<a href="https://kyzylorda-news.kz/">Kyzylorda-news.kz</a> Қазақ өркениетінің бастауы – өнер және дәстүр құндылығы. Оның ішінде ғасырдан-ғасырға жалғасып, жалпы қазақ қоғамының әр кезеңіндегі тарихи оқиғалармен қатар, ұлт мүддесі, әлеумет ұстанымы, салт-сана, тұрмыс-тіршілік сипатын арқау еткен жыраулық, жыршылық өнердің бүгінгі беталысы, деңгейі өте жоғары. Жуырда белгілі жырау, Жиенбай жыр мектебінің өкілі Серік Жақсығұлов өзінің жыр кешін өткізген болатын. Осыған орай жыраудан жыршылық өнері мен құндыылықтары туралы әңгімелескен едік.– Серік аға, «Жырдария» атты жыр кешіңіздің сәтті өтуімен құттықтаймын. Әсеріңізді бөліссеңіз…– Рахмет! Өздеріңіз білесіздер, Сыр өңірі қашаннан да өнерге оң көзқараста. Өнер мерейі тасып бір белеске көтерілген кеш болды. Әр шығарма орындаған сайын халықтың қолпаштауы, алғаусыз көңілі үлкен шабыт сыйлады. &nbsp;Жыр жәрмеңкесінде сыр сүлейлері Тұрмағамбет Ізтілеуұлы, Шораяқтың Омары, Кете Жүсіп, Махамбет Өтемісұлының толғаулары мен «Көрұғлы» дастаны сияқты көлемді шығармаларға тоқталдық. Аямызды тарылтпадық. Тиісінше алдағы жоспарларға із салдық деп ойлаймын.– Жыр кешіңізді өткізу идеясы қайдан келді?– Идеяның өзі халықтың сұранысынан туады. «Халық &nbsp;қаласа, хан түйесін сояды» деген ұғым бар. Біз қашанда халықтың қызметіндеміз. Облыс әкімдігі, облыстық мәдениет, архивтер және құжаттама басқармасының басшысы Мира Жомартқызы, Н.Бекежанов атындағы қазақ академиялық музыкалық драма театры басшысы Мұхтар Мәуленұлы бастаған ұжым шараның жоғары деңгейде өтуіне септігін тигізді. Негізгі мақсат – жыраулық өнерге келген уақыттан бергі тәжірибемен бөлісу. Өнер адамында адымдап келіп, қадамдап шабатын уақыты болады. Профессор Алмас Алматов ағамыздың сөзі бар «Кезеңі келмей, кезегі келмес» деген. Бұл сондай бір сәті келген кеш болды деп есептеймін.– Орындаушылық шеберлігіңізде өзгешелік бар.&nbsp;Десе де бұл шыңы емес шығар…– Бұл – көп жылғы ізденіспен келген нәтиже. Үлкен жырауларды көп тыңдадық. Әрбір жыраудың мақам, саз, ән шақыру, жырлау, мәнерлеп орындау сипаттамасын меңгеруге талпындық. Қадау-қадау жүйріктердің ішінде қадап айтарымыз, Рүстембек жырау, Мұзарап жырау, Жаппар Тұңғышбаев, Шамшат Төлепова, Көшеней Рүстембеков, Қуандық Бүрлібаев, Бидас Рүстембеков, Алмас Алматов сияқты таңбалы жыраулардың жыр қорынан сусындап өстік. Соларға еліктеп, мақам-саздарын үйрендік. Орындаушылық шеберліктің шыңы әлі алда. Өзімді қай кезде де күрделі мақамдар орындап, жетілдіріп отырамын. Әрбір мақамның мәйегіне жетуге, әр дыбыстық жүйеге мән беруге, оның қайырымын орын-орынына түсуіне жұмыс жасадық. Соның нәтижесі міне осы.– Жалпы жыраулық өнер қай кезеңнен бастау алады?– Әр өңірдің өзіне тән өнер сабақтастығы болады. Біздің өңірдегі жыраулық өнер бастау бұлағын Сыр анадан, Қорқыт бабадан алып жатыр десем артық айтқандық емес. Бұл өнер біздің қанымызда бар. Кешегі Күлтегін, Тоныкөк дәуірлері, бертінде Ешнияз сал, Жиенбай жырау, Тасберген жыраулардан қалған мұра. Біз жыраулық өнерді сонау күретамыры үзілмеген кезеңнен бастадық. Бүгінде атамұра өнер жалғасын тауып, жаңғырып жатқаны көңіл құсын көкке шарлатады.– Домбыраны алғаш неше жасыңызда қолға алдыңыз? Кім себепші болды?– Алғаш домбыраны алты жасымда қолға алдым. Өнерге келуімізге ата-анадан алған тәрбиемізбен қатар өскен ортамыздың әсері болды. Әкем Орынбек Шәріпұлы, анам &nbsp;Тұрды Құдайбергенқызы көп септігін тигізді. Кешегі Көшеней Рүстембеков, Қуандық Бүрлібаев, Шамшат Төлепова секілді жампоз жырауларды тыңдай жүріп, туысқандық қатынастарымен де араласқан. Әкем бозбала күнімде белгілі жырау Алмас Алматовқа өз қолымен апарып, табыстағаны күні кешегідей көз алдымда. Содан бері жыраулық-жыршылық әлеміне өз қосымызды тігіп, өнер өлкесіне қадам бастық.– Шәкірт тәрбиелеуде нені бағдар етесіз?– Біз әрбір орындаушының шығарманы дұрыс айтылуына баса мән береміз. Ұстаздық жолы ауыр. Біркелкі мақаммен шектелмей, күллі қазаққа ортақ өнер өкілі болуына баулимыз. Беретін бағдарымыз тек орындаушылық емес, кәсіби шеберлік. Сонымен қатар азаматтық болмысының қалыптасуына да бағыт беріп отырамын.– Жыр қорыңызда қанша қисса-дастан бар?– Сыр сүлейлерінің барлық шығармаларынан орындаймыз. Себебі Сыр бойы жырауларының сонау түркі дәуірінен тамыр алатыны белгілі. Шораяқтың Омары, Балқы Базардың еңбектері мен Тұрмағамбет ақынның бірнеше дастанына бой алдырдық. Сондай-ақ Рахмет Батырбаевтың, Әбзәли Егізбаевтың туындылары және «Бұқарбай батыр», «Шахнама», «Көрұғлы» дастандары бар. Атап айтқанда осылар. Бірақ терме, дастанның барлық түрлері бар. Кешегі «Қобыланды», «Алпамыс» сияқты жырларға дейін бойлап бара береміз. Халықтың сұранысына сай жырлауға толық мүмкіндігіміз баршылық.– Ғылым мен мәдениетте, әдебиет пен өнерде қандай тұстарымыз жетіспей жатады?– Бұл – көлемді тақырып. Ғылым мен мәдениет, әдебиет пен өнер аясы өз кеңістігінде өсіп келеді деп айта аламын. Дегенмен, кешегі ғалымдарымыз Әлкей Марғұлан, Мұхтар Әуезов, Рахманқұл Бердібай, Мардан Бәйділдаевтардың атқарған еңбегінің ізінде көптеген мұраларымызды әлі де жетілдіруіміз қажет. Бұл ғалымдардың жасап кеткен еңбегін жалғастыру – біз үшін үлкен бағыт-бағдар, аманат. Жетіспей жатқан тұсымыз көп. Бүгінгі жыраулардың барлығы мақала жазып, әрбір орындаушының үлкен мектеп қалыптастырған Нұртуған, Нартай, Жиенбай шығармаларын айналымға ендіру мәселесі. Қазақ әдебиетінде толық орын алатын тұлғалардың жыр-дастандарын зерттеу мұраты біздің алдымызда тұрады.– Қазір театрда қызметтесіз. Жыраулық пен театр – екеуі екі бағыттағы сала. Қиындық туғызбай ма?– «Театрдың өзі – синкреттік өнер. Ал жыраулық өнер – даралық өнер шоғыры» дейді профессор Алмас Алматов. Синкреттік – ол жан-жақтылық. Әр саланың, әр өнердің төрт құбыласын түгел қамтып келетін орта. Жалпы осы жыр кешімізді жыр спектакль ретінде ұсынып, жыр кешінің жаңаша форматта өтуі үлкен өзгеріс, тамаша көрініс тапты. Атап айтқанда, режиссер Бақытбек Темірбеков өз қолтаңбасын қалдырды. Театр басшысы, айтыс ақаны Мұхтар Ниязов сценарийге атсалысып, Сыр ана мен Қорқыттың үйлесім табуына үн қосып, үлкен қолдауын көрсетті. Қос саланың қатар тоғысқан тұсында қашанда жаңа келбет жарқырай көрінеді.– Қазақы құндылық қазіргі қоғамда қадірін жоғалтып алған жоқ па?– «Қадірін білген адамға адам қымбат» дейді халық даналығында. Хакім Абайдан: – Бұл өмірде кімнен, неден жеңілдіңіз?» деп сұрапты. Сонда ұлы Абай: «Сөз ұқпайтын ақымақтан күнде жеңілемін» деген екен. Қазақы құндылық қазіргі қоғамда қадірін жоғалтпайды. Егер де соны ел болып көздің қарашығындай қорғай білсе, жас ұрпақ бойына сіңіре білсек, нұр үстіне нұр болар еді. «Жоқ деген жерге, бардың шамын алып бар» дейді ұстазым Алмас Алматов. Жоқ деген сөзден қашуымыз керек. Бар, болады деуіміз керек. Әрқашанда алда жүруге, құндылығымызды кеңінен насихаттауға әрбіріміз үн қосуымыз қажет деп есептеймін.– Соңғы сауал. Жыр кешін аудандарда өткізуіңіз мүмкін бе?– Әбден мүмкін. «Жырдария» атты жыр жәрмеңкесінің облыс орталығында тұсауы кесілді. Жоғарыда атап өткенімдей, бұл – жаңа формат. Халыққа осы үрдісте ұсынсақ жақсы қабылдайды деген ниет бар. Бұл жыр кеші «Руханият жылы» аясында ауқымды шаралардың бірі деп есептеймін.Тұрар Бекмырзаев

Серік Жақсығұлов:  Сыр өңірі қашаннан да өнерге оң көзқараста

<a href="https://kyzylorda-news.kz/">Kyzylorda-news.kz</a>&nbsp;&nbsp; Әлеуметтік желіде мектеп бітірген қыздардың жігітті ұрған сәтінің видеосы тарады. Қыздар видеоны өз парақшаларына жүктеген. Сондай-ақ оқиғаның Алматыда болатыны жазылған. Бұл туралы Stan.kz ақпарат агенттігі хабарлайды. Видеода тағы бір жігітті байқауға болады. Ол қыздарға көмектескен болуы мүмкін.Полиция департаменті көп ұзамай қыздардың ұсталғанын мәлімдеді.<blockquote>"Бұзақылық дерегі бойынша қылмыстық іс қозғалды. Кәмелетке толмаған күдіктілер полицияға жеткізілді. Қазір олардың ата-аналарының қатысуымен тергеу шаралары жүргізіліп жатыр. Істің өзге мән-жайы анықталып жатыр", – делінген хабарламада.&nbsp;</blockquote>

Алматыда мектеп бітірген қыздар жігітті ұрып, видеоға түсірген

<a href="https://kyzylorda-news.kz/">Kyzylorda-news.kz</a>&nbsp;&nbsp; Сырдария ауданының әкімі Берік Сәрменбаев Н.Ілиясов ауылында «Абзал және К» жүлдесі үшін жасөспірімдер арасындағы дзюдодан республикалық турнирдің ашылу салтанатына қатысты.Спорттық іс-шарада аудан басшысы құттықтау сөз сөйлеп, жарысқа қатысушыларға сәттілік тіледі.<blockquote>– Мемлекет басшысы Қасым-Жомарт Кемелұлы Тоқаев Қазақстан халқына арнаған «Әділетті мемлекет. Біртұтас ұлт. Берекелі қоғам» Жолдауында спорт саласы бойынша әр облыста және ірі аудан орталықтарында саламатты өмір салтын қалыптастыру үшін арнайы спорт орталықтарын ашу қажет деді. Қазақстан Президентінің бұл тапсырмасы Үкімет басшысы және облыс әкімі Нұрлыбек Машбекұлы Нәлібаевтың қолдауымен Сыр елінде қарқынды жүргізілуде. Облыс орталығында халықаралық талаптарға сай келетін 10 мың орындық жаңа стадионның іргетасы қаланды. Құны 2,7 млрд. теңге болатын үстел теннисі орталығының құрылысы қарқынды жүруде. 6,8 млрд. теңгені құрайтын жабық бассейні бар көпсалалы дене шынықтыру-сауықтыру кешенінің құрылысы басталды. Сырдария ауданында да спортты дамытуға үлкен қолдау жасалып, мәдени-спорттық шаралар көптеп ұйымдастырылуда. Биыл Бесарық ауылында жаңа спорт кешені пайдалануға берілетін болады. Дені сау ұрпақ – ұлт болашағы екенін ескерсек, жастарымыздың ертеңі үшін осындай спорттық іс-шаралардың маңызы ерекше. Өскелең ұрпақтың денсаулығын шыңдау үшін спорттық жарысты ұйымдастырушы Қазақстанның Еңбек Ері Абзал Ералиевке шынайы алғысымды білдіремін, – деді Берік Әбдіғаппарұлы.</blockquote>Турнирдің ашылуында Қазақстанның Еңбек Ері А.Ералиев те сөз сөйлеп, жыл сайын ұйымдастырылып жатқан турнирге қатысушыларға сәттілік тіледі.Бүгінде Нағи ауылында ашық турнирлерді тұрақты ұйымдастыру үрдіске айналған. 2012 жылдан басталып, биыл 12-ші рет жалауын желбіреткен республикалық турнир спортшылардың үлкен жетістіктерге жетуіне мүмкіндік жасауда. Елді мекенде «Абзал және К» толық серіктестігінің жүлдесі үшін үстел теннисінен де ашық турнирлер жыл сайын өткізіліп келеді.Айта кетейік, жасөспірімдер арасындағы дзюдодан республикалық турнирге 14 өңірден 600-ге жуық спортшы қатысуда.

Дзюдодан республикалық турнир басталды

<a href="https://kyzylorda-news.kz/">Kyzylorda-news.kz</a> Қазалы қалалық кітапханасында «Ұлт руханиятының шырақшылары» атты кездесу кеші өтті. Оған еліміздің рухани дамуына үлес қосып жүрген Білім беру ісінің үздігі, «Шапағат» медалінің иегері, Қазақстан Жазушылар одағының мүшесі, ақын Рүстем Жанайдың жары, ұстаз Күләш Досжанова, Қазақстан Жазушылар одағының халықаралық Қазақ ПЕН-клубының мүшесі, прозашы Үміт Тәжікен қатысты.Шара кітапхананың жас оқырманы Самал Ахметжанның орындауындағы С.Ботабаевтың сөзіне жазылған Ж.Төлебаевтың «Жақсы адамдарым» әнімен ашылды. Кездесуде Қазалы агро-техникалық колледжі директорының орынбасары Шәрбану Баекеева қонақтарға құрмет көрсетті. Колледж оқытушысы Жәния Ысмағұл, М.Горький атындағы №16 мектеп-лицей мұғалімі Гүлбарам Жауғашарова жылы лебізін білдіріп, шәкірттері ақын Рүстем Жанайдың өлеңдерін, прозашы Ү.Тәжікеннің эсселерін жатқа оқыды.Мәдени-рухани кеште ардагер- ұстаздар Қазыбай Саниязов, Қалмырза Нұртазаев, Күләш Бисенова, зейнеткер ана Жәмилә Қаракеева, Ғ.Мұратбаев мемориалдық музейінің директоры Роза Асанова, Қазалы агротехникалық колледжінің оқытушылары Нұргүл Әлменова, Бақтияр Ерғазы, кітапханашысы Алтынкүл Сансызбаева, қалалық жастар ресурстық орталығының инспекторы Жамет Даниел және өзге де оқырмандар қаламгерлер шығармашылығы жөнінде ой бөлісті.Кешті аудандық орталықтандырылған кітапханалар жүйесінің бөлім меңгерушісі Зоя Мұстафаева қорытындылады.

Ұлт руханиятының шырақшылары

<a href="https://kyzylorda-news.kz/">Kyzylorda-news.kz</a>&nbsp;&nbsp;Игілікті іс – қоғам айнасы екені сөзсіз. Бүгінгі қоғамда игілікті іс атқарып, ізгіліктің жаршысы болып жүрген жанашыр жандар қаншама. Сырдария ауданының орталығынан шалғайда орналасқан Айдарлы ауылының тұрғыны Мұхитбек Тәжекеев ізгілікті іс атқарып жүрген азаматтар жөнінде айтып берген болатын. Жанашыр азаматтың айтуынша, ауылдың барлық мәселесіне бей-жай қарамайтын бірнеше азамат ауылдағы «Ардагерлер» саябағына ағаш отырғызып, су арнасын тазартып берген екен.&nbsp;Кіндік қаны тамған туған жер топырағынан түлеп ұшқан қос азамат Нұрмахан Ералиев пен Лесбек Әлмаханов шалғайда орналасқан ауылдың көркеюіне сүбелі үлес қосып, ауылдағы саябаққа 300 түп ағаш отырғызған. Сонымен қоса елдегі елең еткізер кез келген мәселені шешуге белсенділік танытатын Бекзат Жармаханов пен Сәулебек Әуелбеков елді мекендегі «Тораңғылды арық» және «Уалихан» каналын тазалауға демеушілік жасаған.&nbsp;<blockquote>– Көктем-жаз мезгілінде елді мекенде аяқ су мәселесіне жіті көңіл бөлеміз. Егін егіп, несібесін жерден терген ауыл халқы бір сәтке қиналмауы тиіс. Көп жылдан бері ауылдағы «Тораңғылды арық» және «Уалихан» каналы тазаланбай тұрған еді. Өз кезегінде жанашыр жандар игі іске мұрындық болды. Ауыл әкімшілігінің мамандары әркез тазалау жұмысының басы-қасынан табылды. Көркейту-көгалдандыруға, қаналды қалыпқа келтіруге атсалысқан бірқатар жерлесімізге ел ағалары атынан алғыс айтамын, – дейді Мұхитбек Тәжекеев.</blockquote>

Игілікті істің жаршысы болған азаматтар

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Кемелұлы халыққа арнаған Жолдауында «Көлік-логистика саласы экономикамызды алға бастайтын басты күштің біріне айналуға тиіс» деген болатын. Бұл тұрғыда автобустармен жолаушы тасымалдау – үлкен сұранысқа ие қызмет.Бұған дейін облыс орталығында ауданаралық, қалааралық жолаушылар көлігіне қатысты шешімін күткен мәселелер аз емес еді. Соның ішінде жолаушыларға сапалы қызмет көрсететін автовокзал жайы көпті толғандыратын. Көп жылдан бері шешімін таппай келген бұл мәселенің түйіні биыл ғана тарқатылды. Жолаушылар мен жүк тасымалын ұлғайту, қызмет сапасын жақсарту үшін &nbsp;шаһардың сол жағалауында жаңа автовокзал бой көтеріп, тағы бір әсем, заманауи нысанмен толықты.Облыстық жолаушылар көлігі және автомобиль жолдары басқармасы басшысының орынбасары Руслан Ибрагимовтің айтуынша, бүгінде 212 елді мекенді аудан және облыс орталығымен байланыстыратын 205 автобус маршруты ұйымдастырылған. Оның 71-і – ауданаралық (қалааралық) маршрут, 101-і – аудандық (кентішілік) маршрут, 33-і қалаішілік және қала маңы маршруты. Сонымен қатар, Ташкент қаласына халықаралық 1 маршрут және Астана, Алматы, Шымкент, Жезқазған, Түркістан, Сарыағаш, Ақтөбе және тағы басқа қалаларға барлығы 13 автобус маршруты бар. Барлық маршруттарда түрлі сыйымдылықтағы 1405 автобус қызмет көрсетуде.Жыл басынан қаңтар-сәуір айларында 11,1 млн жолаушы тасымалданып, өткен жылдың осы кезеңімен салыстырғанда 84,5% жоғарылады.Қызылордадан – АнтальяғаЖуырда «Қорқыт ата» әуежайы жаңа рейстермен толығып, маусым айының 4-нен бастап қызылордалықтар Антальяға тікелей ұша алады. Халықаралық талаптарға сай келетін «Болат Өтемұратов қоры» қолдауымен салынған жаңа терминал ел игілігіне жақын арада пайдалануға берілмек. Қазіргі уақытта терминал маңында абаттандыру жұмыстары жүргізілуде. 1986 жылы салынған әуежайға 2010 жылы қайта жөндеу жұмыстары жасалса, ендігі кезекте заманауи келбетімен жұртшылыққа табысталады.Халықаралық, ішкі рейстер және транзиттік жолаушыларға &nbsp;қызмет көрсетуге арналған залдар, оның ішінде жолаушыларға ыңғайлы болу үшін телескопиялық трап, 2 эскалатор мен 2 лифт, автоматты түрде жүк &nbsp;тапсыру жүйесі, сауда орындары, &nbsp;медициналық көмек көрсету пункті, кафе, намазхана, жүк сақтау және ана мен бала &nbsp;бөлмелері қарастырылған. Жалпы ауданы 7500 шаршы метр &nbsp;құрайтын екі қабатты ғимарат сағатына 250 жолаушыға қызмет көрсетуіне арналған.«Қорқыт Ата» әуежайының басқарма төрағасы Баян Ажмолдаевтың айтуынша, жолаушыларға қызмет көрсету бойынша кейінгі 4 айда жақсы нәтижелерге қол жеткізілген.<blockquote>– Өткен жылдың 4 айында 83 мыңға жуық, биыл осы кезең аралығында 106 779 жолаушыға қызмет көрсетілді. Былтырмен салыстырғанда көрсеткіштердің 30% – ға артқаны байқалады. Сонымен қатар, осы уақыт аралығында рейстер саны 599-ға жетті, өткен жылы 421 рейс болған, яғни 42,3%-ға көбейген немесе 178 рейске артық қызмет көрсетілді. &nbsp;Былтыр «Қызылорда – Астана» және «Қызылорда – Алматы» бағыттарында аптасына 16 рейс болса, казіргі таңда маусым айына «Қызылорда – Астана», «Қызылорда– Алматы» және жаңадан ашылған «Қызылорда – Анталья» халықаралық чартерлік рейстерін есептегенде аптасына 33 рейс орындалатын болады. Одан бөлек, жаңа терминалдың табысталуына байланысты әуежай қызметкерлері оқытылды, штат саны 50 жаңа жұмыс орнымен толығады. Бұл көрсеткіштер «Қорқыт Ата» халықаралық әуежайының тұрақты өсімін және әуе тасымалының жоғары белсенділігін көрсетеді. Жаңа рейстер ашу, қызмет көрсету сапасын арттыру және барлық жолаушыларға оңтайлы маршруттық желіні кеңейту бойынша жұмыстар жалғасуда, – деді басқарма төрағасы.</blockquote>14 жұп жолаушы пойызыҚызылорда теміржол вокзалы – өткен ғасырдың басында ерекше архитектурамен салынған нысан. Тоғыз жолдың торабында орналасқан, әр тараптан келген жолаушыларды тоғыстыратын шаһардың бас қақпасы. Бүгінде сыртқы және ішкі жөндеу жұмыстары жүргізіліп, келбеті ажарланған жаңа ғимарат аумағынан 14 жұп жолаушы пойызы өтеді. Облыс орталығынан Петропавловск, Павлодар, Көкшетау, Семей және Түркістан қалаларына 5 жұп жолаушы пойызы ұйымдастырылған.Қызылорда облысынан өтетін магистральдық теміржол желісінің жалпы ұзындығы 1051,7 шақырымды құрайды. Оның 8-і – теміржол вокзалы және 2 қызмет көрсету пункті бар.Әлеуметтік маңызы бар «Қызылорда-Бесарық-Түркістан» жолаушылар пойызы облысымыздың оңтүстік бағытында 26 елді мекенді қамтиды. &nbsp;Биыл қаңтар-сәуір айларында 5,8 мың жолаушы тасымалданып, қызмет көрсетілді.Айсәуле Қарапбаева &nbsp;

Жолаушыға қызмет – жауапты міндет

Бала тәрбиесі – басты құндылық

<a href="https://kyzylorda-news.kz/">Kyzylorda-news.kz</a> Қазақстан Республикасы Президентінің 2022 жылғы 3 наурыздағы №826 Жарлығына сәйкес, қала әкімі Серік Қожаниязовтың 2024 жылдың І тоқсанындағы халықпен кездесуі Тасбөгет кентінен басталды. Кездесу ашық диалог форматында жүрді.Мемлекет басшысының тапсырмасымен, ел Үкіметінің қолдауы және облыс әкімінің үйлестіруімен өңірдің, оның ішінде қаланың өсіп-өркендеуі жаңа сатыға көтерілді. Оған шаһар басшысы Серік Салауатұлы биылғы атқарылған жұмыстар және алдағы жоспарларын таныстырғанда айрықша тоқталды.Тасбөгетте халық санының артуына байланысты инфрақұрылымды дамыту, әлеуметтік нысандар салу секілді мәселелер өз шешімін тауып келеді. Кенттің қазіргі әлеуметтік-экономикалық даму барысында серпіліс ерекше.Кенттегі ауқымды жұмыстардың бірі – Сабалақ саяжайының тұрғындарын табиғи газбен қамтамасыз ету болса, оған байланысты жобаның жоба-сметалық құжаттары әзірленді. Сонымен қатар, аталған саяжайдың 15 көшесіне жарықшам орнатуға және 2 көшеге жаяу жүргінші жолын салуға қаржы бөлінді.Тұрғындардың көптен бергі ұсынысы – Қызылорда су тоспасының көпірін ашу болса, жақында облыс әкімінің қолдауымен көпір ашылды. Осылай қала мен ауылдар арасындағы көліктік қатынасы кеңейді. Кенттегі 6 көшеге жарықшам орнатылды, 9 дана аялдама қойылды. Оның ішінде кенттің шеткі көшелері Ғани Мұратбаев, Қуаныш Баймағанбетов және Әлия Молдағұлова көшелеріне ЖК «Досанова» мердігер мекемесімен аялдамалар орнатылуда. Жоба құны 5 миллион теңгені құрайды. &nbsp;Сонымен қатар кент әкімі аппаратының өзін-өзі басқару шотынан тағы 3 аялдама істелінбек. Алдағы уақытта тағы 6 көшеге жарықшам, 6 көшеге жаяу жүргіншілер жолын салу жүзеге асады.Бұдан бөлек, әлеуметтік нысандар шоғырланған Ш. Есенов, Ғ. Мұратбаев, З. Шүкіров, Ә. Сапарбаев, О. Сейтпенбетов, Ә. Оразбаев көшелеріне «Алем Транс Жол» ЖШС мердігер мекемесімен келісімшарт аясында&nbsp;124 миллион теңгеге жаяу жүргіншілер жолы салынуда. Кент аумағы &nbsp;көгалдандырылуда. Амангелді көшесінің бойынан арық қазылып, демеуші есебінен 2 аяқсу насосы орнатылды. &nbsp;Ерте көктемнен ағаш отырғызылып, күтімге алынып жатыр.Биыл Тасбөгет кентінде 30 ауызсу құдығы күрделі жөндеуден өтпек. Бұл құдықтардың 2009-жылы салынғанын ескерсек, тозығы жетіп шіріп және ашып-жабу ысырмасы және өрт гидранты толық істен шыққан. Жөндеу жұмысын «Эквотэк» ЖШС мердігер мекемесі атқаруда.Десе де, қала әкімімен ашық диалог барысында кент тұрғындары өздерінің бірқатар мәселесін &nbsp;жеткізді. Тасбөгеттіктер қала әкіміне көпқабатты үйлердің желден ұшқан шатырларын жөндеу мен аяқ су мәселесін көтеріп, оның шешілуіне ықпал жасауды сұрады. Жиын қорытындысында тұрғындар ашық диалог форматындағы кездесуге алғыстарын білдіріп, ақсақалдар батасын берді.

Тасбөгетте ауқымды жобалар жүзеге асуда

<a href="https://kyzylorda-news.kz/">Kyzylorda-news.kz</a> Қала әкімінің халықпен кездесуі Белкөл кентінде жалғасты. Шаһар басшысы Серік Қожаниязов қаланың әлеуметтік-экономикалық дамуы мен бірінші жартыжылдықта атқарылған жұмыстар жайында тұрғындарды толық хабардар етті.Кентте инфрақұрылымды дамыту, халықтың өмір сүру сапасын жақсарту бағытында жүйелі жұмыстар атқарылып келеді. Өткен жылы белкөлдіктер үшін біршама игілікті істер жасалды. Атап айтқанда, 8 көше түнгі жарықпен жарықтандырылып, 11 дана электр трансформаторы орнатылды. Үш көшеге электр желісін тарту үшін құрылыс-монтаж жұмыстары жүргізілуде. Оған республикалық бюджеттен 76,6 миллион теңге бөлінген. Мұнымен қоса, 12 көшенің электр желілерін қайта жаңғырту, жаяу жүргіншілер жолын салу жұмыстары басталды.Кәсіпкерлікті дамыту бағытында мемлекеттік бағдарламалар тиімді жүзеге асырылуда. Мәселен, «Іскер» бағдарламасы аясында жалпы құны 16 миллион теңгені құрайтын 4 жоба қаржыландырылған. Сонымен қатар кенттегі жұмыссыздық деңгейі 1,8 пайызға төмендеген.Бір сөзбен айтқанда жергілікті тұрғындардың өмір сүру сапасы жақсарған. &nbsp;Жолаушылар көлігінің қатынасында да &nbsp;айтарлықтай мәселе жоқ. &nbsp;Белкөлдіктер көтерген мәселенің өзектісі &nbsp;– орталық көшелерге аяқ су жүргізу, мәдениет үйін салу, көпқабатты №1, 11, 12 үйлердің шатырын жөндеу жайы болды. Бірқазан елдімекенінің тұрғындары балалар ойын алаңын салу қолға алынса деген өтінішін жеткізді. Жиын қорытындысында қала әкімі халықтың көтерген мәселесінің тиянақты орындалатынын, кейбірінің қаржы мәселесіне байланысты кезең кезеңімен шешімін табатынын жеткізді.

Белкөлдің әлеуеті артып келеді

<a href="https://kyzylorda-news.kz/">Kyzylorda-news.kz</a>&nbsp; Бүгін Евразия спорт кешенінде қала мәдениетінің өрістеуі жолында өлшеусіз еңбек еткен майталман маман, марқұм Айтжанов Нұркелді Амангелдіұлын еске алуға арналған «Жарқ еткен жас ғұмыр» атты мәдениет қызметкерлері арасында шағын футбол турнирі өтті.Қалалық дене тәрбиесі, спорт және туризм бөлімі мен қалалық мәдениет және тілдерді дамыту бөлімінің бірлесе ұйымдастыруымен өткен доп додасына 8 команда қатысты. Қалалық мәдениет және тілдерді дамыту бөлімінің басшысы Жағыпар Тажмаханов турнирді ашып берсе, Н.Бекежанов атындағы қазақ музыкалық академиялық драма театрының директоры Мұхтар Ниязов қатысушыларға сәттілік тіледі.Тартысты өткен ойын нәтижесінде Қызылорда Облыстық Филармониясы командасы турнир жеңімпазы атанса, жүлделі 2 орынды Н.Бекежанов атындағы қазақ музыкалық академиялық драма театры жеңіп алды. Нұргелді Айтжановтың ағалары мен достарынан құралған «Ағалар» командасы 3 орынды қанағат тұтты.Жеңімпаздар мен жекелеген ойыншыларға шеберліктері бойынша тиісті жүлделер, естелік кубоктар мен медальдар және қаржылай сыйлықтар табысталды.Турнир соңында Нұргелді Айтжановтың анасына ұйымдастырушылар тарапынан құрмет көрсетілді.

Қызылордада шағын футболдан турнир өтті

<a href="https://kyzylorda-news.kz/">Kyzylorda-news.kz</a>&nbsp; Бұрын О.Мәлібаев елді мекені Тереңөзекке жақын орналасқанымен бөлек ауыл еді. Қалжан ахун ауылымен де ауылы аралас, қойы қоралас жатқан елді мекен. Қос ауылдың өсіп-өркендеуі бір-бірімен тығыз байланысты. Осы уақытқа дейінгі қиын кезеңдерде елді мекен тұрғындары бірлік пен ынтымақтың үлгісін көрсетіп келеді. Адал еңбектен, ертеңгі күнге деген сеніммен аумалы-төкпелі кезеңдерді еңсере білді.Өтпелі кезеңде шаруашылықтың жұмысын ширатып, тізгінді қолға алған Алданберген Құлбаев елді мекендерді құрылыс алаңына айналдыра білді. Жетпіс бес жастағы «Қызылдихан» шаруа қожалығының төрағасымен жақын­да кездесудің сәті түсіп, өткен ғасыр еншісіндегі елеулі жұмыстар жайында әңгіме өрбіген болатын.<blockquote>– 1985 жылдың маусым айында «Пар­тия­ның ХХІ съезі» атындағы совхозға директор болып бекітілдім. Бұл қоғамдық құрылыс өзгерер ал­дындағы ауыр кезең еді. Шаруашылық ол кезде әбден тұралаған, орталық 7 шақырым жердегі Қалжан ахун ауылына көшірілген, техника талан-таражға түскен. Кеңсе, клуб үйі жоқ болса, мектеп ғи­мараты апат алдында тұр. Жұрттың көбі жұмыссыз, сәуір айында жайлауға көшуге тиіс малшылар әлі ауыл маңында отыр. Ол кезде Алматыда Ауыл шаруашылығы Министрі­нің бұйрығымен бекисің. Министр Ресейден келген. Министрлікке Қазалыдан бір жігіт және мен бардым. Екеуміз Ауыл шаруашылығы министрінің қабылдауында болып, арнайы бұйрықпен осы қызметімізге тағайындалдық. 1985 жылдың 16 маусым күні «Қызылдихан» совхозына келдім. Ауылдық клубта жиналыс болды. Ауданның барлық директоры жиналғаны есімде. Сонда «Қызылдихан» совхозында 6 жылда 4 директор ауысыпты. Ауыл тозған, совхоз жұмысы тоқтаған. Қалжан ахун совхозы осы Қызылдихан совхозының бір бөлімшесі болған. Гаражға барсам, техника жоқ, малшылар жайлауға көшпеген, жоңышқа ору жұмыстары басталмаған. Жалпы, совхоз жұмысы тұралап қалған. Директор болып бекігеннен кейін 3 күн бойы кеңсеге бармай, гаражда жүріп, бәрін басынан бастадық. Жұртшылық «кеңсеге келмейтін бұл қандай директор» деген көрінеді. Содан гаражда жұмысшыларға тапсырма беріп, екі-үш күннің ішінде малшыларды жайлауға көшіріп, 3-4 жаткалы комбайнды шөпке салып, сов­хоз жұмысы жандана бастады. Сол кезде совхозда 5000 сиыр, 1000 бас жылқы болған. Бірақ жем-шөп мәселесі күрделі еді. Бақташылыққа ешкім бармайды. Бұған дейін 22 адам сотты болған. Барлығы қорқады. Содан біртіндеп бұл мәселені шеше бас­тадым. Ол кезде Қонысбек Қазантаев Жалағашта қызмет істейді. Ол кісі ауылдағы Айман Байетов, Орынтай Махамбетов, Асан қариямен кеңесіп, бірлесе отырып жұмыс жасауды айтқан. Содан осы үш кісімен ақылдаса отырып, шаруашылық жұмысы реттеле бастады, – дейді Алданберген Бодыбайұлы өткен күндердің естелігін айтып.</blockquote>Көзкөргендер, сол кезде қызметте болып, қазір ардагерлік кезеңге жеткен аға буын өкілдері жақсы біледі, А.Құлбаев елді мекендерді құрылыс алаңына айналдырды. Он құрылысшы бригадасын дайындап, онда барлығы 102 адам еңбек етті. Шаруашылықта 3 миллион кірпіш шығарды. Ресейдің Красноярск аймағындағы Иркутск облысынан орман шаруа­шылығы өндірісін ашты. 50 адам Камаз, шынжыр табанды трактор, бульдозер, «ГАЗ-53», «УАЗ» секілді 10 техникамен тай­га ішінен ағаш кесіп, аудан­ға жылына 7,5 мың текшеметр ағаш, тақтай жіберіп отыр­ды. Мұның бәрі үлкен еңбек, ір­­гелі ізденістердің жемісі еді.1986 жылы ХХІ парт­съездіктер облыс шаруашы­лық­тарына үндеу кө­теріп, жылына 35 тұрғын үй салуды мін­детіне алды. Төлеу Сүлейменов құрылыс прорабы болып, күніне бір үйдің іргетасы қаланып, бұл игі іске жұмыстан бос уақытында кеңсе қызметкерлері де атсалысты. Бригадирлер Самұрат Сейсенов, Владимир Кархалев, Кеңескүл Ілиясова, Жақсығали Еспанов, Гүлнар Досжанова, құрылысшылар Амансерік Әлтешов, Бердібек Әшірбеков, Мырқы Мырзабаев, Самұрат Қалиевтер ерекше еңбек етті. Ел үшін еңбек еш кеткен жоқ. Бірліктің, өзара түсіністіктің арқасында 1986 жылы 33 тұрғын үй пайдалануға берілді. Облыстық партия комитетінің бірінші хатшысы Еркін Әуелбеков бұл үйлердің сапалы салынғанын ерекше атап өтіп, ризашылығын білдірген еді. Тұрғын үйден басқа орта мектеп, клуб үйі, балабақша, монша, амбулатория, еңбек тынығу лагері, ал аудан орталығынан мұражай ғимараты салынды. Көшелер де кезең-кезеңімен асфальттанды, тал-терек отырғызылып, ауыл келбеті өзгерді.<blockquote>– Халықтың тұрмыс жағдайының жақсаруымен қатар, мәдениеті де артты. Совхоздың кәсіподақ ұйымына қарасты екі клубтың жұмысы жыл өткен сайын жаңғыра түсті. Орталықта жаңа үйлер, егіс басында дала қостары салынды, жаңа жатақхана, монша пайдалануға берілді. Соғыс ардагерлері мен құрметті еңбек демалысындағылар санаторияға, демалыс үйлеріне, туристік сапарға жолдама алды, – дейді Алданберген Құлбаев.</blockquote>Қазіргі Қалжан ахун ауылында да шаруашылық адамдарының елеулі еңбегінің арқасында халық игілігі үшін нақты жұмыстар жасалды. Атап айтатын болсақ, «Тұрғын үй – 91» бағдарламасы бойынша ауыл тұрғындарының 70 пайызы жаңа үйге көшті. Сандарды сөйлетсек, төрт жылдың ішінде 78 үй бой көтеріпті. Бұрын балшықтан аяқ алып жүре алмайтын ауыл көшелеріне тас төселіп, асфальтталып, адам танымастай өзгерді. Ауыл үстімен автокөлікпен өтіп бара жатқан тұрғындар «Жасыл желекке жамылған ауыл» деп атаған көрінеді. Ауылға ауыз су жеткізіліп, мәдениет үйі, монша, қырман, тағы басқа мекеме ғимараттары шаруашылық есебінен салынып, мектеп үйі шаруа қожалық қызметкерлері мен халықтың асары арқы­лы бой көтерді. Балалар тамақтанатын дәрігерлік амбулатория салынды. Мұндай ме­ди­циналық ғимарат басқа елді мекендерде болған жоқ. Сол кездегі облыстық денсаулық сақ­тау басқармасының бас­шысы Ернияз Омаров арнайы ашылуы­на қа­тысып, алғыс біл­дірген.<blockquote>– Мұндай жұмыс­тарды жүзеге асыру бұрыннан ойымда бола­тын. Қазақ мем­лекеттік ауыл шар­уашылығы инс­ти­ту­тының агрономдық факультетін бітіріп, еңбек жолым Шаған ауылындағы «Тереңөзек күріш» совхозында звено жетекшісі ретінде басталып, егін ектік. Бірыңғай жас­тар еңбекке білек сыбана кірісіп, 1974 жылы жыл қорытындысымен мол өнімге қол жеткізді. Сол жылы еліміздің әр аймағынан бір адамнан, Қызылорда облысынан жастар жетекшісі ретінде мен Ресейдің Ленинград облысындағы Лодейное поле өлкесіне демалысқа жолдамамен бардық. Бұл өлкенің көшелері тап-таза, гүлденген, төрт қабатты әсем үйлер салынған. Жалпы, мәдениет қалыптасқан, үлгілі елді мекен. Сол өлкені көргеннен елге келіп, шаруашылық тізгінін қолға алған соң құрылыс жұмыстарын жүргіздік, көшелерді жөндедік. Ауылдарды үлгілі елді мекен қатарына қосуға бар күш-жігерімізді жұмсадық, – дейді білікті басшы.</blockquote>Жақында А.Құлбаев Қалжан ахун ауылының тұрғын­дарымен кездесу өткізді. Кездесуде ардагерлер мен жастарға елді мекенді үлгілі ету бастамасын қайта қозғап, орнықты ойлар мен пайымды пікірлер ортаға салынды. Байырқалы бастамаға ауылдағы Болат Дүйсенбаев, Сара Тілеуберген секілді аға буын өкілдері, тұрғындар мен жастар қолдау білдірді. Алданберген Бодыбайұлы «Үлгілі елді мекендер қатары артуы тиіс. Олардың қатарында Қалжан ахун ауылы да болуы қажет. Ол үшін жастар еңбекке бейім болып, ауылда тәртіп болуы керек. Көшелер таза болып, ағаштар егілу керек. Мәдениеттілік үлгісін көрсетуіміз керек. Бұл бағытта біз жыл са­йын қаражат бөліп отыратын боламыз» деп өз жос­парымен бөлісті. Осы ретте биыл атқарылатын жоспарлы жұмыстар Қалжан ахун ауылының әкім­дігімен келісілген. Ауыл әкімі Ғ.Акбаровтың айтуын­ша, елді мекендегі Абай көшесінің бойындағы бақтың ішін абаттандыру жұмыстары жүргізілмек. Егін науқаны аяқталған уақытта бақ ішіндегі ойын алаңдары қайта жаңартылып, заманауи талаптарға сай болмақ. Елді мекендер гүлденсе, тұрғындардың да әлеуеті жақсаратыны анық. Сондықтан үлгілі елді мекендер қатары көбейе берсін.Ақтөре ИБРАГИМҰЛЫ

Алданберген Құлбаев: Қалжан ахун – үлгілі елді мекен қатарында болуы қажет

<a href="https://kyzylorda-news.kz/">Kyzylorda-news.kz</a>&nbsp; &nbsp;2021-2025 жылдарға арналған «Білімді ұлт» сапалы білім беру» ұлттық жобасын іске асыру аясында ел президенті Қасым-Жомарт Кемелұлы Тоқаев мүмкіндігі шектеулі және ерекше балаларды психологиялық-педагогикалық қолдауды басты назарға қойғанын жақсы білеміз. Аталған жоба аясында 2022 жылы Сырдария ауданы №36 Ә.Тәжібаев атындағы мектеп-лицейі жанынан ресурстық орталық ашылып, өз жұмысын бастаған болатын. Бұл орталық жайлы аудан тұрғындарының бірі білсе, бірі білмес. Тіпті мұндай орталықтың жұмыс істейтінін ауданда ғана емес, басқа да аймақтарда да біле бермейтін көрінеді. Сондықтан орталық жұмысы туралы жазып, ақпараттандыруды жөн санадық.&nbsp; Соңғы статистикалық нақты деректерге сәйкес елімізде 170 мыңға жуық бала ерекше білімді қажет етеді екен. Бүгінгі қоғамдағы негізгі мәселенің бірі – ерекше білім беруді қажет ететін балаларды жалпы мектепке, жалпы қоғамға біріктіру. Заң тұрғысынан алып қарағанда кез келген мектеп немесе білім беру ұйымдары ерекше білім беру қажеттілігі бар баланы қабылдауы тиіс және басқа балалармен қатар бірдей білім берілуі міндетті. Жалпы ресурстық орталық – мүмкіндігі шектеулі және ерекше қажеттілігі бар балаларға, мектеп оқушыларына базалық және бейіндік оқыту мен тәрбиелеу негізінде олардың қабілетін, жеке бейінділік ерекшелігін ескеріп, оларға сапалы білім беруді қамтамасыз етеді. Ерекше қажеттіліктері бар балалармен жұмыс – балаларды тәрбиелеу мен дамытудағы маңызды және жауапты саланың бірі. Бұл сала білім мен тәрбие алу үшін ерекше жағдайды қажет ететін балалардың дарындылығы мен қабілетін қолдауға және дамытуға бағытталған. Мектеп жанынан құрылған ресурстық орталық ашылғаннан бері жүйелі түрде үздіксіз өз жұмысын жүргізіп келеді. Ресурстық орталық арнайы мамандармен қамтамасыз етіліп, қазіргі уақытта жалпы 8 маман ерекше балалармен жұмыс жасауда. Орталықта 1 арнайы маман, 2 логопед, 4 ассистент және 1 педагог-психолог жұмыс атқаруда. Аталған орталықтың барлық маманы ерекше білім беру қажеттіліктері бар балаларға арналған білім жаңартылатын мазмұнын іске асыру бойынша арнайы білім алып, сертификат алған.&nbsp; Бүгінде мектеп алдында мынадай міндет тұр: оқушылардың, соның ішінде денсаулық мүмкіндігі шектеулі балалардың ойдағыдай әлеуметтенуі үшін бірқатар біліктілік қабілетін қалыптастыру. Ерекше білімді қажет ететін балаларды қатарға қосу, әлеуметтендіру үрдісін дұрыс ұйымдастырып, түрлі әлеуметтік кедергіге қарсы тұра алатын тұлғаны қалыптастыруда заманауи технологияның барлық мүмкіндігін пайдалану.&nbsp;Ерекше білім алуды қажет ететін мектеп-лицейдің оқушылары арнайы мамандардың түзету-дамыту сабағына аптасына 3 рет қатысады. Ресурстық орталық қазіргі уақытта 33 балаға түзету-дамыту, психологиялық-педагогикалық қолдау көрсетуде. Балаларды дамыту мақсатында ресурстық орталық мамандары 2023-2024 оқу жылына бекітілген жылдық жоспарына сәйкес мамандар апталығы, ата-анаға кеңес беру дөңгелек үстелі, облыстық семинар, ата-анаға қолдау ретінде психологиялық тренингтер ұйымдастырып, өткізіп отырады. Орталық мамандары ұйымдастырылған әр іс-шараға жас ерекшелігіне қарай барлық баланы қатыстырып, олардың белсенді болуын басты назарда ұстайды. Ресурстық орталықтағы ерекше білім алуды қажет ететін балалардың жас ерекшеліктері әртүрлі. Бастауыш сыныптан бастап 11 сынып аралығындағы оқушылар білім алады.<blockquote>&nbsp; – Бүгінде мектеп жанынан ашылған ресурстық орталықта арнайы мамандармен жүйелі жұмыстар атқарып келеміз. Орталыққа балаларды қабылдау үшін алдымен арнайы мамандардың психологиялық, медициналық, педагогикалық кеңесінен өткізіп, соның қорытынды нәтижесі бойынша ғана қабылдай аламыз. Біздің орталықта көбінесе қарым-қатынас және әлеуметтік өзара әрекеттесудің бұзылысы, сөйлеу тілінің ерекше дамуы, СТЖД – І, ІІ, ІІІ деңгейі сияқты ауру белгісі бар балалармен жұмыс істейміз. Баланың анықтамада көрсетілген диагнозына байланысты оқу бағдарламалары беріледі. Әр баламен жеке-жеке сөйлесіп, олардың ішкі жан-дүниесінде не болып жатқанын, не ойлайтынын, арман-мақсатын, қандайда бір отбасылық немесе басқа да мәселелері жөнінде ашық сөйлесеміз. Ерекше балалардың бойында өзіне тән таланты, өзгелерден өзгеше дарыны болады. Біреуі суретті жақсы салса, біреуі математикалық есептерді өте жақсы шығарады, ал біреуі ән айтып, би билеп шығармашылықты жаны сүйеді. Менің осы саладағы тәжірибемде түрлі бала кездесті. Мәселен, бір балаға қанша айтып түсіндірсең де түсінбейді, ал кейбірі айтқаныңды тез қағып алады бірақ жалқау, ештеңеге зауқы болмайды. Дегенмен арнайы маман ретінде әр баламен жеке жұмыс істеп, дамыту-түзету ойындарын ойнату арқылы бір жүйеге келтіреміз. Ресурстық орталық оқушылары басқа балалар сияқты өздерінің сыныптастарымен бірге бір сыныпта оқиды, себебі даму мүмкіндігі шектеулі балаларды қалыпты балалармен бірге оқытылуы міндетті. Біздің орталыққа тек арнайы кестедегі белгіленген мерзім бойынша сабақтан тыс уақытта келіп отырады. Бірақ, сабақ барысында ерекше балалармен жұмыс істеу қиындап кеткен жағдайда пән мұғалімі немесе сынып жетекшісі бізге әкеліп тапсырады және біз баланың ерекшелігіне қарай ары қарай жұмыс істейміз. Ерекше білімді қажет ететін балалармен жұмыс істейтін мамандарға қойылатын талап жоғары. Балаларға сабақ барысында берілген тапсырманың шектен тыс ауыр болмауы, олардың деңгейі мен мүмкіндігін ескеру, жасаған әр іс-әрекетін назардан тыс қалдырмау, ата-анамен әрдайым тығыз байланыста болу сынды өзіндік бірқатар талаптары бар. Ата-ана мен арнайы маманның тарапынан ұстамдылық, шыдамдылық, төзімділік қасиеті болуы тиіс. Сабырлық, мейірімділік сынды қасиеттер ерекше білімді қажет ететін &nbsp;балаларды оқыту және тәрбиелеу кезінде жаттығу түзетудің арнайы әдістерінің бірі. Жаттығуларды орындай отырып бала өзін ортада дұрыс ұстауға, мейірімділікке, төзімділікке үйренеді. Бірақ, жаттығуға толығымен жүгінуде балаларды агрессияға, мінезіндегі қиқарлықты тудыруы мүмкін.</blockquote>&nbsp; Соңғы кезде ерекше балалардың саны көбейіп келеді. Оған себеп өте көп. Бірінде тұқымқуалаушылық болса, бірінде ата-ана тарапынан бала дамуының тежеуін дұрыс қадағаламауы. Одан бөлек жас аналар жүкті кезінде денсаулықтарына салғырт қарауы және денсаулығына зиянды заттарға әуес болуы сияқты себебі де бар. Арнайы тәжірибелі маман ретінде ата-аналарға кеңесім – балаға телефон бермесеңіздер екен. 2 жасқа дейін мүлдем телефон қарауға тыйым салынады. Осының салдарынан қанша бала сөйлемейді, тіпті жанындағыларды елемейді де. Бұл – цифрлық аутизм және оның болашағына тікелей кері әсерін тигізіп отыр. Қазір қай жерге барсақ та телефон гаджетіне жіпсіз байланып отырған жастарды, оқушыларды, тіпті сәбилерді көреміз. Дер кезінде дабыл қағып айтылмаса бұның салдары жақсы болмайтыны анық. Сол себепті ата-аналарға балаларыңызды үнемі бақылауда ұстап, қандай да бір ем керек болса міндетті түрде уақытында емдеу жұмыстарын жүргізіп, арнайы мамандарға жүгінуге кеңес беремін. Балаңыздың болашағы жарқын болсын десеңіз осы мәселеге үлкен жауапкершілікпен қарап, уақытты бос өткізіп алмауыңыз тиіс, – дейді арнайы педагог-психолог маманы Нұргүл Қожарипова.&nbsp; Тоқсан ауыз сөздің тобықтай түйіні, бүгінгі жаңа заман талабы арнайы педагог-психолог маманға әртүрлі ерекше білімді қажет ететін балалардың жүрегінен жол таба білуі, білім-біліктілігі жоғары, жаңашыл, ізденімпаз ерекше қасиет иесі болуды міндеттейді. Дарынды ерекше балалармен жұмыс – қоғамның болашағына салынған инвестиция және тәуелсіз жеке тұлғаны дамытуға көмектесетін игі іс.

Қазақстан және Қызылорда облысының жаңалықтары

Серік Жақсығұлов: Сыр өңірі қашаннан да өнерге оң көзқараста