<a href="https://kyzylorda-news.kz/">Kyzylorda-news.kz</a>&nbsp; Қызылорда қаласы бойынша білім бөлімінің ұйымдастыруымен Абылайхан атындағы №140 орта мектепте сыбайлас жемқорлыққа қарсы мәдениет деңгейін қалыптастыру және алдын алу шараларының әсерін күшейту мақсатында «АДАЛДЫҚ. ЗАҢ. АШЫҚТЫҚ» тақырыбындағы ашық-форсайт өтті.Жиынға Қызылорда қаласы бойынша білім бөлімінің басшысы Ерлан Теңізбайұлы, ҚР Президенті жанындағы мемлекеттік басқару Академиясының Қызылорда облысы бойынша филиалының профессоры Ақзада Алайдарқызы, ҚР Президенті жанындағы мемлекеттік басқару Академиясының Қызылорда облысы бойынша филиалының доценті Алмагүл Жанділдақызы, Қорқыт Ата атындағы Қызылорда университетінің Сыбайлас жемқорлыққа қарсы комплаенс қызметінің комплаенс-офицері Әлібек Бахытжанұлы, «AMANAT» партиясы облыстық филиалы жанындағы Сыбайлас жемқорлыққа қарсы іс-қимыл жөніндегі Кеңес төрағасы Мақсұт Ыбрайханұлы, Қызылорда облысы бойынша адам құқықтары жөніндегі уәкілі Дәурен Сақтапбергенұлы, ҚР-ның Сыбайлас жемқорлыққа қарсы агенттігінің Қызылорда облысы бойынша департаментінің бас маманы Жанар Жалғасбайқызы, мектеп басшылары мен балабақша меңгерушілері қатысты.<blockquote>Қазақстанда сыбайлас жемқорлыққа қарсы іс-қимыл бойынша түрлі шаралар жүйелі түрде орындалып келеді. Ұлттық тәжірибе мен сыбайлас жемқорлыққа қарсы халықаралық озық іс-тәжірибелерді тарту бойынша нақты істер қолға алынды. Қазіргі таңда парақорлықты жоюдың бірегей үлгісін қалыптастыру мақсатында сыбайлас жемқорлыққа қарсы комплаенс бойынша оқыту жүзеге асырылған. Елімізде бұл сала бойынша түрлі іс-шаралар ұйымдастырылып, ел мүддесі үшін сыбайлас жемқорлыққа қарсы комплаенс қызметін жете түсінуге кірісті. Сондықтан 2024 жылға арналған жұмыс жоспары негізінде білім бөлімінің ұйымдастыруымен барлық білім беру ұйымдарының басшылары мен ішкі талдауды жүргізу функциясын іске асыратын комплаенс қызметкерлерінің қатысуымен сыбайлас жемқорлыққа қарсы мәдениет деңгейін қалыптастыру және алдын алу шараларының әсерін күшейту мақсатында «АДАЛДЫҚ. ЗАҢ. АШЫҚТЫҚ» тақырыбындағы ашық-форсайт құқықтық семинар ұйымдастырылып отыр, – деді білім бөлімінің басшысы Е.Теңізбайұлы.</blockquote>Сонымен қатар, комплеанс қызметкеріне «Заң нормалары», «Адалдық принциптері», «Комплеанс функциялары» тақырыптарында арнайы мамандар түсіндірме жұмыстарын жүргізді.<img src="https://knadmin.beoblood.kz/uploads/432267468_1525255728202530_1318524680858524119_n_3687a43170.jpg" alt="432267468_1525255728202530_1318524680858524119_n.jpg"><img src="https://knadmin.beoblood.kz/uploads/432274595_1525255838202519_6690800895728828108_n_8b9d65b459.jpg" alt="432274595_1525255838202519_6690800895728828108_n.jpg">

«Адалдық. Заң. Ашықтық» тақырыбында ашық – форсайт алаңы өтті 

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша Мемлекеттік кірістер басқармасы жеке тұлғалардың көлік құралдары салығы бойынша 2023 жыл үшін салық төлеу мерзімі ағымдағы жылдың1 сәуірінде аяқталатындығын естеріңізге салады. Мерзімінде төленбеген салықтар бойынша кешіктірілген әрбір күніне ҚР Салық кодексінің 117-бабының 2-тармағына сәйкес өсімпұл есептелетіндігін естеріңізге салады.&nbsp;<blockquote>«Берешектер бойынша мәліметті Мемлекеттік кірістер комитетінің порталы, алдағы төлемдер«kgd.gov.kz» сервисінде, &nbsp;"E-salyq Azamat" мобильді қосымшасында, сондай-ақ, банктердің «Kaspi.kz» және «Homebank»мобильді қосымшаларынан көріп, төлеуге болады. &nbsp;Салық төлеу арқылы балаларымызға лайықты болашақ сыйлауға және еліміздің дамуына өз үлесімізді қосуға шақырады. Мекен-жайы:Қызылорда қаласы, Н.Назарбаев даңғылы 23 (40-04-70 ішкі 4207)», - делінген Қызылорда қаласы бойынша Мемлекеттік кірістер басқармасының хабарламасында. &nbsp;</blockquote>&nbsp;фото: Нұрболат Нұржаубай

Салық төлеу мерзімі 1 сәуірде аяқталады

Өрге озған өңірдегі өнеркәсіп

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласы әкімдігінің баспасөз орталығында өткен брифингте Қарауылтөбе ауылдық округінің әкімі Еркін Ахетов 2023 жылы атқарылған жұмыстар мен алдағы міндеттерге &nbsp;тоқталып өтті.<blockquote> - Өткен жылы ауылдық округтің жаңадан қоныстанушы аумағындағы 14 көшеге қиыршық тас төселіп, 1,3,5 көшелеріне жарық бағаналары орнатылды. Округтің кіре беріс автокөлік жолына және Байсейітов көшесіне, сондай-ақ, Ж.Әбдіхалықов, А.Құнанбаев және Желтоқсан көшелеріне жаяу жүргіншілер жолы салынды. «Өңірлерді дамыту» бағдарламасы аясында А.Иманов тұйығы мен А.Құнанбаев көшесінің аяқ жағы жарықтандырылды. «Ауыл - ел бесігі» бағдарламасы аясында Желтоқсан көшесіне асфальт төселді. Электр желілерін жаңарту бағытында, 8 дана КТПН, 15 км құрайтын электр бағаналары орнатылды. 150 орындық ауылдық клуб пайдалануға берілді. Ал, биыл жаңадан қоныстанушы аумақтағы 12 көшеге жаяу жүргіншілер жолы салынады, - деді ауылдық округ әкімі Еркін Әбдірайханұлы.&nbsp;</blockquote> Жалпы, ауылдық округте 119 кәсіпкерлік нысан нақты жұмыс істеуде. Өткен жылы ауыл тұрғындары мемлекеттік бағдарламалар аясында бірқатар жобалар ұсынып, &nbsp;нәтижесінде кәсіп бастағандар қатары 19-ға толыққан. Яғни, «Іскер» бағдарламасы аясында 5 жоба қаржыландырылса, «Аграрлық несие корпорациясы» бағдарламасы аясында 2 жоба және жастарға арналған 2,5%-дық несие беру бағдарламасы арқылы 2 жоба мақұлданды. &nbsp;Ұлттық жоба шеңберінде екінші деңгейлі банк арқылы жеңілдетілген несиеге 1 жоба қолдау тапты.&nbsp;Бұдан бөлек, Жаңа бизнес идеяларды іске асыруға арналған бағдарлама аясында 3 жоба мемлекеттік грантқа ие болды. &nbsp;&nbsp;Фото: Қызылорда қаласы әкімінің баспасөз қызметі&nbsp;

Қарауылтөбеде 119 кәсіпкерлік нысан бар

<a href="https://kyzylorda-news.kz/ru">Kyzylorda-news.kz</a>&nbsp; Мүгедектігі бар жандардың арасында сынаққа сынбайтын, еңбекте тынбайтын, қоғамда белсенді, рухы мықты жандар көптеп кездеседі. Облыстық мүгедектер қоғамының төрағасы С.Қуанышбайұлының айтуынша, аймақта 32 мыңнан астам мүгедектігі бар жан тіркелген екен.&nbsp;Бұл – осынша мәселе, осынша тағдыр талайына түскен жан бар деген сөз. Төрт құбыласы түгел адамдарға да тұсау көп заманда оларға қиындықтың салқыны соқпайды деу жалған болар. Сондықтан «эйблизмнен не үшін арылу керек?» деген сұраққа жауап іздегенді жөн көрдік.Ең әуелі айтатынымыз, мүгедектігі бар адамдар қоғамда дискриминация көріп жатады. Осыған байланысты «эйблизм – адамды мүгедектік белгілеріне қарай алалау» дегенді білдіретін термин енгізіліпті. Бүгін аңдамай айтылған сөз қоғамда алалауды қалай өршітетінін талқылаймыз, талдаймыз. Себебі, жоғарыда айтқандай, сау адамның сау-тамтығын қалдырмай, саусағымен нұқып тұрып алалайтын заманда мүгедектерге шүйлікпейтіндер жоқ дей алмаймыз.Сөз - құдіретРеспубликадағы «ITeachMe құзыретті дамыту орталығының» директоры Захира Бегалиева мүгедектігі бар адамдарды қолдап, олардың жұмысқа тұруына, қоғам өміріне белсене араласуына көмектеседі. Маман ең әуелі эйблизм туралы айтып, қоғамда болып жатқан жайттарды жайып салды. З.Бегалиева қанша жерден абай болған күннің өзінде эйблизм адаммен бірге жасап келе жатқанын айтады. Бұл қоғамда алауыздық пен мүгедектігі бар адамдарды алалауды өршіте түседі дейді.<blockquote>– Көпшілік кей сөздің мағынасын жете түсіне бермейді. Сондықтан адамдар біле тұра біреудің намысына тиеді деу қиын. Қоғам үшін кейбір сөз бен сленг үйреншікті болып кеткені сонша, кейде оның белгілі бір топқа кері әсер ететінін түсінбейді. Әуежайда әдетте «арбаға отырыңыз» деп жатады. Ал арба – әуелден-ақ жүк тасу құралы. Осы сәтте де мүгедектігі бар адам өзін адамдар үшін жүк, ауыртпалық деп біледі.</blockquote><blockquote>«Арба» деген сөзді алмастыру керек деп ойлаймын. Болмай бара жатса, әуежай қызметкерлерінің «Сізге қалай көмектесейін?» деп сұрағаны жеткілікті. Бірден «арбаға отырыңыз» демеу керек. Әрине, олар мұны ренжітейін, кемсітейін деп айтпайды, мен мұны білместікке балаймын. Кейде әуежайда көзі нашар көретіндерге «Ешқайда кетіп қалмай осында тұрыңыз. Қазір қайтып келемін» дейді. Ол қайда кетуі мүмкін? Көзі көрмейтінін еске салудың керегі не? – дейді ол.</blockquote>Тағы айтайық, ең қарапайым мысал, «мүмкіндігі шектеулі жан» деп жүргендер әлі көп. «Мүгедектігі бар тұлғалар, адамдар» деу керек. Біз – қоғамның бір бөлігі, тұлғамыз. «Жан» деп қоғам мүгедектігі бар адамдарды әлсіз етіп көрсетіп, оларды бір елеске теңейтіндей әсер қалдырады емес пе?! Тағы бір жиі кездесетін жайт бар. Көпшілік жиында «өзіміз болсақ, істей береміз ғой, ал мүгедектігі бар адамдар келсе, олар үшін бәрін басқаша ойластыру керек» деп жатады. Біз автоматты түрде «өзімізге» кірмей, шеттетіліп қаламыз. «Өзіміз» дегендер – сау адамдар, ал біз бөлек қоғам, тап сияқтымыз. Мұндай кезде «өзіміздің» орнына «мүгедектігі бар және мүгедектігі жоқ адамдар» дегенді қолданған дұрыс секілді.Захира ханым бала жастан мүгедектігі бар адам жайлы дұрыс түсінік қалыптаспағандықтан, көп адам оларды автоматты түрде аяп тұратынын айтады. Маман мұндай көзқарастан арылған жөн дейді.<blockquote>– Жұрт мүгедектігі бар адамды мүсіркеп, аяныш білдіргенді міндет санайтындай. Ақсап жүргеніңді көріп, «Ойбу, бейшара-ай, аяғың ауырады екен» деп қамқор болады. Бірақ бұл тек кері әсер етеді. Аяқ ақсап, ауыратыны рас шығар. Дегенмен бұл мүгедектігі бар адам мүсәпір, бейшара дегенді білдірмейді. Аяқ қанша жерден ауырғанымен, мүгедектігі жоқ адамнан қаржы, әлеуметтік статус жағынан жағдайы жақсы болуы мүмкін. Бірақ біздің қоғамда мүгедектік алға шығып кете береді.Әлі күнге «арбаға таңылғандар», «арбадағылар» дейді. Орындықта отырғандарды «орындыққа таңылғандар», «орындықтағылар» деп жалпылай атамаймыз ғой. Аңдамай айтылған әр сөз мүгедектігі бар адамдарды қоғамнан күн сайын алыстатып жатыр. Жұрт әуелі адамның арбасын, құлақ аппаратын, балдағын, протезін көреді. Олай болмауы керек. Затты емес, оны қолданатын адамды көре білуіміз қажет, – дейді маман.</blockquote>Сөздің психологиялық әсеріБала үйде не көрсе, түзде соны жасайды. Ата-ана – баланың айнымас айнасы. Айтпағым, бала алғаш эйблизмді үйінде көреді екен. Балаға ұрысқан кезде түрлі диагнозды кемсіту мәнінде қолдану – эйблизмнің асқынған түрі.Ата-ана үйде баласын бір зат әкелуге жұмсады делік. Бала таппай келсе, «Соны да көрмедің бе, көзің соқыр ма?» деуі мүмкін. Естімей жатса, «Құлағың керең бе?» деп ұрысады. «Жынды» деген де осы тізімде бар. Бала достарымен сөзге келіп қалса, осылай келемеждеп шығады. Ал бұл сөздер біреудің диагнозы ғой. Бір-бірін «даун», «шизофреник», «семіз» «төрткөз» деп мазақтайды. Ол сөздің мағынасын да білмейді. Тек ойында түсініксіз ассоциация бар. Осылайша балада жастайынан «диагнозы бар адамдар қауіпті болуы мүмкін», «біздің ортаның адамы емес», «олардан алыс жүру керек» деген ой қалыптасып, стереотип жайыла түседі.Бала достарының мазағынан қашып көзі ауырса да, көзілдірік тақпай қоюы мүмкін. «Семіз» деген атақтан қорқып, тамақ ішпей қоятын балалар да бар. Жай айтылған сөз осылайша баланың дене жағдайына кері әсер етеді. Салдарын іштей сезіп отырған да боларсыз. Иә, негізі адам өзі қандай болса, аузынан сондай сөз шығады.Шиеленістің шешіміКез келген күрмеудің байланған жолы болса, шешілу амалы да болуы тиіс. Бірақ, ауру қалса да, әдет қалмайды. Ең қиыны – осы. Сұлу сөйлеудің сырын меңгерген қоғам ғана кемел адам болады. Ал кемелдік біліммен, көркем мінезбен келетіні ақиқат.<blockquote>– 10 жыл бұрын өзім де эйблизмге, адамдардың аңдамай сөйлейтініне тоқтау салғым келді. Қате сөйлегендердің бәріне түсіндіргім келіп, сөз таластырып та қалатынмын. Уақыт өте бизнес-серіктес, жора-жолдас қатары сирей бастағанын байқадым. Түсіндіру әдісім дұрыс болмаған екен. Олар мені ренжітіп алмайық деп, қарым-қатынасты үзгенді жөн көріпті. Бұлай кете берсем, қоғамнан ажырап қалатындай екенмін.Сондықтан эйблизммен күресер болсақ, мұны барынша адекват жолмен жүргізу керек. Көбірек айтып, арнайы видеонұсқау түсіріп, әлеуметтік желіде көптеп тарату керек. Эйблизм санамызға сіңіп қалғаны сонша, проблема бүгін-ертең шешіледі деу қиын. Ересектер арасында айтылып, түсіндірілуі қажет. Бірақ басты назарды балабақша мен мектептерге аударған жөн. Мысалы, неміс әліппесінде «К» әрпіне (киндерваген – ред.) мүгедектер арбасын қолданатын адамның суреті берілген. Осылайша бүлдіршін қоғамның мұндай өкілі де бар екенін және оларды дұрыс атай білу керек екенін біліп өседі. Ол бала өсіп, келесі ұрпақты тәрбиелейді. Бұл – тым ұзақ, бірақ түбі нәтижелі болатын күрес, – деді Сағатбек Қуанышбайұлы.</blockquote>Эйблизмді болдырмас үшін әр адам сөздік қорын бір сараптап шықса дейді. Сөздік қорды бір талдап шығып, біреуді кемсітуші сөздер болса, оны алмастыруға әрекет ету керек. «Бұл – қоғам өмірін жақсартуға жасалған амал» дейді мамандар. Бірдеңе демес бұрын нені меңзеп тұрғаныңды ойлану, тіркес мәніне үңілу керек. Аңдамай сөйлеп, ауырмай өлетін заманда қай жерде қалай үн қату керектігін білу маңызды. Абзалы, «Сөйлейтін жерде сөйлемесең, сөзің өледі. Сөйлемейтін жерде сөйлесең, өзің өлесің» дегенді қаперден шығармаған жөн.Өңірдегі жан жылытар жұмыстарСөз соңында Қызылорда облысындағы оң қадамдарды да тілге тиек еткенді жөн көрдік. Тағдырлы жандарды қолдау үшін атқарылып жатқан жарқын жұмыстар да жоқ емес. Мәселен, 2022 жылдың 12 айында жиналған мәліметтер бойынша 5735 аз қамтылған отбасы мен мүгедектігі бар адамдарға 30927,4 мың теңге сомасына қаржылық және қайырымдылық көмек көрсетіліпті. Тамақ, қатты отын баспасөзге жазуға және кәсіпкерлерге демеушілік жасалған.«Мүгедектерді жеке оңалту» бағдарламасына байланысты жұмыстар жақсы атқарылған. 2023 жылы облыста мүгедектігі бойынша мемлекеттік әлеуметтік жәрдемақы алатындар саны 3233 адам. Соның ішінде, I топтағылар 273, II топтағылар 1203, III топтағылар 1296; 7 жасқа дейінгі мүгедек балалар 130, 7-18 жас аралығындағы, І топтағы 45, ІІ топтағы 46, ІІІ топтағы 240 бала бар.Денсаулық басты байлық екенін ескерсек, ауырмайтын жолды іздегеніміз жөн. Ал &nbsp;тағдырлы жандардың жан емі жан жадыратар жылы сөз екені даусыз.Қаладағы қарқыны&nbsp;Қызылорда қаласында қазір 11 мыңнан астам мүгедектігі бар адам бар. Олардың құқықтарын қамтамасыз ету және өмір сүру сапасын жақсарту, қоғамдық өмірге бейімдеу бағытында қалалық жұмыспен қамту, әлеуметтік бағдарламалар және азаматтық хал актілерін тіркеу бөлімі біршама жұмыс атқарған.Өткен жылы бөлім тарапынан оңалтудың жеке бағдарламасы негізінде жүріп-тұруы қиын бірінші топтағы мүгедектігі бар 1057 адамның жеке көмекшілеріне әлеуметтік төлемдер төленіп, 184 есту мен сөйлеу қабілеті бұзылған мүгедектігі бар адамға кәсіби сурдоаударма жасау бойынша 17 ымдау тілі маманы қызмет ұсынған.Сондай-ақ, мемлекеттік әлеуметтік тапсырыс аясында психоневрологиялық ауытқуы және тірек-қимыл аппараты бұзылған балаларды оңалту және тәрбиелеу бағытында 35 мүгедектігі бар балаға күндізгі стационар жағдайында және 20 балаға үйде арнаулы әлеуметтік қызмет көрсетілуде. Мүгедектігі бар адамдарды қолдаудың қосымша шарасы ретінде қалада «Инватакси» қызметі барлығы 13 автокөлікпен көрсетілуде, оның 4-і арнайы гидравликалық көтергішпен жабдықталған.Иә, жағдай өз алдына жасала берер. Мұнан бөлек, «Өзгерістер жолы: Әр азаматқа лайықты өмір!» атты «Amanat» партиясының 2025 жылға дейінгі жол картасы аясында Қызылорда қаласында «Ten Qogam» мүгедектігі бар адамдарды қолдау орталығы жұмыс істеуде. Онда қоғамдық бірлестіктермен бірлесе отырып, мүгедектігі бар азаматтардың қоғамға бейімделуіне жәрдемдеседі. Психологиялық, әлеуметтік-құқықтық көмектер ұсынып, бекітілген жоспар аясында мәдени шаралар мен семинар-тренингтерді тұрақты түрде өткізеді.Басына қандай іс түсерін ешкім білмейді. Сол үшін де мүгедектерді мұқатудан аулақ болған жөн. Мәдениеттіліктің ең үлкені – көңілге қарап сөйлеу.&nbsp;Фото: БАҚ.КЗ

Аңдамай сөйлеудің айбы көп

&nbsp;<a href="https://kyzylorda-news.kz/">Kyzylorda-news.kz.</a> Қызылорда қаласы әкімдігінің баспасөз орталығында өткен брифингте Қосшыңырау ауылдық округінің әкімі Сейдуали Әбдіқадыров 2023 жылы атқарылған жұмыстар мен алдағы міндеттерді баяндады.<blockquote> - Өздеріңізге белгілі, округіміздегі ең өзекті мәселелердің бірі ауылымызды газбен қамтамасыз ету болатын. Өткен жылы осы бағытта округке қарасты Абай және Досан елді мекендерін газдандыру жұмыстары жүргізілді. Сонымен қатар, Досан елді мекеніндегі медициналық бекеттің құрылысы аяқталды, ендігі ретте құқықтық құжаттары рәсімделуде. Бұдан бөлек, Досан елді мекеніндегі 5 көшені асфальттау, 10 көшеге қиыршық тас төсеу жұмыстары жүргізілді.&nbsp;</blockquote><blockquote>Абай елдімекеніне кіре беріс автокөлік жолына жарық бағаналары орнатылды және Досан елдімекеніндегі көшелер жарықтандырылды. Сондай-ақ, Абай және Досан елді мекенінен мектепке баратын басты 3 көшеге &nbsp;жаяу жүргіншілер жолы салынды. Аталған жобалармен қатар, ауыл тұрғындарының сұранысына сәйкес Абай ауылындағы саябақ абаттандырылып, &nbsp;Досан ауылына жаттығу алаңы салынды. Ал, биыл округке қарасты Досан елдімекенін талапқа сай электр қуатымен қамтамасыз ететін боламыз. Бұл жоба бойынша құрылыс жұмыстары &nbsp;сәуір айында бастау алмақ, - деді ауылдық округ әкімі Сейдуали Әлайдарұлы.</blockquote> Бизнесті қолдау мен дамытудың мемлекеттік бағдарламалары шеңберінде атқарылған жұмыстардың нәтижесінде округте 227 кәсіпкерлік субъектілері жұмыс істеуде. 2023 жылы 35 кәсіпкерлік субъект тіркеліп, 35 жаңа жұмыс орындары ашылды. Мемлекеттік бағдарламалардың қолдауымен &nbsp;17 млн. теңге қаржыны құрайтын &nbsp;32 жоба қаржыландырылды. &nbsp;Сондай-ақ, «Еңбек» бағдарламасы аясында жалпы құны 19 млн. 660 мың теңгені құрайтын 12 жоба мемлекеттік қайтарымсыз грантқа ие болды. «Ауыл аманаты» бағдарламасы аясында 17 млн. теңгені құрайтын құс етін өндіру және пенаблок шығару жобалары қаржыландырылды.&nbsp;Фото: Қызылорда қаласы әкімінің баспасөз қызметі &nbsp;

Қосшыңырау жұрты "көгілдір отынның" игілігін көріп отыр

<a href="https://kyzylorda-news.kz/">Kyzylorda-news.kz</a> Өңір тарихымен бірге жасасып келе жатқан мекемелердің бірі – Қызылорда облыстық тарихи-өлкетану музейі. Бұл қасиетті орын бірнеше дәуірдің тарихын, этнографиясын, тұлғаларын, өнерін жинақы түрде ұрпақтан ұрпаққа жалғап отырған бірден-бір институт. Өңірдің мәдениеті мен рухани ордасына айналған облыстық тарихи-өлкетану музейіне биыл 84 жыл.Бұл облыстың құрылу тарихымен тамырлас кезең десе де болады. Музей Қазақ ССР Жоғарғы Советі Президиумы ұйымдастыру комитетінің 1939 жылдың 7 ақпанындағы қаулысының шешімімен құрылған. Алғашқы жылдары өз жұмысын өлке тарихы мен табиғатын зерттеуден бастаған музей тұрағы 1890-1896 жылы салынған Перовск Қазан – Богородтық шіркеуі орналасқан ғимаратта болыпты.1980 жылы облыстық атқару комитетінің шешімі бойынша музейге екі қабатты үй бөлінді де, 1985 жылдың 7 мамырында өз жұмысын бастайды. Музей орналасқан бұл ғимараттың өзі 1953 жылы салынса да, қалаға көрік беріп тұрған архитектуралық ескерткіштердің бірі. – Облыстық тарихи-өлкетану музейі – Сыр бойының өткені мен бүгіні жайлы баяндайтын үлкен мәдениет орталығы. Жанында «Ақмешіт» музейі және С.Айтбаев атындағы көркемсурет галереясы жұмыс істейді.2015 жылы облыстық музейде реконструкция және реэкспозиция жұмыстары жүргізіліп, жаңа заманауи кейіпке енді. 2014 жылы Сыр елінің жергілікті суретшілері мен қолөнершілерінің шығармашылықпен еркін айналысуына мүмкіндік беретін тұңғыш көркемсурет галереясы ашылды. Қазақстан Республикасына белгілі қылқалам шеберлерінің туындылары галерея экспозициясынан орын алып отыр. Қуантарлығы, жергілікті қылқалам шеберлері жұмыс жасайтын шығармашылық бөлмелер де галерея ғимаратында қарастырылған, – дейді музей директоры Сапар Көзейбаев.Облыс музейлерінің жалпы қоры 157996 экспонатты құрайды. Оның 3010-ы жаңа экспонатпен толықтырылған. Биыл 9997 экскурсия, 748 лекция, 633 көрме ұйымдастырылған. Облыста музейлерге келушілер саны 116064 адамды құрап, 6997 экспонат цифрлық форматқа көшірілген.<blockquote>– Облыстың 85 жылдығына орай «Жәдігерде бір сыр бар», «Тарихтағы сандар», «Музей энциклопедиясы», «Музей радиосы», «Жас өлкетанушы», «Құнды жәдігер», «Жәдігербаян», «Музей-Тур», «Тарих көмбесі», «Тұлғатану», «Бір әулеттің тарихы», «Тарихтағы сандар» атты жобалар жүзеге асырылуда.Қазіргі таңда төл тарихымыз бен ұлттық идеологиямызды дүниежүзіне насихаттайтын рухани-мәдени орталықтың қорында 60651 экспонат, 1000-ға жуық әшекей бұйымдар коллекциясы сақтаулы. Мәскеуден арнайы әкелінген 2000-ға жуық құнды археологиялық бұйымдар да сақталған. Сондай-ақ, «Шірік-Рабат, Жанкент, Сығанақ қалашықтарына жүргізілген археологиялық ғылыми-зерттеу жұмыстары кезінде табылған археологиялық экспонаттар, соның ішінде сақ дәуірінде алтыннан жасалған әшекей бұйымдарды да осы жерден табуға болады, – деді музейдің ғылыми хатшысы Асхат Сайлау.</blockquote>Биыл музей қоры еліміздің тарихына ғылыми жаңалық болып енген, &nbsp;Сыр елінің келешек брендіне айналатын жәдігерлер &nbsp;«Шірік-Рабат сақ жауынгері» және «Сығанақ ханшайымы» &nbsp;мүсіндерімен толықты. Облыс әкімі Нұрлыбек Нәлібаевтың қолдауымен «Шірік-Рабат сақ жауынгерінің» реконструкциясы белгілі археолог-ғалым Жолдасбек Құрманқұловтың жетекшілігімен орындалды. Ал «Сығанақ ханшайымының» реконструкциясы – бірлескен жұмыс тобының жасаған қажырлы жұмысының нәтижесі.Бұл бірегей жәдігерді Орталық Азияны зерттеу халықаралық институты мен Қожа Ахмет Яссауи атындағы халықаралық Қазақ-Түрік университеті мамандарының бірлескен зерттеу тобы Сығанақ қалашағы маңынан тапқан болатын. Оның алғашқы кейпі қазба авторы, Я.Гулямов атындағы археология институтының (Өзбекстан Республикасы) аға ғылыми қызметкері А.Искандеровамен бірлесіп жасалған. Бас сүйегінің негізіндегі графикалық реконструкциясын Ресей ғылым академиясы Уфа федералдық ғылыми-зерттеу орталығының ғылыми қызметкері А.Нечвалода орындады.Киім үлгілерін Алтын Орда дәуіріне жататын деректер мен қазба жұмыстары барысында табылған материалдарға сүйене отырып Татарстан Ғылым Академиясы А.Халикова атындағы Археология институтының ғылыми қызметкері Л.Макласова жасады. Реконструкция мүсінін және алтын мен қоладан жасалған әшекей бұйымдарын дайындаған Т.Жүргенов атындағы ұлттық өнер академиясы мамандарына өнертану ғылымдарының магистрі А.Назаров жетекшілік етті. Әшекей бұйымдар бойынша ҚР Мемлекеттік орталық музейінің археология орталығының ғылыми қызметкері Н.Төрежанова ғылыми жетекшілік жасады.Мұнда Санкт-Петербург, Стамбул, Ташкент, Қазан қалаларының баспасынан шыққан сирек кездесетін кітаптар мен қолжазбалар сақталуы. Айта берсек, қордағы дүниелерді санамалап бітіру мүмкін емес. Бірақ ерекше атап өтетіндері жетерлік. Соның бірі – шетелдік зерттеушілердің аса қызығушылығын тудырып жүрген артефакт – Жоңғар дулығасы. ХVІІ-ХVІІІ ғасырларға мерзімделген дулыға – Қазақстанда баламасы жоқ дүниелердің бірі.Музейде қазір 5 бөлім жұмыс істейді: өлке тарихы, археология және этнография, қор, экспозициялық-көрмелік, экскурсиялық-көпшілік бөлім. Өлкенің тарихы мен табиғатын баяндайтын 11 экспозициялық: «Кіріспе», «Өсімдіктер мен жануарлар», «Қасиетті Қазақстан және археология», «Сыр өлкесінің әлеуметтік-экономикалық дамуы», «Өлкеде Кеңес үкіметінің орнауы», «Ауыл шаруашылығының дамуы», «Қызылорда облысы Ұлы Отан соғысы жылдарында», «Облыстың әлеуметтік саласының дамуы», «Мәдениет және өнер», «Этнография», «Тәуелсіз Қазақстан» залы бар. Мұндағы құнды деректер ғасырлар тарихынан сыр шертіп қана қоймай, бүгінгі күннің мұраларымен ұштасып жатыр.Аймақта қадым заманнан келе жатқан қос тарихи ғимарат бар. Ішіне енсеңіз, түрлі жәдігерлердің көмбесіне куә боласыз. Ол – С.Айтбаев атындағы көркемсурет галереясы мен «Ақмешіт» музейі. Бұл екі ғимараттың бірі – әскери комиссариат болса, екіншісі – 1917 жылы әскери казарма ретінде пайдаланылған. Уақыт өте келе нысандар жаңа кейіпке еніп, көпшілік тамашалайтын мәдени ошаққа айналды.Облыс басшыларының тікелей қолдауымен 2014 жылы тарихи ескерткіштер тізіміне енген бұрынғы әскери комиссариат ғимаратына күрделі жөндеу жұмыстары жүргізіліп, облыстық музейдің бір бөлімі – Көркемсурет галереясы ашылды. Онда елімізге әйгілі суретшілер Ә.Қастеев, С.Романов, Г.Исмаилова, А.Ғалымбаева, С.Сенчихин, Қ.Қожықовтардың және Қазақстан Суретшілер одағының мүшелері, Қазақстан бейнелеу өнеріне өзіндік үлес қосып жүрген жергілікті қылқалам шеберлерінің қолынан шыққан туындылары орналастырылған. Галерея қорында жақын шет елдердің, еліміздің және жергілікті суретшілердің мыңға жуық туындылары сақталған.Ал «Ақмешіт» музейі – Николай патша заманынан бері келе жатқан, 1905 жылы салынған архитектуралық тарихи мұра. Музей бірнеше залға бөлінген. Бірінші зал – қаланың алғашқы Қамысқала болып негізі қаланған тұстан басталып, Ақмешіт, Перовск кезеңдеріне жалғасады. Екінші бөлімде Орынбордан астананың Ақмешітке көшірілуі, ағарту, денсаулық сақтау, мәдениет, тарихи ғимараттар мен ұлы тұлғаларымыз туралы құндылықтар орын алған. Үшінші зал облыстың құрылу тарихы және аймақтағы өндіріс салаларының дамуынан дерек берсе, соңғысы – зиялы қауым өкілдерінің қонақ бөлмесінің интерьер залы. Онда сол кездегі тұлғалар тұтынған жиһаздар мен мүліктер орналасқан. Сондықтан мұнда жас ұрпақтың өткен тарихты танып-білуіне зор мүмкіндік жасалған.Жалпы жаһандану заманында мәдени мұраны сақтап, өскелең ұрпақтың тарихи санасын қалыптастырып отырған облыс бойынша барлығы 14 музей халыққа қызмет көрсетеді. Олар – облыстық тарихи-өлкетану музейі, 7 аудандық тарихи-өлкетану музейі, Қорқыт ата мемориалдық музейі, Қазалы ауданындағы Ғ.Мұратбаевтың мемориалдық музейі, Шиелі ауданындағы Н.Бекежановтың мемориалдық өнер музейі және Ы.Жақаев атындағы күріш өсіру тарихы музейі, Қызылорда қалаcының тарихы музейі, Арал қалалық тарихи музейі.Тағылымды тарих пен дәстүрдің ұштасқан, ұрпақтар жалғастығының негізгі алтын көпірі. Сол себепті көнеден жеткен жәдігерлерді жинақтап, көздің қарашығындай сақтайтын мәдени орынның бәсі әрқашан биік. &nbsp;Фото: gov.kz

Сыр бойындағы тарих қоймасы

&nbsp;<a href="https://kyzylorda-news.kz/">Kyzylorda-news.kz</a>. Қазалы ауданы әкімі Мейрамбек Шермағанбет Әйтеке би кентіндегі бірқатар нысанның жұмысымен танысып, Әйтеке би кенті көшелерін аралады.Алдымен, «Қызылорда жылу электр орталығы» мемлекеттік коммуналдық кәсіпорнының «Қазалы-Теміржол жылу» филиалына барып, ондағы жылу беру жұмысының барысын көрді.Мұнда «Қазалы-Теміржол жылу» филиалының директоры Еркін Алпысбаев жылу беру орталығының атқарылған жұмыс барысымен таныстырып өтті.Қазалы ауданы әкімі Мейрамбек Зинабдинұлы мекеме басшысына тұтынушыларға жылу беруді үздіксіз қамтамасыз етуді, сонымен қатар, аудан орталығындағы тұрғын үйлерде жылу жүйесіндегі ақаулықтар орын алған жағдайда шұғыл қалпына келтіру жұмыстарын жүргізуді тапсырды.Мұнан соң «Арал-Сарбұлақ топтық су құбырларын пайдаланушы» Қазалы өндірістік бөлімшесіне барып, мекеменің жұмысын көрді. Сондай-ақ, бөлімше басшысы Дәулет Тұяқбаевқа тұрғындарды ауызсумен уақытылы қамтамасыз ету мақсатында үздіксіз жұмыс жасап, тұтынушылар ауызсуды қалыпты жағдайда пайдалану керектігін ескертті.Мұнан кейін Әйтеке би кентіндегі көмір қоймаларындағы қатты отынның қорын бақылап, «Алтын көпір» аумағы мен Қ.Ерімбет, Қ.Пірімов, Бегім ана көшелерін аралады. Сонымен бірге, жауапты сала басшыларымен Қазалы ауданы орталығындағы Жанқожа батыр көшесіне жүргізілетін жол жөндеу жұмыстарының жобасын талқылады.Қазалы ауданы басшысы Әйтеке би кенті әкіміне көше бойындағы істен шыққан жарықшамдарды қайта қалпына келтіру, ретсіз өскен шөптерді шабу, ағаш түптерін балақтау, қоршаулар мен бағаналарды, жол белгілерін сырлау және аудандық кәсіпкерлік бөлімінің басшысына аудан орталығындағы кәсіпкерлік нысандардың алдында тазалық жұмыстарын жүргізіп, ретке келтіру жөнінде кәсіпкерлерге ескерту беруді қатал тапсырды.

Жылу жүйесінде кедергі болмауы тиіс

<a href="https://kyzylorda-news.kz/">Kyzylorda-news.kz.</a> Еңбек адамы дегенде елдің ойына алдымен кәсіподақ ұйымдары оралатыны айқын. Өйткені, оның құқығын қорғайтын да, көмек беретін де бірден-бір қоғамдық ұйым – кәсіподақ.&nbsp; Аймақтағы кәсіподақтар бірлестігі құрамында қазірде 12 салалық кәсіподақ болса, оның ішіне 1007 кәсіподақ ұйымы,&nbsp; 96 812 мүше біріккен. Өткен жылы жаңадан 16 бастауыш кәсіподақ ұйымы құрылып, 644 жұмыскер оның мүшесі атанды.Аумақтық кәсіподақтар бірлестігі мен ҚР Кәсіподақтар федерациясының 2021-2025 жылдарға арналған кешенді жоспарына, облыстық кәсіподақтар бірлестігінің негізгі іс-шаралар жоспарына сай бас кеңестің шешімімен 2023 жыл – «Қауіпсіз еңбек жылы» болып белгіленіп, соған орай түрлі шаралар ұйымдастырылды.Сонымен қатар облыс әкімі бастамасымен&nbsp; 52&nbsp; ірі кәсіпорын мен облыс әкімдігі, жұмыс беруші және облыстық кәсіподақтар орталығы арасында «Еңбек ұжымындағы әлеуметтік-еңбек жағдайы мен өндірістік процестердің тұрақтылығын қамтамасыз ету, жұмыс орындарын сақтау және персоналды жұмыспен қамтуды қамтамасыз ету мәселелері бойынша өзара түсіністік және ынтымақтастық туралы» меморандумдар жасалды. Келісімдер аясында кәсіподақ ұйымдарына ұжымдық шарттарды қайта қарастырып, өзгерістер енгізу ұсынылды.Қауіпсіз еңбекті ұйымдастыру, еңбек жағдайының қауіпсіздігін қамтамасыз ету, кәсіби сырқатты және өндірістегі зақымдануды болдырмау шаралары өткізілгеніне қарамастан, облыс өндірістерінде жазатайым оқиғалар болып жатады. Мәселен, өткен жылдың 12 айында еңбек қызметімен байланысты 45 жазатайым оқиға тіркелді. Кәсіподақтың негізгі қызметінің бірі еңбек қауіпсіздігі екенін ескерсек, ол бойынша 736 өндірістік кеңес құрылып, 758 техникалық инспектор қоғамдық жұмыс атқаруда.Айта кетейік, облыста кәсіподақ белсенділерін, мүшелерін оқыту жұмыстары тұрақты жүргізіліп келеді. Өткен жылы аумақтық кәсіподақтар бірлестігі 21 семинар-оқу жиынын өткізсе, оған 1297 маман қатысқан.Бұл – еңбек адамының жұмыс барысындағы қауіпсіздігі мен құқығын қорғаушылар саны артып жатқанының айқын көрінісі.&nbsp;&nbsp;

Еңбек адамы – ел мақтанышы

<a href="https://kyzylorda-news.kz/">Kyzylorda-news.kz</a> Көзге көрнекті көрінетін кейбір өнімдер өндірісте революция арқылы пайда болды. Мәселен, шыны – құм мен әктастың қосындысы. Ежелгі дәуірде жоғары температурада балқытып, суыту арқылы жасаған. Содан бері әйнек адамзат өмірінде айрықша орын алды.Күнделікті тұрмыста тұтынып, мәдениет пен өнеркәсіп саласында да салмағын сездірді. Аймағымызда шыны зауытының іске қосылғаны белгілі. Қазір жұмыс қарқынды. Тек шыны өндірудің оңай емес екенін айтқымыз келеді. Қайнаған ыстық пен жалынның ортасында жүруге төзімділік керек.<h2>600 тонналық пеш һәм 1550 градус</h2>Шындығында, шыны шығару процесі тым күрделі. Материал мінсіз қалыпқа түскенше даярлаудың бірнеше сатысы жүргізіледі. Тіпті тиісті температураға қоюды да қадағалау шарт. Әйтпесе, шынының шым-шытырығы шақшадай басты шарадай етеді.<blockquote>– Өндірістегі технология ерекше. Маған таңсық болғаны, 24/7 табиғи газ, электр қуаты және сумен қамтамасыз етілуі болды. 600 тонналық алып пешті іске қосқаннан кейін кемінде 10 жылға дейін үздіксіз жұмыс істеуінің өзі таңданыс тудырады. Кварц құмы, доломит, әктас, шпат, сода, натрий сульфаты қосындысын пеште 1550 градуста қыздырып, шыны массаға айналдырамыз. Содан кейін флоат-ванна бөлімінде борт пішіндеу машина арқылы қажетті қалыңдықты келтіріп, шыны массаның температурасын бәсеңдету қажет. Ал күйдіру кезеңінде температураны 50-60 градусқа дейін салқындатуда кемшілік жібермеу керек. Сондықтан мұның бәрін қатаң қадағалаймыз. ISRA Vision қондырғысымен белгіленген стандарт бойынша шынының маркасы, құрамындағы дефекті, оның қалыңдығы және техникалық параметрі анықталып, автоматты түрде қапталады. Осылайша күніне 500 тонна шыны шығарамыз, – деді өндіріс бөлімі басшысының орынбасары Ғалымжан Қуатов.</blockquote>Иә, шамадан тыс шихта шаруаға кері әсер етеді. Сондықтан шикізат материалының мөлшерін рецепт бойынша дәлме-дәл есептеу маңызды. Оны пешке жылдам жеткізіп, істі жүйелеген жөн. Ол балқыту кезіндегі кедергінің алдын алып, шыны бетіндегі кемістікті жояды. Байқасаңыз, пеште температура жоғары, жалын қызу болады. Демек оның ыстығы сыртты да шарпиды деген сөз. Мұндайда мазасызданбай жұмыс істейтін қызметкерлерге қол соғуға болады.<blockquote>– Осы уақытқа дейін мұнай-газ саласында жұмыс істедім. Шыны зауытында алғаш тәжірибе алмасуым. Мен үшін қызықты әрі күрделі жоба. Әр күні түрлі тапсырма орындап, жан-жақты іздену ынталы қызмет атқаруыма түрткі болды. Иә, зауытты іске қосуда қиындық болғаны рас. Бірақ Қазақ-Қытай арасындағы келісім, көрсетілген қолдау мен әр жұмысшының маңдай тер еңбегі арқылы мақсатқа жеттік. Бүгінде жұмыс жүйелі. Қауіпсіздік жоғары деңгейде қарастырылған. Техникалық қауіпсіздік қағидалары жиі түсіндіріледі. Сондай-ақ қондырғылар қуатты. Басым көпшілігі Англия, Түркия, Италия, Жапония, Қытай, Германиядан әкелінген. Шыны өндіру процесіне сай бәрі сапалы жабдықталған, – деді ол.</blockquote><h2>Энергия үнемдейтін шыны шығарылмақ</h2>Әйнектің түр-түрі бар. Олар сыртқы түрімен және физикалық қасиетімен ерекше. Сапа жағынан да сан алуан әйнек кездестіруге болады. Рас, шыны шытынайды, әйнек сынады деген көзқарас қалыптасқан. Оған дәлел де жоқ емес. Өйткені айнаның өзі қолдан сусып түскенде қақ бөлінеді. Бірақ әлемдегі тәжірибе шойыннан берік шыны шығаруға болатынын көрсетті. Бұл Жапонияда жүзеге асқан көрінеді. Өңіріміздегі өндіріс орнында да жаңалық бар.<blockquote>– Шыны қалыңдығына байланысты бөлінеді. Зауытта 3,5 және 12 миллиметр аралығында &nbsp;шыны өндіріледі. Өткен жылы қараша айында қоңыр және күміс түсті таңдап, осы бағытта жұмыс істеп отырмыз. Ал алдағы сәуір айында энергия үнемдейтін шыны шығару ойда бар. Әрине, оның құны жоғары болмақ, десе де өзін ақтайтынына сенім мол, – деді &nbsp; Ғ.Жұма-ділдәұлы.</blockquote>Өндірістің өрісі кеңейгені құба-құп. Жұмыс осы қарқында жалғасса, нарықта нанымды нәтижеге жетеріміз анық.<h2>Қытай азаматтарына қазақ тілі оқытылады</h2>Зауытта Қытай азаматтары да жұмыс істейді. Қазіргі таңда жұмысшы саны – 372. Оның ішінде 102 қытайлық бар. Бәрі шыны өндіруде шет қалып жатқан жоқ. Тиісінше, бұл коммуникация орнатуға да кедергі емес. Жұмысшылар арасында жоғары деңгейде қарым-қатынас орнатылған. Әр цехта бір аудармашыдан бар екен. Сонымен қатар қытай азаматтарына қазақ тілін үйрету қолға алынған. Зауыттың ерекшелігі де осы. Сабақ жұмыстан тыс уақытта жүргізіледі. Яғни, сенбі күні 3 сағат кейде 1 сағат көлемінде аудармашылар арнайы сабақ өтеді. Сайып келгенде, бұл тілдік мәселенің тығырыққа тіремейтінін аңғартты. Егер екіжақты байланыс бекіп, жұмысшылар бір-бірін түсінсе, өндірісті өрге сүйрейтіні ақиқат. &nbsp;

Өңірдегі өндіріс орнында оң өзгеріс бар

<a href="https://kyzylorda-news.kz/">Kyzylorda-news.kz.</a>&nbsp; &nbsp;Сот жұмысы сотқа іс бойынша тарап болып табылатын жеке және заңды тұлғаларды шақыру мен хабарлаудан басталады.&nbsp;Іске қатысатын адамдар, олардың өкілдері, сондай-ақ, куәлар, сарапшылар, мамандар мен аудармашылар сот отырысының немесе жекелеген процестік әрекеттерді жасаудың уақыты мен орны туралы хабарландырылады және соттың шақыру қағаздарымен сотқа шақырылады, яғни оларғаэлектрондық пошта мекенжайы немесе ұялы байланыстың абоненттік нөмірі бойынша хабарлама жіберу арқылы, сондай-ақ хабарлаудың немесе шақырудың тіркелуін қамтамасыз ететін өзге де электрондық байланыс құралдары пайдаланыла отырып хабарлануы немесе шақырылуы мүмкін. Егер электрондық пошта мекенжайы немесе ұялы байланыстың абоненттік нөмірі немесе хабарлаудың немесе шақырудың тіркелуін қамтамасыз ететін өзге де электрондық байланыс құралдары туралы мәліметтер болмаған жағдайда, соттың шақыру қағазы немесе қағаз жеткізгіштегі өзге де хабарлама белгілі болған соңғы тұрғылықты жері немесе тұрған жері бойынша жіберіледі, ал сотқа хабарланған мекенжай бойынша адам іс жүзінде тұрмайтын болса, хабарлау немесе шақыру оның жұмыс орны бойынша жіберілуі мүмкін. Адресатқа электрондық пошта мекенжайы немесе ұялы байланыстың абоненттік нөмірі бойынша оларды жөнелту уақыты растайтын есеппен тіркеледі, ал қолма-қол жеткізілген жағдайда, сотқа қайтарылуға жататын шақыру қағазының түбіртегінде немесе өзге де хабарламаның көшірмесінде белгіленеді.&nbsp;Қазалы аудандық сот әкімшісінің бас маман-сот мәжілісінің хатшысы Жадыра Бержанның мәлімдеуінше, егер шақыру қағазын жеткізген адам іс бойынша хабарландырылатын немесе шақырылатын адамды тұрғылықты жерінен немесе жұмысынан таба алмаса, онда шақыру қағазы онымен бірге тұратын отбасының кәмелеттік жасқа толған мүшелерінің біріне не олардың келісімімен басқа адамға, ал олар болмаған кезде – үй-жайлардың (пәтерлердің) меншік иелері кооперативінің немесе көппәтерлі тұрғын үйлер мүлкінің меншік иелері бірлестігінің не жай серіктестігінің, тұрғын үй-пайдалану және коммуналдық қызметтер көрсету қызметінің уәкілетті тұлғасына не тұрғын үй басқарушысына, жергілікті өзін-өзі басқару органының немесе адресаттың тұрғылықты жері бойынша тиісті атқарушы органның не оның жұмыс орны бойынша әкімшіліктің уәкілетті тұлғасына тапсырылады. Бұл жағдайларда шақыру қағазын қабылдап алған адам шақыру қағазының түбіртегіне өзінің тегін, атын, әкесінің атын (егер ол жеке басты куәландыратын құжатта көрсетілген болса), сондай-ақ, адресатқа қатыстылығын немесе атқаратын лауазымын көрсетуге міндетті. Шақыру қағазын қабылдап алған адам оны кешеуілдемей адресатқа тапсыруға міндетті. Көрсетілген жағдайларда соттың шақыру қағазы тиісті түрде тапсырылған болып есептеледі.– Адресат уақытша болмаған жағдайда шақыру қағазын жеткізетін адам қағаз жеткізгіштегі шақыру қағазының түбіртегіне немесе өзге де, хабарлауға адресаттың қайда кеткенін және оның қашан қайтып келуі мүмкін екенін белгілейді. Адресат соттың шақыру қағазын немесе қағаз жеткізгіштегі өзге де хабарламаны қабылдап алудан бас тартқан кезде, оларды табыс етуші адам, сотқа қайтарылатын шақыру қағазына немесе өзге де хабарламаға тиісті белгі қояды. Сондай-ақ, бұл туралы акт жасауға құқылы. Адресаттың соттың шақыру қағазын немесе қағаз жеткізгіштегі өзге де хабарлауды қабылдап алудан бас тартуы істі қарауға немесе жекелеген процестік әрекеттерді жасауға кедергі болмайды және адам тиісті түрде хабарландырылған болып есептеледі.&nbsp;Егер сот отырысына келуден жалтару белгілері анықталса сотқа құрметтемеушілік белгілері болып танылады және ол бойынша жауаптылық көзделгенін ескерген жөн, – дейді Қазалы аудандық сот әкімшісінің бас маман-сот мәжілісінің хатшысы Жадыра Бержан.&nbsp;Жалпы, сотқа құрмет көрсету, ол өз мемлекетіңді, заңыңды сыйлау. «Тәртіпке бас иген құл болмайды, тәртіпсіз ел болмайды» деп Бауыржан Момышұлы айтқандай, әркім тәртіпті өзінен бастап, мемлекетімізге, бір-бірімізге құрметпен қарап, заңдарды бұлжытпай сақтаған жөн.Фото: Нұрболат Нұржаубай

Жадыра БЕРЖАН: Әркім тәртіпті өзінен бастағаны абзал

<a href="https://kyzylorda-news.kz/">Kyzylorda-news.kz.</a>&nbsp;Қ.Нұрмаханов атындағы №95 білім ордасында мектеп директорының бейіндік оқыту жұмысы жөніндегі орынбасары Л.Дәстенованың ұйымдастыруымен «Мамандық таңдау – маңызды қадам» тақырыбында&nbsp;оқушыларға кәсіби бағдар беруге арналған кеш өтті. Шарада мұғалім, дәрігер, музей қызметкер, журналист, дәнекерлеуші, ветеринар, аспаз, кондитер, автомеханик және тағы басқа мамандық иелері қонақ болды.&nbsp;Кеш басталамас бұрын мектеп психологы Д.Аққоянова қонақтармен «Қуанышты шеңбер» тренингін өткізді.&nbsp;– Мектеп – шәкірттерді тек білім нәрімен сусындатып қана қоймай, олардың болашағына даңғыл жол салып береді. Әрбір шәкірттің ертеңіне алаңдаған ұстаз олардың кемел келешектің иесі болуын көздейді. Қазіргі білім беру жүйесіндегі жаңа мазмұн білімнің тұлғаға бағытталуын, олардың белгілі бір мамандықты игеруіне ықпал етуін қамтиды. Сондықтан шәкірттеріміздің өз қабілеттері мен мүмкіндіктеріне қарай&nbsp; жүрек қалауымен жақсы мамандық таңдау жолында бағдарлы білім алып, әрқайсысы дүниенің бір кірпіші болып қалануын тілейміз. Кешіміздің мақсаты да – осы. Болашаққа дайындықты бүгіннен бастауымыз қажет. Осы орайда кешімізге ауданымызда еңбектің әр саласында қызмет етіп жүрген іскер мамандарды шақырып, ой бөліскелі отырмыз, – деді мектеп директорының тәрбие ісі жөніндегі орынбасары Ж.Көпенов.Кеш барысында мектептің ән-әуез пәнінің мұғалімі&nbsp;Б.Қауымбай дайындаған «Домбыра» үйірмесінің мүщелері композитор Бораш Әбеновтың «Желдірме» күйін орындады. Шәкірттер «Мамандықтар әлемі» көрінісін сахналады. Бүлдіршіндер «Құрбылар» биін билесе, «Еркін микрофон» айдарында оқушылар көкейде жүрген сауалдарын қонақтарға жолдап, жауап алды. Әр маман иесі өзінің жұмысының қызығы мен қиындығын айтып, ақыл-кеңес берді. Аталған мектеп түлегі, «ASTANA OPERA» Мемлекеттік опера және балет театрының солисі, Қазақстан Республикасы Үкіметінің «Дарын» мемлекеттік жастар сыйлығының лауреаты Алтынбек Әбділда бейнеролик арқылы сәлем жолдады. Мектеп тәлімгері Жанна Елеусізқызы «Жақсы адамдарым» әнімен кешті қорытындылады.

Қазақстан және Қызылорда облысының жаңалықтары