Kyzylorda-news.kz. 17 сәуір күні ҚР аумағының басым бөлігінде жауын-шашынсыз ауа райы күтіледі, деп хабарлайды Қазгидромет.
Елдің тек орталығы, солтүстігі мен оңтүстігінің жекелеген жерлерінде атмосфералық фронталды бөліктердің өтуіне байланысты жаңбыр жауады. Оңтүстікте сондай-ақ найзағай болжанады. Республика бойынша екпінді жел тұрып, батыста сонымен бірге тұман болады.
Қызылорда облысының орталығында жел күшейіп, оның жылдамдығы 15-20 м/с болады.

17 сәуірге арналған ауа райы болжамы

Kyzylorda-news.kz. Бүгін актив отырысында облыс әкімі Нұрлыбек Нәлібаев өңірдің дамуына ерекше үлес қосып жүрген бірқатар азаматтарды жаңа қызметке ауысуына байланысты Сыр халқының атынан алғысын жеткізіп құрметін білдірді.
Бұған дейін облыс әкімінің орынбасары қызметін атқарып келген Бахыт Жаханов ҚР Президенті Әкімшілігінің мемлекеттік бақылау және аумақтық ұйымдастыру бөлімінің мемлекеттік инспекторы лауазымына тағайындалды. Аймақ басшысы орынбасарының өңір экономикасын дамытудағы қажырлы еңбегін атап, алдағы қызметіне сәттілік тілеп Құрмет грамотасын табыстады.
<blockquote>
 «Бахыт Дүйсенұлы өзі жетекшілік еткен уақытта ауыл шаруашылығы өнімдерінің өндірісі, инвестиция тарту, тамақ өнімдерін өндірудегі негізгі капиталға салынған инвестиция көлемі артып, ауыл шаруашылығы өнімдерінің экспорты дамыды,-деді Н.Нәлібаев.
</blockquote>
Сондай-ақ, өзге қызметке ауысқан аппарат басшысы Ерлан Райғаниевтің, «Байқоңыр» әлеуметтік-кәсіпкерлік корпорациясы» АҚ Басқарма төрағасы Ерлан Нұрланбаевтың, облыстық энергетика басқармасының басшысы Ерлан Жаңабаев пен іс басқармасының басшысы Алмас Идрисовтың атқарған еңбектерін жоғары бағалап, іскерліктері үшін алғысын жеткізді. Азаматтарға «Құрмет» грамоталары табысталды.
<img src="https://kyzylorda-news.kz/wp-content/uploads/2022/04/fb_img_1650099647982.jpg" alt="" />

Нұрлыбек Нәлібаев әріптестерін жаңа қызметке құрметпен шығарып салды

Kyzylorda-news.kz. Бүгін жалпы білім беретін пәндер бойынша республикалық олимпиаданың облыстық кезеңі аяқталып, жеңімпаздар мен жүлдегерлерді марапаттау шарасы өтті.
Салтанатты шараға облыстық білім басқармасының басшысы Ақзира Қасымова, «Өрлеу» біліктілікті арттыру ұлттық орталығының облыс бойынша педагогикалық қызметкерлердің біліктілігін арттыру институты директорының орынбасары Сакен Серікбаев, Қорқыт ата атындағы Қызылорда университетінің басқарма мүшесі- академиялық мәселелер жөніндегі проректор Дана Абдрашева мен «Әділдік жолы» республикалық қоғамдық бірлестігінің Қызылорда облыстық филиалы басшысы Ляззат Бақтыбаева қатысып, үздіктерді марапаттады.
<blockquote>
 Бүгінгі жеңімпаздар – ертеңгі облыс үміттері. Сіздерге артылар жүктің жауапкершілігін сезініп, алға қарай қадам басуда аймақ сенімін ақтайды деп ойлаймын. Алдағы қорытынды кезеңге сәттілік тілей отыра, оқудағы бастамаларыңыз оңынан болып, алар асуларыңыз мол болсын!, – деді Ақзира Бақтыбайқызы.
</blockquote>
Облыстық кезең жаратылыстану-математика және қоғамдық-гуманитарлық бағыттағы 14 пән бойынша ұйымдастырылып, 389 оқушы білімдерін сынады. Үздік деп танылған 181 оқушы бүгінгі шарада облыстық білім басқармасының І, ІІ, ІІІ дәрежелі дипломдарымен марапатталды. Сонымен, 22 оқушы І орын – Алтын медаль иегерлері атанса, 50 оқушы ІІ орын – Күміс медальді иеленді, ал ІІІ орын – Қола медальді 89 оқушы иеленсе, 40 оқушыға арнайы алғыс хат табысталды. Сонымен қатар олимпиаданың Алтын медаль иегері атанған 11 сынып оқушыларына Қорқыт ата атындағы Қызылорда университетінің 11 білім гранты ұсынылды.
Білім бәсекесіндегі үздік командалар марапатталып, арнайы номинация иегерлері де анықталды. Олардың қатарында І дәрежелі «Ең үздік олимпиадалық команда – 2022» – №9 дарынды балаларға арналған облыстық «Білім-инновация» лицей-интернаты мен Қызылорда қаласы, ІІ дәрежелі «Ең үздік олимпиадалық команда – 2022» – №10 дарынды балаларға арналған облыстық «Білім-инновация» лицей-интернаты, ІІІ дәрежелі «Ең үздік олимпиадалық команда – 2022» – Еркін Әуелбеков атындағы №4 облыстық дарынды балаларға арналған мектеп- интернаты мен Қармақшы ауданы лайық деп танылды.
Ал, «Ең үздік қала мектебі – 2022» номинациясын – Абай атындағы үш тілде оқытылатын дарынды балаларға арналған мамандандырылған сыныптары бар мектебі мен Байқоңыр қаласындағы №277 мектеп – лицейі иеленсе, Қазалы ауданындағы №249 мектеп-лицейі «Ең үздік ауыл мектебі – 2022» атанды. Сондай-ақ, «Олимпиада жұлдызы – 2022» номинациясын №9 дарынды балаларға арналған облыстық «Білім-инновация» лицей-интернатының 11 сынып оқушысы Шахафиддин Нұрдаулет иеленсе, «Ең жас олимпиада қатысушысы» номинациясымен №9 дарынды балаларға арналған облыстық «Білім-инновация» лицей-интернатының 7 сынып оқушысы Мамадахунов Мансур марапатталды.

Қызылордада олимпиада жеңімпаздары марапатталды

Kyzylorda-news.kz. облыс әкімі Нұрлыбек Нәлібаев өңірдің әлеуметтік-экономикалық даму жағдайына арналған кеңейтілген жиын өткізді. Отырысқа облыстық мәслихат хатшысы, облыс әкімінің орынбасарлары, аудан әкімдері мен департамент және барлық басқарма басшылары қатысты.
Жиында әкім орынбасарлары өздері жетекшілік ететін салалардағы негізгі басымдыққа ие бағыттар бойынша атқарылған жұмыстарды баяндады.
Облыс әкімі өңірдің негізгі макроэкономикалық даму көрсеткіштерінің басым көпшілігі республикалық деңгейдегі орташа көрсеткіштен төмен екенін ескертті және инвестицияларды тарту жұмысын тез арада күшейтуді тапсырды.
Жиында өндірісті дамыту, шағын және орта бизнесті көбейту, инвестицияларды тарту бағытында атқарылған жұмыстарға талдау жүргізді. Сондай-ақ, ауыл шаруашылығы және жер дауы мәселелері де шет қалмады. Яғни шаруа қожалықтарына бөлінетін инвестициялық субсидиялардың жымқырылғанын және бірнеше ауылдық елді мекенінде жер даулары орын алғанын айтып, осы мәселелерді бақылауға алуды тапсырды. Мұнан бөлек, әлеуметтік маңызды тауарлар құнының қолжетімді болуы мен қоймаларда жеткілікті қорының қамтамасыз етуін міндеттеді.
Мұнан өзге энергетика саласында инфрақұрылымдық желілердің тозу деңгейін саралап, келер жылу беру маусымына дайындық жұмыстарын осы кезден бастауды тапсырды. Сондай-ақ, қаладағы басқарудың жаңа формасына өтетін 575 көпқабатты үйлердің дайындық тиісті деңгейде жүргізілмегенін айтып, оларды кондоминиум нысаны ретінде тіркеу жұмыстарын күшейтуді міндеттеді.
Кеңейтілген жиында білім, денсаулық, жұмыспен қамту салаларындағы өзекті бағыттар ашық талқыланды. Нұрлыбек Нәлібаев ана мен бала өлімін азайту, жаңа мектептер салу, нақты жұмыс орындарын құру бағытында кешенді талдау жүргізіп, ұсыныстар даярлауды қатаң тапсырды. 
Сондай-ақ, аймақтың қоғамдық-саяси ахуалы мәселесін саралаған өңір басшысы «Халық үніне құлақ асатын мемлекет» тұжырымы аясында қоғаммен сындарлы диалог орнатуға дайын болуды және әлеуметтік шиеліністі болдырмауға қажетті жұмыстарды күшейтуді жүктеді.
Жиын соңында Нұрлыбек Нәлібаев мемлекеттік аппаратты оңтайлы және тиімді ету мақсатында бағыттас басқармаларды біріктіріп, 24 басқармадан 8-ін қысқартып, облыс әкімдігінің құрылымында 16 басқарма қалатынын жеткізді. 
Сондай-ақ, бұдан әрі облыс әкімінің штаттағы және штаттан тыс кеңесші лауазымдары болмайды. Аймақ басшысы «біздің кеңесшіміз –халық!», – деді.
<img src="https://kyzylorda-news.kz/wp-content/uploads/2022/04/fb_img_1650079728808.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650079733994.jpg" alt="" />

Облыс әкімі кеңейтілген жиында өңірді дамытудың мәселелерін жан-жақты қарады

Kyzylorda-news.kz. 14 сәуірде бейнеконференция байланысы режимінде Ұжымдық қауіпсіздік туралы шарт ұйымы Әскери комитетінің кезекті отырысы өтті. Бұл ұйымның әскери комитетінің отырыстары жоспарлы түрде жылына екі рет&nbsp;– бірінші және екінші жартыжылдықта, бетпе-бет немесе онлайн өткізіледі.
Отырыс шеңберінде ұйымның жауапкершілік аймағындағы әскери қауіпсіздік мәселелері,&nbsp;сондай-ақ дағдарысқа қарсы әрекет ету тетіктерін жетілдіру және ұйымға мүше елдер қарулы күштері авиациясының халықаралық ұшуларын ұйымдастыру мәселелері талқыланды. Тараптар 2022 жылы Ұжымдық қауіпсіздік жүйесінің күштері мен құралдарын бірлесіп даярлау шараларын өткізу жоспарын мақұлдады.
<blockquote>
 “Әскери контингенттерді қандай да бір операцияға қатысу үшін жіберу мәселесі&nbsp;Күн тәртібіне&nbsp;қарауға енгізілмеген”, –&nbsp;делінген Қорғаныс министрлігінің баспасөз хабарламасында.
</blockquote>
ҚР Қорғаныс министрлігі бейбітшілік пен қауіпсіздікті қолдау жөніндегі, оның ішінде Ұжымдық қауіпсіздік туралы шарт ұйымы шеңберіндегі халықаралық міндеттемелерді орындау үшін Қазақстан Республикасының әскери контингентін жіберу алгоритмі туралы бірнеше рет түсіндірді.
<blockquote>
 “Ұжымдық қауіпсіздік туралы шарттың 4-бабына сәйкес&nbsp;“егер ұйымға мүше елдердің бірі қандай да бір мемлекет немесе мемлекеттер тобы тарапынан агрессияға ұшыраса, онда бұл осы Шартқа мүше елдердің бәріне қарсы агрессия ретінде қаралатын болады. Қатысушы мемлекеттердің кез келгеніне қарсы агрессия акті орын алған жағдайда ұйымға мүше барлық мемлекеттер оған әскери көмекпен қоса, қажетті көмек береді, сондай-ақ БҰҰ Жарғысының 51-бабына сәйкес ұжымдық қорғаныс құқығын жүзеге асыру тәртібімен олардың иелігіндегі қаражатқа қолдау көрсетеді”,&nbsp; – делінген ведомство хабарламасында.
</blockquote>
Шартқа сәйкес ұжымдық қауіпсіздік жүйесінің күштері мен құралдарын пайдалану туралы шешімді мүше елдердің басшылары қабылдайды. Сонымен қатар ұйымға мүше болуға өтініш берген мемлекеттің аумағына әскери контингенттер&nbsp;ұлттық заңнаманы ескере отырып жіберіледі.
<blockquote>
 “Ұжымдық қауіпсіздік туралы шарт ұйымының бітімгершілік қызметі туралы келісімге сәйкес ұйымға кірмейтін аумаққа Ұжымдық бітімгершілік күштерді енгізуді Біріккен ұлттар ұйымы Қауіпсіздік Кеңесінің санкциясымен&nbsp;және екі тараптың келісімімен ғана іске асуы мүмкін”, –&nbsp;делінген хабарламада.
</blockquote>
Қазақстан Республикасы Қарулы күштерінің әскери контингентін&nbsp;бейбітшілік пен қауіпсіздікті қолдау жөніндегі халықаралық міндеттемелерді орындауға жіберу туралы шешімді&nbsp;Мемлекет басшысының жасаған тиісті ұсынысы негізінде Парламент қабылдайды.&nbsp;
<blockquote>
 “Қазақстан әскери қызметшілерін Украинаға немесе қандай&nbsp;да бір басқа елге жіберу&nbsp;туралы сұрау келіп түскен жоқ және мұндай мәселе қаралған да емес”, –&nbsp;делінген ақпаратта.
</blockquote>
&nbsp;<a href="https://stan.kz/">Stan.kz</a>

Қазақстандық бітімгерлер Украинаға жіберіле ме? Қорғаныс министрлігі жауап берді

Kyzylorda-news.kz. Қызылорда облысының Жалағаш ауданы тұсындағы Сырдария өзені жағалауынан белгісіз ер азаматтың мәйіті табылды, деп хабарлайды ҚазАқпарат.
Облыстық полиция департаментінің хабарлауынша, бұл бойынша қылмыстық іс тіркеліп, сотқа дейінгі тергеп-тексеру басталды.
<blockquote>
 «Мәйіт ұзақ уақыт суда жатып қалған. Осыған байланысты табылған мәйіттің жеке басын анықтау үшін тиісті сот сараптамасы тағайындалды. ҚР Қылмыстық-процестік кодексінің 201-бабының талабына сәйкес сотқа дейінгі тергеп-тексерудің өзге деректерін жария етуге жол берілмейді», – деп мәлім етті департаменттен.
</blockquote>
Ведомство мәліметінше, қылмыстық іс Қызылорда облысы Полиция департаменті бастығының бақылауында.

Қызылорда облысында Сырдария жағалауынан ер адамның мәйіті табылды

Kyzylorda-news.kz. «Қазгидромет» РМК-сы сәуірдің 15-і күнгі күн райы болжамын жариялады.
Атмосфералық фронталды бөліктердің өтуіне байланысты Қазақстан аумағының басым бөлігінде найзағай ойнап, жаңбыр жауады, тек оңтүстік-батыста, оңтүстікте, шығыста антициклонның әсерінен күн ашық болады. Республика бойынша жел күшейіп, оңтүстікте шаңды дауыл тұрады.
Түнде және таңертең Қызылорда облысының солтүстігінде, орталығында найзағай ойнап, облыстың орталығында жел 15-20 м/с жылдамдықпен соғады.

Сенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы Полиция департаментінің бастығы &nbsp;полиция полковнигі Сұлтан Бектөре Жеңісбайұлы Жедел кеңес өткізіп, ағымдағы жылдың 3 айын қорытындылады. Жиынға департаменттің басшылығы мен жеке құрамы, оның аумақтық бөліністерінің басшылары қатысты.
Жедел кеңес барысында департамент бастығы Бектөре Жеңісбайұлы ең алдымен Ішкі істер министрі Марат Ахметжановтың Алқа отырысында алға қойған басты талаптары мен берген тапсырмаларын жеке құрамға жеткізді.&nbsp;
Министр Қызылорда облысында мал ұрлығының алдын алуда нақты талаптар қойды. Осыған байланысты Департамент бастығы барлық басшыларға жедел әрі тиянақты қызмет ету керектігін түсіндірді. Жергілікті атқарушы органдармен үйлесімді іс-қимыл жасау, мал жаю ережелерінің сақталуын, әсіресе жиі ұрланатын иесіз жүрген малдарды қарау, мал жайылымдарын қадағалауды тапсырды.
Сонымен қатар, департаменттің жеке құрамы&nbsp;арасындағы тәртіптің, заңдылықтың және сыбайлас жемқорлыққа қарсы іс-қимылдың жай-күйіне&nbsp;тоқталды. Жиын барысында кейбір басқармалар мен аудандық полиция бөлімдерінің басшыларына жедел-қызметтік жұмыстың қажетті деңгейде ұйымдастырылмағанын айтып, сынға алды. Барлық жіберілген кемшіліктерді қысқа мерзімде жою, сондай-ақ құқық бұзушылықтардың алдын алуды күшейту, “халық үніне құлақ асатын мемлекет” реформасы шеңберінде полиция жұмысының ашықтығы мен айқындығын қамтамасыз ету бойынша шаралар қабылдауды тапсырды.
Полиция органдарының ағымдағы жылғы&nbsp;І&nbsp;тоқсандағы жедел-қызметтік жұмыстарының қорытындысы туралы&nbsp;Департамент бастығының орынбасарлары&nbsp;баяндама жасады. Облысымыздың тәртіп сақшылары&nbsp; азаматтардың құқықтарын, бостандықтары мен заңды мүдделерін қорғау бағытында қоғамдық орындардағы қауіпсіздік шараларын күшейтіп, қылмыстарды болдырмау, жол қауіпсіздігін қамтамасыз ету бағытында&nbsp; жұмыстар атқаруда. &nbsp;&nbsp;
<blockquote>
 «Атқарылған шаралардың нәтижесінде өңірімізде қылмыстық ахуал&nbsp; тұрақты, қылмыс саны төмендеді. Полиция департаменті өз құзыреті шегінде тиісті жұмыстарды атқаруда.&nbsp; Қазіргі қазақстандық полицияның өзекті міндеттерінің бірі қолжетімділікті және&nbsp; ашықтықты арттырып, тұрғындармен өзара тиімді байланыс жасау тиіс. Сондықтан жұмыс тиімділігі халықтың сенімімен ғана өлшенеді», – деді&nbsp; Бектөре Жеңісбайұлы.
</blockquote>
Кеңес қорытындысы бойынша Департамент бастығы полиция полковнигі Сұлтан Бектөре Жеңісбайұлы халықтың қауіпсіздігін қамтамасыз ету бойынша басқарма, бөлім, бөлімше басшыларына алдағы уақытта іске асыру шеңберінде жүзеге асырылатын&nbsp; нақты міндеттерді қойды.
<img src="https://kyzylorda-news.kz/wp-content/uploads/2022/04/0v4a2564.jpg" alt="" />

Бектөре Сұлтан: Қызылорда облысында қылмыстық ахуал  тұрақты

<a href="https://kyzylorda-news.kz/">Kyzylorda-news.kz.</a>&nbsp;Бүгін облыстық мәслихаттағы «AMANAT» партиясы депутаттық фракциясының отырысында өткен жылы атқарылған жұмыстар қорытындысы мен тоқсан нәтижесі сараланып, депутаттар рейтингтері бойынша мәселелер талқыланды.
Сайлауалды бағдарламаның 2021 іске асырылуына жүргізілген талдау, Жол картаның жақсы деңгейде орындалғанын көрсетті.
Атап айтқанда, партияның облыстық, қалалық және 7 аудандық Жол карталарындағы 2021 жылға межеленген шаралардың 96,0% нәтижелі іске асырылса, а.ж. І тоқсан қорытындысымен Жол карталардағы барлығы 869 іс-шараның бүгінгі күнге 148-і орындалып отыр.Сонымен қатар жиын барысында фракция мүшелері халықты толғандыратын мәселелер бойынша сайлаушылармен кері байланыс орнату үшін әлеуметтік желілер мен БАҚ-ның мүмкіндіктерін белсенді пайдалануға шақырылды.
Өз кезегінде партияның сайлауалды уәделерін орындау үшін Жол картасының іске асырылуына депутаттық бақылауды күшейту қажеттігі де атап өтілді.
А.ОҢҒАРБАЕВ,
Қызылорда облыстық мәслихат депутаты

Сайлауалды бағдарламаның іске асуы көңілге қонымды

<a href="https://kyzylorda-news.kz/">Kyzylorda-news.kz.</a> Қазақстан Қарулы күштерінде бақылау тексерісі Мемлекет басшысының әскердің жауынгерлік қабілетін түбегейлі арттыру жөніндегі тапсырмасын іске асыру аясында жаңа форматта өтіп жатыр.
Қарулы күштер Бас штабы жауынгерлік даярлық департаментінің бастығы генерал-майор Дәулет Оспанов Қызылорда гарнизонында жұмыс сапарымен болып, «Тереңөзек» оқу-жаттығу полигонында әскерлер бақылау тексерісін тапсырды.
<blockquote>
 «Бақылау тексерісі әрбір әскери бөлімнің жауынгерлік қабілетін жан-жақты бағалауға, оның ішінде бөлімшелерді ұзақ қашықтыққа жеткізу дайындығын, командирлердің басшылық ету және өз бетінше шешім қабылдаудағы іскерлігін жан-жақты бағалауға, сондай-ақ жеке құрамның жауынгерлік іс-қимылдарды жүргізудегі машығын бағалауға мүмкіндік береді», – деді генерал-майор Дәулет Оспанов.
</blockquote>
Әскерлердің арнайы операциялар кезінде заңсыз қарулы құралымдарға қарсы күрес жүргізуде басқа күштік құрылымдармен өзара іс-қимылды ұйымдастыру қабілетін тексеруге баса назар аударылды.
<img src="https://kyzylorda-news.kz/wp-content/uploads/2022/04/278296282_479422497215220_726803194255379581_n.jpg" alt="" />
<img src="https://kyzylorda-news.kz/wp-content/uploads/2022/04/278380879_479422443881892_1149664764426117229_n.jpg" alt="" />

Бас штаб комиссиясы Қызылорда гарнизонындағы әскерилердің қызметін тексерді

<a href="https://kyzylorda-news.kz/">Kyzylorda-news.kz.</a> Сырдария өзенінің төменгі ағысына секундына 200 текше метр су жіберілуде. Бүгінде Шардара су қоймасында жинақталған су көлемі – 5 млрд.текше метрді құраса, Көксарай су реттегіш қоймасында – 783 млн.текше метр су жиналды. Қазіргі таңда 21 каналды тазалау жұмыстары жүргізіліп жатыр. Бұл туралы Өңірлік коммуникациялар қызметінде өткен брифингте облыстық табиғи ресурстар және табиғат пайдалануды реттеу басқармасының басшысы Бауыржан Шаменов хабарлады.
<blockquote>
 «Биыл жалпы ұзындығы 1 034 шақырымды құрайтын 162 каналды тазалау, 156 дана насос қондырғыларын сатып алу және 322 дана гидротехникалық құрылыстарды жөндеу жұмыстары жүргізіледі. Сонымен қатар осы жылы облыстық бюджеттің есебінен Келінтөбе магистралды каналының жобалық-сметалық құжаттамасы әзірленеді. Облыстағы бірнеше аудандардың каналдарында тазалау жұмыстары жүргізіліп, елді мекендерге 23 насос қондырғысы жеткізіледі», – деді басқарма басшысы Бауыржан Шаменов.
</blockquote>
Облыс төңірегінен секундына – 450 текше метр су өтуде. 16 сәуірден бастап Көксарай су реттегішінен 200 текше метр су босатылады.
<blockquote>
 «Қызылорда су торабынан – 382 текше метр, Әйтек су торабынан – 259 текше метр су өтуде. Алдағы уақытта вегетация кезеніңде Шардара су қоймасынан секундына – 500 текше метр су жіберіледі деген болжам бар, – деді «Арал-Сырдария» бассейіндік инспекциясының су пайдалануды басқару мен реттеу бөлімінің басшысы. 
 -Су тапшылығының алдын алу мақсатында вегетация кезеңіне дейін ұзындығы 50,1 шақырымды құрайтын 9 каналға механикалық тазарту жұмыстары межеленген болатын. Қазіргі уақытта 6 каналды тазалау жұмыстары толық аяқталды. Вегетация кезеңінде Шардара су қоймасынан болжамды түсетін 2,3 млрд.текше суды есепке ала отырып, осы жылға арналған су пайдалану лимитін белгіледік. Үкіметтің резерві есебінен облыс бойынша республикалық меншіктегі 17 каналға механикалық тазарту жұмыстары жоспарланды», – деді «ҚАЗСУШАР» РМК Қызылорда облыстық филиалы директорының орынбасары Жорабек Ерназаров.
</blockquote>
<hr />

Су тапшылығын болдырмау мақсатында 162 каналды тазалау жұмыстары жүргізіледі

<a href="https://kyzylorda-news.kz/">Kyzylorda-news.kz.</a> Бүгін аймақ басшысы Нұрлыбек Нәлібаевтың қатысуымен облыстық мәслихаттың кезекті XIV сессиясы өтті. Сессияны облыстық мәслихат хатшысы Наурызбай Байқадамов жүргізді.
Күн тәртібінде Қызылорда облыстық мәслихатының бірқатар шешімдеріне өзгерістер мен толықтырулар енгізу туралы 12 мәселе қаралып, шешім қабылданды. Атап айтқанда, Қызылорда облысы әкімдігінің дербес құрамын келісу, облыстық Қоғамдық кеңесінің қалыптастырылған құрамын бекіту, экономика, қаржы және жергілікті басқару мәселелері жөніндегі тұрақты комиссиясының есебі туралы және басқа да маңызды сұрақтар талқыланды.
Облыс әкімі өңірдің экономикалық көрсеткіштерін дамыту бағытында атқарылатын бірқатар мәселелерді атап, алдағы міндеттерге тоқталды.
<blockquote>
 Мемлекет Басшысының «Жаңа Қазақстан: жаңару мен жаңғыру жолы» атты Жолдауында айтылғандай халықтың әл-ауқатын көтеру біздің стратегиялық мақсатымыз. Әрине, өңір тіршілігі проблемасыз болмайды. Қазірдің өзінде түйткілді мәселелердің бірқатарымен таныспын, саралайтын боламын. Оларды өзектілігіне қарай кезең-кезеңімен шешетін боламыз. Бұл ретте, әрбір жұмсалған теңгенің тиімділігін, нәтижелілігін ұмытпауымыз керек. 
 Қазіргі дағдарыс жағдайында экономика салаларына инвестициялар тарту, салық базасын ұлғайту, саяси тұрақтылықты сақтау, жаңа жұмыс орындарын біздің негізгі бағытымыз. 
 Мүмкіндігінше, күріш алқаптарын қысқартпауға тырысамыз. Өндіріс пен қызмет көрсетудің арасындағы жұмысты үйлесімді ұйымдастырып, мемлекет тарапынан қолдау шараларын тиімді пайдаланып, барынша өзіміздің тауар өндірушілерімізді қолдауымыз керек. Азық-түлік тауарларына бағаны тұрақтандыру мәселесі де күн тәртібінде. Сонымен қатар алдағы уақытта көп қабатты тұрғын үйлер салуға республикалық бюджеттен көптеп қаржы тартатын боламыз. Менің алға қойған міндеттерімнің барлығы әзірленіп жатқан Қызылорда облысы әкімінің Іс-қимыл жоспарында қамтылатын болады, – деді Нұрлыбек Нәлібаев.
</blockquote>
Отырыста бірқатар депутаттар өңірдегі бірқатар өзекті мәселелерге қатысты ұсыныстарын жеткізді.
<img src="https://kyzylorda-news.kz/wp-content/uploads/2022/04/278572384_282392834081968_7360758727390497388_n.jpg" alt="" />
<img src="https://kyzylorda-news.kz/wp-content/uploads/2022/04/278661045_282393000748618_235504117529868732_n.jpg" alt="" />
<img src="https://kyzylorda-news.kz/wp-content/uploads/2022/04/278693202_282392914081960_3302247257651813275_n.jpg" alt="" />

Қазақстан және Қызылорда облысының жаңалықтары