<a href="https://kyzylorda-news.kz/">Kyzylorda-news.kz.</a>&nbsp;ҚР Премьер-Министрі Әлихан Смайылов Қазақстан ғылымын дамытудың 2022-2026 жылдарға арналған тұжырымдамасының қабылдауды тапсырды, деп хабарлайды <a href="https://www.inform.kz/kz/kazakstan-gylymyn-damytudyn-bes-zhyldyk-tuzhyrymdamasy-kabyldanady_a3921874">ҚазАқпарат</a>.
Үкімет басшысы ғылым мен бизнес тығыз байланыста болғанда ғана өндіріс дамып, халыққа нақты пайда келетінін атап өтті. Ең алдымен, ғылыми жаңалықтарға мұқтаж кәсіпорындарды анықтау үшін маркетинг жүйесін енгізу керек және Ғылым қоры өз жұмысын инвестициялық тартымдылықты арттыруға, ғылыми зерттеу нәтижелерін коммерцияландыруға бағыттауы тиіс.
Осыған орай Ә. Смайылов Білім және ғылым министрлігіне бірқатар тапсырма берді.
<blockquote>
 «Бірінші, 30 сәуірге дейін Қазақстан ғылымын дамытудың 2022-2026 жылдарға арналған тұжырымдамасының қабылдануын қамтамасыз етсін. Екінші, жас таланттарды іздеу және оларды ғылымға тарту механизмдерін пысықтасын, зерттеу әлеуеті жоғары ғалымдардың жаңа буынының ақпараттық базасын жасасын. Үшіншіден, Ұлттық Ғылым академиясына мемлекеттік мәртебе бере отырып, институционалдық трансформациялау шараларын қабылдасын», – деді Премьер-Министр Үкімет отырысында.
</blockquote>
Сонымен бірге, Ғылым қорының экономикалық тиімділігін арттыруға, ғылыми зерттеулерді капиталдандыруға, олардың инвестициялық тартымдылығын, барлық кезеңдегі ашықтығын арттыруға мән беріп, ребрендинг жасау тапсырылды.
<blockquote>
 «Бизнес-қоғамдастық өкілдерімен және «Атамекен» кәсіпкерлер палатасымен бірлесіп, Халықтың табысын арттырудың 2025 жылға дейінгі бағдарламасы жобасына ғылымды қажет ететін өндірістерді, жоғары технологиялық жұмыс орындарын құруда ғылымның үлесі бөлімін қосып, оның нақты индикаторларын белгілеуді қамтамасыз етсін. Индустрия және Энергетика министрліктерімен бірлесіп, ғылыми-техникалық кеңестер құруды және жер қойнауын пайдаланушылардың ғылыми-зерттеу жұмыстарын қаржыландыруының орталықтандырылған механизмі енгізілісін», – деді Әлихан Смайылов.
</blockquote>
Айта кетейік, Үкімет отырысында Премьер-Министр ғылым саласындағы қызметкерлерді кәсіби мерекесімен құттықтады.
<blockquote>
 «Бүгін еліміз Ғылым күнін атап өтеді. Елімізде отандық ғылымды дамыту жолында еңбек етіп жүрген барлық қызметкерлерді кәсіби мерекесімен құттықтаймын! Сіздерге тың ғылыми жаңалықтар, жұмыстарыңызға зор табыс және сәттілік тілеймін! Бүгінгі Үкімет отырысында отандық ғылымды дамыту мәселесін қараймыз», – деді Әлихан Смайылов.
</blockquote>

Қазақстан ғылымын дамытудың бес жылдық тұжырымдамасы қабылданады

<a href="https://kyzylorda-news.kz/">Kyzylorda-news.kz.</a> Бүгін – ғылым саласы қызметкерлерінің күні.
Бұл мереке 2011 жылы Президенттің жарлығымен бекітілген болатын.
Дәл осы күні қазақтан шыққан ұлы академик, Қазақстан ғылым академиясының тұңғыш президенті Қаныш Сәтбаев дүниеге келген. Ол басқарған мекеме отандық ғылым саласының қалыптасуына негіз болды. Содан бері 76 жыл өтті. Қазақстандық ғалымдардың тың жаңашылдықтары түрлі салалардың дамуына оң ықпалын тигізіп келеді.

Бүгін – ғылым саласы қызметкерлерінің күні

<a href="https://kyzylorda-news.kz/">Kyzylorda-news.kz.</a> Шиелі ауданының әкімі Нариман Мақұлбеков бірқатар шаруа қожалықтың төрағаларымен кездесті.
Кездесуге аудан әкімінің орынбасары Ерсұлтан Апетов, Шиелі су шаруашылығының басшысы Дихан Әубәкіров пен шаруа қожалықтардың төрағалары қатысты.
Кездесу барысында егістік алқабына берілетін су мәселесі бойынша шаруа қожалықтың төрағалары жан-жақты ұсыныс-пікірлерін жеткізді.
Кездесуде аудан әкімі Нариман Мақұлбеков өздеріңізге белгілі соңғы жылдары аймағымызда су тапшылығы салдары байқалуда. Қазіргі таңда су мәселесі өзекті екені бәріңізге мәлім. Дей тұрғанмен ауданымызға бөлінген су мөлшерін тиянақты пайдалануға шақырды. Сондай-ақ, әкімдік тарапынан кәсіпкерлерге қашан да қолдау білдіретінін жеткізді.
Биылғы жылы ауданда барлығы 29 250 гектарға егiс егудің болжамды көлемі бекітілді. Оның ішінде негізгі дақыл күріштің көлемі 11 000 гектарды құрайды, қалған 18 250 гектары басқа дақылдардың үлесінде. Атап айтар болсақ, күздік бидай 1 451 гектар, жаздық бидай 820 гектар, тары 150 гектар, арпа 50 гектар, дән жүгері 110 гектар, мақсары 1 000 гектар, соя 150 гектар, жаңа жоңышқа-3 400 гектар, ескі жоңышқа 5 520 гектар, мал жемдік асқабақ-170 гектар, жемдік жүгері 70 гектар, сондай-ақ, картоп 1 201 гектар, көкөнiс 1 701 гектар және 2 457 гектар бақша дақылдары егіледі.
Кездесу соңында аудан әкімі шаруа қожалық төрпағаларының ұсыныстарын назарға алып, тиісті жұмыстар атқарылатынын жеткізді.
<img src="https://kyzylorda-news.kz/wp-content/uploads/2022/04/278240313_1289993701531086_2824563102226961190_n.jpg" alt="" />
<img src="https://kyzylorda-news.kz/wp-content/uploads/2022/04/278227274_1289993898197733_4347276252586002881_n.jpg" alt="" />

Аудан әкімі бірқатар шаруа қожалықтың төрағаларымен кездесті

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-Министрі Әлихан Смайыловтың төрағалығымен өткен селекторлық жиында елдегі әлеуметтік-экономикалық даму мен республикалық бюджеттің атқарылуының қорытындылары және отандық ғылымды дамыту мәселелері қаралды. Жиында ведомство өкілдері мен барлық өңірдің әкімдері қатысты.
Үкімет басшысы инфляцияны ұстап тұру, экономикалық көрсеткіштерді арттыру мен азық-түлік қорын молайту бағытында және ғылыми әлеуетті көтеру, жастарды ғылымға тарту сынды бірқатар тапсырмалар жүктеді. 
Жиыннан кейін облыс әкімі Нұрлыбек Нәлібаев орынбасарлары мен барлық басқарма басшыларына Үкімет қойған негізгі талап шеңберінде өңірдің әлеуметтік-экономикалық көрсеткіштерін көтеруде жұмысты ширау қажет екенін алға тартты. Сала-сала бойынша негізгі басымдықтарға жете мән беріп, талдау жұмыстарын қарқынды жүргізуді тапсырды.
Айта кетейік, өңірді дамытудың өзекті мәселелері облыс әкімінің төрағалығымен өтетін алдағы актив отырысында жан-жақты қаралатын болады.
<img src="https://kyzylorda-news.kz/wp-content/uploads/2022/04/277745925_280344167620168_6258667766066713654_n.jpg" alt="" />
<img src="https://kyzylorda-news.kz/wp-content/uploads/2022/04/278232929_280344170953501_7050452095452028136_n.jpg" alt="" />

Нұрлыбек Нәлібаев: Тапсырма тиянақты орындалуы керек

<a href="https://kyzylorda-news.kz/">Kyzylorda-news.kz.</a>&nbsp;Әлеуметтік медициналық сақтандыру қоры жыл сайын профилактикалық медициналық тексерулерді қаржыландыруға қаражат бөледі. Уақытында жүргізілген тексерулер аса ауыр ауруларды ерте кезеңде анықтауға және емдеуді бастауға көмектеседі. Скринингтік тексерулерді өткізіп алмау неліктен маңызды және оны қалай жасауға болады? Осы және басқа да сауалдарға «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетовке жауап берді.
Скрининг дегеніміз не және ол не үшін қажет?
Скрининг – бұл шағымдары жоқ белгілі бір жастағы адамдарды ауруларды ерте сатысында анықтау және алдын алу үшін профилактикалық медициналық тексеру.
Яғни, емханаға бір рет бару арқылы сіз арнайы тексеру әдістерін қолдана отырып, қатерлі ісік немесе басқа аурулардың болуының (скрининг түріне байланысты) алдын аласыз немесе олардың пайда болу ықтималдығын уақытында анықтай аласыз.
Сақтандыру қажет пе?
Профилактикалық қарап-тексеру және скрининг бойынша медициналық көмек ТМККК және МӘМС бойынша көрсетіледі. Яғни учаскелік дәрігердің қабылдауы ТМККК шеңберінде жүргізіледі, сондықтан сақтандырылған тұлға мәртебесі қажет емес. Алайда пациентті консультациялық-диагностикалық қызметтерге (кардиолог, эндокринолог және офтальмологтың консультациясы, талдаулар алу, рентгеннен өту немесе қандай да бір басқа тексерулерден өту) жіберу үшін түлғаның сақтандырылған мәртебесі болу керек, өйткені бұл қызметтер МӘМС жүйесінде көрсетіледі.
Кімге және қандай скринингтік тексеруден өту қажет?
– 30-39 жас аралығындағы әйелдер мінез-құлық қауіп факторларын ерте анықтау мақсатында скринингтен өтеді. Темекі шегу, дұрыс тамақтанбау, дене белсенділігінің төмен болуына немесе алкогольді шамадан тыс тұтынуға байланысты пациентке салауатты өмір салты мен дұрыс тамақтану жөнінде ұсынымдар беріледі.
– 40-тан 70 жасқа дейінгі ерлер мен әйелдер артериялық гипертонияны, жүректің ишемиялық ауруын, қант диабетін және глаукоманы ерте анықтау үшін скринингтен өтеді. Мужчины и женщины в возрасте от 40 до 70 лет проходят скрининг на раннее выявление артериальной гипертонии, ишемической болезни сердца, сахарного диабета и глаукомы. Қан қысымының, холестериннің, қан глюкозасының деңгейі және дене салмағының индексі анықталады.
– 30-дан 70 жасқа дейінгі әйелдер жатыр мойны обырын ерте анықтауға тексеруден өтеді, оның ішінде ПАП-тест және тереңдетілген диагностика – (бейне) кольпоскопия, биопсия және гистологиялық зерттеу, бейінді мамандардың консультациясын алады.
– 40 – тан 70 жасқа дейінгі әйелдер сүт безі обырын ерте анықтауға-екі проекцияда маммографияға тексеруден өтеді. Қажет болған жағдайда тереңдетілген диагностика – нысаналы маммография, сүт бездерінің УДЗ, трепанобиопсия, пункциялық немесе аспирациялық биопсия, гистология, бейінді мамандардың консультациясы жүргізіледі.
– 50-ден 70 жасқа дейінгі ерлер мен әйелдер гемокульт-тесттің көмегімен колоректалдық обырды ерте анықтауға тексеруден өтеді немесе қажет болған жағдайда тереңдетілген диагностика – жаппай бейне колоноскопия, оның ішінде наркоз, эндоскопиялық шертпелі биопсия, гистологиялық зерттеу арқылы мамандардың консультациясын алады.
Скринингтер өткізу «Скринингтік зерттеулерге жататын адамдардың нысаналы топтарын, сондай-ақ осы зерттеулерді жүргізу қағидаларын, көлемі мен кезеңділігін бекіту туралы» ҚР ДСМ м.а. № 174 бұйрығымен регламенттеледі.
Скринингтен қалай өту керек?
Көңіл-күйіңізге, денсаулығыңызға ешқандай шағым болмаса да, скринингтен міндетті түрде өту қажет. Профилактика – сіздің денсаулығыңызды қорғаудың маңызды әдістерінің бірі. Бүкіл әлемдегі медицина қазір дәрігерлердің, мемлекеттің ғана емес, азаматтардың өздерінің де денсаулығы үшін ортақ жауапкершілікті көтеруге шақырады. Сондықтан жасына қарай жасалынатын тексерулерді өткізіп алуға болмайды. 
Әдетте, пациент тіркелген емхананың учаскелік медбикесі оны скринингтен өтуге шақырады. Алайда, сіз ол жерге жеке куәлігіңіз қолыңызда болса, өздігіңізден хабарласа аласыз.
Әрбір емханада скринингтік кабинеттер құрылған, онда дәрігер өмір салты мен тамақтану рационы, зиянды әдеттердің, тұқым қуалайтын аурулардың болуы туралы сұрақтар қояды, бойын, салмағын, қан қысымын өлшейді, қандағы қант пен холестерин деңгейін тексереді. Содан кейін қажет болған жағдайда пациент қосымша тексеруге немесе бейінді маманның кеңесіне жіберіледі. Жүргізілетін іс-шаралар тізбесі скринингтік зерттеу түріне байланысты болады.
Халық денсаулығы және денсаулық сақтау жүйесі туралы кодексте қызметкерлерге скринингтік зерттеулерден өту үшін жыл ішінде 3 жұмыс күніне дейін әлеуметтік демалыс берілетінін білу маңызды. Яғни, жұмыс беруші өз қызметкерін оның лауазымы мен орташа жалақысын сақтай отырып, скринингтен өтуге кедергісіз босатуы керек.
Егер сұрақтарыңыз болса, сіз оларды емханаңыздан пациенттерге қолдау көрсету қызметіне хабарласып сұрай аласыз. Егер сізге сол жерде көмектесе алмаған жағдайда, онда сіз ыңғайлы байланыс арнасы арқылы Әлеуметтік медициналық сақтандыру қорына өтініш жібере аласыз: fms.kz ресми сайты, 1406 байланыс орталығы, Telegram-да SaqtandyryBot және Qoldau 24/7 мобильді қосымшасы.

Скринингтік зерттеулер туралы не білу қажет?

<a href="https://kyzylorda-news.kz/">Kyzylorda-news.kz.</a> 12 сәуір – адам баласының ғарышқа алғаш рет ұшқан күні. Биыл бұл айтулы датаға 61 жыл толды.1961 жылдың 12 сәуірінде Кеңес одағының аға лейтенанты Юрий Гагарин «Восток» кемесімен алғаш рет Жер орбитасын айналып ұшты.
Небәрі 108 минутқа созылған сапар ғарышты игеруде үлкен қадам болды. Юрий Гагариннің есімі әлемге әйгілі болып, өзі шұғыл майор және Кеңес одағының қаһарманы атағын алды.
Бұл мереке – ғарыш саласында қызмет етіп жүргендер мен ғылымның жаңа деңгейге көтерілген күні. Алғаш рет 1962 жылдың 9 сәуірінде КСРО жоғарғы кеңес президиумының өкімімен белгілі бір республикаларда ғана тойланып жүрді. Кейін 1968 жылы халықаралық авиация федерациясының конференциясында айтулы күнді әлемдік дәрежеде атап өту туралы шешім қабылданды.
2011 жылдан бастап бұл күн халықаралық адамның алғаш ғарышқа ұшқан күні (International Day of Human Space Flight) деп аталып жүр.
Қазақстаннан кімдер ғарышқа ұшты
КСРО-ның соңғы және қазақ ұлтының алғашқы ғарышкері Тоқтар Әубәкіров 1991 жылы ғарышқа экспедициялық сапармен барып, сол жақта 7 күн 22 сағат 13 минут болды. Әубәкіров нөмірі бірінші ғарышкер ғана емес, ол алғаш рет басқа кеңістікте жүріп қазақтың ұлттық тағамын жеген адам. Сол жылы ғалымдар ірімшік, айран және қазақша етті ғарышта жүріп жеуге болатындай етіп әзірлеген.
Ол 1991 жылдың 2 қазанында ғарышқа старт кезіндегі экипаж командирі Александр Волков және австриялық ғарышкер Франц Фибекпен бірге «Союз ТМ-13» кемесімен ұшты. Бір апта бойы «Мир» орбиталық кешенінің бортында жұмыс істеді.
Қазақтан шыққан екінші ғарышкер – Талғат Мұсабаев. Мұсабаев ғарышқа үш мәрте ұшып, сол жақта 341 күн 9 сағат 48 минут 41 секунд болып қайтты. Талғат Мұсабаев Гиннесс рекордтар кітабына енген: осы күнге дейін ол секілді ешкім ғарыш кеңістігінде ұзақ уақыт болып көрмеген.
Ғарышкер алғашқы сапарына 1994 жылы 1 шілде мен 4 қараша аралығында «Союз ТМ-19» және ЭО-16 кемесінің бортинженері ретінде ұшып, ғарышта 125 күн 22 сағат 53 минут және 36 секунд жүрді. Екінші сапары 1998 жылы 29 қаңтар мен 25 тамыз күндері орындалды. «Союз ТМ-27» мен ЭО-25 кемелерінің командирі ретінде ұшып, сол жақта 207 күн 12 сағат 51 минут 2 секунд болған.
Үшінші сапарын 2001 жылы 28 сәуір мен 6 мамыр аралығында «Союз ТМ-32» және “Союз ТМ-31» экспедиция жүргізуге бағытталған кемелердің командирі ретінде орындады. Ғарышкердің бұл сапары 7 күн 22 сағат 4 минут 3 секундқа созылды. Ғарышқа ұшқан бірінші Қазақстан Республикасының азаматы – Айдын Айымбетов.
Айымбетов 2015 жылдың 2-12 қыркүйегі аралығында «Союз ТМА-18М» және халықаралық ғарыш станциясына бағыт алған «Союз ТМА-18М» кемесінің екінші бортинженері ретінде ұшты. Халықаралық ғарыш станциясына барған ЭП-18 экспедиция мүшесі. Жерге «Союз ТМА-16М» кемесінде оралды. Ұшу уақыты 9 тәулік 20 сағат 13 минут 51 секундқа созылды.
«Адамға табын, Жер, енді!»
Адамның ғарышқа ұшқан сәтін жырға қосқан ақын – Олжас Сүлейменов. Публицист бұған дейін Sputnik Қазақстан тілшісіне берген сұхбатында сол айтулы күннің қалай өткенін баяндады.
«12 сәуір. 1961 жылдың 12 сәуірі. Бұл бүкіл адамзат үшін ғана емес, жас ақын, әдебиетші Сүлейменов үшін де жұлдызды күн болды. Оған дейін де бірлі-жарым өлең жаздым, алайда ол уақытта кітабым да жоқ еді. «Казахстанская правда» газетінде жұмыс істеп жүрдім. Редактор шақырып, «Ертең адам ғарышқа ұшады» деді. Маған осындай құпияны айтты. Шамасы партияда осыған байланысты қандай да бір ақпарат айтылып жүрген, республикалық газеттің редакторы ретінде ол жоспардан хабардар еді.
Меніңше, Кеңес Одағының барлық редакторы сол тарихи оқиғаның болатынын білді. Алайда тек бір редактор ғана оны өзінің қызметкеріне айтып, өлең жазуын өтінді. Ол менің өлең жазатынымды білетін, себебі әдебиет институтында оқыдым. Әдеби газетте өлеңдерім жарияланған. Содан Федор Боярский осындай ұсыныс айтты. Ерекше редактор болатын.
<blockquote>
 «Ертең газетте жариялайтындай етіп жаз» деді. Тапсырмасын сол күні орындадым, баспаға тапсырдым”, – деп еске алды Сүлейменов.
</blockquote>
Ал ертеңі таңертең ақынның қарындастары өлеңі жазылған бір уыс парақты үйге алып келген. Сол күні Олжас Сүлейменовтің өлеңін ұшақпен жүріп таратқан.
«…Содан кейін Федор Боярский 12 сәуірде маған: «Жаз. Өлең аз болады, әрі қарай жаз. Көлемді өлең жаз. Көп. Ғарышқа ұшу туралы жаз. Сен инженерсің ғой, түсінесің…» деді. Себебі оған дейін геология факультетін бітірдім, геолог-инженер болдым. Шын мәнінде адамның ғарышқа ұшуы дегеннің не екенін түсіндім. Мұны бәзбіреулер балықтың құрлыққа шығуы секілді тарихи, биологиялық фактімен салыстыруға болатынын айтты. О, қалай! Авторы есімде жоқ, алайда бұл сәтті салыстыру болды. Содан кейін жаздым. Бір апта жазған болармын. Тоқтамастан жаздым, жаздым. Айғайладым! Себебі мұндай дүние үнсіз жазылмайды. Дауыстап айтып отырып жазылады. Бөлме ішінде ары-бері жүргенімнен үйдегілер де қорқып кететін. Нәтижесінде сәуірде «Адамға табын, Жер, енді!» поэмасын өндіріске өткіздім», – деген Сүлейменов.
<a href="https://sputnik.kz/20220412/sauir-garyshkerler-kuni-24140609.html">Sputnik.kz</a>

12 сәуір – ғарышкерлер күні

<a href="https://kyzylorda-news.kz/">Kyzylorda-news.kz.</a> Қызылорда облысы бойынша биылғы жылдың 3 айында 972 қылмыс тіркелді. Бұл өткен жылдың үш айымен салыстырғанда 12,2 процентке төмен. Атап айтсақ, ауыр қылмыстар 7%, ауырлығы орташа қылмыстар 33,6% азайған. Бұл туралы Өңірлік коммуникациялар қызметінің ақпарат алаңында құқықтық статистика және арнайы есепке алу жөніндегі комитетінің Қызылорда облысы бойынша басқармасының қылмыстық саладағы құқықтық ақпаратты қалыптастыру бөлімінің бастығы Қанат Жалғасов хабарлады.
<blockquote>
 «Биыл тіркелген қылмыстарды талдау барысында тонау 33,3 пайызға, зорлық-зомбылық 44,4 пайызға, ал алаяқтық қылмыс бойынша 56,8 пайызға азайды. Жалпы қылмыстың әрбір үшіншісі ұрлық қылмысы болып отыр. Сонымен қатар биыл 22 қылмысты жасыру фактісі анықталды. Бұл іс бойынша тиісті құжаттар прокуратура органдарына жолданды», – деді Қанат Аралбайұлы.
</blockquote>
Жыл басынан бері 43 209 әкімшілік құқық бұзушылық анықталды. Сәйкесінше былтырғыдан 15,6 процентке кеміген. Оның басым бөлігі уәкілетті органдармен қаралды.
<blockquote>
 «Жалпы тіркелген әкімшілік құқық бұзушылықтардың көп бөлігі полиция органдарына тиесілі. Былтырдан бастап әкімшілік рәсімдік-процес кодексі қолданысқа енгізілген болатын. Осыған байланысты «e-Өтініш» ақпараттық жүйесіне 17 мыңға жуық жеке және заңды тұлғалардан өтініш келіп түсті. Аталған өтініштердің 9 893-і қаралды», – деді Құқықтық статистика және арнайы есепке алу жөніндегі Комитетінің Қызылорда облысы бойынша басқармасының азаматтық және әкімшілік салалардағы құқықтық ақпаратты қалыптастыру бөлімінің бастығы Тұрсынқожа Үсенов.
 «Осы жылдың үш айында соттылықтың болу не болмауы туралы анықтама алуға 184 өтініш келді. Оның барлығы Азаматтарға арналған үкімет мемлекеттік корпорациясы арқылы келіп түсті. Архивтік анықтамаларды немесе архивтік құжаттардың көшірмелерін беру түріндегі қызметті алу үшін «Электронды үкімет» веб-порталы немесе «Азаматтарға арналған үкімет» мемлекеттік корпорациясы арқылы жүзеге асырылады», – деді Құқықтық статистика және арнайы есепке алу жөніндегі Комитетінің Қызылорда облысы бойынша басқармасының қылмыстық саладағы құқықтық ақпаратты қалыптастыру бөлімінің прокуроры Дана Ахылбекова.
</blockquote>

Қызылордада тіркелген қылмыстың саны 12,2 пайызға төмендеді

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 151 адам коронавирус инфекциясынан жазылып шықты, деп хабарлайды coronavirus2020.kz.
Өңірлер бойынша:
Алматы қаласында – 8,
Ақтөбе облысында – 137,
Алматы облысында – 3,
Шығыс Қазақстан облысында – 1,
Қарағанды облысында – 1,
Қызылорда облысында – 1,
Елімізде барлығы 1 290 679 адам COVID-19-дан емделіп, сауығып шықты.

Қызылордада 1 адам коронавирустан жазылды

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Еуразия» спорт кешенінде ауыр атлетикадан ерлер мен әйелдер арасында ел біріншілігі өтеді.
Ел біріншілігі жекелеген жаттығулар бойынша болады. Алты күн бойы спортшылар 20 салмақ бойынша жеңімпаздарды анықтайды.
Жарыс кестесі:
18 сәуір
11.00-13.00. Ерлер 55 келіге дейін
16.30-18.30. Әйелдер 45, 49 келіге дейін
19 сәуір
11.00-13.00. Ерлер 61 келіге дейін
15.00-17.00. Әйелдер 55, 59 келіге дейін
20 сәуір
11.00-13.00 Ерлер 67 келіге дейін
15.00-17.00 Әйелдер 64,71 келіге дейін
21 сәуір
11.00-13.00 Ерлер 73 келіге дейін
15.00-17.00 Әйелдер 76, 81 келіге дейін
22 сәуір
11.00-13.00 Ерлер 81 келіге дейін
15.00-17.00 Әйелдер 87 келіге дейін, 87 келіден жоғары
23 сәуір
11.00-13.00 Ерлер 89, 96 келіге дейін
15.00-17.00 Ерлер 102, 109 келіге дейін, 109 келіден жоғары

Қызылордада ауыр атлетикадан ел біріншілігі өтеді

<a href="https://kyzylorda-news.kz/">Kyzylorda-news.kz.</a> ҚР территориясының басым бөлігінде атмосфералық фронталды бөліктердің әсерінен жаңбыр жауады, оңтүстік жартысында қатты жаңбыр болып, найзағай ойнайды, деп хабарлайды Қазгидромет.
Тек еліміздің оңтүстік-батысында, солтүстігінде, шығысында жоғары қысым алқабы әсерінен жауын-шашынсыз ауа райы күтіледі. Республика бойынша желдің күшеюі, оңтүстікте дауыл, солтүстік-батысында тұман, оңтүстік-батысында шаңды дауыл күтіледі.
Қызылорда облысының орталығында, оңтүстігінде түнде және таңертең найзағай, дауыл күтіледі, облыстың орталығында жел 15-20 м/с күшейеді.

Қызылордада найзағай ойнап, дауыл болады

Kyzylorda-news.kz. Облыс әкімі аппараты басшысының бұйрығымен «Қызылорда облысы әкімдігінің іс басқармасы» коммуналдық мемлекеттік мекемесінің директоры қызметіне Ибраимов Ардақ Әбдіғаппарұлы тағайындалды.
Ибраимов Ардақ Әбдіғаппарұлы Қызылорда қаласында туған.
Қорқыт ата атындағы Қызылорда мемлекеттік университетін «Мұнай мен газ кен орындарын игеру» бөлімі, «Болашақ» университетін «Юриспруденция», Қызылорда гуманитарлык университетін «Қаржы» мамандықтары бойынша бітірген. 
Еңбек жолын 2006 жылы «Казгермұнай» ЖШС геология бөлімінің инженерінің көмекшісі болып бастап, жетекші инженері, 2006 – 2011 жылдары «Қамқоршы» ЖШС директорының кадр жөніндегі орынбасары болған. 
2011-2019 жылдары «Азамат» ЖШС директорының құрылыс жөніндегі орынбасары. 
2019-2020 жылдары «Қызылорда қаласы әкімінің аппараты» мемлекеттік мекемесінің персоналды басқару қызметі (кадр жұмысы) бөлімінің бөлім басшысы, Қызылорда қаласы әкімінің кеңесшісі қызметін атқарған. 
2020 жылдан бастап Белкөл кентінің әкімі лауазымын атқарып келді.
<hr />

«Қызылорда облысы әкімдігінің іс басқармасы» мекемесінің директоры тағайындалды

<a href="https://kyzylorda-news.kz/">Kyzylorda-news.kz.</a> Қазақстан үкіметі жанындағы республикалық ономастикалық комиссия жаңа облыстардың атауларын бірауыздан мақұлдады, деп хабарлайды мәдениет және спорт министрлігінің баспасөз қызметі.
11 сәуірде мәдениет және спорт министрі Дәурен Абаевтың төрағалығымен республикалық ономастика комиссиясының отырысы өтті.
Шара аясында Шығыс Қазақстан, Қарағанды және Алматы облыстары әкімдіктерінің жаңадан құрылған Абай, Ұлытау және Жетісу облыстарына атау беру туралы ұсыныстары қаралды.
<blockquote>
 «Енді Қазақстанда өз облыс орталықтары бар жаңа облыстар пайда болады. Атап айтқанда, Семей қаласы жаңа Абай облысының орталығына, Жезқазған жаңадан құрылған Ұлытау облысының орталығына айналады, осындай өзгерістер Алматы облысына да қатысты», – деді Абаев.
</blockquote>
Сондай-ақ, комиссия мемлекет меншігіндегі жекелеген нысандарды, сондай-ақ Нұр-Сұлтан, Алматы, Ақтөбе, Қарағанды, Қызылорда, Қостанай, Павлодар қалаларындағы көшелерді қайта атау мәселелерін де талқылады. 
Отырыс қорытындысы бойынша комиссия мүшелері әкімдіктердің ұсынысын мақұлдады. Жақын арада комиссияның қорытындысы әзірленіп, заңнамаға сәйкес одан әрі жұмыс істеу үшін облыстардың әкімдігіне жіберіледі.
Айта кетері, кез келген қаланы, елді мекенді немесе көшені қайта атау ономастика саласын реттейтін заңнама талаптарына сай жүзеге асырылады. Комиссия келіп түскен ұсыныстарды қарайды және қорытынды береді. Оң қорытынды болса, қайта атау туралы шешім Қазақстан президентінің жарлығымен бекітіледі.
Бұған дейін республикалық ономастика комиссиясы Қапшағай қаласын Қонаев деп қайта атау туралы оң қорытынды берген болатын.

Қазақстан және Қызылорда облысының жаңалықтары