<a href="https://kyzylorda-news.kz/">Kyzylorda-news.kz.</a> Аймақ басшысының тапсырмасына сәйкес, кеше Қармақшы ауданына қарасты Төретам кентінде жәрмеңке өтті.Азық-түлік бағасын тұрақтандыру мақсатында кент әкімі мен ақсақалдар кеңесі аймақтағы кәсіпкерлерді тарта отырып, нарық бағасынан төмен бағада көкөністер мен азық-түлік өнімдерін халыққа ұсынды.

Төретамда жәрмеңке өтті

<a href="https://kyzylorda-news.kz/">Kyzylorda-news.kz.</a> ҚР Энергетика министрлігі автожанармай құю станциялары үшін мұнай өнімдерін көтерме саудада өткізуге шекті баға белгіледі. Бұл туралы бұйрық жобасы Ашық НҚА <a href="https://legalacts.egov.kz/npa/view?id=14460169">сайтында</a> жарияланды.Құжат жобасына сәйкес, автожанармай құю станциялары үшін мұнай өнімдерін көтерме саудада өткізуге шекті бағалар былай белгіленген:1) Аи маркалы бензин-80 – тоннасына 93 161 теңге;2) Аи-92 және Аи маркалы бензин-93 – тоннасына 193 649 теңге;3) дизель отыны (жазғы, маусымаралық) – тоннасына 236 156 теңге.

Министрлік жанармай өнімдерінің шекті бағасын белгіледі

<a href="https://kyzylorda-news.kz/">Kyzylorda-news.kz.</a> 26 наурыз күні Қазақстан аумағының басым бөлігінде қолайсыз метеорологиялық жағдай сақталады, деп хабарлайды <a href="https://www.inform.kz/kz/13-kalada-aua-sapasy-nasharlaydy_a4049651">ҚазАқпарат</a>.Тек Қарағанды, Жезқазған, Теміртау, Балқаш, Өскемен, Семей, Риддер, Атырау, Ақтөбе, Ақтау, Шымкент, Астана және Алматы қалаларында қолайсыз метеорологиялық жағдайлар күтіледі.Қолайсыз метеорологиялық жағдай - атмосфералық ауаның беткі қабатында зиянды заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.ҚМЖ жағдайында елді мекендердегі атмосфералық ауаның сапасы нашарлауы ықтимал.

13 қалада ауа сапасы нашарлайды

<a href="https://kyzylorda-news.kz/">Kyzylorda-news.kz.</a> Қазгидромет 26 наурыз күнгі ауа райы болжамын жариялады.Жексенбі күні Қазақстанның барлық аумағында антициклонның әсерінен ашық ауа райы сақталады.Тек республиканың солтүстік-батысында, солтүстігінде атмосфералық фронтальды бөліктердің өтуіне байланысты құбылмалы ауа райы күтіледі, аздаған жауын-шашын (жаңбыр, қар) жауады. Республика бойынша тұман түседі, еліміздің солтүстігінде, оңтүстік-шығысында желдің күшеюі болжанады.&nbsp;

Жексенбі күнгі ауа райы қандай болады?

<a href="https://kyzylorda-news.kz/">Kyzylorda-news.kz.</a> &nbsp;Үндістанның Нью-Дели қаласында бокстан әйелдер арасында өтіп жатқан әлем чемпионатында қазақстандық Карина Ибрагимова күміс жүлдегері атанды, деп хабарлайды ҚазАқпарат.Қазақстандық боксшы 57 келіге дейінгі салмақта финалда италиялық Ирма Тестамен шеберлік байқасты.Азия чемпионы, екі мәрте әлем біріншілігінің қола жүлдегері К. Ибрагимованың қарсыласы да мықты еді. Ирма Теста – 2020 жылғы Токио олимпиадасының қола, өткен жылғы әлем біріншілігінің күміс жүлдегері, 2019 жылғы Еуропа чемпионы. Екеуінің де жасы 26-да.Бірінші раундта бес төреші түгелдей И. Теста басым деп тапты. Ақыры қазылар жеңісті италиялық боксшыға берді – 5:0.Осылайша, Карина Ибрагимова өз спорттық жолында алғаш рет әлем біріншілігінің күміс медалін жеңіп алды.Тағы бір қазақстандық Ләззат Күнгейбаева аса ауыр салмақта ертең финалдық кездесуін марокколық Марди Хадиджамен өткізеді.

Карина Ибрагимова бокстан әлем чемпионатының күміс жүлдегері атанды

<a href="https://kyzylorda-news.kz/">Kyzylorda-news.kz.</a> Қызылорда облысында балық аулау кезінде ағаш қайығы көлде аударылған 61 жастағы тұрғын қаза болды, деп хабарлайды ҚазАқпарат.Оқиға 24 наурызда Қармақшы ауданында болды. Көлге балық аулауға барған 1962 жылы туған азаматтың қайығы аударылып, суға батып кеткен.<blockquote>«Бұл жөнінде Қызылорда облысы Төтенше жағдайлар департаменті Дағдарыс жағдайында басқару басқармасына хабарлама түсті. Онда Қуаңдария ауылындағы Жетікөл көлінде балық аулау кезінде ағаш қайығы аударылып, оқиға салдарынан 1962 жылы туған азаматтың суға батып кеткені айтылған. Марқұмның денесін жергілікті тұрғындар өз күшімен судан шығарып алған. Оқиға орнында Төтенше жағдайлар департаменті, аудандық полиция бөлімінің мамандары тиісті жұмыстар жасады» деді облыстық Төтенше жағдайлар департаменті баспасөз қызметінің жетекшісі Айгүл Нұрманова.</blockquote>

Қызылордалық балықшы көлде қайығы аударылып, мерт болды

<a href="https://kyzylorda-news.kz/">Kyzylorda-news.kz.</a>&nbsp; «Отандық өнім» деген ұғым пайда болғалы ел нарығында түрлі тауарлар сауда сөрелеріне шығарылып, өз тұтынушыларының лайықты алғысын алып келеді. Тіпті өзге елдерге экспортталып жатқан дайын өнімдер қаншама.&nbsp;&nbsp;Сауда нарығындағы қарқынды көшке соңғы жылдары Арал өнімдері де ілесіп келеді. Айталық, ас тұзы, балығы және сүт өнімдері. Бұл қатар уақыт өткен сайын толығып та келеді. Ал сол өнімдерді өзгелер мақтағанда төбеміз көкке жетердей қуанатынымыз тағы бар. Әдетте осы кезге дейін еліміздің әр аймағында көрме сөрелерінен орын тауып жатқан өнімдерді көргенде іштей қызығушылық болатыны рас. Бұл жолы Аралдың өнімдерін өзге аймақтағы көрмеден көргенде ерекше қуандық. Яғни, Шымкент қаласындағы «Көрме» көрме орталығында осы жылдың 20-21 наурызында Шымкент қаласы әкімдігінің ұйымдастыруымен республикалық тауар өндірушілерінің көрме-жәрмеңкесі өткізілді. Міне, сол көрмеде аралдық тауар өндірушілердің өнімдері көпшілік назарына ұсынылды.&nbsp;Көрмеде химиялық, машина жасау, тамақ, жеңіл, жиһаз өнеркәсібі, құрылыс материалдары мен агроөнеркәсіп кешенінің 100-ден астам кәсіпорны өз өнімдерін ұсынды.Олардың арасында Арал ауданы тарапынан «Аралтұз» АҚ-ның тұз өнімдері, «Aral Quartz» ЖШС-ның кварц құмы шикізаты, жеке кәсіпкер «Нысанбаев Жансеріктің» шыны талшықты пластик қайық өнімдері және жеке кәсіпкер «Жолмахан Нұрсұлудың» шұбат өнімдері бар.Көрменің басты мақсаты – отандық тауар өндірушілердің жоғары сапалы және бәсекеге қабілетті өнімдерімен кеңінен танысу, жаңа серіктестер іздеу және өзара тиімді келісімдер жасасу. Көрме отандық өндірушілерді насихаттауға бағытталған және кәсіпорындарды дамытуға, жаңа технологияларды енгізуге және импортты алмастыратын өнімдердің ассортиментін арттыруға ынталандыру болып табылады.Іскерлік байланыстарды орнату үшін әлеуетті тұтынушылар шақырылған. Қатарында мердігер компаниялар және әртүрлі саладағы жобалық ұйымдар, қонақ үй және мейрамхана бизнесінің өкілдері, сауда және дистрибьюторлық компаниялар және жергілікті атқарушы органдар бар. Барлығы да отандық өнімдердің кең көлемде қолдау тауып, әлемдік стандарттарға сай өнім қалыптастыруға ниетті.

Аралда жасалған:  Шымкент қаласында көрмеде көрсетілді                 

<a href="https://kyzylorda-news.kz/">Kyzylorda-news.kz.</a>&nbsp; Аудан әкімі Серік Сермағамбетовтің атқарып жатқан жұмыстары елдің көз алдында. Соңғы бір ай көлемінде ауданға қарасты барлық елді мекендерді аралап жүрген аудан әкімі ел алдындағы есепті кездесуді Арал қаласында түйіндеді. Сол кездесуде инфрақұрылымды дамыту бойынша атқарылған жұмыстарға тоқталды. Аудан басшысы кездесуде мемлекеттік бағдарлама бойынша қаладағы №5, №6 шағын аудандарында электр және су желілерінің құрылыс-монтаж жұмыстары жүргізіліп жатқанын тілге тиек етті. Алдағы уақытта бұл жұмыстар аяқталған соң кезектілікке сай азаматтарға жер телімдері берілетінін атап өтті.&nbsp;<blockquote>&nbsp;Аудан бойынша қазіргі таңда жер учаскесін алуға 7 мыңнан астам адам кезекте тұр. Бүгінде осы кезектілікті азайту мақсатында «Нұрлы жер» мемлекеттік бағдарламасы аясында Арал қаласындағы №5 шағын ауданында электр желісінің құрылысы мен №6 шағын ауданында электр желісінің және су желісінің құрылыс-монтаж жұмыстары жүргізілуде. Бұл бағытта республикалық бюджеттен 567 млн теңге қаралса, биылғы жылға құрылыс жұмыстарын аяқтауға облыстық бюджеттен 62 млн теңге қаржы қаралды. Сондай-ақ №8 мөлтек ауданда жүзеге асыруға республикалық бюджеттен қаржы тартылды. Бұл өз кезегінде тұрғын үй құрылысына жер учаскелерін алуға 2008-2011 жылдар аралығында кезекте тұрған 1043 тұрғынның өтініштерін қанағаттандыруға мүмкіндік беруде, – деді С.Сермағамбетов.</blockquote>Соңғы жылдары дәстүрлі түрде қолға алынып келе жатқан бұл бағыттағы жұмыстар кезең-кезеңімен жалғасын тауып, жер алу үшін кезекте тұрған азаматтардың тілегі орындалады деген сенім мол.

Аралда 1043 тұрғынға жер телімі табысталады

<a href="https://kyzylorda-news.kz/">Kyzylorda-news.kz.</a> &nbsp;Бірнеше облыста тұрғын үйлер мен ғимараттарды су басты. Премьер-Министр Әлихан Смайыловтың төрағалығымен Орталық және жергілікті мемлекеттік органдардың өзара іс-қимылы жөніндегі үйлестіру штабы су тасқыны кезеңіне қатысты ахуалды қарады. Бұл туралы Үкіметтің ресми <a href="https://primeminister.kz/kz/news/kimette-su-tasynyna-arsy-is-sharalar-araldy-23492">сайты</a> &nbsp;хабарлайды.Төтенше жағдайлар министрі Юрий Ильин алдын алу шараларына қарамастан, еріген және тасқын сулар салдарынан Абай, Ақтөбе, Атырау, Батыс Қазақстан, Түркістан және Павлодар облыстарында 163 тұрғын үй мен үш ғимаратты су басқанын айтты. Қазіргі уақытта Ақтөбе облысында 13 үй, Атырау облысында бір тұрғын үй су астында қалып отыр.Су басу салдарын жою үшін 3,5 мыңнан астам адам, 500-ден астам техника, 300 жүзу және 300-ге жуық су бұру құралдары тартылған. Республикалық және облыстық жедел штабтар шұғыл қызметтер мен ұйымдардың қатысуымен су тасқыны бойынша ахуалды бақылайды.Алдын ала талдауға сәйкес, елді мекендердегі тұрғын үйлерді су басу себептері – өзендердегі су деңгейінің көтерілуі, қорғаныс бөгеттерінің қирауы, азаматтардың жеке учаскелерінен қардың уақтылы шығарылмауы және жол астындағы су өткізу құрылыстарының өткізу қабілетінің төмен болуы.Сонымен қатар, Индустрия және инфрақұрылымдық даму министрі Марат Қарабаев баяндама жасады, ал өңірлерде қабылданып жатқан шаралар туралы Ақтөбе облысының әкімі Ералы Тоғжанов, Ақмола облысының әкімі Ермек Маржықпаев және Солтүстік Қазақстан облысының әкімі Айдарбек Сапаров баяндады.Премьер-Министр су тасқыны проблемасын бекітілген су тасқынына қарсы іс-шараларды және тиісті жол картасын іске асыру, сондай-ақ мемлекеттік органдар арасындағы тиімді өзара іс-қимыл арқылы кешенді түрде шешу қажеттігін атап өтті.Қазір еліміздің солтүстік өңірлерінде ауа температурасы жоғарылап келеді, бұл қалың қарды ерітіп, жаңа тәуекелдердің пайда болуына әкеледі. Осыған байланысты Әлихан Смайылов аса қауіпті учаскелердің маңында арнайы техника мен инертті материалдар қорларын шоғырландырып, өзендердегі мұз жару жұмыстарын жалғастыру және көлік қатынасы тоқтап қалуы мүмкін елді мекендерді алдын ала анықтау қажеттігін атап өтті.Премьер-Министр елді мекендерге қауіп төнгенде немесе су басқан кезде, сондай-ақ қауіпті аймақтардан көшіру кезінде не істеу керектігі туралы халықты хабардар ету жұмыстарын күшейту керектігін айтты.<blockquote>«Халықпен нақты кері байланыс орнатып, олардың көмек беру туралы өтініштеріне дереу жауап беру қажет», - деді Әлихан Смайылов.</blockquote>Үкімет басшысының айтуынша, келесі су тасқыны кезеңіне дайындықты қазірден бастау керек: елді мекендердің маңына бөгеттер тұрғызып, су өткізу құрылыстары мен арықтарды дер кезінде тазарту, сондай-ақ су бұру каналдарын дайындау қажет. Сонымен бірге, гидротехникалық құрылыстардың, бөгеттердің жағдайын тексеріп, қажет болса, оларды жөндеу бойынша шаралар қабылдау керек.<blockquote>«Әкімдіктер жолдар мен көпірлердің, электр желілерінің қираған учаскелерін қалпына келтіріп қана қоймай, орын алған жағдайға талдау жүргізіп, келесі су тасқыны кезінде болуы мүмкін қауіп-қатерлерді ескерулері қажет. ТЖМ алдағы жылдарға арналған елді мекендерді су тасқынынан қорғау жөніндегі іс-шаралар кешенін толықтыруы тиіс», - деді Әлихан Смайылов.</blockquote>Сонымен қатар, Премьер-Министр жылу беру маусымы мәселесіне тоқталды. Үкімет басшысы қыста Екібастұзда, Рудныйда және Риддерде болған жағдайды еске салды, онда туындаған мәселелерді сол бетте шешуге тура келген еді.<blockquote>«Сөз жоқ, өткен қыс мезгілі жылу энергетикасында, әсіресе жылу желілері мен жылу станцияларында, қазандықтарда проблемалардың жинақталып қалғанын көрсетті. Кейбір өңірлерде көмірді уақтылы жеткізу мен қамтамасыз ету бойынша проблемалар да туындады. Бұл – жүйелі түрде жүретін жыл сайынғы жұмыс. Онда ешқандай іркілістер мен кемшіліктер болмауы тиіс еді», - деді Әлихан Смайылов.</blockquote>Үкімет басшысының айтуынша, жабдықтардың техникалық жағдайын тұрақты, кешенді және объективті бағалау жүргізілмеген. Осыған байланысты биыл Үкімет пен жергілікті атқарушы органдар жабдықтар мен желілерді жөндеу бойынша тиісті жобаларды басым тәртіппен қаржыландыруды қамтамасыз ету керек.Әлихан Смайыловтың сөзінше, биылдан бастап энергетикалық бақылау жұмысы күшейтілмек, оның штат саны 75 адамға ұлғайтылады, сондай-ақ заң жүзінде энергия объектілеріне жоспардан тыс тексерулер жүргізу құқығы берілетін болады.<blockquote>«Коммуналдық меншіктегі желілер мен жылу электр орталықтарын жергілікті атқарушы органдар қаржыландыруға тиіс. Ал жеке меншіктегі жылу орталықтарын реконструкциялауды меншік иесінің қаражаты есебінен жүргізу керек», - деді Премьер-Министр.</blockquote>Жалпы, Үкімет басшысының пікірінше, инженерлік желілердің жай-күйін және жөндеу жұмыстарын жүргізуді бақылауды күшейту, сондай-ақ энергия объектілері иелерінің жауапкершілігін арттыру керек – осылардың барлығы шарттарда жазылуы қажет.

Бірнеше облыста тұрғын үйлер мен ғимараттарды су басты: мәселе Үкіметте қаралды

<a href="https://kyzylorda-news.kz/">Kyzylorda-news.kz.</a> &nbsp;Ғарышкерлер қаласы атанған Байқоңыр қаласының іргесіндегі Төретам кентінде де жеке кәсібін ашып, өз ісін дамытып, кәсібінен нәсіп тауып отырған жандар жетерлік. Басым бөлігі мемлекет тарапынан қаржылай қолдау алса, бірқатары барын салып өз игілігі жолында оны дамытуда.Отбасылық кәсібін дөңгелетемін деушілерге мүмкіндік көп. Тек кез келген істің тетігін тауып, мүмкіндікті тиімді пайдалана білсе болғаны. Осылай кәсібін дөңгелетіп отырған жандардың бірі Төретам кентінің тұрғыны, қайырымды істердің басы-қасынан табылатын жеке кәсіпкер, «Бақдәулет» мейрамханасының иесі Амангелді Жакешев. Төретам халқына етене таныс жеке кәсіпкердің ісіне көпшілік сүйсіне қарайды. Ол кәсіпкерлік әлемінде өзіндік қолтаңбасын қалдыруға қол жеткізіп, өз ісін дамытып жүрген белгілі кәсіп иесі. Заман талабына сай іскерліктің көзін тапқан жас кәсіпкердің кәсібі де сан салалы.Оның айтуынша, «Бақдәулет» мейрамханасы тұла бойы тұңғыш баласы Бақдәулеттің атымен аталған. Әуел баста бұл ғимаратты сауда үйі деп салып бастағанмен, кейін Бақдәулеттің тұсаукесер тойын жасамақ болып, тойхана іздестіреді. Тойдың көп болатын жаз айларында бұл өңірден кафе табу қиынға соғады. Сол кезде қаладағы кафемен келісіп, той жасайды. Содан «Неге өзіміз тойхана салмасқа?» деген кәсіпкердің өмірлік жары Айнұр Жарылқасынқызының идеясымен салынып жатқан құрылысты мейрамхана етуді ұйғарады. Мейрамхана 2016 жылы халықтың игілігіне пайдалануға беріліпті. Оның құрылыс жұмыстарына төрт жылға жуық уақыт кетіп, қаншама жұмысшының маңдай терінің арқасында хан сарайындай, сыйымдылығы 400 орындықты құрайтын зәулім ғимарат елдің сұранысын қанағаттандыруға жараған. Мейрамханада оннан астам адам тұрақты жұмыспен қамтылған.Байқоңыр өңірінің жұртшылығы тегіс білетіндей, «Бақдәулет» мейрамханасы біраз уақыттан бері халал мейрамханалардың қатарында. Бұл жайында ағамыздан сұрап білдік.<blockquote>«Өзім мұсылманның бес парызын өтеп жүрген соң «Халал» деген статусты алу көптен ойымда еді. Елімізге келген нәубет, яғни коронавирус жайлаған уақытта мейрамханалар есігі тарс жабылғаны белгілі. Қаншама жандар, жасы бар, кәрісі бар, аз ғана уақыттың ішінде өмірден өтіп кетті. Төтенше жағдай кезінде бізде жағдайға бой ұсынып тойханамызды жаптық. Осындай қысылтаяң шақта отбасылық кәсібіміз тоқтап қалмас үшін біріміз балалар киімі дүкенін, екіншіміз құрылыс заттарын сататын дүкен ашып, тірлік қылдық. Міне, осы карантиннен кейін, мына өмірдің қас-қағым сәт екенін түсініп, ғұмырымызда берген садақамыз адалынан болсын деген ниетте мейрамхананы «халал» деген статусқа қойған жайымыз бар», – дейді кейіпкеріміз.</blockquote>Кәсіп иесінің «Алина» дүкенін бастапқыда «Эврика» гипермаркетіне жалға берсе, содан соң олар сауда болмағасын жабылған-ды. Бүгінгі таңда дүкен электроника және тұрмыстық техника сататын «Sulpak» дүкендер желісіне жалға беріліп, өңір халқының сұранысын орындап, тұрғындардың көңілінен шығып жатқан жайы бар. Бұл «Sulpak» дүкендер желісі өзінде 30-ға тарта адамды жұмыспен қамтыған.А.Байділдаұлымен әңгімелесе отырып, кәсіптің көзін тапқан жан екен деген ойға келдік. Оған себеп, кентіміздегі бірнеше дүкен ғимараттарын жалға беріп және жекелеген кәсіпкерлердің кәсібінің жандануына ықпал етіп отырғаны да бізді сүйсінтті.<blockquote>«Бизнесті жалғыз адамның дамытуы қиынға соғады. Бұл жоба серіктестермен жұмыс істеуге, келісім жүргізуге, міндеттемелерді бөлуге, ең бастысы, қолда бар мүмкіндіктерді пайдалануға үйретеді. Жер бетіне адам болып келген соң, еңбек етіп қана қоймай, қасыңдағы бауырларыңды, отбасыңды бақытты ету саналы әр адамның міндеті. Шынайы көзбен қарасақ, еңбек етіп жатқан адам көп. Әркім өз деңгейі мен Алла берген ырзық-несібесімен нан тауып жеп жүр. Адам алдына қойған мақсатына тек еңбек арқылы жетеді. Еңбек адамды шынықтырады, шыңдайды. Сондықтан адам өмірінде еңбектенудің маңызы ерекше», – дейді ол.</blockquote>«Отбасы – алтын діңгек» демекші, адамның жеке басының алғашқы қалыптасуы отбасынан бастау алады. Баланың тәрбиелі болып өсуіне берекесі тасыған отбасының әсері мол. Отбасының әрбір мүшесі, ата мен әже, әке мен бала, ана мен қызы өзара сөйлесіп, берекебірлікте, сүйіспеншілікпен араласса, босағасы берік, шаңырағы биік отбасына айналмақ.Игі іске бастамашы болып отыратын Жакешевтер отбасы Төретам кентінің байырғы тұрғындары. Амангелді ағамыз Байділда Жакешев ақсақал мен абзал ана Күнім Мұқашева апаның отбасындағы жеті баланың бесіншісі. Көпбалалы отбасында дүниеге келіп, әкесі мен анасынан алған тәрбиесін бүгінде ол өз балаларына үлгі етіп айтып отырады. Немерелерінің қызығына тоймай өмір сүріп жатқан қос бәйтерегінің бірі сексеннің сеңгіріне шықса, бірі жетпістен асқан. Берекелі отбасының ұйытқысы болып отырған ардақты қариялар елдің сыйлысы. Ал Амангелді Байділдаұлы өзінің өмірлік жары, берекесі тасыған отбасының отанасы Айнұр Жарылқасынқызы екеуі құдай берген 4 баланың қамқоршы ата-анасы. Үлкені Бақдәулет 15 жаста, Алина 13 жаста, Али 11 жаста, Осман 9 жаста.Өткен жылдың 20 желтоқсанында «Балалар жылы» аясында есімі елге таныс кәсіпкердің идеясымен Төретам кенті тұрғындарының балаларына арналған «ALI KIDS PARK» атты балалар ойын-сауық орталығы ашылған болатын. Жалпы жоба құны 80 миллион. Мұнда үлкен сырғанақтар, құрғақ бассейндер, яғни балалар атракциондарының жеті түрі бар. Егер отбасымен келген жағдайда ойын орталығында 100 адамға арналған жайлы дәмхана қызмет көрсетеді. Сонымен қатар, көпбалалы отбасы балаларына жеңілдіктер бар. Мүмкіндігі шектеулі балаларға арнайы бір күн арналады деген жоспарлары да жоқ емес. Орталықта 15 адам тұрақты жұмыспен қамтылған.Кәсіпкермен әңгіме барысында кенттің арғы бетінде мемлекет тарапынан берілген жерге салынып жатқан мешіттің құрылысына осы Жакешевтер отбасының қаржылай қолдау білдіргенін аңғарып, риза болдық.Бүгінгі күндегі отбасылық бизнес – бүкіл әлемге таралған кәсіпкерліктің түрі. Мысалы, бірқатар Еуропа елдерінде, Жапонияда компаниялардың 70%-тен астамы отбасылық (туыстық) бизнес үлесіне жатады екен. Осылайша шағын кәсіпкерлік саласында еңбек етіп жүргендердің үлесі біршама артуда. Танымал компания-корпорациялардың тарихына көз жүгіртсек, алғашында отбасылық кәсіп ретінде бастау алғанын аңғаруға болады. Күллі әлемге танымал Samsung корпорациясы бір отбасының бизнесі екені осыған дәлел. XX ғасырдың 30-40 жылдары ауылдық жерде ашылған дүкеннің негізінде өркен жайған бұл отбасылық бизнес жылдар бойы тамырын кеңге жайып келеді. Компанияның атауы «үш жұлдыз» деген мағына береді. Үш жұлдыз яғни, үш арман бұл – үлкен, мықты және мәңгілік компания құру дегенді білдіреді. Компанияның ғасырға жуық уақытта тек қана қарыштап дамып келе жатқанына қарағанда, алға қойған арман-мақсаттары орындалды деуге болатын секілді.Бүгінгі күннің басты талабы – өз кәсібін ашып, еңбек ету, халықтың игілігі жолында қызмет жасау. қазір «алма піс, аузыма түс» деп жататын уақыт емес. Сонымен қатар, мемлекет кәсіп ашып, нәпақасын табуға ниеттілерді қашанда қолдап келе жатқандығы аян. Оны күнделікті өмірде көзімізбен көріп те, құлағымызбен естіп те жүрміз.Бүгінде қазақстандықтар отбасылық бизнес құруға ден қойды. Әлемнің дамыған елдерінде атадан балаға мұра болып қалатын кәсіп экономиканың негізгі қозғаушы күші болып табылады.Кәсіпкерлікте адал еңбегімен өз замандастарына үлгі болып жүрген бұл азаматтың кәсіптік идеясы өңір тұрғындарының көңілінен шығуда. Кәсіптің түбі нәсіп болатынын, жақсы бастама тек қана биіктерге жетелейтінін ол ешқашан есінен шығармайды. Мұндай істе әлбетте береке болатыны анық. &nbsp;

Байқоңырда отбасылық өркен жайған кәсіп бар

<a href="https://kyzylorda-news.kz/">Kyzylorda-news.kz.</a> Қармақшы – еңбек пен өнерде қатар аты шыққан өңір. Қорқыт баба мәңгілік тыныс тапқан киелі мекен. Аудан орталығынан 18 шақырым қашықтықта орналасқан күллі түркі жұртының ұлық тұлғасына айналған Қорқыт ата атындағы мемориалды кешені тек қана өңірдің ғана емес, сондай-ақ ол Қазақ елінің мақтанышы. Қабырғасы сонау 1980-жылдардың басында қаланған кешен басында қай кезде де қонақ аяғы үзілмейді. &nbsp;Бұған дейін елімізде өткен EXPO-2017 көрмесі кезінде туризм саласының өркендеуіне негіз қалайтын жарқын жобалар қолға алынғаны белгілі. Қызылорда облысы Қармақшы ауданындағы «Қорқыт ата» мемориалды кешені – соның айқын көрінісі. Сол жылы кешен қайта жаңғыртылып, шетелдік қонақтарды қабылдайтын негізгі орын санатына енгізілген болды. Осы арқылы Сыр өңірінің мәдени, тарихи құндылықтарын кеңінен насихаттауға мүмкіндік туды. Қазір күрежолдың бойында орналасқан кешен жолаушылардың аялдайтын қасиетті мекен саналады. Бұл аумаққа ат басын бұрған жандардың жайлы демалысына жағдай жасауға да көңіл бөлініп келеді. Осы арқылы туристік әлеуетті арттыруға мүмкіндік жасалуда. &nbsp;Қорқыт ата кешенінің бүгінгі архитектуралық кесенесін әлемге таныту, оны дүниежүзілік туристік орталыққа айналдыра отырып, әлемнің түпкір-түкпірінен Сыр еліне келген қонақтарға кеңінен насихаттау үшін көптеген жұмыстар жүргізілуде. Түгел түркі әлемі кие тұтатын Қорқыт атамыздың мәңгілік мекеніне айналған тарихи маңызға ие – Қорқыт ата кешені сәулет өнерінің айрықша үлгісі. Архитектуралық кескіні ерекше кешен келушілерге ұмытылмас әсер сыйлайтыны сөзсіз. Кешендегі басты ескерткіш стела – қобызды бейнелейтін төрт элементтен тұрады. Биіктігі 12,1 метр, ені 5,3 метр, қордай тасынан дайындалған. Әрбір стела әртарапқа қаратып тұрғызылған құлпытастарға ұқсайды. Жоғары жағы кеңейе келіп, шөміш пішінінде түйісетін стелалар қобыз бейнесін де меңзейді. Түйісер түбіндегі орталық тесігінде 40 металл түтік бар. Олар жел соққан кезде қобыз сарынымен үндес дыбыс шығарады. Аңыздарда айтылғандай Қорқыт ата мазарында соққан желге үн қосатын қобыз қойылған. Жалпы кешенге жыл сайын келетін туристердің саны артуда. Мұнда қасиетті мекеннің құдіреттілігін сезінуге асығатындарға барлық қажетті жағдай жасалған. Соның нәтижесінде өңірде ішкі туризмнің дамуына жол ашылған деуімізге болады. Бүгінде кешенде жүйелі жұмыстар жүріп жатыр. &nbsp;Сол сияқты кешеннің қарсы бетіндегі жеке кәсіпкердің меншігіндегі кәсіптік мақсатта ашылған зиярат ету орталығы да талапқа сай қызмет етуде. Кешеннің инфрақұрылымы да шешімін тапқан. Дариядан құбыр арқылы ауызсу тартылып тұр. Көркейту-көгалдандыру, жарықтандыру мәселесінде де түйткіл жоқ дейді кешендегі мамандар.&nbsp;Кешен басшысының айтуынша, көптен күрделі жөндеу көрмеген нысанға жыл сайын жөндеу жұмыстарын жүргізіп отыруға мәжбүр. Толық жөндеу жұмыстары сөз болғанымен, әлі күнге жүзеге аспай тұрса керек. &nbsp;Жалпы, музейде 3 000-ға жуық экспонат бар екен. Оның 2 000-ға жуығы негізгі қорда болса, қалған бөлігі көмекші қорда сақтаулы. Бұл экспонаттардың басым бөлігі Қорқыт атаның өмір тарихы негізінде жинақталса, қалғаны Сыр өңірінен шыққан ақын-жыраулардың мұраларымен толықтырылған. Қазір кешенді көруге келетіндер өзіміздің қазақстандық азаматтар. Ара-тұра шетелдік туристер де табан тіреп тұрады. Кешен басшысы шетелдік туристерді тарту жұмыстары әлі де күшейтуге шақырады.&nbsp;Сонымен қатар, қазіргі уақытта, Қармақшы ауданы арқылы өтетін халықаралық көлік дәлізінің бөлігінде 14 нысан жұмыс жасап тұр.Қармақшы аудандық кәсіпкерлік, өнеркәсіп және туризм бөлімі тарапынан, аудан бойынша туризм саласында көптеген жұмыстар атқарылып келеді. Атап айтқанда: «Маргарита», «Керуен» жол бойы қызмет көрсету кешендері ашылса, «Оазис» жол бойы кешенінен қонақ үй құрылысы, «Ақсарай» жол бойы кешенінде сауда орталығының құрылысы және халықаралық көлік дәлізінің 1570 шақырымынан «Helios» жауапкершілігі шектеулі серіктестігінің «Д» санатындағы кешені құрылыстары аяқталып халыққа қызмет жасауда. Сондай-ақ, санитарлық-гигиеналық торап жылдың соңына дейінгі мерзімде пайдалануға беруді жоспарлап отыр.Сонымен қатар, ауданда Qarmaqshy Demeu Travel туристік агенті Кең байтақ қазақ жерінің тамылжыған табиғаты, терең тарихтан сыр шертетін мәдени мұраларымен танысуға Түркістан, Шымкент, Алматы қалаларындағы туристтік орындарға қысқа мерзімді турлар ұйымдастырылып келеді.

Қармақшыдағы туризмнің жайы қалай?

<a href="https://kyzylorda-news.kz/">Kyzylorda-news.kz.</a> Сырдария ауданының құқық қорғау саласында еңбек етіп, зейнет демалысына шыққан азаматтар қай кезде де бірлігімен көпке үлгі-өнеге көрсетіп келеді. Ардагерлер он екі айдың сұлтаны болған қасиетті Рамазан айының құрметіне тағы бір сауапты амал жасады. Іс-шараға сала ардагерлерімен қатар мешіт жамағаты, журналистер қатысты.Бұл жолы ардагерлер аудандық мұсылмандар мешітімен бірлесе отырып көмекке мұқтаж, аз қамтамасыз етілген он отбасыға ет үлестірді. Сондай-ақ өмірден өткен әріптестерінің құрметіне хатым құран оқытып, сауабын марқұмдардың рухтарына бағыштатты.<blockquote>«Сырдария аудандық полиция бөлімі жанынан бастауыш ардагерлер ұйымы құрылған. Ұйымға біріккен сала ардагерлері түрлі іс-шараларда бас қосып, тәжірибелерін жас мамандарға үйретіп, үлкен-кішіге үлгі боларлық істерді атқаруға бастамашы болып келеді. Пандемия уақытында да нақты жұмыстар атқардық. Ал «Қаңтар қасіретінде» блок бекеттерде тәулік бойы қызмет еткен ізбасар әріптестерімізді ыстық тамақпен қамтамасыз еттік. Бұл жолы бәріміз ақылдаса келе қайырымдылық іс-шарасын ұйымдастыруды жөн көр­дік. Сөйтіп, өз ынтамызбен орталай қаржы жинап, жылқы малын сатып алдық. Оны сойып, етін бөліп, 10 отбасына тараттық. Сондай-ақ саналы ғұмырында тәртіп пен заң үстемдігін қамтамасыз ету жолында аянбай еңбек еткен әріптестерімізді еске алып, рухына құран бағыштадық. Мұндай жұмыстар алдағы уақытта да жалғасады деп сенемін», – дейді аудандық полиция бөлімі жанындағы бастауыш ардагерлер ұйымының төрағасы Марат Еспенбетов.</blockquote>Халқымызда «Өлі риза болмай, тіріде береке болмайды» деген даналық сөз бар. Ардагерлердің өліге де, тіріге де пайдалы сауапты амал жасап, бір жағадан бас, бір жеңнен қол шығаруы нағыз ізгілікті іс екені анық.<blockquote>«Ардагер ағаларымыздан жақсы ұсыныс түскенде қуанып қалдық. Аудандық мұсылмандар мешіті мұндай сауапты амалдарды бірлесе атқаруға әркез дайын. Құқық қорғау саласының негізгі міндеті қылмысты ашу мен кінәлілерді жазалау ғана емес, қоғамды жақсылыққа ұйыстыру екені белгілі. Осы орайда өздері жақсы амал жасап, өзгелерді де жақсы амалдарға ынталандырып жат­қан азаматтарға Алла разы болсын! Қасиетті Рамазан айындағы дұға-тілектері қабыл болсын», – деді Сырдария аудандық мұсылмандар мешітінің бас имамы Асхат Асқарұлы.</blockquote>Айта кетейік, аудандық полиция бөлімінің жанынан құралған бастауыш ардагерлер ұйымында құқық қорғау саласында еңбек етіп, өмірден өткен 90-ға жуық азаматтың тізімі бар екен. Олардың қатарында Серікбай Жәкеев, Азатбақыт Әлиакбаров, Жылқыбай Құттыбаев секілді есімі аудан халқына белгілі ардақты азаматтар бар. Мақаланың мазмұнына қарай марқұм болған азаматтардың аты-жөнін толық жаза алмадық. Бірақ олардың есімдері де, еңбектері де ұмытылмайды.&nbsp;&nbsp;

Қазақстан және Қызылорда облысының жаңалықтары