<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы әкімдігі мал шаруашылығымен айналысатын қала тұрғындарына ескерту жасады.
<blockquote>
 «Жануарларды өсірумен, асыраумен, бағумен, көбейтумен айналысатын жеке және заңды тұлғаларға мал жаятын орындардан басқа орындарда жануарларды жаюға рұқсат етілмейді. Сондай-ақ, көшелерде, алаңдарда, гүлзарларда, басқа да қоғамдық ортақ пайдаланылатын орындарда жануарларды жаюға қатаң тыйым салынады», – делінген хабарламада.
</blockquote>
<img src="https://kyzylorda-news.kz/wp-content/uploads/2022/08/siyr.png" alt="" />

Қоғамдық орында жайылып жүрген үй жануарларының иесі жауапқа тартылады

<a href="https://kyzylorda-news.kz/">Kyzylorda-news.kz.</a> Жол&nbsp;қашанда экономиканың күретамыры. Соңғы жылдары аймақта жол жөндеуге баса назар аударылып, бірқатар ірі жобалар қолға алынуда. Облыс орталығында жол жөндеу жұмыстары қыза түскен. Қызылорда қаласында бүгінде 45,7 шақырым жол жөндеуден өтіп жатыр.
Биыл Қызылорда қаласында жол-көлік инфрақұрылымын дамыту бағытында 45,7 шақырымды құрайтын 50 көшеге орташа жол жөндеу жұмыстарын жүргізу қарастырылып отыр.
Айта кететін болсақ, қазіргі таңда 14 көшеге орташа жол жөндеу жұмыстары толығымен аяқталды. 
Оған қоса, 8 көшенің жөндеу жұмыстары бойынша мердігер мекемемен келісім шарт жасалса, 26 көшеге орташа жөндеу жұмыстарын жүргізуге мемлекеттік сатып алу конкурсы жарияланған.
Ал, 2 көшеде (Ж. Бекқожаев, Төле би) орташа жөндеу жұмыстарын аяқтау үшін құрылыс-монтаж жұмыстары жүргізілуде.
Мұнан өзге, ұзындығы 4,6 шақырымды құрайтын Сұлтан Бейбарыс көшесінен «Қызылжарма» каналы – Назарбаев даңғылына дейін магистральды көше құрылысы толығымен аяқталып, пайдалануға берілді. Жобаға сәйкес, жол бойы ұзындығы 4,6 шақырымды құрайтын веложолақпен, автобус аялдамалары, жарық бағаналары және «Жібек жолы» каналы арқылы автомобиль көпірі, жаяу жүргіншілер жолы, суағарлармен қамтылып отыр.
<img src="https://kyzylorda-news.kz/wp-content/uploads/2022/08/296443638_1841767352881696_5249356122111838849_n.jpg" alt="" />
<img src="https://kyzylorda-news.kz/wp-content/uploads/2022/08/287185407_1807829556275476_7340147246391313734_n.jpg" alt="" />

Қызылорда қаласында 45,7 шақырым жол жөндеуден өтіп жатыр

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында 4 мыңға жуық бірыңғай жиынтық төлем төлеуші бар. Міндетті әлеуметтік медициналық сақтандыру жүйесінде сақтандырылған болу үшін БЖТ-ды қалай төлеуге керек? Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов өзін-өзі жұмыспен қамтыған азаматтардың өзекті сұрақтарына жауап берді.
– БЖТ-ді не үшін төлеу қажет?
– Бірыңғай жиынтық төлем – бұл азаматтардың өзін-өзі өнімсіз жұмыспен қамтығандар санатын әлеуметтік қамсыздандыру жүйесінен тыс қалмауы үшін зандастырудың бір түрі. Бірыңғай жиынтық төлем үлесі мыналарды құрайды: 10% – жеке табыс салығы; 30% – БЖЗҚ-ға зейнетақы төлемдері; 40% – міндетті әлеуметтік медициналық сақтандыру қорына аударымдар; 20% – мемлекеттік әлеуметтік сақтандыру қорына әлеуметтік аударымдар. Осылайша, егер азаматтар әлеуметтік медициналық сақтандыру қорына ақша аудармаса, олар тегін медициналық көмектің кепілдік берілген көлеміне кіретін медициналық қызметтердің түрлерін ғана ала алады. Қалған медициналық қызметтер, зертханалық зерттеулер, жоспарлы ауруханаға жатқызу – міндетті әлеуметтік медициналық сақтандыру пакеті есебінен.
– БЖТ-ді кім төлеуі керек?
– Бірыңғай жиынтық төлемді жеке қосалқы шаруашылық қызметкерлері, отбасылық кәсіпорындардың ақы төленбейтін қызметкерлері және жыл сайынғы айналымы 1 175 АЕК-тен кем немесе жылына 3,2 млн. теңгеден кем қызметкерлері жоқ кәсіпкерлер төлей алады. Ел аумағында тұрақты тұратындарды және оралмандарды қоспағанда, шетелдіктер мен азаматтығы жоқ адамдар жарналарды төлеушілер бола алмайды.
– БЖТ-ді қалай төлеуге болады, қанша төлеу керек?
– Республикалық және облыстық маңызы бар қалаларда тұратын жеке тұлғалар үшін БЖТ-дің мөлшері 2022 жылы 3 063 теңгені құрайды. Басқа елді мекендерде тұратындарға – 1 531,5 теңге. 
Бірыңғай жиынтық төлемді бірнеше жолдар арқылы төлеуге болады. Бұл 24 Касса және Qiwi кассасының терминалдары. Сонымен қатар, екінші деңгейлі банктердің кассаларында, олардын мобильді қосымшаларында, және «Қазпошта» АҚ бөлімшелерінде БЖТ-ді төлеуге болады. Толық ақпаратты fms.kz сайтынан білуге болады.
БЖТ төлеушілер ЖСН арқылы төлем жүргізілетін күнтізбелік жылдың айын көрсете отырып дербес немесе үшінші тұлға олардың пайдасына төлей алады. БЖТ-ны күнтізбелік жылдың ағымдағы және келесі айлары үшін төленуі мүмкін, бірақ өткен кезең үшін төлеуге болмайды. Сондықтан аударымдар уақытында бөлінуі керек. Егер төлем қандай да бір себептермен дер кезінде төленбеген жағдайда, берешекті дербес төлеуші ретінде 1 ЕТЖ-дан 5% немесе 3 000 теңге төлеуге болады.
– Сақтандыру мәртебесін тексеру кезінде «ЕСП емес төлем» дегеніміз не?
– Telegram боты – SaqtandyryBot арқылы сақтандыру мәртебесін тексеру кезінде алдыңғы 12 айдағы төлемдердің болуы туралы ақпарат көрсетіледі және «EСП емес төлемді» көрсетуі мүмкін. Бұл төлем жұмыс берушіден/салық агентінен, дербес төлеуші ретінде немесе жеке кәсіпкер ретінде, яғни, БЖТ қоспағанда, басқа санаттағы төлемдер жүргізілгенін білдіреді. Қарыз МӘМС бойынша төлемдер болмаған кезеңде ғана көрсетіледі.
– МӘМС-те БЖТ төлеушілерге қандай жеңілдіктер қарастырылған?
– БЖТ төлеушінің МӘМС жарналарын төлеудің қысқартылған мерзімдеріндегі артықшылықтары, оларда 3 төлем болуы тиіс, сонда ғана сақтандырылу мәртебесі беріледі. Бірақ, төлемдер алдыңғы үш айда қатарынан үзбей төленуі керек, өйткені кем дегенде бір кезеңді өткізіп алсаңыз, сақтандыру мәртебесі жоғалады. Өткен кезеңдер үшін БЖТ төлеуге болмайды, тек келесі кезең үшін төлей аласыз. Сондай-ақ БЖТ төлеушілер үшін ағымдағы ай үшін төлемнің болуы міндетті, әйтпесе МӘМС мәртебесі сақтандырылмайды.
<img src="https://kyzylorda-news.kz/wp-content/uploads/2020/09/ismahan.jpg" alt="" />

Бірыңғай жиынтық төлемді не үшін төлеу қажет?

<a href="https://kyzylorda-news.kz/">Kyzylorda-news.kz.</a> Бүгін Үкімет отырысында Денсаулық сақтау министрі Ажар Ғиният коронавирус індеті жеңіл түрде өтіп жатқанын айтты, деп хабарлайды <a href="https://www.inform.kz/kz/koronavirus-indeti-zhenil-turde-otip-zhatyr-densaulyk-ministri_a3961886">ҚазАқпарат</a>.
<blockquote>
 «Бүкіл әлемдегі сияқты, омикрон ВА.5 штамынан болған COVID-19-дың кезекті толқыны биылғы шілдеде елімізде жүргізілген генетикалық зерттеу нәтижелері бойынша зерттелген үлгілердің 70 пайызында анықталды», – деді Ажар Ғиният.
</blockquote>
Министрдің айтуынша, коронавирустың қазіргі штамы (Омикрон ВА.5) жоғары жұқпалығымен сипатталады және дельта нұсқасымен салыстырғанда әлдеқайда ауру жеңіл өтеді. Бұл өз кезегінде науқастардың 94 пайыздан астамы амбулаториялық жағдайда емделетіндігімен де расталып отыр.
<blockquote>
 «Стационарлық ем қабылдайтын пациенттерге қатысты талдау жүргізу кезінде 36 пайызы 18 жасқа дейінгі балалар, 64 пайызы ересектер екені, ал ауырған адамдардың 52 пайызында қосалқы созылмалы аурулары бар екені анықталды», – деді Ажар Ғиният.
</blockquote>
Оның сөзіне қарағанда, былтырмен салыстырғанда КВИ-ге қатысты жедел медициналық көмекті шақырту саны 3,7 есе азайған. Бұл көрсеткіш те аурудың жеңіл түрде өтіп жатқанын айқындайды. Бұдан бұрын хабарланғандай, министр қыркүйек айында коронавирустың таралуы төмендеуі мүмкін екенін айтты.

Ажар Ғиният: Коронавирус індеті жеңіл түрде өтіп жатыр

<a href="https://kyzylorda-news.kz/">Kyzylorda-news.kz.</a> Қызылорда облысы Полиция департаментінің Жаңақорған аудандық полиция бөліміне ауыл тұрғыны жайлып жүрген бір бас қойын ұрланғандығы туралы шағым түсірді.
Жедел-іздестіру шаралары барысында полиция қызметкерлері аудан тұрғынын анықтап, ұстады. Айғақ зат алынды.
Аталған дерек бойынша Қазақстан Республикасы Қылмыстық кодексінің 188-1 бабының 1-бөлігімен (Мал ұрлығы) сотқа дейінгі тергеп-тексеру әрекеттері жүргізілуде. Оқиғаның мән-жайы анықталуда.

Жаңақорғанда қой ұрлаған ауыл тұрғыны ұсталды

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласының әкімі Асылбек Шәменов барлық кәсіпкерлеріне үндеу жариялады.
«Сіздер күн сайын ажарланып келе жатқан туған қаламызда өз кәсіптеріңізді дөңгелентіп отырсыздар. Өңірдің әлеуметтік-экономикалық дамуына қосып жүрген үлестеріңіз ұшан-теңіз. Десек те ширатылатын шаруа, атқарылуы тиіс жұмыс көп екені байқалады.
Осы ретте, бизнестің әлеуметтік жауапкершілігін ауқымды ұғым ретінде қарастырғанымыз жөн. Жеке әлеуметтік топтар мен жалпы қоғамның өмір сүру сапасына әсер ететін жанама айқындалған немесе айқындалмаған заңнаманың этика, экология, қайырымдылық, мейірімділік, жанашырлық және т.б. саладағы ережелер мен нормаларын ұстану бағытында өздеріңізге көп жауапкершілік жүктеледі. Соның ішінде кәсіпкерлік нысанның көз сүйсінер келбеті, тазалығы мен қызмет көрсету сапасы тұтынушы көңілінен шығуы үшін асқан жанашырлық, жан-жақтылық қажет.
Қазіргі таңда билік пен бизнес арасында диалог орнады. Кәсіпкерлікті дамытуға мемлекет тарапынан барынша қолдау жасалуда. Сондықтан осы қалада өмір сүріп, кәсіппен айналысып, табыс тапқаннан кейін өз-өзімізді сыйлап, құрметтеу мәселесі алдыңғы орында тұруы керек! Бұл жауапкершіліктің салмағын әрбір кәсіпкер сезінсе екен деймін. Таза, көркем, көзтартарлық нысанның тұтынушы назарынан тыс қалмайтыны белгілі.
Баршаңызды туған қаламызды, ортақ үйімізді, өз аумақтарыңызды таза ұстауға, нысандарыңыздың кескін-келбетін заманауи талаптарға сәйкестендіруге, әрлеуге, жарықтандыруға, тұтынушыға қолайлы және жағымды орта қалыптастыруға атсалысуға шақырамын», – деді Қызылорда қаласының әкімі Асылбек Шәменов.

Қызылорда қаласының әкімі кәсіпкерлерге үндеу жариялады

<a href="https://kyzylorda-news.kz/">Kyzylorda-news.kz.</a>&nbsp;ҚР Президенті Қасым-Жомарт Тоқаев қысқа мерзімді еңбек демалысына шықты. Бұл туралы Президенттің ресми сайты мәлім етті.
<blockquote>
 «Мемлекет басшысы Қасым-Жомарт Тоқаев қысқа мерзімді еңбек демалысына шықты» делінген хабарламада.
</blockquote>

Мемлекет басшысы еңбек демалысына шықты

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысындағы аудандардың өзекті мәселелері мен әлеуметтік-экономикалық даму көрсеткіштері талданған арнайы жиында Шиелі ауданының әкімі Нұржан Ахатовтың есебі тыңдалды.
Жиынға облыстық, аудандық мәслихат депутаттары, ардагерлер мен қоғамдық кеңес төрағалары, салалық басқарма басшылары қатысты.
Аймақ басшысы ауданның тынысын 4 негізгі бағыт бойынша саралады. Макроэкономикалық көрсеткіштердің қорытындысына сәйкес, Шиелі ауданы 5 орынға тұрақтап, орташа даму динамикасын көрсетті. Облыс әкімі биыл даму динамика едәуір баяулағанын айтып, сынға алды. Себебі аудан өткен жылы үздіктер қатарынан көрінген.
<blockquote>
 «Бірінші жартыжылдықтың қорытындысымен өңдеу өнеркәсібінің қарқыны 1,2 пайызға төмендеген. Ауданның өңдеу саласында бір ғана цемент зауытының үлесі 70%-ы құрайды. Басқа орта буынды өнеркәсіп орындары жоқтың қасы. Өңдеу өнеркәсібін дамытуға ауданда цемент зауытының әлеуетін пайдалана отырып, жанынан ілеспе кәсіпорындарды ашуға жұмыс жасау қажет. Мысалы, цемент зауыты ай сайын 12 мың дана 1 тонналық қаптар және 400 мың дана 50 кг қағаз қаптарды Ресей мен Қытайдан сатып алуда. Бұл бір ғана зауыттың сатып алатыны. Елімізде осындай 15 цемент зауыты бар. Осындай өндірістерді ашуға үлкен әлеуетіміз бар. Бұған қоса, цемент зауыты жанынан құрылыс индустриясын дамытуға мүмкіндік зор, құрғақ құрылыс қоспалары, гипсокартон, тым болмағанда темір бетон бұйымдары өндірістерін өрбітуге болады. Мұнан бөлек, аудан табиғи пайдалы қазбалар қорына бай. Мысалы, ванадий, алтын, мыс, күміс, мырыш, мышьяк қорлары бар. Осы бағытта инвесторлармен жұмысты жандандыру қажет», – деді Н.Нәлібаев.
</blockquote>
Нұржан Ахатовтың айтуынша, өнеркәсіп өнімін өндіру 13,1 пайызға, өңдеу өнеркәсібі 7,7 пайызға, ауыл шаруашылығы өнімі 1,5 пайызға, сауда айналымы 3,5 пайызға, құрылыс жұмыстарының көлемі 42,3 пайызға, пайдалануға берілген тұрғын үйлер көлемі 0,5 пайызға артқан.
Аудан өндіріс көлемі бойынша Қызылорда қаласы мен Жаңақорған ауданынан кейін үшінші орынды иеленеді. Облыстағы өңдеу өнеркәсібіндегі үлесі 7%-ы құрайды.
Облыс әкімі инвесторлармен жұмысты әлі де жандандыру қажеттігін баса айтты. Себебі ауданда инвестиция тарту бағытында жұмыстар да баяу жүргізілуде. Биыл 23 млрд. теңге инвестиция тарту межеленген болса, бүгінде тек 7 млрд. теңге инвестиция нақты тартылған.
Жиында аймақ басшысы халықты жұмыспен қамту бойынша атқарылған жұмысқа да сын айтты.
<blockquote>
 «Шиелі аудан бойынша жоспарланған 3 623 жаңа жұмыс орнының бар болғаны 1134-і ашылса, жоспарланған 1590 тұрақты жұмыс орнының тек 230-ы ашылған. 6 айдың қорытындысымен ресми жұмыссыздық деңгейі өткен жылдың тиісті кезеңімен салыстырғанда 0,4 пайызға өскен. Мемлекет басшысының тапсырмасына сәйкес 10 мың халыққа 100 жаңа жұмыс орнының ашылуы қажет», – деді облыс әкімі.
</blockquote>
Арнайы жиында шағын және орта бизнесті дамыту мәселесі шет қалмады. Аудандағы кәсіпкерлер санының өсу динамикасы өте баяу. Соңғы 3 жылда тіркелген кәсіпкерлерлік субъектілерінің саны не бары 215 бірлікке ғана өскен. Ал, жұмыс жасап тұрған субъектілерінің саны бар болғаны 264 бірлікке ұлғайған.
<blockquote>
 «Көршілес жатқан Түркістан облысының Бәйдібек ауданындағы халық саны небәрі 54 мыңды құрайды. Бұл ауданда 4,5 мың кәсіпкер тіркелген. Оның қасында 85 мыңға жуық халқы бар Шиелі ауданында кәсіпкерліктің дамуы осы екі шағын ауданмен шамалас. Салалық ерекшелігіне қарай микробизнестерді бір жерге шоғырландырып, өнімділік пен табыс көзін арттыру бағытында шараларды атқару қажет. Болашақта олар ірі өндіріс орындарына айналуы тиіс. Біз, 2025 жылға қарай облыста шағын және орта бизнестің ішкі өнімдегі үлесін 25%-ға жеткізуіміз қажет», – деді Н.Нәлібаев.
</blockquote>
Азық-түлік қорын көбейту мәселесі де талқыға түсті. Аудан әкімдігі тарапынан бүгінгі күнге дейін азық-түлік бағаларына бірде-бір мемлекеттік бақылау шарасы жүргізілмеген. Облыс әкімі бағаны тұрақтандыру бағытында нақты шаралар қабылдауды жүктеді.
<blockquote>
 «Қазіргі таңда егіс көлемі жоспардан 1250 гектарға кем. Мен егістікті әртараптандыру мақсатында өзге де дақылдарды егу көлемін ұлғайту қажеттігін айтып келемін. Оған қарамастан, әртараптандыру бағытындағы дақылдар межеден 455 гектарға кем егілген. Осы ретте, басқа аудандарға қарағанда ауданның ерекшелігін пайдаланып көкөніс, бақша дақылдары көлемін арттырып экспорттау мүмкіндігін қарау керек», – деді Н.Нәлібаев.
</blockquote>
Арнайы кеңесте білім нысандарын салуда қаржыны тиімді бағыттау қажеттігін қатаң ескертті. Себебі ауданда салынатын 300 орындық мектепке 1,7 млрд.теңге қаржы сұралған. Бірақ өзге ауданда мұндай қаржыдан бірнеше есе аз ақшаға білім нысанын салуға болатынын дәлелдеген.
Сондай-ақ, отырыста жоғары тұрған органдар мен облыс әкімінің тапсырмаларының орындалу барысы, ауданның кадрлық әлеуеті мен қоғамдық-саяси ахуал сөз болып, нақты тапсырмалар берілді.
Жиын соңында облыс әкімі 9 айдың қорытындысымен бұл көрсеткіштер қайта қаралып, жауапты мамандардың жұмысы сарапқа салынатынын еске салды.
<blockquote>
 «Алдағы қыркүйек айынан бастап қала және аудан әкімдері жұмыстарының тиімділігін анықтайтын рейтинг жүргізілетін болады. Рейтинг қорытындысымен жұмыс нәтижесі төмен аудан әкімдері бойынша жыл соңында кадрлық шешім қабылдаймыз», – деді Н.Нәлібаев.
</blockquote>
<img src="https://kyzylorda-news.kz/wp-content/uploads/2022/08/ahatov.jpg" alt="" />
<img src="https://kyzylorda-news.kz/wp-content/uploads/2022/08/297100558_355143786806872_7119592711760677989_n.jpg" alt="" />

Нұрлыбек Нәлібаев: Шиелі ауданында құрылыс индустриясын дамыту қажет

<a href="https://kyzylorda-news.kz/">Kyzylorda-news.kz.</a> 1 тамыз күні Қазақстанда коронавирус инфекциясын жұқтырудың 2021 жағдайы тіркелді. Бұл туралы COVID-19 таралуына жол бермеу жөніндегі ведомствоаралық комиссия хабарлады.
Өңірлер бойынша:
Нұр-Сұлтан қаласында – 958,
Алматы қаласында – 345,
Шымкент қаласында – 18,
Ақмола облысында – 65,
Ақтөбе облысында – 63,
Алматы облысында – 62,
Жетісу облысында – 75,
Атырау облысында – 13,
Шығыс Қазақстан облысында – 20,
Абай облысында – 25,
Жамбыл облысында – 41,
Батыс Қазақстан облысында – 32,
Қарағанды облысында – 150,
Ұлытау облысында – 20,
Қостанай облысында – 20,
Қызылорда облысында – 38,
Маңғыстау облысында – 15,
Павлодар облысында – 41,
Солтүстік Қазақстан облысында – 14,
Түркістан облысында – 6.
Жалпы пандемия басталғалы Қазақстанда инфекция 1 354 615 адамда тіркелді.

Қызылордада 38 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> 2 тамыз күні республиканың көп өңірлерінде аптап ыстық болып, найзағай ойнайды, жел тұрады, деп хабарлайды Қазгидромет.
Циклон және оған байланысты атмосфералық фронттар Қазақстан аумағының басым бөлігіне әсер етеді. Салдарынан жаңбыр жауып, найзағай жарқылдайды, екпінді жел соғады. Күндіз бұршақ жаууы мүмкін. Түнде және таңертең республиканың солтүстігінде, солтүстік-батысында, солтүстік-шығысында тұман түседі. Тек қиыр батыста антициклон сілемінің ықпалынан ауа райы жауын-шашынсыз болады.
Күндіз Атырау облысының басым бөлігінде қатты ыстық сақталады.
Түркістан, Қызылорда облыстарының басым бөлігінде, Абай, Атырау облыстарының оңтүстігінде төтенше өрт қаупі сақталады.

Қызылордада күн ыстық болады

<a href="https://kyzylorda-news.kz/">Kyzylorda-news.kz.</a> Қазақстанда балаларды 1-сыныпқа қабылдау науқаны аяқталды. Құжаттарды қабылдау толық 4 айға, яғни 1 сәуірден 1 тамызға дейін созылды. Осы уақыт ішінде қазақстандықтар шамамен 400 мың өтініш беріп үлгерді. Балалардың 70%-дан астамы мемлекеттік тілде оқуды таңдады.
Өтініштерді қабылдау тәртібі автоматтандырылған және ата-аналар құжаттарды дәстүрлі форматта да, онлайн форматта да тапсыра алды. Өтініштердің 80%-ы электронды форматта берілді.
<blockquote>
 «Оқу жылының басталуына бір ай қалды. Енді мектептер оқу-тәрбие үрдісін сапалы дайындау мен ұйымдастыруға, сынып жиынтықтарын қалыптастыруға кіріседі. Жүргізілетін жұмыстар әлі жеткілікті және ол үшін мектептер тамыз айын тиімді пайдаланады. Бірінші сынып оқушыларының басым бөлігі Абай, Шығыс Қазақстан, Батыс Қазақстан, Қостанай және Қарағанды ​​облыстарында, сондай-ақ Нұр-Сұлтан, Алматы және Шымкент қалаларында байқалады. Балаларды қазақ тілінде оқытатын сыныптарға қамтудың жоғары көрсеткіші Қызылорда (89,6%), Ұлытау (86,6%), Маңғыстау (86,2%), Жамбыл (80,4%) облыстарында байқалады», – деді ҚР Оқу-ағарту министрлігі Мектепке дейінгі және орта білім комитеті төрағасы Гүлмира Кәрімова.
</blockquote>
<a href="https://24.kz/kz/zha-aly-tar/bilim-zh-ne-ylym/item/557516-1-synyp-a-zhat-abyldau-400-my-nan-astam-tinish-t-sti">Хабар 24</a>

1-сыныпқа құжат қабылдау: 400 мыңнан астам өтініш түсті

<a href="https://kyzylorda-news.kz/">Kyzylorda-news.kz.</a>&nbsp; Аудандардың әлеуметтік-экономикалық даму көрсеткіштеріне талдау жүргізілетін арнайы жиында облыс әкімі Нұрлыбек Нәлібаев бүгін Жаңақорған ауданының әкімі Мұрат Тілеумбетовтің есебін тыңдады.
Жиынға облыстық, аудандық мәслихат депутаттары, ардагерлер мен қоғамдық кеңес төрағалары, салалық басқарма басшылары қатысты.
Алдымен Мұрат Жолкелдіұлы ауданның негізгі даму көрсеткіштерін тізбектеді. Аймақ басшысы ауданның тынысын 4 негізгі бағыт бойынша саралады. Макроэкономикалық көрсеткіштердің қорытындысына сәйкес, Жаңақорған ауданы І орынға шығып, жоғары даму динамикасын көрсетті. Дегенмен, өнеркәсіп өндірісі мен өңдеуші өнеркәсіпте өсім болғанымен, кейбір өндіріс түрлерінде қалыс қалу деректері бар.
Жиында өңір басшысы Жаңақорғанда жаңа өндірістік жобалардың тым аз екенін айтып, сынға алды. Жұмысты шапшаң әрі тиімді етудің жолын қарастыру аудан әкімінің тікелей міндеті екенін тағы бір еске салды.
<blockquote>
 Бүгінгі таңда ауданда 66 өндірістік цех жұмыс жасайды екен. Әлеуеті жоғары ауданға бұл өте аз. Себебі, халық саны 1,5 есе төмен Қармақшы ауданында 126 цех бар. Ал, халық саны шамалас Қазалы және Шиелі аудандарында 286 және 336 өндірістік цех жұмыс жасауда. 
 Өңдеу өнеркәсібіндегі үлесі облыстың 34%-ын құрайды. Бұл көрсеткіш уран саласындағы 2 кәсіпорын есебінен құралады. Өңдеу саласында шағын кәсіпорындар мүлдем жоқ десек болады,-деді Н.Нәлібаев.
</blockquote>
Арнайы кеңесте облыс әкімі ауданда соңғы кездері жұмысы тоқтап қалған кәсіпкерлік нысандардың көбейгенін айтып, бұл бағытта жұмысты күшейтуді тапсырды. Мәселен, Жаңақорған ауданы бойынша соңғы 3 жылда тіркелген кәсіпкерлік субъектілерінің саны небәрі 365 бірлікке өскен.
<blockquote>
 Ауданда 87 мыңға жуық халық болса, оның кәсіпкерлікке тек 7% тіркелген. Ал, көршілес жатқан Түркістан облысының 80 мың халқы бар Шардара ауданында кәсіпкерлердің үлесі 11%. 
 Шардара облыс орталығынан шалғай орналасқан аудан бола тұра, кәсіпкерлік әлеуеті жоғары Жаңақорған ауданынан артық дамыған,-деді Нұрлыбек Нәлібаев.
</blockquote>
Мұнан бөлек, облыс әкімі томат пастасын шығару жобасы 5 жылдан бері іске аспай, созбалаңға салынғанын, зауыт құрылысы әр түрлі себептермен басталмағанын қатаң ескертті. Бұл ретте аудан әкімі инвесторлармен жұмысты күшейтуі қажет.
Ауданда инвестиция қарқыны тым төмен. Биыл жоспарланған 48 млрд.теңге инвестицияның тек 11,3 млрд.теңгесі орындалған. Өңір басшысы Жаңақорған табиғи ресурстарға бай аудан бола тұра өнімділік бағытында ізденіс жоқ екенін қатаң ескертті.
<blockquote>
 Қаратау бөктерінде мырыш пен қорғасынды айтпағанда алтын, мыс, магний, әктас, керамзит және тағы басқа минералдық ресурстары бар. Бірақ толығымен зерттелмеген. 
 Әктас аясында бір ғана мысал келтірейін. Қазір білесіздер, қағаз тапшылығы байқалуда. Бірқатар ірі кәсіпорындар сапасы төмен өңделген қағазды пайдалануға көшуде. Көршілес Өзбекстан 2019 жылдан бастап әктастан кеңсе қағазын шығаруды қолға алса, қазіргі таңда Ресей осы бағытта жұмыстар жүргізуде. Елімізге жылына 51 мың тонна кеңсе қағазы импортталады. Неліктен көрші Өзбекстанға барып, тәжірибесін зерттемейсіздер. Қажет болса, тәжірибені енгізейік. Мұрат Жолкелдіұлы, жаңа инвесторларды тарту керек. Осыған байланысты сізден нақты ұсыныстар мен нәтиже күтемін,-деді Н.Нәлібаев.
</blockquote>
Халықты жұмыспен қамту бағыты да талданды. Ауданда жоспарланған 3 118 жаңа жұмыс орынның бар болғаны 1013-і ашылған. Сонымен қатар, Ұлттық жоба шеңберінде жоспарланған 16 жоба бойынша құрылуы тиіс 168 жұмыс орынның бүгінгі күнге тек 14-і ашылған. 
Жиында азық-түлік қорын көбейту, бақша дақылдарын егу жұмыстарының нәтижесі талданды. Облыс әкімі Жаңақорған ауданы табиғи орналасу ерекшелігіне байланысты аймақтағы бақша-көкөніс өнімдерімен қамтамасыз етуші негізгі аудан болуы тиіс екенін ашып айтты. 
Ауданда негізгі дақыл күріш көлемі берілген тапсырмаға сәйкес 6600 гектарға күріш дақылы егілуі тиіс болса, тапсырмадан 416 гектарға кем егілген. Күріштен басқа дәндік дақылдар 81 гектарға, көкөніс 104 гектарға жоспардан кем егілген. Бұл ретте аймақ басшысы көкөніс, бақша дақылдары көлемін арттырып, экспорттау мүмкіндігін қарап, қажет болса осы бағыттарды дамыту үшін арнайы жоба дайындау қажет екенін тілге тиек етті. 
Арнайы кеңесте ауданның кадрлық әлеуеті мен қоғамдық-саяси ахуалы қаралды. Аудандағы басшылық құрамның қызмет өтіліне талдау жүргізілді. Нәтижесінде, үш ауылдық округ әкімі 6-11 жыл арасында, бір бөлім басшысы 7 жыл, 12 мектеп директоры 10-20 жыл аралығында ұзақ мерзім бір лауазымды қызметте келгендігі анықталды. 
Облыс әкімі заңдылыққа сәйкес ротация тәртібін қолдануды ұсынды. Сондай-ақ, аудандағы қоғамдық-саяси ахуалды бақылауға алып, тұрғындардың мәселесіне атүсті қарамай, сындарлы диалог орнатуға шақырды. 
Жиын соңында облыс әкімі 9 айдың қорытындысымен бұл көрсеткіштер қайта қаралып, жауапты мамандардың жұмысы сарапқа салынатынын еске салды.
<img src="https://kyzylorda-news.kz/wp-content/uploads/2022/08/297030955_354910680163516_1743824703825991284_n.jpg" alt="" />

Қазақстан және Қызылорда облысының жаңалықтары