<a href="https://kyzylorda-news.kz/">Kyzylorda-news.kz.</a>&nbsp; Қорқыт ата атындағы Қызылорда университетінің Басқарма төрағасы – ректоры Бейбіткүл Кәрімова М.Ұлықбек атындағы Өзбекстан ұлттық университетінен келген делегация мүшелерімен кездесті.&nbsp;Жүздесуде оқу орнының басшысы бауырлас елдер арасындағы өзара ынтымақтастыққа тоқталып, білім саласындағы байланыс нығая түскенін атап өтті. &nbsp;Жуырда Қорқыт ата атындағы Қызылорда университеті бірнеше өзбекстандық жоғары оқу орнымен бірлесіп мамандар даярлау туралы келісім жасаған болатын.Өз кезегінде «Адам және жануарлар физиологиясы» кафедрасының доценті, биология ғылымдарының кандидаты Болта Кахоров, доцент, биология ғылымдарының кандидаты Гулчехра Джаббарова бірлескен білім беру бағдарламаларының маңыздылығын атап өтіп, жаңа жобалар туралы сөз қозғады.&nbsp;Сондай-ақ, Қорқыт ата атындағы Қызылорда университетінде өтетін дәрістерге М.Ұлықбек атындағы Өзбекстан ұлттық университетінің магистранты Соибжан Бахронов пен студент Барчинай Давлетова қатысып, өз тәжірибесімен бөлісетін болады.Айта кету керек, өзбекстандық ғалымдар 17-19 сәуір аралығында «Биология» білім беру бағдарламасының студенттері мен магистранттарына дәріс өткізіп, ғылым айлығына орай «Биология, география және химия» кафедрасында өтетін іс-шараларға қатысады.&nbsp;

М.Ұлықбек атындағы Өзбекстан ұлттық университетінің делегациясымен кездесті

<a href="https://kyzylorda-news.kz/">Kyzylorda-news.kz.</a>&nbsp; Математика – нақты ғылым саналады. Бұл сала адам өмірімен тығыз байланысты. Тіпті, күнделікті тіршілікте біз есеп-қисапты үнемі пайдаланамыз. Сондықтан осы саланың меңгертетін мұғалімдерге деген құрмет ерекше.&nbsp;Сырдария ауданының орталығындағы №35 Иса Тоқтыбаев атындағы мектеп-лицей базасында аудандық білім бөлімінің әдістемелік кабинетінің ұйымдастыруымен «Үздік математика пәні мұғалімі – 2023» байқауы өткізілді. Шығармашылықпен жұмыс жасайтын, талантты мұғалімдерді анықтау, оларды қолдау және тәжірибесін тарату, математика пәні мұғалімінің мәртебесін көтеру мақсатында өткізілген байқауға аудан ұстаздары қатысты.Байқау 3 кезеңді қамтыды. Бірінші кезеңде математик мұғалімдер «Бір сабақ – бір әлем тақырыбымен ашық сабақ өткізді. Онда математика ғылымына қатысты көп ақпарат берді, оқушыларға сабақ беру үрдісі көрсетілді. Екінші кезең «Мұғалімнің шығармашылық шеберханасы» деп аталып, бұл кезеңде ұстаздар сабақ берудегі өзіндік тәсілдерін атап көрсетті. Үшінші кезең «Білімді мыңды жығар...» деп аталды. Онда математиктер сұрақтарға жауап берді.Байқау барысында аудан ұстаздары №35 Иса Тоқтыбаев атындағы мектеп-лицейдің оқушыларына ашық сабақ өткізді, педагогикалық тәжірибесінде жасаған авторлық бағдарламасымен, оқу-әдістемелік көмекші құралымен, тәжірибесінде оң әсер еткен, таратуға лайықты педагогикалық идеясымен, математика пәнінен олимпиадаға, ҰБТ-ға дайындаудан тиімді лайфхактарымен бөлісті. Мұғалімнің кәсіби сауаттылығын анықтау, өз пәнін меңгеруін, ойлау қабілетінің шапшаңдығын анықтау мақсатында бір есепті белгіленген уақытта шығарды.Әділ қазылардың шешімімен байқау нәтижесі шығарылып, №139 орта мектебінің мұғалімі Е.Шайхысламов бірінші орынды, №135 орта мектебінің мұғалімі Ш.Райымбекова мен №36 мектеп-лицейінің мұғалімі Г.Әділбекова екінші орынды, №126 орта мектебінің мұғалімі Жорабекқызы мен №131 орта мектебінің мұғалімі А.Жақсылықова үшінші орынды иеленді. Жүлделі орындар алған мұғалімдер аудандық білім бөлімінің басшысы мен аудандық білім және ғылым қызметкерлері кәсіподақ комитеті төрағасының арнайы дипломдарымен, бағалы сыйлықтармен марапатталды.&nbsp;Ал облыстық байқауға Шайхысламов Ерсұлтан жолдама алды. &nbsp;

Сырдарияда «Үздік математика пәні мұғалімі – 2023» байқауы өтті 

<a href="https://kyzylorda-news.kz/">Kyzylorda-news.kz.</a> Қызылорда қаласында көктемгі дала жұмыстары жүргізіліп жатыр. Бұл туралы Қызылорда қаласы әкімдігінің баспасөз орталығында өткен брифингте қала әкімінің орынбасары Дінмұхамед Ермеков баяндап өтті.Биыл Қызылорда қаласында 9 036 гектарға ауыл шаруашылығы дақылдарын егу жопарланып отыр. Оның ішінде негізгі дақыл күріш 3 610 гектар, дәнді дақыл 107 гектар, картоп дақылы 500 гектар, көкөніс дақылы 1 330 гектар, бақша дақылы 990 гектар, мал азықтық дақыл 2 499 гектарды құрайды.<blockquote>«Көктемгі дала жұмыстарын жүргізуге барлығы 148 дана ауыл шаруашылығы техникасы қатысуда. Бүгінгі күнге 1849 гектар ескі жоңышқа тырмаланып, 239 гектарға жаңа жоңышқа, 57 гектарға жаздық бидай, 35 гектарға қант құмайы егілді. Биылғы жылдың егісіне қажетті 918 тонна күріш тұқымы құйылып, оның 13,0 пайызын отандық сорттар, 87,0 пайызын Ресейлік сорттар құрайды. Атап айтқанда, отандық сорттар бойынша 115 тонна «Сыр сұлуы», Ресейлік сорттар 291 тонна «Лидер», 512 тонна «Янтарь» сорттары егілді», - деді Дінмұхамед Жандарбекұлы. &nbsp;</blockquote>Көктемгі дала жұмыстарын жүргізуге қажетті &nbsp;479 тонна дизель отынын жеткізіп беруші операторлар «РК Мұнай» және «Жібек Жолы LTD» ЖШС-і болып белгіленді. Бүгінгі күні шаруашылық құрылымдары дизель отынын аталмыш серіктестіктерден келісім-шарт негізінде сатып алуда.Айта кету керек, қалаға қарасты Қарауылтөбе ауылдық округінен картоп, көкөніс және бақша дақылдарын егуге әр отбасыға уақытша 10 сотық жер маусымдық кезеңге уақытша берілуде. &nbsp;Оған &nbsp;қала тұрғындары қызығушылық танытып, бүгінде 65 өтінім келіп түсті. Өтінім қабылдау жұмыстары мамыр айына дейін жалғасады.<img src="https://knadmin.beoblood.kz/uploads/Whats_App_Image_2023_04_17_at_18_24_15_1_474e7047fa.jpeg" alt="WhatsApp Image 2023-04-17 at 18.24.15 (1).jpeg">

Қызылорда қаласында 9 036 гектарға егін егіледі

<a href="https://kyzylorda-news.kz/">Kyzylorda-news.kz.</a> 18 сәуірде күн райының нашарлауына байланысты бірқатар өңірде ескерту жарияланды, деп хабарлайды Қазгидромет.Бүгін Қызылорда облысының солтүстігі мен орталығында тұман күтіледі. Түнде облыстың басым бөлігінде 1-6 градус үсік жүреді.

18 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Сырдария ауданынан шалғайда орналасқан Жетікөл елді мекеніндегі «Жетікөл-Жері» ЖШС көктемгі егіске қызу дайындық жұмыстарын пысықтау үстінде.&nbsp;Қазіргі таңда егістік жерлерін аяқ сумен толық қамтамасыз ету үшін су өткізгіш құбырларын салу жұмыстарын жүргізуде. Сондай-ақ егістік жерлерін қоршауда және тиесілі жерінің қалған бөлігіне ашу жұмыстарын жасауда.&nbsp;<blockquote>Жердің құнарлығына байланысты ауылшаруашылығы өнімдерін егуді қолға алып жатырмыз. Әрине, азық-түлік өнімдері толықтай шыққан жағдайда молшылыққа кеңелетініміз анық. Жергілікті тұрғындарды жұмыспен қамтып отырған&nbsp;«Жетікөл-Жері» ЖШС егін маусымына дайындықты бастап кетті. Жоспар бойынша дәнді-дақылдарды жерге орналастыру жүргізіледі. Үздіксіз жұмыстың арқасында жоғары өнімге қол жеткізуіміз керек. Көктем-жаз айларында кездесетін сан түрлі қиындыққа қарамастан егін маусымында межелеген өнімді алғанымыз дұрыс. Алға қойған мақсатымызды орындау мақсатында өткен жылы Украина елінің мамандарымен тығыз байланыс орнаттық. Өзара тәжірибе алмастық. Бағыты айқын ауыл шаруашылығы құрылымдарының мамандары бірнеше өнімді өсіру жолдарын айтып берді. Бұл ретте, климаттық зерттеулер жасалды. Біздің жерге қолайлы дән-дақылдар егуге барымызды саламыз, – деді Жетікөл ауылының әкімі Өмірбек&nbsp;Тоқпамбетов.</blockquote>

Жетікөл егін маусымына дайын

<a href="https://kyzylorda-news.kz/">Kyzylorda-news.kz.</a> Биыл Қызылорда облысында 2,5 пайызбен несие беретін «Ауыл аманаты» жобасы жүзеге асырылады. Микрокредиттер ауылдық елді мекендерде және шағын қалаларда жүзеге асырылатын жобаларға қарастырылады. Бұл туралы Өңірлік коммуникациялар қызметінің ақпарат алаңында өткен брифингте облыстық ауыл шаруашылығы және жер қатынастары басқармасының басшысы Талғат Дүйсебаев мәлімдеді.<blockquote>«Ауыл аманаты» жобасы ең алдымен ауылдық жердегі халықтың табысын арттыру бағытына көзделген. Жоба өңдеу саласына қатысты жобаларды қаржыландыру (жылыжайлар, сүт, ет өндірісі, құс және балық шаруашылығы), өсімдік шаруашылығын дамыту, ауыл шаруашылығы кооперативтерін жабдықтау, мал шаруашылығын дамыту және басқа да бизнес жобаларды қаржыландыруға бағытталады. Микрокредиттер 5 жылға дейінгі мерзімге, ал мал шаруашылығы саласындағы жобалар үшін – 7 жылға дейін беріледі. Микрокредиттің ең жоғары сомасы - ауылдық елді мекендерде және шағын қалаларда – 2,5 мың АЕК-ке дейінгі соманы құрайды. Зәкірлік кооперацияны дамыту үшін 8,0 мың АЕК. Номиналды сыйақы мөлшерлемесі – жылдық 2,5 &nbsp;пайыздан аспайды. Айта кететін жайт, несие алушыларға бірқатар талаптар қойылады. Несие алушыны жеке кәсіпкер болып тіркелуі тиіс. Басқа да несиелер бойынша мерзімі өткен жарнаның болмауы, мемлекеттік кірістер органдар алдында берешектің болмауы, несие алушының жасы зейнеткерлік жастан аспауы тиіс, несиені кепілмен қамтамасыз ету, ауыл шаруашылығын жүргізу үшін қажетті жағдайлардың болуы, құрылған ауыл шаруашылық өндірістік кооперативіне мүшелікке кіру, қаржыландырылған жоба аясындағы өндірілген өнімді ауыл шаруашылық өндірістік кооперативке өткізу керек»,- деді Талғат Тұрсынұлы.</blockquote>

Талғат Дүйсебаев: Несие алушыларға бірқатар талаптар қойылады

<a href="https://kyzylorda-news.kz/ru/">Kyzylorda-news.kz</a>. Атақты мұрат етпеген аңыз адамдар қаншама. Сырдың сандуғашы, халқының еркесі, қазақ ән өнерінің жұлдызы, әнші Роза Бағланованың өмірі өзгелер үшін өнегеге толы үлгі болса, өнері әлі күнге дейін өлмей келеді. Шын талантқа берілген уақыт пен тарихтың бағасы шығар. Өткен жылы күзде Республика көлемінде әншінің 100 жылдық мерейтойы атап өтілді.Осы орайда аңыз тұлғаның жалғыз ұлы Тәженнің жары, келіні Марал Бағлановамен әншінің өмірі мен әдемі естеліктері жайлы әңгіме құрған едік.– Марал, қайырлы күн! Роза Бағлановаға қалай келін болдыңыз?– Мен Меркінің қарапайым ғана қызымын. Қарапайым отбасыда өсіп, тәрбиеленгенмін. Өзім бес жаста, інім тоғыз айлық кезінде анамыздан айырылып қалдық. Мені әкемнің анасы, әжем тәрбиеледі. Кейіннен оқуға тапсырып, Алматыдағы педагогикалық ущиличені бастауыш сынып мұғалімі мамандығы бойынша қызыл дипломмен аяқтадым. Әрі қарай ҚазҰҚызПУ-ға сырттай оқуға түстім. Оқимын, өз еңбегіммен ақша табамын деп жүрген кезіміз. Сол жылдары жақын құрбымның әпкесі Роза Тәжібайқызының костюмершесы болып жұмыс істейтін еді. Бір күні ол Роза апайдың үйіне хабарласып, бір жағдайды ескертуімді сұрады. Қоңырау шалғанымда тұтқаны оның ұлы Тәжен көтерді. Сол сәттен бастап таныс-біліс болып кеттік. Ұзақ уақыт бойы сөйлесіп жүрдік.Бір күні бізді Роза Тәжібайқызы үйіне түскі асқа шақырды. Апамыз үлкен үстелге дастархан жайыпты. Мен үстелдің бір басында, ол екінші басында отырдық. Байқасам, сыпайы түрде мені сұрақтың астына алып отыр. «Қайда жұмыс істейсің? Жасың нешеде? Қай жақтансың? Немен айналысасың?» деп бәрін сұрады. Сол күнгі кездесуден кейін ол ұлына қайта-қайта мен туралы қайта-қайта айтыпты. «Оған ұсыныс жасадың ба? Неге әлі жүрсің? Оны жіберіп алсаң, сені кешірмеймін» дейтін көрінеді. Оны түсінуге де болады. Апам ол кезде сексенге келіп, 30 жастағы ұлының отбасылы болғанын, ұрпақ жалғастырғанын көргісі келеді. Сонда мен жиырмадамын. Біраз сөйлесіп жүріп, 26 қыркүйек күні алғаш рет кездескеніміз есімде. Ал 29 қыркүйек менің туған күнім еді. Тәжен арнайы келіп, гүл сыйлап кеткені бар. Осылайша жарты жылдай сөйлесіп жүріп, апамыз асықтырған соң, отбасы құрдық. Мен енді ғана 21-ге толған қызбын. Жалпы мен үшін арты тойға, отбасы құруға ұласқан сол кездегі оқиғалар, кездесулер тағдырдың сыйы сияқты. Күтпеген жерден өмірімде бәрі өзгеріп кетті. Маған әсер еткені, ерекше ұнағаны – Тәженнің қарапайымдылығы, өзін ұстай білуі. Баршылықта өскен, қаланың баласы, не ішем, не жеймін деп көрмеген атақты әншінің жалғыз ұлы бола тұра өзінің қарапайым болмысын сақтап қалғаны жүрегімді жаулап алды. Өркөкіректікті ұнатпаймын. Жанымдағы адамдарды да осы қасиетіне қарап, жақын көремін.– Өзіңіз де Сырдың қасиетті топырағынан тамыр жайған екенсіз…– Иә, көбісі білмеуі мүмкін. Меркіде тұрақтап қалсақ та, ата-әжем, арғы тегім Сыр өңірінен шыққан. Атам Аралдың тумасы болса, әжем Қазалының қызы. Кіші жүзден тарадық. Балалық шаққа көз жүгіртсем, Меркідегі үйімізге Арал, Қазалыдан үнемі қонақтар келіп жататыны ойға оралады. Есімнен кетпейтіні – қауынқақ пен «Қазалы» кәмпитінің дәмі. Үйге келгеннің бәрі талқан, сөк, құрт алып келеді. Баламын ғой, тәттіден басқа ештеңе керек емес. Осылайша қауынқақ пен кәмпиттің дәмі әбден аузымда қалған. Қазір де Қазалыға, Қызылордаға келген сайын «Қазалы» кәмпитінен бірнеше қалта етіп алып кетемін.Тойымыз біткеннен кейін жақын танысып, арғы тегімізді білісе келе апам «Келінім өзімнің топырағымнан екен. Құдалар жерлестерім ғой» деп әбден қуанды. Сол кезде көз жасына ерік беріп, айналып келіп өз жерінен қыз алғанына мақтанып тұрғанын жасырмады. Сұрастыра келе өз әжемнің апаммен Қазалыда, бір мектепте оқығанын білдім. Әжем апамыздан 4 сынып төмен оқыған екен. «Роза оқушы кезінен-ақ ән айтып, елді аузына қаратушы еді. Оған қарап таңқалатынбыз. «Әртіс Роза» деп атап кеттік» дейді әжем.– Апамыз қандай адам еді?– 21 жасымда келін боп түсіп, апаммен бірге 11 жыл тұрдық. Апам бір ғасыр өмір сүрген адам ғой. Жаны да, тәні де таза кісі еді. Тіпті, ауырып қиналып жатқан кезінде де өзін таза ұстайтын, тазалықты сүйетін. Ешкімге жамандық ойламайтын. Адамдарды бір қарағаннан-ақ сканерден өткізгендей кімнің кім екенін, жақсы мен жаманды тани алатын. Апам екеуміз бірден тіл табысып кеттік дей алмаймын. Келе салып керемет болдым десем, өтірік болар. Әр адамның өзінше мінезі болады. «Бақ бергенше, сана бер» деген сөз бар. Осы сөзді ұран еттім. Өйткені баршылық та, байлық та кез келген сәтте жоқ болуы мүмкін. Ал адамда сана болса, бәрін де қайтаруға болады.Роза Бағланованың мінезі темірдей еді. Менің де өжеттігім бар. Алғашқы төрт жыл үйренісе алмай жүрдік. Қанша жыл бойы екеуі ғана өмір сүріп келген анасы мен ұлының өмірі мен келген соң түбегейлі өзгеріп кетті. Кейін балаларым дүниеге келді. Үйде балалардың күлкісі естілгенде анамыздың бақытында шек болмады.– Естеліктер ескірмейді дейсіз ғой…– Әрине, апам туралы айтылар әңгіме, бірге кешкен ерекше сәттер, оқиғалар да көп. Өткен аптада орталық алаңда ескерткіштің ашылуы кезінде туған жері Қазалыдан ата-әжелер келді. Олардың жүрекжарды тілектерін, күзде ауылда дүркіретіп тойлаймыз дегендерін естіп, дайындықтарынан хабардар болғанда, қатты толқыдым. Сол жерде өзіме уәде бердім. Не болса да, осы шаралардан кейін үйге барып, жоспар құруым керек. Апам жайлы естеліктерді жазып, біраз жыл бұрын қолға алған кітапты күзге дейін аяқтауға тиіспін. Күзде туған жерінде қарияларға тұсауын кестірсем деп жоспарлап отырмын. Ата-әжелерді көргенде сондай ой келді. Апам қайтыс болған кезде отбасылық, ана мен келін арасындағы естен кетпес естеліктерді жазып бастаған едім. Қайтқанына қырық күн болмастан жазып жүрдім. Қайтыс болған адамның рухы қырық күн ішінде үйінен кетпей, аралап жүреді деп жатады ғой. Оның бөлмесінде отырып, ойларымды теремін. Сонда апамның демі сезілгендей, өзі қасымда жүргендей болды. Жолдасыма айтсам, мен сенен қорқамын дейді. Біразға дейін апам жайлы жиі түс көріп жүрдім.Апам төсек тартып, біраз ауырды. Бірге кешкен он бір жылымыздың соңғы 4 жылында денсаулығы сыр берді. Ауруға өте шыдамды адам еді. Сонысына таңданып қарайтынмын. Бірақ артынан ойласам, соғысты, ашаршылықты, талай нәубетті көрген адамның ауруға оңайлықпен мойын бұрмауы заңды секілді. Шын мәнінде алғашқы жылдары апамның өлімін қабылдау қиын болды. Бөлмесіне кіргім келмейді, жолда, көліктерде радиодан оның дауысы естілсе, жылап жіберетінмін. Отбасымыз үшін сондай қиын кез болды. Немерелері де оның бөлмесіне кіргісі келмейтін. Бәрі апамызды еске түсіреді. Сөрелерден, қолданған заттарынан өзіне ғана жарасатын әдемі әтірінің иісі шығып тұратын. Апам қайтқан соң ол үйде тұра алмадық, кейін отбасымызбен Астанаға көшіп кеттік.– Сұқбатыңыз үшін рақмет!

Марал Бағланова: Апам жаны да, тәні де сұлу кісі еді

<a href="https://kyzylorda-news.kz/ru/">Kyzylorda-news.kz</a>. Соңғы кезде «садху терапиясы» немесе «шеге йогасы» деп аталатын шегеге тұру арқылы емделу түріне сұраныс артты. Аталған терапия әлемге Үндістаннан тараған. Физикалық, психологиялық денсаулыққа пайдалы екені де мойындалуда. Адамның табанында жетпіс мыңнан астам талшықтар болғандықтан, шегеге тұрудың қандай да бір маңызды әсері бар деуге болады. Оған қызығатын қызылордалық жастар да жеткілікті.Қызылордалық Жадыра Манатбекқызы садху терапиясымен айналысып жүрген маман. Жақында білікті маманмен сұқбаттасып, шеге терапиясының артықшылықтары жайлы көптің көкейінде жүрген сұрақтардың жауабын білген едік.– Жадыра, неліктен шеге терапиясын таңдадыңыз?– Өзім Қызылорда қаласында дүниеге келдім, қазір де осы қаланың тұрғынымын. 3 баланың анасымын. Кішкентай кезімде медбике болып, адамдарға көмек беруді армандайтынмын. Алайда әке-шешем медбике болуға рұқсатын бермеген соң, Алматы қаласында орналасқан Т.Рысқұлов атындағы ҚазЭУ-де білім алуға тура келді. Университет бітірісімен тағдыр жолықтырған жолдасыммен бас қосып, өнегелі отбасыға келін болып түстім.Қазіргі кезде жолдасымның жеке кәсібінде есепші болып жұмыс істеймін. Сонымен қатар «шеге терапиясымен» де айналысып жүрген жайым бар. Неге шеге терапиясы дерсіз? 2021 жылдың жаз мезгілінде қатты күйзеліске түстім. Жолдасым қолдау көрсеткенімен жаным тынышталмады. Ішімде бір кедергінің бар екенін сезгендеймін. Бірақ ол не? Сол кезде осы терапияны іздестіріп, ерекше емдеу түрімен таныса бастадым. Әлі Қазақстанға келмеген болатын, ресейлік мамандарды қарап жүрдім. Күзде Алматы қаласында бар екенін біліп, алды артыма қарамай жолға шықтым. Шыны керек, шегеде тұрғандағы сезімді айтып жеткізу мүмкін емес. Терапияны қабылдаған адамдар ғана біледі. Оңай терапия емес екеніне көзім жетті. Бірақ ерік-жігерімді жинап, жақсы жаққа өзгеруге бет бұрдым.– Шеге терапиясының ерекшелігі неде?– Адамның табанында 70 мыңнан астам жүйке нүктесі бар. Сол нүктелерді басу арқылы қан айналымы жақсарады, гормондар қалпына келеді, ұйқы, бүйрек үсті безінің жұмысы жақсарып, ол барлық сезім мүшесінің жұмысына оң әсерін тигізеді. Шегеде тұру көптеген ауруға ем. Себебі көп ауру қан айналымының дұрыс болмауынан туындайды. Шегеде тұрудың негізгі үш әсерін атап өткен жөн. Физиологиялық әсері бар, яғни, адамның салмағына байланысты акупунктура нүктелеріне шеге қысымы ағзада тазарту, қалпына келтіру және емдеу процестерін бастайды. Бұл ұзақ мерзімді, созылмалы ауруларды жеңуге мүмкіндік береді.Энергиялық әсері айтпаса да түсінікті. Қытай медицинасының көзқарасы бойынша адамдағы барлық ауру энергияның дұрыс емес ағынынан туындайды. Демек қандай да бір ауруды емдеу үшін денедегі энергия ағынын үйлестіру қажет. Сонымен бірге адамдар канша жыл өтсе де, өкпе-ренішін ішінде сақтап, кешіре алмай, энергиясын кұртады. Осындай өкпе-реніш жинала беріп, одан шаршаған адам ағзасы өзін өзі лақтырып жібереді де, түрлі ауру болып шығады. Мысалы инсульт, неврит.Психологиялық әсері бар екенін көбісі түсіне алмауы мүмкін. Алайда шегеде тұру күйзеліске төзімді бола түсуге, бір нәрсеге шоғырлануға, сананы, ерік-жігерді дамытуға мүмкіндік береді. Кез келген саналы адам үшін өзінен артық жау жоқ. Яғни ең маңызды жеңіс – Өзіңді жеңу.– Жан мен тән байланысы дейсіз ғой…– Иә, адамның ішінде не болып жатқаны физикалық денсаулығынан көрініп тұрады. Көбіне депрессияда жүрген адамдар өткен шақпен өмір сүреді. Басынан өткен небір қиындықтарды ойлап, сол кездегі ой мен сезімдерден шыға алмай жүреді. Шеге терапиясы бәрін қабылдауды, қазіргі сәтпен өмір сүруді үйретеді.Жан мен тән – бір-бірімен тығыз байланыстағы үйлесімділік. Қиналғанда жанын емдеу үшін тек психологпен сөйлесіп, қабылдауына барудың қажеті жоқ. Терапиядағы ең басты ерекшелік – ауруды сезіну. Ауыр күйзелісте жүрген адам өз денесін, жанын да сезбей қалады. Яғни, робот секілді күй кешеді.Шеге терапиясы физикалық ғана емес, психологиялық терапия. Тұрақты айналысқан адам күйзелістен алыс жүреді, әрі иммунитеті жоғарылайды, ағзада зат алмасу жақсарады. Адам өз денесін босаңсытып, шегеде тұрғанда түрлі сезімді кешуі мүмкін. Біреуі айқайлайды, біреуі жылайды, біреуі күледі. Аз уақыттан соң адам садху тақтасында тұрғанда саналы түрде эмоциясын басқаруды үйренеді. Маған әртүрлі жастағы адамдар келеді. Көпшілігі 25-45 жас аралығында, ең үлкені – 72-де.

Жадыра Манатбекқызы: Терапия түрлі ауруға ем

<a href="https://kyzylorda-news.kz/ru/">Kyzylorda-news.kz</a>. «Ақпарат кімнің қолында болса, сол әлемді басқарады» деген әйгілі сөздің салмағы күннен күнге сезіліп келеді. Дегенмен ақпараттың сапасымен бірге оны жылдам жеткізу, қабылдауға ыңғайлы, «тілге жеңіл, жүрекке жылы тиетін» форматта ұсыну маңызды. Қажетті ақпаратты бір минуттың ішінде қамтамасыз етіп, қолжетімді ететін бірден бір жол – сайт пен қосымшалар. Уақыт көші қанша алға жылжып, әр салада техно¬логиялық өзгерістер орнағанмен сайт құрастыру саласы ілгерілемесе, маңызынан айырылған емес. Осы орайда қызылордалық сайт маманы Алмагүл Айтмағамбетовамен қызықты саланың қыр-сыры жөнінде сұқбаттасқан едік.– Алмагүл Аманжолқызы, бұл саланы неге таңдадыңыз?– Мамандығым – IT саласы. Негізі қазақ-түрік лицейін бітірген соң осы салаға бет бұрып, Алматы қаласындағы Халықаралық Ақпараттық Технологиялар университетіне оқуға түстім. Университетте кәсіби білімімді жетілдіріп, күрделі саланың сан қырын көрдім десем болады. Өйткені 2012-2016 жылдары дәл осы оқу орнында жүріп көптеген жетістікке жеттім. 2016 жылы көптеген республикалық, халықаралық жобаға қатысып, жүлделі орындарға ие болдым. Олимпиадаларда топ жарып жүрдім. Өзім қатты қызыққандықтан маған бұл салада іздену, білім алу күш бере түсті. Оқуға түскенде бейімделу керек болды, өйткені дайындықпен келмедім. Ал оқып жүргенде осы саланы таңдағаныма қатты қуандым, дұрыс таңдау екенін ұғына түстім. Себебі мен сүйікті ісімді таптым.– Соңғы жылдары сайт маманы көбейгенімен сұраныс азайған жоқ. Қызылорда облысы бойынша бұл сала қаншалықты дамыған?– Шыны керек, Қызылорда бойынша ақпараттық технология саласы төмен көрсеткіште. Басқа қалалармен салыстырсақ, бізде бұл бағытта арнайы жобалар, конкурс өткізілмейді. Оқып жүргенімде Қызылорда қаласына арнап дисконттық сервис түрінде сайт жасағым келгені есімде. Жасап, енгізіп көрдім. Бірақ сұраныс болған жоқ. Себебі біздің халық оған дайын емес еді. Сайттың қолданысы аз, сондықтан сұраныс та жоқ.Дегенмен мойындау керек, жылдан жылға жұмыс бірізденіп келеді. Сервистік мекемелер, тамақтанатын орындар арнайы сайт ашып, ақсап тұрған тұсты қолға алуда. Осылай халық сайтты қолдануға бейімделеді. Бірақ сайтты қолдану, онымен жұмыс жүргізу толық дамымаған. Теңіз де тамшыдан құралады ғой. Уақыт өте бұл саланы дамытып, басқаша көзқараспен қарайтын, сайтты жандандыратын кезге жақындап келеміз.– Сайт жасаудың қиындығы неде?– Сайт жасап, бағдарлама құрудың мамандар түсінетін бірнеше тілі бар, яғни әр адам өзі қалаған, өзіне ұнайтын тілді пайдалану арқылы оны құрастырып шығады. Әр программистің өзіне байланысты. Негізі сайт жасаудың ешқандай қиындығы жоқ. Қазіргі кезде қажетті дайын платформалар да бар. Бір күннің ішінде жасап шығуға болады. Нөлден бастап, арнайы білімсіз де кез келген адамға сайт жасап шығаруға мүмкіндік бар. Бірақ көп уақыт шығындалады. Бәрі сайттың бағасына, күрделілігіне байланысты. Дегенмен маман ретінде ешқандай қиындығы жоқ дей аламын. Ал сайт жасаудың рахаты – адамдардың өмірін жеңілдетуге, уақытын үнемдеуге септігімізді тигізе алатынымызда. Біздің қаладағы бірнеше ресторан сайт арқылы жұмыс жасайды. Ол тұтынушыға да, қызмет ұсынушыға да өте ыңғайлы.– Қосымша курс өткізіп, шәкірт тәрбиелеу жоспарда бар ма?– Иә, мұндай жоспар бар. Қазір Назарбаев зияткерлік мектебінде жұмыс істеп жүрмін. Оқушыларыма сайт жасауды, программа тілін үйретудемін. Ал қосымша шәкірт тәрбиелеу, арнайы курстар жасау ойда болғанымен, әзірге уақыт тапшы. Мүмкіндік болса әрине, бұл идеяны іске асырамын. Өйткені қызылордалық жастардың ақпараттық технология саласындағы сауатын арттырып, білімін жетілдіруге аз да болса ықпал еткім келеді.– Телефонға арналған қосымша жасаумен де айналысады екенсіз…– Иә, оны да университет қабырғасында жүргенде үйреніп, android пен ios платформасына бірнеше қосымша жасадым. Ойын бағдарламаларын құрастырып, плеймаркетке енгізген едім. «Қайсар» футбол клубына да арнайы қосымша құрастырғанбыз. Телефонға арналған қосымшаларды жыл сайын техникалық тексерістен өткізіп, жаңартып отыру керек. Негізі мұндай қосымшалар сайтқа қарағанда өте ыңғайлы. Халыққа сайтты ашып, сілтемеге өткенге қарағанда қосымшаны жүктеп алып, сол арқылы ақпарат алу тиімді деп ойлаймын.– Бір ерекшелігі, сайт құрастырумен онлайн айналысуға да болады. Тапсырысқа келген бір сайтты жасап шығаруға қанша уақыт қажет?– Өзім университет бітіргеннен кейін біраз уақыт фрилансер боп жұмыс істедім.Себебі интернеттегі платформалардан онлайн түрде тапсырыс қабылдап, сайт жасау арқылы ақша табуға мүмкіндік бар. Бұл жасөспірімдер мен декреттегі қыз-келіншектер үшін тиімді дүние. Өзім де декретте отырғанда сайт, телефонға арналған қосымшалар жасау арқылы ақша таптым. Интернет арқылы, тіпті, Америка сияқты ірі мемлекеттерден де сайт жасауға тапсырыс алып, жұмыс істеуге болады. Ол жақтың төлемақысы да жоғары.Ал бір сайт жасап шығаруға кететін уақыт қолданатын тәсілге байланысты. Жоғарыда айтқанымыздай, дайын платформалар арқылы құрастырсақ, бір күнде жасап шығаруға болады. Интернет дүкендерге арналғандай бірнеше беттік, көпфункциялы, күрделі сайтты жасап шығару 2-3 күн немесе бір айға дейін созылуы мүмкін.– Сайт жасау шығармашылық жұмыс десек те артық емес…– Дұрыс айтасыз, бір сайтты жасау үшін құрылымдық жағынан бөлек оның дизайны, жазбаның тартымды шрифті, суреттер мен ұсынылатын қызметтің ақпараты дұрыс орналасуы керек. Мұның бәрі – шығармашылық жұмыс. Сондықтан сайт жасауда арнайы команда болғаны дұрыс. Үлкен қалаларда сайт жасаумен айналысатын арнайы компаниялар бар. Оларда дизайнер бөлек, менеджер бөлек, бірнеше маман құрам болып қызмет етеді. Мұндай жағдайда сайт әрі сапалы, әрі тез жасалып шығады.Өз тәжірибемде біраз уақыт бұрын бір компанияда Қызылорда қаласына қатысты портал жобасына қатыстым. Әкімшіліктің тапсырысы бойынша өңіріміздің геопорталын жасауға атсалыстым. Бұйырса, жақында қолданысқа енуі керек. Білуімше, Қызылорда қаласында да сайт жасаумен айналысатын бірнеше команда, кішігірім компаниялар бар.– Сұқбатыңыз үшін, рақмет!

Алмагүл Айтмағамбетова: Сайт жасау саласы сұраныста

<a href="https://kyzylorda-news.kz/ru/">Kyzylorda-news.kz</a>. Кез келген адам туралы өзінен бұрын киіну стилі айтады. “Қонақты киіміне қарап қарсы алып, ақылына қарап шығарып салатын” деген қазақ осыны меңзеген болар. Заман өзгеріп, құндылықтар ауысқанымен, киім өндірісі, сән әлемі қоғамнан маңызын жоғалтпай, керісінше, жаңалық жасау арқылы жаңа даму жолына түсіп, қажеттілікке айналып барады. Әсіресе, жастардың арасында стильге қатысты қызығушылық жоғары.Осы орайда қызылордалық «Jadior» жеке брендінің иесі, жас киім дизайнері Жадыра Құлмырзаевамен жеке кәсібі, тігіншілік өнері жайлы сұқбаттасқанбыз.– Киім тігу кез келгеннің қолынан келе бермейді. Бұл салаға қызығушылығыңыз қашан басталды?– Баланың дарыны, қарым-қабілеті кішкентайынан білінетіні рас. Есімді білгелі сурет салуға, тігінге қызыққанның бірімін. Бала кезімнен киім дизайнері болуды армандап, осы мамандықты таңдадым. Ол кезде қолда манекен жоқ, үйде отырып үйренетін ютуб жоқ. Болмаған соң домбыраны манекен етіп, белдемше тігетінмін. Ал 7-8 сыныптарда өз қатарластарыма белдемше, көйлектер тіге бастадым. Анамның көйлектерін «бұзып», өзіме басқа нәрсе тігіп алушы едім. Яғни киім тігуге деген алғашқы қызығушылығым мектеп кезде басталды.Бір оқиға ерекше есімде қалыпты. Үйде әжемнің қол машинасы бар-тұғын. Ешкім жоқта, тығылып отырып пайдаланамын. Үйдегілер оны білмейді. Машинаның инесі сынып қала беретін. Сондай кездің біріде анам: «Осыны үнемі кім сындырады?» деп қалды. Ұялдым да, ешкім жоқта машинаны пайдаланып, киім тігетінімді, инесін мен сындырғанымды мойындап едім, анам сол ескі машинаны маған сыйлыққа берді. Қуандым. Сол күннен бастап анамның киілмей қалған көйлектерін, пальтоларын өзіме шақтап тігіп алатын болдым. Сосын дәптерге неше түрлі қыздардың суретін салып, қиялымдағы көйлектерді кигізіп қоямын. Байқасам, бала кезімнен-ақ осы салаға нақты таңдау жасап, бет бұрыппын. – Қолынан іс келгенмен, көбінің кәсіп бастауға батылы жетпейді. Өз оқиғаңызбен бөліссеңіз…– Мектепті бітірген соң Қызылорда қаласындағы Қорқыт ата университеті физика-математика факультетінің жеңіл және тоқыма өнеркәсібі деген мамандығына оқуға тапсы¬рып, игеріп шықтым. Бір жағынан инженер-педагогпын. Бұл мамандықтың ішіне барлығы кіреді. Педагог, технолог, тігінші болуға да мүмкіндік бар. 2005 жылдан бастап Қармақшы ауданындағы №2 балабақшада тәрбиеші боп жұмыс істедім. Сол кезде балабақшаның балаларына арнап киім тігіп жүрдім, үйден де қосымша тапсырыстар қабылдайтынмын. Ал 2010 жылдан бастап №105 орта мектепте технология пәнінің мұғалімі ретінде қызмет ете бастадым. Онда 3 жыл жұмыс істедім де, кейін Қызылорда қаласына көшуімізге байланысты ұстаздық қызметті аяқтадым. Осылайша өз арманыма нақты әрекет жасайтын кезең басталды. Әлі есімде. Қаладағы бір дүкеннің бұрышынан жалға орын алып, бір түйір тігін машина, бір үтікпен кәсібімді бастадым. Ол кезде мақсатым ақша тауып, байып кету емес. Өзімнің жан рақатым үшін жақсы көретін ісіммен айналысқым келді. 200 теңгеге тапсырыс қабылдап жүрсем де, уақыт өткен сайын қызығушылығым арта түсті. Нәтижесінде бүгінгі күнге дейін 3 тігін цехын ашыппын. Сондықтан ал¬ды¬мен кішкентай болса да тұрақты әрекет керек. Ең маңыздысы – ойға келген нәрсені бастау.– Жеке брендіңізді жасау идеясы қалай келді?– «Jadior» – қызылордалық бренд. Бұл брендтің пайда болуына жастарға, әйелдерге сәнді киім, ерекше дизайнерлік туындыларды ұсынсам деген ішкі қалауым әсер еткен шығар. Бізде қырғыздардың, өзбектердің киіміне сұраныс көп қой. Өзіміздің киім де сұранысқа ие болса, ұлттық киім өндірісіне өз үлесімізді қосу арқылы өзге адамдарды да жұмыспен қамти алсақ деген ой болды. Негізінен жеке брендті жасауға түрткі болған өз өмірім, тұрмыстағы жағдай десек, артық емес. Өзіме бір ерекше киім іздесем, таба алмайтынмын. Көйлек алсам, міндетті түрде өзгертіп, өзім қалағандай болу үшін реставрация жасаймын. Осындай жайттардан соң неге өз брендімізді шығармасқа деген ой туындады. Қазіргі таңда азғантай ғана коллекция шықты. Алайда барлығына ұнап жатыр екен. Тұтынушылардан жағымды пікір естіп, алғыс алып, одан сайын қанаттана түстік. Бұйырса, алдағы уақытта коллекциямыз көбейіп, жаңа сән үлгісіндегі, сапалы киімдердің саны артатын болады.– Жадыраның туындыларына қызылордалықтардың көзқарасы қалай?– Көйлектегі ең маңызды нәрсе оны киетін әйел. Тігін сән саласына жататындықтан, бізде әйелдерге арналған киімдерге тапсырыс көп. Тойларға, кешкі кездесулерге арналған, күнделікті киюге арналған көйлектер тұрақты сұраныста. Сонымен бірге стандарттан тыс дене мүсініндегі толықтау немесе тым арық келген қыз-келіншектер өзіне сай, арнайы киім тіктіріп жатады. Көбіне реставрация жасаймыз. Қысқарту, ұзарту, басқа элемент қосу деген секілді. Тапсырыспен перделер де тігеміз.Жерлестеріміздің талғамы жоғары десек болады. Біздің брендтің туындыларына қызығып жатыр. Тіпті, намаз оқуға арналған ұзын көйлектер тігуге де ұсыныс тастады. “Алдағы уақытта тағы қандай киім шығады? Мүмкін, ерлер киімін де шығарарсыздар” деген сияқты ұсыныс-пікірлер де жоқ емес. Тапсырыс беруші риза болып, басқаларға бізді ұсына бастайды. Осылайша тұрақты тұтынушыларымыз көбейіп, жарнама өзінен-өзі жүзеге асуда. Өзім 2013 жылдан бастап ателье ашып, жеке жұмыс істей бастадым. Қазір тура 10 жыл болыпты. Ал жеке брендтің жұмысы енді қыза бастады.– Кәсібіңізге береке берсін!

Жадыра Құлмырзаева: «Jadior» жеке бренді қалыптасып келеді

<a href="https://kyzylorda-news.kz/">Kyzylorda-news.kz.</a> Қызылорда облысында ауылдық жерлердің өмір сүру сапасын жақсарту мақсатында бірқатар бағдарламалар жүзеге асуда. Мәселен, биыл «Ауыл-ел бесігі» арнайы жобасы аясында 46 елді мекенге 11,6 млрд. теңге бөлініп, 216 жоба жүзеге асатын болады. Бұл туралы Өңірлік коммуникациялар қызметінің ақпараттық алаңында өткен брифингте облыстық экономика және қаржы басқармасының басшысы Нұрғали Қордабай мәлімдеді.&nbsp;Сондай-ақ биыл облыста ауыл халқының табысын арттыру мақсатында «Ауыл аманаты» жобасы бастау алды. Жобаның мақсаты- ауылдық елді мекендерде және шағын қалаларда бизнес жобаларды іске асыру үшін үміткерлерге шағын кредит беру.&nbsp;<blockquote>«Бүгінде «Ауыл аманаты» жобасы бойынша ауыл тұрғындарын шағын несиелендіруге дайындық жұмыстары жүргізілуде. Қазіргі таңда ауылдық округтер бойынша 454 жоба жасақталып, 300 жаңа жұмыс орындары ашылады деп күтілуде. Ауыл кәсіпкерлігін дамытудағы негізгі проблемалар кепіл мүлкінің өтімсіздігіне байланысты кредиттік ресурстардың қолжетімсіздігі болып отыр. Осыған сәйкес кәсіпкерге жүктемені азайту мақсатында несиеге кепілдік беру тетігі қолданылуда. Осы мақсатқа жергілікті бюджеттен жыл сайын 2 млрд. теңгеден астам қаржы бағытталуда. Мұнан өзге, өңір жастарының кәсіпкерлік бастамасын қолдау және жұмыссыздықты азайту мақсатында биыл 257 жасқа 2,5 пайызбен 1,3 млрд. теңге жеңілдетілген несие берілуде»,-деді Нұрғали Рахымшаұлы.</blockquote>Сонымен қатар «Дипломмен ауылға» жобасы аясында бүгінгі күні ауылдық жерлерде 5526 маман жұмыс істеуде. Олардың тұрғын үймен қамтамасыз етуге және біржолғы &nbsp; көтерме жәрдемақы төлеуге 17,5 млрд. теңге бөлінді. Ал, биыл 494 маманды ауылдық жерлерге жұмысқа тартуға 2,6 млрд. теңге бағытталды.

«Ауыл - ел бесігі»: Қызылордада биыл 216 жоба жүзеге асады

<a href="https://kyzylorda-news.kz/">Kyzylorda-news.kz.</a> Қызылорда облысында 17-21 сәуір аралығында «Мен және менің полицейім» атты акциясы өткізіледі.Акцияның мақсаты – кәмелетке толмағандардың құқықтық сауаттылығын қалыптастыру, отбасылық және адамгершілік-рухани құндылықтарды насихаттау, азаматтардың ішкі істер органдарына деген &nbsp; сенімін арттыру, сондай-ақ кәмелетке толмағандарды полиция жұмысымен таныстыру және қауіпсіздік шараларына үйрету болып табылады.&nbsp;Аталмыш акция шеңберінде бүгін Қызылорда облысы полиция департаменті басшылығының бастамасымен «Ашық есік күні» өткізілді. Мектеп оқушыларына полиция департаментінің мұражайы мен Жедел басқару орталығы, &nbsp;Жылдам қимылдайтын жасақ, &nbsp;Кинология &nbsp;орталығының есірткі заттарын анықтайтын иісшіл иттердің жасырылған жұмысы таныстырылды.Оқушыларға мұражайда департаменттің тарихы және ауған соғысы ардагерлері, ерлік бұрышы, &nbsp;ішкі істер органдарының ардагерлері Е.Демесинов және Ұлы Отан соғысының ардагері А. Сағымбайдың жеке заттары таныстырылды.Кәмелетке толмағандардың қауіпсіздігін қамтамасыз ету, қылмыстылық пен құқық бұзушылықтың &nbsp;алдын алу мақсатында Қызылорда қалалық полиция басқармасының Жедел басқару орталығының қызметкерлерімен &nbsp;бейнебақылау камералары арқылы &nbsp;қылмыстарды қалай анықтайтындығы &nbsp;көрсетілді.&nbsp;Оқушылар қала аумағында орналасқан бейнебақылау камералары қоғамдық орындар мен көпқабатты үйлерде, өздері білім алып жатқан мектептердің ішкі ғимараттарының аумағына және Жедел басқару орталығына қосылғандығын &nbsp;көрді.Бүгінгі іс-шараға қатысқан 200-ден астам оқушы &nbsp;өздерін қызықтырған сауалдарын қойып, тұшымды жауаптар алды.&nbsp;<img src="https://knadmin.beoblood.kz/uploads/p_6d87707d0e.jpg" alt="п.jpg"><img src="https://knadmin.beoblood.kz/uploads/p2_4440234cab.jpg" alt="п2.jpg"><img src="https://knadmin.beoblood.kz/uploads/p1_10fd18a7ad.jpg" alt="п1.jpg">

Қазақстан және Қызылорда облысының жаңалықтары