<a href="https://kyzylorda-news.kz/">Kyzylorda-news.kz.</a> Бір қолымен бесік, екінші қолымен әлемді тербеткен нәзік жандар қоғам дамуына бір кісідей атсалысып жүр. Нарық заманы – отбасымен қатар мансап жолын да қоса алып жүретін іскер әйел болуға талпынғандардың уақыты. Соқпағы мен тәуекелі көп кәсіптік ортада өз орнын еншілеп қана қоймай, табысқа кенелген әйелдер өзгелерге үлгі болары хақ. Шиелі аудандық Әйелдердің кеңесінің жоспары мен бастамасы жайлы аталған кеңестің төрайымы Нәйлә Палымбетовадан сұрап білдік.– Нәйлә Әбілқасымқызы, аудандық әйелдер кеңесі қоғамда маңызы бар үлкен ұйымға айналды. Әйелдер кеңесіне төрағалық ету өте жауапты екені кімге болса да ұғынықты. Белсенділерді біріктіріп, ұйытып ұстау қаншалықты қиын?– Көпшілік біледі, мен халықпен тығыз қарым-қатынас жасайтын салада қызмет етіп келемін. Мен басшылық еткен 25 жыл ішінде аудандық әйелдер кеңесі қанатын кеңге жайып үлгерді. Кеңесті құрудың басты мақсаты – кент әйелдерінің іскер ортадағы белсенділігін күшейту. Өзім де ана, әйел болғандықтан, аналар ісін қолға алып, қаншылықты қиын болса да жігерімді жасытпауды ұйғардым. Әрине, мен өзімді өзім сайлап алғаным жоқ. Осынау қоғамдық іске ауданның ұсынуы арқылы келдім. Иә, қоғамдық жұмыс болған соң, жүре тыңдалатын, дер кезінде орындалмай қалатын кезеңдер болып жатады. Ал ұйымдастыру, орындату, бірлікте ұстау үшін де әкімдер кеңесі төрайымының өзінің атқарған тірілігінде бірегейлік пен талапшылдық, отбасындағы өнеге үлгіде болуы тиіс. Сондықтан да басшы әйелдер төрайымдарына қарапайымдылық, сауаттылық, іскерлік қажет.&nbsp;– Әйелдер кеңесінің негізгі миссиясы мен ауданда атқарылып жатқан ілкімді істерге ойыссақ…– Ең алдымен адам өз жұмысына шын жанашыр болу керек. Сосын қазекеңде «жалғыздың үні шықпас» деген жақсы сөз бар. Бір адамның бастамасымен ешқандай шаруа біте салмайды. Ол үшін құрам мықты болу керек. Осындай мықты құрамның арқасында кеңесте осы күнге дейін қаншама ілкімді істер атқарылды. Аудан көлемінде, ауылдық деңгейлерде көптеген жұмыстар атқарылып келеді. Оның ішінде келіндер сайысы, қыздарға арналған «Қыз сыны» байқаулары, әжелерге «Әжелер ансамблі» және тағылым мен танымдық өсиет өркениеті жайлы түрлі іс-шаралар ұйымдастырылып отыр. Әйелдер кеңесінің құрамымен әрбір ауылда қыз-келіншектердің пікірін, жанұяның жағдайы мен тұрмысына байланысты барып пікір алысып, бағыт-бағдар беріп отырамыз. Әйелдер кеңесінің негізгі миссиясы тек іс-шарамен шектелмейді. Ағайын, достар, демеушілерді ұйымдастыра отырып тұрмысы төмен отбасыларыға көмек қолын созып, киім-кешек пен азық-түлікпен қамтамасыз етіп отыру.– Бүгінде өз-өзін белсенді санап, балағат сөздерімен әлемжеліде түрлі бейнежазбалар салып жүрген аналарға қандай шара көруге болады?– Иә, бұл бүгінгі күннің өзекті мәселесі. Менің ойымша, отбасыда әкенің рөлі төмен болса, осындай тәртіпсіздіктер белең алады. Қазақтың «тәйт» деген тыйым сөзі осы келеңсіздікті тыйяр еді. «Ұяда не көрсең, ұшқанда соны ілерсің» дегендей сол белсенді қыз-келіншектердің жанұясында әкенің рөлі өте төмен. Ал анасы ақылсыз болса, балаға ерік береді. «Шолақ белсенді» деген сөзді осындай қазіргі «блогер» атын жамылып жүрген әдептен озған «батыр аналарымыздан» байқап жүрміз. Заң бар, тәлім-тәрбие бар, бұл кері кеткен қыздарымызды бір санаға салатын. Қазіргі таңда әрбір белсенді өзінің жіберген қателіктерін мойындататындай заң күші бар. Одан аттағандардың орны айтпаса да, түсінікті. Біз әдепсіз осындай қылықтар басым болып, дау шыққан кезде ғана, «кімнен болды?» деген сұрақпен кінәні басқа біреулерден, басқа қоғамнан іздейміз. Адам ең бірінші кінәні өзінен іздеу керек.– Әйелдердің еңбекқорлығы, іскерлігі көп ер азаматтармен бір деңгейде көрініс тауып келеді? Осы тұста әйелдің кәсіпкерлікте алар орны қандай?– Үйде де, жұмыста да тыңбай еңбектеніп, қызметте көшбасшы, тамаша ұйымдастырушы қазақстандық әйелдер легі қалыптасып келеді. Бүгінде кәсіпкерліктегі әйелдердің үлесі 50 процент. Дейтұрғанмен, біздің кеңес ер-азаматтарды басып озу, мықты болуды көздеп отырған жоқ. Шығыс халқы ретінде қазақ әйелі тіпті мықты бақсарушы, табыскер болсын ер-азаматынан қашанда бір қадам төмен тұрады. Ол – табиғат, ол – дәстүр, ол – тәрбие. Бір сөзбен айтқанда әйелдер кеңесінің мақсаты – жүйелі сөзден – нақты іске.– Аудандық әйелдер кеңесінің кемшін тұсы бар ма? Не жетіспейді?Мінсіз ештеңе болмайды. «Көш жүре түзеледі» деген. Жасыруға болмас, кемшін тұстары да бар. Ауданда 80 мың халықтың 40 мыңы әйел азаматтар. Біздің берген, өткізген тәрбие шараларымыздың біреуге жетіп, біреуге жетпеуі мүмкін. Өйткені халық қазір көп жиынға жинала бермейді. Ал басқа түйткілдік хабарға тез жиналады. Қоғамдық негізде болған соң да, қолымыз көп нәрсеге қысқа болып жатыр. Марапаттау сый-кәде жасауға үнемі демеушілер табыла бермейді. Сосын да «Күлшелі бала сүймекке жақсы» дегендей қазіргі таңда бұл жағына да көп көңіл бөледі. Негізгі қоғамдағы небір өзгерістер мен қозғалыстар да әсер етеді. Еліктегіш халықпыз ол жағы да бар батысқа қарап «біз кімнен кембіз» деген шолақ ой кейбіреулерді шаршатады. Қоғамдық жұмыстың жүйелілігінде де ілгерілеушілік бар. Бірақ кім қалай қабылдайды? Ұлттық салт-дәстүрімізді ұрпаққа дарытып тәрбиелеуге жете мән бермей кетеміз. Мысалы, оюланған камзолды тек наурыз мерекесінде ғана кию керек сияқты. Оны дамытуда да ықпал аз. Сондықтан да әрбір ауылдың &nbsp;әйелдер кеңесі төрайымы жұмысты жүйелі жүргізуі қажет.– Нәйлә ханым, әйел ең біріншіден – ана. Осы бағытта көмекке мұқтаж жандарға, балаларға кеңестің ықпалымен қандай қайырымдылық шаралары жасалып жатыр?– Әйелдер кеңесі қайырымдылық шараларды тұрақты түрде өткізеді. Қаржылай көмек беріп, қайырымдылық жәрмеңкелерін өткізіп тұрамыз. Сондай-ақ ауылдағы қыз-келіншектердің бизнес ашуына жәрдемдесіп қана қоймай, барынша қолдау көрсетуге тырысамыз. «Бөрі аштығын білдірмес, сыртқы қарнын томпайтар» дегендей ауылда, жанұяда болып жатқан қиындықты сол елдің ардақты аналарына, ақсақалдарына жүгінсе, шикілік сыртқа шықпас еді. Бұрын мешіт жоқ, ақсақалдар өздерінің деңгейінен төмен, ішімдікке құмар деген сөздерді еститін едік. Ал қазір бәрі бар. Әрбір ауылда имамы бар, сол елдің мұң-мұқтажына қамқорлық жасайтын үлкендер бар. Неге ол кісілерден аттап, орталыққа ақ үйдің есігінен аттаймыз. Міне, әке сыйлап, ана қадірлеген жастардың небір ой жетекке ерік беретін тұсы осы деп ойлаймын.– Әңгімеңізге рақмет.

Нәйлә Палымбетова: Әйел – қоғам тірегі

<a href="https://kyzylorda-news.kz/">Kyzylorda-news.kz.</a> Көкшоқы мөлтек ауданындағы спорт комплексте Шиелі ауданының 95 жылдығына орай футболдан жасөспірімдер арасында турнир басталды.Турнирдің ашылу салтанатына аудандық мәдениет және спорт бөлімінің басшысы Аруна Өркенқызы, аудандық ішкі саясат бөлімінің басшысы Кенжехан Есенбаев және бұқаралық ақпарат құралдары өкілдері қатысты.Шара барысында аудан әкімінің орынбасары Алмат Алдабергенов сөз сөйлеп, турнирге қатысушы жасөспірімдерді спартакиаданың ашылуы салтанатымен құттықтады.<blockquote>– Жас ұрпақты спортқа баулу, салауатты өмір салтын ұстануына жағдай жасау Мемлекетіміз үшін қашан да маңызды бағыттардың бірі саналады. Себебі, спорт адамды төзімділікке, табандылыққа үйрететін үлкен өмір мектебі секілді. Сондықтан Баршаңызды салауатты өмір салтын ұстанып, спортпен тұрақты шұғылдануға шақырамын. Біз өз тарапымыздан Сіздерге қажетті барлық жағдайды жасайтын боламыз. Атап айтар болсам, жуырда Шиелі кентінен дене-шынықтыру сауықтыру кешені ашылмақ. Аталған кешеннің ашылуы аудандағы бұқаралық спорттың дамуына тың серпіліс береді деген ойдамын, – деді &nbsp;Алмат Алдабергенов.</blockquote>Аталған турнирге кент және ауылдық округтерден арнайы 7 команда жасақталып, өзара сынға түсіп, бақ сынамақ. Сонымен бірге, турнирге қатысушы спортшылар намысты қолдан бермей, ойынды қыздыра түсуде.

Шиелі ауданының 95 жылдығына орай футболдан жасөспірімдер арасында турнир өтті

<a href="https://kyzylorda-news.kz/">Kyzylorda-news.kz.</a> Соңғы жылдары Шиелінің ажары кіріп, инфрақұрылымы күн өткен сайын жақсарып келеді. Әсіресе, кент көшелерінің жылдар бойы жөндеу көрмеген шұрық-тесік жолдары асфальтталып, көше шамдары түнде самаладай жарқырап тұрады. Елде мекендерге су, газ тартылып, балалардың заманауи ойын алаңқайлары мен футбол алаңдары да жаңарған.Шиелі ауданында орын алып жатқан оң өзгерістерді жергілікті тұрғындар да қуанышпен құптап, жыр қылып айтуда. Мәселен, Аманкелді Иманов көшесінің тұрғыны Данияр Аяпов жетпістің желкеніне жетіп отырған, құрылыс саласында өнімді еңбек еткен зейнеткер. Оның осы көшеде тұрып жатқанына да 70 жылға жуықтапты. Кешегі тоқсаныншы жылдардың қиын шақтарында аудан мүшкіл халін де көзімен көрген. Экономиканың түзеліп, өмірдің сәт санап жақсарған шақтары да көз алдындағы тарих.Ойын алаңдары да салынып жатыр<blockquote>– Күн санап демесем де, жыл сайын ескісі жаңарып, күрмеуі қиын мәселелері шешіліп келе жатқан ауданымыздың жағдайын барлығы жақсы біледі. Осындай игілікті шаралар біздің Аманкелді көшесінде де орын алса екен деген тілегім мен ұсынысымды аудандық әкімдікке айтып жүрдім. Міне, сол сәт те келіп жетті. Өзге көшелер секілді біз тұрып жатқан көшеге де асфальт та жайылды. Осыдан бірнеше уақыт бұрын көктем мен күз айларында тобықтан асатын лай батпақты кешіп жүріп үйіне әрең жететін көршілеріміз қуанып қалды. Балаларымыз бен немерелеріміз футбол алаңдарында доп теуіп, ойын алаңдарында ойнау үшін алыс көшелерді кезіп кететін. Үйлеріндегі ата-ана, ата-апалары балалары мен немерелері үйге жеткенше алаңдаулы болатын. Бүгінде бұл уайымымыз да сейілді. Көшемізден балалар ойын және футбол алаңы салынды. Аллаға сансыз шүкірлер айта отырып, осы бір игілікті іске демеу болған аудан әкімі бастаған қызметкерлерге, барлық еңбеккерлерге алғысымды білдіргім келеді, – дейді Данияр Мадиярұлы.</blockquote>49 көше орташа жөндеуден өтудеЖыл өткен сайын халықтың әл-ауқаты жақсарып, түйіткілді мәселелер шешімін табуда. Екі жүзден астам көшесі бар кенттегі жолдардың сапасын арттыруға жыл сайын миллиондаған қаржы қаралады. Тоғыз жолдың торабында орналасқан ауданда 80 км республикалық, 98 км облыстық, 145,4 км аудандық барлығы 323,4 км автомобиль жолы бар.Аудандық маңыздағы 145,4 шақырымды құрайтын автомобиль жолдарының бүгінгі күнге 103,4 шақырымы, яғни 71,1 проценті қанағаттанарлық жағдайда болса, республикалық және облыстық маңыздағы автомобиль жолдары 100 процент асфальтталған.Шиелі кенті және елді мекендердегі көшелердің саны – 401. Ұзындығы – 395,38 км құрайды. Оның – 198,69 км асфальт, 145,69 км қиыршықтасты, 51 км топырақты.Облыстық бюджеттен Шиелі кентіндегі жалпы ұзындығы 19,8 шақырым болатын 49 көшесін орташа жөндеуге 563,9 млн теңге бөлінді. Бүгінде жұмыстар қызу жүргізілуде. Аудан әкімі Нұржан Ахатов бұл жұмыстарды өзінің ерекше бақылауына алды. Осылайша, бұған дейін көпшіліктің орынды ренішін туындатып келген мәселе ретке келтірілуде. Таяуда тұрғындар 49 көшенің &nbsp;Ә.Тәжібаев ауылына кіре беріс орналасқан көпірді күрделі жөндеуге 305,3 млн теңге қаржы бөлінген. Құрылыс жұмыстары сәтті аяқталды. Осы шілде айында ауыл тұрғындары игілігін көрмек.Жарық та орнатылғанШиелінің өзіне тән қоңыр тіршілігі бар. Жыл санап өсіп-өркендеп келеді. Бүгінде кентте мөлтек аудандармен қосқанда 205 көше бар. Оларға орнатылған жарық шамдары 3500 дананы құрайды. Айта кету керек, кентке түнгі жарық бағаналарын орнатуға 59 млн 426 мың теңге, ал ауылдық округтерге трансформаторлар алуға 59 млн 400 мың теңге қаржы бөлінген.<blockquote>– Кенттің 70 проценті толық көше шамдарымен қамтамасыз етілген. Бүгінде шамның түр-түрі шығып, соған сәйкес ұсыныстар көбейді. Қала берді тұрғындар тарапынан жарық жүргізілмеген көшелер кезең-кезеңімен жарықтандырылатын болады. Сапалы шамдардың қолдану мерзімі ұзақ әрі жарық беру көрсеткіші жоғары және бес жылға дейін жарамдылығына кепілдік беріледі, – деді кент әкімі Амангелді Өмірәлі.</blockquote><blockquote>– Кәрімбаев көшесі, 31/1 үйдің тұрғынымын. Зейнеткермін. 3 бала тәрбиелеп өсірдім. Қазір Құдайға шүкір, немерелерімнің қызығын қызықтап отырған жайым бар. Кейінге шегініс жасар болсам, келген кезімізде жол нашар, кедір-бұдыр, жарығы да болмады. Шаң-топырақ ұшып, көктем мен күзде батпақ болып жататын еді. Енді міне, мемлекет қамқорлығының арқасында жолымыз жөндеу көріп, едәуір жақсарып қалды. Көшеміз де жап-жарық. Біз сияқты зейнет жасындағы адамдардың жүріп-тұруларына, кешкілік таза ауамен серуендеуіне де жақсы. Әкімшілікке, аудан басшысына рақмет. Еңбектері жансын, ел аман болсын, тек жақсылық болсын! – кент тұрғыны Қ.Мәді.</blockquote>Міне, бүгінгі шежірелі Шиелі ауданының ажары осындай. Тұрғындардың қуанышты лебіздерін өздеріңізге жеткіздік. Әрине, оң өзгерістер осымен тоқталып қалмасы анық. Тоғыз жолдың торабында жатқан ауданның келешегі кемел боларына сеніміміз мол.

Шиелі ауданында шарықтау бар

<a href="https://kyzylorda-news.kz/">Kyzylorda-news.kz.</a> Өмірде жақсылыққа зәру, қиындықпен күн кешіп жатқан жандар қаншама?! Олардың ауыр тағдыры естіген жанды бей-жай қалдырмасы белгілі. Әсіресе баспананың азабын тартып, үйден-үйге көшіп, пәтер жағалап күн кешіп жүрген жандар Жиреншенің «Өз үйім – өлең төсегім» деген сөзін айтуды аңсайды. Осы ретте Бала би ауылының тұрғындары, жанашыр жастары бірігіп қос бірдей отбасыға баспана кілтін табыстап, қуаныш сыйлайды.Ынтымақ пен бірлікті ту еткен Бала би ауылының әкімгершілігі бастаған, кәсіпкер, ауылдық әйелдер кеңесінің төрайымы К.Әшірбекова, сонымен қатар ауылдағы барлық игілікті іске жұмылған ағайын, жанашыр жастар жағы бірлесіп, қос отбасына баспана тарту етіп көпке үлгі көрсетті. Көңіл қуантарлық іс-шараға ауыл әкімі Х.Тәжиев, ардагерлер кеңесінің төрағасы С.Жұманазаров, әйелдер кеңесінің төрайымы К.Әшірбекова, ауыл имамы Қ.Білімов, ардагер А.Әлиев екі отбасын қуанышқа кенелткен сәтке куә болып, баспаналы болған қос отбасын құттықтады.Алдымен мүмкіндігі шектеулі жанның бірі Ермек Қасымбековке бағасы 1,5 миллион тұратын 5 бөлмелі баспананың кілті табысталды. Кейіпкеріміз Ермек мүмкіндігі шектеулі бола тұра бойындағы қажыр-қайратын қара жұмысқа жұмсап, бірнеше жыл жалданып мал бағып адал еңбек етіп шеттей бала-шағасын асырап келеді. Жырақта жүрсе де бұл кісінің жалғыз арманы жайлы баспана болатын.Әйтсе де, «Адамнан сұрасаң екі көзің шығады, Алладан сұрасаң екі бүйірің шығады» деген емес пе халқымыз? Күндіз-түні Алладан жайлы баспана тілеген ол жақында күтпеген қуанышқа кенелді. Яғни, Ермек пен Қарлығаштың жағдайын жақсы білетін ауыл тұрғындары, жаны жайсаң жастар бастама көтеріп, бірлесіп, жұдырықтай жұмылып жаңа баспананы өткен аптада салтанатты түрде табыс етті.Онда ауыл әкімі Х.Тәжиев құттықтау сөз сөйлеп, «жаңа пәтер игілікке жарасын!» деген тілек білдірсе, ал ауыл ардагері А.Әлиев ақ батасын берді.Мұнан соң тұрмысы төмен отбасының тағы бірі – Гүлназия Талмановаға да бағасы 1 миллион тұратын үш бөлмелі баспананың кілтін табыс етті.<blockquote>– Мұндай жағдайда қуанышымды қалай жеткізерімді де білмей тұрмын. Осы күнді қанша күттім. «Жеке баспанам болады» деген ойымды тек арманым ғой деп қана елестетуші едім. Бірақ, қолы ашық, жүрегі жайсаң жандардың арқасында, демеушілердің қолдауымен және ауыл әкімгершілігінің араласуымен бүгін сол арманыма жетіп, төбем көкке бір елі ғана қалып тұр. Осындай жастар бар жерде еліміздің еңсесі биік, болашағы нұрлы боларына, әрбір біз сияқты кісілердің ескерусіз қалмайтынына кәміл сенемін, – деп қуаныштан көзіне жас ала отырып бар алғысын жеткізді, - дейді Гүлназия Талманова.</blockquote>Осынау ізгі ниетпен қайырымдылық жасап, көмек қолдарын созып жатқан ауыл тұрғындарына, жомарт азаматтарға, жаны жайсаң жастарға шексіз ризашылығын білдірген қос қоныстың иелері Ермек пен Гүлназия жанашыр жандарға көптен-көп рахмет айтып, қуаныштан еріксіз көздеріне жас алды.<blockquote>– Қазақ халқы қашан да ынтымақ, бірлік мәселесіне ерекше мән беріп, оны тірліктің тұтқасы, өмірдің өзегі ретінде бағзы заманнан бағалап келген. Ауыл тұрғындары мен жастардың бірлігі мен ынтымағының арқасында қос бірдей отбасы бүгінде баспаналы болды. Қоныстарыңыз құтты болсын! Игі бастаманың бастаушысы болған барлық азаматтарға алғыс білдіремін. Осындай игі істер алдағы уақытта да жалғасын таба берсін, – дейді ауыл әкімі Х.Абдуллаханұлы.</blockquote>Айта кетейік қос бірдей баспанаға ауыл имамы Қ.Білімов «Талаптан» мешітінен төрт төсеніш берген. Одан бөлек әкімгершілікте қоғамдық жұмыс жасайтын Қ.Ахметова, А.Өткелбаева, А.Қуанышбайқызы бастаған кісілер бірлесіп қос баспананы сырлап, әктеу жұмыстарын жүргізуге атсалысқан.«Көптің батасы қабыл» дейді қазақ. Жұртшылықтың алғысы мен ризашылығына бөленіп жүрген жандарға біздің де тілеріміз көп-ақ. Әр қазақты жалғызы санаған Сабыр Адайдың сөзінен үлгі алған, игілікті істі пенделік мұраты деп білген ауыл тұрғындарына алғыс білдіріп, жастардың жолына, қадамына жеміс тілейміз. Шара соңында ауыл ақсақалы А.Әлиев құтты баспана болсын деген тілеулестікпен ақ батасын берді.

Балабидегі қос қуаныш

<a href="https://kyzylorda-news.kz/">Kyzylorda-news.kz.</a> Шежірелі өлкенің 95 жылдық мерейтойына арналған фестиваль жоғары деңгейде өтіп жатыр. Ауданға қарасты елді мекендердің тыныс-тіршілігін таныстырып, таразылайтын сайыстан Қоғалы мен Майлытоғай да қалыс қалмады. Байқаудың есебінде екінші болып бағын сынаған ауылдық округтердің бағдарламасын біз де тамашалап қайттық.Бір қарағанда кәнігі этно-ауыл дерсіз. Себебі сол күнгі орталық алаңдағы көрініс – ауылдың ауызбіршілігін, қазақы құндылығын аңғартты. Келген көпшілік көрмеге қарап, Қоғалы мен Майлытоғай ауыл округтерінің тұрмысын, салтын көзбен көрді. Шиеліліктер әсіресе қолөнер бұйымдарына қызығушылық танытқанын байқадық. Ауыл тұрғындары жасаған әр бұйым бағалы. Әрқайсысының мазмұны – терең, мәні – зор. Сонымен қатар қолдан жасалған тұмыстық сабын әлеумет арасында таңданыс тудырды. Құрт, ірімшік, май, айран мен сүттің дәмі ауылға деген сағынышты сейілтті.Көрмеге қойылған ұлттық танымдық туынды, еңбектермен етене танысқан тұрғындар орталық алаңынан алыстай қойған жоқ. Аудан жұрты үшін халықтың әндері әуелеп, жыр-термелері шалқыды.Тағылымы терең шараға аудан әкімі Нұржан Ахатов, аудандық мәслихат төрағасы Айтбай Жандарбеков, аудан әкімінің орынбасары Алмат Алдабергенов, кәсіпкер Насырбек Мырзабеков, аудандық әйелдер кеңесінің төрайымы Найлә Палымбет, аудандық білім бөлімінің басшысы Жібек Баймұратова, аудандық мәдениет және тілдерді дамыту бөлімінің басшысы Аруна Өркенқызы, аудан тұрғындары мен зиялы қауым өкілдері қатысты.Аудан әкімі Нұржан Ахатов тұрғындардың қолдан жасалған бұйымдарының сапасы мен маңызын қарап, іске икемі бар жандарға кәсіпкерлік мақсатта әлі де қолдау шаралары қолға алынуы қажет екені айтылды.Айта өтейік, осынау «Туған елге тарту» фестивалі әлі де жалғасады. Алда 18 ауылдың бағдарламасы бар.

Шиеліде «Туған елге тарту» фестивалі жалғасын тапты

Kyzylorda-news.kz. Қазақстандық сарапшылар келесі оқу жылын 31 мамырға дейін ұзартуды қолдады. Алайда олар түпкілікті шешім қабылдау үшін бір жыл жеткіліксіз деп мәлімдеді, деп хабарлайды <a href="https://stan.kz/kortindi-zhasauga-ali-erte-sarapshilar-kelesi-oku-zhilinda-da-31-mamirga-kaldirudi-koldadi-385387/">Stan.kz</a>.&nbsp;Ы. Алтынсарин атындағы ұлттық білім академиясында сараптамалық комиссияның отырысы өтіп, келесі оқу маусымы 36 аптаға, яғни 31 мамырға дейін созылуы тиіс деген ортақ пікірге келді. &nbsp;<blockquote>"Түпкілікті шешім шығару үшін кемі екі-үш жыл қажет. Сарапшылар бұл шешім бес күндік оқу аптасын қалдыру үшін өте қажет екенін алға тартады. Соңғы жылдары елімізде оқушылардың апталық жүктеме 39-дан 35 сағатқа дейін қысқарды", –деп мәлімдеді Ы. Алтынсарин атындағы ұлттық білім академиясының вице-президенті Руслан Қарабанов.&nbsp;</blockquote>Ұлттық академия 36 апталық оқудың балаларға әсері туралы зерттеу жүргізді. Сауалнамаға 15 мың адам қатысып, көбісі жаңашылдықты қолдайтынын білдірген. Тағы бір тиімді тұсы –түлектердің жоғары оқу орынына түсуі үшін дайындық уақыты да ұзара&nbsp;түседі. Оқуда үлгермегендер, мұғалімнен жеке кеңес алуға, кейбір тақырыптарды пысықтауға мүмкіндік алды.Сондай-ақ&nbsp;сарапшылар&nbsp;Қазақстан оқу жылы орта есеппен 184 күнге созылатын дамыған елдердің көрсеткіштеріне сәйкес келе бастағанын айтуда.<blockquote>"Оқу процесінің ұзартылуымен балалар мен тәрбиешілердің демалу уақыты артты. Егер бұрын біз 160 күн демалсақ, енді 36 қосымша сенбіге байланысты демалыс күндерінің саны 180 күнге дейін өсті. Бұл&nbsp;тоқсандық демалыс, мерекеге сәйкес келген және әдеттегі&nbsp;демалыс күндерін қоса есептегенде. Нәтижесінде балалар мен педагогтердің сенбі мен жексенбіде жақсылап тынығуына және жаңа оқу аптасын жаңа күшпен бастауға мүмкіндігі бар", – деп атап өтті академияның вице-президенті.</blockquote>Отырыста психологтар да оқу жылының ұзаруын қолдады. Мамандар жазғы демалыста жасөспірімдердің &nbsp;қылмысы жиілейді,&nbsp;сондықтан балалардың 31 мамырға дейін бос болмауы тәртіп бұзушылықты азайтады деген пікірде.Сарапшылардың барлық пікірі негізінде комиссия қорытынды жасады:<ul><li>Оқу жылын ұзартудың тиімділігін бағалау үшін бір жыл жеткіліксіз, сондықтан қабылданған шешімнің орындалуын жалғастырған жөн.</li><li>Ұзартылған оқу жылы мектеп бағдарламасын, барлық қажетті көлемді ыңғайлы қарқынмен игеруге мүмкіндік береді.</li><li>Оқу жылын ұзарту білім алушылардың психикалық және дене денсаулығы үшін тәуекелдерді азайтуға мүмкіндік береді.&nbsp;</li></ul>

2024 жылы оқушыларға арналған оқу жылы 31 мамырда аяқталады: Комиссия шешім шығарды

Kyzylorda-news.kz. Мәдениет және спорт министрлігі ауылда қызмет ететін архив мамандарына жалақысының 25% мөлшерінде үстемеақы төлеуді ұсынды, деп хабарлайды <a href="https://www.inform.kz/kz/auylda-zhumys-isteytin-arhiv-mamandaryna-25-ustemaky-toleu-usynyldy_a4092429/amp">ҚазАқпарат</a>.&nbsp;<blockquote>«Бүгінгі күні аудандық мемлекеттік архив қызметкерлері ауылдық жерлерде жұмыс істегені үшін лауазымдық жалақысының 25% мөлшерінде үстемеақы алмайды. Бұл өз кезегінде аудандық мемлекеттік архив қызметкерлері арасында әлеуметтік шиеленісті туғызады», - делілген реттеушілік саясаттың консультативтік құжатында.</blockquote>Бұл мәселенің шешімін заңнамалық тұрғыдан реттеу ұсынылып отыр. Атап айтқанда, ведомство ауылдық жерде жұмыс істейтін азаматтық қызметшілер санатына архившілерді енгізу бастамасын көтеріп отыр.

Ауылда жұмыс істейтін архив мамандарына 25% үстемақы төлеу ұсынылды

<a href="https://kyzylorda-news.kz/">Kyzylorda-news.kz.</a> 22-24 шілдеге арналған болжамға сәйкес, республикада жауын-шашынды ауа райы сақталады, деп хабарлайды Қазгидромет.Жақын күндері Қазақстан бойынша синоптикалық жағдай атмосфералық фронтальды учаскелерді қалыптастыруды жалғастырады.Жаңбыр жауып, найзағай ойнап, екпінді жел соғады, 22 шілдеде шығыста, 22-23 шілдеде еліміздің солтүстігінде қатты жаңбыр күтіледі.Синоптиктер температура фонында күрт өзгерістер күтілмейтінін атап өтті.

22 шілдеге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бүгін Қызылорда облысы әкімі аппаратының басшысы Шахмардан Байманов 3-8 шілде аралығында Астана қаласында отырып ойнау волейболынан өткен Азия чемпионатында ҚР ұлттық құрама сапында өнер көрсетіп, күміс жүлдегер атанған спортшыларды қабылдады.Қабылдау барысында аппарат басшысы Азия чемпионатының жүлдегерлерін жеңістерімен құттықтады. Сондай-ақ, оларға алғыс хат табыстап, келер жылы Франция астанасы Парижде өтетін Паралимпиада ойындарында жоғары нәтижеге қол жеткізетіндіктеріне сенім білдіріп, сәттілік тіледі.Кездесуде Шахмардан Асқарұлы өңірімізде мүмкіндігі шектеулі жандардың спортпен айналысуына барынша жол ашылғандығын айтты. Сондай-ақ, олардың спорттың бірнеше түрлері бойынша паралимпиадаларға қатысып, түрлі жаттығу орындарында шынығып жүргендігін тілге тиек етті. Сонымен бірге, облыстағы мүгедектерге арналған спорт клубтарына әкімдік тарапынан әрдайым қолдау болатындығын және өз кезегінде алдағы уақытта клуб базасымен арнайы барып танысатындығын жеткізді.Соңғы жылдары Сыр спортында серпін жоғары. Айта кетер жайт, аймақтың спорт саласын дамытуда мүмкіндігі шектеулі азаматтардың да үлесі зор.&nbsp;

Паралимпиада жолдамасының иегерлері қабылдауда болды

&nbsp;<a href="https://kyzylorda-news.kz/ru">Kyzylorda-news.kz.</a>&nbsp; Жастардың келешек өміріне жолдама беретін білім ордасының, &nbsp;білім мен тәрбиеге қоса, мамандық беретіні, жас мамандардың өмірге жолдама алуына зор мүмкіндіктер ашатындығы қандай ғанибет десеңші. Олай дейтінім, сол өткен кезеңдердің өзінде де, кейбір отбасылар балаларын үлкен қалаға жіберіп оқытуға қиналып жататын. Оған себеп болатын, бір отбасындағы балалардың білімдері сәл жетіңкіремей жатырса, бір отбасылар балаларын оқытуға жағдайы болмай қалатындығын сезіп жүретінбіз. Сондай кезеңдерде осындай отбасылаға Арал қаласының шығыс жақ бетіндегі орналасқан, бұрынғы №169 селолық кәсіптік-техникалық училищесі көп көмекке келіп, жастардың болашақ маман иесі атануларына зор мүмкіндіктер жасаған болатын. Сондағы училищені бітірген түлектердің бір легі арман қуып жоғары оқу орындарына түсіп жатса, бір легі туған жерлерінде қалып, өз мамандықтары бойынша жұмысқа орналасатын. Бұл бір жағынан жастардың ауылда қалып, сол жерде жұмысқа орналасып, ата-аналарына қолғабыс еткендіктері болатын. Содан кейін олардың одан әрі қарай өз түтіндерін түтетіп, бір-бір &nbsp;шаңырақтың сенімді иесі болып &nbsp;жататындықтарына талай куә да болғанбыз.&nbsp;Сол шақтардың алдында, әкеден ерте қалған мен де әскери борышымды өтеп келіп, үлкейген анамды асырау мақсатында аудандық «Толқын» газеті баспасының баспаханасына қызметке орналастым. Осы тұста анам үлкен кісі болса да, менің оқымай қалуымды құп көрмеді. Анам Дәмеш Райсова өзі матрос-балықшы бола жүріп, Социалистік Еңбек Ері Ұштап Өтеулиевамен қатар еңбек етті. Сонымен қатар қазір Алматы қаласында тұратын, Алматыдағы Балалар институтының жоғарғы дәрежелі білікті дәрігер маманы болған, қазіргі күні зейнеттік демалыстағы Күнзия Райсова атты бірге туған бауыр апайым менің жоғары оқу оқығанымды қалап, «Қайдауыл, сен қайтсең де оқуың керек», деген сөзі желеу болып, өндірістен қол үзбей жүріп, Қызылорда қаласындағы педагогикалық институтты бітірдім. Сол арада қазіргі өмірлік жолдасым, №213 мектепте ағылшын тілі мұғалімі болып &nbsp;қызмет істеген Зоя Медетовамен түтін түтеттім.&nbsp;Мұғалімдік оқуды бітіргеннен кейін, менің де алдымда қай жерге орналассам екен деген үлкен таңдау тұрды. Не керек, сөздің қысқасы, аталмыш училищеге мұғалім болып келдім де, ең әуелі екі айдай тәрбиеші болдым. Ол кездегі жұмысқа жаңа барған менде де балалармен қалай тез тіл табысып кетеді екенмін деген қорқыныштар болды. Жоқ, балалармен жұмыс істей бастаған күннен бастап бұрынғыдай қорқасоқтағаным басылып, екі айдың ішінде балалармен қалайша тез тіл табысып кеткендігім байқалмай, дереу мұғалімдікке ауыстырылып, қазақ тілі мен әдебиеті сабағынан дәріс беріп кеттім. Алғашқы беталысым жаман болмағанындай, ары қарайғы еңбек жолымның осы жерден қалай басталып кеткендігін де сезбей қалыппын. Әрине, ең бірінші қызметке келгенде жаңа жұмыстағы жол көрсетушілерсіз жұмысты ары қарай алып кету қиынның-қиыны екендігі түсінікті де болар. Осы жерде менен де бұрын қызметке келіп, біршама тәжірибе жинақтаған &nbsp;білікті мамандар, директордың тәрбие ісі жөніндегі орынбасары Омар Махамбетов, директордың оқу-өндірістік жұмыстары жөніндегі орынбасары Данабек Сәрсенов сынды ағаларымның жаңа жұмысымды алып кетуіме көп септіктері тиді.Мендегі жұмысқа енгендегі әдепкі қорқыныштар болғандығының себептері, біріншіден, сол кездері училищеге тек мектептен қашқан бұзық балалар барады екен деген, екіншіден, техникалық-оқу базасы ескірген деп айтылып та, есітіліп те жүретін &nbsp;желеу сөздер болды. Осы оқу орнына қызметке келгеннен кейін, көп ұзамай училищенің директоры Әбіл Сейітжаппаров сынды білікті басшының көрегенділігі арқасында оқу орнының базасы жаңа техникалармен толықтырылып, жаңа оқу корпустары мен жатақхана орындары салынып пайдалануға берілді. Училищедегі жатақхананың болуы ауылдық жерлерден келіп оқитын балалардың көп екендігімен де түсіндірілетін. Сол кездегі училищеге жаңа оқу корпусының пайдалануға берілгендігі оқуға тілек білдіре келетін оқушылардың санын біршама арттырып, білім сапасы көтеріле бастады.&nbsp;Бірқатар ұстаздарымыз бен оқушыларымыз білім жарысының жеңімпаздары атанды. Училищені жақсы мен өте жақсы деген бағаға бітіріп жатқан оқушыларға мамандықтарына сәйкес жоғары оқу орындарына жолдамалар берілді. Соған қарап балаларын осы училищеге беретін ата-аналардың да саны көбейіп, ықыластары еселеп артты. Осы ретте сол кездегі білім беріп жүрген ұстаздардың да мерейлері үстем болды. Сондағы білікті ұстаздар Сабырбай Оразалиев мал шаруашылығы білімінен дәріс берсе, Қылышбек Ермағанбетов жолда жүру ережелері пәні, Мұхтар Ниязбаев тракторлар мен автомобиль пәндерінен, Жидебай Өтегенов ауыл шаруашылығы машиналары пәнінен дәріс берді. Сол сияқты жалпы білім беретін пәндер бойынша Сахитжан Мүсенов дене тәрбиесі пәні мұғалімі, бірнеше жарыстар жеңімпазы, спорт шеберлігіне кандидат болса, Айнакөз Сағымбаева физика, Зибагүл Арзықұлова информатика (есептеуіш машиналар), Гүлхан Тілепова қазақ тілі мен әдебиеті, Ақбала Айназарова химия, Нағима Көптілеуова математика, Гүлнар Матниязова орыс тілі мен әдебиеті, Шолпан Балманова арнайы техникалық пәндерден, Бақтыбай Әйділдаев алғашқы әскери дайындық пәнінен, Мейрамкүл Тұрымбетова тарих пәнінен дәрістер беріп, білім мен біліктіліктері арқасында училищенің Құрмет тақтасынан орын алды.&nbsp;Училищелерде жалпы білім берумен бірге арнайы пәндермен қатар өндірістік оқу да бірге жүргізілді. Өндірістік оқу дегеніміз – болашақ жас мамандарды сол училищенің базасында өндіріске дайындап, дайын маман күйінде жұмыс орнына баруға жол ашатын білім. Бұл салада Дүйсенбай Тұрмашев, Ағысбай Өтемісов, Дәулет Мәзенов, Асан Молдабаев, Нұрхан Сарбөпеев, Қыдырбай Кәленов сынды өндірістік оқытудың майталман шеберлері болды. Білім алушыларды машина мен трактор рөліне отырғызып, жүргізіп айдауды үйретуде жақсы шеберлік танытқан жүргізушілер Сәдуақас Қилашов, Берік Есов, Толағай Әленов зор біліктіліктерімен атсалысып отырды. Директордың оқу ісі жұмыстарының орынбасары Лайық Шалабаев, өндірістік оқудың аға шебері Тілеген Таймырзаев, есеп-қисап жөнінен Қуандық Үмбетов, кадр есебін жүргізуші Маржан Ешекенова сынды мамандар өз еңбектерінің майталман мамандары атанды. Осындай еселі еңбектердің арқасында училище аз уақыт ішінде облыстағы алдыңғы қатарлы экспериментальді-тірек училищесіне айналды.&nbsp;Училищедегі еңбек етіп жүрген уақыттарымның есте қалған тұстарын айтып өтетін болсам, жастардың жалынды жетекшісі болған Ғани Мұратбаевтың 100 жасқа толу қарсаңындағы оқушылармен бірге барған, оның Қазалыдағы мұражайына саяхат, Арал қаласымен іргелес жатқан Сексеуіл кентінде өтетін түрлі спорттық жарыстар өте қызықты да тартымды өтетінін жиі еске аламын. Әрине, жарыс болғасын жеңіліс те, жеңіс те болуы шарт. Ал біздің барған күндеріміздің бірінде де мақтау мен мадақтаусыз, сыйлықсыз қайтқан күндеріміз болған емес еді. Осы жеңістерімізді жігерлендіріп отырған кездерімдегі училищедегі топ жетекшілік, пән мұғалімдігі қызметтеріммен қатар осындағы бастауыш кәсіподақ ұйымының төрағалығын да он жылдай абыройлы атқарған уақыттарым есіме түсіп жатыр.Иә, осы күндері қазіргі кездегі кәсіптік білімнің қарашаңырағына айналып отырған Арал көпсалалы колледжі, бұрынғы №16 кәсіптік-техникалық училищесінде абыройлы еңбек еткенімді зор мақтанышпен жие еске аламын. Сол кездегі жастарды, яғни болашақ &nbsp;мамандарды &nbsp;өмір жолына салуда, оларға білім мен тәрбие берудегі өз қолтаңбамның қалғандығына қатты қуанамын. Бүгінде сондағы оқыған оқушыларымыз қазіргі күні бір-бір жанұяның иесі, бір-бір жұмыс орнының мақтаулы мамандары болып отырған жайлары бар. Солардың бірімен кездесе қалған кездерімізде алдымыздан кесе өтпей, сәл танымай бара жатып, қайта айналып келіп, «Сіз Қайдауыл ағай емессіз бе?» деп артынша бұрылып келгендерінде, құшағымыз айқаса қалатынын айтпай өте алмаймын. Қазір сол еңбек еткен жылдарымның жемісін көріп, жанұяммен Астана қаласында тұрып жатырмын.&nbsp;Бүгінде 5 баладан 12 немере көріп отырған, кәсіптік білім саласының ардагерімін. Осыдан ұққаным, адамға еңбек еткен өткен күндерінің зейнетін көруден асқан бақыт жоқ екендігін түсіндім. Осы мақаланы жазуда да, сол өткен жолдарымды тебіреніспен еске түсіре &nbsp;отырып, ондағы бірге еңбек еткен адамдардың да жылы лебіздері мен ыстық алақандарының табы әлі күнге дейін сезілетіндігі өткенге көп ой тастатады да тұрады. Әрине, бұл мен үшін үлкен тарих болып қалмақ.&nbsp;Иә, тарих демекші, жақын күндері осы іргелі қара шаңырақтың құрылғанына 65 жыл толғалы отыр екен. Осы жылдар ішінде қаншама мамандар өмірге қанат қағып аудан экономикасын көтеруге зор үлестерін қосып отырғандығын айтпаса да түсіне аламыз. Сөзімді қорыта келе, бүгінгі Арал көпсалалы колледжінің іргесі одан да берік болып, жыл сайынғы бітіруші түлектердің саны еселеп артып, осындағы ұстаздар қатарының да шығармашылық табыстарға жете берулеріне зор тілегімді қосқым келеді.

Аралдағы жастардың білімін шыңдаған мекен

<a href="https://kyzylorda-news.kz/ru">Kyzylorda-news.kz.</a>&nbsp; Әр дәуірдің өз талап-тілегі бар. Жаһандану дәуірі есік қаққалы жұрт жаңа технологияның тілін меңгеруге көшкен. Заманның көшінен қалмау – уақыт талабы. Осы тұрғыда қабылданған «Цифрлы Қазақстан» бағдарламасы технологиялық тұрғыда дамуға қол жеткізеді. Сонымен қатар, IT бағдарламалар шығындарды азайтып, уақытты үнемдеуге көмектеседі, адамдар өзара ақпарат, тауар және қызмет түрлерін алмаса алатын болады. Осыған орай қазіргі таңда электронды түрде қызмет жасап отырған аудандық архив филиалының жұмысы туралы айтпақпыз.Өткенге үңілсек, құжатсыз архив, архивсіз тарих, тарихсыз мемлекет болмайды. Бұл –аксиома. Сол себептен де егемендігіміздің құжаттық негізі болып саналатын «Арал аудандық архиві» филиалының орны ерекше. Құрылғанына осы жылдың 1 шілдесінде 60 жыл толған мерейтойы аудан тарихындағы айтулы мереке.&nbsp;1963 жылғы 1 шілдеде қалалық атқару комитеті президиумының «Арал аудандық архиві филиалын құру туралы аудандық мекемелердің, кәсіпорындардың, колхоздардың, МТС совхоздарының және ауыл советтердің архив материалдарын ретке келтіру туралы» қаулысы қабылданғаннан бері 60 жыл өтіпті.&nbsp;Құрылған күнінен бастап 60 жыл бойы архившілер өздерінің басты қызметі – Қазақстан Республикасының Ұлттық архив қорын құруға, оны сақтауға және қоғамның даму мүддесінде жанжақты пайдалану ісімен шұғылданып келеді. Қазіргі таңда Арал аудандық архивінде аудан экономикасы мен мәдениетінің жай-күйі, әлеуметтік-құқықтық және экономикалық дамуы туралы құнды ақпараты бар жазба және электронды нұсқада 60000-ға жуық құжат сақталуда. Мекемелер мен кәсіпорындардың құжаттарымен қатар Арал ауданының көрнекті қоғам және саясат, мәдениет қайраткерлерінің, жазушылардың, ғалымдардың, Ұлы Отан соғысына, Ауған соғысына қатысушылардың және тағы басқа 50-ге жуық жекеленген қор сақталған. Қоғамдық сананы қайта құру, дәстүрлі құндылықтардың оралуы тарихи процесті шынайы дерек арқылы тануға көмектесетін архив құжаттарына деген қызығушылықты айтарлықтай арттырды. Мұның бәрі мемлекеттік архивтің тек құжаттар қоймасы ретінде ғана емес, мәдени-ағартушы, патриоттық және адамгершілік қасиетті нығайтатын орталық ретінде маңызының артуына ықпал етті. Архив құжаттарына қол жеткізуді теңдестіру, оларды құпиясыздандыру, өлкетануды жаңғырту Тәуелсіз Қазақстанның алғашқы жылдарында Арал аудандық архивінің оқу залына келетін зерттеушілер санының артуына себеп болды.Өлкетанушылар, зерттеушілер ғылыми еңбектер жазу үшін қажетті ғылыми-тарихи және дереккөздік археографиялық базаны құра бастады. Зерттеушілер қатарында кәсіби тарихшылар, өлкетанушылар , студенттер мен оқушылар басым, сондай-ақ аудандық түрлі мекемелерінің өкілдері де кездеседі. Архивтің оқу залында отандық зерттеушілерден басқа жақын және алыс шетелдік ізденушілері де жұмыс істейді. Айта кету керек, шетелдік зерттеушілер Арал балық комбинаты құжаттарынан аудан тарихына қатысты құжаттарды зерттеп, ғылыми еңбек жазды.«Архив және болашақ ұрпақ» республикалық жобасы аясында «Ашық есік» күнін өткізу архивтік құжаттарды пайдалануды ұйымдастырудың өзекті нысаны болып табылады. Барлық архив өз қызметін үш бағытта жүргізеді. Архив құжаттарын жинайды, оны сақтайды және ол құжаттарды пайдаланады немесе ғылыми жариялайды. Соңғы уақытта зерттеушілерге, архив мекемелерінің мамандарына ғылыми, өлкетану және өзге де мақсаттарда ақпаратты жедел іздестіруде және пайдалануда баса көңіл бөлінді. Архив құжаттарынан «Аралдықтар Ұлы Отан соғысында» кітап дайындалып, оқырмандарға таныстырылды. Арал ауданының әкімшілікаумақтық құрылысы бойынша, Кеңес билігінің Арал ауданында орнауы туралы, аудандағы арнайы қоныс аударушылар туралы тағы басқа құжаттар мен материалдар бұған дейін де жергілікті басылымдарда жарық көріп келеді.&nbsp;Мемлекеттік архивтің ақпараттық қызметінің нысандарының бірі – жеке және заңды тұлғалардың заңды құжаттар мәртебесі бар, қазақстандық және шетелдік азаматтардың заңды құқықтары мен мүдделерін қамтамасыз ету мақсатында архив құжаттары бойынша орындалған архивтік анықтамалар, архивтік үзінді көшірмелер, архивтік көшірмелер түріндегі сұрау салуларын орындау болып табылады. Қазіргі қоғам құжаттамалық қамтамасыз етуді реттеуге, электрондық құжат айналымын енгізу мәселелерін шешуге архив қызметінің көбірек қатысуын талап етеді. Архив құжаттарын пайдалану саласында ақпараттық-технологиялар маңызды рөл атқарады. Қазір бұл басым бағыт болып табылады, соның арқасында аудан архивінде жаңа IT технологиялар енгізілуде. Архивтің бірыңғай ақпараттық кеңістігін қалыптастыру үшін қағаз және аудиовизуалды ақпарат құралдарында сақтау бірліктерінің әр түрін цифрландыру арқылы бірыңғай деректер базасы құрылады. Архив ісінде ақпараттық технологияларды қолдану әртараптандырылуда, олар архив жұмысының барлық бағыттарына біртіндеп еніп, күнделікті архив өмірінің ажырамас бөлігіне айналуда. Архив қызметінің қалыптасу кезеңі мен тарихи байлықты ғана емес, тарихи ақиқатты сақтау жолында өз жұмысын асқан ынта-ықыласпен атқарып, ондаған жылдар бойы өте күрделі, кейде тіпті мүмкін емес міндеттерді шешкен, аса қиын кезеңде архив ісіне адал болған азаматтардың еңбегі елдің есінде болар. Бұл салада Арал аудандық архиві филиалының бірінші басшысы Ы.Махатовтың, Ж.Жантілеуовтің есімі ел-жұртқа етене таныс. Сондай-ақ аудандық архив қызметін кешенді қайта құруды бастаған Б.Қуатовтың, сондай-ақ Г.Қазанқапованың, архивистер Р.Исламханова, Қ.Арғынғазиевтің, инспектор Р.Тлеуованың өзіне бекітілген аса құнды құжат дереккөздерін жинау және сақтау үшін барлық күш-жігерін жұмсаған архив ісі саласының майталмандары екенін айта кету керек.&nbsp;Иә, архив – тарихтың қайнар көзі, өткеніңе үңілдіріп, санаңа жарық саңылау сыйлар тарихи құнды құжаттар ордасы. Хатталған тарих пен тасқа басқан ақиқаттарды келер ұрпаққа аманаттау жолында табанды еңбек ететін архившілердің жұмысы әрқашан жоғары бағалануы тиіс. Өйткені олардың жұмысы соған лайықты.

Аралдық архивте 60000-ға жуық құжат электронды нұсқада сақталуда

<a href="https://kyzylorda-news.kz/">Kyzylorda-news.kz.</a> &nbsp; Мемлекет басшысы Қасым-Жомарт Тоқаев «Халықтың денсаулығын жақсарту мәселесі айрықша назар аударуды талап етеді. Барлық жастағы ел азаматтары арасында бұқаралық спортты дамыту маңызды. Спорт инфрақұрылымдарының балалар үшін барынша қолжетімді болуын қамтамасыз ету керек. Бұқаралық дене шынықтыруды өркендету ісі жаңа чемпиондар шыңына шығатын пирамидаға айналуы тиіс. Бұл салауатты әрі белсенді жастардың, түптеп келгенде, қуатты ұлттың негізін қалыптастырады» – деп атап өткен еді.Осы орайда, Арал ауданының мәдениет және спорт бөлімінің «Арал спорт клубы» коммуналдық мемлекеттік мекемесі, Қазақстан «Спартак» дене тәрбиесі-спорт қоғамы республикалық қоғамдық бірлестігі Арал филиалының және ауданымыздың волейбол спорт түрінің бір топ жанашырларының ұйымдастыруымен, &nbsp;волейболдан ауыл жастары арасында Арал ауданының чемпионаты өз жалауын көтерді. Жарыстың негізгі мақсаты аудан көлемінде жастар арасында дене шынықтыру мен спортты дамыту, салауатты өмір салтын насихаттау, волейболды – командалық және олимпиадалық спорт түрі ретінде дәріптеу, қалыптастыру және дамыту,аудан, ауыл спортшы жастарының өзара қарым-қатынасын нығайту, волейболдан аудан құрама командасын іріктеп, жасақтау және спортшылардың спорттық деңгейін шыңдай түсу.Аудан чемпионатына, ауданымыздың орталығы мен елді мекендерінен жалпы 10 команда қатысуда. Олар: «Арал» (Арал қаласы), «Аралқұм» (Аралқұм ауылы), Арал көпсалалы колледж (Арал қаласы), «Ардагер» (Арал ауданы), «Жақсықылыш» (Жақсықылыш кенті), «Қамбаш» (Қамыстыбас ауылы), «Қарақұм» (Абай ауылы), «Спартак» қоғамдық бірлестігі (Арал қаласы), «Сыр бойы» (Арал ауданының Сыр беткейінің құрамасы) және №19 орта мектеп (Жақсықылыш кенті).Волейболдан аудан чемпионатының І-айналымы Сексеуіл кентіндегі №20 Арал ауданының балалар-жасөспірімдер спорт мектебінің спорт залында, 15 шілде күні өтті. Бұл күні тартысты 11 ойын өткізілді. Чемпионаттың ІІ-айналымын Қарақұм ауылындағы №59 орта мектебінің спорт залында өткізу жоспарланса, ІІІ және IV-айналымдары, сәйкесінше Жақсықылыш кенті мен Арал қаласында үстіміздегі жылдың қараша және желтоқсан айларында өткізіледі деп күтілуде.&nbsp;Жарыстың бас төрешісі «Арал спорт клубы» КМ мекемесінің жаттықтырушысы Дәурен Махамбетияров.<blockquote>– Соңғы жылдары волейбол спортына деген аралдық жастардың қызығушылығы артып келеді. Олардың спортқа деген сүйіспеншілігін одан әрі дамыту масқатында аудандық турнир өткізуді жөн деп санадық. Әзірге бірінші кезеңді өткердік. Алда әлі тартысты додалар өтетін болды. Жарыс кезінде қауыпсіздік шаралары қатаң сақталып, спортшыларға жан-жақты жағдай жасалуда, дейді жарыс төрешісі Д. Махамбетияров.</blockquote>Жарыс жеңімпаздары мен жүлдегерлері спорт кубогтарымен, медальдарымен дипломдарымен және аталымдар бойынша үздік ойыншылар естелік сыйлықтарымен марапатталады.

Қазақстан және Қызылорда облысының жаңалықтары