<a href="https://kyzylorda-news.kz/">Kyzylorda-news.kz.</a> Әлеуметтік медициналық сақтандыру қорының Қызылорда облысы бойынша филиалының мамандары аудандарда МӘМС мәселелері бойынша кенес беруді жалғастыруда. Ағымдағы жылдың 26 мамырында Арал және Қазалы аудандарында есептік кездесулер өтеді.Арал ауданы, Арал қаласы, сағат 10.00, аудан әкімдігінің мәжіліс залы; Қатысушылар: Арал ауданы әкімінің орынбасары Бержанов Кететөлеби Досымжанұлы, «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Исмаханбетов Бақыт Торғайбайұлы, Қызылорда облысының денсаулық сақтау басқармасы басшысының орынбасары Шаймбетов Жангелді Мырзагелдіұлы, Арал аудандық көп бейінді орталық ауруханасының бас дәрігері Ршымбетов Марат Кубылұлы.Қазалы ауданы, Әйтеке би кенті, сағат 15.00, аудан әкімдігінің мәжіліс залы; Қатысушылар: Қазалы ауданы әкімінің орынбасары Тлеумбетов Дәурен Оңғарбайұлы, «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Исмаханбетов Бақыт Торғайбайұлы, Қызылорда облысының денсаулық сақтау басқармасы басшысының орынбасары Шаймбетов Жангелді Мырзагелдіұлы, Қазалы ауданаралық ауруханасының бас дәрігері Әлішева Бақыткүл Алмамбетқызы. &nbsp;

Арал, Қазалы аудандарында МӘМС мәселелері бойынша халықпен кездесу өтеді

<a href="https://kyzylorda-news.kz/">Kyzylorda-news.kz.</a>&nbsp; ҚР Премьер-Министрі Әлихан Смайыловтың төрағалығымен өткен Үкімет отырысында оқу жылының аяқталуы және балалардың жазғы демалысын тиімді ұйымдастыру, қатты тұрмыстық қалдықтарды жинақтау мәселелері талқыланды.Күн тәртібінен тыс Үкімет басшысы Абай облысының Бородулиха ауданында болған өртті ауыздықтау мәселесі бойынша баяндаманы тыңдап, өңір әкімдеріне қауіпсіздікті үнемі назарда ұстауды тапсырды.Үкімет отырысында оқушыларды толыққанды әрі қауіпсіз демалыспен қамтамасыз ету, мәдени-спорттық іс-шаралар ұйымдастырудың мән-жайы талқыланды. Ведомство басшылары атқарылған жұмыстар мен алдағы жоспарларды баяндады.Күн тәртібіндегі екінші мәселе бойынша өңірлерде санкцияланбаған қатты тұрмыстық қалдықтар полигондарына жүргізілген мониторинг нәтижелері таныстырылып, қалдықтарды өңдеу бағдарламасын бекіту қажеттігі айтылды.Жиыннан соң облыс әкімінің міндетін атқарушы Серік Қожаниязов облыстық білім басқармасына 2022-2023 оқу жылының аяқталуын Оқу-ағарту министрлігі бекіткен алгоритмге сәйкес ұйымдастыруды тапсырды. Каникул кезінде балаларды сауықтырудың, бос уақытын өткізудің және еңбекпен қамтудың арнайы жоспары әзірленуі тиіс. Бұл шараларды Премьер-Министр бекіткен өкімге сәйкес үйлестіру жүктелді.Мұнан бөлек, балалардың сауықтыру демалысын ұйымдастыру бойынша өткізілетін мемлекеттік сатып алу конкурстарына қойылатын талаптар күшейтілуі керек. Конкурстардың заң аясында өткізілуін қадағалау, бірінші кезекте ата-ана қамқорлығынсыз қалған, тұрмысы төмен, жетім және көпбалалы отбасылардың, мүгедектігі бар, даму мүмкіндіктері шектеулі балаларды, сондай-ақ жалпы білім беретін мектептердің үздік оқушыларын қамту міндеттелді.Күн тәртібіндегі екінші мәселе бойынша жауапты тұлғаларға қатты тұрмыстық қалдықтарды өңдеу бағдарламасының жобасын әзірлеу, жаңа полигондар салу, бұрынғыларды рекультивациялау бойынша іс-шараларды қарастыру тапсырылды.<figure class="image"><img src="https://knadmin.beoblood.kz/uploads/349174231_765779061848037_3551442899998908980_n_aecb98b2a1.jpg" alt="349174231_765779061848037_3551442899998908980_n.jpg"></figure>&nbsp;<figure class="image"><img src="https://knadmin.beoblood.kz/uploads/349314146_573908124872816_6001451170292825845_n_1_cef8f931c2.jpg" alt="349314146_573908124872816_6001451170292825845_n (1).jpg"></figure>

Балалардың жазғы демалысын ұйымдастыру мәселелері пысықталды

<a href="https://kyzylorda-news.kz/">Kyzylorda-news.kz.</a> Шиелі ауданы әкімінің орынбасары Болатбек Ысмағұловтың төрағалығымен жиын өтті. Жиында Шиелі аудандық статистика бөлімінің басшысы Алтынкүл Қожамжарова, аудандық экономика және қаржы бөлімінің басшысы Дәуренбек Жакеев, аудандық тіркеу және «Азаматтарға арналған үкімет» мемлекеттік корпорациясы» коммерциялық емес акционерлік қоғамының Қызылорда облысы бойынша филиалының жер кадастры бөлімінің басшысы Нұржан Әбітханов баяндама жасады.«Электронды әр шаруашылық бойынша есепке алуды жүргізу және тіркеу жазбаларын жүргізуді ұйымдастыру нысандары бойынша статистикалық әдіснама беру» тақырыбында аудандық статистика бөлімінің басшысы Алтынкүл Қожамжарова, «Аудандық бюджетке түсетін салық және бюджетке төленетін басқа да міндетті төлемдердің базасын ұлғайтуға» байланысты аудан бюджетінің салық салу базасын ұлғайту» тақырыбында экономика және қаржы бөлімі басшысы Д. Жакеев, «Тұрғын үй қорының статистикалық тіркелімі, «Жылжымайтын мүлік тіркелімі» мемлекеттік деректер қоры және Мекен жай тіркелімінің қазіргі жағдайы» тақырыбында «Азаматтарға арналған үкімет» мемлекеттік корпорациясы» коммерциялық емес акционерлік қоғамының Қызылорда облысы бойынша филиалының жер кадастры және жылжымайтын мүлік бойынша Шиелі ауданының бөлімінің басшысы Н.А. Әбітханов баяндап, күн тәртібіндегі тақырыптарға қатысты ойлар ортаға салынды.&nbsp;Жиын соңында Болатбек Ысмағұлов талқыланған мәселелер мен кемшіліктерге жауапты кент пен ауылдық округ әкімдіктерінің мамандарына арнайы тапсырма беріп, туындаған мәселелерді шешуді міндеттеді.

Аудан әкімі орынбасарының төрағалығымен жиын өтті

<a href="https://kyzylorda-news.kz/">Kyzylorda-news.kz.</a> Қазалы аудан әкімінің орынбасары Дәурен Тілеумбетов бастаған бірқатар азаматтар С.Сейфуллин көшесі, Күләш Байсейітова, Жалдыбай жырау, Мұстафа Шоқай және Сұлтан Аманов көшелерінің тұрғындары және жастарымен кездесті.&nbsp;Мақсат – аудандағы топтық төбелес пен құқық бұзушылықтың алдын алу. Сонымен қатар жан-жақты түсіндірме жасап, жасөспірімдер арасындағы келеңсіз жайттарды болдырмау.&nbsp;Бірнеше айдан бері аудан әкімі Мұхтар Оразбаевтың тапсырмасымен арнайы құрылған топтардың рейд жұмыстары жүріп жатқанын айтқан Дәурен Оңғарбайұлы, тәртіпке шақыру жұмыстары тоқтамайтынын жеткізді. Сондай-ақ, арнайы жасақталған құрамның жұмысы нәтижесіз емес екенін де тілге тиек етті.&nbsp;Оған қоса мемлекет тарапынан жастарға берілетін несие аясында, «Ауыл аманаты» жобасы туралы және өскіндердің әскерге баруы жөнінде түсіндірме жасады.&nbsp;Басқосуда тұрғындар өскелең ұрпақтың келешегіне алаңдайтындарын айтып, түсіндірме жұмыстарына оң бағасын берді.<blockquote>«Әкім бол, халқыңа жақын бол» деген. Тұрғындармен кездесіп, тілдесіп, талап-тілектеріне құлақ түрген басшыларға ризамын. Ел ішіндегі тентектерді тезге салу мақсатында атқарылып жатқан жұмыстарды да газет беттерінен оқып, біліп отырмыз. Жастарымыздың бойындағы жауапкершілік артып, адамгершілік қасиеттің алға шығарына мен сенемін», – дейді көше тұрғыны.</blockquote>

Қазалы аудан әкімінің орынбасары көше тұрғындарымен кездесті

<a href="https://kyzylorda-news.kz/">Kyzylorda-news.kz.</a> Отбасында тәрбие негізі қалыптасса, мектепте тәрбие мен білім бала бойына бірдей егіледі. Елдің ел болып, қоғамның қоғам болып дамуында да тәрбие мен білімнің атқаратын рөлі орасан. Сөзімізді жандандыру үшін Жосалы кентіндегі үлгілі мектептердің бірі, өткен жылғы білім саласының қорытынды есебінде «Ізденімпаз мектеп» атанған Ү.Томанов атындағы №183 орта мектептің қазіргі тыныс-тіршілігі мен табыстарына тоқталып өтсек.Алдымен аз-кем тарихына көз жүгіртейік. Мектеп бастапқыда 1953 жылы Калинин атындағы жеті жылдық мектеп болып құрылған. Директоры Әбдуәли Жаназаровтың басшылығымен 29 оқушы білім ұясының қабырғасынан түлеп ұшқан. Мұнан соң сегіз жылдық орта білім беретін мектеп ретінде жұмысын жалғастырып, оған Бертай Ташенов басшылық жасаған. Ал 1969-1971 жылдары аралығында Кәрімбек Төреалиев директорлық еткен. Сол жылы мектепті 135 оқушы бітіріп шығып, үлкен өмірге қанат жаяды. 1981 жылы облыстық халық депутаттары кеңесінің шешімімен тәрбие ошағына Үсен Көлдейұлы Томановтың есімі беріледі. Ол – Кеңес одағының билік органдарын құру, азамат соғысы, сауатсыздықпен, ашаршылықпен күрес, ұжымдастыру науқандарының бел ортасында жүріп, өлкеде кеңес өкіметін орнату мен нығайтуға белсене қатысқан тұлға болды.Енді орта мектептің бүгінгі жай-күйіне зер салар болсақ, тарихы тереңнен тамыр алатын тәрбие ордасына 2020 жылдан бастап Гүлнара Әшірова басшылық етіп келеді.<blockquote>«Мектепте жалпы саны 61 мұғалім жас ұрпаққа білім нәрін себуде. Сапалық құрамға келсек, 11 педагог-зерттеуші, 16 педагог-сарапшы, 15 педагог-модератор, 19 педагог-ұстаз балаларға жан-жақты білім беруде. Мақсатымыз – зерделі де дарынды, талантты да адамгершілігі мол азаматтар қалыптастыру. Тәрбие мен білімнің бір орында тұрып қалуына болмайды. Ол әркез алға жылжып, дамып, жетіліп отыруы тиіс. Бұл бағытта мұғалімдер жылдан-жылға біліктіліктерін арттырып, арнайы курстардан өтіп отырады. Ұстаздар үшін білім деңгейін көтеріп, сертификатқа ие болу – білім үдерісінде маңызды саналатын іс. Оқу жылында осы мақсатта 25 мұғалім арнайы курстан өтіп, біліктіліктерін дәлелдеп шықты. Сол ұстаз қауымның білімін жетілдіріп, жаңа жүйеге бейімделгені оң өзгерістер әкеліп, жақсы нәтижесін беруде.Айта кеткен жөн, 2018 жылы 25 мамырда Жосалы кентіндегі Тәуелсіздік ықшам ауданынан мектептің жаңа ғимараты пайдалануға беріліп, оқушыларымыз заманауи білім ордасында кең де жарық кабинеттерде білім алуды жалғастырды. Заман талабына сай салынған ғимаратта 100 орындық оқушылар асханасы, 90 орындық мәжіліс және спорт зал бар. 22 сынып кабинетінде, оның ішінде, информатика, АКТ, лингофон кабинеттері баланың тәрбие және білім сапасына қызмет етуде», – дейді Гүлнара Исақызы.</blockquote>Ескерерлігі, мектептегі жас шәкірттердің білім сапасы көрсеткіштерінің жыл санап артып келетіндігі. Мектеп ұжымы 2016-2017 оқу жылында Ұлттық бірыңғай тестілеу сынағынан 101,38 орташа баллмен аудан бойынша І орынды иеленсе, 19 түлектің 15-і мемлекеттік білім грантын жеңіп алған. Өткен жылғы қорытындыда 11 сыныпты 21 оқушы аяқтап, оның 14-і тестке қатысып, 2 оқушы «Алтын белгі» төсбелгісін кеудесіне таққан. Мектептің педагогикалық құрамының жеткен табыстары біршама. Мысалы, 2006 жылы «Білім ұясы» ІІ республикалық конкурсының қатысушысы ретінде «Үздік мектеп» номинациясын жеңіп алса, 2009-да аудандық «Үздік педагогикалық ұжым» байқауында бас жүлдені бағындырған. 2014 жылы «Балалар және жаз» республикалық байқауының жеңімпазы атанса, осы жетістік үшін ұжым Қазақстан Республикасы Білім және ғылым қызметкерлері кәсіподағы комитетінің дипломымен марапатталып, мерейлері өсті. 2016 жылы Қазақстан Республикасы Тәуелсіздігінің 25 жылдығына орай ұйымдастырылған «Ең үздік қазақ тілді мекеме» байқауында жеңімпаз атанса, 2016-2017 оқу жылында «Үздік білім ордасы – 2017» номинациясын қанжығалады.Бұл мектеп ұстаздарының бағындырған биік белестері деп есептесек, сол білікті мұғалімдерден білім алған мектеп шәкірттерінің де айтарлықтай оқу нәтижелері көзге түсуде. Мектеп оқушылары облыстық, республикалық байқауларға тұрақты қатысып, бірқатар жетістіктерге жетіп отыр. Облыстық эссе, жазба ақындар мүшәйралары мен түрлі байқауларында жас шәкірттер Диас Төлегенов, Назым Асылжан, Әзиза Кеңшілік жүлделі болса, оларды сөздің киесі мен қасиетіне баулыған ұлағатты ұстаз Шынар Райымбаеваның бала тәрбиесіндегі еңбегін айта кету керек. Сонымен қатар, химия, биология пәні бойынша олимпиада көрсеткіштерінде Дана Шаухатбекова, Әлхамидулла Сүлеймен де жүлделі орыннан көрініп, мектеп намысын қорғап шыққан білімгерлер. Осындай олимпиада жүлдегерлерін баптаған сала майталманы Манат Көбекова, Жадыра Сатылғанованың да өлшеусіз еңбектерін айта кету ләзім. Мұнан бөлек, Қызылордада өткен «INNO. FEST» Qyzylorda инновациялық идеялар фестивалі» байқауында мектептің 10-11 сынып оқушылары Диас Төлегенов, Дулат Бисенбай, Нұрлығаным Жүнісова, Нұрила Бектай, Дильназ Әзілхановалар жоба қорғап, жоғары нәтиже көрсеткен. Қорытындысында Диас баламыз Қызылорда Технология және қызмет институты құрылтайшысының грантын жеңіп алған. Жас жеткіншектердің білімін шыңдап, талабын ұштауда пән мұғалімдері Айгерім Тұрғанбек пен Ләззат Бакманованың зор ізденістерін атамай кету мүмкін емес.Мектеп – тәрбие мен білім берумен қоса, басқа да сан саланың іргетасы қаланатын қасиетті орын. Мұнда өнер, мәдениет, спортқа бейімі бар балалардың қабілеті оянып, оның дамуына апаратын даңғыл жол әрдайым ашық. Осы бағыттар бойынша да жетістіктерге жетіп жүрген шәкірттер саны көптеп саналады. Атап айтқанда, спорт саласы бойынша әпкелі-сіңлілі егіздер Сымбат, Қымбат Мырзашқыздары облыстық, республикалық жарыстарда жеңіл атлетикадан жүлделі орындарды иеленіп жүрсе, Мағжан Ібіраш, Парасат Қосжанов, Ерасыл Түркешов, Әсем Ғаниева, Мирас Базарбаев, Дамир Шағалаев, Асылжан Сейдалыұлы, Мардан Ермахановтай жеткіншектер көптеген сайыстарда мектеп қоржынына жүлде салып жүрген спортшылар. Соңғы екі оқу жылында Ұлттық бірыңғай тестілеу сынағында, 2020-2021 оқу жылында Данияр Шаухатбеков, Айгерім Әлиасқар, Дінмұхаммед Смағұл, ал өткен оқу жылында Ерасыл Каналбек «Алтын белгі» иеленді. Үздік оқушылардың қатарын көбейтіп, оларға білім беруде пән мұғалімдері Маруся Хасенова, Манат Көбекова, Гүлмира Жақпанова, Гүлнар Сырымбетова секілді ұстаздардың орны бөлек. Ауданымызда орта отыз мектеп болатын болса, соның ішінде былтырғы жылы тестілеу нәтижесімен 183-тіктер 85,1 процент көрсеткішпен алғашқы ондықтың құрамына кірді.Мектептің тәрбие мен білім процесімен бірге, қатар жүріп отыратын қоғамдық жұмысы да бір төбе. Ұжымға ақыл-кеңесін беріп, өмірлік тәжірибелерімен бөлісуде ардагер-ұстаздардың белсенділігі жоғары. Олардың қатарында Бәтима Байдүйсенова, Меруерт Омарова, Ғалияш Байменова, Патыма Құндақбаева, Нағимаш Ибраева, Зүбайра Мешітбаева, Райхан Балабаева, Рәзия Ерлепесова, Әлібек Шегенов, Арзанкүл Абдуллаева, Шыназкүл Шаймаханова, Смағұл Қауысов, Забира Суюбердиева, Ажар Нақшораева, Бақыт Қалекенова, Қанымкүл Әбдікерімова, Зейнеш Дүйсенбаева, Орынкүл Бодашова, Феруза Сайдалиева, Ажар Қайырбекова, Мәдина Дастанова, Қалдыгүл Өтеулиева, Алтынша Кенжеева, Жұмагүл Әлиева, Ұлбосын Меңдібаева, тағы басқа да ардагер-ұстаздардың есімдерін құрметпен атай аламыз.Қай білім шаңырағының да біліктілік, білімділік деңгейі ізденімпаз, жан-жақты дамыған ұстаздар қатарына бек байланысты келеді. Осы тұрғыда аудандық, облыстық, республикалық білім сайыстары мен пәндік олимпиадаларында жүлде салып, биіктерді еңсеріп жүрген сала мамандары бұл мектепте де көптеп кездеседі. Ағираш Сабырбаева, Бақытбек Баймұратов, Ақбөпе Асқарова, Жадыра Байжанова, Жанат Дайрабаева, Гүлжайна Ерекешова, Жадыра Таширова, Қайырхан Тұрымтаев, Гүлжайна Сұңғатова, Гүлшат Наукебаева, Айнұр Қайруллаева, Әзимаш Жұмағалиева, Жұлдыз Жалғасбаева, Мөлдір Ешжанова, Айнұр Мадиярова, Қуаныш Садақбаев, Гүлнар Бүркітбаева және басқасы ауданымыздың тәрбие мен білім саласына ізденімпаздықпен өнегелі өрнектерін салып жүрген ұстаздар.Орта мектептен түлеп ұшып, републикаға танылған түлектер тіпті де көп-ақ. Олардың бірқатарын ел басқару ісінде көрсек, кейбірін өнерде, спортта, басқа да салалардан кездестіреміз. Сондай танымал азаматтың қатарында ақын, философ, аудармашы, зерттеуші-ғалым, саясаттанушы Әуезхан Қодардың, «Өрлеу» біліктілікті арттыру ұлттық орталығы» АҚ филиалының Қызылорда облысы бойынша педагогикалық қызметкерлердің біліктілігін арттыру институтының директоры Бауыржан Елеусіновтің, қоғам қайраткері, аудандық, облыстық деңгейде басшылық қызметтер атқарған Ырзақұл Сәденовтің есімдерін ерекше атауға болады.<blockquote>«Мектебіміздің педагогикалық ұжымы өткен жылдың қорытындысында аудан мектептері арасында «Ізденімпаз мектеп» номинациясын иеленді. Бұған өте қуаныштымыз. Бұл бір жағынан басшылық тарапынан біздің еңбегіміздің бағаланғаны болса, екінші жағынан марапат алдағы уақытта да ұжымның белсенді де ізденіспен еңбек етуіне септігі мол. Әрі қарай да осы жұмыстарымызды жетілдіріп, мемлекетіміздің болашақ кілті саналатын – балалар мен жас жеткіншектердің тәрбиесі мен білімі жолында аянбай тер төге беретін боламыз», – дейді мектеп басшысы Гүлнара Исақызы жарқын көңілде.</blockquote>Осылайша, №183 орта мектептің ұстаздары былтырғы жылды ізденімпаз мектеп қатарында аяқтап, оң нәтижелерін көрсетті. Бірақ, білім бір күн немесе бір жылмен тұрып қалатын дүние емес. Ол үнемі, әркез, әрдайым ілгерілеуді, өрлеуді қажет ететін сала. Сол үшін де еліміздің келешегі сапарында ерінбей қызмет етіп, заман көшінен озық түсетін, тәрбиелі де білімді азаматтар өсіріп шығаруда талмай еңбек ете береміз дейді ұстаздар қауымы.

Қармақшыдағы ізденімпаз мектеп

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысының жұмыспен қамтуды үйлестіру және әлеуметтік бағдарламалар басқармасының мемлекеттік әлеуметтік тапсырысы негізінде «Арбамен марафон» атты облыстық жарыс өтті.Спорттық жарыс мүгедектігі бар адамдарға әлеуметтік көмек көрсетуден бөлек оларды түрлі шараларға қатыстырып, қоғамдық ортаға бейімдеу, белсенділіктерін арттыру, спорттық, мәдени, қоғамдық іс-шараларға қатыстыру мақсатын көздейді.<blockquote>«Марафон - бұл ең ауыр спорт түрі, тіпті дені сау адамдар да марафон қашықтығына төтеп бере бермейді. Ал, дөңгелектерді қолдарымен айналдыра алатын тек мықтылар ғана. Ең бастысы-өзінді жеңу арқылы ғана мүгедектіктің жоқ екенін дәлелдеу. Мүгедектігі бар &nbsp;адамдарды әлеуметтік қолдау және олардың өмір сүру сапасын арттыру мемлекеттік саясаттың басты бағыттарының бірі және бірінші кезектегі міндеттерінің бірі болып табылады. Бүгінгі марафон Қызылорда облысының жұмыспен қамтуды үйлестіру және әлеуметтік бағдарламалар басқармасының мемлекеттік әлеуметтік тапсырысы негізінде «Қызылорда облыстық мүгедектер қоғамы» ҚБ ұйымдастырумен өтті», дейді Қызылорда облыстық мүгедектер қоғамының төрағасы Сағатбек Сиюов.</blockquote>Марафон қашықтығы &nbsp;100 метр. Оған облыс бойынша &nbsp;30-дан аса арбамен қозғалатын мүгедектігі бар адамдар қатысты. Қатысушылар 4 категория бойынша жарысты.&nbsp;1. Балалар 5-12 жас 2.Жасөспірім 13-18 жас&nbsp; 3.Ерлер 18 жастан жоғары 4. Әйелдер 18 жастан жоғары &nbsp;Жеңімпаздарға арнайы дипломдар мен бағалы сыйлықтар табысталды. Ал қалған қатысушыларға алғыс хат пен ынталаңдыру сыйлықтары табысталды.<blockquote>«Мен мұндай жарысқа екінші рет қатысып отырмын және жүлделі орынға ие болғаныма өте қуаныштымын. Өткен жылы мен жеңе алмадым, бірақ мен бұған ренжіген жоқпын. Керісінше, бұл жарыс маған алға мақсат қою, табандылық сияқты жеке қасиеттерді дамытуға көмектесті. Ұйымдастырушыларға, атап айтқанда Қызылорда облыстық мүгедектер қоғамының төрағасы Сиюов Сағатбек Қуанышбекұлына мені назардан тыс қалдырмай шақырғаны үшін ерекше рахметімді айтамын. Және де алдағы уақытта да осындай жарыстар болғанын қалаймын»-дейді марафонға қатысушы Балнұр Жайшылық.</blockquote>&nbsp;<figure class="image"><img src="https://knadmin.beoblood.kz/uploads/09adc2a1_8ce3_49f7_a31f_360cc176811e_a388c72f6a.jpg" alt="09adc2a1-8ce3-49f7-a31f-360cc176811e.jpg"></figure>

Қызылордада «Арбамен марафон» атты облыстық жарыс өтті

<a href="https://kyzylorda-news.kz/">Kyzylorda-news.kz.</a> Ақбай халқымен өткен кездесуде Арал ауданының басшысы Серік Сермағамбетов жыл басынан бері атқарылған жұмыстар мен жүзеге асырылып жатқан ірі жобалар жөнінде баяндады.Кездесу елдімекенде орналасқан «Шеру» шаруа қожалығының егіс алқабы жанында өтті. Қожалық бүгінде 3 гектар жерге бау-бақша өнімдерін егіп, 1,5 гектар жері «Подпленка» әдісімен, ал қалған жартысы қолмен суару әдісімен орналастырған.<blockquote>«Жылымыз жағымды жаңалықтармен басталды. Мемлекет басшысының тікелей қолдауымен, республикалық бюджеттен биылғы жылға 1,4 млрд. қаржы қаралып, аудан орталығынан аспалы көпірдің құрылысы бастау алды. Оған қоса, қала аумағынан 100 пәтерлі тұрғын үйдің жобасы басталып, бұл үйлер «Халықтың әлеуметтік жағынан әлсіз топтары» санатындағы азаматтар иеленеді. Жылда осылай әртүрлі санатты қамтитын боламыз. Бұл жұмыстар алдағы уақытта да өз жалғасын табатын болады. Жоба бүгінде 1 млрд. теңгеге жуық қаражатты құрап отыр.Жол мәселесі де кезең кезеңімен шешімін тауып келеді. Былтыр автожолдарға 2,8 млрд қаржы бөлінсе, биыл 7 млрд-қа жеткізіп жатырмыз. «Ауыл - Ел бесігі» жобасына енген ауылдарды дамытып қана қоймай, барлық елдімекендерді дамыту тұжырымдамасына сәйкес ең бірінші кезектегі жол, су жүйесі, газ тарту мәселелерін шешу үшін үлкен жобалар жүргізудеміз. Қазір электр желілерін жаңғыртуға баса мән беріп жатырмыз. Биыл Ел Президентінің тапсырмасына сәйкес, «Жайлы мектеп» бағдарламасы аясында Арал қаласы мен Жақсықылыш кентінде жаңа мектептің құрылысын бастайтын болсақ, оған қосымша Сапақ, Мергенсай ауылдарына да білім ордасын салу жоспарда тұр» - деді, Серік Сағитжанұлы.</blockquote>Тұрғындар да өз тарапынан жергілікті жердегі шешімін табуды қажет ететін өзекті деген мәселелерді ортаға салды. Өз кезегінде аудан әкімі әлеуметтік салаларға баса мән беріліп, жұмыстар кезең-кезеңімен шешілетінін жеткізді.Кездесуден соң, аудан әкімі «Асхат» шаруа қожалығының егіс алқабы мен жеке кәсіпкер «С. Нұрмановтың» алма бағына барды. Бүгінде 5 гектар аумақты қамтыған шаруа қожалық егістікке бау бақша дақылдарының түрлі тұқымдарын орналастырған. Өнім маусым айында өз жемісін беретін болады. Ал ауылдық округ маңынан 5 гектар жерге алма өсірген кәсіпкер, 6000 түп ағаш отырғызған. Алқап «Қаһар» каналы арқылы суландырылуда.<figure class="image"><img src="https://knadmin.beoblood.kz/uploads/349061113_576095141306584_1516952921438046259_n_7cd972785b.jpg" alt="349061113_576095141306584_1516952921438046259_n.jpg"></figure>

«Жайлы мектеп»: Арал ауданында 4 мектептің құрылысы басталады

<a href="https://kyzylorda-news.kz/">Kyzylorda-news.kz.</a>&nbsp; 25 мамырдан кейін сабаққа себепсіз келмеген оқушының ата-анасы ғана емес, мектеп директорлары да жауапқа тартылатын болады.Бұл жөнінде оқу-ағарту министрлігі оқу жылының аяқталуына қатысты шұғыл жиында айтты.<blockquote>"Кәмелетке толмаған баланың тәрбиесі мен біліміне қатысты міндеттемелерді орындамау екі тараптың жауапкершілікке тартылуын көздейді", - деп мәлімдеді ведомстодағылар.</blockquote>Жиын барысында оқулықтарды оқу жылы аяқталмай жинап алған мектеп басшылары 15-тен 30 АЕК көлемінде айыппұл арқалайтыны айтылды.Естеріңізге сала кетейік, биыл оқу жылы 1 маусымда аяқталады.

Кітаптарды оқу жылы аяқталмай жинап алған мектеп басшыларына айыппұл салынады

<a href="https://kyzylorda-news.kz/">Kyzylorda-news.kz.</a> Байқасаңыз, бүгінде тілінің мүкістігі бар балалар жиі кездеседі. Бір емес, бірнеше дыбысты бұзып айтатындар көп. Ата-аналар алаңдайтын үлкен мәселелердің бірі де – осы. «Баламыздың тілі дұрыс шықпай жатыр» деп дабыл қағушылар аз емес. Осы орайда №266 мектеп-лицейдің логопеді Райхан Пірімжароваға бірнеше сауал жолдаған едік.– Райхан Жандосқызы, бала тілінің кеш шығуының басты себебі неде?– Баладағы сөйлеу тілі бұзылысының негізгі себептерінің биологиялық факторларына құрсақішілік даму кезінде ұрықтың гипоксиясы, анасының жұқпалы аурулармен ауыруы, босану кезіндегі зақымдар, сондай-ақ туылғаннан кейінгі алғашқы айларда әсер ететін патогендік факторлар (ми инфекциялары, жарақаттар, т.б.) жатады. Ал әлеуметтік-психологиялық тұрғысынан қоршаған ортаның жағымсыз әсерлері, қостілділік, айналасындағы адамдардың сөйлеу қабілетінің бұзылуы әсер етеді. Көп ата-аналар баланың сөйлеудегі дыбыс шығаруы үлкендердің көмегінсіз, өз бетімен дамиды деп ойлайды. Бірақ бұл қате түсінік. Қазір көп балақайлар сағаттап теледидардың алдынан шықпайды немесе ұялы телефон, планшет, компьютер ішіндегі вертуалды әлемге кіріп, санасы қажетсіз ақпаратқа толады. Салдарынан олар ойын жеткізе алмайды және тілі кеш шығады.Сөйлеу тілі дамуының айқын ауытқуы бала үшін нағыз жағымсыз салдарын туғызады. Баланың психикасы кешігіп дамиды, таным іс-әрекетінің жоғары деңгейлерінің қалыптасуы тежеледі, ерік-эмоциялық жағының бұзылуы пайда болады, ол тұлғалық ерекше қасиеттерінің қалыптасуына алып келеді. Балада тұйық мінез, көңіл-күйінің тұрақсыздығы, сенімсіздік пайда болады.– Сөйлеу тіліндегі бұзылыс қай жаста басталады?– Бір жастағы бала 10-15 сөзді, екі жастағысы 300-дей сөзді анық айтып, 3 жастан асқасын еркін сөйлесе алатын жағдайда болуы қажет. Егер 3 жастан асқан соң олардың тілі бұл нормаға сәйкес келмесе және 4-5 жаста дыбыстарды бұзып айтуы, тұтығуы, байланыстырып сөйлей алмауы байқалса, ата-ана логопед маманның көмегіне жүгінгені дұрыс. Алайда бұл кезде де олар бар жұмыс пен жауапкершілікті логопедке артпауы қажет. Яғни баланың сөйлеу тілі бұзылысын түзетуде маманмен ата-ана бір команда болып үздіксіз жұмыс жасаса тез әрі жақсы нәтижеге қол жеткізе алады.– Үй жағдайында баланың сөйлеу тілін түзете-дамыту үшін ата-аналарға қандай кеңес бересіз?– Сөйлеу процесіне тіл, тіс, ерін және жақ қатысады. Сондықтан ерте жастан бастап баланың сөйлеу мүшелерін, қимыл-қозғалысын дамыту маңызды. Осы орайда балғынның сөйлеу тілін түзете-дамытуда ата-аналарға мынадай кеңестер ұсынамын. Жаңа туылған сәбиде алғашқы тістер пайда болғаннан бастап қою тағамдарды қосымша жеу қажет. Қазір көп ата-ана баласының тағамын блендерден өткізіп бергенді ұнатады да, 3-5 жасқа дейін ұсақталған, үгілген ас ішеді. Осылайша шайнау қажеттілігі қанағаттандырылмағандықтан, оларда тіл дамуы тежеледі. Сондай-ақ, емізікті 1 жастан кейін пайдалануға болмайды.Балаға жеке және психикалық тәрбие беру балалық шақтарынан басталады. Барлық дағдылар отбасынан алынады, соның ішінде дұрыс сөйлеу дағдысы да отбасында қалыптасады. Баланың тілі жаңадан шығып келе жатқанда онымен бір тілде тілдесіп және «бала тілімен» сөйлеспеу қажет. Мысалы, ням-ням, пи-пи, бум-бум, тағы басқа сөздерге шектеу қойып, оның дұрыс еместігін түсіндіріп, нан, машина деп таза айтқызыңыз. Баланың ұсақ қол маторикасымен көп жұмыс жасау керек. Ұсақ қол маторикасы арқылы баланың тілі дамиды. Бірге көбірек сурет салыңыздар, мозаика, пазл, манка және құммен сурет салу, ¬ермексаз, ұсақ дәнді дақылдармен жұмыс жасау арқылы сіздер өз балаларыңызды жан-жақты дамыта аласыздар. Кішігірім әңгіме құру үшін суретпен жұмыс жасап, балаға уақыт бөліп, кітап оқып беріңіз. Кітап оқу арқылы баланың ойы, танымы, логикалық ойлауы дамиды. Баламен үнемі сөйлесіп, оның жауаптарын тыңдау керек. Бала сөйлескенді, оны тыңдағанды ұнатады, қажет етеді. Серуенде әңгімелесіп, жаңа сөздерді бірнеше рет қайталаңыз. Балаға айтқан сөздеріңіз анық болсын. Сөйлемдерді де анық, дұрыс айтыңыз. Балаға сюжеттік ойындар ойнатыңыз. Мысалы, «Дүкен», «Шаштараз», «Дәрігер», «Балабақша» секілді. Кітаптағы суреттер арқылы әңгіме жүргізіңіз, баланың өзінен сұраңыз. Фотоальбомдағы суреттер бойынша әңгімелесіңіз. Жеңіл тақпақтарды жаттатып, мәнерлеп айтқызыңыз. Тұтықпасы бар балаларға тыныс алу жаттығулары, ән айтқызу және жаңылтпаштар жаттату жақсы нәтиже береді. Өз сөйлеуіңізді тым қарапайым түрде жасамаңыз, ақырын күрделендіріп, ересек адамдардың сөйлегені сияқты сөйлесіңіз. Осындай жай түрдегі кеңестерге сүйеніп отырсаңыз, баланың ойлау қабілеті, тілі, жалпы дамуы жақсы болады және үлкен нәтижеге жетесіздер.– Сөйлеу тілінде бұзылысы бар балаларды ерте жастан логопед маманға апару қаншалықты тиімді?– Ата-ана баласынан сөйлеу тілі дамуының кешеуілдеуін немесе бұзылысын байқаған жағдайда логопед маманның көмегі арқылы ерте жастан түзету жұмысын жүргізіп, тез оң нәтижеге қол жеткізе алады. Сондай-ақ, логопедиялық диагноздарға байланысты баланың ерекшелігі мен қажеттілігіне сәйкес басқа сала мамандарымен кешенді түрде жұмыс жүргізген тиімдірек. Атап айтсақ, педиатр, невропатолог, остеопат, ортодонт дәрігерлерінің бақылау емі, психолог, дефектолог мамандарының түзете-дамыту жұмыстары баланың тек сөйлеу тілінің дамуына ғана емес, жалпы дамуына оң әсерін тигізеді.– Сіздің практикаңызда қандай жағдайлар жиі кездеседі?– Мен жалпы білім беретін мектепте мұғалім-логопед болып қызмет атқарамын. Ерекше білім беруді қажет ететін баланы психологиялық-педагогикалық әдіс-тәсілдерімен тексере отырып, әртүрлі тіл кемістіктерінің түрлерін, психикалық дамуы тежелген, эмоционалды және мінез-құлықтағы бұзылыстарын түзетуде қызмет етіп келемін. Менің тәжірибемде мектеп жасындағы балалар арасында сөйлеу тілінің жалпы дамымауы 2-3 деңгейі, дыбыс айту бұзылысы, тұтықпа, ринолалия диагноздары көп кездеседі. Сөйлеу тілінде бұзылысы бар балалармен түзете-дамыту жұмысының мазмұнына қойылатын қазіргі таңға сай жоғары талаптарды іске асыруда ең алдымен логопедтің тұлғалық қасиеттері де өте маңызды. Ол әлеуметтік және ұйымдастырушылық белсенділігімен ерекшеленіп, балаларды сүйіп, өз ісіне бірілген болуы керек. Логопедке педагогикалық шығармашылықтағы емес, бақылаушылық, шыдамдылық және жауапкершілік қажет деп есептеймін.Менің мамандығыма деген сүйіспеншілігім мен құлшынысым жыл санап артып келеді. Себебі, балалармен логопедиялық түзете-дамыту жұмысын жүргізу арқылы оң нәтиже шығару мен үшін үлкен жетістік. Ата-ананың алғыс білдіруі мен баланың қуанышы мені қанаттандырады. Әрбір бала – бір жұлдыз. Сол жұлдызды жаға білу менің кәсіби шеберлігіммен баланы шыңдау жолында атқаратын талмас ізденісіме тікелей байланысты.Егеменді еліміздің ең басты мақсаты – өркениетті елдер қатарына қосылу болса, оған жетуде жан-жақты дамыған, рухани бай тұлғаның алар орны ерекше. Сондықтан әркім өз ісін жетік меңгеріп, өзгелерге септігін тигізе алса нұр үстіне нұр болары сөзсіз.– Кеңестеріңізге рахмет.

Райхан Пірімжарова, логопед: Баламен ересек адамдай сөйлесу керек

<a href="https://kyzylorda-news.kz/">Kyzylorda-news.kz.</a> Арал ауданының әкімі Серік Сермағамбетов Аққұм және Сазды ауылдық округтеріне барып, жергілікті тұрғындармен кездесті.Ауыл халқымен өткен кездесуде аудан басшысы жыл басынан бері өңірдегі атқарылған жұмыстарды баяндап, жүзеге асырылып жатқан ірі жобалар жөнінде тоқталып өтті.<blockquote>«Өздеріңіздің ауылдарыңызда электр желісін жаңарту үшін бүгінде жоба дайындалып, мемлекеттік сараптаманың оң қорытындысын алдық. Бюджеттік өтінімі тапсырылды. Келесі жылға 6 елдімекен, оның ішінде Шижаға ауылы да бар, жұмыстары жүргізілетін болады. Биылғы жылы жарықтандыру бойынша да елдімекенге аудан бюджетінен 4,5 млн. теңгеге бөлініп, мердігері анықталды. Жуық күндері бұл жұмыста жүзеге аспақ. Одан бөлек, 3,5 млн. теңгеге ауылдың шет аймағына КТПН орнату жоспарланып отыр. Жол мәселесіне қатысты ауылға кіреберіс жолдың ағымдағы жөндеу жұмыстарыда басталды. 10 мың шаршы метрді құрайтын аудандық маңызы бар автожолдарға аудан бюджетінен 52,0 млн теңге бөлініп, соның ішінде Аққұм елдімекеніндегі 1000 шаршы метр жөндеуден өткізілмек» - деді, Серік Сағитжанұлы.</blockquote>Сондай-ақ, Шижаға елді мекеніне газ желісін тарту жоспарлы жұмыстардың бірі екендігін, Сексеуіл кентінен кейінгі ең бірінші кезекте осы ауылды көгілдір отынға қосу үшін құны 1,7 млрд. теңгені құрайтын жоба бүгінгі күні мемлекеттік сараптамадан өткізіліп тұрғандығын, келесі жылы республикалық бюджеттен қаржыландырылуы үшін нақты жұмыстар жүргізіліп жатқандығын жеткізді.Бұдан бөлек, ауыл халқының өткен жылғы аудан әкіміне айтылған өтініші орындалып, демеушілік есебінен жаңа балабақша құрылысы басталған еді. Бүгінде 2 қабатты нысанның 1-ші қабатының құрылысы аяқталуға жақын. Балабақша 150 орынға арналған. Жеке кәсіпкер Б. Жандаулетов аудан басшысын қызу жұмыс барысымен таныстырып, биыл бүлдіршіндер жаңа ғимараттың игілігін көретінін жеткізді. Аудан әкімі бұл «Жеке инвестор есебінен салынған ең үлкен балабақшалардың бірі» екенін айтып, кәсіпкерге оң бағасын берді.Кездесуде тұрғындар тарапынан ауылға денешынықтыру және сауықтыру кешенінің қажет екендігі айтылды. Аудан әкімі 3 ауылға спорт кешенін салу бойынша жоба әзірленгенін, оның біреуі Шижаға ауылына тиесілі болатындығын жеткізді.Сапар барысында аудан басшысы жеке кәсіпкер Г. Жолшараеваның «Тойхана салу» жобасымен танысты. Кәсіпкер құны 50 млн. теңгені құрайтын бұл жобаның 42 млн. теңгесі өз қаражаты есебінен, 8 млн. теңгеге «Ауыл Аманаты» жобасы арқылы қаржыландыру үшін өтінім ұсынғанын айтты. Өз кезегінде аудан басшысы электр желісі, су жүйесі колжетімді екенін және нысанды көгілдір отынға қосу үшін жұмыс жасау керегінде атап өтті. Тойхана сыйымдылығы 200 адамға арналған.Сазды ауылдық округінің тұрғындарымен кездесу барысында аудан басшысы Серік Сағитжанұлы өңірдегі оң өзгерістерді айтып, алдағы жоспарлармен бөлісті.Ең алдымен аудан басшысы жоба құны 918,5 млн. теңге болатын өткен жылы басталған «Сазды елдімекеніне кірберіс» автожолына асфальт төсеу жұмыстарының өз жалғасын тауып, бүгінде жолдың 17 шақырымына қиыршық тас, 5,5 шақырымына асфальт жабындысы төселініп жатқанын айтты. Мердігері – «Арал құрылысы» ЖШС-гі. Ауыл тұрғындары бұл жұмыстардың өз деңгейінде жүргізіліп жатқанына қуанышты екендіктерін айтып, ризашылықтарын жеткізді. Аудан әкімі мердігер мекемеге жолдың сапалы әрі барлық талапқа сай жасалуын қатаң түрде ескертіп, маусым айының аяғына дейін 10 шақырым жолды толық игеруді тапсырды. Жауапты сала басшыларына жол құрылысы жұмыстарының аяқталысымен аудандық полиция бөлімімен бірлесе отырып, жол белгілерін орнату жұмыстарын жүргізуді жүктеді.Мұнымен бірге, су мәселесі де – күн тәртібіндегі бірінші мәселе екендігін, бүгінде елдімекенге тұщытатын қоршауланған ауыз су жүйесіне қосу үшін жұмыстар жасалып жатқандығын жеткізді. Сондай-ақ, ауыл ішіне «Тағзым» алаңын салу үшін ауылдық округ бюджетінен қаржы қаралып, биылғы жылдың маусым айында басталатындығын да атап өтті.Кездесу соңында ауыл ақсақалдары аталған жұмыстарға оң бағасын беріп, алдағы жұмыстарға сәттілік тіледі.<figure class="image"><img src="https://knadmin.beoblood.kz/uploads/348673815_274859111684698_300678154686493437_n_fb53dd3da0.jpg" alt="348673815_274859111684698_300678154686493437_n.jpg"></figure>&nbsp;<figure class="image"><img src="https://knadmin.beoblood.kz/uploads/348972728_267574792464858_5865657149403619549_n_b095f850f2.jpg" alt="348972728_267574792464858_5865657149403619549_n.jpg"></figure>

Кәсіп ашпақ болған аралдық тұрғын «Ауыл аманаты» жобасынан қолдау тапты 

<a href="https://kyzylorda-news.kz/">Kyzylorda-news.kz.</a>&nbsp;Бүгінгі өткен брифингте Сырдария өзеніндегі су деңгейі туралы айтылды. Сала мамандарының айтуынша, Сырдария өзеніне күнделікті бақылау жұмыстары жүргізіліп, егіс алқаптарына жіберілетін су көлемі толық қамтылғанын жеткізді.&nbsp;<blockquote>«Шардара су қоймасында 4301 млн.текше метр су &nbsp;бар. Қоймаға түсіп жатқан су көлемі секундына - 82,8 текше метр, ал төменге тасталып жатқан су көлемі секундына - 200 текше метр. Мұнан өзге, Көксарай су реттегішіндегі су көлемі - 750,56 млн.текше метр болса, Әйтек су торабынан өзеннің төменгі ағысына жіберілген су көлемі секундына - 5 текше метрді құрап отыр. Шардара су қоймасымен Көксарай су реттегішінің жұмыс кестесі бақылауға алынды. Жергілікті атқарушы органдар және су шаруашылығы ұйымдарымен Сырдария өзеніндегі су деңгейіне күнделікті бақылау жұмыстары жүргізілуде», - деді «Арал-Сырдария» бассейндік инспекциясы басшысының міндетін атқарушы Зейнулла Қазтоғанов.</blockquote>Өздеріңізге белгілі, вегетациялық кезеңнің басталуына байланысты каналдармен суармалы егіс алқаптарын сумен қамтамасыз ету жұмыстары үздіксіз жүргізілуде.&nbsp;<blockquote>«Егілген егісті суармалы сумен қамтамасыз ету бойынша дайындалған алдын ала су пайдалану жоспарына сәйкес секундына 464 текше метр су көлемі каналдармен толық қамтамасыз етілуде. Бүгінде &nbsp;62,9 мың гектар күріш дақылы суға бастырылған. Қазіргі таңда &nbsp;филиал тарапынан күнделікті каналдармен судың алынуы мен егістікке дейінгі берілуі толық бақылауда», - деді «Қазсушар» РМК Қызылорда облысы филиалының су шаруашылығы нысандарын пайдалану бөлімінің басшысы Айдос Асанбаев.</blockquote>

Сырдария өзеніндегі су деңгейі бақылауда

<a href="https://kyzylorda-news.kz/">Kyzylorda-news.kz.</a> 25 мамыр күні атмосфералық бөліктердің өтуімен елдің батысында, солтүстігінде, оңтүстігі мен оңтүстік-шығысында найзағай ойнап, жаңбыр жауады. Республиканың қалған аймақтарында солтүстік антициклон жотасының әсерінен жауын-шашынсыз, ашық күн райы күтіледі. Барлық өңірде жел күшейіп, батыс пен оңтүстікте шаңды дауыл сақталады. ҚазАқпарат бұл туралы Қазгидрометке сілтеме жасап хабарлайды.Сондай-ақ Павлодар облысының басым бөлігінде, Қызылорда облысының шығысында, орталығында, Қарағанды облысының шығысында, Ұлытау облысының орталығында, Қостанай облысының оңтүстігінде, Атырау облысының оңтүстігінде, шығысында, Абай облысының солтүстігінде төтенше өрт қаупі сақталады.

Архив