<a href="https://kyzylorda-news.kz/ru/">Kyzylorda-news.kz</a>. Қай халықтың да болмысын аша түсетін, елдігін танытатын әлбетте сол елдің ұлттық киімі. Оның құндылығы қашанда өзгелерден биік тұрған. Бірақ бір кездері қазақылығымызды танытатын қастерлі дүниенің кенжелеп қалуы, күнделікті тұрмыстан шеттеуі байқалды. Оған да себеп бар. Себебі егемендікке енді ғана қол жеткізіп, қайтадан аяққа тік тұру жолында көптеген қиындықтардан өттік. Тіпті киім түгілі, ішер асты табу да қиындап, халық өте ауыр күндерді көрді. Бірақ бүгінде жоғымыз табылып, кеткеніміз қайта оралды. Дәл осы уақытта өзгелерді әлемдік брендтермен таңғалдыра алмаймыз десек те артық емес шығар. Есесіне, сол әлемдік брендтердің орнын басатын ұлттық нақыштағы киімдерге сұраныс өте жоғары.&nbsp;Ұлттық киімдерге көнеден келе жатқан тек киім деп қарауға болмайды. Мұнда қазақтың тіршілігі мен танымы, терең тәрбиесі мен нағыз шеберлікті қажет ететін айшықты өнері жатыр. Расында ата-бабамыз киім тігу барысына аса қатты көңіл бөлген. Әр киімді киюдің өзіндік әдебі қалыптасқан. Тіпті киімге салынатын ою-өрнекке дейін жіті қадағалап, мағынасына терең үңілген. Ұлттық киімнің түрлерін дайындауда көшпелі қазақ халқы төрт түлiк малдың жүнi мен терiсiн пайдаланған. Жүндi иiрiп, мал терісін илеп, күнделікті киетін киімдерін дайындаған.Бірақ қазіргі таңда қолжетімділік артып, шикізатты тек жүннен емес, өзге де тауар түрлерінен тұтынушылардың талғамына сай, сұранысына бейімдеп әзірлеуге мүмкіндік мол.&nbsp;Осы мүмкіндіктерді пайдаланып, бүгінде ұлттық киімдерге жаңаша сән беріп отырған тігінші Тұрсын Жәнібекова. Жас кәсіпкер жаңа үлгідегі ұлттық киімдерді әзірлеудің тілін терең меңгерген. Осы салада жүргеніне 2 жыл ғана уақыт өтсе де, шебердің қолынан шыққан дүниелерге сұраныс өте жоғары.«Балапан ұяда не көрсе, өскенде соны алады» демейді ме?! Тәлімі мол тәмсіл Тұрсынның да осы салаға келуіне қозғаушы болған. Бала күнінен әжесі мен анасының жанында отырып, көрпе, құрақ құрауды, көйлек тігуді үйреніп өсті. Кейіннен мектеп қабырғасында жүріп моншақпен жұмыс істеуге машықтанған ол бала күнгі қызығушылығын кәсіпке айналдыруды ойлады.Арманның ақиқатқа айналуын ойлаған тігінші аудандық кәсіпкерлер палатасының кеңесімен өз жұмысын бастады. Мемлекеттің қолдауынан жігерленген Тұрсын жай ғана тігін тігумен емес, ұлттық нақыштағы дүниелер жасауды мақсат етті. Осылайша ұлттық киімдерге ден қойды. Ал былтыр «Бастау Бизнес» жобасы аясында LUNEVIL кестесі негізінде ұлттық киім тігу бағыты бойынша 1 225 200 теңге грантты жеңіп алған кәсіпкер «Бұл жастарға берілген үлкен мүмкіндік. Әркім өз кәсібін бастауға ниетті. Ал сол кәсіпті бастап, кейіннен түрлі қиындықтарға байланысты жарты жолдан тастап кетіп жатқандары қаншама. Оларды естіп, көріп жүрміз. Бірақ жас кәсіпкерлерге берілген қайтарымсыз грант осы қиындықтың нақты шешімі дер едім. Өйткені өз жұмысымды одан әрі дамытуды ойлап жүрген маған үлкен көмек болды. Қажетті техникаларды алдым. Олар маған бұрынғыдан да көп мүмкіндіктер сыйлады» дейді. Мәселен, ұлттығымызды танытатын киімдерді атай қалсақ, алдымен қазақтың түрлі ою-өрнегі мен кестелері еске түсе кетеді. Бірақ оның киімге қондыру үшін көптеген функциялар жасалуы қажет. Ал арнайы техникалар мен машиналар осы функцияларды орындауды жеңілдетіп, тапсырыстың барынша тез дайындалуына жағдай тудырады.Сондай-ақ өз сөзінде Тұрсын Сарқұлқызы:<blockquote>&nbsp;Негізінен ұлттық нақыштағы киімдердің салтанат құратын жері тойда екені жасырын емес қой. Талай қиындықтардан өтсек те, еліміз халықтың қазынасы саналған тойда қазақ деген ұлттың қандай боларын анық көрсетіп келді. Әлі күнге дейін солай. Қыз ұзатуға арналған ұлттық киімдерге өте көп тапсырыс түседі. Сонымен қатар тұсаукесер тойларына да тапсырыс беретіндер аз емес. Бірақ біздің ұлттық киімдеріміз тек осындай жерлерде қолданылады деп ойлауға да болмайды. Өйткені ұлттық нақыштағы заманауи киімдерді күнделікті тұтынғысы келетіндер бар. Әсіресе қыз балалар осы бағыттағы тапсырыстарды жиі береді. Қазіргі заманауи киімдерде ұлттық болмысымыздың көрініс табуы нағыз бақыт деп білемін, – деді.</blockquote>Жас кәсіпкердің алға қойған мақсаты да айқын. Алдағы уақытта «Сырғалым» брендімен көшшіліктің сұранысын орындағысы келеді. Қазақтың әрбір сырғалысы осы брендтің өнімін пайдаланып жатса, ауданның абыройы, кейіпкеріміздің бақыты емес пе?!"Шебердің инесі де, күймесі де – алтын" демекші, тапсырыс берушінің талғамына сай келетін ұлттық киімнің қалай дайындалатынын өте жақсы білетін Тұрсыннан алдағы уақытта тек жақсы жаңалықтар күтеміз.

Ұлттық киімді насихаттап келе жатқан кәсіпкер

<a href="https://kyzylorda-news.kz/">Kyzylorda-news.kz.</a> Қазіргі қоғамдағы ең өзекті мәселе бұқаралық спортты дамыту және жастарды спортқа көптеп тарту. Бұған байланысты мемлекет тарапынан арнайы бағдарламалар түзіліп және сол бойынша түрлі шаралар қолға алына бастады. Нәтижесі де жаман емес. Соның дәлелі ретінде біздің ауданымызды айтуға болады.&nbsp;Расымен, Жалағашта соңғы жылдары спорт саласында айтарлықтай серпін бар, оны мойындауымыз керек және онда «Наркескен» спорт клубының өзіндік қолтаңбасы барын да ешкім жоққа шығара алмас. Иә, аталған мекеменің жұмысы бүгінде бір ізге түскен. Оны ауданда "Наркескеннің" бастамасымен қолға алынған үлкен додаларға, жалпы ауқымы кең спорттық жарыстардағы нәтижесіне үңілген адам оңай аңғарады. Бүгін дәл осы мекеменің бастамасымен қолға алынған тағы бір жарыстың куәсі болдық. Мемлекет және қоғам қайраткері Темірбек Жүргеновтың 125 жылдығына орай баскетболдан аудандық турнир өтті. Кент және ауылдық округтерден келген спортшылар арасындағы бәсеке тартысты болды. Шараны аудан әкімінің орынбасары Ғани Сүлейменов ашып, қатысушыларға сәттілік тіледі.&nbsp;<blockquote>«Бүгінгі спорттық шараның маңызы зор. Бір жағынан бұл мемлекет және қоғам қайраткері, ұлт зиялысы Темірбек Жүргеновтың 125 жылдығына орай ұйымдастырылып отыр. Жалпы Темірбек Қараұлының 125 жылдығы түркі әлемінде аталып өтіледі. Туған жері Жалағаш ауданында бірқатар шара қолға алынған. Бүгінгі спорттық сайысты соның бірі де бірегейі деп қарауға болады. Қатысушыларға сәттілік тілеймін, спортты серік еткен өздеріңіздей жастар мемлекеттің өркендеуіне еңбек ете береді деп сенемін», – деді Ғани Кенжеғараұлы.</blockquote>Мұнан кейін кент және ауылдық округтерден келген командалар жеребе бойынша қай топқа қай команда баратынын анықтады. Осылайша 12 команда 4 топ бойынша сайысып, өзара мықтыны анықтады. Жарыстың шымылдығы «Наркескен» мен «Таң ауылы» командалары арасында ойынмен ашылды. Бұл кездесуде орталық жігіттері қонақтарды кешірмеді. Осылайша 34:10 есебімен «Наркескен» басым болды. Мұнан кейін келесі топтағы аудандық полиция бөлімінің жігіттерінен құралған команда мен «Қаракеткен» командасы өзара мықтыны анықтады. Бұл кездесуде ауылдың жігіттері 15 ұпай айырмашылықпен алға шықты.&nbsp;Кент орталығындағы №201 мен №123 мектеп-лицейі арасындағы тартысты бәсекеде мемлекет және қоғам қайраткері атындағы білім ошағының бәсі биік болды. Ал «Жалағаш жастары» мәдениеттің жігіттерін 40:2 есебімен шаң қаптырды. Басқа да командалар арасындағы ойын тартысты өтті. Қорытындысында 4 топтан 4 команда шығып, жартылай финалда Есет батырдың жігіттері мен «Наркескен» командасы ақтық мәренің жолдамасын сарапқа салды. Аламесектен келген қонақтар қарсыласын 22:15 есебімен жеңіп, ақтық мәреге өтті. Ақсу ауылынан келген жігіттер мен №123 мектеп-лицейінен келген команда арасында ақсулықтардың бағы басым болды. Осылайша ақтық мәреде «Ақсу» мен «Есет батыр» командасы кубокты сарапқа салса, «Наркескен» мен «123 мектеп-лицейі» командасы 3 орынға таласты.&nbsp;Жарыс қорытындысымен Есет батырдың жігіттері бас жүлдеге лайық деп танылды. Сондай-ақ олар кубок пен қаржылай 50 мың теңгеге ие болды. Ал ақтық мәреде оларға есе жіберген «Ақсу» командасына 30 мың теңгенің сертификаты табысталды. Үшінші орынға «Наркескен» командасы лайық деп танылды. &nbsp; &nbsp;Жалпы, ауданда спорттың бұл түріне қатысты әңгіме өрбісе, Есет батыр ауылының аты қатар айтылады. Бұдан Аламесктегі жастардың баскетболға бейім екенін түсіне қоямыз. Бүгінгі турнирде де ауылдың жігіттері топ жарды. Кент және ауылдық округтерден келген командалар арасынан қарсылас шақ келтірмеген Ақарықтың жігіттері осылайша ауылға олжамен оралып отыр. Жарысты басынан аяғына дейін тамашалап, тақым қысып, жанкүйер болдық. Расында жігіттер бабында тұр. Тіпті алды 35-тен асса да, Бекет Әйтімовтың қимылына қарап, командадағы жастардан жас айырмашылығын аңғару қиын танымайтындарға. Одан кейінгі алды Мақсат Өмірзақ, басқа да команда мүшелері де қарап қалмады.

Жалағашта баскетболдан турнир өтті

<a href="https://kyzylorda-news.kz/">Kyzylorda-news.kz.</a> Спорт адам өмірінің бір бөлшегі. Сондықтан спортпен шұғылдану ісі жеке адамдар үшін ғана емес, жалпыхалықтық сипат алуы тиіс. Спорт – өмір, спорт – денсаулық, спорт – абырой. Бүгінде Жалағаш ауданында спорт саласы жанданып келеді. Әсіресе, жасөспірімдердің спортқа деген қызығушылығы артқан. Спорттың әр түрінен республикалық, халықаралық, әлемдік бәскелерде жоғары жетістікке жетіп, жеңіс тұғырынан көрініп жүрген жеткіншектер ауданымыздың абыройы. Өзге елде өз ұлтын, халқын танытқан жеңімпаздармен біз қашанда мақтанамыз, оларды құрмет тұтамыз. &nbsp; &nbsp; &nbsp; &nbsp;&nbsp;Жуырда жас спортшыларымыздың қоржыны тағы бір жүлдемен толықты. №13 олимпиадалық резервтің мамандандырылған балалар және жасөспірімдер мектебінің волейболдан жаттықтырушысы Ләззат Әбдіқалықованың шәкірттері республикалық командалық жарыста жеңімпаз атанды.Шымкент қаласында өткен қыстық чемпионатта жалағаштық волейболшы қыздар облыс құрамасы қатарында жүлделі бірінші орынды иеленді. “Жеңімпаз атану оңай, сол тұғырды ұстап қалу қиын” демекші, волейболшы қыздар көктемгі өтетін ел біріншілігіне де тыңғылықты дайындалған. Ыждағаттылық пен еңбектің арқасында Ұлыстың ұлы күні қарсаңында Өскемен қаласында волейболдан өткен 2010-2011 жылдары аралығындағы қыздар арасында көктемгі ел біріншілігінде Ақпейіл Маратқызы мен Назым Қанибай аймақ құрамасы қатарында өнер көрсетіп, бас жүлдені жеңіп алды. Осылайша өңіріміздің қайсар қыздары Сыр елінің мерейін тағы бір мәрте үстем етті.&nbsp;Аталған жарыста республиканың түк¬пір-түкпкірінен келген 21 команда бақ сынаған. Волейболдан облыстың құра¬масына ену оңай шаруа емес секілді. Ол үшін спортшы бірнеше жарыста бой көрсетіп, әдемі ойын мен чемпиондық мінезді көрсету керек. Ақпейіл мен Назым да өткен жылы күзде облыс құрама бапкерінің шақыртуымен команданың бірлескен жаттығуына қатысыпты. Содан бері жеңімпаз қос қарындасымыз бірде-бір жарысты қалдырмай қатысып, қысқа уақыттың ішінде мол тәжірибе жинақтаған.&nbsp;Жалпы, бұл спорт түрінен ел біріншілігі жылына 4 рет, яғни әр мезгіл сайын өтіп тұрады. Осылайша күзде Хромтау қаласында өткен республикалық жарыста Ақпейіл мен Назым бірінші рет облыстық команда қатарында ойнап, бесінші орынды місе тұтқан. Иә, жаттықтырушы да, спортшы қыздар да жеңістің оңай жолмен келмейтінін жақсы түсінеді.– Жарысқа барысында спортшыларымыз барын салып, терін төкті. Әрине, республиканың түкпір-түкпірінен жиналған қарсыластар осал емес. Бәрінің мақсаты – чемпион болу. Сондықтан өрендерге жеңіс оңай келмеді, – дейді білікті бапкер Ләззат Әбдіқалықова.&nbsp;Иә, жиырма жылдан аса уақыт жаттықтырушы болып еңбек етіп келе жатқан Ләззат ауданымызда бірнеше қайсар да қабілетті спортшы қыздарды, чемпиондарды тәрбиелеп, аудан спортының дамуына елеулі үлес қосып келеді.&nbsp;<blockquote>«Шүкір, ауданымыз мықты спортшылардан кенде емес. Спорттың тілімен айтсақ, өсіп келе жатқан жүйріктерге тәртіп пен төзімділік керек. Оның барлығы үйдегі ата-ана мен мектептегі ұстазды сыйлаудан басталады. Оған спортта жүрген бапкерлерді де қоса аламыз. Әрбір жаттықтырушы шәкіртінің жаман болғанын қаламайды, ерсі қылық жасауына жол бермейді. Сосын әрбір спортшы алдына мақсат қойып, әрдайым өзін бабында ұстап, бос уақытты құр өткізбей, жаттығу жасап, залда болуы қажет. Өйткені барлық жетістік, жеңіс төккен тердің, еткен еңбектің арқасында келеді. Санадағы қорқынышты сылып тастап, психологиялық тұрғыдан мықты болуы шарт. Сонда ғана барлығы оңынан болады. Айналып келгенде жаттықтырушымен тығыз байланыста болып, берілген тапсырманы артығымен орындау қажет. Соның барлығы тәртіппен келеді. Көріп тұрғаныңыздай, бүгінде еңбегім елеусіз емес, жетістігіміз жетерлік, шәкірттерім жүлдемен оралып жүр», – дейді Ләззат Әбдіқалықова.</blockquote>Айта кетейік, 2019 жылы Жаңақорғанда өткен 2006-2007 жылғы жасөспірімдер арасындағы сайыста воллейболшы қыздар үздік үштікке ілінді. Ал, Ақерке деген шәкірті облыс құрамасына еніп, Петропавл қаласындағы республикалық жарысқа қатысып, жүлделі орынға ие болған. Сондай-ақ былтыр Талдықорған қаласында өткен ауыл жасөспірімдерінің ойындарында облыс құрамасына енген шәкірті Нұрсұлу Мырзаш та жүлделі І орынды иеленген. Осылайша Нұрсұлу спорт шеберіне кандидат дәрежесін қорғап, аудан тарихында волейболдан бірінші рет осындай үлкен жетістікке жеткен қыздың бірі болды. Ақпейіл мен Назым да жеңімпаз апаларының жолымен жүруді мақсат етіп, еліміздің көк туын әлемдік додаларда желбіретуді көздейді.Айта кетейік, бүгінде болашағынан үлкен үміт күтіп отырған Ақпейіл Маратқызы №202 орта мектептің, ал Назым Қанибай 246 орта мектептің озат оқушылары. Жеңімпаз қыздар тек спортта ғана емес, мектеп қабырғасында да түрлі танымдық шараларда бой көрсетіп жүрген белсенді оқушылар қатарында екен.Кез келген мықты спортшының артында білікті бапкер мен жанкешті жат-тықтырушы тұратыны анық. Жеңіс пен жеңілісті спортшымен бірдей көтеретін мамандар көп жағдайда көзден тасада қалып жатады. Жаттықтырушы спортшының спортқа деген алғашқы қадамын басқызып, кәсіби спорттағы жолын бағдарлап, нағыз спортшы ретінде қалыптастыруға негіз болады. Түптеп келгенде, спортшыны жеңіске де, жеңіліске де жетелейтін жаттықтырушы болып табылады. Тәлімгерлік – көзге көріне бермейтін жұмыс. Осы орайда біз таудай жауапкершілік, асыл үміт пен мықты сенімді бірдей арқалаған Ләззат Әбдіқа¬лықова мен талапты да талантты шәкірттері өңіріміздің абыройын әлі де асқақтатарына сенеміз.

Жалағаштық саңлақтар көк байрақты желбіретті

<a href="https://kyzylorda-news.kz/">Kyzylorda-news.kz.</a> &nbsp;Денсаулық сақтау саласы – қай елде де, қай қоғамда да ең ауқымды сала. Өйткені ол саланың қызметі адам өміріне тікелей қатысты. Бұл салада күні-түні жұмыс бір сәт тыншымайды. Медицина саласындағы қызметкерлердің мойынында адам өмірінің жауапкершілігі бар. Сондықтан бұл салада жұмыс істейтін мамандар білім алып, тәжірибе жинаудан бөлек, сырқаттанған әрбір науқастың алдындағы жауапкершілігін сезінуі тиіс. Сол үшін де олар аяулы, құрметті.&nbsp; &nbsp;Сондай аяулы, құрметті ақ халатты абзал жанның бірі – Сандуғаш Рахымбекқызы. Сандуғаш Жетісай қаласындағы медициналық оқу орнынан білім алып, еңбек жолын 2003 жылы Жалағаш аудандық ауруханасында бастапты. Бес жылға жуық уақыт аудандық аурухананың қабылдау бөлімінде мейірбике болады. Өзінің мамандығына аса сүйіспеншілікпен қарайтын Сандуғаш Рахымбекқызы басы ауырып, балтыры сыздап келген науқастарға дәрігерлік қызметінен бөлек, адами жүрекпен көмек көрсетіп, көптің алғысын алып, құрметіне бөленді. Осылайша басшылық құрам ақ халатты абзал жанды 2007 жылы «Хирургия» бөліміне кезекші мейірбике етіп ауыстырады. Бас дәрігердің бұл бөлімге Сандуғашты кезекші мейірбике етіп тағайындайтындай жөні бар, себебі мұнда көбіне ауыр жағдайдағы науқастар түсетін, ал оларды дертінен айықтыруға жұмыс жасайтын мамандар бойында бірінші кезекте біліктілік пен жауапкершілік болуы керек. Бүгінгі сұхбатта оның бойында бұл қос қасиеттің барын аңғардық. Сөзі нық, жұмысы жүйелі, арнайы отырып сұхбат беруден де бас тартты және қарсы болатындай реті бар. Себебі, науқастарға дәрігер тағайындаған күнделікті ем-домын жасайтын уақыт еді. Бөлімдегі науқастардың бірінің қан қысымын өлшесе, енді біріне кеңес беруде. «Дәрігердің сөзі де шипа» деген нақылдың мағынасына кезекші мейірбике мен науқастар арасындағы диалог барысында тағы бір мәрте көз жетті.Сандуғаш Байкенова – жалағаштықтардың денсаулығын түзеуде уақытпен санаспай еңбек ететін абзал жандардың бірі де бірегейі. Оның жұмысы таңғы сағат 7:30-да әріптесінен кезекшілікті қабылдаудан басталады. Содан кешкі 20:00-ге дейінгі уақыты мұндағы науқастарға ем-дом жүргізумен өтеді. Кейде ауыр жағдайдағы науқастар бір күнде көптеп түсіп жатса, оның бір минут тізе бүкпей жұмыс істеуіне тура келеді. Солай бола тұра антына адал жан «менің уақытым таңнан кешке дейін» деп бұлданып көрмепті. Керісінше, «Дәрігер қай уақытта да қиын жағдайға дайын болуы керек» дейді ол.&nbsp;<blockquote>«Иә, дәрігер расында қай уақытта да қиын жағдайға дайын болуы керек. Себебі біз адамдарды ауруынан айықтырып, сырқатынан сауықтыруға жұмыс істейміз. «Хирургия» бөліміне қандай науқастар түсетінін айтпаса да жақсы білесіздер, біз оларды тексеріп, ем-дом жүргіземіз, күрделі жағдайдағы науқастарды отаға да біз дайындаймыз. Бастысы, жасап жатқан еңбегіміз еш кеткен жоқ. Біз үшін науқастың дертінен айыққанын көруден асқан бақыт жоқ. Науқастың сауығып, отбасына аман-есен оралғанын көргенде өзіміздің еңбегімізге марқайып қаламыз. Олардың бізге жаудырған алғысы жауапкершілікті еселейді», – дейді Сандуғаш Рахымбекқызы.&nbsp;</blockquote>2013 жылы бөлімге 4 науқастың күрделі жағдайда түскені кезекші мейірбикенің әлі күнге дейін көз алдында. Ақ халатты абзал жан барлығының өмірін ажалдан арашалағысы келеді, бірақ іште мейірбикеден бір өзі, алайда барлық науқасты отаға дайындау қажет. Абырой болғанда күндіз кезекшілікті тапсырған әріптесі де оның қасына көмекке келеді. Осылайша бірігіп 4 науқасты отаға дайындайды. Барлығына ота сәтті жасалып, кейін науқастар аман-есен отбасына оралыпты. Бұдан олардың бойындағы жауапкершіліктен бөлек ұжымның ауызбіршілігін де аңғарасың. Міне, осылайша көлік апатына түскен жерлестеріміз аман қалыпты.&nbsp;Кейіпкеріміз жайында толығырақ білу үшін әріптестерін де, ондағы науқастарды да әңгімеге тарттық. Бәрінің айтатыны бір сөз. Абзал жандар оның бойындағы жауапкершілігін, науқастарға жанашырлығын тілге тиек етсе, ем алушылар оның қолы жеңіл деп мақтай кетті. Кез келген адамның артынан мұндай жақсы әңгіме ермейді, елдің берген бағасы оның абыройын арттырады, жұмысына шабыт береді, өзі де жоғары бағаға лайық еді.&nbsp;Қазір Сандуғаштың жетістігін бірер сөзбен айтып тауысу мүмкін емес, аудан әкімінің, «Amanat» партиясының бірнеше рет Алғыс хатымен, Құттықтауымен марапатталды. Сондай-ақ былтыр аудан бойынша мейірбикелер арасында «Ең үздік мейірбике» номинациясын иеленді.

Жалағаштағы алтын қолды дәрігер

<a href="https://kyzylorda-news.kz/">Kyzylorda-news.kz.</a> Ел келешегі – жастар. Ал, елдің келешегін сеніп тапсыратын сол жастарымызға мемлекет тарапынан қамқорлық, қолдау болуы тиіс. Бұл тұрғыда мемлекет жастар саясатына мейілінше көңіл бөліп, олардың жаңа қоғам қалыптастыруға деген талпыныстарын қолдап, сол бағыттағы идеяларын жүзеге асыруына қажетінше жағдай жасап отыр. Апта басында Жалағаш ауданы әкімі Асқарбек Есжановтың төрағалығымен аудан әкімі жанындағы жастар ісі жөніндегі кеңес отырысы өтті.Мақсат – аудандағы жастар саясатын жүзеге асыру бағытындағы жұмыстарды талқылау, таразылау, сарапқа салу. Алқалы жиынға бөлімдер мен мекеме басшылары және кент, ауыл әкімдері қатысты. Күн тәртібіне енген төрт мәселе қаралды. Кеңес отырысында көтерілген мәселелерге сәйкес жастарға бағытталған мемлекеттік бағдарламалардың орындалу барысы туралы, оның ішінде NEET санатындағы жастарды жұмыспен қамту, кәсіпкерлікке баулу бағытында атқарылған жұмыстар таразыланып, алдағы жоспарлар нақтыланды. Сонымен бірге жастар мен жасөспірімдер арасында қылмыс пен құқық бұзушылықтың алдын алу, Қаракеткен және Мәдениет ауылдық округінде мемлекеттік жастар саясатын жүзеге асыру бойынша атқарылған жұмыстар мен алдағы міндеттер туралы бөлім басшылары мен ауыл әкімдері хабарлама жасады. Алайда, нақты істен құрғақ сөз көп. Қағаз жүзіндегі жылдық жоспар, бір сарынды жұмыстарға көңілі көншімеген аудан басшысы бұл бағыттағы жұмысты әлі де ширатып, жандандыра түсу керектігін тапсырды. Әсіресе, жастар арасындағы кәсіпкерлікті дамыту бағытында берілетін қайтарымсыз гранттардың шикі тұсы көп. Грантқа ие болғандар бар, нәтиже аз. Себебі жастар ұсынатын тың инновациялық бизнес жобалар жоқ. Барлығының айналып келіп тоғысар тұсы атакәсіп – мал шаруашылығы. Дұрыс, аграрлы аудан болған соң, мал шаруашылығын дамытқан жөн. Алайда, мемлекет үміт күтіп отырған кәсп жасауға ынталы жастардың тым болмаса жартысы заманауи жаңашыл жобалар дайындауы керек қой.&nbsp;Бұл ретте аудан әкімі Асқарбек Темірбекұлы кент және ауылдық округ әкімдеріне, тиісті бөлім, мекеме басшыларына бірқатар тапсырма берді. Атап айтқанда, NEET cанатындағы жастардың кәсіптік оқыту, қайта даярлау курстарынан өтуін қамтамасыз етіліп, жастарды мемлекеттік бағдарламаларға, кәсіпкерлік мақсатта өткізілетін гранттық конкурстарға қатысуын және жаңа инновациялық жобалардың үлесін арттыру бағытында жұмыстар жүргізуді, мүмкіндігі шектеулі балалары бар отбасыларды әлеуметтік және психологиялық қолдау шараларын ұйымдастырып, жастарды тұрақты жұмыспен қамту бағытында шаралар қабылдап, жастарға арналған несие беру туралы ақпараттарды әлеуметтік желілерге жариялап және елді мекендерде түсіндірме жұмыстарын жүргізуді тапсырды.&nbsp;Сондай-ақ аудан басшысы түнгі мезгілде жасөспірімдердің ата-анасыз бел-гіленген мерзімнен тыс уақытта жүру жағдайларының алдын алу жұмыстары, учаскелік инспекторлардың бекітілген аймақтары бойынша жастардың тізімін жасап, нақты шаралар атқаруды, мектептер мен колледждерде жасөсіпірімдер арасында құқық бұзушылықтың алдын алу бағытында түсіндірме жұмыстарын күшейтуді, жүргізуші куәлігінсіз көлік тізгіндеген жастар мен жасөспірімдерді анықтап, күнделікті тұрақты түрде рейдтік шаралар ұйымдастыру қажеттігін де атап өтті. Бұдан бөлек, Мемлекет басшысының тапсырмасына сай жастар саясаты туралы заңға өзгерістер енгізіліп, елімізде 2023-2029 жылдарға арналған жеті бағыттан тұратын тұжырымдама әзірленгенін айтып, оған сәйкес ауыл жастарын кәсіби тұрғыда дамытып, кәсіпкерлік арқылы әлеуетін кө¬теру қажеттігіне тоқталды. Енді осы орайда аудандық кәсіпкерлік, өнеркәсіп және туризм бөлімі жастар арасында инновациялық жобаларды жүзеге асыру бойынша жас кәсіпкерлер форумын өткізуі керек. Сондай-ақ айтылған ұсыныстардың қатарында ауылдық жерлерде жылына кемінде 2 рет ауыл ақсақалдары мен жастардың бірлескен шараларын ұйымдастыру жоспары да бар. Ал жұмыспен қамту орталығы, аудандық полиция бө¬лімі, денсаулық, білім салалары бойынша да жүйелі жұмыстар атқарылуы тиіс.Айта кету керек, қазіргі таңда Жалағаш ауданында 14 пен 35 жас аралығында 10 966 жас тіркелген. Мемлекеттік жастар саясатын қаржыландыруға 2023 жылға жергілікті бюджеттен 18 млн теңге және жастарды дамыту мен қолдауға 4,2 млн теңге бөлінген. Мемлекеттік әлеуметтік тапсырыс шеңберінде 3 жоба жүзеге асырылады деп күтілуде. Дегенмен жастарды қолдау, мемлекеттік бағдарламаларға тарту және кәсіппен айналысамын деушілерге көрсетілетін көмек тоқтамайды. Әсіресе, жоғарыда айтқанымыздай, жастар ұсынатын бизнес жобалардың жаңашыл-дыққа бағытталуы да қадағалануы қажет.

Жалағашта жастар ісі жөніндегі кеңес өтті

<a href="https://kyzylorda-news.kz/">Kyzylorda-news.kz.</a>&nbsp;Бүгінде наубайхана ашып, өз кәсібін дамытып жүрген жастар жетерлік. Мемлекет тарапынан кәсіп бастаймын деген жандарға біршама мүмкіндік қарастырылғаны да белгілі. Сондай мүмкіндікті пайдаланып, халықты ас атасы – нан өнімімен қамтамасыз етіп жүрген кәсіпкерлер де баршылық. Кәсіп саласы тек қалада ғана емес, қалаға қарасты кент, ауылдық округтерде де жүйелі даму үстінде.&nbsp;Бүгінгі тақырыбымызға арқау болып отырған Аралқұм ауылдық округіндегі жас кәсіпкер – Ақару Өмірзақ. Ақару бүгінгі күні алғашқылардың бірі болып өзі тұратын аймақта наубайхана ашып, ауыл халқының ризашылығына бөленіп келеді.<blockquote>Бұл кәсіпке келуіме ең алдымен ауыл әкімі Кенжебек Жанназаров мырза ықпал еткен болатын. Ол кісі маған ауылға осындай кәсіп қажет деп бірнеше кеңес берген еді. Сол кезде мен өзім наубайхана кәсібін қолға алуға бел будым. Жалпы біздің ауылда кемі 4-5 дүкен бар. Олардың көбі нанды қаладан алдыртып жатады. &nbsp;Қаладан нан алдырудың өзі оңай шаруа емесі белгілі. Яғни, жолға кететін шығынның өзі біршама болып қалады. Сөйтіп, мен нан өнімін қаладан алдырмай-ақ, өзіміздің ауылдан неге жасап шығармасқа деген ойға келдім. Бұл ауылға келін болып түскеніме 3 жыл болды. Өзім түрлі тәттілер пісіріп, тапсырыс қабылдайтынмын. Кейін мемлекеттің қолдауымен қайтарымсыз грант ұтып алып, кәсібімді әрі қарай дамыттым. Шағын наубайхана болған соң, әзірге тек бір адамды ғана жұмыспен қамтып отырмын. Тұрғындар сұранысына байланысты нан өнімдерін дайындаймыз. Бүгінде күніне шамамен 100-дей нан пісіреміз. Халық қалтасына жеңіл болсын деген ниетпен төмен бағада үйден сатып жүрмін. Әлі де өз кәсібімді дамытып, кеңейту жоспарда бар,– дейді кәсіпкер Ақару Амангелдіқызы.</blockquote>Елімізді дамытушы күштердің бірі – жастар екендігі белгілі. Бүгінгі күні жастар мемлекет тарапынан берілген мүмкіндікті тиімді пайдалана отырып, өз кәсіптерін бастап жүр. Ақару да ауыл тұрғындарына түрлі нан өнімдерін ұсынып, алғашқылардың бірі болып наубайхана кәсібін бастаған. Алдағы уақытта жас кәсіпкерге табыс пен сәттілік тілейміз.<figure class="image"><img src="https://knadmin.beoblood.kz/uploads/8b11e260_c2e9_46db_af30_7bef7fbfd278_5c466b88ea.jpg" alt="8b11e260-c2e9-46db-af30-7bef7fbfd278.jpg"></figure>

Ауыл тұрғындары мемлекеттен грант алып кәсіп ашып жатыр 

<a href="https://kyzylorda-news.kz/">Kyzylorda-news.kz.</a> Қазалы ауданындағы Р.Бағланова атындағы мәдениет үйінде ауданға қарасты Сарбұлақ ауылындағы №78 мектептің оқушылары халық жазушысы, қоғам қайраткері Шерхан Мұртазаның «Домалақ ана» қойылымын сахналады. Қазалылық көрермендермен бірге театрландырылған тарихи сахналық көріністі &nbsp;тамашалауға Қазалы ауданының әкімі Мұхтар Оразбаев та келді.Қазақ жылнамасын ақтарып, қатталған тарих беттерін ақтарсақ, аты аңызға айналған абыз аналарымыз баршылық. Осылардың қатарындағы қасиетімен ерек тұратын «Домалақ ана» туралы оқиға – тарихи шындығымен дараланатын шығарманың бірі. Киелі сахна төрінде орындалған көріністе мейірімге толы ана махаббатының қуаты өте ауқымды әрі шынайы бейнеленді. Көрерменге береке-бірлік, тектілік пен имандылықты ұстану қажеттігі жайлы ой сіңірді. Ұшы-қиырына көз жетпейтін ұлан-ғайыр дала. Қос мергеннің аңшылығы. Суы сарқылған құдықтан Бәйдібек бидің Нұриланы өрме арқанмен шығарып алуы. Осыншама ауқымды оқиғаны шағын дерлік сахнаға сыйғызған оқушылардың шеберлігіне жиналған жұрт тамсана, шын ықыласымен қол шапалақтап, алғысын білдірді. Қойылымнан соң аудан &nbsp;әкімі Мұхтар Оразбаев сахнада жан-дүниесімен беріліп ойнаған оқушылардың актерлік шеберліктеріне риза болғандығын жеткізді. Шалғайдағы ауылдан осындай өнерлі өрендердің шығып келе жатқаны қуантатынын айтты. Аудан тұрғындарына ерекше көңіл-күй сыйлаған сарбұлақтық өнерпаздарға шығармашылық табыс тіледі.&nbsp;Сондай-ақ Сарбұлақ ауылдық №78 мектеп ұжымына арнайы алғыс хатты білім ошағының директоры, қойылым режиссері Гүлдәурен Рахатдинге табыстады.<blockquote>«Театр &nbsp;– &nbsp;тәрбие мектебі, театр – тәлім, рухани азық алар орда» деп ұлы жазушылар айтып кеткен. Сондықтан театр көрінгеннің ермегі емес, еңбек. Еңбектің көркемі. Көңіл көтерудің ғана орны емес, мәдени ошақ, идеологиялық құрал. Бүгін бір жан-дүнием рахатқа бөленіп, ерекше рухани азық алдым. Мектеп директоры мен мұғалімдері және мектеп оқушыларының осындай керемет қойылымды жоғары дәрежеде сахналап шығуы үлкен жетістік деп есептеймін. Жас өнерпаздардың қиялдарына қанат &nbsp;бітіп, бұдан биіктерге самғасын. Дарынды оқушыларды үлкен сахналардан көруге жазсын», – дейді кент тұрғыны Айдана Алдабергенова.</blockquote>

Қазалыда «Домалақ ана» қойылымы сахналанды

<a href="https://kyzylorda-news.kz/">Kyzylorda-news.kz.</a>&nbsp; Аудандағы ең ауқымды міндеттерді атқаратын аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімінің атқарған жұмысына тоқталып өтуді жөн көрдік.Бірнеше бағыттағы жауапкершілікті жүйелі әрі жемісті атқарып келе жатқан бөлім көлік инфрақұрылымын дамыту бойынша автомобиль жолдарын жақсарту бағытында оң нәтижеге қол жеткізген бөлімнің жұмысымен инфрақұрылымды дамытудың 2020-2025 жылдарға арналған «Нұрлы жол» мемлекеттік бағдарламасы аясында 6 жоба жүзеге асырылуда. 2021 жылы басталған аудандық маңызы бар «Самара-Шымкент-Қамыстыбас-Аманөткел-Жаңақұрылыс» автожолының құрылысы жалғасын табуда. Өтпелі кезең ретінде бекітілген бұл жоба биыл да жүйелі жалғасатын болады. Жұмыстың нәтижелілігі де әрқашан басты назарда ұсталады.Мұнан бөлек тұрғындардың басты сұранысындағы мәселелердің бірі болып келген аудандық маңызы бар «Қызылжар-Шөмішкөл» автожолының құрылысы да барыс жылында бастау тапты. Жол құрылысы басталып, бөлінген қаражат жолдың сапалы болуы үшін көзделген мақсатта жұмсалды.&nbsp;Сондай-ақ жол мәселесі бойынша маңызды сауалдардың бірі болып келген «Сазды елді мекеніне кіреберіс» автожолын орташа жөндеу жұмысы да өз деңгейінде жүргізілуде.Осында орташа жөндеу жұмыстары мұнан бөлек Бөген-Ақлақ, Қаратерең-Жаңақұрылыс, «Қызылжар елді &nbsp;мекеніне кіреберіс» автожолында да істеліп жатыр. Айта кетейік, мұның барлығы келесі жылға өтпелі жоба ретінде қарастырылған. Демек алдағы уақытта да тұрғындардың сұранысы толықтай қамтыла бермек.Мұнан бөлек «Ауыл – Ел бесігі» жобасы аясында Сексеуіл кентіндегі №231 мектептен темір жол өткеліне дейінгі автожолды орташа жөндеуге республикалық бюджеттен қаржы бөлініп, жолдың 2 шақырымы жөндеуден өткізілді. Жоба келесі жылға өтпелі болғандықтан қалған бөлігі де алдағы уақытта жөнделетін болады.Өңірлерді дамытудың 2020-2025 жылдарға арналған мемлекеттік бағдарламасының жүзеге асырылу барысында моно және шағын қалаларды дамыту бойынша жергілікті бюджет есебінен В.Терешкова, И.Панфилов көшелері орташа жөндеуден өткізілсе, қала көшелері мен аудандық маңызы бар «Самара-Шымкент-Сексеуіл» автокөлік жолдары ағымдағы жөндеуден өткізілді.Жылдың басты жағымды жаңалығы барша аралдықтың көкейіндегі қаладағы темір жол үстінен аспалы көпір салу болатын. Міне, осы мәселе бойынша 2022 жылы атқарылған жұмыстың нәтижесімен көпірдің техникалық-экономикалық негіздеме мен жоба-сметалық құжаттама әзірленіп, мемлекеттік сараптаманың оң қорытындысы алынды. Аудан бюджетінен бөлінген қаржыға мемлекеттік сатып алу жұмыстары жүргізіліп, мердігер де анықталды.Көпір мәселесі бойынша шешімін тапқан тағы бір сауал – Хан елді мекені тұсындағы қалқымалы көпірге қайта жаңғырту жұмыстары жүргізілуде. Жоба келесі жылға өтпелі болып табылады.Бөлімнің ауқымды жұмысының арқасында ауызсу мәселесі де шешімін тауып, Көнту елді мекеніне ауызсу желісі жүргізіліп, пайдалануға берілді. Ал «Арал қаласына кіреберіс» автожолын және қаладағы Р.Тұрымбетов, Б.Тәңірбергенов, Т.Әубәкіров, Н.Балапанов, А.Қаюпов көшелерін жарықтандыру жұмыстары жүргізілді.Өткен жылы Арал қаласындағы № 19 балалар мен жасөспірімдер спорт мектебінің бокс және күрес залдары газ жүйесіне қосылып, көгілдір отынның игілігін көріп отыр.Аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімі десе көпшіліктің есіне қаланың ажары мен сәулеті, сән-салтанаты оралары анық. Бұл бағыттағы жұмыстарды да ешкім жоққа шығара алмайды. Нақтырақ тоқталар болсақ, былтыр «Балықшылар» аллеясы, «Жалаңтөс Баһадүр» алаңына тиісті жұмыстар жүргізіліп жатса, қаладағы Бақтыбай батыр көшесін абаттандырудың І-кезеңіне бөлінген қаржыға жаяу жүргіншілер жолы салынды.Сонымен қатар аудан елді мекендерінде жол қозғалысы қауіпсіздігін қамтамасыз ету үшін аудандық маңызы бар автожолдар бойына қажетті 100 дана жол белгілері орнатылды. Жыл көлемінде қаладағы асфальт қабатымен жабдықталған көшелерге 3 мәрте жол сызбалары сызылып, 196 дана жол белгілері орнатылып, стандартқа сәйкестендірілді. Сондай-ақ М.Нұржаубаев-Әйтеке би көшелерінің қиылысында орналасқан бағдаршам жөндеуден өткізіліп, Бақтыбай батыр, «Жақсат» коммуналдық базары маңына, қаладағы «Оқушылар үйі», №13 орта мектебі мен №62 мектеп-лицейі алдына 7 дана жасанды жол кедергілері қойылды.Ауданның қарышты дамуы үшін қарқынды қызмет жасап келе жатқан бөлімнің алдағы уақытта да атқарар ісі қыруар болмақ. Себебі мемлекеттің басты капиталы саналатын ел азаматтарының сұранысы қашанда алғашқы қатарда.

Аралда мемлекеттік бағдарламалар жүйелі жүзеге асуда

<a href="https://kyzylorda-news.kz/">Kyzylorda-news.kz.</a>&nbsp; Санаулы күн бұрын «Amanat» партиясы ұсынып, Президент Жарлығымен қайта тағайындалған Үкімет басшысы Әлихан Смайылов өткен жылдың соңында Сыр еліне жұмыс сапарымен келген болатын.Өңірдің әлеуметтік-экономикалық дамуын көрді, қолға алынған жұмыстарға, бұл тараптан жасалған ұсыныстарға зер салды. Өнеркәсіп, инфрақұрылым, әлеуметтік нысандар жұмысымен танысып, өзекті деген мәселелерге қолдау білдіретінін жеткізді.Расында, өткен жылы облыста қандай жұмыс жасалды? Бұл турасында облыс әкімі Нұрлыбек Нәлібаев жуырда облыстық мәслихаттың VIII шақырылым сессиясында тарқатып айтып берген еді.Жалпы 2022 жыл облыс үшін табысты болды деуге негіз бар. Табысты болу дегеніміз – бар мәселе түбегейлі шешілді деген сөз емес. Әйтсе де, әлеуметтік-экономикалық макрокөрсеткіштер бойынша өңірлер арасында алға шығуын аз уақыттағы табанды еңбектің жемісі деп бағалаған абзал.Былтыр облыста өңдеу өнеркәсібінің көлемі 5,6, ауыл шаруашылығының жалпы өнімі 1,8, инвестиция тарту 26,8, пайдалануға берілген тұрғын үй көлемі 3,3, құрылыс жұмыстары 16,6, сауда көлемі 2,3 пайызға артқан. Осының ішінде инвестиция тарту қарқыны бойынша облыс 2021 жылмен салыстырғанда өңірлер арасында бірінші орынға тұрақтап, 100,6 млрд теңге артық орындаған.Сонымен қатар, индустрияландыруды дамытуда ілгерілеу бар. Бұл санатта құны 1 млрд теңгеден асатын 5 жоба жүзеге асырылған. Олар – жылына 200 мың текше метр бетон шығаратын зауыт, 324 тонна балық өңдейтін, 1056 тонна балық ұнын өндіретін, 630 тонна күріш ақтайтын зауыт және 23,4 мың тонна құрғақ құрылыс қоспаларын өндіретін цех.Мемлекет басшысының тапсырмасына сай Жалпыұлттық Бірыңғай жобалар пулы қалыптасқанын да білеміз. Оған құны 907 млрд теңге болатын 36 жоба енгізілген. Соның ішінде былтыр 5,1 млрд теңгенің 4 жобасы іске қосылған. Ал биыл 13,4 млрд теңгеге 9 жобаны жүзеге асыру міндеті тұр. Сайып келгенде, мұның өзі облыста экономиканы әртараптандырудың жанданғанын көрсетеді.&nbsp;&nbsp;

Сыр өңірінде былтыр 5,1 млрд теңгенің 4 жобасы іске қосылған

<a href="https://kyzylorda-news.kz/">Kyzylorda-news.kz.</a>&nbsp;&nbsp; Мемлекет басшысы Қасым-Жомарт Тоқаев жуырда өткен VІІІ сайланған Парламенттің бірінші сессиясында референдумнан кейін Конституцияның жаңа талаптарына сай билік тармақтарын түгел жаңғыртуға қадам жасалғанын айтты.<blockquote>«Халықтың көптен күткені осы еді. Конституциялық өзгерістерге сәйкес Президент сайлауы, Сенат, Мәжіліс және мәслихаттар сайлауы өтті. Референдумды қосқанда бір жылға жуық уақыттың ішінде өте маңызды 5 саяси науқан өткізілді. Оның бәрі аса күрделі кезеңге тұспа-тұс келді. Қаншалықты күрделі болса да, біз еліміз үшін өте қажет жолды қысқа мерзім ішінде жүріп өттік. Қазақстанның жаңарып, жаңғыра бастағанына жұрттың көзі жетті», деді Президент.</blockquote>Сондай-ақ, Мемлекет басшысы «Қазақстан – геосаяси аймақта түбегейлі реформа жүргізіп жатқан бірден-бір ел» деп нақтылады. Президент сөзінің пәрменін ой елегіне салып отырған боларсыз. Бір жылға жетер-жетпес уақытта бес бірдей саяси науқан өткізу, шын мәнінде жұтынып тұрған жаһандану заманында оңай емес. Бірақ, қазақ елі бұл күрделі құбылыстың басқы жолын еңсере алды.Осы үдеден шығуда Сыр елінің сапта озық көрінуі – ынтымақ пен ауызбірлікті айқындай түсті. Әсіресе кейінгі өткен Мәжіліс және барлық деңгейдегі мәслихат депутаттарын сайлауда (67,21 пайыз) облыс халқы белсенділік танытып, республикада озық шықты.Бір жыл демекші, осы уақыт ішінде өңірдегі өзгерісті ел көріп отыр. Бірден-бір жүргізіліп жатқан реформа біздің аймаққа да тән десек қателеспейміз. Талай тірлікке тыңнан түрен түсті. Президент пен Үкімет деңгейіндегі қолдау ең алдымен жаңа жобаларға серпін берді. Инвестиция тартуда Қызылорда облысы республикада көш бастады.&nbsp;&nbsp;

Қызылорда көш басында: Жетістікке жетелейтін бастама

<a href="https://kyzylorda-news.kz/">Kyzylorda-news.kz.</a>&nbsp; Өткен қыста Екібастұз қаласының халқы мұз құрсанғандай суық, сұрықсыз күй кешкенін білеміз. Әбден тозығы жеткен жылу орталығы апатқа ұшырады. Сол кезде өзге де қалаларға жасалған талдау көптеген өңірде жылу орталықтарының шықпа жаным, шықпа халін аңғартты. Президент шұғыл тапсырма беріп, жылу орталықтарын қайта жаңғырту міндеті қойылды.Ал Қызылорда қаласында 2022 жылдың қыркүйек айында жаңа жылу-электр орталығының іргетасы қаланды. Сол тарихи сәтте облыс әкімі: «Мемлекет басшысы оңтүстік өңірлерді үздіксіз электр энергиясымен қамтамасыз ету үшін алдағы үш жылда қуаттылығы 1000 мегаваттан асатын электр станцияларын салуды тапсырды. Осы тапсырма аясында атқарылатын жұмыс алғаш болып біздің аймақта жүзеге асуда», – деген болатын.Түріктің «Акса энерджи» компаниясымен жасалған жылу-электр орталығын салу жөніндегі мәміле шын мәнінде, басқалардан жөні бөлек жоба. 240 мегаваттық жылу-электр орталығының құны 215 млрд теңгеден асады. Ауқымды құрылыс 2025 жылы аяқталуы тиіс.Түріктермен инвесторлық байланыста тағы бір ауқымды жоба бар. сКоч Холдинг» компаниясы Жаңақорған ауданының «Қызылорда-Агроплюс» серіктестігінде томат пастасын өндіруді бастамақ. Оның құны – 50 млн АҚШ доллары. Осы компанияның еншілес кәсіпорны «ТАТ» компаниясымен бірлесіп, тамшылатып суару әдісімен 10 гектар жерге қызанақ егіп, өнім жинаған болатын.Облыста өңдеуші өнеркәсіпке серпін беру үшін шыны зауыты жанынан 8 ілеспе кәсіпорын құру жоспары жасалып отыр. Қазіргі уақытта оның 4-уі бойынша жобалау жұмыстары басталған. Ал барлық 8 кәсіпорынның құны 100 млрд теңге болмақ.<blockquote>«Осы бағытта желтоқсан айында Мемлекет басшысының Өзбекстанға барған ресми делегациясының құрамында болып, бірнеше іскерлік кездесуге қатыстық. Өңірден барған кәсіпкерлермен бірге бизнес форумда ортақ жобаларды талқыладық. Науаи облысының хәкімі Нормат Тұрсуновпен бірге екіжақты ынтымақтастықты дамытуды көздейтін Жол картасына қол қойдық. Бүгінде екі өңір арасында ынтымақтастықты одан әрі дамыту, инвестициялық мүмкіндіктерді кеңейту, тауар айналымын ұлғайту арқылы жаңа жобаларды іске асыруда ортақ мүдде бар», – деді облыс әкімі.</blockquote>Талай жыл алуан пікірге арқау болған шыны зауыты енді өңдеуші өнеркәсіпте өңірдің беткеұстар кәсіпорны саналмақ. Әлеуетті зауыттың бәсекеге қабілетін әілеспе кәсіпорындар толыстырып отырса, аймақ экономикасының жаңа тынысы ашылары сөзсіз.&nbsp;

Жылу-электр орталығы – аса маңызды жоба

<a href="https://kyzylorda-news.kz/">Kyzylorda-news.kz.</a> ​Халқының бірлігімен, тату тірлігімен, қастерлі қазына өнерімен Алашқа үлгі Сыр елінің бас қаласы - Қызылорда күн өткен сайын құлпырып, бүгінде өзінің көркем келбетімен, тазалығымен көз сүйсінтіп келе жатқаны анық.​Бұл тұрғыда ұдайы ұйымдастырылатын көгалдандыру және тазалық шаралары шаһардың әсемденуіне зор септігін тигізеді. Биыл да көктем шығысымен тазалық акциялары басталып, оған он мыңға жуық қала тұрғыны мен мекеме қызметкерлері қатысты. Арықтар аршылып, көшелер тазартылып, тал егу жұмыстары қарқынды жүргізілді.​Қызылорданы жасыл желекке айналдыруды мақсат еткен бүгінгі акцияда қала әкімі Асылбек Шаменов өзі бастап тал екті. Тағзым алаңынан бастау алған экологиялық жоба аясында аумақтарға 3000 түп қара тал, сыр талы, терек, клён, туя, ясин секілді өңір климатына төзімді тал көшеттері отырғызылды.​Биыл облыс әкімінің тапсырмасымен егілген талдарды күтіп-баптауға Қызылорда орман және жануарлар дүниесін қорғау жөніндегі мемлекеттік мекемесіне маусымдық жұмысшылар алынды. Қазіргі таңда отырғызылған жасыл желекке техникалық су ұңғымалары арқылы аяқ су жіберіле бастады. Өткен жылы қалада және оған қарасты кенттер мен ауылдық округтерде барлығы 33 дана жер асты су ұңғымасы қазылып, іске қосылған еді. Осы игілікті іс биыл да жалғасын тауып, облыстық бюджеттен бөлінген 337 млн. теңгеге 14 ұңғыма бұрғылануда.​Айта кету керек, тазалық акциясы басталғалы тоғыз мыңға жуық тал отырғызылды.<img src="https://knadmin.beoblood.kz/uploads/340159995_1156522561677725_778497501220736604_n_deafc38735.jpg" alt="340159995_1156522561677725_778497501220736604_n.jpg"><img src="https://knadmin.beoblood.kz/uploads/340120829_149617888053862_6114957895330677013_n_2e5e32ee25.jpg" alt="340120829_149617888053862_6114957895330677013_n.jpg">

Қазақстан және Қызылорда облысының жаңалықтары