<a href="https://kyzylorda-news.kz/">Kyzylorda-news.kz</a> Президент Қасым-Жомарт Кемелұлы Тоқаев бүгінгі Қазақстан халқына Жолдауында ғылым саласына қатысты маңызды мәселелерді қамтып, оның бағыт-бағдарын айқындайтын бірқатар басымдықтарға тоқталды.<blockquote>– Ғылыми әзірлемелерді коммерцияландыру деңгейі 17 пайыздан аспайды. Ал, тиісті оқу орындарын бітірген түлектердің 40 пайызы ғана осы салаға жұмыс істеуге барады. Агроғылым мен «жердегі тіршіліктің» арасында алшақтық бар, – деп атап өтті Мемлекет басшысы.</blockquote> Бұл – ел ғылымының әлеуеті толық пайдаланылмай жатқандығын көрсетеді. Озық елдерде экономикада ғылымның үлесі айтарлықтай. Мысалы, АҚШ ғылыми әзірлемелерді коммерцияландыруда көшбасшы болып саналады. Университеттер мен жеке компаниялардың бірлескен жобаларының арқасында бұл көрсеткіш 60-70 пайызға жетеді. Массачусетс технологиялық институты (MIT) мен Стэнфорд университеті жүздеген стартаптың туындауына жол ашып, Google, Facebook, Moderna сияқты ірі компаниялардың қалыптасуына негіз болды.Оңтүстік Корея да инновациялық экономика үлгісінің жарқын мысалы болып табылады. Мұнда коммерцияландыру деңгейі 50-55 пайызға тең. Мемлекет университеттерді бизнеске серіктестікке міндеттеп, «Samsung», «LG», «Hyundai» секілді ірі компаниялардың ғылыми орталықтармен бірлесе дамуына жағдай жасады.Біздің елде ғылыми зерттеулер мен өнертапқыштық патенттердің коммерциялануы бірнеше себепке байланысты төмен. Ғалымдардың еңбегі мен нақты өндіріс арасындағы байланыс әлсіз. Президенттің сөзімен айтсақ, агроғылым мен «жердегі тіршіліктің» арасында алшақтық бар: зертханаларда жасалған жаңалықтар егістікке толық жетпейді, ғылыми тұжырымдар нақты шаруашылыққа айналмайды. Соның нәтижесінде инновациялық идеялар қажетті деңгейде экономикалық пайда әкелмей отыр. Бұл жағдайды өзгерту – ортақ міндетіміз.Біріншіден, ғылыми зерттеулерді өндіріс пен бизнеске бағыттау қажет. Әсіресе ауыл шаруашылығы, экология, цифрлық технология және жасанды интеллект саласында ғылымды нақты нәтижеге жеткізу маңызды. Екіншіден, ғалымдардың еңбегі лайықты бағалануы тиіс. Жас мамандар ғылымнан кетпей, осы салада қалып жұмыс істеуі үшін бәсекеге қабілетті жалақы мен әлеуметтік қолдау қарастырылуы қажет. Үшіншіден, ғылым мен бизнестің арасын жақындататын заңнамалық базаны күшейту маңызды. Парламент нақты шешім қабылдап, ғылыми әзірлемелерді коммерцияландыруға қолайлы орта жасауы қажет. Ғылым – елдің болашағы. Егер ғылым мен өндірісті ұштастыра білсек, Қазақстанның әр саладағы бәсекеге қабілеттілігі артады. Президент атап көрсеткен кемшіліктерді жойып, ұлттық мүддені қорғап, болашақ ұрпаққа мықты мемлекет қалдыруға болады. Сондықтан ғылым саласын жаңғырту – тек салалық мәселе емес, бұл – ұлттық қауіпсіздік пен ел дамуының стратегиялық кепілі.Руслан Рүстемұлы,ҚР Парламентінің Сенат депутаты

Ғылым – елдің болашағы

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Кемелұлы Тоқаев &nbsp;биылғы Жолдауында әлемде қалыптасқан тәртіп пен адамдардың өмір сүру салтының күрт өзгерісі сынына қалай жауап береміз, &nbsp;бұдан шығатын жол қандай деген сұрақтарға жан-жақты тоқталды. &nbsp;Осыған дейін бізге үлгі көрсетуге тырысқан, кейбір мәселелерде «жетістікке» жеткен Батыстық &nbsp;қоғамдық қарым-қатынастардың өзі дағдарысқа ұшырауда екенін &nbsp;және олардың ұлттық мәдениеттер мен дәстүрлерге зиян келтіріп жатырғанын айтып өтті. &nbsp;&nbsp;&nbsp;Жаһандық теңсіздік күшейе түскен &nbsp; жаңа дәуірге етене кірігу барысында қазақ қоғамының болашақ алдындағы жауаптылығы арта түсетіні белгілі. &nbsp;Осы бағытта Президентіміз еліміздегі заң мен тәртіп тұжырымдамасын одан әрі жетілдіре беруімізге пәрмен берді. &nbsp;Заң мен тәртіп әділетті мемлекеттің &nbsp;негізгі факторларының бірі. Ал «Әділетті Қазақстан» &nbsp;құрудағы &nbsp; &nbsp;конституциялық – саяси реформалар қоғамдық қатынастың мәнін өзгертуде. Саяси мәдениетіміз артып, билік пен халық арасында диалог қалыптасып, «әділеттілік» қағидасын ілгерлетуге халық қолдау көрсетуде. &nbsp; &nbsp;Аталмыш тұжырымдама қоғамдық мүддеден туындайды. Шыны керек, қазір «демократияны» желеулеткен, &nbsp;мәдениетті, өркениетті қоғамға жат жеке қылықтар да &nbsp;қосарлана көрініс табуда. Оның қоғамдық әдепке жат екенін біле тұра, әлде түсінбей, «жарқ» етіп көріну үшін әлеуметтік желіде әлеулететіндер де жетеді. &nbsp; Одан айғайға аттан қосылып өре түрегелетіндер шығады. Біреу туралы ғайбат сөйлеу моралдық мәселе, заң алдындағы жауапкершілік. Мораль адамдардың басқалардың игілігі үшін өздерінің эгоистік мүдделерін құрбан етуін талап етеді. &nbsp;Демократиялық либерализмге енген сайын, табиғи заңнан алыстай түсетінімізге көзіміз жетуде.&nbsp;&nbsp; Адамның табиғи құқығы мен қолданыстағы заңдарды қарама-қарсы қою, құқықты абсолюттендіру себебімен &nbsp;заңдарды елемеу мысалдары артуда. &nbsp; Демократияның заң мен тәртіптен тыс болуы ешбір теорияға сәйкес келмейді. Мұндай жағдай өз кезегінде шынайы әділдік қағидасын бұрмалай бастайды. &nbsp; &nbsp;Заң мен тәртіп қағидасы &nbsp;қатаң адамгершілік тұрғыдан өзін-өзін шектеу, заңдарды орындаудың жоғары мәдениеттілігін, басқаның құқығын құрметтеу дәстүрге айналуымен тиімді болатыны белгілі. Әрине, &nbsp;қоғамымызда құқық әбден саясаттандырылған &nbsp; құбылыс. &nbsp;Ендеше, бізге құқықтан тыс ойлаудан &nbsp; &nbsp;кетуге үйренгеніміз жөн. Заң мен тәртіп өміріміздің факторына, тұрмыс-тіршілігіміздің өлшеміне, халықтың рухани құндылығына айналуы тиіс. &nbsp;Құқық жақсылық пен тәртіпті жүзеге асыруға қатысты мәжбүрлі талаптар болып саналады. Қажет болса, зорлық пен зомбылыққа, тәртіпсіздікке жол бермейтін заңның үстемдігін қалыптастыруға мәжбүрлейтін әдістер &nbsp;өмір заңдылығы. Бұл биліктің құзіреті. Құқық пен билік қатар жүріп, бір-бірін толықтырып отырады. &nbsp;Заңмен шектеу көрмейтін билік - қауіпті билік. &nbsp;Ал билікпен қамтамасыз етілмеген құқықтың дәрмені де шамалы. &nbsp; Қандай да бір саяси бастаманы құқықтық негізінсіз жүзеге асырам деу &nbsp;саяси дағдарыстың бастамасы. Мемлекет басшысының елімізге қатысты маңызды &nbsp;мәселелерді жалпыхалықтық талқыға салып шешуді ұстануы нағыз халықтық биліктің нышаны.&nbsp;Әрқайсымыз отанды сүю дегенді алдымен еліміздің ішкі &nbsp; бірлігін, ынтымағын сақтауға өз үлесімді қосу парызым деп түсінуден басталса керек. &nbsp;Еліміздің жасампаздығы бірлікке тікелей қатысты. Бірлік болғанда тірлік болары рас, ал тірлік болғанда бірлігіміз одан сайын нығая бермек. &nbsp; Мемлекет басшысының жыл сайынғы Жолдаулары саяси, маңызды ресми құжат. Бірақ ол құқықтық &nbsp;ережелерді &nbsp;құрамайтындықтан нормативтик сипатқа ие бола алмайды. Сондықтан да, Президент бастамаларының құқықтық базасын жасау &nbsp;заң шығарушы билікке жаңа міндеттерді жүктейді. Осы бағыттағы Парламент жұмысына сәттілік тілейміз!&nbsp; &nbsp; Наурызбай Байқадамов, Парламент сенатының депутаты

Заң мен тәртіп – мемлекетіміздің мызғымас тұғыры

<a href="https://kyzylorda-news.kz/">Kyzylorda-news.kz</a>&nbsp; Медициналық қызметтің сапасы мен көлемін және ашықтығын қамтамасыз ету мақсатында жаңа жоспар дайындалады. Бұл туралы Денсаулық сақтау министрі Ақмарал Әлназарова мәлім <a href="https://kaz.inform.kz/news/zholdau-2025-meditsinalik-komek-sapasin-baskarudin-keshend-zhospari-azrlened-8e1342/">етті.&nbsp;</a><blockquote>– Президенттің медициналық қызмет сапасы мен көлеміне мониторинг жүргізудің жаңа жүйесін құру жөніндегі тапсырмасын іске асыру мақсатында медициналық көмектің сапасын басқару жүйесін жетілдірудің кешенді жоспарын әзірлейміз. Медициналық көмекке ақы төлеудің бірыңғай жүйесіне жасанды интеллект, медициналық ұйымдардың лицензиядан кейінгі және аккредиттеуден кейінгі мониторингі енгізіледі. Сонымен қатар заңнамалық деңгейде медициналық қызметке лицензия мерзімін енгізу мәселесі пысықталады, — деді Ақмарал Әлназарова Үкімет отырысында.</blockquote>Министрдің мәлімдеуінше, аталған іс-шаралар медициналық қызметтің ашықтығы мен шынайылығын қамтамасыз етуге мүмкіндік береді.<blockquote>–&nbsp;Мемлекет басшысының Жолдауын іске асыру мақсатында дәрігер мәртебесі мен әлеуметтік жағдайын арттыру бағытында министрлік облыс әкімдеріне «Отбасы банкпен» бірлесіп, 2026 жылы әсіресе кадр тапшылығы өте жоғары өңірлерде дәрігерлерді тұрғын үймен қамтамасыз ету ұсынады. Сонымен қатар, «Қазақтелекоммен» және жергілікті атқарушы органдарымен бірлесіп, медициналық қызметкерлердің қауіпсіздігін қаматмасыз ету мақсатында, 2100 жедел жәрдем бригадалары және 644 стационардың қабылдау бөлмелері видеобақылаумен қамтамсыз етіледі. Осылайша Мемлекет басшысының тапсырмаларын уақтылы және сапалы орындау үшін жан-жақты шаралар қабылданады,&nbsp;— деп түсіндірді ведомство басшысы.</blockquote>Фото: Үкімет

Жолдау — 2025: медициналық көмек сапасын басқарудың кешенді жоспары әзірленеді  

<a href="https://kyzylorda-news.kz/">Kyzylorda-news.kz</a>&nbsp; Арал ауданының әкімі Аманжол Оңғарбаев қаладағы бірқатар құрылыс нысандарын аралау барысында, құрылыс жұмыстары жүргізіліп жатқан әлеуметтік нысандардың құрылыс қарқынымен танысты.Қазіргі таңда қаржысы 2 млрд. 23 млн. теңге болатын жапсаржайдың қабырғасы қаланып, ішкі жұмыстары жүргізілуде. Жапсаржай құрылысын «СМП Қызылорда» ЖШС мекемесі қолға алған. Мердігер мекеме өкілінің сөзінше ғимарат алдағы қараша айының соңына дейін толықтай аяқталуы тиіс.«Ұлт саулығын нығайту» жобасы аясында қолға алынға қосымша жапсаржайда 17 төсектік нейро-инсульт, 35 төсектік кардиология бөлімшелері болады. Сонымен қатар МРТ және ангиограф қондырғылары орнатылатын болады.Оған қоса аудандағы жұқпалы аурулар бөлімшесінің ғимараты ескіруіне байланысты жаңа ғимараттың құрылыс жұмыстары да жүргізілуде. Қаржысы 2 млрд. 300 млн. теңге болатын жаңа нысанның құрылысын «Иман» ЖШС мекемесі жүргізуде. Мердігер мекеме өкілі Ә.Тұрсынбаевтың айтуынша қыркүйек айының соңына дейін ғимарат төбесі толықтай жабылып, сыртқы абаттандыру жұмыстары жүргізілетін болады.Аудан әкімі жауаптылармен кездесу барысында негізгі жұмысты бәсеңдетуге жол бермеу керектігін жеткізді.<blockquote>– Бұл жобаның құны да аз емес, құрылыстың сапасына аса мән берілуі керек. Жұмысқа жүрдім-бардым қарауға болмайды. Жұмыс күшін тиімді пайдаланып, жылдың соңына дейін осы жұмыстарды толықтай аяқтауға күш салу керек, – деді аудан әкімі Аманжол Сақыпұлы.</blockquote>Фото: Арал ауданы әкімінің баспасөз қызметі

Аудан әкімі бірқатар әлеуметтік нысандардың құрылыс жұмыстарымен танысты

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Кемелұлы Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» тақырыбындағы Жолдауы елді әлеуметтік-экономикалық тұрғыда жаңғыртуға, бәсекеге қабілеттілік пен халықтың тұрмыс сапасын арттыруға, жаңа сын-қатерлердің алдын алуға және дамудың жаңа бағыттарын айқындауға арналды.&nbsp;Жолдау халық көкейінде жүрген көп сұраққа жауап беріп, атқарылған жұмыстар сараланып, алдағы мақсат-міндеттер нақтыланды деп айтуға толық негіз бар.&nbsp;Мемлекет басшысының сенімді саяси тірегіне, қоғамдық бастамалардың ұйытқысына айналған «AMANAT» партиясы әр Жолдауға ерекше мән береді. Биыл да партия жаңа іс-шаралар жоспарын нақтылап, депутаттық корпус пен бастауыш партия ұйымдары Президент бастамаларына қолдау көрсетуді жалғастыратын болады. Оның үстіне Президент өз сөзінде «AMANAT» партиясы ұсынған «Қарызсыз қоғам» жобасын жүзеге асыруды жалғастыру керектігін айтты. Мемлекет басшысы әсіресе азаматтардың қаржылық сауаттылығын арттырудың маңыздылығына жеке тоқталды. Президенттің айтуынша, бұл бағытта «AMANAT» партиясы ұсынған «Қарызсыз қоғам» жобасын одан әрі жалғастыру қажет. «Азаматтардың қаржылық сауаттылығын арттыру мәселесі әлі де өзекті. Осы ретте «AMANAT» партиясы ұсынған «Қарызсыз қоғам» жобасын жүзеге асыруды жалғастыру керек. Былтырдың өзінде осы жоба аясында 845 мың адам сауатын жетілдіріп, заңгерлік кеңес алды. Түпкі мақсат – халықтың мойнындағы қарызын азайту ғана емес, азаматтардың табысы тұрақты болуын қамтамасыз ету», – деді Қасым-Жомарт Тоқаев. Былтыр жоба аясында аудан бойынша 920 адамның қаржылық сауаттылығын арттыру жоспарланып, І кезеңде 505 азамат, ІІ кезеңде 424 адам оқумен қамтылып, жоспар артығымен орындалды. Биыл қаржылық қиындығы бар азаматтарда оқыту үшін арнайы санаттағы 1237 адамның тізімі нақтыланды. Жобаның басты ерекшелігі, биылдан бастап несиелік берешегі 90 күннен асқан азаматтар ғана оқумен қамтылады, тегін кеңес алады. Бұл бағыттағы жұмыстарды «AMANAT» партиясы аудандық филиалы аудан әкімдігімен, аудандық жұмыспен қамту және әлеуметтік бағдарламалар бөлімімен, Отбасын қолдау орталығымен, кент және ауылдық округтердегі жобаға жауапты мамандармен бірлесе жүзеге асыруда. Қазірдің өзінде 587 азаматтың несие тарихы заңгерлердің қарауына алынды, күн сайын құқықтық кеңестер беру жұмысы бірыңғай байланыс орталығы арқылы жалғасуда. «Қарызсыз қоғам» жобасы аясында азаматтардың қаржылық біліктілігін арттырумен қатар, қарызын заң аясында реттеуге, яғни қарызын қайта құрылымдау, аресттен шешу, банкроттыққа тапсыру секілді құқықтық көмектер көрсетілуде және бұл қызметтердің барлығы ақысыз, тегін негізде жүргізілуде.Жолдауда әлеуметтік қорғауға, қауіпсіздік, білім беру, денсаулық сақтау, өнер мен мәдениет, бұқаралық спортқа қатысты да біраз ойлар айтылды. Бұл мақсат-міндеттердің бәрі Қазақстанның одан әрі қарқынды дамуы үшін аса маңызды. Мемлекет басшысы «Заң және тәртіп» қағидаты жайлы терең ойлар айтты. Шыны керек, қазір қоғамда дөрекі әрекеттер мен жөнсіз қылықтар көбейіп барады. Бір-бірін жағадан алып, балағаттау, қоғамдық тәртіпті бұзу фактілері жиі көрініс табуда. Әлеуметтік желідегі негізсіз сындар, жала жабулар халықты дүрліктіруге, қоғамдық бірлікті бұзуға алып келеді. Әрине, бұл – мәдениетті, өркениетті қоғамға жат қылықтар. Мемлекет басшысы осындай әрекеттерге арнайы мән берді. Біз отаншылдық пен әсіреұлтшылдықты шатастырмауымыз керек. Президент айтқандай, патриотизмнің басты көрсеткіші – жасампаздық пен жаңашылдық. Осыны ұмытпауымыз қажет. Әсіресе, зиялы қауым, қоғамдық пікір көшбасшылары және жастар Мемлекет басшысының әр сөзін көкейіне түйіп, шындық пен жалғанның, жақсы мен жаманның ара-жігін ажырата білуге тиіс. Сонда ғана бірлігіміз бекем, еліміз тұтас болады, елдігімізге сызат түспейді.Мемлекет басшысы парламенттік реформа мәселесіне де жеке тоқталды. Бұл жайт біраз жылдан бері қоғамда қызу талқыланып келе жатқаны жасырын емес. Президент сол мәселенің тоқетерін айтып, елімізде көп ұзамай бір палаталы Парламент құру туралы бастама көтерді. Маңызды реформа – осыған дейінгі елдегі ауқымды өзгерістердің заңды жалғасы. Президент бұған асықпай, байыпты, саналы әрі сындарлы түрде келу керек екенін айтып, оны бүге-шігесіне дейін жан-жақты талқылауға бір жыл уақыт берді. Сөйтіп, 2027 жылы жалпыұлттық референдум өткізуді ұсынды.«Егер халық қолдап, бір палаталы Парламент құрылатын болса, партиялық тізім бойынша сайлаған жөн» деді Мемлекет басшысы. Бұл қадам партиялар арасында бәсекелестікті айтарлықтай арттыра түседі. Сондай-ақ елдегі партиялар жүйесін одан әрі жетілдіруге ықпал етері анық.&nbsp; Әдетте елімізде мұндай маңызды шешімдер тосыннан, күтпеген жерден жарияланатын. Президент ондай тәжірибеден түбегейлі бас тартты. Жалпы Қасым-Жомарт Кемелұлы ел тағдырына, болашағына қатысты мәселенің бәрін халықтың пікірін ескере отырып, жұртшылықпен бірге қабылдап келеді. Ол – Мемлекет басшысының берік ұстанымы. Осы жолы да шешім елмен бірге ақылдасып қабылданады. Бұл – «Халық үніне құлақ асатын мемлекет» тұжырымдамасының нақты іске асуының тағы бір жарқын көрінісі. Әрине, еліміздегі саяси партиялармен салыстырмалы түрде қарағанда нақты сайлауалды бағдарламасы бар, оның орындалуы жөнінде Жол картасы бекітілген, азаматтар сенім артатын, халық пен билік арасына алтын көпір болған «AMANAT» партиясы бұл саяси науқанда халықтың сеніміне, қолдауына ие болады деп сенеміз. Бұған партияның әлеуеті, мүмкіндігі толық жететіні анық.Қорыта айтсақ, Президент осы Жолдауда елдегі экономикалық, әлеуметтік дамудың таяу жылдардағы эволюциясын айқындап берді. Өйткені, халықтың тұрмыс сапасы, қолжетімді жағдайда өмір сүруі ел экономикасының деңгейімен тікелей байланысты. Әлемде орын алып жатқан ахуалға қарамастан ел экономикасы тұрақты түрде дамып келеді. Десек те, ұдайы алға жылжу, экономиканы тұрақты жандандыру, цифрландыру – ел ертеңінің негізі болмақ. Аудандық мәслихаттағы «AMANAT» партиясы депутаттық фракциясы, бастауыш партия ұйымдар, партия ардагерлері мен белсенділері Жолдаудың әр тармағын іске асыруға, Президент бастамалары мен тапсырмаларын орындауға жауапкершілікпен, тиянақтылықпен атсалысатын болады.Ақтөре ИБРАГИМҰЛЫ, «AMANAT» партиясы Сырдария аудандық филиалының Атқарушы хатшысы

Цифрландыру – ел ертеңінің негізі

<a href="https://kyzylorda-news.kz/">Kyzylorda-news.kz</a> Кәріз жүйесінің шаруашылық-тұрмыстық және сарқынды су, сұйық өнімдерді шығаруға арналған су бұру жүйесінің бір бөлігі ретінде қызметі өте маңызды.&nbsp;Сондықтан оны жетілдіру мен жаңғырту жұмыстары жыл бойы жүргізіліп келеді.&nbsp;Бүгінгі таңда қала аумағында 457 шақырым кәріз желісі, 67 насос станциясы және 2 кәріз суларын тазарту кешені жұмыс істейді. Осы орталық кәріз жүйесіне тұрғын үйлердің 60 пайызы қосылған. Әлі де қосылатын халық үлесін 82 пайызға жеткізуге болады. Сол мақсатпен кәріз жүйелерін жаңарту бағытында ауқымды жұмыстар атқарылуда.&nbsp;Айта кету керек, аймақ басшысының тікелей қолдауымен 2023 жылы 11 насос станциясы жаңартылып, 8,3 шақырым тозған кәріз құбырлары ауыстырылса, алдағы уақытта 158 шақырым жаңа желі салынып, 10 КНС қайта жаңғыртылады деп күтілуде.&nbsp;Сонымен қатар, Қызылжармадағы кәріз суларын тазарту станциясын жаңғырту, Тасбөгеттегі жағымсыз иіс мәселесін шешу және магистралдық коллекторларды қайта құру жобалары қолға алынып отыр.<img src="https://knadmin.beoblood.kz/uploads/1_K_riz_zh_jeleri_zha_yrtyluda_09ae93ac7d.jpg" alt="1 Кәріз жүйелері жаңғыртылуда.jpg">

Кәріз жүйелері жаңғыртылуда

<a href="https://kyzylorda-news.kz/">Kyzylorda-news.kz</a> Бүгін Арал ауданының әкімі Аманжол Оңғарбаевтың төрағалығымен Мемлекет басшысының 2025 жылғы 8 қыркүйектегі Жолдауын жүзеге асыру бойынша арнайы мәжіліс өтті.Өздеріңізге белгілі, кеше ел Президенті Қасым-Жомарт Тоқаев Парламент палаталарының бірлескен отырысында Қазақстан халқына «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауын жариялады.Ауданда өткен жиында осы Жолдауда айқындалған нақты міндеттер сараланды.<blockquote>– Мемлекет басшысы бүгінгідей халықаралық байланыстар шиеленіскен жағдайда цифрландыру мен жасанды интеллект үдерістерін пайдалана отырып, түрлі қатерге толы кезеңде еліміздің тұрақты әлеуметтік-экономикалық дамуын және қауіпсіздігін қамтамасыз етуді Үкіметке тапсырды. Осы міндеттерді іске асыру үшін нақты шараларды қабылдау қажет. Бұл шаралардың түпкі нәтижесі – инвестиция тарту, өңдеу өнеркәсібін дамыту, ауыл шаруашылығын жаңа деңгейге көтеру, көлік-логистикасын дамыту, тұрғын үй-коммуналдық шаруашылығы мен су инфрақұрылымын жаңғырту, кәсіпкерлікті және адам капиталын дамыту арқылы халық табысын арттырып, тұрмысқа қолайлы жағдай жасау, – деді аудан әкімі Аманжол Сақыпұлы.</blockquote>Жолдауда ауданымыз үшін маңызды мәселелер де қозғалды. Айталық, Мемлекет басшысы еліміздегі транзиттік дәліздердің мән-маңызына баса көңіл аударып, «Сексеуіл-Бейнеу» бағытындағы автомобиль жолының құрылысын жеделдету керектігін тапсырды.Осы жолдың арқасында Қазақстан аумағы арқылы Қытайдан Еуропа елдеріне тонналаған жүктер тасымалданады. Бұл жоба жүзеге асқан жағдайда ауданымыздағы Сексеуіл кенті мен Қосаман, Ақеспе, Ақбасты және Құланды елді мекендеріне жол қатынасы жеңілдеп, тұрғындар жаңа жұмыс орындарымен қамтылып, кәсіпкерліктің дамуына мол мүмкіндік туады.Сонымен қатар Мемлекет басшысы су инфрақұрылымын жаңғырту бағытында Солтүстік Арал теңізін сақтау және оны толтыру туралы да сөз қозғады.Жолдауда айтылған осы және өзге де басымдықтарды назарға алған аудан әкімі өңірге қатысты тың бастамалардың жүзеге асуын қазірден назарға алып, тиісті жұмыстарды атқару керектігін жауапты аудан әкімінің орынбасарлары мен бөлім басшылары және ауыл әкімдеріне жүктеді.Фото: Аудан әкімінің баспасөз қызметі

Жолдау жүктеген міндеттер айқындалды

<a href="https://kyzylorda-news.kz/">Kyzylorda-news.kz</a> &nbsp;Жалағаш аудандық прокуратурасының бастамасымен және жергілікті қауымдастықтың белсенді қолдауымен Таң ауылы ресми түрде ішімдіксіз ауыл мәртебесіне ие болды.&nbsp;Бұл бастама аясында ауыл кәсіпкерлері өз еріктерімен алкоголь өнімдерін сату лицензияларынан бас тартып, саламатты өмір салтын қалыптастыруға үлес қосты.&nbsp;Мұндай шешім – ауыл тұрғындарының денсаулығын қорғауға, жастарды зиянды әдеттерден сақтауға және қоғамдық қауіпсіздікті арттыруға бағытталған маңызды қадам.&nbsp;Прокуратура тарапынан жүргізілген түсіндіру жұмыстары мен кездесулер нәтижесінде кәсіпкерлер мен ауыл ақсақалдары бастаманы бір ауыздан қолдады.&nbsp;Бұл – билік пен қоғамның ортақ мүдде үшін бірлесе әрекет еткенінің айқын дәлелі.Салауатты орта – жарқын болашақ кепілі!Фото: egemen.kz

 Таң ауылы «арақсыз ауыл» мәртебесін алды

<a href="https://kyzylorda-news.kz/">Kyzylorda-news.kz</a> Бүгін Премьер-министр Олжас Бектеновтің төрағалығымен Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауындағы бағыттар бойынша міндеттер айқындалған Үкімет отырысы өтті. Оған облыс әкімдері селекторлық режим арқылы қатысты.Үкімет отырысынан кейін арнайы жиын өтіп, сала басшыларына тапсырмалар жүктелді.Мемлекет басшысы ел экономикасын дамытудың 7 маңызды негізгі бағытын белгіледі. Атап айтсақ, елімізге қомақты инвестиция тарту, өңдеу өнеркәсібінің дамуына жаңа серпін беру, ауыл шаруашылығын жаңа деңгейге көтеру, көлік логистикасын, экономиканы, адам капиталын, елімізді цифрлық дамытуға, тұрғын үй-коммуналдық шаруашылығы мен су инфрақұрылымын жаңғыртуға қатысты жаңа міндеттер.Жиында Жолдауда белгіленген бағыттарды негізге алып, өңір экономикасын тұрақты дамыту шараларын жалғастыру туралы айтылды.Облыстық кәсіпкерлік және өнеркәсіп басқармасы межеленген 631 млрд. 400 млн. теңге инвестиция тартуды мүдделі облыстық басқармалармен, аудан, қала әкімдерімен бірлесіп атқаруы тиіс.Тау-кен саласындағы төмен динамиканы ескеріп, өңдеу өнеркәсібінің өнім көлемін арттыру шараларын ұйымдастыру өте маңызды. Ол үшін осы жылға жоспарланған өңдеу саласындағы 21 жобаны уақытылы іске қосу, кәсіпорындардың өндіріс көлемін барынша арттыру қажет.Жолдауда ауыл шаруашылығын жаңа деңгейге көтеруге қатысты нақты тапсырмалар берілді. Бұл ретте, су тапшылығы жағдайындағы егін алқаптарын әртараптандыруды жалғастыру керек.​Бұдан бөлек, игерілмей бос жатқан, заңсыз алынған ауыл шаруашылығы жерлерін кері қайтарып, оны қайта бөлу мәселесін де мұқият қарау міндеттелді. Ауыл шаруашылығы және жер қатынастары басқармасына Қызылорда қаласы, аудан әкімдерімен бірлесіп, ауыл шаруашылығы мақсатындағы жерлерді мемлекет меншігіне қайтару бойынша межені толық орындау туралы тапсырма берілді.Облыстық жолаушылар көлігі және автомобиль жолдары басқармасы «Сексеуіл-Бейнеу» автомобиль жолының құрылысын жеделдету бойынша тиісті құжаттар ұсынып, салалық министрлікпен пысықтауы тиіс.Сонымен қатар, электр, газ, жылу және сумен жабдықтауды сапалы әрі үздіксіз жүргізу, тұрақты жетілдіру, жасанды интеллект технологиясын барынша меңгеру, тың тәсілдерді енгізу мәселелері қаралды.Алдағы уақытта Мемлекет басшысының Жолдауын жүзеге асыруға арналған кеңейтілген жиын өткізіледі.Фото: Қызылорда облысы әкімінің баспасөз қызметі

Жолдауда айқындалған бағыттар бойынша тапсырмалар жүктелді

<a href="https://kyzylorda-news.kz/">Kyzylorda-news.kz</a> Байқоңыр қалалық сотында Қазақстан Республикасының ҚК-нің 293-бабының 3-бөлігінде көзделген сотталушы И.-ға қатысты қылмыстық іс <a href="https://kzl.sud.kz/kaz/news/kylmystyk-zhauaptylykka-tartyldy-1">қаралды.</a>Іс құжаттарына сәйкес, сотталушы И. қоғамдық орында, жерге тізерлеп отырған кезде жәбірленуші Ж. жақындап, оның жағдайын білмек болғанда, өзімен бірге алып жүрген «кастетке» ұқсас затты ұстап, себептен себепсіз жәбірленуші Ж.-ның бет тұсынан соққы жасап, дене жарақатын салған.Басты сот талқылауында сотталушы И. кінәсін толығымен мойындайтынын және жасаған әрекетіне шын ниетпен өкінетінін көрсеткен.Жәбірленуші И. сотталушыға қоятын арыз-шағымы жоқ екенін, кешірім беретінін көрсеткен.Сот үкімімен сотталушы И. Қазақстан Республикасының ҚК-нің 293-бабының 3-бөлігімен кінәлі деп танылып, оған 4 жыл 8 ай мерзімге бас бостандығынан айыру жазасы тағайындалды.Фото: Нұрболат Нұржаубай&nbsp;

Қылмыстық жауаптылыққа тартылды

<a href="https://kyzylorda-news.kz/">Kyzylorda-news.kz</a> &nbsp; Арал ауданы әкімі Аманжол Оңғарбаев қаладағы бірқатар құрылыс нысандарын аралау барысында, көп жылдардан құрылысы тұралап, келешегі күмәнге айнала бастаған ауқымды жоба «Qazaq Camel» ЖШС-нің «Түйе сүтінен құрғақ ұнтақ шығару зауытын салу» жобасымен танысты.Мемлекет басшысы бүгінгі Жолдауында «Елімізге қомақты инвестиция тарту керек. Қазір дүние жүзінде инвестицияға талас күшейіп барады. Жаңа инвестициялық кезеңді бастауымыз қажет. Қазіргі инвестиция тарту саясаты мардымды деп айта алмаймын. Қаражаттың көбі шикізат салаларына құйылып жатыр. Жалпы, бұл жаман емес, осындай инвестициялар бізге қажет» деген болатын.Аудан экономикасын көтеруге тиіс, кезекті ауқымды жоба саналатын түйе сүтінен құрғақ ұнтақ шығару жобасы сәтті жүзеге асуда. Аймақ басшысы Н.Нәлібаевтың тікелей қолдауымен көп жылдардан тоқтап қалған іске қайта жан бітті.Арал ауданы Қызылорда облысы бойынша түйе малын көп ұстайтын бірегей аудан. Қазірдің өзінде ауданда 37 мың бас түйе малы тіркелген.Сондықтан да өндірісті осы өңірде іске қосуды жоспарлаған жауапты мекеме жұмысты қайта қолға алып, аталған істі жыл соңына дейін жүзеге асыруға ниетті.Қазіргі таңда «Qazaq Camel» ЖШС Қытай елінен арнайы мамандар алдырып, өнім өндіретін құрылғыларды орналастыру жұмыстарын жүргізбек. Бұған дейін тұрғызылған негізгі ғимарат жанынан қосымша сүтті кептіру орны салыну үстінде. Биіктігі 7 қабатты үйдің деңгейіндей болатын ғимаратта түйе сүтінен дайындалған ұнтақ өнімді арнайы құрылғылардың көмегімен кептіру жұмыстары жүргізілетін болады.Негізгі құрылыс құны 3,5 млрд теңге болатын бұл зауыт күніне 20 мың литр түйе сүтін өңдеуге қауқарлы. Зауыт іске қосылғанда шиікзатты ауылдардан арнайы техниканың көмегімен алдырып, арнайы ыдысқа жинау жұмыстары жүргізіледі. Осы арқылы түйе малын ұстайтын шаруалардан сүт қабылдау жұмыстары жан-жақты жүргізілетін болады.Фото: Арал ауданы әкімінің баспасөз қызметі

Түйе сүтінен құрғақ ұнтақ шығаратын зауыт құрылысы қарқынды жүргізілуде

<a href="https://kyzylorda-news.kz/">Kyzylorda-news.kz</a> &nbsp;Жаңақорғандық диқандар алқаптардан өнімін жинауға кірісті. &nbsp;Сунақата ауылдық округіне қарасты «ӘМІР» шаруашылығының күріш алқаптарында егінге алғашқы орақ түсті.Салтанатты шараға аудан әкімі Мажит Самитов, аудандық мәслихат төрағасы Жарқынбек Ғалымжан, шаруашылық басшылары, еңбек ардагерлері қатысып, егіншілердің қуаныштарымен ортақтасты.«Әмір» шаруашылығының егістік алқабы басында аудандық ауыл шаруашылығы бөлімінің басшысы Талғат Зейдалиев пен шаруақожалық төрағасы Ақтан Перенов биылғы жылғы егіннің жай-күйіне тоқталып, белгіленген мерзімде астықты төкпей-шашпай жинап алу қажеттігін тілге тиек етті.Егінге орақ салу рәсімінде аудан әкімі егіншілерді науқанның басталуымен құттықтап, сәттілік тіледі.<blockquote>– Сыр күріші – ел ырысы. Мемлекет басшысы Қасым-Жомарт Кемелұлы Тоқаевтың тапсырмасымен, аймақ басшысы Нұрлыбек Машбекұлы Нәлібаевтың қолдауымен жыл сайын аграрлы өңіріміз ауыл шаруашылығы саласында жоғарғы белестен көрініп келеді. Биыл да адал еңбекті ту еткен дала еңбеккерлері күріштен мол өнім жинайды деп сенеміз. Өнім мол болсын, қырман тасысын! – деді аудан басшысы.</blockquote>Шарада аудан әкімі Мажит Самитов пен ел ағалары алғашқы егін орағының лентасын қиса, еңбек ардагері Әсет Жиенқожаев бата берді.Осылайша биылғы егістікке сақадай сай әзірлікпен бел буып, білек түре кіріскен сырмаржандықтар дала төсін еңбек дүбіріне бөледі.Айта кетейік, биылғы жылы суды көп қажет ететін күріш көлемін өткен жылмен салыстырғанда 245 гектарға азайтып, 7 300 гектарға, ал жалпы егіс көлемін әртараптандыру дақылдарының көлемін ұлғайту есебінен 35 453 гектарға орналастыруды межеленді. Атап айтар болсақ, негізгі күріш 7 300 га, күздік бидай 3 050 га, жаздық бидай 180 га, тары 192 га, дәндік жүгері 1 030 га, мақсары 1 445 га, күнбағыс19 га, жаңа жоңышқа 4 325 га, ескі жоңышқа 15 210 га, сүрлемдік жүгері 27 га, картоп 160 га, көкөнiс 545 га, бақша 1 970 га егілді.Фото: Жаңақорған ауданы әкімдігі

Қазақстан және Қызылорда облысының жаңалықтары