<a href="https://kyzylorda-news.kz/">Kyzylorda-news.kz.</a>&nbsp; Болашақ еліміздің тағдыры бүгінгі жастармен тікелей байланысты екендігі белгілі. Иә, Мемлекет басшысы Қасым-Жомарт Тоқаевтың бастамасымен мемлекетімізде жүзеге асып жатқан саяси реформаның негізгі бағыттарының бірі – жастар саясатын жаңғырту. Міне, сол үшін елімізде жастар саясаты мемлекеттің маңызды міндеттерінің біріне жатады. Мемлекет тарапынан да ел жастарына біршама мүмкіндіктер қарастырылып, түрлі бағдарламалар арқылы қолдау көрсетіліп жүр.Бүгінгі статистикалық мәліметке сәйкес, ауданда 78 850 халық болса, оның 25473-і, яғни 24,2 пайызы 14 пен 35 жас аралығындағы жастарды құрайды екен. Атап өтер болсақ, мектеп қабырғасында 14-18 жас аралығында 6752 оқушы болса, орта арнаулы оқу орнында 696 студент білім алады.Сонымен бірге аудандық жастар ресурстық орталығы аудан жастарымен тығыз байланыс орнатып, жүйелі жұмыс атқаруда. Мәселен,«Жас маман» жобасы бойынша – 11кездесу, «Дін және жастар» – 6 кездесу, «Еріктілер мектебі» – 24мәдени-көпшілік шара, сондай-ақ «Жастар қоғам назарында» – 7 рейд жұмыстары, «Мен спортты таңдаймын» – 6спорттық шара және «Жас кеңесші» – 3 «Ашық есік» акциясы ұйымдастырылған. Жалпы жыл басынан бері 57 шара ұйымдастырылып, оған 1711-ге жуық жас тартылған.Тағы айта кетерлігі, жыл басында аудан әкімі Серік Сағитжанұлының тапсырмасына сәйкес аудандық жастар ресурстық орталығы мамандары ағымдағы жылдың 18 мамырынан бастап мемлекеттік жастар саясатын ауыл жастары арасында кеңінен насихаттау мақсатында «Мүміндіктер керуені» жобасын қолға алған. Атаулы жобаның басты мақсаты – ауылдық жерлердегі жастардың әлеуетін көтеру. Бұл жоба бойынша бүгінге дейін Бекбауыл, Бөген, Жаңақұрылыс, Аққұм және Аралқұм ауылдарының 263 жас тұрғындары тартылған. Сонымен қатар жоба аясында «Ауыл аманаты» агронесие бағдарламасы, жас кәсіпкерлердің кәсібін дамыту, NEET санатындағы жастармен жұмыс жасау, сондай-ақ жастар мен жасөспірімдер арасындағы құқықбұзушылықтың алдын алу және мектеп бітіруші түлектерге мамандық таңдау жөнінде ақпараттар беріліп, ұсыныс-пікірлер тыңдалды. Атаулы жоба аясында ауданға қарасты басқа да ауылдық округтер қамтылып өтпек.<blockquote>–Бүгінгі басты мәселелердің бірі – жұмыссыздық болып отыр. Жұмыссыздық &nbsp;салдарынан көптеген жастар құқықбұзушылық әрекеттерге барып, түрлі жолдарға түсіп жатады. Осы тұста аудан жастарын жұмыспен қамту бойынша тиісті шаралар қабылданып, жүйелі жұмыстар жүргізіліп келеді. Өткен жылы 1346 жұмыссыз жас маусымдық, жастар тәжірибесі және тұрақты негіздегі жұмыстарға орналастырылып, жұмыссыз есебінен алынған. Ал үстіміздегі жылдың бірінші тоқсаны бойынша аудандық жұмыспен қамту орталығына жұмыссыз ретінде 1407 адам тіркелсе, оның 487-сі жастар. Қазіргі кезде 72-сі жастар тәжірибесімен және 167-сі қоғамдық жұмыстармен қамтылды. Сонымен қатар жұмыссыз жастар санын азайту мақсатында маусымдық «Жасыл ел» еңбек жасағына және ақылы қоғамдық негіздегі жұмыстарға тарту көзделіп отыр. Қабылданған мемлекеттік бағдарламалардың жастар үшін маңызды тұстарын түсіндіру және оларды жүзеге асыру мақсатында мобильді топ мүшелері алдағы уақытта көшпелі «Жастар керуенін» жалғастыратын болады, – дейді аудандық жастар ресурстық орталығының директоры Ақтілек Алтынбекұлы.</blockquote>Кешегі күн – бүгінгі тарих. Мемлекет басшысы Қасым-Жомарт Тоқаевтың «Тәуелсіздік бәрінен қымбат» атты мақаласында: «Бабалардан мұра болған қасиетті жеріміз – ең басты байлығымыз. Қазаққа осынау кең -байтақ аумақты сырттан ешкім сыйға тартқан жоқ», – деп баса айтты. Алдағы уақытта тәуелсіздігіміздің тамырын тереңдетіп, Қазақстанды іргелі мемлекетке айналдыру жастардың жауапкершілігінде екендігі сөзсіз. Сол үшін «Жас келсе – іске» деген қағиданы әрбір жас ұстана отырып, әрекет ете білгені жөн.

Жастар күшімен Аралда жаңа бастамалар қолға алынуда

<a href="https://kyzylorda-news.kz/">Kyzylorda-news.kz.</a> Күнделікті күйбең тіршіліктен бір сәт қол үзіп, рухани демалыс жасаудың пайдасын көзі ашық жұртшылық бүгінде жақсы түсінеді. Содан болар, театр, мәдениет үйіне ағылатындар да жетерлік. Бұл қала тұрғындарының рухани құндылықтарға басымдық беретінін аңғартса керек.&nbsp;Бүгінде аймақ халқының рухани демалыс орнына айналған Н.Бекежанов атындағы қазақ-музыкалық академиялық драма театры қызмет көрсетеді. 600 орындық руханият ордасында белгіленген кестеге сәйкес спектакльдер, эстрада жұлдыздарының концерті, шығармашылық кештер ұйымдастырылады. Бұдан бөлек қалада А.Тоқмағамбетов атындағы мәдениет үйі бар. Бұл мекемеде жоспар бойынша салтанатты жиындар, іс-шаралар өтеді. Десе де, халық саны өсіп, сана жаңғырған тұста аталған руханият ордаларына деген сұраныстың артуы заңдылық.&nbsp;Осы орайда облыс әкімі Нұрлыбек Нәлібаев Қызылордадан заманауи үлгідегі бірнеше әлеуметтік нысан салу туралы бастама көтерген болатын. Соның бірі – Бейбарыс сұлтан көшесі бойынан іргесі қаланған Өнер сарайы.&nbsp;Аталған руханият ошағының іргесі былтыр қаланды. Екі гектар аумаққа салынып жатқан ғимараттың жалпы ауданы 12,4 мың шаршы метрді құрайды. Ал, көпфункционалды кешеннің сыйымдылығы 1000 орындық. Онда мәдениет саласының симфониялық, эстрадалық және ұлттық өнер бағытындағы концерттік бағдарламалар мен түрлі форматтағы қоғамдық іс-шаралар өткізіледі деп жоспарлануда.&nbsp; Бүгінде аталған екі қабатты ғимараттың құрылысы қарқынды жүргізілуде. Нысанның жоба-сметалық құжаты демеушілер есебінен әзірленген. Ал, жоба құны 3 миллиард 370 млн теңгені құрайды. Өткен жылы басталған құрылысты жүргізуге 289 миллион теңге қаржы жұмсалыпты. Биыл 3 миллиард 80 миллион теңге игерілуі қажет. Руханият ошағын жоспар бойынша жыл аяғына дейін ел игілігіне беру көзделіп отыр.Аймақта алпыс жылдан астам тарихы бар «СМП-Қызылорда» ЖШС құрылыс компаниясы Өнер сарайының құрылыс жүргізуші мердігер мекеме. Сонау Кеңес заманынан бері құрылыс саласында еңбек етіп, өзіндік қолтаңбасын қалыптастырған бұл ұжым тек облыста емес, республика көлемінде әлеуметтік нысандардың іргесін қалап келеді. Екі өнеркәсіптік базасы жасақталған компанияға артылған жауапкершілік жүгіде ауыр. Сондықтан халық игілігіне қажетті ғимаратты талапқа сай сапалы әрі уақытылы орындауды мамандар жіті сезінеді.&nbsp;<blockquote>«1000 орындық Өнер сарайының құрылысы былтыр басталған. Ауқымы кең жоба болғандықтан нысанды салу өтпелі кезеңмен жүргізілуде. Бұйыртса, биыл желтоқсан айында пайдалануға беру жоспарланған. Қазір құрылыс басында 119 құрылысшы жұмыс істеуде. Әрқайсысының өзіне жүктелген міндеті бар. Күнделікті азанымен жұмыс қыза бастайды. Ел игілігіне қажетті ғимараттың сапалы салынуы әрі белгіленген мерзімде пайдалануға берілуін тиісті мамандар қадағалауда. Құрылысқа қажетті барлық техникалар, құрал-жабдықтар толық қамтылған», – дейді &nbsp;«СМП-Қызылорда» ЖШС бас инженері Жанаман Құлжанов.&nbsp;</blockquote>Бас инженердің айтуынша, құрылысқа қажетті құрал-жабдықтар мекеменің өндіріс ошағында шығарылады екен. Тек кейбір құралдар мен шикізат өнімдерін ғана сырттан әкеледі. Сол себепті, мұнда жетіспеушілік жағдайы жоқ. Құрылыс саласында алпыс екі жылдық тарихын қалыптастырған мекемеде мұндай ұсақ-түйек кемшілік болмауы тиіс. Сапаға жұмыс істейтін ұжымға абырой бәрінен маңызды.&nbsp; Мердігер мекеме директоры Темірхан Әлімқұлов алғаш еңбек жолын Шиелі ауданында жүргізуші болып бастаған. Одан кейін, Алматы темір жол транспорты инженерлер институтына «Инженер-құрылысшы» мамандығы бойынша оқуға түсті. Сөйтіп, Бәйгеқұм қыстағында ПМК-47 мекемесінде тас қалаушы болып жұмыс істеді. Қарапайым маман болып бастаған азамат еңбекқорлығының арқасында биіктен көріне білді. Атап айтсақ, Шалқар станциясындағы СМП-660 «Ақтөбетрансстрой» мекемесінде учаске мастері, 1983 жылы прораб, 1984 жылдан бас инженер қызметтерін атқарды. Содан бері құрылыс саласындағы қанша сатыдан өтті. Тәжірибесі толысқан майталман маман атанды.Қазіргі кезде «СМП-Қызылорда» ЖШС облыс көлемінде ғана емес, ел аумағындағы кез-келген күрделі ғимараттарды салу бойынша құрылыс монтаждау жұмыстарын бірінші санаттағы мемлекеттік лицензия негізінде жүзеге асырады. Бұл мекеме арнайы құрылыс техникасымен, түрлі мақсаттағы механизмдер және үлкен автомобильдер паркімен жабдықталған.<blockquote>«Мекемеде 245 адам еңбек етуде. Оның ішінде 171 әртүрлі мамандық иелері бар. Атап айтсақ, 42 экскаватор, бульдозер, кран машинистері мен жүргізушілер мен 32 инженерлік-техникалық қызметкерлер бар. Мұнда жұмысшылардың әлеуметтік жағдайын жақсарту, жалақы, еңбек демалысын уақытылы беру, арнайы киіммен қамтамасыз ету басты назарда. Бұл мекеменің тарихы тереңде жатыр. Толығырақ айтсақ, алғаш 1945 жылы Қызылорда қаласынан Ташкент темір жолы механикаландырылған колоннасының прорабтық учаскесі болып құрылды. Ал, 1958 жылы осы учаске базасында Теміржол байланысы министрлігіне қарасты Қазақ теміржолының СМП-355 құрылыс мекемесі жасақталады. Ол Түркістан станциясынан Сексеуіл станциясына дейінгі аралықтағы теміржол саласына байланысты барлық құрылыс-монтаж жұмыстарын жүргізумен айналысты. Айта кету керек, мекеме құрылғаннан бері қырық жыл ішінде вагон депосын қайта жарақтандыру кешенін, теміржол ауруханасын салды. Қалалық ішкі істер бөлімі орналасқан аудандағы, темір жол вокзалы маңындағы тұрғын үйді, монша, локомотив депосы, рельс дәнекерлеу зауыты, нан зауыты, балабақшалар және басқа да нысандар салып, пайдалануға берді. Осылайша, 1998 жылы темір жол құрылыс мекемесінің барлығы «Желдорстрой» акционерлік қоғамы құрамына еніп, осы құрамдағы біздің мекеме СМП-4 болып аталды. Сөйтіп, көптеген нысанға құрылыс монтаж жұмысын жүргізе бастады. Сол кезде қарашығанақ кешенінде темір жолды дамыту, Ақсай темір жолы, Ұзынағаш-Алматы темір жол учаскесін жарықтандыру, жанармай құю бекеті, шағын қазандық құрылысы салынды. Ал 2002 жылы «Желдорстрой» АҚ кәсіпорыны қайта құрымдауға түсіп, мекеме жаңадан өз алдына «СМП-Қызылорда» ЖШС болып аталды. Алғашқы кезде мекеменің ішкі жағдайының төмен екенін көрдім. Жұмысшылардың да жағдайы жасалмаған. Осы кезеңде құрылыс саласының ыстығына күйіп, суығына тоңып, шыңдалдым. Жылдар бойы жинақтаған тәжірибемді ел игілігі жолындағы жұмыстарға жұмсап келемін. Қиындықты көппен бірге көріп, жетістікке жұртпен бірге жетіп жүрміз. «Бір адам бейнеттеніп құдық қазса, мың адам мейірленіп шөл қандырады» деген даналық сөз бар. Біздің ісіміз көпшілікке саясын түсіріп жатса марқаямыз», – дейді «СМП-Қызылорда» ЖШС директоры Темірхан Әлімқұлов.</blockquote>Серіктестіктің өндірістік қуаты жоғары, ауқымы кең. Кәсіпорында лай-бетон дайындау торабы, ағаш құрылым цехы, арматура цехы, механикалық цех, пластикалық бұйымдар цехы, шағын темірбетон бұйымдарын дайындау цехы, қозғалқыштарды орау цехы, екі бетон зауыты және база аумағында ұзындығы 3,6 шақырым теміржол желісі бар. «СМП-Қызылорда» ЖШС құрылған уақыттан бері тұрғын үйлер, мектептер, балалардың жазғы тынығу лагерін, ауыл клубтарын, салды. Атап айтсақ, «Сейхун» спорттық-сауықтыру кешені, Қорқыт ата мемориалды кешені, әкімшілік ғимараттардың құрылысын жүргізді.Өнер орталығы заманауи құрал жабдықтармен қамтамасыз етілмек. Мың адамға арналған мәжіліс залы, арнайы үйірмелерге арналған бөлмелер жұмыс істейтін болады. Сонымен қатар, қаладағы көрікті нысандардың біріне айналмақ. Оқушылар мен жас жеткіншектердің бос уақыттарын тиімді пайдалануына арналған өнеге ордасы болмақ. Осынау дәуірлі өнер ордасы – Сыр төрінде салтанат құрмақ. Шаһардың жыл санап көркейіп, зәулім ғимараттар бой көтеріп жатқандығын байқау қиын емес. Әсіресе, биыл Бейбарыс сұлтан көшесі бойындағы құрылыс қарқынды жүруде. Бірқатар әлеуметтік нысан орналасқан көше бойы қайта жаңғыртылып, Өнер орталығы мен Неке сарайы бой көтермек. Ал облыс әкімдігінің алды – жазғы уақытта саялайтын демалыс алаңына айналмақ. Онда жарық шамдар, скверлер мен субұрқақтар орналастырылып, жанға жайлы жағдай жасалады. Одан бөлек көркейту-көгалдандыру жұмыстары жүргізіледі. Осылайша, «Сыр Ана» монументі, облыс әкімдігі, шығармашылық үйі, бірқатар білім ошақтары және ана мен бала орталығы, орталық мешіт орналасқан қатарға жаңа руханият ошағы &nbsp;қосылатын болады.

Қызылордада заманауи руханият ордасы ел игілігіне жарамақ 

<a href="https://kyzylorda-news.kz/">Kyzylorda-news.kz.</a> Америкалық Work and Travel студенттерге арналған танымал бағдарламасы арқылы жұмыс істеп, тәжірибе жинап жүрген жерлесіміз, жас ізденуші Ұлыстан Қарасаев. Осы тұста АҚШ-қа арман қуып жеткен Ұлыстанмен сұхбаттасудың сәті түскен еді.– Ең алдымен өзіңіз жайлы айтып өтсеңіз…Мен Ұлыстан Жомартұлы, 2002 жылы қасиетті Қызылжар топырағында дүниеге келгенмін. Ыбырай Алтынсарин атындағы №204 мектептің 2020 жылғы түлегімін. Қазір Алматы қаласындағы, Қазақстан-Британ техникалық университетінің 2-ші курс студентімін. Қарапайым қоғамда тума-туыс, таныс көп шоғырланан жерге барып үйренгенбіз. Алайда бұл жолы тәуекелге бел байлап, бағымды сынап көрдім. Осылайша таптаурындарды бұзып, 2022 жылдың жазында «WORK AND TRAVEL» бағдарламасымен Америкаға баруды ұйғардым.– Бағдарлама жайына толығырақ тоқтала кетсеңіз…– «WORK AND TRAVEL» бұл – америкалықтардың тұрмыс-тіршілігі, мәдениетімен танысып, шетелден тәжірибе жинақтауға арналған бағдарлама. Ол көріп, ағылшын тілін жетілдіргісі келетін студенттерге арналып құрылған теңдесіз халықаралық байланыс бағдарламасы. Екі бөлімнен тұрады. Біріншісі – сонда жұмыс жасау. 15 мамырдан 15 қыркүйек аралығында дейін әрбір студент өзіне ыңғайлы күнтізбесін жасайды. Дегенмен студенттер тек ойын-сауық саябақтары, мейрамханалар, дүкендер, Ұлттық саябақтар, қонақ үйлер секілді қызмет көрсету саласында ғана жұмыс істей алады. Жұмысты көбіне АҚШ-тың шығысында орналасқан Нью-Йорк, Нью-Джерси, Масачусетс сынды штаттарында жасайды.Екінші – саяхаттау. Жұмыс мерзімі аяқталғаннан соң студенттер 30 күнге дейін саяхаттауға құқылы. Яғни, студент жаз бойы жинаған ақшасын, басқа қалаларға саяхаттауға жаратса болады. Бұл саяхат көбінесе Американың батыс қалаларына жасалады. Студенттерге Лос-Анджелес, Лас-Вегас, Сан-Франциско секілді қалаларға саяхаттау мүмкіндігі туады. Міне, бағдарламаның бар баяны осы.– АҚШ-тың қай қаласындасыз? Қашан бардыңыз және қандай мамандықта оқып жүрсіз?– Мен АҚШ-тың Нью-Джерси штатындағы, Оушен сити қаласында бірінші маусымнан бастап жұмыс жасап жатырмын. Бұл қалада фаст-фудта кассашы қызметін атқарып жүрмін. Жоғарыда айтып кеткендей, бірінші бөлімімен келдім. Алдымен мұнда осындай қарапайым жұмыс жасауға мүмкіндік береді.– Құпия болмаса мұндағы айлық-табысыңыз қанша?– АҚШ-та ақшаны сағатына төлейді. Мен Оушен сити қаласында екі жерде жұмыс жасаймын. Бірінші негізгі жұмысымда 7-8 сағат көлемінде жұмыс жасап, сағатына 13 АҚШ долларын аламын. Ал екінші жұмыста сағатына 17 доллар. Бір күнгі жұмысқа 5-6 сағат беріледі. Сөйтіп, аптасына бір күнімді демалысқа арнаймын. Орташа есеппен алғанда бір айда 3500-4000 доллар көлемінде ақша табамын.– Бұл қала несімен таңғалдырды?– Бұл қаланың бір ерекшелігі мұнда ешқандай ішімдік, темекі секілді зиянды заттар сатылмайды. Қала көшелері соның арқасында таза және тұрғандары да керемет.Тағы бір таңғалдырар тұсы ол – Атлант мұхитынан ескен салқын жел. Оушен сити қаласында жаздық орташа температура 26-30 градус аралығында болады. Мұхит лебі ескенде өзіңді жеңіл сезінесің. Бұл да қаланың ерекше тұстарының бірі. Алайда, мұның барлығы туған жер топырағына жетпейді.– Жалпы сіздің мұхит асып, арман қууыңызға не түрткі болды?– Америка құрама штаттарын көру бала күнгі армандарымның бірі еді. 11 сынып тәмамдаған шақта АҚШ-қа жоғары оқуға түсемін деген жоспарым болған. Бірақ ағылшын тілін жеткілікті білмегендіктен бұл жай арман болып қалды. Кейін Алматы қаласына жоғарғы оқу орнына түскеннен кейін, студенттерге арналған «WORK AND TRAVEL» бағдарламасы туралы естідім. Бұның өмірімдегі ең үлкен мүмкіндіктердің бірі екенін түсініп, осы бағдарлама арқылы шетелге баруға бекінді. Қуанышыма орай ең үлкен армандарымның бірі 19 жасымда орындалды.– Онда тәжірибе алмасу, яғни жұмыс жасау барысында қандай қиыншылықтармен кезіктіңіз?– Ондағы қиыншылықтың бірі ағылшындардың айтуынша, «Jet Lag» болатын. Яғни, мұндағы уақыт белдеуінің басқаша болуы. Нью-Йорктың Алматы уақытынан 10 сағат айырмашылығы бар. Бірақ 3-4 күннен кейін бәрі өз орнына келді.Ал келесі, үлкен қиыншылықтардың бірі жергілікті тұрғандарды түсініп, олармен сөйлесу болды. Себебі Америка тұрғындарының ағылшын тілінде сөйлеу акценттері, мен ойлағаннан да қиын болып шықты. Сонымен қатар бірге жұмыс жасайтын Коста-Рика, Колумбия және Тайланд секілді елдердің студенттерінің ағылшын акцентіне үйреніп кету оңай болмады.– «WORK AND TRAVEL» бағдарламасы бойынша АҚШ-қа барғысы келетін жасқа қандай ақыл-кеңес берер едіңіз?– Бұл бағдарламаға қызығушылығы артып, бағын сынағысы келген немесе жоспарлап жүрген студенттерге айтарым көп. Бұл – өмірлеріңде берілетін ең керемет мүмкіндік. Және мұндай мүмкіндікті қорыққаннан немесе тіл білмегендіктен жіберіп алу үлкен қателік болады. Сол себепті ойыңыздан барлық күмәніңізді артқа тастап, өзіңізге деген үлкен сеніммен арманыңызға қол жеткізіңіз. Бұл ересек өмірге жасалатын үлкен қадам. Себебі АҚШ-та жүргенде жауапкершіліктің көп бөлігі өзіңізге түседі. Бұл тек өзіңізге тәуелді болуға көмектеседі дегім келеді.Сонымен қатар ағылшын тілін барынша жақсы меңгеріңіз, неғұрлым жақсы білсеңіз, соғұрлым Америкаға саяхатыңыз оңай болады. Бұл бағдарламаға қомақты ақша кетуі мүмкін, бірақ оны сіз еселеп, қайтарып алып келе аласыз. Егер мүмкіндік болса, міндетті түрде қалыс қалмаңыз.– Әңгімеңізге рахмет!

Ұлыстан Қарасаев: Студент жастарға мүмкіндік берген бағдарлама 

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласы әкімінің орынбасары Дінмұхаммед Ермековтың бастамасымен ҚР Бәсекелестікті қорғау және дамыту агенттігінің Қызылорда облысы бойынша департаменті, Қызылорда облысының мемлекеттік кірістер департаменті, ҚР Қаржылық мониторинг агенттігінің Қызылорда облысы бойынша экономикалық тергеп-тексеру департаменті, облыстық кәсіпкерлік және өнеркәсіп басқармасы, облыстық ауыл шаруашылығы және жер қатынастары басқармасы мен «Байқоңыр» ӘКК» АҚ өкілдерінен құралған жұмысшы топ әлеуметтік маңызы бар азық-түлік тауарларының бағасына бақылау жүргізді.Аралау барысында қала аумағында орналасқан «Смолл», «Магнум», «Анвар», «Қызылорда», «Аль-Асад», «Радуга», «Астана», «Тұран», «Меркурий» «Мирас» сынды сауда үйлері қамтылып, &nbsp;ондағы мамандарға әлеуметтік маңызы бар азық-түлік тауарларының бағасына қатысты сауда субъектілеріне қойылатын заң талаптары түсіндірілді.&nbsp;Сонымен қатар, сауда үйлерінің өкілдеріне ресми хабарламалар таратылып, сауда субъектілеріне рұқсат етілген сауда үстемесін сақтауын бақылау бойынша тұрақты негізде жұмыс жүргізу тапсырылды.

Қызылорда: Әлеуметтік маңызы бар азық-түлік тауарларының бағасына бақылау жүргізілді

<a href="https://kyzylorda-news.kz/ru">Kyzylorda-news.kz.</a>&nbsp;Жалағаш ауданының әкімі Асқарбек Есжановтың төрағалығымен аудандық төтенше жағдайлардың алдын алу және жою жөніндегі комиссия отырысы өтті.Күн тәртібінде жазғы мезгілде суға шомылу маусымында су айдындарындағы қауіпсіздік шаралары, елді мекендердегі өрттерді сөндіру және елді мекендерден ашылған өрт сөндіру бекеттерінің жай-күйі, аудан көлемінде жедел ішек инфекциялары мен топтасқан тағамнан улану ауруларының індеттік маусымында аурушаңдық деңгейін тұрақтандыру, алдын алу және болдырмау мақсатында атқарылған жұмыстары туралы негізгі мәселелер қаралды.Жалағаш ауданының су айдындарындағы суға түсу маусымында келеңсіз жағдайларды болдырмау және олардың алдын алу бойынша түсіндірме жұмыстарын одан әрі күшейту мақсатында Жалағаш ауданының әкімі Асқарбек Есжанов сала мамандарына тұрғындар арасында кеңінен ақпараттандыру жұмыстарын жүргізу, әлеуметтік жағдайы төмен отбасы балаларының тізімін анықтап тұрмысы төмен және көпбалалы отбасылардың балаларын бассейнге ақысыз суға шомылуды ұйымдастыру, «Ақтерек» сауықтыру лагерінде орналасқан бассейнді балалардың демалысы басталғанға дейін дайындығын қамтамасыз ету және ішек инфекцияларының алдын алу бағытында тиісті тапсырмалар берді.Жалағаш ауданына қарасты, ауылдық округтерінде өрт сөндіру бекеттерін кезең-кезеңімен құру туралы Қызылорда облысы әкімінің жоспарына сәйкес өрт сөндіру бекеттерінің ашылуы бақылауға алыну қажеттігін жеткізген Жалағаш ауданының әкімі бюджеттік қаржы есебінен ауыл әкімдері өкімімен құрылған ерікті өрт сөндіру жасақшыларын тиісті құрал-жабдықтармен, арнайы өртке қарсы киімдермен қамтамасыз ету бойынша шара қабылдап, өрт сөндіру бекеттерінің ашылуын маусым айының соңына дейін ұйымдастыруды тапсырды.&nbsp;Жалағаш ауданының аумағында эпидемиологиялық маңызды нысандардың санитарлық гигиеналық жағдайын бақылауға алып, жіті ішек аурулары және тағамнан уланудың алдын алу мақсатында тұрғындар арасында санитарлық ағарту және түсіндірме жұмыстарын жүргізу, мектеп, балабақшалардағы тамақтанатын орындарды санитарлық талаптарға сәйкес болуын және мектептерде балалардың ас рациондарының талапқа сай болуы мен жеткізілген ас өнімдерінің жарамдылық мерзімдері қатаң бақылауға алу туралы, ауыз су қоймаларына жылына екі рет «Жалағаш ауданының оқшау сумен жабдықтау жүйелерін пайдаланушы» өндірістік бөлімшесі тарапынан механикалық тазалау, жуу-шаю жұмыстарының жүргізілуін бақылауға алу, инфекциялық аурулар тіркелген елдерден оралған азаматтарды көші–қон полиция қызметкерлері уақытылы есепке алуды және емдеу-сауықтыру мекемелеріне хабарлануын қамтамасыз ету тапсырылды. Комиссия отырысында берілген тапсырмалардың орындалуына бақылау жасау Жалағаш ауданы әкімінің орынбасары Әліби Қодарұлына жүктелді.Құқық бұзушылық профилактикасын жүргізу шаралары қабылдандыЖалағаш ауданының әкімі Асқарбек Есжановтың төрағалығымен құқық бұзушылық профилактикасы жөніндегі ведомствоаралық комиссия отырысы өтті.Күн тәртібіне сәйкес алаяқтық қылмыстарының алдын алу бағытында атқарылған шаралар және есірткі бизнесіне қарсы қылмыстардың алдын алуда атқарылып жатқан шаралар туралы екі мәселе қаралды.Комиссия отырысында қаралған мәселелерге байланысты алаяқтық қылмысының, оның ішінде интернет алаяқтығы қылмысының алдын алу, орын алған қылмыстарды ашу мақсатында жедел профилактикалық іс-шараларды күшейту, қоғамдық орындарда «жұмысқа тұрғызамын, несие, пәтер алып беремін» деген мәтіндегі ілінген парақшалар бойынша сұрау жұмыстарын жүргізіп олардың соңында алаяқтар бар жоғын анықтауға бағытталған іс-шараларды қабылдау, мамыр айынан бастап облыс әкімі және облыс прокурорымен бекітілген «Есірткісіз аймақ» жобасы аясында кент және ауылдық округтерде құрылған топтардың жұмысын жандандырып, нақты шаралар қабылдау үшін тапсырмалар берілді.Комиссия отырысының күн тәртібіне сәйкес хаттама жасалып, хаттамалық тапсырмалардың орындалуын бақылау және үйлестіру аудан әкімінің орынбасары Нұрмағанбетов Арнұр Әлібекұлына жүктелді.Аудан әкімдігі жанындағы терроризмге қарсы комиссия отырысы өтті. Жалағаш ауданының әкімі Асқарбек Есжановтың төрағалығымен өтетін аудан әкімдігі жанындағы терроризмге қарсы комиссия отырысы өтті.Жастар арасында экстремизм және терроризм көріністеріне бой бермеуді қалыптастыру бағытындағы атқарылып жатқан шаралар және Жалағаш ауданының әкімдігі жанындағы терроризмге қарсы комиссияның ақпараттық қажеттілік тізбесімен жұмыс жүргізу туралы мәселелер қаралды.Жастардың діни санасы мен діни білімін қалыптастыру, сондай-ақ, бұрмаланған діни көзқарастардың қалыптасуын алдын алу мақсатында әлеуметтік желі арқылы және білім бөлімімен бірлесіп оқушылар арасында түсіндіру жұмыстарын тұрақты түрде ұйымдастыру, шетелде діни білім алуға қызығушылық танытқан оқушылармен түсіндірме жұмыстарын жүргізу, жұмыссыз және NEET санатына жататын жастардың қайта даярлаудан өтіп мамандық алуына ықпал жасау, Жалағаш ауданының әкімдігі жанындағы терроризмге қарсы комиссияның ақпараттық қажеттілік тізбесі бойынша жауапты мекемелер атқарылған іс-шаралар бойынша толыққанды және уақытылы мәліметтерді ұсыну жөнінде тапсырмалар берілді.Комиссия отырысында берілген тапсырмалардың орындалуына бақылау жасау аудан әкімінің орынбасары Ғани Кенжеғараұлына жүктелді.Сыбайлас жемқорлыққа қарсы іс-шаралар қабылдандыЖалағаш ауданының әкімі Асқарбек Есжановтың төрағалығымен сыбайлас жемқорлыққа қарсы іс-қимыл жөніндегі комиссия отырысы өтті.Жалағаш ауданының қоғамдық даму бөлімімен сыбайлас жемқорлықтың алдын алу бойынша атқарған жұмыстары және Мәдениет ауылдық округі бойынша сыбайлас жемқорлықтың алдын алуда атқарылған жұмыстар туралы мәселер қаралды.&nbsp;Күн тәртібіндегі мәселелерге сәйкес сыбайлас жемқорлықтың алдын алуда атқарылып жатқан шаралар туралы жергілікті бұқаралық ақпарат құралдарына және әлеуметтік желілерге тұрақты жариялау, сыбайлас жемқорлыққа қарсы мәдениетті қалыптастыру бағытында қысқа метражды фильмдер, бейнероликтер әзірлеу, сыбайлас жемқорлық тәуекелдерін анықтау мақсатында кент және ауылдық округтерде сауалнамалар жүргізіу, «Сыбайлас жемқорлық тәуекелдеріне ішкі талдау жүргізудің үлгілік қағидаларын бекіту туралы» ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының 2016 жылғы 19 қазандағы №12 бұйрығына сәйкес жылына екі рет ішкі талдау жұмыстары жүргізу, азаматтарды әуреге салмай жеке қабылдау барысында көтерілген мәселелер бойынша нақты шаралар қабылдау туралы тапсырмалар берілді. Тапсырмалардың орындалуын аппарат басшысы Қайрат Ғалиұлына жүктелді.&nbsp;

Жалағаш ауданының әкімі бірқатар мәселені талқылады

<a href="https://kyzylorda-news.kz/">Kyzylorda-news.kz.</a> Қармақшы әкімдігі жанындағы терроризмге қарсы комиссияның ағымдағы жылға арналған жұмыс жоспарына сәйкес, Қармақшы ауданының әкімі Жандос Еркінбектің төрағалығымен кезекті комиссия отырысы өтті.Комиссия отырысына комиссия мүшелері, құқық қорғау органдары мен салалық бөлімдердің басшылары қатысты. Отырыстың күн тәртібіне сәйкес, «Мемлекеттік органдармен аудандық терроризмге қарсы комиссияны ақпаратпен қамтамасыз ету сапасының жағдайы туралы. Жұмыстарды жетілдіру шаралары туралы» Қармақшы ауданы әкімнің орынбасары Жандос Ерқосаевтың және «Аудан аумағында ақпараттық түсіндіру топтарымен жүргізілген жұмыстардың барысы туралы. Ақпараттық кеңістікте діни экстремизм мен терроризмге қарсы насихатты жетілдірудің жағдайы мен шаралары туралы» аудандық қоғамдық даму бөлімінің басшысы Ғ.Нысанбаевтың баяндамалары тыңдалды.Сондай-ақ, отырыста қаралған мәселелерге орай комиссия мүшелері өз ұсыныс-пікірлерін ортаға салды. Комиссия төрағасы жиын қорытындысымен айтылған пікір-ұсыныстарды қуаттап, жауапты мекеме басшыларына бірқатар тапсырмалар жүктеді. Алдағы уақытта аталған мәселелер шешімін табады. &nbsp;

Қармақшы ауданында терроризмге қарсы комиссия отырысы өтті

<a href="https://kyzylorda-news.kz/">Kyzylorda-news.kz.</a>&nbsp; Қорқыт ата атындағы Қызылорда университетінде «Алматыкітап баспасының» жобалық PR бөлім басшысы Гүлмарал Қабдолшаева &nbsp;«TopIQ.kz» электрондық оқулықтар платформасын таныстырды. Шараға оқу ордасының профессор-оқытушылары мен білім алушылары қатысты.Жаңа платформа «Цифрлық Қазақстан» мемлекеттік бағдарламасын іске асыру және Реформалар жөніндегі жоғарғы кеңестің кезекті отырысында Президент Қасым-Жомарт Тоқаевтың «Оқулықтарды цифрлық форматқа көшіру және оқушы сөмкесінің салмағын жеңілдету» жөніндегі тапсырмасын орындау мақсатында құрастырылған. «Алматыкітап баспасы» дайындаған жаңа цифрлық өнім 2022 оқу жылынан бастап республикалық бірқатар оқу орындарына енгізілген. Электрондық оқулықтар оқу бағдарламасына сәйкес құрастырылып, түрлі интерактивті тапсырмалар, аудиовизуалды материалдар, анимациялар, мультфильмдер және ертегілермен толықтырылған.«TopIQ.kz» оқу-ағарту министрінің 2022 жылғы 21 маусымдағы №291 бұйрығымен бекітіліп, пайдалануға ұсынылған 1-11 сынып оқулықтарын және мектепке дейінгі дайындыққа арналған оқу-әдістемелік кешендерді, хрестоматиялар мен көркем әдебиеттерді қамтитын тұңғыш отандық платформа.<figure class="image"><img src="https://knadmin.beoblood.kz/uploads/IMGL_3027_1cedda3466.jpg" alt="IMGL3027.jpg"></figure>

Қызылордада «TopIQ.kz» электрондық оқулықтар платформасы таныстырылды

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университеті және Оңтүстік Кореяның Сеул ұлттық ғылым және технологиялар университеті (SEOULTECH) Lupic бағдарламасы аясында Қазақстанда ақпараттық технологиялар саласын дамыту туралы келісім жасасты.Бұл ынтымақтастық Қорқыт ата атындағы Қызылорда университетінің студенттеріне Сеултех университетінің ақпараттық технологиялар бойынша мамандандырылған оқу бағдарламасы негізінде оқуға мүмкіндік береді.2030 жылға дейінгі LUPIC бағдарламасы бірнеше маңызды бастамаларды қамтиды.Соның бірі – Қорқыт ата атындағы Қызылорда университетінің базасында жасанды интеллект мектебі мен бизнес-инкубатор ашу.Бағдарлама аясында Сеултех пен Қорқыт ата университетінің өзара тәжірибе алмасуы жоспарлануда. Сеултех профессорлары мен студенттері ақпараттық технологиялар саласында білім алуға және практикалық білім алмасуға шақырылады. Жасанды интеллект мектебі машиналық оқыту және терең оқыту бағыттарын қамтиды. Сонымен қатар, ол виртуалды және кеңейтілген шындықты (VR/AR) дамытуға бағытталған.Бағдарламаның алғашқы кезеңінде инфрақұрылымды құру және оқытушыларды даярлауға баса назар аударылатын болады. Одан кейін білім беру мекемелері арасындағы өзара іс-қимыл мен ынтымақтастықты күшейту үшін Сеултех пен Қорқыт ата университеті арасында оқытушылар мен студенттердің тәжірибе алмасуы басталады. Бағдарламаның үшінші кезеңінде бизнес процесс толығымен Сеултехтен Қорқыт ата университетіне ауысады.Бұл бағдарламаның мақсаты - жасанды интеллект, машиналық оқытуды дамыту, сондай-ақ VR/AR технологияларын қолдану және ақпараттық технологиялар саласындағы стартаптарды дамыту үшін берік негіз құру болып табылады. Сеултех пен Қорқыт ата университеті арасындағы бұл стратегиялық әріптестік білім алмасуға, мүмкіндіктерді кеңейтуге және ақпараттық технологиялар саласындағы инновациялық дамуға ықпал етеді.

Қорқыт ата атындағы университет Сеул ұлттық ғылым және технологиялар университетімен келісім жасасты

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданында статистикалық мәлімет бойынша бүгінде 14 пен 35 жас аралығында 11 727 &nbsp;жас бар. Оның ішінде жұмыссыз жастар саны – 320, маргинал жастар (яғни NEET жастар) саны – 15.Аудандық жастар ресурстық орталығының директоры Нұрман Абдрасиловтың айтуынша жыл басынан бері жастар тәжірибесінде жүрген жастар саны – 26, қайтарымсыз грант алған жастар саны – 4, тұрақты жұмысқа орналасқан жастар саны – 49, әлеуметтік жұмысқа орналасқан жастар саны – 8, қоғамдық жұмысқа тартылған жастар саны – 107, студенттер – 2623, өзін-өзі жұмыспен қамтыған жастар саны – 262, мүмкіндігі шектеулі жастар саны – 64, 14 жастан жоғары оқушылар саны – 3255, жас кәсіпкерлер саны – 433, түрлі мекемелерде тұрақты жұмыс жасайтын жас мамандар саны – 2528, мемлекттік қызметшілер – 26, пробациялық есептегі жастар саны – 54, жас отбасылар саны – 381 құрайды. Бұдан бөлек, «Бастау Бизнес» жобасы аясында кәсіпкерлік бағытында 49 жас оқытылған. Бүгінгі таңда елімізде жұмыссыздық деңгейі жастар арасында өзекті мәселеге айналып отыр. Ауданның еңбек нарығында жастарды еңбекке тарту, жастардың жұмыссыздық деңгейін төмендету мақсатында түрлі бағытта жұмыстар жүргізілуде.&nbsp;<blockquote>Аудандағы жастар арасындағы жұмыссыздық деңгейін төмендету мақсатында және оларды жұмыспен қамту бағытында аудандық жастар ресурстық орталығының бастамасымен 7 ауылдық округінен Шіркейлі, Айдарлы, А.Тоқмағамбетов, Аманкелді, Бесарық, Жетікөл, Қоғалыкөл ауылдық округінен жастар бригадалары қайта құрылды. Олардың қатарында жұмыссыз, НЕЕТ санатындағы жастар және пробация есебінде тұратын жастар жұмыс жасауда. Осы жастар бригадаларына 150-ге тарта жас тартылып, барлығы 40 гектар жер беріліп, 25 гектарына картоп дақылын және 15 гектарына бақша дақылдары егілді. Жыл басында Сырдария ауданы бойынша Республикалық база Отбасының цифрлық картасында анықталған NEET санатындағы жастарды мемлекеттік қолдау шараларымен жұмысқа орналастыру, қайта оқыту, кәсібін ашуға грант немесе кредит беру жұмыстарын жүргізу үшін NEET санатындағы 275 жастың тізімі келді. Алайда тізімдегі 275 азаматты тексеру барысында көптеген жастар Отбасының цифрлық картасы тізімнен алынды, – дейді аудандық жастар ресурстық орталығының директоры Нұрман Абдрасилов.</blockquote>Анықталғандай: жұмыс жасайтындар &nbsp;– 81, үй шаруасында – 37, тіркеу орнында тұрмайтыны – 58, бейресми жалдамалы жұмысшы – 16, қайтыс болғандар – 1, мүмкіндігі шектеулі – 1, студент – 7, тіркелмеген жұмыссыздар – 33, статусы мүлдем жоқ – 1.Жалпы көрсетілген 33 азаматпен аудандық аурухана, аудандық жұмыспен қамту орталығы, аудандық полиция бөлімі арқылы зерттеліп, қосымша адрестік жұмыстар жүргізіліп, жұмыспен қамту шаралары жасалған. Олардың ішінде қазіргі таңда 15 жас ғана НЕЕТ санатындағы жастар қатарында болып отыр. Аудан бойынша жастар арасында жұмыссыздық деңгейі 4,3 % болса, жыл аяғына дейін 3,9 %-ға төмендету көзделуде.<blockquote>&nbsp;Жастарға арналған мемлекеттік бағдарламалар мен жобаларды түсіндіру мақсатында барлық ауыл жастарына "Мүмкіндіктер алаңы" атауымен көшпелі кеңес беру жұмыстары жүргізілді. Оған аудандық кәсіпкерлік, өнеркәсіп және туризм бөлімі, аудандық ауылшаруашылығы және жер қатынастары бөлімі, аудандық жұмыспен қамту орталығы, аудандық экономика және бюджеттік жоспарлау бөлімі, аудандық жастар ресурстық орталығы, "Атамекен" кәсіпкерлер палатасының аудандық филиалының мамандары қатысты. "Жастар практикасы", "Алғашқы бос жұмыс орны", "Қоғамдық жұмыс", "Әлеуметтік жұмыс орны", 5 млнға дейінгі инновациялық жобалардың қайтарымсыз гранты, Бос жұмыс орындары, "Ауыл аманаты" жобасы, "Агронесие" жобасы, "Жасыл ел" жобасы, "Жастар бригадасы", шағын гранттар, бизнес жоспарлар туралы, "Бастау-Бизнес" және "Ұрпақтар келісім-шарты" жөнінде толыққанды ақпараттар берілді, – дейді орталық директоры.</blockquote>Айту керек, аудан жастары көп қолданатын аудандық жастар ресурстық орталығының Тик-ток, Телеграмм, Инстаграмм, Фейзбук парақшаларында жұмыспен қамтылуына ықпал жасау мақсатында бос жұмыс орындары туралы ақпараттар беріліп, жастарға арналған мүмкіндіктердің барлығы бейнероликтер арқылы тұрақты түрде жарияланып келеді. &nbsp;

Сырдария ауданында жастар арасындағы жұмыссыздық деңгейі 4,3 пайыз

<a href="https://kyzylorda-news.kz/">Kyzylorda-news.kz.</a> «Қайырымдылық жасасаң, қайырын өзің көрерсің», — дейді дана халқымыз. Қамшының сабындай қысқа өмірде шама-шарқың келгенше аялы алақан мен жан жылуын аңсайтын жандарға қол ұшын бергенге не жетсін!Әр жылдары мектеп бітіргендеріне бірнеше жыл толған түлектердің білім ордаларындағы соңғы қоңырау қарсаңында қайырымдылық жасап, мұқтаж жандарға көмектесуі, өз ауылының көркейіп-көріктенуіне үлес қосуы дәстүрге айналды. Биыл да түлектер бұл үрдістен айныған жоқ. Оған дәлел – 1983 жылы Ү.Томанов атындағы №183 орта мектепті бітірген түлектер.&nbsp;Олар биыл мектеп бітіргендеріне 40 жыл толуына орай сағынысып бас қоспақшы. Еліміздің әр түкпірінен туған жерін, өскен елін, аяулы сыныптастарын іздеп келгендер тек өзара думандатып қана қоймай, марқұм болған сыныптастарын да еске алып, дұға бағыштауды да ойға алған. Одан бөлек, әлеуметтік көмекті қажет ететін бірнеше отбасыны азық-түлікпен қуантып, ауылдастарының алғысын алуда.<blockquote>«Қайырымдылық – халқымыздың ең ізгі қасиеттерінің бірі. Сондықтан да балалардың жанашыр қамқоршысы болу, аялы алақанын тосып, жүрек жылуын ұсыну, сауабы мол игі іске атсалысу әрбір адамның азаматтық борышы. Осы мақсатта сыныптастарымызбен ақылдаса келе қайырымдылық жасауды жөн көрдік. Ең болмаса бір адамға қуаныш сыйлап, пайдамызды тигізсек – біздің мақсатымыздың орындалғаны. Өмірлік мұраттың негізі де қоғамға пайдалы болу ғой. Ал бұл ісіміз – соның бір бөлшегі ғана. Алдағы уақытта да мұндай игі істерді кең ауқымда ұйымдастыратын боламыз», – дейді 40 жылдық түлектер.</blockquote>

Қармақшыдағы түлектер тартуы

<a href="https://kyzylorda-news.kz/">Kyzylorda-news.kz.</a> Азірбайжанның Баку қаласында «Мугам» халықаралық дәстүрлі байқау өткен-ді. Оған Қармақшы ауданынан жас жыршы Мәди Елдесбаев қатысып, жүлделі ІІІ орынды жеңіп қайтты.ХІІІ халықаралық балалар арасындағы «Мугам» фестивалі Әзірбайжан Республикасы Жастар және спорт министрлігі мен Мәдениет министрлігінің қолдауымен, «Каинат» жастар орталығының ұйымдастыруымен өткен. Оған Түркия, Әзірбайжан, Иран, Қырғызстан, Қазақстан, Түркіменстан және Өзбекстаннан 19 жас талапкер қатысып, бақ сынаған. Нәтижесінде жерлесіміз үздік өнер көрсетіп, еліміз алдыңғы қатардан көрінді.Мәди Алдашбай ахун ауылындағы №111 орта мектептің 5 сынып оқушысы. Сонымен қатар аудандағы К.Рүстембеков атындағы жыраулар үйіне қарасты «Ешнияз сал» үйірмесінің шәкірті. Жетекшісі – Әлішер Мырзағалиев. Домбыраға қатысып тәлім алып жүргеніне үш жылдан асқан. Кешегі өткен байқаудағы әсерін ол бізбен былай бөлісті.<blockquote>«Өзге елдегі жарыс маған жақсы әсер қалдырды. Алғашында бойымда кішкене қорқыныш болып, кейін жеңе білдім. Өйткені елдің атынан барып тұрғасын жүгін сезіндім. Жарыс екі кезең бойынша өтті. Онда Наурызбай ақынның «Сөз сөйлейін», Тұрмағамбет Ізтілеуовтің «Не қызық» деген термесін орындадым. Маған қолдау көрсеткендерге айтар алғысым шексіз», – дейді жас өрен.</blockquote>Ал Әлішер шәкіртінің домбыра ойнауда ерекше қабілеті барын, үйірмеде 18 оқушы болса, Мәдидің жыр-термеге қызығушылығы жоғары, сөз жаттауы тез, берілген тапсырмаға жауапкершілікпен қарайтынын айтады. Алдағы уақытта барлық шәкіртінің ерекше талантымен танылып, топқа қосылатынына сенімді.

Жас жыршы Бакуден жүлдемен оралды

<a href="https://kyzylorda-news.kz/">Kyzylorda-news.kz.</a> Дана халқымыз «Білімдіге дүние жарық» деп бекер айтпаса керек. Қай жерде жүрсе де өзінің білімділігін, алғырлығын аңғартып жүрген жерлесіміз бейсенбі күні тағы да бір жақсы жаңалықпен қуантты. Осыдан біраз уақыт бұрын газетімізде «Үздік оқытушы Қармақшыда» деп облыстық байқаудан топ жарған мемлекеттік тіл оқытушысы Гүлжанат Дүзенова жайлы сүйіншілеп, республикалық сынға сәттілік тілеген болатынбыз.&nbsp;Бейсенбі күні Қазақстан Республикасының Ғылым және жоғары білім министрлігі Тіл саясаты комитетінің «Ш.Шаяхметов атындағы «Тіл-Қазына» ұлттық ғылыми-практикалық орталығы Алаш ардақтысы, ұлт ұстазы Ахмет Байтұрсынұлы атындағы республикалық оқытушылар байқауын Атырау облысында ұйымдастырған болатын. Мұндай республикалық көлемдегі байқау ұлт ұстазы, тіл білімінің атасы, қазақ әліпбиінің негізін қалаушы реформатор Ахмет Байтұрсынұлының ғылыми-әдістемелік мұрасын насихаттау мақсатында мемлекеттік тіл оқытушылары арасында тұрақты түрде өткізіліп келеді.Республиканың түкпір-түкпіріндегі тіл оқыту орталықтарының оқытушылары қатысқан сайысқа Қызылорда облысының атынан облыстық тілдерді оқыту орталығының біздің ауданның мемлекеттік тіл оқытушысы Гүлжанат Дүзенова қатысып, «Үздік оқытушы – 2023» республикалық байқауының бас жүлдесін иеленді.&nbsp;<blockquote>«Байқауға әр облыстың тәжірибелі, озық мамандары қатысты. Тіпті арамызда филология ғылымының кандидаттары болды. Оқытушылық қызметке кеше ғана келген маған он бес облыстан озудан бұрын мұндай додаға түсіп тәжірибе жинау да үлкен жетістік еді. Бұл жеңіс менің емес, мен қызмет ететін облыстық тілдерді оқыту орталығының жеңісі, еңбегінің жемісі. Облыстық тілдерді оқыту орталығының ұжымы, әріптестерім, жерлестерім, туған-туыс бәрі-бәрі сәйгүлігін баптап бәйгеге қосқандай ақтық кезеңге дейін тақымдарын қысып отырды. Орталық директоры Мартана Қонысбекқызы мен бөлім басшысы Гүлбану Ғарифуллақызы сонау Атырау төріне менімен бірге барып рухани және әдістемелік көмегін көрсетуден аянып қалмады. Сыр елінің үміті, осындай қолдау мен зор сенім иығыма артылғанда оны абыроймен алып шықпау сын еді. Сол үшін намысты қолдан бермеуге тырыстым. Білім додасында қазақылықтың қаймағы бұзылмаған, ана тілін ардақ тұтатын, &nbsp;әдебиет пен мәдениеті биік Қызылорданың тілге деген жанашырлығы мен білімге құштар ұрпақ сабақтастығын көрсете алғаныма қуаныштымын», – дейді жеңімпаз оқытушы.</blockquote>Бұл жеңіс – тарихи-мәдени мол мұрасы тарих беттерінде ойып орын алатын Атырау төрінде Алаштың анасы атанған қасиеті мен шежіресі тұнған Сыр елінің абыройын тағы бір мәрте асқақтатты. &nbsp;Облыстық байқаудан оза шауып, республикалық додада топ жарған жерлесіміздің мерейі үстем бола берсін. Қандай да бір қолға алған ісін тиянақты орындап, отбасында да, ортасында да сыйлы Гүлжанаттай білікті мамандардың қатары көп болсын.

Архив