<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы КЕАҚ Қызылорда облысы бойынша филиалымен кәсіподақ ұйымы «1 маусым – Халықаралық балаларды қорғау күні» қарсаңында филиал қызметкерлерінің балалары арасында конкурс ұйымдастырған еді.
Үміткер 13 бала музыкалық аспаптармен орындаған шығармаларын видео түрінде байқауға ұсынып, М.Қалауова атындағы Қызылорда қалалық өнер мектебі директорының орынбасары Жадыра Қожатаева өрендердің өнерін сараптады. Әділқазы шешімімен 6 бейне шығарма жүлдеге лайық деп танылды.
Атап айтсақ, 12 жастағы байқоңырлық Аян Сабиханов байқаудың бас жүлдесін қанжығасына байласа, қызылордалық Ақжан Келесбай І орын тұғырынан көрінді. Жүлделі ІІ орынды Нұржан Болат пен Нұраян Марат өзара бөлісті. Ал, ІІІ орынды Айбол Болатбек пен Жарқынай Әбілқасым қанағат етті. Мұнан бөлек қос қазалылық бір отбасының екі баласы Абай Оңғар мен Айым Оңғарға ынталандыру сыйлығы табысталды. Бүгін филиал директоры Айнұр Тобаева додада оза шапқан өнерлі балаларды марапаттады.
<blockquote>
 «Сіздерді алдымен «1 маусым – Халықаралық балаларды қорғау күні» мерекесімен шын жүректен құттықтаймын. Биыл – балалар үшін ерекше жыл. Мемлекет басшысы Қасым-Жомарт Тоқаев 2022 жылды «Балалар жылы» деп жариялады. Қазіргі таңда еліміздің барлық өңірінде балалардың шығармашылығын, денсаулығын білімін арттыру бағытында түрлі шаралар атқарылуда. Біз де өз кезегімізде сіздерді қуанту мақсатында осы байқауды өткіздік. Өнерлеріңізді тамашалап, сүйсіндік. Кейінгі ұрпақтың талантты, өнерлі болып өсіп келе жатқандығы бізді қатты қуантты. Әрқашан биіктерді бағындырып, мемлекетіміздің байрағын желбірете беріңіздер. Еліміздің ертеңі сіздермен жарқын» – деді Айнұр Тобаева.
</blockquote>
Марапаттау рәсімінде жеңімпаздар өз алғыстарын шығармаларын орындау арқылы жеткізді.
<img src="https://kyzylorda-news.kz/wp-content/uploads/2022/06/photo5244487228758013954.jpg" alt="" />
<img src="https://kyzylorda-news.kz/wp-content/uploads/2022/06/photo5244487228758013969.jpg" alt="" />
<img src="https://kyzylorda-news.kz/wp-content/uploads/2022/06/photo5244487228758013957.jpg" alt="" />

Өнерлі балаларға жүлделер табысталды

<a href="https://kyzylorda-news.kz/">Kyzylorda-news.kz.</a>&nbsp; Қызылордада «Балаларға күлкі сыйла» науқаны өтуде. Ұйымдастырушы – Әлеуметтік медициналық сақтандыру қорының облыстық филиалы. Балаларды қорғау күніне орай бірқатар медициналық мекемелерде Ашық есік күндері өтті. Бұл науқандарда балаларға міндетті әлеуметтік медициналық сақтандыру аясында стоматологиялық қызметтер тегін көрсетіледі.
Күн сайын «Элит-стом Қызылорда» клиникасы 18 жасқа дейінгі 10-15 баланы қабылдайды.
11 жастағы Рамазан тәттілерді, балмұздақтарды, газдалған сусындарды жақсы көреді. Мұның бәрі тістер мен қызыл иектерге зиян келтіреді. Тіс дәрігерінің кеңесінен кейін алтыншы сынып оқушысы тістерді емдеу және пломбалаудың тегін емін бастады.
<blockquote>
 Жақында бір жарым жасар қыздың ата-анасы жүгінді. Оның екі тісінде кариес пайда болды, ол асқыну кезеңіне – пульпитке айналды. Тістерін емдедік. Ата-анасына қызына тісін тазалауды үйрету керектігі ескертілді. Өкінішке орай, қөбінесе ата-аналарда сүт тістері күтімді қажет етпейді деп қате ой болады. &nbsp;Тістерді жас кезден сақтау керек, – дейді балалар тіс дәрігері Күләш Төлепова.
</blockquote>
Әлеуметтік медициналық сақтандыру қорының облыстық филиалының бөлім басшысы Абылайхан Рахимовтың айтуынша, МӘМС аясында азаматтардың 15 жеңілдік санатындағы 18 жасқа дейінгі &nbsp;балалар шұғыл және жоспарлы қызметтерді тегін ала алады. Жоспарлы түрде: анестезия, пломба салу, терапиялық қабылдау, пульпитті, периодонтитті емдеу, гипоплазия, флюороз кезінде тістің анатомиялық формасын толық функционалды қалпына келтіру. Сондай-ақ, тісті жұлудың хирургиялық әдістері, еріннің, тілдің френальды бөлігіне пластикалық хирургия, жақ рентгені және анестезия.
<img src="https://kyzylorda-news.kz/wp-content/uploads/2022/06/whatsapp-image-2022-06-01-at-15.22.29-1.jpeg" alt="" />

Абылайхан Рахимов: МӘМС аясында  балалар шұғыл және жоспарлы қызметтерді тегін ала алады

<a href="https://kyzylorda-news.kz/">Kyzylorda-news.kz.</a> ҚР Ұлттық экономика министрінің бұйрығымен, облыс әкімінің келісімі негізінде Табиғи монополияларды реттеу комитетінің Қызылорда облысы бойынша департаментінің басшысы қызметіне Зеріпбаев Мирас Мақсетұлы тағайындалды.
Бүгін аймақ басшысы Нұрлыбек Нәлібаев актив отырысында департамент басшысының жаңа қызметіне сенім білдірді.
<blockquote>
 «Мирас Мақсетұлы жаста болса еліміздің ірі мегаполистерінде жауапты қызмет жасаған. Сондықтан, жаңа қызметінде жинақтаған тәжірибесін, жастық жігер мен кәсіби әлеуетін аймақтың дамуына арнап, табиғи монополияларды реттеу саласын жүйелі қадамдармен ретке келтіреді деп сенім білдіремін», – деді Н.Нәлібаев.
</blockquote>
Мирас Зеріпбаев Алматы облысында дүниеге келген. Алматы энергетика және байланыс, сондай-ақ Қаныш Сатпаев атындағы Қазақ ұлттық техникалық зерттеу университеттерін бітірген.
Еңбек жолын «Авислогистик» жауапкершілігі шектеулі серіктестігінің экспедиторы ретінде бастаған. 
Әр жылдары жеке секторда жауапты қызметтер атқарды.
2017-2020 жылдары Ұлттық экономика министрлігі Табиғи монополияларды реттеу, бәсекелестікті қорғау және тұтынушылардың құқықтарын қорғау комитеті Электр энергетикасы саласын реттеу басқармасының сарапшысы болған.
2020-2021 жылдары Ұлттық экономика министрлігі Табиғи монополияларды реттеу комитетінің Павлодар облысы бойынша департамент басшысының орынбасары.
2021 жылдан бастап осы кезге дейін Ұлттық экономика министрлігі Табиғи монополияларды реттеу комитетінің Алматы қаласы бойынша департамент басшысының орынбасары қызметін атқарып келді.
<img src="https://kyzylorda-news.kz/wp-content/uploads/2022/06/miras.jpg" alt="" />

Табиғи монополияларды реттеу комитетінің Қызылорда облысы бойынша департаментінің басшысы тағайындалды

<a href="https://kyzylorda-news.kz/">Kyzylorda-news.kz.</a>&nbsp; Аймақтың инвестициялық әлеуетін арттыру үшін жаңа жобалар керек. Бұл ретте аймақ басшысы қала, аудан әкімдеріне инвестициялық жобалар арқылы қаржы тарту мәселесінде жұмысты ширату қажет екенін нақты тапсырған болатын.
Облыс әкімі Нұрлыбек Нәлібаевтың төрағалығымен өткен жиында да осы мәселе қайта қаралды. 
Отырыста облыс әкімінің орынбасары Мархабат Жайымбетов Қызылорда қаласы мен барлық аудан үшін өзекті жобаларға қаржы бөлу және алдағы перспективалық жоспарлар туралы нақты талдау жүргізіп, Қызылорда облысында өзге өңірлермен салыстырғанда жобалар саны мен көлемі аз екенін алға тартты.
<blockquote>
 «Мәселен, инженерлік инфрақұрылымды жүргізуге біздің аймақ жалпы құны 2,8 млрд. теңге жобаларын ұсынса, көрші Маңғыстау облысы 26 млрд.теңгеге ұсынып отыр. Басқа бағыттар бойынша да әзірлеген жобалар саны кем және көрсеткіштер әлдеқайда төмен», – деді Мархабат Жайымбетов.
</blockquote>
Жиында әр аудан және қала әкімдерінің инженерлік коммуналдық инфрақұрылым орнату, ауыз су, кәріз жүйелерін жақсарту, газ кіргізу, тұрғын үй салу, үйлерді қайта жаңғырту, электр желісін тарту, жылуға қосу сынды негізгі жобалары жан-жақты қаралып, кемшіліктері де ашық айтылды. Мысалы, Сырдария, Жалағаш, Шиелі аудандарының әкімдері инвестиция тартудан әлсіздік танытып, санаулы ғана жобаны әзірлеп ұсынды.
Өз кезегінде қала, аудан әкімдері мен басқарма басшылары атқарылған жұмыстар бойынша есеп беріп, жобаларын қорғап шықты.
Өңір басшысы Нұрлыбек Нәлібаев әкімдердің бюджет қаражатын тиімді бағыттау және республикадан қомақты қаржы тарту жұмыстарына сылбыр қарауының салдарынан көрсеткіштер көңіл көншітпей тұрғанын баса айтты.
<blockquote>
 «Әрбір жобаның артында қаржы тұрады. Жобаларды уақытылы атқарсақ, тұтас аудан, қала халқының әл-ауқатын арттыруға мүмкіндік туады. Өкінішке орай, былтырғы жылы жобалар тым аз жасалған. Соның салдарынан аймаққа бірнеше есе төмен қаржы тартылған. Сондықтан бюджет қаражатына қарап қалмай, демеушілер тартып, инвесторлармен жұмысты күшейту қажет», – деді облыс әкімі.
</blockquote>
Жиын барысында әкімдердің жұмысын саралаған аймақ басшысы қосымша инвестициялық жобаларды 10 күн ішінде әзірлеп, дайын жобалар бойынша қорытынды шығару мен сараптама нәтижесін алу жұмыстарын тездету қажет деді. Ал, міндетін орындай алмаған басшылардың алдағы уақытта жауапкершілігі қаралатынын ескертті.
Сондай-ақ, Нұрлыбек Нәлібаев жоба әзірлеу барысында жол салу, ауыз су тарту және табиғи газ өткізу секілді мәселелерге басты көңіл бөліп, құрылыстың бағасын негізсіз асырып, жұмысты аяқтаудан бас тартқан мердігерлердің жауапкершілігін қарау қажет екенін қатаң тапсырды.
<img src="https://kyzylorda-news.kz/wp-content/uploads/2022/06/285602125_314516337536284_1069364972912525705_n.jpg" alt="" />
<img src="https://kyzylorda-news.kz/wp-content/uploads/2022/06/285451481_314516324202952_2305148201412495329_n.jpg" alt="" />
<img src="https://kyzylorda-news.kz/wp-content/uploads/2022/06/285670331_314516404202944_606156019186327749_n.jpg" alt="" />

Н.Нәлібаев:  Инвестиция тартып, жаңа жобалар әкелу керек

<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Нұрлыбек Нәлібаевтың төрағалығымен актив отырысы өтті. Жиында аймақ басшысы облыстық табиғи ресурстар және табиғат пайдалануды реттеу басқармасының жаңа басшысы ретінде Құрманбаев Марат Ердәулетұлын таныстырды.
<blockquote>
 «Марат Ердәулетұлы – аймақтың тыныс-тіршілігімен етене таныс. Өңірде экология департаментін басқарған тұста қоршаған ортаны қорғау бойынша бюджетке қомақты қаржы түсірген тәжірибелі және іскер басшы. 
 Жұмыс атқарған уақытта өзін білікті, жауапкершілігі мол, қоршаған ортаны қорғау мәселесінде құзыретті, ұйымдастырушылық қабілеті мол басшы ретінде көрсетіп келеді. 
 Соңғы жылдары елімізде қуаншылық белең алып, соның ішінде Сырдария суының тапшылығы мәселесі туындауда. Осыған байланысты, қазіргі кезде табиғатымызды сақтап қалу басты міндет. Осы орайда, Марат Ердәулетұлы осы кезге дейін жинақтаған мол тәжірбиесін күрделі де жауапты қызметте аянбай қолданатынына, іскерлік қабілетін облыстың табиғат қорғау саласын дамытуға арнап, саланың тамырына қан жүгіртеді деп сенеміз», – деді Н.Нәлібаев.
</blockquote>
Құрманбаев Марат 1963 жылы Қызылорда облысында дүниеге келген. Жамбыл гидро мелиоративтік-құрылыс институтын «инженер-гидротехник» мамандығы бойынша бітірген. 
Еңбек жолын 1980 жылы «Қызылордаводстрой» тресіне қарасты ПМК-9 мекесінде жұмысшы болып бастаған. Аталған мекемеде 1990 жылға дейін бригадир, өндірістік жоспарлау бөлімінің инженері, гидротехникалық құрылыс жөніндегі мастері қызметтерін атқарған.
Мемлекеттік қызметтегі еңбек жолын ең төменгі сатыдан бастап, кәсіби біліктілігі мен жоғары ұйымдастырушылық қарым-қабілеті арқылы Қызылорда облыстық табиғатты қорғау комитеті Жалағаш аудандық басқармасының басшысы, Арал-Сырдария экология департаментінің мемлекеттік экологиялық инспекция бөлімінің бастығы, облыстық қоршаған ортаны қорғау басқармасы бастығының орынбасары – Бас мемлекеттік экологиялық инспекторы қызметіне дейін саты-сатысымен, мансаптық өсу қағидатымен көтерілген.
Экология саласының майталманы ретінде ол 2013-2014 жылдары Қоршаған ортаны қорғау және су ресурстары министрлігінде Экологиялық реттеу және бақылау комитетінің Қызылорда облысы бойынша экология департаментінің басшысы, 2015-2019 жылға дейін Энергетика министрлігінде мұнай газ кешеніндегі экологиялық реттеу, бақылау және мемлекеттік инспекция комитетінің Қызылорда облысы бойынша экология департаментінің басшысы, 2019 жылдың тамыз айынан бастап экология, геология және табиғи ресурстар министрлігінде Экологиялық реттеу және бақылау комитетінің Қызылорда, Жамбыл облыстары бойынша департаменті басшысы қызметтерін абыроймен атқарды.

Облыстық табиғи ресурстар және табиғат пайдалануды реттеу басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Бүгін Қазалы теміржол ауруханасында магнитті-резонанстық томография және компьютерлік томография орталығы ашылды.
Аурухананың басшысы Құбыл Ршымбетов жаңадан ашылған орталықпен таныстырып, құрылғылардың мүмкіндіктерін көрсетті.
Салтанатты шарада аудан әкімі Мұхтар Оразбаев құттықтау сөз сөйлеп, дәрігерлердің жұмысына сәттілік тіледі.
<blockquote>
 «Бүгін міне өздеріңізбен қуанышты жағдайда кездесіп отырмыз. Себебі осы жерден біздің ауданда алғаш болып МРТ орталығы ашылып отыр. Бұл өте қуанышты жаңалық. Бұған дейін біздің ауданның тұрғындары науқастанып қалған жағдайда облыс орталығына бару қажет еді. Бұл өз кезегінде көп уақытты және қосымша қаржыны талап етеді. Енді қазалылықтар бұл тауқыметтен құтылады. МРТ орталығының қызметкерлері арнайы оқытудан өткен. Бір сөзбен айтқанда орталық аудан халқына қызмет көрсетуге дайын. Олай болса Құбыл Ршымбетов басшылық жасайтын ұжым қызметкерлерінің жұмысына сәттілік тілеймін», – деді Мұхтар Әуесұлы.
</blockquote>
Мұнан соң облыстық денсаулық сақтау басқармасының басшысы Сәбитбек Пазылов, аудандық ардагерлер кеңесінің төрағасы Оразғали Бекбанов құттықтау сөз сөйледі.
Оңтүстік Корея және австриялық заманауи құрылғының мүмкіндігі өте жоғары. Нұр-Сұлтан, Алматы, Қызылорда қалаларында арнайы білімін жетілдірген мамандар заманауи құрылғының мүмкіндіктері арқылы жүйке, тірек-қимыл жүйесі, омыртқаның және жұлынның туа біткен патологиялар, акушерлік, гинекологиялық ауруларды анықтай алады. Осылайша науқастарға дәл диагноз қойылып, емдеу шаралары жүргізіледі.
<img src="https://kyzylorda-news.kz/wp-content/uploads/2022/06/282124924_3368963289991261_4523174065774188733_n.jpg" alt="" />

Қазалыда МРТ орталығы ашылды

<a href="https://kyzylorda-news.kz/">Kyzylorda-news.kz.</a> Биыл Қызылорда облысында 8-ші мәрте дәстүрлі түрде «Мерейлі отбасы» ұлттық байқауы өткізіледі.
Қазіргі таңда ұлттық конкурстың аудандық және қалалық деңгейдегі кезеңіне 15 маусымға дейін құжат қабылданады.
Конкурсқа отбасылар өзін-өзі ұсыну жолымен, сондай-ақ кент, ауылдық округ әкімдерінің, заңды тұлғалардың ұсынуы бойынша қатысады.
Конкурсқа қатысуға отбасы мүшелерінің еңбекте, спортта, шығармашылық, зияткерлік, ғылыми жетістіктері бар, сондай-ақ қоғамдық пайдалы қызметке қатысатын (волонтерлік, қайырымдылық, меценаттық, тәлімгерлік) отбасылар жіберіледі.
Қызметі Қазақстан Республикасының аумағында тыйым салынған ұйымдардың құрамына кіретін (кірген) мүшелері бар және бұрын сотталған мүшелері бар отбасылар конкурсқа қатыса алмайды. 
Конкурсқа қатысуға өтініштер мен құжаттарды Жаңақорған ауданының ішкі саясат бөлімі қабылдайды.
Қатысуға ниет білдірген отбасылар үшін байланыс құралдары: жұмыс тел.: 22-2-90, жауапты маман А.Әбдірейімов 87753226532.

«Мерейлі отбасы» ұлттық конкурсына құжат қабылдау жалғасуда

<a href="https://kyzylorda-news.kz/">Kyzylorda-news.kz.</a> Кәсіпкерлер консалтинг қызметтерге төлеген қаржысының 50-75 пайызға дейінгі бөлігін қайтарып ала алады. Еуропа қайта құру және даму банкінің Қазақстандағы шағын және орта бизнесті қолдау бағдарламасы аясында консалтинг қызметтер құнын өтеу үшін грант (субсидия) алуға болады. Бұл туралы Қызылорда облысы кәсіпкерлер палатасының бастамасымен өткен кездесуде айтылды.
Шараға ЕҚДБ-ның шағын және орта бизнесті қаржыландыру және дамыту жөніндегі маманы Мұрат Нарқұловпен облыстағы кәсіпкерлер қатысты.
Палата директоры Пірмұхаммед Сыздықов шараны өңір кәсіпкерлеріне мемлекеттік қолдау тетіктерінен өзге де құралдарды таныстыру мақсатында ұйымдастырып отырғанын атап өтті.
Кездесуде ЕҚДБ өкілі шағын және орта бизнесті дамытуға арналған бағдарламаның ерекшеліктерін, көрсетілетін қызметтер мен қатысуға қойылатын талаптарды, берілетін қаржы туралы түсіндірді.
<blockquote>
 «Бұрын грант 10 мың еуроға дейін болатын. Қазір ол шектеу алынды. Дәстүрлі субсидия, әдетте, жанармай, асыл тұқымды мал, жабдық, жөндеу немесе құрылыс жұмыстарына беріледі. Біз бұл айтқандардың ешқайсына қаржы бермейміз. Тек консалтинг, яғни кеңес беру қызметтеріне ғана субсидия береміз», – деді ЕҚДБ маманы Мұрат Нарқұлов.
</blockquote>
Аталған консалтинг қызметтерге мыналар жатады:
<ul>
<li>интернет-дүкен, веб-сайт, мобильді қосымша әзірлеу;</li>
<li>бизнес-жоспар, ТЭН, жобалық-сметалық құжаттама, ҚОӘБ, интерьер дизайнын дайындау;</li>
<li>сатылым мен маркетинг қызметін оңтайландыру, нарықты зерттеу;</li>
<li>бизнесті автоматтандыру, CRM жүйесін енгізу;</li>
<li>үнемді өндіріс принциптері, Кайдзен;</li>
<li>өз франшизаңызды, брендіңізді дамыту, ілгерілету;</li>
<li>диханшылық және мал шаруашылығы саласындағы кеңестер;</li>
<li>қаржы менеджменті, сапа менеджменті (ISO, HACCP, GPP, GDP, GMP);</li>
<li>электр-энергиясын, жылуды, суды үнемдеу тетіктерін енгізу;</li>
<li>персоналды басқаруда тиімді жүйелер ұйымдастыру, KPI қалыптастыру, басқа дасалалар.</li>
</ul>
«Кеңес беру қызметтерінде бірінші қазақстандық мамандарға басымдық беріледі. Жерігілікті мамандар болмаған жағдайда шетелдік кеңесшілердің қызметі ұсынылады. Біздің бағдарламаға «Бизнестің жол картасы – 2025» бағдарламасындағы барлық басым салаға қатысушы кәсіпкерлер, қаржы айналымы 50 млн еуродан аспайтын шағын және орта кәсіпкерлік субъектілері, сондай-ақ бизнестегі қыз-келіншектер қатыса алады», – деді Мұрат Нарқұлов.
Сонымен қатар, кәсіпкерлер қолдау тетіктеріне қатысты сауалдарын қойып, ұсыныс-пікірлерін жеткізді.
Аймақ кәсіпкерлері осы және өзге де сұрақтарға қатысты Қызылорда облысы кәсіпкерлер палатасының сарапшысы Назым Мұрсалға 8 /7242/ 40-09-81 байланыс нөмірі арқылы хабарласып, кеңес ала алады.

Қызылордалық кәсіпкерлерге Еуропа қайта құру банкінен грант алу жолы түсіндірілді

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде жастар ұйымдарының көшбасшылары мен білім алушылардың қатысуымен «Реформалардың мәні – азаматтардың мемлекет ісіне араласу мүмкіндігін арттыру» тақырыбында дөңгелек үстел өтті. Жастар алдағы саяси науқан туралы ой-пікірлерін білдіріп, штаб мүшелеріне сұрақтарын қойды.
Кездесу барысында Қорқыт ата атындағы Қызылорда университетінің Әлеуметтік және тәрбие жұмыстары жөніндегі проректоры, референдумды қоғамдық қолдау жөніндегі облыстық штабтың төрағасы Жандос Базартай, «Тәрбие жұмыстары және жастар саясаты» бөлімінің басшысы Жанар Бимұратқызы, Жастар ісі жөніндегі комитет төрағасы Нәбиден Маратұлы баяндама жасады.
Жиында Жанар Бимұратқызы жастарды 5 маусым күні өтетін референдумға қатысып, белсенділік танытуға шақырды.
<blockquote>
 «Жастар еліміздегі кез келген өзгеріске бей-жай қарамауы керек. Себебі, олар біздің болашағымыз, келешектің тұтқасы осы өскелең ұрпақта. Сондықтан бүгінгі кездесуде санаулы күннен кейін өтетін референдум туралы, ондағы өзгерістер жайлы талқыладық, жастардың пікірін тыңдадық. Нәтижесінде, расымен жастардың қоғамда ықпалы жоғары, белсенді топ екеніне көзіміз жетті. Жалындаған жастар барда – Жаңа Қазақстанды әділетті, білімді, рухы биік азаматтар құратынына сенімдімін», – деді Жанар Бимұратқызы.
</blockquote>

Университет жастары референдумды қолдайды

<a href="https://kyzylorda-news.kz/">Kyzylorda-news.kz.</a>&nbsp; Облыста алаяқтық қылмысқа қатысты деректер өткен жылмен салыстырғанда 24 пайызға төмендеді. Жыл басынан бері алаяқтық санатындағы 36 қылмыстық іс сотқа жолданып, оның 24-і тараптардың ымыраға келуіне байланысты тоқтатылды.
Бұл жөнінде Өңірлік коммуникациялар қызметінде өткен брифингте Қызылорда облысы прокурорының орынбасары Нұрлан Ерманов мәлімдеді.
<blockquote>
 «Бүгінде елімізде банктің атын жамылып, өзгенің ақшасына қол сұғатындар көбейді. Дәлірек айтқанда, жергілікті сот органдарымен 23 адамға қатысты 21 қылмыстық іс қаралды. Талдау барысында сотқа жолданған алаяқтық істердің басым көпшілігі – жер немесе тұрғын үй алып беруге, несие рәсімдеуге, жұмысқа орналастыруға, көлік жүргізу куәлігін алып беруге байланысты істер қозғалған. Ал биыл тіркелген 316 алаяқтық қылмыстың 51 пайызы интернет алаяқтыққа жатады. Кінәлі азаматтар ҚР заңына сәйкес жауапқа тартылды. Алаяқтың арбауына түспеу үшін еш нәрсеге көз жеткізбей, бөтен азаматқа ақша аудармау қажет. Ал онлайн қызметке жүгінген кезде өзге қаладағы таныстарына немесе туыстарына айту арқылы нақты тексеріп алған жөн. Егер онлайн қызметтердің ісіне күмән туындаса дереу құқық қорғау қызметіне жүгіну қажет. Себебі, қылмыстың тездетіп ашылуына өз септігін тигізеді», – деді Қызылорда облысы прокурорының орынбасары Нұрлан Ерманов.
</blockquote>

Қызылордада алаяқтық қылмысқа қатысты деректер азайған

<a href="https://kyzylorda-news.kz/">Kyzylorda-news.kz.</a>&nbsp; Халықаралық балаларды қорғау күні мерекесінде «Қамбаш» олимпиадалар және қосымша білім беру орталығындағы балаларға арналған жазғы тынығу лагерінің ашылуы өтті.
«Сіздерді 1 маусым – Халықаралық балаларды қорғау күнімен шын жүректен құттықтаймын! Міне, тағы бір оқу жылы аяқталып, асыға күткен жайдары жаз мезгілі де келіп жетті. Жадыраған жазғы демалыс – барлық балалардың сағына күтетін сәті. Жазғы демалыстарыңыздың әрбір күнінің естен кетпестей қызықты сәттерге толы болуына тілектеспін. Тынығу лагерінде жаңа достар тауып, ауызбіршілік пен ынтымақтың ұйытқысы бола біліңіздер. Дендерің сау, оқуда озат болыңыздыр!», – деп жылы лебізін жеткізді аудан әкімі Серік Сермағамбетов.
Сонымен бірге, Қызылорда облыстық білім және ғылым қызметкерлері кәсіподағы комитетінің төрайымы Гүлнар Бабабекқызы қатысып, балалардың қызықты демалыс өткізуіне тілектестік білдірді.
Мерекелік шарада аудан басшысы және облыстық мәслихат депутаттары лагерь тынығушыларымен бірге кешкілік алау отын тұтандырды.
Атап өтейік, «Қамбаш» жазғы тынығу лагері биылғы жылы 7 ауысым бойынша 1000-нан астам баланы жазғы демалыспен қамтиды. Сондай-ақ, лагерь биылғы жылы республикамыздың өзге өңірлерінен де балаларды қабылдайды. Ал бүгінгі тынығу лагерінің алғашқы легінде 130 бала қабылданды.
Демалыс орнында балалардың қызығушылығы мен психологиялық жас ерекшеліктеріне сәйкес робототехника, ағылшын, орыс тілдерінің үйірмелері, спорттық-әскери клубтар, суда жүзу және ән, би, сурет үйірмелері жұмыс жүргізеді. Әрбір тынығушы өздерінің қалаған үйірмелеріне барып, өз уақыттарын тиімді, әрі қызықты өткізуіне жағдай жасалынған.
Сонымен қатар, жазда тынығуға келген балаларға өңір тарихы мен мәдениетін насихаттау мақсатында Арал қаласы мен Әйтеке би кентіндегі мұражайларға, Байқоңыр қаласында орналасқан «Байқоңыр ғарыш айлағы» және «Қорқыт ата» кешеніне саяхаттауға мүмкіндік қарастырылған.
<img src="https://kyzylorda-news.kz/wp-content/uploads/2022/06/284541445_3280525768942453_2787506160296423547_n.jpg" alt="" />
<img src="https://kyzylorda-news.kz/wp-content/uploads/2022/06/283712749_3280525665609130_1523894308388850795_n.jpg" alt="" />
<img src="https://kyzylorda-news.kz/wp-content/uploads/2022/06/282566769_3280525438942486_3306759301793126402_n.jpg" alt="" />

«Қамбаш» тынығу лагері 7 ауысымда 1000 баланы жазғы демалыспен қамтиды

<a href="https://kyzylorda-news.kz/">Kyzylorda-news.kz.</a> Қызылордада жеке кәсіпкерді заңсыз тексергені үшін қалалық сәулет және қала құрылысы бөлімінің маманы «сөгіс» алып, кәсіпкерден өндірген салық төлемі қайтарылды.
Осы жылдың ақпанында Қызылорда облысы кәсіпкерлер палатасына жеке кәсіпкер Әбунасыр Алдабергенов құқығын қорғауды сұрап, өтініш білдірді.
Кәсіпкердің айтуынша, өткен жылдың желтоқсанында қалалық сәулет және қала құрылысы бөлімінің мамандары ешқандай ескертусіз, сырттай бақылау жасап, нысанда тұрған ақпараттық тақтаны өлшеп алып кетеді. 7 желтоқсанда «сыртқы жарнама құралы» деп бағалап, кәсіпкерге 14 585 теңге төлемақы төлеуді міндеттейді.
Қала әкімдігіне қарасты жауапты бөлімнің берген ақпараты негізінде қалалық мемлекеттік кірістер басқармасы кәсіпкердің есеп шоттарын бұғаттап, берешек сомасына тікелей өкім қояды. Нәтижесінде үш банктік шотынан берешек сома артығымен ұсталады. Қосымша шоттары бұғатталған кәсіпкер өзге несиелік міндеттемелерін уақытылы төлей алмай, кешіктіреді.
Кәсіпкерлер палатасының заңгерлері өтінішті жан-жақты зерттеп, ҚР Ұлттық экономика министрлігіне мемлекеттік органдардың іс-әрекеттерінің заңдылығына құқықтық баға беруді сұрап, хат жолдаған.
<blockquote>
 Министрліктен: «Қазақстан Республикасы Президентінің Жарлығымен 2020 жылдың 1 қаңтарынан 2023 жылдың 1 қаңтарына дейін шағын кәсіпкерлік субъектілеріне, оның ішінде микрокәсіпкерлік субъектілеріне бару арқылы тексерулер мен профилактикалық бақылау мен қадағалауға мораторий енгізілгенін атап өтеміз. Орталық мемлекеттік және жергілікті атқарушы органдарға шағын және микрокәсіпкерлік субъектілеріне бару арқылы тексерулер мен профилактикалық бақылау мен қадағалау жүргізуге тыйым салынады. Осылайша, бақылау органдарының мемлекеттік бақылау нысандарының өзге де түрлерін жүргізуге, сондай-ақ бақылау нәтижелері бойынша Кодексте және заңда көзделмеген құжаттарды жіберуге құқығы жоқ», – деген жауап келді.
</blockquote>
Бұдан бөлек, Палата мамандары қалалық әкімдікке қарасты бөлімнің тексеруі арнайы есепке алынбағанын да анықтады. Қажетті құжаттар жинақталғаннан кейін Кәсіпкерлер палатасының кәсіпкердің атынан берген шағымы негізінде қалалық прокуратура заң бұзушылықтарға жол берген бөлім қызметкерінің тәртіптік жауаптылығын қарау және кәсіпкерге берілген ескертпе хатты жою жөнінде қала әкімінің атына прокурорлық ықпал ету актісін енгізді.
Нәтижесінде бөлім қызметкері Мақсат Абдинабиге «сөгіс» түрінде тәртіптік жаза беріліп, кәсіпкерге берілген ескертпе хаттың күші жойылды. Сондай-ақ, кәсіпкердің есепшотынан алынған қаржы толық қайтарылып, кәсіпкердің құқығы қорғалды.

Қазақстан және Қызылорда облысының жаңалықтары