<a href="https://kyzylorda-news.kz/">Kyzylorda-news.kz</a> Қызылордадағы «Aray City Mall» сауда, ойын-сауық орталығының ашылғанына – 5 жыл. Шаһардың сәулетіне сән қосқан ғимараттың басқа сауда орындарынан ерекшелігі неде? Кәсіпкерлік нысан саланың дамуына қаншалықты ықпал етті?<h2 style="text-align:justify;">Әлемдік брендтердің «басын қосты»</h2>«Aray City Mall» ойын-сауық орталығының құрылысы 2016 жылы басталып, 2018 жылы ел игілігіне берілді. Орталықтың аумағы – 30 мың шаршы метр. Осы кезге дейін сауда орны 15 миллионға жуық адамға қызмет көрсетті. Сауда жасауға әрі демалуға арналған орталықтың ашылуы қала тұрғындарын қуантқан елеулі жаңалық болды. Осылайша брендтік өнімді ұнататындар үшін Қызылордада таңдау жасау мүмкіндігі туындады. Бұрын Алматы, Астана, Шымкент секілді мегаполистерге қызығудың бір себебі ірі сауда орындарының болуында еді. «Aray City Mall»-да еліміздегі ең ірі гипермаркет сауда желісінің бірі «Magnum Cash&amp;Carry» 2018 жылы ашылды. 2019 жылы ғана «Aray City Mall» толықтай жұмысын бастады. Тәулік бойы қызмет ететін «Magnum» сауда желісінің ең үлкені Алматы қаласында, көлемі 11 мың шаршы метр болса, одан кейінгісі (8 мың шаршы метр) Қызылордадағы филиалы. Мұндағы дәріхана да келушілерге 24 сағат бойы қызмет көрсетеді. Ал, екінші қабатта соңғы үлгідегі заманауи технологиямен жабдықталған 8 залы бар Қазақстандағы кино желісінің бірінші нөмірлі операторы Kinoplexx орналасқан. Кинотеатрдың кең залы, жайлы орындықтар, қызықты кино тізімі жастардың «Aray City Mall»-ға жол тартуына негізгі себеп болып тұр. Сондай-ақ орталықта әлемдік деңгейдегі «LC Waikiki», «Flo», «Детский Мир», «Спорт Мастер», «O’stin», «Kari» брендтерінің дүкендері бар. «Бургерлердің атасы» делінетін америкалық Burger King-те осында орналасқан. Иә, екінші қабаттың көп бөлігін, фуд-корт тамақтану алаңы алып жатыр. Мұнда еліміздегі әйгілі фудбрендтер дәмді және тез дайындалатын тағамдар ұсынады. Ал отбасылы жандардың да мұнда жиі келуінің басты себебі – кішкентайларға қызық ойын алаңы «Funky town» болып тұр. Сонымен, «Aray City Mall» – бірқатар әлемдік брендті бір нысанға жинаған Қызылордадағы ең ауқымды сауда орны.<h2 style="text-align:justify;">Жергілікті кәсіпкерлерге қолдау бар</h2>Орталық 2019 жылы жұмысын 50-ге жуық кәсіпкермен бастады. Бүгінде олардың саны 120-дан асты.<blockquote>– Бұл көрсеткіш кәсіпкерлерге жайлы орталық болғанымыздың дәлелі. Сауда орнын сұрап, Ресейден, Астана, Алматы қалаларынан хабарласатын кәсіпкерлер бар. Бірақ біз бірінші кезекте жергілікті кәсіпкерлердің сұранысына басымдық береміз. Өйткені бизнес бастаған қызылордалықтар кәсібін дамытса екен деген ниетіміз бар. Жалпы серіктестерімізге уақытылы қызмет көрсету, халықпен мәдениетті жұмыс істеу, имиджге нұқсан келтірмеу турасында талап қоямыз, – деді орталықтағы «Қоғаммен байланыс» бөлімінің басшысы Ерболат Тұрсынқожа.</blockquote>Бізге әсіресе «жергілікті кәсіпкерлердің ұсынысына бейқам қарамаймыз» дегені ұнады. Себебі, қызылордалықтар кәсібін «Aray City Mall»-да бастап, әрі қарай танылып, жеке орталық ашып жатса, қаладағы кәсіпкерліктің дамуына бұл да бір қолдау болмақ.<h2 style="text-align:justify;">Қоғамдық орын мәдениетті қалыптастыруда</h2>Мұндай ауқымды сауда, ойын-сауық орталықтарының әр қалада болуы маңызды. Адамдар жиі бас қосатын қоғамдық орын қала мәдениетіне де едәуір ықпал етеді. Әртүрлі әлеуметтік топтағы тұрғындар мен қала қонақтары жиналатындықтан, бір-біріне қарап ой түйетіні, талғам қалыптастыратыны рас. Айта кетерлігі, мұнда мезгіл сайын атриумдағы декорация өзгереді.<blockquote>– Әр мерекеге сай интерьерді ғана емес, ішкі музыканы да өзгертіп қоямыз. Әдемілікпен қатар мағыналы әуен де адамдарға рухани тұрғыда әсер етеді. Әсіресе, жанымызға жақыны – 22 наурыз мерекесі. Ұлыстың ұлы күнінде бауырсақ пісіріп, концерт ұйымдастырып, барлық қызметкер қазақы нақыштағы киім киіп, күллі Шығыс жұртына ортақ мерекені ерекше атап өтеміз. Көпшілік жиналатын орын болғасын әр мерекенің өзгеше форматта өтуін алдын-ала ойластырамыз. Сондай-ақ қала әкімдігі, «Қоғамдық келісім» КММ, орталық музей, оқу орындарымен тығыз байланыс орнатып, бірлескен жұмыстар атқарудамыз. Қала тұрғындары үшін пайдалы әрі қызықты іс-шаралардың ұйымдастырылуына, көпшіліктің жиналуына қолдау білдіру маңызды, – деді Ерболат Тұрсынқожа.</blockquote>Бір қарағанда, тек сауда-саттыққа бағытталған нысан көрінгенімен, мұндай орталықтардың экономикалық жағдайға, тұрғындардың мәдени дамуына қосар үлесі зор. «Aray City Mall» туралы жазу барысында осындай ойға келдік. Сондықтан сауда орны басшылығының санды ғана емес, ұлттық сана мен сапаны алдыңғы орынға қоятыны қуантты. &nbsp;

Қызылордадағы ең ауқымды сауда орны

<a href="https://kyzylorda-news.kz/">Kyzylorda-news.kz</a>&nbsp; «Ұстазы жақсының, ұстамы жақсы» деген тәмсілді берік ұстанған мұғалімнің еңбегі қашанда еш кетпесі анық. Сырдария ауданында білімнің қарашаңырағы саналатын №35 Иса Тоқтыбаев атындағы мектеп-лицейдегі болашақ жас ғалымдардың жол бастаушысына айналған ұлағатты ұстаздың бірі – Жанар Жаңабаева. Әркез білім сапасын арттырып, оқушының өмірден өзіндік орнын табуына себепкер атанатын аяулы жан – физика пәнінің мұғалімі.Бүгінде мектеп бітіруші түлектердің басым бөлігі физика пәнін таңдауында үлкен мән жатыр. Себебі, қоғам өмірінде кездесетін мамандықтар атласында физика пәнімен байланысты қызметтің түрі жеткілікті. Ғылыми тұрғыдан зерттеуді қажет ететін аталған саланың қыр-сырына қанығып келе жатқан зейінді шәкіртінің сүйікті ұстазы нақты ғылымға негізделген білімге сүйенеді. Осы уақытқа дейін оның жекелеген бірнеше оқушысы үлкенді-кішілі білім бәсекесінде топ жарып келеді. Үнемі білім алушысына ерекше шабытпен сабақ беретін Жанар Алтынбекқызы тынбай ізденудің арқасында педагог-сарапшы біліктілігін сәтті қорғаған. Жанар Жаңабаева 10 жылдан аса уақытта іргелі білім ошағында қызмет етіп келеді.<blockquote>– Менің физика пәнінің мұғалімі атануыма ұстазым Нұрбек Қожамжаровтың ықпалы мен ықыласы зор болды. Өзім Қазалы ауданының тумасымын. Туған жердегі №70 Жанқожа батыр атындағы орта мектептің табалдырығын аттадым. Негізгі мамандығым бойынша Арқалық қаласындағы Ыбырай Алтынсарин атындағы мемлекеттік педагогикалық институтында білімімді жетілдірдім. 2013 жылы жолдасым Айбек Сәдуақасовпен отау құрып, Тереңөзектегі өсіп-өнген әулеттің келіні атандым. Отбасымда 4 ағайындымыз. Інім Қонысбек те білім саласының маманы. Бүгінде шағын мемлекетімізде үш перзент тәрбиелеп отырмыз, – дейді аяулы жан.</blockquote>Күн сайын көптеген өзгеріске ұшырайтын білім саласында ізденіссіз бір орында тоқтап қалу – ұстаз үшін кешірілмейтін дүние. Педагогикалық этикадан бастап, білім деңгейін жоғарылатып отыруға әрбір мұғалім мүдделі. Осы кезге дейін бірнеше бітіруші түлекке бағыт-бағдар берген Жанар Алтынбекқызының шәкірттері жоғары оқу орындарының грант иесі атануда. Тәжірибесі толысқан, аға буын өкілдерінен тәлім алған білімі жоғары маман көптеген байқаулардың жеңімпазы. Ол – өткен жылы аудандық «Үздік физика пәні мұғалімі – 2023» байқауынан ІІІ орын, «Рухани жаңғыру» ақпараттық-сараптамалық орталығы» «Үздік педагогикалық мақала» республикалық байқауының «Үздік сабақ жоспары» номинациясы бойынша I дәрежелі, Қызылорда облысы бойынша физика пәні ұстаздары арасындағы «UST.KZ» олимпиадасының I дәрежелі дип­лом иегері атанды. Сонымен қатар оның жемісті еңбегінің өлшемі оқушыларының республикалық деңгейдегі біршама білім бәсекесінен топ жаруы болып табылады.<blockquote>– Физика – табиғат туралы ғылым. Осы күні соңғы 10 жылдықта қалыптасқан білім жүйесін салыстыруға келмейді. Баланың қабілетін дамыту үшін сан алуан жаңалық орын алуда. Заман ағымына ілесу үшін барынша еңбектеніп келеміз. Әр жылдары 1 сыныптан 8-9 бала физика пәнін таңдайды. Өткен жылы ҰБТ-да физика пәні бойынша 45 балл болса, алдағы сынақта оқушылар таңдау пәнінен 50 сұраққа жауап беруі тиіс болады. Әріптесім Әлия Жүсіпова екеуміз оқушыларға физика пәнінен дәріс береміз. Кез келген мұғалімнің білім деңгейі қол жеткізген жетістігімен сараланатындығы сөзсіз. Сондықтан біз тынбай балаларды ғылыми жобаларға, олимпиадаларға дайындаймыз. Мықты, сауаттылығы басым оқушылар қай жерде болсын өз шеберлігін байқата біледі. «Ұлы өнертапқыштыққа алғашқы қадам» атты инновациялық идеялар байқауының кезеңінен Нұрбек Әбіласан І орынды иеленді. Жалпы білім беретін пәндер бойынша республикалық олимпиаданың ІІ кезеңінде бірнеше оқушым бақ сынап, жүлделі орындардан көрінді. «JAS DARYN» зияткерлік байқауының физика пәні бойынша Элеонора Нұрланқызы жеңімпаз атанды. Сонымен қатар республикалық «Зерде» ғылыми жобасының аудандық кезеңінен Ақерке Шерімқожа ІІ орын, жалпы білім беретін пәндер бойынша республикалық зерттеу жобалар конкурсы бойынша аудандық және облыстық кезеңде Зере Мұхтар І орынды еншіледі. Мұндай жетістіктер шығармашыл ұстаздың жұмысына серпін беретіні анық, – дейді білікті ұстаз.</blockquote>№35 Иса Тоқтыбаев атындағы мектеп-лицейінде нар тұлғалы қаншама дарабоз еңбек еткен.&nbsp;Жанар секілді жас ұстаздар олардың нақ ізбасары екені даусыз.&nbsp;

Сырдариялық ұстаздың шәкірттері ауқымды жобалардың жеңімпазы атануда

<a href="https://kyzylorda-news.kz/">Kyzylorda-news.kz</a> Жас өреннің өркениет биігіне өрлеуі үшін сапалы білім керегі айдан анық. Бұл мақсатта том-том кітапта толған теорияның емес, тақырыпқа сай тәжірибе жүргізу мен практиканың да маңызы зор. Әлбетте, мұндайда мектептің заман талабына сай жабдықталғаны ләзім. Оқушының ынтасы мен ықыласын білімге бұру үшін қабілетін танып, зейінін зерделеген дұрыс. Сайып келгенде, кіл талантты мен дарындының кіндік қаны ауылда тамады. Демек шалғай орналасқан аудан мен ауыл мектебіне тиісті деңгейде көңіл бөлу толымды істің айғағы. Осы ретте Жаңақорған жағымды жаңалығымен қуантты. Жабдықталған тірек мектебіне ата-ана мен оқушы да дән риза. Біз де қуанышты күннің куәгері болып қайттық.Аудандағы №286 мектеп Білім беру саласын тұрақты дамыту қоры, Назарбев зияткерлік мектептері мен «Қазақстан халқына» қоры қолдауымен 26 жаңа негізгі пәндік және 10 қосымша білім беруге арналған кабинетімен жаңартылды. Бұл нағыз мүмкіндік мекені іспетті. Баланың бейіміне қарай түрлі техника орнатылған. Яғни, STEM-лабораториялар, робототехника мен арнайы арт-студия, киностудия да бар. Ал, қолға түсе бермейтін кітаптар мен жаза мазмұндағы шетел аудармалары жайлы әңгіме бөлек. Жалпы мектепте 535 оқушы білім алуда. Сондай-ақ, 42 педагог бар. Әрбір мұғалім біліктілік санатынан өткен.Бала жанының бағбанына айналған ұстаздар қауымы да тың тәсілмен сабақ беруде. Физика және химия пәніндегі эксперименттік жұмыстар соған дәлел. Оқушының шеберлігін шыңдап, ой-ақылын нығайта түсетін тиімді тетік деуге әбден болады. Әсте, оқушының қағиданы қаперде сақтап, ережені ескеруі екіталай. Сондықтан тақырыпты түйсіну үшін теорияны практикамен ұштастыру пайдалы.<blockquote>– Физика пәнінің кабинетіне жабдықтарды тапсырыс беруге қатыстым. Енді мектеп бағдарламасына енген барлық тәжірибелерді жасауға мүмкіндігіміз бар. Мәселен, Roqed панельдер мен Энштейн лабораториясымен математикалық маятник тербелісі мен формуласын іс-жүзінде көрсете аламыз. Бұл – бір ғана мысал. Яғни, балаларға түсіндіруіміз де жеңілдеді, оқушылар да жылдам қағып алады, – дейді Ақмарал Садырқызы.</blockquote>Кейде миды тынықтырып, сананы серпілтудің де оң әсері бар. Өйткені оқуға деген құлшыныс төмендеп, зер салуда зерігу пайда болуы бек мүмкін. Осы орайда шығармашылыққа көп көңіл бөлінгендігі қуантты. Яғни қолөнер, сурет, музыка шығармашылығымен еркін айналысуға мұрсат та, мүмкіндік те қарастырылған. Үйірмеден үйренері көп оқушылар өз әлемінде жүргендей сезілді. Аса тиянақты салынған бейне, жасалған құмыра, аспаптармен ойналған орындау соны аңғартты. – Қыш құмыра жасағанды ұнататыным рас. Ауданда құмыра жасайтын орталық болмаған соң, қалаға барғым келіп жүрген. Мектебімізде осындай жағдай жасалып, құмыраға арналған құрылғы келгеніне қуаныштымын. Бүгінде үш құмыра жасап үлгердім. Негізі мұғалім мамандығын таңдаймын. Бірақ қыш құмыраны екінші кәсіп ретінде қатар алып жүру ойымда бар, – деді 11-сынып оқушысы Жібек Келдіғұлова.<blockquote>– Мектеп жанынан құрылған «Балбырауын» домбыра үйірмесінің жұмысы жандануда. Өскелең ұрпақтың өнерін қолдап, үйірме ісіне өң берген мектеп басшылығының үлесі зор. Бүгінде үйірмеде 10-15 жас аралығындағы балалар қатысуда. Сондай-ақ, жоба аясында үйірме 12 домбыра аспабымен қамтамасыз етілді. Балаларға «Балбырауын», «Халық», «Тепеңкөк», «Келіншек» күйі үйретілді. Бұл көрсетілген қолдаудың нәтижесі деп білемін, – деді үйірме жетекшісі Гүлжан Шерубаева.</blockquote>Сонымен, мектептің материалдық-техникалық базасын жаңартуға қолдау көрсеткен «Қазақстан халқына» қоры. Кемел келешектің кепілі мен кілті білімде болғандықтан игі істердің басы-қасында жүр.<blockquote>– «Ауылдық аймақтардағы тірек мектептердің әлеуетін дамыту» жобасы білім беру кеңестігі мен үдерісіне жаңа әдістерді әкеліп, ауыл баласының жоғары деңгейде білім алып, біліктілігін қалыптастыруға бағытталған. Былтыр Аралдағы мектепті жаңарттық. Жаңақорған – Қызылорда облысындағы екінші тұрағымыз. Жосалы ауылында да жақын арада толыққанды тірек мектебі пайда болады», – деді Лаззат Шыңғысбаева.</blockquote>Сайып келгенде, балаға білім беретін мұғалімнің де білікті болуы маңызды. Бүгінде сабақ берудің жоспары мен тәсілі түрліше қалыптасқан. Заман ағымына сай бәрін игеру үшін оқуға барып, білімін жетілдіру артық етпейді. Мұндайда «мұғалім үздіксіз ізденіп, жетіліп отырғанда ғана мұғалім» деген қанатты сөз қапысыз ойға оралады. Аталмыш қор да мұғалімнің жаңа бағдарламамен оқуын бірінші орынға қойған. Бұл жөнінде Білім беру саласын тұрақты дамыту қорының жетекшісі Данияр Тоқтарбаев баяндады.<blockquote>– Ауылдық аймақтардағы тірек мектептердің әлеуетін дамыту» жобасы – білім сапасын арттырып, қала мен ауыл мектебінің алшақтығын азайтуға негіз. 2019 жылы жобаға Ақмола және Шығыс Қазақстан облысынан 5 мектеп алынды. Жұмыс барысында оң өзгеріс барын, мектеп жақсы нәтиже көрсетіп жатқанын түсіндік. Үш жылдың ішінде мектептердегі оқу сапасы жалпы алғанда 10-12 пайызға артты. Сөйтіп «Қазақстан Халқына» қорымен бірлесіп, мұны жалпыұлттық жобаға айналдырдық. Серіктестеріміздің қолдауымен әр мектепке шамамен 250 млн теңге қаржы бөлінуде. Бұл қаражатқа мектептің материалдық-техникалық базасы жаңартылады. AITAS холдингі жобаның операциялық, мұғалімдерді оқытуға кеткен, тренерлердің жолға кететін шығынын өтейді. «Назарбаев Зияткерлік Мектептері» мұғалімдерді оқытып, қайта даярлауда қолдау білдіреді, – деді ол.</blockquote>Демек, жоба аясында арнайы курстар өткізілмек. Жаңарқорған мектебі алдағы 3 жыл көлемінде Назарбаев зияткерлік мектептерімен тығыз жұмыс жасайды. НЗМ педагогикалық шеберлік орталығы ауыл ұстаздарына арнап арнайы оқыту бағдарламасын өткізеді. Сондай-ақ, жыл сайын мектепте білім деңгейінің мониторингі жүргізілмек. &nbsp;

Жаңақорғандағы жаңарған мектеп

Бүгінде мемлекет тарапынан жастардың білім алуына барлық жағдай жасалған. Тіпті шетелде оқып, тәжірбие жинақтауына да жол ашық. Бұл да Тәуелсіздіктің жемісі. Елімізде «Болашақ» бағдарламасы жүзеге асырыла бастаған шақтан бері қаншама білімді жастар мұхит асып, әлемнің түкпір-түкпірінде білімдерін шыңдады. Кейін елге оралып, мемлекет дамуына үлестерін қосуда. Шетелде оқу бақыты бұйырған жанның бірі жерлесіміз Дәурен Жүсіпов. Ол АҚШ-тың Массачусетс штаты, Бостон қаласында оқып жатыр.Дәурен Әлиұлы Арал қаласында қарапайым отбасында дүниеге келген. Ата-анасының тұңғышы. Әкесі Әли Жүсіпов пен анам Куляйша Үсенқызы &nbsp;кеңес &nbsp;одағы ыдырағанға дейін Аралдағы балық өңдеу зауытында қызмет атқарған. Ал қазір анасы – сауда-саттық саласында, әкесі қала ішінде такси қызметін кәсіп етіп жүрген еңбекқор жандар. Дәуреннің қос қарындасы Ақтоты мен Ақтолқын &nbsp;медицина саласында қызмет жасайды.Ата-анам біздің білім алып, жақсы жұмыс жасағанымызды қалады. Сол үшін бар күштерін салды. Отбасында бойымызға жақсы тәрбие сіңіре білдік. Соның арқасында жетістіктерге жеттік. Осының бәрі ата-анамның адал еңбек етіп, адал ас ішкізіп, ешкімнің көңіліне кір шалдырмай өсіргендігінің арқасы деп ойлаймын. Қазір өзім де отбасын құрып екі қыз тәрбиелеп отырғандықтан, ата-анамның қабірін жіті түсіне бастағандаймын, – дейді Дәурен.Алғаш рет 1998 жылы Н.К.Крупская атындағы №14 орта мектептің табалдырығын аттаған Дәурен кейін &nbsp;№260 мектепке ауысып, сол мектепті «Алтын белгімен» бітіріп шығады. Мектеп қабырғасында жүргенде &nbsp;физика пәніне деген қызығушылығы жоғары болады. Физика пәні бойынша өткен түрлі білім жарыстарға қатысып, республикалық олимпиададан ІІІ орын алғаны бар. Дәурен спорттан да осал емес. Соның ішінде жеңіл атлетика және баскетболмен шұғылданады. Жыл сайын 9 мамыр күні болатын Шульга атындағы эстафетадан жүлделі І орынды бермей келеді. Ал &nbsp;баскетболдан &nbsp;аудандық құраманың мүшесі. Жан-жақты жігіт мектеп бітірген соң қаржыгер болуды армандайды.Арманым инвестиция саласын бағындыру болатын. Маған акция, облигация сияқты құнды қағаздардың қыр-сырын меңгеру мақсат болды. Сондықтан мектеп бітірген соң бағымды сынап Қаржы мамандығы бойынша университетке құжат тапсырдым. Сәтін салып Л.Н.Гумилев атындағы Еуразия Ұлттық Университетіне «Қаржы» мамандығына мемлекеттік грант негізінде оқуға түстім. Оқумен қатар университеттің қоғамдық өміріне де араластым, 2010 жылы Астана (Қазіргі Нұр-Сұлтан) қаласында болған ЕҚЫҰ саммитін ұйымдастыруға белсене қатысқаным үшін, сол кездегі ҚР Президенті Н.Ә.Назарбаевтың алғыс хатымен марапатталдым,- дейді ол.Университет қабырғасында жүргенде Дәуреннің өз білімін шетелде жалғастыруға деген қызығушылығы пайда болады. &nbsp;Осылайша ол сабақтан тыс уақытта өздігімнен ағылшын тілінің курстанына қатыса бастайды. 2013 жылы университеттің &nbsp;қызыл дипломын қолға алған ол бірден &nbsp;университет бітіруші түлек санаты бойынша «Болашақ» бағдарламасына тапсырады. Бірақ ол кезде түсініксіз жағдайлардың салдарынан соңғы әңгімелесу сатысынан өте алмаған. Сондықтан ендігі кезекте, тәжірибе жинақтап барып қайта тапсыру қажет деп шешеді.Астанадан туған жерге оралдым. Көптеген жерлерге түйіндеме тастадым. Алғашқы кезде кейбір мекемелерде тегін есепшінің көмекшісі болып қызмет жасап жүрдім. Кейіннен Арал аудандық мәслихатына бас маман есепші ретінде жұмысқа қабылданып, мемлекеттік қызметші ретінде іскерлік жолымды бастадым. 2018 жылдың сәуір айында Арал ауданы әкімі аппаратының бас есепшісі болдым. Жұмыста табысқа жетсем де, шетелге магистратураға түсу деген арманым әлі жоғалмаған болатын. Сондықтан сол жылы «Болашақ» бағдарламасына магистратура бағдарламасы бойынша АҚШ-та оқу үшін қайта құжат тапсырдым. Оқуға қабылданғандардың тізімде өзімнің аты-жөнімді көргенде қуанышымда шек болмады. Одан соң керекті құжаттарымды дайындап, АҚШ-тың Калифорния штаты, Лос-Анджелес қаласына тілдік курсқа аттандым. Себебі, «Болашақ» стипендиясының иегері болу бір бөлек, университетке түсу бір бөлек. Оған қажетті тілдік деңгей керек. Америка немесе Ұлыбритания сияқты ағылшын тілді елдерге жоғары оқу орнына түсу үшін міндетті түрде IELTS немесе TOEFL сияқты емтихандар тапсыру керек. Сондықтан дайындықты бастап кеттім, – деп Дәурен шетелдеге алғашқы оқу жайлы айтып берді.Бала кезде фильмдердан көріп өскен Лос-Анджелестегі Голливудқа бару кім кімің де арманы. Дәурен де дәл осылай армандаған. Тынық мұхитының жағалауында жүрудің рахатын сезініп, &nbsp;көршілес штаттарды аралап, Лас Вегас қаласынада болады. Дегенмен туған жерге деген сағыныш елге қайта әкелді. Лос-Анджелестен тілдік курсты бітіріп келген соң университеттерге тапсыра бастайды. Дәуренге АҚШ-тың алдыңғы қатарлы 5 университетінен шақырту келеді.Таңдауым әйгілі Бостон Университетіне түсті. Оқуды енді бастаймын &nbsp;деп жүргенде пандемия басталды. Сондықтан оқуды 1 жылға шегеріп, аудандық әкімдікте жұмысымды жалғастырдым. Жұмыс барысында өте жақсы жетістікке жетіп, аудан әкімі аппаратының цифрлық технологиялар және мемлекеттік қызметтердің мониторингі бөлімінің басшысы қызметіне тағайындалдым. Елдегі ахуал тұрақталған соң АҚШ-қа оқуға аттандым. Қазір Бостон қаласына жанұяммен көшіп келгенімен 2 жыл қаржылық менеджмент мамандығы бойынша оқуды бітіретін күн де жақын қалды. Алла сәтін салып бәрі ойлағыдай болса, елге оралып, қызмет атқаруға ниеттімін, - деді Дәурен.Әлемді аралау – кім-кімнің де арманы. Дәурен секілді білімін шыңдау жолында талмай еңбектеніп, ақырында ойға алған мақсатына жеткен қарапайым аралдық бала осындай арман арқалаған жастарға үлгі болса дейміз. Ол білім жолында ерінбей еңбектенді, қызыметте тәжірбие жинақтап, біліктілігін ұштады. Осылайша көптің ішінен дараланып Әлемнің әйгілі оқу орынында білім алуға мүмкіндік алды.Қазіргі күні Дәурен оқуын ойдағыдай аяқтап тәжірибесін жетілдіру үстінде. Болашақта елге оралып, халыққа қызмет ету басы арманы.

Болашақ бағдарламасымен шетелде білім алған аралдық жас 

<a href="https://kyzylorda-news.kz/">Kyzylorda-news.kz</a> Білімнің қайнар бұлағы мектепте қалыптасатыны сөзсіз. Бүгінде мұғалімнің мәртебесі биіктеп, кәсіби біліктілігі жоғарылай түскені жасырын емес. Ғасырдан астам тарихы бар №35 Иса Тоқтыбаев атындағы мектеп-лицейде ағартушылық саланың бүге-шүгесіне қаныққан талай марқасқа ұстаз өз қолтаңбасын қалдыра білді. Бүгінде шәкірттеріне сапалы білім мен мағыналы тәрбие беруге ұмтылған білім ошағының ұжымы ұстанған бағыт айқын саналады. Өз кезегінде жыл көлемінде атқарылған жұмыстарды саралау мақсатында мектеп-лицей директоры Үміткүл Жұмабаевамен сұхбаттасудың сәті түсті.– Үміткүл Қонысбайқызы, өзіңіз жетек­шілік ететін білім ұясының тарихы тереңде жатқанын жақсы білеміз. Өз кезегінде мектеп-лицей жөнінде кеңінен ақпарат берсеңіз.– Қоғам қайреткері Иса Тоқтыбаев атындағы мектеп-лицей базасында ұстаздар қауымы халық баласын білім нәрімен сусындатып келеді. Өткен ғасырдан бері білімнің қара­шаңырағы қаншама қарлығашын қияға ұшырғаны мәлім. Елімізге танымал тұлғалар мектеп партасында отырып, ұлағатты ұстаздан білім алған еді. Негізінен мектеп ғимараты 1967 жылы пайдалануға берілген екен. Жыл сайын оқу жылы басталмас бұрын мектеп-лицей ғимаратына ағымдағы жөндеу жұмысы жүргі­зіле­ді. Бүгін­де білім ошағында 31 сынып комплектісі қалыптасқан. 630 орынға лайықтандырылған мектеп-лицейде 588 оқушы білім алу үстінде. Сонымен қатар мектепалды даярлық тобында 49 тәрбиеленуші бар екенін айта кетейін. Сыныптар бойынша оқушылар құрамы анықталып, алфавиттік кітапқа енгізілген болатын. ҰБДҚ ақпараттық жүйесі жұмыс жасайды. Әлеуметтік аз қамтылған отбасынан шыққан балалар үшін сыныптардың нақты әлеуметтік картасы жасалған. Бұл ретте бастауыш сыныптың 201 оқушысы, аз қамтамасыз етілген отбасыдан шыққан 80 бала ыстық тамақпен қамтылу үстінде.– Мектеп-лицейдің негізгі бағыты – білім алушыға сапалы білімді қамтамасыз ету екені рас. Бұл ретте ұстаздарға қандай талап қойылады? Мұғалімдер біліктілігін қалай арттырады?– Қазіргі уақытта мектеп-лицейде 84 мұға­лім жұмыс жасайды. Оның ішінде, педагог-модератор – 23, педагог-сарапшы – 22, педагог-зерттеуші – 18 болып табылады. Мектеп-лицейде 10 пән бірлестігі құрылған. Осы күні ұжымның құрамы тәжірибесі толысқан мұғалімдермен қа­тар, жас ұстаздармен толығып келеді. Тарифи­кациялық жүктеме оқу жылы басында және екінші жартыжылдықта қайта дайындалды. Үйде оқитын 5 оқушының іс-қағаздары жасалып, пән мұғалімдері кестеге сәйкес сабақ беріліп келеді. Апталық, семинар жиі өткізіліп, ұстаздардың тәжірибе алмасуына жағдай жасалып келеді. Сондай-ақ мұғалімдеріміз кезең-кезең бойынша уақыты келгенде аттестаттаудан өтуге мүдделі. Ұстаздарды қызметке қабылдау барысында арнайы конкурс жарияланып, комиссия шешімі шығарылады. Менің негізгі талабым – ұстаздың жұмыс көрсеткіші оқушының жетістігімен саралау екені анық. Біліктілікті жан-жақты арттыра отырып, оқушының білім деңгейін, шығармашылық қабілетін ұдайы шыңдауымыз керек. №35 Иса Тоқтыбаев атындағы мектеп-лицей тірек білім ошағы ретінде 2 магниттік №131 Талғат Қозыбаев атындағы және №135 Асқар Тоқмағанбетов атындағы орта мектеппен тығыз қарым-қатынас орнатқан. Биыл №35 мектеп-лицей базасында «Табыс­ты мұғалім – табысты оқушы» тақырыбында аудандық ағылшын тілі пәні мұғалімдерінің қатысуымен коучинг өткізілді. Ал аудандық білім бөліміне қарасты әдістемелік кабинет­тің жоспарына сәйкес «Информатиканы оқытудағы жаңа тәсілдер – мұғалімнің ІТ құзіреттілігін қалыптастыру негізі» тақыры­бында аудандық семинар жүзеге асты. Педагогтардың тәжірибесін жақсарту мақса­тын­да «Lesson study» ұйымдастыру және өткізу тиімділігі қарастырылған. Білім сапасын көтеру және оқушылардың оқуға деген ынтасын жоғарылату негізінде арнайы топтар құрылып, жұмыс жасауда. Анығын айтқанда, қазақ тілі мен әдебиеті және тарих бірлестігі мүшелерінен құрылған «Ізгілік» тобы құрылып, зерттеу бағытына «Қоғамдық-гуманитарлық пәндер аясында оқушылардың сөйлеу тілін дамыту енгізіл­ген еді. Математика бірлестігі мүшелерінен құрыл­ған «Өркен» тобы да жасақталған. Олардың зерттеу бағытына «Мәтін есеп­тер­ді шығару дағдыларын жақсарту» мәсе­лесі қарастырылған болатын. Ал жаратылыстану бірлес­тігінің «Кемел» тобының зерттеу бағы­тына «Оқушылардың функционалды сауат­тылығын арттыру» мәселесі көзделген. Бастауыш сыныптарда «Зерде» және «Бірлік» тобы құрылған. Қос топтың негізгі бағыты – «Оқушылардың тілдік дағдыларын қалыптастырудың тиімді жолдары» және «Оқушы­лардың функционалдық сауаттылық дағдыларын қалыптастыру» ретінде құрыл­ды.– Оқушылардың жалпы білім бере­тін пәндер бойынша республикалық олимпиада мен жекелеген олимпиа­да және ғылыми жобаларда қол жеткізген жетістігі туралы тарқатып айтып бересіз бе?– 2023-2024 оқу жылында жалпы білім беретін пәндер бойынша республикалық олимпиадалар кезеңін өткізу ережесіне сәйкес, дарынды балаларды анықтау үшін қажетті жағдай тудыру, пән олимпиадасына қатысатын оқушыларды іріктеу және даярлау мақсатында №35 мектеп-лицейде олимпиада резервін дайындау орта­лығы құрылды. Орталық жетекшісі ретінде оқушылары аудандық, облыстық пән олимпиадаларының, республикалық, халықаралық қашықтық олимпиадаларының жүлдегерлері болып табылатын педагог-зерттеуші, мектеп-лицей тренері, география пәні мұғалімі Ажар Әбдреева бекітілді. Орталыққа 2-4 сынып бойынша 27 оқушы, 6-9 сынып бойынша 44 оқушы 10-11 сынып бойынша 32 оқушы тіркелген. Осы күні 11 пән бойынша дайындық жұмысы жүргізілуде. Пән мұғалімдері арнайы жоспар құрып, дайындықты әрқашан пысықтап отырады. Осы оқу жылында 9-11 сыныптар бойынша аудандық кезеңге 17 оқушы қатысып, оның 9-ы жүлделі орын алды. 2 оқушы облыстық кезеңде бақ сынап, 1 оқушымыз І орын жеңіп алды. Білім бәсекесінен дараланған Асылай Бектасқызы қазақ тілі мен әдебиеті пәнінің мұғалімі Маржан Қалқоразованың жетекшілігімен республикалық кезеңге нау­рыз айының соңында қатысып, аудан мерейін асқақтататын болады. Осы оқу жылында алғаш рет ауыл олимпиадасы өткізіліп, мектеп-лицей бойынша 9-11 сыныптардан 25 оқушы қатысып, 9 оқушы облыстық кезеңінде жүлдегерлер қатарынан көрінді. Өз кезегінде 2-4 сыныптар бойынша «Бастау» математика олимпиадасының аудандық кезеңіне 3 оқушы қатысып, барлығы жүлдегер атанды. Оның ішінде 1 оқушы облысқа жолдама ұтты. Ал 5-6 сыныптар бойынша аудандық олимпиадаға 11 оқушы қатысып, 3 оқушы жүлдегер атанды, 7-8 сыныптар бойынша 18 оқушы қатысып, 14 оқушы жүлдегер атанып, облыстық кезеңге 2 оқушы жолдама алды. Жалпы білім беретін пәндер бойынша республикалық олимпиаданың аудандық кезеңін­де оқушыларымыз үздік нәтиже көрсеткені үшін «Ең үздік олимпиадалық команда – 2023» номинациясымен ІІІ орын иеленген едік. 2023-2024 оқу жылында ғылыми жобаның аудандық кезеңінен 8 оқушы орын алған болатын. Облыс­тық кезеңге қатысқан 5 оқушының 3-еуі алғыс хатпен марапатталса, 2-еуі І және ІІ орын иеленді. Республикалық кезеңге қатысқан топтық жоба І орынға қол жеткізді. Бұдан бөлек, шығармашылыққа бейім оқушы­ларымыз республикалық деңгейдегі эссе байқау­ларын­да топ жарып жүргені мәлім.– Биыл мектеп-лицейден қанша оқушы бітіріп шығады? Олардың ҰБТ-ға дайындығы қалай жүзеге асырылуда?– Мектеп-лицей бойынша 2023-2024 оқу жылында 11 сыныпты 28 оқушы бітіреді. 11 «а» сыныбында 16 оқушы, 11 «б» сыныбында 12 оқушы білім алуда. Қыркүйек айынан бастап ҰБТ-ға дайындау мақсатында арнайы бұйрықпен пән мұғалімдері бекітілді. Дайындық сабағының кестесі бекітіліп, таңдау пәндері нақтыланды. Мектеп-лицей бітірушілерінің арасынан 6 оқушы – «Алтын белгіге», 2 оқушы «Үздік аттестатқа» үміткер ретінде ұсынылды. Оқушылардың білімін жан-жақты толықтырып, ізденуге бейімдеу үшін «Юстади», «Тест центр», «Қазбілім» секілді орталықтармен байланыс орнатылып, сынама тесттер алынып келе жатыр.– Бүгінде бала тәрбиесіне қатысты сан түрлі мәселе қоғам өмірінде қозғалып жүр. Білім ошағында тәрбие бағытында нендей жұмыстар жасалуда?– Біздің оқушыларымыз шығармашылық байқауларда бақ сынап, жоғарғы нәтиже­лерге қол жеткізіп келеді. Ата-анамен тығыз байланыс орнатып, тәрбие мәселесін алдыңғы орынға қоюға мүдделіміз. Сынып сағаттары өткізіліп, тәрбие бағытында пысықталуға тиісті жұмыстар жүзеге асырылады. Әрине оқушының тәрбиесімен қатар, шығармашылық әлеуетін арттыру жолға қойылған. Оқушыларымыз аудандық, облыстық, республикалық байқаулардан жүлделі орындар алып келеді. Тәрбие ісі жөніндегі орынбасар Ләйла Сағымбаева «Үздік тәрбие ісі жөніндегі орынбасар – 2023» байқауының аудандық кезеңінде өзі­нің жоғары кәсіби деңгейін және озық іс тәжірибе­сін көрсеткені үшін І дәрежелі дип­лом иегері атанды. «Үздік сынып сағаты – 2023» облыстық сырттай байқауында жас ұстаз Жансая Қорғанбай жүлделі І дәрежелі диплом иеленді. Қазақ тілі мен әдебиеті пәні мұғалімі Гүлнұр Кенбаеваның жетекшілігімен оқушыларымыз елорданың 25 жылдығына орай өткізілген «Мен сенемін жастарға» ҚР үздік дарынды жастардың форумына қаты­сып, І дәрежелі дипломға қол жеткізді. Мұн­дай жоғарғы жетістіктер шығармашылық және спорт бағытында жеткілікті. Биылғы оқу жылынан бастап «Біртұтас тәрбие» бағдарламасына сәйкес, «Ата-аналарды педа­гоги­калық қолдау орталығы» жұмыс жасауда. Арнайы орталықтың жұмыс жос­пары бойынша ата-аналардың қатысуымен таным­дық, тағылымдық іс-шаралар, кездесулер, арнайы сабақтар өткізілуде. Айта кетейік, сәуір айының екінші он күндігінде ата-аналарға ашық есік күні өткізіледі.– Бастауыш сыныптар бойынша ұстаз­дар қауымы осы оқу жылында қандай жетістіктерге қол жеткізді?– Бастауыш сынып мұғалімдерінің жұмысы қашанда күрделі. Мектеп табалдырығын енді аттаған оқушылардың сауатын арттыруға негізделген сабақ жос­пары бекітілген. Біздің мұғалімдеріміз оқушы­ларға сабақ берумен қатар, сан түрлі шығар­ма­шылық байқауларға қатысуда. Атап айтқанда, «Бас­тауыш сыныптағы дүние­тану пәнінің Үздік мұғалімі – 2023» аудандық байқауында Айжан Ермағанбетова ІІІ орын еншіледі. «Алтын тұғыр» бастауыш сынып педагогтерінің математикалық олимпиадасында «Зерде» ғылыми жоба қорғау байқауында «Бастау» математикалық олимпиадасында «Кенгуру» математикалық олимпиадасында, «Бала дарын» балалар шығармашылығын дамы­ту орталығының ұйымдастырумен Мұқа­ғали Мақатаев өлеңдерін мәнерлеп оқу­дан республикалық байқауында мектеп оқушылары дараланып, үздіктер қатарынан көрінді. «Бастауыш сынып сабақтарында оқушыларды табысқа жетелейтін тиімді тәсілдер» тақырыбында өткізілген облыстық семинарда үздік сабақ, іс-тәжірибесімен бөліскен мұғалімдер Шолпан Абенова, Айжан Әлиева, Перизат Омарова, Жұлдыз Есназарова, Айжан Жұмабекқызы сертификатталды. ҚР оқу-ағарту министрлігі «Дарын» республикалық ғылыми-практикалық орталығы математикадан бастауыш сынып мұғалімдеріне арналған «Педстарт» олимпиада­сында Жұлдыз Есназарова ІІІ дәрежелі дипломға қол жеткізді.– Сұхбахыңызға рахмет!

Іргелі қарашаңырақта 588 оқушы білім алуда

&nbsp;<a href="https://kyzylorda-news.kz/">Kyzylorda-news.kz</a>&nbsp;Аймақтағы алдыңғы қатарлы білім ошағының бірі – Ә.Мүсілімов атындағы №101 мектеп-лицейі «Орта білім беретін үздік ұйым» облыстық конкурсының жеңімпазы атанды. Өткен жылы іргелі ұжымға облыс әкімі 34 млн теңге грантты табыс етті. Осы орайда мектеп-лицей директоры Айгүл Алтынбекқызымен ой бөліскен едік.– Өзіңіз басқарып отырған білім ошағы «Орта білім беретін үздік ұйым» атанып, облыс әкімі 34 млн теңге табыстады. Әлбетте, мұның ар жағында мектеп ұстаздарының үлкен еңбегі жатыр. Оқуға құштар шәкірттердің де үлесі бар. Осы жаңалықты оқырмандармен бөліссеңіз…– «Орта білім беретін үздік ұйым» гранты ҚР Білім және ғылым министрінің 2014 жылғы №544 бұйрығына сәйкес өткізілген конкурс нәтижесінде берілді. Конкурсқа мектептің кейінгі үш жылдағы жеткен жетістіктері мен атқарылған жұмыстарын айқындайтын құжаттар тапсырылды. Жалпы 11 бағытты қамтитын материалдар жинақталды. Нәтижесінде, біздің мектебіміз осы марапатқа лайықты деп танылды. Әрине, бұл – біздің ұжымның жылдар бойы зор ізденіспен атқарған еңбегінің жемісі. Бірінші кезекте, мектептің материалдық-техникалық базасы жыл сайын заманауи жабдықтармен толықтырылып отыр. &nbsp;Жаңа модификацияланған биология, химия, өлкетану кабинеттері ашылды. Сонымен қатар, робототехника үйірмесіне арналған кабинет жабдықталды. Осылайша сапалы әрі жан-жақты білім берудің нәтижесінде мектеп түлектері жыл сайын ҰБТ-дан жоғары балл жинап, 70 пайызы мемлекеттік грант иегері атануда. Ал бірқатар түлектеріміз – алыс-жақын шетелдік жоғары оқу орындарының студенті. Бүгінде мектеп оқушыларының 90 пайызы қосымша біліммен қамтылған. Одан бөлек, спорттық үйірмелер, ІТ үйірмесі, домбыра, вокал, хор үйірмелері, робототехника, дебат клубы жұмыс жасайды. Мұғалімдер 3 ай сайын біліктілігін арттырып отырады. Қала, облыс, республика көлемінде ұйымдастырылған кәсіби байқауларда бірнеше рет жеңімпаз атанды. Атап айтар болсақ, республикалық «Алтын тұғыр» математикалық олимпиадасында бастауыш сынып мұғалімі Ж.Жұмаділдаева І орынды жеңіп алса, «Үздік педагог-2022 республикалық байқауының облыстық кезеңінде жеңімпаз атанған ағылшын тілі пәнінің мұғалімі Д.Сәдірбаева 918 900 теңге сыйақы иеленді. Ал математика пәнінің мұғалімі С.Құлжанова, химия пәні мұғалімі Ж.Оспанованың оқушылары халықаралық ғылыми сайыстар байқауының жеңімпазы атанып, «Жыл үздігі» номинациясын иеленді. Орыс тілі пәнінің мұғалімі М.Қалмақова орыс тілі мен әдебиеті оқытушыларына арналған «Русский язык в Казахстане – новые горизонты» халықаралық байқауының жеңімпазы атанса, А.Жармахан – «Сыр үміті» облыстық жастар сыйлығының иегері. Ағылшын тілі пәнінің мұғалімдері Н.Жаңалықова, А.Жұмағали «Teacher’s Debut Cup» қалалық дебат ойындарының І орын, математика пәнінің мұғалімі Г.Манғұлова – «Үздік математика-2023» қалалық байқауының І орын иегері. Осындай білікті ұстаздардың еңбегінің нәтижесінде оқушыларымыз да жыл сайын халықаралық, республикалық байқаулар жеңімпазы атанып жүр. 2022 жылы оқу жылында 2 оқушы «Жалпы білім беретін пәндер бойынша республикалық зерттеу жобалар» конкурсының жеңімпазы атанды. Осы конкурстың облыстық кезеңінде 17 оқушы І, ІІ, ІІІ орындарды жеңіп алса, 8 оқушы алғыс хатпен марапатталды. Ал 2-7 сынып оқушылары арасында өткен «Зерде» республикалық зерттеу жобалары конкурсының қалалық кезеңінде 32 оқушы жүлделі орын иеленсе, 3 оқушы алғыс хатпен марапатталды. Басқа да байқаулар нәтижесінде, қалалық байқауларда 62 оқушы, облыстықтан 16 оқушы, республикалық байқауларда 2 оқушы жүлделі орындарға ие болып, мектебіміздің мерейін асыра түсті. Міне, осындай жетістіктер негізінде жоғарыда аталған конкурс жеңімпазы атанып, арнайы грант иелендік.– Өткен оқу жылының басында мектеп-лицей жанынан 375 орындық қосымша ғимарат пайдалануға берілді. Бұған қарап, жыл сайын білім алушылар қатары артып келе жатқанын аңғарып отырмыз. Қазір мектепте қанша оқушы бар және неше ауысымда оқытылады?– Мектебіміздің негізгі оқу &nbsp;ғимаратының жобалық қуаты – 624 орын. Былтырғы оқу жылында 2308 оқушы білім алып, мектеп ІІІ ауысымда жұмыс жасаған болатын. Биыл бастауыш сыныптарға қосымша оқу ғимараты салынды. Қазір мектепте 2377 оқушы бар, яғни, екі ауысымда оқытылады. Бастауыш сыныптарға арналған жаңа оқу ғимаратын заманауи материалдық-техникалық базамен жабдықтап, оқушыларымыз үшін барынша жайлы білім беру ортасын қалыптастыратын боламыз.– «Жасыл мектеп» жобасы – өте құптарлық іс. Өйткені бұл бір жағынан, білім алушылар үшін эстетикалық тәрбие десек, екіншіден, әрбір баланың еңбекке деген құштарлығын оятқаны анық. Соның дәлелі, ҚР Экология және табиғи ресурстар министрлігі &nbsp;ұйымдастырған ұлттық конкурстың 1 дәрежелі дипломын жеңіп алдыңыздар. Бұл – әрине, өзге де білім ошақтарына үлгі боларлық бастама. Осы жұмыстар жайлы айтып берсеңіз.– Иә, «Жасыл Қазақстан» ұлттық жобасының жүзеге асырылуын қолдаумен қатар, экологиялық білім беруді дамыту мақсатында облыстық білім басқармасының бұйрығына сәйкес «Жасыл мектеп» пилоттық жобасын ендіруге №101 мектеп-лицейі тірек білім беру ұйымы ретінде бекітілді. «Жасыл мектеп» жобасы педагог қызметкерлердің, оқушылардың белсенді қатысуымен, білім берудің экологиялық бағыты саласында оқыту моделін енгізуге арналған. Бүгінде жоба 7 бағытта жұмыс жасап келеді. Оның бірі – «Биоалуантүрлілік» бағыты бойынша мектеп жанынан салынған &nbsp;жылыжайда көкөністер мен қарапайым өсімдіктер егіп, күтімге алдық. Ал «Жасыл сақшы» аталатын эковолонтерлер тобы гидропоника әдісі арқылы аквапоника құрылғысында көгалдық жасылдар егіп, еңбектің нәтижесін көрді. Сондай-ақ, осы жоба аясында оқушыларымыз тәжірибесін жетілдіріп, арнайы бидай сабан субстратында «Вешенка» саңырауқұлағын өсірді. Тағы бір тамаша жаңалығымыз, «Энергияны үнемдеу» бағыты бойынша жел энергиясын электр энергиясына айналдыратын ҒТ-400 маркалы механикалық қондырғы орнатылды. Қондырғының электрлік қуаты 400 ваттық, қалақшаларының айналдыру жылдамдығы 12-17 м/c, диаметрі 48 мм, &nbsp;1200-1300 мм құрайды. &nbsp;Қазір жұмыс жасап тұр. Мектебімізде қалдықтарды бөлек жинау тәжірибесі енгізілген. Бұл орайда «Қалдықтарға сараптама жасау» бағытында оны барынша азайтуға жұмыс жасаудамыз. Мысалы, мектептің әр бұрышында қалдықтарды бөліп тастауға арналған эко-жәшіктер орналастырылған. Нәтижесінде, ең көп жиналатын қалдық – қағаз, картондарды өңдеу арқылы жеңіл және тиімді биоотын жасалды. Осы жоба аясындағы «Дұрыс тамақтану» бағытына сай оқушылар мен ұстаздар қауымы пайдалы тағамдармен тамақтануға дағдыланса, «Салауатты өмір салтын сақтау» бағытында тұрақты түрде спорттық ойындар мен сайыстар ұйымдастырылып отырады. Жоба аясында әрбір тәрбиеленушінің бойына экологиялық сананы қалыптастыру маңызды. Сондықтан тірек мектеп ретінде «Жасыл мектеп» жобасы бойынша тәжірибемізді бөлісіп, жоба ауқымын кеңейтіп, өзге білім ошақтарында да жүзеге асыруға үлес қосып келеміз. Атап айтсақ, жоба аясында өңірдегі «Сыр бөбегі» балабақшасымен, Қорқыт ата атындағы Қызылорда университетімен арамызда тығыз сабақтастық орнады. ҚР Ғылым және жоғары білім министрлігі Ғылым комитетінің «Жасыл мектеп – жасыл колледж – жасыл университет моделі білім беруді экологиязациялауды дамыту жүйесі» тақырыбындағы ғылыми жоба аясында мектебіміз ғылыми зерттеулер базасы. Жобаның маңыздылығы, «Жасыл мектеп: экологиялық бағытталған оқытудың инновациялық шешімдері» тақырыбында халықаралық ғылыми-практикалық конференция өткізілді. Осындай ортақ мәселелерді талқылау барысында &nbsp;Минск қаласындағы «Жасыл мектеп» жобасымен жүйелі айналысып, жоғары нәтижелерге жеткен 19 гимназиясымен, Белорусь мемлекеттік университетімен екіжақты меморандумға қол қойып, бірлесе жұмыс жасауға келісімге келдік. Бүгінде Беларусь елінің «Green office bspu» ресурстық орталығы мен «Green office schools» желісі және Қорқыт ата атындағы Қызылорда университетімен бірлесе халықаралық марафон үздіксіз ұйымдастырылып келеді. ҚР Экология және табиғи ресурстар министрлігі Орман шаруашылығы және жануарлар дүниесі комитетінің Ботаника және фитоинтродукция институты Астана ботаникалық бағы филиалымен өзара ынтамақтастық туралы меморандумға қол қойылды. Жаңа оқу жылында Жасыл мектебімізді флораның &nbsp;сан алуан түрімен толықтыру жоспарлануда. Жастардың әлеуметтік инновациялары мен кәсіпкерлігінің жаһандық бағдарламасы – UPSHIFT бойынша «Жасыл мектеп» жобасы аясындағы 3 жоба жеңіске жетті. Олар: «Best team» – экологиялық биосабын, «Stars» – Табиғи антисептик, «Эковолонтерлар» – экологиялық таза өнім жобасы. Жалпы алғанда, «Жасыл мектеп» пилоттық жобасының облыстық тірек білім беру ұйымы – №101 мектеп-лицейі базасында ғылыми негізделіп, сараптамадан өткен жобалар облысымыздың басқа білім беру ұйымдарына таратылып отырады. Облыстағы «Жасыл мектептер» желісі қалыптастырылып, жетекші ғалымдардың қатысуымен мазмұндық толықтыру бағытында нысаналы жұмыстар жүргізіледі. Осындай атқарылған жұмыстар нәтижесінде Экология және табиғи ресурстар министрлігінің ұйымдастыруымен өткен «Үздік экологиялық білім беру ұйымы» ұлттық конкурсының І дәрежелі дипломымен Ә.Мүсілімов атындағы №101 мектеп-лицейі «Үздік экологиялық жоба» номинациясымен марапатталды. Бұл ұстаздар мен оқушылардың тынбай ізденісінің, табанды еңбегінің нәтижесі деп айтар едім.– Мемлекет басшысы биылғы Жолдауында «әркім отаншыл, білімпаз, еңбекқор, тәртіпті, адал, үнемшіл әрі жанашыр болса, алынбайтын асу жоқ» деп, Абай айтқан «Толық адам» сипатына сай «Адал азамат» тұжырымдамасының да түпкі мәні осы екенін атап көрсетті. Жалпы ХХІ ғасырда, әлемдік даму үдерістері алға шыққан кезеңде жас ұрпақты ұлттық ұстында, отаншыл рухта тәрбиелеу үшін қандай қадамдар қажет?– Қоғамның қазіргі даму кезеңінде болып жатқан әлеуметтік, саяси және технологиялық өзгерістерден, ұрпақ тәрбиесіндегі олқылықтардан білім мен тәрбие жүйелерінің ісін жаңа сатыға көтеру қажеттігі туындап отырғаны мәлім. Осыған орай қоғамның ұлттық- мәдени тұрғыдан кемелденуі жастарды өз халқының рухани қазынасымен, ұлттық тәрбиенің озық, өнегелі дәстүрлерімен тереңірек таныстыруды көздейді. Соның негізінде жеке тұлғаның шығармашылық, рухани мүмкіндіктері ұлғаяды. Өйткені, еліміздің болашағы, оның материалдық және рухани дамуы жастардың білімі мен тәрбиесінің деңгейіне байланысты. Президент айтып отырған мәселенің мән-жайы осында деп ойлаймын. Қоғамда отбасы берекесі оның толыққандылығында десек, әке мен ана тәрбиесі қатар жүрген жерде жақсы азамат қалыптасарына да сенім мол. Жалпы мектеп табалдырығын аттаған баланың барлығын да ең алдымен ұлттық сана, отаншыл рухта тәрбиелеп, туған жерін, ана тілін, ата-баба өнегесін терең ұғындырып, жалпы тіршілікті, қоршаған ортаны сүюге баулығанымыз жөн. Қазіргі біздің алға қойған мақсатымыз осы.&nbsp;

Айгүл Алтынбекқызы: Зор ізденіспен атқарған еңбектің жемісі

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы Назарбаев Зияткерлік мектебінде облыстық көшбасшылар форумы өтті.Тәжірибе алмасу алаңына аймақтағы жалпы білім беретін мектептердің президенттері, вице-президенттері мен үйлестірушілер жиналды. Мектеп директоры Жаңбыржан Бекболатов қатысушыларға сәттілік тілеп, көш бастаған оқушылардың мектеп дамуындағы рөлі зор екенін атап өтті.«Бірлігіміз жарасқан» психологиялық тимбилдингте лидерлер бірлескен іс-әрекеттер жасап, ынтымақтастық пен ауызбіршілік қасиеттерін дамытты. Ал топтық жұмыс кезеңінде командалар өзін-өзі басқару ұйымдарының моделін құрып, оны дамыту бойынша үздік жобаларымен бөлісті.<blockquote>– Көптеген идеялар ұсынылды, әрқайсымыз өзімізге түртіп алып отырдық. Бүгінгі алған тәжірибені алдағы уақытта мектептерге енгізіп, жаңа бағытта жұмыс жасайтын боламыз, – дейді №268 мектептің көшбасшысы Асылзат Нұрғабыл.</blockquote>Үйлестірушілер үшін NIS белсенділері «Эмоционалды интеллектінің маңыздылығы» тақырыбында практикум өткізді және көшбасшылық қасиеттері мен салалық ерекшеліктерін анықтау жолдарын көрсетті.<blockquote>– Нағыз көшбасшы өзі дамып қана қоймай, басқарларға үлгі бола білу керек. Топтасып жасалынған жұмыс оң нәтижеге алып келеді. Өзін-өзі басқару ұйымының жұмысы мектептің рейтингісін жақсартуға өзінің септігін тигізетіні анық, – дейді С.Толыбек атындағы №3 ІТ мектеп-лицейінің президенті Азат Жұматай.</blockquote>

Назарбаев Зияткерлік мектебінде облыстық көшбасшылар форумы өтті

<a href="https://kyzylorda-news.kz/">Kyzylorda-news.kz</a>&nbsp; Қорқыт ата атындағы Қызылорда университетінің ғалымдары ғылыми зерттеулер нәтижесінде ел экономикасының дамуына үлес қосуда. Атаулы күн қарсаңында назарларыңызға қызылордалық әйел ғалымдардың ғылыми жаңалығын ұсынамыз.<h2>Дәнді дақылдың жаңа сорттарын шығарды</h2>Ауыл шаруашылығы ғылымдарының докторы, Қорқыт ата атындағы Қызылорда университетінің «Аграрлық технологиялар» кафедрасының профессоры Тохетова Лаура Әнуарқызы дәнді дақылдардың жаңа сорттарын шығаруда.Ол өзге де ғалымдармен бірлесіп көп жылдар бойы жүргізілген ғылыми зерттеулер нәтижесінде «Сыр Аруы», «Қымбат», «Сымбат», «Құралай», «Елік», «Инкар», «Шахристан», «Қайсар», «Алтын арай» атты жаздық арпа сорттарын, бидайдың «Зарина» сортын классикалық селекция әдістерімен шығарды. Оның басшылығымен алғаш рет Қызылорда облысында дәнді дақылдар (арпа, бидай, сұлы) бойынша толық ауқымды селекциялық процес ұйымдастырылды. Сонымен қатар өсімдік ша­руашылығы саласын әртараптандырудың ғылыми практикалық негізі әзірленді. Ғалымның жетекшілігімен арпаның, бидайдың және сұлының стресстік факторларға төзімді 750 сорт үлгілерден тұратын генетикалық коллекциясы қалыптасып, практикалық селекцияда ген көзі ретінде кеңінен пайдалануда.2022 жылы республикалық «ЖОО үздік оқытушысы» атағын иеленді.<h2>Қаймақ әзірлеудің жаңа әдісін тапты</h2>Қорқыт ата атындағы Қызылорда университетінің қауымдастырылған профессоры, техника ғылымдарының кандидаты Смаилова Жұлдыз Жолдасқызы сүт өнімдерінің биологиялық, тағамдық құндылығын арттыру, шикізат ассортиментін кеңейту, сүт шикізатын үнемдеу әдістерін зерттеуде.Ғалымның «Пробиотикалық ашытқыны қолдана отырып қаймақ алу әдісі» атты моделі ҚР Әділет Министрлігі Зияткерлік меншік құқығы Комитетінің Ұлттық зияткерлік меншік институтында тіркеліп, патент алды. Педагог экологиялық таза азық-түлік өнімдерін әзірлеу және әртүрлі аурудың алдын алу, ағзаның қорғаныш функцияларын нығайту үшін емдік-профилактикалық мақсаттағы өнімдер технологиясын әзірлеуге бағытталатын жұмыстармен айналысуда. Айта кетейік, ғалым жуырда тағы бір зерттеу жұмысына патент алды.2022 жылы республикалық «ЖОО үздік оқытушысы» атағын иеленді.<h2>Ұлттық нақыштағы киімдердің жаңа үлгісін жасады</h2>Қорқыт ата атындағы Қызылорда университетінің «Дизайн және технология» кафедрасының қауымдастырылған профессоры, техника ғылымдарының кандидаты Шілдебаева Ләззат Қадырбекқызы – дәстүрлі қазақ костюмі негізінде заманауи киімдерді жобалау әдістемесін әзірлеуде.Республикалық «ЖОО үздік оқытушысы» атағын 2017 және 2018 жылдары иеленген.2019 жылы ҚР&nbsp;Әділет министрінің Өнертапқыштық саласындағы жетістіктердің «Шапағат» республикалық конкурсында №2882 «Ұлттық ою-өрнегі бар әйелдер пальтосы» өнеркәсіптік үлгіге патент үшін бірінші орын үшін диплом иегері.Ләззат Қадырбекқызы «Қазақтың ұлттық костюм негіндегі қазіргі заман киімдері. Modern clothes manufacturing based on kazakh national dress. Современная одежда на основе казахского традиционного костюма» Оқу құралы. Учебное пособие. Train aid» еңбегіне ҰЗМИ-нан №25306 авторлық куәлік алды.2022 жылы Ләззат Шілдебаеваның жетекшілігімен Мемлекеттік ұлттық ғылыми-техникалық сараптама орталығында (МҰҒТСО) ғылыми-техникалық қызмет нәтижелері&nbsp; бойынша «Қайта өнделген жүнді пайдалану арқылы брендтік өнімдер өндірісін ұйымдастыру» жобасы тіркелді. Бүгінде «Қазақтың ұлттық киіміндегі ойма қалтаны өндеу әдісі» атты өнертабысы бойынша Еуразиялық патенттік ведомствоға берілген (ЕАПВ) өтінімі формалдық сараптаманың оң шешімін алған.Ғалым – 16 патент және 17 авторлық куәліктің авторы.<h2>Күріш сабанынан целлюлоза алу тәсілін ұсынды</h2>Қорқыт ата атындағы Қызылорда университетінің «Физика-химиялық талдау әдістері» инженерлік бейіндегі зертхананың ғылыми қызметкері, педагогика ғылымдарының магистрі Ниязова Динара Жұмабекқызы ғалымдармен біріге отырып, күріш сабанынан целлюлоза алу тәсілін ұсынды.Күріш сабанынан алынған целлюлоза қағаз бұйымдарын өндіруде қолданылуы мүмкін. Мақсатты өнім – целлюлозаның ьшығымы 42,7-70,3 мас.% құрады. Десиликация мен делигнификация үрдісі аса жоғары жиілікті сәуледендірудің 180 Вт қуатында 15 мин бойы аммоний молибдаты қатысында (кремнийсізденген целлюлозалық массадан 5%) натрий гипохлоритін қоспай жүргізгенде оңтайлы болып табылды, осындай жолмен алынған өнімнің құрамындағы альфа-целлюлозаның мөлшері 74,45 мас. % құрады, бұл өнім №2А маркасына сәйкес келеді.<h2>Күл үйіндісінен құрылыс материалдарын даярлады</h2>Қорқыт ата атындағы Қызылорда универистетінің «Сәулет және құрылыс өндірісі» кафедрасының аға оқытушысы Жақыпова Гүлнұр Мұхамеджанқызы «Жергілікті шикізат ресурстары негізінде майда түйіршікті бетоннан төсеніш тақтайшаларын өндіру технологиясы» бойынша зерттеу жұмыстарын жүргізіп келеді.Технологияны өңдеу мен енгізу мәселесіне жылу энергетикасының көп тонналы қалдықтарын пайдалану ресурсты үнемдеуге негіз. Осылайша, жылу электр орталығының күлін пайдалану құрылыс техникалық қасиеттерінің жақсаруымен құрылыс материалының жаңа тиімді түрін өндіруге, капиталды және ағымдағы шығындарды, күл үйінділердің құрамын бірден төмендетуге мүмкіндік береді. Сонымен қатар бұйымның өзіндік құнын айтарлықтай арзандатады. Осы мәселелерді шешу мақсатында «Жергілікті шикізат ресурстары негізінде майда түйіршікті бетоннан төсеніш тақтайшаларын өндіру технологиясы» тақырыбы негізінде зерттеу жұмыстарын жасау барысында 3 өнертабыс патентін алды. Атап айтсақ, жол төсеніш тақтайшасына арналған құрам №4847, бетон құрамы № 5435 мен бетон араласпасының құрамы №5304. Барлық өнертабыс патенттері жаңа құрамда жасалған. Күл үйінділерін құрылыс материалдар өндірісінде қолдану арқылы біріншіден, аймақтың экологиялық жағдайы жақсарады, екіншіден, көп тонналы қалдықтарды утилизациялау мәселесі шешіледі.&nbsp;Фото: Нұрболат Нұржаубай

Қызылордалық ғалымдардың жұмысы нәтижелі

<a href="https://kyzylorda-news.kz/">Kyzylorda-news.kz</a> Осыдан екі жыл бұрын көрікті қаламыздың қақ ортасында «ұмыт қалған» Қызылорда құрылыс және бизнес колледжінің ұсқынсыз қалпын көретін едік. Оның осы күйін журналистер газет бетінде: «Соңғы отыз жылда ғимарат тіпті жеңіл жөндеу көрмеген, қабырғасына біреу бір алақан батпақ жапсырмаған. Есіктерінің сыры көбелектің қанатындай көтеріліп, едені баланың ақыл тісіндей айқасып жатыр» деп суреттеген. Қазір бұл оқу ордасы – әудем жерден бас көтеріп қарайтын әсем ғимарат.Оны бүгінгі бейнеге ендіріп, жаңаша мазмұнда білім игілігіне жаратып отырған білім меценаты, кәсіпкер, «Нұрай» ЖШС директоры Сейітқали Алшынбаев екенін жақсы білеміз.Мемлекет басшысы Қасым-Жомарт Тоқаев: «Лайықты азамат – өз білімін Отанымыздың игілігі үшін жұмсайтын адам. Алдымызда тұрған құбылмалы заманда жастарымыз еңбекқор болмаса, ешқандай бәсекеге түсе алмайтынын терең түсінуі керек» деген еді. Бұл сөз баланы еңбек пен білімге қатар үйрететін кәсіптік білім саласына деген ерекше көзқарасты білдіреді.Өткен жылы колледждің жаңаша келбетімен және материалдық-техникалық әлеуетімен арнайы танысқан облыс әкімі Н.Нәлібаев өз сөзінде: «Жастар арасынан келешек еңбек адамын дайындауды &nbsp;бүгіннен бастауымыз қажет. Бұл бағыттағы жұмыстар Сыр өңірінде жүйелі түрде жүргізіледі. Сейітқали Бегманұлы бұған дейін Қызылорда қаласынан «Шұғыла», «Нұр-Шұғыла» балабақшаларын, «Zerde» интеллектуалды мектебін ашқан болатын. Енді міне, Қызылорда құрылыс және бизнес колледжін сенімгерлік басқаруға алып, оқу орнын заманауи талаптарға сәйкестендірді. Аймақтың еңбек нарығына, оның ішінде құрылыс саласына қажетті, сұранысқа ие кадрлар даярлайтын оқу орнының алдағы атқаратын жұмыстары ауқымды», – деді ризалық білдіріп.Сенімгерлік басқаруға беру шарты бойынша келісілген инвестициялық жоба құны 3,5 млрд теңге болатын. Кәсіпкер бүгінде колледжге осынша қаржы салып, сапалы игеріп отыр. Осыны көзімізбен көрген біз оқу орнындағы жаңалықтарға қанығып, таңғалысымызды да жасыра алмадық. Сол көрген-білгенімізді көпшілікке баяндап бермекшіміз.Жалпы, колледж балаларды 12 мамандық, 24 біліктілік бойынша мамандыққа даярлайды. Солардың бірі – тігіншілік.Кезінде қазақ іші тігіншілікті өнер деп танып, тігін шеберлерін «ісмер» деп атаған. Баяғы әжелерінің қаны бар қазіргі балаларымыздан неге ісмерлік шықпайды? Себебі, үйрету, оқу жоқ.Өткен жылы осы колледжде тігін ісін оқытатын бір ғана сынып болатын. Биыл тұтас тігін цехын көріп отырмыз.Бұрын тәжірибе жасау шеберханасынан айырылған училище балаларды теория жүзінде оқытумен шектелген. Кейінгі жылдары практикалық сабақ алу үшін қаладағы өндіріс орындарына апарған. Ескі тігін машиналарынан іс үйренген оқушылар «Далатекс» секілді заманауи шеберханаларға барғанда өздері көрмеген жаңа тігін машиналарымен жұмыс істеуді меңгеріп кете алмай қиналған. Ал бүгінде бұл колледжде ең соңғы үлгідегі ондаған «Jack» маркалы тігін машиналары бар.Биыл колледждің өзін-өзі қаржыландыруын жүзеге асыру мақсатында «Тігін өндірісі және киімдерді үлгілеу» мамандығы бойынша тағы да қосымша тігін цехы жабдықталып, бизнес-жоспар жасалған. Мақсат – білім алушылардың кәсіби дағдыларын өндіріс талаптарына, WorldSkills халықаралық талаптарына сәйкестендіру, олардың оқи жүріп, жұмыс істеуін, кәсіби білік-дағдыларын шыңдауын және табыс табуын ұштастыру.Колледждің көше жақ бетінен есік ашқан дәмхана мен &nbsp;шаштаразды көргенде де көп жайды түсіндік. Бұл екі бизнес нысаны жаңа құрал-жабдықтармен жабдықталып, жалға беріліпті. Пайда оқу орнының арнайы есепшотына түсіп, материалдық-техникалық базаны толықтыруға жұмсалады.Сонымен қатар колледж ауласынан былтыр басталған екі қабатты спорт кешенінің құрылысы да еріксіз назар аудартады. Алдағы мамыр айында пайдалануға берілуі жоспарланған кешен колледж оқушылары үшін ғана емес, облыс жұртшылығына қызмет етуге қауқарлы болатынын қазірден-ақ айғақтап тұр. &nbsp;Оның 3 мың шаршы метр болатын залы, 300 көрермен сыятын кенересі, киінетін орындар мен сусебезгі бөлмелері, би үйірмесіне берілетін фойесі, т.б. тамаша жай-күйі қызықтармай қоймайды.Жақын арада «Жиһаз өндірісі», «Дәнекерлеу ісі», «Автомобиль көлігіне техникалық қызмет көрсету, жөндеу және пайдалану», «Ғимараттар мен құрылыстарды салу және пайдалану» мамандықтары бойынша оқу-өндірістік шеберханалар құрылысын бастау жоспарлары да бар екен. Қазіргі кезеңде техникалық және кәсіптік білім беру жүйесінде инклюзивті білім беру өзекті мәселеге айналып отыр. Оқу-ағарту министрлігінің жанынан инклюзивті және арнайы білім беру департаментінің құрылуы да бұл мәселенің көкейтестілігін көрсетсе керек. Ерекше білім беру қажеттілігі бар білім алушыларды колледждерге оқуға қабылдаудан бастап оларды сапалы кәсіптік-техникалық біліммен қамтамасыз ету, педагогикалық-психологиялық қолдауды ұйымдастыру, арнайы құрал-жабдықтармен қамту сияқты түйіні шешілмеген мәселелер жетерлік.&nbsp; Біз сөз етіп отырған С.Ысқақов атындағы Қызылорда құрылыс және бизнес колледжінде аталған өзекті мәселелерді шешу барысында біршама ауқымды істер атқарылғаны анық.Биылғы оқу жылының басында инклюзивті-ресурстық кабинет ашылса, соңғы кезеңде сенсорлық бөлме жабдықталып, пайдалануға берілген. Мақсат – ерекше білім беру қажеттілігі бар білім алушыларды оқыту, тәрбиелеу және дамытудың тиімді ортасын құру. Оқу-тәрбие үдерісіндегі педагогикалық-психологиялық қолдауды дұрыс ұйымдастыру, ерекше білім беру қажеттілігі бар білім алушылардың өздерін осы қоғамның толыққанды мүшесі ретінде сезіне алуы тиіс. Оларға түсетін психоэмоционалдық жүктемені азайту үшін қажетті алғышарттарды жасау жұмысы колледжде өз шешімін тауыпты. Психолог, дефектолог, педагог-ассистенттерді жұмыс үстінде кездестірдік.Инклюзивті-ресурстық кабинет сабаққа арналған жиһаздармен, құрал-жабдықтармен: арнайы оқу үстелдері, магнитті, интерактивті тақта, көз зердесі зақымданған білім алушыларға арналған компьютер, пернетақталармен, жеке және топтық сабақтар жүргізуге арналған жұмсақ жиһаздармен, пуфиктермен, массажды доптар, дидактикалық және иллюстрациялық материалдармен, гамак, қол және аяқ моторикасын дамытуға арналған балансирлермен жабдықталған.Тіпті өзіміз осы жаңалықтарға тамсанып, арт-терапия, музыка терапиясы аталатын бөлмелерге бөгелдік. Түрлі құстардың үнін шығарып, желдің уілін, судың сылдарын салатын релаксация, яғни, тынығу бөлмесінде көз жұмып біраз рахат күй кештік. Балалардың бақытты сәттеріне «саяхат жасадық». Бұл сапалы, сиқырлы құрал-жабдықтар Мәскеуден, әрісі алыс шет елдерден әкелінген. Мұның бәрі әрине, ең алдымен колледжді сенімгерлік басқаруға алған Сейітқали Алшынбаевтың тынымсыз еңбегін танытып тұр. Бұрын білім саласында мұндай жағдай болған жоқ, сондықтан, бұл – облыстағы пилоттық жоба болып саналады.Колледждің осындай оқу-тәрбиелеу жұмыстарын көріп, көзіне жас алған &nbsp;ата-аналардың қуанышы бір бөлек сөз.&nbsp;<blockquote>«Бұрын ата-аналар баламыз стипендия алып жүрсе болды дейтін, қазір білім алса екен дейді. Бұл – біздің Үкіметіміздің &nbsp;техникалық және кәсіптік білім беру жүйесін жетілдіре түсу бағытына барынша көңіл бөлуінің нәтижесі», – дейді колледж директоры, педагогика ғылымдарының кандидаты Әлия Досмаханова.</blockquote>Осылайша біз сенімгерлік басқарудың сенімге селкеу түсірмеген білікті де жанашыр жұмыстарына куә болдық.&nbsp;

Заманауи үлгіде жабдықталған оқу ордасы

<a href="https://kyzylorda-news.kz/">Kyzylorda-news.kz</a>&nbsp;Мемлекет басшысы Ұлттық құрылтайда көтерген маңызды мәселелер жөнінде Парламенттік тыңдалым өткізілмек. Бұл туралы Мәжілістің жалпы отырысында палата спикері Ерлан Қошанов айтты, деп хабарлайды Қазақпарат.<blockquote>«Археология, мемлекеттік рәміздер мен мемлекеттік наградалар саласындағы заңнаманы жетілдіру жұмысы күтіп тұр. Мәселен, кейінгі күндері қоғам қызу талқылап жатқан Герб мәселесі өзекті болып отыр. Шынтуайтында, аталған мәселенің талқыға түсуі – қоғамдағы пікір алуандығының көрінісі. Қолданыстағы Гербтің бейнесіне байланысты жастар, қоғам белсенділері тарапынан көтерілген ұсынысқа Президентіміз құрылтайда өз пікірін білдіріп, ортақ, байыпты шешімге келуге шақырды. Мемлекет басшысы осылайша Герб мәселесін ашық талқылауға шығарып отыр», - деді Ерлан Қошанов.</blockquote>Осы орайда палата спикері жалпы жұртшылықпен бірге, мемлекеттік символиканы зерттеп жүрген геральдика саласының кәсіпқой мамандарының ұсыныстары жете талқылануы қажеттігін баса айтты.&nbsp;<blockquote>«Біздің Герб – сан ғасырлық тарихымызды таңбалайтын, мемлекетіміздің айбынын асыратын, халқымыздың асқақ рухын айшықтайтын негізгі символ болуы керек. Ең бастысы, еліміздің болашаққа ұмтылысын бейнелейтін бірегей атрибутикасына айналуы тиіс. Бұл, әрине, қоғам мен арнаулы комиссияның құзыретіндегі мәселе. Президент белгілеп берген бағыт-бағдар бәріңізге түсінікті деп ойлаймын. Сондықтан Ұлттық құрылтайда көтерілген маңызды мәселелер жөнінде Парламенттік тыңдалым өткізуіміз қажет деп санаймын. Себебі келелі жиында айтылған нақты ұсыныстарды орындау бойынша мақсат міндеттерімізді бірге айқындауымыз керек», - деді Ерлан Қошанов.</blockquote>&nbsp;Фото: Жаслан Жұмабеков

Ерлан Қошанов: Герб мәселесінің талқыға түсуі – қоғамдағы пікір алуандығының көрінісі

&nbsp;<a href="https://kyzylorda-news.kz/">Kyzylorda-news.kz</a>&nbsp; Тәлім мен тағлымды шәкірт санасына дарыта білген ұлағатты ұстаздар арамызда жетерлік. Халық баласын оқытуда қажыр-қайратын жұмсай білген Мейрамкүл Серікбаева – білім саласының майталманы. Ұстаздық қызметтің ұлағатын сезініп, аға буыннан тәлім алған білімді педагогтың өмір жолы өнегеге толы. Қаншама жыл ағартушылық қызметтің қыр-сырына қаныққан шәкірттерінің ардақтысы өзінің ұстаздарын жол бастаушы ретінде көреді. Талай уақыт мектеп оқушыларына тәлім-тәрбие берген аяулы жанның педагогика саласындағы еңбегі ұшан-теңіз.Мейрамкүл Серікбайқызы қарапайым отбасында дүниеге келген. Қыз күнінен білімге құштар жан ұстаз болуды армандайды. Адал еңбекке негізделген мұғалімдік қызметтің жүгін айқын сезінеді. Әрине, кеңпейілді, жүрегі таза ауыл қызының ойлаған барлық мақсаты ағартушылықпен байланысты болғаны көпшілікке аян. Қазіргі №35 И.Тоқтыбаев атындағы мектеп-лицейден білім алған кейіпкеріміз сүйікті мамандығына қызығушылықты ұстаздарынан көрген тәлім-тәрбиесі арқылы оятады.<blockquote>– Отбасымызда біз әкенің ұлағатын, ананың шапағатын көріп өстік. Ата-анамыз түзу жолмен жүруді, үнемі оқуды, тынбай ізденуді талап ететін. Сонда біздің болашағымыз үшін алаңдаушылық білдіретіні жасырын емес еді. Мектеп қабырғасында жүргенде Сақыбек Алданазаров, Ұлтай Болғанбаева, Дәмеш Мамытбаева, Жоламан Ерманов сынды білімді ұстаздар педагогика мамандығының иесі атануыма ерекше септігін тигізді. Әрине, өмірлік жолымда ағай-апайлардың болмысы, өздерінің ұстауы, тектілігі, сабақ берудегі методикасы мамандығымыздың нағыз майталманы болуға ұмтылдырды. Көркем әдебиетке біздің буын өте жақын болды. Сондықтан қазақ тілі мен әдебиеті пәнінің мұғалімі атандым. Жоғарғы оқу орнын бітіргеннен кейін ұстаздық қызметім бастау алды, – дейді ардақты ана.</blockquote>Жалпы Мейрамкүл Серікбайқызы В.Гоголь атындағы пединститутты бітіргеннен кейін тереңөзектік Аманкелді Есқалиевпен отбасын құрады. Ал алғашқы еңбек кітапшасы осыдан 44 жыл бұрын ашылған ұлағатты ұстаз «Жалын» тынығу лагерінде тәрбиеші болып жұмыс&nbsp;істейді. Содан кейін өз мамандығы бойынша «Қызылдихан» орта мектебінде оқушыларға сабақ береді. Іргелі білім ордасында мол тәжірибе жинақтап, шығармашылықпен айналысуға машықтана білді. Өз кезегінде басшылықтың ұйғарымымен білікті ұстаз тәрбие ісі жөніндегі орынбасар қызметін жоғарғы деңгейде жүзеге асырады.<blockquote>– Ауыл балаларының тәрбиесіне жауапты болу – үлкен міндетті жүктеді. Еңбеккеш балаларға Ресей федерациясына саяхат демалысын ұйымдастырып, тәрбие жұмысын жандандыра алдық. Мүмкін басшылық қарым-қабілетімді басқаша сынағысы келген болар. Маған аудандық білім бөлімінің бас инспекторы қызметін жүктеді. Сондай-ақ әдістемелік кабинетінің меңгерушісі лауазымын сеніп тапсырды. Мұнда аға буын өкілдерінен білмегенімізді үйреніп, білім саласының бүге-шүгесіне қанықтық. Жастық жігермен әрбір қызметте белсенділік таныттық. Атаулы мектеп ашуға жұмыс жасадық, – дейді өз ісінің білгірі.</blockquote>Ұлағатты ұстаз зейнет демалысына шығам дегенше №36 Ә.Тәжібаев атындағы мектеп-лицейде қажырлы еңбек етті. Орыс сыныбындағы қазақ тілі мен әдебиеті пәнінен сабақ берген Мейрамкүл Серікбайқызы өзге ұлт өкілдерінің балаларын шығармашылыққа баулыды. Оның шәкірті Мария Лаврова өзге ұлт өкілдері арасында өткізілген республикалық байқауда ІІІ орын иегері атанды. Айта кетейік, білім саласының ардагері әлі күнге білім ордасымен байланысып отырады. Оның ұлы Нұрлан Есқалиев «Сырдария» мұнай компаниясында тау-кен инженері болып қызмет етеді. Келіні Майра Есқалиева – ағылшын пәнінің мұғалімі. Қазіргі уақытта ақ жаулықты ананың немерелері ата-ана үмітін ақтап, өз саласының мықты маманы атануға талпынуда.

Білім саласының білгірі

<a href="https://kyzylorda-news.kz/">Kyzylorda-news.kz</a> Мемлекет басшысының тапсырмасына сәйкес Ұлыстың ұлы күні – Наурыз мейрамын тойлаудың жаңа тұжырымдасы әзірленді. 14-23 наурыз аралығында халықтық мерекені тойлауға арналған Наурызнама онкүндігі жарияланды. Осыған орайда бүгін C.Толыбеков атындағы №3 ІТ мектеп-лицейде Ұлттық киім ұлтымыздың ұлы мерекесінің абыройын арттырған ерекше күн аталып өтілді. Шарада 1-11 сыныптар арасында «Ұлттық киім – ұлт мұрасы» атты ұлттық киімдер дефилесі ұйымдастырылды. Дефиледе 100-ден аса оқушы ұлттық киіммен сән үлгісін көрсетті. Қатысқан барлық оқушыларға «Ең үздік ұлттық киім», «Ерекше этностиль», «Ерекше сән үлгісі», «Заманауи стиль» номинациялары бойынша дипломдармен марапатталды.<img src="https://knadmin.beoblood.kz/uploads/5c42cb2d_601e_4427_a178_3508373d74a3_14fafd43ac.jpg" alt="5c42cb2d-601e-4427-a178-3508373d74a3.jpg"><img src="https://knadmin.beoblood.kz/uploads/fb_img_1710838571600_eaf041838e.jpg" alt="fb_img_1710838571600.jpg">

Қазақстан және Қызылорда облысының жаңалықтары: Білім