<a href="https://kyzylorda-news.kz/">Kyzylorda-news.kz.</a> Қызылорда қаласындағы Б.Момынбаев атындағы №278 ІТ мектеп-лицейінің директоры Эльмира Азатбаева ҚР Президентінің биылғы «Әділетті мемлекет. Біртұтас ұлт. Берекелі қоғам» атты Қазақстан халқына Жолдауы ұстаздар қауымына зор жауапкершілік жүктейтінін айтты.
Білім күні қарсаңында Президент Қасым-Жомарт Тоқаев халыққа кезекті жолдауын жеткізген болатын. Бүгінгі жолдаудың артар жүгі ауыр екені белгілі. Мемлекет басшысы халықтың көкейінде жүрген өзекті мәселелердің оң шешімін таба білді деп ойлаймын.
Жолдауда айқын мақсат пен қай салада болмасын тұрақтылық, өсу қарастырылған. Өткеннен тағылым алып, келешекке сеніммен қадам басамыз. Осы жолда жұртымызға ең алдымен ауызбіршілік керек. Ақыл мен сабыр, парасат пен ұстамдылық қажет екені айдан анық. Кезекті жолдаудың негізі үлкен бес бағыттан құралған екен.
Ұстаздар қауымының Президент Жолдауынан күтері көп екені рас. Осы жолғы Жолдаудың үшінші бағдары «Ел болашағына арналған стратегиялық инвестиция» деп аталады. Шынымен балалар еліміздің болашағы, мемлекетіміздің келешегі екені айдан анық. Демек, өркениетке ұмтылған қандай ел болмасын алдымен бесігін түзеуге ұмтылатыны сөзсіз. Қасым-Жомарт Кемелұлы Жолдауында алдымен ұлт сапасын жақсартуға күш салу керектігін ескерте келіп, білім саласына біршама өзгерістер ұсынды. Бұл біз үшін жақсы мүмкіндік және қолдау.
Бірінші кезек күттірмейтін мәселе білімнің негізгі фундаменті орта білім саласын дамыту Мемлекет басшысының Жолдауында айқын көрініс таба білген. Ең маңыздысы – осы орта білім жүйесінде «Жайлы мектеп» ұлттық жобасының қолға алынуы өте құптарлық бастама. Президент өз сөзінде 2025 жылға дейін 800 мың баланың заманауи мектепте оқуына жағдай жасап, осылай апатты мектептер мен үш ауысымдағы мектептер мәселесі шешілетіндігін жеткізді. Әрине, бұл қала мен ауыл мектебі оқушыларына бірдей мүмкіндік беру деп түсінер едім. Яғни, енді қала мектептеріндегі заманауи жабдықтар ауыл мктептеріне де қолжетімді болады деген сөз.
Екінші маңызды мәселе мектеп формасын барлық оқушыға барынша қолжетімді етуі. Бұл ата-ана үшін аса маңызды. Әлеуметтік тұрғыдан әлсіз саналатын кейбір топтағы балаларға форманы бюджет есебінен беруі құптарлық іс. Сондай-ақ, Ел Президенті мектеп формасына арналған мемлекеттік тапсырысты отандық жеңіл өнеркәсіпті дамытуға ден қою қажеттілігіне де тоқталды. Осы барлық бастамалардың жүзеге асыруына ұстаздар қауымы да аянбай еңбек етіп, Жаңа Қазақстанды құруға белсене атсалысады деп ойлаймын.
Қуатты ұлттың діңгегі халық. Ең бастысы, азаматтарымыздың денсаулығы мықты, білімі терең болу қажет. Бүгінгі жолдаудан түйгенім Біз таңдаған жол қиын, дегенмен мақсатымыз айқын.
<img src="https://kyzylorda-news.kz/wp-content/uploads/2022/09/jelmira.jpg" alt="" />

Жолдау ұстаздар қауымына зор жауапкершілік жүктейді

<a href="https://kyzylorda-news.kz/">Kyzylorda-news.kz.</a>&nbsp;Мәншүк Мәметова атындағы Қызылорда педагогикалық жоғары колледжі «Филология» бөлімінің ұйымдастыруымен Қазақстан халқы тілдері мерекесіне орай «Тіл – татулық пен тұрақтылық негізі, ұлт қазынасы» тақырыбындағы апталықтың ашылу салтанаты өтті.
Шара мақсаты – Тіл – ұлттың мақтанышы, рухани байлығы екендігін студенттерге жетік меңгерте отырып, оларды елжандылыққа, туған тілін құрметтеуге, тілді ұлттық мұра ретінде қастерлеуге үйрету. Сондай-ақ тіл тазалығын сақтауға, мәдениетті сөйлеуге, ана тіліне сүйіспеншілігін арттыруға, мемлекеттік тіл мәртебесін көтеруге атсалысуға шақыру, Отанға деген патриоттық сезімін ояту, үш тілдік саясатты дамыту.
Бұл мереке елімізде 2018 жылдан бастап қазақ тілі мен әдебиеттану ғылымдарының негізін салушы Ахмет Байтұрсыновтың туған күнімен тұспа-тұс тойланып келеді. Биыл Алаш ардақтысының туғанына 150 жыл толып отыр. Осыған орай «Филология» бөлімінің меңгерушісі Г. Мұхиддинова студенттерге ғалымның мол мұрасы мен шығармашылығынан мәлімет беріп, жас ұрпақты ана тілімізді құрметтеуге шақырды. Атаулы күнге орай колледжде өтетін іс-шаралар тізбегімен таныстырды.
Кеш барысында ғалымның еңбектеріне шолу жасалып, жас ақындар өздерінің жүрекжарды туындыларымен бөлісті. Мерекелік кеште әсем әндер шырқалып, ақын-жазушылардың туындыларынан үзінді өлеңдер оқылды. Колледждің ұстазы Б.Ахунов айтулы күнге жылы лебізін білдіре отырып, мерекелік кешті аяқтады.
<img src="https://kyzylorda-news.kz/wp-content/uploads/2022/09/305270081_1265800007562766_8842036824088565255_n.jpg" alt="" />
<img src="https://kyzylorda-news.kz/wp-content/uploads/2022/09/304785554_1265799997562767_6268334597598973301_n.jpg" alt="" />

5 қыркүйек – Қазақстан халқы тілдері күні мерекесі

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Нұрлыбек Нәлібаев Арал ауданына іссапармен барды.
Сапар барысында облыс әкімі Нұрлыбек Нәлібаев Aral Quarts кварц құмын байыту тау-кен комбинатына ат басын бұрды.
Жылына 120 мың тонна кварц құмын өндіретін кәсіпорын алғашқы кезеңде 40 маманды жұмыспен қамтыса, ІІ кезеңде 172 мың тонна құрғақ құрылыс ұнтағын шығаруға ден қойып, 88 маман еңбекке тартылды. Өндіріс орны ішкі нарықты 80 пайыз өніммен қамтиды.
Нұрлыбек Нәлібаев шыны зауытына қажетті өнімді осы өндіріс қамтамасыз етуі керек екендігін алға тартып, комбинат жұмысын бағдарлады.
Кәсіпорын айыны 5500-6000 тонна өнім өндіругк қауқарлы. Қазіргі таңда 3.5 мың тонна өнім дайындалған.
Сапар барысында аймақ басшысы Аралдың Қамыстыбас ауылдық округінде құтқару бөлімшесінің модульдік станциясының жұмысын көрді.
Тоғыз бөлмеден тұратын бөлімшеде медициналық пункт, кезекші диспечерлік және компрессорлық бөлме қамтылған. Аумағы 250 шаршы метрді құрайтын орталық төтенше жағдай кезінде тұрғындарға оперативті көмекті жылдам үйлестіруге мүмкіндік береді.
Арал ауданындағы сапары соңында облыс әкімі Нұрлыбек Нәлібаев аудан әкіміне Президент Жолдауынан туындаған міндеттерді уақытылы әрі сапалы орындауды тапсырды.
<img src="https://kyzylorda-news.kz/wp-content/uploads/2022/09/305608816_377986571189260_2081843237436600622_n.jpg" alt="" />
<img src="https://kyzylorda-news.kz/wp-content/uploads/2022/09/305652609_377986561189261_3459034008312337677_n.jpg" alt="" />
<img src="https://kyzylorda-news.kz/wp-content/uploads/2022/09/305527234_377986551189262_6621578771307563822_n.jpg" alt="" />
<img src="https://kyzylorda-news.kz/wp-content/uploads/2022/09/305549944_377986634522587_4297405761368416664_n.jpg" alt="" />
<img src="https://kyzylorda-news.kz/wp-content/uploads/2022/09/305569855_377991111188806_180522467876562162_n.jpg" alt="" />
<img src="https://kyzylorda-news.kz/wp-content/uploads/2022/09/305458542_377987594522491_8110782030603594359_n.jpg" alt="" />

Нұрлыбек Нәлібаев кварц құмын байыту тау-кен комбинаты мен модульдік станцияға барды

<a href="https://kyzylorda-news.kz/">Kyzylorda-news.kz.</a> **Қызылорда облысының әкімі Нұрлыбек Нәлібаев *Арал ауданына жұмыс сапары барысында* Аралқұм ауылдық округі, Шөміш елді мекеніндегі «Латон-Маркет» ЖШС-ның демеушілігімен салынған әмбебап кіші спорт алаңын көріп, ауыл тұрғындарымен кездесті.**
<blockquote>
 «Балаларға тарту ретінде өңірде парктер, скверлер салынуда. Жақында ғана Жаңақорғанда меценат 750 млн.теңгеге парк салу ісіне белсене кірісті. Ал, демеушілердің қолдауымен қалада 50, аудандарда 30 балалар алаңы бой көтереді. Тағы бір жанашыр азамат 1.5 млрд.теңгеге “Анаға тағзым” алаңын салып беруге ниет білдірді. Міне, осындай шағын алаңдарды балалардың игілігі үшін табыстау үлкен игілікті іс деп санаймыз», – деді Нұрлыбек Нәлібаев.
</blockquote>
Спорт алаңында 12 жас бір мезетте ойнай алады. Аумағы 800 шаршы метрді құрайтын теміртормен қапталған алаңда 6 жарықшам қойылып, газон төселген. 
Спорт алаңына келген жастар облыс әкімімен тілдесті.
Сонымен қатар, өңір басшысы Нұрлыбек Нәлібаев Аманөткел ауылдық округіне барып, «Ауыл – Ел бесігі» бағдарламасы аясында салынған дене шынықтыру және сауықтыру кешенінің ашылу рәсіміне қатысты.
<blockquote>
 «Спорт – ел мерейін асырып, абыройын арттыратын ауқымды сала. Өңірде «Балалар жылы» аясында демеушілердің қолдауымен 80 ойын алаңы салынуда. Арал ауданында соның 5-еуі жыл аяғына дейін аудан тұрғындарының игілігіне қызмет ететін болады. Бұл кешенде байрақты бәсекелерде, Олимп шыңында Көк Туымызды желбіретер даңқты спортшылар жаттығып шығарына сенімдімін! Жаңа спорт ғимараты құтты болсын»,- деді аймақ басшысы.
</blockquote>
Нұрлыбек Машбекұлы спортпен шұғылдануға ниетті жастармен жүздесіп, пікірлесті. Мұнда бір мезетте 40 баланың спортпен шұғылдануға мүмкіндігі бар. Яғни баскетбол, волейбол, шағын футбол ойнай алады. Айту керек, мұндай денешынықтыру-сауықтыру кешені Жақсықылыш кенті мен Қамыстыбас елді мекенінде салынуда.
<img src="https://kyzylorda-news.kz/wp-content/uploads/2022/09/305585571_377984954522755_3298838221813189892_n.jpg" alt="" />
<img src="https://kyzylorda-news.kz/wp-content/uploads/2022/09/305437174_377987154522535_7884782342735225683_n.jpg" alt="" />
<img src="https://kyzylorda-news.kz/wp-content/uploads/2022/09/305497574_377987144522536_1307402072258973524_n.jpg" alt="" />
<img src="https://kyzylorda-news.kz/wp-content/uploads/2022/09/305562580_377987217855862_292716545186538815_n.jpg" alt="" />

Арал ауданында дене шынықтыру және сауықтыру кешені пайдаланылуға берілді

<a href="https://kyzylorda-news.kz/">Kyzylorda-news.kz.</a>&nbsp;Мемлекет басшысының Қазақстан халқына Жолдауына қатысты қызылордалық зиялы қауым өкілдері өз пікірлерін білдіріп, халықты бірлікке, елдікке шақырып жатыр. Олардың қатарында еңбек ардагері, Қызылорда облыстық ардагерлер кеңесінің алқа мүшесі Нажмаддин Мұсабаев та өз пікірін білдіріп, халықтың жағдайы оңалса, еліміз одан әрі дами беретінін айтты.
<blockquote>
 «Мемлекет басшысының дәстүрлі Жолдауы халықтың арасында кеңінен талқыланып, біраз насихатталуда. Шынында да, Жолдауда барлық саладағы көптеген мәселелер қамтылды. Дегенмен, аталған мәселелер айтылып қана қоймай, нақты жұмыстар орындалуы керек. Бұл ретте Президентіміз ең бірінші халық үңіне құлақ асатын мемлекет құру керектігін айтып келеді. Халықтың жағдайы оңалса, еліміз одан әрі дами бермек. Сыр өңірі үшін ауыл шаруашылығы саласы мен су саласы өте өзекті екені белгілі. Мемлекет басшысы да Жолдауында бұл мәселені қозғап, болашақта су тапшылығы әлемдік деңгейде көтерілетінін жеткізді. Біздің облыстың экономикасы негізінен Сырдария өзені мен Кіші Аралдың жағдайына тәуелді. Сол үшін Президент Қасым-Жомарт Кемелұлы Үкіметке 3 жылға арналған бағдарлама әзірлеу туралы тапсырма берді. Одан бөлек, гидротехникалық саласының мамандарын дайындау керектігін де тілге тиек етті. Соңғы жылдары аталған мәселені түпкілікті зерттеу жұмыстары белсенді жүргізілуде», – деді Нажмаддин Мұсабаев.
</blockquote>
<img src="https://kyzylorda-news.kz/wp-content/uploads/2022/09/mwsabaev.jpg" alt="" />

Халықтың жағдайы оңалса, еліміз одан әрі дами береді

<a href="https://kyzylorda-news.kz/">Kyzylorda-news.kz.</a>&nbsp; Қызылорда өңірінде жаңа мектептер мен балабақшалар желісі көбеюде. Бүгін Арал ауданына жұмыс сапарымен барған облыс әкімі Нұрлыбек Нәлібаев ел ағаларымен бірге бірқатар әлеуметтік нысандарды ашты.
Аймақ басшысы алдымен бүгінге дейін апатты деп танылған мектептің орнына жаңадан салынған №71 орта мектебіне барып, оқушыларға игі тілегін арнады.
<blockquote>
 “Мемлекет үшін де, адам үшін де бала өмірінен қымбат байлық жоқ. Сондықтан да, өткен жылы мектеп ғимаратының құрылысы басталып, өз уақытына сай жаңа оқу жылында пайдаланылуға берілді. Осы кезге дейін №71 мектеп-интернатының ескі мектеп ғимараты апатты деп танылып келді. Енді ол қауіп жойылды. Елдің ардагерлері мен ұстаз қауымының сұранысы толық өтелді. 
 Білім жолында еңбекқорлықтың өлшеусіз үлгісін көрсетер ұстаздар қауымының ұрпақ тәрбиелеу ісіндегі еңбектеріне сәттілік тілеймін!”,- деді Н.Нәлібаев.
</blockquote>
Өңірде апатты деп танылған 4 мектептің 3-еуінің биыл шешімі табылып, оның екеуі қыркүйек айында табысталмақ.
Аралдағы Тоқабай елді мекенінде пайдалануға жарамсыз деп танылған №248 орта мектеп жеке инвестор есебінен қайта салынуда. Айту керек, Тоқабай ауылындағы 11 сынып оқушыларының барлығы биыл мемлекеттік грант иегері атанды.
Мұнан бөлек, алдағы 3 жылда Арал ауданының өзінде 8 мектептің құрылысы жүргізіліп, жаңа нысандар бой көтермек. Оның ішінде, «асарлату» әдісімен салынған Сапақ ауылдық округіндегі №69 орта мектеп пен Мергенсай елді мекеніндегі №58 орта мектебі келесі жылы салынатын мектептер тізімінде тұр. Жалпы Сыр елінде алдағы 3 жылда 32 мектеп салынбақ.
Аймақ басшысы Аралға сапары барысында Жақсықылыш кентіндегі «Асылым» жеке балабақшасының ашылу рәсіміне қатысты. Жаңадан бой көтерген нысан 140 бүлдіршінге лайықталған. Облыс әкімі ауыл тұрғындарын жаңа нысанның ашылуымен құттықтап, білім саласына инвестиция құйған кәсіпкерге алғыс білдірді.
Бүгінде Арал өңірі 3 пен 6 жас аралығындағы бүлдіршіндердің балабақшамен 100 пайыз қамтыған ауданның бірі.2025 жылға қарай ауданда 16 жеке балабақша және 4 мектеп жанынан шағын орталық ашылмақ.
<img src="https://kyzylorda-news.kz/wp-content/uploads/2022/09/305747066_377983544522896_2988004966863274062_n.jpg" alt="" />
<img src="https://kyzylorda-news.kz/wp-content/uploads/2022/09/305656552_377983727856211_7684884929647434419_n.jpg" alt="" />
<img src="https://kyzylorda-news.kz/wp-content/uploads/2022/09/305704366_377983561189561_161723128327211657_n.jpg" alt="" />
<img src="https://kyzylorda-news.kz/wp-content/uploads/2022/09/305099122_377983564522894_7478439975240548790_n-1.jpg" alt="" />
<img src="https://kyzylorda-news.kz/wp-content/uploads/2022/09/300131147_377983724522878_7016035266703217772_n.jpg" alt="" />
<img src="https://kyzylorda-news.kz/wp-content/uploads/2022/09/305434324_377984407856143_4424794490848072324_n.jpg" alt="" />
<img src="https://kyzylorda-news.kz/wp-content/uploads/2022/09/305389892_377984321189485_7434495895293621300_n.jpg" alt="" />
<img src="https://kyzylorda-news.kz/wp-content/uploads/2022/09/305465008_377984554522795_4776918282717478448_n.jpg" alt="" />
<img src="https://kyzylorda-news.kz/wp-content/uploads/2022/09/305765507_377984541189463_5255771018918146045_n.jpg" alt="" />

Аралда жаңа мектеп пен балабақша пайдалануға берілді

<a href="https://kyzylorda-news.kz/">Kyzylorda-news.kz.</a> Бүгін 5 қыркүйек – Қазақстан халқы тілдерінің мерекесіне және ұлт ұстазы Ахмет Байтұрсынұлының 150 жылдығына орай Қызылордада «Мемлекеттік тіл – ел бірлігінің негізі» тақырыбында пленарлық мәжіліс өтті.
Жиын «Достық» үйі ғимаратының фойесінде кітап көрмесінен басталып, сөреге қойылған құнды құжаттар мен фотолардың тарихымен танысты. Сондай-ақ, ұлт ұстазы Ахмет Байтұрсынұлы жайлы бейнеролик көрсетілді. Жиынның алғысөзін Қызылорда облысы әкімінің орынбасары Нұрымбет Сақтағанов алды. Облыстық қоғамдық даму басқармасының басшысы Мира Жомартқызы модераторлық еткен пленарлық мәжіліске тіл жанашырлары, қоғам зиялылары, жоғары және орта оқу орындарының оқытушылары, этномәдени бірлестік жетекшілері мен өкілдері, жастар және БАҚ өкілдері қатысты.
Мемлекеттік тіл мәртебесін көтеру бағытында жүйелі жұмыс жасап жүрген «Халықаралық «Қазақ тілі» қоғамы» қоғамдық бірлестігі Қызылорда облыстық филиалының төрағасы С.Аңсат «Аймақтағы мемлекеттік тілдің мәселелері» тақырыбында баяндама жасады. Одан кейін Қорқыт ата атындағы Қызылорда университетінің қазақ тілі мен әдебиеті және журналистика кафедрасының қауымдастырылған профессоры, филология ғылымдарының кандидаты, доцент Аман Абасилов «А.Байтұрсынұлының қоғамдық-саяси және ғылыми қызметінің Қызылорда кезеңі» тақырыбындағы ауқымды баяндамасымен жалғастырды. Өз кезегінде облыс әкімі жанындағы әйелдер істері және отбасылық-демографиялық саясат жөніндегі комиссия мүшесі Н.Мұсаева «Ұлттық руханияттың негізі – тіл», ақын, облыстық «Сыр бойы» газетінің аға тілшісі Д.Аяшұлы «Бұқаралық ақпарат құралдарындағы тіл қолданысы», Шиелі ауданындағы «Самғау» жеке мектебінің мұғалімі Т.Нуштаева «Мемлекеттік тілді құрметтеу – парызымыз» тақырыптарында хабарлама оқыды.
Жиын соңында бірқатар тіл жанашырлары марапат биігінен көрінді. Атап айтқанда, Қорқыт ата атындағы Қызылорда университетінің доценті, филология ғылымдарының кандидаты Алдажар Әбілов пен облыстық «Сыр бойы» газетінің аға тілшісі Дүйсенбек Аяшұлына ҚР Ғылым және жоғары білім министрлігінің Тіл саясаты комитетінің «Құрмет грамотасы» табысталды. Одан өзге мемлекеттік тілдің қолданыс аясын кеңейту бағытындағы жұмыстарға белсене араласып жүрген бірқатар азаматтар облыстың «Құрмет грамотасы» және облыс әкімінің «Алғыс хатымен» марапатталды.
<img src="https://kyzylorda-news.kz/wp-content/uploads/2022/09/305296437_1611749245887248_8755953439662886482_n.jpg" alt="" />
<img src="https://kyzylorda-news.kz/wp-content/uploads/2022/09/305498365_1611750085887164_2013597559091453272_n.jpg" alt="" />
<img src="https://kyzylorda-news.kz/wp-content/uploads/2022/09/305640804_1611749859220520_313031541811375297_n.jpg" alt="" />

Ахмет Байтұрсынұлының 150 жылдығына орай пленарлық мәжіліс өтті

<a href="https://kyzylorda-news.kz/">Kyzylorda-news.kz.</a> «AMANAT» партиясы Қызылорда қалалық филиалы жанынан құрылған мониторингтік топ қаладағы бірқатар сауда орындары мен дәріханаларды аралады. Мониторинг барысында қала орталығындағы сауда дүкендерінде және дәріханалардағы бағаларға зерделеу жүргізді.
Зерделеу барысында негізгі дәрі-дәрмек бағаларының өткен аптадағы баға мәнінен өзгермегендігі анықталды. Сондай-ақ дәрі-дәрмектердің тапшылығы да байқалмады.
Топ мүшелері келесі ретте «Тағзым алаңы» маңайында орналасқан әлеуметтік дәріханада болды. Бір айта кетерлігі, адамдар аз шоғырланатын аймақта елеусіз орналасқан бұл дәріханада дәрілік заттар бағасы едәуір төмендігі көңіл қуантады. Дәрілік заттардың төмен бағамен босатылғанына қарамастан зейнеткерлерге тағы да 5 пайыз жеңілдіктер ұсынылады. Сонымен қатар жас шамасына қарамастан барлық келушілер сауда жасаған сәттен ұялы телефон нөмерін тіркеу арқылы әр саудадан бонус жинақтай алады. Және де жинақталған бонусқа дәрілік заттар ала алады.
Айта кетейік, мұндай әлеуметтік дәріхана қаламызда екеу. Екіншісі ескі базар аймағындағы «Сұлтан» сауда үйіне қарама-қарсы орналасқан.
Мониторингтік топ мүшелері алдағы уақытта да өз жұмысын жалғастыратын болады.
<img src="https://kyzylorda-news.kz/wp-content/uploads/2022/09/304837600_185319867293473_7128103286386569159_n.jpg" alt="" />

Қызылордада мониторингтік топ мүшелері сауда орындары мен дәріханаларды аралады

<a href="https://kyzylorda-news.kz/">Kyzylorda-news.kz.</a> Қызылорда облыстық ардагерлер кеңесінің төрағасы Серік Дүйсенбаев ел болып бірігіп, игі істердің орындалуына атсалысуға&nbsp;шақырады.
Мемлекет басшысы Қ.Тоқаевтың Қазақстан халқына Жолдауында халықтың әл-ауқатын көтеру және еліміздің әлеуметтік-экономикалық даму барысы туралы маңызды міндеттер мен тапсырмалар берді. Соның бірі – бала күтіміндегі аналарға берілетін жәрдемақының мерзімін бір жарым жылға дейін ұзарту туралы шешім көпшіліктің көңілінен шығып, үлкен қолдауға ие болды.
Сонымен қатар, 2024 жылдан бастап 18 жасқа дейінгі әрбір баланың арнайы есепшотына ұлттық қор есебінен ақша аударылатын болады. Бұл қаржы баланың болашағы үшін жұмсалмақ. Одан бөлек, халықтың табысын арттыру мақсатында ең төменгі жалақы мөлшерін 60 мың теңгеден 70 мың теңгеге дейін көтеру бастамасы үлкен қолдауға ие болды. Сондықтан Мемлекет басшысының әлеуметтік салаға баса назар аударуы халықтың жағдайын жақсартуға ықпал етпек. Біз де ардагерлер қауымы болып Жолдауда айтылған барлық салаларға қатысты туындаған міндеттердің орындалуын қолдаймыз! Бұл жас ұрпақтың келелі келешегі үшін маңызды қадамдардың бірі болмақ. Сол үшін ел болып бірігіп, игі істердің орындалуына атсалысуға шақырамын!
<img src="https://kyzylorda-news.kz/wp-content/uploads/2022/09/whatsapp-image-2022-09-05-at-16.48.57.jpeg" alt="" />

Серік Дүйсенбаев: Ел болып бірігіп, игі істердің орындалуына атсалысуға шақырамын

<a href="https://kyzylorda-news.kz/">Kyzylorda-news.kz.</a>&nbsp;Қостанай халқына көмек көрсету үшін «AMANAT» партиясы Қызылорда облыстық филиалы жанынан құрылған көмек көрсету пунктіне кешеден бері партия белсенділері азық-түлік, тұрмысқа қажетті заттарды толассыз әкелуде.
Осы орайда бүгін партия белсендісі Таңат Байкенжеев Қостанай халқына қазіргі таңда аса қажетті болып отырған шаруашылық тауарлары мен мектеп жасындағы балаларға арналған арнайы құрал-жабдықтар жеткізіп берді.
Сондай-ақ қайырымдылық шарасына облыс тұрғындары, әкімдік қызметкерлері мен мәслихат депутаттары, жергілікті кәсіпкерлер мен еріктілер жасағы атсалысып жатыр.
Қабылдау пункітіне алғаш болып өз көмегін жеткізгендердің бірі партия белсендісі, «BIALI»ЖШС –нің төрағасы Асхат Шәукенбаев. Ол осындай қиын сәтте өзінің қостанайлықтармен бірге екенін жеткізіп, барлық жерлестерді жұмыла көмек көрсетуге шақырды. Қостанайлық ағайынға көмекке «AMANAT» партиясы облыстық, қалалық, «Тұран», «Теміржол» филиалдарының ұжымы да ортақ қаржы жинап, азық-түлік өнімдері мен төсек бұйымдарын алуға үлес қосты.
Айта кетейік, «AMANAT» партиясы Қызылорда облыстық филиалы бойынша гуманитарлық көмек қабылдау пунктерінің Қызылорда қаласындағы мекенжайы партияның қалалық филиалының ғимараты Ы.Жақаев көшесі 15А. Байланыс нөмірі: 8-747-530-85-79, 8-778-460-23-00.
<img src="https://kyzylorda-news.kz/wp-content/uploads/2022/09/305766065_186140930544700_3929789953231761876_n.jpg" alt="" />
<img src="https://kyzylorda-news.kz/wp-content/uploads/2022/09/4766d3ef-0394-4ba3-8771-e7dd42e1952b.jpg" alt="" />

Қызылордада қостанайлықтарға берілетін көмек жалғасуда

<a href="https://kyzylorda-news.kz/">Kyzylorda-news.kz.</a>&nbsp;Мемлекет басшысы Қасым-Жомарт Тоқаевтың Қазақстан халқына Жолдауына қатысты Қызылорда облыстық Қазақстан халқы ассамблеясы жанындағы Қоғамдық келісім кеңесі төрағасының міндетін атқарушы Сайлаубай Әбішев пікір білдірді.
Халқымыздың бірлігі – болашағымыздың кепілі.
Халық бұл жолдаудан көп үміт күтеді. Жаңа Қазақстан құру жолындағы бүкіл мемлекеттік құрылым басшыларының халық алдындағы жауапкершілігін одан әрі күшейтуге мемлекет басшысының баса назар аударғаны түсінікті. Себебі, елімізде қордаланған мәселелер жеткілікті, мемлекеттік ресурстарды тиімді пайдалана отырып, әрбір атқарылған жұмыстың санына емес, сапалық көрсеткіштерге басты мақсат етіп қою міндеті айқындалғандай.
Қоғамда қалыптаса бастаған саяси реформаларды жүйелі, әрі пәрменді жүргізе отырып, ел экономикасының халықтың әлеуметтік жағдайын жақсартуға бағытталған іс-шаралардың уақытылы орындалуына айырықша назар аударылған. Үстіміздегі жылы бүкілхалықтық референдум арқылы қабылданған конституциялық реформаның сөзсіз әрі табанды түрде орындалуына бүкілхалықтық бақылау орнату біздің әрқайсымыздың азаматтық борышымыз екені даусыз. Алдағы болашақта елімізде іске асырылатын, орындалар жұмыстардың саяси астарының негізі – халқымыздың ауызбіршілік, ынтымақ бірлігінде жатқанын бір сәт естен шығармауымыз керек. Алдағы белгіленген ел тағдырына қатысты кезектен тыс республика Президентінің сайлауын өткізу жөніндегі ұсынысты қолдай отырып, алға қойған мақсатты күрделі де, кең ауқымды жұмыстарды жүзеге асыруға барлық Сыр бойының тұрғындарын шақырған болар едім.
<img src="https://kyzylorda-news.kz/wp-content/uploads/2021/04/sajlawbaj-abishov.jpg" alt="" />

Сайлаубай Әбішев: Халқымыздың бірлігі – болашағымыздың кепілі

<a href="https://kyzylorda-news.kz/">Kyzylorda-news.kz.</a> Елімізде жыл сайын қыркүйек айының алғашқы жексенбісінде мұнай-газ кешені қызметкерлері күні аталып өтіледі. Осыған орай бүгін Қазалы ауданы әкімдігінің мәжіліс залында бірқатар сала мамандары марапатталды.
Басқосуда аудан әкімі Мұхтар Оразбаев мұнай-газ кешені қызметкерлерінің аймақтың әлеуметтік-экономикалық дамуына қосқан үлестері зор екенін айтып, кәсіби мерекемен құттықтады.
<blockquote>
 «Біздің қазыналы Қазалы жерінде газ саласының қызметкерлері аймақтың әлеуметтік-экономикалық дамуына өзіндік үлестерін қосып келеді. Соның нәтижесінде Қазалы ауданының орталығы – Әйтеке би кенті мен Қазалы қаласы және Ғани Мұратбаев ауылындағы тұрғын үйлер табиғи газ желісіне қосылған. Биыл аудан орталығына жақын орналасқан Жалаңтөс батыр, Басықара және Қашақбай Пірімов ауылдарын газдандыру жұмыстары қарқынды жүргізілуде. Қазіргі таңда біз Абай ауылын газдандыру үшін аудандық бюджеттен қаржы бөліп, жоба-сметалық құжаттарын дайындап жатырмыз. Сондай-ақ, жеке кәсіпкер, Шымкент қаласында тұратын жерлесіміз Жылқайдар Тәңірбергеновтың демеушілігімен елді мекендерге магистральдық газ құбырын жеткізу үшін жоба-сметалық құжаттары әзірленіп, сараптамадан өтуде. Жоба жүзеге асқан жағдайда 15 елді мекен газ желісіне қосылады», – деді аудан басшысы.
</blockquote>
Мұнан соң бір топ сала қызметкерлеріне аудан әкімінің «Алғыс хаты» тапсырылып, құрмет көрсетілді.
Басқосуда «Қаз Транс Газ Аймақ» АҚ Қызылорда өндірістік филиалы Әйтеке би газ шаруашылығының директоры Қуаныш Сансызбаев әріптестерін құттықтап, аудан әкіміне алғысын жеткізді.
Мерекелік шарада аудан өнерпаздары мұнай-газ кешені қызметкерлеріне арнап әннен шашу шашып, көтеріңкі көңіл күй сыйлады.
<img src="https://kyzylorda-news.kz/wp-content/uploads/2022/09/304840544_3445249465695976_806076655832587851_n.jpg" alt="" />
<img src="https://kyzylorda-news.kz/wp-content/uploads/2022/09/304744097_3445249632362626_2521618646224747617_n.jpg" alt="" />

Қазақстан және Қызылорда облысының жаңалықтары