<a href="https://kyzylorda-news.kz/">Kyzylorda-news.kz.</a> Бүгінде ауданда еңбек етіп, жұртқа алақан жаймай, өз күнімді күнелтемін деушілер қатары жыл сайын артуда. Мұндай кәсіпке ұмтылған жандардың саны өсе берсе, қазалылықтардың әл-ауқаты жақсарады деген сөз. Соның арқасында Әйтеке би кентінің орталығында түрлі нысандар жаңадан бой көтеріп, сауда, қолөнер, кондитерлік өнім әзірлеу ісі дамып келеді.&nbsp;Мемлекеттік грант негізінде қайтарымсыз қаражат алған қазалылықтар бүгінде өз істерін дөңгелетіп, жан-жағына алаңдамай, нәпақасын тауып отыр. Мал шаруашылығына қызығушылық танытқандар да бар.Солардың қатарында он саусағынан өнері тамған ұста, жаңадан ісін ашқан Айбосын Төлемісұлы өтеусіз қаржының арқасында темір бұйымдарын жасайтын шеберхананы қолға алды. Шағын және орта бизнесті дамыту аясында беріліп жатқан мемлекеттік бағдарламалардың, жұмыссыз жандарға, әсіресе қолынан өнері тамған, бірақ қаржы тапшылығы қолбайлау болғандарға пайдасы зор екендігі айтпаса да түсінікті. Соңғы жылдары беріліп жатқан қайтарымсыз грант талай азаматтың шабытын шыңдады. Соның арқасында қаншама жұмыссыз жандар жеке кәсібін өркендетіп, бала-шағасын асырап келеді.&nbsp;"Әрекетке – берекет" демекші, туған топырақтың түлеуіне аянбай атсалысып келе жатқан азамат, 44 жастағы Айбосын әу бастан электрмен дәнекерлеуге ебі бар, темірден түйін түйіп, бұйым жасауға бейім жігіт болды. Шамасының келгенінше, той-жиындарға арналған безендіру бұйымдары мен темір есіктер жасап жүрген. Дегенмен, кәсібін одан әрі дөңгелеткісі келсе де, ірі бұйымдар дайындауға қажетті құрал-жабдықтарға қолы жетпеді. Осылайша, мемлекеттен қайтарымсыз ақша беріліп жатқаны туралы ақпараттанады. Ол қайтарымсыз мемлекеттік грантқа құжат өткізіп, нәтижелі жұмыспен қамтуды және жаппай кәсіпкерлікті дамытуға арналған «Еңбек» мемлекеттік бағдарламасы шеңберінде 583400 теңге көлеміндегі қаржыға қол жеткізеді. Бұл күні кәсібін жаппай жалғастырып отыр. Алайда, жаңа құрал-сайман алып, цех ашып, көмекші алып, шәкірт тәрбиелеймін деген арманына әлі жете қоймапты. Дей тұрғанмен, барға қанағат тұтып, халыққа қызметін ұсынуда.<blockquote>"Алған қаржыма темірден түйін түюге қажетті құрал-жабдықтар сатып алдым. Өткен жылы жұмысымды бастап кеттім. Бүгінде ауламда тұрғындардан түскен тапсырысты орындаудамын. Кез келген тұтынушы тапсырысын заманауи үлгіде түрлі ою-өрнектермен безендіріп есік жасап, орнатамын. Терезе сыртына темір тор, есік алдына темірден қоршау, сәкі және тағы басқа да өнімдерді өндіремін. Тапсырыс берушінің қалауынша қажетті материалынан қалауынша талғамына орай бұйымды кез келген дизайнда әзірлеймін. Мұндай бағдарламаның тиімділігі мол. Қаражат қол байлау болғандарға жанына жақын ісін ашуға мүмкіндік береді", – дейді Айбосын Орынбаев.</blockquote>Бір сөзбен айтқанда, қазір ауылдың үлкен-кішісі бұл кісінің шеберлігіне дән риза. Барлық тұтынушының көңілін таба біледі, әрі талғамын дөп басады. Ісі мығым, орындаған қызметі сапалы болғандығы үшін аға буын әркез алғаусыз алғысын айтудан жалықпайды. Біз де өз тарапымыздан кәсібіне береке тіледік.

Қазалы: Қайтарымсыз қаржының тиімділігі жоғары

<a href="https://kyzylorda-news.kz/">Kyzylorda-news.kz.</a> Еңбек жолын 15-16 жасында атақты Шиелі каналын қазудан бастаған Шопанбек Нұрбайұлы 1941 жылы 17-ге толар-толмаста майданға аттанып, зұлым жаудың сазайын Сталинград майданында берді. Сталинград шайқасы екінші дүниежүзілік соғыстың барысында түбірлі бетбұрыстың басталуына негіз жасады.Тарихқа жүгінсек, Сталинградта айбынды жауынгерлер 140 күн жаумен бетпе-бет айқасты. 330 мың неміс әскері мен офицері, 24 генерал қолға түсті, сөйтіп жау ең негізгі күшінен айырылды. Нәтижесінде 22-фашист дивизиясы қоршауға алынып, генерал-фельдмаршал Паулюс басқарған 6-шы неміс армиясы тізе бүкті.&nbsp;1943 жылы 2-ақпанда генерал-фельдмаршал Паулюс қалған әскерімен тұтқынға алынды. «...Сталинградқа жорық қайғылы қателік болды. Енді ешқашан &nbsp;соғыс өрті неміс жерінен тұтанбауы тиіс. Бұл менің жасаған жауыздығым үшін кеңес халқы алдында тәубеге келгенім болсын... Мен Ресейге оған дұшпан болып келген едім, досы болып қалдырып барамын» деп жазыпты өзінің естелігінде фельдмаршал Фридрих Паулюс.&nbsp;Атақты фельдмаршалды тәубасына келтірген осы қанды шайқасқа Қызылорда облысының Шиелі ауданындағы &nbsp;Еңбекші ауылының өрені &nbsp;Шопанбек Нұрбайұлы да қатысқан еді. Қайсар &nbsp;жауынгер &nbsp;ерен ерлігі нәтижесінде ««Бірінші дәрежелі Отан соғысы» ордені &nbsp; мен «Сталинградты азат еткені үшін» &nbsp;медалін төсіне тақты.1943 жылы жараланып елге оралды. Механизаторлық курсты бітіріп, шаруашылықта &nbsp;алғашқы болып тракторға отырды. Күзгі науқан аяқталып, техникаларда қысқы орынға жинап жүргенде молотелканың сүйрейтін тетігі шығып кетіп, &nbsp;трактормен екі ортаға қысылып қалады. Ауруханаға жатып емделіп шығады, бірақ &nbsp;мамандығына қайта &nbsp;оралуға жарамай, мүгедек &nbsp; болып қалады. Дегенмен намысшыл, еңбекшіп жан с оғыста контузия, еңбекте мүгедектік &nbsp;алғанына қарамастан &nbsp;еңбектен бой тасаламай, шаруашылықтың барлық жұмысына белсене араласты. Өндіріс бригадасының есепшісі, мал азығын дайындайтын бригаданың бригадирі, тағы да басқа, мал, ауыл шаруашылық жұмыстарын құлшына атқарды. Оның бір ерекше қасиеті қайда жүрсе де ойында өлең өріліп, қойын дәптеріне төгіліп жүрді.&nbsp;...Жалғыз ұлын қан майданға аттандырып, өзі өмірден өткенше соның жолын тосып, хабарын күткен, не өлі, не тірі екенін біле алмай іш құсамен бақилық болған еңбекшілік Тәжімбет атаның туғанына &nbsp;да 140 жыл толып отыр. Шопанбек ағаның туған қайын атасы. Тарихта өзіндік орыны бар адам. Өткен &nbsp;ғасырдың жиырмасыншы-отызыншы жылдары түйемен кіре тартып жүргенде Қызыл құмның асу бермес қия шыңдарына қиғаштап жол салған азамат. «Тәжімбет асуын» &nbsp;жерлестері әлі ұмытқан жоқ.Бірінің туғанына ғасыр толып, екіншісінің өмірге келгеніне 140 жылдың жүзі болған қос тарланның тойын жерлестері асыға күтуде...

Қос майданның жаршысы

<a href="https://kyzylorda-news.kz/">Kyzylorda-news.kz.</a> Халқымызда «Еңкейгеннің еңсесін еңбек көтереді» деген даналық сөз бар. Еңбегі мен еңсесін тіктеп келе жатқан еліміз жылдан-жылға дамып, көркейіп келеді. Оның ішінде таудай тұлғалар мен дарынды ұлдарды дүниеге әкеліп, алтын бесігіне айналған киелі мекен Шиелінің тірлігі төрге, өндірісі өрге озып тұр. Ауданда соңғы жылдары өндіріс орындарының саны артып, қай салада болсын алға қарай жылжу байқалады. Әсіресе, ауданның дамып, өркендеуіне Шиелі кентінің қосқан үлесі зор. Еткен еңбек, төккен тер ақталып, Шиелі кенті облыстық байқаудан «Үлгілі аудан орталығы» номинациясы бойынша екінші орынды иеленді. Сондай-ақ қалдық тасымалдайтын «КамАЗ» көлігі мен жол тазалайтын трактор және ассенизатор машинасын жеңіп алды.&nbsp;Өткен жылы қаланы абаттандыру, елдімекендерді дамыту, оның ішінде ауыл тұрғындарының өмір сүру сапасын жақсарту, оларға жайлы орта жасау бағытындағы жұмыстарды ынталандыру, бағалау мақсатында аймақта алғаш рет «Үлгілі елді мекен» облыстық конкурсы жарияланған болатын. Конкурстың талаптары таныстырылып, бұқаралық ақпарат құралдарында жарияланып, кеңінен насихатталды. Биыл да аталған байқау жалғасын тауып, оқ бойы оза шыққан аудандар анықталды. Үздік елді мекендерді анықтау үшін азаматтық қоғам өкілдерінен, халық қалаулыларынан, тәуелсіз журналистер мен экобелсенділерден құрылған тәуелсіз сарапшылық комиссия жұмыс жасап, шешім қабылдады. Конкурс нәтижесін шығарып, жеңімпаздарды марапаттау рәсімі өткен аптада «Достық үйінде» ұйымдастырылып, облыс әкімі Нұрлыбек Нәлібаев жеңімпаз ауылды атап, сый-сияпатын табыстады.&nbsp;Марапаттау рәсімінде аймақ басшысы ауылдар мен қаланы тең дамыту басым бағыттың бірі екенін атап өтті.&nbsp;<blockquote>– Мемлекет басшысы Қасым-Жомарт Кемелұлы өткен айда Түркістанда өткен Ұлттық құрылтайда «Тазалық пен ұқыптылық күнделікті өмір салтымызға айналуы қажет. Қалалар мен ауылдардың сәулетті, саябақтар мен ауланың таза болуы, ең алдымен басқа біреуге емес, өзімізге керек. Азаматтарымыз қоғамдық орындар мен қоршаған ортаға жанашыр көзқараспен қарауы тиіс» деген болатын. Қазақылықтың қаймағы бұзылмаған, ұлттық дәстүрдің алтын қазығы саналатын сырбойылықтар бұл бастаманы негізгі қағида ететіні сөзсіз. Өздеріңізге белгілі, ел Президенті өткен жылы қайта сайланғаннан кейін «Қазақстан Республикасының ауылдық аймақтарын дамытудың 2023-2027 жылдарға арналған тұжырымдамасын бекіту туралы» Жарлыққа қол қойды. Осы құжат аясында Үкімет пен әкімдіктер алдағы бесжылдықта ауылды дамытуға күш салуда. Мемлекет басшысының тапсырмасына сәйкес облыстың әрбір елді мекеніне ауқымды шаралар үздіксіз ұйымдастырылуда, – деді облыс әкімі.&nbsp;</blockquote>Тазалық демекші, бүгінде Шиелі кенті әкімдігі назарынан бұл жұмыстар тысқары қалған емес. Таңның атысы, күннің батысы аула сыпырып, қоқыс сұрыптап, керексіз қалдықтарды тасып жүрген жұмысшыларды көзіміз шалады. Айта кетейік, бүгінде кент аумағында 43 жерде тұрмыстық қатты қалдықтарды жинауға арналған арнайы орындар бар. Сол 43 орынға қалдықтарды тастау үшін 163 қоқыс жәшіктері және сынап шамдар мен химиялық қуат беру көздерін жинауға арналған 24 дана жәшік қойылған. &nbsp;Бұдан басқа қараша халықтың көзіне іліне бермейтін қаншама тірлік те атқарылып келеді. Қарапайым ағаштарды ақтау, жаяу жүргіншілерге арналған жолды сырлау сияқты тындырымды тірліктің өзі кенттің көркіне көрік қосып тұрады. Оның үстіне кенттегі хош иісті гүлдердің жайқалуы, оларды уақытылы суару және баптау сынды жұмыстар да аудан орталығының ажарын айшықтау үшін атқарылып келеді. Бұл әрине, тек кент жұмысшыларына ғана қатысты емес. Ауданның абыройы – тұрғындардың да абыройы. Сол себепті жыл сайын кент аумағында сенбілік ұйымдастырылып, көгалдандыру және абаттандыру жұмыстары атқарылады. Серпін берер сенбілікке барлық мемлекеттік мекемелер мен кәсіпорындар білек сыбана атсалысып келеді. «Жұмыла көтерген жүк жеңіл» демекші, бір жағадан бас, бір жеңнен қол шығару арқылы Шиелі кенті талайлар тамсанатындай халге жетіп отыр.&nbsp;Ал осындай нәтижелі жұмыстың атқарылуына «Үлгілі елді мекен» облыстық байқауының серпін берері сөзсіз. Осыны ескерген облыс басшысы марапаттау рәсімінде ауыл-аймақтың ажарын айшықтап, келбетін көркем етуді көздеген шараны жыл сайын атап өтуді жоспарлағанын тілге тиек етті.&nbsp;<blockquote>– Бүгін бірлік пен берекенің, тазалық пен абаттандырудың үлгісін көрсеткен жеңімпаздарға күнделікті тұрмысқа ең қажетті, заманауи үлгідегі техникаларды табыстаймыз. Тазалыққа жаны құмар қала тұрғындарының да абаттандыру бағытындағы еңбектері орасан. Жеңімпаз атанған шағын аудандарда сквер салу, көше, аулаларды жарықтандыру, балалар және спорттық ойын алаңдарын салу сынды жобаларды облыстық бюджеттен қаржыландыратын боламыз. Күзде «Үлгілі елді мекен» конкурсы қаланың шағын аудандары, аудан орталықтары мен ауылдар арасында қайта жалғасады. Қазірдің өзінде облыстық бюджеттен 523 млн теңге қаржы бөлініп, дайындық жұмыстары басталды, – деп Нұрлыбек Машбекұлы жақсы жаңалығымен бөлісті.&nbsp;</blockquote>Қазіргі уақытта ел экономикасын сауықтырып, халықтың әл-ауқатын жақсарту бағытында әр салада ауқымды жобалар жүзеге асып жатқаны белгілі. Оның үстіне ел Президенті «Барлық бағдарламалардың нәтижесі айналып келгенде қарапайым адамдардың ертеңгі күнге деген сенімін оятып, әр отбасының ауқатты тұруын қамтамасыз етуге бағытталуы тиіс» деген болатын. Осы тұста ауданда атқарылып жатқан абаттандыру жұмыстарын айналып өтсек жарамас. Себебі, әр абаттандыру жұмысы халықтың игілігі үшін жасалып жатыр. Мәселен, Шиелі кенті, Т.Жүргенов, әл-Фараби, И.Панфилов, Қ.Шәкәрім және И.Әбдікәрімов көшелері бойында орналасқан футбол алаңдарында қазіргі таңда күрделі жөндеу жұмыстары жүргізілуде. Ал жақын арада И.Әбдікәрімов көшесі бойындағы көпқабатты 18 пәтерлі тұрғын үй ауласына балалар ойын алаңының құрылысы басталмақ. Оған қоса аталған көшеге және Иманжүсіп аллеясына асфальт төсеу жұмыстары қолға алынған. Тек бұл ғана емес, бүгінде аудан халқы кешкілік серуенге шығып, бой жазып, таза ауамен тыныстайтын аллеялардың да саны артып келеді. Бұрынғыдай жастар қауымы да жазғы демалыста қайда барамын деп сенделмей, кеш қарайғанда бір мезгіл дене шынықтырумен айналысу үшін спорттық құралдар да қойылған алаңды кездестіре аласыз. Әрине, көптің көңілінен шығатын мұндай игі бастамалар осымен аяқталып қалмайды. Бұл туралы марапаттау рәсімінде облыс әкімі айтып өтті.&nbsp;<blockquote>– Тұрғындарының тілегі бойынша аудан орталықтарында музей, кітапхана, архив, неке қию залы, ардагерлер және аналар, жастар орталықтары сынды бірқатар мекемелерді біріктіріп, заманауи бір ғимарат етіп салу бағытындағы жұмыстарды қолға алудамыз. Бұл жұмыстар туған жеріміздің гүлденуіне оң әсер ететіні сөзсіз, – деп жаңа бастама туралы сөз етті аймақ басшысы.&nbsp;</blockquote>Облыстық байқауға қатысып, бақ сынаған өзге аудандар да марапатсыз қалмады. Сонымен қатар көркейту-көгалдандыру шараларына үлес қосқаны үшін бірқатар белсенді азаматтарға облыс әкімінің «Алғыс хаты» табысталды. Іс-шара соңы облыс өнерпаздарының ән шашуымен жалғасты.

Серпін бар Шиелінің әр ісінде

<a href="https://kyzylorda-news.kz/">Kyzylorda-news.kz.</a> Мүгедектіктің құрығына түсіп, жарымжандықтың тақсіретін тартып, тауқыметін мойнына іліп жүрген жандар қаншама?! Әрине, әркім өзіне тиесілі тағдырды таңдап алмайды. Қоғамда қанша адам болса, сонша тағдыр иесі бар. Кейбіреулері арбаға таңылып, қос аяғынан айырылып жатса, енді біреулері жанарынан, қолынан, я болмаса өзге де дене жарақаттарын алып жатады. Бірақ айналамызда 12 мүшесі сау болса да мүмкіндігі шектеулі жандай қаннен-қаперсіз жүретін адамдар да жоқ емес. Осындай да қайсысының нағыз мүмкіндігі шектеулі екен деп ойланып қаласың. Себебі өз еркімен жүріп-тұра алмайтын адамдардың әрқашан тырысып, жетістікке жетуге талпынып жатқанын жиі байқаймыз. Ал тепсе темір үзетін, денсаулығында бір кінәраты жоқ кей &nbsp;кісілердің өмірге деген талпынысын сезінудің &nbsp;өзі қиын. Сондықтан болар қазір қандай жұмыс атқарылатын болса да, мүгедектікі бар жандарды да ескерусіз қалдырмай келеді. Тіпті арнайы топ өкілдеріне арнап әртүрлі спорттық шаралар, концерттер мен байқаулар да ұйымдастырылуда. Бұл да кедергісіз қоғам қалыптастыруға талпыныс.&nbsp;Әлгінде айтқанымыздай, өмірдің бір сарынды немесе бір түсті болуы мүмкін емес. Ақ пен қара бірге жүретін секілді, адамдардың арасында да әртүрлі жағдай болып жатады. Мәселен, Шиелі ауданында 2382 мүмкіндігі шектеулі адам тіркелгенімен, оның барлығын бірдей жұмысқа жарамсыз, яки төсекке таңылып жатып қалған деуге болмайды. Олардың өзі ішінара бірнеше топқа бөлініп, өздеріне тән кәсіппен, хоббимен айналысып келеді. Тіпті арасында 124 адам еңбекке қабілетті. Жылдың басынан бері оның 36-ы ақылы қоғамдық жұмыспен айналысса, үшеуі әлеуметтік жұмыс орындарына, бесеуі жастар практикасынан өтуге уақытша жұмысқа жолдама алған. &nbsp;Демек аты мен анықтамасы ғана мүмкіндігі шектеулі демесеңіз, өзгерелер сияқты олар да қоғаммен тығыз байланыста болып, ел қатарлы жұмыс істеуге қауқары жетеді. Қуаныштысы, олардың арасында «Мен арбаға таңылдым, яки мүгедекпін. Маған барлығы көмектесуге міндетті» деп алақан жайып отырған ешкім жоқ. Керісінше, білсем, көрсем, үйренсем деген талпыныстарын тез-ақ аңғаруға болады. Мысалы, мүмкіндігі шектеулі азаматтардың арасында 79-ы қазіргі кезде «Бастау-Бизнес» кәсіпркерлік негізінде оқыту курстарын онлайн түрде оқып, сертификат иегері атанған. Олардың ішінде 12-не қайтарымсыз грант тағайындалып үлгерді. Кәсіп ашамын деген жанның қолдаушысы бар екеніне бұл да бір дәлел. &nbsp;Бұдан бөлек 4 мекемеге 4 азамат тұрақты жұмысқа орналасқан.&nbsp;Онсызда тағдыр шекесінен тартып, шаңышқысын шалт қадаған жандарды қоғам кеудесінен кері итермеуі керек. Иә, кейде айналамыз қатігезденіп денсаулығында кінәраты бар адамдарды қолын шошайтып көрсетіп, көңіліне тиер ауыр сөздерді де айтып жатады. Бірақ қазір мүмкіндіктер заманы. Технология қарыштап дамыған заманда «Мүмкін емес» деген сөзді айтуға болмайды. Тіпті мемлекеттің өзі тағдырдың сынына ұшыраған жандарды ерекше қамқорлығына алып, олар үшін кедергісіз орта қалыптастыруға тырысып келеді. Мысалы, Шиелі ауданында «Үміт» мүгедектер қоғамдық қорымен келісім жасалып, жыл басынан бері үздіксіз әлеуметтік такси қызметі көрсетілуде. Сондай-ақ «AMANAT» партиясының «Өзгерістер жолы: Әр азаматқа лайықты өмір» атты сайлауалды бағдарламасын іске асыру мақсатында ерекше қажеттілігі бар адамдар үшін ғимараттарды пандустармен, бейімделген лифтілермен, дәретхана және көзі көрмейтіндерге арналған бағыттаушы белгілермен қамтамасыз етіп, инфрақұрылымды жақсарту бойынша жұмыстар атқарылуда. Бұған қоса, 33 объектіні стандартқа сәйкес жөндеу де кезек күттірмейтін іс. &nbsp;Мемлекет басшысы Қасым-Жомарт Тоқаев «Қазақстан ешкімнің құқығын шектемеу керек» деп ерекше күтімді қажет ететін жандарға ыңғайлы орта қалыптастыру керегін тапсырған. Әрине, мүгедектерді жұмыспен қамту я болмаса кәсібін әрмен қарай дөңгелетіп алып кету оңай емес. Бірақ дамыған елдердің бәрінде еңбекке жарамды мүмкіндігі шектеулі жандар қысылмастан жұмыс істейді. Бұл мемлекет үшін де, мүгедектер үшін де, қоғам үшін де тиімді. Алайда кейбір жұмыс берушілер мүмкіндігі шектеулі десе бұрылып қарағысы да келмейді. Осыдан кейін олардың сағы сынып, өмірге деген құлшынысы құлдырайды. Сондықтан алдағы уақытта елімізде бұл мәселеге баса назар аударылып, әрбір жан үшін кедергісіз орта қалыптастыруға тырысу керек. Себебі олар мейірімді, көзқарасы, ой-тұжырымы, түйсігі бөлек жандар. Бойындағы күш-жігер, іштегі бұлқынысы оларды өмірді ынта-шынтасымен сүюге жетелейді. Ал қоғам сол жандардың жарық дүниеге деген махаббатын сөндірмей, керісінше серпін беруі керек.

Шиелі ауданында 2382 мүмкіндігі шектеулі жан тіркелген

Қазалы: Тарихы терең Қарашеңгел ауылында сан салада даму бар

<a href="https://kyzylorda-news.kz/">Kyzylorda-news.kz.</a>&nbsp; «Адамды адам еткен – еңбек» дегендей, бүгінгі қоғам кешегі еселі еңбек еткен тұлғалардың арқасында даму үстінде. Бүгінгі күні де тек еңбек арқылы адам көздеген мақсатына жетуде. Сондықтан қай қоғамда да еңбек еткеннің еңсесі биік. Міне, өткен ғасыр мен осы ғасыр еншісінде еңбек көрігін қыздырып, содан бақты тапқан жандардың қатарында Орынбасар Құланшиевтей ардақты азамат бар екені мәлім. Аптал азамат кісі тек еңбек еткен адамның ғана мерейі үстем болатынын айтады.Біз айтып отырған О.Құланшиев бүгінде 65 жаста екен. Ауыл шаруашылығы саласының майтплманы – ауданға қарасты С.Сейфуллин ауылының тумасы. Балалық балғын шағы сол елді мекеннің топырағында өткен. Ауылдағы №137 «1 Май» атындағы орта мектепте онжылдық білім алған. Ол кезеңде бүгінгідей мектеп бітірісімен оқуға түсіп кету деген жоқ. Ер жеткен жігіт, бойжеткен қыз болсын оқу оқимын дегенше совхозда жұмыс істейтін болған. Ондағысы – енді ғана үлкен өмірге қанат қаққан жастар еңбекпен есейсін, барлық нәрсе маңдай терге байланысты екенін ұғынсын деген қағида. Осы қағида негізінде Орынбасар аға совхозда механизатордың көмекшісі болып еңбек жолын бастайды.<blockquote>– Ол кездегі ауылдың жағдайы белгілі. Барлық адам шаруашылықта еңбек етеді. Мектеп бітірген жылы менің де еңбек жолым елді мекендегі совхоз жұмысымен байланысты болды. Шаруашылықта егін егіледі, мал бағылады, оған қажетті шөп жиналады. Осы жұмыстар совхозда бар техникалармен атқарылады. Ал олардың бұзілмай жүруі механизаторға тікелей байланысты. Сондықтан ең алғаш механизатордың көмекшісі болғанымда ауыл шаруашылығы техникаларын жөндеу жұмыстарына араластым. Азды-көпті тәжірибе жинақтадым, – дейді еңбек адамы.</blockquote>Совхозда техника жөндеп, оны тізгіндеуге машықтана бастаған жас маман 1975 жылдың желтоқсан айында аудандық әскери комиссариаттың шақырумен үш айлық автомектепте оқыған. Сол негізде жүргізуші куәлігін алған.Одан кейінгі жылдары Ресейдің Саратов облысында әскери міндетін өтеп келіп, аудан орталығында еңбекке қайта араласады. Өзі Орын-басар Құланшиевтің еңбек кітапшасында үш қана мекеменің атауы тұр. Оның біріншісінде 1978-1983 жылдар аралығында аудандық «Сельхозтехника» мекемесінде көлік жүргізуші болып жұмыс істеген. Ал 1997 жылға дейін Тереңөзек аудандық «АТП» мекемесінде көлік жүргізуші болған. Және де 2002-2021 жылдар аралығында «ҚОР» МК АҚ-да мұнай саласында еңбек етіп, осы жерден құр¬метті зейнет демалысына шыққан.<blockquote>– Қазіргі уақытта ер мен әйелдің барлығы көлік тізгіндей береді. Бірақ біздің уақытта бүгінгідей жеңіл көліктердің түр-түрі болған жоқ. Барлық техника шаруашылық жұмысына қатысты болатын. Сондықтан ауыр техникаларды тізгіндеп, астық тасу, жем-шөп жеткізу жұмыстарын істедік. Шопырлық жұмысты өткен ғасырдың аяғына дейін атқардық. Ал жаңа ғасырдың бас кезінде мұнай саласына жұмыс ауыстырып, 20 жылдай еңбек еттім. Мұнда да негізгі қызметім техника саласына қатысты еді. Сол жастайымнан еңбекке араласып, білікті механизаторлардан үйренген, көрген тәжірибем өмірлік азық болды десем артық айтқандық емес. Содан соң мен қатарлы замандасымның барлығы осылай еңбек етті. Олар¬дың қайсысы болсын қара жұмыстан қашқан емес, – дейді О.Құланшиев.</blockquote>Осы күні бейнетінің зейнетін көріп жүрген еңбек ардагері туралы замандастары өте жақсы пікірде. Көпшілік жақсы танитын Орынбасар аға туралы сұрай қалсаң барлығы еңбеккеш екенін айтады.<blockquote>– Біз – замандаспыз. Жас кезімізден бірге араласып келеміз. Орекең жас кезінен еңбекқор. Өзі техника тізгінінде болса да жан-жағындағыларға қолғабыс етіп, қай жұмысыңды да істеп жүре береді. Сонысымен де елге сыйлы болды. Қазір Орекең зейнет демалысында болса да үйде жатқанды құп көрмейді. Еңбек етуге бейімделіп қалған адам тынымсыз болатыны анық. Бүгінде бақша дақылдарын бірге егіп, соның бап-күтімін жасап келеміз. Бұл тұрғыда да ол кісінің тәжірибесі мол. Орекең – жастарға үлгі ететін нағыз еңбек адамы, – дейді еңбек ардагері Әлібек Емжаров.</blockquote>Орынбасар аға Құланшиев көпжылғы бейнеті үшін екі рет Қызылорда облысы әкімінің Алғыс хатымен, «Қазақстан мұнайына – 120 жыл» мерекелік медалімен марапатталған.Ардақты аға жалағаштық Минут Қайбаровамен шаңырақ көтерген. Бүгінде Нұрбол, Марат, Әсел есімді ұл-қызды жетілдіріп, олардан немере сүйіп отыр. Ардақты ата, құрметті әке, қадірлі еңбек адамы ретінде көпшілік құрметіне бөленуде.&nbsp;&nbsp;

Ауыл шаруашылығы саласының майталман маманы 

<a href="https://kyzylorda-news.kz/">Kyzylorda-news.kz.</a> Бүгінде халық төрт түлікте береке барын жақсы түсінген. Себебі, мінгенге көлік, шөлдегенге сусын, ашыққанға азық болса, ал шеберлердің қолына түссе, терісі мен жүні қажетті дүниеге айналады. Дархан даланың еңбекқор шаруаларының арқасында қазір кең байтақ жеріміз мыңғырған малға толуда. Солардың қатарында Жанқожа батыр ауылының тұрғыны Гүлбану Әлиеваны ерекше атауға болады. Талапшыл жан мемлекеттік бағдарлама бойынша жеңілдікпен 6 проценттік көрсеткішпен сомасы 11 миллион теңге құрайтын несие алған. Мұндай мемлекеттік жоба бойынша несие мерзімі 9 жылға деп есептелгенмен ел кәсіпкерлері өз ісінде айналымға шығуы үшін 2 жыл қарызды өтемей тұра тұруға мүмкіндік береді. Бұл жаңалық жас кәсіпкерді ерекше ынталандырып, қолға тиген қаражатқа барлығы 15 түйе иемденді. Солардың басын қолдағы түлікке қосқанда 42 басқа жетті. Нағыз құмды жерге жақсы бейімделген жануарлардың арасынан 10 түйені отбасымен бірге сауады. Оларды арасын өткізіп, 3 мезгіл сауатын көрінеді.&nbsp;Түйе күйіс қайтаратын, жұп тұяқты, шөл және шөлейтті жерлерге жақсы бейімделген үй жануары. Түйенің аналығын - іңген, аталығын – бура деп атайды. Түйенің ботасын емізіп, сауу үшін көс - көс деп шақырады. Түйені су ішуге сорап - сорап деп шақырады. Шөк - шөк деп түйенің тізесін бүктіріп, шөгеру үшін айтылған сөз. Басқа жануарларға қарағанда түйенің ерекшелігі көп. Түйені пышақпен жүндейді. Малды ұстап байлайтын жабдықтары болады. Түйені мұрындық немесе бұйдамен байлайды. Түйе төлін 12 ай көтереді. Түйенің баласын бота деп атайды. Бір топ түйені келе - келе деп атайды. Түйені бағатын адамды түйеші дейді.&nbsp;<blockquote>“Қазақ халқы үшін төрт түліктің осалы жоқ. Дегенмен, ілгері заманда жылқы мен түйенің адам үшін атқаратын қызметі өте жоғары бағаланған. “Жылқы малдың - патшасы, түйе - малдың қасқасы” деген мақал сол кезде туылған болатын. Мереке - қуанышта, қайғы - қасіретте басқа түскен ауыр күндерде бұл түліктер адамның айырылмас жан досы болған. Біздің жерімізде үй жануарларын өсіруге қажетті жағдайлардың бәрі бар. Шүйгін шөп, су, жайылымдық жерлер жеткілікті. Оның ішінде түйе шаруашылығының пайдасы мол. Түйе 150 - 200 келіні құрайтын жүкпен 30 - 40 шақырым жол жүре береді. Қазақ халқы еті мен сүті, әрі тағам, әрі шипалы дәрі, жүні - киім, өзі - сенімді көлік болған қасиетті жануарды төрт түліктің төресі санаған. Сүтінен емдік қасиеті бар май, шұбат, сыр дайындалса, еті тағамға қолданылды, ал жүні 85 процент таза өте бағалы түбіттен тұрады. Барлық шөптің түрін жей береді, шөлге шыдамды. Олардың салмағы 550 - 650 келі, ол 10 - 12 келідей жүн беріп отырады. Басқа үй жануарларына қарағанда, түйе біздің елімізде өте аз. Түйе киелі жануар – пайдасы да зор. Қазақтың түйе сүтінен жасалатын ұлттық сусыны - шұбат. Шұбат - түйе сүтінен ашытылады. Бұл - әрі сусын, әрі тағам. Өйткені бие сүтіне қарағанда, түйе сүті өте майлы келеді. Оның емдік қасиеті мол”, – дейді кәсіпкер әйел.</blockquote>Ірі қара малдың сүті, еті үшін өсіреді. Үй жануарлары ең алдымен тамақ өнімдерімен қамтамасыз етеді. Ал жүн, түбіт, теріден киім – кешек дайындауға болады. Оның ішінде түйе шаруашылығының тигізер пайдасы мол деп айтар едім. Басқа жануарларға қарағанда еті де, жүні де мол. Әсіресе сүтінен шұбат ашытып оны емге пайдаланылады. Ертеде түйені көлік ретінде пайдаланған. Бір түйеге кигіз үйді жабдықтарымен артып, бір жетіге немесе он күнге дейін су ішпей жүре береді екен. Олар 30 - 40 жыл өмір сүреді. Түйеден 350 - 450 кг. ет алынады. Қазақ халқы еті мен сүті әрі тағам, әрі шипалы дәрі, жүні киім, өзі сенімді көлік болған қасиетті жануарды төрт түліктің киесі санаған. Түйеден алынатын бағалы өнімнің бірі жүн. Тоқыма өнеркәсібі үшін бағалы шикі зат. Түйе жүнінен дайындалған бұйымдар әрі жеңіл, әрі жылы болады. Ел арасында шудадан жалпақ белдік тоқып, белі ауырғанда, сары су жиналған жерге тағады. Ата - бабаларымыз қасиетті жануар болғандықтан пір тұтқан.Осы күні түйе шаруашылығын дамытуда сүбелі үлесін қосып отырған кәсіпкер бұдан бөлек жылқы, сиыр және уақ малдарды да баптап жүр. Төрт түлік ұстауда ұзақ жылдық тәжірибесі бар Гүлбану Әлиева үй тіршілігін ұршықша иіруде. Атап айтқанда, түйе сауу, шұбат ашытудың қыр-сырын тәп-тәуір меңгерген. Берекелі әулеттің келіні, түйе төлін өсіріп, шаңырағындағы үш баласына білгенін үйретіп, шаруаға баулып жүр. Сонымен қатар күбі пісіп, табиғи сары май мен құрт пен ірімшік әзірлейді. Түйенің қырқылған жүнін де кәдеге асырады.&nbsp;<blockquote>“Жалпы түйе сүті жүз ауруға ем. Ол ішек-асқазан аурулары, өкпе ауруларымен күресіп, жүйке-жүйесінің жақсаруына әсер етеді. Балалар мен ересектердің иммундық жүйесін қалыпқа келтіреді. Дәмі тіл үйіріп, шөліңді қандыратын қасиетке ие. Шүкір, күніне кемі 10-15 литр өнім алу мүмкіндігі бар. Шұбат дайындап, алдымен балаларға, сосын үйге келген меймандарға ұсынамыз. Қалған ауысқанын тұрақты тұтынушыларымызға сатамыз. Әрекет етсең еңбегі қарай Құдай да береді. Әзірге бастама жаман емес. Тапсырыс берушілер көп. Ауылдағылардан бөлек Қазалыға да жеткіземіз”, – дейді кәсіпкер.</blockquote>«Ашытқысын үзбейміз» деген ол, қажетіне қарай бірде түйе сүтін жылыдай құйса, бірде пісіріп құятынын жеткізді. Содан да болар шұбатқа сұраныс үзілмей, тұтынушылар қатары көбеюде. Қойған бағасы да аса қымбат емес.&nbsp;«Түйесі бардың, киесі бар» деп бекер айтылмаған. Қазір де шұбаттың мыңда бір дертке шипа екенін ғалымдар дәлелдеуде. Енді Гүлбану шаруалығының шашауын шашпай, оны ұлғайтуды діттеп отыр. Алдағы уақытта көмекшілер алып, жұмыссыз санын азайтуды да көздеуде. Біздің тарапымыздан мақсаты айқын, жоспары нық Гүлбанудың берекесі арта берсін деген тілек.

Қазалы: Жанқожалық кәсіпкер әйел түйе сауып, шұбат ұсынуда

<a href="https://kyzylorda-news.kz/">Kyzylorda-news.kz.</a>&nbsp; Өңірдегі жедел – жәрдем станциясының материалдық-техникалық жағдайын жақсарту, мамандардың тапшылығын жою секілді мәселелер бүгін «AMANAT» партиясы облыстық филиалы жанындағы Білім және денсаулық сақтау мәселелері жөніндегі аймақтық Кеңес отырысында қаралды.Жедел – жәрдем қызметіне көпшліктің көңілі толмай жатады. Бұған себеп те көп. Алайда бүгінгі күні облыстық медициналық жедел жәрдем стансасы бойынша өте күрделі қаржылық қиындықтар қалыптасқан. Яғни, стансаның тапқан қаржысы жалақы қорының өзін жабуға жетпегендіктен ағымдағы жылдың 1 қаңтарына 564,0 млн теңге кредиторлық берешек қалыптасқан.&nbsp;Облыстық денсаулық басқармасы басшысының орынбасары Ерділдә Нұртазаұлының айтынша станса бойынша қаржының жеткіліксіздігі 2018 жылдан бері тұрақты түрде орын алып келеді, дегенмен жыл сайын аймақтық коэффициенттерді жоғарылату есебінен реттеліп, қосымша қаржылар бөлініп келген.&nbsp;<blockquote>«2020 жылы бұйрықпен бекітілген аймақтық коэффициент жыл басында 1,167 болса жыл ішінде өзгерістер жасалып 1,3444-ке артты. Ал 2021 жылы 1,1670 –ден 1,4852-ге өсті. Биылдан бастап аймақтық коэффициент мүлдем алынып тасталып, станса өзінің қызметін толық атқарғанымен тарифтің өте төмендігінің салдарынан қаралған қаражатты толық ала алмай қарызға әбден батып, тығырыққа тіреліп отыр. Қазіргі таңда, мамыр айының жалақысы төленгенімен сәуір айынан бері міндетті салықтық төлемдері мен жарналары төленбей келеді. Бүгінгі күні қызметкерлерге шілде, тамыз айыларының жалақысын төлеу мәселесі қиындық тудырып отыр»,- дейді облыстық денсаулық басқармасы басшысының орынбасары.</blockquote>Атап өту керек, станса құрамындағы 4 қалалық және 9 аудандық барлығы 13 бөлімшеде 50 бригада және 7 аудан мен Қызылорда қаласына медициналық авиация бөлімшесі мен оперативті бөлім жұмыс жасайды.Кеңесте мәселені шешудің жолдары талқыланып, облыстық мәслихат пен тиісті органдарға нақты ұсыныстар жолданатын болды.&nbsp; Жиын барысында күн тәртібіндегі екінші мәселеге орай өңірдегі үш ауысымды, апатты жағдайдағы білім беру нысандарының мәселесін шешу бойынша атқарылып жатқан жұмыстар мен арнайы және мектеп-интернаттарында оқитын балалардың оқуы мен тұруына жасалған жағдайларда қаралды.&nbsp;<blockquote>Қазіргі таңда аймақта 6 апаттық және Қызылорда қаласында үш ауысымда оқытатын 6 мектеп бар. Бұл мәселені шешу «AMANAT» партиясының сайлауалды бағдарламасында да қамтылған. 2025 жылы толық шешіледі деп жоспарланып отыр. Нақты жұмыстарға тоқталсақ, «Жайлы мектеп» ұлттық жобасы аясында өңірде салынатын 21 мектеп есебінен апаттық мектептердің 4-еуінің мәселесі шешімін табатын болады. Олар Қазалы ауданындағы №94-ші, Қармақшы ауданындағы №105, 108 мектеп және Шиелі ауданындағы №45 мектеп. Арал ауданы Тоқабай елді мекеніндегі апатты мектептің құрылысы жеке демеуші есебінен жүргізілуде. Нысан биылғы жылы пайдалануға берілмек. Ал, Шиелі ауданы Жансейіт елді мекеніндегі 100 орындық мектептің құрылысын «Білім беру инфрақұрылымын қолдау қоры» есебінен қаржыландыруға ұсынылған.&nbsp;Ал үш ауысымда оқытатын білім беру ұйымдары мәселесін шешу мақсатында облыс орталығындағы 4 мектептің жанынан 1850 орынға лайықталған қосымша ғимарат құрылысы жүргізілуде. Қалған 2 білім нысаны биыл пайдалануға берілетін Жезқазған трассасы бойындағы 600 орындық жаңа мектеп есебінен шешіледі. Бұдан бөлек, аудандардағы орын тапшылығын шешу мақсатында осы жылы Жаңақорған ауданында 300 орындық, Шиелі ауданы 250, Қазалы ауданы, Әйтеке би кентінде 250 жаңа 3 мектеп пайдалануға беріледі. Осылайша биылғы жылы үш ауысымда оқыту мәселесі толық шешімін табады»,- дейді атқарылған жұмыстар жөнінде хабарлама жасаған облыстық білім басқармасы басшысының орынбасары Бағдат Бердәулетов.</blockquote>

Жедел-жәрдем станциясының материалдық-техникалық жағдайы аймақтық кеңес назарында

Теңізді өлкенің тынымсыз тіршілігі

<a href="https://kyzylorda-news.kz/">Kyzylorda-news.kz.</a>&nbsp; Қызылордалық кәсіпкер Самал Смаилова «Eco Green» бренді аясында экоөнім өндірісіне ден қойды. Оның ішінде дайын таңғы ас,&nbsp; жемісті чипс, пастилалар тұтынушы қолына тиіп үлгерді.Бизнесті бастамас бұрын Самал жергілікті тұтыну нарығына талдау жасаған.<blockquote>– Айналдырған 3 айда инстаграмның ғана көмегін пайдаландық. Жазылушы аз болғанымен бір клиент жүрген жерінде айтып, ондаған клиент әкелетін болды. Бәрімен сөйлесе келе көзімнің жеткені, қызылордалықтар ғана емес, жалпы адамдар қазір өз денсаулығына бейжай қарамайды. Сондықтан көбі дұрыс тамақтануды таңдаған, – деді ол.</blockquote>Кәсіпкер жақында «Бір ауыл – бір өнім» көрмесіне қатысқан. «Қызылордадан да осындай шыға ма?» деп таңғалыпты көргендер. Иә, әзірге облыс орталығында ғана шығып жатыр. Енді өңірге, сосын ел аумағына тарату ойда бар.Өнімнің негізі – сұлы жармасы. Сонымен қатар&nbsp; микро-макро элементтерге бай&nbsp; жаңғақ, дәндер қосылады. Алдағы уақытта өнім түрлілігі артады. Мюсли таңғы асын, арпа-бидай, күріштен&nbsp; өнім шығармақ.<blockquote>– Экоөнім, аты айтып тұрғандай, таза, қоспасыз. Құрамында қант, маргарин май, қопсытқыш жоқ. Чипстерді жаңазеландиялық құрылғымен кептіреміз. Өйткені бұл ел пластикадан, зиянды материалдардан бас тартқан. Пастила тіскебасары жеміс пюресінен жасалып, сол құрылғыда&nbsp; кептіріледі, – деді кәсіпкер.</blockquote>Барлық бала бас тарта алмайтын чипстің орнын «Eco Green» өнімі ауыстыра алады.

Қызылордалық кәсіпкер «Eco Green» бренді аясында экоөнім өндірісін қолға алды

<a href="https://kyzylorda-news.kz/">Kyzylorda-news.kz.</a>&nbsp; Елдің тұтқаұстары болған жастарды жалынды, жігерлі деп жатамыз. Барлығының бойында күш-жігері тасып тұрады. Десе де олардың арасында барлық іске тез бейімделіп, кез келген жұмысты ұтымды үйлестіре білетін бел¬сенділері болады. Олар жалындап тұрған жас буын өкілдеріне жетекшілік те жасай біледі. Бүгін біз сұхбаттасқан қоғалыкөлдік Олжас Балтахожа – сондай белсенді жастардың бірі саналады.– «Өзге емес, өзім айтам өз жайымда» дегендей, сұхбатымыздың әлқиссасында өзіңіз туралы айтсаңыз. Олжас Балтахожа кім?– Мен ауылдың қарапайым баласымын. Көптеген даналар мен даралар шыққан қасиетті Қоғалыкөл ауылында туып, өстім. Әкем Айтқожа ауылда еңбек етіп, бүгінде немерелерінің ортасында отыр. Ал анам Жадыра білім саласында қызмет етеді. Ауыл мектебінде директордың тәрбие ісі жөніндегі орынбасары. Өзім туған елді мекендегі №44 орта мектепте білім алып, үлкен өмірге қанат қақтым. Мектеп бітірген соң сол кездегі Қызылорда облысының әкімі Қырымбек Елеуұлы тағайындаған білім грантын ұтып алып, Қорқыт ата атындағы университетке оқуға түстім. Университет қабырғасында «Технологиялық машиналар және жабдықтар» мамандығын меңгеріп шығып, еңбекке араластым. Қазір ақпараттық қоғамның қарқынды дамыған шағы. Сол себепті әрбір адам қоғам үдерісінен еш қалмауы керек. Сондықтан қазіргі қызметім де соған байланысты. Бүгінде «Қызылорда электр тарату тораптары компаниясы» акционерлік қоғамында PR-менеджер қызметін атқарып келемін.– Жас бола жүріп, жастар жанашыры екеніңізді білеміз. Осы салада еңбек еттіңіз. Сол еңбегіңіздің нәтижесінде Ел Президентімен кез-десудің сәті түсті. Осыны кеңінен тарқатып берсеңіз?– Университет қабырғасында барынша белсенді өмірге жақын болдық. «Ұлағат ұландары» педаго¬гикалық жасағына жетекшілік еттім. Осы жасақ құ¬рамында жүріп, жазғы тынығу лагерьлеріне тәлімгер ретінде бала-лардың демалысын, уақытын қызықты өткізу үшін түрлі іс-шаралар ұйымдастырдық. Сондай-ақ басқа уақытта да қайырымдылық көрсетіп, университет қабырғасындағы іс-шараларға атсалыстық. Одан бөлек, жайдарманды да қатар алып, өңіріміздің намысын республикалық ойындарда қорғап жүрдік. Сол белсенділігімді облыстық жастар орталығының мамандары байқаса керек, оқу бітірісімен Сыр жастары үшін қызмет етуге шақырды. Жастар орталығының жаңа ғимараты қаланың сол жағалауынан бой көтерді. Жаңа жастар орталығының жұмысымен танысуға Ел Президенті Қасым-Жомарт Тоқаев Сыр еліне іссапары барысында келді. Сыр жастарымен кездесу барысында Президентіміз жастарға мемлекеттік бағдарламалар бойынша кеңес беріп, мен тұрған жерге кідіріп тоқтады. Мен ол кісіге жастар үшін жасалып жатқан бағдарламарды және қандай кеңестер беріліп жатқанын егжей-тегжейлі түсіндірдім. Президентімізге шығармашыл, белсенді жас екенімді, жайдарманшы екенімді облыстық жастар орталығынын басшысы жеткізді. Мемлекет басшысы көңілді көзқараспен жайдарман саласындағы жастардың потенциалы жоғары екенін және бұл саладағы жастардың болашағы зор екенін айтты. «Қазіргі таңда жайдарманшылар Президент болып жатыр. Сондықтан сенің де президент болуға мүмкіндігің зор» деп батасын берді. Бұл 2019 жылы болатын. Ал биыл сол жылғы түсірілген видеошығарылым әлеуметтік желіге тарады. Мұны Қазақстандағы танымал тұлғалар мен оқырманы көп блогерлер өз парақшаларына жарыса жариялады. Теледидардан да арнайы көрсетті. Тіпті, «Жайдар-манның» Президенті Есен Елеукен «Менің өзім әлі Президентпен бұлай кездескен емеспін» деп өз пікірін білдірді. Қазақстан Президентімен кездесу – мен үшін мақтаныш және маған ерекше серпін берді.– Жастар қоғамның қозғаушы күші дейміз. Қазір жастардың көбі «жеңілдің астымен, ауыр¬дың үстімен» жүргісі келетіндей. Осыған қа-тысты көзқарасыңыз?– «Заманына қарай адамы» деген қазақта жақсы сөз бар. Қазіргі таңда күн сайын мыңдаған жаңа маман¬дықтар дүниеге келуде. Сырт көзге оңай көрінгенімен әр жұмыстың өз қиындығы болатыны анық. Енді қай заманда болмасын оңай ақшаны олжа қылатын жастар жоқ емес. Олардың «жеңіл жолмен ақша табамын» деп құмар ойындарға кіріп кетуі заманның айықпас дерті болуда. Бұл тұрғыда жоғарыдағы ағаларымыз осы саланың жарнамасын азайтып, тоқтау қойса деген ұсынысым бар. Себебі жастар бұл жолға қаржылай қаражаттың жетіспеуінен барады. Бұған өз кезегінде өңіріміздегі еңбекақы пайызының төмендігі де әсер ететіні анық. Мейлінше, өндірістік саладағы қыз¬¬мет¬¬керлердің жалақысын көбейтсе, адал еңбекпен нәпа¬қасын табатын жастар саны артады деп ойлаймын.– Қоғалыкөлдік жастардың басын біріктіріп, жайдарман тобын құрдыңыз. Республикалық лигаға дейін барғанын білеміз. Қазір қоға-лы¬көлдік жайдарманшылар қайда? Және де ауданда жайдарманға деген қолдау қай деңгейде деп ойлайсыз?– Иә, «Қоғалыкөл» жайдарман құрамасы республикалық ойындарда, оның ішінде жоғары лигаларда ауданның, ауылдың намысын қорғап, сәтті өнер көрсете білдік. Жетістіктеріміз де аз емес. Бірақ, ең бастысы, шығармашыл жастарға тұрақты демеушінің болуы қажет. Біздің жайдарманды әрі қарай жалғастыруымызға демеушіміздің шамасы келмеді. Содан кейін ауылдың әкімімен және аудандағы жастар ре-сурстық орталығының басшысымен арнайы кездескеннің өзінде қолдау болмады. Осының салдарынан команда тарауға мәжбүр болды. Қазіргі таңда қоғалыкөлдік жайдарманшылар түрлі салада қызмет етуде. «Аудандағы жайдарманға деген қолдау қай деңгейде деп ойлайсыз» дегенге келер болсақ. Қазір аудандағы жастар ресурстық орталығына жаңа басшы келгенін білемін. Аудан әкімі де жаңадан тағайындалды. Жаңа басшылар бұл салаға жаңашылдық әкелетін шығар деген ойдамын. Дегенмен, деңгей мәселесінде ең соңғы рет ауданымыздан республикалық лигаларға шыққан жалғыз Қоғалыкөл құрамасы. Сондықтан ауданда жайдарманшыларға үлкен қолдау қажет деп есеп-теймін.– Бүгінгі қоғам – әлеуметтік желінің тілін білетін жастардың қоғамы. Бұл тұрғыда, кәсіби маман екеніңізді көріп жүрміз. Халыққа қажетті контент түсіруді қолға алыпсыз. Осы жөнінде ай¬тып берсеңіз?– Бүгінде әлеуметтік желі жаңа мүмкіндікке жол ашты. Барлық тіршілігіміз осыған байланысты болуда. Облыстық жастар орталығының ақпараттық бөлімінде жұмыс жасай жүріп, әлеуметтік желіге жақындай түстім. Сол кезден әлеуметтік желінің қыр-сырына қанығап, жұмыс жүргізе бастадым. Қазір «YouTube» платформасында екі каналым бар. Біріншісі – «Bizdin Baga» ютуб каналы. Онда 73 мың оқырман бар. Каналдың мақсаты – еліміздегі барлық сауда орындарының баға¬сын уақытылы ұсынып отыру. Оның ішінде төрт түлік, темір тұлпар, құрылыс заттары саудаланатын базар, дүкендердегі бағаларға талдау жасаймыз. Ал екіншісі – «Olzha by» ютуб каналы. Бұл каналда қазақы вайбтар түсіріледі. Яғни, ауылдағы өмір оның ішіндегі жыл¬қының пайдасы, мал сою, оны жіліктеу, ұлттық ойындар – көкпар, бәйгені, ләңгі жасауды көрсету және өңіріміздегі шипасы бар аймақтарға сапар секілді жақ¬сы дүниелерді түсіреміз. «Фейсбук», «Инстаграм» әлеу¬меттік парақшаларында да белсенділік жоғары.– Өзіңізді мазалайтын нендей мәселелер бар және мүмкіндік болса оларды қалай шешуге болады деп ойлайсыз? Және де алдағы жоспар-ларыңызбен бөліссеңіз?– Қазіргі таңда «YouTube» блогері ретінде облысымыздағы барлық ауылдың тұрмыс-тіршілігін, жағрафиялық орнын және басқа да тұстарының жақсы¬лығын асырып түсіргім келеді. Себебі елімізді дамыту үшін алдымен ауылды өркендету қажет. Ол үшін жас¬¬тарды ауылға көптеп тарту керек. Ал жастардың елді мекендерге баруы үшін, әрине оларға жасалып жатқан жағдайларды кеңінен насихаттау шарт. Олардың қызығушылығын ояту керек. Әлеуметтік желі жастарға ақпарат тарататын тікелей көпір екені сөзсіз. Сол себепті осы жұмыстарды іске асыруға тырысамыз. «Жалғыздың үні шықпас» деген бар. Осы орайда, әлеуметтік желіні дұрыс пайдалану үшін ауыл жас¬тарына сабақ беріп, үйреткім келеді. Бұған әкімдіктер қолдау білдіріп, арнайы жобалар ұйымдастырса деген ұсыныс-тілек бар. Түптеп келгенде, ауылдағы жас¬тардың шыңдалуына, олардың өмірден өз орындарын табуына демеу, қолдау білдіруіміз керек.– Сұхбатыңызға рақмет!&nbsp;

Олжас Балтахожа: Мемлекет басшысымен кездесу бақыты бұйырды 

<a href="https://kyzylorda-news.kz/ru">Kyzylorda-news.kz.</a> Халқымыз «Өсер елді өскелең ұрпағынан таниды» деп бекер айтпаса керек. Ата-ананың үкілі үмітін ақтайтын да, еліміздің артқан сенім үдесінен шығып, абыройын сақтайтын да жастар, жас өрендер. Жас болса да, талай жерде топ жарып, білімі мен білігін дәлелдеп жүрген өрендер жетерлік. Олардың әрбір жетістігі ата-ананың қуанышын еселесе, ауданымыздың мерейін асырып, абыройын асқақтатады.&nbsp;Жалпы, жазғы мезгілінде &nbsp;баланың &nbsp;ойы да, бойы да жақсы демалуы керек. Балалар жазғы демалысты тек демалу, ойнау, қыдыру үшін асыға күтпеуі керек. Сонымен қатар әрбір бала ата-анасымен тығыз байланыста болып, көбірек уақыт өткізуге мүмкіндік алғаны абзал. Бұл тұста ата-аналар тарапынан қажетті әрекет балаға мейлінше көңіл бөліп, ой бөлісу, арман-мақсаттарына қанат бітіру. Әрбір ата-ана баламен сөйлесіп қана қоймай, баланың жас ерекшелігін, психологиялық ерекшелігін, денсаулығы мен қабілет-мүмкіндігін ескере отырып жұмыс жасауы тиіс. Мамандардың кеңесіне сүйенсек, баламен байланыс жасағанда әңгімелесу арқылы өз денсаулығы мен өзінің өсіп-жетілуіне мән беруге, ойын әрекеті барысында ойлау әрекетінің де тиімді әдістерін меңгеруге, достық, жолдастық, сыйластық, өзара көмек сияқты адами қасиеттерді ұғынуға, туған жердің табиғатына мән беруге, қоршаған ортамен байланысын нығайтуға, азаматтық-елжандылық санасын қалыптастыруға, ұлттық және мәдени, тұрмыстық салт-дәстүрлермен сусындауына да қолдау білдіру, жол көрсету керек екенін айтады. Иә, баламен жұмыс жасау, оның өресін кеңейту мен дамуына тікелей әсер ету ата-ананың, тіпті қоғамның алдындағы міндеті деуге болады. Алайда бала алғашқы тәрбиенің түпқазығын отбасында бойына сіңіретінін ескерсек, бұл ретте әрбір ата-ананың үлгі болуы керек екенін даусыз.Расын айту керек, жаз мезгілін балалар ерекше ықыласпен күтеді. Ал баланың &nbsp;жазғы демалысы оның тұлға ретінде қалыптасуына, дүниетанымының кеңейіп, рухани дамуына, денсаулығы мен дене бітімінің дұрыс жетілуіне тікелей әсер етеді. Жаз мезгілі балалардың негізгі сабақтан, үйреншікті тіршілік қарекетінен босап, өзінің қызығушылығымен айналысуына мүмкіндік береді. Сонымен қатар жазғы демалыс балалардың жұмсалған күшінің орнын толтыру, денсаулығын нығайтып, оларды сауықтыру кезеңі болып табылады. Балалардың уақытын тиімді өткізу, жаман әдеттерден аулақ болуын қамтамасыз ету мақсатында ата-аналар жазғы лагерьлерге жіберіп жатады. Жазғы лагерьлердің жұмысын бастауы тек ата-аналар үшін ғана тиімді емес, тіпті балалардың асыға күтетін бақыт мекені деуге болады. Өзі құралпы балалармен қатар ойнап-күліп демалыс уақытын өткізетін баланың смартфонға үңілетін уақыты да болмайтыны анық. Сонымен бірге жазғы тынығу лагерлерінің міндеті балалардың жазғы демалыс уақытын тиімді өткізу, мектептегі тәлім-тәрбиесін толықтыру, танымын кеңейтуге жұмыс істеу.&nbsp;Сонымен бірге жаз мезгілінде балалардың смартфонға әуестігін жою үшін кітап оқуға қызықтырудың да пайдасы көп. Бұл бір жағынан баланың ой-өрісін дамытса, екінші жағынан жаман әдеттен тыйылып, уақытын тиімді ұйымдастыруға мүмкіндік береді. Бала жастайынан кітап оқуға әуес болуы үшін ата-ананың рөлі зор. Енді ата-ана үйде баланың көзінше жиі кітап оқыса, кітаптарды жиі қарайтынын байқатса және белгілі бір туындыны дауыстап оқыса баланың санасы, жады осы нәрсені тез қабылдап, саналы түрде кітап оқуды қажеттілік деп есептей бастайды екен. Ойын баласы үшін ата-анасының тосын әрекеті дер кезінде оның ойыннан ойын бөліп, кітапқа, сіз дауыстап оқып отырған мәтінге аударады. Нәтижесінде бала қызығушылық танытып, қасыңызға келеді. Солай сіз оқып отырған кітаптың мұқабасынан бастап қарап шығып, сұрақтарын жаудыра бастайды. Тиімді сәтті пайдаланған сіз де тиісінше мәтіннің қызықты жерлерінен үзінділер келтіріп, баланы кітап оқуға қызықтыра бастайсыз. Осылай ата-ана тарапынан жасалған дұрыс іс-әрекет кітап оқуға құштар баланы қалыптастыруға мүмкіндік береді. Бұл баланы кітап оқуға қызықтырудың бір тәсілі ғана.&nbsp;Жазғы лагерьлермен қатар балалардың демалысын тиімді өткізуде аудан орталығындағы Оқушылар үйінің де жүйелі жұмыс жасап келе жатқанын айтуға болады. Демалыстың бір бөлігін тынығу лагерьлерінде өткізген балалар үшін, қалған уақытын ұтымды пайдалануға мүмкіндік беретін үйірмелер жұмыс жасап тұр. Баланың шығармашылығы мен шеберлігін шыңдайтын, қарым-қабілеттерін ашып, одан ары дамытатын, бала бойындағы көшбасшылық және өнерге деген ықыласын арттыратын үйірмелердің қатарында «Жұлдыз &nbsp;бала», «Шебер қолдар», «Бейнелеу өнері», «Жас Ұлан» және «Эстрадалық әндер» үйірмесін атап өтуге болады. Айта кетейік, биылғы маусымда «Ақтерек» сауықтыру лагеріне 6 ауысымда 442 бала, мектеп жанындағы күндізгі тынығу лагерлерінде 2028 бала, облыстан тыс лагерлерде 150 баланы демалдыру жоспарланып отыр. Бүгінгі күні аудан кәсіпкерлері мен демеушілердің есебінен 170 бала Жаңақорған ауданындағы «Талдысу» лагеріне жіберілді. Сондай-ақ 2000-ға жуық бала Түркістан қаласы мен Қорқыт Ата мемориалды кесенесіне тарихи-танымдық экскурссияға шығатын болады.

Қазақстан және Қызылорда облысының жаңалықтары