<a href="https://kyzylorda-news.kz/">Kyzylorda-news.kz</a> &nbsp; Бүгінде Ұлытау облысының «Кеңгір» мен «Жезді» су қоймаларынан түскен судың және Жамансарысу, Жақсысарысу өзендерінен келген судың мөлшері жылдағыдан көп болуына байланысты Сарысу өзенінің суы өз арнасына толып ағуда.Сарысудың толуына байланысты Ұлытау және Қызылорда облыстарына ортақ өзенді бірлесіп тиімді пайдалану мақсатында басқарма басшысы Т. Дүйсебаев Ұлытау облысының жергілікті атқарушы органдарымен кездесу өткізді.Бүгінгі күнге, Сарысудың суы соңғы құярлығы Телікөл көлінен 40-50 шақырым қашықтықта келеді. Ал, Телікөл көлінен 90-100 шақырым қашықтықта су арнасына сыймай жайылымдық, шабындық алқаптарға жайылуда.Жайылымдық алқапта қоныстанған шаруалардың жағдайын көзбен көру мақсатында облыс әкімінің орынбасары Бахыт Жаханов және жауапты сала басшылары Сарысу өзенінің бойын аралады.Жалпы Сарысу өзеніне келген судың пайдасы 400-500 мың гектар аумақ суландырылып, мал шаруашылығымен айналысатын шаруаларға жайылымдық алқаптардың шөбі көгалдандырылады.Осының нәтижесінде, шаруалар судың келгеніне қуаныштарын білдіріп, төрт түлік пен үй-жайларының суда қалу қауіпі жоқ екенін жеткізді.<img src="https://knadmin.beoblood.kz/uploads/434056706_1982435842151918_371805314904880768_n_c7b0417255.jpg" alt="434056706_1982435842151918_371805314904880768_n.jpg">

Сарысу бойы суландырылып, жайылымдық алқап көгалдандырылуда

<a href="https://kyzylorda-news.kz/">Kyzylorda-news.kz</a> &nbsp; &nbsp;Оқиға еліміздің оңтүстік өңірінде, яғни Бәйдібек ауданында болған. otyrar.kz-тің хабарлауынша, қайынағасы туған келінін аяғымен теуіп, шашынан тартып ұрған. Бәйдібек аудандық сотында азамат Н.Ж-ға қатысты әкімшілік құқық бұзушылық туралы іс қаралды. Аталған іс бойынша құқық бұзушы Н.Ж ақпан айының 21 күні сағат 21:00 шамасында өзінің туған інісі мен оның жұбайы А.А мен өзара келіспеушілік болып жатқан кезде араларына түсіп, жәбірленуші А.А-ның арқасынан аяғымен теуіп, шашынан тартып, ішінен және басынан ұрып, қасақана денсаулыққа жеңіл дәрежелі зиян келтірген. Сот отырысында құқық бұзушы Н. Ж өзінің кінәсін мойындады, алайда жәбірленуші А.А кешірім бермейтінін айтты. Сот құқық бұзушы Н.Ж-ны Қазақстан Республикасының Әкімшілік құқық бұзушылық туралы кодексінің 73-1-бабының 1-1-бөлігімен кінәлі деп танып, оған 15 (он бес) тәулiк мерзiмге әкiмшiлiк қамаққа алу жазасын тағайындады. Сонымен қатар, құқық бұзушы Н.Ж-ға 6 (алты) айға дейін жәбірленуші А.А еркiне қарамастан, оны iздестiруге, оның iзiне түсуге, оған баруға, онымен ауызша, телефон арқылы сөйлесуге және өзге де тәсiлдермен байланыс жасауға тыйым салуды көздейтін ерекше талап белгіледі. фото: kaz.orda.kz

Келінін арқасынан теуіп, шашынан тартып, басынан ұрған...

&nbsp; <a href="https://kyzylorda-news.kz/">Kyzylorda-news.kz</a> &nbsp;Құрметті аудан тұрғындары! Қадірлі ағайын!Елімізде 8 сәуірден бастап, Мемлекет басшысы Қасым-Жомарт Кемелұлының бастамасымен «Таза Қазақстан» экологиялық акциясы басталды. Науқан бес аптаға созылады. Әр аптаның «Таза өлке», «Киелі мекен», «Жасыл аймақ», «Өнегелі ұрпақ» сынды өзіндік тақырыптар берілген. Осыған сәйкес, Сыр өңірінде де, «Таза Қазақстан – таза аймақ» атты экологиялық науқаны басталып, облыс әкімінің сыр жұртшылығына үндеуі жарияланды.Құтты мекен – Қазалы ауданында да, наурыз айының басынан бастап, екі айлық көктемгі санитарлық-тазалық жұмыстары басталып кетті. Тазалық айында аудан орталығы - Әйтеке би кенті 7 аймаққа бөлініп, әрбір аймақ бойынша тазалық жұмыстары қарқынды жүргізілуде. Тазалық жұмыстары барысында аудан аумағындағы барлық тұрғын үйлер, кәсіпкерлік нысандардың аулалары мен көшелер күл-қоқыстан тазартылып, үйлерді әктеу, қоршаулар мен бағаналарды сырлау, ағаш түптерін әктеу, балақтау, көшеттер отырғызу, аяқ су арықтарын тазалау сынды басқа да көркейту-көгалдандыру жұмыстары жүргізілуде.«Тазалық – табалдырықтан басталады» дегендей, әрбір тұрғын тазалықты өзінің елді мекенінен, көшесінен, ауласынан бастап, тұтас бір ауданның айнасына айнала білуі тиіс. Көрікті көше мен таза аула – бұл әрине ауданның келбеті.Осыған орай, барша Қазалы жұртшылығын, мекемелер мен кәсіпорын ұжымдарын, кәсіпкерлерді елімізде бастау алған республикалық акцияға қатысып, игі іске атсалысуға шақырамын.«Жұмыла көтерген жүк жеңіл» дегендей, ортақ іске бірге үлес қосайық.

Мейрамбек Шермағамбет: «Жұмыла көтерген жүк жеңіл»

<a href="https://kyzylorda-news.kz/">Kyzylorda-news.kz</a> &nbsp;Қала әкімі Cерік Қожаниязовтың төрағалығымен өткен актив отырысында «Қызылорда жолдары» ЖШС төрағасы Алтынбек Шомановқа Қызылорда қаласының «Құрметті азаматы» атағы берілді. Бұл марапат өткен жылдың қорытындысында табысталуы тиіс болатын. Алайда, белгілі себептерге байланысты марапаттау рәсімінің сәті бүгінге түскен.Жиында шаһар басшысы Серік Салауатұлы марапат иесіне жылы лебізін білдірді.<blockquote>– Алтынбек Дәуменұлы, Сіз басқаратын компания жол саласындағы көшбасшылардың бірі. Компания шаһарымыздың әлеуметтік-экономикалық өркендеуіне зор үлес қосты. Осы іргелі істерге Өзіңіз ұйытқы болдыңыз. Бүгінгі марапат сіздің пайғамбар жасына келген мерейлі күніңізбен тұспа-тұс келіп отыр. Қос қуанышыңызбен құттықтаймын. Алдағы уақытта да өңіріміздің дамуына атсалыса береді деп сенемін», – деді Серік Салауатұлы.</blockquote>Алтынбек Шоманов жол құрылысы саласында үздіксіз 41 жыл еңбек еткен. Ол өңірдің жол инфрақұрылымын дамытуға атсалысқан елге танымал азамат.Жиында марапат иесіне қалалық мәслихаттың төрағасы Ибадулла Құттықожаев және жол саласының ардагері Әтен Қалымбетов ізгі лебіздерін білдірді.

Қызылорда қаласының «Құрметті азаматы» атағы берілді

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы әкімінің орынбасары Дархан Тұрсынбаевтың төрағалығымен өткен мәжілісте бюджеттің кіріс бөлігінің өсуін қамтамасыз ету және салық салу базасының резервтерін анықтау, оны кеңейту мүмкіндіктері қаралды.Жиында қала әкімімен бекітілген «Қызылорда қаласы бюджетінің салық салу базасын кеңейту жөніндегі іс-шаралар жоспары» талқыланып, уәкілетті органдардан жоспарға сәйкес қалалық кірістер басқармасына тиісті ақпарат ұсыну тапсырылды.2024 жылдың 1 тоқсаны қорытындысымен жергілікті бюджеттің жоспары 114,4 пайызға орындалып, бюджет түсімдерінің өсімі байқалған. Осы ретте, Дархан Есалыұлы 2024 жылға бекітілген жоспарды өз деңгейінде орындау үшін алда бюджетке түсетін түсімдер бойынша жоспарланған кіріс көзін сапалы әрі толық орындауды, салықтық берешектерді өндіру жұмыстарын күшейтуді жүктеді.Сонымен қатар, қаланың барлық көшелері мен кент, ауылдық округтердегі коммерциялық объектілерге түгендеу жұмыстарын жүргізу мақсатындағы бірлескен жұмысшы топ құрылмақ. Аталған жұмысшы топ қала көшелеріндегі, кент ауылдық округ әкімдері өз аймақтарындағы кәсіпкерлік нысандары түгендеп, мәліметтерін мемлекеттік кірістер басқармасына ұсынатын болады.Қала әкімінің орынбасары салық базасын ұлғайту бағытында салаға жауапты бөлімдер мен кент, ауылдық округтердің әкімдері және кірістер органдары арасында өзара бірлескен жұмыс жүргізілгенде көрсеткіш нәтижелі болатынын атап өтті.

Салық базасын кеңейту мәселесі талқыланды

<a href="https://kyzylorda-news.kz/">Kyzylorda-news.kz</a> &nbsp; Былтыр 157 мың тұрғын үй салынған. Биыл 172 мың тұрғын үй салу көзделіп отыр.&nbsp;Мемлекет басшысы Өнеркәсіп және құрылыс министрі Қанат Шарлапаевты қабылдады. Бұл туралы Ақорданың баспасөз қызметі &nbsp;хабарлады.Қанат Шарлапаев өнеркәсіптік даму, геология, жер қойнауын пайдалану және құрылыс салаларындағы жұмыстың нәтижесі мен алдағы кезеңге арналған жоспары жөнінде баяндады.Шарлапаевтың айтуынша, биылғы қаңтар-ақпан айларында Қазақстанның өңдеу өнеркәсібіндегі өсім 7,4 пайызды құраған. Өндіріс көлемін ұлғайтуда машина жасау, металлургия, химия және жеңіл өнеркәсіп сияқты салалардың үлесі зор. Жалпы құны 1,5 триллион теңге болатын 180 жобаны жүзеге асыру жоспарланған. Соның арқасында 17,8 мың жұмыс орны ашылмақ.Былтыр 157 мың тұрғын үй салынған. Биыл 172 мың тұрғын үй салу көзделіп отыр. Сондай-ақ жалға берілетін 22 мың тұрғын үйдің құрылысына мемлекеттен 300 миллиард теңгеден астам қаржы бөлінген. «Отбасы банкі» арқылы қаржыландыру көлемі 300 миллиард теңгені құрайтын бағдарлама іске қосылады. Бұл ел азаматтарына 12 мың ипотекалық займ беруге септігін тигізеді.Жер қойнауын пайдалану құқығын беруге қатысты аукциондарды электронды форматта өткізу үшін E-Qazynakz цифрлық платформасының іске қосылған. Бұл бастама процестің ашықтығы мен қолжетімділігін едәуір арттырды.Қазіргі уақытта су басқан өңірлерде жаңа тұрғын үй салу үшін жобалық-сметалық құжаттаманың құнын бекіту жұмыстары аяқталып келеді.Қасым-Жомарт Тоқаев апаттан қираған тұрғын үйлерді тез арада қалпына келтіруді тапсырды.Фото: Ақорда

Тоқаев апаттан қираған тұрғын үйлерді тез арада қалпына келтіруді тапсырды

<a href="https://kyzylorda-news.kz/">Kyzylorda-news.kz</a> Ел дегенде еміреніп, жұрт дегенде жүгініп қызмет етіп, Шиелі ауданының экономикасы мен кәсіпкерлік саласын дамытуға өз үлесін қосқан арда азамат Әбдіманап Шорабаев тірі болғанда биыл зейнет жасы 63-ке толар еді. Оның есімі көзі тірісінде көмек сұраған адамның қолын қайтармай, атымтай жомарт жан ретінде танылып, игілікті істерге қолдау білдіргені үшін халық жадында сақтаулы тұр. «Жақсының аты, ғалымның хаты өлмейді» демекші, көзі тірісінде мешіт салып, жетімжесірге қол ұшын созып, аз ғұмырында көпке үлгі боларлық із қалдырған Әбдіманап Шорабаевты халық арасында «атымтай жомарт еді» деп еске алады.Кеше сәуір айының сегізінші жұлдызы, аудандық спорт мектебінде Шиелі ауданының «Құрметті азаматы», Ә.Шорабаевты еске алуға арналған 2008-2009 жылы туған жасөспірімдер арасында бокстан Х республикалық турнир бастау алды.&nbsp;Жыл сайын дәстүрлі түрде өтетін турнирдің ашылу салтанатына Шиелі ауданы әкімінің орынбасары Болат Ысмағұлов бастаған зиялы қауым өкілдері, жас спортшылар мен БАҚ өкілдері қатысты.&nbsp;Салтанатты шарада сөз алған Болат Ысмағұлов:&nbsp;<blockquote>– Құрметті спортсүйер қауым, турнирге қатысушы жас спортшылар. Елінің елеулісі болған, ауданның «Құрметті азаматы» Әбдіманап Дүйсенұлын еске алуға арналған республикалық турнирге қош келдіңіздер. Бүгінгі республикалық турнир биылғы жылы 10-шы рет ұйымдастырылып отыр. Бір қуантарлығы, спорттық шараға еліміздің түкпір-түкпірінен командалар қатысып, жарыстың кеңейіп келе жатқанын көрсетті. Киелі мекен саналатын шежірелі Шиеліге ат басын бұрып келулеріңізді – елге құрмет деп білеміз. Бүгінгі байрақты бәсекеде оза шапқан спортшыларымыз елдің ертеңіне айналып, әлем елдері алдында байрағымызды көкке желбіретеді деп сенеміз, – деді.&nbsp;</blockquote>Ә.Шорабаевтың үлкен әпкесі Әтіркүл Шорабаева мен ағасы Оразәлі Байділдаев естелік сөз сөйлеп, қатысушыларға сәттілік тіледі.&nbsp;Иә, жыл өткен сайын құлашын кеңге жайып келе жатқан турнирге биыл 9 облыстан 250-ге жуық спортшы қатысуда. Жоспарланған жарыс үш күнге созылып, марапаттау рәсімі 10 сәуір күні өтеді.

Шиеліде 9 облыс бас қосты

&nbsp;<a href="https://kyzylorda-news.kz/">Kyzylorda-news.kz</a> &nbsp;Ақша Biz Birgemiz Qazaqstan қоғамдық қорына жолдарды жөндеуге, құтқару тікұшақтарының жұмысын қамтамасыз етуге, генераторлар, сорғылар, үрлемелі қайықтар мен дәрі-дәрмектер сатып алуға жіберіледі.Су тасқыны жағдайы бірқатар облыстарда күрделі күйде қалып отыр. Мыңдаған отбасы уақытша орналастыру орталықтарында. Бүгін Kaspi.kz қосымша 500 миллион теңге бөлді. Бұл туралы <a href="https://sn.kz/sn-akparat-agyny/111563-kaspi-kz-su-taskynynan-zardap-shekkenderge-komek-retinde-tagy-500-million-tenge-audardy">sn.kz</a> ақпарат агентігі хабарлады.&nbsp;Ақша Biz Birgemiz Qazaqstan қоғамдық қорына жолдарды жөндеуге, құтқару тікұшақтарының жұмысын қамтамасыз етуге, генераторлар, сорғылар, үрлемелі қайықтар мен дәрі-дәрмектер сатып алуға жіберіледі.&nbsp;<blockquote>«Мен су тасқынынан зардап шеккен аудандарда жүрмін. Апаттың ауқымын көріп отырмын. Біз су тасқынынан зардап шеккен барлық аймақтарға техника ұсынған жалғыз қормыз. Бізге генераторлар, сорғылар, үрлемелі қайықтар, үлкен моторлы қайықтар, қолшамдар, күректер, қаптар керек. Олардың біраз бөлігін сатып алдық, қалған техниканы бізге қарызға берді. Біз бұл қаражаттың дәл қазір қажет екенін түсініп, Kaspi.kz-тен тағы да қосымша көмек сұрадық. Алынған заттардың ақысын төлеу үшін бізге 500 миллион теңге қажет болды. Әрбір қазақстандыққа қайырымдылықтарыңыз үшін және Kaspi.kz бізбен үнемі байланыста болып, барлық қажетті көмекті көрсетіп жатқаны үшін алғыс айтамыз. Бұл көмекке баға жетпейді, мұның арқасында біз зардап шеккен отбасыларға көмекті жалғастыра аламыз!», – деді Biz Birgemiz Qazaqstan ҚҚ төрағасы Перизат Қайрат.</blockquote>Biz Birgemiz Qazaqstan қоғамдық қоры 2020 жылы құрылған. Қор Covid-19 пандемиясы кезінде қазақстандықтарға көмек көрсетті, Арыстағы төтенше жағдайлар мен Семейдегі өрттен зардап шеккендерге көмектесті, сондай-ақ ерекше балалары бар отбасыларды тұрақты қолдайды.Наурыз айының соңында Kaspi командасы Kaspi.kz қосымшасында онлайн қызмет ұйымдастырды. Ол арқылы жағдайға бей-жай қарай алмайтын әрбір қазақстандық зардап шеккендерге көмектесу үшін «Biz Birgemiz Qazaqstan» қорына қаражат аудара алады. Қазіргі уақытта қорға 100 мыңнан астам қазақстандықтан 145 миллион теңгеден астам қаражат келіп түскен.Kaspi.kz сонымен қатар сүйікті клиенттері мен серіктестеріне көмектеседі және мұқтаж адамдарға несиені кейінге қалдыру мен есептен шығаруды ұсынады. Kaspi.kz жағдайды жіті қадағалап, көмек көрсетуді жалғастырады.Фото: primeminister.kz

Kaspi.kz су тасқынынан зардап шеккендерге көмек ретінде тағы 500 миллион теңге аударды

<a href="https://kyzylorda-news.kz/">Kyzylorda-news.kz</a> &nbsp;Мемлекет басшысы Қ.К. Тоқаевтың&nbsp;12 өңірдегі су тасуынан зардап шеккендерге көмек көрсету туралы тапсырмасы шеңберінде Қаржы нарығын реттеу және дамыту агенттігі банктермен және микроқаржы ұйымдарымен бірлесіп зардап шеккен азаматтарды, шағын және орта бизнес субъектілерін қолдау жөніндегі іс-шараларды іске асыруда.Зардап шеккен қарыз алушыларға көмек көрсету шеңберінде банктер мен МҚҰ мынадай шараларды іске асырады:жергілікті атқарушы органдардың тізімдеріне сәйкес су тасуынан зардап шеккендер санатына жатқызылған барлық азаматтарға кредиттер бойынша төлемдер автоматты түрде 2024 жылғы 1 сәуір мен 30 маусым аралығында&nbsp;3 ай мерзімге кейінге қалдырылады; зардап шеккен азаматтардың кредиттері бойынша су тасуы салдарының әсеріне байланысты туындаған&nbsp;төлемдерді кешіктіргені үшін айыппұлдар мен өсімпұлдар есептелмейді; шаруашылық қызметтің бұзылуына әкеп соққан су тасуынан зардап шеккен барлық дара кәсіпкерлерге, шағын және орта бизнес субъектілеріне&nbsp;олар берген өтінішті ескере отырып, кредиттер бойынша төлемдерді кейінге қалдыру мүмкіндігі берілетін болады. Банктер мен МҚҰ әрбір зардап шеккен қарыз алушыға мүлікке және жеке шаруашылыққа, қарыз алушылардың кірістері мен қаржылық жағдайына келтірілген залалдың әсерін бағалау үшін жеке талдау жүргізеді, оның негізінде кредиттер бойынша қосымша дербес қолдау көрсету шаралары айқындалатын болады.Қарыз алушыларға көмек көрсету шаралары туралы зардап шеккен азаматтар мен кәсіпкерлерге хабарлау мақсатында әлеуметтік желілердегі кредиттік ұйымдардың ресми сайттары мен аккаунттарында тиісті өтініштерді берудің нақты алгоритмдері және кредиттерді қайта құрылымдауды жүргізу тәртібі жариялануда.Қарыз алушылармен өзара іс-қимыл процесін жеңілдету үшін банктер мен МҚҰ зардап шеккен қарыз алушылардың өтініштерді қашықтан беру сервисін іске асырады.Дереккөз: ҚНРДА &nbsp;ресми сайты&nbsp;

Банктер су тасқынынан зардап шеккен қарыз алушылардың төлемдерді кешіктіргені үшін өсімпұлын есептемейді 

<a href="https://kyzylorda-news.kz/">Kyzylorda-news.kz</a> &nbsp;Білімді ұрпақ бар кезде халықтың болашағы бұлыңғыр болмасы анық. Ел болашағы – білімді ұрпақтың қолында. Бүгінгі жас толқын &nbsp;– ертеңгі елдің тірегі. Жас ұрпаққа тәлімді тәрбие мен сапалы білім беру – қазіргі күннің басты талабы. №131 Талғат Қозыбаев атындағы орта мектептің 10 сынып оқушылары Жансая Әбиболлақызы мен Нұрдәулет Нұрмағанбетов – болашағынан зор үміт күттіретін озат оқушылар.Білім мен тәрбие – егіз ұғым. Осы қос ұғымды бір арнаға тоғыстырып, қатар алып жүрген 10 сыныпта оқитын Жансаяның арманы асқақ, мақсаты айқын. Қоғамдық жұмыстарға өте белсенді әрі ұйымдастырушылық қабілеті жоғары бойжеткен сыныпты үнемі алға тартып, барлығын ұйымдастырып отырады. Ең бастысы, кітап оқуға, сабаққа деген белсенділігі өте жоғары.<blockquote>– Жансая – өте үлгілі, тәртіпті, тәрбиелі, мінезі салмақты, бір сөзбен айтқанда бетке ұстар оқушыларымның бірі. Үлкенді құрметтеп, кішіні сыйлай алатын қасиетінің арқасында адамдармен тез тіл табысып алады. Әркез үй жұмысын уақытылы әрі жүйелі түрде орындап келеді. Талабы таудай Жансаяның байқағыштық қасиеті өте жақсы дамыған. Оның бойынан қыз балаға тән қасиеттің барлығы табылады. Сабақ үстінде де, сыныптан тыс жұмыстарда да өзін байсалды, жинақы ұстайды. Осы уақытқа дейін жаман қылығын байқаған емеспін. Жансая көбінесе гуманитарлық бағыттағы пәндерге жақын және осы бағыттағы байқаулардан марапаттары бар. Үлгілі оқушымның жан-жақты қабілетінің нәтижесінде жеткен жетістіктері де аз емес. «Сыбайлас жемқорлықпен күрес – жарқын болашақтың кепілі» атты онлайн түрдегі сурет салу және эссе жазу байқауына қатысып, жүлделі 2 орынды иеленді. Сонымен қоса жалпы білім беру ұйымдарының білім алушылары арасында «Қазақстан – бақытты балалар мекені» тақырыбындағы дебат турнирінің аудандық кезеңінде «үздік оратор» номинациясын жеңіп алған болатын. Аудан әкімінің алғысымен марапатталған Жансая – мектебіміздің мақтанышы, – дейді озат оқушының сынып жетекшісі Арайлым Жақсылықова.</blockquote>Жоғарыда айтып өткеніміздей, Жансая шығармашы­лыққа жақын оқушылардың бірі. Шығармашылық қабілет­тілігін шыңдау мақсатында Қазақстан және КСРО халық әртісі Сәбира Майқанованың туғанына 110 жыл толуына орай «Сахна тарланы – Сәбира» атты аудандық оқушылар арасында өткен монолог орындаушылар байқауына қатысып, 2 дәрежелі дипломмен марапатталды. Сонымен қатар өзі сүйіп оқитын орыс тілі мен әдебиеті пәнінен республикалық олипиаданың 2-кезеңі бойынша 3 орын иеленген ол бұған дейін де аудандық, облыстық, республикалық олимпиадалар мен түрлі білім сайыстарында бақ сынап жүр.<blockquote>– Орыс тілі мен әдебиеті пәні менің ең сүйікті пән­дерімнің бірі және болашақта осы пән бойынша мұғалім болғым келеді. Алдағы уақытта Алматы қаласындағы Қазақ Ұлттық қыздар педагогикалық үниверситетіне оқуға түскім келеді. Ең басты арманым әрі мақсатым «Алтын белгі» иегері атанып, ұлттық бірыңғай тестілеуден жоғары нәтиже көрсетіп, мемлекеттік грант ұтып алу, – дейді білімге құштар Жансая.</blockquote>Нұрдәулет Нұрмағанбетов те – мектептің бетке ұстар үздік оқушыларының бірі. Оның бойынан жігітке тән салмақтылық, сабырлылық, байсалдылық қасиеттерінің барлығы табылады. Оқу үлгерімі бойынша үздік.<blockquote>– Нұрдәулет ұстаздармен де, оқушылар және достарымен де жақсы қарым-қатынаста. Ол өзін кез келген жерде, кез келген уақытта жақсы жағынан көрсете біледі. Нұрдәулет жан-жақты, ізденімпаз, білімді оқушыларымның бірі. Осы қасиетімен өзгелерден ерекше және ортасына сыйлы. Оқушыларымды қай кезде де қолдап, үнемі бағыт-бағдар беріп отырамын. Нұрдәулет математика пәнін жақсы көреді және осы пән бағыты бойынша жыл сайын өтетін олимпиада байқауларына қатысып, жоғары нәтиже көрсетіп келеді. Ол республикалық «Дарын» ғылыми жобалар конкурсына қатысып, математика пәнінен облыстық кезеңде 3 орын, республикадан 2 орын иеленді. Сонымен қоса «Алтын түлек» байқауында математика пәнінен облыстан 1 орын, республикадан 2 орынды жеңіп алды. Осы тұста пән мұғалімі әрі олимпиадаға дайындап жүрген жетекшісі Жұмагүл Нұрымованының еңбегін атап өту орынды деп есептеймін. Үлгілі оқушы мектептегі қоғамдық жұмыстарға да белсене араласып, өзінің жан-жақтылығын көрсете білгенінің арқасында биылғы оқу жылында мектеп президенті атанды. Нұрдәулеттің ата-анасы да, ұстаздары да оның болашағынан зор үміт күтеді, – дейді сынып жетекшісі А.Жақсылықова.</blockquote>Жансаядай үлгілі, Дәулеттей білімді өскелең ұрпақ барда ел болашағы жарқын, келешегі кемел болатынына сенімдіміз. Жастарға сапалы білім беріп, саналы азамат етіп тәрбиелеу – ел мүддесі үшін жасайтын баршаға ортақ парыз.&nbsp;Ел сенімін, үмітін ақтау – жастардың қолында.

Болашағынан зор үміт күттіретін озат оқушылар 

<a href="https://kyzylorda-news.kz/">Kyzylorda-news.kz</a> &nbsp; &nbsp;«Жақсы мұғалім – мектептің жүрегі» деген Ы.Алтынсариннің осынау қанантты сөзі ұстаздың &nbsp;мектепте, оқушылар өмірінде қандай маңызға ие екенін аңғартып тұрғандай. &nbsp; Бұл – бұлжымас қағида. Себебі мектепке керегі – білімді, өз мамандығын жетік меңгерген шебер мұғалім. Ұстаз Ержан Жанбосынов еңбек жолын №131 орта мектепте бастап, 21 жылдан бері дене тәрбиесі пәнінен сабақ беріп келеді. Тәжірибелі ұстаз әрбір сабағын ұлттық құндылықтармен толықтырып, ерекше әдіс пайдалануды дәстүрге айналдырған.Білім ошағында оқушыларға эстетикалық тәрбиенің негізі – дене тәрбиесі сабағында қаланады. Бұл сабақты бас­тауыш сыныптан бастап жоғарғы сынып оқушыларының барлығы дерлік жақсы көретіні анық. Өйткені еркіндікті, қозғалысты қалайтын жас буын 45 минуттың ішінде соның бәрінен өтеді десек артық айтқандық болмас. Сондықтан әрбір сабағына жіті дайындықпен келуді мақсат еткен ұстаз оқушымен өткізетін әрбір минутын тиімді әрі бала денсаулығына пайдалы етуге күш салады.<blockquote>– Дене тәрбиесі сабағында өсіп ке­ле жатқан жеткіншектердің қимыл-қозға­лысын дамытумен қатар, еңбекке деген жұмыс істеу қабілетін арттыруға көңіл бөлеміз. Негізінен дене тәрбиесі ұғымы – дене мәдениеті дегенді білдіреді. Біз­дің де мақсатымыз – мәдениетті, еңбек­сүйгіш ұрпақты тәрбиелеу. Күнұзақ компьютерге немесе ұялы телефонға байланып отыруға бейім келетін оқушыларды сабақ кезінде серпілтіп, спортқа деген қызығушылығын арттыруға тырысамыз. Ауыл балалары ұлттық ойын десе ішкен асын жерге қояды. Ұлдар асық ойнаса, қыздар бесасықты шебер ойнауға машықтанып келеді. Арқан тартысты да қызыға ойнайды. Қазір осы бірнеше ұлттық ойын түрлері сабақ бағдарламасына енген. Үздік оқушыларды түрлі жарыстарға шығарамыз. Ал спортқа жақын баланың бойын­да патриоттық сезім, эстетикалық тал­ғам болады. Мұғалім ретінде дене жаттығу­ларын жасауды, күн тәртібіне бағынуды, спорттық үйірмелерге қатысуды талап етеміз, – дейді тәжірибелі ұстаз Ержан Жанбосынов.</blockquote>Ұлағатты ұстаз дене тәрбиесі мен спорттың маңызын арттыруда қазақтың ұлттық ойындарындағы қимылдарды пайдалану арқылы баланың дене қимыл сапасын және қабілетін жан-жақты дамытуды көздейді. Бұл оқушылардың шыдамдылық, төзімділік, бір топта жұмыс істеу дағдысын қалыптастырады.Мұғалім мамандығын жүрек қалауы­мен таңдап, оқушыларға білім мен тәрбие беруде жетістіктерге жеткен ұлағатты ұстазды әріптестері мақтаудан гөрі онымен мақтануды жөн көреді. Мектеп басшылығы жас та болса кәсіби шеберлігі мықты ұстаздың ізденімпаздығына дән риза.<blockquote>– Еліміздің болашағы бүгінгі мектеп қабырғасындағы ұрпақ екені даусыз. Бүгінде білім саласындағы өзгерістерге ілесу – ұстаздарымыздың біліміне, кәсіби шеберлігіне көп байланысты. Жас та болса тәжірибелі ұстаз атанған Ержан мектепте оқып жүрген кезінде-ақ өзінің білімге құштар екенін дәлелдеген. Үздік аттестат иегері ретінде педагогикалық мамандықты таңдап, жоғарғы білімді маман ретінде біздің мектепте алғашқы еңбек жолын бастады. Ізденімпаз мұғалім түрлі сайыстарда, халықаралық турнирде, спартакиадаларда жүлдегер атанып, біліктілігі мен тәжірибесі артты. Қазіргі кезде оқушыларды ұлттық спортқа баулуда жетістіктерге жетіп келеді, – дейді мектеп директоры А.Әлиева.</blockquote>Спорт шеберлігіне үміткер дәрежесі бар ұстаз соңғы 3-4 жылдың көлемінде көптеген жетістікке жетті. Мәселен, 2019 жылы асық ату спортынан Қазақстан Респуб­ликасы чемпионатында, 2021 жылы халықаралық турнирде үшінші орын, 2023 жылы Тараз қаласында ұстаз­дар арасында өткен спартакиадада асық атудан екінші орын, 2024 жылы Атырау қаласында осы спорт түрінен өткен турнирде бірінші орын алып, ұстаз мерейі үстем болды. Білікті педагог 2023 жылы облыстық білім басқармасының «Құрмет грамотасын» алды. Өз пәнінің үздігі атанған ұстаз оқушыларды спортқа баулып, облыстық, аудандық сайыстарға қатыстырып, жүлделі орын алғаны үшін диплом, алғыс хатпен марапатталды. Оқушысы Ғибрат Зайдағали облыстық спартакиадада асық ату спортынан екінші орын алып, мектеп, ұстаз абыройын асқақтатты.<blockquote>– Бала кезімізде күнұзақ асық ойнап, ләңгі тебетінбіз. Футболды да ойнаймыз. Сол дағдымыздан әлі күнге дейін алшақтаған емеспіз. Қазір оқу бағ­дарламасына ұлттық ойындар енгі­зілуде. Қазақтың баласы асық атпаса, қыздар бесасық ойнамаса ұлттық құндылығымыздың дәрежесі қандай бол­мақ?! Жалпы балалардың арасында ұлттық ойынға деген қызығушылық бар. Сондықтан ұлттық спортқа баулуды дене тәрбиесі сабағы кезінде тиімді пайдаланамыз, – дейді Ержан Жанбосынов.</blockquote>Шебер мұғалімнің бүгінгі ізденісіне көз сүйсінеді. Ол кәсіби шеберлігін арттыруда қазіргі заман талабына сай жаңашылдыққа ұлттық құндылықты дәріп­теу арқылы келді. Оның талпынысы мен үздіксіз ізденісі дәрежесін арттырды.Ержан Самыратұлы ұлағатты ұстаз болумен қатар жұбайы Нұргүлмен бірге бес бала тәрбиелеп отырған бақытты отбасы.&nbsp;

Ержан Жанбосынов: Ұлттық спортқа баулуды дене тәрбиесі сабағы кезінде тиімді пайдаланамыз 

<a href="https://kyzylorda-news.kz/">Kyzylorda-news.kz</a> Адам баласының тұлға болып қалыптасуына мектеп қабырғасында алатын тәрбие мен білімнің берері зор. Бұл ретте Қызылорда қаласындағы Тәкей Есетов атындағы №264 мектеп-лицейі өзіндік орнын қалыптастырып, сапалы білім беруде алдыңғы орыннан көрініп келеді.&nbsp; Оқу ордасының іргесі 2007 жылы ««100 мектеп, 100 аурухана» бағдарламасы аясында қаланып, 2010 жылы білім алу үшін толық пайдалануға берілген болатын. Білім саласына қадам басқан азғантай уақытта аталған білім ошағы талай шәкіртті қияға қанат қақтырды. Мыңнан астам орындық оқу ордасы жаратылыстану-математикалық бағытта білім береді. Қазіргі таңда зәулім де биік ғимарат қала көркіне өзіндік ажар, көрік беріп тұрған нысандардың біріне айналды. Мектеп-лицейде 164 сынып кешені, 4032 оқушы білім алып, 417 педагог маман жұмыс жасауда.&nbsp; 14 жылдық тарихы бар білім ордасына білікті басшылар басшылық етті. Мектеп-лицей тарихында білім ошағының алғашқы директоры қызметін Дүйсенбаев Бақытжан Жұмабайұлы атқарды. Алғашқы 2010-2011 оқу жылында 248 орындық білім ошағы 1604 оқушы, 57 сынып жиынтығымен, 187 &nbsp;мұғаліммен, оқуға арналған 50 кабинет, &nbsp;6 лабораториялық кабинеттер, оқулықтармен қамтамасыз етілген кітапхана, оқу залы, &nbsp;4 технология, 3 информатика кабинеттерімен өз жұмысын бастады. Мектеп-лицейде жаратылыстану пәндері тереңдетіліп оқытылды. Мектептің құрылыс жобасы бойынша шетел тілдерін, информатика, технология, физика, химия және биология пәндерін топтарға бөліп оқыту үшін барлығы 12 зертханалық және тәжірибелік кабинеттер, 2 спорт зал және басcейн, медбикелер, процедуралық тіс дәрігерлерінің кабинеттері ашылып, психолог мамандар, оқушыларды бір мезгіл ыстық тамақпен қамтамасыз ету үшін 448 орындық асхана және 24 орындық арнайы буфет жұмыс жасады.&nbsp; Білім беру ісінде мектеп ұжымы баланың жан-жақты дамуында &nbsp;назардан тыс қалдырмады. Мектеп-лицейде балалардың қызығушылығын оятатын түрлі &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;үйірмелер, спорттық секциялар, оның ішінде «Домбыра», «Еркін күрес» үйірмелері, 2011 жылдың 21 ақпан айынан &nbsp;бастап 75 орынға лайықталған мектепке дейінгі шағын орталық - 3 топ, 75 бала, 7 педагог маман жұмыс жасаған. Шағын орталықта оқу-тәрбие жұмысы «Зерек бала», «Біз мектепке барамыз» бағдарламалары негізінде жүргізілді.&nbsp; &nbsp; &nbsp; Алғаш ашылған тұста білім ошағын басқарған Бақытжан Жұмабайұлы &nbsp;мектеп-лицейдің сапалы білім беретін, оқушылардың білім деңгейін көтере алатын дәрежеде жұмыс істеуі үшін бар күшін салады. Мәселен, 2011 жылдың 1 қазанынан бастап мектеп-лицей жанынан «Қосымша білім беру орталығы» өз жұмысын бастайды. Орталықтағы 5 түрлі үйірмені ( ән айту, домбыра, сурет салу, күрес және хор үйірмелері) 9 маман жүргізді. Осылайша, алғашқы жылдан-ақ білім ошағы заман талабына сай білім беруге дайын екендігін дәлелдеді.&nbsp; &nbsp; &nbsp; &nbsp; Мектеп ұжымын 2013 жылдың қараша айынан бастап Ежетаева Күләш Тұрсынқызы жалғастырады. Одан кейін білім ордасының тізгінін Маханова Ұлбосын Ыбырайханқызы қолына алады. Оқу ордасын әр жылдары басқарған директорлар мектеп-лицейдің толыққанды қалыптасуына, қаладағы айтулы білім ордасына айналуына орасан зор үлесін қосты. Ал 2020 тамыз айынан бастап Қызылорда облысының білім басқармасының Қызылорда қаласы бойынша білім бөлімінің «Т.Есетов атындағы №264 мектеп-лицейі» коммуналдық мемлекеттік мекемесінің директоры қызметін Тумурзаев Бек Сұлтанбекұлы атқарып келеді. Қай кезеңде де елдік мұраттың бірі – ұрпақ тәрбиесі. «Адамға ең бірінші білім емес, тәрбие керек. Тәрбиесіз берілген білім – адамзаттың қас жауы» деген әл-Фараби сөзінің жаны бар. Қазіргі таңдағы білім беру саласындағы реформаның басты мақсаты да ой-өрісі биік жеке тұлға тәрбиелеу. &nbsp;Бүгінде №264 орта мектеп–лицейі заман талабына сай соңғы үлгідегі техникалық құрал-жабдықтармен қамтамасыз етілген. &nbsp;Білікті басшы бұрынғы әріптестері қалыптастырған ізді әрі қарай жалғастырып, мектептің көш басында жүруіне сеп болуда. Бұл ретте Т.Есетов атындағы №264 мектеп-лицейдің жеткен жетістіктерін ерекше атап туге болады. Мәселен, 2020 жыл Қызылорда облыстық оқу орталығы (әдістемелік кабинет) «Үздік қосымша білім беру ұйымы-2020», облыстық байқаудың «Шығармашыл ұйым» номинациясын алса, Қазақстан Республикасы таныған шет мемлекеттер табыс еткен білім беру саласындағы жетістіктері үшін мемлекеттік наградалар, оның ішінде &nbsp; 2021 жылы гранттық бағдарлама «Корни и трава». Жапон мемлекеті. 28 миллион грантын жеңсе, «Орта білім беретін үздік ұйым» облыстық грант конкурсының жеңімпазы «Қызылорда қаласы бойынша білім бөлімінің Т.Есетов атындағы №264 мектеп-лицейі» 34 миллион теңге иегері атанды.&nbsp; Осыдан 3 жыл бұрын мектепте жаратылыстану-математикалық сауаттылығын арттыру, физика-астрономия бағытындағы пәндерді тереңдетіп оқыту сапасын жоғарлату мақсатында «Мектеп обсерваториясы» пилоттық жобасы ендірілетін «тірек білім беру ұйымы» ретінде білім басқармасының арнайы бұйрығымен бекітілген. Білім ордасында сондай-ақ, «BIOFLOWERS», «BIOMASTER», «Киностудия» және де «мектеп обсерваториясы» кабинеттері бар.&nbsp; Жалпы аталған мектеп-лицейде білім алғысы келетін оқушылар көп. Сұраныстың артуынан былтырға дейін білім ошағы үш ауысымда білім берген болатын. Өткен жылы бұл мәселе оң шешімін тапты. Үш ауысымда білім беруді жою мақсатында өткен жылы 550 орындық, 22 сынып кешені бар қосымша ғимарат салынды. Өткен оқу жылында Тәкей Есетов атындағы № 264 мектеп-лицей жанындағы қосымша білім беру орталығына қыркүйек айында 300 оқушы &nbsp;үйірмеге қабылданса, қазіргі таңда 315 оқушы білім алуда. Орталықта эстетикалық көркемөнер (домбыра, хор, би), &nbsp;қолданбалы өнер (сурет), &nbsp;спорт &nbsp;(күрес) сынды &nbsp;үш бағытта бес үйірме жұмыстарын жүргізуде. &nbsp; Әр үйірмеде &nbsp;IV топ бар. Оның ішінде, домбырада - 62, хорда – 63, биде – 60, суретте – 64, күресте – 66 оқушы қамтылған. &nbsp; &nbsp; Үйірме мүшелері білімдері мен өнерлерін шыңдай отырып, мектепішілік, қалалық іс-шараларға, қалалық, облыстық байқауларға қатысып, жүлделі орындарды иеленуде. &nbsp; &nbsp; &nbsp; &nbsp; – Жаңа оқу жылы басталар тұста үйірме қызметкерлерімен кеңес өткізіліп, онда үйірме жетекшілерінің 2023-2024 оқу жылында атқарылатын оқу- тәрбие жұмысына бағыт-бағдар беріліп, күнтізбелік оқу жоспарлары, сабақ кестелері құрылып, бекітіледі. Сыныптарды дайындау және ағымдағы &nbsp;мәселелер қаралып, толықтырылады. Сонымен бірге, қазіргі таңда білім беру үрдісіне инклюзивті білім беру жүйесі қосылуда. Бұл заман талабы. Инклюзивті білім берудің мақсаты – оқушылардың жеке ерекшеліктерін зерделеу, қажеттілігіне қарай бейімдеу, тең білім беру мүмкіндіктерімен қамтамасыз ету. Бұл мақсаттарды іске асыру үшін Тәкей Есетов атындағы №264 мектеп-лицейінде 2014 жылдың 1 қыркүйек айынан бастап инклюзивті білім беру бөлімі жұмыс жасап келеді. Аталған бөлім облыстық білім басқармасының №121 бұйрығы негізінде 2022 жылдың 30 мамыр айынан бастап инклюзивті тәжірибені дамыту және тәжірибе алмасу үшін облыстық ресурстық орталық болып қайта бекіді. 2014-2015 оқу жылында инклюзивті қолдаумен қамтылатын 6 оқушы ғана болса, қазіргі таңда ресурстық орталықтағы мамандардың қолдауы және түзете-дамыту сабағымен қамтылған оқушы саны 100-ге жетті. Жыл сайын ерекше біліммен қамтылатын оқушыларға нақты бекітілген оқу бағдарламасы бойынша білім беру, тәрбиелеу, түзете-дамыту барысында 8-12 оқушы аралығында түзетіліп, жалпы сыныптағы жалпы бағдарламаға көшіріліп отырды. Алайда, мектеп-лицейіндегі инклюзивті қолдаумен жұмыс жасайтын облыстық ресурстық орталық болғандықтан облыс көлемінде (Арал, Қазалы, Байқоңыр, Шиелі, Жаңақорған т.б) барлық аудандардан, арнайы мамандар жетіспейтін шалғай ауылдардан ерекше баласы бар ата-аналар мектепке жақын аумақта орналасқан мөлтек аудандардан пәтер жалдап, мектеп-лицейімізге орналасып, арнайы мамандардың түзету сабақтарына мұқтаж болуы, жыл сайынғы ерекше оқушылардың санының артуына әкелуде, – дейді мектеп директоры Бек Сұлтанбекұлы. Қазіргі таңда ресурстық орталықта 24 арнайы маман жұмыс жасайды. Арнайы 6 кабинет (психолог, логопед, дефектолог, сенсорлық, емдік денешынықтыру) техникалық құрал- жабдықтармен жабдықталған. Инклюзивті білім берумен қамтылған 82 оқушы бейімделген бағдарламамен, 6 оқушы жеке оқу бағдарламасы, 12 оқушы жалпы оқу бағдарламасы, бойынша білім алады. Ерекше білім беруді қажет ететін оқушыларға инклюзивті білім бойынша қайта даярлаудан өткен 160 педагог сабақ береді. Ерекше білім алуды қажет ететін оқушылардың әлеуметтік ортаға бейімделуін арттыру мақсатында биофлорес, биомастер кабинеттері, заманауи технологияларды меңгертуге бағытталған робототехника, физикалық бағытта оқушылардың ғылымға деген қызығушылықтарын дамытуға арналған обсерватория, кинотерапия әдістемесі бойынша оқушылар арасындағы достық, сыйластық, адамгершілік қасиеттерге тәрбиелеуге ұмтылдыратын киностудия кабинеті және хор, би, сурет салу өнерлерін насихаттайтын үйірмелермен қамтылған қосымша білім беру орталығы қызмет атқарады. Инклюзивті білім берудің әдістемесін арттыру үшін мектеп-лицейінде ресурстық орталық мамандары мен пән мұғалімдері біріккен командалық жұмысты дамыта отырып, әдістемелерін (авторлық бағдарламалар, әдістемелік құралдар, дидактикалық материалдар, жұмыс дәптерлері т.б) қала, облыс, республика көлеміне ұсынылды. Мектеп-лицей педагогтары инклюзивті білім беру мәдениетін қалыптастырып, дамытуға арналған қазақ тілінде жарық көрген алғашқы кітап авторларының бірі болып саналады. Сонымен бірге, психологиялық-педагогикалық қолдау қызметін тиімді ұйымдастыру арқылы ерекше біліммен қамтылатын оқушылардың қабілетін дамытуға арналған мектеп-лицей педагогтерінің үздік тәжірибелерін облыс, республика көлемінде таратып, практикалық тұрғыда өз әдістемелерімен бөлісіп келеді. <img src="https://knadmin.beoblood.kz/uploads/c09df4a9_994a_4db5_aee7_fa1ba2f6d352_6e397c136e.jpg" alt="c09df4a9-994a-4db5-aee7-fa1ba2f6d352.jpg">

Қазақстан және Қызылорда облысының жаңалықтары