<a href="https://kyzylorda-news.kz/">Kyzylorda-news.kz.</a>&nbsp; Қазақстанда жылдық мөлшерлемесі 11-12% болатын жаңа ипотекалық бағдарламаны іске қосу жоспарланып отыр. Бұл туралы “Бәйтерек” ҰБХ” АҚ басқарма төрағасы Қанат Шалапаев мәлімдеді, деп хабарлайды Sputnik Қазақстан.
Оның айтуынша, зейнетақы жинағының баспанаға жұмсауға болатын шекті мөлшерінің өсуіне және келесі жылы “7-20-25” бағдарламасының аяқталуына байланысты 500 млрд теңге ипотекаға немесе 35 мың пәтерге деген сұраныс төмендейді болжанып отыр.
<blockquote>
 “Жеке құрылыс салушылардың коммерциялық тұрғын үйді сату жылдамдығы айтарлықтай төмендеуі мүмкін. Сұраныстың өтелмеуіне жол бермеу мақсатында халық үшін екінші деңгейлі банктердің нарықтық ипотекасы бойынша сыйақы мөлшерлемесін субсидиялау тетігін іске қосу ұсынылады”, – деді Шалапаев үкімет отырысында.
</blockquote>
Қазақстан Қаржыгерлер қауымдастығы жүргізген келіссөздер нәтижесінде мынадай базалық шарттар ұсынылып отыр: 
бастапқы жарна 20 пайыздан басталады; 
кредит беру мерзімі 20 жылға дейін; 
-қарыздың ең жоғарғы сомасы 35 миллион теңгеге дейін; 
-төлем қабілеттілігін міндетті түрде растау қажет.
Шалапаевтың айтуынша, Ұлттық банктің базалық мөлшерлемесінің деңгейінен 5%-тен аспайтын ипотека бойынша сыйақы мөлшерлемесінің 7% субсидияланады.
Екінші деңгейлі банктер өз қаражаты есебінен құрылыс салушылардың бастапқы тұрғын үйіне және Қазақстан тұрғын үй компаниясының кепілдігімен қамтамасыз етілген салынып жатқан тұрғын үйге қарыз бере алады.
<blockquote>
 “Осы бағдарламаны іске қосу үшін заңнамалық өзгерістер қажет емес. Қазіргі уақытта бюджеттік өтінім қаржы министрлігінің қарауында. Бюджет мақұлданғаннан кейін, Қазақстандық тұрғын үй компаниясы осы бағдарламаны дереу іске қосуға дайын”, – деді Шалапаев.
</blockquote>
Үкімет отырысында көрсетілген слайд бойынша субсидиялау талаптары: 
субсидиялау ставкасы – 7%, 
ипотека бойынша ставка – Ұлттық банктің базалық ставкасы + 5%-ке дейін 
субсидиялау мерзімі – 10 жыл; 
қарыз алушы үшін соңғы ставка – жылдық 11-12%.

Қазақстанда жаңа ипотекалық бағдарлама іске қосылмақ

<a href="https://kyzylorda-news.kz/">Kyzylorda-news.kz.</a>&nbsp; Қaзaқтың ұлттық аспабы – дoмбыpaның мaңыздылығы epeкшe бағаланып, елімізде шiлдe айының aлғaшқы жeкceнбiсі «Ұлттық дoмбыpa күнi» болып белгіленді.
Атаулы мерекеге орай аудан орталығындағы демалыс саябағында домбыра үлгісіндегі символикалық белгінің ашылу рәсімі өтті.
<blockquote>
 «Қазақ халқымен сан ғасырдан бері егіздің сыңарындай қатар жасасқан асыл жәдігері ол – қасиетті қара домбыра. Атадан балаға аманат болған осындай асыл қазынамызды қадір тұту – бәріміздің қасиетті борышымыз. Жоралы жұртымыздың қатпар-қатпар тарихынан, асу да асу кезеңінен сыр шерткен күй-толғау, сыңғырлы сұлу ән-әуен құлағымыздан кетпесін! Әр шаңырақтан ән-күй үзілмесін! Домбыра күні мерекесі құтты болсын!» – деді мерекелік шараға қатысқан аудан әкімі С. Сермағамбетов.
</blockquote>
Шара барысында ұлы өнерді кейінгі ұрпаққа ұлықтау мақсатында аянбай еңбек етіп жүрген бірнеше белігілі күйлердің авторы, асыл мұраның жанашыры, күйші-композитор Мұрат Сыдықов пен күй қазынасын өскелең ұрпаққа мұра еткен күйші, 25-ке тарта күйді дүниеге әкелген – сазгер Жұмабай Жақып аудан әкімінің құттықтауымен марапатталып, қазақы дәстүрмен шапан жабылды.
Мерекелік жиынға арнайы келген Мәжіліс депутаты Геннадий Шиповских қазақ үшін қасиеті мол қара домбыра ұлықталған шараның маңызына тоқталып, өскелең ұрпақ үшін мәні зор игілікті іске куә болғандығына қуанышты екендігін жеткізіп, барша аралдықтарды мерекемен құттықтады. 
Одан соң, ҚР – ның Еңбек сіңірген қайраткері, ҚР ның мадениет қайраткері, Қазақстан композиторлар одағының мүшесі, «Құрмет» орденінің иегері, Арал ауданының «Құрметті азаматы», ақын – жырау, күйші – композитор Мұрат Сыдықов киелі аспаптың құдіреттілігін тарихта болған аңыз-әңгімелер арқылы жиналған жұртшылыққа мәлімдеді.
Ұлттық аспап айрықша ұлықталған тағылымды шарада «Мұраттың төкпесін» күй авторы нақышына келтіре орындаса, күйші-сазгер Жұмабай Жақып тартқан «Қара жорға» күйіне көпшілік ерекше ілтипат білдірді.
Сондай-ақ, сахна төрінде жас домбырашылар Құрманғазының «Балбырауын», «Ерке сылқым» «Адай» , Нұрғисаның «Әлқисса» күйлерін күмбірлетті.
Сонымен бірге мерекелік шарада жыршы-термешілер домбыраны әуелеген әндеріне арқау етіп, жиналған қауымға ерекше әсер сыйлады.
<img src="https://kyzylorda-news.kz/wp-content/uploads/2022/07/291918022_3306286269699736_3071074406139731176_n.jpg" alt="" />
<img src="https://kyzylorda-news.kz/wp-content/uploads/2022/07/291944514_3306286196366410_6260652010134406052_n.jpg" alt="" />
<img src="https://kyzylorda-news.kz/wp-content/uploads/2022/07/291958076_3306286649699698_6569743497893810501_n.jpg" alt="" />

Аралда домбыра үлгісіндегі символикалық белгі қойылды

<a href="https://kyzylorda-news.kz/">Kyzylorda-news.kz.</a>&nbsp; Облыс әкімі Нұрлыбек Нәлібаев балалар жылына тарту ретінде Сыр өңірінде кәсіпкерлердің демеушілігімен аймақта 80-ге жуық спорт-ойын алаңы салынатынын жеткізген еді. Оның Қызылорда қаласында 50-і, аудандарда 30-ы бой көтереді.
Бүгінде игілікті іс Қызылорда қаласынан бастау алды. Жергілікті кәсіпкерлер жаңадан салынатын ойын алаңдарының жер учаскелерін белгіледі. Мәселен, «Корпорация Алем-құрылыс» мекемесі «Бәйтерек» мөлтек ауданы, Бала-мекен елді мекеніндегі ойын алаңының жерін тегістеп, құрылыс-монтаж жұмыстарын жүргізуде. Бұл жұмыстар аудандар да жүргізілмек.
Еске салайық, өткен жылы 25 ойын алаңы пайдалануға берілді. Нысандар қаладағы көпқабатты тұрғын үйлердің аулаларына орналастырылды.
Мұнан бөлек, биыл қалалық бюджеттен қала аумағына 3 ойын алаңын салу жоспарлануда. Бұл нысандарды салуда халықтың сұранысы ескеріледі.
Айта кетейік, тұрғындардың спорт нысандарына қолжетімділігін арттыру мақсатында биыл облыста 7 дене шынықтыру-сауықтыру кешені пайдалануға беріледі.

Қызылордада 80-ге жуық спорт-ойын алаңы салынады

<a href="https://kyzylorda-news.kz/">Kyzylorda-news.kz.</a>&nbsp; Облыс әкімінің орынбасары М. Жайымбетовтің төрағалығымен ағымдағы жылдың І жартыжылдығындағы жол инфрақұрылымын дамыту саласындағы атқарылған жұмыстар қорытындыланды.
Мәжілісте жол саласына жауапты жергілікті мемлекеттік органдардың басшылары, аудан және қала әкімдерінің орынбасарлары, мердігерлер компаниялар мен авторлық және техникалық қадағалаушы мекемелердің басшылары қатысты.
Күн тәртібіндегі мәселе бойынша облыстық жолаушылар көлігі және автомобиль жолдары басқармасының басшысы П. Шамұратов баяндама жасап, саладағы өзекті мәселелерге тоқталды. 
Оның ішінде, биыл іске асырылып жатқан 118 жобаның барысы, атап айтқанда, 12 көпір құрылысы, 292 шақырым жол мен 72 елді мекендегі көшелерге жөндеу жұмыстары баяндалды.
Мәжіліс қорытындысымен облыс әкімінің орынбасары М. Жайымбетов басқарма басшысына, салаға жетекшілік ететін аудан және қала әкімдерінің орынбасарларына, сондай-ақ, мердігер мекеме басшыларына 2022 жылы жоспарланған барлық жобалар жыл аяғына дейін келісім-шартта көрсетілген мерзімде, әрі сапалы аяқталуын тапсырды.
<img src="https://kyzylorda-news.kz/wp-content/uploads/2022/07/291873827_336369905350927_4864667790393385169_n.jpg" alt="" />
<img src="https://kyzylorda-news.kz/wp-content/uploads/2022/07/292049913_336369805350937_933831407523721740_n.jpg" alt="" />
<img src="https://kyzylorda-news.kz/wp-content/uploads/2022/07/292153655_336369795350938_6234002701212670678_n.jpg" alt="" />

Жол инфрақұрылымын дамыту саласындағы жұмыстар қорытындыланды

<a href="https://kyzylorda-news.kz/">Kyzylorda-news.kz.</a>&nbsp; Синоптиктер 5 шілдеге Қазақстанның ауа райы болжамын ұсынды. Сейсенбі күні нөсер жаңбыр, найзағай, бұршақ, жел, шаңды дауыл күтіледі.
Қызылорда облысының&nbsp;басым бөлігінде төтенше өрт қаупі сақталады. +24 градус.

Сейсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Өзбекстан прокуратурасы Қарақалпақстанда болған тәртіпсіздіктер кезінде қаза тапқан мен жараланған адамдардың санын айтты, деп хабарлайды&nbsp;<a href="https://podrobno.uz/cat/proisshestviya/v-rezultate-volneniy-v-karakalpakstane-pogibli-18-chelovek-v-bolnitsakh-nakhodyatsya-eshche-94-ranen/">Podrobno.uz</a>.
Өзбекстан прокуратурасының мәліметінше, Қарақалпақстандағы халық толқуы кезінде 18 адам қаза тауып, 94 адам жарақат алған.
Ал Қарақалпақcтан&nbsp;автономиясының Денсаулық сақтау министрлігі 243 адам жарақат алғанын, оның ішінде 38 құқық қорғау органдарының қызметкерлері барын айтқан.
Ұлттық ұлан баспасөз қызметінің басшысы Даврон Жұманазаровтың мәліметінше, 1 және 2 шілдеде Нүкүсте болған шерулер кезінде 516 адам ұсталған. Ал 110 азамат 3 шілдеден 4 шілдеге қараған түні коменданттық сағат кезінде көшеде қолға түскен.

Өзбекстан прокуратурасы Қарақалпақстандағы толқулар кезінде қаза тапқандардың санын айтты

<a href="https://kyzylorda-news.kz/">Kyzylorda-news.kz.</a> Қазақстанда онлайн құрбандық шалуға мүмкіндік беретін <a href="https://www.qurban2022.kz/kk/">qurban2022.kz</a> сайты іске қосылды.
Биыл елімізде құрбан шалу рәсімі офлайн және онлайн форматта өтеді.
<blockquote>
 “Діни басқарма ел азаматтарына, әсіресе қала тұрғындарына қолайлы жағдай жасау мақсатында құрбан шалу рәсімін қашықтан өткізуге арналған <a href="https://www.qurban2022.kz/kk/">qurban2022.kz</a> сайтын іске қосты”, – деп хабарлады Қазақстан мұсылмандары діни басқармасы.
</blockquote>
Онлайн құрбан шалғысы келетіндер сайт арқылы құрбандық малын таңдап, көрсетілген реквизитке қажетті ақшаны аудара алады. Қой мен ешкіні бір адам, ал ірі қара мен түйені бір немесе 7 адам бірігіп шалса болады.
Бұдан кейін төлем барысында хабарламаға тапсырыс нөмірі мен құрбандық шалушының аты-жөнін жазу міндетті. Құрбандық шалынған соң оның фото және бейне есебі тапсырыс беруші көрсеткен WhatsApp нөмірге жіберіледі.
Құрбандық еті мұқтаж жандарға таратылады. Сол себепті мұқтаж жандар осы сайтта етті алуға өтініш беруге тиіс.
<a href="https://www.qurban2022.kz/kk/">qurban2022.kz</a> сайтында Нұр-Сұлтан тұрғындары үшін құрбандыққа шалынатын бір қойдың бағасы 70 мың теңге. Ал ірі қара бір адамға 455 мың теңгеге шығады. Егер жеті адам бірігіп сойса, әрбіреуі 65 мың теңгеден төлеуі керек.
Алматы қаласында қой – 75 мың теңге, ешкі – 47 мың теңге, ірі қара – 392 мың теңге тұрады. 
Сайтта көрсетілген мал бағасына қасапшының еңбекақысы кіреді. Қалған қызмет түрлері (малды бөлшектеп сою, пакеттерге салып, мұқтаждарға жеткізу) – тегін.
Құрбан айт елімізде үш күн тойланады. Биыл мейрамның бірінші күні сенбі, 9 шілдеге түсіп тұр. 
Елімізде Құрбан айттың алғашқы күні демалыс болып саналады. Бірақ бұл ұлттық немесе мемлекеттік мереке болмағандықтан, демалыс күні ауыстырылмайды. Сол себепті қазақстандықтарға осы жылы қосымша демалыс берілмейді.

Онлайн құрбандық шалатындар үшін арнайы сайт іске қосылды

<a href="https://kyzylorda-news.kz/">Kyzylorda-news.kz.</a> Алматы қаласы коронавирус инфекциясының эпидемиологиялық ахуалына байланысты «сары» аймаққа өтті. Бұл туралы санитарлық-эпидемиологиялық комитеттің ресми өкілі Ержан Байтанаев мәлімдеді.
<blockquote>
 «Бүгінде Алматы «сары аймаққа» өтті. Қаланың бас санитарлық-эпидемилогиялық дәрігері қаулы дайындап жатыр. Қаулыда ведомствоаралық комиссия ұсынған барлық карантиндік талап көрсетіледі. Дайын болған соң қаулы күшіне қай күні енетіні көрсетіледі. Біз тұрғындарды түсіністікпен қарап, вакцинациялау мен ревакцинацииялаудан бас тартпауды ескертеміз», – деді Ержан Байтанаев.
</blockquote>
Айтуынша, қазіргі таңда коронавирус инфекциясын жұқтырғандардың 80 проценті – соңғы алты айда вакцина және ревакцинация алмағандар.
Еске салсақ, бұған дейін ведомствоаралық комиссия коронавирус инфекциясының таралуына жол бермеу бойынша Қазақстанда эпидемиологиялық жағдай нашарласа, шектеулер енгізілетінін айтқан еді.
Өңір «сары» аймаққа көшсе: 
науқаспен жақын байланыста болған адамдарды қашықтан жұмысқа ауыстыру; 
СOVID-19 вакцинациясына қарсы көрсетілімдері бар қызметкерлерді және жүкті әйелдерді қашықтан жұмыс түріне ауыстыру; 
жабық мекемелерде, қоғамдық көлікте масканы міндетті түрде кию; 
10-нан астам адам қатысатын кеңестерді онлайн-форматқа көшіру ұсынылады.

COVID: Қазақстанда бір қала «сары» аймаққа өтті

<a href="https://kyzylorda-news.kz/">Kyzylorda-news.kz.</a> Биыл облыс аумағындағы су айдындарында 21 адам қаза болды. Оның 7-і жасөспірім бала. Осыған байланысты төтенше жағдайлар департаменті суға шомылу маусымында қауіпсіздік ережелерін барынша сақтауға және белгіленбеген аймақта суға түсуге болмайтынын ескертеді.
<blockquote>
 «Суға шомылу маусымы басталғалы төтенше жағдайлар департаменті қызметкерлерінің көмегімен 7 адам құтқарылды. Қазіргі таңда құтқарушылар мен полиция қызметкерлері қала және аудан аумағында орналасқан су айдындарында күшейтілген режимде рейд жұмыстарын жүргізуде. Тексеріс барысында ортақ су пайдалану қағидаларын бұзу бойынша 27 адамға ескерту берілді. Ал қоғамдық орында алкогольді ішімдік ішкен 2 азаматқа әкімшілік хаттама толтырылды. Жазғы демалыста балалардың қауіпсіздігін қамтамасыз ету мақсатында облыстық білім басқармасымен бірлесіп, қауіпті деп танылған 4 модульді-қаңқалы бассейн алынып тасталды», – деді Қызылорда облысы ТЖД басқарма бастығы Асхат Тоғызбаев.
</blockquote>
Сондай-ақ 12 мыңнан астам оқушыға қауіпсіздік ержелері бойынша 89 интерактивтік сабақ өткізілді. Суға шомылу маусымы аяқталғанша қауіпсіздікті қамтамасыз ету бағытындағы жұмыстар өз жалғасын табады.

Қызылордада 21 адам суға кетті

<a href="https://kyzylorda-news.kz/">Kyzylorda-news.kz.</a> Қазақстанның көптеген өңірінде Оңтүстік циклонның әсерінен жаңбыр жауып, жел күшейеді.
5 шілдеде шығыста, оңтүстік-шығыста, солтүстікте, ал 6 шілдеде солтүстік-батыста, орталықта қатты жаңбыр жауады, күн күркірейді, бұршақ түсуі мүмкін.
7 шілдеде еліміздің батыс өңірлерінде жоғары атмосфералық қысымның әсерінен жауын-шашын тоқтайды.
Күндіз батыста ауа температурасы +18+26°С-тан +23+31°С-қа дейін, солтүстік-батыста, солтүстікте +15+23°С-тан +20+28°С-қа дейін жоғарылайды.
Маңғыстау облысында – +23+28°С, оңтүстігінде – +31°С,
елдің орталығында – +20+28°С,
Қарағанды және Ұлытау облыстарының оңтүстігінде – +33°С,
республиканың шығысында – +22+29°С, ШҚО оңтүстігінде – +33°С,
елдің оңтүстігінде – +30+37°С-тан +25+33°С-қа дейін төмендейді,
елдің оңтүстік-шығысында – +28+33°С, таулы аудандарда – +23°С.

Ертеңнен бастап жаңбыр жауып, жел күшейеді

<a href="https://kyzylorda-news.kz/">Kyzylorda-news.kz.</a> Қызылорда облысының полиция департаментімен&nbsp; тұрақты түрде шетел азаматтарының нақты келу мақсаттарының шынайлығын анықтауға бағытталған рейдтік іс-шаралар жүргізілуде. Мәселен, &nbsp;жыл басынан республика көлемінде&nbsp; «Мигрант» іс шарасы өткізіліп, нәтижесінде көші-қон заңнамасын бұзған барлығы 765 дерегі анықталып, олар әкімшілік жауапкершілікке тартылған.
Сонымен қатар, қазіргі уақытта «Заңсыз келуші-2022» арнайы жедел-профилактикалық іс-шарасы өткізілуде.
Іс шара барысында көші-қон заңнамасын бұзудың барлығы 585 дерегі анықталды.&nbsp;&nbsp;&nbsp; &nbsp;
Атап айтқанда, шетелдіктің немесе азаматтығы жоқ адамның ҚР халықтың көші-қон саласындағы заңнамасын бұзған949 шетелдік&nbsp; анықталып шара көрілсе, оның ішінде ТМД елдерінен келген 41 азамат Республика аумағынан аластатылды (выдворение).
Сонымен бірге, шетелдіктердің болу ережелерінің сақталуын қамтамасыз етпеген Қазақстан Республикасының 401 азаматына, яғни жеке және заңды тұлғаларға қатысты әкімшілік шаралар көрілді.
Жалпы, жыл басынан облыс аумағына түрлі мақсаттармен ТМД елдерінен келген шетелдіктер &nbsp;ҚР ІІМ 08.02.2014 жылғы №76 бұйрығының «Бір жұмыс беруші-жеке тұлғаның үй шаруашылығында үй жұмыскерлері ретінде жұмыстар орындау(қызметтер көрсету) бойынша еңбек шарттарын бір уақытта бестен астам еңбекші көшіп келушімен жасасуға жол берілмейтіндігі» талабына сәйкес, 6948&nbsp; азамат &nbsp;жеке кіріс салығы бойынша айлық есептік көрсеткіштің 2(екі) еселенген мөлшерінде алдын ала төлемді төлеп, заң талаптарына сай рұқсат рәсімдеп, заңды жұмыс атқаруда.

 «Заңсыз келуші-2022»:  Көші-қон заңнамасы бұзылған 585 дерек анықталды

<a href="https://kyzylorda-news.kz/">Kyzylorda-news.kz.</a> Қызылордадағы көпқабатты үйлердің тұрғындары арасында «Үздік аула» байқауын өткізу дәстүрге айналған үрдіс. Биыл бұл байқау бесінші мәрте өткізілуде.
Байқау шарты бойынша көпқабатты тұрғын үй ауласына жасыл-желекті&nbsp; өз еңбегімен еккен кез-келген тұрғын қатыса алады. Ол үшін инстаграм, фейсбук әлеуметтік желілері арқылы #Qzo #Qyzylorda #Үздікаула2022 хэштегтерін міндетті түрде пайдалана отырып, «Сүйікті қалам – Қызылорда» тақырыбында жылы лебізін жолдап, өз парақшасында суреттерді жариялау қажет.
Байқауға материалдар 4 шілде мен 31 тамыз аралығында қабылданады.
Жеңімпаз аулалар комиссия шешімен анықталады.
І, ІІ, ІІІ орын жеңімпаздарын бағалы сыйлықтар күтеді.

Қазақстан және Қызылорда облысының жаңалықтары