<a href="https://kyzylorda-news.kz/">Kyzylorda-news.kz.</a> Қармақшы ауданы бойынша білім бөліміне қарасты №199 орта мектеп базасында «Қазақстан Республикасы білім беру ісінің үздігі», ардагер ұстаз Бекқадам Әлиасқар Әбілтайұлын еске алуға арналған волейболдан білім саласы қызметкерлері арасында турнир өткізілуде.Бүгінде ұйымдастырылып отырған ІІ Дәстүрлі турнирдің ашылу салтанатына Қармақшы аудандық ардагерлер кеңесінің төрағасы Асқар Мереков, аудандық мәслихат төрағасы Әділ Қошалақов және де қоғамдық кеңес төрағасы Әбдірахман Құлдүйсенов, білім бөлімінің басшысы Абдазиева Гульзира Мажитқызы мен аудандық дене тәрбиесі, спорт және туризм бөлімінің басшысы Мырзабаев Нұрбол арнайы қатысып, ұзақ жылдар бойы білім саласында ұстаздық етіп, ұрпақ тәрбиесіне зор еңбек сіңірген ардақты ел ағасының өнегелі өмір жолдарынан естеліктер айтып, турнирді ұйымдастырушыларға өзіндік алғыстарын жеткізді.Ұстаз есімі ұлықталған спорттық додаға биылғы жылы 10 команда қатысып, тартысты ойын көрсетуде. Турнир барысында жеңімпаз атанған командаларға ардагер ұстаз ұрпақтары атынан бағалы сыйлықтар мен ақшалай жүлде қорлары табысталатын болады. &nbsp;

Қармақшыда ұстаз есімі ұлықталған спорттық шара ұйымдастырылуда

Фото: Zakon.kz<a href="https://kyzylorda-news.kz/">Kyzylorda-news.kz</a> Астананың қылмыстық істер жөніндегі мамандандырылған ауданаралық сотында бүгін, 2024 жылғы 13 мамырда Салтанат Нүкенованы өлтіру ісі бойынша сотқа тартылған Қуандық Бишімбаевтың немере ағасы Бақытжан Байжановқа қатысты сот үкімі жарияланды. Ол қылмысты жасырды деп айыпталады, деп хабарлайды Zakon.kzБишімбаев пен Байжановқа қатысты қылмыстық іс бойынша үкімді судья Айжан Құлбаева жариялады.<blockquote>"Кінәлі деп танылсын (Бақытжан Байжанов - шамамен. ред.). Төрт жылға бас бостандығынан айыру жазасы тағайындалсын", - деп оқыды судья сот үкімін.</blockquote>

Салтанат Нүкенованың өлімі: Байжановқа қатысты сот үкімі жарияланды

<a href="https://kyzylorda-news.kz/">Kyzylorda-news.kz</a> Дана халқымыз «Отан отбасынан басталады» деп бекер айтпаса керек. Отбасы – бала тәрбиесінің ең алғашқы ұжымы. Сыйластық пен жарастық орнаған орта, шағын мемлекет. Ал мықты мемлекеттің қалыптасуы үшін әрбір үйдің, шаңырақтың береке-бірлігі жарасымды, ынтымағы ырысты болуы қажет. Ықылым заманнан бері қазақ ұғымында отбасының орны айрықша. Отбасының қамқоршысы мен тіреуі – ер азаматы, шаңырағының шырайын келтіріп, ырысын еселейтін – адал жары болса, оны береке мен мерекеге толтыратын – балалары. Осы ретте «Ұяда не көрсең, ұшқанда соны ілерсің» деген тәмсіл сөздің астарына үңіліп, ақиқатын ақтарып көрсек, бала ата-анасына қарап өседі. Міне, бүгінгі әңгіменің ауаны Шиеліде тұратын ерлі-зайыпты Абай Алтынбеков пен Балхаш Томаеваның өнегелі отбасы, өнерлі балалары туралы болмақ.Еңсегей бойлы, ер мінезді, сөзі мен ісі нық азамат, текті әулетінен шыққан отбасы иесі Абай Абдоллаұлы шежірелі өлкедегі балалар музыка мектебінде домбыра классының мұғалімі болып, шәкірттерді білім нәрімен сусындатты. 1999-2021 жылдары осы әуез мектебінің директоры болып, зейнет демалысына шықты. Қызмет атқарған уақыттарда Шиелі ауданы әкімдігінің, облыс әкімдігінің, білім министрлігінің Алғыс хаттарымен марапатталған.&nbsp;«Ерін сыйлаған есікте қалмайды» дегендей, жанындағы жарын сыйлап, балаларына да әкесін бағалауды үйретіп, шаңырағының сәнін келтіріп отырған Балхаш Жексенбіқызы да ақылды, байсалды жан. Өз кәсібінің жай-жапсарын жетік білетін, мамандығының қыр-сырын үздік меңгерген маман.&nbsp;«Шиелінің Шарасының» өмір жолдарына кезек берсек, 1959 жылы 30 қарашада Жексенбі мен Натидың отбасында Қызылорда қаласы, Тасбөгет қыстағында дүниеге келеді. Өзінің балалық шағы, отбасы жайында айтқанда Балхаш Жексенбіқызының жанарында сонау артта қалған қымбат кезеңге деген сағынышын байқадық.&nbsp;<blockquote>– Жанұяда он баланың үлкенімін. Әкем Жексенбі ақжарқын, ақкөңіл әзілқой кісі еді. Бала кезімнен мені ән мен биге, өнерге баулыды. Анам Нати болса, бәріміздің өнерімізді тамашалап, қабақ шытпай жүретін. Анам үнемі бізге өтірік айтпа, ұрлық жасама деп ескертіп отыратын. Үлкендерге құрмет көрсет, батасын ал деп тәрбиелейтін. Осы тәрбиенің бәрі өмірде маған сабақ болды және оған ризамын, – дейді Б.Жексенбіқызы.&nbsp;</blockquote>Иә, ата-ананың үлгілі тәрбиесінде өскен жанның өнер әлеміне деген қызығушылығы арта түсті. Сөйтіп, 1977 жылы Н.Гоголь атындағы педагогикалық университеттің «Музыка және ән» факультетіне оқуға қабылданады. Оқу орнында да белсенді студенттер қатарында болып, өнерін ұштай түсті. Бұл туралы кейіпкеріміз:&nbsp;<blockquote>– Университетке түскен күннен бастап, «Сыр сұлуы» ансамбілінің бишісі болдым. Қазақстанның халық әртісі Дәурен Абировтен сабақ алдым. Оқуды аяқтаған кезде маған «би үйірмесінің жетекшісі» деген куәлік берілді, – дейді.&nbsp;</blockquote>Шынында, өнер жолы қашан да ауыр жол екені мәлім. Ал қыз баласы үшін, тіпті де оңай емес. Күш пен жігер, ақыл мен қайрат өнер жолын қуған адамның бойынан табылуы қажет қасиеттер. Сонымен жоғарғы оқу орнын аяқтап, өмірлік серігі Абай Алтынбековпен шаңырақ көтереді. Шиеліге келгеннен соң аудандық әуез мектебіне қызметке орналасады. Бүгінде екеуі бес қыз, бір ұл тәрбиелеп, өсіріп отырған үлгілі ата-ана.&nbsp;Қазіргі таңда төрт қызы тұрмыста. Оларды әкенің ақылы, ананың ақ сүті ақ жолдан адастырмады. Тұңғышы Гүлзада оқу орнын М.Мәметова атындағы гуманитарлық колледжінде «Қазақ тілі мен әдебиеті» мамандығы бойынша бітірді. Жеті баланың анасы, ұл-қыз тәрбиелеп отырған үлгілі жан. Екінші қыздары Лаура Алтынбекова Құрманғазы атындағы Қазақ ұлттық Консерваториясын жақсы аяқтап, бүгінде Астана қаласындағы «№1 Балалар музыка мектебінің» домбыра сыныбында оқытушы болып қызмет атқарады. Әрі қарай балалары жайлы өздері былай деп баяндады:&nbsp;<blockquote>– Жалпы баланың болашағы жарқын, келешегі кемел болсын деген мақсатта біз де балаларымызды ата-дәстүр салтымен, өнермен, рухы асқақ азамат, ибалы да инабатты етіп тәрбиелеуге тырысамыз. Елімізде отбасыға маңызды орын берілген. Себебі адамзат пен мәдени құндылықтардың ажырамас бөлігі отбасы болып табылады. Отан – ортақ үйіміз. Ортақ үйіміздің шаңырағын шайқалтпай, уығын тіктеп, керегесін кеңейтіп отыру – ортақ міндетіміз.&nbsp;</blockquote>Біздің үшінші қызымыз Алматы Қалалық №4 емханасында клинико-диагностикалық бөлімшесінің бөлім меңгерушісі болып жұмыс істейді. Білікті әрі тәжірибелі маман. Қоса кеткен жөн, қызымыз 2014 жылдан бастап Қазақстан Республикасының Эндокринологтар Ассоциациясының мүшесі. Өзінің ерекше қабілетімен көзге көрініп жүрген Ұлан қызымыз да өнерге жақын. Негізгі мамандығы – архитектор-дизайнер. Бала күнінен суретті, сызуды жақсы көретін. Арманы – асқақ, мақсаты – айқын. Ал Жазира болса 1998 жылы 5 наурызда дүниеге келген. Ол отбасындағы бақытты басты орынға қояды. Жастайынан қолөнерге бейім болып өсті. Бұл қызымыз да шәкірт тәрбиелеп, бар білгенін Like School өнер және спорт орталығында үйретіп жүр. «Бисер өру» үйірмесінде жетекшілік қызметте. Шығармашылыққа жаны құмар Жалғас 2009- 2016 жылдары аралығында аудандық музыка мектебінде Дана Нұрмышева ұстазынан «Фортепиано» аспабы бойынша білім алып, 2017- 2021 жылдар аралығында Қазанғап атындағы музыкалық колледждін тәмамдады. Әрмен қарай білімін жалғастырып 2021 жылы Құрманғазы атындағы қазақ ұлттық консерваториясында оқуға түсті. Қазір сонда фортепиано сыныбы бойынша 3 курс студенті, – деді күлімдеп.&nbsp;Ұрпақ тәрбиесі – ұлт болашағының кепілі. Әр бала атаның қанымен, ананың сүтімен келетін туа бітті қасиеттер секілді ұлттық рухани құндылықтарды да ең алдымен отбасында атаананың тәрбиесімен бойына сіңіретіні сөзсіз.&nbsp;

Шиелідегі өнерлі отбасы

2024 жылы 13 мамырда азаматтық некедегі әйелі Салтанат Нүкенованы өлтіру ісі бойынша айыпталушы бұрынғы ұлттық экономика министрі Қуандық Бишімбаевқа қатысты сот үкімі шықты, деп хабарлайды Zakon.kz.Сот сотталушы Қуандық Бишімбаевтың бұған дейін сотты болғанын атап өте келе:<blockquote>"Қуандық Бишімбаевты кінәлі деп танып, 24 жылға бас бостандығынан айыру туралы үкім шығарылады", деп жариялады.&nbsp;</blockquote>

Қуандық Бишімбаевқа сот  үкімі шығарылды

<a href="https://kyzylorda-news.kz/">Kyzylorda-news.kz.</a> Бұрнағы күні майдангер Әбіл Таңсықбаевты еске алуға арналған «Ерлігі – елге өнеге» тақырыбында&nbsp;Сырдария&nbsp;ауданында жазба ақындар мүшайрасы өткізілген болатын.&nbsp;Аудандық мәдениет және тілдерді дамыту бөлімі және Тереңөзек кенті әкімдігінің қолдауымен, Тереңөзек кенті клубы ұйымдастырды. Аталған іс-шараға аудан әкімінің орынбасары Димаш Байдушев, аудандық ардагерлер кеңесінің төрағасы Мұса Келдібаев, аудандық әйелдер кеңесінің төрайымы Ұлмекен Жанәлиева, мәдениет саласының майталманы Жантемір Айсин, «Жарбол» шаруа қожалығының төрағасы Жарбол Ұлтанбекұлы, аудан тұрғындары қатысты.Жеңіс күні мерекесі аясында шымылдығын түрген тағылымды іс-шара барысында аудан әкімінің орынбасары Димаш Байдушев сөз сөйлеп, әрбір жас ақынның шығармашылығына табыс тіледі.<blockquote>– Өскелең ұрпаққа ғибраты бөлек, пайым-парасаты ерекше Әбіл Таңсықбаев майдан даласында көзсіз ерлік көрсете білген жан ретінде саналады. От пен оқтың арасында жүріп, кескелескен жаудың екпінің қайтарды. Талай соққыға тойтарыс беріп, жеңіс күнін жақындата алды. Майданда көрсеткен ерлігі үшін І-дәрежелі Ұлы Отан Соғысы орденінің, Германияны жеңгені үшін Кеңес одағының батыры Маршал Г.Жуковтың медаліне ие болды. Соғыс аяқталғаннан кейін елге оралып, қажыр-қайратының арқасында абыройлы еңбек ете білді. Ұрпағына тағылымды тәрбие беріп, үлкен әулеттің іргесін бекітті, – деді аудан әкімінің орынбасары.</blockquote>Жазба ақындар мүшәйрасында жекелеген талапкер 2 кезең бойынша жыр жолдарын оқыды. Бірінші кезеңде «Аузымен құс тістеген» жас­тар Әбіл Таңсықбаевты жөнінде көпшілікке төгілте кестелі сөз өрнегін ұсынды. Ал екінші кезеңде майдан даласында кеудесін оққа тосқан соғыс солдаты хақында мән-мағынасы зор өлең құралды. Пайым-парасаты бөлек тұлғаның бітім-болмысын жан-жақты аша білген талапкер қатарында тереңөзектік Ербол Сағынбайұлы, Нұрсұлтан Сүйіндіков, Жұлдызай Аншаева, Ақмарал Кәдірханова, Ақтолқын Абылаева, іңкәрлық Малика Қожақова, қоғалыкөлдік Ақерке Балманова, ақжармалық Тұмарлан Өмірбек, аманкелділік Данияр Уәлиев, сәкендік Алпамыс Арыстанов бар. Бұл ретте, ақындардың қарым-қабілетіне халықаралық «Қазақ тілі» қоғамдық бірлестігінің аудандық филиалының төрағасы Шаһарбек Нұрсейіт, аудандық «Тіршілік тынысы» газетінің бас редакторы Ақтөре Ибрагимұлы, аудандық мәдениет үйінің әдіскері Гаухар Сәрсенбаева төрелік етті.<blockquote>– Азаматтық ерлік пен жауангерлік ерлік бір негізден тарайтыны рас. Кез келген жас қаламгердің қаламына арқау болған Әбіл Таңсықбаев ерлігімен де, еңбегімен де ел жадында мәңгі сақталады. Біз төрелік ету барысында атпалдай азамат жайында көптеген мәліметке зер салдық. Образдық, шығармашылық тұрғыдан кейіпкерді барынша аша білуге толықтай ізденіс керек. Жас ақындардың таудай талабын көріп, поэзия әлеміндегі аяқ алысына баға бердік, – деді қазылар алқасының төрағасы Шаһарбек Нұрсейіт.</blockquote>Жалпы, көпшілік іс-шара кезінде «Тағзым алаңына» гүл шоқтарын қойып, арда азаматты 1 минут үн­сіздікпен еске алды. Әбіл Таңсық­баевтың ұрпақтары атынан білім саласының майталманы Гүлбар Әбілқызы сөз сөйлеп, ұйымдастырушыларға алғысын жеткізді.<blockquote>– Әкеміз сұрапыл соғыстың жаужүрек батыры екені даусыз. Елдік мүддені жоғары қоятын азаматтың перзенті болғанымызға мақтанамыз. Бүгінде Әбіл әкемізден тараған ұрпақтары мәуелі бәйтерекке айналды. «Орнында бар оңалар» демекші, біз әркез әке есімін жаңғыртуға үлес қоса береміз. Ол – савхозда сан түрлі қызметте шыңдалды. Ауыл шаруашылығы саласында елеулі еңбек етті. Анамыз екеуі отбасында 5ұл, 3 қыз тәрбиелеп өсірген. Амал нешік, осыдан16 жыл бұрын 86 жасқа қараған шағында бақилыққа аттанды. Асқар тауымызбен қатар жүріп, замандас атанған аға-жеңгелеріміз ортамыздан табылуда. Бұл – біз үшін мәртебе. Осындай ізгілікті іс-шараны жүзеге асырған Рүстем ініміз бастаған ұжымға отбасымның атынан алғысымды жеткіземін, – деді Гүлбар Әбілқызы.</blockquote>Өз кезегінде қазылар алқасының шешімімен жүлделі ІІІ орынды Нұрсұлтан Сүйіндіков, Ербол Сағым­байұлы, ІІ орынды Тұмарлан Өмірбек, І орынды Данияр Уәлиев, бас жүлдені Алпамыс Арыстанов иеленді. Барлық қатысушыға арнайы «Диплом» мен бағалы сыйлық берілді.

«Ерлігі – елге өнеге» тақырыбында аудандық жазба ақындар мүшайрасы өтті 

<a href="https://kyzylorda-news.kz/">Kyzylorda-news.kz</a> Соғыс… Осы бір сөз айтылғанда майданнан оралмаған оғландарын зарлана еске алып, бір Құдайға аманаттап отыратын, қайғыдан қан жұтқан қайран ана, жар, апа-қарындастың қасіреті елестейді. Иә, Ұлы Отан соғысына ауылдан талай боздақ аттанып, ел мен жер, бейбітшілік үшін жан берісіп, жан алысқаны айтпасақ та белгілі. Қолына қару ұстағаны майданға аттанса, қарттар мен әйелдер, бала-шаға майдан арсеналына айналып, тылда аянбай еңбек етті. Ұрыс даласында атылған оққа қарсы тұрмаса да, тылда еңбек еткен батырларымыз ашаршылықты, адам төзгісіз жұмысты басынан өткерді. Сондықтан Ұлы Жеңіске тыл ардагерлерінің қосқан үлесі өте зор. Соның бірі – Жалағаш ауданының тұрғыны, тыл ардагері Күлбағирам Тұрсынбаева.&nbsp;Мереке қарсаңында редакция ұжымы әжеміздің шаңырағына атбасын бұрып, сұхбаттасуды жөн көрдік. 90 жасқа таяған әжеміз аулада үй тірші­лігімен айналысып жүр екен. Бізді көр­ген әжеміз балаша қуанып қалды.&nbsp;«Соғысқа әкем МұхтарТұрсын­баев­ты және ауылдың ер-азаматтарын алып кетті. Ауылда бас көтеретін ешкім жоқ, ылғи кемпір-шалдар, қыз-келіншектер мен бала-шаға қалған. Мен соғыс бас­талған жылдары 5-6 жаста едім. Ол кезде ауыл халқы тары мен мақсары егеді. Біз таң атқаннан кеш батқанға дейін сол алқаптың басындамыз. Кіш­кентай болсақ та өгізге, атқа арба жегіп, алқапқа дәнді дақылдарды егуге жәр­дем бердік. Күздің кезінде шыққан өнімнің бір түйірін шашпай теріп, май­данға жөнелтіп отырдық. Онымен қоса әжелер балаларына жүннен киім тоқып, үйіндегі азық-түліктерін майданға жө­­­нел­­­­тетін» деп бастады әңгімесін Күлбағирам әже.«Өмір – таусылмайтын күрес» де­­мек­ші, әжеміздің бейнеттің ащы дә­мін татып, тынбай еңбектеніп келе жат­қан жанның бірі екенін әңгімесінен бай­қадық. Әрине, әжеміз айтып отыр­ған бұл деректер біз үшін ертегі секілді, бірақ сонысымен өте қызықты еді. Сон­дықтан әжеме сұрақ қоя отырып, әңгімесін ары қарай жал­ғауын өтіндім.&nbsp;Кейіпкеріміз тағы да біраз ойға шомып, әңгімесін жалғай берді.«Анам алқаптан бір уыс та­рыны қал­тасына салып, үйге алып келіпті. Әрине, бар аналық ойы сол та­рыны диірменнен өткізіп, балаларына талқан дайындап беру болса керек. Бірақ бригадир біліп, бір түйірін де қал­дырмай, алып қойыпты. Сонда анам да, біз де қыңқ еткен дауыс шығармай, ісімізге ұялып, бригадирден кешірім сұ­радық. Қазір ойласам, не деген жанкештілік, патриотизм деймін. Иә, ана­­мыз кешқұрым 2 түйір жүгеріні диір­меннен өткізіп, бізге сол ұннан нан жауып беретін. «Еңбектің наны тәтті» демекші, үйдегі бала-шаға таласып-тармасып жеп қоятынбыз», дейді тыл ардагері.&nbsp; &nbsp;Қаншама қиын күндерді артқа тас­тап, 1945 жылы қасіретті соғыс та аяқ­талды. Күлбағирам әжеміздің әкесі соғысқа 1942 жылы аттанып, 1946 жылы елге оралған. Әжеміз сол кезде не­бәрі 2-3 сыныптың оқушысы екен. Со­ғыстың қайда болғанын, қай жерде жараланғанын, бомбаның асты­нан қа­лай аман қалғанын, соғыстан кейін ауылды дамытуда бойындағы бар күш-жі­герін салғаны туралы әкесінің әңгімелерін кейіпкеріміз тыңдап өсіпті.Иә, батыр әжеміз өткен қиыншы­лық­тардың қайтарымы ретінде қа­зіргі таңда балаларының, немере-шө­бе­релерінің ортасында өмір сүріп отыр­ғанына шүкіршілік етеді. Бүгінде әже­міздің 30-дан астам немере-шөбересі бар. Балалық шағының алаңсыз күн­де­рін ұрлаған сұм соғысты есіне де алғысы келмейді.&nbsp;Ол соғыстан кейінгі жылдары жо­ғары білім алып, ауданымыздың бі­лім саласының да­муына үлес қосады. Аудандағы Т.Жүргенов атындағы да­рынды балалар мектебінде 35 жыл бойы ұстаздық етіп, мықты тұлғаларды тәрбиелеген. Батыр анамыздың тек бір ғана арманы бар, ол «Кейінгі ұрпақ соғыс көрмей, тек бейбітшілікте өмір сүрсе екен» дейді.«Ер есімі – ел есінде». Сұрапыл соғыстың ардагерлерінің есімі тарих­тың парағына алтын әріптермен мәң­гіге жазылып қалары анық. Көзі тірі­сінде құрмет көрсетіп, сыйлай білу – кейінгі ұрпақ, біздің парыз. Сұхбат со­ңында ақжаулықты әжемізден бата алып, көкірегіміз рухқа толы күйде редакцияға жол тарттық.Жандос ЖАЗКЕН

Тыл ардагері Күлбағирам Тұрсынбаева

<a href="https://kyzylorda-news.kz/">Kyzylorda-news.kz</a> Әлеуметтік медициналық сақтандыру қоры халыққа медициналық көмек көрсету үшін медициналық ұйымдарға берілетін алдын ала төлемді 30% – дан 70% - ға дейін, ал медициналық қызметтерді жаңа жеткізушілер үшін 30%-ға дейін көтерді. Мұндай шаралар медициналық ақпараттық жүйелерді жаңарту кезеңінде емханалардың қаржылық тұрақтылығын қолдау үшін қабылданды. Бұл туралы ӘМСҚ Қызылорда облысы бойынша филиалының директоры Бақыт Исмаханбетов хабарлады.Қазір ҚР Денсаулық сақтау министрлігінің медициналық қызметтердің мониторингі мен сараптамасы үшін ақпараттық жүйелері пысықталып, Қордың «SAQTANDYRY» ақпараттық жүйесінің төлем бөлігі әзірлену үстінде. Осыған байланысты нақты көрсетілген жұмыстардың аяқталу қорытындысы бойынша медициналық қызметтер қаржыландырылатын болады.Сонымен қатар БСМК, әлеуметтік маңызы бар аурулар, паллиативтік көмек, гемодиализ, жедел медициналық көмек сияқты басым бағыттар бойынша 47%-ға дейін қосымша алдын ала төлем берілді. Барлығы 86 медициналық ұйым шамамен 12,1 млрд теңге алды. 10 мамырдағы жағдай бойынша 106 медициналық ұйымға 40,42 млрд теңге қосымша алдын ала төлем төленді.Осылайша, Қордың 111 жеткізушісінің 106-ы немесе 95%-ы алдын ала төлем алды. Қалған 2 медициналық ұйым жаңа жеткізушілер болып табылады және 2 медициналық ұйым алдын ала төлем алудан жазбаша бас тартты. 1 медициналық ұйым (ФГБУЗ ЦМСЧ№1 ФМБА России) мемлекетаралық меморандумға сәйкес аванстық төлем төленбейді. Медициналық ұйымдарға алдын ала төлемдерді төлеу жұмыстары жалғасуда. &nbsp;

Қызылорда облысында медициналық 109 ұйым қосымша қаржыландырылды

<a href="https://kyzylorda-news.kz/">Kyzylorda-news.kz</a> 16-17 мамыр аралығында Солтүстік Қазақстан облысы делегациясының&nbsp;Арал ауданына жұмыс сапары жоспарлануда. Алматы, Жамбыл, Маңғыстау, Түркістан, Қызылорда, Жетісу облыстары, Шымкент, Алматы, Астана, Шымкент қалалары және де «Мәңгілік ел жастары – индустрияға!» («Серпін») жобасына қатысушылар қатарындағы және белгіленген квота шеңберінде өңірлерде оқып жатқан ауыл жастары қатарындағы түлектер шығу өңіріне/мемлекетіне қарамастан өңіраралық ерікті қоныс аударуға қатысады.Ерікті түрде өңіраралық қоныс аударуды мемлекеттік қолдау:1) көшуге материалдық көмек беруді;2) тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтеуді;3) қоныс аударуға жәрдем көрсететін жұмыс берушілерге субсидиялар беруді;4) қажет болған кезде техникалық және кәсіптік білім алу үшін оқытуға және қысқа мерзімді кәсіптік курстарға жіберуді;5) жаңа тұрғылықты жерінде жұмысқа орналасуға және кәсіпкерлікті дамытуға жәрдемдесуді қамтиды.Қоныс аударғаннан кейін комиссия отырысына қажетті құжаттарды өткізіп, оң шешім алғаннан соң бағдарлама қатысушыға және оның отбасы мүшелеріне – отағасына және әрбір отбасы мүшесіне бір рет 70 АЕК (258 440 теңге) мөлшерінде көшуге материалдық көмек (көшуге материалдық көмек жаңа тұрғылықты жерге келгеннен кейін) беріледі.Бағдарламаға қатысушының отбасына, оның ішінде жалғызбастыларына он екі айдан көп емес (тұрғын үй алғанға дейін) ай сайын тұрғын үйді жалдау (жалға алу) және коммуналдық қызметтерге ақы төлеу бойынша шығыстарды өтеуге мынадай мөлшерлерде материалдық көмек беріледі:1) қалалық жерлерге қоныс аударғандар үшін:- бір адам үшін – 20 АЕК мөлшерінде (73 840 тенге);- отбасы мүшелерінің саны екеуден төртеуге дейін болса – 25 АЕК мөлшерінде (92 300 тенге);- отбасы мүшелерінің саны бесеу және одан көп болған кезде – 30 АЕК мөлшерінде төленеді (110 760 тенге).2)ауылдық жерлерге қоныс аударғандар үшін:-бір адам үшін 15 АЕК (55 380 теңге) мөлшерінде;-отбасы мүшелерінің саны екеуден төртеуге дейін болған кезде 18 АЕК (66 456 теңге) мөлшерінде;-отбасы мүшелерінің саны бесеу және одан көп болған кезде 21 АЕК (77 532 теңге) мөлшерінде төленеді.Тұрғын үйді сатып алуға – 50% экономикалық ұтқырлық сертификаты беріледі (1160 АЕК- тен (4 282 720 тг) аспайтын сомада).Фото: ortcom.kz

Арал ауданында Солтүстік Қазақстан облысы делегациясының  жұмыс сапары жоспарлануда

<a href="https://kyzylorda-news.kz/">Kyzylorda-news.kz</a>&nbsp;Уақыт зымыран, жүйрік-ақ. Кеше мектеп бітіріп, қос бұрымына тастай қып бантик таққан қырмызы қыздың мамандық таңдауға келгенде өзге қатарына қарағанда кібіртіктеп, қиналмағаны рас. Озат оқушылар қатарында білім алған оның пәндер арасынан химия мен биологияға &nbsp;қызығушылығы басқашалау болды. Бұл оның медицина саласына бір табан жақындатып, келешек қызметін таңдауға септігін тигізді. Мінеки, арада қанша жыл өтсе де жүрек қалауымен таңдаған мамандығының игілігін ғана көріп келеді. Білікті маманның денсаулық сақтау саласында келе жатқанына тегеурінді 40 жыл өтіпті. &nbsp;Біз әңгімелеп отырған Клара Сәрсенова Қармақшы ауданы, Ақжар ауылының тумасы. 1965 жылы дүниеге келген. Аудандық аурухананың перзентхана бөлімінің жоғары санатты акушері болып қызмет етеді. Оның аз-кем өмір жолына тоқталып өтсек. Ол 1980 жылы Қызылордадағы медициналық училищесінің «Акушерка» мамандығы бойынша үздікке тәмамдап, жолдамамен өзі туып-өскен Ақжар ауылдық амбулаториясына жұмысқа қабылданады. Алғашқы еңбек жолы ауылдан басталған медбикенің одан арғы қызметі 1989 жылы аудандық аурухананың перзентхана бөлімінде бас акушер болуымен жалғасын табады. Одан соң 16 жыл осы бөлімде аға акушерліктің тізгінін мықтап ұстайды. 2009 жылдан бастап босану бөлімінің акушеркасы болып үздіксіз еңбек етуде. &nbsp; &nbsp; &nbsp; &nbsp;&nbsp;<blockquote>– Акушерлік – өте жақсы мамандық. Әр ана, әр отбасы сәби дүниеге келгенде қалай қуанады, біз де олардан артық қуанбасақ, кем қуанбаймыз. Мамандыққа келуімнің себебі де осында жатқан болар. Кезінде аналарымыз босанғанда заманы қиындау болды. Перзентханада орын аз болды ма екен, ол кісілер көбінесе үйде босанатын. Сондайда аналармыз «Сенің кіндік шешең мына кісі, сенің бауырыңның кіндік шешесі ана кісі» деп айтып отыратын. Содан кішкене күнімізден-ақ кіндік ана деген ұғым санамызда қалып қойды. Кіндік ана тану – үлкен құрмет. Менің бір бауырымның кіндік анасы ауданға белгілі Қоңырбай Дәуменов деген ағамыздың анасы болды. Інім көрген жерде жаңылмай апамыздың алдынан жүгіріп шығып, «кіндік ана» деп құшақтай алатын. Ол кісі де қолындағы барын беріп, бәйек болып жататын. Біз соған сырттарынан қызыға қарап мейірленіп тұратынбыз. Акушер мамандығын таңдағанда мен де сол кісілердей болсам, ізін қусам деп армандаған шығармын, – дейді ол ойымен бөлісіп.</blockquote>Клара Сәдуқызы мамандығына адалдық танытумен бірге, мекемедегі қоғамдық жұмыстардың да белсендісі. Талай мәрте түрлі аудандық, облыстық жарыс-сайыстарға қатысып, жүлдегер атанған. 2016 жыл оның еңбек жолында ерекше аталады. Себебі білікті маман осы жылы «Жылдың үздік акушері» номинациясын жеңіп алып, аудан мерейін тасытқаны бар.&nbsp;Клара Сәрсенова ұжымда сыйлы әріптес, жастардың жол көрсетуші тәлімгері &nbsp;болса, отбасында аяулы жар, балаларының ардақты анасы. Өмірлік серігі Мұхтар теміржол саласында қызмет етеді. Бүгінде екеуі 2 бала мен 8 немеренің ұйытқы, қамқоршысы. Үлкені – Мейрамбек Қызылорда қаласында жоғары білімді маман. Ал Қуаныш – аудандық пошта торабы басшысының орынбасары қызметінде.&nbsp;<blockquote>– Акушерлік мамандығын жас кезімнен жақсы көремін. Армандағанмын деп айттым ғой. Сол арманым орындалды. 40 жылдық еңбек өтілімде жүздеген сәбидің жарық дүниеге келуіне себепкер болып, кіндік анасы атандым. Әрбір ананың аман-есен өмірге ұрпақ әкелуіне, қуанышына үлесімді қосқаныма өзімді бақытты санаймын. Дүниеге іңгәлаған сәбидің келген күні біз үшін ұлы күн есептеледі. Ұлтымыздың болашағы – аналарымыз бен сәбилеріміз әрқашан да аман-сау болсын, – дейді ол сөз түйінінде тілегін білдіре. &nbsp;</blockquote>

Клара Сәрсенова: Кіндік шеше атану – үлкен құрмет

<a href="https://kyzylorda-news.kz/">Kyzylorda-news.kz</a> Жалағаш кентінде орталықтандырылған газ желісі 2021 жылдың &nbsp;шілде айында пайдалануға берілген. Содан бері кенттегі 2 868 тұрғын үй, 12 әлеуметтік, 127 кәсіпкерлік нысан орталықтандырылған газ желісіне қосылған. Қазіргі таңда ауылдық елді мекендерді газдандыру жұмыстары басталып кетті. Аудандық мәслихаттағы «Amanat» партиясы депутаттық фракциясының отырысында аудан әкімінің орынбасары Әліби Байнахатов осылай деді.Кент тұрғындарының 90,7 пайызы газ тұтынадыСпикердің айтуынша, былтыр кент іргесіндегі Ақсу және М.Шәменов елді мекендерін газдандыру жұмыстарын бастауға облыс қазынасынан 83,8 млн теңге қаралған. Биыл газ құрылысына Ұлттық қордан 200 млн теңге, облыстық бюджеттен 36,3 млн теңге бөлінген. Бүгінде қос ауылда да газ құрылысы қарқын алған.&nbsp;Бұдан бөлек Жалағаш кентіндегі «Ақтерек» учаскесіндегі жаңа шағын ауданын газбен жабдықтау жүйесінің құрылысына ел тайқазанынан 603 млн теңге қаралған. Бүгінде ондағы газ құрылысы толық аяқталды.&nbsp;Әліби Қодарұлы аудандағы әлеу­мет­тік нысандардың жылу жүйелерін табиғи газға ауыстыруға «Ауыл – ел бесігі» жобасы аясында қаржы тартылғанын айтады. Мәселен, аталған бағдарлама аясында ауданға ел қазынасынан 25,5 млн теңге бөлінген. Бүгінде «Наркескен» спорт клубы мен аудандық кітапхана ғимаратын табиғи газға ауыстыру жо­лымен қазандықты қайта жаңғырту жұ­мыстары толығымен аяқталған. Ал был­тыр облыстық бюджеттен бөлінген қар­жыға 2 мектептің жылу жүйесін кө­гілдір отынға ауыстыру жұмыстарына жобалық-сметалық құжаттар дайын­дал­ған.&nbsp;Аудан әкімінің орынбасары ауылдық округтерді газдандыру жұмыстары әлі де жалғасатынын айтады. Бүгінде Бұқарбай батыр, Қаракеткен, Далдабай ауылдарында газ тарату желілерінің және жеткізуші газ құбырының құрылысына демеушілер есебінен ЖСҚ әзірленуде. Егер бұл жоба жүзеге асқан жағдайда аудан тұрғындарының 40 пайызы көгілдір отын тұтынады.Электр желілері жаңғыртыладыӘліби Байнахатов елді мекендердің электр желілерін жаңғырту бойынша соңғы жылдары ауданда ауқымды жобалар қолға алынғанын айтады. Қазіргі таңда ауданда электр желілерінің жалпы ұзындығы 457,5 шақырымды құраса, электр жүйелерінің орташа тозу деңгейі – 45,2 пайыз. Былтыр Ақсу, Қаракеткен елді мекендерінің электр желілері күрделі жөндеуден өтті. Ал Жалағаш кенті мен Еңбек, М.Шәменов елді мекендерінің электр жүйесін қайта жаңғырту жұмыстарына жобалау-сметалық құжаттар әзірлеу демеушілер есебінен жүргізіледі. Жоба жүзеге асқан жағдайда аудан бойынша электр жүйесінің тозу деңгейі 25 пайызға азаяды.Спикер ауызсу сапасын жақсарту, жалпы тұрғындардың тәулік бойы оған қол жеткізуіне жұмыс жасалып жатқанын айтады. Сөзінше, аудан тұрғындары толығымен орталықтандырылған ауыз сумен қамтамасыз етілген. 2022 жылы 4 жобаға 1,1 млрд теңге қаржы қарал­ған. Оның ішінде 2 елді мекеннің ауыз су желілерін кеңейту және жаңадан ашылатын «Ақтерек» учаскесінде су ұңғамасы мен су тарату желілерінің құры­лысы іске асырылып, былтыр бұл жоба да толық аяқталған.&nbsp;– Таң елді мекенін шаруашылық-ауыз сумен жабдықтау үшін жерасты суларын өндіруге арналған №2 Т барлау пайдалану ұңғымасын бұрғылап салу жұмысына жобалау-сметалық құжаттар әзірленіп, сараптамадан өткізілуде. Жоба­лаушы мекеме – «Пройнсет» ЖШС. Одан бөлек Бұқарбай батыр елді мекенінде 1, Жаңаталапта 1 су мұна­расын сатып алу үшін былтыр облыстық басқармаларға бюджеттік өтінім ұсынылды. Алдағы уақытта да тұрғын­дардың сапалы ауызсу тұты­нуына жұмыс жасаймыз, – деді Әліби Қодарұлы.16 көппәтерлі тұрғын үй күрделі жөндеуді қажет етедіАуданда 27 көппәтерлі тұрғын үй бар. 2014-2023 жылдары 10 көппәтерлі тұрғын үйге күрделі жөндеу жүргізілген. Бірақ әлі 16 көппәтерлі тұрғын үй күрделі жөндеуді қажет етеді.Биыл 2 тұрғын үйге күрделі жөндеу жұмыстарын жүргізуге ел қазынасынан 5,8 млн теңге қаралған. Қазіргі таңда Үркімбаев көшесіндегі көппәтерлі тұр­ғын үй жөнделуде. Дәл осы көшедегі тағы бір көппәтерлі тұрғын үйдің күрделі жөндеу жұмыстары мамыр айында басталады. Мұнан бөлек 3 көппәтерлі тұрғын үйге күрделі жөндеу жұмыстарын жүргізуге ЖСҚ әзірленеді.Шағын ауданда тұрғындарға 511 жер телімі беріледі2017 жылы Жалағаш кенті «Ақтерек» жер учаскесінде 170 гектарға түбегейлі-жос­парлау жобасы әзірленген. Онда тұр­ғындарға баспана салуға 511 жер те­лімін беру көзделген. Мұнан бөлек 26 көпқабатты тұрғын үй салынады. Бұл аумақта тұрғын үйдің жалпы ала­ңының 125,9 мың шаршы метрі ор­на­­­ластырылады. Осы орайда ин­же­­­­нерлік-инфрақұрылым жүргізу мақ­­­са­­тын­да су ұңғымалары және су жи­­­­нау-тарату кешеніне, тас жолдар, газ, электр мен ауыз су желілеріне жо­ба­­лар әзірленіп, республикалық және облыс­тық бюджеттен су ұңғымалары, су жинау-тарату кешеніне, газ желісіне, электр желісі мен ауыз су желілеріне құ­рылыс-монтаждау жұмыстарына то­лық­тай қаржы қаралған. 2022 жылдың соңында «Электр желілері» пайдалануға қабылданған. Ал былтыр мамыр айында «Су ұңғымалары және су жинау-тарату кешені» нысаны қабылданған. Сондай-ақ ауыз су желілері де толық аяқталды. Былтыр желтоқсанда газ желісінің құрылысы да толық жүзеге асқан.Әліби Байнахатов шағын ауданға инженерлік-инфрақұрылым құрылысы қар­жыландырылса, тұрғын үй салу үшін жер телімін сұраған азаматтардың то­лықтай өтініші ескерілетінін айтады. Жобаның жалпы құны – 2 млрд 506 млн теңге.&nbsp;Жалпы былтыр құрылыс бөлімі та­рапынан бірнеше жоба әзірленген. Олар­­дың қатарында Қаракеткен елді ме­кеніне 150 орындық ауылдық клуб құры­лысына жоба-сметалық құжаттар әзірлеу жұмыстары бар. Қазіргі таңда бұл жоба толық сараптамадан өтіп тұр. Былтыр облыстық мәдениет бас­­қармасына бюджеттік өтінім тап­сырылған. Жоба құны – 639,2 млн теңге. Мұнан бөлек Жаңаталап елді мекеніне 100 орындық ауылдық клуб құрылысына жоба-сметалық құжаттар әзірлеу жұмыстары жүзеге асқан. Бұл жоба да толық сараптамадан өтіп, тиісті басқармаға бюджеттік өтінім тап­сырылған.Спикер алдағы уақытта барлық ны­санның құрылыс сапасы бақылауда бо­латынын айтады. Сондай-ақ ол елді мекенде жүзеге асып жатқан жобаларда жергілікті халықтың да жұмыспен қам­тылуына ерекше мән беріліп жатқанын жасырмады.&nbsp;

Жалағаш ауданында құрылыс қарқынды дамуда

<a href="https://kyzylorda-news.kz/">Kyzylorda-news.kz</a> Жуырда Мемлекет басшысы Қасым-Жомарт Тоқаев «Қазақстан Республикасының кейбір заңнамалық актілеріне әйелдердің құқықтары мен балалардың қауіпсіздігін қамтамасыз ету мәселелері бойынша өзгертулер мен толықтырулар енгізу туралы» және «Қазақстан Республикасы Әкімшілік құқық бұзушылық туралы кодексіне әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» Қазақстан Республикасының Заңдарына қол қойды.Жаңа заң: Әйелдер мен балаларды қорғай ала ма?Мемлекет басшысы 2022 жылы 16 наурыздағы және 2023 жылы 1 қыркүйектегі Қазақстан хал­қына ар­­наған Жолдауларында әйелдер мен балаларға қатысты зор­лық-зом­­былық үшін жазаны қатаң­да­туды тапсырған. Газетіміздің өткен сандарында жазғанымыздай, ау­дан­да тұрмыстық зорлық-зомбы­лық – бүгінде өзектілігін жоймаған маңызды мәселе. Бұл келеңсіздікпен аудандық полиция бөлімінің қызмет­керлері тәулік бойы күресуде. Осы орайда Жалағаш аудандық полиция бөліміне қарасты жергілікті полиция қызметі бөлімшесінің әйелдерді зор­лық-зомбылықтан қорғау тобының инспекторы, полиция майоры Ұл­босын Ахметовамен тілдескен едік.<blockquote>– Президентіміз Қасым-Жомарт Тоқаевтың бұйрығымен әйелдер мен балаларға қатысты кез келген сипаттағы зорлық-зомбылық үшін жауапкершілікті қатаңдататын, сон­дай-ақ отбасы институтын, кә­ме­летке толмағандардың қауіпсіз­дігін нығайтатын нормалар енгізілді. Тұр­мыстағы зорлық-зомбылыққа тап болған нәзікжандылардың қатары күн сайын артуда. Сон­дық­тан тиісті шараларды дер кезінде қабылдап, алдын алмасақ, соңы қай­ғылы жағдаймен аяқталуы мүмкін, – дейді Ұлбосын Ахметова.</blockquote> Жаңа заң бойынша денсаулыққа қасақана жеңіл зиян келтіру және ұрып-соғу қылмыстық құқық бұзу­шылық ретінде таныл­ған. Денсау­лыққа қасақана ауыр­лығы орташа және ауыр зиян келтіруге қатысты жауапкершілік қатаңдатылған. Нақ­тырақ айтар болсақ, ұрып-соғу (ҚР ҚК 109-1 бабы) – 80 АЕК-ге дейінгі айыппұл және түзету жұмыстары, 80 сағат қоғамдық жұмыстар, қамауға алу – 25 күн. Ал ҚР ҚК 109-1 бабы 2-бөлігі бойынша, яғни қасақана ауыр­лығы орташа және ауыр зиян келтірсе, 200 АЕК-ге дейін айыппұл салу және түзету жұмыстары, 200 сағат қоғамдық жұмыстар, қамауға алу 50 күн болып бекітілген.Сонымен қатар жаңа заңда 16 жасқа толмаған балаларға сек­суал­дық сипатта тиіскені үшін қыл­мыс­тық жауапкершілік енгізілді. Кә­мелетке толмағандарды ұрлағаны және заңсыз бас бостандығынан айыр­ғаны үшін жаза айтарлықтай қа­таңдатылды. Кәмелетке толмаған­дарды жәбірлегені (буллинг, кибер­буллинг) үшін әкімшілік жауапкершілік алғаш рет енгізіліп отыр. Білім беру ұйымдарына кәмелетке толмағандар жасаған немесе оларға қатысты жа­салған заңға қайшы әрекеттер ту­ралы құқық қорғау органдарына дереу хабарлауға міндеттелді.16 жасқа дейінгі балалардың қауіп­­сіз­дігін қамтамасыз ету мақса­тында жол ақысын төлемегені үшін олар­ды қоғамдық көліктен мәж­бүрлеп түсіруге тыйым са­лынды. Қор­ғансыз нәзікжан­ды­лар мен кәмелетке толмаған жас­өспірімдер мемлекеттің жіті назарында.2 мыңнан астам бала зорлық-зомбылыққа тап болғанБылтыр елімізде тұрмыстық зор­лық-зомбылыққа қатысты 100 мыңға жуық арыз-шағым түскен. Оның 2 мыңнан астамы балаларға қарсы жасалған қылмыстарға байланысты. Олардың ішінде кәмелетке тол­мағандарға қатысты 700-ден аса жыныстық қылмыс тіркелген. Яғни күн сайын кемі 6 қылмыс тіркеледі. Оның ішінде азаптау, ұрып-соғу, боп­салау, қасақана қауіп-қатерге душар қылу сынды оқиғалар жиі кездеседі.Осындай заңсыздықтарға барған 79 мың адам әкімшілік жауап­кершілікке тартылса, 1000-ға жуық адамның үстінен қылмыстық іс қоз­ғалған. ҚР Парламенті Мәжі­лісінің де­пу­таты Қарақат Әбденнің айтуын­ша, күн сайын 6 балаға қатысты қыл­мыс жасалып, 300-ден ас­там адам тұрмыстық зорлық-зом­былыққа ұшырайды. Балалар ара­сында 1 күнде 5 қылмыс жа­салса, жылына 150 жеткіншек тере­зеден құлап кетіп, жазатайым жағ­дайға ұшыраған. Былтыр тұрмыстық зор­лық-зомбылық салдарынан 69 әйел мен 7 бала қайтыс болған. Ал жыл басынан бері «102» пультіне тұр­мыстық зорлық-зомбылыққа қа­­­­­­­тыс­­ты 21 мыңнан астам хабар­ла­­ма түскен. 34 мыңға жуық адам әкім­­шілік жауапкершілікке тар­тыл­ған. Еліміздегі отбасылық зорлық-зомбылықтың құрбаны болатын көп жағдайда нәзікжандылар мен кә­ме­леттік жасқа толмаған балалар екені анық. Ал әлемде әр сағат сайын онға жуық әйел немесе қыз өз отбасы мүшелерінің бірінің қолынан жасал­ған зорлық-зомбылықтан қайтыс бо­ла­ды.Аудандағы ахуал қалай?Былтыр Жалағаш ауданында әйел адамға қа­тысты жасалған құқық бұзушылық бойынша 100-ге жуық отбасынан хабарлама түс­кен. Аудандық полиция бө­лі­мінің жер­гілікті полиция қызметі бө­лімшесінің учаскелік полиция инс­пек­­торлары жеке бастың құқық­тарына қол сұғатын әкімшілік құқық бұзушылықтар бойынша ҚР әкімшілік құқық бұзушылық туралы кодексінің 73 бабына сәйкес 93 адамға шара көрген. Бұл тұста былтыр аудан бойынша 37 азамат сот шешімімен қамауға алынған. Оның 15-і осы заң аясында бірнеше мәрте қамалған. ҚР «Құқық бұзушылық профилактикасы туралы» Заңының талаптарына сай тұрмыстық ортада құқық бұзу­шылық жасаған адамдарға қа­тысты 77 қорғау нұсқамасы шыға­ры­лып, аудандық сотпен құқық бұ­­зушылардың мінез-құлқына 22 ерек­ше талап белгіленген. Жыл басынан бері отбасылық тұрғыдағы жанжалдардың 44 де­регі тіркеліп, оның 12-сі әкімшілік кодекстің 73 бабына сәйкес қамауға алынған. Қорғау нұсқамасын бұзған әкімшілік кодекстің 461 бабына сәй­кес 2 азаматқа шара көріліп, қа­мақ­қа алынса, 5-еуіне ескерту бе­ріл­ген. Ерекше талап шектеулерін бұз­­ғаны үшін әкімшілік кодекстің 669 бабының 3 бөлігімен 8 азамат қамауға алынған. Есепті мерзімде атқарылған профилактикалық жұ­мыстардың нәтижесінде 2023 жыл­мен салыстырғанда отбасылық тұр­­­ғы­да жасалған қылмыстар 100 па­йызға төмендеген.Аудандық сот мамандарының мә­ліметінше, былтыр тұрмыстық зор­лық-зомбылыққа қатысты 78 іс қаралған. Оның 31-іне жаза та­ғайындалса, 10-ына ескерту бе­ріл­ген, 21 азамат әкімшілік қа­мауға алын­ған. Ал жыл басынан бері олар 34 істі қарағанын айтады. Оның 5-еуіне ескерту берілсе, 16-сы қа­мауға алынған. 13 іс қысқартылып, 9-ы медиация арқылы татуласқан. Ал 21 азаматқа жаза тағайындалған.Мәселен, А.Е есімді азамат 12 наурыз күні сағат 18:30 шамасында әйеліне мас күйінде былапыт сөздер айтып, отбасы тыныштығын бұзған. Ол бұл әрекетті бұрын әкімшілік жа­за қолданылғаннан кейін бір жыл ішінде қайталаған. Сондықтан оған 10 тәулік мерзімге әкімшілік қа­мақ­қа алу түріндегі әкімшілік жаза та­ғайындалған.Мамандардың айтуынша, тұр­мыс­тық зорлық-зомбылықтың сал­да­рынан отбасындағы нәзікжан­дар ұрып-соғудың, қорқыту мен қор­­лаудың құрбаны болған. Сал­дарынан сәтсіз отбасылардың саны артып, ажырасуға бел буған отба­сылар қатары да артқан. Мәселен, был­тыр 39 отбасы ажырасса, биыл жыл басынан бері 12 отбасының ша­ңырағы шайқалған.Түйін: Бұл – жалпыға ортақ мә­селе. Шаңырақ шайқа­лмас үшін ата-аналар қыз баланың тәрбиесімен қатар ұл ба­лалардың да тәрбиесіне аса мән берген жөн. Ер бала шаңырақтың тұтқасы деп жатамыз. Ал сол ша­ңы­рақтың тұт­қасы бала күнінен ана­сы мен қыз баланы сыйлап өссе, бо­лашақта шаңырағының берекесін арт­тыратын жарына зорлық-зом­бы­лық көрсет­пейтіні анық.&nbsp;Ақтоты БҮРКІТБАЙФото: Нұрболат Нұржаубай

Тұрмыстық зорлық-зомбылыққа тоқтам бола ма?

<a href="https://kyzylorda-news.kz/">Kyzylorda-news.kz</a>&nbsp; Жергілікті тұрғын Мәншүк Қабылбаеваның мақта өңдеу кәсібімен айналысқанына екі жыл болған. Жас кәсіпкер халық арасында сұранысқа ие кәсіп түрін бастап, ел игілігі үшін оны табыс көзіне айналдырғаны мәлім.Тереңөзек Мәншүк Қонысбекқызы кәсіпкерлікке ден қою мақсатында әлеуметтік желі арқылы мақта түтетін құрылғыны құрастырып беретін шеберді іздеп келеді. Ондай шеберді Алматы қаласынан табады. Байланыс орнатып, құрылғыны жасатып, оны алдырып, іске қосқанда халыққа пайдалы іс бастағанына қуанады.Шын мәнінде тозығы жеткен мақтаны көп адам қоқысқа тастауға асығатыны мәлім. Ал жарамсыз деп ойлаған мақтаны жақсылап түтетіп алсаңыз көрпе-төсегіңіз жаңарып, әлі талай уақыт сізге қызмет ететініне көзіңіз жетеді. Сондықтан ысырапқа жол бермей, тозды деп ойлаған затыңызды шеберге әкелсеңіз болады. Мәншүк көрпеше секілді төсеніштердің мақтасын түтумен қатар матрац, бесік жасауын да жаңалап, қажет болса көрпе-төсекті көктеп, жаңадан тігіп те береді екен.<blockquote>– Мақта түтуге жаз, күз айларында қыз-келіншектер көп келеді. Мақтаның келісін әдепкіде 200 теңгеден есептедік. Қазір баға өсті, келісіне 300 теңге алып келеміз. Сонымен қатар көрпе-көрпешені көктеп те береміз. Тапсырыс берушінің сұранысы бойынша жаңалап беруге де мүмкіндігім зор. Қолда бар құрылғы мен тігін машинасы электр тоғымен жұмыс істейтіндіктен қызметіміздің бағасын 100 теңгеге көтердік. Тәулігіне 40 келіге дейін мақта түтетін құрылғының күшіне қарай тапсырысты 2-3 күнде дайындап береміз, – дейді жас кәсіпкер.</blockquote>Қара күшті қажет ететін жұмыстың басы-қасында жүріп, сапалы етіп мақта түтету оңай шаруа емес. Көне мақтаның қаншама шаң-тозаңы болатындықтан алдымен оны қағып-сілкіп, кептіру қажет. Сонан соң ғана арнайы құрылғыға бөлшектеп, қолдап отырып салады, түтетеді. Құрылғы мақтаны тұтастай етіп шығаратындықтан, оны көрпешеге салып көктеу ыңғайлы, әрі оңай болатыны сөзсіз.Өз ісінің шебері атанған Мәншүк еңбектенуден ешқашан жалыққан да, шаршаған да емес. Қолы қалт еткенде қосымша табыс ретінде дастархан мәзірін де жасауды кәсіпке айналдырған. Той-ас иелерінің тапсырысымен түрлі дәмділерді пісірудің шебері атанған. Қазір Мәншүк қолынан келетін аспазшылық қызметімен де қатар айналысады. Оның тұрақты тұтынушылары да бар.Мәншүктің мамандығы бағдарламашы болғандықтан өз мамандығы бойынша жұмыс табу оңайға соқпағаны белгілі. Қазір көп жас қолындағы дипломымен жұмыс жасамайды. Сондықтан табылған жұмысты қанағат еткен. Мәншүк те кәсіпкерлікке келмес бұрын еңбек жолын ауруханада техникалық қызметкер болып бастап, қоғамдық негізде бірнеше мекемеде жұмыс істейді. Ай сайынғы жалақының мардымсыздығы жаңа іс бастауға себепкер болады. Көп ұзамай кәсіпкерлікке ден қою мақсатында аудан орталығынан ашылған «Әдемі» тігін шеберханасында жұмыс істейді. Тігінші Нұрсұлу Ажарованың оқу курсынан өтіп, тігінге машықтанады. Қазір Мәншүк өз ісіне машықтанған, кәсібі бар нағыз шеберге айналды.Шебердің айтуынша әрбір қыз бала үйдің көрпе-төсегіне мән беруі керек. Келген мейман отырған жеріне, төселген төсенішке қарайды. Сондықтан әдемі етіп тігілген, әрі жұмсақ етіп жайылған көрпеше ол үй иесінің айнасы, әрі абыройы.<blockquote>– Мен бала кезімнен қолөнерге жақын болдым. Анам Раушан Тайшықова тігінші, Қызылорда қаласында тұрады, үйден тігін тігеді. Сіңілім Кәмшат та тігінші. Байқоңырда өз кәсібін жасап отыр. Қазір екі қолды қалтаға салып отыратын уақыт емес. Мемлекеттен берілетін грантты алудың жолын іздеп, кәсібімді кеңейткім келеді. Жылдың барлық мезгілінде жұмыс істейтін цех ашып, мақта түтетін құрылғының жұмыс күшін көбейткім келеді. Сонымен қатар көрпе көктейтін құрылғы алу да жоспарымда бар. Қазір тек кенттен ғана емес, жақын ауылдардан да келіп, мақтасын жаңартқысы келетіндер көп. Әзірге жолдасым Болат көмектеседі. Тапсырыс болғанда неғұрлым аз уақытта орындап беруге тырысамыз, – дейді кәсіптің тың түрін тапқан келіншек.</blockquote>Бойындағы талабы мен ізденісін ұштастырып, қажыр-қайратын жұмсап, өз ісін ерекше ынта-ықыласпен жасайтын Мәншүк адал еңбектің нанын тауып келеді.

Қазақстан және Қызылорда облысының жаңалықтары