<a href="https://kyzylorda-news.kz/">Kyzylorda-news.kz.</a>&nbsp; Жаңақорған ауданы әлеуметтік-экономикалық даму жолында тұрақты жүйе қалыптастырып, сан салаға серпін ала келді. Әсіресе, әлеуметтік мәселелерге басымдық беріліп, халықтың тұрмыс сапасын жақсартуда, газ, ауыз су, жол және жарық жүйесін жаңғыртуда іргелі істермен көрінді. Жаңақорған кентінің келісті келбеті мен ауылдардың ажарлана түсуі көңіл қуантады. Биыл да атқарылып жатқан жұмыс аз емес. Жаңақорған – бірқатар сала бойынша Сыр өңіріндегі көші ілгері ауданның бірі. Ауылшаруашылығы, өндіріс пен өнеркәсіп, инвестиция көлемі бойынша озық.Ең алдымен ауданның географиялық биографиясына тоқтала кетсек, Жаңақорған ауданы – Қызылорда облысының оңтүстік шығысында орналасқан аудан. Аудан 1928 жылы 17 қаңтарда құрылған.Ауданның жері Қаратау бөктерінен басталатын төбешікті жазық. Жаңақорған ауданында әйгілі емдік-шипалық қоры «Теріскен» көлінің табиғи қара балшығы мен минералды суы сүйек буын және нерв жүйелері ауруларын, сондай-ақ ішкі ағзалар ауруларын емдейтін емдік қасиеті жоғары, құрамы жөнінен Железноводскінің Смерновский суымен сәйкес минералды су болып табылатын Жаңақорған санаториясы бар.&nbsp;Ерте заманда Сыр өңірінің бүкіл қазақ елінің басты қалалары болған Сығанақ, Өзгент, Баршынкент шаһарлары және Хорасан ата, Ақтас мешіті мен Айқожа әулие кесенелері осы ауданның жерінде.Климаты – континенттік: қысы суық, жазы ыстық әрі құрғақ. Ауданның негізгі шаруашылық саласы – егін және мал шаруашылығы. Сонымен бірге, Шалқия кен орнында қорғасын, мырыш және әртүрлі фракцияда қиыршық тастар өндіретін кәсіпорындар жұмыс істейді. Жалпы Жаңақорған ауданының әлеуметтік-экономикалық даму көрсеткіші жоғары. Оны биылғы аудан бюджетінің жалпы кірістерінен байқауға болады. Атап өту керек, 2023 жылдың 1-мамырына аудан бюджетінің жалпы кірістері 110,7 пайызға орындалды (болжам 4 305 331,9 мың теңге болған, бюджет кірісіне нақты түскені 4 764 787,9 мың теңге), аудан бюджетіне артық түскені 459 456,0 мың теңге (2022 жылдың 1-мамырына жалпы кірістер 105,6 пайыз, 355 125,3 мың теңге артық түсім болған).&nbsp;2023 жылдың 1-мамырына аудан бюджетінің өз кірістері 145,7 пайызға орындалды. Оның ішінде салықтық түсімдер 392 121,10 мың теңгеге артық түсіммен, яғни 139 пайызға орындалды (есепті жылға жоспар 1 004 341,0 мың теңге, орындалуы 1 396 462,1 мың теңге).&nbsp; Салыққа жатпайтын түсімдер 33 121,1 мың теңге артық түсіммен, 3 902,7 пайызға орындалды (есепті айға жоспар 871,0 мың теңге, орындалуы 33 992,1 мың теңге). Капиталды сатудан түсетін түсімдер 34 213,8 мың теңге &nbsp;артық түсім болды (есепті айға жоспар 0,0 мың теңге, орындалуы 34 213,8 мың теңге).Кенттер мен ауылдық округтердің есепті айдағы өз кірістерін артығымен орындап келеді (есепті айдың болжамы 42 871,0 мың теңге болса , бюджет кірісіне нақты түскені – 146 628,6 мың теңге).&nbsp;Ауданда өнеркәсіп өнімдерін өндіру биыл 34 952 млн теңгені құраған. Ал, өңдеу өнеркәсібі бойынша қаңтар-сәуір айларында 22 417,0 млн теңге болып, өткен жылдың осы кезеңімен салыстырғанда 85,2 пайызға орындалған.Ауданның негізгі капиталы ауылшаруашылығы саласы екені анық. Былтыр егіс көлемі мен өнімі жоғары нәтиже көрсетті. Оның ішінде әртараптандыру бағытындағы атқарылған жұмыстарға тоқталатын болсақ, азық-түлік бағасын тұрақтандыру мақсатында әр отбасы өзін-өзі картоп, көкөніс, бақша өнімдерімен қамтамасыз етуіүшін қосымша жер дайындау жөнінде облыс әкімінің тапсырмасына сәйкес 196 гектар егін егілді. Бұл жоба әлеуметтік маңызы бар азық – түлік тауарларының бағасын тұрақтандыруда өз көмегін тигізді. Биылғы жылы да өнім көлемін ұлғайтуды көздеп отырмыз. Аудандағы бірнеше шаруашылық құрылымдары су үнемдегіш технологияларды қолданып 30 гектардан астам жерге егін екті. Биылғы меже 37 781 гектарға егiс егу болса, тағы да әртараптандыру бағытына басымдық береміз. Азық-түлік қауіпсіздігін сақтау мақсатында қосымша жерлер ашылып ұжымдық түрде 295 гектарға картоп, көкөніс, бақша дақылдарын орналастыру бағытында жұмыстар атқарылуда. Нақтырақ айтқанда 845 адам отбасылық егістікпен айналысып, нәтижесінде әлеуметтік маңызы бар азық-түліктермен өзін-өзі қамтитын болады.Ауыл шаруашылығы ел экономикасындағы әлеуеті жоғары бағыттардың бірі. Биыл Жаңақорған ауданында ауыл шаруашылығының жалпы өнім көлемі 4 750,6 млн теңгені құрады. Бұл өткен жылмен салыстырғанда 100,5 пайызды көрсетіп отыр.Ауданда бөлшек сауда көлемі 2 243,4 млн теңгеге жетті. Бұл былтырғы осы мезгілмен салыстырғанда 108,6 пайызды құрайды.&nbsp; 2023 жылдың қаңтар-сәуір айларында негізгі капиталға тартылған инвестиция көлемі 9 888,0 млн теңге болып, өткен жылдың осы кезеңімен салыстырғанда 2,7 есе артып отыр. &nbsp;Құрылыс жұмыстарының көлемі 2023 жылдың қаңтар-сәуір айларында 1 134,0 млн теңге болып, пайдалануға берілген тұрғын үйлердің жалпы ауданы 2023 жылдың қаңтар-сәуір айларында 17 273 шаршы метр болып, тиісті кезеңімен салыстарғанда 103,5 %-ды құрап отыр. Қазіргі уақытта спорт саласындағы өзекті мәселелердің бірі – аудандарда спорт инфрақұрылымын дамытуда атқарылып жатқан жұмыстар көп. Соның бірі аудандағы Машбек Нәлібаев ауылдық округіндегі 120 адамға арналған спорттық кешеннің құрылысы. Нысан 2023 жылдың шілде айында қабылдау жоспарланып отыр.Жыл басынан жұмыс іздеуші ретінде Халықты жұмыспен қамту орталығына 3263 хабарласса (оның ішінде жастар саны – 1398), жұмыссыздықтан әлеуметтік қорғау шараларымен қамтылған азаматтардың саны барлығы 2135 адам (жалпы хабарласқандарға шаққандардың 65,4 пайызы) жұмысқа орналастырылды. Ресми жұмыссыз ретінде тіркелгендер саны – 2497, осыдан келіп бүгінгі күнгі мамыр айына ресми жұмыссыздар саны 2798 құрап отыр. (2022 жылдан 2023 жылға жалғастырушы жұмыссыздар санын қоса алғанда). Атап айтқанда, тұрақты жұмыс орындарына 276 адам, оның ішінде 134 жастар, әлеуметтік жұмыс орындарына 64 адам, жастар практикасына 17 адам орналасты. 2022 жылдан 2023 жылға 205 адам өз жұмысын жалғастыруда.Бүгінде қоғамдық жұмыс орындарына 1166, 37 адам мемлекеттік грант ұтып алды, «Алғашқы жұмыс орындарына» 17 адам жұмысқа орналасса, 2022 жылдан 2023 жылға 32 адам өз жұмысын жалғастыруда. «Ұрпақтар келісім шартына» 1 адам тіркелді. 2022 жылдан 2023 жылға 5 адам жалғастырды.Айта кету керек, «Бастау –бизнес» жобасымен 488 адам оқуға жолданды.-Күміс жас жобасына 69 адам қатысты. Жылпы биылғы жылы 3175 жаңа жұмыс орындарын құру жоспарланып отыр. Осыдан жоспарланған 3175 жаңа жұмыс орнынан 1598 жаңа жұмыс орындары құрылып, жылдық жоспар 50,3 пайызға орындалды. Оның ішінде тұрақты жұмысқа орналасқаны 264 немесе 18 пайызды құрады.&nbsp; Ауданда 10 рет бос жұмыс орындарына жәрмеңке өткізу жоспарланып, бүгінгі таңға екі жәрмеңке өтті. Онда 30 жұмыс беруші 98 бос жұмыс орындарын ұсынды. Оған 11 азаматқа жолдама берілді.Субсидияланатын жұмыс орындарын ұйымдастыру арқылы кәсіпкерлерді қолдау және кәсіпкерлердің қажеттіліктеріне қарай дағдыларды дамыту бағыты бойынша әлеуметтік жұмыс орындарын құруға жыл басынан бері республикалық бюджеттен 39744,0 мың теңге қаржы қаралған. Осыған 55 адам жолдау жоспарланып, қазіргі таңда 27 жұмыс берушіге 64 адам жолданды. Оның ішінде 24 әйелдер адам бар. Жастар саны – 27. Игерілген қаржы сомасы 9645,0 мың теңгені құрады. Ал жастар практикасын ұйымдастыруға республикалық бюджеттен 490590,0 мың теңге қаралып, осыған 395 адам жолдау жоспарланған. Қазіргі таңға 13 мекемеге 17 адам жолданды. Оған 10 әйел жіберіліп, 90000,0 мың теңге игерілген. Қоғамдық жұмыс орындарын ұйымдастыруға 797 адамға республикалық бюджеттен 959916,0 мың теңге қаралған. Осыдан бүгінгі таңға 1166 адам жолданды. Әйелдер саны – 806, жастар саны – 478, мүмкіндігі шектеулі адамдардар саны – 40. 28 адам мерзімінен бұрын аяқтап, осыдан 17 адам тұрақты жұмысқа орналасты.Алғашқы жұмыс орындарын ұйымдастыруға республикалық бюджеттен 92529,0 мың теңге қаралып, осыдан 17 адам жолданды. Оның ішінде 10 адам нәзік жандылар. Ұрпақтар сабақтастығын ұйымдастыруға республикалық бюджеттен ағымдағы жылға 1863,0 мың теңге қаралған. Осыған 3 адам жіберу жоспарланған болатын. Қазіргі таңға 1 адам жұмысқа жіберілді. 2022 жылдан 2023 жылға 5 адам жалғастыруда. Күміс жас жобасын ұйымдастыруға республикалық бюджеттен ағымдағы жылға 36515,0 мың теңге қаралған. Осыған 42 адам жолдау жоспарланып, бүгінгі таңға 69 адам жіберілді.Ауданда соңғы 5 жылда кәсіпкерлік саласында серпін өте көп. Шағын кәсіпкерліктің көкжиегі кең. 2023 жылдың 1 қаңтарына тіркелген шағын және орта кәсіпкерлік субъектілер саны 6605 болып, өткен жылмен салыстырғанда 18,5 процентке артқан. Ондағы белсенді субъектілер саны 6349 бірлік немесе 96,1 процент. Аудан бойынша 2022 жылы барлық қаржы көздерінен 131 жобаға 1 миллиард 578,4 миллион теңге несие алынса, 396,5 миллион теңгенің 361 жобасына мемлекеттік гранттар жеңіп алынды. 2021-2025 жылдарға арналған кәсіпкерлікті дамыту бағдарламасы шеңберінде аудандық жұмыспен қамту орталығы арқылы мемлекеттік гранттар беруге байланысты 360 жоба 395,5 миллион теңгені құрайтын грантты жеңіп алды.2023 жылы тағы 3 мектептің (Жаңақорған кентіндегі 600 орындық, Жаңарықта 300 орындық, Байкенжеде 150 орындық) құрылысы басталса, Жаңақорған кенті МАИ бекетіндегі мектеп құрылысы да аяқталатын болады. Осы мектеп құрылыстары аяқталған соң аудандағы проблемалық мәселе толық шешімін табады.Өткен жылдың соңында Жаңақорған кентіндегі 2 мектеп пен Бірлік елді мекеніндегі 90 орындық балабақша құрылысы аяқталып, пайдалануға берілді.Халықтың рухани азық алуына бар мүмкіндік жасау – міндетіміз. Республикалық, облыстық деңгейде түрлі шаралар ұйымдастырылды. Өзгент, Жайылма ауылдарында 150 орындық клуб құрылысы жүргізілуде. Ағымдағы жылдың I-ші жартысында оларды да пайдалануға берілетін болады. Тағы 3 елді мекенде (Екпінді, Кеңес, Көктөбе) клуб салуға жоба жасалды.Спорт саласында аудан спортшылары үздік нәтижелер көрсетуде. Спорттық инфрақұрылымды дамытуға байланысты мемлекеттік-жекешелік әріптестік аясында Қожамберді ауылында жеке инвестор спорт кешені құрылысын салып бітірсе, Ақжол елді мекенінде ҚР Ұлттық Қорынан берілетін қаражаты есебінен спорт кешенінің құрылысы жүргізілуде.Сонымен қатар 3елді мекенге (Шалқия кенті, Жаманбай батыр және Өзгент ауылдық округтері) спорт кешенін салуға жобалары әзірленіп, сараптаманың оң қорытындысы алынды. Мемлекет басшысының 2022 жылды «Балалар жылы» деп жариялауына байланысты ауданда ауқымды жобалар жүзеге асты. «Азимут-М» ЖШС-і аудан орталығынан жоба құны 790 млн теңгені құрайтын демалыс паркін салды. Паркте, аттракциондар, субұрқақтар, спорт алаңдары мен балалар ойын алаңдары орналасады.Аудандық бюджет есебінен жаңадан тренажер құрылғылары орнатылған 10 шағын спорт алаңы пайдалануға берілді.Жаңақорған кентіне «Самара-Шымкент» автомобиль жолынан кіретін арка жаңғыртудан өтсе, Жаңақорған кентіне Сырдария өзені жағынан кіретін жолға жаңадан арка орнатылды. Хорасан ата көшесіндегі аудандық мешіт алдындағы аумақ абаттандырылып, үлкен сағат қойылса, Хорасан ата мен Тәуелсіздік көшелерінің қиылысына айналма жол салынды. Хорасан ата мен А.Иманов көшелеріндегі шағын аркаларды жаңа орнаменттермен өрнектеп, түрлі-түсті жарық шамдар қойылды. &nbsp;

Жаңақорған ауданы бірқатар сала бойынша Сыр өңіріндегі көші ілгері

<a href="https://kyzylorda-news.kz/">Kyzylorda-news.kz.</a>&nbsp;Туған жерден түлеп ұшқан перзенттермен сырдариялықтар қашанда мақтанатыны жасырын емес. Сан салада абыройлы еңбек етіп келе жатқан жерлестеріміз ел дамуына өзіндік үлестерін қосып келеді. Сырдариялық дәрігер Ербол Жұмабековтің есімі елгі белгілі. Ол Ақтөбе қаласындағы Марат Оспанов атындағы Батыс Қазақстан мемлекеттік медицина университетінің медицина орталығының дәрігері.– Ербол Баянәліұлы, алғашқы сауалымыз туып-өскен ауылыңыз жайлы болмақ. Сіз үшін туған өлке несімен қымбат?– Мен үшін туған жерім, туып өскен ауылым әркез ыстық көрінеді. Туған өлкенің әр тасы мен қыратынан артық ешнәрсе таба алмасымыз анық. Өзім қазіргі Сырдария ауданына қарасты Аманкелді ауылында дүниеге келген едім. Балалық шағымның қызықты сәттері әлі жадымда. Өзімнен үлкен ағаларымның жанынан бір елі қалмай өстім десем қателеспейін. Олармен бірге жүріп, көп қызықты оқиғаны бастан өткерген жайым бар. Сегіз жасқа толған кезімде ауыл шетіндегі диқандардың бақшасына қауын-қарбыз алу үшін жасырынып кіретінбіз. Заматында бақташы алдымыздан шыға келіп, қаша жөнелетін едік. Бір кезде алды-артыма қарамай жүгіріп келе жатып, аң аулауға арналған қақпанға түсіп қалғаным бар. Содан кейін абайлап жүретін болдық. Кейіннен қақпан құрылған жерлерді бағдарлап, бақташыға ұсталмай кететінбіз. Бәрі балалықпен жасалған істер ғой...Ауыл балаларымен әр мезгілде түрлі ойындарды ойнайтынғаныз есімде. Мысалы, қыста биіктен сырғанап, қас қарая шанамызды сүйретіп үйге келеміз. Ал, жаз бойы ауылдағы каналға суға түсеміз. Бет-ауызымыз жарылып, күннің аптап ыстығынан қап-қара болғанымызды байқамайтыныз тағы бар– Білімге құштарлықты ояту тағылымды ұстаздың ұлағатынан деп білеміз. Өзіңіз білім алған білім ұясы жайлы айта кетсеңіз?– Мен үш мектепте білім алдым. Ең алғаш 1993 жылы №35 Иса Тоқтыбаев атындағы орта мектебінің табалдырығын аттадым. Менің оқуға деген құштарлығымды оятып, білім нәрімен сусындатқан математика пәнінің мұғалімі Іңкәр Қордабаева болды. Ұстазым, ең алдымен, бақылау жұмысын менен алып, сыныптан шығарып жіберетін. Өйткені, сыныптастарыма көп көмектесетін едім.Кейіннен әкемнің қызмет бабымен Қызылорда қаласына көштік. Мұнда №135 Темірбек Жүргенов атындағы қазақ орта мектебінде 5 жыл оқыдым. Ал, 2003-2004 оқу жылын Аманкелді ауылындағы №42 Қуаныш Баймағанбетов атындағы мектеп-лицейден бітірдім. Біздің сынып жетекшіміз Талғат Жүсіпбеков болған еді. Ұстаздарымның тағылымды тәрбиесі мен саналы білімінің арқасында осыдан 16 жыл бұрын Ақтөбе қаласындағы Марат Оспанов атындағы Батыс Қазақстан мемлекеттік медицина университетінің емдеу ісі факультетіне оқуға түсе алдым.– Қазіргі таңда медицина саласында еңбек етіп келесіз. Мәртебелі мамандықты таңдау бала күнгі арманыңыз болар. Медицинаның күрделі саласы – хирург болудың басты қиыншылығы неде?– Қай кезде де адам өміріне араша түсетін дәрігер мамандығы үлкен жауапкершілікті талап етеді. Өйткені, дәрігер өмірде түрлі тосын оқиғаға тап келеді. Өзім қалаған мамандықтың қиындығын білсем де бала күннен ақ халатты абзал жан болуды арман еттім. Бірнеше жыл алған білімнің арқасында жемісті еңбек етіп келемін. Дәрігер жүйкесі мықты, барлық күйзеліске төзімді жан болуы керек. Ең бастысы хирург физикалық тұрғыдан мықты болып қалыптасуы қажет. Мен таңдаған мамандық өте күрделі. Ақтөбе қаласындағы Марат Оспанов атындағы Батыс Қазақстан мемлекеттік медицина университетінің медицина орталығында 2012 жылдан бастап дәрігер-хирург, онколог, маммолог мамандығы бойынша қызмет атқарудамын. Айта кету керек, хирург болып қалыптасуыма тәжірибелі ұстаздар Марат Күзденбаев пен Асылан Ерғалиев септігін тигізді. Екеуі де Қазақстанға аты белгілі, білікті хирургтар. Алдағы уақытта туған жерім Қызылорда қаласында қызмет ету ойда бар. Сонымен бірге, білімімді шыңдау үшін Оңтүстік Корея еліне тағылымдамадан өтуді мақсат етіп қойғанмын.Орталықта жұмыс істеп жүріп, талай науқастың өміріне араша түстік. Күні-түні ұйқысыз түндер өтеді. Қапелімде, ота бөлмесінде маңызды шешім қабылдайтын кездер болады. Сондықтан әрбір хирургтың өзінің физикалық жағдайы барлық талапқа сай болуы тиіс. Шұғыл ота барысында күтпеген тосын жайттерге тап боламыз. Сонда ең алдымен өзімізді төзімді болуға тәрбиелейміз.– Алғашқы отаға қатысқан кез есіңізде ме?– Ең алғаш отаға 2-курста қатыстым. Ота барысында менде қорқыныш сезімі болмапты. Негізінен, жасалатын оталарға іш қуысы, кеуде қуысы мүшелері кіреді. Аталмыш оталарды дәстүрлі, яғни дене мүшесін кесу және заманауи технологиялық әдіс эндовидеохирургиялык (лапароскопия және торокоскопия) тәсілдермен жасаймын. Негізінен хирургия саласының өзі бірнеше салаға, яғни, торокольды, тамыр, кордиохирургия тағы басқаға бөлінеді.– Медицина мамандығын таңдауға ниетті жастарға айтар ақылыңыз? Ең алдымен, хирургтың бойында қандай қасиет болу керек?– Медицина мамандығын таңдайтын жастарға айтарым, ең бірінші, адамның шын ниеті, ынтасы мен ықыласы керек. Көп жағдайда ата-анасының айтуымен мамандық таңдаған жастар қателікке ұрынады. Кейіннен күрделі мамандықтың қиындығынан оқуды тастап кетіп жатады. Мұндай келеңсіздік жастардың болашағына кері әсер етеді.Ал, хирургке адамгершілік, шыдамдылық, жүректілік. Дәрігер адамның тәнін ғана емес, жан дүниесін де емдеуі керек. Ота алдында әрбір науқаспен сұхбаттасып, келісімін алу өте маңызды. Науқастың бізге барынша сенім артуы жігер береді. Қарапайым адамның дәрігер-хирургтің жалпы хирургия, кардиохирургия, торакальды хирургия, тамыр хирургиясы секілді тағы да басқа мамандықтармен айналысатындығын білгені абзал.– Еліміз бойынша онкология саласындағы негізгі мәселелерге тоқталып өтсеңіз?– Онкологиялық аурулар бүгінде дүние жүзімен қатар, еліміз бойынша жүрек, қан-тамыр дертінен кейін көш бастап келеді. 2018-2022 жылдарға арналған онкологиялық аурулардың кешенді жоспарына сәйкес, дертті алдын-алу жұмыстары жүргізілуде. Науқастық белгілерді ерте анықтау «Скрининг» және емдеу әдістерінің жақсаруына байланысты дертті болған адамдардың өмір сүру ұзақтығы артуда.– Отбасыңызға тоқталып өтсеңіз?– Бүгінде ата-анам Қызылорда қаласында тұрады. Әкем Баянәлі Жұмабеков – Аманкелді ауылының тумасы. Ұзақ жылдар бойы ішкі істер саласында табанды еңбек ете білді. Құқық қорғау органдарында еңбегі еленіп, зейнет демалысына шыққан болатын. Анам Аяқбаян Ахметова талай жыл жедел-жәрдем саласында қызмет атқарды. Әлі есімде күн-түн демей, науқастардың жанынан табылатын. От-басында төрт ағайындымыз. Ағам Тұрар Жұмабеков Шиелі ауданы әкімі аппаратының құқықтық қамтамасыз ету бөлімінің басшысы. Інім Нұрбол Жұмабеков – Сырдария аудандық ауыл шаруашылығы және жер қатынастары бөлімінің басшысы. Ал, кенжеміз Нұржан Жұмабеков жеке секторда еңбек етуде.– Сіз перзенттеріңізге қандай әкесіз? Отбасы бюджетін үйде кім жоспарлайды? Өмірлік жарыңыз туралы айта кетсеңіз?– Өмірлік жарым Венара Тынышбайқызымен университет қабырғасында таныстық. Ол Ақтөбе облысына қарасты Қобда ауданынан. Біз 2011 жылы отбасын құрған болатынбыз. Шүкір, жанұяда екі ұл тәрбиелеп отырмыз. Жарым – гинекология саласын меңгерген дәрігер.&nbsp; Біз үлкен қалада жүріп, отбасы болып қалыптастық. Барлық ауыртпалықты көтере білдік. Келіншегім екеуміз ақ халатты абзал жан болғаннан кейін елдегі қиын кезеңді жақсы білеміз. Әрбір азаматтың дертті болып, қиналғанын түсінеміз. Үнемі отбасы бюджетін бірге жоспарлаймыз. Дегенмен, көбіне қаржыны өзім ұстаймын. Балаларымның анасы маған үнемі қолдау көрсетіп отырады. Бос уақытымды балаларыма арнаймын. Сонымен қатар, аптасына екі-үш рет жаттығу залына барып, дене шынықтыруды, бассейнге жүзуді әдетке айналдырғанмын. Ал, аптасына бір рет атқа шабу менің сүйікті хоббиім десем қателеспеймін.&nbsp;

Ербол Жұмабеков: Дәрігерлер еңбегі – ерлік

<a href="https://kyzylorda-news.kz/">Kyzylorda-news.kz.</a> Сырдария ауданының әкімі сайлауалды үгіт-наси­хат ке­зеңінде тұрғын­дар­дан түскен ұсыныс-пікір­лерді саралау­ үшін аудандық мәслихат депутаттарымен кездесті. Ауданның әлеуметтік-эконо­микалық, қо­ғам­дық-саяси да­муы­на­ атқарушы орган­мен қа­тар өкілді орган да тікелей жа­­уап­ты.&nbsp;Сырдария ауданының әкімі сайлауалды үгіт-насихат кезеңінде тұрғындардан түскен ұсыныс-пікірлерді саралау үшін аудандық мәслихат депутаттарымен кездесті. Ауданның әлеуметтік-экономикалық, қоғамдық-саяси дамуына атқарушы органмен қатар өкілді орган да тікелей жауапты. Сондықтан аудан әкімі мен аудандық мәслихат депутаттарына тұрғындар тарапынан тең талап қойылады.Кездесу еркін форматта ұйымдастырылды. Әр­бір округтен сайланған депутатқа жеткілікті уақыт беріліп, аудан басшысы айтылар ұсыныс пен пі­кірді, тіпті сын-ескертпені де асықпай тыңдады. Мә­селелердің түйіні – инфрақұрылымды жетілдіру, жолдарды жөндеу, аяқ су мәселесін реттеу, газдандыру, жарықпен қамтамасыз ету секілді өзекті тақырыптармен&nbsp;жалғасты.<blockquote> «Биыл біз үлкен саяси маңызды науқандарды жоғары деңгейде қорытындылап, жаңа кезеңге қадам басып жатырмыз. Бұл – ауданымыз үшін де, әрбіріміз үшін де аса&nbsp;маңызды. Сондықтан жауап­кер­шілікті терең сезініп, Мемлекет басшысы­ның саяси реформаларын жүзеге асыру мақсатында облыс әкімінің жанына топтасып, елімізді әлеуметтік-эко­номикалық дамыту жолында бірлесе еңбек етуі­міз&nbsp;қажет. Өткен айда Мемлекет басшысы Қасым-Жомарт Тоқаевтың төрағалығымен Ас­та­нада ке­­­­­­­­­­­­­­­­­­­­ңейтілген кеңес өтті. Кеңеске ау­дан­нан аудандық мәс­лихат төрағасы Ержан Әжікенов екеуміз қа­тысып келдік. Жиында еліміз­дің әлеуметтік-эконо­ми­калық мәселелері кеңінен талқыланды, нақты міндеттер айқындалды. Сол тапсырмаларды орындау бағытындағы жұмыстарды нақтылау бойынша аймақ басшысы Нұрлыбек Машбекұлының төр­ағалығымен де арнайы жиын өткізілді. Бұл жиынды тарихи жиын десек те болады. Өйткені, об­лысымыздың алдағы даму белестері айқындалып, үлкен істердің негізі қаланды», – деді аудан әкімі.</blockquote> Аудан басшысы ауданның әлеуметтік-экономи­калық, қоғамдық-саяси дамуында аудандық мәс­лихат депутаттарының алатын орны ерекше екенін&nbsp;жеткізді. Депутаттар бүгінде тұрақты комиссиялар­дың бірлескен отырысы мен әрбір сессияларда ма­ңызды шешімдер қабылдап, сайлаушылардың ұсы­ныс-пікірін жұмыстарының басты арқауы еткен. Бұл жолғы жиын сол жұмыстарды жетілдіруге арналып, әр округтен сайланған депутаттар тұрғындардың мұң-мұқтажын&nbsp;айтты.<blockquote> Мемлекет басшысы Парламент пен Үкіметтің өзара бірлескен жұмысына қатысты мәселелер­ге ерекше тоқталды. «Парламент депутаттарының ­ой-пікірі атқарушы билікті беталды сынның астына алуды ғана көздемеуге тиіс. Үкіметтің де, Парла­мент­тің де мақсаты – бір. Бұл – халықтың қамы және елдің мүддесі» деді Президент. Бұл бізге де қатысты. Жергілікті жерде мәслихат депутаттары әкімдерге қолдау көрсетіп, қажет болса кеңесшісі болып, өзара ақылдасып, халық игілігі үшін жұ­мыс жа­сауы керек. Яғни, біз «бір жағадан бас, бір жең­нен қол шығарып» өңіріміздің әлеуметтік-эконо­микалық, қоғам­дық-саяси, рухани-мәдени дамуына бар ын­та-жігерімізбен, күш-қайратымызбен атса­лы­суы­­мыз қажет. Бізден мұны уақыт да, қоғам да талап етіп отыр. Ал бұл істе Сырдария аудандық мәс­ли­хатындағы депутаттық корпус жергілікті ат­қарушы органдармен, аудан, кент және ауыл әкім­діктерімен, бөлімдермен тығыз әріптестік байланыста болып, тиімді шешімдердің қабылдануына жұмыс істеуде деп нық сеніммен айта аламын, – деді жиында аудандық мәслихат төрағасы.</blockquote> Депутаттардың ұсыныстарын байыппен тың­да­ған Берік Сәрменбаев кент және ауыл әкімдеріне, тиісті мекеме басшыларына нақты тапсырмалар берді. Арнайы жоспар әзірленіп, әрбір мәселенің орындалуы назарға алынып, бақылауда болатынын жеткізді. Сондай-ақ депутаттарды ауданның макроэкономикалық көрсеткіштерін жақсарту ба­ғытында бірлесе еңбек етуге шақырды.&nbsp;

Сырдария ауданында күрделі мәселелер талқыланды

<a href="https://kyzylorda-news.kz/">Kyzylorda-news.kz.</a> 7 мамыр – Отан қорғаушылар күніне орай білім бөлімінің кубогы үшін өткен талас мәресіне жетті. 4 топқа бөлінген 20-ға жуық команда шебер ойын өрнегін салды.&nbsp;Сайыс қорытындысы бойынша №104 мектеп ұстаздарынан құралған жанкенттіктер турнир жеңімпазы атанды. Күміс алқаны аудандық білім бөлімінің жігіттері қанжығаға басса, Жанқожа батыр атындағы №70 мектептің мұғалімдері мойындарына қоладан алқа тағынды.&nbsp;Таңнан кешке дейін созылған кіші футбол жарысындағы төрешілер шешіміне сәйкес, турнирдің «Үздік ойыншысы» номинациясы&nbsp; білім бөлімінің сарапшысы Ринат Әбдіқалыққа бұйырды. «Үздік сұрмерген» бағамын №104 мектептің дене шынықтыру пәні мұғалімі Сырым Бегилдинов, «Үздік қақпашы» аудандық білім бөлімінің әдіскері Ержан Төлегенов, «Үздік қорғаушы» №70 мектептің математигі Кәрімжан Нұрмағамбет, «Үздік төреші» атағын №95 мектептің инженер-технигі Тимур Берденқұлов еншіледі. Ал «Үздік шабуылшы» бағамы №266 мектептің математика пәні мұғалімі Тұрсын Нұрділдә, «Үздік команда жетекшісі» атағын №70 мектептің дене тәрбиесі мұғалімі Ардақ Жұмахметов жеңіп алды.&nbsp;Турнирдің жабылу салтанатында аудандық білім қызметкерлері кәсіподағының төрағасы Әбіш Роман қатысушы командаларға алғыс білдіріп, жеңімпаздарға марапат пен қаржылай сыйлық табыстады.

Жанкенттіктер турнир жеңімпазы атанды

<a href="https://kyzylorda-news.kz/">Kyzylorda-news.kz.</a> Алысқа ұзамай-ақ қоялық. Өзге өңірлерді айтпағанда, Шиелі ауданның өзінде былтыр индустриалды-аграрлық колледжін 226 түлек тәмамдапты. Биыл да осы межеден артық болмаса, кем болмасы анық. Әне-міне жас маман атанатын студенттің негізгі мәселесі – жұмысқа орналасу. Бұл ретте кедергілер де жоқ емес.Кедергілер деп отырғанымыз ең әуелі – еңбек өтілі мен тәжірибенің жоқтығы. Оқуын енді бітірген түлектерде ол екеуінің болмайтынын білсе де, жұмыс берушілер талап етуден танбайды. Шарасыздықтан жас мамандар дипломды қалтаға басып алып, кезіккен кез келген жұмысты істеуге пейілді болады. Ал нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясындағы «Жастар тәжірибесі» – осы түйіткілді мәселенің түйінін шешуге таптырмас мүмкіндік.«Жастар тәжірибесі» – жұмыспен қамтудың белсенді шараларының бірі. Жастар арасында сұранысқа ие. Былтыр осы бағдарламаға қатысқан адамның 432-сі тұрақты жұмысқа орналасыпты. Ал биыл 360 жас жұмыс істеуде. Талап бойынша «Жастар тәжірибесіне» қатысушылар 29 жастан аспаған, мамандық бойынша 3 жыл ішінде жұмыс істемеген болуы тиіс. Жұмыс ұзақтығы – 1 жыл. 30 АЕК, бұл қазір 103 500 теңге көлемінде еңбекақысы да төленеді. Сәйкесінше, зейнетақы, әлеуметтік аударымдары жасалады.Жыл басынан бері «Жас¬тар тәжірибесіне» қатысқан Інжу Қасымханованың практикасы аяқталар күн таяу. Ол одан кейін де өзі жұмысқа қабылданған аудандық «Жастар ресурстық орталығында» тұрақты жұмысқа қалу ниетте екен.<blockquote>«Колледжді аяқтай салысымен бірден ауылға келдім. Келгеннен кейін «Жастар тәжірибесі» бойынша құжат тапсырдым. Себебі жұмыс берушілер еңбек өтілін сұрайды. Ал бұл жақсы мүмкіндік. Тәжірибе жинақтайсың, еңбекақы аласың, зейнетақы аударымдарың жүріп жатады. Ақшасы аз демеймін, мүлдем төленбесе бұдан да жаман болуы мүмкін еді ғой», – дейді ол.&nbsp;</blockquote>Өздеріне маман іздеген мекемелер мен ұйымдар үшін де «Жастар тәжірибесі» тиімді бағдарлама. Қажет мамандарын өздері оқытып алады. Әдетте, бағдарламаға қатысушылар мемлекеттік мекемелерге жіберіледі. Қазір жеке сектормен де байланыс тығыз екендігін айтады мамандар.Аудандық статистика басқармасының басшысы Алтынкүл Қожамжарова маман табудың қиын екенін айтады.&nbsp;<blockquote>«Біздің жұмысқа сәйкес мамандарды біз өзіміз іздейміз, – дейді ол. – Оқытып, өзімізге кадр ретінде қалдырамыз. «Жастар тәжірибесі» уақытша жұмыс орны десек те, жас маманның алғашқы кәсіби машықтарын қалыптастаруға мол мүмкіндік береді. Бұл мемлекеттің жұмыссыз жастарды жұмыспен қамту бағытында шын мәнінде оң нәтижесін көрсеткен көп жылдан бері қолданыстағы шара. Жыл сайын қаншама түлек бітіреді, дайын тұрған жұмыс жоқ. Екінші жағынан маман тапшы деп зар қағатын кәсіпорын, өндіріс, ауруханалар мен мектептер көп. Екі тарап арасындағы байланыстың жолы – «Жастар тәжірибесіне» екі жақ та мүдделі. Осы бағдарлама аясына бастапқы кәсіби біліктілікке қол жеткізіп, өтіл жинақтайтын жастар уақыт өте келе сол мекемелерге дайын маман болып барады», – дейді басқарма басшысы. &nbsp;</blockquote>

«Жастар тәжірибесі» – мәселенің түйінін шешуге таптырмас мүмкіндік

<a href="https://kyzylorda-news.kz/">Kyzylorda-news.kz.</a> 9 мамыр Ұлы Жеңіс күні мерекесі қарсаңында Байқоңыр қаласы да өз дәрежесінде атап өтті. Мерекелік іс-шарада орталық &nbsp;саябағы жанынан &nbsp;Қазақстан Республикасы мен Ресей Федерациясы достығы аясында Ұлы Отан соғысы батырларына арналған аллеясының ашылу салтанаты өтті.&nbsp;Салтанатты шараға Қызылорда облысы әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай, Байқоңыр қаласы әкімшілігінің басшысы Константин Бусыгин мен қала тұрғындары қатысты. Алғашқы сөз тізгінін алған Қайрат Нұртай қатысушыларды Ұлы Жеңіс күні мерекесімен құттықтап, жүрекжарды жылы лебіздерін білдіріп, қала тұрғындарының әлеуетін арттыруда атқарылып жатқан іргелі істердің жайына тоқталды.&nbsp;<blockquote>«Батырлардың ерлігін ұлықтап, үлгі тұтатын шаралардың жиі өткізілуі дәстүрге айналып келеді. Бүгінгі аллеяның салынуы да соның айқын дәлелі. Бұндай шаралар жастарды ерлікке баулуға өз әсерін тигізетіні анық», – деді ол. Сонымен қатар, шараға қатысушы Ұлы Отан соғысында тылда еңбек еткен ардагерлерге де құрмет көрсетті.&nbsp;</blockquote>Одан әрі салтанатты шараға қатысушыларға қала өнерпаздары тақырып аясында ән мен жырдан шашу шашып, мерекелік көңіл-күй сыйлады.

Байқоңырда батырлар аллеясы ашылды

<a href="https://kyzylorda-news.kz/">Kyzylorda-news.kz.</a> Қазалы ауданында Ұлы Жеңістің 78 жылдығына арналған мерекелік шара кент орталығындағы «Жеңіс» саябағында өтті.Жиынға соғыс ардагері Қабақ Смағұл, Қазалы ауданының әкімі Мұхтар Оразбаев, мемлекеттік органдар мен әскери бөлімдердің, құқық қорғау органдарының өкілдері, сондай-ақ қала тұрғындары қатысты. Мерекелік шара алдымен қазалылық жауынгерлерді еске алумен басталды. Жиналғандар «Мәңгілік алау» ескерткішінің алдына гүл шоқтарын қойып, соғыста қаза тапқандарды бір минут үнсіздікпен еске алды.Одан соң салтанатты жиын «Жеңісті жарқыратқандар» атты концерттік бағдарламаға ұласты. Мерекелік шарада сөз алған аудан әкімі Мұхтар Әуесұлы жұртшылықты Ұлы Жеңіс күнімен құттықтады.<blockquote>«Құрметті Ұлы Отан соғысы ардагерлері, тыл еңбеккерлері, жерлестер! Сіздерді 9 мамыр Ұлы Жеңіс күнімен шын жүректен құттықтаймын. Бұл күн – тарихта туған жердің бостандығы мен келешек ұрпақтың бақытты болашағы жолында ерлікпен күресудің жарқын белгісі ретінде алтын әріптермен жазулы. Ортақ Отанды қорғау үшін біздің ауданымыздан 11 мыңға жуық азамат майданға аттанып, 6 мыңнан астамы ғана аман-есен отбасына оралды. Бүгінгі ұрпақ аталарымыз жасаған ерлікті әрқашан қастерлеп жадында сақтайды, ешқашан ұмытпайды. Ұлы Жеңiс күнiнде баршаңызға ұзақ ғұмыр, отбасыларыңызға бақ-береке тiлеймiн», – деді аудан әкімі.</blockquote>Аудан өнерпаздарының дүбірлі думанға тыңғылықты дайындалғандығын аңғардық. Олар «Жеңіс» саябағына жиналған қауымға көтеріңкі көңіл-күй сыйлады. Тұрғындар сарбаздардың сап түзеген салтанатты шеруін қызықтап, шайқас кезінде жауынгерлерді жігерлендірген жалынды әндерді тыңдады. Сонымен бірге театрландырылған қойылымдар сахналанып, оны көпшілік ерекше таңданыспен тамашалады.&nbsp; &nbsp;

Мұхтар Оразбаев: Бүгінгі ұрпақ аталарымыз жасаған ерлікті ешқашан ұмытпайды

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданында саяси тұрақтылық барынша сақталған. Қазіргі әлеуметтік, экономикалық саламен қатар, қоғамдық мәселелер шешімін табуда. Өз кезегінде Сырдария аудандық қоғамдық даму бөлімінің басшысы Бейбіт Смайыловпен аудандағы қоғамдық-саяси мәселелер жөнінде сұтбаттасқан едік.&nbsp;– Бейбіт Есенкелдіұлы, ең алдымен Сырдария ауданы бойынша қоғамдық саяси ахуал жайында тарқатып айтып берсеңіз. &nbsp;&nbsp;– Сырдария ауданы бойынша қоғамдық-саяси ахуал тұрақты негізде сипатталады. 2023 жылдың басынан есепті мерзімге дейін наразылық тудыратын, көңіл толмаушылық танытуға ниет білдірген митинг, пикетті аудан көлемінде өткізу туралы өтініштер тіркелген жоқ. &nbsp;Аудандық қоғамдық даму бөлімімен аудан көлеміндегі қоғамдық-саяси ахуалға күнделікті зерделеу жұмыстары жүргізілуде. Аймақ басшысымен бекітілген «Қызылорда облысының ықтимал әлеуметтік шиеленіс ошақтары картасына» сәйкес &nbsp;Сырдария ауданына қатысты ауылшаруашылығы мақсатындағы жер қатынастары мәселесі бойынша 3 ауылдың жер мәселесі («Мағжан и К» ЖШС, «Жамбыл-2030» ЖШС, «Мәді қажы» ЖШС-нің үлескерлерінің мәселелері) және 3 апатты тұрғын үй мәселесі (О.Мәлібаев елді мекеніндегі 2 үй мен Абай көшесіндегі 1 үй) енгізілген. Тиісті сала басшыларымен шиеленісті жағдайлар бақылауға алынған. Мәселе көтерілуі мүмкін жағдайлар бойынша түсіндірмелер жүргізілді. Қоғамдық-саяси ахуалдың тұрақтылығын сақтау, ықтимал тұрақсыздық жағдайлардың алдын алу мақсатында «Қоғамдық-саяси ахуалды тұрақтандыру және әлеуметтік-экономикалық салаларда дағдарыс жағдайлар туындағанда азаматтармен келіссөздер жүргізуші жұмысшы тобының» алгоритмі бекітілді. Алгоритм бойынша арнайы жұмысшы топ құрылып, жедел әрекет ету бойынша тиісті салалардың іс-әрекеті белгіленді. Барлық тиісті салалар мен құқық қорғау органдарына таратылды. Сырдария ауданы бойынша ұлтаралық қақтығыстар орын алған жоқ. Сырдария ауданында жалпы саны 463 әртүрлі этнос өкілдерінің 16 түрі мекен етеді. Аудандық ассамблеяның құрамы – этномәдени бағыттағы бірлестік өкілдерінен, қоғамда өзіндік орны, абырой-беделі бар тұлғалардан тұрады. Ассамблея қазіргі таңда, &nbsp;«Аналар кеңесі», «Қоғамдық келісім кеңесі» және «медиация» &nbsp;бойынша жұмыстар атқаруда. Қазақстан Республикасы Президенті әкімшілігінің сәйкес, Қазақстан халқы Ассамблеясы жанынан аудандық «Ақсақалдар кеңесі» &nbsp;құрылды. Барлығы 15 мүшесі бар, аудандық іс-шаралар жоспары бекітілді. Іс-шара жоспарына сәйкес тоқсан сайын (қажеттілігі болған жағдайда) кеңес өткізу жоспарланған. «1 наурыз-Алғыс айту күніне» &nbsp;арналған іс-шаралар жоспарына сәйкес, аудан әкімінің орынбасары Д.Байдушев қоғамдық даму бөлімінің мәжіліс залында этнос өкілдерімен кездесуі ұйымдастырылып, сала мамандары мен өзге ұлт өкілдері Алғыс хатпен марапатталды. Сонымен қатар, әлеуметтік желі парақшаларында &nbsp;45 мақала, &nbsp;3 құттықтау бейнеролигі жарияланды. Ауданымызда 2023 жылға арналған қоғамдық саяси маңызы бар шаралар жоспары аудан әкімімен бекітіліп, жоспарға сәйкес 102 шара енгізілді.&nbsp; Жоспарға сәйкес, аудандық деңгейде түрлі бағытта шаралар қатарында дебат, кездесулер, мүшайралар, салтанатты мерекелік шаралар, акциялар, көрмелер, мерекелік шаралар, тәрбие сағаттары ұйымдастырылады.&nbsp;– Мемлекеттік рәміздерді насихаттау қай деңгейде жүргізілуде? &nbsp;– Аудан көлемінде мемлекеттік рәміздерді насихаттау, халықтың рәміздерге деген құрмет сезімін қалыптастыру мақсатында мемлекеттік рәміздер жөніндегі аудандық комиссия тұрақты жұмыс жасауда. Мемлекеттік рәміздер жөніндегі аудандық комиссияның отырысы бекітілген жылдық жұмыс жоспарына сәйкес 1 рет өткізіліп, 3 мәселе қаралды. Аудан әкімдігі тарапынан аудан көлеміндегі мемлекеттік мекемелердегі рәміздердің жай-күйі күнделікті қатаң бақылауға алынып, тиісті зерделеу жыл басынан бері 2 рет жүргізілді. Жыл бойы аудан көлеміндегі мекемелермен аудан әкімдігіне қарасты барлық &nbsp;дербес бөлімдер, кент және ауылдық округтерде барлығы 75 мекемеге мемлекеттік рәміздердің қолдануы, насихаттау шаралары бойынша зерделеу жасалды. Осы зерделеу барысындағы анықталған кемшіліктер бойынша тиісті сала басшыларына ескертулер жасалып, дер кезінде қалыпқа келтіру жұмыстары жүргізілді.– Бұқаралық ақпарат құралдары бойынша қандай жұмыстар атқарылуда?&nbsp;– Ағымдағы жылдың І тоқсаны бойынша ресми БАҚ-тағы теріс жарияланымдар саны – 10. &nbsp;Оның ішінде «Qazaqstan» ұлттық арнасы – 1, &nbsp;«Tengrinews.kz/» порталы – 1, «YouTube» видео-хостингі арқылы – 8 («Орда тв» арнасы – 5, &nbsp;«Көзілдірік» арнасы - 3 (Шіркейлі ауылындағы үлескерлер мәселесі туралы). Сырдария ауданында атқарылып жатқан жұмыстар туралы республикалық, облыстық, аудандық &nbsp;БАҚ-тағы жарияланымдар саны – 37. (Оның ішінде - «Хабар 24» телеарнасы - 5; «Astana TV» телеарнасы - 1; «Qyzylorda» телеарнасы - 2; «Қоғам ТВ» телеарнасы – 2, Облыстық «Сыр бойы», «Кызылординский вести» газеттері – 6, аудандық «Тіршілік тынысы» газеті - 21 мақала). &nbsp; Сырдария &nbsp;ауданы әкімдігі қызметінің ашықтығын қамтамасыз ету мақсатында «Сырдария Ауданының Әкімдігі» фейсбук және «akimat_syrdariya» инстаграмм әлеуметтік желілері жұмыс жасауда. Облыстық коммуникация орталығында 1 брифинг өткізілді. Аудан бойынша 168 (97 тұғыр) көрнекі үгіт-насихат құралдары орналасқан. Кент бойынша көрнекі үгіт насихат құралдарының саны – 59 дана (32 тұғыр). (оның ішінде- 1 беттік-4 дана, 2 беттік-27 дана,3 беттік -1 дана). Елді мекендер бойынша көрнекі үгіт насихат құралдарының саны –109 дана (65 тұғыр).(оның ішінде 1 беттік- 21 дана, 2 беттік- 44 дана). Мемлекеттік бағдарламар, Президент Жолдауы, құқық бұзушылық,мемлекеттік қызмет көрсету, төтенше жағдайдың алдын алу шаралары, еңбек адамдарын насихаттау, жергілікті ақын-жазушыларды насихаттау т.б бағыттар бойынша билбордтар орнатылған. Сондай-ақ атаулы мерекелік даталардың баннерлері үнемі ауыстырылып тұрады. Кенттің орталық көшесі А.Иманов бойында ЛЭД экран (өлшемі 2,40*4,60) орнатылды. Шаған-Тереңөзек трассасы бойында 7 тұғырға (14 билборд) Сырдария ауданынан шыққан жергілікті ақын жазушылар мен өнер майталмандары бейнесі бейнеленген билборд орнатылды. &nbsp;Тоқсанына бір рет бөлім тарапынан мониторинг жүргізіліп, идеологиялық мазмұны ескірген, күнге күйген, жыртылған баннерлер уақытылы ауыстырылып отыр.– Үкіметтік емес ұйымдар мен дін саласы &nbsp;бойынша &nbsp;атқарылған жұмыстарды айтып бересіз бе?&nbsp;Аудан бойынша мемлекеттік әлеуметтік тапсырыс шеңберінде 2023 жылы жергілікті бюджеттен қоғамдық даму бөлімі арқылы 10 жобаға 19,245 мың теңге. Қазіргі таңда, мемлекеттік сатып алу порталына орналастыру жұмыстары жүргізілуде. Сырдария ауданы бойынша діни ахуал тұрақты. Есепті мерзімге дейін қоғамдық-саяси, діни шиеленіс тудыратын проблемалық мәселелер орын алған жоқ. &nbsp;Аудан әкімдігі жанындағы діни бірлестіктермен байланыстар жөніндегі аудандық комиссия &nbsp;жылдық жоспарына сәйкес, 1 рет комиссия отырысы өткізіліп, 2 мәселе қаралды. Қазіргі таңда, аудан бойынша 15 мешіт, 1 өзге діни бірлестік тіркеліп, жұмыс жасауда. Оның ішінде 4 мешіт бейнекармералармен қамтамасыз етілген. 2023 жылғы аудандық қоғамдық даму бөлімінің дін мәселелері жөніндегі ақпаратты насихаттау бойынша сәйкес, «Зайырлы қоғам мен жоғары руханиятты ел құру мемлекетіміздің басты бағыты», «Дәстүрлі емес шетелдік діни оқу орындарынан сақ &nbsp;бол», «Жат ағымдардың зардабы» тақырыбында 1-акция, &nbsp;14-кездесу өткізіліп, 1155 &nbsp;адам қамтылды. Әлеуметтік желілерде дәстүрлі емес ағымдардың алдын алу мақсатында 8 бейнематериал, 9 мақала, аудандық «Тіршілік тынысы» газетінде 5 мақала жарық көрді.– Жастар саясаты бойынша жүйелі жұмыстар жүргізілген шығар. &nbsp;– Сырдария ауданы бойынша 14 пен 35 жас аралығында 11 727 жас бар. Оның ішінде ерлер - 6367, әйел - 5360 жасты құрайды. Аудан жастарының түрлі санаттары мен жас ерекшеліктері бойынша - 24 ақпараттық түсіндірме жұмыстары, тұрақты кездесулер &nbsp;ұйымдастырылып, 1928 жас қамтылды. Аудан бойынша маргинал (NEET санатындағы) жастарды анықтау мақсатында үйлерді аралау арқылы адрестік жұмыстар жүргізілді. &nbsp;– Гендерлік саясат және отбасы &nbsp;жөнінде аз-кем мәлімет келтірсеңіз.&nbsp;– 2023 жылға аудан әкімдігі жанындағы әйелдер істері және отбасылық-демографиялық саясат жөніндегі комиссияның жұмыс жоспары жасалып, бекітілді. Комиссия құрамына дербес бөлім басшылары, ҮЕҰ-дар өкілдері енгізілген. Тоқсан сайын тұрақты өткізілетін комиссия отырысының ағымдағы жылдың 31 наурыз күні өткізіліп, күн тәртібіне сәйкес, 1 мәселе қаралды. &nbsp;«Сырдария ауданының әйелдері» қоғамдық бірлестігінің жанынан &nbsp;құрылған «Жас отау» клубы, «Әжелер мектебі» жұмыс жасайды. &nbsp;«Жас отау» клубында &nbsp;жаңадан бас қосқан жас жұбайлардың аяқтарынан нық тұрып кетуіне байланысты кездесетін қиыншылықтарды шешуге ақыл кеңес айтылса, «Әжелер мектебінде» келін мен ене арасындағы туындайтын мәселелер туралы, әулеттің үлкендерінің жақсы дәстүрлері үлгі ретінде айтылып, насихатталып отырады. «8 - наурыз Халықаралық &nbsp;әйелдер күні» мерекесіне орай, аудандық іс-шаралар жоспары бекітілді. Іс-шаралар жоспарына сәйкес, аудан әкімі Б.Сарменбаевтың қатысуымен мерекелік қабылдау, концерттік бағдарлама өткізілді. Мереке қарсаңында волейболдан аудан мекемелері арасындағы аудандық біріншілігі өткізілді. &nbsp;Әлеуметтік желі арқылы мемлекеттік қызмет атқарып келе жатқан қыз-келіншектер туралы 2 бейнеролик &nbsp;дайындалып, жарияланды. &nbsp;&nbsp;

Сырдария ауданында қоғамдық-саяси ахуал тұрақты

<a href="https://kyzylorda-news.kz/">Kyzylorda-news.kz.</a> Туған жерден жырақ жүрсек те, ел ахуалына құлағымыз түрік астаналық жерлестерге Шиеліден суық хабар жетті. Халқына сыйлы азамат Пердәлі (Перден) Сейдахметұлы Архабаев ағамыз сексенге қараған жасында дүниеден өтіпті. Елге барған кезімізде сәтіне қарай көпшілік жиындарда кездесіп, жылы шыраймен сәлемдесіп, жағдай сұрасып тұратын аяулы ағаның жарқын келбеті көз алдыма келді.Етене араласып кетпегенмізбен, ел ішінде Перден аға туралы естіген жылы сөзіміз, өмір жолынан білген мәліметтеріміз баршылық. Соларды саралайтын болсақ, ол өзімен тұстас замандастары сияқты тұрмыс-тіршілік жағдайына байланысты еңбекке ерте араласады. Шиелі қамыс зауытына жұмысшы болып орналасады.Жұмысшылыққа да мамандық қажеттігін түсініп, 1960 – 1962 жылдары Шымкент қаласындағы техникалық училищеде токарь мамандығын меңгереді. Өте еңбекқор, ізденгіш жас маман Перден кәсіби шеберлігі &nbsp;шыңдалып, ауданда өтетін токарьлар арасындағы кәсіптік біріншіліктерде үнемі озық шығып жүретін деп еске алады замандастары. Әскери борышын өтеп оралған соң Перден Шиелі ауданында «Қызылту» ұжымдық шаруашылығында (колхоз) шеберхана меңгерушісі болып тағайындалады. Келе-келе жоғары білім алған талапты инженер-механиктің іскерлік қабілеті бағаланып, колхоздың бас инженері, ауыл шаруашылығын химияландыру кәсіпорнының директоры, аудандық ауылшаруашылығы басқармасы төрағасының орынбасары, Ы.Жақаев атындағы колхоз басқармасының төрағасы, Шиелі ауданы әкімінің бірінші орынбасары, аудандық жер ресурстары комитетінің төрағасы, аудандық орман шаруашылығының директоры болып жемісті қызмет етті. Қай жерге іскер басшы, ұйымдастырушы қажет болса, П.Архабаев сол жерге жұмсалды.Қызылорда облыстық мәслихатына, Шиелі аудандық мәслихатына депутат болып сайланды. Зейнеткерлікке шыққаннан кейін де белсенді еңбектен қалмай Шиелі аудандық қоғамдық кеңесіне төраға болды. Елге қызмет – абыройлы міндет деген өмірлік бұлжымас ұстаныммен еңбек етті, сеніп тапсырылған іске өте ыждағаттылықпен, үлкен жауапкершілікпен қарауы оны халық құрметіне бөледі. Шиелі ауданының құрметті азаматы атанды.Тағы бір азаматтық ұстанымы – қамшының сабындай қысқа ғұмырда қолдан келгенінше өнегелі өмір сүру керек дейтін қағида. Ата-бабамыздан жеткен «артыңда мал қалғанша, тал қалсын» деген өнегелі сөз бар. Перден Архабаевтың мамандығы инженер-механик бола тұра, өмірінің бір кезеңінде нағыз орманшыға, бағбанға айналды. Шиеліде орман шаруашылығын дамытуға көп еңбек сіңірді, облыстық саябақ күтіміне басшылық етті, артында жайқалған бақ қалды. Жайқалған бағы – азаматтың өмірлік бақ-бақыты, өнегелі ісі – өмірдегі ізі деген осы.&nbsp;Жер кодексіне жерді сату, шетелдіктерге жалға беру сияқты елеулі өзгерістер енгізу туралы ұсыныстар халық талқысына шығарылған кезде Жер реформасы жөніндегі мемлекеттік комиссияның Қызылорда облысында өткізген арнайы талқылау жиынында алқалы топ алдында халықтың, мемлекеттің тағдырын, ғасырлардан ұрпаққа ұрпаққа мұра болып келе жатқан ата-баба аманатын қорғауға белсене қатысты. Осынау өзекті өмірлік мәселеде мемлекеттік комиссияның ресми ұсынысына қарсы өткір пікірін айтып, халық үнін жеткізе алған табанды азаматтардың бірі – Перден Архабаев еді.Жаныңыз жәннатта болсын, елім деген аяулы аға. Бақұл болыңыз, қош...Ақайдар ЫСЫМҰЛЫ, Шиелі ауданының «Құрметті азаматы», Қызылорда облысының құрметті ардагері

Жайқалған бақ – өмірлік бақ

<a href="https://kyzylorda-news.kz/">Kyzylorda-news.kz.</a> Қайсыбір елдімекен мен жердің тарихи мұрасы мен жәдігерлері мұражайда сақталады. Әрбір сырттан келген мейман елдің болмыс-бітімімен, тарихи тұлғаларымен, көне жәдігерлерімен танысқысы келсе, осы орынға бас сұғары анық. Мұнда ел шежіресінің айнасы келушілерге мың сан сырды шертіп тұрады.Сырдария ауданының орталығында орналасқан «Еңбек даңқы» музейіне бас сұғып, тарихи жәдігерлерді тағы бір шолдық. Музейдің ашылуына сол кездегі аудан әкімі Ғ.Қазантаев пен мәдениет саласының белгілі ардагері А.Бақтиярова айрықша үлес қосты. Ғимаратқа жөндеу жұмыстары жүргізіліп, аудандық тарихи-өлкетану музейінің қосымша ғимараты ретінде мұражай жұмысы жолға қойылған болатын.«Еңбек даңқы» залы 3 бөлімді қамтиды: бірінші бөлім ауданнан шыққан қоғам қайраткерлеріне арналса, екінші бөлім Сырдария ауданының Тәуелсіздік жылдарында жеткен жетістіктеріне бағытталады. Ал үшінші бөлімде ауданда жемісті қызмет атқарған үздік қызметкерлер мен ардагерлер, спорт, өнер жұлдыздары туралы деректер мен жәдігерлер орналастырылған. Сондай-ақ ауданның негізі – 13 ауылға арналған арнайы көрме-сөре бар. Әр көрме-сөреде сол ауылдың тарихи тұлғалары мен маңызды оқиғаға толы жылдарынан көрініс беретін ақпараттар, арнайы кітаптар сақталған.Сондай-ақ мұражайда аудан көлеміндегі Екінші дүниежүзілік соғыс ардагерлеріне арналған арнайы экспозиция бар. Ел Тәуелсіздігінің 25 жылдығы аясында ашылған мұражай филиалында тарихтан сыр шертетін арнайы сөренің орналастырылуы орынды. Алғашқы екі шағын витринада сұрапылды көзбен көрген аудан азаматтарының медальдары орналастырылса, үлкен витринада отты жылдары майдан даласында болған батыр бабалардың суреті қойылған. Аталған витринаға әр ауылдан бір батырдың суреті орналастырылған. Мұражайға бас сұққан жан арнайы витринадан Н.Ілиясов, Ж.Нұрсейітов, Б.Өтепов, Б.Оспанов, Ж.Нұрышев, Е.Шүкіров, Т.Асқаров, Б.Өкшебаев, С.Баяханов, Ш.Оспанов, Д.Сақтағанов, У.Әбдуов, С.Мұхымов, Ж.Әлекеев, С.Теңізбаев, Д.Арыстанбековтердің суретін көре алады.ҰОС жылдарында ерен ерліктің үлгісін көрсетіп, жанкештілікпен жан аяп қалмағаны үшін 449 жауынгер «Кеңес Одағының батыры» атағын алған. Ең жоғары дәрежелі марапатты біздің ауданымыздан екі азамат – Нағи Ілиясов пен Жаппасбай Нұрсейітов алғанын мақтанышпен атап өткеніміз жөн. Аудан еңбекшілері елді қорғау жолында бір кісідей сапқа тұрған. Екі мыңға жуық жерлесіміз майдан даласында ерлікпен қаза тауып, елге оралмаған. Батыр бабалардың рухын ұлықтап, кейінгі ұрпаққа үлгі ету мақсатында ұйымдастырылған мұражай сөресінде батыр жерлестеріміздің төсбелгілерімен қоса майдан даласынан келген қол сөмке, қол сағат және Ұлы Жеңістің 50 жылдығына орай берілген радиоқабылдағыш сақталған. Аталған жәдігерлер мұражай келушілерінің қызығушылығын әрі бойындағы мақтаныш, ұлтжандылық сезімін туғызары анық. Осындай арнайы көрме-сөрелер қатары Ауған соғысы ардагерлеріне, Семей ядролық полигонына және Чернобыль апатына арналып жасалған құнды жәдігерлермен толықтырылып, жалғас тапқан.<blockquote>– Мұражайдың ғылыми қызметкерлері батыр аталарымыздың үйіне, ұрпақтарына арнайы жолығып, қалған жәдігерлерді мұражайға өткізулерін сұрап, жинақтаған. Майдан даласын көзбен көрген батырлардың кейінгі ұрпағы «атамыздың аты өшпесін» деп, мұндай заттарды мұражайға арнайы алып келіп жатады. Кез келген сырттан келген мейман елдің болмыс-бітімімен, тарихи тұлғаларымен, көне жәдігерлерімен танысқысы келсе, мұражайға бас сұғары анық. Тарихты келешекке мұра ету – баршамыздың міндетіміз, – дейді мұражай экскурсоводы Айжан Жұмабекова. &nbsp;</blockquote>

Сырдарияда музей жұмысы жолға қойылған

<a href="https://kyzylorda-news.kz/">Kyzylorda-news.kz.</a> Ағымдағы жылдың 4-6 мамыр күндері Қырғыстан елінің Бішкек қаласында гір тасын көтеруден Азия чемпионаты болып өтті.Азия чемпионатында қармақшылық жасөспірімдер арасында Қалжанов Әділет 68 кг салмақ дәрежесінде жүлделі ІІІ орын иеленді және әуесқой ересектер арасында 63 кг салмақ дәрежесінде Әміртай Саят жүлделі ІІІ орынға ие болды. Азия чемпионатына 15-тен астам шет елдерден 550-ге жуық спортышлар келіп қатыстыСпортшыларды дайындаған №16 Қармақшы аудандық балалар-жасөспірімдер мектебінің гір спорты бөлімшесінің жаттықтырушысы Нысанбаев Бемұрат.

Жерлестеріміз Азия чемпионатының жүлдегері атанды

<a href="https://kyzylorda-news.kz/">Kyzylorda-news.kz.</a> &nbsp;ҚР ҰҚК Шекара қызметі Қызылорда облысы бойынша департаментінің әскери қызметшілері Ұлы Отан соғысындағы Жеңістің 78 жылдығына орай мәңгілік алауға гүл шоқтарын қою рәсіміне қатысты. «Тағзым алаңында» қала тұрғындары, облыс, қала әкімдіктерінің өкілдері жиналды.<img src="https://knadmin.beoblood.kz/uploads/345470129_625976606241314_8025718231990900762_n_246fd4f066.jpg" alt="345470129_625976606241314_8025718231990900762_n.jpg"><img src="https://knadmin.beoblood.kz/uploads/345264938_629184145766775_3243106306177699937_n_e5dd58b385.jpg" alt="345264938_629184145766775_3243106306177699937_n.jpg"><img src="https://knadmin.beoblood.kz/uploads/345569046_2980252665451570_1124724383284177257_n_d5d29abeca.jpg" alt="345569046_2980252665451570_1124724383284177257_n.jpg">

Қазақстан және Қызылорда облысының жаңалықтары