<a href="https://kyzylorda-news.kz/">Kyzylorda-news.kz.</a> Қ.Нұрмаханов атындағы №95 орта мектебінде мектеп директорының бейіндік оқыту ісі жөніндегі орынбасары Ләйла Дәстенованың ұйымдастыруымен «Бүгінгі оқушы, ертеңгі студент – болашақ маман» атты студенттермен кездесу кеші өтті. Мақсаты – болашақ бітіруші түлектерге кәсіби бағыт-бағдар беру.&nbsp;Шараға осы мектепте оқып, қазіргі уақытта жоғары оқу орнында білім алып жатқан студенттер мен жоғары сынып оқушылары, мектеп ұстаздары қатысты. Алтын ұя мектебінен сан тарапқа қанат қаққан шәкірттер бүгінгі күні білім шаңырағында бас қосты. Кеш жүргізушілері ұстаздар Еркін Құдабаев пен Мираш Ақбаева мектеп мақтанышына айналған жастарды слайд арқылы таныстырып, ортаға шақырды.<blockquote>«Бұл түлектеріміз қазіргі таңда Арқалық, Актөбе, Алматы, Астана, Петропавл, Түркістан, Қызылорда қалаларында білім алуда. Олар болашақ сан түрлі мамандықтардың иелері. Бұлар – еліміздің болашағы. Атап айтсақ, «Алтын белгі» иегерлері Елдос Меңдуахас қазіргі таңда Алматы қаласындағы Әл-Фараби атындағы Қазақ Ұлттық университетінде ақпараттық қауіпсіздік мамандығы бойынша, Нұрай Киікбай Қазақстан –Ресей университетінің жалпы медицина мамандығын грант негізінде меңгеруде», – дейді Ләйла Дәстенова.</blockquote>Кеш қонақтарының қатарында Петропавл қаласындағы М.Қозыбаев атындығы Солтүстік Қазақстан мемлекеттік университетінде қазақ тілі мен әдебиеті пәні мұғалімдерін даярлау мамандығында грант жүйесі бойынша оқып жүрген Ерлан Жұмахан, Аружан Жалғасбек, Эльвира Жаңбырбай, Қорқыт Ата атындағы Қызылорда мемлекеттік университетінде білім алып жатқан түлектеріміз кадастр және жерге орналастыру мамандығының грант иегері Аружан Қарасай, шет тілі мамандығы бойынша облыс әкімі грантының иегері Манар Бозқұлан және осы университеттен ақпараттық қауіпсіздік мамандығын алатын Бақытжан Орынбасар мен болашақ дене шынықтыру пәні мұғалімі Бексұлтан Нұржанов болды. Сондай-ақ, Алматы қаласы Қ.И.Сәтпаев атындағы Қазақ ұлттық техникалық зерттеу университеті стандарттау, сертификаттау және метрология мамандығынындағы Аружан Дәулеткерім, Қазақ және спорт туризм академиясының дене шынықтыру пәні мұғаліміндегі Елдос Жанқуат, Қызылорда қаласындағы «Болашақ» жоғары колледжінің ақпараттық жүйелер мамандығын меңгеруші Индира Дайрабай кештің құрметті қонақ ретінде келді.&nbsp;Студенттерге арнап, мектептің ән –әуез пәнінің мұғалімі Еркін Құдабаев «Ауылым» әнін орындады. Кештің екінші «Сұрақ - жауап» бөлімінде кеш қонақтарына «Сіздер мемлекеттік грант иегері атандыңыздар. Осы жетістікке қалай жеттіңіздер?», «Мамандық таңдауда нені есепке алу керек?», «Өз мамандығыңыз туралы айта кетсеңіз?»,«ҰБТ-ға дайындық барысында мұғалімдер қойған талаптар орынды болды ма, орынсыз ба? Қалай ойлайсыздар?», «Мамандықты өзіңіз таңдадыңыз ба, әлде ата-анаңызбен ойластыңыз ба?», «ЖОО-да таңдаған мамандығын бір-екі жыл оқып, артынша басқа мамандықтарға ауысып жатқандар бар ма?», «Мамандықтарыңызға өкінетін, қап, осы мамандықты бекер таңдадым деген кездеріңіз болды ма, әлде өзіңізге ұнайды ма?», «Үлкен аға/әпкесі ретінде ізбасарларыңызға қандай кеңес берер едіңіздер?» деген сұрақтарға жауап беріп, өз ойларын ортаға салды. Оқушыларға ақыл-кеңестерін айтты, өз толғамды ойларымен бөлісті. «Сұрақ – менен, жауап – сенен» сауалнамасы оқушылар арасында жүргізіліп, «Өзіңнің болашақ мамандығыңды таңдадың ба?», «Оқуға түскеннен кейін қиындығына төзе аласың ба?», «Мамандық таңдауыңа кімдер әсер етті?», «Жоғары оқу орнына түсуге өз күшіңе сенесің бе?» көптеген сауалдар ортаға салынды. «Мен кіммін?» ойыны кезінде жаңа замандағы мамандықтардың түрлерін тапты. Түлектер Ерлан Жұмахан, Эльвира Жаңбырбай, Елдос Жанқуат ұстаздарына арнау өлеңдерін оқып, әсем ән салды.&nbsp;Мектептің «Алтын белгіге» бітірген түлектері Елдос Меңдуахас пен Нұрай Киікбай өздерінен кейінгі ізбасарлары «Алтын белгіге» үміткер оқушы Рамазан Сайфуллаға тілектерін айтып, «Алтын белгі» аманатын тапсырды. «Жарнама айдарында» студенттер өздерінің оқып жатқан білім ордасын, өз мамандықтарын бір ауыз сөзбен таныстырды. Кеш соңында студенттер естелік кітабына өздерінің тілектерін жазып қалдырды.&nbsp;

Қазалы: Бүгінгі оқушы – болашақ маман

<a href="https://kyzylorda-news.kz/">Kyzylorda-news.kz.</a> Қазақ спортының ғана емес, әлем боксының жарық жұлдызы, кәсіпқой боксшы, бес бірдей белбеудің иегері, хас балуан Садриддин Ахмедов Жаңақорған топырағында қонақта болды. Ата-бабасының кіндік қаны тамған Қожакент ауылына арнайы ат басын бұрып, Құран бағыштап, Хорасан ата басына тағзым етуге келген қазақтың батыр ұлын ауылдастары құрмет төріне шығарды.&nbsp;Асылбек Айтжанов ағамыз бастаған қожакенттік ел ағалары мен жастар, барша ауылдағы ағайынның басы бір күнде бір арнаға тоғысып, інілерін ізетпен күтіп алды. Алдымен боксшы Қожакент ауылдық клуб үйінің фойесінде жергілікті халықты ауданның 95 жылдығы және “Жаңақорған тынысы” газетінің 90 жылдық мерейтойымен құттықтап, жылы лебізін білдірді. Жерлестері асыға күткен кештің шымылдығы мың бұралған бимен, әсем әуенмен басталып, чемпионды төрге оздырды. Емін-еркін сұхбатпен өрілген шырайлы кешті Асылбек ағамыз өзі жүргізіп, сұрақ-жауап ретінде өткізді.«Киелі шаңыраққа Садриддин ініміз келді дегенді естіп, аталарының ақ батасын алсын, ізінен ерген балаларға шабыт берсін, құрдастарымен сырлассын деген ниетте осы кездесуді ұйымдастырдық. Бұл Қожакент ауылында алғаш рет ұйымдастырылып жатқан спорттағы ең шоқтығы биік шара деуге болады. Бауырымыз жай ғана боксшы емес, қазақ ұлтының намысын ту етіп көтеріп жүрген азамат. Садриддиннің біздің ауылға келуінің себебі көп. Ата-бабасының ғана емес, әкесінің де кіндік қаны тамған жері осы ауыл. Қазір ауылда әкесінің ағасы, жалпы туыстары тұрады. Сондықтан батырға құрмет көрсетуді мақсат еттік. Қолдау білдіріп, демеушілік жасаған ауыл азаматтарына мың алғыс», – деп Асылбек ағамыз сөз бастады.Иә, Садриддин Алиханұлының жақын бауырлары осы ауылда тұрады. Әкесі Жетісайға көшіп, батырдың кіндігі сол өңірде кесіліп, мектеп табалдырығын аттаған сәтте Елордаға қоныстанып, сонда спорт әліппесін үйренеді. Әуесқойлар арасында талай тұғырды бағындырып, небәрі 19 жасында кәсіпқой боксқа ауысып, 5 жылдан астам ринг төрінде тер төгіп келеді.<blockquote>«Ең бірінші, осындай құрмет көрсетіп жатқан барша ағайынға Алла разы болсын. Қожакент ауылы мен үшін қашанда ыстық. Әкем, аға-көкелерім осы ауылдың төл перзенті. Сондықтан сәлем беріп, Жаңақорған жеріне жиі келуімнің себебі де осы, – деді батыр. Аудан әкімі Мұрат Жолкелдіұлының арнайы құттықтауын аудандық қоғамдық даму бөлімінің басшысы Әбілғазы Төлегенов табыс етіп, тілектестігін білдірді. Аудандық мәдениет және спорт бөлімінің басшысы Әбілқайыр Сыздықов та өз кезегінде жылы лебізін қосты. Сұхбаттасу сәтінде жас ақын Көкен Өскенбай арнауын арнады. Кезек сұрақ-жауапқа ойысты. Бірінші болып аудандағы таеквандо спортының аға бапкері Кәмілжан Нақышпанов қонақтың қадамына құт тілеп, алдағы жоспарын сұрады. Негізінен менің шет елде жүргеніме 10 жылдан асты, кәсіпқой бокста 13 жекпе-жек өткізіп, барлығында ел туын тік көтердім. Менің бұрынғы демеушілеріммен келісім-шартым аяқталды. Алла бұйырса, жақын күндері АҚШ-қа жол жүріп, жаңа жолымды қалыптастырамын. Құжаттар дайындалып, барлық мүмкіндіктер қарастырылды. Сол үшін туған елімнің тынысымен тыныстап, сағынышымды басуға Қазақстанға келдім. Қасиетті Қожакент жеріне келу себебім – атабаба аруғына Құран бағыштап, көзі тірі батагөй ақсақалдардың ақ батасын алып, құрылық асуды мақсат еттім, – деп жоспарын қысқаша бөлісті. Одан әрі кеш жеткіншектердің сауалдарымен жалғасты. – Аға, Канеломен кездесуіңізді күтіп жүрміз, – деген жастар тілегіне: – Алла қаласа, ол күн де алыс емес, тек ол спортық мансабын ертерек аяқтап қоймаса мен дайынмын. Қазір болса да дайынмын, бірақ ережелері бар, сәл шыдаңыздар», – деді.</blockquote>– Үлкен спортқа қалай келдіңіз?– Негізі мен спортты күрестен бастадым, бала кезгі арманым еді. Бірақ, бір финалдық кездесуде ағам жеңіліп қалып, қатты жылаған болатын. Сол ағамның көз жасы маған шабыт беріп, бірден бокс үйірмесіне бардым.– Неге кәсіпқой боксты таңдадыңыз, неге әуесқой емес?– Әуесқой бокста да жетістігім аз болмады. Небәрі 13 жасымда ел чемпионы атандым, кез келген спортшының арманы – Олимп шыңын бағындыру, бірақ менің мақсатым бөлек болды. Сондықтан ертерек кәсіпқой боксқа ауыстым. – Жастарға қандай ақыл-кеңесіңізді айтасыз?– Ең бірінші жүрегімізде рух, қазақ деген ұлттың намысы тұруы керек. Үлкен спортта қиындық өте көп кездеседі, сынып қалмауымыз керек. Жарты жолдан тастап кету деген үлкен қателік болады. Мені де бокстан кету жайы ойландырған, бірақ бала кезгі арман, бойымдағы талант, кеудемдегі қазақтың рухы мені қайта спортқа алып келді. Жасым 25-те, әлі 10 жылдан астам әлем төрінде қазақтың атын паш ететін боламын.Сондықтан сіздерге де айтарым, тек алға ұмтылу керек. Қолына былғары қолғап киген ауыл балаларының сауалы толастамады. Кездесу соңы Изатулла Үсенов ағамыздың тілегі, Мұстафа ақсақал мен Әділбек қарияның батасымен түйінделді. Қожакенттік ағайын чемпионға шапан жауып, ат мінгізіп, құрмет көрсетті. Соңынан боксшы спорт кешеніне барып жастарға мастер-класс көрсетті. Кешқұрым дастархандас болған азаматтар тағы да емін-еркін дидарласты.Иә,“Алыстан алты жасар бала келсе, алпыстағы қария сәлем береді” демекші, алыстан ат арытып келген ұлт мақтанышы болған ұлдарына Асылбек ағамыз бастаған ағайындар осылай құрмет көрсетті. Бәрекелді..!

Садриддин Ахмедов Жаңақорғанда қонақта болды

<a href="https://kyzylorda-news.kz/">Kyzylorda-news.kz.</a> Шахмат – ақыл-ойды дамытатын спорт түрі болып саналады. Адамның бәсекеге қабілеттілік қасиетінің дамуына бұл ойынның пайдасы көп. Сондықтан аталған спорт түрі ел ішінде жыл сайын өз деңгейінде өткізіліп келеді. Шиелі спортшылары да одан қалыс қалған емес.&nbsp;Жуырда 7 мамыр – Отан қорғаушылар мерекесіне орай Шиелі аудандық Жастар ресустық орталығында аудандық шахмат турнирі өткізілді.Аталған турнирдің ашылу салтанатына аудан әкімі Нұржан Ахатов, сондай-ақ аудан ардагерлері қатысты. Ең әуелі өңір басшысы Отан қорғаушылар мерекесі қарсаңында ұйымдастырылған спорттық турнирге қатысушы барлық спортшыларға сәттілік тіледі.&nbsp;Шараның негізгі мақсаты – спортшылардың ойынға деген шеберлігін шыңдау, және салауаты өмір салтын насихаттау. Тақта тартысына 40-қа жуық азамат қатысты. Бастала сала қыза түскен додаға қатысушылар ойын барысында бар шеберліктерін салып, тартысқа толы ойын өрнегін көрсетті. Бірнеше сағатқа созылған додада қателіктерге ұрынбай қарсыластарын шаң қаптырғандардың мерейі өсті. Нәтижесінде, I орынды барлық қарсыластан оза шауып, жеңіске жеткен Жорабек Сәдібеков иемденді. Ал екінші орын Бекболат Мизамбаевқа бұйырды. Үшінші орынға ең жас қатысушы, №219 Ы.Алтынсарин атындағы қазақ орта мектебінің 9 сынып оқушысы Олжас Азатжанұлы жайғасты.Жеңімпаздардың барлығына ақшалай және арнайы сыйлықтар табысталды. Қалған қатысушыларға алғыс хаттар үлестірілді. Сайыс соңында әуесқой шахматшылар осы турнирдің &nbsp;өтуіне қолдау білдірген аудан әкімдігі мен бірқатар азаматтарға алғыс білдірді.&nbsp;Айта кетейік, 7 мамыр – Отан қорғаушылар мерекесіне орай ұйымдастырылған спорттық турнир енді жыл сайын өткізілетін болады.

Шиеліде шахматтан спорттық турнир өтті

<a href="https://kyzylorda-news.kz/">Kyzylorda-news.kz.</a> Жыл сайын білім беру үдерісіне өзгерістің енуі қалыпты жағдайға айналды. Саладағы жаңа жобалар заман талабы екенін айқындай түседі. Мәселен алдағы уақытта білім беру саласы цифрландыруға бағыт алмақ. Атап айтқанда, ұстаздар мен оқушылардың жеке мәліметтері енгізілген цифрлы портфолиосы әзірленеді. Ал аттестаттар мен дипломдар QR-код арқылы цифрлы форматта беріледі. Оқулықтар электронды форматта болады. Осылайша оқушылардың ауыр сөмкесі планшетке ауыстырылуы мүмкін.Соңғы жылдары бастауыш сыныптың оқушыларының арқалайтын ауыр сөмкесі денаулығына зиян екені жиі айтыла бастады. Десе де бұл мәселе өз шешімін тапқандай болатын. Нарықта плекс мұқабалы, яғни жеңіл оқулықтар пайда болды. Ереже бойынша бастауыш сыныптар үшін кітаптың салмағы 300, 5-6 сыныптарға 400, 7-9 сыныптарға 500 граммдық өлшеммен бекітілген. Алайда болашақта мектеп оқушылары оқулықтарды мүлдем қажетсінбеуі ғажап емес. Себебі кітаптардың орнын электронды оқулықтар алмастыруы бек мүмкін. Барлық пәннің оқулығын электронды түрге ауыстырудың пайдасы қандай болмақ?Жаһандану заманында баланың қолында сөмке емес планшеттің болуын бүгінде көптеген дамыған, дамушы мемлекеттер қолдап отыр. Мамандар электронды оқулықтардың қарапайым кітаптардан бірнеше &nbsp;артықшығын алға тартады. Электронды оқулықтардың, дәстүрлі қағаз кітаптардан айырмашылығы біріншіден «жанды» болып келеді. Екіншіден, ол оқушыға ешқандай салмақ түсірмейді, бір құрылғының ішінен кез-келген уақытта кез-келген пәнді ақтарып, оқуға мүмкіндігі бар. Үшіншіден, республикалық мектептерде кітап санының жетіспеушілігі байқалады. Сондықтан ата-аналар әр оқулықты кем дегенде 800-1000 теңгеден сатып алатыны анық. Егер электронды оқу үрдісіне көшкен жағдайда кітапқа шығындала қоймайсыз. Төртіншіден, баланың жастайынан технологияны жетік меңгеріп кетуіне жол ашылады. Оқушы электронды оқулықпен жеке жұмыс жасайды. Мысалы, оқушы физика, химия, биология пәнінен тәжірибелер жүргізіп және зертханалық жұмыстарын үйінде отырып компьютерде орындай алады.Қарыштап дамып келе жатқан еліміздің шәкірттері &nbsp;заманға сай білім алғаны әрине, құптарлық. Дегенмен электронды құрылғымен оқушылардың көп жұмыс жасауы, ұдайы пайдалануы олардың денсаулығына, физилогиялық дамуына кері әсерін тигізетінін ғалымдар дәлелдеп отыр. Соған қарамастан электронды кітаптар дәстүрлі кітаптардың &nbsp;орнын түгелімен &nbsp;алмастыра ала ма?Цифрлық даму, инновациялар және аэро-ғарыш өнеркәсібі министрі Бағдат Мусиннің айтуынша, мұндай әдіс бірқатар дамыған елдерде, оның ішінде Ұлыбритания, Норвегия, Оңтүстік Корея және Түркия мектептерінде жақсы нәтиже көрсеткен. Сонымен қатар бұл оқушылар үшін шығармашылық пәндер бойынша өз контентін жасауға мүмкіндік береді.Оқу-ағарту министрлігінің мәліметіне сүйенсек, электронды планшеттер оқушылардың оқуына қосымша мүмкіндіктер береді. Сондай-ақ мектеп сөмкесінің салмағын жеңілтеді. Яғни кішкентай балалар ауыр сөке көтеріп жүрмесе де болады.<blockquote>«Планшеттердің көмегімен балалар цифрлы сабақтарға, жаттығулар мен тапсырмаларға қосымша қол жеткізе алады. Интернеті нашар өңірлер үшін жүктелген цифрлы сабақтарды, тапсырмаларды, білім беру ресурстары және оқулықтарды офлайн пайдалану мүмкіндігі болады. Егер қандай да бір себептермен бала планшеттерді қолданғысы келмесе, онда ол әдеттегідей дәстүрлі оқулықтарды және стационарлық құрылғылардан білім беру ресурстарына қол жеткізе алады. Яғни планшеттер оқулықтарды алмастырмайды, бұл – оқудың қосымша ресурсы. Таңдау ата-аналар мен оқушылардың еншісінде болады», – деді оқу-ағарту вице-министрі Айбат Ілиясов.</blockquote>Айта кетейік, өткен жылдың соңында Цифрлық даму, инновациялар және аэроғарыш өнеркәсібі министрі Үкімет отырысында сервистік модель механизмі арқылы 2023 жылы бірінші сыныпқа баратын 400 мың қазақстандық баланы Қазақстанда жасалған планшеттермен қамтамасыз ету жоспарланып отырғанын мәлімдеген болатын.<blockquote>«Қазірдің өзінде баламызға кітапты зорға аштырамыз. Болашақта оқулық бірте-бірте ысырылып қалмай ма? Қазіргі балалардың өзі ұялы телефонға әуес. «Мектепте планшетпен оқиды» дейді. Бұл балаға зиян емес пе? Тым болмаса сабақ уақытында телефоннан алшақтайтын еді. Енді мектепте де гаджет пайдаланса не болмақ? Оқулықпен оқығаны, бұрынғыдай бағаны күнделікке қойдырғаны жақсы еді», – дейді ата-ана Аружан Исаева.</blockquote>Жаңа бастаманы бірі қолдаса, бірі цифрлыққа көшіруге әлі ерте дейді. Өйткені аз уақытта оқулықты планшетке ауыстыруға интернеттің әлсіздігі әсер етпей қоймайтыны тағы бар. Көпті толғандырып, талқыға түскен бұл жобаның қалай жүзеге асып, тапсырмалардың уақытылы орындалуы болашақтың еншісінде. Еліміздің дамуы білімді жастардың қолында &nbsp;екені анық. Сондықтан олардың бәсекеге қабілетті білім алуы да міндет.

Оқулықты планшет алмастыра ма?

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласы бойынша білім бөлімінің басшысы Ерлан Теңізбайұлы М.Сужиков атындағы №6 орта мектебінің ұжымымен кезектен тыс пед кеңес өткізді. Кеңесте бөлім басшысы мұғалімдердің сағат бөлінісін дұрыс бөлу, оқушыларға жайлы жағдай жасау, мектеп бітіру кешіне ақша жиналмау керегін қатаң ескертті. Сонымен қатар, оқушылардың білімді, өнерлі болуы білікті ұстаздың қолында екенін жеткізді.Жиында мектеп директоры Асылхан Әміржанұлы атқарылған жұмыстар мен мектептің даму жоспары жайында баяндама жасады.Жалпы 2022-2023 оқу жылында мектепте 914 оқушы білім алуда. Мұғалімдердің біліктілік санаты бойынша педагог-зерттеуші-38, педагог-сарапшы-30, педагог-модератор-31, 1-санат-1 мұғалім оқушыларға білім беруде.<blockquote>«Елбасы медалі» жобасының күміс медалін Тілеуберген Еркебұлан иеленді. Кеңес Одағының Батыры Т.Бигельдиновтің 100 жылдығына орай алғашқы әскери дайындық пәні мұғалімдері арасында әскери-қолданбалы спорт түрлерінен өткізілген қалалық және облыстық сайыста АК-74 оқу қаруының оқжатарын патрондармен жарақтау бойынша жүлделі І орын Жұмахметов Сейітқасым марапатталды. «Әуезовтану» олимпиадасының қалалық кезеңінен 9-сынып оқушысы ІІІ орын иеленді. Республикалық турнирден №6 орта мектеп оқушысы Сәулетбай Айлана, Каратэ-до шотокан спорт түрінен жүлделі І орын иеленді. Жалпы білім беру ұйымдарының 7-8 сынып оқушылары арасында 6 оқушы жүлделі орынға ие болды. Ал, 9-11 сынып оқушылар арасында 10 оқушы жүлделі орыннан көрінді. Математика пәнінен «Алтын сақа» олимпиадасының қалалық кезеңінде оқушылар жүлделі орындарға қол жеткізді», – мектеп директоры.</blockquote>Жиында Ерлан Теңізбайұлы мұғалімдер еңбек демалысына жаңа оқу жылындағы сағатынан хабардар болып кету керектігін де назардан тыс қалдырмады. Бөлім басшысына мектеп ұстаздарымен кері байланыс жасап, ұсыныс-пікірлерін білдірді.

Оқушының білімді болуы білікті ұстаздың қолында

Қызылордалықтардың кәсібі қалай жүруде?

Айдарлы ауылының экономикалық дамуы қарқынды

<a href="https://kyzylorda-news.kz/">Kyzylorda-news.kz.</a>&nbsp;Бүгінде Сыр өңірінде &nbsp;6 соғыс, 2048 соғыс ардагеріне теңестірілген тыл ардагері бар. Ұлы Жеңісті жақындатқан көзі тірі майдангерлерге жан-жақты қолдаулар көрсетілуде.«Ардагерлерді ардақтайық» жобасы аясында аға ұрпаққа қамқорлық көрсету - «AMANAT» партиясының басым бағыттарының бірі. Бүгін қызылордалық аманаттықтар «Тағзым» алаңы маңындағы салтанатты шараға қатысып, кешегі қаһарлы жылдардың қаһармандарына арнап гүл шоқтарын қойды.Жеңіс күні мерекесі және партияның жобасы аясындағы шара Ұлы Отан соғысының ардагерлерін құттықтаумен жалғасты. «AMANAT» партиясының облыстық филиалының Атқарушы хатшысы Ләйлә Төрешова мен облыстық мәслихаттағы «AMANAT» партиясы депутаттық фракция мүшесі Ержан Ескендер және партияның облыстық филиалы жанындағы «Jastar ruhy»ЖҚ төрағасы Медет Жорабек &nbsp;облыс орталығындағы көзі тірі қарт жауынгерлер &nbsp;Төлеген Жүнісов пен Әбдірахман Байтіковті мерекемен құттықтап шықты. Ғасыр ғұмырды еңсерген Төлеген Жүнісов атамыз &nbsp;1923 жылы Қызылорда облысы, Тереңөзек ауданы, Жаңарық ауылында дүниеге келген. Украинада 688 атқыштар полкінде ұрыста болған. Ол отты жалдарды есіне алып, «бүгінгі ұрпақ бақытты өмір сүрсін. Енді қайтып, соғыс болмасын»-, деп тіледі. &nbsp;Ал майдангер Әбдірахман Байтіков биыл 99 жасқа келеді. Ол 1942 жылы Ашхабад қаласында командирлер дайындайтын курсқа оқуға түсіп, аяқталмастан майданға аттанған. 1943 жылы Курск доғасында ауыр жарақат алып, 2-топ мүгедегі болып, 1944 жылы 20 жасында елге оралған. Қарт жауынгерлер өздеріне деген алғаусыз құрметке ризашылықтарын білдіріп, баталарын берді.Партияның облыстық филиалының Атқарушы хатшысы Ләйлә Төрешова 9 мамыр – Отан қорғаудағы өшпес ерліктің, өлшеусіз даңқтың, еңселі елдіктің рухы. Сондықтан майдангерлер мен тыл еңбеккерлерінің тарихи ерлігі үшін мақтаныш пен шынайы құрмет көрсететін мереке болып қала беретінін және оларға қолдау білдіру әрқашан «AMANAT» партиясының басты назарында болатындығын атап өтті.<figure class="image"><img src="https://knadmin.beoblood.kz/uploads/cc52e727_d6d2_4f14_a135_de9e42cf92cb_6f2a97bd1a.jpg" alt="cc52e727-d6d2-4f14-a135-de9e42cf92cb.jpg"></figure>

«AMANAT»: Қарт жауынгерлерге құрмет көрсетілді

<a href="https://kyzylorda-news.kz/">Kyzylorda-news.kz.</a> Қазалы қаласында көрген көзді сүйсінтер зәулім ғимарат бар. Ауласы әсем гүлмен, жасыл-желекпен көмкерілген бұл ғимарат – бүлдіршіндердің бақыт мекені. Еңселі әрі көрікті балабақша былтыр ғана пайдалануға берілді. Қазіргі таңда ел игілігін көруде.&nbsp;140 балаға арналған жаңа типтік балабақшада 1 мен 5 жас аралығындағы 8 топ бар. Балақайларға жоғары білімді алты педагог сарапшы, екінші санатты 5 тәрбиеші тәрбие беріп, білім нәрімен сусындатады. Заманауи құрал-жабдықтармен жабдықталған орында музыка залы, дене тәрбиесі, STEM бағытындағы үйірме кабинеті, эко кабинеті, ұлттық кабинеттер жұмыс жасайды.&nbsp;Ауласынан бастап әсемдік тұнып тұрған тәрбие ордасы тәрбиеленушілерді есіктен енгеннен-ақ ерекше дүниелермен қарсы алады. Әр қабат, әр бөлме сәні мен салтанаты келіскен сарай іспеттес. Балаларға барлық қажетті жағдай жасалынған. Жан-жақты, танымдық, зияткерлік, шығармашылық дағдыларын &nbsp;дамытуға арналған «Әнші балапан», «Сымбат» би, «Ұлттық спорт», «Жас зерттеушілер», «Жас математик», «Шахматшылар» үйірмелері мен «Жас шеберлер» шеберханасы балаларды өнерге баулып, шығармашылықтарын шыңдай түсуде. Үнемі ізденіс үстінде жүретін тәрбиешілер кішкентайларды үлкен сахнаға шығаруда аянбай еңбек етіп келеді. Аудан көлемінде қандай іс-шара болмасын басы-қасынан табылатын өрімталдық өрендердің өнеріне көпшілік бұрыннан тәнті. Облыс, республика тіпті халықаралық деңгейдегі сайыстарды топ жарып жүрген тәрбиеленушілер жетерлік. Жетістіктер қоржынын ай сайын емес, апта сайын толтырып отыратын өнерлі өрендердің ата-аналары да балабақша ұжымына дән риза.&nbsp;Балабақшада 2022 жылдың қараша айында Мектепке дейінгі білім беру ұйымдардын арасында ұйымдастырылған «Үздік жоба – 2022» облыстық байқауының аудандық кезеңде балабақша тәрбиешілері Құралай Жүсіпова, Айман Тұрсынбай жүлделі ІІІ орын иеленді. Қызылорда облысының білім саласы қызметкерлері кәсіподағының ұйымдастыруымен өз саласында елеулі жетістікке жетіп, кәсіби қызметінде жасаған еңбегі мен атқарған қызметі үшін балабақша тәрбиешісі Айшагүл Жолмырзаева «Жыл үздігі – 2022» номинациясын жеңіп алды. ҚР Оқу ағарту министірлігі балаларды ерте дамыту институтының ұйымдастыруымен 1-15 желтоқсан арасында өткізілген «Ән шырқайық, бәріміз» республикалық патриоттық әндерді хормен айту челленджге музыкант Роза Ахметованың жетекшілігімен ересек «Ертөстік» тобының тәрбиеленушілері балабақша педагогтары мен бірге «Менің Қазақстаным» атты патриоттық әнін орындап, жүлделі ІІ орынды қанжығаға байлады.&nbsp;Білім құмар балаларға арналған республикалық «Үркер» зияткерлік марафонның жүлдегері Ерасыл Әділбек, Назарбек Сражадин арнайы дипломмен марапатталды. ҚР оқу ағарту министірлігі «Балаларды ерте дамыту» институтының жылдық жоспарына сәйкес өткізілген «Шымырлық пен шеберлік күні» республикалық байқауының «Ханталапай» ұлттық ойындар бойынша ересек топ бүлдіршіндері Байғани Досымұлы, Назарбек Сражадин, Ақмедияр Өмірбекұлы қатысып, аудандық «Ләңгі» ұлттық ойын сайысында бірінші, облыстық кезеңінде үшінші орын иеленді. Жетекшісі хореограф Мереке Дәрібаева.ҚР оқу ағарту министірлігі «Балаларды ерте дамыту» институтының жылдық жоспарына сәйкес өткізілген республикалық «Анам, әжем және мен» байқауында тәрбиеленушіміз Жансая Ілиясова, анасы Жақсыгүл Қуандықова, әжесі Сара Сатаймен қатысып аудандық және облыстық кезеңде де жоғары дәрежелі бірінші орынға лайық деп танылды. Республикалық кезеңінде «Үздік» номинациясымен марапатталды. Жетекшісі тәрбиеші Феруза Толыбаева.Мектепке дейінгі ұйым педагогтары мен тәрбиеленушілеріне арналған «Ән шырқаймыз, бәріміз!» облыстық челленджінде ІІІ орын иеленді. Балалардың ән әлемінде еркін самғап, әсем үндерімен тыңдарманын баурап алуына бар күшін сарқитын музыка жетекшісі Роза Ахметованың еңбегі ерекше.&nbsp;«Атадан-мұра» қоғамдық қорының бүлдіршіндер, мектеп оқушылары мен жасөспірімдер арасында ұйымдастырылған «Ана туралы жыр» халықаралық байқауында «Вокал» номинациясы бойынша балабақшамыздың ересек топ бүлдіршіндері Раяна Әділ, Көзайым Аралбаева, Ақнұр Серғазы, Жансая Ілиясова, Дария Аралбек, Мақсат Бақытбек, Ақмедияр Өмірбек, Аман Кеңес, Еркесұлу Ермырза үздік өнер көрсеткені үшін «Әнші балапан» тобы жүлделі үшінші орынмен, жетекшісі Роза Ахметова «Атадан – мұра» қоғамдық қорының Алғыс хатымен марапатталды.&nbsp;Аталған байқауда «Көркем сөз» номинациясы бойынша Дария Аралбек үздік өнер көрсетіп, «Бас жүлде» иеленді. Жетекшісі Алия Сембиева «Атадан – мұра» қоғамдық орының Алғыс хатымен марапатталды.&nbsp;<blockquote>«Балабақшаға балалар қызығып келуі үшін ұжым болып күш-жігерімізді жұмсаймыз. Біздің мақсат – жас ұрпақты жан-жақтылыққа, біліммен қоса өнерге баулу. Олардың өз ойын еркін әрі ашық жеткізе алатын тәуелсіз елдің ұл-қыздары екенін ерте бастан бойына сіңіру. Әрбір тәрбиеленушіге бала деп қарамай, олардың іс-әрекетімен, ойымен санасуды тәрбиешілер жақсы меңгерген. Кез келген бүлдіршіннің ішінде бүгіп жатқан таланты, дарыны болады. Оны жарыққа шығарып, дамытуда балабақшаның қосар үлесі зор. Осы орайда әріптестерім елеулі еңбек сіңіріп келеді деп сеніммен айта аламын», – дейді «Өрімтал» бөбекжай-балабақшасының меңгерушісі Рабиға Қарымсақова.</blockquote>

Заманауи құрал-жабдықтармен жабдықталған балабақша

<a href="https://kyzylorda-news.kz/">Kyzylorda-news.kz.</a>&nbsp; Өзбекстан астанасы Ташкент қаласында өтіп жатқан әлем чемпионатының ширек финалына Қазақстан құрамасынан жеті боксшы шықты. Бұл жөнінен ел құрамасы төртінші орында тұр, деп хабарлайды ҚазАқпарат.Елорда уақытымен сағат 15:00- де басталатын күндізгі сессияда А рингі үшінші жұпта Серик Теміржанов (57 келі) кубалық Сайдел Ортамен шықса, сегізінші жұпта Асланбек Шымбергенов (71 келі) француз Макан Траоремен қолғап түйістірсе, Б рингінде оныншы жұпта Нұрбек Оралбай (80 келі) иорданиялық Хуссейн Эйшаиш Ишайшпен кездеседі.Ал, сағат 19:00- де басталатын кешкі сессияда Б рингінде алғашқы жекпе-жек Санжар Ташкенбай (48 келі) мен жапониялық Кадзума Аратаке арасында өткізілсе, А ригінде үшінші жұпта Махмуд Сабырхан (54 келі) ганалық Мохаммедо Амадумен, А рингінде сегізінші жұпта Дулат Бекбауов (67 келі) мексикалық Мигел Анхел Мартинеспен шеберлік байқасады.Сондай-ақ, Б рингіндегі он төртінші жұбында Қамшыбек Қоңқабаев (92 келі) өзбекстандық Баходир Джалоловпен <a href="https://www.inform.kz/kz/bokstan-alem-chempionaty-konkabaev-dzhalolov-zhekpe-zhegi-10-mamyrda-otedi_a4065045">сайысқа түседі</a>.

Әлем чемпионатының ширек финалында қазақстандықтар кімдермен жұдырықтасады?

<a href="https://kyzylorda-news.kz/">Kyzylorda-news.kz.</a>&nbsp; «Қазгидромет» РМК-сы мамырдың 10-ы күнгі ауа рай болжамын жариялады.Кәсіпорын таратқан деректерге қарағанда, Қазақстанның батысында, солтүстік-батысында, солтүстігінде циклон жырасы және онымен байланысты фронталды бөліктердің өтуіне орай найзағай ойнап, жаңбыр жауады, солтүстік-батыста кей уақытта қатты жаңбыр жауады.Еліміздің қалған аймақтарында күн жауын-шашынсыз. Республика бойынша жел күшейеді, солтүстікте түнде және таңертең тұман түседі, күндіз республикамыздың солтүстік-батысында бұршақ жауады.Түнде Ақтөбе облысының батысында, солтүстігінде, күндіз Қостанай облысының орталығында, солтүстігінде қатты жаңбыр жауады. Түнде Қостанай облысының солтүстігінде, Солтүстік Қазақстан облысының солтүстік-батысында топырақ бетінде 2 градус үсік жүреді.Қостанай облысының орталығында, оңтүстігінде жоғарғы өрт қауіпі сақталады. Қызылорда облысында, Түркістан облысының солтүстігінде төтенше өрт қауіпі сақталады. &nbsp;

Сәрсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қазалы көлік-техникалық жоғары колледжінің тарихы сонау 1901-1906 жылдар аралығында Орта Азиямен Ресейдің орталығын қосатын Орынбор-Ташкент теміржолының салынуынан бастау алады.&nbsp;КСРО-ның тарихи архивінен алынған мына құжатта 1905 жылғы 17 шілдеде жолаушылар қозғалысы үшін Қазалы өңірінде шағын жөндеу шеберханасы салатыны жоспарланған болатын. 1929 жылы Қазалы паровоз депосының жанынан ФЗУ болып ашылған колледж өмір ағымына қарай ЖУ, ЖДУ, ГПТУ, СрПТУ, ПТУ, мектеп лицей,колледж, жоғары колледж атауларына ие болды. Ұлы Отан соғысының батыры Я.Д.Михайлюк 1938 жылы колледжге оқуға түсіп, 1941-45 жылдары жауынгерлік ерлігі үшін Совет Одағының Батыры атағын алуы біз үшін үлкен мақтаныш.1939 жылы Қазалы теміржол бөлімшесі училищесіне 210 орынды екі қабаттық оқу орны салынып берілді. 1929 жылдан бастап әр жылдары училищені &nbsp;П.С.Никеров, А.В.Харьков, Ə.Ұзақбаев, П.П.Сиснев басқарды. 1976-1981 жылдары училищені Қазақстан Республикасы кəсіптік білім беру саласының үздігі, Еңбек Қызыл Ту орденінің иегері Оразғали Бекбанов басқарды.1981-1985 жылдары училищені КСРО жəне Қазақ КСР кəсіптік білім беру ісінің үздігі Молдабай Ақниязов басқарды. М.Ақниязов 1990 жылы осы училищеге қайта басшы етіп тағайындалды. Училищеге Ресейден, Украинадан, Белоруссиядан Молдавиядан, Башқұртстаннан жастар келіп теміржол мамандықтарын оқыды. Өйткені, Қазалы теміржол училищесі Одақтағы теміржол мамандарын даярлайтын санаулы оқу орындарының бірі еді. 1978 жылы училище КСРО кезінде кəсіптік-техникалық білім беру орталық комитетінің «Құрмет грамотасымен» марапатталды. 1979 жылы 410 оқушыға арналған 4 қабатты оқу корпусы жоспарланып, 1981 жылы желтоқсан айында жаңа ғимарат пайдалануға берілді. 1981-1985 жылдары колледж Бүкілодақтың Ленин комсомолы сыйлығының лауреаты атағын жеңіп алды. Сол комиссияның ұсынысымен Молдабай Ақниязұлы одақ бойынша «Ең үздік оқу-өндірістік жұмысты ұйымдастырушы» деген баға алды. Училищенің озат тəжірибесі білім саласында одақ бойынша тарады.&nbsp;1977 жылы Училище əр бес жылдықта мемлекеттік жоспарды асыра орындағаны үшін ССРО кəсіптік техникалық білім беру комитетінің «Құрмет грамотасымен» марапатталды. 1984 жылдың қорытындысымен Қызылорда облысының Коммунистік партиясының «Құрметграмотасымен» марапатталды. Бірнеше дүркін облыс аралық кəсіптік-техникалық басқармаларының Қызылтуы мен ақшалай сыйлығымен марапатталды.&nbsp;1985 жылдан бастап училищеге Балғараш Тəженов басшылық жасады. Бұл жылдарда училищенің материалдық-техникалық базасы нығайды. Жаңа типтік асхана, 210 орындық жатақхана іске қосылды. 2003 жылдың қараша айынан №5 кəсіптік мектепке Б.Жолтаев директор болып келді. 2007 жылдың қараша айында №5 кəсіптік мектепке Қазақстан Республикасы кəсіптік білім беру жүйесінің үздігі Е.Құрмарзаев директор болып тағайындалды.&nbsp;Колледж 2009 жылы І дəрежелі «Үздік кəсіптік лицей-2009» жəне «Үздік ұжым» атағымен марапатталды.&nbsp;2010 жылы желтоқсан айынан бастап №5 кəсіптік лицей директоры болып Б.Ахметов тағайындалды. Басшының алға қойған мақсаты педагог кадрлардың кəсіби деңгейін көтеру, əлеуметтік серіктестікті дамыту жəне білім ордасының материалды-техникалық жағдайын жақсарту болды. Білім ордасы көптеген байқаулардың жеңімпазы атанды, атап айтсақ, Қазалы көлік-техникалық колледжі Қазақстан Республикасы мен Халықаралық қайта құру және даму банкі арасындағы «Техникалық және кәсіптік білімді жаңғырту» Жобасына қатысып,«1108000-Теміржол жылжымалы құрамдарын пайдалану және техникалық күту» мамандығын дамыту үшін жалпы сомасы 57 000 000 теңге кіші-грантты жеңіп алды.Теміржол саласын білікті мамандармен қамтамасыз етуде ҚР Білім және ғылым министрлігі мен «Қазақстан темір жолы ҰК» АҚ-ы арасында дуальды оқыту жүйесін жүзеге асыру бағытында атқарылған жұмыстардың нәтижесінде, әлеуметтік әріптес «Қамқор вагон» ЖШС» Қазалы вагон жөндеу депосының басшысы Т.Ә.Әліпбаев ҚР Білім және ғылым министрінің &nbsp;«Әріптестік көшбасшы-2013» дипломымен марапатталды. Облыстық «Үздік техникалық және кәсіптік білім беру оқу орны 2014» атағын иеленген оқу орны 2015 жылы Ұлттық бизнес рейтинг нәтижесі бойынша алтын рейтинг қатарына шығып «Көшбасшы кәсіпорын-2015» қабырғалық медалімен марапатталды және арнайы ұлттық Сертификат иеленді. Колледждің оқу материалдық базасында 410 орындық оқу корпусы, оқу-өндірістік шеберхана мен зертханалар, 100 орындық асхана және жатақхана, жазғы спорт алаңы, оқу-жаттығу залы, фитнес клуб және жылыжай бар. Жас жұмысшыларды өз мамандығына тәрбиелеуде слесарлық, ағаш ұстасы, газэлектрмен дәнекерлеу және токарлық шеберханалар, физикалық және химиялық лабораториялық кабинеттер, компьютерлік орталық,мамандықты оқытуға арналған 36 оқу кабинеті, оның ішінде: 24 арнаулы пән (заманауи құрылғылармен жабдықталған 6 арнайы пән) кабинеттері, 12 жалпы білім беретін пән кабинеттері, 6 шеберхана, 4 зертхана және 3 полигон, 150 орынды мәдени орталық, 100 орындық ғылыми-әдістемелік орталық, 19287 кітап қоры бар 10 орынды электронды кітапхана жұмыс жасайды. Теориялық білімді практикамен ұштастыру мақсатында 31 әлеуметтік серіктестіктермен келісім-шарт жасалды. Инженер-педагогтар өз біліктіліктерін Корея, Франция, Германия, Чехия елдерінде және Мәскеу, Минск қалаларында арттырды.&nbsp;Қазалы көлік-техникалық жоғары колледжі «Жас маман» жобасына қатысып республикалық үздік 180 колледждің қатарына енгізілді. 2021 жылы республикалық бюджеттен 320 000 000 теңге бөлінді.&nbsp;Аталған қаржыға «Локомотивті жөндеу жөніндегі &nbsp;слесарына» 142 млн, «Вагон &nbsp;жөндеу слесарына 133 млн және «Электр жабдықтарын жөндеу жөніндегі электр слесары» біліктілігі бойынша 45 млн теңгеге заманауи құрал-жабдықтар сатып алынды.Жоба аясында 3 шеберхана, 3 арнайы пән кабинеті, 1 интерактивті класс, 1 мультимедиялық орталық жабдықталып, 22 электрленген стенд, 6 электрленген макет, 3 тренажерлық кешен, 6 виртуалды 3Д конструктор, 8 оқу-лабораториялық кешен, виртуалды көзілдірік және 14 станок сатып алынды.Заманауи құрал жабдықтарды игеруде 25 инженер-педагог өз біліктіктерін көтеріп сертификатталды.

Қазақстан және Қызылорда облысының жаңалықтары