<a href="https://kyzylorda-news.kz/">Kyzylorda-news.kz</a> Үкімет отырысының күн тәртібінде егін жинау науқанының барысы қаралды. Осыған орай Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен арнайы жиын өтіп, күн тәртібіндегі мәселе бойынша бірқатар міндеттер сараланды.Биылғы жылы 983 гектар жерге егіс егіліп, 4 мың тоннадан астам өнім алынды. Дегенмен кейбір ауылдық округтер бойынша берілген меже толық орындалмағандығы байқалады. Су үнемдеу технологиясын енгізу жұмыстары да қаралды. Айталық, осы мақсатта биылғы жылы су үнемдеу технологиясымен 240 гектар жерге егіс егілген. Осы және өзге де ауыл шаруашылығы саласындағы ауқымды жұмыстар жиын барысында пысықталып, аудан әкімі тарапынан жауапты тұлғаларға тапсырма жүктелді.Жиында «Ауыл аманаты» жобасының жүзеге асырылу барысы мен аудан аумағында 2024-2025 жылдардағы қыс-көктем мезгілдерінде су тасқынының алдын алу бойынша ұйымдастырылған кешенді шаралардың барысы талқыланды. Бұл туралы аудан әкімінің орынбасары Ш.Есжанов жан-жақты мәлімет беріп, дария бойындағы елдерге қорғаныс бөгеттерінен ешбір қауіптің жоқ екенін баяндады.Аудан әкімі су тасқынының алдын алу бойынша дайындық жұмыстары жүйелі әрі дер кезінде ұйымдастырылу керектігін баса айтып, ахуалды бақылауға алуды тапсырды.Мұнан өзге алдағы жылу беру маусымына дайындық жұмыстары мен «Таза Қазақтан» экологиялық акциясының жүзеге асырылу барысы туралы айтып, жол берілген кемшіліктерге байланысты бірқатар ескертулер жасады.Жиын соңында қолға алынып жатқан жұмыстарды әлі де жандандыру керектігін айтқан аудан басшысы Аманжол Сақыпұлы тапсырмалардың уақытылы әрі тиянақты орындалуын бақылауға алуды салаға жетекшілік жасайтын аудан әкімінің орынбасарларына жүктеді.Фото: Аудан әкімінің баспасөз хатшысы

Алдағы міндет айқындалды

<a href="https://kyzylorda-news.kz/">Kyzylorda-news.kz</a> Текетірес пен айқай-шудың соңы бас шайқап, сан соғып қалатын салдармен аяқталып жатады. Сондықтан, бассыздықты бұғаулап, қандай да бір қылмыстың алдын алған маңызды. Осы тұста, ҚАЖ департаментіне қарасты №68 мекемесінде Қызылорда қалалық пробация қызметі есебінде тұратын кәмелетке толмағандарға экскурсия ұйымдастырылды. Қызылорда қалалық прокуратурасымен бірлесе өткен іс-шарада жасөспірімдерге теріс әрекеттен тыйылып, қылмыс жасамау керектігі жөнінде түсіндірме жұмыстары жүргізілді.Мекеменің режим және күзет бөлімінің бастығы әділет капитаны Азат Батырбеков жас буынға түзету мекемесінің жатақханасы мен асханасын аралатып, тыныс-тіршілігімен таныстырды. Мұндағы күнделікті тұрмыстың оңайға соқпайтынын сезініп, еркіндіктің қадірін тағы бір түсінгендей болды. Қызылорда қалалық прокуратурасы прокуроры Бақытжан Рысбай да нық сөзімен нақты мысалдар келтіріп, бұзақылықтың бірлікті бұзып, берекені қашыратынын жеткізді.<blockquote>– Іс-шараны өткізудегі басты мақсат – қателікке бой алдырмауға үндеу. Өйткені, жай ғана кикілжіңнің өзі өкінішке себеп болатыны белгілі. Түзету мекемесінің ішкі тәртібімен таныстыру арқылы жасөспірімдерге тек заңды құрметтеп қана қоймай, өз өміріне жауапкершілікпен қарауды, теріс әрекеттен бойды аулақ ұстап, қоғамға пайдалы азамат болып қалыптасуды түсіндірдік. Білім мен адал еңбек қана жарқын өмірге жол ашады , - дейді Қызылорда қалалық пробация қызметінің бастығы әділет майоры Фариза Сембаева.</blockquote>Алдағы уақытта да ізгілікке бағытталған іс-шара ұйымдастыру жұмысы жалғаса бермек.

Жасөспірімдерге түсіндірме жұмысы жүргізілді

<a href="https://kyzylorda-news.kz/">Kyzylorda-news.kz</a> Жаңақорған кентінде тұрғындардың көптен күткен игілікті іс – көшелерді асфальттау жұмыстары жүйеленіп, бірқатар аумаққа жаңа жол төселді.Тегіс те сапалы жолдар елдің еңсесін көтеріп, халықтың көңіл-күйіне серпін береді.Биыл аудан орталығындағы жалпы құны 807,3 млн теңгеге 4 көшеге күрделі жөндеу жүргізілді. Атап айтсақ, Т. Құлымбетов,Т.Әбенов, П.Өрғараев, Б.Ысқақов көшесінің (Әлімкөлден Ы.Алтынсарин көшесіне дейінгі) жолы жаңартылды.Сондай-ақ, Қ.Жарқынбекұлы көшесіне орташа деңгейде жөндеуге 112,5 млн.теңге қаражатқа жұмысы аяқталды.Биыл жыл аяғына дейін Б. Байкенжеев көшесі абаттандырылады. Сондай-ақ, Қорасан Ата көшесінің де заманауи келбеті жаңармақ.Жаңақорғандықтар үшін бұл – кенттің көркі арттыратын қуанышты жаңалық. «Жолы түзелген елдің – тұрмысы түзеледі» демекші, бүгінгі атқарылған іс – ертеңгі жарқын болашақтың кепілі. Бұл оң өзгерістер ең алдымен Президентіміздің тапсырмасына сәйкес, Үкіметтің, облыс әкімі Нұрлыбек Нәлібаевтың елге деген қамқорлығы мен аудан әкімі Мажит Самитовтың әр істі тиянақты орындап, халықшыл ниетінің жарқын жемісі.Айта кету керек, биылғы жылы 17 елді мекендегі жалпы ұзындығы 55,7 шақырымды құрайтын 36 көшені жөндеуге облыстық және аудандық бюджеттен 3.8 млрд теңге бөлініп, жөндеу жұмыстары жүргізілуде. Бүгінде аудандық маңыздағы 192 шақырым жолдың қанағаттанарлық деңгейі 96,4 пайыз болса, жөндеу жұмыстары аяқталған соң көрсеткіш 98,4 пайызға жоғарылайтын болады.

Жаңақорған жолдары жаңаруда

<a href="https://kyzylorda-news.kz/">Kyzylorda-news.kz</a> Қызылорда облысы Төтенше жағдайлар департаменті ағымдағы жылғы 25 қыркүйекте облыстық азаматтық қорғау қызметтерімен бірлесе отырып, Қызылорда қаласындағы Белкөл станциясында «Теміржол көлігімен қатты әсер ететін улы заттарды тасымалдау кезіндегі қауіпті жүктердің төгілуіне байланысты туындаған төтенше жағдайларды жою бойынша іс-қимылдарға азаматтық қорғау мемлекеттік жүйесінің басқару органдары мен күштерін дайындау» тақырыбында кешенді оқу-жаттығу өткізеді.&nbsp;Сабырлы болуларыңызды және үрейге берілмеулеріңізді сұраймыз!Фото gov.kz

Қызылорда: Белкөл стансасында кешенді оқу-жаттығулар өтеді

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласындағы Достық үйінің мәжіліс залында облыстық Қазақстан халқы Ассамблеясы жанындағы Ақсақалдар кеңесінің үшінші отырысы өтті. Отырыста қоғам үшін маңызды мәселелер талқыланып, оларды шешуге қатысты нақты ұсыныстар қабылданды. Басқосуды кеңес төрағасы Нұрмұрат Ерманов жүргізді.Жиынға облыстық, қалалық, аудандық Ақсақалдар кеңестерінің төрағалары мен мүшелері, «Қоғамдық келісім» КММ қызметкерлері, этномәдени бірлестік өкілдері қатысты. Сондай-ақ Қызылорда облысы кәсіпкерлік және өнеркәсіп басқармасының, кәсіпкерлер палатасының, Жалағаш аудандық қоғамдық даму бөлімінің мамандары шақырылды.<img src="https://knadmin.beoblood.kz/uploads/552993459_4186342671684881_463562988539515378_n_1092fcffb6.jpg" alt="552993459_4186342671684881_463562988539515378_n.jpg">Кеңестің күн тәртібінде екі негізгі мәселе қаралды. Оның алғашқысы – бизнесті заңсыз әкімшілік қысым мен қылмыстық қудалау қатерінен қорғау жайы. Бұл тақырып бойынша Қызылорда облысы кәсіпкерлер палатасы директорының орынбасары Салават Құлмахан баяндама жасады. Ол өз сөзінде кәсіпкерлік саласындағы түйткілдер мен бизнестің дамуына кедергі келтіретін жайттарға тоқталып, оларды шешудің тетіктерін атап өтті.Күн тәртібіндегі екінші мәселе – Жалағаш ауданындағы этносаралық қатынастардың қазіргі жағдайына арналды. Бұл бағытта аудандық қоғамдық даму бөлімінің басшысы Жасұлан Еспенбет аймақтың әлеуметтік ахуалына талдау жасады.Жиында кеңес мүшелері ұсыныс-пікірлерін білдіріп, кәсіпкерлікті қолдау мен қоғамдық келісімді сақтау жөнінде өз ойларын ортаға салды.Қорытынды сөз сөйлеген кеңес төрағасы Нұрмұрат Ерманов баяндамашыларға алғыс айтып, алдағы уақытта айтылған ұсыныстардың тиісті мекемелерге ресми түрде жолданатынын жеткізді.

Қызылордада Ақсақалдар кеңесінің үшінші отырысы өтті

<a href="https://kyzylorda-news.kz/">Kyzylorda-news.kz</a>&nbsp; Қала әкімі Нұржан Ахатов тұрғындарға жеке қабылдау өткізді. «AMANAT» партиясының қалалық филиалы ғимаратында өткен жеке қабылдауға қалалық мәслихат төрағасы Ибадулла Құттықожаев және қалалық полиция басқармасы бастығының орынбасары қатысты.“Халық үніне құлақ асатын мемлекет” қағидасына негізделген қабылдауда 40-қа жуық азаматтың өтініші қаралды. Көпбалалы аналар мен мүгедектігі бар жандар және жұмыссыз жүрген азаматтар мәселелерін жеткізді. Басым бөлігі - тұрғын үй алу, жол, көше жарығы және жер кезегі туралы сауалдарын жолдады.Шаһар басшысы Нұржан Сәбитұлы көтерілген мәселелерге жауап беріп, шешу жолдарын қарастыруды жауапты басшыларға тапсырды. Ал, қалалық мәслихат төрағасы мен қалалық полиция басқармасы бастығының орынбасары қабылдауға келген азаматтарға заң аясында түсіндірме жасады.

Тұрғындардың талап-тілегін тыңдады

Қазақстан Президенті Қасым-Жомарт Тоқаевтың БҰҰ Бас Ассамблеясының 80-ші сессиясындағы Жалпы дебатта сөйлеген сөзі

<a href="https://kyzylorda-news.kz/">Kyzylorda-news.kz</a> Облыста жыл басынан бері 79 839 адам жедел респираторлы вирусты инфекцияға шалдыққан. Оның ішінде 14 жасқа дейінгі балалардың үлесі 63 пайызды құрайды. Ал тұмаумен ауырғандар саны 35 адам болса, оның 25-і балалар. ЖРВИ бойынша аурушаңдық көрсеткіші өткен жылмен салыстырғанда 2,6 пайызға төмендеген. Бұл туралы Өңірлік коммуникациялар қызметінде облыстық денсаулық сақтау басқармасы басшысының орынбасары Жаңыл Абубакирова мен облыстық санитарлық-эпидемиологиялық бақылау департаменті басшысының орынбасары Әлия Әбдіқайымова мәлімдеді.<blockquote>– &nbsp;Жіті респираторлық вирустық инфекциялар - тұмау, парагрипп, аденовирус және респираторлық-синцитиальды вирустардан туындайтын, ауа-тамшылары арқылы таралатын аурулар тобы. Инфекция жөтелгенде, түшкіргенде және тұрмыстық байланыс арқылы жұғады. ЖРВИ мен тұмаудың алдын алудың негізгі жолы - вакцинация. Биыл облысқа тегін егуге 85 мыңнан аса доза вакцина жеткізілді. Ол алдымен диспансерлік есептегі, ата-анасының қамқорлығынсыз қалған балаларға және қарттарға салынады. Айта кетейін, аймақта вакцинациялау жұмыстары бүгіннен басталды, - деді Жаңыл Исақызы.</blockquote>Қазір күз мезгілі басталып, ауа райы құбылмалы кезеңге өтті.&nbsp;<blockquote>– Бұл уақыт ЖРВИ мен тұмаудың өршитін шағы. ҚР Бас мемлекеттік санитарлық дәрігерінің қаулысына сәйкес, 1 қазаннан бастап медицина ұйымдарының қызметкерлері маска режимін сақтайды. Сондай-ақ дезинфекциялық шаралар күшейтіліп, ұйымдасқан ұжымдарда профилактикаға бақылау артады. Дүниежүзілік денсаулық сақтау ұйымы тұмаудан қорғаудың жалғыз әрі ең тиімді жолы ретінде вакцинацияны ұсынады. Осы мақсатта облыстық бюджеттен қаржы бөлініп, Ресейде өндірілген «Гриппол плюс» вакцинасы қолданылады, – деді Әлия Мүтәліпқызы.</blockquote><img src="https://knadmin.beoblood.kz/uploads/Snimok_b3613ba79e.PNG" alt="Снимок.PNG">Фото: Нұрболат Нұржаубай

Биыл облыста ЖРВИ көрсеткіші 2,6 пайызға төмендеген

<a href="https://kyzylorda-news.kz/">Kyzylorda-news.kz</a> &nbsp;Қорқыт ата атындағы Қызылорда университетінің Басқарма төрағасы-Ректоры Бейбіткүл Каримова Жүсіп Баласағын атындағы Қырғыз ұлттық университетінің ректоры Догдурбек Чонтоевпен кездесіп, қос дипломды магистрлік бағдарламаны іске асыру мәселелерін талқылады.2025-2026 оқу жылынан бастап "Педагогика және психология" бағыты бойынша қос диплом бағдарламасы басталды. Бұл бағдарламаның бірегейлігі-студенттер "Педагогика және психология" бағдарламасы бойынша Қорқыт ата университетінен және Жүсіп Баласағын атындағы ҚҰУ "Психология" бағдарламасы бойынша қос дипломға қол жеткізеді.Сонымен қатар, Ж.Баласағын атындағы ҚҰУ Ыстықкөлде 2025 жылдың жазында Ұлы Отан соғысындағы Жеңістің 80 жылдығына арналған бірлескен жазғы мектеп ұйымдастырды. Аталған шараға Ресей, Қазақстан және Қырғызстанның ЖОО студенттері қатысты. Ректор Бейбіткүл Каримова өткен семестрде Қорқыт ата университетінде білім алған қырғыз студенттерімен кездесіп, пікір алмасты.Сондай-ақ, "Манас" Қырғыз-Түрік университетіне сапары аясында университеттің құрылғанына 30 жыл толуына арналған мерейтойлық іс-шараларға қатысқан Басқарма төрағасы – Ректор екі университет арасындағы академиялық ұтқырлық пен ғылыми серіктестікті жоғары бағалады. Қазіргі таңда Қорқыт ата университетінің студенттері "Орхун" бағдарламасы аясында "Манас" университетінде білім алуда.Айта кетейік, Ж.Баласағын атындағы ҚҰУ алғаш рет QS WUR 2025 әлемдік рейтингісіне енсе (1201–1400 орын), "Манас" Қырғыз-Түрік университеті осы рейтингте 951–1000 орын позициясымын орын алып отыр.

Қырғыз университеттерімен ынтымақтастық:  Қос диплом және академиялық ұтқырлық бағдарламалары

<a href="https://kyzylorda-news.kz/">Kyzylorda-news.kz</a>&nbsp; Әлеуметтік маңызы бар салаларды дамытуға ерекше көңіл аударған «Қазақстан халқына» қорымен Қызылорда облысында бұқаралық ақпарат құралдары өкілдеріне арнап баспасөз турын ұйымдастырылды.Баспасөз туры барысында қордың денсаулық сақтау, білім беру және әлеуметтік қолдау бағыттарында жүзеге асырылып жатқан бағдарламалары мен жобалары көрсетіліп, журналистерге олардың нәтижелері таныстырылды.<img src="https://knadmin.beoblood.kz/uploads/1_Syr_irinde_aza_stan_hal_yna_ory_ar_yly_zh_zege_asyryl_an_ajyrymdyly_zhobalary_k_rsetildi_a5f978b261.webp" alt="1 Сыр өңірінде «Қазақстан халқына» қоры арқылы жүзеге асырылған қайырымдылық жобалары көрсетілді.webp">2022 жылдан бері облыс әкімінің бастамасымен «Қазақстан халқына» қорының қолдауымен облыстың әлеуметтік саласына жалпы сомасы 10 млрд. теңгеден астам қайырымдылық көмек көрсетілді. Бұл қаражаттың басым бөлігі әлеуметтік нысандарды жабдықтауға, балалардың сапалы білім алуы мен қауіпсіздігін қамтамасыз етуге, ауылдық жерлерде медициналық қызметтердің қолжетімділігін арттыруға және ерекше күтімді қажет ететін балаларды қолдауға бағытталды.<img src="https://knadmin.beoblood.kz/uploads/4_Syr_irinde_aza_stan_hal_yna_ory_ar_yly_zh_zege_asyryl_an_ajyrymdyly_zhobalary_k_rsetildi_b0c2ba289c.jpg" alt="4Сыр өңірінде «Қазақстан халқына» қоры арқылы жүзеге асырылған қайырымдылық жобалары көрсетілді.jpg">Баспасөз туры барысында ең алдымен БАҚ өкілдері Қызылорда қаласындағы №6 есту қабілеті бұзылған балаларға арналған арнайы мектеп-интернатымен танысты. «Арнайы мектеп ұйымдарын жабдықтау» жобасы аясында бұл мекеме оқу, түзету және шығармашылық бағыттағы заманауи құрал-жабдықтармен қамтамасыз етілген. Қордың қолдауымен қазақ тілі кабинеті мен шеберхана жаңартылып, балалардың тілдік дағдыларын дамытуға және еңбекке баулуға мүмкіндік жасалды. Қазіргі таңда, интернатта 56 бала тәрбиеленуде, ал түлектердің бір бөлігі тігін ісін кәсіби деңгейде жалғастыруда.Келесі бағыт – облыстық онкология орталығы. Мұнда, «QH Денсаулық жолы» жобасы аясында табысталған жылжымалы медициналық кешеннің жұмысы таныстырылды. Заманауи жабдықталған көліктер шалғайдағы елді мекен тұрғындарына қызмет көрсетіп, онкологиялық ауруларды ерте кезеңде анықтауға мүмкіндік беруде. Маммографиялық аппарат, жоғары деңгейлі ультрадыбыстық жүйе және компьютерлік томограф – барлығы Жапонияда жасалған жоғары дәлдіктегі құрылғылар. Бұл Қазақстанда алғаш рет қолданысқа енгізілген кешен болып табылады. Жоба халықтың сапалы медициналық қызметке қолжетімділігін арттыруға зор үлес қосуда.<img src="https://knadmin.beoblood.kz/uploads/3_Syr_irinde_aza_stan_hal_yna_ory_ar_yly_zh_zege_asyryl_an_ajyrymdyly_zhobalary_k_rsetildi_ed38e996b6.jpg" alt="3Сыр өңірінде «Қазақстан халқына» қоры арқылы жүзеге асырылған қайырымдылық жобалары көрсетілді.jpg">Бұдан бөлек, Қызылорда қаласының Талсуат ауылында журналистер «QH Мүгедектігі бар балаларды үй жағдайында оңалту» жобасымен танысты. Бұл бастама ерекше күтімді қажет ететін балалардың өмір сапасын жақсартуға бағытталған. Оларға арнайы техникалық оңалту құралдары ұсынылып, ата-аналарға кәсіби кеңестер берілуде. Мұндай қолдау балалардың қоғамға бейімделуіне және тәуелсіз өмір сүру дағдыларын қалыптастыруға жол ашуда.<img src="https://knadmin.beoblood.kz/uploads/2_Syr_irinde_aza_stan_hal_yna_ory_ar_yly_zh_zege_asyryl_an_ajyrymdyly_zhobalary_k_rsetildi_6b87a873be.webp" alt="2 Сыр өңірінде «Қазақстан халқына» қоры арқылы жүзеге асырылған қайырымдылық жобалары көрсетілді.webp">Баспасөз туры соңында БАҚ өкілдері Жалағаш ауданындағы Әл-Фараби атындағы №201 мектеп-лицейінде болып, «Ауылдық жерлердегі тірек мектептердің әлеуетін арттыру» жобасының нәтижелерімен танысты. Жоба аясында мектеп робототехника, STEM-зертхана, физика және химия кабинеттерімен жабдықталды. Сонымен қатар, мұғалімдерге зияткерлік мектептерінің педагогикалық шеберлік орталығында біліктілікті арттыру курстары өткізілген. Бұл ауыл мұғалімдеріне жаңа әдістемелерді меңгеріп, білім сапасын арттыруға мүмкіндік беруде.Баспасөз турға қатысқан журналистер қордың аймақтағы бастамаларының маңыздылығына көз жеткізіп, халыққа нақты жеткен көмекті өз көздерімен көрді.Өз кезегінде «Қазақстан халқына» қорының өкілдері алдағы уақытта осы бағыттағы жобаларын жалғастыра беретінін жеткізді.

Сыр өңірінде «Қазақстан халқына» қоры арқылы жүзеге асырылған қайырымдылық жобалары көрсетілді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Басқарма Төрағасы – Ректор Бейбіткүл Каримова Үшінші жақтағы университеттердің халықаралық қауымдастығы (AIUTA) өкілдерімен кездесіп, ынтымақтастық меморандумына қол қойды.Меморандумның мақсаты – «Үшінші жақтағы университеттер» концепциясын дамыту және ілгерілету, атап айтқанда қарт адамдардың әлеуметтік және мәдени өмірге белсенді қатысуын қамтамасыз ету. Мұндай серіктестік қарттардың білім алуын қолдап, олардың қоғамдағы рөлін арттыруға бағытталған.Қорқыт ата атындағы Қызылорда университеті үшін бұл халықаралық ынтымақтастық өз тәжірибесін байытып, «Күміс университеттер» жобасын дамытуға жаңа серпін берері анық. Сонымен қатар, университет қарт адамдардың білім алу және әлеуметтік белсенділік саласындағы үздік халықаралық тәжірибелерді енгізуге мүдделі.Айта кетсек, аталмыш ынтымақтастық туралы меморандум Абай атындағы Қазақ ұлттық педагогикалық университетінде Үшінші жақтағы университеттер халықаралық қауымдастығының (AIUTA) президенті, Франциядағы Тулуза университетінің профессоры Франсуа Веллас және қауымдастықтың басқарма мүшесі, Словакияның Братислава Экономика университетінің жанындағы Үшінші жақтағы университет директоры, профессор Янка Себера Хладецканың ресми сапары аясында өтті.Сапардың басты мақсаты – халықаралық ынтымақтастықты нығайту, үшінші жаққа арналған білім беру саласында тәжірибе алмасу, Қазақстандағы «Күміс университеттердің» даму стратегияларын талқылау және қазақстандық қауымдастықты халықаралық деңгейге шығару.Фото: Қорқыт ата атындағы ҚУ

Халықаралық ынтымақтастық туралы меморандумға қол қойылды

<a href="https://kyzylorda-news.kz/">Kyzylorda-news.kz</a> Облыс әкімінің төрағалығымен мәжіліс өтіп, онда егін жинау науқанының барысы қаралды. Жиында көтерілген мәселе бойынша қала әкімдігінде шаһар басшысы Нұржан Ахатов алдағы міндеттерді пысықтады.Қазіргі таңда қала бойынша егін жинау науқаны қарқынды жүруде. Шаруашылықтар жоңышқа орымын аяқтап, шөп дайындау жұмыстарын атқаруда. Бау-бақша өнімдері де межелі уақытында жиналуда.Ал, бүгінгі күнге күріштің 1 275 гектары орылып, 1 024 гектары бастырылған. Орта өнім 52 центнерден келуде. Егін жинауға қажетті жанар-жағар май жеткілікті деңгейде.Күн райына қарамастан, егінді мүмкіндігінше шығынсыз жинап алған жөн. Тиісті сала жетекшілері науқанның қарқынын бәсеңдетпей, оны 15-ші қазанға дейін аяқтауы тиіс,-деді қала әкімі Нұржан Сәбитұлы жиында.

Қазақстан және Қызылорда облысының жаңалықтары