<a href="https://kyzylorda-news.kz/">Kyzylorda-news.kz.</a>&nbsp; 30 маусым күні Қызылорда облысы полиция департаментінің патрульдік полиция ротасының қызметкерлері «Фольсваген» автокөлігін жол ережесін бұзғаны үшін тоқтатқан. Оқиға «Шымкент-Самара» тасжолы, яғни Арал ауданы Шижа ауылы&nbsp; тұсында орын алды. Жүргізуші 49 жаста, онымен бірге бір жолаушы да болған.
Тексеру барысында автокөліктен бір қапқа салынған шөп ұнтақтары тәркіленді. Сараптама қортындысына сәйкес тәркіленген зат салмағы 4 келіден аса «кептірілген марихуана» екені белгілі болды.
Екі күдікті қазіргі таңда Арал АПб-ның уақытша ұстау изоляторына қамаққа алынды.
<blockquote>
 «Аталған дерек бойынша Қазақстан Республикасы Қылмыстық кодексінің&nbsp;296-бабы 4-бөлігімен&nbsp;(аса ірі мөлшердегі есiрткi,психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау)&nbsp; сотқа дейінгі тергеп-тексеру әрекеттері жүргізілуде», – делінген полиция департментінің хабарламасында.
</blockquote>

Аса ірі мөлшерде есірткі тасымалдаған Қызылорда қаласының тұрғындары ұсталды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Нұрлыбек Нәлібаев республикалық «Қазақстан барысы» турнирінде жеңіске жеткен қызылордалық Мақсат Исағабыловтың жеңісімен сыр жұртшылығын құттықтады.
<blockquote>
 «Қадірлі жерлестерім! 
 Жеңісіміз құтты болсын! 
 Елдің берекесі бірлікте. Кешегі Референдумда да Қызылорда облысының екінші тұғырға көтерілгені бірліктің нәтижесі еді. Бүгін ел намысын ер көтерген күн болды. Қуанышқа құшақ толатын мерейге жеттік. 
 Ұлттық күрестің ұлық жолы -«Қазақстан барысы» балуандар сайысында жерлесіміз Мақсат Исағабылов бас жүлдені қанжығаға байлап, Сыр елінің абыройын асқақ етті. Жарайсың, жампозым! 
 Ел рухын биік ұстаған Мақсат бауырымды барша Сыр жұртының атынан елеулі жеңісімен құттықтаймын! Жығылмаған жауырынның жеңісі құтты болсын! 
 Сыр елінің абыройы асқақ, мәртебесі биік болғай!», – делінген аймақ басшысының құттықтауында.
</blockquote>

Аймақ басшысы «Қазақстан барысы» турнирінің жеңімпазы Мақсат Исағабыловты құттықтады

<a href="https://kyzylorda-news.kz/">Kyzylorda-news.kz.</a>&nbsp; Қызылорда облысы бойынша ҚАЖ департаментінің&nbsp; ЗК-169/5 мекемесінде кәсіптік-техникалық колледжін бітірушілерге диплом табысталып, 37 жазасын өтеуші С.Ықсанов атындағы Қызылорда құрылыс және бизнес колледжінің дипломын алды. Диплом алған 37 сотталғанның&nbsp; 18-і &nbsp;«Ағаш ұстасы және паркет жұмыстарының шебері», 19 сотталғанға «Құрылыс әрлеу жұмыстарының шебері» біліктіліктері берілді.
Салтанатты шараға С.Ықсанов атындағы Қызылорда құрылыс және бизнес колледжінің мұғалімдері қатысып,&nbsp; алған дипломдарын игі кәдеге жаратуларына тілектерін білдіріп, білімділігімен көзге түскен бірнеше сотталғанды марапаттады. Және де &nbsp;сотталғандарға білім беруге жан-жақты көмек көрсеткені үшін мекеме басшылығына алғысын білдірді.
<blockquote>
 «Ағаш ұстасы және паркет жұмыстарының шебері» мамандығы бойынша білім алған Алмат ҚР ҚК-нің 188-бабының 3- бөлігінің 3- тармағымен кінәлі&nbsp; деп танылып 6 жылға сотталған.&nbsp; «Өзімнің жасаған іс-әрекетіме өкінемін. Ата-анамды тындамай бұзақы боп өстім. «Білім алудың ерте –кеші жоқ екендігін түсініп,&nbsp; білім алуға өтініш беріп, міне бүгін &nbsp;47 жасымда диплом алдым. Босап шыққан соң қоғамға өз пайдамды тигізетін боламын »,- деді жазасын өтеуші. &nbsp;
</blockquote>
Мекеме бастығының орынбасары&nbsp; Б.Наурызбаевтың айтуынша&nbsp; түзеу мекемесіне жазасын өтеуге жіберілген әрбір сотталғанның&nbsp; жаза мерзімі аяқталғанша олармен тәрбиелік жұмыстар жүргізілуімен қатар, кәсіптік &nbsp;білім алуына да мүмкіндік беріледі. Мекемеде кәсіптік-техникалық колледждің филиалы&nbsp; ашылғанына 8 жыл ішінде 300-ден астам сотталған әр түрлі мамандық иесі атанған.
<img src="https://kyzylorda-news.kz/wp-content/uploads/2022/07/whatsapp-image-2022-07-01-at-11.57.20.jpeg" alt="" />

Қызылордада 37 жазасын өтеушіге диплом табысталды

<a href="https://kyzylorda-news.kz/">Kyzylorda-news.kz.</a> Қазалы ауданында жас кәсіпкерлердің бизнес форумы өтті. Форумның негізгі мақсаты – кәсіпкерлікті дамыту бойынша жастарымызға бағыт-бағдар беру, олардың кәсіпкерлікке деген ынтасын арттыру болып табылады.
Қазалы қаласындағы Жастар үйінде ұйымдастырылған форумға «GOSAUDA» халықаралық интернет-дүкенінің Ақтөбе облысы бойынша өңірлік жетекшілері Қуаныш Сұлтанов және Жәнібек Жексенбаев, аудандық мәслихат хатшысы Бақытжан Жарылқап, аудандық қоғамдық кеңес төрағасы Талайлы Бөріқұлақов, аудандық мәслихат депутаты, аймақтық «Тұран Қазалы» газетінің бас редакторы Ғазиз Әліш, аудандық «Қазалы» газетінің бас редакторы Есет Табынбаев және жас кәсіпкерлер көптеп қатысты.
Ауқымды шараны алғы сөз сөйлеп ашқан аудан әкімі Мұхтар Оразбаев Қазалыда тіркелген 5292 кәсіпкерлік субъектілерінің ішіндегі 15,7 пайызы жастардың үлесінде екенін атап өтті.
<blockquote>
 «Алдыңғы жылмен салыстырғанда жас кәсіпкерлер қатары 11,7 пайызға артқан. Бұл бізді қуантады. Бірақ, облыстағы кәсіпкерлігі дамыған аудан үшін бұл бізге аздық етеді. Сондықтан Мемлекет басшысы Қасым-Жомарт Тоқаевтың жаңа кезеңге – жаңа реформалармен жетуге айқындап берген жаңа бағыттарға біз бірігіп, барлық қиындықты еңсеріп, көздеген мақсатымызға қол жеткізуіміз қажет», – деді Мұхтар Әуесұлы.
</blockquote>
Жас кәсіпкерлер форумына арнайы шақырылған «GOSAUDA» халықаралық интернет-дүкенінің Ақтөбе облысы бойынша өңірлік жетекшісі Қуаныш Сұлтанов өзінің бастамаларымен таныстырып, интернет-дүкеннің тиімді тұстарын айтып берді.
Мұнан соң кезек ұсыныс-пікірлерге беріліп, жас кәсіпкерлердің сұрақтарына халықаралық интернет-дүкеннің Ақтөбе облысы бойынша өңірлік жетекшісі Қуаныш Арыстанбекұлы жауап берді.
Форум барысында жеке кәсіпкер, «Рауан» инклюзивті балабақшасының меңгерушісі Қуанышгүл Дәулетиярқызы, аудандық қоғамдық кеңес төрағасы Талайлы Бөріқұлақов сөз сөйлеп, өз пікірлерін жеткізді.
Сондай-ақ, өз кәсіптерін дөңгелентіп отырған бірқатар жас кәсіпкерлер аудан әкімінің «Алғыс хаттарымен» марапатталды.
Әлемдік экономикалық дамуда шағын және орта бизнестің үлесі мол. Сондықтан да ілгерілеуге бағыт ұстаған елдер кәсіпкерлікті мейлінше дамытуға тырысады. Мұны шағын және орта бизнес нысандарының саны артып, экономикалық әлеуетіміздің жыл өткен сайын нығайып келе жатқаны да дәлелдейді.Бұл бағытта жастарға мол сенім артылатыны да жасырын емес. Алғыр ойлы, істің тетігін білетін жастар елдің ертеңі екені сөзсіз. Әрине, бұл бағытта олардың өзара тәжірибе алмасып, ортақ ойласуының да маңызы зор. Осы тұрғыдан келгенде Қазалы қаласында өткен жас кәсіпкерлердің бизнес форумы нәтижелі болды.
<img src="https://kyzylorda-news.kz/wp-content/uploads/2022/07/291564177_3394067910814132_822383470453102517_n.jpg" alt="" />
<img src="https://kyzylorda-news.kz/wp-content/uploads/2022/07/291467527_3394067570814166_1875628403156381173_n.jpg" alt="" />

Қазалыда тіркелген кәсіпкерлік субъектінің  15,7 пайызы жастардың үлесінде

<a href="https://kyzylorda-news.kz/">Kyzylorda-news.kz.</a> Өзбекстан президенті Шавкат Мирзиёев тәртіпсіздіктер орын алған Нүкіс қаласына барып, Қарақалпақстан Жоғарғы Кеңес депутаттарымен кездесті, деп хабарлайды&nbsp;<a href="https://stan.kz/">Stan.kz</a>.&nbsp;
Парламент депутаттары және Қарақалпақстан халқының алдында сөз сөйлеген президент конституциялық заң жобасы жалпыхалықтық талқылаудан өтіп, кейін одан әрі жетілдіру үшін заң шығарушы органға өтетінін айтты. Тек осыдан кейін ғана жоба республикалық референдумға шығарылып, бұл сауалға қатысты халықтың еркін дауыс беретінін мәлімдеді.&nbsp;
<blockquote>
 «Осыдан соң Өзбекстан Республикасының конституциясына өзгерістер мен толықтырулар енгізіледі», – деп атап өтті Мирзиёев.
</blockquote>
Оның сөзінше, ел халқының парызы – бірлік пен бейбітшілікті, тұрақтылықты сақтау.&nbsp;
<blockquote>
 «Конституциялық реформаның басты мақсаты – осы. Біз бірге міндетті түрде Жаңа Өзбекстан мен Жаңа Қарақалпақстанды құрамыз. Осы бағыттағы барлық&nbsp;реформалар мен талқылаулар тек демократиялық жолмен іске асуы керек», – деп қосты ол.
</blockquote>
Сондай-ақ Өзбекстан президенті Қарақалпақстан Республикасының құқықтық мәртебесі өзгеріссіз қалуы керек деп санайтынын айтты.

Қарақалпақстандағы жағдай: Мирзиёев «Жаңа Өзбекстанды» құруға уәде берді

<a href="https://kyzylorda-news.kz/">Kyzylorda-news.kz.</a> 9 шілде – Құрбан айт мерекесінің бірінші күні.
Құрбан айт – мұсылмандардың жыл сайын атап өтетін қасиетті діни мерекесі. Биыл Құрбан айттың бірінші күні – 9 шілде сәйкес келеді. Бұл туралы бүгін Қазақстан мұсылмандары діни басқармасының төрағасы Наурызбай қажы Тағанұлы бұқаралық ақпарат құралдары өкілдеріне берген сұхбатында мәлімдеді.
«Һижри жыл санауы бойынша 1443 жылдың зұлхижжа айының басталуы 30 маусым болып бекітілді. Ал арапа күні 8 шілдеге сәйкес келеді. 9 шілде – Құрбан айт мерекесінің бірінші күні.
Зұлхижжа айының алғашқы он күнінде барынша ықыласпен ғибадат етіп, көбірек ізгі істер мен жақсы амалдар жасауға тырысу керек. Өйткені, хадистерде сол уақытта орындалған игі істердің сауабы еселеніп жазылатыны айтылған.
Ал арапа күні ораза тұту – сүннет. Ардақты Пайғамбарымыз Мұхаммед (оған Алланың салауаты мен сәлемі болсын): «Арапа күні ораза ұстау арқылы Алладан өткен және келесі жылдың күнәсін кешіруді үміт етемін», – деген.
Құрбан айт намазынан кейін үш күн ішінде жағдайы келген мұсылманға құрбандық шалу – міндет. Алла Тағала қасиетті Құранда: «Раббыңның разылығы үшін намаз оқы және құрбандық шал» («Кәусар» сүресі, 2-аят) деп бұйырған.
Алла Тағала елімізге амандық, жұртымызға тыныштық бергей. Ізгі ниетпен шалатын құрбандығымыз, қажылық сапарында жүрген жерлестеріміздің қажылығы қабыл болғай. Әмин!» деп атап өтті Наурызбай қажы Тағанұлы.

Құрбан айт мерекесі қай күнге белгіленген?

<a href="https://kyzylorda-news.kz/">Kyzylorda-news.kz.</a> Бүгінде жастар қарап отырмай, жеке кәсіпті ұршықша иіруде. Оған қуану керек, оларды қолдау керек. Ондай азаматтар өзінің жағдайын жасап қоймайды, жұртқа жұмыс береді, бюджетке қаржы түсіреді. Елдің сұранысын қанағаттандырады. Осындай азаматтардың бірі –жеке кәсіпкер Әсет Әзілханов.
Аудан әкімі Мұхтар Оразбаев Қазалы қаласына арнайы барып, жеке кәсіпкердің жұмысымен танысты.
Жеке кәсіпкер Әсет Әзілханов құрылыс жұмыстарына қажетті газоблок шығарумен айналысады. Бұл өнім ұзаққа төзімді, өртке қауіпсіз, экологиялық таза, жылуды сақтайтын, аз ғана үлес салмағы бар, түрлі өңдеулерге ыңғайлы құрылыс материалы.
Өз кәсібін осыдан бірнеше жыл бұрын жеңілдетіп несие алып бастаған. Әзірге өнімді жеке үй-жай салып жатқан азаматтар мен түрлі ғимараттар құрылысын жүргізіп жатқан құрылысшылар тапсырыспен алдырып жатыр. Өзіне қажетті құрал-жабдықтарды Қызылорда қаласынан алдырған. Алдағы уақытта тағы да қаржы көздерін қарастырып, ксәбін кеңейткісі келеді. Бүгінгі таңда өзінен бөлек 3 адамды жұмыспен қамтып отыр.
Аудан әкімі Мұхтар Оразбаев жеке кәсіпкердің жұмысына сәттілік тілеп, жұмыс жасауға ниетті азаматтарға әрдайым қолдау көрсетуге дайын екендігін жеткізді.

Қазалы қаласында газоблок шығаратын шағын цех жұмыс істеп тұр

<a href="https://kyzylorda-news.kz/">Kyzylorda-news.kz.</a> Ұлыбританияның Бирмингем қаласында Еуропадағы Қауіпсіздік және Ынтымақтастық Ұйымы Парламенттік Ассамблеясының жазғы сессиясы өз жұмысын бастады. Оған Қазақстан Республикасы Парламентінің делегациясы қатысты, деп хабарлайды ҚазАқпарат.
ЕҚЫҰ ПА Тұрақты комитетінің отырысы барысында Қазақстан делегациясын бастаған Асқар Шәкіров пен Өзбекстан делегациясын бастап келген Садық Сафоев ұйымды және оған мүше мемлекеттерді Арал теңізін құтқару жөніндегі жобаларды іске асыруға донор болуға шақырып, екі ел парламенттерінің бірлескен үндеуін жария етті.
Сессияға қатысушыларға таратылған құжатта соңғы 60 жылда ең ауқымды жабық су айдынының бұрын-соңды болмаған көлемде азаюына және сортаңдануына назар аударылды.
Шаңды дауыл жыл сайын 100 миллион тоннадан астам майда тұзды шаңды, улы тұз бен құмды мыңдаған шақырымға әкетеді. Оны Еуропа елдеріне, Жапон аралдары мен Антарктидаға жеткізіп, мұздықтардың еруі мен мұхит деңгейінің жоғарылауы себептерінің біріне айналып отыр.
Онкологиялық аурулар ең жоғары пайызды көрсетіп отырған Орталық Азиядағы Арал өңірі халқының денсаулық жағдайының күрт нашарлауына тұрғылықты жердің экологиялық азып-тозуы себеп болғаны атап өтілді.
Экологиялық апаттың ауқымы Арал теңізі бассейніндегі әлеуметтік-экономикалық және экологиялық ахуалды сауықтыру жөніндегі проблемаларды кешенді шешу үшін өңірдегі елдердің ғана емес, бүкіл халықаралық қоғамдастықтың күш-жігерін біріктіру талап ететіні атап өтілді.
Қазақстан мен Өзбекстан көшбасшылары Қасым-Жомарт Тоқаев пен Шавкат Мирзиеев осындай ортақ пікірге шақыруда.
Қазақстан делегациясы сессия аясында «Құбылмалы әлем және қазіргі заманғы сын-қатерлер жағдайында Жаңа Қазақстанды құру» тақырыбы бойынша сайд-ивент ұйымдастырды.
Оның барысында Қазақстанның ішкі және сыртқы саясатына байланысты негізгі оқиғалар туралы парламенттік қоғамдастық хабардар етілді.
Парламент депутаттары Қазақстан мемлекеті басшысының ауқымды саяси және әлеуметтік-экономикалық реформаларын іске асыру, «Жаңа Қазақстанды» қалыптастыру үшін берік негіз қалаған ҚР Конституциясына өзгерістер енгізу жөніндегі жалпыұлттық референдумның қорытындыларын жан-жақты таныстырды.
Парламенттің рөлін күшейту, сайлау жүйесін жетілдіру, саяси бәсекеге қабілеттілік үшін жағдай жасау, құқық қорғау тетіктерін дамыту мәселелері басты назарда болды.
Кездесуге қатысушылар айтылған ақпаратқа ықылас білдірді және Қазақстанда жүргізіліп жатқан өзгерістер қолдау тапты.
Орталық Азия елдері мен Моңғолияның делегациялары ЕҚЫҰ ПА Орталық Азия бойынша арнаулы өкілі Пиа Каумамен кездесті, онда Қазақстанның өңірлік ынтымақтастық және өзекті халықаралық проблемалар жөніндегі ұстанымы жария етілді.
Сессия шараларына сенаторлар Ғұмар Дүйсембаев, Қайрат Қожамжаров, Дүйсенғазы Мусин, Мәжіліс депутаттары Айгүл Құспан, Айдос Сарым, сондай-ақ Қазақстан Республикасының Ұлыбританиядағы Елшісі Ерлан Ыдырысов қатысты.
<img src="https://kyzylorda-news.kz/wp-content/uploads/2022/07/220704091122325e-1.jpg" alt="" />

ЕҚЫҰ Парламенттік Ассамблеясында Арал теңізінің проблемалары талқыланды

Kyzylorda-news.kz. Бүгін елордада өткен республикалық «Қазақстан барысы» турнирінде қызылордалық Мақсат Исағабылов чемпион атанды.
Ол финалда маңғыстаулық Нұрдәулет Жарылғаповпен кездесті. Нәтижесінде Мақсат қарсыласын жеңіп, биылғы турнирдің жеңімпазы атанды.
Мақсат Исағабылов 1994 жылдың 17 қарашасында Қызылорда облысында дүниеге келген. Бойы 184 сантиметр болса, салмағы 120 келі.
Бұған дейін қазақ күресінен халықаралық дәрежедегі спорт шебері атанған.
Оған 25 миллион теңге ақшалай сыйлық, алтын белбеу және алтыннан құйылған «тайтұяқ» берілді.
Ал екінші орын иегері Нұрдәулет Жарылғаповқа 5,5 миллион теңге мен күміс белбеуге қол жеткізді.
Турнир барысында қола жүлдеге жамбылдық Ғалымжан Қырықбаев қол созып, 1,8 миллион теңге мен қола белбеуге ие болды.
<a href="https://www.inform.kz/kz/kyzylordalyk-maksat-isagabylov-kazakstan-barysynyn-zhenimpazy-atandy_a3950847">ҚазАқпарат</a>

Қызылордалық Мақсат Исағабылов «Қазақстан барысының» жеңімпазы атанды

Kyzylorda-news.kz. Бүгін елордада республикалық «Қазақстан барысы» турнирі өтіп жатыр.
Турнир «Барыс-арена» мұз сарайында елорда уақытымен 13:00-де басталып, «Qazaqstan» мен «Qazsport» телеарналарынан тікелей эфирде көрсетілуде.
Турнир жеңімпазына 25 миллион теңге ақшалай сыйлық, алтын белбеу және алтыннан құйылған «тайтұяқ» беріледі. Ал екінші орын иегері 5,5 миллион теңге мен күміс белбеу, қола жүлдегер 1,8 миллион теңге мен қола белбеуге қол жеткізеді.
Биылғы бәсекеге Жамбыл облысынан Бейбіт Ыстыбаев қатысады деп күтілуде. Ол аталған турнирде 2012, 2015 және 2016 жылдарда жеңімпаз атанған болатын. Ал екі мәрте жеңіс тұғырынан көрінген Айбек Нұғымаров биыл спорттық мансабын аяқтағанын жариялады. Сондай-ақ, өткен жылы «Қазақстан барысы» атанған Дәурен Нұралинов алған жарақатына байланысты жарысқа қатыса алмайтынын жария етті.
Турнирде биыл мамандар Мұхит Тұрсынов пен Еламан Ерғалиев бас жүлдеден үміткер ретінде санайды. Мұхит 2014, Еламан 2017 жылы жеңіс тұғырына көтерілген еді. 2019 және 2021 жылдарда күміс жүлдегер атанған Ерасыл Қажыбаев пен Ғалымжан Қырықбай да қатысады.
Турнир барысында барлығы 36 балуан сынға түседі.

Елордада республикалық «Қазақстан барысы» турнирі өтіп жатыр

Kyzylorda-news.kz. Маусым айының аяғынан бастау алған атаулы күнге арналған домбыра шерулері ауыл, аудандарда басталып кеше қалада өткізілді. Өңірдің барлық аудандарынан жиналған өнер саңлақтарының қатысуымен негізгі көпшілік шара Сырдың бас алаңында жалғасын тапты.
Қазақы дәстүрмен безендірілген сахнада облыстың белгілі өнер ұжымдары, жыршы-термешілер, домбыра шеберлері əн-күй төкті. Оркестрдің орындауымен күй атасы Құрманғазының “Сарыарқа” күйімен ашылған салтанатты шараға қатысқан облыстық Мәслихат хатшысы Наурызбай 
Байқадамов өз сөзінде рухани жаңғырудың нағыз үлгісі – домбыраны ұлықтау екенін, алғаш эпикалық дәстүр шеңберінде жыр, толғау, термелерді сүйемелдеуге қолданылған домбыра кейін аспаптық шығарма — күй жанрының қалыптасуына ықпал еткенін, ал жыр мен толғау, терме Сыр сүлейлерінен бастау алғанын айтты.
Мәдениет және спорт басқармасы ұйымдастырған концерт барысында облыстың өнер ұжымдары Түркештің “Көңілашар”, Әлшекейдің “Терісқақпай”, М.Сыдықовтың “Батыр баба”, “Күй-тартыс”, Ә.Райымбергеновтің “Секіртпе” күйлерін күмбірлетсе, әншілеріміз ұлттық музыкалық аспабымыз – домбыраны әуелеген әндеріне арқау етіп, домбыраның қос ішегіндей тартылған мың бұралған бишілер көрермендерге тамаша демалыс сыйлады.
Ұлттық саз өнерінің темірқазығына айналған Құрманғазы Сағырбайұлының күйімен бастау алған шара күйшінің “Махамбет” атты туындысымен қорытындыланды.
<img src="https://kyzylorda-news.kz/wp-content/uploads/2022/07/fb_img_1656827354325.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656827360870.jpg" alt="" />
<img src="https://kyzylorda-news.kz/wp-content/uploads/2022/07/fb_img_1656827365214.jpg" alt="" />

Ұлттық домбыра күні Сыр бойында кең көлемде аталып өтуде

Kyzylorda-news.kz. Мемлекет басшысы Қасым-Жомарт Тоқаев қазақстандықтарды Ұлттық домбыра күнімен құттықтады, деп хабарлайды Ақорда.
***
Құрметті отандастар!
Баршаңызды Ұлттық домбыра күнімен шын жүректен құттықтаймын!
Бұл – еліміз үшін ерекше мейрам. Оны ел болып атап өту арқылы халқымыздың рухын көтеріп, танымын арттырамыз. Сондай-ақ, ұлы дала дәстүрлерін жас ұрпақтың санасына сіңіріп, төл өнеріміздің құдіретін танытамыз.
Шын мәнінде, қазақтың қара домбырасы – ұлтымыздың бойтұмары. Оның үні әрқайсымыздың жүрегімізге жақын. Өйткені, қазақ пен домбыра – бір-бірінен бөліп қарауға болмайтын егіз ұғым. Академик Ахмет Жұбанов «Домбыра – көшпелі елдің көнекөз шежіресі» деп бекер айтпаған. Қастерлі аспаптың қос ішегіне халқымыздың бүкіл болмысы сыйып тұр.
Сонау Кетбұғадан бері жалғасып келе жатқан дәулескер күйшілеріміздің мол мұрасы – баға жетпес рухани байлығымыз. Біз төл өнерімізді дәріптеу арқылы асыл құндылықтарымызды ұлықтай түсеміз.
Қазір Жаңа Қазақстанды құруға кірістік, ұлттың жаңа сапасын қалыптастыруды қолға алдық. Өркениетті ел болу үшін жаңа дәуірдің жақсы үрдістерін бойға сіңіру жеткіліксіз. Сонымен бірге, салтымызды сақтап, еңбекқорлық құндылықтарын кеңінен дәріптеп, бабалар жолын берік ұстанамыз.
Ендеше, жұртымызбен бірге домбыра да мәңгі жасайды. Күй өнері азаттық рухын ұрпақтан ұрпаққа жалғастырады.
Домбыра әр шаңырақтың төрінде тұрсын!
Еліміздің мерейі тасып, абыройы асқақтай берсін!

Қазақстан және Қызылорда облысының жаңалықтары