<a href="https://kyzylorda-news.kz/ru">Kyzylorda-news.kz.</a> Беймәлімді білуге бекініп, көпшілікке пайдалы боларлық ғаламат жаңалық ашуда ғалымдардың үлесі зор. Сұрау белгісі бар белгісіздердің мәнін аңғаруда елеулі еңбек етіп, күтілетін нәтиже жемісті болу үшін барын салатын білімпаздардың төгер тері де аз емес. Себебі, олар салмақты сараптама жасап, татымды талдау жүргізуге тырысады. Білімін жетілдіріп, тиянақты тәжірибелерде тәуекелге бел буып, көздеген нысаны халық игілігіне бағытталған ғалым ғана заман талабының биігінде болатыны сөзсіз. Қорқыт ата атындағы Қызылорда университетінің қауымдастырылған профессоры, PhD Ақерке Болатқызымен сұхбаттасуды жөн көрдік.– Ғылыммен айналысуға не себеп болды?– 2008 жылы Қорқыт ата атындағы Қызылорда университетінің журналистика мамандығына оқуға түстім. Оқи жүріп, өндіріске, яғни қызметке араластым. “Qyzylorda“ облыстық телеарнасында жаңалықтар бөлімінде редактор қызметін атқардым. Аға буын әріптестерден тәжірибе жинақтап, университет қабырғасында алған теориялық білімді практикамен ұштастыруға мүмкіндік туды. Шама-шарқымыз жеткенше жұмыс істедік. 2012 жылдың ақпан-наурыз айларында сол кездегі университет ректоры, белгілі ғалым, академик Қылышбай Бисеновтің ұсынымен университетке баспасөз хатшысы қызметіне ауыстым. Осылайша 4-курста оқып жүріп, университетте жаңадан құрылған баспасөз орталығына маман болып қабылдандым. Сол уақытта университеттегі ғалымдармен тікелей қойын-қолтық жұмыс жасап, өзімнің де ғылымға деген қызығушылығым артты. Бакалаврды аяқтағаннан кейін, магистратурада білімімді шыңдадым. Шетелде тәжірибе алмасуға мүмкіндік туды. Бір бағытта тұралап қалмай, әрі қарай білімімді жетілдіруге тырысып, докторантураға түсуге талпынып, 2017 жылы университеттегі алғашқы түлектердің бірі болып оқуды аяқтадым. Докторлық диссертацияны жетекшілерімнің, ұстаздарымның, ғылым жолындағы кеңесшілерімнің арқасында, атап айтсақ, ғылыми жетекшім Бағдат Кәрібозұлы, Ботагүл Алтаевна, шетелдік кеңесшім Хулия Касапоглу және университеттегі өзге де жанашыр ұстаздарымның қолдауымен қорғадым. Менің зерттеу нысанына алған ғылыми бағытым – ұлттық әдебиеттің үлкен бір шоғыры саналатын шетелдегі қазақ әдебиеті. Яғни эмигрант естеліктерін оқыту мәселесі болды. Осы салада университеттің ғылыми кеңесінің шешімімен пән енгізіліп, эксперименттік жұмыс жасап, сол жұмыстың нәтижесінде диссертацияның қорытындыларын шығарып, өз деңгейінде қорғадым.– Халықаралық “Болашақ” бағдарламасы бойынша тәжірибе толыстырады деп естідік…– “Болашақ” бағдарламасымен оқу басты мақсатым болды. Себебі оқып жүріп, алыс-жақын елдерде Қазан, Самара, Орынбор, Анкарада тағылымдамадан өттім. Жоғары оқу орнында оқытушылық қызметте жүргеннен кейін әрі қарай педогогтік шеберлік бойынша білімімді шыңдағым келді. Осы тұрғыда бірнеше жоғары оқу орындарын таңдап, халықаралық бөлімдеріне өмірбаяныммен қатар тағылымдамадан өтуге ниетті екенімді жазып, хат жолдадым. Соның ішінде М.Ломоносов атындағы Мәскеу мемлекеттік университетінен арнайы шақырту келіп, жылдық жоспарымызды бірлесе отырып жасап, стипендиат атандым. Дегенмен белгілі себептерге байланысты тағылымдамаға уақытында бара алмай, создырдым.– Ғылымда жастардың үлесі қандай?– Өз саласында табысты, жемісті еңбек етіп жүрген жастар көп. Өзіммен қатар әріптестерім ғылым жолында елеулі еңбек етіп келеді. Мәселен, “Болашақ” бағдарламасымен былтыр бірнеше университет қызметкерлері стипендиат атансақ, соның тең жартысы жастар. Бүгінде олар оқуын сәтті аяқтады. Ғылымға қызығушылығы жоғары жастар жетерлік. Алматыдағы Қазақ Ұлттық қыздар педагогикалық университетінің докторлық диссертация кеңесінде мүшелікте болып, диссертация жұмысын қорғауына қатысқан едім. Докторанттардың зерттеу тақырыбына деген қызығушылығы, парасатты пайымы ғылымға жақындығын аңғартты. Әлбетте біз мұндай іргелі жұмыстарды атап өтіп, бағалауымыз қажет. Дей тұрғанмен шолақ белсенділікке бой ұрып, өзін жарнамалауға жанталасып жүрген жастар да жоқ емес.– Елімізде ғылыммен айналысатындарды қаншалықты бағалайды? Сіздің ойыңызша ғалымға жеткілікті қолдау көрсетіле ме?– Ғылыммен тұрақты, тиянақты айналысатындарға мемлекет тарапынан қолдау көп. Жыл сайын министрлік тарапынан гранттық қаржыландыру жүзеге асады. Жас ғалымдарға міндетті түрде бөлек гранттық қаржыландыру конкурсы өткізіледі. Талабы өте жоғары. Бірақ ғылыммен тұрақты айналысатын ғалым өзінің бейімделген саласы бойынша өзекті тақырыпта жоба ұсынып, гарнтты жеңіп алған жағдайда үлкен жол ашылады. Ғылыми потенциалын арттыруға мүмкіндік туады. Сонымен бірге жыл сайынғы ғалымдарға арналған мемлекеттік стипендиялар бар. Яғни, ізденіс ізінде жүріп, тыңғылықты ғылым жолына тсүкендерге мемлекет тарапынан қолдау жоқ деп айтуға болмайды.– Докторантураны «кәсіп көзіне» айналдырып отырғандар бар деген пікір жоқ емес. Осыған көзқарасыңыз қандай?– Докторантураға үлкен дайындықпен, жауапкершілік жүгін сезініп келу қажет. Оның ай сайынғы алып отаратын шәкіртақысы болғандықтан соған сай жауапкершілігі де жеңіл емес. Ғылым жолына бет бұрғандар сол уақыт аралығында рейтингі жоғары басылым және комитеттің тізбесіне енетін журналдарда мақала жариялап, халықаралық конференцияларға қатысып, шетелде тағылымдамадан өту секілді талаптарын ескеріп, ықтиятты қарауы маңызды.– Мақала жариялаудағы қиындықтар қандай?– Мақала жариялауда кез келген докторанттың алдында қиындықтар кездеседі. Өзімнің де басымнан өтті. Ғылыми журналға мақала жариялау үшін көп еңбектендік. Әрі бұл көп уақытты қажет етеді. Тіпті мақалалар бір-екі жыл редакцияда кезекте жатады. Сондықтан докторантураны бітіріп, қорғаймын деген ниеттегі адам жарияланымдарды 1-курсты аяқтаған тұста беріп қоюы керек деп есептеймін. Сондай-ақ, біз де енді ғана зерттеу көзіне айналып, ғылыми тұрғыда жаңалық болып келе жатқан салалар шетелде әлдеқашан зерттелген болуы мүмкін. Сондықтан мақалалардың ғылыми жаңалығы да, аталған базадағы журналдарға өтімділігі де өз алдына бір мәселе, әсіресе гуманитарлық сала үшін. Осындай қиындықтарды ескеріп, филология, қазақ тілі мен әдебиеті мамандығында, тарих мамандығында докторанттарға шетелдік басылымдарға мақала жариялау талабын алып тастады. Министрлік тарапынан шешім қабылданып, жеңілдік қарастырылды. Дегенмен докторанттардың тың тақырыбы өзіндік өтімділігін тауып, берілген мақалалар шетелдік басылымдарда жарияланып жатыр.– Ғылымға жақын жастар осы салаға бейімделе түсу үшін қандай бағыт-бағдар берер едіңіз?– Ғылым жолына түсу үшін жастар ғылымды жан-дүниесімен түсінгені абзал. Бел ортадан кері қайтып кетпей, қай салаға келгенін түйсігімен түсініп, жоспарын жүйелеп алғаны жөн. Тезірек танылсам деген ойдан арылған ләзім. Өйткені ғылым жолында оңай дүние болмайды. Қоғам, ғылыми орта жетістік пен кемшілікті өте баяу көреді, жылдам мойындамайды. Сондықтан, ғылым жолы үлкен сабыр мен салмақтылықты талап етеді.– Отбасы мен қызметті, одан қалды ғылым жолын қатар алып жүру оңай емес. Сіз бәріне қалай үлгересіз?– Әйел адам үшін ең маңыздысы – отбасы. Кез келген қыз баласының мақсаты – әйел бақытын сезіну, ана атану. Жанұя жарасымдығын сақтай отырып, қоғамға қызмет ету оңай емес. Дегенмен өзі ынталы әрі ер азаматының қолдауын сезінетін адам мұның бәріне уақыт таба алатыны айқын. Жарқын болашақ үшін бір орында тұрақтап қалмай, дамудың даңғыл жолын жалғай беремін.

Ақерке Болатқызы: Ғылым жолы үлкен сабыр мен салмақтылықты талап етеді

<a href="https://kyzylorda-news.kz/ru">Kyzylorda-news.kz.</a> Аймақтағы білім беру ісін жетілдіруге «Қамбаш» олимпиадалар және қосымша білім беру орталығының үлесі зор. Арал ауданында орналасқан орталық өткен жылдан бастап «Сыр дарыны» оқу-жаттығу жиынын өткізіп келеді. Бүгінде жобаға 7-10 сыныптардан іріктеліп алынған 480 оқушы қатысып жатыр. Олар жаратылыстану ғылымы саласындағы информатика (робото-техника), география, химия, физика, биология және математика пәндері бойынша тереңдетілген білім алып, олимпиадалар мен түрлі байқауларға қатысып, облыстың білім көкжиегін дамытуға өз үлестерін қосуда.<blockquote>— «Қамбаш» пансионаты бір мезгілде 120 оқушыны қабылдауға қауқарлы. 7-10 – сынып аралығындағы дарынды оқушыларр жатын орын, 5 мезгіл тамақ, келіп-кету жолақысымен қамтылған. Жастар жоғарыда аталған пәндер бойынша топ-топқа бөлінген. Сабақтың жыл бойғы ұзақтығы 210 сағатқа тең. Қазіргі жұмысымыз балалардың болашағына ықпал етері сөзсіз. Біздің орталықта ҰБТ-ға дайындалып кеткен оқушылардың алды шетелде білім алуда. «Сыр дарыны» оқу-жаттығу жиыны жыл сайын дәстүрлі түрде өткізіліп тұрады. Балалардың білім алуына бар жағдайды жасап жатырмыз. Тіпті, смартфондарын жинап алып, тек қажетті жағдайларда ғана қайта береміз, – дейді «Дарын» облыстық қосымша білім орталығының директоры Айжан Тұрғанбекқызы,</blockquote>Мұнда оқудан бқлек, суға түсу бассейні, үстел теннисі, сурет салу кабинеті секілді бос уақытты тиімді пайдалануға тамаша мүмкіндік қарастырылған. Оқушылар таңғы ауаның жұпарымен көл жағасында жаттығу жасайды. &nbsp;Кешкі серуенге де шығып, бір сәт көңіл көтереді. Он күн ішінде оқумен ғана шектелмей, қызықты шаралардың өткізілуі оқушының санасына серпіліс беріп, көңілін көтереді. Кешкілік уақытта Қамбаш көлінің жағасына жиылып, алауды айнала қоршаған балалар өлең оқып, ән айтып, бір-біріне жылы лебізін арнайды.<blockquote>— Математика пәнінен мұғалім болуды қалаймын. Ұлттық бірыңғай тестілеуден жоғары балл еншілеп, жоғары оқу орнына түсіп, ұлы математиктерді даярлайтын ұстаз болғым келеді. Осы ретте «Сыр дарыны» оқу-жаттығу жиынына алғыс білдіргім келеді. Білікті мамандардан білім алып, дарынды оқушылармен тәжірибе алмасып, жақын дос таптық. Қосымша үйірмелерге қатысып, білімімізді жетілдірудеміз, – деді Жалағаш ауданы № 123 мектептің 10-сынып оқушысы Эльмира Доспанова.</blockquote>Бүгінде талап пен тәртіпті назарға алған жоба нәтижесін беруде. Жуырда орталықта білім алған оқушылар пәндер бойынша өткізілген республикалық олимпиаданың жаратылыстану-математикалық бағытында II орын иеленсе, қоғамдық-гуманитарлық бағытта үздік үштікке ілікті.&nbsp; Мұнда мұғалім мен оқушының байланысы берік. Сапалы білім алу үшін керекті дағды сараланып, жастардың бойына оқуға құштарлық сезімі себіледі. Осылайша, біздің оқушылар тестілеу мен олимпиадада үздік шығып, терең білім мен таным-түсінігі дәлелдеп келеді.

«Сыр дарыны» – үздіктер мекені

<a href="https://kyzylorda-news.kz/ru">Kyzylorda-news.kz.</a> Күйдің құдіретті, домбыраның қасиетті екеніне ешкім талас айтпас. Домбыраның үнінде дала дүбірі, қос ішегінде тарихтың тілі сөйлеп жатады. Ал күйді төгілте орындап, көңіл пернесін түртетін күйшілердің орындауы қандай ғажап десеңші! Құлақ құрышын қандырар күй күмбірлей түскенде жан сарайын ашылып, толқыныс пен тыныштық сезімін қатар сезінесің. Осы орайда жеті өнерді жанына серік еткен сері Үкітай Ерниязовпен әңгіме өрбіткен едік.&nbsp;— Күй саласында сегіз жыл оқығаныңыз рас па?— Иә, күй саласында сегіз жыл оқыдым. 2005-2009 жылдар аралығында Қызылорда қаласындағы Қазанғап атындағы музыкалық жоғарғы колледжінде оқыдым. Сондай-ақ, 2009-2013 жылы Астана қаласындағы Қазақ ұлттық өнер университетін тәмамдадым. Екі оқу орнында да күй саласы, домбыра мамандығы бойынша білім алдым.&nbsp;— Өзіңіздің төл туындыларыңызды, күйлеріңізді атап шықсаңыз. Оның тарихына тоқталып өтсеңіз…— Осы уақытқа дейін көбінесе ән жаздым. Бір композитор ағамыздың 200-ден аса әні бар екен. Бірақ, соның 10-15-тей ғана әні елге кеңінен таралған екен. «Демек мен ел ұнатқан, халыққа таралған 10-15 қана ән жаздым» дейтін көрінеді. Сол ағамыз айтпақшы, менің де 300-ден астам әні бар. Бірақ елге таралғаны 15-20 шақты шығар. Сондықтан өзімді композитормын немесе күйшімін деп айтпаймын. Күйшімін деудің салмағы ауыр, жауапкершілігі жоғары. Себебі күй саласы – үлкен өнер. Домбырашымын дегенім дұрыс шығар. Күйші деп көптеген күйді жатқа біліп, өз жанынан күй шығарып, оны жүрегімен сезінетін адамды айтады. Кейде өнер иелерінің дәреже-деңгейін ажырата алмай, бірінің атауын біріне таңып, шатастырып жатамыз. Өнердің парқын түсініп, байыбына бара алғандықтан «өзім-өзім» деп кеуде қағудан аулақпын.&nbsp;Күй шығару өте күрделі. Саусақпен санарлық 3-4 күйім бар. Соның бірі – «Қаршыға». Бірде жол жүріп бара жатқанымда Қаршыға Ахмедияровтың өмірден өткенін естідім. Сыйлас ағаның қазасы көңілді күңірентіп қойды. Студент кезімде емтиханда, концерттерде күйін көп орындайтынмын. «Қаршыға» атты күйім де сол негізден туындады. Сонымен қатар Колледждегі ұстазым, Құрманғазы атындағы Қазақ ұлттық консерваториясы, «Халық музыкасы» факультетінің деканы Төлепберген Тоқжанов, Қазақ ұлттық өнер университетінде күй сабағынан берген Орынбай Дүйсен мен Қаршыға Ахмедияровтың күйлерін көп орындайтынмын. Үшеуінің де шығармашылығы бір-біріне тән, өзара үйлесім тапқан ұқсас екендігін аңғардым. Осылайша, тұлға деп таныған ұстаздарымның құрметіне «Тұлғаларға» атты күй шығардым. Одан кейінгісі – «Аманат» деп аталды. Күй, жыр, дәстүрлі ән өнері бабадан қалған асыл мұра, аманат деп сезініп жазған күйім. Өздеріңіге белгілі, тәжді вирус талай адамның өмірін жалмады. Қапияда атақты композитор Кеңес Дүйсекеев сынды аға буын өкілдерінен айырылып қалдық. Сол уақытта бір күй шықты. Оның атауы әлі қойылмады. Алғашында ән етіп шығарғаныммен жараспады, терме етіп айтармын деген оймен мақамға салдым ойдағыдай болмады. Сонымен күй ретінде жарық көрді.&nbsp;Шығармашылығыма келетін болсам, басым көпшілігі ән, 3-4 &nbsp;күй және 4-5 мақам бар. Мақам жазу да қиынның қиыны. Мен өзімді қинап ән жазып, күй шығарған емеспін. Меніңше, көңіл құбылып, жүрек тебіреніп, жан толқынысы буырқанған шақта жазылған шығарма ғана өміршең болады. Аккорд қуалап, «осындай стильде ән шығарып тастайыншы» деп әуен жазғым келмейді. &nbsp;— Өнер немесе музыкатанушы деген арнайы дипломы жоқ жандар домбыра шанағында жасырынған саздың сөзін қалай оқыды? &nbsp; &nbsp;&nbsp;Күй – дәуір айнасы, тарихта таспасындағы ұлы оқиғаның бәрі домбыраның қос ішегінде біте қайнасып жатыр. Кез келген күйді алып қарасаңыз түпкі мәнінде тарих, астарында зор мән жатыр. Демек қандай да бір шығарма түрлі тақырыпта түзіліп, алуан себептен туындағынын бағамдауға болады. Бұрыннан тұрмыс-тіршілікке, өмір келбетіне байланысты күй сөйлесудің құралы болған тәрізді. Бірі &nbsp;ет жақынынан, бірі елінен айырылғанда «ел айырылған» деген күйлер шыққан. Ол күй сол кездегі жоқтауға құрылған. Жоқтауда да әуен бар.&nbsp;— Кезінде көзі ашық, білімді деген Еуропа өз музыканттарының сырлы сазын уағында дұрыс түсіне алмағаны туралы өкініп жазады. Нотаның не екенін білмек түгілі естімеген қазақ – күйшілердің сазын сол уақытта бірден түсінген. Ал қазір күйді түсінетіндердің қатары кеміп, тыңдайтындардың өзі сиреп қалғандай. Неліктен?— &nbsp;Бүгінде эстрада жанрының қосылғаны бар, басқасы бар, сырт елге еліктеушілік бар. Соның салдары өнерді түсінбеуге, әсіресе, күй тыңдауға деген құлшынысты төмендеткендей. Бастысы, үлкен өнерді өлтіріп алмасақ деймін.&nbsp;— «Күйшінің күтімі» деген ұғым бар. Сол жайында айтып берсеңіз..— Оқуда жүргенде білікті ұстазардан дәріс алдық. Сонда ұстаздан естігеніміз «Тәттімбет күйші жеңгелеріне шаңыраққа дейін жиналған жүкті түсірткізіп, сандықтың ішінен домбыраны алып бер» деп айтады екен. Жеңгелері ерінбей, оралған қорабын, шүберектен домбыраны алып беретін көрінеді. Сосын добыраны шертіп болған соң, қайтадан сандыққа салғызады. Бұл жерде домбыраның да күтімі, күйшінің де домбыра тартуға ықыласы ауған кезде қасындағы адамдардың лайықты жағдай жасауы айтылған. Былай қарағанда күтім бар деп те айта алмаймыз. Өйткені Құрманғазы бабамыз әрі батыр, күйші, асқан шебер де болған. Бізге ұстаздарымыз «Өте нәзік болмаңдар, Құрманғазы бабаларың әрі батыр, әрі күйші болған. Тек қолдарыңа зақым келмесе, Буындарың қатып қалмаса болды» деп кеңес беретін. Әр дәуірдің, әр өңірдің қаншама күйшілері болған. Сондықтан «олардың күтімі былай болған» деп болжап, нақтылап айту қиын сияқты. Бәрі де күй ырғағына байланысты. Кейде күшті, нәзіктікті қажет ететін, домбыраны жұмсақ ғана сипап өтіп орындайтын күйлер болады. Қысқасы күйшілерде вокалистер сияқты тамағына салқын тигізбеу, майда тамырлары жарылып кетпеу керек, дауыс қою сияқты күтім жоқтың қасы.&nbsp;-Әдемі әңгімеңізге рақмет!

Үкітай Ерниязов: Күй шығару өте күрделі

<a href="https://kyzylorda-news.kz/">Kyzylorda-news.kz.</a> Бұқаралық ақпарат құралдары қызметкерлері күні мерекесі қарсаңында Қазақстан Журналистер одағы ұйымының қатары жаңа мүшелермен толықты. &nbsp;Жылдағы дәстүр бойынша одақтың облыстық филиал төрағасы Аманжол Оңғарбаев 20 адамға мүшелік билет табыстады. Олардың қатарында аға буын өкілдері мен жас тілшілер де бар.Мерекелік шарада филиал төрағасы журналистердің қоғамдағы орны туралы айта келіп, ұйымға жаңадан қабылданған жандарға үлкен жауапкершілік жүктелетінін жеткізді.<blockquote>– Журналистер тынымсыз еңбектің адамы. Ал одаққа мүше болу – үлкен сенім. Қазіргідей уақытта сол сенімге, жалпы қаламгерлер атына кір келтірмей абыройлы қызмет ету – парыз. Сіздерді осы сенім үдесінен шығады деп сенемін, – деді филиал төрағасы А.Сақыпұлы.</blockquote>Мұнан соң ұйымның куәлігі мен төсбелгісін тапсыру рәсімі өтті. Облыстық «Сыр бойы» газетінің ардагері, осы кәсіби мерекеде&nbsp; «Қазақстанның Құрметті журналисі» атағын иеленген Жолдасбек Ақсақалов әріпрестерін төл мерекемен құттықтап, талапты, талантты жастарға ыстық лебізін арнады. &nbsp;<blockquote>– Өркениетті елдердің қайсысында болмасын бұқаралық ақпарат құралдары, оның ішінде мерзімдік басылым ерекше ықпалдылыққа ие болып келеді. Сол себепті де журналистиканы қызығы мен қиындығы мол, зор жауапкершілікті қажет ететін бірегей сала дейміз. Одаққа мүшелікке қабылданған тілшілерге әрдайым шынайылық пен ақиқатты серік етіңдер дегім келеді. Баршаңызды кәсіби мерекелеріңізбен құттықтаймын! Ақпарат саласының қарымды қаламгеріне айналып, еңбектеріңіздің жемісін көріңіздер, – деді ол.</blockquote>Қазақстан Журналистер одағы ұйымына қабылданғандардың дені осы салада талай жылдан бері қызмет етіп жүрген жандар. Олардың қатарында әріптестеріміз «Кызылординские вести» газетінің бас редакторы Жәнібек Исаев, Жанна Балмағанбетова, Наталья Черней, Инна Бекеева, Индира Әбдірахманова, «Қазақстан дәуірі» жалықаралық қоғамдық саяси газетінің облыстағы меншікті тілшісі Анархан Марданова және «Сыр бойы» және «Кызылординские вести» газеттерінің белсенді авторы, «Өрлеу» біліктілікті арттыру ұлттық орталығы» АҚ филиалы Қызылорда облысы бойынша педагогикалық қызметкерлердің біліктілігін арттыру институтының директоры Бауыржан Елеусінов бар.Сондай-ақ, осы шарада «Қызылорда» телеарансының қызметкерлері Лемара Иргайбаева, Әсия Нұрлыбаева, Дәулет Сағит, Амина Үсенова, Динар Рахман, Арал аудандық «Толқын» газетінің тілшісі Назерке Маратқызы, Шиелі аудандық «Өскен өңір» газетінің тілшісі Маржан Құрманғалиева, «Жалағаш жаршысы» газетінің қызметкерлері Нұржамила Алмас, Ақтоты Бүркітбай және Сыр бойы газетінің тілшісі Аружан Ералы сияқты жастар да аталған ұйымның куәлігін алды.Одаққа мүшелікке қабылданған аға буын атынан Бауыржан Елеусінов пен Анархан Марданова сөз алып, ықыласын білдірді.

Қызылорда: Журналистер одағы жаңа мүшелермен толықты

Қармақшы ауданында жыл басынан бері 1,6 миллиард теңге инвестиция тартылған

<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Нұрлыбек Нәлібаев «Петро Қазақстан Құмкөл Ресорсиз» АҚ Президенті Ян Миньюй, Басқарма төрағасы Чжао Сяомин және стратегиялық коммуникациялар бойынша вице-президенті Есен Қайыржанмен кездесіп, өңірдегі мұнай-газ саласын дамыту мәселелерін талқылады.Аймақ басшысы мұнай қорын толықтыру, газ өндіру саласын әрі қарай дамыту және еңбек қатынасын реттеу барысын саралады. Сондай-ақ Қызылорда қаласында жазғы демалыс лагерінің құрылысын салуды ұсынды.Өз кезегінде, компания басшылары аталған мәселелер мұқият зерттеліп, ықтимал шешу жолдары ұсынылатынын жеткізді.

 Облыс әкімі «Петро Қазақстан» басшылығымен кездесті

<a href="https://kyzylorda-news.kz/">Kyzylorda-news.kz.</a> Шиелі ауданы әкімінің орынбасары Болатбек Ысмағұловтың төрағалығымен Шиелі ауданы әкімдігі жанындағы құқық бұзушылық профилактикасы жөніндегі ведомствоаралық комиссия отырысы өтті.Комиссия отырысына құқық қорғау органдарының басшыларының орынбасарлары, дербес бөлім басшылары, кент және ауылдық округ әкімдері, тиісті мекеме басшылары қатысты.Комиссияның күн тәртібінде «Мал ұрлығы қылмыстарының алдын алу, болдырмау, жергілікті қауымдастық кеңес мүшелерімен атқарылған жұмыстары және бей-берекет жүрген малдарды қағумен орын алатын жол-көлік оқиғаларының (пада ұйымдастыру, бей-берекет жүрген мал иелеріне шара көру, мал қамау орындарын ашу) алдын алу жұмыстары», Кәмелет жасына толмағандармен және оларға қарсы жасалған қылмыстардың (топтық төбелес, жыныстық тиіспеушілік, қаңғыбас иттердің тістеуі, ойын алаңдар мен спорт алаңдарының сапасы және т.с.с) алдын алу, болдырмау бағытында атқарылған жұмыстардың нәтижесі және алдағы уақытта атқарылатын жұмыс жоспарлары тақырыптарындағы мәселелер қаралды.Күн тәртбіндегі алғашқы мәселе бойынша Шиелі аудандық полиция бөлімі бастығының орынбасары Ердәулет Баянбайұлы, Еңбекші ауылдық округінің әкімі Бағдат Серікбайұлы баяндама жасаса, екінші мәселе бойынша Шиелі аудандық полиция бөлімі бастығының орынбасары Ердәулет Баянбайұлы және &nbsp;аудандық білім бөлімінің басшысы Жібек Орынбайқызы баяндама жасады.Баяндама барысында Ердәулет Баянбайұлы мал ұрлығы, егесіз малдарды қамау бағыттарында бөлім тарапынан атқарылып жатқан жұмыстарға тоқталды. Сондай-ақ, егесіз малдарды қамау барысында кейбір ауылдық округтерде арнайы орындардың талапқа сай келмей, малдарды қамауға мүмкіндік болмай жататындығын айтты. Мұнан соң, аталған тақырып бойынша Еңбекші ауылдық округінің әкімі Бағдат Серікбайұлы ауылда атқарылып жатқан жұмыстарға тоқталды.Келесі кезекте Ердәулет Баянбайұлы полиция бөлімі тарапынан кәмелет жасына толмағандармен және оларға қарсы жасалған қылмыстардың алдын алуға бағытталған шараларға тоқталды. Сондай-ақ, жиында аудандық білім бөлімінің басшысы Жібек Орынбайқы¬зы баяндама жасап, білім бөлімі тарапынан бұл бағытта атқарылған жұмыстарға егжей-тегжейлі тоқталды.&nbsp;Баяндамалар аяқталғаннан кейін ауылдық округ әкімдері өз ұсыныстарын айтып, жиын соңында аудан әкімінің орынбасары Болатбек Ысмағұлов баяндамашыларға бірқатар тапсырмалар жүктеді.

Шиеліде құқық бұзушылық профилактикасы жөніндегі ведомствоаралық комиссия отырысы өтті

<a href="https://kyzylorda-news.kz/">Kyzylorda-news.kz.</a> Елімізде жыл сайын 23 маусым – Қазақстан полициясы күні ретінде аталып өтіледі. Сондай-ақ, ел тыныштығын күзетіп, қоғамдық тәртіпті қадағалаған полиция қызметінің құрылғанына биыл – 31 жыл. &nbsp;Бұл күн тұрақтылық пен қоғамдық тәртіпті сақтауға үлес қосқан ардагерлерге және осы қатарда еңбек етіп жүргендерге, қызметтік парызын өтеуде өмірін қиғандарға ризашылық пен алғыс білдіру күні болып саналады. Еске сала кетсек, 1992 жылы 23 маусымда Қазақстан Республикасы Жоғарғы Кеңесі Қазақстан Республикасы ішкі істер органдары туралы Заң қабылдады. Бұл – Қазақстан полициясының қызметі мен міндеті анықтайтын алғашқы құқықтық акт. 2007 жылы Мемлекет басшысының Жарлығымен 23 маусым – Полиция күні болып ресми түрде бекітілді.&nbsp;Қазақстан полициясы – бейбіт күніміз бен ашық аспанымыздың тыныштығын қадағалап, қоғамдағы құқықтық тәртіпті, азаматтарымыздың қауіпсіздігін қамтамасыз ететін еліміздегі аса маңызды құрылымдардың бірі. Елдегі тыныштық пен тұрақтылықты сақтап, беріктікті нығайту мақсатында құрылған қазақстандық полиция қызметі бұл күндері тәуелсіздігіміздің қастерлі міндеттеріне көлеңке түсірмей, ел тыныштығын сақтауға өз үлестерін қосып келеді. Олардың қатарында біздің ауданымыздың полиция қызметкерлері де бар екендігін мақтанышпен айта аламыз. Жалпы, ауданда қылмыстық жағдай тұрақты деуге болады. Күн сайын көшедегі қоғамдық тәртіпті қамтамасыз етуге тәртіп сақшылары атсалысуда. Қылмыстық жағдайды тұрақтандырып, көшелер мен көпшілік жиі шоғырланатын қоғамдық орындарда жасалатын құқық бұзушылықтардың алдын алу мақсатында жыл басынан бері жедел профилактикалық шаралар мен рейдтер тұрақты жүргізілуде. Нәтижесінде айтарлықтай, бес айда жалпы қылмыстық құқық бұзушылықтар саны төмендеп, өткен жылға қарағанда азаюда. Бұл – қанағаттанарлық көрсеткіш.&nbsp;Полиция үшін қашанда қоғамдық қауіпсіздікті сақтау, адамдардың тыныш, бейбіт өмір сүруін тұрақты қадағалау – басты міндет. Оны талапқа сай орындау бүгінгі күннің мәселесі болып тұр. Сонымен қатар, көшелерде жасалатын қылмыс та азаюда. Кәмелетке толмағандар арасындағы құқық тәртібінің сақталуын қамтамасыз етуі бойынша аудан көлеміндегі оқу орындарымен бірлесе отырып, біршама жұмыстар атқарылды. Сонымен қатар, кәмелетке толмағандармен және оларға қарсы жасалатын қылмыстық құқық бұзушылықтардың алдын алуға бағытталған ОПД-нің нұсқауымен «Балалар түнгі қалада», «Жасөспірім», «Абайлаңыз – балалар!» атты жедел профилактикалық іс-шаралар ұйымдастырылуда.&nbsp;Рейд барысында прокуратура, білім бөлімі, мектеп әкімшілігі, жастар ресурстық орталығы қызметкерлерімен бірлесіп, ойын-сауық орталықтары, компьютерлік клубтар араланып, халық көп шоғырланатын жерлерге түсіндірме жұмыстары жүргізілді. Отанымыздың, ел аумағының бүтіндігін сақтауды, азаматтардың құқықтары мен бостандықтарының қорғалуын қамтамасыз етуді, халықтың тыныштығын күзетуде, мемлекетке қауіп төндіретін кез келген сыртқы және ішкі күштерге қарсы тұруды мақсат еткен полиция қызметінің ел өміріндегі алар орны орасан зор.&nbsp;Әрдайым аудан халқының тыныштығын қырағы күзетіп, оны қорғауға және қылмыстардың белең алуына тойтарыс берудегі кәсібиліктері, қызмет барысындағы жоғары іскерліктері, халық арасында заңдылық пен құқық тәртібін қамтамасыз етудегі жанқияр еңбектері қандай да бір құрметке болса да лайық. Кәсіби қызметке үлкен жауапкершілік жүктеліп, кез келген қауіп-қатерге тайсалмай қарсы тұруымен ерекшеленеді. Тәртіп сақшыларының жұмысы уақытқа бағынбайды.

Қармақшыда қоғамдық тәртіпті тұрақты қадағалануда

<a href="https://kyzylorda-news.kz/">Kyzylorda-news.kz.</a> Он сегіз мың ғаламды жаратушы Құдай пендесіне жақсы амалдарды жасау үшін өмір сүрудің қағидаларын жеткізді. Сонымен қатар мұсылмандарды бір-біріне бауыр етіп қана қоймай, бірлікте болу үшін ортақ берекеге толы мерекелерді де нәсіп етті. Ол әлемдік деңгейдегі мәртебесі биік – Құрбан айт мерекесі. Жаратқанға пендесін сауапты істерімен жақындастыратын бұл күн Ораза айттан кейін жетпіс күннен соң басталып отыр.Пайғамбарымыз өз өсиетінде «Айт күні бірінші орындайтынымыз – намаз оқу» деген. Сондықтан айт мейрамы намаз оқумен басталады. Ибраһим бабамыздан бастау алған құрбан айт ұлы күн болып саналса, кей ғұламалар осы дүниедегі ең қайырлы, тіпті арафа күнінен артық көрген. Яғни қасиетті күндерді ұлықтау адам баласының тақуалығынан хабар берген.Еліміздің әр аймағында айт намазы азанда әр уақытта оқылса, облысымыз бойынша сағат 6.00-де басталды. Бұл уақытта аудандағы «Қармақшы ата» мешітіне де тұрғындар айт намазын жамағатпен оқуға ерте келді. Қасиетті күні Жаратқанның мейірімі төгілгей күн ерекше шуағын шашып, салқын самалын есті. Сондай-ақ мерекеде бір-бірімен көріскендер көркем мінез танытып, құшақтасып төс қағыстырып амандасып, айт қабыл болсын десті. Мешітте бас имам Өміржан Жұмаділдаұлы жиналған жамағатқа Құрбан айттың ерекшелігі мен үкімі жөнінде уағыз айтты.<blockquote>«Құрбан айт Жаратқанның ұлық мерекелерінің бірі. Әлбетте бұл күні бірінші мұсылман сіз бен біз бір-бірімізге кешірімшіл болуымыз керек. Өкпе ренішті ұмытып, құрметпен қараған абзал. Адам баласы құрбан шалу арқылы Ұлы Жаратушысының өзіне берген сансыз жақсылықтары мен шексіз нығметтеріне алғыс-шүкірін айтып, күнәларына кешірім тілейді. Құрбан шалудың негізгі үкімі – пенденің Құдайға толық бойұсынғанын анықтап, тақуалығын тексеру. Әйтпесе кәмілдік пен пәктіктің иесіне мал етінің еш қажеті жоқ, ол біздің шалған құрбанымыздың қанына немесе етіне мұқтаж емес. Алайда біздің Жаратушының әмірін «Құп алдым, құлдық» деп орындауымыз, әрекетіміздегі ықыласымыз бен ниетіміз оған жетіп, разылығына бөленуіміз сөзсіз. Сондықтан сүйіспеншілік әуелі Жаратқанға бағытталуы керек», – деді бас имам.&nbsp;</blockquote>Иә, Құрбан айт мерекесінің ерекше қасиеті ол туыстық қарым-қатынасты нығайтып, жақындастырады. Мұсылмандардың бір-біріне деген сүйіспеншілік, сыйластық, өзара құрмет сезімдерін арттыруға септігін тигізеді. Отбасында ұрпақтан-ұрпаққа жалғасатын дәстүрлерді жаңғыртып, болашақ ұрпаққа ұлағатты ғибрат береді. Имани тәрбиесі мол уағыздан соң айт намазы оқылып, Жаратқанға дұға жасалды.Қасиетті мерекеде адамның ішкі ниеті, дінге бекемдігі таразыға түседі. Пенденің пендешілігі, сараңдығы мен жомарттығы сыналады. Өзім ғана ішсем, жесем, тоқ болсам деп қара бастың қамын ойламаған жөн. Осы ретте Пайғамбарымыз «Көршісі аш кезде өзі тоқ түнеген адам бізден емес» деген. Осы ретте ауданымыздағы ардагер ұстаз Смағұл Қауысов ағамыздың ұйымдастыруымен бір ірі қара мал сойылып, азық-түлікпен бірге кентіміздегі көпбалалы, жалғыз басты және мүмкіндігі шектеулі жандары бар барлығы 35 отбасыға қайырымдылық жасалды. Мұнан соң аудандағы «Ғибрат» ас үйі мейрамханасында ас беріліп, өмірден өткен жандарға Құран бағышталды.

Қармақшыда Құрбан айт мерекесі тойланды

<a href="https://kyzylorda-news.kz/">Kyzylorda-news.kz.</a> Шиелі ауданы әкімінің орынбасары Болатбек Ысмағұловтың төрағалығымен аудан әкімдігі жанындағы Сыбайлас жемқорлыққа қарсы іс-қимыл мәселелері жөніндегі комиссияның кезекті отырысы өтті.Комиссияның күн тәртібінде «Шиелі ауданы бойынша Мемлекеттік кірістер басқармасымен сыбайлас жемқорлыққа қарсы іс-қимыл бағытында атқарылған шаралар», «Ауыл шаруашылық субсидиялау мен инвестициялау, жайылымдар мен шабындықтарды дамыту және ауыл шаруашылық жерлерін бөлу барысындағы сыбайлас жемқорлық тәуекелдері», «Денсаулық сақтау саласында сыбайлас жемқорлық тәуекелдерінің жолын кесу бағытында орындалған нақты жұмыстар» тақырыптарындағы 3 мәселе қаралды.Күн тәртбіндегі алғашқы мәселе бойынша Шиелі ауданы бойынша мемлекеттік кірістер басқармасының басшысы Еркеғали Амангелдіұлы, екінші мәселе бойынша аудандық ауылшаруашылығы мен жер қатынастары бөлімінің басшысы Мұрат Шайтмағанбетұлы, үшінші мәселе бойынша аудандық көп бейінді орталық ауруханасының бас дәрігері Нұрлан Әмір баяндама жасады.Мұнан соң, Болатбек Ысмағұлов Шиелі ауданы бойынша мемлекеттік кірістер басқармасының басшысы Е.Әбдрахмановқа жергілікті баспа беттеріне сыбайлас жемқорлыққа қарсы тақырыпта мақалалар жариялануын қамтамасыз етуді, сыбайлас жемқорлықты болдырмау және алдын алу мақсатында бағынысты қызметкерлердің қатысуымен түсіндірме жиналыстарын өткізіп, сыбайлас жемқорлық тәуекелдеріне ішкі талдау жұмыстарын жүргізуді тапсырды.&nbsp;Ал, Шиелі аудандық ауыл шаруашылығы мен жер қатынастары бөлімінің басшысы Мұрат Әшірбековке сыбайлас жемқорлық көріністеріне қарсы тұру мақсатында бөлімде мемлекеттік көрсететін қызмет берушілердің атқарып жатқан жұмыстарына қатаң бақылау орнатуды, техникалық көлік құралдарына құжаттар беру, мемлекеттік жобалар, бағдарламалар бойынша (егін және мал шаруашылықтарына) заң бұзушылықтарға жол бермеу шаралары қабылдауды, жер қатынастары саласындағы заңнамаларға сәйкес кәсіпкерлік субъектілерге жер учаскелерін табыстау жолдары бойынша ақпараттандыру (мақала жариялау) жұмыстарын жүргізуді, жеке және заңды тұлғалардың жер телімін меншігіне алу және мақсатын өзгерту жөніндегі өтініштердің мерзімінде қаралуы бақылауға алуды, жер заңнамаларының бұзылуына жол бермеу мақсатында, облыстық басқарма қызметкерлерін тарта отырып, кент және ауылдық округ әкімдері мен тиісті мамандарына әдістемелік түсіндірме жұмыстарын жүргізуді, жер қатынастары саласында мемлекеттік қызмет көрсету стандарттарының сақталуын қамтамасыз етуді тапсырды.&nbsp;Шиелі аудандық көп бейінді орталық ауруханасының бас дәрігері Нұрлан Әмірге қарасты мекемелерде сыбайлас жемқорлық сипатта қылмыс орын алған жағдайда сол мекемеде талқылау жүргізу тәжірибесі енгізуді, «AMANAT» партиясы филиалымен бірлесіп сыбайлас жемқорлыққа қарсы іс-шаралар ұйымдастыруды тапсырды.

Шиелі: Сыбайлас жемқорлыққа қарсы күрес жіті назарда

<a href="https://tdmix.ru/kk/vegetables/chem-lechitsya-kishechnaya-infekciya-u-detei-lechenie-vidy-i-lechenie-kishechnyh.html">ФОТО</a><a href="https://kyzylorda-news.kz/">Kyzylorda-news.kz.</a> Жаз маусымында адамдардың аңсары ауатын қауын-қарбыздың дәмінде шүбә жоқ. Алайда осы аталған өнімдерден жедел ішек инфекциясымен ауырып жатқандарды да естиміз. Осы жайында бүгін Өңірлік коммуникациялар алаңында өткен брифингте облыстық санитариялық-эпидемиологиялық бақылау департаментінің басшысы Динара Жаңабергенова толық ақпарат берді.&nbsp;<blockquote>«Жаз маусымы басталысымен жедел ішек инфекциясы ауруларының тіркелу көрсеткіші басқа кезеңдерге қарағанда арта бастайды. Оған себеп – ыстық ауа райында тамақ өнімдерінің тез бұзылуы, мерзімінен ерте піскен жеміс-жидектерді мөлшерден тыс қолдану. Нақты атап кетсек, облыста жедел ішек инфекциясына шалдыққан 21 жағдай есепке алынды. Әдетте қарбыздар маусым айында сауда сөрелерінде пайда бола бастайды. Бұл уақытта өнімдер анағұрлым қауіпті, яғни нитратпен улану деңгейі жоғары. Бұдан бөлек, гербицид, пестицидтердің мөлшерден тыс болуы да денсаулыққа кері әсер етеді. Қарбызды мөлшерінен көп жеуге де болмайды. Ересек адамдар үшін бір күндік норма 500 грамм, 4-6 жастан асқан балаларға 150 грамм. 2 жасқа толмаған бөбектерге қарбыз беруге болмайды. Сонымен қатар, жеміс-жидектерді, қарбыз-қауынды сақтау және жеткізу ережесінің бұзылуы да осы өнімнен ауырып қалуға себеп болады. Айта кетейін, ерте піскен жеміс-жидектер мен қауын-қарбыздардан денсаулыққа зиян келмес үшін сақтық шараларына салғырт қарамауды, ауру белшілері байқалған жағдайда медициналық көмекке жүгіну керек», - деді Динара Олжабайқызы.</blockquote>

Динара Жаңабергенова: Жазда жедел ішек инфекциясы аурулары арта бастайды

<a href="https://kyzylorda-news.kz/">Kyzylorda-news.kz.</a> Кәсіподақ қызметі – үлкен күш. Кәсіподақтардың басты мақсаты – еңбек ұжымы арасындағы тұрақтылықты сақтау, жұмыскер мен жұмыс беруші арасындағы алтын көпір, қоғамның тірегі.Қармақшы аудандық білім қызметкерлері кәсіподақ комитетінде 62 бастауыш кәсіподақ ұйымы бар. Атап айтар болсақ 29 мектеп, білім бөлімі, 3 – мектептен тыс мекеме, 1 – психологиялық-педагогикалық түзету кабинеті, 24 мемлекеттік балабақша және 4 жеке балабақша жұмыс істейді.Кәсіподақ комитетінің жұмысы жүйелі. Оның атын шығарып жүрген жалынды жастар да бар. Облыстық кәсіподақ комитетінің ұйымдастыруымен «Қуатты Қазақстанның жарқын бейнесі – жігерлі жастар» тақырыбындағы Алматы қаласында өткен шығармашылық алаңға Қ.Изкенов және Н.Сайлауов барып, Н.Сайлауов облыстық «Үздік жас маман» номинациясын иеленіп қайтты.Т.Көмекбаев атындағы №250 мектеп-лийейде «Мақсаттары бір арнаға тоғысқан білім жастары» тақырыбында аудандық жастар форумы өткізілді. Аталмыш шара көшбасшылық қасиеттері бар, бастамашыл креативті жас педагогтердің ой-пікір алмасу алаңын құру, белсенді кеңес мүшелерін ынталандыру, жас мамандарды кәсіподақ қозғалысына жұмылдыру бағытындағы бас қосу болды. Шараға аудан жас мамандары қатысып тәжірибелерімен бөлісті. Форумның ашылу салтанатына аудандық білім бөлімінің басшысы Гүлзира Мәжитқызы арнайы қатысып, алғыс сөз айтса, облыстық кәсіподақ комитетінің маманы жастар жанашыры Жанар Сағындықова кәсіподақ жұмысына шолу жасап, жастарға сәттілік тіледі. Жастар 5 топқа бөлініп өз білімдері мен өнерлерін ортаға салды.&nbsp;1 Наурыз – «Алғыс айту» күні мерекесінде аудандық білім бөлімі және кәсіподақ комитеті, аудандық кәсіподақ комитеті жанынан құрылған «Жас қанат» жастар кеңесінің мүшелерінің ұйымдастыруымен жылма-жыл «Шын жүректен алғыс айтамын» тақырыбында көшпелі құттықтау шарасы өткізіліп келеді. Биыл Байқоңыр қаласындағы қазақ мектептері Ақай, Төретам ауылы мектептеріне барды. Сонымен қатар барлық білім мекемелерінде де алғыс айту іс-шаралары ұйымдастырылды. Шара барысында құттықтау, марапат, лебіздер мен ақ тілектер айтылды.&nbsp;Сонымен қатар, №23 балабақша базасында, ұстаздардың шығармашылық ізденістерін арттыру, іскерлікке дағдыландыру, тәжірибе алмасу мақсатында &nbsp;«Болашаққа үміт, жастарға сенім» тақырыбында аудандық мектепке дейінгі мекемелер арасындағы жастар форумы өткізілді. Форумда жас ұстаздар 4 топқа бөлініп: таныстыру, жоба қорғау, жаңа идеялар жәрмеңкесі, IQ дода сайысында өз білімдерін ортаға салды. Форум соңы марапат рәсімімен қорытындыланды.&nbsp;№250 мектеп- лицей базасында Аудандық білім бөлімі мен білім қызметкерлері кәсіподағының ұйымдастыруымен «8 наурыз – Халықаралық әйелдер күні» мерекесіне орай «Арулар – аяулылар, ардақтылар» мерекелік кеш өткізілді. Кеш әдеби монтажбен және №250 мектеп-лицей оқушыларының «Ана» хорымен ашылды. Мерекелік кешті аудан ардагерлер кеңесінің төрағасы Асқар Мереков, аудан ардагері Әбдірахман Құлдүйсенов аудандық білім бөлімінің басшысы Гүлзира Абдазиева ашты. Мерекелік шараға мектеп директорлары, балабақша меңгерушілері, қонақтар, ұстаздар қатысты. Барлық қатысушыларға 8 Наурыз мерекесіне орай сыйлықтар берілді. Шара барысында биыл 70, 75, 80, 85 жасқа толған ардагер ұстаздар аудан әкімі алғысымен марапатталды және жақсы жетістікпен еңбек етіп жүрген біршама ұстаздар облыс әкімінің, аудан әкімінің және облыстық, аудандық марапаттармен марапатталды.Мерекелік шара ұстаздардан құралған, «Жас қанат» жастар кеңесінің ұстаздарынан құралған өнерпаздардың ән-биіне ұласып, көрермендерге жақсы көңіл-күй сыйлады.«Наурыз шапағаты» қайырымдылық акциясына сәйкес әлеуметтік жағдайы төмен қайырымдылықты қажет ететін білім қызметкерлерінің 79 отбасына аудандық кәсіподақ комитетінің ұйымдастыруымен қайырымдылық жұмыстары ұйымдастырылды.Ағымдағы жылдың сәуір айында «Қазақтың даналық, ғибратты сөздері» атты облыстық білім саласы ардагерлердің байқауына №29 мектеп ардагері Тасымова Зарипа Жаппарқызы қатысып Алғыс хатпен марапатталды.Аудандық білім бөлімі мен аудандық кәсіподақ комитетінің ұйымдастыруымен аудандық білім бөлімінде бастауыш кәсіподақ отырысы өткізілді. Кент орталығындағы білім беру ұйымдарының бастауыш кәсіподақ төрағалары аудандық білім бөліміне, Байқоңыр қаласы, Төретам, Ақай ауылы және елді-мекенде орналасқан мектептер ZOOM бағдарламасы арқылы онлайн түрінде қосылды. Күн тәртібінде «Педагогикалық әдеп қағидалары» «Кәсіподақ қызметкерінің этикасы туралы Ереже» қаралды. Педагогикалық әдеп қағидалары туралы тағы бір мәрте пысықталып отырыс соңында ұсыныс пікірлер айтылып, алдағы жұмыс жоспары туралы өрбіді.Иіркөл елді мекенінде тұратын №106 мектептің тыл ардагері С.Махамбетов және Жаңақала ауылында тұратын №185 мектептің тыл ардагері Б.Қанатқызын және кент орталығындағы №105 мектептің тыл ардагері Н.Бүркітбаева және №26 мектептің тыл ардагері Ұ.Омарова апайларымызды 9 Мамыр мерекесімен үйлеріне барып құттықтап, оларға сыйлық корзина толтырылған жеміс-жидектер мен тәттілер және ақ жаулық табысталды. Құттықтауға арнайы білім бөлімі басшысы барды.№250 мектеп-лицей базасында &nbsp;аудандық білім бөлімі мен кәсіподақ комитеті «7 мамыр – Отан қорғаушылар күні, 9 мамыр – Жеңіс күні» мерекесіне орай «Ерлікті ұлықтау – ұрпақ парызы» тақырыбында мерекелік кеш ұйымдастырылды. Мерекелік кешке арнайы облыстық кәсіподақ комитетінің төрағасы Гүлнар Бабабекқызы келіп ауданымыздың ер –азаматтарын мерекемен құттықтады. Мерекелік кеште ауған соғысының ардагерлері: Әбутәліп Нәбиұлы №26 мектеп, Арықбаев Ахметбек, №106 мектеп, Ауған тәжік шекарасындағы соғысқа қатысқандар Қашақбаев Алтынбек, №108 мектеп, Жұмабай Мұрат, №199 мектеп және білім саласында жемісті еңбек етіп жүрген ер азамат мұғалімдер марапатталды.&nbsp;Оқу жылы аяғында жыл көлемінде жақсы жетістікпен жұмыс жасап жүрген ұстаздарымыз облыстық білім басқармасы және кәсіподақ комитетінің марапатымен, аудандық білім бөлімі және білім кәсіподағаның марапатымен марапатталды. «Жас қанат» жастарының ұстаздары аудандық кәсіподақ комитенің төрағасы қабылдаунда болып облыстық кәсіподақ комитетінің марапатымен марапатталды. 1 Маусым «Балалар күні» мерекесінде аудандық орталық алаңда мерекелік шара ұйымдастырылды.&nbsp;Жазғы тынығу лагеріне Қызылорда облысының білім басқармасының «Қамбаш» олимпиадалар және қосымша білім беру орталығы" коммуналдық мемлекеттік қазыналық кәсіпорнына Қармақшы ауданы білім қызметкерлерінің балалары демалды. 42 бала Шипажайларға білім қызметкерлерін жіберу жұмыстары ұйымдастырылуда.

Қазақстан және Қызылорда облысының жаңалықтары