<a href="https://kyzylorda-news.kz/">Kyzylorda-news.kz.</a> 7 айда Қазақстанда 61 миллион 700 мың тонна көмір өндірілді. Бұл туралы Индустрия және инфрақұрылымдық даму вице-министрі Ілияс Оспанов айтты.<blockquote>«Жылу беру кезеңінің жоспарына сәйкес, шамамен 9 млн 100 мың тонна көмір қажет (оның ішінде коммуналдық салада - 2,4 млн тонна, халыққа – 6,7 млн тонна көмір). Биылғы 7 ай ішінде 61 млн 700 мың тонна көмір өндірілді, оның ішінде коммуналдық-тұрмыстық қажеттіліктер мен халыққа 3 млн 900 мыңға жуық тонна жөнелтілді» деді І. Оспанов Үкімет отырысында.</blockquote>Оның айтуынша, әлеуметтік көмірдің шетке кетуін болдырмау мақсатында министрлік көмірді автомобиль көлігімен тасымалдауды шектеуге бағытталған алдын алу шараларын қабылдады. Бұдан бөлек, көмір өндіруге келісімшарттары бар көмір өндіруші кәсіпорындар мен олардың үлестес сауда компанияларына тасымалдау құқығын бере отырып, көмір экспортына айрықша құқықты белгілеу мәселесі пысықталып жатыр.<blockquote>«Жергілікті атқарушы органдар бақылаушы органдармен бірлесіп, жылу беру маусымына дайындықты күшейтуге мүмкіндік беретін бірқатар іс-шараларды пысықтауы қажет» деді вице-министр.</blockquote>

Биыл елде қанша көмір өндірілді?

<a href="https://kyzylorda-news.kz/">Kyzylorda-news.kz.</a> Алдағы жылдан бастап Әлеуметтік медициналық сақтандыру қоры 10 мыңнан аз тіркелген халқы бар алғашқы медициналық-санитариялық көмек көрсететін ұйымдармен шартқа отырмайды деп жоспарлануда.&nbsp;Бұл медициналық мекемелер арасында қаржыны тиімді бөлуді қамтамасыз етіп, пациенттердің қолжетімді, сапалы және уақтылы медициналық көмекке құқықтарын қорғауға мүмкіндік береді. Өзгертілген бұйрық жобасы қоғамдық талқылауға шығарылды. &nbsp; Олар құп көрсе, Қормен жұмыс жасайтын медициналық ұйымдарды да айналып өтпейді.&nbsp;Бұл туралы Әлеуметтік медициналық сақтандыру қорының Басқарма Төрағасы Сәбит Ахметов Түркістан облысының медициналық қоғамдастығымен кездесу барысында хабарлады.Әлеуметтік медициналық сақтандыру қорымен жұмыс істейтін медициналық ұйымдардың саны жыл сайын көбейіп келеді. Биыл 1900-дан астам мекеме Қормен шарт жасасты, ал шамамен оның 700-і алғашқы медициналық-санитариялық көмек көрсетеді. Бұл ретте емханалардың көбі Алматы мен Түркістан облыстарына тиесілі. Соңғысында 59 медициналық ұйым қызмет ұсынады.&nbsp;Әрқайсысы кешенді норматив арқылы қаржыландырылады, яғни әр тіркелген пациентке ай сайын Қор төлейді. Осылайша, емханада халық саны неғұрлым көп болса, соғұрлым көп қаражат алады. Ал 10 мыңнан аз, кейде 2 мың адам тіркелген медициналық ұйымдарға қаржылық тұрғыдан қиынға соғады.&nbsp;Оларға шамалы бюджетпен қыруар шығынды еңсеруге тура келеді. Атап айтар болсақ, ғимаратты күтіп ұстау, жалақы төлеу, бейінді мамандарды тарту, коммуналдық шығындарды төлеу және жабдықтар, дәрі-дәрмектер мен медициналық бұйымдарды сатып алу керек. Сондықтан көптеген медициналық ұйымдар 90%-ға жуық медициналық қызметті бірлесіп орындауға беруді жөн көріп, бір жалпы тәжірибелік дәрігер мен медбикенің күшімен жұмыс істейді. Бейінді маманнан кеңес алу немесе тексерілу үшін әр түрлі медициналық мекемеге жолдамамен баратын пациенттерге ауырға соғады. Бұл медициналық көмектің қолжетімділігі туралы айтылған қағиданы бұзады. «Адамдар денсаулығын сіздерге сеніп тапсырады. Сол себепті халыққа медициналық қызметтердің қолжетімділігін қамтамасыз ету сіздердің міндетіңіз болса, біз сеніп тапсырылған ақшаны көрсетілген қызметтер үшін тиімді бөлуіміз керек. Әркім өз ісімен айналысып, оны сапалы орындауға тырысуы шарт. Біз сатып алу ережелері қайта қарап, өзгерістер қабылданса, келесі жылдан бастап 10 мыңнан аз адам тіркелген емханалармен шарт жасалмайды. Ал бұрыннан Қормен шарт жасасқан мекемелердің пациенттерді тіркеп, халық санын арттыруға уақыты бар. &nbsp;Ал емхана қажет халық санын жинай алмаса, олармен шарт жасалмайды, - деді Сәбит Ахметов. &nbsp;Қор басшысының ойынша, бұл жерде денсаулық сақтау басқармасы үлкен рөл атқарады. Себебі олар өңірдегі жағдайдан құлағдар, яғни халықты емханаларға біркелкі бөліп, медициналық жабдықтарды сатып алуға көмектеседі және медициналық көмек көрсетуге жеке инвесторларды, оның ішінде мемлекеттік-жекеменшік әріптестік шеңберінде тартып, медициналық көмектің қолжетімділігіне жауап береді. Ал Түркістан облысында 2 млн астам адам тұратынын әрі тұрақты өсу үрдісі бар екенін ескеретін болсақ, жеке инвесторлар үшін бұл өте тартымды болмақ.&nbsp;«Біз медициналық ұйымдарды мемлекеттік немесе жекеменшік деп бөліп- жармаймыз. Қор білікті мамандар жұмыс істейтін, материалдық-техникалық жағынан жарақтандырылған емханалармен шарт жасасады», - деп атап өтті Сәбит Ахметов.&nbsp;Басқарма төрағасы 3-5 айдың ішінде адам санын ондаған мың адамға арттырып, сәйкесінше мекеменің дамуына қыруар қаржы алған Қарағанды және Астана емханаларын мысалға келтірді. Онда бейінді сала мамандары жұмыс істейді әрі толық жабдықталған &nbsp;(ультрадыбыстық аппараттар, КТ, МРТ).&nbsp; Алайда, жекеменшік клиникалардың құрылтайшылары желдеткіштерді тиісті көлемде алмай, күрделі жөндеу кезінде үнемдеп, жабдықтарды жаңартпай жатады. &nbsp;Қор басшысы Түркістан облысының медициналық ұйымдарын аралау кезінде сондай нысанды көрсетіп, Қормен ары қарай жұмыс істеу үшін сапаға назар аударып, стандартқа сәйкестендіруді тапсырды. Кері жағдайда, медициналық ұйымдармен шарт бұзылады. Түркістан облысының денсаулық сақтау басқармасының басшысы Асхан Байдуәлиев аймақ халқының 75%-дан астамы ауыл &nbsp;азаматтары екенін тілге тиек етті. Оларға медициналық қызметтердің қолжетімділігін арттыу үшін медициналық ұйымдарды ірілендіру мәселесі шешілуде. Сонымен қатар, көптеген елді мекендер Сайрам орталық аудандық ауруханасында барлық консультативтік-диагностикалық көмекті алып отыр. Медициналық ұйымды ауданаралық деңгейге дайындауда әрі барлық қажетті жабдықтармен жабдықталып жатыр.&nbsp;Кездесу барысында ол бірқатар проблеманы айтып, оңалту және жедел жәрдем тарифтерін қайта қарауды, аз инвазивті операциядан кейін асқынуларды болдырмау үшін дәрігерлердің бақылауында біраз уақыт қалуы үшін аудандардағы пациенттер үшін бір күндік хирургия тарифін әзірлеуді сұрады.Жедел жәрдем бойынша тарифтердің төмендігі айтылып қана қоймай, нақты шешімдер айтылды. Жедел жәрдем станциясына қайтар жолға шығындарды үнемдеу мақсатында желілік бригадалар енді постқа оралмайды. Қызмет &nbsp;көрсеткеннен кейін, олар соңғы мекенжайда қалып, келесі қоңырауды күтеді. Бұдан бөлек, жедел медициналық көмек бригадаларын облыстың барлық аудандарына беру және бөлу жоспарлануда. Бұл ретте орталық станцияға бас консультативтік орталықтың функциялары берілетін болады.Асхан Байдуәлиев қаржыландыру мәселесін де тілге тиек етті. Түркістан ауруханалары аймақ тұрғындарына ғана емес, Шымкент қаласының азаматтарына да медициналық көмек көрсетеді.&nbsp;«Қаржы тапшылығына байланысты пациенттерді кезекке қоюымызға тура келеді. Бұл көпшілік арасында түсінбеушілік тудырады. Қосымша қаржыландыруды және Қордың Шымкент филиалымен шарттарды қоса атқаруға рұқсат беруді сұраймыз», - деді Қор басшысымен әңгіме барысында Асхан Байдуәлиев. Басқарма төрағасы бұл сұрақты назарға алатынын айтты.&nbsp;Тағы бір мәселе – Түркістан облысының 24 мемлекеттік медициналық ұйымындағы 4,9 млрд теңге көлемінде жинақталған кредиторлық берешегі. Денсаулық сақтау басқармасы басшысының айтуынша, бұл берешек жұмыс сапасына әсер етеді. Мәслихаттың ұйғарымымен жергілікті бюджеттен медициналық ұйымдарға көмек ретінде 252 млн теңге бөлінді. Сәбит Ахметов Қор тарапынан 8,3 млрд теңге бөлінгенін айтты. Сонымен қатар, ол ӘМСҚ міндетіне жекелеген медициналық ұйымдардың кредиторлық берешегі бойынша мәселелерді қадағалау және шешу кірмейтінін атап өтті. Тапсырыс беруші ретінде негізгі міндеті – емделген жағдайлар үшін төлем жасайды. Медициналық ұйымдар орындаушы болып табылады және жасасқан шарт аясында өз міндеттемелерін орындауы тиіс. Осы ретте Қор басшысы кредиторлық берешек бойынша мәселелер Денсаулық сақтау министрлігімен және жергілікті атқарушы органдармен шешілетінін айтты.

Келесі жылдан бастап емханаларға талап күшейтілмек

<a href="https://kyzylorda-news.kz/">Kyzylorda-news.kz.</a> Биыл қыркүйекте ерлі-зайыптылар үшін ақпараттық-түсіндіру шараларының кешені іске қосылады. Бұл жайында Премьер-Министр Әлихан Смайыловтың Мәжіліс депутаттарының сауалына берген жауабында айтылды.<blockquote>«Отбасы құндылықтарды одан әрі нығайту мақсатында Ақпарат және қоғамдық даму министрлігі Цифрлық даму, инновациялар және аэроғарыш өнеркәсібі министрлігімен бірлесіп, осы жылдың қыркүйек айында некеге тұрған ерлі-зайыптылар үшін оң ықпалы бар отбасылық дәстүрлер мен рухани-адамгершілік құндылықтарды сақтау, отбасын жоспарлау және ерлер мен әйелдердің репродуктивті денсаулығын қорғау мәселесі бойынша некеге тұрған ерлі-зайыптылар үшін ақпараттық-түсіндіру шараларының кешенін (е-gov платформасындағы жадынама, офлайн және онлайн форматтағы бейнероликтер, семинарлар мен тренингтер және басқа да шаралар) іске қосуды жоспарлап отыр» деп атап өтеді Үкімет басшысы.</blockquote>Премьер-Министрдің дерегінше, елімізде отбасылық-тұрмыстық зорлық-зомбылықтың профилактикасы саласында белгілі оң динамика байқалады. &nbsp;

Қыркүйекте жаңадан отау құрған жастарға арналған ақпараттық-түсіндіру шаралары басталады

<a href="https://kyzylorda-news.kz/">Kyzylorda-news.kz.</a> Жүйе іске қосылған 2017 жылдың 1 шілдесінен 2023 жылдың 1 тамызына дейінгі аралықта Қызылорда облысының тұрғындары Әлеуметтік медициналық сақтандыру қорына 56,8 млрд. теңге аударған.Оның 34,8 млрд. теңгесі жұмыс берушілердің аударымдары болса, қалған 22 млрд. теңге - жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі, - деп хабарлады «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.

Облыс тұрғындары Әлеуметтік медициналық сақтандыру қорына 56,8 млрд теңге аударды

<a href="https://kyzylorda-news.kz/">Kyzylorda-news.kz.</a> Бүгін Сырдария ауданының әкімі Берік Сәрменбаев «Еңбек даңқы» музейінде өткізілген «Жаралы жылдар жаңғырығы» тақырыбындағы көрме жұмысымен танысты. Семей полигонының жабылуына орай өткізілген іс-шараны аудан басшысы ядролық жарылыстан зардап шеккен ардагерлермен бірге көрді.Аудандық тарихи-өлкетану музейінің қызметкерлері ядролық сынақ полигоны туралы ақпарат берді. 1991 жылы 29 тамызда Семей полигоны жабылды. Одан 1,5 миллион адам зардап шекті. Ядролық сынақтың зардаптарын жою үшін ел азаматтары әскери міндетін өтеді. Сынақ алаңына ауданнан 150-ге жуық азамат барса, бүгінде 28 ардагер мемлекет тарапынан көмек алуда. Семей полигоны ардагерлерінің құрметіне «Еңбек даңқы» музейінде арнайы бұрыш жасақталған.Іс-шарада Семей полигоны ардагерлері өз естеліктерімен бөлісті. Аудан әкімі әскери борышын өтеген азаматтардың ерліктері кейінгі толқынға үлгі-өнеге екенін айтып, құрмет толастамайтынын жеткізді.

«Жаралы жылдар жаңғырығы» көрмесімен танысты

<a href="https://kyzylorda-news.kz/">Kyzylorda-news.kz.</a> Мәжіліс депутаты, «AMANAT» партиясы фракциясының мүшесі Мархабат Жайымбетов Қ.Пірімов ауылындағы Қ.Күлетов атындағы №92 мектептің күрделі жөндеу жұмыстарымен танысып, жаңа оқу жылына дайындық жұмыстарын көрді.Мектеп ауласында ең алдымен ауыл тұрғындарымен кездесіп, ұсыныс-пікірлерін тыңдады. Өз кезегінде жергілікті халық атқарылып жатқан жұмыстарға ризашылықтарын білдіріп, алғыстарын айтты.Ары қарай «Ауыл – ел бесігі» жобасы шеңберіне күрделі жөндеуден өтіп жатқан нысанмен танысқан фракция мүшесі мердігер мекеме – «ГрадСтройСервис» ЖШС қызметкерлеріне жөндеу жұмыстарын уақытылы әрі сапалы етіп жасауды тапсырды. Сондай-ақ білім ордасындағы күрделі жөндеу жұмыстары оқу процесіне кедергі келтірмеу үшін жаңа оқу жылына дайын болу керектігін жеткізді.Халық қалаулысы осы ауылдағы жаңадан пайдалануға берілген спорт кешенінің құрылысымен де танысып шықты. Бүгінде ауыл балалары бұл нысанда еркін күрес, грек-рим күресі, самбо, дзюдо, бокспен шұғылдана алады.Айта кетейік, партияның сайлауалды бағдарламасына сәйкес Ү.Түктібаев ауылында да жаңа спорт кешені бой көтеріп, ағымдағы жылдың сәуір айында пайдалануға берілген болатын.

Мәжіліс депутаты күрделі жөндеуден өтіп жатқан мектепте болды

Жосалы кентінде ХVII ғасырда Жайық өзені бойын жаулаған қалмақтармен күрестерде ерлігімен ерекшеленген қазақ батырының бірі – халқына Сарқасқа есімімен танылған Келменбет Келдібайұлының туғанына 375 жыл толуына орай мәдени-спорттық шара өтті.Ол алдымен ат бәйгесімен басталды. Азанғы сағат 7.00-де «Мөлтек» ықшам ауданында орналасқан ипподромда 2 айналым болатын 6 шақырымдық тай бәйгесімен басталған жарысқа «Сен тұр, мен шабайын» деген 23 тай иесі қатысып, оның нәтижесімен талай дүбірлі жарыста бәйгенің көш басынан көрініп жүрген ақайлық Асланбек Әбдібекұлының Ермұхамбет есімді шабандозы мінген «Жебесі» басқа тайлардан дараланып, мәре сызығын бірінші болып кессе, келесі жүлделі екі орынды Көмекбаев ауылынан келген Жәнібек Әбдірахмановтың шабандозы Нұржан мінген «Оригиналы» мен ақайлық Әбдуәли Жалғасұлының «Бұйрығы» (шабандозы Рамазан) иемденді.Сондай-ақ, 6 шақырым болатын 4 айналымдық Құнан бәйгесіне қатысқан 7 құнан арасында ерекше шабысымен дараланған Қазалы ауданы, Сарбұлақ ауылынан келген Сражадин Шамұратовтың «Жұлдызторысы» бәйгенің бас жүлдесін жеңіп алса, ІІ орынға қазалылық Нұрлыбек Шаламановтың «Қалмаққарасы», ал жүлделі ІІІ орынға Қызылорда қаласынан келген атбегі Еділ Дауыловтың жүйрігі көтерілді.Келесі кезекте бәйгеқұмар қармақшылықтардың асыға күткен 6 айналым болатын 16 шақырымдық Аламан бәйгесінде шапқан 7 сәйгүліктің мәреге 3-еуі ғана жетті. Нақтысын айтқанда, үш жүйрік мәреге бірінің артынан бірі жарыса жетсе, енді біреуі бір айналым кеш келді, ал қалғандары жарыс жолынан шығып қалды. Жарыс нәтижесінде Қазалыдан келген Әбілқайыр Қадіровтің «Спартагы» І орынға көтерілсе, екінші бір қазалылық атбегі Ғабит Бозғұловтың «Күреңқасқасы» ІІ орынға, ал Жалағаш ауданынан келген Ерболат Кетебаевтың «Ақмаңдайы» ІІІ орынға көтеріліп, мерейлері үстем болды.Есімі елге танымал айтыс ақыны Сырым Әділбековтің арнауымен басталған шара әрі қарай Келменбет батыр көшесінің ашылу салтанатымен жалғасты. Оны аудан әкімінің орынбасары Самат Смағұлов ашып, іс-шараға қатысушылар мен қонақтарға аудан экономикасын нығайту, тұрғындардың әлеуетін арттыру мақсатында атқарылып жатқан ілкімді істермен таныстырып, батырдың өмір жолына тоқталды. Одан кейін сөз алған қоғам қайтаркерлері Сәпен Аңсат, Бекмырза Еламанов, еңбек ардагері Төлеген Анасбайұлы игі іс бастамашыларына жылы лебіздерін білдірді. Содан соң қатысушылар Келменбет батырға арналған ескерткіш-тақтаның лентасын қию рәсімін тамашалады.Одан әрі іс-шара ат бәйгесінің жүлдегерлерін марапаттауға ұласса, аудандық «Қармақшы ата» мешітінің бас имамы Өміржан Тобжанов әруақтарға арнап Қатым-Құран шығарды.Сонымен бірге ұйымдастырушылар зілтемір көтеруден Әлем біріншілігінің екі мәрте жеңімпазы Ерасыл Сәулебекке тұлпар мінгізді.Одан әрі әруақтарға арналған ас беріліп, Құран бағышталды.Тағылымы мол, тәрбиелік мәні зор болып өткен шарада балуандар күресі, арқан тарту, гір тасын көтеру сияқты спорттық жарыстар ұйымдастырылды. Түйе балуандар белдесуінде бас жүлдені Шыңғыс Тоқманбетов жеңіп алса, ІІ орынды Азамат Шәйкөзов, ал ІІІ орынды Ерлан Жақсылықов иеленді. Ал, арқан тарту және гір тасын көтеруден өткен жарыста да жеңімпаздар мен жүлдегерлер арнайы жүлдемен марапатталды.

Қармақшы ауданында мәдени-спорттық шара өтті

<a href="https://kyzylorda-news.kz/">Kyzylorda-news.kz.</a> ҚР Парламенті Мәжілісінің депутаты, «AMANAT» фракциясының мүшесі Мархабат Жайымбетов Қазалы ауданына жұмыс сапарымен келіп, ауыл шаруашылығы саласындағы бірқатар маңызды мәселелерді талқылады.Басықара су торабына арнайы барып нысанның жағдайымен танысқан соң, фракция мүшесі ауыл шаруашылығы саласының өкілдерімен бірге Сырдария өзеніндегі судың жайын талқыға салды.Сырдария өзеніндегі су тапшылығына байланысты аудан бойынша соңғы 1-2 жылдың көлемінде кейбір көлдер мен жайылымдықтарға су жіберілмеді. Алайда бұл мәселелердің алдын алу мақсатында жүйелі жұмыстар жүргізілен болатын. Дегенмен өзендегі су тапшылығы осы жылы да байқалып, дақылдарды суару кезеңінде кері әсерін тигізіп, егін және мал шаруашылығымен айналысатын кәсіпкерлерге көптеген кедергілер келтірді.Осы ретте кездесуде қазалылық шаруалар бұл күрделенген мәселе екенін айта отырып, шешілу жолдары тиісті деңгейде қарастырылса деген ұсыныстарын жеткізді. Ал өз кезегінде халық қалаулысы мәселенің жергілікті тұрғындар үшін өзектілігін ескере отырып, бұл бағыттар бойынша тиісті жұмыстар жүргізетінін тілге тиек етті.Айта кетейік, кездесуге аудан әкімі Мұхтар Оразбаев, аудандық партия филиалының төрағасы Ғазиз Әліш, аудан әкімінің орынбасары Күнтілес Назымбеков, облыстық мәслихат депутаты Нұрлан Имандосов, партия филиалының Атқарушы хатшысы Нұрғиса Жалғасбаев және тиісті сала мамандары қатысты.

Ауыл шаруашылығы саласындағы мәселелер талқыланды

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданы әкімінің міндетін атқарушы Арнұр Нұрмағанбетов аудандық құрылыс, сәулет және қала құрылысы бөлімінің әдіскері Өмірбек Оспановты зейнеткерлікке шығарып салуға арналған қабылдау өткізді.<blockquote>«Ауданымызда бой көтерген түрлі нысандар, сапалы ғимараттар, ел игілігі үшін тұрғызылған әлеуметтік нысандардың кірпішінде Өмірбек Асанбекұлының қолтаңбасы жатыр деуге әбден болады. Еліміздің тәуелсіздік алғанға дейінгі жылдарында да қызметтің қиын да күрделі сатыларынан өтіп, ауданымыздың өркендеу жолында алдыңғы шепте жұмыс жасадыңыз» деді Арнұр Нұрмағанбетов.</blockquote>Өмірбек Асанбекұлына ауданның ең жоғары марапаты «Құрмет грамотасы» табысталды.Өмірбек Асанбекұлы еңбек жолын 1979 жылы Жалағаш аудандық су шаруашылығы басқармасында гидротехник болып бастаған.1985-1990 жылдары жылжымалы құрылыс мехколоннасында (ПМК) шебер, еңбек және еңбек ақы бөлімінде инженер қызметтерін атқарған.1990-1992 жылдары Жалағаш аудандық Кеңесінің атқару комитетінде аға-референд, 1992-1998 жылдары аудан әкімі аппаратында инспектор, бас маман болып жұмыс жасаған.1998-2006 жылдары ауданның бас сәулетшісі, құрылыс-сәулет және тұрғын үй-коммуналдық шаруашылық бөлімінің басшысы қызметтерін абыроймен атқарған.Бүгінгі күнге дейін Жалағаш аудандық құрылыс, сәулет және қала құрылысы бөлімінде әдіскер қызметін атқарып келді.Қабылдауға аудандық мәслихат, ардагерлер және алқа билер кеңесінің төрағалары, құрылыс саласының ардагерлері мен мамандары қатысты.

Жалағаш ауданының құрылыс майталманына құрмет көрсетілді

<a href="https://kyzylorda-news.kz/">Kyzylorda-news.kz.</a> Бүгін "AMANAT" партиясы облыстық филиалы жанындағы Партиялық бақылау комиссиясының төрағасы Н.Бақытбекұлы, Өңірлік даму кеңесінің төрағасы Қ.Ильясов және комиссия мүшелері аймақтың жылу маусымына дайындық жұмыстарына мониторинг жүргізді.Алдымен Қызылорда жылу электр орталығының жұмыс барысын бақылап, жылу жүйелерінің алдағы қысқы мезгілге дайындығын пысықтады.Мұнан соң аманаттықтар партияның Сайлауалды бағдарламасының Жол картасына енгізілген С.Бейбарыс көшесіндегі жылу құбырларының жаңғыртылуымен танысты.Бақылау жұмысы барысында жылу электр станциясы, жылу желілері және резервтік отынның жай-күйі айтылып, мердігер мекемелерге жаңғырту жұмыстарының сапалы аяқталып, уақытылы пайдалануға берілуі тапсырылды.

Жылу маусымына дайындық барысы бақыланды

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-министрі Әлихан Смайыловтың төрағалығымен өткен Үкімет отырысында егін жинау науқаны, жем-шөп дайындау барысы, алдағы жылу маусымына дайындық мәселелері қаралды.Ауыл шаруашылығы министрі Ербол Қарашөкеевтің баяндауынша, биылғы қолайлы жағдай егін орағын уақытылы бастауға мүмкіндік берді. Бүгінде республика бойынша 2,4 млн. гектар немесе 14,1% дәнді және дәнді-бұршақты дақылдар жиналды. Орташа түсім гектарына 11,5 центнер болып, 2,8 млн тонна астық бастырылды. Биыл 24 млн гектар алқапта ауыл шаруашылығы дақылдары жиналмақ.Алдағы жылу маусымына дайындық барысы туралы Энергетика вице-министрі Жандос Нұрмағанбетов баяндама жасап, бекітілген кестеге сәйкес еліміздің электр стансаларында 10 энергоблокты, 49 қазандықты және 54 турбинаны күрделі жөндеу жоспарланғанын айтты. Қазір 4 энергия блогында, 24 қазандықта және 15 турбинада жөндеу жұмыстары жүргізілуде.Ә.Смайылов жиынды қорытындылап, жоспарланған жұмыстарды мерзімінде аяқтауды тапсырды.Үкімет отырысынан кейін Премьер-министр берген тапсырмаларды пысықтау мақсатында өткізілген мәжілісте сала басшыларына дайындық жұмыстарын уақытылы жүргізіп, жылу беру маусымын кедергісіз бастау міндеті жүктелді.

Жауапты науқанға дайындық мәселелері талқыланды

<a href="https://kyzylorda-news.kz/">Kyzylorda-news.kz.</a> Қызылордада жол жөндеу жұмыстарына байланысты 22-24 тамыз аралығында С.Бейбарыс көшесі мен Тәуелсіздік даңғылының қиылысында жеңіл автокөліктер мен автобустардың қозғалысы уақытша тоқтатылды.

Қазақстан және Қызылорда облысының жаңалықтары