауылындағы «Оңталап» шаруа қожалығында №2 бригаданың бригадирі. Осында қызмет істеп, жыл сайын жақсы өнімге қол жеткізіп жүрген білікті маман.Тельман осы шаруашылықта 3 жылдан бері дала төсіндегі дүбірде маңдай терін төгіп жүр. Уақытты жаны қалаған іске арнау – бақыт деп санайды. Осыған дейінгі еңбек жолын да ауыл шаруашылығына арнаған.<blockquote>«Еңбекке 1983 жылы оқу бітіргеннен араластым. Ол уақытта жұмыс істеу біз үшін абырой саналатын. Әуелі ауыл шаруашылығында үш жылдай қол жұмыс істедім. Ортада әскерге барып, борышымызды өтедік. Одан кейін ауыл ақсақалы Тұрғанбек Іздібаевтың қарамағында болып, көп нәрсені үйрендім. Тоқсаныншы жылдары ел тоқырауға ұшырап, жұмысымыз тұралап қалды. Бертін келе «Ақтөбе и К» шаруашылығы құрылып сонда пішен бригадирі, одан бөлек жаткаға механик те болдық. Шүкір жаман болғанымыз жоқ. Қазір Хамит Аралбаев басқарған шаруашылықта абыроймен қызметімді жалғастырып келемін», – дейді ол.</blockquote>Биыл «Оңталап» шаруа қожалығы барлығы 1383 гектар жерге егін ексе, оның 961 гектарға күріш, 185 гектарға бидай, 185 гектарға жаңа жоңышқа мен 237 гектарға ескі жоңышқа сепкен. Қазір таңда егіні толықтай суға бастырылған.<blockquote>«Биыл №2 бригада бойынша 483 гектарға күріш ектік. Ерте қамданғанның арқасында су тапшылығына жол бермей, атыздарымызды суға бастырдық. Енді жақсы көтерілу үшін екі-үш күнде тыңайтқышын беруді жоспарлап отырмыз. Былтыр 60 центнерден өнім алсақ, биыл одан да жоғары өнімге қол жеткіземіз деген мақсатымыз бар. Техникаларымыз жеткілікті, сақадай сай», – дейді білікті бригадир Тельман Ақжанов.</blockquote>

Қармақшылық білікті бригадир

<a href="https://kyzylorda-news.kz/">Kyzylorda-news.kz.</a> Уақыт ізін айшықтауға келгенде сәулет өнерінен асқан құдіретті дүние жоқ. Қара жерге қазық болып қағылып, тау боп төселген ғимараттар мен ескерткіштер салынған дәуірінің тыныш-тіршілігі мен арман-мұратынан, қилы тағдырынан сыр мен шежіре шертер нағыз дерек. Сол дәуірдің сәлет ескерткіштеріне қарап-ақ, уақыт лебі мен тарих желісін, өркениет мәнін түсінуге болады.Тарихқа зер салсақ, қазақ даласында құрылыс ерте дәуірлерде басталған. Жетісу мен Шу бойы, Сыр жағалауы, Арыс пен Талас өзендерінің бойы, Ұлы Жібек жолының өн бойында өркениет пен ежелгі қала мәдениеті дамып, бірегей сәулет өнерінің туындылары бой көтерді. Қожа Ахмет Яссауи, Айша бибі, Қарахан кесене-күмбездері, Сыр бойында жатқан қалалар соның дәлелі.Жалпы, ескерткіш – сәулет өнерінің жемісі. Туынды кейіпкерінің бейнесі тасқа қашалып не болмаса шойыннан, мыстан, қола сынды металдан құйылып, мүсінші өнерпаздардың қолымен жасалады. Көпшілігіміз мүсіншілерді танығанымызбен, ескерткіш құйылмас бұрын әуелі оның жоба-сызбасын даярлайтын, еңбегі өлеусіз сәулетшілерді назардан тыс қалдырып жатамыз. Міне, сондай жанның бірі сәулетші Яхия Күлібаев болатын.Яхия Күлібаев 1958 жылы Шиелі ауданына қарасты «Жеміс-жидек» (қазіргі Алмалы) ауылында дүниеге келген. Балалықтың бал шырын сәттері мен қайта оралмас кезеңдері де осы жерде өткен. Болар баланың өзгеден бөлекше болатыны бар демекші, Яхия жасынан ұсталыққа бейім болып өседі. 1976 жылы онжылдық мектепті бітіріп, жүрек қалаумен Шымкенттегі Ә.Қастеев атындағы көркемсурет училищесіне түседі. Үздік дипломмен бірге Ленинградқа берілетін сирек жолдамаға ие болды. Осылайша, жас сәулетші &nbsp;Репин атындағы көркемсурет Академиясында 6 жыл бойы тәлім алып, сәулетші мамандығының қыр-сырын жетік меңгеріп шығады. Білімі толысып, сәлет өнеріне құштарланған ағамыз еңбек жолын 1980 – 1982 жылдары Шиелі аудандық халыққа қызмет көрсету комбинатында суретші-әрлеуші, &nbsp;1988 – 1995 жылдары АлмаАтаГипроГор мемлекеттік жобалау институтында сәулетші қызметтерін атқарады. Өзі біліп қана қоймай, білгенін жас буынға үйрету үшін Қазақ Мемлекетік Суретшілер Академиясында «Мүсін» кафедрасында «Сәулет» сабағынан аға-оқытушы болып 4 жыл қызмет етеді. Ал, өмірінің соңғы жылдарын, яғни 1999 – 2016 жылдарда Алматы қ. Сәулет және Құрылыс басқармасында өткізеді. Өкінішке қарай, Қазақстан Республикасының құрметті сәулетшісі Яхия Күлібаев 2016 жылы дүниеден озды.Білікті биігірек сәулетімен«Біліксіз биік болса дәулетімен, білікті биігірек сәулетімен» деп аталарымыз айтпақшы, Яхия Күлібаевтың қай жобасын алсақ та, әрқайсысы өзінше ерекше мәнге ие. Деректерді ақтарып қарайтын болсақ, оның қолтаңбасы түскен ескерткіштер мен нысандар еліміздің бірнеше аймағынан кездесетінін байқаймыз. Алғашқысы 1990 жылы Алматы қаласындағы 1200 оқушыға арналған мектеп болса, сол жылы ҚР президентінің резиденциясының «Марапаттау» залы да оның авторлық жобасы болып есептеледі. Сондай-ақ, сәулетші 1991 жылы Ақтау қаласындағы «Бекет ата» орталық мешітінің, 1992 жылы Қапшағай қаласының спорттық-сауықтыру кешенінің, 1993 жылы Алматы облысы, Сарыөзек қаласының мешітінің авторы атанды. Яхия Күлібаевтың қолынан шыққан жобалардың көпшілігі мешіттер екендігін байқадық. Мешіттің ішкі-сыртқы әрлеу-әдемілеу жұмыстарының қаншалықты қиындыққа соғатынын ескерсек, оның жеңіл жолмен жүруді қаламағанын байқаймыз.&nbsp;Ағамыздың қолтаңбасы бар ескерткіштер мен нысандар қатары мұнынмен аяқталмайды. Мәселен, &nbsp;ол 2002 жылы «Бәйтерек» монументі жобасының сәулетшілер тобының мүшесі, «VII Қысқы Азия Ойындарының» ашылуына қалған күндерін есептеу Стелласының сәулетшісі, «ҚР Тұңғыш Президенті саябағы» фонтан аллеясы мен «Қазақстан» монументі жобасының кеңесшісі, авторлар мүшесі болып қызмет атқарады. Мұнымен қоймай Ресейдің, Астрахан облысы, Камызяк ауданындағы Ұлы Отан Соғысының жауынгерлеріне арналған ескерткіштің бой көтеруіне ат салысады.Оның қолы тиген сәулет өнері ескерткіштерінің басқа сәулет ескерткіштеріне қарағанда өзіндік ерекшелігі бар. Әсіресе, оның сызбасымен Сыр елінде бой көтерген еңселі ескерткіштердің жөні бөлек. Сол жәдігерлерге қарап тұрып өз бойындағы талантты қадірлегенін, сәулет өнерінің қадір-қасиетін жанымен ұғынғанына көз жеткіземіз. Сыр елінде бой көтерген ескерткіштердің қатарында &nbsp;1998 жылы Шиелі ауданында бөй көтерген М. Шоқай ескерткіші, 1991 жылы Сұлутөбе ауылында соғылған «Жаназар батыр» кесенесі мен Қызылорда қаласында орналасқан «Сыр бойы батырлары» монументін ауыз толытырып айтуымызға болады.Яхия Күлібаевтың Шиелі ауданында сызбасын сызған ескерткіштері туралы ҚР Мәдениет қайраткері Берік Саймағанбетов өз ойын жеткізді.&nbsp;<blockquote>«Ескерткіш – сәулет өнерінің жемісі. Кейіпкердің бейнесі тасқа қашалып не болмаса шойыннан, мыстан, қола сынды металдан құйылып, мүсінші өнерпаздардың қолымен жасалады. Ол құйылмас бұрын әуелі сәулетші оның жобасын дайындап алады. Мүсінші сонан соң ғана білек сыбана іске кіріседі. Мәселен, Мұстафа Шоқайдың ескеткіші облысымызда бірнешеу. Сонау 1998 жылы Шиелі кентіндегі орталық алаңда алғашқы мүсін салтанатты түрде ашылды. Жоба авторы – сәулетші Яхия Күлібаев, күллі түркі жұртының мақтаны М.Шоқайды мүсіндеген – Мұратбай Үмбетов. Міне, ширек ғасырдан бері аудан әкімдігі мен руханиятшыл азаматтар жыл сайын 7 қаңтар күні Алаштың ардақты ұлының туған күнін осында атап өтеді. Бұған қоса, отаршылдық езгіге қарсы күрескен Жаназар батырдың кесенесін қайта сомдауының өзі неге тұрады?! Бұл бір ауданның ғана емес, тұтастай Сыр елі үшін мақтануға тұрарлық іс», - деді Берік Саймағанбетов.</blockquote>Жаздың керемет кешінде шиеліліктер демалатын бір жайлы орын бар. Ол – Шиелі кентінде орналасқан орталық алаң. Оның қақ төрінде Түркі әлемінің көсемі Мұстафа Шоқайға арналған алып ескерткіш тұр. Мұстафа Шоқай сынды қайраткердің бейнесін шебер суреттеген туындының ішкі сырын, жеткізбек болған ойын бір білсе, бірі білмес. Тіпті, мән беріп қарамайтын да шығар. Дегенмен, ескерткіштің салыну тарихына қанық аудандық ардагерлер кеңесінің төрағасы Өркен Исмаил өз пікірін білдірді.<blockquote>«Өз басым жаз айларында немеремді ертіп орталық алаңда серуендегенді жақсы көрем. Жай серуендеп қоймай, алаңның қақ төрінде орналасқан алып ескерткіштің тарихын, Мұстаф Шоқай атамыздың жүріп өткен жолын, ескерткіш арқылы автордың жеткізек болған ойын ұқындыруға тырысамын. Жалпы, асқан шеберлікпен соғылған бұл ескерткіш сонау 1998 жылы салынып, 23 жыл өтсе де кескін-келбетін жоғалтпай келеді. Естуімше, ескерткіш гипстен құйылып, сырты мыс қаңылтырмен қапталған. Биіктігі – 2,5 метр, тұғырының биіктігі 2 метр болатын ескерткішті соғардан бұрын, сәулетішінің күн-түн демей толғанып, күннің батысы мен шығысын есептеп әлекке салынған естігенім бар. Демек, сәулетші әрбір ескерткішке жанын беріп іске кіріседі деген сөз», - деді Өркен Исмаил.&nbsp;</blockquote>Яхия ағамыздың сәулет өнеріне, еліміздегі әсем ғимараттар мен ескерткіштерді орнатуға деген еңбегі түрі күнінде де елеусіз қалған жоқ. 2009 жылы «Қазақстан Республикасының Құрметті Сәулетшісі», 2012 жылы «Мәдениет саласының үздігі» атағын алса, түрлі жылдары Сәулетшілер одағының «Алтын диплом» иегері, Қалақұрылысшылары одағының «Алтын диплом» иегері, Қалақұрылысшылары одағының «Құрмет грамотасы», «Қазақстан Республикасының тәуелсіздігіне 20 жыл» медалінің иегері, «Қазақстан конституциясына 20 жыл» медалінің иегері, РФ, Астрахан облысының Мәдени-мемориалдық фондына сіңірген еңбегі үшін Алғыс хаттың, «Қазақстан Республикасының тәуелсіздігіне 25 жыл» медалінің иегері атанды.Тірлігінде даңқты тұлғаларды мүсіндеген сәулетшінің өзі де сол мүсін-бейнеге айналып, жыл өткен сайын оны білетін, еске алатын адамдар қатары сирей түсуде. Дегенмен, ол жасаған мүсіндер мен әсем ғимараттар арқылы табиғаттан дарыны мен білімін туған елінің игілігіне жұмсаған талант иесінің есімі ұмытылмақ емес.

Архив