<a href="https://kyzylorda-news.kz/">Kyzylorda-news.kz.</a> Қазақстанда тұтынушылық несиелер мен ипотекалық несиелердің барлығы 9,8 триллион теңге болады. 8&nbsp;миллионға жуық қазақстандықтың қолданыстағы несиелері бар. Қарыздан қалай тезірек құтылуға болады? Бұл сұраққа қаржыгер Мақсат Халық жауап берді.
Маманның сөзінше, ең алдымен, тұтынушылық құқық толық сақталуы керек. Кез келген клиент өзі келісімге отырған екінші деңгейлі банкпен шартты жаңарта алады. Ал бұл өз кезегінде несиені тез жабуға көмектесуі мүмкін. &nbsp;&nbsp;
<blockquote>
 «Борышкер болсаңыз да, сіз банктің клиенті болып қала бересіз. Банкке өтініш жазып, қарызды қайта есептетуге болады. Яғни бұған дейін айына 35 мың теңге төлеп жүрсеңіз, қайта есептеуден кейін ол сомманы өсіре аласыз. Әрине, ол кез келген адамның қаржылық мүмкіндігіне тікелей байланысты, бірақ көп жағдайда артық ақшасы бар адамдардың өзі келісімшарттың кесірінен шығынға батып жатады. Ал оны өзгертуге болатынын екінінің бірі біле бермейді», – дейді ол.&nbsp;
</blockquote>
Қайта қаржыландыру
Қайта қаржыландыру – несие саясатының әдісі, ескі берешекті жаңа міндеттемелер қабылдау жолымен өтеу. Экономистер бұл әдісті несиені тез жабу үшін таптырмас құрал деп санайды.&nbsp;
<blockquote>
 «Бұл тек бір жағдайда дұрыс болады. Мысалы, кезінде жоғары пайызбен несие алдыңыз, бірақ келесі жылы елдегі экономикалық жағдай тұрақталып, инфляция қалыпқа келгенде базалық мөлшерлеме түседі, яғни несиенің пайызы төмендейді. Осы уақытта несиені қайта қаржыландырып, қарыздың үстінен төлейтін пайызын азайтуға болады. Қысқаша қайырғанда, несие мөлшерлемесі сіз алған уақыттан қазір төмен болып тұрса, онда қайта қаржыландыруға болады. Осы ретте ескеретін жайт бар: қайта қаржыландыру кезінде үстінен тағы қаражат алуға болмайды», – деді қаржыгер.&nbsp;
</blockquote>
Депозит ашу
Мақсат Халық көп жағдайда депозитті несиесі бар адамдар ашпайтынын айтады. Оның пікірінше, бұл қаржылық сауаттың төмендігінен.
<blockquote>
 «Қазір несие алатын емес, депозит ашатын уақыт екенін айтқым келеді. Неге десеңіз, бүгінде депозиттердің пайызы өсті. Ал тұтынушылық несиелердің базалық мөлшерлемесі елдегі экономикалық ахуалға байланысты тиімді болмай қалды. Несиені тез жабу үшін депозит болуы керек. Табыстың кемінде 10 пайызын депозитке құятын болсаңыз, жыл соңында оның үстінен түсетін пайда кемінде 14 пайыз болады. Ал бұл несиенің пайызын өтеуге көмектеседі. Бір сөзбен айтқанда, депозиттен түскен бонуспен несиенің пайызын жабу керек. Сол кезде несие де тез жабылады және шығынға көп батпайтын боласыз», – дейді ол.
</blockquote>
Көшкін әдісі
Бұл әдіс клиенттің бірнеше несиесі бар болған жағдайда қолданылады.&nbsp;
<blockquote>
 «Әрине, логикаға салсақ, сомасы аз несиені бірінші жапқан тиімді көрінеді, себебі несиені тез жабуға қосымша мотивация пайда болады. Дегенмен, ең бірінші негізгі қарызды жабуды ойлау керек. Одан кейін ғана пайызы жоғары несиені толық өтеуге тырысу керек. Пайызы жоғары несиенің соммасы аз да болуы мүмкін, көп те болуы мүмкін, сондықтан бұл тұста кесіп айту қиын», – деді маман.&nbsp;
</blockquote>
Қосымша табыс&nbsp;
Мақсат Халық несие жабуда негізгі табыс көзін ғана қарастыруға болмайтынын айтты.&nbsp;
<blockquote>
 «Қосымша табыс көзін табуға тырысу керек. Ол үшін қазір көптеген мүмкіндік бар. Қашықтан жұмыс істеуге де болады. Ең бастысы, несие сомасын жаба алатындай қосымша табыс болғаны маңызды. Сол кезде негізгі табысты депозитке құюға болады», – деп сөзін аяқтады ол.
</blockquote>
<a href="https://kaz.tengrinews.kz/private_finance/nesien-tez-jabudyin-5-jolyi-ekonomist-kenes-337736/">Tengrinews.kz</a>

Несиені тез жабудың 5 жолы. Экономист кеңесі

Kyzylorda-news.kz. Сыр елінде әнші-композитор, ҚР еңбек сіңірген артисі Жеңіс Сейдоллаұлының 60 жылдық мерейтойына арналған “Сен деп соққан жүрегім…” атты мерекелік концерті өтті.
Кеште республикамызға танымал әншілер, ҚР еңбек сіңірген қайраткерлері Жеңіс Ысқақова, Жанна Орынбасарова, Нұрлан Абдуллин, Мадина Сәдуақасова және Медеу Арынбаев өнер көрсетсе, танымал музыкант Ренат Гайсин мен Диная көрермен ықыласына бөленді.
Кеш иесі Жеңіс Сейдоллаұлының ізін жалғаған қыздары Ажар мен Жанель Жеңісқызы Сыр елінің сахнасында ән шырқаса, аймағымыздың мәртебесін асқақтатып жүрген Руслан Садықов және “Адажио” тобы композитордың шығармаларын орындады.
Әнші-композитор Жеңіс Сейдоллаұлының өміршең әндері шырқалған кеште аймағымыздың ән сүйер қауымы толассыз қошемет көрсетіп, жылы лебізде тарқасты.
<img src="https://kyzylorda-news.kz/wp-content/uploads/2022/05/fb_img_1652177271480.jpg" alt="" />

Әнші-композитор Жеңіс Сейдоллаұлы Сыр халқына арнап шығармашылық кеш өткізді

Kyzylorda-news.kz. Қазақстан мен Мальдив Республикасының билігі визалық талаптардан өзара босату туралы келісімге қол қойды. Бұл туралы ҚР Сыртқы істер министрлігі хабарлады.
Бұл келісім екі ел азаматтарына Қазақстан мен Мальдив аралдарының аумағында 30 күнтізбелік күннен аспайтын мерзімге визасыз кіруге және онда болуға мүмкіндік береді.
Алайда жұмысқа орналасу, білім алу немесе іскерлік мақсатта ел аумағына кіруді көздейтін адамдар тиісті виза алуға міндетті болады.
Айиа кетейік, 2021 жылдың қазан айында Қазақстан мен Мальдив Республикасы екі елдің шекарасын кесіп өту кезінде азаматтарды коронавирус жұқтырмағаны туралы тест нәтижесі бар ПТР анықтама ұсыну міндеттемесінен босататын вакциналау паспорттарын өзара мойындады.

Қазақстан мен Мальдив Республикасы визасыз режим туралы келісімге қол қойды

Kyzylorda-news.kz. Балаға дөрекілік таанытқаны үшін павлодарлық балабақша тәрбиешісі жұмыстан шығарылды.
<blockquote>
 «Бүгінгі күні тәрбиеші жағымсыз себептермен қызметінен босатылды. Мұндай фактіге алдағы уақытта жол бермеу мақсатында педагогтардың бала өмірі мен денсаулығын сақтау нұсқаулығын ұстану мәселесі жөнінде кезектен тыс жиын өтті. Мекеме басшысына сөгіс түрінде тәртіптік жаза қолданылды және балабақша жұмысшыларының өз қызметтік міндеттерін орындау және ата-аналармен түсіндіру жұмыстарын жүргізу бойынша шараларды күшейту ұсынылды», – деп жазылған білім басқармасы ұсынған жауапта.
</blockquote>
Екі жастағы баланың анасы балабақшаға барған екі аптадан кейін жасқаншақ болып қалғанын байқаған. Бейнежазбаны көргеннен кейін баланың мұндай қылығына не себеп болғаны анықталды.
Тәрбиеші баланы жұлқып, оның аузын жапқан, еденге түскен сүлгімен оның бетін сүрткен. Балабақша қызметкері басқа балаларға да дөрекілік танытқан: бір баланы капюшонынан ұстап жетектеген, қолдарынан жұлқыған, балалардың ойыншық ойнауына кедергі жасаған.
<a href="https://sputnik.kz/20220509/bala-pavlodar-tarbieshi-zhaza-24722307.html">Sputnik.kz</a>

Балаға дөрекілік танытқан тәрбиеші жұмыстан шығарылды

<a href="https://kyzylorda-news.kz/">Kyzylorda-news.kz.</a> Адамның ұзақ өмір сүруі ең алдымен әдетіне, ғұмыр салтына байланысты. «Сақтансаң, сақтайды» деген. Адамның ғұмырын ұзартуға не себеп, оның жолдары мен амалдары қандай – осы бағытта зерттеу жүргізіп жүрген ғалымдар көп.
Ендеше солардың айтып жүрген ойларынан ұзақ өмір сүруге септігі тиетін қарапайым 4 амалды атап өтейік.
Жүру, қимылдау
Көбірек қимылдаған, әсіресе, жаяу жүруге, серуендеуге көңіл бөлген адам жақсы өмірге лайық. Зерттеу көрсеткендей, адам күніне кем дегенде 30 минут (жарты сағат) жаттығу жасап, қимылдауы тиіс. Сонда жүрек пен қан ауруларынан, инсульт, басқа да қауіпті аурулардың алдын алмақ. 30 минуттық жаттығу не дегенге келсек, бұған кез келген қозғалыс жатады. Жаяу жүру, серуендеу, спортпен айналысу, баспалдақпен шығу, тауға шығу, тағысын тағы.
Көбірек қимылдаған адамның сүйегі мықты, бұлшықеті жұмыскер болады. Адамның ғұмыры содан ұзарады.
Ұйқыны жөндеу
Ұйқы ағзаға өте қажет. Ми мен денені қалпына келтіреді. Түнде жақсы ұйықтаған адамның ағзасы дұрыс жұмыс істейді, психикалық жай-күйі жақсарады, иммунитеті күшейеді. Дұрыс ұйықтамаған адамның депрессияға түсуі, диабет, жүрек ауруларын, тіпті қатерлі ісікті «іліп алуы» мүмкін.
Адам күніне 6-9 сағат ұйықтауы керек.
Ішімдік ішпеңіз
Ішімдік ішудің зиян екенін бәріміз білеміз. Алкоголь жүрек жұмысына кері әсер етеді. Аптасына 14 ыстақан ішімдік ішкен адамның ауруға шалдығу қауіпі зораяды.
«Ішімдікті аздап ішсе, денсаулыққа пайдалы деген бос сөз» дейді мамандар.
Жақсы тамақтаныңыз
Мамандардың айтуынша, адам барынша түрлі тағамнан жеуге тырысуы керек. Адам ағзасына зиян түсіретін, өмір қуатын алатын тағамдардан бас тартуы абзал.
Ғалымдардың айтуынша, ағзаға түскен зиянды тағам адам иммунитетін әлсіретіп, ағзаның өзін-өзі қалпына келтіру қабілетіне кедергі келтіреді.Ал жасуша жаңармаған соң, ағза да тез қартаяды. Оның үстіне, зиянды тағам жейтіндердің көбі салауатты өмір салтын ұстанбайды. Спортпен, дене қимылымен айналыспағандардың да ағза теломері тез қысқаратын көрінеді.
<a href="https://massaget.kz/layfstayl/Zdorove/67916/">Massaget.kz</a>

Ұзақ өмір сүрудің қарапайым 4 амалы

Kyzylorda-news.kz. Қызылорда облысының әкімі Нұрлыбек Нәлібаев Қазақстанның еңбек сіңірген әртісі, әнші-композитор Жеңіс Сейдоллаұлымен кездесті.
Басқосуда аймақ басшысы әншінің Ұлы Жеңіс күнімен қатар келген 60 жас мерейтойымен құттықтады.
Өңір басшысы отандық эстрададағы қолтаңбасы бар Жеңіс Сейдоллаұлына шығармашылық табыс тілеп, оның туған жерге арналған туындыларын Сыр жұртшылығы жақсы ілтипатпен қабылдайтынын жеткізді. Мерейтой иесіне аймақ жұрты атынан Қызылорда облысының «Құрмет» грамотасын табыстады.
Өз кезегінде Жеңіс Сейдоллаұлы көрсетілген құрметке ризашылығын білдірді.
Айта кетейік, талантты композитор, әншінің Н.Бекежанов қазақ академиялық музыка драма театрында «Сен деп соққан жүрегім» атты кеші өтті.

Аймақ басшысы әнші-композитор Жеңіс Сейдоллаұлын 60 жылдық мерейтойымен құттықтады

Kyzylorda-news.kz. Қазақстанның басым бөлігі циклонның ықпалында болады. Осыған байланысты бүгін күн күркіреп, батыста, солтүстік-батыста, елдің оңтүстігінің таулы аймақтарында қатты жаңбыр жауады, деп хабарлайды Қазгидромет.
Республика бойынша кей жерлерде жел күшейеді, шаңды дауыл тұрып, батыста және оңтүстікте бұршақ жауады.
Түнде және таңертең Қызылорда облысының солтүстігінде, орталығында, шығысында күн күркірейді, дауыл, облыс орталығында шаңды дауыл, солтүстікте, орталықта, облыстың шығысында жел жылдамдығы 15-20 м/с дейін күшейеді.

10 мамырға арналған ауа райы болжамы

Kyzylorda-news.kz. Ұлы Жеңістің 77 жылдық мерекесінде облыс әкімі Нұрлыбек Нәлібаев аймақтағы барлық соғыс ардагеріне барып, Президент атынан құттықтап, құрмет көрсетті.
Аймақ басшысы зиялы қауым өкілдерімен бірге Шиелі ауданында тұратын Ұлы Отан соғысының ардагері Сәрсенбек Байжановтың үйіне барды.
<blockquote>
 «Біз қай кезде де ардагерлерімізді ардақтап, майдангерлерімізді құрмет биігіне шығарған елміз. Сіздер Отанымызға Жеңістің жалауын желбіретіп, бейбіт заманды келер ұрпаққа аманат еттіңіздер! Соғыс жылдары Сталинградтта шайқасқа қатысып, бейбіт өмір үшін аянбай күрестіңіз. Арамызда аман-есен жүріңіз», – деді Н.Нәлібаев.
</blockquote>
Өңір басшысы бұл құрмет бір күнмен шектеліп қалмайтынын, майдангер ерлігі әрдайым дәріптелетінін жеткізіп, иығына шапан жауып, арнайы сыйлықты табыстады.
Майдангер Сәрсенбек Байжанұлы елге тыныштық тілеп, ақ батасын арнады.
<img src="https://kyzylorda-news.kz/wp-content/uploads/2022/05/fb_img_1652100057963.jpg" alt="" />

Аймақ басшысы Президент атынан соғыс ардагері Сәрсенбек Байжановты құттықтады

Kyzylorda-news.kz. Ұлы Жеңістің 77 жылдық мерекесінде облыс әкімі Нұрлыбек Нәлібаев аймақтағы барлық соғыс ардагеріне барып, Президент атынан құттықтап, құрмет көрсетті.
Мерекеде өңір басшысы ардагер Любовь Колесникке ілтипат танытты. Кәмелет жасына толысымен соғысқа аттанып, ерліктің үлгісін көрсеткен ол Беларусь фронтының дала госпиталінде медбике қызметін атқарып, ержүрек батылдығымен көзге түскен.
Аймақ басшысы ардагерге зор денсаулық тілеп, бұл құрмет бір күнмен шектелмейтінін, ауыр күнде ерге бергісіз қызмет еткен майдангердің еңбегі әрдайым дәріптелетінін жеткізді.
<blockquote>
 «Уақыт алға жылжыған сайын бұл ерліктің шоқтығы биіктеп, қадір-қасиеті артып, тағылым-тәрбиесі мен мән-мағынасы мейілінше тереңдеп, даралана түсуде. Халқымыздың даңқты ұлдары мен қыздарының қан майдан мен тылдағы өшпес ерлігі мен ерен еңбегі ешқашан ұмытылмайды. Деніңізге саулық, ұзақ ғұмыр тілеймін», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/05/fb_img_1652099752288.jpg" alt="" />

Соғыс ардагері Любовь Колесникке құрмет көрсетілді

Kyzylorda-news.kz. Ұлы Жеңістің 77 жылдық мерекесінде облыс әкімі Нұрлыбек Нәлібаев аймақтағы барлық соғыс ардагеріне барып, Президент атынан құттықтап, құрмет көрсетті.
Мерекеде аймақ басшысы 98 жастағы соғыс ардагері Әбдірахман Бәйтіковке барып, майдангермен әңгімелесті.
<blockquote>
 «Ел басына күн туған сұрапыл соғыс жылдары адам төзгісіз қиыншылықтарды қайыспай көтеріп, елдің қорғаны болғандарыңыз үшін Сіздерге бас иеміз. Батыр әкелеріміз бен аналарымызға тиісті деңгейде құрмет көрсету – біздің перзенттік парызымыз! Себебі Сіздер Отанымызға Жеңістің жалауын желбіретіп, бейбіт заманды келер ұрпаққа аманат еттіңіздер», – деді Н.Нәлібаев.
</blockquote>
Облыс әкімі майдангерге құрмет бір күнмен шектелмейтінін еске салып, ардагердің иығына шапан жауып, сый-сияпат көрсетті. Өз кезегінде ақсақал әрдайым бірлікті ту ету керектігін, әр азамат елдің тұтастығы мен тыныштығына қызмет етуі қажет деді.
<img src="https://kyzylorda-news.kz/wp-content/uploads/2022/05/fb_img_1652099381182.jpg" alt="" />

Облыс әкімі Ұлы Отан соғысының ардагері Әбдірахман Бәйтіковке ілтипат көрсетті

Kyzylorda-news.kz. Ұлы Жеңіс күні мерекесінде облыс әкімі Нұрлыбек Нәлібаев өңірдегі барлық соғыс ардагеріне жеке-жеке барып, Президент атынан құттықтап шықты.
Мерейлі сәтте аймақ басшысы Қызылорда қаласында тұратын соғыс ардагері Төлеген Жүнісовтің үйінде болды.
<blockquote>
 «Сіз сұрапыл соғыста Украинаны азат етуде жанқиярлық ерлік көрсетіп, майдан аяқталғаннан кейін Берлинде қалып, қала маңында патрульдік қызметті абыроймен атқардыңыз. Соғыстағы ерліктеріңіз бен бейбіт жылдардағы еңбектеріңіз, сондай-ақ ел Тәуелсіздігін нығайтуға қосқан үлесіңіз шын мәнінде елге – мұра, ұрпаққа – өнеге. Келер жылы ғасырлық тойыңызды тойлау бұйырсын. Өзіңізге және отбасыңызға амандық тілеймін», – деді Н.Нәлібаев.
</blockquote>
Нұрлыбек Нәлібаев келер жылы ғасыр тойын жасайтын майдангерге күш-қуат тілеп, бұл құрмет бір күнмен шектеліп қалмайтынын жеткізді.
<img src="https://kyzylorda-news.kz/wp-content/uploads/2022/05/fb_img_1652099126754.jpg" alt="" />

Аймақ басшысы соғыс ардагері Төлеген Жүнісовті мерекемен құттықтады

Kyzylorda-news.kz. Ұлы Жеңістің 77 жылдық мерекесінде облыс әкімі Нұрлыбек Нәлібаев аймақтағы барлық соғыс ардагеріне барып, Президент атынан құттықтап, құрмет көрсетті. Солардың бірі – Сырдария ауданында тұратын 100 жастағы Ұлы Отан соғысының ардагері Яхия Тасыров.
Аймақ басшысы ғасыр жасаған ардагерге денсаулық тілеп, қазақы дәстүрмен иығына шапан жапты. Сондай-ақ, бұл құрмет бір күнмен шектеліп қалмайтынын, олардың ерлігі әрдайым дәріптелетінін жеткізді.
<blockquote>
 «Сіз соғыс жылдарында Сталинградты, Курскіні, Польшаны жаудан қорғап, Германияға дейін жеттіңіз. Отан қорғауда үлгі аларлық батылдық таныттыңыз. Отты жылдары кеудеңізді оққа тосқан қайсар мінезіңіз бен ерен еңбегіңізге бас иеміз! Біз мұны мәңгі есте сақтаймыз және мақтан тұтамыз», – деді облыс әкімі.
</blockquote>
Ғасыр куәгері Яхия Тасыров мерекемен құттықтап келген қонақтарға алғыс білдіріп, елге тыныштық тілеп, ақ батасын берді.
<blockquote>
 «Қиындықтың бәрі артта қалды. Енді соғыс болмасын. Сырттың сұқ көздерінен сақтап, елде тек ауызбіршілік орнасын. Ел қамын ойлар азаматтар аман болып, әр шаңырақта береке ұя салсын», – деді Яхия Тасыров.
</blockquote>
<img src="https://kyzylorda-news.kz/wp-content/uploads/2022/05/fb_img_1652098760286.jpg" alt="" />

Қазақстан және Қызылорда облысының жаңалықтары