<a href="https://kyzylorda-news.kz/">Kyzylorda-news.kz.</a> Жастайынан ақ халат киген дәрігерлерді көрсе, сүйсіне қарайтын қаршадай қыз осынау мамандық иесі болуды армандаған жанның бірі. Замандастары мен ұстаздары бұл мамандықтың қиын екенін қаншама рет айтқанмен, өз шешімінен бас тартпаған бүгінгі біздің кейіпкеріміз Анар Әбілдаева мектепті үздік бітіріп, өзінің армандаған кәсібіне таңдау жасайды. &nbsp;№246 мектепті бітірген соң 1990 жылы Торғай облысы, Арқалық қаласындағы медициналық училищенің фельдшер факультетіне оқуға түсіп, оны 1993 жылы бітіріп шығып, 2018 жылға дейін қаладағы №6 емханада аймақтық мейіргер болып жұмыс істейді. 2018 жылдан осы кезге дейін емхананың аға патронаж мейіргері болып қызмет атқаруда. Әр жылдары еткен еңбегі еленіп, қала әкімінің алғыс хатымен, облыстық денсаулық сақтау басқармасының құрмет грамотасымен марапатталған. Жергілікті емделушілердің мейірімді мейіргерге айтар алғыстары көп.<blockquote>«Анар елгезек – жауапты, білгір маманның бірі. Басымыз ауырып, балтырымыз сыздаса, осы бір ақкөңіл жанға жүгінеміз. Аймақ мейіргері болған кезде өзіне тиесілі үйлердің бәріне барып үлгереді. Ауырып барған адамның көңілін тауып, жылы сөйлеседі. Өте білімді, өз ісінің шебері Анарды жауапкершілігі жоғары болғандықтан №6 емханаға аға мейіргерлік қызметке тағайындады. Қарамағында бірнеше мейіргер жұмыс істейді. Бұл қызметті де Анар мүлтіксіз адал атқарып келе жатқанын естіп отырмыз. &nbsp;Қызметіне табыс, отбасына амандық тілеймін», – дейді КБИ шағын ауданының тұрғыны Ақсәуле Атабаева.&nbsp;</blockquote>Емделушілер мейіргердің еңбегіне жоғары баға беріп отырса, бұдан асқан бақыт бар ма?! Бүгінде Анар өз отбасында қадірлі ана, әзиз әже. Өмірге 1 ұл, 2 қыз әкеліп, балаларына жоғары білім беріп, ұлды ұяға, қызды қияға қондырып, құрмет төрінен көрініп, жарасымды жанұяның отанасы мен шырақшысы болып, үлгілі отбасының ұйытқысы болып еңбек етуде. Біз де осы бір ақ халатты абзал жанға абырой мен бақ тіледік.&nbsp;

Мейірімді мейірбике

<a href="https://kyzylorda-news.kz/">Kyzylorda-news.kz.</a> Дені сау адам – табиғаттың ең қымбат жемісі. Көп жасау – деннің саулығы,бақытты болу – адамның өз қолындағы ісі депті ғұламалар. Денсаулықты зор байлыққа теңеген халқымыз ағзаның саулығын бақытқа балаған. Осы ретте адам денсаулығын сауықтыруда ақ халатты абзал жандардың еңбегі өлшеусіз. Ал өңірдің медицина саласын басқару үлкен жауапкершілік пен тынымсыз ізденіс пен ерекше еңбекті қажет етеді.&nbsp;Аймақтың бас дәрігері қызметіне тағайындалған сәттен Олжас Искаков әр сала бойынша облыстың штаттан тыс бас мамандарын жеке қабылдап, мәселесін тыңдағанын айтады. Нәтижесінде тұрғындардың медициналық көмекке арыз-шағымы азайған. &nbsp;Нефрология қызметін дамыту жөніндегі жол картасы шеңберінде «Облыстық қан орталығы» ШЖҚ КМК-дағы қандағы такролимус концентрациясын анықтайтын аппаратқа реагент жеткізіліп, облыстағы бүйрегі ауыстырылған тұрғындарға талдау жұмысы басталған. Сонымен қатар, «Орталық қалалық емханасы» ШЖҚ КМК-на иммунохимиялық анализатор аппараты сатып алынып, қондырғы іске қосылған.Одан бөлек аймақтағы хирургия саласын дамытудың «Жол картасы» әзірлеу игілікті істің бірі.Барлық медицина ұйымдарының бас дәрігерлерін 2022 жылы атқарылған жұмысы, 2023 жылға қойған міндеттерін талқылау мақсатында жеке қабылдау өткізген. Қабылдау нәтижесінде аймақ медицинасының 2023-2028 жылдарға арналған стратегиялық даму жоспары дайындалуда.Ағымдағы жылы облыс әкімінің орынбасары Нұрымбет Сақтағановтың төрағалығымен, медицина ұйымдары бас дәрігерлерінің қатысуымен 2023 жылдың І тоқсанын қорытындылау бойынша алқа отырысын өткізіп, нақты тапсырма берген. Бүгінде «Ауылда денсаулық сақтауды жаңғырту» пилоттық ұлттық жобасы аясында 2023-2024 жылдары жалпы құны - 11,2 миллиард теңгеге 27 денсаулық сақтау нысан құрылысы, 2025 жылға дейін Арал, Қазалы, Шиелі, Жаңақорған ауданаралық ауруханасын «Көпбейінді аудандық аурухана» деңгейіне жеткізу бойынша жұмыстар жүргізілуде.Қызылорда қаласының сол жағалауында 2,9 миллиард теңгеге облыстық қан орталығының құрылысы жүргізіліп жатса, &nbsp;қалада бір ауысымда 100 келушіге арналған емханасы бар 300 төсек орынға арналған көпбейінді ауруханасының құрылысы басталған. Аталған денсаулық сақтау нысаны құрылысы бойынша б министрлікпен тиісті жұмыс жүргізілуде. Еліміздің Премьер-министрінің орынбасары Алтай &nbsp;Көлгіновтің облысқа жұмыс сапары барысында Шиелі аудандық көпбейінді орталық ауруханасында аймақта атқарып жатқан жұмысым туралы баяндадым.Премьер министр облыстық фтизиопульмонология орталығы және облыстық психикалық денсаулық орталығы ғимаратының күрделі жөндеу жұмысымен танысып, бөлінген қаржының мақсатты игеріп, жұмысты сапалы жүргізуді &nbsp;тапсырды. Әріптестеріме ана мен бала денсаулығын &nbsp;басты назарда ұстауды арнайы ескертіп отырамын. Көп бейінді облыстық балалар ауруханасы 200 төсек орынға арналғанымен 360 төсек болып үстемемен жұмыс жасап жатқанына ерекше назар аударып, &nbsp;облыс әкіміне мән жайды түсіндіріп, мәселе қолдау тапты. Осылайша, бұрын-соңды облыста болмаған 150 төсекке арналған көп бейінді қалалық балалар ауруханасын жергілікті бюджет қаражаты есебінен ашу жұмысы жүргізілуде.Жағымды жаңалықтың бірі – жас аналарға жоғары мамандандырылған медициналық көмектің қолжетімділігін арттыру мақсатында жыл соңына дейін көпбейінді облыстық аурухана жанынан 70 төсектік босану бөлімшесін ашу жұмысы қолға алынуда.Сонымен қатар, мемлекет басшысының тапсырмасына сәйкес халықаралық стандартқа сай 200 төсектік перинаталдық орталық салу мәселесі &nbsp;пысықталып, жер учаскесі бөлінген. Ағымдағы жылы медицина ұйымдарын техникамен қамтамасыз етуге қомақты қаржы қарастырылған.&nbsp;2023 жылға &nbsp;облыс бойынша жергілікті бюджет есебінен орфандық – сирек кездесетін ауруы бар науқастарға 345 986 мың теңге қаржы қаралды. Былтырғы жылмен салыстырғанда 150 миллион теңгеге көбейіп отыр.&nbsp;<blockquote>«Медицина қызметкерлерінің біліктілігін арттыруға жергілікті бюджет қаражаты есебінен 88 160 мың теңге бөлінді. Аталған қаржының барлығы ана мен бала денсаулығын сақтау саласының игілігіне жұмсалмақ. Қажеттілікке қарай, мамандарды шет елде оқыту мәселесі пысықталуда. Республикалық мамандармен байланыс нығая түсуде. Астана қаласы ұлттық ғылыми медицина орталығының кардиохирург дәрігері Марат Мыңбаевпен облыстағы туабітті ақаумен туған есепте тұратын 62 балаға кеңес беріліп, 18 бала ота жасауға ел астанасына жолданды. Акушерлік-гинекология саласы бойынша республикалық куратор, «Акушерия-гинекология және перинатология ғылыми орталығының» дәрігері Б.Туленова облысымызға іс-сапармен келіп, медицина ұйымдарына тәжірибелік көмек көрсетті. Астана қаласындағы Ұлттық балаларды оңалту орталығының психоневрология бөлімінің меңгерушісі, невролог дәрігері А.Алимжанова көпбейінді облыстық ауруханасына келіп, «Церебральды параличте күтім ерекшелігі», «1 жасқа дейінгі балалардың жүйке-психикалық дамуы» тақырыбында дөңгелек үстел өткізілді», – дейді өңірдің бас дәрігері.</blockquote>Басқарма басшысының айтуынша, ағымдағы жылдың 24 сәуірінде өткізілген кезекті сессияда орфанды сирек кездесетін ауру түрімен сырқаттанатын облыс тұрғындарына жергілікті бюджеттен қосымша 100 миллион теңге &nbsp;бөлінген. Одан бөлек басқарма ұсынысы «Қазақстан Халқына» қорына жолданып, нәтижесінде 34 миллион теңгеге 3 науқас «Цинрайз», «Рисдиплам» препаратымен қамтамасыз етіліпті.Сондай-ақ биылғы жылы 15 төсекке арналған «Лор» бөлімшесі көп бейінді облыстық балалар ауруханасында ашылған. Лор бөлімшесінің ашылуы балалардың денсаулығын одан әрі жақсартуға жасалып отырған игілікті шара екені анық.Сонымен қатар, республика бойынша оңалтудың брендіне айналған «Қамқорлық» оңалту орталығын Арал, Қазалы, Жаңақорған, Шиелі аудандарында ауданаралық оңалту орталығын ашу жоспарланыпты. Бұл бастама өз кезегінде 5000-ға жуық ерекше балалардың тиісті оңалту шарасын тұрғылықты жерде қабылдауға мүмкіндік беретінін айтты.Басқарма басшысы Байқоңыр қаласы, Арал және Жаңақорған аудандарына жұмыс сапарымен барып, медициналық ұйым жұмысымен танысқан. &nbsp;Тұрғындармен жеке қабылдау өткізіп, ашық диалог ұйымдастырып, алыстағы ағайынның арыз-шағымын тыңдаған. Алматы және Жамбыл облыстарындағы үздік тәжірибені енгізу мақсатында Шиелі аудандық көп бейінді орталық &nbsp;ауруханасы және №6 қалалық емханасы мамандары тәжірибе алмасу және озық тәжірибені &nbsp;жүзеге асыруға жолданған.Облыс тұрғындарына травматологиялық және ортопедиялық көмек көрсетуді жақсарту мақсатында Астана қаласының №2 көпбейінді қалалық ауруханасының травматология бөлімшесінің аға дәрігері А. Кузнецовтың қатысуымен «Полижарақат» тақырыбында семинар өткізіліп, облыстың травматолог мамандары тәжірибе алмасқан.Бүгінде облыс тұрғындарына жоғары мамандандырылған медициналық көмек көрсететін ұйымдардың қажетті бағыты анықталып, «Қазақстан халқына» қорына сұраныс хат жолданған.&nbsp;Еліміздің бірқатар өңірінде медицина саласының қызметкерлеріне, оның ішінде орта буын медицина мамандарына тапшылық әлі де бар. Әсіресе, еліміздің солтүстік өңірінде медицина маманына тапшылық жоғары. Осы мәселені шешу мақсатында облыстық денсаулық сақтау басқармасының басшысының шақыртуымен 10-11 мамыр күндері аймағымызға Қостанай және Солтүстік Қазақстан облысынан арнайы құрылған жұмыс тобы келіп, медициналық жоғары колледжінің мәжіліс залында бітіруші түлектермен кездесу өткізідген.&nbsp; Басқарма басшысының төрағалығымен наурыз айының соңынан бүгінгі күнге дейін медициналық ұйымның бас дәрігерлерімен 5 облыстық штаб отырысы, 9 апталық лездеме &nbsp;өткізілген.Осы уақытқа дейін басқарма басшысының жеке қабылдауында 94 азаматтың мәселесі қаралып, алпысы оң шешімін тауып, 24-не заң аясында түсінік берілген. Қазақтың «жас келсе іске» деген ұлағатты сөзі бар. &nbsp;Халықтың денсаулығын сауықтыру мақсатында қаншама жұмыстар атқарылған. Алда атқарылар шаруа да шаш етектен дейді басқарма басшысы.&nbsp;Әрине дәрігер мамандығы – мамандық атаулы ішіндегі ең қасиеттісі, әрі абыройлысы. Дәрігерлік – аса жауапкершілікті, шыдамдылықты, өз ісіне деген сүйіспеншілікті қажет ететін ұлы мамандық. Ал аймақтың денсаулық саласының жұмысын үйлестіру басшының шеберлігін дәлелдейді.

Қызылорданың бас дәрігері денсаулық саласының стратегиялық даму жоспарын дайындауда

<a href="https://kyzylorda-news.kz/">Kyzylorda-news.kz.</a>&nbsp;Дана халқымыз «Ас тұрған жерде – ауру тұрмайды» дейді. Ақиқат, ас бар жерде ешқандай ауру жоқ. Бірақ мына заманда олай айтуға болмайды. Өйткені қазір тауарлардың ғана емес, тамақ өнімдерінің де сапасы сын көтермей тұр. Жуырда осыған байланысты және 7 маусым Дүниежүзілік тамақ өнімдерінің қауіпсіздігі күніне орай «Қауіпсіз тағам таңда» атты акция өтті. Акцияны аудандық санитариялық-эпидемологиялық бақылау басқармасының мамандары да жүйелі түрде жүргізіп, он күндік науқан аясында түрлі шаралар өткізіп, аудан тұрғындарына түсіндірме жұмыстарын жүргізді.«Ауру – астан». Әсіресе, елімізде орын алған эпид ахуалдан кейін тамақ өндірісіне қауіп жоғарылады. Қазір дүкен сөрелерінде самсап тұрған азық-түлік тауарларын да, көкөністер мен жеміс-жидектерді де емін-еркін жеуге қорқасың. Себебі олардың құрамында нитрат бар. Нитрат – көбінесе көктем мен жаз айларында сатылатын құлпынай, қарбыз, қауын, қызанақ пен қиярда көп болады. Ал мұндай өнімдердің сырты тәбет тартарлықтай көрінгенімен, адам ағзасына өте қауіпті. Әрине, олардың барлығы арнайы қаптамада, дәрі-дәрмектер арқылы егілетін болғандықтан, ерте піседі. Жер ананың көмегінсіз, мезгілсіз піскен жемістер мен көкөністерге деген сұраныстың қашан да жоғары болатыны белгілі. Сондықтан оларды тұтынбас бұрын әуелі арнайы тексерістен өткізген абзал. Осыдан бірнеше күн бұрын аудандық санитариялық-эпидемиологиялық бақылау басқармасының мамандары Ұлттық сараптама орталығының аудандық бөлімшесімен бірлескен бұйрыққа сәйкес, сондай-ақ онкүндік акция аясында азық-түлік тауарларының сапасын анықтау мақсатында арнайы тексеру жұмыстарын жүргізді.Санитарлық-эпидемилогиялық тексеру жұмыстары ең әуелі «Сыр Ұланы» тынығу лагерінен бастау алды. Мұнда жазғы лагерге келген балалардың күнделікті тұтынатын тағамдары, көкөніс пен жеміс-жидектер экспресс әдіспен нитратқа тексерілді. Сондай-ақ сала мамандары балаларға тамақ өнімдерінің қауіпсіздігі, тағамнан улану, сапасыз өнімдерден қорғау, жеке бас гигиенасын сақтау, жедел ішек инфекцияларының алдын алу жөнінде түсіндірме жұмыстарын жүргізіп, дәрістер оқыды.Науқан бұдан әрі «Әбдіманап базары» атындағы орталық базарда өз жалғасын тапты. «Қауіпсіз тағам таңда» атты акцияның барысында базарға келген тұрғындарға, сатып алушыларға арнайы үн парақтар таратылды. Бұдан бөлек тамақ өнімдерінің бөлшек сауда нысандарының жеке кәсіпкерлері арасында үгіт-насихат жұмыстары жүргізілді. Сондай-ақ радиоәдіс арқылы қауіпсіздіктің алдын алу жүйесі баяндалды. Ал аталған тексеру жұмыстары кезінде базарда сатылатын көкөніс пен жеміс-жидектерден 75 үлгі, сүт өнімдерінің қышқылдығынан 10 үлгі, ет өнімдерінен 15 үлгі алынып, тексерілді. Даброраториялық зерттеулер жүргізіліп, үлгілік зерттеу алынды.&nbsp; Нәтижесінде базарда сатылып жатқан қарбыз, құлпынай, өрік, пияз сынды өнімдердің қауіптілігі жоғары екендігі анықталды. Осы іс-шара жосарына сәйкес, кент орталығында орналасқан «Қазына» сауда үйінде басқарманың, аудан¬дық сала мамандарының қатысуымен зерттеу жұмыстары өз жалғасын тапты.<blockquote>«Қазіргі таңда Дүниежүзілік тамақ өнімдерінің қауіпсіздігі күніне орай «Қауіпсіз тағам таңда» атты халықаралық ауқымдағы түрлі іс шаралар акциясы жүргізілуде. Аталған акция Шиелі ауданында да қарқынды жалғасын тауып жатыр. Өздеріңіз білетіндей, азық-түліктің сапалы болуы – аса маңызды. Сондықтан әрбір тұтынушы дүкендерден, немесе сауда орындарынан өздеріне қажетті тамақ өнімдерін сатып аларда сақ болған жөн. Біз осы тақырыпқа байланысты аудан халқына арнайы үн парақтар таратып, түсіндірме жұмыстарын жүргіздік. Сонымен қатар, жемістер мен көкөністерден экспресс тексеру сынамасын алдық», – дейді аудандық санитариялық-эпидемиологиялық бақылау басқарма басшысының орынбасары Гүлстан Болатова.</blockquote>Иә, «Сақтансаң – сақтаймын» деген сөз де жан бар. Басқа айларды есепке алмаған күннің өзінде, жаз – түрлі дәрумендерге бай болатын мезгіл болғанымен, өте қауіпті ай. Өйткені – жаңа піскен өнімдерде түрлі инфекциялық вирустар болуы әбден мүмкін. Оның үстіне жуылмаған жемістерде қауіп жоғары. Ал мезгілінен бұрын пісетін көкөністердің құрамында нитрат жоғары. Мұның барлығы асқазанның жарасы, бауыр, өт жолдарын нашарлатуы бек мүмкін. Сол үшін ас ішерде абай болайық, қымбатты оқырман!

Шиеліде «Қауіпсіз тағам таңда» акциясы өтті

<a href="https://kyzylorda-news.kz/">Kyzylorda-news.kz.</a> Осыдан жиырма тоғыз жыл бұрын Қазалы қаласы халқының игілігіне берілген емхананы алғашқы жылдары Махат Жансейітов басқарды. Содан бері екі қабатты еңселі ғимаратта жұмыс істейтін ақ халатты абзал жандар талайдың дертіне дауа тауып, денсаулығын түзетуге септігін тигізіп келеді. Бұнда барлығы 65 қызметкер бар.2009 жылы емхана басшылығын медицина саласының үздігі Гүлайым Айсауыт қолға алып, 2021 жылдың шілдесіне дейін абыройлы еңбек етіп, құрметті зейнет демалысына шықты. Қазіргі таңда дәрігер Аралкүл Ашықбай басқарып отырған денсаулық сақтау орнында тәжірибелі, өз ісінің білікті мамандары топтасқан. «Шипагер» емханасында тіркеуде тұрған жеті мыңға жуық тұрғынға 8 дәрігер, психолог маман, 45 орта буын, 12 кіші қызметкер қызмет көрсетеді. «Ауырып ем іздегенше, ауырмайтын жол ізде» деген ұстанымдағы ұжым мүшелері халықтың денсаулық жағдайын үнемі бақылауда ұстап отыруға дағдыланған. Ішкі істерді тиянақтап, күнделікті жұмыс барысының жүйелі өтуін жолға қоя білген аға мейіркеш Нұрила Жаңылованың еңбегі ерекше. Осы салада 36 жыл еңбек өтілі бар маман өз ісінің майталманы.Емханада 15 орындық күндізгі стационар жұмыс жасайды. 4 жалпы дәрігерлік аймаққа бөлінген. Бір аймаққа бір дәрігер және төрт мейіркеш бөлінген. Олардың екеуі ересектердің, біреуі туу жасындағы әйелдердің, біреуі балалардың денсаулығына жауапты. Стоматология кабинетінде екі дәрігер қызмет көрсетеді. Стоматолог-терапевт Гүлдана Бекжанова тісті емдесе, тіс дәрігері Аралбай Мәмбетжанов емдеуге келмейтін тісті жұлады. Жүкті әйелдердің жай-күйін бақылауда гинекология кабинеті жұмыс істейді. Әр аптаның бейсенбі күні түстен кейінгі уақытта орталық ауруханадан маман Сәкен Өтегенов келіп, УЗИ аппаратына түсіреді. Ол бар-жоғы екі сағаттың ішінде 15-20 науқасқа дейін қабылдай алады. Сонымен қатар бұнда балаларды дамыту кабинеті де бар. Онда 37 жыл өтілі бар мейіркеш Гүлмира Шамшаева балалар мен жүкті әйелдерге өзінің жұмыс жоспарына сәйкес арнайы сабақтар өтеді. Сабақ кезінде жас аналарға ақыл-кеңестер беріліп, нәрестені қалай қосымша тамаққа үйрету жолдары мен физикалық дамуына қатысты бағыт-бағдар көрсетеді. Жүкті әйелдердің тамақтануы мен босануға дайындығы, сәбиді дұрыс емізу жолдары үйретіледі. Жылумен емдеу кабинеті де халыққа қызмет көретеді. УВЧ, Гальванизатор, Лоток, парафин салынады. Балаларға небулейзер аппаратымен ингалияция жасалады. Ол тыныс жолының ауруларында таптырмас құрал.&nbsp;Жүрек қызметін бақылайтын ЭКГ аппараты орналасқан кабинетте Орынкүл Өтеналиева келушілерге қызмет көрсетеді. Бұл аппараттың көмегін емханаға келе алмайтын науқастар үйден де ала алады. Зертханада Гүлсара Орысбекова, Гүлмаржан Кәдірбай еңбек етеді. Егу және ем-шара кабинеті де пациенттер қабылдап, уақытылы ем-дом алуларына күш салады. Сонымен қатар туберкулезге шалдыққан науқастарға профилактикалық ем қабылдайтын арнайы бөлме бар. Аймақтық мейіркештер «Д» есептегі жандарға ай сайын тегін дәрі-дәрмек беріп отырады. Әр бала дүниеге келген сәтте нәресте қобдишасы беріледі. Сәбилерге анасының жағайына орай, көрсеткішке сай сүт өнімдері үлестіріледі.&nbsp;<blockquote>«Жалпы емханаға қала халқының 6946-сы тіркелген. Оның 2293-і бала, жүкті әйелдер саны – 79. Оның ішінде 19-ы жоғарғы қауіпті топқа жатады. Яғни, денсаулықтары үнемі бақылауда ұстап отыруды қажет етеді. Балалар жылына орай, бізде ашық есік күні өтті. Онда аудан орталығынан келген эндекринолог, невролог, хирург, ЛОР. Окулист мамандар балаларды жан-жақты тексерістен өткізді. Бұл ата-аналар үшін таптырмас мүмкіндік болды. Бұндай шара алдағы уақытта өз жалағасын табады деген ойдамын», – дейді бас дәрігер Аралкүл Ашықбаева.</blockquote>

Дертке дауа тапқандар

<a href="https://kyzylorda-news.kz/">Kyzylorda-news.kz.</a> Жүрегі қалап, таңдауы түскен мамандығының майталманына айналған жандар ортамызда аз емес. Олардың қатарында Қазалы қалалық емханасындағы аймақтық мейіркеш Айнагүл Жұбаныш та бар. Ол Ғ.Мұратбаев атындағы №17 орта мектептен 10 сыныпты бітірген 1987 жылы Павлодар облысы Екібастұз қаласындағы медициналық училищеге оқуға түседі. Мамандығын меңгеріп, туған жеріне оралған соң еңбек жолы басталып кетті. 1990 жылдың наурызынан қалалық емханада аймақтық мейіркеш болып жұмыс жасайды.Байсалды мінезімен көпке жаққан ақ халатты Айнагүл Оңталапқызы қазір балалардың күнделікті хал-жағдайы мен денсаулығын жіті бақылайды. Өзінің аймағында &nbsp;Отыз екі жыл еңбек өтілі бар мейіркеш сәбилердің тілін жақсы түсінеді. Әр бөбектің көңілін тауып, мейірім шуағын төге қарайтын абзал жанға ата-аналар да дән риза.<blockquote>«Үш баланың анасымын. Аллаға шүкір деймін. Тұңғышым дүниеге келгеннен, аймақтық балалар мейіркешімен таныстық. Содан бері Айнагүл апаймен біргеміз. Үнемі үйге келіп, қал-жағдаймызды біліп отырады. Уақытылы екпелерін алып, қай күні дәрігердің тексеруінен өтетінімізді хабарлап, бәйек болады. Кез келген сәтте әрбір сұрағымызға жауап беріп, өз міндетін мүлтіксіз атқарады дей аламын. Бала ауырған соң жаныңды шүберекке түйіп, күйгелектеніп кетесің. Ондай сәттерде Айнагүл апай өзінің байыпты қалпынан танбай, сабырлы үнімен жаныңа жалау болғанда бойыңа күш-қуат дарып, жинақтала бастайсың, – дейді жас ана Гүлдана.</blockquote>Қоғам қарыштап, дүние дамып жатқан кезде білім мен біліктілікті арттырып отыру заман талабы. Бұл үдерістен Айнагүл Оңталапқызы да шет қалған емес. Ол әр кез білім жетілдру куртарына қатысып, арнайы сертификаттар иеленген. Үнемі ізденіс үстінде жүретін мейіркеш медицина саласындағы кез келген жаңалықты қалт жібермейді. Аудан, облыс басшыларынан алған «Алғыс» хаттары мен «Құрмет» грамоталары кейіпкеріміздің мерейін өсіріп, беделін биіктете түсті. Әріптестеріне сыйлы, тұрғындарға тілекші Айнагүл Жұбаныш отбасында аяулы жар, ардақты ана, асыл әже. Жолдасы Байсал Құлниязовпен үш бала тәрибелеп, өсірді.Үлкен қызы Нұргүл тұрмыста, ата-анасына ата-әже бақытын сыйлап отыр. Ұлы Нұрбол мен кенжесі Аружан анасының қолғанаты.Еңбегі ескеруге әбден лайын мейіркешті мерейлі мереке қарсаңында іздеп барып, сыр тартқанымызда: «Жұмысым ұнайды, осыдан отыз жыл бұрын «мейірбике боламын» деген арманның жетегінде солтүстікке сапар шеккен едім. Уақыт деген жүйрік ғой ширек ғасырдан астам кезеңді артқа тастаппыз. Кез келген істе керегі, мамандыққа адалдық. Медицина, оның ішінде балалардың жағдайына жауаптылық жоғары жауапкершілік жүгін артады. Әр үйде сәбидің бал қылығы мен күміс &nbsp;күлкісі естілсін. Бар тілегім балалар ауырмасын»,– &nbsp;деп сөз соңын түйіндеді.Бізбен қоштасып, емханадағы харбалас тіршілігіне еніп кеткен мейірімді мейіркештің ісіне сәттіліп тілеп, біз де көзбен көрген кешіпейілділікті қағаз бетіне түсіруге жұмыс орнымызға аяңдадық.

Міндетіне адал мейірбике

<a href="https://kyzylorda-news.kz/">Kyzylorda-news.kz.</a>&nbsp;Дәрігер деген кең ұғым, қастерлі мамандық. Бұл мамандық иелерінің жауапкершілігі де мол, атқаратын жұмыстары да ауқымды. Қызығы мен шыжығы қатар жүретін осынау маңызды салаға бүкіл өмірін арнап келе жатқан абзал жандар қаншама. Солардың бірі – аудандық аурухананың УДЗ бөлім дәрігері Нұргүл Әбітаева.Нұргүл Оралқызы – 12 жыл көлемінде медицина саласында өнімді еңбек етіп, шексіз құрметке бөленген, «Алтын дәрігер» медалінің иегері. Бір сөзбен айтқанда, нағыз адам өмірінің қорғаушысы. Ол 2009 жылы Оңтүстік Қазақстан Мемлекеттік медицина академиясын тәмамдап, сол жылдан бастап аудандық емханада жасөспірімдер дәрігері болып жұмыс істеген. Өз білімі мен біліктілігін ары қарай дамыту мақсатында 2011 жылы Алматы Мемлекеттік дәрігерлер білімін жетілдіру институтында сәулелі диагностика мамандығы бойынша білім алады.Қоғамдағы адам денсаулығын күзетіп, мемлекеттің алға жылжуына үлес қосушы бірден-бір мамандық болса осы дәрігерлер. Бұл сала тек іспен емес, сөзбен де терең тамырласып жатады. Өйткені «ақ халаттылар науқасты жартылай іспен емдесе, жартылай сөзбен емдейтіні» талассыз ақиқат. Бұған көне Иран даналығында айтылған «Дәрігердің үш қаруы бар: сөз, шөп және пышақ» дегені нағыз дәйек. Бұл жердегі сөздің бірінші орынға қойылуы тегіннен-тегін емес. Яғни «дәрігердің науқас психикасына, оның ойына, көңіл күйіне, ерік-жігеріне ықпал етуі – ең басты қаруы». Өз кезегінде білікті дәрігер Нұргүл Оралқызы да бұл қағидатты жадында ұстап, науқастармен тиісті дәрежеде сөйлесіп, қарым-қатынас құра біледі. Конфуций айтқандай «Бір сөзбен адамды дана немесе ақымақ деуге болады. Сондықтан әрбір сөзімізге абай болғанымыз жөн».12 жылдан астам еңбек өтілі бар Нұргүл Әбітаева қазіргі таңда сұранысы жоғары мамандық иесі – узист. Осындай қоғамда маңызы бар мамандықты таңдаған Нұргүл өз ісінің шебері, білгір әрі жан-жақты. Аудан медицинасының дамуына бір кісідей үлес қосып жүрген жанның жақында «УльтраНұр» УДЗ жеке кабинеті ашылды. Соңғы үлгідегі заманауи Оңтүстік Корея елінен алынған «Samsung» HS30 скайнер жасайтын аппаратымен аудан тұрғындарына өз адал қызметін көрсетуге дайын.<blockquote>«Бұл көп біліктілікті қажет ететін қызықты жұмыс. Жас мамандарға көп жылдан бері жинаған тәжірибемді үйретіп келемін. Пациенттермен сөйлесіп медициналық қызметтің олқы тұстарын анықтаймын. Заман талабына орай медициналық көмек көрсетудің сапасын арттыруға барынша үлесімді қосып жүрмін», – дейді ол.&nbsp;</blockquote>Әрине, осындай берері көп нағыз білікті маманның келешек шәкірттері де осал болмасы анық.Бағалай білген кісіге медицина мамандары тұғыры таймас биік тұлға. Жалпы медицина қызметкері болу адамға жарық сыйлау деген сөз іспетті. Сондықтан тек ісімен ғана емес жүрегімен емдей білетін Нұргүл Оралқызына абырой биігіңіз арта берсін демекпіз.

«Алтын дәрігер» медалінің иегері адам өмірінің қорғаушысы

<a href="https://kyzylorda-news.kz/">Kyzylorda-news.kz.</a> Жаңа жағдайдағы жаңашыл қоғам қалыптастыруға бағытталған Жолдауда елдегі саяси, әлеуметтік-экономикалық мәселелер қамтылып, соған орай жаңа реформалар енгізуге нақты тапсырмалар берілді.Жолдауда Президент еліміздің әлеуметтік дамуына, ел тұрғындарының табысы мен жұмыс орындарының сақталуына, халқымыздың денсаулығы мен өмірін сақтау жолындағы жұмыстарға басты назар аудару керектігіне тоқталды. Оның ішінде, денсаулық сақтау саласындағы атқарылып жатқан жұмыстарды жетілдіруге, ұлт саулығын жақсартуға қатысты негізгі міндеттерді атап көрсетті.«Ұлт саулығы жақсы болса ғана, қоғам орнықты дамитыны сөзсіз. Денсаулық сақтау саласында біраз реформа жүргізілгені мәлім. Дегенмен, оның жағдайы әлі де мәз емес. Әрине, жылдар бойы қордаланған түйткілдер бір мезетте шешілмейді» деген Мемлекет басшысы медициналық инфрақұрылымды кешенді түрде жақсартуға баса назар аудару керектігін айтты. Бұл ретте, Мемлекет басшысы медициналық қызметтің сапасын арттыруға қатысты Ұлттық жобаны жүзеге асыруға шешім қабылдап отыр. Соның нәтижесінде, елімізде медициналық мекемелері жоқ 650 ауылда медициналық және фельдшерлік-акушерлік пункттер салынып, толық жарақтандырылады. Сондай-ақ, жоба аясында 32 аудандық аурухана жаңғыртылып, ауданаралық көпсалалы мекемелер болып қайта құрылады. Бұл медициналық мекемелерде инсульт орталықтары, хирургия, реанимация және оңалту бөлімшелері де пайда болмақшы. Яғни, денсаулық сақтау саласына бағытталған осындай қолдау нәтижесінде медициналық қызметтердің сапасының арттуына айтулы мүмкіндік жасалады.Жолдауда медицина қызметкерлерін қуантқан жаңалықтардың бірі – мамандардың білімін жетілдіруге гранттардың бөлінуі. Атап айтқанда, жоғары оқу орнын бітірген медицина қызметкерлері біліктілік талаптарын аттыру үшін резидентура оқуы тиіс. Бұл олардың кәсіби деңгейін шыңдайды. Міне, осыған бөлінетін грант көлемі 70 пайызға дейін артатын болады. Осы гранттар негізінде ауданның медицина қызметкерлері біліктіліктерін арттырып, тұрғындар денсаулығын жақсартуға қызмет көрсете береді.Жалпы, бұл жолғы Мемлекет басшысының Жолдауында да ұлт саулығын жақсартуға айрықша мән берілді. Оны жүзеге асыруда аудан медицинасының мамандары бірлесе жұмыс атқара беретін боламыз.Жанар Жұмабаева, Сырдария аудандық ауруханасы бас дәрігерінің орынбасары.

650 ауылда медициналық және фельдшерлік-акушерлік пункттер салынады

<a href="https://kyzylorda-news.kz/ru">Kyzylorda-news.kz.</a> Білікті кадр – қай саланың да қарыштауының алғышарты. Облыстық денсаулық сақтау басқармасының бас дәрігері ауысқалы жақсы жаңалықтар қатары артып келеді. Сала басшысы алдымен Қызылорда облысының штаттан тыс бас мамандарын жеке қабылдап, мәселелерді тыңдады. Осыған орай, қазіргі таңда тұрғындардың арыз-шағымын азайту және оның алдын алу мақсатында тұрғындардың медициналық көмекке қанағаттану деңгейін арттыру, хирургия саласын және нефрологиялық қызметін дамыту бойынша жол карталары әзірленуде.Әкім қолдауы – дамуға жолдау2022 жылы атқарылған жұмыстар мен 2023 жылға алға қойған мақсаттарды талқылау барысында барлық медицина ұйымдарының бас дәрігерлерін жеке қабылдап, тыңдады. Тыңдаулар нәтижесінде Қызылорда облысы тұрғындарына көрсетілетін медициналық көмекті жетілдіру мақсатында 2023-2028 жылдарға арналған стратегиялық даму жоспары әзірленуде.Созылмалы бүйрек жетіспеушілігі бар науқастарға көрсетілетін медициналық көмекті талдау мақсатында «B.B.NURA» және «DIAVERUM» амбулаторлы гемодиализ орталықтарының басшылары, мемлекеттік органдар және МӘМСҚ КЕАҚ филиалы өкілдірімен бірге аталған орталықтар тарапынан бүйрек жетіспеушілігі бар науқастарға медициналық көмек сапасын жақсарту және анықталған кемшіліктерді жоюға 1 шілдеге дейін уақыт берілді.&nbsp;Облыстағы бүйрегі ауыстырылған тұрғындар қанындағы такролимус концентрациясын анықтау мақсатында «Облыстық қан орталығы» ШЖҚ КМК-нда такролимус концентрациясын анықтайтын аппаратқа реагент және «Орталық қалалық емханасы» ШЖҚ КМК-на иммунохимиялық анализатор аппаратын сатып алу жұмыстарын үйлестіріп, ағымдағы жылдың мамыр айының ортасында аталған қондырғы іске қосылатын болады.Алматы және Жамбыл облыстарындағы (Еңбекші қазақ және Мерке аудандарында) үздік практика орталықтарының тәжірибесін енгізу мақсатында Шиелі ауданаралық ауруханасы және №6 қалалық емханасы мамандарын тәжірибе алмасу және озық тәжірибені тиімді енгізу үшін мамыр айында облыс мамандарын жолдау министрлікпен пысықталды.&nbsp;Республикалық және жергілікті бюджеттен алынатын медициналық құрал жабдықтардың тізімі қайта қаралып, аймақ басшысы айқындаған даму бағыттарына сәйкес қайта өзектендірілді.&nbsp;Облыс әкімінің қолдауымен: 1. облыстық перинаталдық орталығының жүктемесін азайту мақсатында көпбейінді облыстық ауруханасының жанынан 70 төсектік перинаталдық орталығы; 2. 150 төсекке арналған көпбейінді қалалық балалар ауруханасы; 3. Қызылорда қаласында 0-3 жас аралығындағы балдарға ерте араласу орталығы; 4. Арал ауданынан балаларға арналған ауданаралық оңалту орталығын құру жоспарланып отыр.Бүгінгі күнге дейін тар буынды дәрігер мамандарды дайындауға облыс әкімінің 20 гранты бөлінсе, биыл 30 грант бөлініп, облысқа аса қажетті мамандар тізімі жасақталды.&nbsp;Ана мен бала денсаулығын қорғау басты мақсатымыз екенін ескеріп, 2023 жылға біліктілікті арттыруға жергілікті бюджет қаражаты есебінен дәрігерлерге 18 тақырып, орта буын қызметкерлеріне 22 тақырып бойынша оқыту жоспарланды.&nbsp;Медицинаның бағыты сан түрлі. Мәселен, бір ғана айда Н.Д.Батпенов атындағы травматология ғылыми орталығының жоғары санатты травматолог ортопед дәрігері облыс тұрындарына күрделі 8 ота жасаса (оның ішінде 3–і бала), облыстық көпбейінді балалар ауруханасының базасында ҚР ДСМ-нің бас балалар ревматологі Мукушева Зәуре Серикпаевна «Балалар жасындағы аутоиммунды патологияны ерте диагностикалау» тақырыбында ЖТД, ревматолог, педиатр мамандарына семинар өткізіліп, 46 науқасқа кеңес берілумен қатар, 4 балаға буынішілік глюкокортикоидттардың енгізілу тәжірибесін көрсетті.&nbsp;ҚР ДСМ-нің бас неонатальды хирургы Асылжан Абубакирович «Туабітті өт шығару жолдарының даму ақауы», «Туабітті асқазан ішек жолдарының даму ақауы» тақырыптарында мастер класс өткізген. Алдағы уақытта да бұл бағыттағы жұмыстар жалғасын таппақ. Осы орайда барлық республикалық орталықтарға басқармамен тиісті сұраныс хаттары жіберілген.Сәуір айындағы кезекті сессия отырысында орфанды сирек кездесетін ауру түрлерімен сырқаттанатын облыс тұрғындарына жергілікті бюджеттен қосымша 100 млн теңгеге қаражат бөлінді. Одан бөлек басқармамен «Қазақстан Халқына» қорынан 34 млн. теңгеге 3 науқасты керекті «Цинрайз», «Рисдиплам» препараттармен қамтамасыз ету үшін сұраныс беріліп, қолдау тапты. Басқарма басшысының жеке қабылдауында 59 азаматтың мәселесі қаралса, соның ішінде 58 жеке тұлғадан, 1 заңды тұлғадан &nbsp;өтініш келіп түсті. Осы өтініштердің 37-сі оң шешімін тауып, 12-сі заң аясында түсіндірілген.Ауданда медициналық қызмет қаншалықты жолға қойылған?Денсаулық сақтау басқармасының басшысы Олжас Ермекұлының медициналық ұйымдар жұмысымен танысу сапары Қазалы ауданында жалғасты. Аймақтың бас дәрігері алдымен «Бозкөл» дәрігерлік амбулаториясын араласа, одан әрі «Абай», «Шипагер» дәрігерлік амбулаториясы, «Жетес би» емханасы, жедел жәрдем стансасы, Қазалы аудандық көпбейінді орталық ауруханасы, жаңа емхана жұмысымен және Қазалы теміржол ауруханасы, «DIAVERUM» гемодиализ орталығының жұмысымен танысып, медицина қызметкерлерімен пікірлесті.&nbsp;Медицина мекемелері жұмысымен танысқан өңір бас дәрігері халыққа әрдайым сапалы әрі медициналық қызмет көрсету басты мақсат екендігін айта келе, көңіл аударатын тұстарға тиісті тапсырмаларын беріп өтті.&nbsp;Басқарма басшысы сонымен қатар, тұрғындар ұсыныс-пікірлерін тыңдау мақсатында халық арасында қоғамдық қабылдау өткізді. Онда тұрғындар медициналық кеңестерге жүгінді. Өз кезегінде Олжас Ермекұлы айтылған өтініштердің шешу жолдарын қарастырып, тұшымды мағлұматтар беріп өтті.Кездесу соңында қоғамдық қабылдауға келгендер қатары аймақтың бас дәрігеріне ризашылықтарын білдіріп тарқасты.&nbsp;Аталған саладағы тың серпілістер санға да, сапаға да қатар әсер етуде. Облыс тұрғындарының денсаулығын жақсарту және сапалы медициналық қызмет көрсету деңгейін жоғарылату мақсатында өңірде 18 аурухана мен 26 амбулаториялық емхана жұмыс істейді. Ал ауыл тұрғындарын қажетті медициналық қызметтермен қамтамасыз ету мақсатында аудан орталықтарында 9 аурухана мен аудандық емхана, 100 дәрігерлік амбулатория, 24 фельдшерлік акушерлік мекеме, 97 медициналық бекет қызмет көрсетеді. Бұдан бөлек, аса ауыр жағдайдағы науқастарға берілетін тегін медициналық жолдама саны да жыл сайын артып келеді. Бұл квота автоматтандырылған түрде тағайындалып, әрі қарай азаматтарды емдеуге дейінгі бақылауды жіберген медициналық ұйым жүзеге асырады. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шайымбетов мәлімдеді.<blockquote>«Егер науқас шұғыл көмекті қажет ететін болса дәрігерге дейінгі тексеруден өтіп, қажет болған жағдайда стационарлық емге жедел түрде жіберіледі. Ал науқас белгілі бір шағымдармен немесе созылмалы аурулардың асқыну жағдайында аймақтық дәрігерге жүгінетін болса лезде диагностикалық және емдеу әдістерінің клиникалық хаттамаларына сәйкес, медициналық жолдама тағайындалады. Керек жағдайда тар буынды мамандар кеңесіне жолданып, олардың ұсыныстарымен ем-дом қабылданады. Ал егер емделушінің тексеріс қорытындыларынан нәтиже болмаған жағдайда аймақтық дәрігер науқастың диагнозын нақтылау мақсатында республиклық деңгейдегі стационарларға жолдайды. Науқасты жоспарлы емдеуге жатқызу үшін өзі қалаған денсаулық сақтау ұйымы туралы ескеріледі. Жалпы емделуші жолдама арқылы тегін медициналық көмектің алдында 10 күн бұрын толық тексерістен өткізіледі», – деді басқарма басшысының орынбасары Жангелді Мырзагелдіұлы.&nbsp;</blockquote>Брифинг барысында облыстық және қалалық көп бейінді аурухананың дәрігер мамандары аталмыш ұйымның атқарған жалпы жұмыстарына тоқталып өтті.<blockquote>– Көпбейінді облыстық аурухана аймақ тұрғындарына жоғары мамандандырылған медициналық көмек көрсетеді. Біздің ауруханада 525 тәуліктік төсек-орынмен қамтылған. Сондай-ақ, орталықта 200-ден астам білікті мамандар жедел түрде жеткізілген науқастарға сапалы медициналық қызмет көрсетуде. Біздің мекемеде жалпы хирургия, урология, терапия, кардиология, нейрохирургия және т.б бөлімдер жұмыс істейді. Бұдан бөлек, біздің дәрігер мамандар өз білімдерін жетілдіріп отыруы үшін алыс-жақын шет елдерге барып, біліктілігін жоғарылатып отырады. Қазіргі таңда біз заманауи медицналық әдіс-тәсілдер арқылы омыртқа жотасына ота жасауды жоспарлап отырмыз, – деді көпбейінді облыстық аурухананың бас дәрігері Нұриддин Амитов.</blockquote><blockquote>– Көпбейінді қалалық аурухана 4 мыңнан астам тұрғынды жедел және жоспарлы көмек көрсетуге қауқарлы. Оның ішінде 205 тәуліктік стационар және көп функцияналды 30 төсек-орын қамтылған. Бұдан бөлек, 24 ақылы бөлім бар. Қазіргі таңда ауруханамызда кардиология, терапия, гинекология, және т.б бөлімдер қала тұрғындарына қызмет етеді.&nbsp;Сондай-ақ, біздің орталықта хирургиялық күрделі оталар жасалып, жоғары сапалы медициналық көмектер көрсетіліп келеді. Алдағы уақытта орталығымызда лор бөлімшесін ашуды жоспарлап отырмыз, – деді көпбейінді қалалық аурухана бас дәрігерінің орынбасары Қадырбек Алипов.</blockquote>

Өңірдің денсаулық сақтау саласында серпін көп

<a href="https://kyzylorda-news.kz/">Kyzylorda-news.kz.</a> Дәрігер – адам жаны мен тәнінің шипагері. Ақ халат кию мойныңа қаншама жауапкершілік жүктейді. Бұл жерде жүрек тазалығы мен мейірімділік аса қажет. &nbsp;Егер бойыңда осындай жақсы қасиеттер болмаса, мамандықты дұрыс таңдамасаң, көңілің ақ, жүрегің мейірім мен шуаққа толы болмаса, &nbsp;қанша жерден бұл мамандықты игергеніңмен, жоғары жетістік пен сәттілікке жете алмайсың. Бұл – біздің бүгінгі кейіпкеріміз қаладағы № 6 емхананың бас дәрігері Жаннат Қожарипованың пікірі.&nbsp;Шынында, &nbsp;дәрігердің өмір жолына қарап, оның өте еңбекқор, өзіне де, өзгеге де талап қоя алатын білгір басшы екендігін жазбай танисың.&nbsp;Жаннат Шайхысламқызы Қожарипова 1968 жылы 7 қазанда Қызылорда қаласында дүниеге келген. Батыржан Шалғынбаев атындағы №217 орта мектепті бітірген соң 1986-1992 жылдар аралығында Ақтөбе мемлекеттік медицина институтын бітіреді. &nbsp;Алғашқы еңбек жолын №1 перзентханадан бастайды. Емдеу орнында 1992-1994 жылға дейін дәрігер болып жұмыс істеп, интернатурадан өтеді. 1995 жылдан 2002 жылдар аралығында №2 қалалық емханасында акушер-гинеколог қызметінде, 2002-2004 жылдары облыстық медицина орталығында дәрігер болады. 2004-2013 жылдар аралығында қалалық әйелдер консультациясының бас дәрігері, 2013 жылы облыстық перинаталдық орталығының бас дәрігері болып тағайындалады. Мұнан соң 2013-2014 жылдары «Интертич» клиникасы бас директорының орынбасары, 2014 жылдың қаңтарынан желтоқсан айына дейін облыстық денсаулық сақтау басқармасының ана мен бала ісі жөніндегі орынбасары, 2014 жылдан 2015 жылға дейін облыстық инфекциялық ауруханасының бас дәрігері, 2015-2017 жыл аралығында облыстық денсаулық сақтау басқармасының ана мен бала ісі жөніндегі орынбасары болып, абыройлы қызмет атқарады. 2017 жылдан бүгінгі күнге дейін №6 емхананың бас дәрігері қызметінде.&nbsp;<blockquote>«Дәрігер – &nbsp;деген мен үшін ең құрметті атақ. Мансап, қызметтен жоғары адамгершілік, адалдық деген ұғым бар. Өмір жолымда мені жетелеп келген ата-анамнан берілген осынау ұғымдар. Дәрігер болу үшін тер төгіп, тәуліктің 24 сағатында да жаныңды аямай, ұйқысыз түнді өткіздік. Басқа мамандық иелері жұмыс орнынан шыққанда бүкіл жұмыс барысындағы күйзелісті жұмыс бөлмесіне тастап кетеді. Ал біз, біздің әріптестеріміз жұмыстың проблемасын үйге алып келіп, науқасты үйде де уайымдап, жаның жай таппай қиналасың. Бізде сенбі, жексенбі деген болмайды. Аяқ астынан шақыру түссе түн мезгілінде шақыртуға барып, үздіксіз жұмыс істеп, әскерилер секілді қырағылық көрсетеміз. Оның үстіне маған еңбек жолымда жауапкершілік артып, түрлі қызметтің тұтқасын ұстатты. Халық алдындағы жауапкершілік, ұжым алдындағы абырой &nbsp;үнемі маған қажымас қайрат, талмас қанат береді. Осы мамандықты таңдағаныма еш өкінбеймін. Себебі мен өз мамандығымды шексіз сүйемін. Сондықтан барлық ауыртпалық пен қиындығын мойымай көтеремін», – дейді бас дәрігер.&nbsp;</blockquote>Шынында дәрігер болу жүректің батырлығы мен шексіз шыдамдылық пен сабырлы болуды талап етеді. Жаннат Шайхысламқызы – өз мамандығының білгірі. Ерен еңбегі еленіп, алған марапаты да еңбегінің жемісі деп білеміз.2006 жылы денсаулық сақтау министрінің Алғыс хатымен, 2008 жылы денсаулық сақтау министрінің құрмет грамотасымен, 2021 жылы «Халық алғысы» медалімен, сол жылы «Шапағат» медалімен марапатталған. Отбасылы, бүгінде үш бала тәрбиелеп отырған абзал ана.&nbsp; Қазақта кәсіп таңдауда қателеспеу керек деген сөз бар. Жаннат Қожарипова кәсібіне адал, қол астындағы қызметкерлерге сыйлы, халқына қалаулы жан. Үлкен жүректі дәрігерге деген елдің риясыз ықыласы &nbsp;да &nbsp;өміріне шуақ сыйлайды. Елдің ақ батасын арқалаған жанға біз де табыс тілейміз!

Жаннат Қожарипова: Дәрігер –  деген мен үшін ең құрметті атақ

<a href="https://kyzylorda-news.kz/">Kyzylorda-news.kz.</a> Бүгінде МӘМС жүйесіне сақтандырылған өңір халқының үлесі 84,2 пайызды құрады. Сәйкесінше, әлеуметтік осал санаттағы азаматтардың тегін медициналық қызмет алу көрсеткіші 5 есеге ұлғайып, оңалту қызметтерінің қолжетімділігі айтарлықтай артқан. Бұл туралы Өңірлік коммуникациялар қызметінің ақпарат алаңында өткен брифингте «Әлеуметтік медициналық сақтандыру қоры» КЕАҚ Қызылорда облысы бойынша филиалы директорының орынбасары Жұпар Алхожаева хабарлады.<blockquote>«МӘМС жүйесінің бір артықшылығы – азаматтар кез келген емханалар мен дәрігерлерді еркін таңдауға толық мүмкіндігі бар. Сондай-ақ, осы қызмет арқылы Әлеуметтік медициналық сақтандыру қорымен келісімшартқа отырған жеке меншік клиникаларға да тегін тіркеле алады. Жалпы облысымызда былтырғы жылмен салыстырғанда сақтандырылмаған азаматтар саны 3,3 пайызға азайған. Бұл МӘМС жүйесінің оңтайлы қызмет көрсетуінің дәлелі десек болады. Соңғы 3 жылда зертханалық талдаулардың және аспаптық диагностиканың қолжетімділігі 5 есеге артты. Сонымен қатар МӘМС жүйесі арқылы КТ мен МРТ көмегін алу біршама жеңілдетіліп, 47,8 мың қызметті құрады. Ал ересек пациенттерге жүрек-қан тамырлары, неврологиялық, онкологиялық аурулар мен жарақаттар кезінде медициналық оңалту қызметін алу екі есеге өсті. МӘМС жүйесінің тағы бір артықшылығы - &nbsp;халықтың тегін дәрі-дәрмекпен қамтылуы болып табылады. &nbsp;Осы арқылы облыста 600 мыңнан астам адам аталмыш қызметтің көмегіне ие болады. Елімізде Әлеуметтік медициналық сақтандыру қоры бойынша жұмыс істейтін медициналық қызмет көрсетушілер саны екі мыңға дейін өссе, Қызылорда облысында 107-ге дейін жоғарылады. Бұл өсім жеке клиникалардың есебінен болды. Бұл сапалы медициналық қызметтер өңір халқының денсаулығына оң әсерін тигізуде деп білемін», - деді Жұпар Алтынбекқызы.</blockquote>

Қызылордалықтардың 84,2 пайызы МӘМС жүйесінде сақтандырылған

ҚР Денсаулық сақтау бірінші вице-министрі Қызылорда облысына іссапармен келді

<a href="https://kyzylorda-news.kz/">Kyzylorda-news.kz.</a>&nbsp;Көкіректегі үміт отын алаулатып, қатарынан кем қалдырмай, алға сүйрейтін, алға сүйрегенде де алысқа жетелейтін адамның жүрегіндегі жігер-ау, сірә! Тіршіліктің түйінін уысынан шығармай, алдынан сара жолды ашатын да осы жігер. Иә, осындай жігітке тән жігерлілікті Ақжан Оразмаханның өн бойынан кезіктіруге болады.Істің көзін тауып, шаруасын оңқай асықтай үйіріп отырған кәсіпкердің қарақан басының қамын ғана ойламай, қалың ормандай шиеліліктердің әлеуметтік-тұрмыстық жайы мен денсаулығына көңіл аударып, қолынан келгенінше көмек көрсетуі азаматтық. Кейіпкеріміз осыдан 8 жыл бұрын Шанхайдан алғаш болып дәріхана ашып, кәсібін бастайды.Жол түсіп менде «Ақжан» дәріханасына бас сұқтым. Мұнтаздай тап-таза бөлме, жинақы сөрелер, реттілікпен орналастырылған дәрі-дәрмектер бір-бірімен үйлесіп-ақ тұр. Қала берді мұнда келушілерге толық жағдай жасалған. Арнайы ине егу бөлмесі де бар. Сәлемімді қабыл алған Ақжан келген мақсатымды білген сәтте бірден ағынан жарылды. Әңгіменің ауанынан байқағаным, жас кәсіпкердің дәріхана ашамын деген арман-мақсаты бала күнгі арманы. Нәтижесінде отбасымен бірге дәріхана ашты. Бүгінде кәсібін дөңгелетіп, 3 адамды жұмыспен қамтып отыр. Ақжанның негізгі мамандығы да – фармацевт.<blockquote>«Аудан тұрғындары ризашылықтарын білдіріп, алғаусыз алғыстарын айтуда. Әр келген тұтынушыға қажет болған дәріні тауып беруге тырысамыз. Жоқ болып қалған жағдайда дереу тапсырыс беріп, алдырамыз. Дәрілер келісімшарт арқылы еліміздің Қызылорда мен Шымкент қалаларынан жеткізіледі», – дейді Ақжан Оразмахан.</blockquote>Жас кәсіп иесінің ендігі мақсаты – дәрі-дәрмек түрін молайтып, кезек күттірмейтін күндізгі стационар ашу. Халыққа қолдан келгенше қалтқысыз қызмет етуге әзір. «Батаменен ел көгерер» деген тәмсілді ұстанған ол адамнан алған алғыс, кәсіптің берекесін артырарына бек сенімді.

Қазақстан және Қызылорда облысының жаңалықтары: Денсаулық