<a href="https://kyzylorda-news.kz/">Kyzylorda-news.kz</a> Халық жадында мәңгілікке сақталған Семей ядролық полигоны – еліміздің ең қасіретті беттерінің бірі. Осы зұлматтың зардабын тартқан мыңдаған адамның рухына тағзым ету – әрбіріміздің азаматтық парызымыз. Осы мақсатта 29 тамыз – Халықаралық ядролық сынақтарға қарсы іс-қимыл күніне орай Қармақшы ауданында еске алу шарасы өтті.Іс-шара ядролық сынақ құрбандарының рухына Құран бағышталып, гүл шоқтарын қоюмен басталды.Аталған шарада сөз алған Қармақшы ауданы әкімінің орынбасары Самат Смағұлов:<blockquote>«Семей полигонында болған ядролық сынақтар халқымыз үшін орны толмас қасірет әкелді. Бұл қайғылы күндер ұмытылмайды. Қазақстан ядролық қарудан өз еркімен бас тартқан алғашқы елдердің бірі ретінде бүкіл әлемге үлгі көрсетті. Бейбіт болашақ жолында күрескен ардагерлерге тағзым ету – бүгінгі ұрпақтың парызы», – деді.</blockquote>Шара барысында Семей ядролық сынақ аймағында әскери қызмет атқарған, сол зұлмат кезеңдердің куәгерлеріне аудан әкімінің атынан «Алғыс» хаттар табысталып, ядролық сынақтың зардабын тартқан марқұм азаматтардың отбасыларына естелік сыйлықтар ұсынылды.Сондай-ақ, аудандық ардагерлер кеңесінің төрағасы Асқар Мереков пен «Невада–Семей» қоғамдық бірлестігі төрағасының орынбасары Мұрат Айбақов сөз сөйлеп, жиналған жұртшылыққа ізгі лебізін білдіріп, жастарды ел мен жер тарихын ұмытпауға шақырды.Тағылымды шара бейбіт өмірдің қадірін ұғындырып, өткенге тағзым арқылы болашаққа сеніммен қарауға үндеді.

Ядролық зұлмат- ел жадында

<a href="https://kyzylorda-news.kz/">Kyzylorda-news.kz</a> Қармақшы ауданында 2025–2026 жылдардағы жылу беру маусымына дайындық мәселелеріне арналған мәжіліс өткізілді. Жиынға аудан әкімінің міндетін атқарушы Шыңғыс Әбділәмитұлы төрағалық етті.Күн тәртібіндегі негізгі мәселе бойынша аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Бақытбек Жылтыров баяндама жасап, әлеуметтік нысандардың қазіргі жағдайы мен дайындық барысы туралы кеңінен ақпарат берді.Қазіргі таңда Қармақшы ауданы бойынша 114 әлеуметтік нысан бар. Аталған нысандарда жылу қазандықтарын күзгі-қысқы кезеңге дайындау жұмыстары жүргізіліп жатыр. Қазіргі уақытта дайындық паспортын алу үшін тиісті құжаттар тапсырылуда. Жиын барысында Шыңғыс Әбділәмитұлы жауапты сала басшыларына дайындық жұмыстарын жүйелі түрде жалғастырып, барлық әлеуметтік нысандардың жылу беру маусымына толық әзір болуын қамтамасыз етуді тапсырды.Айта кету керек, ҚР Заңның 6-бабында Энергия өндіруші және энергия беруші ұйымдардан Әзірлік паспортты алу құжаттарды қабылдау www.egov.kz «электрондық үкімет» веб-порталы арқылы жыл сайын 15 тамыз бен 30 қыркүйек аралығында жүзеге асырылады.

Жылу беру маусымына дайындық барысы пысықталды

<a href="https://kyzylorda-news.kz/">Kyzylorda-news.kz</a> Қазалы ауданының Әйелдер істері және отбасылық-демографиялық саясат жөніндегі комиссиясының жұмыс жоспарына сәйкес Руханият орталығында еңбекші аналармен кездесу өтті.2025 жыл – Жұмысшы мамандықтар жылы аясында еңбек адамдарының, соның ішінде еңбекші аналардың қоғамдағы мәртебесін көтеру, олардың еңбегін дәріптеу мақсатында өткен кездесуді қоғамдық даму бөлімінің басшысы Жәнібек Алмасұлы жүргізді.Жиынға Қазалы ауданының құрметті азаматы Әбиқызы Бибісара Қазалы ауданының мәслихат депутаттары – Эльмира Жалпақбайқызы мен аудандық аналар кеңесінің төрайымы Шәкизада Келімбетқызы, ауылдық округтердегі әйелдер кеңесінің төрайымдары мен мүшелері, Отбасын қолдау орталығының мамандары сондай-ақ әр салада еңбек етіп жүрген еңбекші аналар қатысты.Кездесу барысында Жәнібек Алмасұлы: «Жұмысшы мамандықтары – кез келген мемлекеттің экономикасы мен әлеуметтік дамуының алтын қазығы. Бүгінгі кездесудің мақсаты – әр саладағы еңбекші аналардың кәсіпқойлығын, олардың қоғамдағы жауапкершілігі мен еңбегін дәріптеу. Жастарға тәрбие берудің басты құралы – еңбекке құрмет десек, бүгінгі жүздесу – осы құндылықты дәріптеудің бір парасы» – деді.Шара барысында қарапайым еңбектің қадірін ұғындырып, маңдай терімен ел игілігіне үлес қосып жүрген бірқатар еңбекші аналар аудан әкімінің Алғыс хатымен және естелік сыйлықтармен марапатталып, аудандық мәдениет орталығының өнерпаздары –аналарға арналған әндерін арнап, қатысушыларға көтеріңкі көңіл-күй сыйлады.Жиында сөз алған Қазалы ауданының Құрметті азаматы Бибісара Әбиқызы: «Еңбек бәрін жеңбек, шынайы бақыт – адал жұмыс пен маңдай тердің жемісінде. Ел мүддесі үшін аянбай еңбек ету – әрбіріміздің қасиетті парызымыз» – деп жастарды еңбекқорлыққа шақырды. Одан соң, Аудандық аналар кеңесінің төрайымы, Қазалы ауданының мәслихат депутаты Шәкизада Келімбетқызы сөз алып марапат алушы еңбекші аналарды құттықтап, ел ішіндегі береке мен бірліктің бастауы аналар екендігін жеткізді.Сондай-ақ марапат иесі, еңбекші ана Гүлсара Жұматқызы ұйымдастырушыларға алғыс айтып, еңбегінің елеп-ескерілгеніне ризашылығын білдірді.Жиын соңы аудандық аналар кеңесінің мүшесі, талантты әнші Гүлнұр Аралбайқызының орындауындағы «Анаңды сүйсең менше сүй» әнімен түйінделіп, естелік суретке түсумен қорытындыланды.Фото: Қазалы ауданы әйелдер істері және отбасылық-демографиялық саясат жөніндегі комиссиясы

Еңбекші аналар құрмет төрінде

Президенттің 2024 жылғы Жолдауы: экономиканы әртараптандыру және $150 млрд тікелей инвестиция

<a href="https://kyzylorda-news.kz/">Kyzylorda-news.kz</a>&nbsp; Желіде танымал әнші Тамара Асардың әйел мен еркекке қатысты ойы қызу талқыға түсті. Бұл туралы <a href="https://stan.kz/erkektin-adiletsizdigine-konu-kerek-tamara-asardin-ayel-422643/">Stan.kz</a> ақпарат агенттігі хабарлады.Өнер иесі журналист Дина Төлепбергенмен сырласып, қоғамдағы ерлі-зайыптылардың қарым-қатынасын анықтап берді.<blockquote>“Ағаларыңды өзінен артық сүйемін. Сүю де керек. Ер адамды әйел адам артығырақ сүйіп, әділетсіздігіне де көне білу керек. Артығырақ бас иіп тұрған дұрыс. Оларды ақ қағаздың үстінде жүргізе алмаймыз. Ер адам түзу жүруге тиіс емес. Қазіргі болып жатқан проблема – әйелдер әділетсіздікті қабылдай алмағандықтан туындайды", – деді Тамара Асар.</blockquote>Одан кейін әйелдерге қол көтермеу үшін еркектер қандай іспен айналысатынын да айтты.<blockquote>“Осы сөзім арқылы әйелдерге қол көтеретін еркектерді ақтап тұрған жоқпын. Бүгінгінің еркектері жауға шапқан жоқ, қырғын көрген жоқ. Сосын іштегі агрессиясын әйелдеріне шығарады. Сол үшін ер адамдар ауыр жұмыс істеп, түзде жүруі керек”, – деді әнші.</blockquote>Фото:&nbsp;https://www.instagram.com/tamara_assar_official/

"Еркектің әділетсіздігіне көну керек": Тамара Асар әйелдерге кеңес берді

<a href="https://kyzylorda-news.kz/">Kyzylorda-news.kz</a>&nbsp; Ұлттық бірыңғай тестілеуден ең жоғары көрсеткіш – 140 балл жинаған Түркістан облысының түлегі Әбілхан Жәнібек өз таңдауын жасады. Ол білімін Astana IT университетінде IT мамандығы бойынша жалғастырмақ, деп хабарлайды&nbsp;<a href="http://qaz365.kz/">Qaz365.kz</a>.Енді жас студентке қуанышты жаңалық бар: ол білім алған EDUSER оқу орталығы елордадан комфорт санат бойынша еуропалық стандарттағы екі бөлмелі пәтер сыйлады. Бұған дейін орталық басшылығы үздік нәтиже көрсеткен талапкерге өзі түскен университет маңынан баспана алып беруге уәде еткен болатын.Әбілхан Жәнібек – биыл 5 пәндік ҰБТ бойынша 140 балл жинаған жалғыз түлек.EDUSER оқу орталығының мәліметінше, олардың курсына небәрі 400 оқушы қатысқан. Соның ішінде Әбілхан тарихи рекорд орнатып отыр. Соңғы 9 жылда 5 пәннен толық 140 балл алған небәрі үш-ақ оқушы болған.<blockquote>2025 жылы бізде онлайн дайындыққа қатысқан Әбілхан 140 балл жинады. Бұдан бөлек, 130-дан жоғары нәтиже көрсеткен шәкірттеріміз де, 120-дан асып, мемлекеттік грантқа түскен оқушыларымыз да көп. 2026 жылы да біздің курсымыздан 140 балл жинаған талапкерге өзі оқуға түсетін қалада пәтер алып береміз, – деді EDUSER оқу орталығының директоры Айдос Жұманазар.</blockquote>ҰБТ-дан 140 балл алған ауыл баласына уәде етілген пәтер табысталды.&nbsp;<blockquote>«Біз ЕDUSER компаниясының уәде берген пәтерінде отырмыз. Алла разы болсын ол кісілерге. ЕDUSER компаниясына сәтілік тілейміз.&nbsp;&nbsp;Алда Жәнібек сияқты 140 балл алатын балалар өте көп болсын! Сенбейтіндер бар екен, айтарым – шынайы барлығы. Жәнібектің жасы 17-де. Кәмелет жасқа толмаған. Үй біздің атымызға аударылды. Қуаныштымыз», – дейді Жәнібектің әкесі Асқар Әбілхан.</blockquote>Фото: EDUSER

ҰБТ-дан 140 балл жинаған түлекке университет маңынан екі бөлмелі пәтер сыйға берілді

<a href="https://kyzylorda-news.kz/">Kyzylorda-news.kz</a> &nbsp;Жаңа оқу жылы қарсаңында Қазақстан Халық партиясының Қызылорда облыстық филиалы «Мектепке жол» республикалық акциясына үн қосып, әлеуметтік жағынан аз қамтылған және көпбалалы отбасылардың балаларына көмек көрсетуді дәстүрге айналдырған.Биылда бұл дәстүр жалғасын тапты. ҚХП облыстық филиалының төрағасы Қайрат Ерназаровтың демеушілігімен Талсуат ауылдық округі мен Ақжарма ауылына қарасты Талдыарал елді мекенінде «Мектепке жол» акция аясында оқушыларға оқу құралдары мен мектепке қажетті жабдықтар табысталып, балалар мен ата-аналар қуанышқа бөленді.Бұл игі шара – жас ұрпақтың болашағына жасалған қамқорлық пен қоғамдағы әлеуметтік жауапкершіліктің айқын көрінісі.

Қазақстан Халық партиясы Қызылорда облыстық филиалы «Мектепке жол» акциясын өткізді

<a href="https://kyzylorda-news.kz/">Kyzylorda-news.kz</a>&nbsp; Өткен жылу беру маусымында Қызылорда облысының тұрғын үй секторларында 120 өрт <a href="https://kaz.inform.kz/news/kizilordada-500-ge-zhuik-uyge-tegn-datchik-ornatiladi-3992f0/">оқиғасы болды</a>. Бұл алдыңғы жылғыдан 24,1%-ға көп.Облыстық төтенше жағдайлар департаментінің мәліметінше, тілсіз жау сектор иелерін 15,5 млн теңгеге жуық шығынға батырған.&nbsp;<blockquote>– 4 адам қаза тауып, 3 адам жарақат алды. Табиғи газдан 3 адам уланып қайтыс болса, 5 адам жарақат алды. Көмірқышқыл газынан улану жағдайлары тіркелген жоқ. Мұндай келеңсіз оқиғалар тұрғындардың қауіпсіздік шараларына салғырт қарауынан, яғни тұрмыстық пештің техникалық жағдайын қадағаламауынан, балаларды қараусыз қалдыруынан көбейіп тұр, – деді департаменттің мемлекеттік өрт бақылау басқармасының бастығы Асхат Оразбеков.</blockquote>Құтқарушылар жаңа жылу маусымы алдында профилактикалық іс-шаралар қарқынын күшейтті.&nbsp;<blockquote>– Одан бөлек, облыстық жұмыспен қамтуды үйлестіру және әлеуметтік бағдарламар басқармасы тұрмысы төмен, көпбалалы, жалғысбасты ана және мүгедек жандар тұратын 6 825 отбасының тізімін ұсынды. Осы отбасылардың қауіпсіздігін қамтамасыз ету мақсатында 2024 жылы жергілікті бюджет қаражаты есебінен табиғи газды анықтайтын 484 датчик сатып алынды. Алдағы жылу беру маусымында сол құрылғыларды орнатамыз, – деді Асхат Оразбеков.</blockquote>Фото: Тасбөгет кенті әкімдігі

Қызылордада 500-ге жуық үйге тегін датчик орнатылады

<a href="https://kyzylorda-news.kz/">Kyzylorda-news.kz</a>&nbsp; Бүгінде Қазалы ауданы орталығынан шалғай орналасқан Сарбұлақ, Шилі, Шәкен және Шитүбек елді мекендерін таза ауыз сумен қамту жұмыстары жүргізілуде.Бүгін аудан әкімінің міндетін атқарушы Жалғас Сүйеубаев Қарақұм беткейдегі Шәкен және Шилі елді мекендеріне арнайы барып, ауыз су құрылысы жұмыстарының сапасын бақылады. Сондай құрылыс жұмыстарын жүргізіп жатқан мердігерлермен кездесіп, жұмыстың ең алдымен сапасына аса мән беріп, белгіленген мерзімде аяқтауды тапсырды.Қазіргі таңда Шәкен ауылында 8,7 шақырым ауыз су желісі жүргізіліп, 31 темір бетон құдығы орнатылды. 76 үйге сервистік желісі жүргізіліп, 1 дана скважина бұрғыланды. Сонымен қатар абаттандыру жұмыстары жүруде. Ал, Шилі елді мекенінде бүгінде 3,2 шақырым ауыз су желісі жүргізіліп, 24 темір бетон құдығы орнатылды. Сондай-ақ 30 үйге сервистік желісі жүргізіліп, скважина бұрғылау жұмыстары жүруде.Шәкен ауылын ауыз сумен қамту құрылыс жұмыстарымен «Дәнекер КС» жауапкершлігі шектеулі серіктестігі, ал Шилі елді мекеніндегі жұмыстарымен «Намыс – Құрылыс» ЖШС мекемесі айналысуда. Екі елді мекендегі де құрылыс жұмыстары биылғы жылдың қыркүйек айының соңына дейін толық аяқталып, елді мекен халқына сапалы ауыз суды пайдалануға беру жоспарланып отыр.Айта кетейік, Мемлекет басшысының 2025 жылы Қазақстан халқын 100 пайыз таза ауыз сумен қамту туралы тапсырмасына сәйкес елді мекендердегі ауыз су құрылысы жұмыстары аяқталғаннан кейін аудан халқын таза ауыз сумен қамту көрсеткіші 100 пайызды құрайтын болады.

Қазалы: Елді мекендерді ауыз сумен қамту жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz</a>&nbsp; Қазақстандық педагогтердің цифрлық құзыреттілігін арттыруға бағытталған оқыту басталды, деп хабарлайды Оқу-ағарту министрлігінің баспасөз <a href="https://kaz.inform.kz/news/pedagogterge-arnalgan-tegn-zhasandi-intellekt-kursi-ske-kosildi-5a05aa/">қызметі.</a>Жаңа оқу жылы қарсаңында мұғалімдердің кәсіби даярлығын заманауи талаптарға сай жетілдіру мақсатында ҚР Оқу-ағарту министрлігіне қарасты «Өрлеу» біліктілікті арттыру ұлттық орталығы ЮНЕСКО-мен бірлесіп жаңа бағдарламаны іске қосты.Бағдарлама халықаралық тәжірибе негізінде әзірленіп, қазақстандық оқу жүйесіне бейімделген.Оқыту барысында педагогтер:• жасанды интеллект құралдарын тиімді әрі этикалық тұрғыдан дұрыс қолдануды;• промпт жазу әдістерін;• сабақ жоспарлау тәсілдерін;• тестілер мен оқу материалдарын әзірлеуді;• иллюстрациялар жасауды;• оқу мазмұнын жетілдіру және оқушылардың қызығушылығын арттыру жолдарын меңгереді.—&nbsp;Бағдарлама жасанды интеллектіні педагогтің орнын алмастырушы емес, кәсіби қызметін жеңілдететін сенімді құрал ретінде қолдануға бағытталған. Ол&nbsp;мұғалімге шығармашылыққа көбірек уақыт бөлуге мүмкіндік береді. «Өрлеу» біліктілікті арттыру ұлттық орталығы ұйымдастырған бұл оқуға мұғалімдер&nbsp;https://reg.orleu.edu.kz сайты арқылы тіркеліп, LMS платформасында тегін қатыса алады,&nbsp;— делінген хабарламада.Бір аптаның ішінде 100 мыңға жуық адам қатысып, соның жартысына жуығы сертификат алды.Бұдан бұрын педагогтерге құрметсіздік танытқандар жауапкершілікке тартылатыны анықталды.Фото: Оқу-ағарту министрлігі

Педагогтерге арналған тегін жасанды интеллект курсы іске қосылды  

<a href="https://kyzylorda-news.kz/">Kyzylorda-news.kz</a>&nbsp; Қызылорда қаласы әкімдігінің қоғамдық даму бөлімінің мемлекеттік әлеуметтік тапсырысына сәйкес сыбайлас жемқорлыққа қарсы мәдениетті қалыптастыру мақсатында ұйымдастырылған "Үздік бейнеролик" байқауының жеңімпаздары мен жүлдегерлері анықталды. Байқауға қала тұрғындары қатысты.Байқаудың мақсаты қала тұрғындары арасында сыбайлас жемқорлыққа қарсы дүниетанымды қалыптастыру, ақпараттық-коммуникациялық құзыреттілікті арттыру арқылы жеке тұлғаның, қоғамның және мемлекеттің қауіпсіздігін қамтамасыз ету.Байқау Қызылорда қаласының аумағында ашық түрде өткізілді. Байқауға сыбайлас жемқорлықты қабылдамау және адалдық принциптерін нығайтуға ықпал ететін мәдениеттерді белгілейтін алты бейнеролик қабылданып, комиссия шешімімен үш бейнеролик жүлделі орындарды иеленді. І орынды Іскендір Нұрислам Жандосұлы, ІІ орын Тұрсынбай Нұрымжан Үсенбайұлы, ІІІ орын Төребай Тұрсынбай Төлеуұлы иеленді.

"Үздік бейнеролик" байқауының жеңімпаздары марапатталды

<a href="https://kyzylorda-news.kz/">Kyzylorda-news.kz</a>&nbsp; Өңірлерден келген делегация мүшелері Қызылорда қаласындағы бірқатар әлеуметтік, мәдени және инфрақұрылымдық нысандардың жұмысымен танысты.Алдымен қонақтар қайта жаңғыртудан өткен Тәуелсіздік даңғылы арқылы өтіп, «Отбасы орталығы», «Жаңа Достық үйі», «Қызылорда Арена» спорт кешенінің құрылыс барысымен, «Өнер орталығы» ғимаратының сыртқы келбетімен танысты. Бұдан соң делегация «Сыр жұлдыздары» шығармашылық-инновациялық академиясының жұмысын көріп, ондағы жасөспірімдердің өнерін дамытуға бағытталған жобаларға жоғары баға берді.Келесі аялдама - «Анаға тағзым» орталығы болды. Мұнда делегация мүшелері ұлттық құндылықтарды дәріптейтін және ананы құрметтеуге үндейтін орталық қызметімен танысты. Сондай-ақ қайта жаңғыртудан өткен қалалық мәдени-демалыс паркінде болып, тұрғындардың бос уақытын тиімді өткізуге арналған жаңа мүмкіндіктерді тамашалады.Бұдан әрі қонақтар жаңа жылу электр орталығының құрылыс алаңына барып, энергетикалық инфрақұрылымды жетілдіруге бағытталған жобамен танысты. Аймақтың энергетикалық қауіпсіздігін қамтамасыз етуге арналған бұл нысан делегация тарапынан ерекше назарға алынды.Сол жағалауда орналасқан 11 мың орындық жаңа стадион да делегаттардың басты аялдамаларының бірі болды. Мұнда спорт инфрақұрылымының дамуымен танысып, аталған нысанның жастар спорты мен бұқаралық спортты дамытудағы маңызына тоқталды.Одан кейін делегация облыстық тарихи-өлкетану музейінде болып, Сыр өңірінің бай тарихы мен мәдени мұраларына қанықты. Жолай «Қан орталығы», жаңа Физика-математика мектеп-интернаты, «Жаңа автовокзал», «Шағын өнеркәсіптік аймақ», жаңа көпқабатты тұрғын үйлер, «Оқушылар сарайы» және Үстел теннисі орталығының құрылысымен сырттай танысып өтті.Сапар соңында делегаттар «Қорқыт Ата» халықаралық әуежайының жаңа терминалына аялдап, өңірдің көлік-логистикалық әлеуетін арттыруға арналған жобамен танысты. Жолай «Музыкалық колледж», қайта жаңғыртылып жатқан «Президент паркі» және «Rixos Qyzylorda» қонақ үйінің құрылыс нысандарын көрді.Өңірлерден келген қонақтар Сыр еліндегі даму қарқынын жоғары бағалап, жүзеге асырылып жатқан жобалардың аймақ тұрғындарына игілігін тигізетініне сенім білдірді.

Қазақстан және Қызылорда облысының жаңалықтары