Kyzylorda-news.kz. Түзеу мекемесіндегі сотталғандарды қоғамға бейімдеудің түпкі бір әдісі – еңбекпен тәрбиелеу. Жазасын өтеушілерді жұмыспен қамту мәселесі Қызылорда облысы бойынша қылмыстық-атқару жүйесі департаменті мекемелерінде жүйелі жүргізіліп келеді. Қылмыстық-атқару жүйесі департаментінің №37 мекемесіндегі жазасын өтеушілердің 95 пайызы жұмыспен қамтылған.
Мекеме бастығы, әділет подполковнигі А.Махашевтің айтуынша, жаза басып, жаңылғандарды қоғамға бейімдеп, еңбекке баулу мекемеде бірінші кезекте жолға қойылған.
«Қазіргі таңда 30 кәсіпкерлік нысанда келісім-шарт негізінде 130 жазасын өтеуші жұмыспен қамтылған. Олардың айлық табысының 50 пайызы мемелекетке, жеке тұлғаға келтірген шығындарын төлейді. Ал қалған бөлігін өздеріне, отбасыларына жаратады. Жуырда тағы 14 азаматты ағаш өнімдерінен жиһаз құрастыратын цехқа жұмысқа орналастырдық. Алдағы уақытта жазасын өтеушілерді көбірек еңбекке тартып, 100 пайыз жұмыспен қамту жоспарда бар. Еңбек ету арқылы сотталғандар теріс ойларынан арылып, қоғамға көзқарасы өзгеріп, өмір сүруге деген құлшынысы артады. Сондықтан жазасын өтеушілерді барынша еңбекпен қамту үшін жұмыстар атқарып жатырмыз» деді мекеме бастығы.
Жұмысқа жуырда орналасқан азаматтардың жұмыс орнына ат басын бұрып, сөзге тарттық. Олар абайсызда қылмыс жасап, жазасын қауіпсіздігі барынша төмен мекемеде өтеуде. Жиһаз жасайтын цехта 14 сотталған азамат қызу жұмыс үстінде. Олардың шығаратын өнімдерімен де таныстық. Ерлан, Болат есімді сотталғандар тапсырыс бойынша ағаштан сандық жасап жатыр екен.
«Бұл сандықтар таза ағаштан жасалады, ағашты жонып тазартып, біртегіс етіп жасаймыз. Одан соң ою-өрнектерін салып, арнайы кескіш құралдарымен өрнектеп шығамыз. Нарықта қазақы ою-өрнектермен нақышталған есік, сандық басқа да заттарға сұраныс жоғары. Ағаштан ерекше бұйым дайындау төзімділікті талап етеді. Ағаштан өнімді жасауға бірнеше күн уақыт кетеді. Тапсырысты мерзімінде жасап беруге тырысамыз дейді. Айлығымыз да уақытылы, өзімнің керек-жарағымды мекеме ішіндегі дүкеннен алып, артылған ақшамды отбасыма да жіберіп жатырмын. Бостандықта ағаш ұстасы болып жұмыс жасағанмын, сондықтан маған ағаштан әр түрлі дүниелер жасау аса қиын емес. Мекемеде жазамды өтей жүріп, есік жасаудан бөлек, ағаш өнімдерінен тапсырысқа қарай заттарды жасаймыз. «Жігітке жеті өнер де аз» дегендей үйренгенім өзіме жақсы» дейді жазасын өтеп жатқан азамат.