<a href="https://kyzylorda-news.kz/">Kyzylorda-news.kz.</a>&nbsp; 14 – 17 шілде күндері Астана қаласында «Beeline Arena» спорт кешенінде ересектер арасында Белбеу күрес спорт түрінен Әлем чемпионаты өтті. Ол сайысқа 10 мемлекеттен 350-ден астам мықты деген спортшылар қатысып, бақтарын сынады.&nbsp;Әлемдік додада Қазақстанның намысын қызылордалық полицей қыз қорғады. Қызылорда облысы Полиция департаментінің Жылдам қимылдайтын арнайы жасағы саптық бөлінісінің инспекторы полиция аға лейтенанты Оразбай Арайлым Бахытқызы +76 кг салмақ дәрежесінде бақ сынасты.&nbsp;Полицей қыз 5 елдің спортшыларымен күресіп, нәтижесінде финалдық кездесуде өзбекстандық қарсыласын аса басымдықпен жеңіп, табандылық пен жеңіске деген мұқалмас ерік-жігер көрсетті. Бұл аламанға қатысқан полицей қыз Арайлым ел намысын абыроймен қорғады.&nbsp;Осылайша, дзюдодан және самбодан спорт шебері, Белбеу күресінен ҚР спорт шебері полиция аға лейтенанты Оразбай Арайлым Бахытқызы Халықаралық спорт шебері атағын иеленді.&nbsp;Ерлер арасындағы медальдар жиынтығы еркін және классикалық стильде сарапқа салынса, әйелдер тек еркін тәсіл бойынша күреседі. Жарыс қорытындысы бойынша қараша айында Ресейдің Екатеринбург қаласында өтетін әлем кубогында ел намысын қорғайтын ұлттық құрама жасақталады.Айта кетейік, бұл жарыс елімізде төртінші рет өткізілгелі отыр. Осыған дейін Астана 2007, 2012, 2017 жылы белбеу күресінен ересектер арасында әлем чемпионатын қабылдаған болатын.

Қызылордалық полицей қыз Әлем чемпионатында жеңімпаз атанды

<a href="https://kyzylorda-news.kz/ru">Kyzylorda-news.</a> Жалағаштық ұстаз Салтанат Қосжанованың есімі бүгінде елге мәлім. Бұған дейін білім саласында қажырлы еңбек етіп, бәсекеге қабілетті ұрпақ қалыптастыруға бар қарым-қабілетін жұмсаған ұлағатты ұстаз бүгінде Темірбек Жүргенов атындағы №123 мектеп-лицейінде жұмыс жасайды.&nbsp;Ол жыл сайын дәстүрлі түрде өткізіліп тұратын республикалық «Үздік педагог» байқауында былтыр топ жарды. Айта кеткен жөн, мұғалімдердің білімі қатаң сараптаудан өтетін бұл байқауға тек үздік педагогтар ғана қатыса алады. Былтыр аталған білім бәсекесіне республика бойынша 5 500 талапкер қатысса, соның 123-і облыстан іріктеліп, республикалық кезеңге өткен. Яғни байқаудың соңғы кезеңінде білім беру саласының 123 қызметкері бақ сынады. Олардың ішінде Жалағаш ауданынан бір үміткер болды. Ол – Темірбек Жүргенов атындағы №123 мектеп-лицейдің қазақ тілі мен әдебиеті пәні мұғалімі Салтанат Қосжанова болатын.&nbsp;Сонымен байқаудың қорытынды нәтижесінде алғаш рет аудан ұстазы жеңімпаз атанды. Осылайша ол 3 млн теңге сыйақы мен «Үздік педагог» төсбелгісін кеудесіне таққан және сол уақыттан бері ол мұндай марапатқа лайықты екенін саладағы еңбегімен дәлелдеп келеді. &nbsp;Иә, Салтанат Қосжанова – үнемі ізденіс үстінде жүретін жаңашыл мұғалім және жиған білімі, тәжірибесімен шәкіртті ғана емес, өзін де үнемі жетілдіріп отыратын нағыз ұстазға тән бекзат болмыстың иесі. Оқырмандардың ойына тағы да сала кеткенді жөн көрдік, Салтанат Қосжанова – Қазақстан Республикасының оқу-ағарту министрлігі ұсынған «Абайтану» оқулығын әзірлеген авторлардың бірі. Нақтырақ айтсақ, биыл жаңа оқу жылынан бастап мектеп бағдарламасына еніп, пән ретінде оқытыла бастаған қосымша әдістемелігі бар «Абайтану» хрестоматиясын жазып, даярлаған республика бойынша үш мұғалімнің бірі. Сондай-ақ Салтанаттың өз пәні бойынша дайындаған оқушылары облыстық, республикалық, халықаралық олимпиадалардан жүлделі орындар иеленіп келеді.&nbsp;– 2012 жылдан бері өткізіліп келе жатқан бұл байқауға қойылатын талап өте жоғары. Байқаудың ережесі бойынша әр қатысушы мұғалімнің республикаға тараған педагогикалық тәжірибесінен жинақталған әдістемелері, авторлық бағдарламасы, республикалық конкурстарға, фестивальдарға, конференцияларға қатысқаны, ондағы жасалған баяндамалары болуы тиіс. Сонымен бірге түсірген телевизиялық сабақтары, «Оқуға құштар мектеп» жобасы, дебаттық қозғалыс бойынша атқарған жұмыстары және ата-аналармен қарым-қатынас жұмыстары, волонтерлық қызметтері, қайырым¬дылық іс-шараларына белсенділігі және басқа да педагог атқаруы тиіс жұмыстардың барлығы сұралады. Мен байқаудың облыстық кезеңінде өзге әріптестерімнен басым ұпай жинап, республикалық кезеңге өттім.&nbsp;Байқаудың ережесі бойынша бұрын көрмеген мектебімізде болып, танымайтын оқушыларға сабақ бердік. Сабақтарымды талдау кезеңінде комиссиядан жоғары баға алдым. «Сабақтың құрылымы, сабақ барысында қолданылған тың әдіс-тәсілдеріңіз, сабақтың әр кезеңінде оқушылармен қарым-қатынас орнатуыңыз, соның ішінде олардың әрбір сөзі мен әрекетіне жіті мән беруіңіз, оқушылармен жұмыстарды сара-лауыңыз көңілімізден шықты және біз оны тәжірибе ретінде өз сабағымызда қолданатын боламыз» деді. Шынымды айтсам, комиссия мүшелері мен әріптестерімнің осындай бағасы мен үшін байқаудың жүлдесінен де қымбат болды, – дейді Салтанат Қосжанова.&nbsp;Иә, бүгінде Мемлекет басшысы білім саласына айырықша назар аударып, мұғалімдердің жағдайына жіті мән беріп отыр. Қабылданған жаңа заңның аясында педагогтардың мәртебесін көтеруде көптеген жұмыстар атқарылып келеді. Оның мақсаты – мұғалімдердің жағдайын жасау арқылы жаңашыл, ізденімпаз мұғалімдердің қатарын көбейту, жас ұрпаққа ұлттық тәрбие бере отырып, оларды жаңа методикалар арқылы әлемдік стандарттарға сәйкес оқытуға мүмкіндік туғызу. «Үздік педагог» байқауы нағыз ұстаздарды анықтайды. Сол үздік педагогтардың қатарынан жерлесіміздің көрінуі – аудан үшін, тіпті аймағымыз үшін үлкен абырой.

Салтанат Қосжанова – үздік педагог

<a href="https://kyzylorda-news.kz/ru">Kyzylorda-news.</a> Үлгерімі жақсы оқушы мектептің де, ата-анасының да, тіпті ұлағатты ұстаздарының да мерейін үстем етеді. Қалаберді қатарластарына үлгі болатыны анық. &nbsp;Бұрын біздер үшін «мектепте жақсы оқиды» деген атақ өмірлік паспортың іспетті. Бүгінде Жалағаш ауданында да білімімен биік шыңдарды бағындырып, оқу бәйгесінде топ жарып жүрген озық ойлы озат оқушылар аз емес. Әсіресе Жалағаш ауданына қарасты Ақсу ауылында мұндай оқушылар жетерлік. Солардың бірі &nbsp;– ауылдағы 116 орта мектептің &nbsp;9 сынып оқушысы Ақниет Дүйсенғалиқызы.Қазақтың бағзыда айтқан «қатарыңның алды бол» деген баталы сөзі бар. Аталы сөзді құлағына құйып өскен Ақниеттің білімге деген талпынысы өте жоғары. Алтын ұясының мерейін үстем етіп жүрген оның алғырлығы мен жігеріне, білімі мен тәрбиесін ұстаздары шаттанып та, мақтанып та айта алады. Әр оқу жылын «өте жақсы оқығаны үшін» мақтау қағазымен аяқтайтын оқушы түрлі деңгейдегі байқауларға қатысып, жеңімпаз атанған. Былтыр да оқр оқу-ағарту министрлігі жанындағы «Балдәурен» оқу-сауықтыру орталығының «Елжанды патриот» сертификатын иеленген болатын. Сондай-ақ қазақстандық жас патриоттар академиясының мүшелігіне қабылданып, арнайы медальмен марапатталды.– Былтыр 10-30 қараша аралығында республикалық «Балдәурен» оқу-сауықтыру орталығының Түркістан лагерінде тыныққан болатынмын. Біз Қызылорда облысынан 24 бала бардық. Біз барған ауысымға әр мектептен өз мектептерінің көшбасшыларын, мектеп президенттерін жинаған болатын. Мен ең үлкен 8-ші &nbsp;топ болдым. Ең алғашқы жарысымыз «визитка» еді. Біз бұл жарыстан бас жүлде алдық. Кейін олимпиада жарысынан да бас жүлдені қанжығамызға байладық. 1-1,5 апта өткеннен кейін маған І топқа жетекші боласың деген тапсырма келді, мен солай жетекші болдым. Ұйымдастырушы ұстазбен бірге оқушыларды жарыстарға дайындадым. Солай біз көптеген жетістікке жеттік. Мен 15 ауысым «top leaders» атты ауысымға түскен болатынмын. Бізде тәрбие кешенінің директоры Әліп Егемберді Тұрсынбекұлы болған. Ол кісі – өте керемет адам. Балалармен жақсы қарым-қатынас құра алатын. «Балдаурендегі» әрбір вожатыйлар өз қызықтарымен, өздерінің ерекше қасиеттерімен әрбір болған сәттерімен есімде қалған болатын. Вожатыйлар, балалар үшін бір уақытта ата-ана, дос бола алатын ерекше жандар. Бұл демалыс менің білімге деген құштарлығымды арттырды. Бұйыртса, алдағы жылы мектеп бітіремін. ҰБТ-ға дайындықты бастап кеттік, нәтижесін уақыт көрсетер, – дейді озат оқушы.Қазір мектептерде оқушылардың қоғамдық-әлеуметтік, танымдық және шығармашылық қабілеттерін дамыту негізінде көшбасшы оқушылар арасында ұйым құрылып, өзара мектептің президентін сайлайды. Оқуда озат атанған Ақниет те өз мектебінің президенті. Біліммен қатар өнер айдынында да жүлдегер атанып, былтыр Балалар жылы аясында ұйымдастырылған «Мен де жұлдыз боламын» байқауында І орынды иеленді. «Аmanat music» ІІ халықаралық конкурс-фестивалінің облыстық І кезеңінде бас жүлде иеленсе, республикалық ІІ кезеңінде үздік өнер көрсеткені үшін «ұлттық би» номинациясымен марапатталды. Абай Құнанбаевтың 175 жылдығына орай ұйымдастырылған «Абай дана, Абай дара қазақта» атты облыстық байқаудан ІІ орынды жеңіп алған болатын.&nbsp;Ақниеттің марапаты мен дипломдарын айта берсек, мұнымен бітпейді. Әр мақтау қағаздың артында оның білімі мен еңбегі жатыр. Осы секілді халықаралық, республикалық, облыстық олимпиадалар мен білім, өнер сайыстарында алған марапаты көп. Бұл жетістіктерін білім нәрімен сусындатқан ұстаздарының еңбегі, отбасының қолдауының жемісі деп біледі.&nbsp;– Ұстаздарымның жетекшілігімен алған білімімді облыстық, республикалық, халықаралық жарыстарда шыңдап келемін. Осындай сайыстарға қатысуға мүмкіндік беріп, білім нәрімен сусындатқан мектеп мұғалімдеріне алғысым шексіз. Бізде білім алуға, білімді одан әрі жетілдіруге толық мүмкіндік бар. Қосымша сабақтар да қарастырылған. Алдағы білім және өнер додаларында да жүлделі оралуға барымды саламын. Жетістікке жетіп жатсам, ол – ата-анамның, ұлағатты ұстаздарымның еңбегінің жемісі, – дейді жас дарын Ақниет Снасап.Балауса қыз мектепті үздік аяқтап, болашақта журналист болуды армандайды. Би өнері мен музыкаға да жаны құштар. Тағы бір айта кетерлігі, Ақниет кітапқұмар. Әсіресе қазақ тілі мен әдебиетін сүйіп оқиды. Талай білім бәйгелерінен топ жарған дарынды оқушының болашағынан ата-анасы, ұстаздары, ауылдастары үлкен үміт күтеді.

Ақниет – аудан мақтанышы

<a href="https://kyzylorda-news.kz/ru">Kyzylorda-news.</a> Тәуелсіздік жылдарының басында көптеген саланың жұмысы тұралап қалғаны белгілі. Бірақ ел болашағының жарқын болуы үшін жасалған ең әуелгі әрі батыл қадамдардың барлығы дерлік бүгінде нәтижесін беріп жатыр десек, артық айтқанымыз болмас. Әсіресе медицина саласына көрсетілген қолдау жемісін беріп, саланың дамуына үлкен септігін тигізуде.&nbsp;Медицина халық саулығының негізі екенін ескерсек, салаға бағытталған қаржы мен қолдаудың әрқашан өз нәтижесін бергеніне және алдағы уақытта да нәтижелі жұмыстарға жол ашатынына күмән жоқ. Бұл қолдаудың арқасында елдің сапалы медициналық қызметке қолы жеткенін аңғару қиын емес. Бір сөзбен айтқанда, сала қызметкерлерінің жұмысының оңтайлануына үлкен қолғабыс болып отыр.Жалағаш ауданындағы аудандық емханаға жолыңыз түсіп бара қалсаңыз, жүзі жылы, мейірімді дәрігерлердің науқастарға асқан ыждағаттылықпен хал-жағдайын біліп, ақыл-кеңесін айтып жатқанын көресіз. Дәрігерге керегі де осы қасиет, мейірімділік қой. Ал көзінде күн күлімдеген ақхалатты абзал жандардың алдына келген жанды жылы жүзбен қарсы алуы кәсіби біліктіліктерімен қатар, адами тұр-ғысынан да мәдениеті жоғары екенін айқын аңғартып тұр.&nbsp;Негізі медицина саласында ақхалатты абзал жандардың дертке шалдыққан жанды емдеуінің айқын үш жолы бар екені баршамызға мәлім. Біріншісі сөзбен. Екіншісі шөппен, яғни дәрі-дәрмекпен. Үшіншісі пышақпен, яғни ауру асқынып, жоғарыдағы екеуінен көмек болмағанда, көрсеткішіне қарай хирургиялық жолмен емдеу қажет. Осы емдеу жолының алғашқы екеуін ұштастыра білген маман нағыз өз мамандығына дөп келген жандар деп айта аламыз. Таңдаған мамандығына жауапкершілікпен қарайтын, өз ісінің маманы деуге тұрарлықтай ақхалаттылардың қатарынан Жалағаш аудандық емханасының егу медбикесі Айжан Кенбаеваның есімін ерекше атауға болады. Жалағаш жерінде туып-өскен Айжан Бостанқызы – тәуелсіздіктің төл құрдасы. Нағыз еркіндік салтанат құрған кезеңде дүние есігін ашқан бақытты ұрпақ. 1991 жылдың 22 желтоқсанында жарық дүниеге келген кейіпкеріміз отбасы үшін де ерекше перзент, ата-анасының қуанышын еселеген қыз.&nbsp;– Шүкір, қызым – бүгінде медицина саласының қызметкері. Өз жұмысын жауапкершілікпен алып жүруге әркез тырысады. Қай кезде де, кез келген уақытта жұмысын бірінші орынға қояды. Жұмысы ширақ, жүйелі болса, елдің алғысында болады ғой қашанда. Бүгінде осы қызым бір шаңырақтың аяулы келіні, екі баланың анасы атанып отыр. Ата-ана үшін баласымен мақтанғанға не жетсін, – дейді ақхалатты абзал жанның анасы Маржан Омарова.Иә, Маржан апайдың бізбен қуанышын бөлісетіндей жөні бар, «Бала жаман болса, ата-анасын түйе үстінен ит қабады» дейді. Ал өзіңнен үлгі-өнеге алып, жолыңды қуып, халыққа адал қызмет етіп, тек елдің алғысын алса, ата-ана да оның қуанышына марқайып отырады. Бүгінгі кейіпкеріміздің анасының сөзінен осыны ұқтық. Аудан орталығындағы №201 мектеп-лицейін тәмамдап, кейіннен Қызылорда медициналық колледжінде мамандығы бойынша білім алған Айжан Бостанқызы алғашқы еңбек жолын аудандық емхананың жалпы тәжірибелік медбикесі болып бастаған. 2021 жылдан бері емханада егу медбикесінің міндетін атқарады.&nbsp;– Несін жасырайын, медицина саласына аяқасты келе салмадым. Ақхалатты абзал жан атану бала күнгі арманым болатын. Мамандық таңдауда қателеспеу керек дегендей, мен өмір бойы жасайтын жұмысымды таңдауда өзімнің қарым-қабілетіме, ынта-жігеріме сендім. Емханада қызмет ету, алдыңа келген әрбір науқастың саған қарап-ақ жүзіне күлкі үйірілуі міне, біздің «абзал жан» атына лайықты болғанымыздың дәлелі деп білемін. Көптеген үлкен кісілер алғысын айтып, батасын беріп жатады. Бұл мен үшін ең үлкен жетістік деп есептеймін, – дейді кейіпкеріміз.&nbsp;Өз қызметі жайында бір-ақ ауыз сөзбен жауап қатқан Айжан өзінің нағыз маман екенін сөзбен емес, іспен дәлелдейтінін де байқадық. Қиын болсын, қызықты болсын барлығына шыдамдылықпен қарауға дайынмын деген Айжан Кенбаева азын-аулақ әңгімеден соң жұмысына кірісіп кетті.&nbsp;Дұрыс қой, есік алдына адамды үйіріп қойып, жайбарақат әңгімелесіп отыру ақхалатты абзал жандарға тән емес. Біз де мұнан әрі Айжанға қолбайлау болмай, жұмысын сырттай бақылап көрдік. «мейірбике деген аты айтып тұрғандай, дәл осындай жүзі жылы, мейірімді болмаушы ма еді» деп іштей кейіпкеріміздің тыңғылықты ісіне, нәзік болмысына қайран қалдық. Расымен дертке дауа, емге шипа бере алатын тек осы ақхалатты абзал жандар ғана. Біздің ең қымбат байлығымыз – өміріміз осы сала қызметкерлерінің кәсібиліктеріне байланысты. Сондықтан да бұл сала иелеріне үлкен жауапкершілік жүктеледі. Олардың көмегімен ауруымыздан айығып, ертеңімізге үмітпен қараймыз. Алдына барған әр науқасқа ерекше мейіріммен қарап, жылы сөзімен көңіліңді көтеріп, өмірге деген құлшынысыңды арттыратын да осы асыл маман иелері. Жалағаш аудандық емханасындағы Айжан сынды білікті мамандар ендігі жерде халықтың денсаулығын жақсарту жолында аянбай еңбек ете береді деп сенеміз.

Тұрғындар алғысын алған жалағаштық абзал жан

<a href="https://kyzylorda-news.kz/">Kyzylorda-news.kz.</a>&nbsp; Басқарма басшысының 2023 жылғы 17 шілдедегі бұйрығына сәйкес Баймаханов Дастан Бахытұлы Қызылорда облыстық экономика және қаржы басқармасы басшысының орынбасары лауазымына тағайындалды.Баймаханов Дастан Бахытұлы 1981 жылы Қызылорда қаласында дүниеге келген. 2002 жылы Тұрар Рысқұлов атындағы Қазақ экономикалық университетін «Қаржы және несие» мамандығы бойынша бітірген.Еңбек жолын 2002-2009 жылдары Қызылорда облысы бойынша салық департаментінің жетекші маманы болып бастаған.-2009-2013 жылдары Қызылорда қаласы бойынша салық басқармасының бас маманы, бөлім бастығы;-2013-2017 жылдары Қызылорда облысы бойынша Мемлекеттік кірістер департаментінің Жалағаш ауданы бойынша мемлекеттік кірістер басқармасы басшысының орынбасары;-2017-2022 жылдар аралығында Қызылорда облысы бойынша Мемлекеттік кірістер департаментінде бас маман;-2022 жылдың 20 қазанынан бастап 2023 жылдың 1 шілдесіне дейін Қызылорда облысының мемлекеттік сатып алу басқармасы басшысының орынбасары болған.

Басқарма басшысының орынбасары тағайындалды

<a href="https://kyzylorda-news.kz/ru">Kyzylorda-news.</a> Спорт – ұлт саулығының кепілі. «Шынықсаң – шымыр боласың» демекші, дене жаттығуы адам баласына қашан да пайдалы. Күні бойы өзіңді сергек сезініп жүрудің де бір тәсілі – спорт. Ғалымдар зерттеуіне сүйенер болсақ, спорт адамды шат-шадыман өмір сүруге де жетелейді екен. Көпшілікті ұлты мен жеріне, тілі мен дініне бөлмей өзіне ынтызар ететін спорттың құдіреті қашанда жоғары.Осы тұста аудандық қоғамдық даму бөлімінің тапсырысы аясында «Темірқазық» қоғамдық бірлестігі, аудандық мәдениет және спорт бөлімі мен «Наркескен» спорт клубы және аудандық жастар ресурстық орталығының ұйымдастыруымен Жалағаш ауданына қарасты ауыл жастарына бағытталған аймақтық спорттық сайыс ұйымдастырылды.&nbsp; Ауыл жастары арасында салауатты өмір салтын насихаттап, ауыл жастарының уақытын тиімді әрі пайдалы өткізуге, сондай-ақ достық қарым-қатынас орнату мақсатында ұйымдастырылған жарыс 3 күнге созылып, әртүрлі спорттық сайыс бойынша бақ сынасты.&nbsp;Аталған спорттық шараның алғашқы күні Таң ауылынан бастау алды. Шараға аудандық «Наркескен» спорт клубы директорының орынбасары Нұрхан Исламов пен Ерхан Бертаев және аудандық жастар ресурстық орталығының директоры Нұржан Амандық қатысты. Шара барысында Нұржан Райсұлы өткізіліп жатқан сайыстың маңыздылығына тоқталып, қатысушыларға сәттілік тіледі. Мұнда өткен жарысқа Таң, М.Шәменов, Ақсу, Қаракеткен мен Далдабай елді мекенінің жастары қатысты.&nbsp;Спорттық шара қатысушылар арасында бұқаралық спортты дамытып, өскелең ұрпақтың спортқа, оның ішінде футболға деген қызығушылығын арттыру мақсатында шағын футболдан және әр адамның білек күші мен топтаса әрекет етуіне қарай ептілік пен төзімділікті талап ететін командалық күшті біріктіретін, қазақтың ұлттың ойындарының бірі арқан тартыстан және турникке тартылудан тұрды. &nbsp; &nbsp;Ойын барысында ала допты жанына серік еткен спортшылар өзінің шеберліктерін көрсетіп, ерекше ептілігі мен өзгеше ойын өрнегін көрсеткен командалар жеңіс тұғырынан көрінді. Атап айтқанда, &nbsp;жалпы командалық есеп бойынша ІІІ орынды Қаракеткен ауылы, ІІ орынды Таң ауылы, жүлделі І орынды Ақсу ауылының спортшылары иеленді.Сайыстың 2-ші күні Мырзабай ахун ауылында жалғасын тапты. Жарысқа «Темірқазық» қоғамдық бірлестігінің төрағасы Ербатыр Исатай қатысып, шараны ашып берді. Мырзабай ахун ауылында Мәдениет, Т.Жүргенов, Жаңаталап, Мырзабай ахун ауылдарының спорт әуесқойлары арасында сайыс тартысты өтті. Барлық сайыс түрінен сүрінбей өтіп, спорттық шеберліктерін көрсете білген спорт¬шылар кіл мықтыны анықтады. Командалық есеп бойынша ІІІ орынды Т.Жүргенов ауылы, ІІ орынды Мәдениет ауылы, І орынды Мырзабай ахун ауылының жас спорт¬шылары иеленді.&nbsp;Сайыс Еңбек ауылында қорытындыланды. Спорттық шараға Еңбек ауылдық округі әкімі аппаратының бас маманы Бексұлтан Тоқсанбаев қатысып, жастар арасында салауатты өмір салтын қалыптастыру қазіргі уақытта ең көкейкесті мәселелердің бірі екенін, спорттық шараның ауыл жастарына тигізер пайдасы мол екенін айтып, бақ сынайтын спортшыларға ақ тілегін жаудырды.Бұл ауылда өткен жарысқа Бұқарбай батыр, Аққұм, Еңбек, Есет батыр, Жаңадария ауылдарының жастары қатысты.&nbsp; Жылдамдық пен табандылықты, күштілік пен ептілікті талап ететін дүбірлі додада командалық есеп бойынша ІІІ орынды Еңбек ауылы, ІІ орынды Бұқарбай батыр ауылы, І орынды Аққұм ауылы иеленіп, топ жарды.3 күнге созылған тартысқа толы сайыстың соңғы күні «Наркескен» спорт клубы директорының орынбасары Ерхан Бертаев пен Нұрхан Исламов аудан көлемінде спорт саласын дамыту мақсатында жоспарлы жұмыстардың жүйелі түрде жүзеге асып жатқанын тілге тиек етіп, бүгінде ауданда жастарға салауатты өмір салтын насихаттап, бұқаралық спортты дамыту барысында атқарылып жатқан жұмыстар аз емес екенін айтып, спорттың қай түрі болсын ауданның сайыпқыран спортшылары жүлделі орындардан көрініп жүргенін жеткізді. Кіл мықтының басын қосқан аймақтық сайыста бар ынта-жігерімен жеңіске деген құлшыныстарын байқаған төрешілер жеңімпаздарды қоғамдық бірлестіктің кубок, медаль, дипломдарымен марапаттап, бағалы сыйлықтарын табыстады

Жалағашта жастар арасында  спорттық сайыс ұйымдастырылды

<a href="https://kyzylorda-news.kz/">Kyzylorda-news.kz.</a> Жалағаш ауданы бойынша жастар саясатының жүзеге асырылуы қарқынды жүргізілуде. Статистикалық мәліметтерге сәйкес Жалағаш ауданында 14 пен 35 жас аралығында 10 966 жас тіркелген.Жалағаш ауданындағы мемлекеттік жастар саясатын қаржыландыруға жергілікті бюджеттен 18 млн.теңге және жастарды дамыту мен қолдауға мемлекеттік әлеуметтік тапсырыс шеңберінде 3 жобаны жүзеге асыруға жергілікті бюджеттен 4,2 млн.теңге қаржы бөлінді.Ауқымды жобалардың басым көбі ауыл жастарына бағытталған. Оң бастамалардың бірі ү.ж 13-15 шілде аралығында Мырзабай ахун, Еңбек, Таң ауылдық округтерінде 3 спорт түрінен ауыл жастарына арналған аймақтық сайыс өтті.Сайыс мақсаты - ауыл жастары арасында салауатты өмір салтын насихаттау, достық қарым-қатынас орнату.Сайыс 3 кезең бойынша (шағын футбол, турникке тартылу, арқан тарту) өтті. 13 шілде күні Таң ауылында өткен сайысқа Таң, М.Шаменов, Ақсу, Қаракеткен ауылдарының және Далдабай елді мекенінің жастары қатысып, жалпы командалық есепте ІІІ орынды Қаракеткен ауылы, ІІ орынды Таң ауылы, І орынды Ақсу ауылы иеленді.14 шілде күні Мырзабай ахун ауылында өткен сайысқа Мырзабай ахун, Мәдениет, Мақпалкөл, Жаңаталап, Аққыр ауылдары қатысып, жалпы командалық есепте ІІІ орынды Т.Жүргенов ауылы, ІІ орынды Мәдениет ауылы, І орынды Мырзабай ахун ауылы иеленді.15 шілде күні Еңбек ауылында өткен сайысқа Бұқарбай батыр, Еңбек, Аққұм, Есет батыр, Жаңадария ауылдары қатысып, жалпы командалық есепте ІІІ орынды Еңбек ауылы, ІІ орынды Бұқарбай батыр ауылы, І орынды Аққұм ауылы иеленді.Сайыс жеңімпаздары қоғамдық бірлестіктің кубок, медаль, дипломдарымен және бағалы сыйлықтарымен марапатталды.2023 жылдың маусым айына дейін жастар ресурстық орталығының ұйымдастыруымен 80 шара өткізіліп, оған 3500- ға жуық жас қатыстырылған.Алдағы уақытта да жастардың бос уақытын тиімді ұйымдастыруға арналған түрлі бағыттағы шаралар жалғасын табатын болады.

Ауыл жастарына арналған аймақтық сайыс мәресіне жетті

<a href="https://kyzylorda-news.kz/">Kyzylorda-news.kz.</a>&nbsp; Тереңөзек кентінің әкімі Бахтияров Ержан Бахтиярұлы 13 шілде күні «Адал көмек» жобасы аясында жеке және заңды тұлғаларға жеке қабылдау &nbsp;өткізді. Жоба барысында азаматтардың құқықтық сауаттылығын арттыру, сонымен қатар өмірлік маңызды мәселерді шешу үшін халықтың әлеуметтік әлсіз топтарына құқықтық көмектер көрсетіліп, кеңестер берілді."Адал көмек" жобасының мақсаты азаматтардың құқықтық сауаттылығын арттыру, сондай-ақ халықтың әлеуметтік осал топтарына өмірлік маңызды мәселелерді шешуде заң көмегін көрсету болып табылады. «Біздің жоба бастапқыда әлеуметтік осал топтарға арналған еді. Бірақ біздің жобаға тек қана осал топтар емес, әртүрлі адамдар хабарласып, кеңес алып жатыр. Түпкі негізгі мақсатымыз – осал топтарға көмектесу. Бірақ менің түсігінімше, заңда осал деп танылған тұлғаларға ғана емес, қиын жағдайға тап болған барлық адамға көмек берілуі қажет» дейді жоба жетекшісі жобаның мақсатын түсіндіріп.Аталған жоба аясында жұмыстар бідің ауданда да атқарылып келеді. Кент әкімінің қабылдауында тұрғындар өз сұрақтарына жауап тауып, емін еркін сұхбат құра алды. Сондай-ақ көкейдегі мәселелерін жеткізіп, тиісті жауап ала алды.«Толғандырған мәселені айтып, көкейдегі сұраққа жауап таптық. Халыққа жасалған қолдау, жоба аясында өткен жеке қабылдау көпшілікке ұтымды болды» дейді кент тұрғыны.

«Адал көмек» жобасы аясында құқықтық көмек көрсетілді

<a href="https://kyzylorda-news.kz/">Kyzylorda-news.kz.</a> Қазалы ауданына қарасты ауылдардың бүгінгі ахуалы көңіл қуантарлықтай. Жылдан-жылға келбеті келісіп, ажары арта түсуде. Қазіргі таңда өзіндік тұрмыс-тіршілігі және мәдениетімен ерекшеленетін ауылдар қатары да қалың. Соларыдң бірі – аудан орталығы Әйтеке би кентінен 5 шақырым жерде орналасқан, шаруасы шалқыған, көрікті, инфрақұрылымы жоғары деңгейдегі, заман талабына сай салынған, тірлігі тындырымды Ғ.Мұратбаев ауылдық округі.Округте – 1561 тұрғын, 282 – отбасы мекендейді. Ауылдың аты аталғанда құлаққа жағымды әндер, есімізге елеулі тұлғалар келеді. Бұлай дейтініміз дәл осы ауылдан бір кездері Қазақстанның халық қаhарманы, әнші Роза Бағланова, Қазақстанның Халық әртісі әнші Мадина Ералиева, Социалистік Еңбек Ер Көлжан Оразалиева мен төрт Қазақ ССР депутаты және 2 мемлекеттік сыйлықтың лауреатын иеленген бетке ұстар азамат-азаматшалар түлеген. Ауыл тұрғындарын білім нәрімен сусындатып тұрған 320 орындық орта мектеп пен бала-балғындарға 90 орындық балабақша үздіксіз қызмет етіп тұр. Одан бөлек дерті дендеген жандарға 4 адамға арналған күндізгі емдеу бөлімі бар дәрігерлік амбулаториясы және мұратбайлықтардың зейінін ашуға 21 619 кітап қоры бар жинақталған кітапхана да бар. Сонымен қатар кез келген іс-шара мен ауылдың мерейлі күндерінде күміс көмей әншілері бұлбұлдай сайрайтын ауылдық мәдениет үйі, қасиет қонған «Қуандық әулие» мешітінің есігі құдайға құлшылық етушілерге әрдайым ашық.Мұндағылардың көбісі мал шаруашылығына басымдылық берген. Сондықтан төрт түлігін сай ұстағандар үшін де ветеринариялық пункт жұмыс жасап, ауылда бес сауда дүкені және пошта байланыс бөлімшесі қызмет көрсетеді.Кәсіпкерлік көкжиегі кеңейгенАуыл кәсіпкерлерінің белсенділігін процентпен құрап айтар болсақ, онда ауыл тұрғындарының белсенділігі 97%-ті құрайды екен. Нақтырақ айтсақ, Ғ.Мұратбаев ауылдық округінде – 54 шаруа қожалығы, 1– жауапкершілігі шектеулі серіктестігі, 1 – «Жас Ғани» өндірістік кооперативі &nbsp;мен 70 жеке кәсіпкер және барлығы 126 шағын және орта бизнес субьектілері бар. 2022 жылдың 1 қаңтарынан бастап 23 ауыл тұрғыны шағын кәсіпкерлікке тіркеліп, оның ішінде 23 түрлі кәсіп ашып, бүгінде өз нәпақаларын тауып, жұмыстары жүйелі жүруде. Мұнда аудан орталығына қатынау мәселесі де қарастырылған. Дәлірек айтсақ, билет құны тоқсан теңге тұратын кіші сыйымдылықтағы қоғамдық көлік арқылы ауылдық округке күніге 11 рет қатынайды. Сонымен қатар бес жеңіл автокөлік иелері патент арқылы жолаушылар тасымалымен айналысады.Басқа да ауылға қатысты атқарылған жұмыстармен ауыл әкімі Абай Рыстығұлов бөлісе кетті.<blockquote>«2021 – 2025 жылдарға арналған кәсіпкерлікті дамыту жөніндегі &nbsp;ұлттық жоба» аясында округ бойыншабарлығы 359,159 миллион теңге несие қаражат алынды. «Бизнес-Кеңесші» жобалары аясында оқыту курстарына кәсіпкерлерді тарту – 2022 жылы«Бастау-Бизнес» жобасы бойынша 27 адам оқып сертификат алды. Сонымен қатар бүгінгі күнге 21 адам тұрақты жұмысқа орналасса, ақылы қоғамдық жұмысқа 23 адам қабылданды.Сонымен қатар 1 адам «Жасыл ел» бағдарламасы бойынша және5 жас маман жастар тәжірибесі бойынша жұмыс жасауда. Азық-түлік қауіпсіздігін қамтамассыз ету мақсатында ауыл тұрғындарына, «Ақарық», «Дәуқазған» каналдары бойынан &nbsp;20 гектар жер бөлініп, бау-бақша дақылдары егілді. Сонымен қоса бұл ауылда мал шаруашылығы да шалқыған. Округ бойынша 2350 бас мүйізді ірі қара, 1970 бас қой, 1630 бас ешкі, 1970 бас жылқы, 252 бас түйе бар. Барлық мал басы бірдейлендіріліп, базаға енгізіліп, сырғаланды. Округте мал басы көбейіп, ауыл тұрғындары малдарын сырғалап, тіркеуге алуда. Малдарды асылдандыру мақсатында бүгінгі күнге 5 бас асыл тұқымда бұқа алынды және алдағы уақытта 4 бас асыл тұқымды бұқа алу жоспарда бар. Мал ауруларының алдын-алу шаралары бойынша 12 түрлі аса қауіпті жұқпалы ауруларға қарсы ветеринариялық – профилактикалық шаралар атқарылып, 3 түрлі ауруға қарсы диагностикалық тексерулер жүргізілді. Конго-Қырым қызбасының алдын алу мақсатында 2 маусым ауыл ішіндегі 165 қора мен сондағы төрт түлікті улау жұмыстары жүргізілді, – ауыл әкімі.</blockquote>Ауыл тынысы хақындаАуылдың оқу ордасын 2021-2022 оқу жылында жалпы саны он төрт оқушы сәтті тәмамдап шыққан. Оның ішінде Ұлттық Бірыңғай Тестілеуге он екі оқушы қатысып, жетеуі «Үздік аттестат» иегері атанды. Басқа да ҰБТ-ға қатыспаған екі оқушы арнаулы орта оқу орынына түскен.Ал №15 «Балдәурен» бөбекжай-балабақшасында 90 бала тәрбиеленіп, ауыл балғындарына 13 педагог-тәрбиеші тәлім тәрбие береді. Балабақша тәрбиешілері оқу тәрбие жұмыстарына қазіргі заманғы әдістемелер мен технологияларды жүйелі түрде қолданып келеді. Сонымен қатар тұрғындар үшін дәрігерлік амбулаторияда бір жедел жәрдем автокөлігімен қамтамасыз етілген және төрт адамға арналған күндізгі емдеу бөлімі жұмыс жасайды. Күндізгі емдеу бөлімінде бүгінгі күнде 83 адам дертіне шипа тауып, ем қабылдаған. Ал флюрографиялық тексеруден 710 адам өткізіліп, 40 сәби дүниеге келсе 7 адам дүниеден өткен. Ауыл бойынша халық саны жыл санып артып келеді.Мұнда әрбір мерейлі де, мерекелі күндер ескерусіз қалмайды. Яғни, жергілікті мәдениет үйінің демеуімен атап өтіледі. Сонымен қатар жоспарланған іс-шаралардың барлығы ауыл тұрғындарының қатысуымен өткізіліп келеді. Ағымдағы жылда түрлі мазмұндағы 41 мәдени іс-шара ұйымдастырылып өткізілген.Ал қысқы дайындық пен жылу жайына келер болсақ, Ғ.Мұратбаев ауылдық мәдениет Үйі газ желісіне қосылып, қазіргі таңда өнер үйінің мамандары игілігін көруде. Алдағы уақытта мектеп, балабақша және дәрігерлік амбулаторияны газ желісіне қосу үшін ұсыныстар берілді.Ауылда ауыз су мәселесі де шешімін тапқан. Нақтырақ айтсақ, «Арал – Сарбұлақ» топтық су құбыры арқылы қамтамассыз етіліп, тәулік бойы 160 текше метр ауыз су берілуде. Аяқ су мәселесі толығымен шешілген.<blockquote>«Ауылға 4G жылдамдықтағы биіктігі 18 метр болатын билайн антенасы орнатылды. Ал автомобиль жолдарына келер болсақ, Ғ.Мұратбаев ауылдық округі бойынша 17 көше бар. Ұзынды 11, 180 шақырымды құрайтын оның 13 көшесіне асфальт жүргізілген. Сонымен бірге алдағы 2023 жылға «Әйтеке би – Ғ.Мұратбаев» тас жолы және ауыл ішіндегі Қуандық әулие көшесі қаржыландырылып, алдағы уақытта асфальтталатын болады. Сонымен қатар Ж.Жабаев, Ақтан батыр, Қ.Наурызбаев, С.Сейфуллин, көшелрге орташа жөндеу жұмыстарын жүргізіу үшін «Қазалы ауданының тұрғын үй коммуналдық шаруашылығы, жолаушылар көлігі және автомобиль жолдары бөлімі» арқылы «Ауыл – Ел бесігі» бағдарламасына енгізіліп қаржыландыру кезегінде тұр. &nbsp;Спорттық жарыстарда мектебіміздің дене шынықтыру пәнінің, мұғалімдердің жетістіктері жетерлік. Гандбол және тоғызқұмалақтан мектебіміздің оқушылары аудандық, облыстық, республикалық, халықаралық &nbsp;жарыстардың жүлделі орныдарын иеленді. &nbsp;Ауылымыздың мақтанышы Ақберен Бақытберген қазақтың ұлттық ойыны – тоғызқұмалақтан V Азия чемпионатында күміс медальға қол жеткізді. &nbsp;Осыған орай ауыл спортын одан әрі дамыту мақсатында соңғы үлгідегі спорт кешенін салу үшін жоба – сметалық құжаттары әзірленіп сараптамадан өткізілуде. Ауылдық округтен жер алу мақсатында &nbsp;тұрғындардан өтініш көптеп түсуіне байланысты, ауылға жаңадан 3 көшеге инфрақұрылым тарту үшін жоба – сметалық құжаттары әзірленіп сараптамадан өткізілуде. Соңғы жылдары ауылдық округ бойынша бала туу көрсткіші жоғары деңгейде (45-50 бала) соған сәйке &nbsp;Ғ.Мұратбаев атындағы №91 орта мектепте бала санының өсуіне байланысты кабинет саны жетіспеуде осыған байланысты мектеп жанына қосымша құрылыс салу үшін ұсыныс берілді. Кәсіпкерлік мақсатта мал бордақылау үшін өтініш білдерген азаматтарға ауылдың батыс беткейінен аудан әкімінің қаулысына сәйкес 20 гектар жер учаскесі бекітіліп, қазіргі таңда 4 өтініш түсіп, құжаттары жер қатынастары бөлімінде конкурсқа ұсынылды», – дейді Ғ.Мұратбаев ауылдық округінің әкімі Абай Рыстығұлов.</blockquote>

Қазалы: Тірлігі тындырымды ауыл

<a href="https://kyzylorda-news.kz/">Kyzylorda-news.kz.</a> Су – тіршілік көзі. Ал адамзат пен табиғат тіршілігіне нәр беретін суды реттейтін арнайы мамандар бар. Ол - су шаруашылығы қызметкерлері. 9 шілде аталған сала мамандарының мерекесі. Атаулы күн біздің елде 2019 жылдан бастап күнтізбеге еніп, аталып өтіп келеді.&nbsp;Кәсіби мерекеге орай аудан әкімдігінің мәжіліс залында аудан әкімі Мұхтар Оразбаев сала мамандарын мерекелерімен құттықтап, ізгі лебізін білдірді.&nbsp;<blockquote>«Өздеріңізге белгілі, Сыр елінің негізгі тіршілік көзі – Сырдария өзенінің суы. Жүздеген жылдар бойы диқан қауымы дариядан тартқан тіршілік нәрімен егінін егіп, тіршілігін жасап келеді. Десек те, қазіргі күні су мәселесі көңіл көншітерліктей емес. Оны барлығыңыз жақсы білесіздер. Қазіргідей су тапшылығы кезінде сала мамандарының білімі мен тәжірибесі ауадай қажет. Қыстың қаһарлы аязы мен шілденің шіліңгір ыстығына қарамастан сушылар қауымы өз міндеттерін бұлжытпай атқарып келеді. Сондықтан да Сіздердің жауапкершілікпен атқарған қызметтеріңіз үшін алғысымды айтамын. Мереке қарсаңында барша сала қызметкерлеріне зор денсаулық, шаңырақтарына береке, жұмыстарына табыс тілеймін», – деді аудан басшысы.&nbsp;</blockquote>Мұнан соң мерекеге сәйкес бірқатар азаматтар марапат төрінен көрінді. Атап айтар болсақ, аудан әкімінің, ҚР Экология және табиғи ресурстар министрлігінің су рестустар комитеті төрағасының, облыс әкімінің және облыс әкімі орынбасарының «Алғыс хатымен» марапатталды.&nbsp;Одан бөлек, Халықаралық Аралды құтқару қорының ҚР-дағы атқарушы дирекциясының «Арал теңізін құтқаруға қосқан үлесі үшін» төсбелгісі Байназар Ерқусаевқа және ауыл шаруашылығы қызметкерлерінің салалық кәсіптік одағының ІІІ дәрежелі «Еңбек даңқы» төсбелгісі Жайберген Кенжалиевке табысталды.&nbsp;Мерекелік шарада Қызылорда облысының құрметті азаматы Самұрат Имандосов та сөз сөйлеп, сала қызметкерлерін мерекемен құттықтады.

Қазалыда су шаруашылығы қызметкерлеріне құрмет көрсетілді

Жуырда Қазалы ауданының мәдениет және спорт бөлімінің қолдауымен және Өркендеу ауылдық округі әкімі аппаратының «Өркендеу ауылдық клубы» мемлекеттік коммуналдық қазыналық кәсіпорнының ұйымдастыруыменөзінің өткір, әділ шешімімен қарақылды қақ жарған белгілі би, ел билеген Сырлыбай хан Шабақұлының туғанына 205 жыл толуына орай «Сырда туған Сырлыбай хан» атты балалар шығармашылығына арналған 13 жас пен 17 жас аралығындағы аудандық термешілер байқау өтті.Байқаудың ұйымдастырушылардың мақсаты – Сыр бойы қазақтары мен Хиуа, Қоқан хандықтарына белгілі би, әділдігі мен қайраткерлігінің арқасында үлкен бедел иесі бола білген Сырлыбай Шабақұлын еске алу мақсатында, жыр-терме арқылы жас ұрпаққа дәріптеу болып табылады.Төл өнерді ұлықтаған сайыста ауылдық клуб әдіскері және ауылдық жастар ұйымының төрағасы Мурзалиев Талап Алтынбекұлы ашып, Сырлыбай ханның өмір жолы мен шығармашылғына қысқаша тоқталып өтті.&nbsp;Әрі қарай ел ағасы, Жанкент ауылының дамуына сүбелі үлес қосқан Үргенішбай Нәби Мәлиұлы мен ауыл ақсақалыКөмекбай Бөлекбаев алғы сөз сөйлеп,жас өрендерге сәттілік тіледі. Байқауда бақ сынауғаауылдық мәдениет үйі мен клубтардан 4 ауылдық округтен,Әйтеке би кенті мен Қазалы қалалық мәдениет Үйінен барлығы 13 талапкер қатысып, IIкезең бойынша өнерлерін сарапқа салды.&nbsp;Аталған өнер додасындаӘйтеке би кенттік мәдениет ҮйіМКҚК-ның директоры Сүлейменов Нұрлыбек Байқараұлы менжыршы-термеші Ердаулетов Кеңес Болатбекұлы және Өркендеу ауылдық округі әкімінің аппараты коммуналдық мемлекеттік мекемесінің бас маманы Ілияс Айткүл Нұртуғанқызы қазылық етті.Қазылар алқасы жас өнерпаздардың сахна мәдениетін игеруі мен орындаған жыр-термесін тыңдап, сонымен қатар шеберліктеріне, киіміне үлгісіне жіті мән беріліп, әділ бағасын қойды.Тартысты өткен өнер додасында әділ-қазылар шешімі бойынша көпті басып озғанӘйтеке би кенті «Адиля» өнер орталығының өнерпазыАйдын Мырзабай бас байқаудың жүлдесін жеңіп алды. Ал жүлделі I орындыЖанкент ауылының өнерпазыӨркен Қойшыбай иемденсе,II орынды Қазалы қалалық мәдениет Үйінің өнерпазыМеруерт Таңсықбайжәне III орынды Қожабақыауылының өнерпазыЫқпалЕлтай мен «Қорқыт Ата» атындағы музыка мектебінің өнерпазыАлдияр Өтептерөзара бөлісті.Онан соң өнерімен көрермендер жүрегінен орын алған қатысушылар түрлі номинациялар бойынша марапатталды. Нақытрақ айтсақ, Жанкент ауылының өнерпазыЖарасхан Қашқынбай«Дарынды», «Талапты» номинациясынҒани Мұратбаев ауылының өнерпазыТөремұратТемір иеленді.&nbsp;Сондай-ақ БақтиярЖақсыгелдиев, Алтынбекқызы Айзат, Ертуған Ерзат, Ерқосаева Нұрай, Шаңғытбай Ерназ, Жеткерген Зейнеп сынды басқа да қатысушы өнерпаздарғааудандық балалар шығармашылығына арналған термешілер байқауыныңдипломы және бағалы сыйлықтар табысталды.&nbsp;<blockquote>«Қазақ ұлтының өзіне ғана тән бірнеше сөз арнау дәстүрі бар. Толғау мен терме соның бір көрінісі. Халқымыз ықылым заманнан келешек тағдырына алаңдаушылық білдіргені тарихтан мәлім. Келешек тағдыры дегенде елін, жерін, ұрпақ тәрбиесін, тілін, дінін айтып отырмыз. Осы қасиеттердің ұрпақ санасына сіңіріп, атадан балаға мирас қылып қалдыру дәстүрге айналған. Осы мақсатта терең мәнді терме өмірге келген. Ата-бабадан жеткен өнердің бүгінгі күнге дейін жетіп, тіпті жастар арасында өзіндік танымалдылығына, сүйіспеншілігіне ие болуы көз қуантады. Жалпы ауданда жыр-терме өнерін дамыту мақсатында осы тектес көптеген байқаулар ұйымдастырылып тұрады. Ұлттық өнеріміз осылай ұлықтап жүрейік, санамыздан, бастысы жүрегімізден өшпесін дегім келеді», – дейді Жанкент ауылдық клуб әдіскері және ауылдық жастар ұйымының төрағасы Талап Алтынбекұлы.</blockquote>

Баба есімі һәм ұлттық өнер ұлықталды

<a href="https://kyzylorda-news.kz/">Kyzylorda-news.kz.</a> Ағымдағы жылдың 17-19 шілде күндері аралығында ауданда «Түнгі қаладағы балалар» жедел профилактикалық іс-шарасы аясында рейд жұмыстары өткізілетін болады.&nbsp;Мақсаты – аудан көлемінде жасөспірімдер арасындағы қылмысты ескерту және оның алдын алу, &nbsp;оның ішінде тәуліктің кешкі және түнгі уақытында кәмелетке толмағандардың арасындағы құқық бұзушылықтың жолын кесу, &nbsp;кәмелетке толмағандардың құқықтарын қорғау саласындағы әкімшілік құқық бұзушылықтарды анықтау, олардың құқықтық сауаттылықтарын арттыру, &nbsp; сондай-ақ балаларға қатысты қылмыстық қол сұғушылықтардың алдын алу. Кәмелетке толмағандардың жүріс-тұрыстарына бақылау жасау, заңды өкілдерінің қарауынсыз түнгі уақытта көшеде және ойын-сауық орындарында бей-берекетсіз жүретін жасөспірімдерді анықтау, қылмысқа бейім, тәртібі қиын балаларды полиция органдарының есебіне алу.&nbsp;«Түнгі &nbsp;қаладағы балалар» жедел профилактикалық шарасы жыл сайын дәстүрлі түрде өткізіліп келеді.&nbsp;Қазақстан Республикасының «Әкімшілік құқықбұзушылық туралы» Кодексіне сәйкес, кәмелеттік жасқа толмаған балаларға түнгі сағат 23:00-ден таңғы 6-ға дейін ата-анасының және оған құқы бар заңды өкілдердің қарауынсыз ойын-сауық мекемелерінде немесе үйден тыс жерлерде жүруге болмайды. Ол үшін ата-анасы әкімшілік жауапкершілікке тартылады.Аулаларда, саябақтарда, жастар көп жиналатын ойын-сауық орындарында рейдтік қадағалау жұмыстары кеңінен жүргізіледі. Сондықтан құрметті ата-аналар жасөспірім балаларды қадағалап отыруды үнемі естен шығармайық.

Қазақстан және Қызылорда облысының жаңалықтары