<a href="https://kyzylorda-news.kz/">Kyzylorda-news.kz</a>&nbsp; Сырдария ауданына қарасты Нағи Ілиясов ауылында «Жүректен шыққан сырлы сөз» тақырыбымен поэзия кеші өтті.&nbsp;Аудандық басылымның 85 жылдығына орай қоғамдық даму бөлімінің қолдауымен&nbsp;ашық аспан астында ақынға да, тыңдарманға да шабыт сыйлаған кешті жастар ресурстық орталығы ұйымдастырды.Жасыл желекке бөле­ніп тұрған ауыл көркі ерекше көз тартады. Әсем табиғат пен таза ауа үйлесімі жас ақындар жырымен тіпті айшықтала түскендей болды. Ауылдағы «Еңбек аллеясында» республикалық деңгейдегі жыр мүшәйраларының жеңімпазы атанған, өзіндік оқыр­маны қалыптасқан сырбойылық жас ақындар бас қосып, ауыл кешін көріктендіре түсті.Ерекше, еркін форматтағы поэзия кешін аудандық мәдениет және тілдерді дамыту бөлімі басшысының міндетін атқарушы Жеңісбек Үсенұлы мен ауылдық ардагерлер кеңесінің төрағасы, Сырдария ауданының Құрметті азаматы Төребек Жұмабекұлы ашып берді.<blockquote>– Облыс әкімі биылғы жылды «Руханият жылы» деп жариялағанын білесіздер. Атаулы жыл аясында көптеген іс-шара өтіп, мәдениет пен руханият саласында іргелі мекемелер бой көтеріп жатқаны да сіздерге аян. Салада атқарылып жатқан жұмыстардың барлығы халықтың рухани қазынасын байытары сөзсіз. Облыс қана емес, республикалық деңгейдегі жас ақындар ауданға ат басын бұрып, іргелі ауылда бас қосып отырмыз. Талаптарыңызға нұр жаусын, қаламдарыңыз мұқалмасын, – деді Ж.Төрәлиев. Ал батагөй ақсақал Төребек ата ақындарға шалқар шабыт тілеп, тілеулес­тігін білдірді.</blockquote>Жас ақындар Ұлықбек Тәңірбергенов, Ақжол Түменбай, Айдар Сайлауов, Дина Бөкебай және Ақтөре Ибрагимұлы поэзия кешінің құрметті қонақ­тары ретінде төрден орын алды. Содан кейін ақындар кезек­пен өлең оқып, өлең-жырға, поэзияға шөліркеген халық­тың шөлін қандырды. Алдымен туған жер, Отан, отбасы туралы өлеңдерін ортаға салған ақындар махаббат поэзиясына да кезек берді. Одан кейін белгілі өлеңдердің авторы Ақжол Түменбай мен ақын Дина Бөкебай поэти­калық дуэльге шығып, тартысты дуэль көрсетті.Кеш соңына таяу ақын аға-апаларының ізін басып келе жат­қан мектеп оқушылары Айшат Ешмұратова, Нұрахмет Мансұров, Назым Кенжебекқызы, Жансая Әбибуллақызы ақындардың өлеңін оқып, көрерменнің ыстық ықыласы­на бөленді. Жас ақын­дарға аудан әкімінің орынбасары Димаш Байдушевтің алғыс хаты мен естелік сыйлық табыс­талды. Аудандық мәдениет үйінің өнерпаздары поэзия кешін­де қонақ болған ақындардың сөзіне жазылған бірнеше өлеңді орындап, ауыл кешінің сәні мен мәнін үстеді. Ең қызығы, аудандық газеттен поэ­зия кеші өтетіні туралы ақпараттанған жас ақындар аллеяға көптеп жиналып, өз кезегінде жырдан шашу шашты. Жас ақындар аудандық газеттің 85 жылдығына арнаған арнауымен кешті қорытындылады.Ашық аспан астында, әуелеген әсем ән мен сырлы поэзияға қаныққан жұртшылық ризашылығын білдіріп жатты. Республикадағы «Үлгілі ауыл» атанған батыр атындағы ауылдың әдемі табиғаты ақындарға шабыт сыйлап, көрерменнің көңіліне қуат сыйлады.Көтеріңкі көңіл-күйде тәмамдалған кеш­ті ауыл әкімі Сағдат Нұрмағамбетов, аудандық жастар ресурс­­тық орталығының директоры Айгүл Ахметова, мәдениет сала­сының ардагері Күләш Құдабаева қорытындылап, жылы лебіздерін білдіріп, аудандық газеттің мерейтойымен құттықтады. Бірнеше сағат бойына сыршыл поэзиямен жан сарайын толтырған тыңдарман әдебиет әлемінде өзіндік өрнегін сызып келе жатқан жас ақындармен естелік суретке түсті.

«Жүректен шыққан сырлы сөз» тақырыбымен поэзия кеші өтті 

«Ұлы дала жорығы» марафон-бәйгесінің үшінші маусымы өз мәресіне жетті

<a href="https://kyzylorda-news.kz/">Kyzylorda-news.kz</a>&nbsp; Сырдария ауданының әкімі Берік Сәрменбаев Н.Ілиясов және Шаған ауылында көшпелі кездесулер өткізіп, тұрғындардың ұсыныс-пікірлерін тыңдады.Аудан басшысы Мемлекет басшысының және Үкіметтің қолдауымен, облыс әкімі Нұрлыбек Машбекұлы Нәлібаевтың тапсырмасымен аймағымызда атқарылып жатқан ауқымды жұмыстарға тоқталды.<blockquote>– Мемлекет басшысы Қасым-Жомарт Кемелұлы Тоқаев «Батыс Еуропа-Батыс Қытай» халықаралық дәлізінің Қызылорда қаласынан Ақтөбе қаласына дейінгі аумағын І санатты жолға айналдыру және облыс орталығын ыстық сумен қамтамасыз ету жөніндегі облыс әкімінің ұсынысын қолдады. Мемлекет басшысының бастамасымен қолға алынған «Жайлы мектеп» ұлттық жобасы аясында облыста 12 300 орындық 21 мектеп салынуда. Өткен жылы 10 мектептің құрылысы басталса, биыл 11-нің құрылысы жүргізіледі. Бүгінде «Білімді қолдау қоры» есебінен 7 млрд. 900 млн теңгеге 300 орындық жатақханасы бар 400 орындық физика-математика мектеп-интернатының құрылысы қарқынды жүргізілуде. Облыс орталығында осы кезге дейін бір ғана Оқушылар үйі болса, «ҚазГерМұнай» компаниясының демеушілігімен 350 орындық заманауи үлгідегі Оқушылар сарайы бой көтеруде. «Саутс Ойл» компаниясының демеушілігімен Сырдария өзенінің сол жағалауынан музыкалық колледждің жаңа ғимаратының құрылысы басталды. Міне, осындай қолдаулар ауданда да атқарылып жатыр, – деді Берік Әбдіғаппарұлы.</blockquote>Аудан басшысы тұрғындарға жақында аймақ басшысының төрағалығымен жасөспірімдер арасындағы құқық бұзушылықты болдырмауға қатысты кеңейтілген мәжіліс өткенін айтып, бүгінгі таңда жастарға саналы тәрбие беруде, олардың жаман әдеттерден аулақ болып, әлімжеттік жағдайларға жол бермеуіне қоғам болып атсалысу қажеттігін жеткізді.Бұл ретте, елді мекендердегі «Адал адам» орталықтарын ұтымды пайдаланып, жазғы уақытта балалардың бос уақыттарын тиімді өткізуге, оларды өнерге баулуға, шығармашылықпен айналысуға тарту керектігін атап өтті.Айта кетейік, ауданға қарасты Н.Ілиясов ауылын газдандыруға демеушілік есебінен жоба жасалып, бюджеттік өтінім ұсынылған. №132 Т.Айтбаев атындағы орта мектеп биыл күрделі жөндеуден өтетін болады. Демеушілік есебінен ауылға кіреберіс 2 шақырым көше бойына жарықтандыру жұмыстары жүргізілуде.Ал аудандағы үлкен ауыл – Шағанда биыл жобалық құны 2,6 млрд. теңге болатын газдандыру жұмыстары басталады. Сонымен қатар, 1,1 млрд. теңгеге елді мекендегі электр желілері мен бағаналары, трансформаторлар қайта жаңартылуда.Кездесулерде тұрғындар ұсыныс-пікірлерін жеткізді. Атап айтқанда, елді мекендер халқы инфрақұрылымдық жұмыстар, қоғамдық тәртіп, денсаулық сақтау, әлеуметтік салаға қатысты өздерінің мәселелерін айтты. Аудан басшысы ұсыныс-пікірлер негізінде жұмыс жүргізілетінін, мәселелер тұрақты бақылауда болатынын атап өтті.Кездесу соңында аудан әкімі құқық қорғау қызметкерлерімен, мәслихат депутаттарымен, қоғамдық кеңестер мүшелерімен, жергілікті зиялылармен бірлесіп, азаматтарды жеке мәселелері бойынша қабылдады.

Аудан әкімі Н.Ілиясов пен Шаған ауылында көшпелі кездесулер өткізді

<a href="https://kyzylorda-news.kz/">Kyzylorda-news.kz</a> Өнер жас талғамайды. Біз талай рет осының куәсі болғанбыз. Қай уақытта болса да елдің алдына шыға қалса, сахнаға сән беріп, өнерімен талайды сүйсіндіріп жүрген ардагерлердің ауқымды жұмысы жұртшылықты аңсатып отырады.Иә, талай жылдар бойы өнерден алыстамай өздерін әркез бабында көрсететін ұлағаттықтар өткен аптада тағы да сахна төріне көтерілді. 21 мамыр мәдениет және өнер қызметкерлері күні мерекесі қарсаңында З.Шүкіров атындағы қалалық мәдениет үйі жанындағы «Ұлағат» ардагерлер аспапты ансамблінің ұжымы «Ұлағатым-ұрпаққа» атты концерттік бағдарламасымен Райым және Қосжар ауылдарында болып, ауыл халқына өз өнерлерін көрсетіп,халықтың құрметіне бөленіп қайтты.Иә, расында солай. Асқақ өнер иелері қос ауылдың халқын өздерінің әсем саздарымен қуантып, ерекше көңіл күй сыйлады. Ансамбль мүшелерінің шебер орындауына тәнті болған ауыл тұрғындары тікесінен тік тұрып, қос қолдап қошемет жасады.&nbsp;З.Шүкіров атындағы қалалық мәдениет үйінің директоры Маруся Нұрмағанбетова:– Өнер қай халықтың болса да өткенінен хабар беріп, бүгінін ертеңге күнмен байланыстырып отыратын теңдессіз дүние. Әрбір өнер иесінің сыйлы болу да соған байланысты. Ал сол жолдағы сапарын тоқтатпай, қаншама жыл өтсе де халықтың ыстық ықыласына, қошеметіне бөленіп жүрген «Ұлағат» ансамблінің орны тіпті ерекше. Оларға деген халықтың құрметін біз тағы бір мәрте байқадық. Одан дәлел осындау үлкен шараның өтуіне қолдаушы болған Жетес би мен Қосжар ауылдық округтерінің әкімдері, клуб меңгерушілері мен сүйемелдеушілерінің қолдауы. Сондай-ақ ардагерлердің концерттік іссапармен шығуына қолдау білдіріп, автокөлікпен қамтамасыз еткен Арал қаласының әкімі БатыржанҰзақов пен қалалық ардагерлер кеңесінің төрағасы Әділхан Танымбетовке де «Ұлағат»мүшелерінің алғысы шексіз, – дейді.Міне, өшпейтін өнер иелері алда өзге де ауылдарды аралап, сахнаны сәндендіруді мақсат тұтып отыр. Мұнан бөлек те көптеген бастамалар мен үлкен мақсаттарды көздеп отыр. Десе де барлығын уақыт көрсетеді. Біз ардагерлердің жақсы жаңалығына ғана тілекшіміз.

«Ұлағат» ардагерлер  аспапты ансамблі Арал ауданындағы ауылдарда болды

<a href="https://kyzylorda-news.kz/">Kyzylorda-news.kz</a> 31 мамыр – саяси қуғын-сүргінге ұшыраған және ашаршылық азабын тартқан &nbsp;жандарды аза тұту күніне орай біз Қорқыт ата атындағы Қызылорда мемлекеттік университетінің профессоры, тарих ғылымының кандидаты Айтжан Оразбақовпен сұхбаттасқан болатынбыз.– Тарихқа зер салсақ, қазақ халқының тарихында ең қаралы кезеңі &nbsp;1917-1991 жылдар аралығындағы кенестік тоталитарлық режимнің билігінің тұсына дөп келеді екен. Осы бағытта сіздің пікіріңіз қандай?– Қазақтың &nbsp;тарихына көз салсаңыз, қай кезде де басынан қиындықтар өткені айна қатесіз. Ал шындығында да кеңестік билік орнағаннан кейін қазақ даласында жағдай қиындады деп айтуға болады. Оның бәрі 1917 жылғы репрессияның ықпалынан. Азамат соғысы жылдарында бір жағынан қазақ ауылдарын ақтар келіп тонап жатса, екінші жағынан қызылдар келіп тонап жатты. Ал совет үкіметі орныққаннан кейін репрессия жаңа екпін алды деуге болады. Репрессия құрбандарын ақтау комиссиясының жұмысына қатысып, &nbsp;біраз құжатпен таныстық. 1920 жылдары совет үкіметі толық күшіне еніп, өзінің репрессиялық қимылын бастаған екен. XІХ ғасырдың 20-50 жылдары Қазақстанда репрессиялық аппарат жұмыс істепті.– Нағыз аштық қай кезеңнен басталды?– Қазақстандағы аштық Голощекин билікке келген кезден басталды деп айтуға болады. Өйткені ол кіші қазан революциясын орнатам деп көп асыра сілтеушілікке барды. Соның нәтижесінде қазақтар жоғарылатылған жоспарды орындаймыз деп малынан, егіннен, жейтін тамағынан айырылып, бәрі орталыққа кетті. Соңғы кезде «Қазақстандағы ашаршылық әдейі ұйымдастырылған емес пе?» &nbsp;деген ой келеді. Бірақ Совет үкіметіне әдейі аштық жасауға қолайсыз жағдай болды. &nbsp;Азаматтық соғыс кезінде 1920 жылдардағы совет үкіметі қызметкерлерінің ішінде қазақстандықтармен бірге украйндықтар бой көрсетті. Бір ғана мысал, азамат соғысы жүріп жатқан кезде өздерінің ұлттық үкіметін құруға украйндықтар, қазақтар, Закавказия респуликалары талаптанып жатты.– Билік тарапынан әдейі жасалған ашаршылық науқаны, қазақ халқының санын &nbsp;2,2 милионға кемітіп, рухани дағдарысқа әкеліп, ұлттық сананы сансыратып, елдің сағын сындырды деген дерек бар. Сіз не дейсіз?– Өте орынды айтылған. Өйткені ашаршылықтан кейін, ашаршылық кезінде, аштықтан қашқан қазақтар көршілес Өзбекстан, Ресей, Қытай территориясына кетіп қалды. Сол кездерде қазақтың рухы бәсеңсіп қалды ма деген ой келіп отыр. Ал &nbsp;санына қарай қазақтың кемуін &nbsp;ғалым Талас Омарбековтің зерттеу еңбектерінен көруге болады.– Ұлтымыздың зиялы қауым өкілдері, ақын-жазушылар, елдің бетке ұстар тұлғалары &nbsp;саяси қуғын-сүргіннің құрбаны болғанын тарих баяндап тұр. &nbsp;Десе де, сіздің тарихшы ретінде пікіріңізді білсек...– Революцияға дейін қазақтың интелегенциясы Ресейде қызмет істесе, кейбірі Ресейден оқу орнын бітірген, көзі ашық, көкірегі ояу жандар болды. Тіпті олардың ішінде &nbsp;Думада, Алаш партиясында қызмет істегендері де бар. Ал совет үкіметі орнағаннан кейін қазақ интелегенциясының жаңа буыны көтеріліп келе жатты. Егін қалай көтеріліп, өркен жаяды. Сол секілді қазақ интелегенциясы да&nbsp;сапа жағынан нығайған кезі болатын. 1930 жылдан бастап қазақтың бетке ұстар азаматтарын бел орақпен қырып салғандай жағдай болды. Тіпті олардың 90 пайызын құртты деп айтуға негіз бар.– Біздің аймақтан&nbsp;репрессия құрбаны болып жапа шеккендер жайлы айта кетсеңіз?Репрессия құрбандарының саны жайлы толық айту мүмкін емес. Өйткені бұл жұмыстар әлі де жүргізіліп жатыр. Бұл туралы зерттеу жұмыстарын дайындап жатырмыз. &nbsp;XX ғасырдың 1920-1950 &nbsp;жылдарына дейін &nbsp;Сыр өңірінде репрессия &nbsp;болған азаматтардың сандық мәліметі туралы жұмыстарын дайындап жатырмыз. Бұл жерде біздің көрсеткіміз келіп отырғаны – әр жылы қаза болғандар туралы, олардың ұлтына, қызметіне, жынысына қарай бөлінісін бергіміз келеді. Репрессияға ұшырағандардың барлығы интелегенция өкілдері деп айтуға болмайды. Көпшілігін жұмысшылар мен шаруалар құрайды. Біз бұл сұрағыңызға нақтырақ жауапты ғылыми жұмыс дайын болған кезде айтатын боламыз.– Әлі ашылмаған ақиқаттар бар ма?Әлі ашылмаған ақиқаттар көп. Бір материалды дайындап бітірдім- ау деген кезде тағы бір деректің шеті шыға келеді. Оны суыртпақтасаң, әрі қарай жалғаса береді. Бір ғана мысал жақында архивтен материал таптық. 1930 жылдардың басында Арал станциясында концлагерь болған екен. Лагерьде 6 мыңнан астам адам азап шеккен. Бұл – зерттелмеген тың тақырып. Әлі зерттеуді қажет етеді. Сәті келген күні бұл тақырып та қозғалады деп ойлаймын.Әңгімеңізге рақмет!Сұхбаттасқан: Гауһар ҚОЖАХМЕТОВА

Айтжан Оразбақов:  Арал лагерінде 6 мыңнан астам адам зардап шеккен

<a href="https://kyzylorda-news.kz/">Kyzylorda-news.kz</a> Театр – тәрбие бесігі. Көрнекті жазушы Ғабит Мүсіреповтің «Театр – хас сұлудың көз жасындай мөлдір өнер» деп баға беруі де тегін болмаса керек. Мәдениет пен руханият әлемін театрсыз елестету әсте мүмкін емес.&nbsp;Бұл өнер туралы сөз қозғалса, Қызылорда өңірінің аса мақтанышпен айтатын&nbsp; жайты да бар. Ол – алғаш театр шымылдығының біздің облыста ашылуы. Содан бері ғасырға жуық уақыт өтсе де өз жалғасын тауып, әлі де көрермен көзайымына айналып жүрген театрлар қаншама. Арал ауданының халық театры 1972 жылы негізі қаланған сәттен бастап түрлі қойылымдарымен көрерменін қуантудан әсте жалыққан емес. Сол жұмыстың жалғасы – кешегі болған Төлен Әбдіктің шығармасы негізінде жазылған, драматург Нұрдәулет Баймаханның «Оң қол» мистикалық драмасының қойылымы.Иә, Төлен Әбдікті танымайтын, оның ішінде «Оң қол» әңгімесін оқымаған қазақ кемде-кем шығар. Кітапты оқып отырып-ақ басқа әлемге жетелеп, Алманың хикаясын басыңнан кешкендей әсер қалдыратын шығарманың қойылымы қала жұртшылығының көңілінен шықты десек өтірік емес.<ul><li style="text-align:justify;">Көптен бері театр өнерін тамашалауға келгенім екен. Қазіргі таңда көп уақытымызды жұмыс, үйдің тіршілігі деп қалай өткізіп алғанымызды аңдамай қаламыз. Осындайда ой сергітіп, көңіліңді бөлуге таптырмас мүмкіндік – театр. «Оң қол» спектаклі өте қатты ұнады. Актерлер шеберлігі, қойылымның музыкамен әрленуі, жарықтың сахнаға берілуі бәрі-бәрі үйлесімді болды. Алманың, Айшаның, Мақсат дәрігердің де бастан кешкен оқиғасын сезініп отырдым. Алдағы уақытта да осындай сахналық қойылымдардың көп болғанын қалаймын, – деп көрермен Әсемгүл Әзілханова өз пікірін білдірді.</li></ul>Арал аудандық «Халық» театрының режиссері Диана Кеңес инсценировкалаған қойылымда аудандық Мәдениет үйінің қызметкерлері – Дәулеткерей Қуантқанов, Нұртаза Ордағұлов, Ақнұр Төлегенова,&nbsp; Айгерім Серікова, Есбол Қадірғұлов, Ерімбет Орынбасаров, Ғабит Базанов және Диана Кеңес басты рөлдерде ойнады.&nbsp;<ul><li style="text-align:justify;">Бұл спектаклге дайындық 2 апта көлемінде болды. Алғашқыда Қазалы ауданындағы аймақтық байқауға арнайы жоспарланып, дайындық жүргіздік. Ол сайыстан жүлделі І орын алдық. Аралға келген соң халық сұранысына байланысты қойылым көрсету туралы ой туды. Осылайша бүгін Арал қаласына қойсақ, алдағы уақытта ауылдық елдімекендерді аралау ойымызда бар, – дейді аудандық халық театрының режиссері Диана Кеңес.</li></ul>Ал басты рөлді сомдаған Айгерім Серікова Алманың рөліне кіру оңайға соқпағанын айтады:<ul><li style="text-align:justify;">Алманың образы – өте ауыр образ. Өз қолының өзіне бағынбауы әрбір адам үшін үлкен қиындық дер едім. Қойылымда өз рөлімді жақсы алып шығуға тырысқаным сонша, кей уақытта түнгі ұйқымнан шошынып оянатын кезім болды. Алғашқы аптадан кейін барып үйренісе бастадым. Қойылымның халық көңілінен шығып, оң бағасын алғанына өте қуаныштымын. Бұл біздің еңбегіміздің ақталғаны, – дейді.</li></ul>Арал ауданының атын шығарып, жүлделі марапатпен оралған халық театрын қойылым соңында Мәдениет және Тілдерді дамыту бөлімінің басшысы Бауыржан Махатов және арнайы қонақтар, Арал ауданының құрметті азаматы Толыбай Абылаев, белгілі журналист, «Арал әлемі» газетінің бас редакторы Ерғали Абдулла, дәстүрлі өнер дәріптеушісі Базар Қостаевалар құттықтап, игі тілектерін білдірді.&nbsp;Біз де болашаққа жоспары мен мақсаттары айқын, мәдениет пен өнерді, әдебиет пен руханиятты ұштастырып жүрген театр ұжымына сәттілік серік болғай деп тілек білдіреміз.

Аралда «Оң қол» атты мистикалық драма қойылымы өтті

<a href="https://kyzylorda-news.kz/">Kyzylorda-news.kz</a> Қызылорда облысының Полиция департаменті Есірткі қылмысына қарсы іс-қимыл басқармасымен облыс көлемінде оқушы, студенттер арасында «РЭП – есірткіге қарсы!» ұранымен байқау ұйымдастырылды. Сайыстың негізгі мақсаты – жастар мен жасөспірімдердің бойында есірткі тарату мен тұтынуға қарсы тұруын дамыту, салауатты және қауіпсіз өмір салтын қалыптастыру, денсаулықты бағалау болып табылады. Байқау екі кезеңде өткізілді. Бірінші кезеңі Қызылорда қаласы, аудандар көлемінде өткізілсе, екінші кезеңге ең үздік болып танылған 18 үміткер қатысып, тақырыпқа байланысты ізденіп, нашақорлыққа қарсы рэп орындап, есірткі мәселесін кеңінен ашатың өздерінің шығарған композицияларын ұсынды. Құрылған сайыстық комиссия шешіміне байланысты, екінші кезеңге қатысқан барлық сайыскерлер жеңімпаз атанып, 1,2,3 орындар иеленді. Облыс жеңімпазы болып: Қармақшы ауданы №№274, 113 орта мектеп оқушылары – Мамбетов Сұлтан, Қанибек Ернар, Тұрақов Ерсұлтан; Қызылорда қаласы «Қазанғап» атындағы музыкалық жоғары колледжінің студенттері – Әбілқасым Қуаныш пен Әбдірайым Қабілет танылды.

«РЭП – есірткіге қарсы!» ұранымен байқау өтті

<a href="https://kyzylorda-news.kz/">Kyzylorda-news.kz</a>&nbsp; &nbsp;«Қызылорда облысының әйелдер күштерінің Альянсы» қоғамдық бірлестігі және облыстық Қазақстан халқы ассамблеясы арасында жасалған өзара &nbsp;әріптестік меморандумның аясында "ТЕК ҚЫЗДАР!" атты жобасы қолға алынды.Жоба аясында Достық үйінде алғашқы рет «Қыздардың репродуктивті денсаулығын сақтау мәселелері» тақырыбында пікір алмасу алаңы өтті.Іс-шараға жоғары және орта арнаулы оқу орындарының 70-тен аса студент қыздары қатысты.«Қызылорда облысының әйелдер күштерінің Альянсы» қоғамдық бірлестігінің төрағасы Рахима Ахметова жобаның мақсатына тоқталды. Аналар кеңесінің төрағасы Айгүл Мұсабаева «Мәдениетті ана - мәдениетті ұлт» жобасы аясында бірлескен іс-шараларды, әсіресе болашақ ана атанатын қыз балаларға арналған тиімді жобалар туралы сөз қозғады.Іс-шарада репродуктивтік денсаулықты сақтау, жеке бас тазалығы, жыныстық даму мәселелері жөнінде мамандардың &nbsp;жас қыз балаларға кеңестері берілді. Қатысушылар эндокринолог, маммолог, психолог, гинеколог, жастар денсаулығы орталығының мамандарынан кеңес алды. Сондай-ақ, өмірге, өздеріне деген оң көзқарастарын қалыптастыру, олардың ортамен жайлы қарым-қатынастар орнату, сондай-ақ, психологиялық, физиологиялық денсаулықтарына байланысты мәліметтер айтылды.<blockquote>– Біздің орталықта 10-29 жасқа дейінгілер әрдайым хабарласып, жедел көмек ала алады. Қыздарға психологиялық, медициналық ақпарат беріп келеміз. Вейп, нашақорлық, ерте жүктілік, құмар ойын секілді мәселелердің алдын алу мақсатында жұмыс жасаймыз, – деді Жастар денсаулығы орталығының дәрігері Сәуле Каусова.</blockquote>Сондай-ақ №3 қалалық емхананың эндокринологы Шолпан Ермағамбетова қыз баланың екінші жыныстық даму кезеңі 8-16 жас аралығында эмоциялық мобильділік, қоршаған ортаға ашушаңдық, күйзелісті іште сақтау мәселелеріне көп тап болады. &nbsp;Егер осындай белгілер болған жағдайда, міндетті түрде эндокринолог мамандарына келуге кеңес беремін деді.Ал &nbsp;№3 қалалық емхананың мамологы Бақыт Ысқақов жастардың тамақтану мәселесіне аса мән беруге шақырды. Әлеуметтік желідегі кейбір кеңестерге еріп, тамақты шектеу дұрыс емес. Ол дамып, жетіліп келе жатқан ағзаға кері әсер етуі мүмкін. Адам деген тұнып тұрған биохимия. Енді өсіп келе жатқан ағзаға жақсы тамақтану қажет. Сүт безінің даму жолы осы мәселелерге қатты байланысты. Сондықтан нақты дәрігерлердің кеңесін алып барып, дұрыс тамақтану режимін қалыптастыру қажет. Жас қыз балалардың қазіргі кезде сүт бездерінде ісіктің пайда болуы эстрогеннің жетіспеушілігінен болады. &nbsp;Бүгінгі күні мамографиялық скрининг әдісі 50 пайыз ғана нәтиже береді. Сондықтан міндетті түрде мамолог дәрігерге көрініп, узиге түсіп, нақты диагнозды білу аса маңызды деді.Сонымен қатар онколог Айгүл Әділова онкологиялық аурулар әйелдер арасында кең тарап жатыр. Қазіргі таңда онкологиялық сырқаттар жасарып барады. Д витаминінің жетіспеушілігі өте көп кездеседі. Д витаминің 5 мың единица мөлшеріне дейін ішу керек. Қан аздылық, шаш түсу, ұйқы қанбау, тырнақ сыну секілді осының белгілері. Дені сау ұрпақты өмірге әкелу үшін қыз бала жас кезінен денсаулығына аса мән беру тиіс деді.Қорқыт Ата атындағы Қызылорда университетінің психологиялық қолдау орталығының жетекшісі Құралай Иманалиева жастарды қандай психологиялық мәселелер алаңдатады және олармен қалай күресуге болатындығын айтып өтті. Ашық алаңға келген қыздарды қатыстыра отырып, олардың өмірінде болған келеңсіз жағдайлар мен психологиялық жағынан кері әсер еткен оқиғаларға тоқталды.<blockquote>– Негізі қыздарда 9-13 жаста алғаш рет етеккірі келеді. Демек, бұл уақыт олардың бойжеткендігінің белгісі. Етеккір келгенде не істеуі керек? Тазалықты сақтаудың алғы шарттарын қызына ең алдымен анасы, жеңгесі айтып түсіндіргені абзал. Ал 13-14 жаста жасөспірім қыздың гинеколог дәрігерге келіп, профилактикалық тексеруден өтуі міндетті. Бұл қабылдауды дәрігер қыздың қасында тек анасы болғанда ғана жүргізе алады. Бұл не үшін керек? Қыз баласының гинекологиялық ауытқуларын ерте жастан анықтап, дәрігерлік кеңес беру үшін қажет. Сондай-ақ, қыздың гинекологиялық тұрғыда қандай да бір шағымдары болса, анализ талдамаларын алып, зерттеуге жіберіледі, – деді гинеколог Әйгерім Ыдырысова.</blockquote>Пікір алмасу алаңында дәрігерлер қосымша ақпарат берумен &nbsp;қатар, оқушыларды толғандырған сұрақтарға толық жауап берді. Сонымен бірге жас қыздардың аналары пікір білдірді.Іс-шараны қорытындылай келе, «Қызылорда облысының әйелдер күштерінің Альянсы» қоғамдық бірлестігінің төрағасы Рахима Ахметова қатысушыларды қоғамдағы келеңсіздікті жоюда бірлесіп, пікірлесіп, ортақ мәселені ортаға салып шешуден шет қалмауға шақырды.

Қызылордада «Қыздардың репродуктивті денсаулығын сақтау мәселелері» тақырыбында жиын өтті

<a href="https://kyzylorda-news.kz/">Kyzylorda-news.kz</a>&nbsp;&nbsp; Қызылорда облысының әкімі Нұрлыбек Нәлібаев Жаңақорған ауданына жұмыс сапарымен барып, "Көлтоған" су қоймасының жағдайын көрді. Аймақ басшысы облыстағы су қоймаларының жұмысымен, көрсеткіштерімен танысып, бірқатар тапсырма жүктеді.<blockquote>"Қоймаларға келген су жеткілікті. Вегетациялық кезеңде суды дұрыс пайдалану үшін бірлескен жоспарға сәйкес іс-шаралар атқарылуы керек. Ысырапшылдыққа жол берілмеуі тиіс. Өздеріңізге белгілі, "Көлтоған" су қоймасы апатты жағдайда, күрделі жөндеуді қажет етеді. Бөгеттің ұзындығы 1500 метр, оның 900 метрінің бетон еңістігінің (откос) төменгі жағы сумен шайылып, бетоны сынуда. Жоба-сметалық құжаттама әзірлеу қажет", - деді Нұрлыбек Нәлібаев.</blockquote>"Көлтоған" су қоймасы Жаңақорған ауданы "Бірлік" елді мекенінің жанында орналасқан, 1929 жылы пайдалануға берілген. Жалпы ауданы 52 гектар, қорғаныс бөгетінің ұзындығы 1,5 шақырым. Қойманың жобалық сыйымдылығы 4 млн. текше метр, қазір 3,5 млн. текше метр су бар, яғни 87,5 пайыз толған. Бүгінгі күнге су тасқыны қаупі жоқ.Аталған су қоймасы "Бірлік" ауылының 250 гектар үйіргелік жерлерін, жеміс, бау-бақшасын және саялы ағаштарын суландырады. Елді мекенді аяқ сумен қамтамасыз ететін жалғыз су көзі. Таудың ортасында орналасқан бетон тоспа (плотина), темірбетонды лоток каналы және ескі арна арқылы қар мен жаңбыр суынан жиналады. Артық су арнамен «Шұқырой» көліне тасталады.<img src="https://knadmin.beoblood.kz/uploads/444152739_752752690379311_5381830843257883770_n_03590bd2e3.jpg" alt="444152739_752752690379311_5381830843257883770_n.jpg"><img src="https://knadmin.beoblood.kz/uploads/444154080_752752710379309_3172494992698798828_n_7a9fe353c2.jpg" alt="444154080_752752710379309_3172494992698798828_n.jpg">

 Аймақ басшысы "Көлтоған" су қоймасының жұмысымен танысты

<a href="https://kyzylorda-news.kz/">Kyzylorda-news.kz</a>&nbsp; «Қазгидромет» РМК-сы мамырдың 27-сі күнгі күн райы болжамын жариялады.Кәсіпорынның деректеріне қарағанда, циклон және онымен байланысты суық атмосфералық ағындар ҚР басым бөлігінің күн райына әсер етеді, соның салдарынан түнде жауын-шашын, шығыста қатты жаңбыр, қар жауады, елдің солтүстік-шығысында қатты жаңбыр өтеді. Елдің оңтүстігінде ғана антициклонның әсерінен күн ашық, жауын-шашынсыз болады. Республика бойынша екпінді жел соғып, найзағай ойнайды, елдің солтүстігінде бұршақ жауады, орталығында дауыл тұрып, оңтүстік-шығыста түнде тұман түседі.Түнде Ақмола, Қарағанды облыстарының батысында, Ұлытау, Солтүстік Қазақстан облыстарының солтүстігінде, Түркістан облысының солтүстігінде топырақ бетінде, таулы аудандарында 1-2 градус үсікжүреді.Қостанай облысының оңтүстігінде, Атырау облысының батысында, оңтүстігінде, Қызылорда облысының шығысында, Батыс Қазақстан облысының батысында, оңтүстік-батысында, Абай облысының орталығында жоғары өрт қауіпі сақталады.Абай облысының оңтүстігінде, Жетісу облысының шығысында, Түркістан облысының шөлді аудандарында төтенше өрт қауіпі сақталады.

Дүйсенбіге арналған ауа райы болжамы

<a href="https://kyzylorda-news.kz/">Kyzylorda-news.kz</a>&nbsp; Қазалы ауданы ықылым заманнан ынта-пейілі өнерге ауған өңір санатында. Ән-жыр, күй десе, ішкен асын жерге қойып, өнерпаз алдында ұйып қалатыны бар. Ол да болса, табиғи болмысымыздағы тектілік пен өнерге деген өреміздің биіктігінен болса керек. Қазалы ауданында көрермен көзайымына айналып, сахна саңлағы болған талантты жандар жеткілікті. Солардың ішінде белгілі күйші, КСРО мәдениетінің үздігі, ҚР Мәдениет қайраткері Орақ Баубековтің шоқтығы биік. Осы орайда, ел сыйлаған өнерпаздың ғұмыр жолы, асқақ рухты өнері жайлы сөз қозғап, сұхбат құрудың реті келген болатын. – Орақ аға, жалпы, өмір өзеніңіз қай жерден бастау алды? – Рахмет. Мен 1948 жылы 15 мамыр күні Арал ауданына қарасты «Көне Бөген» деген жерде дүниеге келдім. Әкемнен сегіз айлығымда қалдым. Бала күнімнен домбыраға құмартып өстім. Біз тұратын жерге іргелес қазақтың қабырғалы қаламгері Зейнолла Шүкіров те тұрды. Мен ең алғаш домбыра тартуды сол кісіден үйрендім. Ол күй «Огонек» деп аталатын. Кейіннен Дәулеткерейдің «Қос алқа» күйін де үйретті. Алғашқы ұстазым Зейнолла ағамыз десем, артық айтқандық емес. Жетінші сыныпты бітірген жылы Қазалы ауданына қарасты Бек¬арыстан би ауылына көшіп келдік. Мұнан соң, Кеңес Одағының Батыры Үрмәш Түктібаев атындағы №24 мектепті тәмамдадым. Мектеп қабырғасынан бастап аудандық, облыстық байқауларда бақ сынадым. Содан соң, сол тұстағы аудандық мәдениет бөлімінің меңгерушісі Кеңес Асанбаевтың тәрбиесінде бол¬дым. Кейіннен белгілі күйші Махамбет Әуезов пен Әбен Жолтаевтан домбырашылықтың қыр-сырын үйреніп, құмарым арта түсті. 1968 жылы жолдамамен Алматы қаласындағы Өнер институтына оқуға бардым. – Негізінен, өнер атаның қанымен, ананың сүтімен дариды. Сізге күйшілік қабілет қалай қонған? Сондай-ақ, шығармашылық еңбегіңізді айтып өтсеңіз? – Алғаш Зейнолла Шүкіровтен әртүрлі күй үйренгенімді жоғарыда айттып өттім. Сосын, менің Балшын әжем жастайынан жырау атанған. Ол кісі домбыраны шебер тартатын. Соған қарағанда, өнерге жақындығым нағашыларымнан қонса керек. Ал, екінші сұрағыңа келсек, қазіргі таңда өзім шығарған 28 күй, 5 ән жарық көріп, көрермен көзайымына айналды. Оның ішінде: «Жанқожа батыр баба», «Қаразым», «Өмір талабы», «Сұлушаш», «Ойлану» секілді күйлерім бар. – Адам бойындағы қандай қасиетті жоғары бағалайсыз? – Кез келген адам бойындағы кішіпейілділік қасиетті жоғары бағалаймын. Үлкенге сәлем беріп, кішіге ізет көрсететін жандарды құрметтеймін. Сонымен бірге, мақтанып асып-таспағанды, «Мен олай едім, мен былай едім» деп көкірегін кермейтіндерді жақсы көремін. Осы ретте, «әдептілік – әдемілік» дегенді айтқым келеді. – Жас күйшілерге қандай кеңес бересіз? – Қазақ күй тарихындағы Құрманғазы, Дәулеткерей, Шалмырза, Қазанғаптардың ешқандай нота білмегендігі белгілі. Сонда да болса, олар біздің қазақ тарихындағы асқан дәулескер күйшілер болды. Осылардың ғұмыр жолдары, тұрмыс-тауқыметі де, әралуан өтті. Мысалы, Құрманғазы өте жарлы болса, Дәулеткерей дәулетті, малды кісі еді. Осы себептен шығар, оның күйлерінің көбі, анаға, табиғатқа, жер-суға, қыз-келіншектерге арналған. Ал, «күй атасы» атанған Құрманғазы орыс отаршылдарынан зор теперіш көрді. Сондықтан да, оның күйлері әрдайым тәуелсіздікке, азаттыққа арналған. Мұнымен қоса, терең ойға, мұң мен шерге толы болып келеді. Шүкір, қазіргі таңда дамыған мемлекетке айналдық. Күйді, нотаны үйрететін музыкалық мектептер көп. Ендігі жас буындар соларға барып оқып, іздену керек деп ойлаймын. – Үйрену керек деп қалдыңыз. Ал, өзіңіз дайындаған, өнер аспанына ұшырған шәкірттеріңіз бар ма? – Әрине, өзім де, осы күй өнеріне біраз ізбасарларымды баулыдым. Олардың бірқатары еліміздің 12 қаласында жүр. Осылардың ішінде Нұркен, Дәулет, Роман деген шәкірттерімді айрықша атап өткім келеді. Бұлардың екеуі Астана қаласындағы Өнер академиясына оқуға түсті. Республикалық Құрманғазы, Нұрғиса Тілендиев атындағы байқаулардың, «Шабыт» фестивалінің лауреаттары атанды. – Қазақ даласындағы сіз мойындайтын ең ұлы музыкант кім? – Жалпы, мен өнер адамдарының көбін құрметтеймін. Бірақ, соның ішінде, өзіміздің жерлес, республикаға есімі белгілі сазгер Кеңес Дүйсекеевті айрықша мойындаймын. Мойындайтын себебім, 1981 жылы телевидениеде жұмыс жасап жүрген кезінде Қазалыға келіп, біздің оркестрімізді көріп, телефильмге түсірді. Одан бөлек, оның әндерінің өзі қандай керемет! Сондықтан, мен үшін ең мықты сазгер сол. – Өмірде өкінетін сәттеріңіз жиі болып тұрады ма? – Өкінетін сәттер дегенде мәдениет, өнер жайындағысын айтайын. Бұл жағына келгенде, аздаған көңіл толмайтын кішкентай өкініш бар. Бұрын Кеңес үкіметі кезінде 1980 жылдары Қарақалпақстан, Өзбекстан, Түркіменстан секілді жерлерде өнер көрсеттік. Мәскеуге, Омбыға, Орынборға сапарладық. Тәуелсіздік алған алғашқы жылдары Әбіш Кекілбаевтың ықпалымен бірінші рет, Алматы қаласында Қазалы ауданының мәдениеті мен өнері күндері өткізілді. Оған КСРО халық әртісі Роза Бағланова апамыздан бастап, Кеңес Дүйсекеев, Мәдина Ералиева, Рүстем Жанаев секілді өнер қайраткерлері бастаған топ қатысты. Шара жоғарғы деңгейде өтті. Кейін, осы құраммен Египетке баратын болып ұсыныс түскен. Сол кездегі облыс, аудан басшыларының қаржы мәселесін шешіп бере алмауынан жол сапардың сәті түспеді. Өнер саласында осындай түрлі жайттар кездесіп тұрады. – «Атамұра» ансамблі туралы айтып өтсеңіз? – Бүгінде көпшілікке белгілі «Атамұра» ансамблі көптеген мәдени шараларға белсене қатысып жүр. Оның құрамындағылар зейнеткерлер болса да, аянбай тер төгіп жатқанын айту ләзім. Басқа салаларда зейнеткерлік болса да, өнерде «ардагер» деген ұғым жоқ. «Атамұра» ансамблінің шығармашылық кешін өткізіп тұрамыз. Әркез жиналған көпшілік жылы қарсы алады. Бұдан бөлек, ел азаматтары арнайы келіп, біздің ұжымға қошеметтерін білдіреді. Алдағы уақыттары да, өнерпаздар өз өнерлерімен ел-жұртты қуанышқа бөлей береді деген сенімдемін. – Әңгімеңізге рахмет!

Орақ Баубеков:  «Ең алғашқы күйді Зейнолла Шүкіровтен үйрендім»

<a href="https://kyzylorda-news.kz/">Kyzylorda-news.kz</a>&nbsp; &nbsp;Қасиетті Қазалы топырағы талант дарыған тұлғаларға бай. Туған жерден тұрақ тауып, елін, жан сырын әнге арқау еткен әнші Нұрмаш Алғашбайды аудан жұртшылығы жақсы біледі. Көпшілік Нұрмаш Қабылбайұлын күміскөмей әнші деп қана емес, талай өлеңге ән жазған композитор ретінде де жақсы таниды. «Қазалының Шәмшісі» атанған сазгер Нұрмаш Алғашбаев бүгінде 300-ге жуық әннің авторы. Қара сөздің қаймағын қалқыған ақындығы да бар жан-жақты жанның жүрегінен шыққан төл туындылары аудан, облыс көлемінен асып, республикалық сахналарда шырқалып жүр.Қарапайымдылығымен ерекшеленетін өнер иесінің Отан, туған жер, табиғат, әке мен ана, бейбітшілік, махаббат, салт-дәстүр, тәуелсіздік тақырыптарындағы әндері республикалық телерадионың алтын қорында сақтаулы. «Жастық шақ әуендері», «Сырдың сұлу саздары», «Сыр әуендері» жинақтарына бір топ әндері, балаларға арналған бірнеше әуендері мектеп оқулықтарына енгізілген. Бүкілодақтық фестивальдің лауреаты Нұрмаш Алғашбаев қазірде аудандық «Атамұра» ардагерлер ансамблінде өнер көрсеткен болатын. Әуелеген саз әлемінде өзіндік қолтаңбасын қалыптастырған сыршыл сазгермен сұхбаттасудың сәті түскен еді.– Нұрмаш аға, бойыңыздағы өнер қанмен берілген қасиет пе әлде...– Солай деуге болады. Өйткені, анам Разия өнерлі кісі еді. Ән салатын. Үй шаруашылығында болып, балалардың тәрбиесімен айналысты. Әкем Қабылбай күрішші болды. Бауырларымның ішінде ағам Әбілтай екеуміз өнерге жақынбыз. Ол кісі де мен секілді аудандағы өнерпаз ардагерлерден құралған «Атамұра» ұлт-аспаптар ансамблінің құрамында.Мектеп қабырғасында жүрген кезден-ақ аудандағы оркестердің құрамында болып, ән айтып жүрдім. Талай жарыстарға қатысып, жүлдемен оралдық.– Ең алғашқы туындыңыз туралы айтсаңыз...– Мектептен кейін өнер жолына түскім келді. Алайда, шығармашылық тапсыру емтиханына кешігіп қалыппын. Сөйтіп, Алматыдағы Зооветеринариялық институтына оқуға түстім. Зоотехник-инженер мамандығын алған соң, жолдамамен Қарағанды облысының Нұра ауданына қарасты Киевка совхозында екі жыл еңбек еттім. Содан соң туған жерге оралып, сол кездегі Қазалы қаласындағы СПТУ-34 мекемесінде, кейін №17 мектепте мұғалім болдым. Бертін келе, С.Сейфуллин атындағы №165 мектептен музыка пәнінен оқушыларға білім беріп, зейнеткерлік демалысқа шықтым.Алғашқы туындым институт қабырғасында өмірге келді. Бір күні бөлмеде жалғыз отырғаныма радиодан Мұхиттың әні шырқалды. Сол әннен шабыт алсам керек, ойыма әуен оралып, «О,Зәуреш» әнін шығардым. Сөзі де өзімдікі, алғашқы орындаушысы да өзім. Оқу орнында өнер студиясы болды.&nbsp;Оркестрдің құрамында болып, домбырада ойнадым. Гитара, прима-қобыз, баян, бас домбырада тарта аламын.– «Өлең деген тумайды жайшылықта» деп Мұқағали ақын жыралағандай әр өнер адамының шабыт алатын дүниесі болады? Сіздің жүрегіңізді тербеп, көңіліңізді шалқытатын не нәрсе?– Көбіне оңаша қалғанда тың дүниелер туады. Табиғаттың керемет көрінісі де менің музама айнала алады. Әсемдіктен алатын әсерім де жоқ емес.– Білуімше, 300-ге жуық әннің авторысыз. Жаныңызға ерекше жақынын атасаңыз...– Әр ән өзінше бір әлем. Бір-бірінен бөле-жара қарау мүмкін емес. Олда балаңдай ғой. Әрбірінің өзіндік орны мен шығу тарихы бар. Мен патриоттық тақырыпта да, лирикалық жанрда да жазамын.«Аралым, Аяулым», «Он екі ирек», «Әләулім» әндерім қазақ телевизиясының алтын қорына қабылданған. 1998 жылы жазылған «Қызыма» атты әнім сол уақыттан бері ұзату тойларында айтылып жүр. 70 әнім қазақ авторлар қоғамында тіркелген. Күйлерім мен арнайы шығармаларым да бар.– Ал, балаларға арналғаны бар ма?– Иә, 50-60 шақты балаларға арнап жазған әнім бар. «Әжем айтқан ертегі», «Көгершіндер», «Суық торғай», «Су торғай», «Анашым», «Егеменді ел Қазақстан» сынды әндерім мектеп оқулықтарына енген.– Отбасыңыз өнерге қаншалықты жақын?– Зайыбым Жаңыл бастауыш сынып мұғалімі болып еңбек етіп, зейнеткерлікке шықты. Ол кісі де, ән салады. Екеумізді табыстырғанда осы өнер жолы. Ол кезде Қызылтуда мұғалім еді. Мен СПТУ-34 мекемесіндемін. Аудан өнерпаздары болып, Жалағашқа жарысқа бардық. Оркестр құрамында жолдасым да болды. Сөйтіп, танысып, сөзіміз жарасып, шаңырақ көтердік. Үш ұл, бір қыз тәрбиелеп, өсірдік. Екі ұлым Алматыда тұрады. Ғалымжаным құрылысшы, келінім Айнұр мейірбике. Біржаным реаниматолог-дәрігер, келіншегі Жанерке мейірбике. Қазалыда қызым Ақсамал №165 мектепте орыс тілінен, ұлым Ғани №249 мектеп-лицейде музыка пәнінен мұғалім. Келіншегінің есімі Марқаббат. Ақсамал фортепиано, Ғани музыка мектебінен баян класын бітірді. Алайда, өнер жолында тек Ғани ғана. Оның қыздары Жаннұр мен Қарақат ән салады. Түрлі сайыстардың жеңімпаздары.– Бір сөзіңізде кітапты жиі оқитыныңызы айтып қалдыңыз. Қандай ақындармен шығармашылық байланыстасыз?– Сазгер болғандықтан әніңе сәйкес, өлең іздейсің. Сол себепті де, кітапты көп оқимын. Кейде бірінші ән өмірге келеді. Оған лайықты өлең жолдарын қараймын. Қазалылық ақындардан Жетіскен Мәкеналы, Насыр Баекеев, Жұмабек Табынбаев, Жұмабек Құлбаевпен бірлесіп, бірнеше туындыны жарыққа шығардық.– Қазіргі эстрада әншілерінен кімді тыңдайсыз? Қандай сазгерлердің әні көңіліңізге қонымды.– Шынымды айтсам, қазіргі әншілерді көп тыңдамаймын. Шәмші, Ескендір, Әсеттің әндері жүрегіме жақын.– «Өнер – ортақ байлық» деген тәмсіл бар. Кейінгіге мұра ретінде туындыларыңызды топтастырып, кітап қылып шығару ойыңызда бар ма?– Ілгеріде Болатбек Пұсырманов аудан әкімі болған тұста: «Кітабыңызды шығарайық. Қанша қаржы болса да, көтереміз» деген еді. Алайда, өзім құнттамадым. Әндерімді жарнамаламаймын. Жазылып, орындалмай жатқаны қаншама. Уақыт өте келе ойланып жүрмін. Барлығы дайын. Енді жүйелеп, жинақтап, кітап қылу ойда жүрген істің бірі.– Армансыз адам болмас аға. Сіздің де жетсем деген мақсатыңыз бар шығар...– Атақты Шәмшінің өзі «Естайдың Қорланындай ән жазсам шіркін!» деп армандаған екен. Менің де, көкейімде жүрген мақсатымның бірі, әрі бірегейі – керемет туындыны өмірге әкелу. Сол арманның жетегімен «Естай-Қорлан» атты ән жазудамын. Жуырда жарыққа шығады деген ойдамын.– Әңгімеңізге рахмет. Шабытыңыз шалқи берсін!СұхбаттасқанҰлболсын ТАЛАПБАЕВА

Қазақстан және Қызылорда облысының жаңалықтары

«Жүректен шыққан сырлы сөз» тақырыбымен поэзия кеші өтті

«Ұлы дала жорығы» марафон-бәйгесінің үшінші маусымы өз мәресіне жетті

Аудан әкімі Н.Ілиясов пен Шаған ауылында көшпелі кездесулер өткізді

«Ұлағат» ардагерлер аспапты ансамблі Арал ауданындағы ауылдарда болды

Айтжан Оразбақов: Арал лагерінде 6 мыңнан астам адам зардап шеккен

Аралда «Оң қол» атты мистикалық драма қойылымы өтті

«РЭП – есірткіге қарсы!» ұранымен байқау өтті

Қызылордада «Қыздардың репродуктивті денсаулығын сақтау мәселелері» тақырыбында жиын өтті

Аймақ басшысы "Көлтоған" су қоймасының жұмысымен танысты

Дүйсенбіге арналған ауа райы болжамы

Орақ Баубеков: «Ең алғашқы күйді Зейнолла Шүкіровтен үйрендім»

Нұрмаш Алғашбаев: Шәмшінің әндері жүрегіме жақын