Жалағаш ауданының&nbsp;тұрғындарының қауіпсіздігін қамтамасыз ету мақсатында бүгін облыс және аудан аралық қоғамдық көліктерге түсіндірме жұмыстары жүргізілді.Түсіндірме жұмыстарына сала бойынша жауапты басшылар қатысып, қоғамдық көліктердің жол көлік оқиғаларына жол бермеу шараларын қамтамасыз ету тапсырылды.&nbsp;–&nbsp;&nbsp;Жолаушыларды шамадан артық тасымалдау жол қауіпсіздігіне көп әсер етеді. Егер қандай да бір жол апаты болса, бірінші кезекте жолаушылар зардап шегеді. Сондықтан мұндай шаралар жиі өткізіліп тұруы керек. Бұл жерде жолаушылар да адам толы қоғамдық көліктерге отырмауға тырысуы керек. Осыған орай қала тұрғындарына қоғамдық көліктерде тәртіпті сақтауларын сұраймыз, –&nbsp;дейді аудандық полиция бөлімінің басшысы Мәулен Нөсеров.Сондай-ақ көліктерде өрт болған жағдайда қолданылатын арнайы құралдар, дәрі-дәрмектер және талапқа сай сыйымдылықта орындардың болуы қажеттігі айтылды. Қоғамдық көліктердегі баға тұрақтылығын сақтауда, халықтың қауіпсіздігін қамтамасыз ету мақсатындағы рейдтік шаралар жалғасатын болады.Сонымен қатар мұндай түсіндірме жұмыстары тұрақты жүргізілетін болып келісілді.

Жалағаш ауданында жолаушылар қауіпсіздігін қамтамасыз ету шаралары жүргізілуде

Қазір кәсіптің қай бағытын қолға алам десеңіз, мемлекет тарапынан бәріне қаржылай қолдау бар. Мұның бір тиімділігі бұрын іс бастамасаңыз да сізді мемлекет сүйемелдеуге дайын. Бұл қолдау біраз азаматқа үлкен демеу болуы керек, қазір Жалағаш ауданында да кәсіпкерлердің қатары артқан. Ал пайдасы болмаса жұрт жаппай кәсіпкерлікке бет бұрмас еді. Бір қуанарлығы, ауыл халқы да қазір іс бастауға бейім тұр. Ауылдық елді мекендерде наубайхана, шаштараз, тігін шеберханасы сияқты кәсіп көзімен табысқа кенелу оңайға соқпайды. Десе де көзін тапсаң бұл бағытта да қыруар қаржыға кенелуге болады. Ет өнімдерінің бағасында жиі өсім болып жатқанда мал шаруашылығын дамыту – кәсіпкер үшін табысқа кенелудің тиімді жолы. Мұны мәдениеттік Абай Мұстафаев жақсы біледі. Бұрын сатып алған малын бордақылап қайта нарыққа шығарған Абай ағамыз уақыт өте қомақты қаржысыз бұл салада табысқа жете алмайтынын жете түсінеді. Осылайша кәсіпкерлікті қолдауға бағытталған мемлекеттік бағдарламамен несие алуды көздейді.&nbsp;&nbsp;Абай Шоңмұрынұлының жылқы малын бордақылауға арналған жобасы 10 млн теңгемен қаржылай қолдау тапты. Тиісті қаражаттың бір бөлігіне кәсіпкер 32 бас жылқы сатып алды. Екі жылдан бері мал бордақылап нарыққа шығарған іскер азамат бұл бағдарламаның үлкен көмек болғанын айтады.&nbsp;– Мемлекет ұсынған несиенің көмегін көріп отырған жалғыз мен емес деп ойлаймын. Сондықтан бұл бағдарламалардың кәсіпкерлікті дамытуға үлкен демеу болғанын да жақсы білемін. Бұл сала дамыса, өңірлердің әлеуеті де артады, жұмыссыздық та белең алмайды. Осы ретте біз мұның тек кәсіпкерлік саласының алға басуына ғана жасалып жатқан қолдау емес екенін жақсы түсінуіміз керек. Бұрын пайыздық үстемақысы төмен қыруар қаржыға кенелу деген мүлде болған емес. Қазір осынша көмектің болып жатқаны мемлекеттің де экономикасында тұрақты өсім қалыптасқанын аңғартады. Біздің ауылда жүзден астам азамат кәсіппен айналысады. Аллаға шүкір, қазір олардың басым бөлігі сол қолға алған жобасымен тұрмысын түзеп алды. Мен де екі жылдан бері жылқы бордақылап сатамын. Пайда да жоқ емес, несием де жабылып жатыр, – дейді іскер азамат.&nbsp;Ағамызға мал шаруашылығы бөтен сала емес. Бұрыннан осы салада қолтаңбасы бар Абай Мұстафаев мал бағудың да өзіне тән қыр-сырын жетік меңгерген. Мал бағып көрмегендерге жем-суын молынан берсең, көп ұзамай қорадағы түлік домаланып шыға келетіндей көрінер, бірақ мүлде олай емес. Төрт түліктің ішінде әсіресе жылқы бағу оңай шаруа емес. Мәселен, Қамбар атаның тұқымына бағымда әсте молынан жем-шөп беруге болмайды. Бір тойып жем-шөп жеген жылқы 3-4 күн, әрісі 1-2 аптаға дейін тамаққа тәбеті құриды. Ал осынша уақыт дұрыс азық жемеген малдың тез етке шығуы неғайбыл. Бірақ бордақыда түлікті көп баптау кәсіпкер үшін үлкен шығын. Осы ретте іскер азаматтың жоңышқаны қай уақытта қанша салу керектігі, жемді қай уақытта беру қажеттігі жөнінде айтқан ақылы бізді таң қалдырмай қоймады.&nbsp;Кәсіпкер ауыл өнімінің нарықта өтімді келетінін айтады. Сондықтан ауыл халқы үшін мал бордақылап сату табысқа кенелудің ең тиімді жолы екенін тағы бір назарға салды. Расында ет сататын сауда орындарында тұтынушы тарапынан үлкендердің аузынан «Қай жақтан келген ет, қай өңірдің малы?» деген сөздерді жиі естиміз. Ал ауылдан келген өнімге тұтынушылар тарапынан үлкен талас болатынын көріп те жүрміз. Сондықтан ағамыздың әлгіндегі пікіріне қарсы айтар уәжіміз жоқ. Дайын өнімді тұтынуды қаймана қазақ біледі, ал оның қандай еңбекпен келетінін бірі білсе, бірі &nbsp;білмейді. Өрістегі жылқы арнайы бір бақташының назарында болмаса, барымташыға не итқұсқа жем болады. Ал бордақыдағы малдың тез қоң алуы үшін қандай күтім қажеттігін жоғарыда айттық. Сондықтан пайданың көзі осында екен деп шауып барып, шатқаяқтаған кімге болса да тиімсіз. Бастысы, Абай Мұстафаев секілді мақсатпен, жоспармен іс қылсаң болғаны, табыс өздігінен арта береді. Ағамыздың бұл салада мұнан басқа да жоспары жоқ емес, алдымен несиеден құтылса, басқа да кәсіп көзін қолға алуға ниетті.&nbsp;Қалғаны уақыттың еншісінде. &nbsp;

Ата-дәстүрді кәсіпке айналдырды

Әр жәдігер тарихтан сырт шертеді

Қазақ қашаннан қолөнерден құралақан халық емес. Соның ішінде ұсталық өнер бізге жақын. Жаугершілік замандарда ұсталар соққан қару-жарақтың сипаты бертін келе бейбіт өмірдегі тұрмысқа қажетті құрал-саймандармен алмасты. Ата-бабаларымыз ұста дүкенін кие тұтып, оның ішін таза ұстаған, тіпті, дүкен ішінде бейәдеп сөздер де айтылмаған. Ұстахананың бар тылсым қасиеті төстемірдің бойында болса керек, әйтеуір, бала күнімізде төстің үстіне шығып сүйір тұмсығына «ауыздық» салып, дүмінен қамшылап ат қылып ойнаған балаларға үлкен кісілер қатты кейіп жататын.&nbsp;&nbsp;&nbsp;&nbsp;&nbsp; Жаңаталап ауылының орталығында атадан балаға мирас болып келе жатқан ескі ұста дүкені бар. Бұл дүкенді ертеректе Әбжаппар ұста ұстаған. Әбжаппар әкеміз темірден түйін түйген ұста әрі қылдай нәрсеге қиюластырып өрнек түсіретін зергер болыпты. Ауыл-аймақтың халқын күнделікті тұрмысқа қажетті құрал-сайманнан да тарықтырмаған. Тіпті, ол кісіні Арқадағы бай-манаптар да арнайы алдырып, ұзатылатын қыздарының жасауы мен әшекей бұйымдарын тапсырыспен жасататын болыпты. Алтынмен аптап, күміспен күптелген сырға, сақина, жүзік, алқа, білезік, шашбау, шолпы, қапсырма секілді өзіндік шекімелі ерекше өрнегі бар, қыз-келіншектердің көз жауын алған бұйымдарды Әбжаппар әкеміз айлап жатып жасайды. Ұсталығымен, зергерлігімен Арқа жұртшылығынан сый-құрмет көрген әкеміз бес-алты айдан соң алдына жүз қаралы мал салып елге оралады екен...Сол кісінің ұста дүкенін бертін келе баласы Әбдікәрім ұстап келді. Ұядай ұстахана ауыл халқының барлық қажетін өтеді. Одан бөлек, ауылдағы шаруашылық көліктерінің сынған бөлшектері осы ұстаханада бүтінделді. Қазірде бұл киелі орын Әбжаппар әкеміздің кіші баласы Ғалымның иелігінде. Ғалым Әбжаппарұлы ұзақ жылдар осы аталған ауылда егін шаруашылығында механизатор, бригадир және басқа да жауапты жұмыстар атқарған. Қазірде жеке кәсіппен айналысатын ағамыз әкеден қалған қара шаңырақпен бірге, осы ұста дүкенін де күзетіп отыр. Ішіне кірсеңіз, шаң-шұң дыбыстан құлақ тұнады. Көріктен жаңа шыққан сом темірлерді жұмыр басты шой балға ұстаның ыңғайына қарай иіп, қамырша илеп жатыр. Белі құрсауланған дөңбек қара ағашқа бекітілген төстемір балғаның қатты соққысынан былқ етпейді. Есесіне, балға мен төстің ортасында алаулап жатқан темір металлдың зілмауыр соққыдан пішіні өзгеріп жатыр. Ұстаның бір қолындағы серпімелі ұзын сабы бар имек тұмсық қысқышы қозған темірді көріктің оттығынан алып төске төсеп, аударып-төңкеріп тұр. Бірақ, бұл жерде қолкөріктің орнын заманауи электрлі көрік ауыстырыпты. Бұл жайында Ғалым ағамыз: "Ұсталық – ежелден келе жатқан киелі өнер. Ұста дүкенін де, ұстаны да және ондағы әрбір құрал-сайманды да халқымыз әлі күнге дейін қастер тұтып келеді. Алайда, уақыт бір орнында тұрмайды, күн сайын, тіпті\сағат сайын ғылым дамып, тұрмыстық-техникалық мүмкіндіктеріміз артып келе жатыр. Сондықтан біз қай салада болмасын заман көшінен қалып қоймай, ілесіп отыруымыз керек. Қолкөрік – ол өткен ғасырларда ұсталардың темірді "пісіру" мақсатында пайдаланған құралы. Көріктің көлемі неғұрлым үлкен болса, оның көмейінен оттыққа берілетін ауаның қысымы да соғұрлым жоғары болады. Сол замандардағы ұстаханалар қазіргі зауыттардың қызметін атқарды. Яғни, онда бірнеше адам жұмыс жасады. Олардың бірі көрік басса, екіншісі темірді иіп, үшінші адам дайын болған темірді суғара беретін болған. Ал қазірде мен ұстаханада өзім ғанамын. Жалғыз адамға қолкөрікпен жұмыс істеу қиын, отты "оятып", темірді пісіру үшін бір адам көрікте арнайы отыруы керек. Сол үшін мен электрлі көрікті іске қостым. Бұның тиімділігі сол, қажетті темірді отқа қойып, басқа жұмыстарыммен айналыса беремін. Әрине, бұл қолкөрікті мүлдем пайдаланбаймын деген сөзім емес, ара-тұра бабамыздан қалған құрал-сайманның "шаңын сілкіп" тұрамын» дейді.&nbsp;Қазірде Ғалым ағамыз аймағымыздағы егін шаруашылығына қажетті құралдар жасайтын жалғыз темір ұстасы. Осы күндері аудандағы диқандар жалпы еңбек адамдарының пайдаланып жүрген кетпендері ағайынды ұсталар Әбдікәрім мен Ғалым ағаларымыздың қолынан шыққан. Қатты темірді өте жоғары градуста жұмсартып, одан күнделікті тұрмыста тұтынатын құрал-сайман, қару-жарақ жасау мыңның бірінің қолынан ғана келетін іс. Сапасына, пішініне қарай әр қайсысының өз жасалу жолдары, технологиялық әдістері бар. Темірді қорытып, одан қажетті дүниеңді жасағаннан кейін суғару процесі басталады. Бұл жұмыстың өте күрделі кезеңі.&nbsp;– Ең алдымен металды отқа қызарғанша қыздырып, өз еркімен салқындатып, жасытып алады. Жасыған металл жұмсақ әрі өңдеуге жеңіл болады. Негізінен, темірді көріктің оттығында қалдырып, көмірмен бірге суытады. Жасыған темір балғамен ұрып, шұңғылдап қобылауға, дөңес кейіпке келтіруге оңай көнеді. Балғамен көп ұрғандықтан темір қатая түседі. Сол кезде қайтадан жасытып алып, қобылау жұмысын әрі қарай жалғастыруға болады. Одан соң төске салып, балғаның сүйір қырлы жүзімен ұрып, таптап, шыңдайды. Шыңдау кезінде металл қатайып, өткірлігі арта түседі. Одан соң қақтайды. Ал, ең ақырында суғарады. Темірді суғару үшін қасат дайындау керек. Ол үшін алдымен топырақты қазанға салып су құйып қайнатып, суытып қояды. Ауыр бөлшектер шөгіп, суда қасат қалады. Осы суды басқа қазанға құйып, тағы қайнатады. Қазан суалғанда түбінде пышақтың қырындай ғана тозаң қалады. Осы тозаң "қасат" деп аталады. Кетпен түрлі температурада бірнеше мәрте суғарылады. Суғарардың алдында қасатты азғантай ғана суға езіп қоймалжың жасайды да оны кетпеннің жүзіне жағады. Қасат кепкеннен кейін тастай болып қатады. Мұның мәнісі мынада: қасатпен қапталған жер отқа қызбайды, кетпен сағаттап жоғары температурада қыздырылғанмен қасатталған жері суып тұра береді. Оны оттан алып суғарындыға салғанда отқа қызған тұсы ғана шыңдалады, – дейді темірші.&nbsp;Бұл жерде ұста кетпеннің жүзі мен сыртқы бірнеше микрон қабатын ғана шыңдап, қалған жерін жұмсақ күйінде қалдыруды мақсат тұтады. Өйткені, осылай жасалғанда кетпеннің пайдалану мерзімі ұзаққа созылады екен. Яғни, Ғалым ағамыз қандай да бір тұрмыстық затты жасағанда ең алдымен сапаға мән беретінін аңғардық. Жаңаталаптық темірші шаруашылыққа қажетті құрал-саймандармен бірге ауыл шаруашылығы техникаларының да кейбір тозған бөлшектерінің көшірмесін жасайды. Иә, "Ұстаның &nbsp;қолы – ортақ".&nbsp;Айтпақшы, Әбжаппар әкемізден қалған көрік те ұстахананың бір бұрышында тұр. Алайда, жасалғанына ғасырға жуық уақыт болған көнтерілі көне көріктің қазіргі жағдайдағы орыны бұл жер емес секілді, мұражайдың құнды жәдігерлерінің қатарына қосылуға сұранып-ақ тұр...&nbsp;

Темірден түйін түйген ұсташы

ХІХ ғасырда патша отаршылдарына қарсы ұлт-азаттық күрес жүргізген Кенесары хан мен оның қасында бірге болған, елге, халыққа белгілі адамдар көп еді. Солардың бірі – Кенесары туралы деректерде жиі айтылатын халық батыры Бұқарбай Естекбайұлы. Бұқарбай батырдың даңқы тек Сыр өңірінде ғана емес, тұтас қазақ даласына ерлігімен танымал. Біз осындай батырдың біздің өңірден шыққанын мақтан тұтамыз.&nbsp;Жалағаш ауданына қарасты Бұқарбай батыр ауылында баһадүрдің атындағы тарихи үй – музей бар. Бұл ғимарат батырдың 180 жылдық мерейтойы қарсаңында пайдалануға беріліп, Бұқарбай Естекбайұлының туғанына – 200 жыл толғанда жаңадан қайта салынған екен. Онда батырдың ұрпақтары өткізген көне жәдігерлер сақтаулы. Біз осы тарихи үйге барып, ондағы әр жәдігердің, экспонаттың тарихымен таныстық.&nbsp;Музейге кіреберісте Бұқарбай батырдың ескерткіші қойылған.&nbsp;Ғимараттың бірінші залында картиналар орналасқан. Бұл картиналарды батырдың мерейтойы қарсаңында танымал суретшілер тарту еткен. Майлы бояудан салынған. Бір картинада батырдың бейнесі, біреуінде өмірлік жары Шынар анамыз, тағы бірнеше картинада қазақ батырларының жорық кезіндегі, шайқас кезіндегі суреттері бейнеленген. Батырдың жары ажарлы, қайратты жан болғанын тарихтан білеміз. Шынар анамыздың ерлігін дәріптейтін ел аузында жүрген әңгіме де бар. Біле білсек, «Шынар көлдің» атауы осы кісінің есімімен байланысты.&nbsp;Бұқарбай батыр нөкерлерін ертіп, шапқыншылықпен ұзақ уақытқа жорыққа кетеді. Соны естіген қоқандықтар батырдың әйелін өлтіріп, кек алмақшы болады. Бір күні Сыр өңірін, Сырдария бойын жайлап отырған Бұқарбай батырдың ауылына келіп тұтқиылдан шабуыл жасайды. Сол сәтте «Еркегі жоқ бейбіт ауылды шапқалы тұрғандарың қай сасқандарың, қарапайым халыққа, бала-шағаға тимеңдер, мен керек болсам алдарыңда тұрмын» деп, шапқыншыларға қарсы тұрған екен. Бірақ қоқан шапқыншылары оны қоршап, қыспаққа алады. Ақырында найза түйреп өлтіріп, денесін көлге тастайды. Жаумен шайқас кезіндегі Шынар анамыздың ерлігін көрген ауыл адамдары Шынардың денесін арулап, көлдің жағасына көмген көрінеді. Сөйтіп ел жайлаған көл «Шынар көлі» атанып кетеді. Негізінде батырдың жарының өлімімен байланысты бір-екі аңыз-әңгіме бар. Солардың ішіндегі шындыққа жанасатыны да, көнекөз қариялардың білетіні де осы.&nbsp;Тарихи үйдегі әрбір экспонаттың тарихымен таныстырған музей қызметкері Мереке Әбілдаева батырдың ерлік істерінен әңгіме қозғап жүрді. «Бұл музейдің алғашқы директоры – Жоламан Алданазаров. Бұл кісі де тегін адам емес. Атақты батырдың тікелей ұрпағы. Қанша жыл осы музейді басқарды» дейді музей қызметкері. Тарихтан сыр шертетін көне жәдігерлердің ішінде ең алдымен біздің көзімізге түскені – Бұқарбай батырдың бір жарым ғасырға жуық уақыт бұрын жорықта пайдаланған қайқы қылышы. Қолымызға алып көрдік. Осыншама уақыт өтсе де, сыны кетпепті. Жақсы сақталған деуге болады. Жүзі әлі де өткір. Қылыштың салмағы да әжептәуір ауыр екен. Қыны ағаштан жасалғанға ұқсайды. Қолымызға алып тұрып «Осы қайқы қылышпен батыр бабамыз ұланғайыр жазиралы даламызға көзін сатқан жауды талай мәрте жер жастандырды-ау. Осы қарумен елін, жерін қорғап бізге бейбіт күннің таңын атырып кетті-ау» деп баба рухына еріксіз алғыс айттық. Мұнымен қоса музейде сонау&nbsp;XVIII-XIX&nbsp;ғасырлардағы темір қалқан, шақпақты аңшы мылтығы және Нұрмағанбет Оспанқұловтың шоқпары тұр. Бұқарбай батырдың шашақты туы, күмістен жасалған мөрі, өзінің қызына дүние есебінде берген оюлы сандығы да осында сақтаулы. Күмістен соғылған мөрдің ортасында араб әріптерімен жазылған сөз бар. Музей қызметкерінен сұрағанымызда, бұл жазудың мағынасы «Бұқарбай баһадүр» дегенді білдіретінін айтты.&nbsp;Екінші залдың төрінде орналасқан қабырғада батырдың суреті бейнеленген тоқылған кілем ілулі тұр. Оның қасында Бұқарбай батырдың мүсіні орналасыпты. Бұл мүсінді батырдың мерейтойында Тереңөзек ауданының мүсіншісі Жәркен Смағұлов арнайы жасаған екен. Гипстен құйылған, сырты сырланған. Көлемі аса үлкен емес. Батырдың сауыт-сайманын асынып, жорыққа дайындалып отырған бейнесі бейнеленген.&nbsp;– Жастайынан ел қорғау жорықтарына қатысып, шыңдалып өскен Бұқарбай батыр ержүректілігімен көзге түседі. Кенесары көтерілісіне алғашқылардың бірі болып қатысқан. Ол 1839 жылы тамызда Ақмола бекінісін алуға қатысты. Орыс тіліндегі деректерге қарағанда, Бұқарбай осы шайқастардың бірінде ауыр жараланып еліне қайтқан соң бейбіт еңбекпен айналысқан. Егін егіп, 1854 жылы Сырдария сағасынан күні бүгінге дейін ұрпақтары пайдаланатын «Бұқарбай арығын» қаздырған. Талайды көріп, ұзақ өмір сүрген батыр туған жерінде 1898 жылы дүние салды. Батырдан тараған ұрпақтары бүгінде өзі туып-өскен өңірде өмір сүруде.Ауыл тұрғындары жиі келеді. Батырдың тұтынған заттарын, қылышын, мөрін көріп, батыр бабаны еске алып тұрады, – дейді музей қызметкері.&nbsp;Музейде ауылдың ұстасы Мұқтасын Қауқановтың баласы өткізген зергерлік көрік, сонымен бірге үзеңгілер, қырықтық, құранды ер, ас үй, тұрмыстық бұйымдар мен ағаштан жасалған ыдыс-аяқтар да тарихтан сыр шертіп тұрады. Бір бөлігінде Сорлыасардан табылған қыш құмыралардың сынықтары, Қарақұмнан табылған қобыз, өгіз соқа орналасқан. Сонымен қатар сол ауылдан шыққан атақты тұлғалар, батырлар, &nbsp;соғыс ардагерлері және басшыларға арналған витрина да тарихи үйге көрік беріп тұр.&nbsp;Шағын ғана екі залдан тұратын мудейде тарих беттерінен сыр шертетін құнды жәдігерлер бар. Өткенді танып-білмей, болашаққа бағдар жасау мүмкін емес. Біз музейдегі экскурсия барысында Бұқарбай батырдың өмірінен, ерлік істерінен тағы да мағлұмат жинап, тарихқа көз жүгірттік.

Тарихқа толы музей

Көктемгі науқан орта тұсына жеткен шақта алқаптағы жұмыс қыза түседі. Қайнаған тіршілікке қарап тұрып, осынша ырзық-несібесін адалынан берген қара жерге «Жер-Ана» деп айдар таққан адамнан айналасың. Рас қой, тастаған дәнің мыңдаса, ала жаздай атыз жағалағандағы бейнетіңнің зейнеті қайтса «Жер- Ана» демей не дейсің! Өткенде аудан іргесіндегі «Сәрке батыр» шаруа қожалығына бардық. Көшені бойлай келе алқапқа енгеніміз сол еді, атыз басындағы керемет көрініс маған қара жердің қадірін ұқтырды. Ауыл шаруашылығы саласындағы қажырлы мамандардың қолтаңбасы қалған бұл дала төсі кейінгі буынға аманат екен ғой. Ал соны жете түсініп, өткеннен өнеге алған бүгінгі буыннан айналасың.&nbsp;Шаруашылықтың шираған жұмысына қарап саладағы кадр жастармен толығып жатқанына көз жеткіздік. Күрішке түскен комбайн үстінде де жас маман, күзгі науқан барысында босаған жерді көктемгі егіске дайындап жатқан трактор тізгіндеген еңбек адамдарының басым бөлігі жастар. Буын алмасудың бүгінгі шаруашылықтарда жүріп жатқаны қуантады. Оның үстіне қазір заманауи техникалармен жарақтанып жатқан ауыл шаруашылығының жұмысы айтарлықтай жеңілдеді. Ал «Сәрке батыр» ЖШС-дағы Наурыз Демесінов сала серпін алмай тұрып та өзінің білікті маман екенін ісімен дәлелдеген майталман механизатор.&nbsp;2007 жылдан бері аталған шаруашылыққа жұмыс істейтінін Наурыздың уақыт өте түрлі техника тізгіндеймін деп өзі де ойламаған. Бұл салада он жылдан астам тәжірибесі бар білікті маман көктем басталса ХТЗ тракторымен сүдігер жұмыстарына кіріседі. Ал күз болса комбайнға отырып, күріш жинайды. Бұл маусымда комбайншылар жетерлік. Десе де өнімнің мол болуына байланысты күріш тасымалдайтын көлік тапшылығы байқалады. ХТЗ тракторына тіркеме жегіп алып, Сыр салысын тасымалдауға жәрдемдесіп жүргені де сондықтан.&nbsp;– Шаруашылық жұмысы тек қыс мезгілінде тоқтайды. Қалған уақытта өздеріңіз көріп тұрғандай, бізге дамыл жоқ. Кеше ашылған 100 гектар жерді көктемгі науқанға дайындап қойдық. Енді қалған жерлер босағанға дейін осылай күріш тасымалдауға жәрдемдесемін. Жерді сүдігерлеуге келсек, егістікті күзде бір, көктемде бір жыртқан абзал. Себебі күзде айдалған жердің бетіне шыққан арам шөптер қыстағы аязбен үсіп кетеді. Есесіне келер жылы өнім отақтың ешқандай кедергісінсіз тегіс бас алатын болады. Алдын ала тағы бір айдап алып жатқан себебіміз сондықтан. Өзімнің әкем де ауыл шаруашылығының тәжірибелі маманы. Менің бүгінгі жетістіктерімнің бәрі – сол кісіден үйренгендерімнің жемісі, – дейді механизатор.&nbsp;Байқасақ айтқан сөзінің жаны бар. Осының алдында ғана шаруашылық төрағасымен сөйлескенімізде бұрын өнімді аз беретін отақ басқан алқап мәселесінен осындай әдіспен арылғанын айтқан еді. Есесіне былтыр гектарынан 30-35 центнерден өнім берген сол атыздардан қазір 69-70 центерден өнім алынуда. Төраға бір сөзінде тәжірибеде бар тәсілді меңгеріп алған осындай жас мамандарымен мақтанатынын да жасырмады. Біз Наурыздың ауыл шаруашылығы саласы бойынша айтқан бір ғана тәжірибесімен бөлісіп отырмыз. Болмаса жерді сүдігерлеу кезінде нендей жұмыстарға мән беру қажет, дәннің толық бас алуы үшін қандай жағдай жасалу керектігі жөнінде біраз кеңес алдық. Майталман механизатор агрономия саласынан да бейхабар емес. &nbsp;Талай техниканың тізгіндей жүріп, саланың жұмысын меңгеріп алған механизатордың біліктілігіне тәнті болдық.&nbsp;

Қыстың қамын жазда ойла

Kyzylorda-news.kz &nbsp;Жаңақорған жұртшылығы бүгінде жылыжай шаруашылығына бейімделе бастады. Жыл он екі ай жұмыс істеп, екі маусымда өнім алатын кәсіпкерлерге де мемлекеттен көрсетілетін қолдаулар көп.Бүгінгі «Ауыл аманаты» айдарындағы біздің кейіпкеріміз Айымбетов Наурызбек те дәл осылай өткен жылы мемлекеттен қолдау тауып, жеңілдетілген несие арқылы жылыжай кәсібін бастаған.Наурызбек бұл кәсіп түрін бала кезінен ата-анасына көріп үйренген. Бүгінде өз ауласынан жылыжай соғып, отбасылық бизнеске айналдырған. Осыдан бір жыл бұрын «Ауыл аманаты» жобасы аясында 2,5 пайызбен 4 млн.теңге несие алып, шағын кәсібін ілгерілетуге мүмкіндік алған.<blockquote>Өзім жылыжайдың ісін қияр егумен бастадым. Осы кәсіптің көзін тапқан шаруалармен жиі кездесіп, пікірлестім, ой бөлістім. Жалпы осы сала жақын болды. Себебі кішкене кезімізден ата-анаммен есік алдында егін ектік. Ойлана келе осы жылыжайды бастап кеттім. Жеңілдетілген несие алып, жылыжайымды үлкейте түстім, – деді Наурызбек Жұмабайұлы.</blockquote>Ең алдымен қияр егумен бастаған Наурызбек жылыжайын кеңейткен соң қызанақ егуді де бастаған. Бүгінде алғашқы өнімнен 9 тонна қияр, 7 тонна қызанақ алып отыр. Бұл өнімдерді кенттегі шағын дүкендер мен ірі сауда орталықтарына сатуда. Наурызбектің айтуынша, алдағы уақытта осындай мемлекеттік бағдарлама арқылы қолдау болса егістік жер алып, жылыжай ісін кеңейтпекші.Фото: saq.kz

Жаңақорғанда жылыжай шаруашылығы дамуда

Кәсіпкерлікті қолдауға бағытталған мемлекеттік бағдарламалар соңғы жылдары ауыл халқының әлеуетін арттыруға да өз септігін тигізіп жатыр. Бұрынғыдай емес, қазір кәсіпке ден қойып, қаржылай қолдаумен іс бастап, оны әрі қарай дамытып жатқандардың қатары артуда. Олардың ішінен ауылдық елді мекендер тұрғындарының табылып жатқаны бізді қуантып отыр. Неге? Себебі бұрын ауыл халқы іс бастауға жүріксінетін, тіпті қаржылай қолдау көру үшін оның құжаттарын дайындауға орашолақ қарайтын. Қазір ше, қазір мүлде басқа. бүгінде ауыл халқы да кәсіпсіз нәсіп болмайтынын жете түсінді. Жалағаш ауданына қарасты 14 елді мекеннің қайсысына атбасын бұрсаңыз да ауыл халқының кемінде 7-8-і мемлекеттік бағдарламамен қаржылай қолдауға ие болып, іс бастап жатқанын көресіз. Бұл өз кезегінде әлеуметтің әлеуетін арттырумен шектелмей, жұмыссыздық мәселесінің алдын алуға да үлкен көмек болуда.Осы кәсіпкерлікті дамытуға арналған қай жобаны алып қарасаңыз да мақсаты бір – елде жұмыссыздықтың алдын ала отырып, жергілікті халықтың тұрмыс сапасын жақсарту. Кеше Жаңадария ауылына барғанымызда мұндай бағдарламалардың расында ауыл халқы үшін үлкен көмек екеніне көз жетті. 500 мың теңге қайтарымсыз грантқа ие болған Нұрлан Шериев бүгінде құс шаруашылығын дамытуға ден қойған. Ауыл азаматы тиісті қаражатқа Қараөзек ауылынан «Линда» тұқымды 60 қаз сатып алыпты. Мұнан бөлек балапан шығаратын арнайы аппаратты «Қазпошта» АҚ арқылы Алматы қаласынан алдырған. Іскер азамат алдағы уақытта қолдағы қазбен шектелмей олардың қатарын арттыруға ден қоятынын айтады.&nbsp;– Осыдан 2-3 ай бұрын мемлекеттің қайтарымсыз қаржылай қолдауына ие болдым. Қолға алған жобамның бағытын айтып едім, кәсіпкерлікті қолдауға арналған мекеме қызметкерлері маған жәрдем берді. Тиісті қаржыға қол жеткізген бойда іс бастауға кірісіп кеттім. Осылайша желідегі жарнамалардан Қараөзек ауылында «Линда» тұқымды қаз барын естіп, 60 қаз сатып алдым. Ал әлгі аппарат алдағы уақытта олардың қатарын көбейтуге қажет болады. Күн жылысымен осы бағыттағы жұмысыма кірісемін. Біздің ауыл негізінен мал және құс шаруашылығын дамытуға қолайлы өңір. Себебі мұнда су да бар, шөп те бар. Ал қысқы құс азығын енді сатып алуға тура келеді. Өткенде 3-4 тонна жем алып қойдым. Сонымен бұйыртса қыстан шығады. Ал келер жылы қаздың қатары артса, қажетті жем-шөптің де көлемі артады. Алдағы уақытта осы үй құсының басқа да тұқымдарын өсіруді қолға алсам деймін. Кешегі қаржылай қолдау маған үлкен көмек болды. Біз мемлекет ұсынған осындай қолдау барда кәсіпке кірісуіміз керек, – дейді жаңадариялық Нұрлан Шериев.Кәсіпкер тек қаз өсірумен шектелмеген. Арнайы аппаратымен балапан шығарып, етті тауық өсіруді де қолға алған. Оның айтуынша, әлгі аппарат қаздың жұмыртқасынан 30 күнде балапан шығарса, тауықтың жұмыртқасын 20 күнде қорытып үлгереді екен. Қаз тек наурыз-сәуір айында жұмыртқалайтындықтан одан көп пайда болмайтын көрінеді. Сондықтан кәсіпкер көбіне құсты бордақылағаннан табыс мол болатынын айтады. &nbsp;– Қаздың басқа түрі қалай болатынын білмеймін, бірақ осы тұқымы тек екі-ақ айда жұмыртқалайды. Сондықтан біз тек ет бағытында табысқа жетуді көздейміз. Ондай кезде тауығымыз бар. Мәселен, кепедегі тауықтың өзінен осылардың жем-суын шығаруға болады. есеппен іс қыламын деген жанға пайда табудың жолы көп қой. Ол үшін қаржылық сауаттылық керек екен, мен осыны ұқтым. Бұрын біздің ауылдың тұрғындарында мемлекеттік бағдарламамен іс бастауға ниет бола бермейтін. Қазір Аллаға шүкір, олардың қатары артып отыр. Мен де осымен шектеліп қалмаймын. Өз жоспарымды толық орындасам, кәсіптің басқа да көздерін қолға аламын, – дейді іскер азамат.Табысы өз алдына, аулаңда қаздың керіле қанатын кеңге жайғанының өзі бір сән ғой. Ара-тұра арық жағалап, суға малынғанының өзі неге тұрады. Ауыл сонысымен қызық. Көптен бері мұндайға кезікпеген соң біз бұл көріністен ерекше әсер алдық.&nbsp;

500 мыңмен құс кәсібін бастаған

Жалағаш ауданындағы &nbsp;ауыз су құрылысының басынан келе жатқанда көше жиегіндегі үйлердің бірінің ауласында станокпен жұмыс жасап жатқан ағамызды көзім шалды. Басылымның кезекті санына еңбек адамының бар ынтамен жасап жатқан жұмысын насихаттайық деген оймен көлік тізгіндеген әріптесімді тоқтаттым. Үйге қарама-қарсы орналасқан сарайдың алды толған пластик есік-терезелердің қалдығы. Пластик түгілі ағаштан жасалған құрылыс заттарының өзін сырттан таситын жаңадарияда осындай кәсіпті біреу дөңгелентіп отыр дегенге ішкі түйсігім сенер емес. Алайда ауданнан ең шет орналасқан елді мекен халқының кәсіпке деген қызығушылығы мен ойлағаннан да жоғары болып шықты.Әріптесім Кирил Денисов екеуміз аялдаған шаңырақ Жеңіс Исаев ағамыздың үйі екен. 15-20 жылдай пластик есік-терезе шығаратын зауытта жұмыс жасаған жігіт ағасы кейін бұл істі өзі бастауға бел буады. Қажетті құрал-жабдықтар алуға қаржысы жетпеген кейіпкеріміз кәсіпкерлікті дамытуға бағытталған мемлекеттік бағдарламалардың көмегіне жүгінуді жөн санайды. Осылайша аудан орталығына келіп, өз жобасын арнайы мамандарға таныстырады. Мамандар ағамыздың жобасының жарқын екенін айтып қаржылай қолдау алуға жәрдемдесіпті. Нәтижесінде былтыр Жеңіс Исаев 1 млн теңге қайтарымсыз грантқа қол жеткізеді. Қаржы қолға тиген бойда жұмыс та басталып кетті.&nbsp;Іскер азамат есік-терезеге пайдаланылатын негізгі шикізатты түркиялық «Кави» дүкенінен алады. Оның сөзінше, түрік тауарларында айтарлықтай сапа бар көрінеді. Ал тұтынушы талабына сай өнім шығару үшін алдымен сапаға аса мән беру қажеттігін бәріміз жақсы білеміз. Шикізат көзі былай тұрсын, кәсіпкер қолдағы құрал-жабдықтардың өзін арнайы дүкендерден алдырыпты.&nbsp;– Өз ісімді бастап кеткелі қазір бір жылдай уақыт болып қалды. Кейбір адамды кәсіп ашарда «Бұл істі әрі қарай жүргізе алам ба?» деген сауал мазалайды. Ал менде мұндай болған емес. Себебі бұрын қатарынан бірнеше жыл осы салада жұмыс жасағанмын. Ол кәсіпорында біз өндірген тауарға қатысты бірде-бір шағым болған жоқ. «Қашанғы бір айлыққа қарап жүре береміз, мұнан өзім жеке іс бастағаным жақсы» деген ой келді. Осылайша бастап та кеттім. Шыны керек, жұмысымның алға басуына мемлекеттің үлкен қолдауы көмек болды. 1 млн теңге қайтарымсыз қаржы кімге болса да үлкен жәрдем. Сондықтан алдағы жауапкершілікті сезініп жұмыс жасау – бізге міндет. Ауданнан шет орналасқан ауыл болсақ та әзірге тапсырыс берушілердің қатары сиремей тұр. Біз бұған қуанамыз. Ал өнімімді тұтынған жандардың да ешқайсысы реніш білдіріп жатқан жоқ. Соған қарағанда бұрынғыдай сапаға аса мән беріп жатқан болуым керек, – дейді кәнігі маман.&nbsp;Жеңіс Исаев – негізінен екінші топтағы мүмкіндігі шектеулі жан. Бірақ менің денсаулығымда ақау бар екен деп мүжілетін ол жоқ. Керісінше өмірге деген бұл талпынысынан кейбір аяқ-қолы сау адамдар сабақ алуы қажеттігін айтады. Есік-терезе сатып алған ауыл тұрғындары да өнімінде сапа барын айтып отыр. Кейіпкеріміздің қолынан шыққан есік-терезелерге тек жаңадариялықтар ғана емес, көршілес Есет батыр мен Еңбек, Аққұм, Мәдениет, Мырзабай ауылының тұрғындары да тапсырыс беруде. Бұрыннан бұл салада қолтаңбасы бар Жеңіс Исаевтың бұйымына қала берді аудан орталығынан да бірлі-жарым тапсырыс түсетін күндер де болды. Тапсырыс берушілер қатары көбейген сайын кейіпкеріміздің жұмысқа деген ынтасы артатын көрінеді.&nbsp;– Қазір тек ауыл халқынан ғана емес, көрші ауылдардан да тапсырыс түсіп жатыр. Бұл менің жұмысқа деген ынтамды одан әрі арттыра түседі. Табыс өз алдына, менің негізгі мақсатым – тұтынушы талабынан шығу. Маған жасаған бұйымыма төленген қаржыдан сөзбен берген бағасы жоғары тұрады қашанда. Сапаға аса мән беретінім де сондықтан. Біреу өзіңнің қолыңнан шыққан туындыңа қатысты теріс пікір айтса, ертең жұмысқа ынтаң болмай, қабілетің ашылмайды ғой. Аллаға шүкір, менде ондай жағдай болған емес. Алдағы уақытта да болдырмауға тырысамын. Мына қолымдағы құрылғы 120 мың теңге тұрады. Арнайы пластик есік-терезелер жасауға арналған. Алдым қыс, сондықтан енді көктемге дейін тапсырыс бола бермейді. Біздің маусым күн жылығанда ғой, – деп бір жымиып алды ағам.&nbsp;Расында, жаңадариялық Жеңіс Исаевтың бұл ісі үлгі алуға тұрарлық. Тек бақша дақылы мен мал шаруашылығын қолға алған ауыл үшін бұл жоба – үлкен жаңалық. Алдағы уақытта кейіпкеріміз кәсібінің көкжиегін кеңейтіп, пластиктен басқа да бұйымдар дайындауға ниеттеніп отыр. Қазірдің өзінде іскер азамат бір адамды жұмыспен қамтыған. Жаңадариялықтарға менің риза болатыным осы. Бізде күріш не өндіріс жоқ деп мүжілмейді. Барға қанағат қылып, тек алға талпынуды біледі.Жалпы кәсіпкерлікті дамытуға бағытталған бағдарламалар мен үшін өңірлерді дамытуға негізделгендей көрінеді. Себебі ауылдың әрбір азаматы оның игілігін көрсе, сол өңірдің алға басуына кішкене де болса оң әсері тиеді. Кәсіпорын бар жерде жұмыссыздық болмайды, әлеуметтік сала алға басады. Ондай ауылда тұратын әрбір отбасының тұрмыстық сапасында да ілгерілеушілік басым болады. Біз бір күнгі сапардан осыны ұқтық.

1 млн теңгемен кәсіп бастаған

<a href="https://kyzylorda-news.kz/">Kyzylorda-news.kz</a>&nbsp;&nbsp; «AMANAT» партиясының облыстық филиалы жанындағы Сыбайлас жемқорлыққа қарсы іс қимыл жөніндегі кеңестің отырысы өтіп, онда мемлекет қаржысын белгіленген мақсатқа сәйкес нәтижелі жұмсалуы және жалпы сыбайлас жемқорлықтың алдын алу бағытындағы жұмыстарын саралау үшін облыстық табиғи ресурстар және табиғат пайдалануды реттеу басқармасы мен экология департаментінің жауапты басшыларының есебі тыңдалды.Бүгін есеп берген басқарманың миссиясы: өңірдің қоршаған ортасын қорғау саласын басқару, экологиялық жағдайды жақсартуға және экологиялық қауіпсіздікті қамтамасыз етуге бағытталған бірыңғай табиғатты қорғау саясатын қалыптастыру болып табылса, экология департаментінің негізгі міндеттері – жобаларға мемлекеттік экологиялық сараптама жасау, табиғат пайдаланушыларға қоршаған ортаға эмиссияға рұқсат беру, қоршаған ортаның құрамдас бөліктеріне зертханалық талдау-бақылау жүргізу болып табылады.<blockquote>«Сыбайлас жемқорлық бар жерде әділетті қоғам орната алмайтынымыз анық. Мемлекет басшысы Қасым-Жомарт Кемелұлы Тоқаев Әділетті Қазақстанды құру үшін адам құқығы мен заң үстемдігі мәселесін алға қойды. Осыны басты назарға алып, жұмыс істесек, сыбайлас жемқорлықтың алдын алсақ, оны жеңе алатынмызға күмән жоқ. Біздің де негізгі міндет — қызметтегі неғұрлым сыбайластыққа «жақын» салаларды анықтау және бақылау, сол арқылы құқық бұзушылыққа жол бермеу»,- деді барлық жұмыстарды саралай келе жиынды қорытындылаған Кеңес төрағасының орынбасары Дәурен Шәріпбаев.</blockquote>

Мемлекет қаржысының мақсатты жұмсалуы мен сыбайластықтың алдын алу мәселелері қаралды

Қазақтың ән-күйін, тұрмыс-салтын зерттеген орыс этнографы Григорий Потанин: "Маған бүкіл қазақ даласы ән салып тұрғандай болып көрінеді" деп тамсаныпты. Рас, кең даланы мекендеп, еркін өмір сүрген халқымыздың бүтін болмысының өзі әнге-күйге айналып кеткен. Жиырма жыл бұрын "Ұлытау" атты аспапты этно-рок стиліндегі музыкалық ұжым Голливудта өткен Бүкіләлемдік музыка орындаушыларының чемпионатында бас жүлдені жеңіп алды. Құрманғазының "Адай" күйімен қазақтың қара домбырасын мұхиттың арғы бетіне таныстырып, америкалықтарды таң қалдырды. Одан бері де қазақтың маңдайына біткен жарық жұлдызы, сиқырлы дауысымен әлемді табындырған алтын дауысты әнші Димаш Құдайберген азуын айға білеген сол Батыстың сахнасында ұлттық аспабымыздан күмбірлете күй төгіп, халық әндерін нақышына келтіре орындап, жаһаннан жиылған жұрттың жанарын жасқа толтырды. Осыдан соң әлем қазақтың төл өнерін, соның ішінде ұлттық музыкамызды мойындамай көрсін...Таяуда жас әнші, сазгер, Қ.Қазантаев атындағы аудандық мәдениет үйінің жанынан құрылған "Жігер" этно-фальклорлық ансамблінің жетекшісі Руслан Бурабай қара домбыраның қасиетін әлемге тағы бір паш етті. Американың Техас штатында өткен "ARTIVITIES seassons" Халықаралық көпжанрлы онлайн конкурс-фестиваліне өзінің "Талас" күйімен қатысып, "Халықтық орындау" жанры бойынша І орынды иеленді. Бұл – ауданымыз үшін ғана емес, еліміз үшін де сүйіншілейтін жағымды жаңалық, үлкен жетістік.&nbsp;Руслан Бурабай Қарағанды қаласындағы Тәттімбет атындағы өнер колледжнің және Көкшетау қаласындағы Біржан сал атындағы музыкалық колледжінің халық аспаптар бөлімін бітірген. 2016 жылдан бері Қ.Қазантаев атындағы аудандық мәдениет үйінде қызмет істеп келеді. Жігерлі жас 2017 жылы "Жігер" этно-фальклорлық ансамблін құрып, ұрпақтан-ұрпаққа мирас болып келе жатқан мәдени мұрамызды жаңғыртуды қолға алыпты. Қазір сол "Жігердің" жетекшісі және мәдениет үйі жанынан ашылған домбыра үйірмесінің ұстазы. Құрамында он адамы бар "Жігер" этно-фальклорлық ансамблі құрылғаннан бері жақсы жетістіктерге қол жеткізген. Атап айтсақ, 2017 жылы Қазалы ауданында өткен "Қастерлеп жүрсін өнеріңді ұрпағың" атты облыстық фальклорлық ансамблдердің байқауында Раманқұл Әуезов атындағы арнайы жүлдені иеленсе, 2019 жылы Жамбыл облысында өткен "Көне Тараз күмбірі" атты республикалық байқауда Ықылас Дүкенұлы атындағы арнайы жүлдені жеңіп алды және сол жылы қыркүйек айында Қызылорда қаласында өткен "Қорқыт және ұлы дала сазы" атты халықаралық фестивальда жоғары дәрежеде өнер көрсетіп, дүние жүзінен жиылған түркі тектес туысқан халықтарды тәнті етті. Сонымен бірге Руслан Бурабай қазірде өзінің жеке шығармашылығына ден қойып жүр. Үлкен сахналардан орындалып жүрген бірнеше ән мен күйдің авторы. "Шабыт" және "Тәуелсіз Қазақстан" атты екі күйі "Қазақ күйлерінің энциклопедиясына" енген.&nbsp;– Менің өмірім өнермен егіз. Қазірде мамандығым бойынша сол өнер саласында қызмет етіп келемін. Мен өмірімді әуенсіз елестете алмаймын. Соның ішінде ұлттық бояуы бар әуендер жаныма жақын және ұлттық музыкалық аспаптармен орындалатын халық әндері мен жеке авторлық күйлерді хал-қадірімше насихаттап келемін. Қазірде өзім жетекшілік ететін ансамблді құрғандағы негізгі мақсатым да сол болатын. Бұл бағытта әлі алда жоспарлар бар, сол арқылы жұмысымызды жалғастыра береміз.Таяуда Америкада өткен "ARTIVITIES seassons" Халықаралық көпжанрлы онлайн конкурс-фестиваліне өзімнің авторлық туындымды қосып, "Халықтық орындау" жанры бойынша І орынды иелендім. Әрине, өнердің ордасынан, тіпті облыс орталығынан шалғай жүрген мен үшін бұл күтпеген қуаныш болды. Алайда, жақсы туынды қашанда өз бағасын алады ғой. Бұл менің талантыма беріліп тұрған баға емес, қазақ өнеріне көрсетілген құрмет деп білемін. Ал орын алған шығармаға келер болсақ, "Талас" күйі аты айтып тұрғандай, сан ғасыр бойы қазақ халқының басынан өткізіп келе жатқан аумалы-төкпелі жаугершілік заманды, талас-тартыспен өткен өмірін суреттейді, &nbsp;– дейді Руслан ініміз.Бір кездері ұстазға шәкірт болып, республикалық "Бозторғай" шығармашылық конкурсының лауреаты, республикалық "Күй құдіреті" байқауының жүлдегері, делфильік ойындардың жеңімпазы және басқа да көптеген халықаралық байқаулардың жүлдегері атанған Руслан Бурабайдың өзі де қазір шәкірт тәрбиелеп жатыр. &nbsp;

Голливудта чемпион атанды 

Фото: Ақорда<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қасым-Жомарт Тоқаев бұқаралық ақпарат құралдары қызметкерлерін мерекемен құттықтады. Бұл туралы Ақорданың баспасөз қызметі хабарлады.<blockquote>«Құрметті журналистер!Бұқаралық ақпарат құралдарының қызметкерлері!Сіздерді кәсіби мерекелеріңізбен құттықтаймын! Еліміздің бұқаралық ақпарат құралдары қоғам санасын жаңғыртып, ұлт тұтастығын нығайту жолында айрықша рөл атқарады. Баспасөз саласын дамыту, сондай-ақ журналистердің құқықтары мен заңды мүдделерін қорғау – мемлекеттің маңызды міндетінің бірі.Қазақ журналистикасының тағылымды тарихы, аға буын қалыптастырған ерекше қолтаңбасы бар. Біз оның бай шежіресі мен ағартушылық дәстүрін барынша сақтауымыз қажет. Бүгінгі ақпарат саласының өкілдері осы сабақтастықты лайықты жалғастырып, өзіне жүктелген жауапты миссияны абыроймен атқарып келеді.Сіздер қай кезде де халыққа шынайы әрі жедел хабар таратып, кәсіби біліктіліктің озық үлгісін көрсетіп жүрсіздер. Болашақта да елдік мәселелерді көтеріп, ұлттық құндылықтарды насихаттауға белсене атсалыса бересіздер деп сенемін. Баршаңызға бақ-береке, толағай табыс, шығармашылық шабыт тілеймін!», - деп жазылған Президент құттықтауында.</blockquote>

Қазақстан және Қызылорда облысының жаңалықтары