Жаңақорғанда құрылыс бағамы қандай?

<a href="https://kyzylorda-news.kz/">Kyzylorda-news.kz.</a> Ауыл-аймақтағы тұрмыс-тіршілік енді бұдан да жақсарып, жұмыстар жүзеге асып, тұрғындардың талап-тілегі орындала түспек. Оған «Ауыл – ел бесігі» бағдарламасы себеп болмақ. Мемлекеттік бағдарлама аясында былтыр қалаға қарасты ауылдық округтерде біраз іс атқарылса, биыл да осы бағытта бірқатар шара қолға алынды. Осыған орай біз «Ауыл – ел бесігі» бағдарламасы аясында биыл атқарылатын жұмыс барысының біршамасына тоқталғанды жөн көрдік.&nbsp;Осы жылы қалада тұрғын үй құрылысын дамытуға, әлеуметтік және инженерлік инфрақұрылымды жақсартуға ұлттық қордан, республикалық және облыстық бюджеттерден барлығы 53 млрд теңге бөлініп, ірі жобалар жүзеге аспақ. Осы жобалардың ішінде ауылдық елді мекендерде атқарылатын игі істер қамтылған.&nbsp;Жақында қала әкімі Асылбек Шәменов қалаға қарасты ауылдық округтер мен қос кентті аралап, тұрғындармен кездесіп, талап-тілегін тыңдап қайтты. Сол кездесулерде шаһар басшысы «Ауыл – ел бесігі» бағдарламасы аясында қолға алынатын жұмыстарды саралады.&nbsp;<blockquote>«Биыл ауылдарға ерекше көңіл бөлінуде. Тұрғындардың талап-тілегіне сәйкес, қажетті шаралардың барлығы атқарылады деп жоспарлануда. Бұл жұмыстар мұнымен тоқтап қалмайды. Жедел әрі жүйелі істің нәтижесінде «Ауыл – ел бесігі» бағдарламасы арқылы республикалық бюджеттен қомақты қаржы бөлінді», – деді қала басшысы.&nbsp;</blockquote>Игілікті бағдарлама аясында Қызылөзек ауылдық округіндегі 2 көшеге асфальт және 4 көшеге малта тас төселеді. Бөлінген қаржы көлемі – 173,8 млн теңге. Бұдан бөлек, жергілікті бюджеттен қаралған 4,5 млн теңгеге түнгі жарық бағаналары орнатылады. «Қожақ» автомобиль көпірі де алдағы күндері жөнделеді. Оның жоба-сметалық құжаттарына 5,2 млн теңге қаражат бөлінді. Оған қоса балаларға арналған спорттық-ойын алаңы салынады. Оған да қаржы қарастырылды. Ал электр желілерін қайта жаңғырту үшін 6 млн теңгеге жоба-сметалық құжаттары әзірленуде.&nbsp;Қарауылтөбе елді мекенінде «Ауыл – ел бесігі» бағдарламасы аясында республикалық бюджеттен бөлінген 274,4 млн теңгеге 150 орындық ауылдық клуб үйінің құрылысы жүргізілуде. Округтегі жаңадан қоныстанушы аумақтағы жалпы ұзындығы 9 шақырымды құрайтын 12 көшеге қиыршық тас төсеу үшін мемлекеттік сатып алу конкурсы жарияланып, мердігер мекеме анықталуда. Ал кіре беріс жолдың бойындағы R-1 каналына жаяу жүргіншілерге арналған көпір құрылысы үшін жоба-сметалық құжаттамасы мен мемлекеттік сараптама қорытындысы дайындалуда. Округ бойынша 8 КТПН, электр бағаналарын орнату жүргізілсе, жаңа қоныстанушы аумаққа техникалық су тарту ұңғымасын бұрғылауға 14,7 млн теңге қаралды.Талсуатта да биыл қызу жұмыс жүреді. Яғни «Ауыл – ел бесігі» бағдарламасы шеңберінде республикалық бюджеттен бөлінген 65,2 млн теңгеге 8 көше жөнделеді. Жергілікті бюджеттен қаралған 2,1 млн теңгеге ауылдағы 7-ші көшеге жарық бағаналары орнатылады. Өткен жылы іргетасы қаланған 150 орындық ауылдық клуб мамыр айында ашылады деп күтілуде. Биыл қос ауылда атқарылатын ауқымды істің бірі – Абай және Досан елді мекендерін газдандыру жобасы. Бұл газдандыру жүйесін ауыл тұрғындары да көптен күтті.&nbsp;<blockquote>«Жақында қала әкімі ауылға келіп, халықпен жүздесті. Биылғы атқарылатын жұмыс барысын толық жеткізді. Соның ішінде ауылымызға «көгілдір отын» келетінін естіп риза болдық. Жалпы барлық ауылдың осылай көркейгені көңіл қуантады ғой», – деді Абай ауылының тұрғыны Әлібек Темірханов.&nbsp;</blockquote>Иә, мәселе оң шешімін тауып, республикалық бюджеттен 663 млн теңге қаржы қаралған. Сондай-ақ республикалық бюджеттен бөлінген 56,5 млн теңгеге «Ауыл – ел бесігі» бағдарламасы аясында Досан ауылындағы 5 көшеге орташа жол жөндеу жұмыстары мен 3,8 млн теңгеге №1 көшеге жарық бағаналары орнатылатын болады. Абай елді мекеніндегі «Сиыр фермасы» учаскесіндегі 1 көшеге қиыршық тас төселеді.&nbsp;Сонымен қатар «Ауыл – ел бесігі» жобасы аясында Қызылжарма, Ақсуат, Қарауылтөбе, Қосшыңырау, Талсуат, Қызылөзек ауылдық округтерінен барлығы 46 көшеге, Ұлттық қордан бөлінген қаржыға Қарауылтөбе ауылдық округіне қарасты кіре беріс жолдың бойында орналасқан жаңа қоныс аумағына, қала мен Жезқазған тас жолының бойындағы 150 гектар жерге, сонымен қатар қаланың Сарысу көшесі бойындағы Шорғазы тұйығына және кенттер мен ауылдық округтердің 26 көшесіне қиыршық тас төсеу жұмыстары жүргізіледі.&nbsp;Оған қоса қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі мамандарының айтуынша, қала мен оған қарасты кент және ауылдық округтердегі 106 көшеге облыстық бюджеттен орташа жол жөндеуге 1 752, 6 млн теңге қаралып, қала бойынша 76 көшеге, Бөлкөл кентінен 6 көшеге, Тасбөгет кентінен 14 көшеге және Сабалақ саяжайынан 10 көшеге асфальт төселінбек.&nbsp;Қалаға жақын орналасқан ауылдың бірі Ақсуат елді мекені сәуір айының алғашқы онкүндігінде «көгілдір отынға» қосылады деп жоспарлануда. Ақсуат ауылдық округінің әкімі Мәмбетәлі Ақмырзаевтың айтуынша, бұл ауылда да тірлік қарқынды.&nbsp;<blockquote>«Ауыл – ел бесігі» жобасы аясында 79,9 млн теңгеге 2,9 шақырым болатын 3 көше жөнделеді. 10,4 млн теңгеге 1,6 шақырым болатын 2 көшеге түнгі жарық бағаналары орнатылады. Мұнан өзге, 68,7 млн теңгеге 1,4 шақырым болатын Ә.Құдабаев көшесіне жаяу жүргіншілер жолын салуға және түнгі жарық бағаналарын орнатуға ұлттық қордан 89,8 млн теңге бөлінді. Ал 1 млрд теңгеге жаңадан қоныстанушы аумаққа электр желілерін жүргізу құрылысына облыстық бюджеттен 200 млн теңге қаралды. Қосымша 5 көшеге асфальт төсеуге 590,9 млн теңге берілді. Бұдан бөлек, тағы қосымша 3 көшеге асфальт төселеді деген жоспар бар», – деді ауыл әкімі. &nbsp;</blockquote>

Қызылорда қаласына қарасты ауылдар «Ауыл – ел бесігі» жобасының игілігін көреді

Сырдариялық отбасы спортпен тұрақты түрде шұғылданады

<a href="https://kyzylorda-news.kz/">Kyzylorda-news.kz.</a> Бұл білім ошағының ашылғанына көп уақыт бола қойған жоқ. Десе де білім саласында ұжымға артылған жауапкершілік жүгі зор. Қалаға қарасты «Сабалақ» саяжайындағы №285 мамандандырылған мектеп-лицей-интернаты білім беру бағытындағы өз жұмысын бастады.Сыйымдылығы 150 орындық білім ордасының оқушыларды қабылдап, оларға тереңдете білім беруді қолға алғанына да айға жуықтаған. Мектептің бүгінгі тыныс-тіршілігін ұжым басшысы Балзия Абдуллаева баяндады.<blockquote>«Мектебіміз Наурыз мерекесі қарсаңында облыс әкімі Нұрлыбек Нәлібаевтың қатысуымен салтанатты түрде ашылды. 150 оқушыға білім береміз. Дегенмен қазіргі таңда 100 оқушы білім алуда. Оның ішінде 7 және 8 сынып оқушыларынан 4 сынып жасақталған. Оқушыларды конкурстық негізде іріктеп алдық. Мектебіміз дарынды балаларға арналған физика-математика мектеп-интернаты болуы үшін республикалық «Дарынның» желісіне қосылуы керек. Оған қоса талап бойынша 1-2 жыл көлемінде жетістігіміз болуы қажет. Алайда біз енді ашылғандықтан, оқушыларды жаңадан қабылдағандықтан әзірге қалыптасу үстіндеміз. Сондықтан мамандандырылған мектеп-лицей-интернаты негізінде жұмыс істеудеміз», – дейді мектеп директоры Балзия Әбдікәрімқызы.</blockquote>«Адам адамнан тек білім арқылы озады» дейді хакім Абай. &nbsp;Расымен, әр адамның өмірде өз жолын қалыптастырып, тұлға атануына отбасындағы тәрбиеден бөлек, мектеп қабырғасында алған білімі маңызды. Бұған дейін де Е.Әуелбеков атындағы №4 дарынды балалаларға арналған &nbsp;облыстық мектеп-интернатында басшылық жасаған, &nbsp;білім саласында талай жыл тәжірибесі бар білікті ұстаз Балзия Абдуллаеваның аталған оқу ордасына басшылыққа келуі де тегін емес. Білікті маман қалыптастырып, білімді шәкірт тәрбиелеуде өз ісінің маманына зор сенім артылған. Бүгінде сол сенімнің үдесінен шығу жолында &nbsp;аянбай еңбек етуде.Білім ошағы мектеп-лицей-интернаты болғандықтан мұндағы оқушылар 5 күн мектеп жатақханасында жатады. Тек оқу аптасы аяқталған соң ғана үйіне қайтуға рұқсат етіледі. Ал бес күн бойы оқушыға қолайлы жағдай жасау ұжымның міндеті. Бұл ретте ер және қыз балаларға арналған жатын орны, жуыну бөлмесі, медициналық көмек көрсету, өзге де қажеттіліктерге арналған арнайы бөлмелер қарастырылған. Олардың оқудан тыс уақытта өзін қызықтырған спорт түрімен айналысуына мүмкіндік жасалыпты. Мәселен, үстел теннисі, тоғызқұмалақ, шахмат, дойбы сынды спорттық ойындарға арнайы бөлме жабдықталған. Одан бөлек теледидар көріп, кітап оқуына да мүмкіндік бар. Әр жұма сайын шығармашылықтарын шыңдауға бағытталған түрлі үйірмелер жұмыс істейді. Сонымен қатар балалар Денсаулық сақтау министрлігінің бұйрығымен бекітілген ас мәзірі бойынша &nbsp;бес мезгіл тамақтанады.<blockquote>«Біздегі сабақ барысы таңғы сағат 8.30-да басталады. Оған дейін оқушылар ұйқыдан тұрып, жаттығу жасап, таңғы ас ішеді. Түске дейін жалпы білім беретін мектеп бағдарламасымен сабақ өтсе, түстен кейін химия, физика, биология, математика, ағылшын пәндерін тереңдетіп оқытамыз. Оның арасында 1 сағаттық түскі үзіліс, &nbsp;45 минуттық далада серуендеу, тамақтану уақыты белгіленген. Әр сыныптың өз тәрбиешісі бар және екі сыныпқа бір куратор белгіленіп, ер балаларға ер азаматтар, қыздарға әйел тәрбиеші бекітілген. Оқушылардың бос уақытын тиімді өткізу, ата-анамен байланысы сынды тәрбие бағытындағы жұмыстар тәрбиешілерге жүктелген. Ал куратор оқушының сабаққа дайындығына, пән мұғалімімен байланысына зерттеу жүргізіп, оқушы мен мұғалім, ата-ана үштігі, өзге де мәселелер бойынша жауапты тұлға. Бала 24 сағат біздің бақылауда болады. Сондай-ақ мектептің тәртібіне сәйкес балалардың ұялы телефон ұстауына тыйым салынған», – дейді басшы.</blockquote>Әрбір ұжымның ауызбіршілігі, нәтижелі жұмыс істеуі білікті басшыға байланысты. Бұл ретте мектеп басшысы Балзия Әбдікәрімқызы басқару, ұрпақ тәрбиелеу ісінде өзіндік тәжірибесі толысқан маман. Қайсыбір істі қиыннан қиыстыра білетін ол – талапшыл. Оқушыларға білім беру ісі қазір күн сайын өзгеріп отыр. Осы орайда мамандандырылған мектеп-лицей-интернатының мұғалімдері де осыған &nbsp;сай болуы қажет. Бұл білім ордасында 80-нен астам маманға орын белгіленген екен. Десе де маман тапшылығы бар. Кейбір пәндер бойынша білікті ұстаздар өзге білім ошағынан шақыртылып қоса атқару негізінде жұмыс істеуде.«Шәкірт – ұстаз айнасы» десек, оның еңбегі оқушысының жетістігімен өлшенетіні белгілі. Елінің ертеңі болар азамат тәрбиелеу, олардың қоғамдағы орнын қалыптастыру – мұғалімнің еңбек жолындағы басты мүддесі. Сондықтан оларға қойылатын талап пен артылған жауапкершіліктің жүгі ауыр. &nbsp; &nbsp; &nbsp; &nbsp;<blockquote>«Ұстаз бен шәкірттің биіктен көрінуі мектеп мерейін өсіреді. Үйретуден жалықпаған ұстаздар еңбегі өлшеусіз. Өскелең ұрпаққа заман ағымына сай білім мен тәрбие беруде оларға қойылатын талап жоғары. Ғылыми-технологиялық, инновациялық негіздерді меңгерген маманның оқушыға берері мол болады. Қазіргі уақытта оқытудың жаңа әдісін қолдану оқушының білім деңгейінің өсуіне өз септігін тигізеді. Оқушыларға тереңдетілген білім беріледі. Жаратылыстану бағытындағы пәндерді ағылшын тілінде өтеміз. Бұл тұрғыда ұжымда білімді де білікті мұғалімдер қауымы жинақталған. Алайда олардың көбі дерлік біздің мектепте қосымша жұмыс істейтіндер. Алдағы уақытта маман тапшылығын жойып, оқушыларымыз қаламыздың мықты ұстаздарынан білім алуына жағдай жасауды жоспарлап отырмыз. Біздегі басты мақсат – алдымызға келген өреннен адамгершілікті, білімді, дарынды, салауатты азамат қалыптастыру», – дейді ұжым басшысы Балзия Абдуллаева.</blockquote>Бәсекеге қабілетті елдер көшіне ілесу үшін сауатты ұрпақ тәрбиелеу – бастысы осы. Жас өреннің ғылымды, заманауи технологияны игеруі, функционалдық сауаттылығын арттыруда ізденіс жасауы – кемел келешегінің іргесін бүгіннен қалауы. Бұған айрықша мән беретін мектеп ұжымы барлық сыныпты оқуға қажетті құрал-жабдықтарымен қамтамасыз еткен. Оқушының толыққанды білім алуына бар мүмкіндік жасалса да ескерілуі тиіс дүние бар. Ол – баланың тәртібі. «Тәрбиесіз берілген білім – адамзаттың қас жауы» деп ұлы ғұламалар бекер айтпаса керек. Білім ордасының басшысы мұны басты орынға қойған. Жалпы үлкенді сыйлау, ұстазды құрметтеу мұндағы оқушылар үйренетін тәлімнің бастауы.&nbsp;Бала тәрбиесіне мектеп басшысының бей-жай қарамайтындығын білім ошағына аяқ басқаннан-ақ байқауға болады. Мұнда оқушыға ой салар насихат сөздер жаңаша үлгіде көрініс тапқан. Білім алушыға білімнің, тәрбиенің, ауызбірліктің құндылығы өнегелі сөздермен өріліпті. Сыныпқа барар жолда жазылған сөздерге назар аудармау әсте мүмкін емес. Ал жатақханаға апарар жолда бір үйдің баласындай тату-тәтті тұруға үндейтін әсерлі сөздер жазылған. Бұл да болса тәрбие берудің тың әдісі секілді.&nbsp;Жылы да жайлы, жарық ғимарат білім аламын деген баланы өзіне тартып тұрғандай. Әзірге қалыптасу үстіндегі жаңа білім ошағы алда әлі талай озат оқушыларға жол ашып, дарынды балаларға арналған мектеп-лицей-интернаты деңгейіне жетері сөзсіз. &nbsp;&nbsp;Кезінде ағартушы ғалымдар оқу, білімі бар жұрттардың жоқтан бар жасайтын қабілетін кейінгі ұрпаққа өнеге еткен. Бүгінде олардың айтқаны дәлме-дәл келуде. Білім мен ғылымды қатар игеріп, заман үдерісінен шет қалмауда бұл білім ордасының алға қойған мақсаты зор.

Қызылордадағы №285 мектеп-лицей тереңдете білім беруді қолға алды

<a href="https://kyzylorda-news.kz/">Kyzylorda-news.kz.</a> Қызылордада «Мен кәсіпкер» жобасы аясында өткен алғашқы ресми кездесуде мамандар қыз-келіншектерге бизнесті жүргізуге дайындық, мемлекеттік қаржылай қолдау тетіктері, денсаулыққа инвестиция бағытында кеңес берді.Қызылорда облысы кәсіпкерлер палатасының алаңында өткен шарада Кәсіпкерлер палатасының директоры Пірмұхаммед Сыздықов пен облыстық Іскер әйелдер кеңесінің төрайымы, «Мен кәсіпкер» жобасының менторы Наталья Мишукова «Әйелдер кәсіпкерлігін дамыту орталығы» бағыты аясында болатын шаралармен таныстырды.Жоба аясында ментор кәсіппен айналысуға ниетті қыз-келіншектерді таңдаған бағыттары бойынша оқытып, өнімін әзірлеу барысында сүйемелдейді.Кездесуге келген қыз-келіншектерге бизнестегі белсенді, табысты әйелдер тәжірибелерін бөлісті.Атап айтқанда, «Био Мой доктор» клиникасының құрылтайшысы Ләззат Өмірзақова денсаулыққа инвестиция салудың маңызына тоқталса, психолог Жанат Исамберлинаның бизнес психологиясы жайлы кеңес берді. Ал «Халық банк» АҚ Қызылорда облыстық филиалы директорының орынбасары Ақмарал Сыздықова кәсіпкерлікті қаржылай қолдау тетіктері туралы айтты.<blockquote>«Біз енді ай сайын кәсіп ашуға ниетті қыз-келіншектердің басын қосып, осындай кездесулер өткізіп тұрамыз. Мұндай шаралар арқылы әйелдердің кәсіпкерлік саласындағы қажеттіліктерін анықтап, соған сай қызмет көрсеткіміз келеді. Сондай-ақ, кәсібі бар қыз-келіншектер санының артқанын қалаймыз», – деді облыстық Іскер әйелдер кеңесінің төрайымы Наталья Мишкуова.</blockquote>Қазір Кәсіпкерлер палатасында «Мен кәсіпкер» жобасы аясында жұмыс істейтін арнайы кеңесшілер бар. Жобаға қызығушылық танытқан азаматтар Қызылорда облысының кәсіпкерлер палатасына хабарласуына болады. Тел.: 8 /7242/ 40-09-81. &nbsp;<figure class="image"><img src="https://knadmin.beoblood.kz/uploads/oo_f15cc70570.jpg" alt="оо.jpg"></figure>

Қызылордалық қыз-келіншектерге жаңа жоба таныстырылды

<a href="https://kyzylorda-news.kz/">Kyzylorda-news.kz.</a> Аудан әкімі Берік Сарменбаев ауданда жүргізіліп жатқан құрылыс жұмыстарын аралап, ауыл тұрғындарының ұсыныстарын тыңдаған болатын. &nbsp;Осы күні &nbsp;Айдарлы, Жетікөл, Аманкелді және Қоғалыкөл елді мекендерінде электрмен жабдықтау жұмыстары жүргізілуде. Мердігер мекеме “УниверсалСтройСервис” ЖШС-і болып табылады. электр желілері мен бағаналарын толықтай ауыстыруда.<blockquote>&nbsp;Сырдария ауданында бірнеше жоба бойынша жұмыстар қарқынды жүзеге асырылып келеді. Жұмыс сапарымен бірнеше елді мекенді аралап электр желісі мен бағананы ауыстыру жұмысына қанықтым. Жекелеген ауылдар бұл жобадан зор үміт күтіп отыр. Әрине, күнкөрістің негізгі өзегі саналатын жарықтың өшпеуі – маңызды рөл ойнайды. Электр жүйесін толықтай жаңарту арқылы жыл көлемінде орын &nbsp;алатын ауа-райының қолайсыздығына төтеп бере аламыз. Мердігер мекеме мерзімді уақытта жұмысты бітіруге ықпал жасап жатқандығын алға тартты. Бізде өзіміз тарапынан халық игілігі үшін ұтымды ұсыныстарымызды жеткіздік, – деді аудан әкімі Берік Сәрменбаев.&nbsp;</blockquote>Сонымен қатар, “Қызылорда-Қоғалыкөл-Шіркейлі”, “Қызылорда-Айдарлы-Тартоғай” автомобиль жолдарының және елді мекендердегі көшелердің орташа жөндеу жұмыстары да назардан тыс қалмады.&nbsp;Аудан басшысы мердігер мекемелердің және жауапты сала басшыларына құрылыс жұмыстары барысында кемшіліктердің орын алмауын тапсырды. Ауданда жүргізілетін әрбір құрылыс, жөндеу жұмыстары, олардың сапасы, қауіпсіздігі аудан басшының бақылауында. &nbsp;

Сырдария ауданының әкімі құрылыс нысандарын аралады

<a href="https://kyzylorda-news.kz/">Kyzylorda-news.kz.</a> Бүгін Шиелі аудан әкімдігінің мәжіліс залында Шиелі ауданының әкімі Нұржан Ахатовтың төрағалағымен "Ауыл Аманаты" жобасы аясында өңірге бөлініп отырған "2,5 пайыздық 3 млрд теңге көлеміндегі несие қаражатын ұтымды пайдаланудың жолдары" тақырыбында жиын өтті.Жиынға аудан әкімінің орынбасары Ерсұлтан Апетов, аудандық мәслихат төрағасы Айтбай Жандарбеков, жауапты бөлім басшылары мен кент әкімі Аманкелді Өмірәлі, сондай-ақ ауылдық округ әкімдері "зум" желісі арқылы қатысты.Жиын барысында аудан әкімі 2,5 пайыздық несие қаражатын алудың жолдары мен шарттарын тұрғындарға толықтай түсіндіру керектігін айтып, ауылдық округ әкімдеріне бірқатар тапсырмалар жүктеді.Келесі кезекте, ауыл шаруашылығы және жер қатынастары бөлімінің басшысы Мұрат Әшірбеков сөз алып, жобаның шарттары мен қаржыландыру бағыттарын түсіндірді."Ауыл Аманаты" жобасының негізгі қаржыландыру бағыттары: 1) &nbsp;Өңдеу саласына қатысты жобалар; 2) Өсімдік шаруашылығын дамыту; 3) ауыл шаруашылығы коперативтерін жабдықтау; 4) мал шаруашылығын дамыту; 5) басқа бағыттағы бизнес жобалар;Несиенің негізгі шарттары: 1) шағын несие мерзімі 5 жылға дейін; мал шаруашылығындағы жобалар үшін 7 жылға дейін; 2) шағын несиенің ең жоғарғы сомасы - ауылдық елді мекендер мен шағын қалаларда 2,5 АЕК, яғни (8.6 млн теңге), зәкірлік кооперация – шағын және орта шаруа (фермерлік) қожалықтары және/немесе ауыл шаруашылығы кооперативтері үшін 8 мың АЕК (27.6 млн теңге) дейін; 3) сыйақы мөлшері жылына 2.5 пайыздан аспайды;Несие талаптары: 1) несие алушы жеке кәсіпкер ретінде тіркеуде болуы тиіс; 2) басқа несиелері бойынша мерзімі өткен жарналар болмауы керек; 3) Мемлекеттік кірістер органдарында берешек болмауы тиіс; 4) кепілмен қамтамасыз ету; 5) зейнет жасына жетпеген; 6) Ауыл шаруашылығын жүргізу үшін қажетті жағдайдың (жер телімі, қораның) болуы қажет;Жоба әкімшісі ретінде облыстық ауыл шаруашылығы және қатынастары басқармасы белгіленсе , сенімді өкіл ретінде "Байқоңыр" ӘКК" ҰҚ" белгіленіп отыр. Ал, жоба "Өңірлік инвестиция орталығы" МҚҰ арқылы жүзеге асырылатын болады.

«Ауыл аманаты» жобасы аясында 2,5 пайыздық несие беріледі

<a href="https://kyzylorda-news.kz/">Kyzylorda-news.kz.</a> Қазіргі қоғамдағы өзекті тақырыптың бірі – жастар мен жасөспірімдер арасындағы қылмыстың өсуі. Өткір де өзекті осы мәселенің алдын-алу үшін апта басында &nbsp;аудан басшысы Нұржан Ахатовтың қатысуымен жедел жиын өтті.Басқосуға аудандық мәслихат депутаттары, полиция бөлімінің қызметкерлері, білім бөлімінің мамандары, сондай-ақ кент және ауылдық округ әкімдері мен дербес бөлім басшылары қатысты.&nbsp;Жедел жиында аудан әкімі аймақ арасында кәмелеттік жасқа толмаған балалардың топтық төбелесі белең алып тұрғанын айтты. Сонымен қатар, мектеп жасындағы балалардың беймезгіл уақытта көшеде жүріп, қылмыстық әрекетке баратындығын тілге тиек етті. Жиын барысында аудан басшысы топтық төбелестің, қылмыстық іс-әрекеттердің қайталанбауы үшін барлық сала мамандары мен құрылымдар бірігіп жұмыс атқару керектігін айтты. Бұдан бөлек, арнайы рейдтік шаралар мен түсіндірме жұмыстарын күшейту керектігін ескертті. Мұнан соң аудандық мәслихат депутаттары да жастар мен жасөспірімдер арасындағы құқық бұзушылыққа байланысты өз ұсыныстарын жеткізді.&nbsp;Жиын қорытындысы бойынша жасөспірімдердің беймезгіл уақытта көшеде жүруі, түрлі қылмыстық әрекетке бармауының алдын алу мақсатында екі айлық рейд жүргізілетін болды.

Топтық төбелеске тоқтам керек

<a href="https://kyzylorda-news.kz/">Kyzylorda-news.kz.</a> Қызылорда облысында «Ауыл аманаты» пилоттық жобасы жүзеге асырылады. Бұл туралы бүгін баспасөз орталығында өткен брифингте қала әкімінің орынбасары Дінмұхамед Ермеков айтып өтті.«Ауыл аманаты» пилоттық жобасы ауыл тұрғындарының әл-ауқатын жақсартуға, олардың табысын арттыруға бағытталған. Сондай-ақ, жобаға қатысу ауыл шаруашылығы өнімдерін өндіру ісін жаңадан бастағандар үшін жақсы қолдау болмақ. &nbsp;&nbsp;<blockquote>«Бағдарламаны іске асыру үшін 2023 жылы Қызылорда облысына 3 млрд. теңге бөлінді. Ал, несиелерді беру маусым айынан бастау алады деп жоспарланған. Айта кету керек, бағдарлама аясында ауыл тұрғындары жеңілдетілген несие алып, техниканы лизингке ресімдей алады. Қарыз алу шарттары да өте тиімді, себебі ондағы пайыздық мөлшерлеме әлдеқайда төмен. Мәселен, несие/микронесие мерзімі – 5 жыл, ал мал шаруашылығы және ауыл шаруашылығы кооперативтерін құру саласындағы жобалар бойынша 7 жылға дейінгі мерзімге 2,5% жеңілдетілген мөлшерлемемен шағын несие алуға мүмкіндік береді», - деді қала әкімнің орынбасары.</blockquote>Пилоттық жоба аясында микрокредиттерді беру үшін сенім білдірген өкіл ретінде «Байқоңыр» ӘКК» ҰҚ» АҚ белгіленіп, «Өңірлік инвестиция орталығы» МҚҰ бөлімшесі арқылы іске асырылады деп жоспарлануда.«Ауыл АМАНАТЫ» пилоттық жобасын іске асыру үшін 2023 жылға Қызылорда облысына 3 млрд. теңге қаржы қаралды.&nbsp;«Ауыл аманаты» пилоттық жобасының басты мақсаты – ауылды жерлердегі халықтың табысын арттыру. Бағдарлама 2023-2025 жылдарға арналған және несиелер ағымдағы жылдың маусым айынан бастап берілуі жоспарланып отыр. Бағдарлама адамдардың тұрақты табыс жолына түсуіне бағытталған.&nbsp;«Ауыл аманаты» пилоттық жобасы бойынша ауыл тұрғындары өз бизнесін дамытуға немесе кооператив құрамында жеңілдетілген несие ала алады, сондай-ақ техниканы лизингке рәсімдеуге болады. Қарыз алу шарттары да өте тиімді, себебі ондағы пайыздық мөлшерлеме әлдеқайда төмен.&nbsp;- несие/микронесие мерзімі – 5 жыл, ал мал шаруашылығы және ауыл шаруашылығы кооперативтерін құру саласындағы жобалар бойынша 7 жылға дейін;&nbsp;- несиенің/микронесиенің ең жоғары сомасы қолданыстағы заңнама бойынша айқындалады;&nbsp;- номиналды сыйақы мөлшерлемесі – 2,5 пайыз, кепілмен қамтамасыз ету. Мұндай несиенің халыққа пайдалы болары анық. Сондықтан да ауылда қандай да бір өндіріс ашып, оны дамыту үшін бұл – үлкен мүмкіндік.&nbsp;Бағдарлама әкімшісі облыстық ауыл шаруашылығы және жер қатынастары басқармасы. Микрокредиттерді беру үшін сенім білдірген өкіл ретінде «Байқоңыр» ӘКК» ҰҚ» АҚ белгіленіп, &nbsp;бөлімшесі «Өңірлік инвестиция орталығы» МҚҰ арқылы іске асырылатын болады.Қаржыландыру бағыттары:1. Өңдеу саласына қатысты жобаларды қаржыландыру (жылыжайлар, сүт, ет өндірісі, құс және балық шаруашылығы)&nbsp; 2. Өсімдік шаруашылығын дамыту&nbsp; 3. Ауыл шаруашылығы кооперативтерін жабдықтау&nbsp; 4. Мал шаруашылығын дамыту&nbsp; 5. Басқа бағыттағы бизнес жобаларНегізгі талаптары:&nbsp;1. Несие алушының жеке кәсіпкер болып тіркелуі;&nbsp; 2. Басқа да несиелер бойынша мерзімі өткен жарнаның болмауы; 3. Мемлекеттік кірістер органдар алдында берешектің болмауы;&nbsp; 4. Несие алушының жасы зейнеткерлік жастан аспауы тиіс;&nbsp; 5. Несиені кепілмен қамтамасыз ету (кепіл мүлкі қалада орналасқан жағдайда 70%, ауылдық елді мекенде орналасқан жағдайда 50% беріледі);&nbsp; 6. Ауыл шаруашылығын жүргізу үшін қажетті жағдайлардың болуы (жер телімі, қора және т.б.);&nbsp; 7. Ауыл шаруашылық өндірістік кооперативіне мүшелікке кіру;&nbsp; 8. Қаржыландырылған жоба аясындағы өндірілген өнімді ауыл шаруашылық өндірістік кооперативке өткізу.Несие алу алгоритмі:Сенім білдірілген өкіл (агент) микрокредит алуға үміткер ұсынған құжаттардың мазмұны мен мәліметтерін тексеру мерзімі барлық қажетті құжаттармен бірге өтініш тіркелген күннен бастап 3 жұмыс күнін құрайды. Құжаттар мен олардағы мәліметтер микрокредит беру шарттарына сәйкес келмеген жағдайда сенім білдірілген өкіл (агент) қайтару себептерін көрсете отырып микрокредит алуға арналған құжаттар топтамасын қайтарады. Құжаттар микрокредиттер беру талаптарына сәйкес келген жағдайда 15 жұмыс күні ішінде ұсынылған бизнес-жобаға бағалау жүргізеді және микрокредитті мақұлдау не беруден бас тарту туралы шешім қабылдайды. Мақұлданған жағдайда үміткермен микрокредит беру туралы шартқа қол қояды, содан кейін микрокредитті оның ағымдағы шотына аударады.

Қызылордада «Ауыл аманаты» пилоттық жобасы жүзеге асады

​<a href="https://kyzylorda-news.kz/">Kyzylorda-news.kz.</a> Орталықтандырылған кітапханалар жүйесінің ұйымдастыруымен Т. Жүргенов атындағы шығармашылық үйінде ұлттық тарихымызда есімі алтын әріппен жазылып қалған, бар жоғы 40 жыл ғана өмірінде мемлекеттік дәрежедегі сан-салалы қызметімен бірге мәдениет, өнер саласының талантты ұйымдастырушысы, зерттеушісі бола білген, ұлттық құндылықтарымыз бен мәдени асыл мұраларымыздың сақталуына тынбай еңбек еткен бірегей тұлға, мемлекет және қоғам қайраткері Темірбек Жүргеновтің 125 жылдық мерейтойына орай «Ұлт рухын ту еткен тау тұлға» атты &nbsp;тарихи-танымдық іс-шара өтті.&nbsp;Шараның негізгі мақсаты - халқы үшін туған қайратты ердің өнегелі өмір жолымен, қызметімен таныстыру, жастарға патриоттық рух беру, адамгершілікке тәрбиелеу, жас оқырмандардың шығармашылық қабілеттерін дамыту, рухани және мәдени құндылықтарға деген қызығушылықтарын арттыру болып табылады. &nbsp;Іс-шараға «Сыр медиа» ЖШС қызметкерлері, С. Лапин атындағы №261 мектептің ұстаздары, оқушылары, кітапхана оқырмандары қатысты.&nbsp;Шара барысында &nbsp;«Сыр медиа» ЖШС бас директорының орынбасары Айжан Жұмабекқызы Т. Жүргенов атындағы шығармашылық үйінің тыныс-тіршілігімен таныстырды. Ал қалалық «Ақмешіт апталығы» газетінің бас редакторы Батырбеков Әзиз Жұмаділдаұлы ойы ұшқыр, қаламы қарымды публицист, ұлттың кемел келешегі үшін аянбай қызмет еткен қайраткер тұлғаның ерен еңбегі мен өнегелі өмір жолы жайлы ой өрбітті.&nbsp;Сонымен қатар жас оқырмандар Н. Қанибек, Қ. Барысбай, Ә. Ізбасар, Н. Зейнулла қазақ өнері мен әдебиетінің &nbsp;кең қанат жаюына қыруар тер төккен Алаш ардақтысы Т. Жүргеновтің монологін, Ә. Рахымбекұлының, А. Рахметовтің, Ж. Әбдірейімұлының арнау өлеңдерін оқыды және С. Жаппасбай мен Н. Зейнулла халық әні «Ақ толғайды» нақышына келтіре орындап, кеш ажарын ашты.&nbsp;Темірбек Жүргеновтің қайраткерлік және қаламгерлік тұлғасы жайлы кең көлемді &nbsp;«Қазақ руханиятының жарық жұлдызы» атты кітап көрмесі жасақталып, библиографиялық шолу жасалды. &nbsp;<img src="https://knadmin.beoblood.kz/uploads/Whats_App_Image_2023_04_17_at_12_45_18_59d137d369.jpeg" alt="WhatsApp Image 2023-04-17 at 12.45.18.jpeg"><img src="https://knadmin.beoblood.kz/uploads/Whats_App_Image_2023_04_17_at_12_45_23_1cb933a1be.jpeg" alt="WhatsApp Image 2023-04-17 at 12.45.23.jpeg"><img src="https://knadmin.beoblood.kz/uploads/Whats_App_Image_2023_04_17_at_12_43_41_1_d1d9146835.jpeg" alt="WhatsApp Image 2023-04-17 at 12.43.41 (1).jpeg"><img src="https://knadmin.beoblood.kz/uploads/Whats_App_Image_2023_04_17_at_12_45_30_faec13e1b1.jpeg" alt="WhatsApp Image 2023-04-17 at 12.45.30.jpeg">

Темірбек Жүргеновтің 125 жылдығы: «Сыр медиа» ЖШС-де тарихи-танымдық шара өтті

<a href="https://kyzylorda-news.kz/">Kyzylorda-news.kz.</a> Жасыратыны жоқ, соңғы уақытта тұрғындарды тасымалдайтын көліктің қызмет көрсету сапасы сын көтермейді. Тіпті, бұл мәселе күн санап тереңдеп бара жатыр. Тұрғындардың да тарапынан айтылып жатқан шағымдар аз емес. Көпшілігі қоғамдық көліктің белгіленген уақытта жүрмейтіндігіне көңілі толмаса, ал, енді бірі, кешіккен көліктің кесірінен аялдамада сағаттап уақыт жоғалтатынына қапалы.Расымен, аудандағы қоғамдық көлік қызметінің жай-күйі анау айтқандай мәз болмай тұр. Көзі қарақты оқырман бұл мәселе турасында редакцияның бірнеше мәрте жазғанынан хабардар, дегенмен, бұл мәселеде ілгерілеушілік байқалмайды. Олай деуімізге жауапты мекемелердің халықты тасымалдайтын кентішілік жеті бағыттағы маршруттардың қызметін жүйелі ұйымдастыруда салғырттық танытып отырғандығы себеп болуда. Егер, олай болмаса, тұрғындар осылай бас көтеріп, редакциямызға келмес еді.&nbsp;«Ашынғаннан шығады, ащы дауысым» деп редакцияға бас сұққан халықтың талап-тілегін жеткізбек ниетпен Қазалы аудандық тұрғын-үй коммуналдық шаруашалылығы, жолаушылар көлігі және автомобиль жолдары бөлімінің бас маманы Нұрман Ердалиевке хабарластық.<blockquote>«Қазіргі таңда кент ішінде қоғамдық көліктердің 7 бағыты белгіленген. Осыған орай Әйтеке би кенті ішіндегі жолдарда 44 газель жүріп тұрады. Карантин уақытына дейін бұл көрсеткіш әлдеқайда көп болса, қазір біршама төмендеді. Оған пандемия кезінде көлік иелерінің біршама табыс көзін жоғалтқандығы себеп болып отыр. Соның салдарынан жекелеген көлік иелері, қоғамдық көлік қызметін жүйелі ұйымдастырып отырған серіктестіктермен келісімшартын бұзып, көліктерін сатып жіберген. Әйтеке би кенті ішінде бір бағытта жүретін төрт-бес көліктің саны екі-үшке қысқарып, уақыт жиілігінің алшақтауына әсер етіп отыр. Бұл мәселені оңтайландыру мақсатында қоғамдық көлік қызметін субсидиялауды ұсындық. Бірақ, бұл мәселеге көлік жүргізушілері қарсылық танытып отыр. Неге десеңіз, жеке көлік иелері мұны субсидия арқылы шешу оңтайлы деп есептемейді. Егер, олар бұған келіссе, «көлеңкелі» ақша айналымынан қағыламыз деп санайды. Осындай теріс түсінік көлік қозғалысының бұзылуына әсер етіп отыр. Қоғамдық көліктер шеңберінде шешімін таппай тұрған мәселелер толығымен бір арнаға түсуі үшін жұмыстар жүріп жатыр. Қызметтің сапасын жақсартып, бір жүйеге келтіру бағытындағы жұмыстар алдағы уақытта да жалғасын табады», – дейді Нұрман Серікұлы.</blockquote>Сала маманының сөзіне сенсек, өңірде аталған мәселе бойынша біршама тірлік басталған. Әйтсе де, тұрғындардың бұл үдерістің жүру барысына аса көңілі толмайды. Соның бірі – Айдана есімді кент тұрғыны. Оның айтуынша, атқарушы орган өкілдері нақты іс-әрекетке емес, құрғақ уәдеге басымдық беретін көрінеді.<blockquote>«Жуырда жұмыстан шығып, 7 маршрутты 40 минутқа жуық уақыт күтіп, жоспарланған кездесуге кеш бардым. Такси ұстап кете беруге болар еді. Артық ақша алып шықпаған соң, амалсыз маршрут күтуге мәжбүр болдым. Күткен көлігім кешеуілдеп келгенде, кондуктордан кідіруінің себебін сұрағанымда: «Қазір 2-ақ маршрут жүріп жатыр. Сондықтан уақыт жиілігі алшақ болып тұр. Өздеріңіз де байқап жүрген шығарсыздар, белгіленген аялдамаларда кейде ұзақ тұрып қалатынымыз да бар. Себебі біздің нанымызға қазір таксистер ортақтасып жүр. Сондықтан адам жинауға тура келеді. Бәріміз сол 5-10 тиын үшін жан бағып жүрміз. Жолаушылар бізді де түсінуі керек», – деп мұңын шағып қоя берді.</blockquote><blockquote>«Иә, түсінуіндей-ақ түсінерміз. Себебі, бұл олардың да кінәсі деп толық айта алмаймыз. Өйткені, о бастан қоғамдық көлік қызметін ұйымдастыруда жүйелілік жоқ. Атқарушы органдардың да, нақты қадам жасап жатқаны шамалы. Тек, уәде беруден шаршамайды. Тұрғындардың талабы ескерілуі керек қой. Жолақысының көтерілгеніне де наразы болып жатқанымыз жоқ. Тым құрығанда, әр бағытта жүретін көліктің уақыт жиілігін дұрыстап, көлік санын ұлғайтуды қолға алуды жоғарыдағылар ескеруі керек. Егер, бұл мәселе айтылған күйі үнемі осылай шетте қала беретін болса, халықтың қиналғаны қиналған», – дейді кент тұрғыны Айсана Нұрлыбекқызы.</blockquote>Расымен, үйден жұмысқа, жұмыстан үйге асыққанда, Шәмшінің әніндегідей, «Кешікпей келем деп ең, мен тұрмын елеңдеумен» деп жолға қарайлап-ақ тағатыңды тауысып боласың. Бірақ, бұл қашанға дейін созылмақ?! Жолаушылар барар жерінен қалмаудың қамын жасар, бірақ, солай екен деп, жергілікті билік өкілдерінің қолды қимылдатпай, құр қарап отыруы қаншалықты орынды?! Бұл сауалға көлік қатынасын реттейтін мекеме қымсынбаса, қысылтаяңға тап болған жүргіншілер байырғы қалпынан әзір алыстамайтыны анық.

Қазалының қоғамдық көліктері көңілден шыға ма?

<a href="https://kyzylorda-news.kz/">Kyzylorda-news.kz.</a> Әрбір адамның ойының түкпірінде «шетел көрсем, басқа өркениетпен таныссам» деген арман бой тасалап жатқаны анық. Бұл үшін беделді шенеунік немесе табысты кәсіпкер болу міндетті емес. Мәселен, аудандық «Қазалы» газетінде 7 жылдан бері күзетші болып жұмыс істеп жүрген Нұрбол Дауылбай былтырдан бері әлем елдерін аралауды, сол арқылы ой «шекарасын» бұзуға шындап кіріскен. Бақыт құсын қолына қондырып, той шығындарынан құтылғаннан кейін Қазалы қаласының тұрғыны қасиетті Меккеде кіші қажылығын өтеп, Дубай, Түркия мемлекеттерін көзбен көріп қайтты. Жақында осы қызықты тақырып төңірегінде жерлесімізбен әңгіме өрбітуді құп көрдік.– Нұрбол, шетел аралау ойыңызға қайдан келді, не түрткі болды?– Бала кезден теледидардан басқа мемлекеттердің дамыған мегаполистері мен тұмса табиғатын көп көретінбіз. Теледидарда саяхат жайында арнайы бағдарлама да болды. Содан мектеп бітіріп, оң-солымызды танығаннан кейін оқу, одан кейін күйбең тірлікке сүңгіп кеттік. Алайда, бала кездегі көкжәшіктен көрген дүниені шынайы тамашалау туралы арман алдамады. Бұған келіншегім де түрткі болды. Отау құрып, тойды аман-есен атқарғаннан кейін бірнеше жыл уақытымыз несиемізді жабуға кетті. Ағайынды шақырып, қуанышпен бөліскеніме өкінбеймін, әрине, десе де, сол шығынға тағы бірнеше елге табан тіреп қайтуға болар еді.Жарым – Мөлдір екеуміз интернеттен саяхатшы блогерлердің өміріне қарап қызығып, армандап отырамыз. Құр арман бізді шетел асырмайтынын білдік. Сөйтіп, қалтаға шақ туристік компаниялардың қызметтері туралы іздендік. Әсіресе, карантиннің кезінде ұтымды турлардың жарнамасы қаптап кетті ғой. Соның бірін тәуекел етіп, сатып алдық. Үш айдан кейін Меккеге барып, арманымыз орындалды. Аллаға алғысымызды жаудырып, дұға-тілегімізді айтып қайттық.– Жұрт саяхаттау арқылы өмірге деген көзқарасын өзгертіп жатады. Сіз қандай әсер алдыңыз?– Қазақстанның да табиғаты тамаша. Бірақ қаладағы цивилизация жағынан бізден бірнеше адым алда келе жатқан елдер көп. Сол артықшылықтың ортасына барып тұрып, бұрын көрмеген игілікті қолмен ұстап, көзбен көру адамға ерекше әсер береді. Жетілген, дамыған дүниені көрген жан сол төңіректе жоспар құра алады. Ал саяхат жасау – мақсатыңның мықтылығына тікелей байланысты. Әйтпесе, артық ақша тапсақ үйімізді жаңартып, көлік алуға жұмсап жіберетініміз жасырын емес. Тіпті, қарызға кіріп, бірнеше несие алып, төргі бөлмеге миллион теңге тұратын гарнитур, құны соған жуықтайтын диванға аянбайтын азаматтарымыз көп. Мұның дұрыс емес екеніне біздің көзіміз жетті. Әрине, әркімнің өз таңдауы, ұстанымы бар, оған қарсы келе алмаймыз.Әлгінде айттым, келешекте атқаратын және қолға алатын істі жүзеге асыру үшін алдағы күндерге мақсат қоюды саяхаттаған кезімде қалай жоспар жасауды үйрендім. Бір елге бару үшін жыл бойы дайындық жасау керек. Қаржы жинау, қажетті заттарды жоспарлау, ұшу-қону – бәрі назардан тыс қалмауы тиіс. Мақсатқа ұмтылуды дұрыс жоспарлау күнделікті осындағы өміріме, белгілі бір жетістікке жетуіме тікелей әсер етіп жүр десем арттық айтқандық емес. Әлі де өзге елдің өркениетінен аларым көп деп ойлаймын. Ол жайында амандық болса, алдағы уақытта тағы әңгімелесе берерміз.– Кіші қажылыққа баруға қанша қаражат жұмсадыңыз? Қомақты қаржыны қалай жинағаныңыз да көпшілікті қызықтыратыны анық.– Өзім бес уақыт намазда болғаннан кейін қасиетті мекенге баруды біраздан бері ойлап жүрген едім. Алланың қалауымен мұның да сәті түсті. Меккеге бару үшін турдың өзін 620 мың теңгеге сатып алдым. Бұдан бөлек жеке жол шығындары бар, ауылдағы ағайын-туысқа үлестіретін базарлығымыз бар, бас-аяғы миллион теңгеге жуық қаржы жұмсадым.Жұмыстан бос уақытта таксиге шығамын. Келіншегім екеуміз интернет арқылы кәсіп жасайтынымыз бар. Бұдан бөлек кезекті еңбек демалысынан түсетін қаржы бар, бәрінің басын біріктіріп 1 жылдан аса уақыт дайындалдым. Алла алдындағы үлкен сапар болғаннан кейін, тек материалдық тұрғыда емес, моральдық дайындығымды да пысықтауым керек болды. Барынша рухани тазаруға тырысып, қасиетті Меккеге бару туралы арманым орындалды.– Шетелге барғанда туған жерден қандай артықшылық байқадыңыз? Несімен есте қалды?– Әлгінде айтып өткенімдей замана игілігі көп көзге түседі. Мәселен, Дубайды алсақ, туризмді мықтап жолға қойған. Аспанмен таласқан ғимараттар, саяхатшының алаңсыз тынығуына, серуендеуіне лайықты жағдай жасалған. Мұнда жыл 12 ай жаз болып тұратынын ескерсек, қай мезгілде де шетелден келуші адам қарасы азаймайды. Жүздеген жыл бұрын сахара құмның ортасында күнін күріп отырған елдің әп сәтте бағын жаққан құдайдың шеберлігіне таңғаласың. Күндердің бір күнінде біздің де мемлекетіміз бен халқымыз табан астында жатқан қара алтынның қызығын көрсе, қиындықсыз өмір сүрсе, деген ойға шомып кеткенімді де жасырмаймын.Жалпы, сырт елде жүргенде көшеде көрген әрбір дүниені еріксіз өз еліңдікімен салыстырасың. Мысалы, жұрт тамсана айтатын сафариді Қазақстанда да жасап қоюға болады емес пе?! Құмды жер жеткілікті. Дубайдағыдай сәнді әшекеймен әсемделген түйелерді жинақтап, құмды жазықтың ортасында шай ішу – алып бара жатқан қаржыны талап етпейді. Соның өзін арабтар бизнес қылып отыр. Құмның ортасында отырып, жағажай жасап алған жұртқа қарап, қызыға да, қызғана да қарағанымыз рас.– Алдағы жоспарларыңызбен бөліссеңіз. Енді қай мемлекет сіздерді қызықтырып отыр?– Ендігі сапарымыз – Парсы шығанағында жалғасады. Желтоқсан айына брон жасап қойдық. Бұл саяхаттың ұтымды жері – 3 мемлекеттің 6 қаласымен танысуға мүмкіндік береді. Алып кемемен шекаралас жатқан Оман, Катар, Әбу-Даби сияқты елдерге саяхаттауды да өткен жылы жоспарлаған едік.Шетел аралап жүріп, тіл үйренудің маңызын жете ұғындық. Қалтасы көтеретін азаматтар өздерімен бірге мобилограф, аудармашы алып жүретінін білесіздер. Ал, барған елдің тілін жетік білу, керек затыңды сұрай алу шығындарыңызды біршама азайтуға көмектеседі. Дубайда көп нысандарда орысша қызмет көрсетеді. Дегенмен, барлығы дерлік ағылшынша біледі. Сондықтан, өзге елдің өркениетімен толыққанды танысу үшін ағылшын тілін білу керек.– Өзге мемлекетке қыдырып барғысы келетін Қазалы ауданының тұрғындарына қандай кеңес бересіз?– Әрине, ең бірінші, жол шығындарын дұрыс, шынайы есептеу керек. Ғаламторда бар ақпарапен танысып, белгілі бір қызметтің нақты бағасын білмей, ойша жоспар құру шетелдегі көңіл-күйіңізді құртуы мүмкін. Сол себепті, мәселен, Қазалыда тұратын болсаңыз, ұшақ ұшатын қалаға дейінгі пойыз билетінің бағасына дейін жоспарға қосуыңыз қажет. Бұл артық шығын жасамауға, ойдағыдай демалуыңызға көп септігін тигізеді.Бұдан кейін шетелдегі ауа-райын зерттеп, барынша минималды киім-кешек алу керек. Өйткені, бірнеше чемоданды арқалап жүру бейтаныс әлемнен әсер алуға айрықша кедергі келтіреді. Сонымен бірге жеке құжаттардың көшірмесін жасап, түпнұсқасын сенімді жерге, орналасқан отельге тастап кету келеңсіздіктердің алдын алады. Ең бастысы, өзгеріске дайын екеніңді сезіну, тәуекел етуден тартынбау керек. Бір мәрте шетел көрген адам басқа да мәдениетпен, өзге ұлттың игілігімен танысуға құмартып алатын әдеті бар. Сондықтан алғашқы сапар саяхатшылықты жаныңызға серік етуге негізгі себеп болады.– Көңіл көгжиегімізді кеңейткен әңгімеңізге рахмет!

Қазақстан және Қызылорда облысының жаңалықтары