<a href="https://kyzylorda-news.kz/">Kyzylorda-news.kz.</a> Біріңғай конкурстық комиссияның 2022 жылғы 30 маусымдағы қорытынды шешіміне сәйкес, Жаңақорған ауданы әкімінің өкімімен аудан әкімінің орынбасары лауазымына Бектас Балғабайұлы Нуридинов тағайындалды.
Бектас Балғабайұлы – 1976 жылы 15 маусымда Қызылорда облысы, Қазалы ауданында дүниеге келген. Қызылорда политехникалық институтын «Бухгалтерлік есеп және аудит» мамандығы бойынша бітірген. Алғашқы еңбек жолын 1997 жылы Қызылорда қаласының Салық бөлімінде аға маман ретінде бастаған.
1999 – 2006 жылдары Қызылорда облысы бойынша Салық комитетінің, аға салық инспекторы, бөлім бастығы, басқарма бастығы; 
2006 – 2009 жылдары Жаңақорған ауданы бойынша салық комитетінің басқарма бастығы; 
2009 – 2010 жылдары Қызылорда облысы бойынша Салық департаментінің, басқарма бастығы; 
2010 – 2015 жылдары Арал ауданы бойынша Салық басқармасының бастығы; 
2015 – 2018 жылдары Қызылорда облысы бойынша мемлекеттік кірістер басқармасы басшысының орынбасары;
2018 – 2022 жылдары Қызылорда қаласы әкімінің орынбасары қызметін атқарса, 2022 жылдың мамыр айынан бастап осы кезге дейін Қызылорда облысының жұмыспен қамтуды үйлестіру және әлеуметтік бағдарламалар басқармасының ардагерлермен жұмыс бөлімінің басшысы лауазымын абыроймен атқарды.
Енді Бектас Балғабайұлы білім, денсаулық сақтау, ішкі саясат, мәдениет және спорт салаларына жетекшілік ететін болады.
Мемлекеттік қызметте тәжірибесі мол, білікті басшы ретінде жауапты қызметтерді атқарған Бектас Балғабайұлы алдағы міндеттерін де абыроймен атқарады деген сенім мол.

Бектас Нуридинов жаңа қызметке тағайындалды

<a href="https://kyzylorda-news.kz/">Kyzylorda-news.kz.</a>&nbsp; Денсаулық сақтау министрі Ажар Ғиният Қазақстанда коронавирус жұқтырғандардың көбейіп бара жатқанына алаңдаушылық білдірді, деп хабарлайды Sputnik Қазақстан. 
Үкімет кулуарында журналистер министрден індеттің қайта өршуіне байланысты Қазақстанда карантин күшейтілуі мүмкін бе деп сұрады.
<blockquote>
 “Бұл аурудың дамуына, өршуіне және вирустың мутациясына байланысты болады. Қазір біз әрбір келген вирустың түрін анықтап отырмыз. Соған байланысты шаралар қолданылады”, – деді Ғиният.
</blockquote>
Министрдің айтуынша, осы айда вирус жұқтырғандардың көбейгені байқалып отыр. Ғиният былтыр да, оның алдыңғы жылдары да коронавирус өскенін атап өтті. Яғни, бұл инфекциялық аурудың маусымдық өсімі.
Ол денсаулық сақтау министрлігі барлық сценарийге дайын екенін мәлімдеді.
<blockquote>
 “Біз барлық сценарийге дайынбыз. Бұрындары тәулігіне 16 мыңнан астам ауру тіркелген болатын, біз оны да еңсердік. Қазір тәулігіне 187 жағдай тіркеліп отыр. Барлық денсаулық сақтау ұйымдары коронавируспен күресуге дайын”, – деді Ғиният.
</blockquote>
Алматы мен Нұр-Сұлтандағы вирус жұқтырған адамдардың эпидемиологиялық анамнезін қарағанда, тек 5 пайызы ғана шетелден келген немесе шетелден оралған адамдармен қарым-қатынаста болған.
<blockquote>
 “Яғни бүгінгі таңда ауру ел ішінде таралып отырғаны белгілі болды. Сол себепті әзірге біз шетелден келгендерді ПТР-тестпен кіргізу бойынша шара қабылдауды қарастырып жатқан жоқпыз”, – деді ол. 
 Ғиният елде бүгінгі таңда ұжымдық иммунитет бар екенін мәлімдеді. 11 миллионнан астам адам вакцина салдырса, бес миллионға жуығы ревакцинация жасатқан. 
 “Сондықтан қазір біз қатаң шектеу шараларын енгізбейміз. Тек жұрт көп жиналатын орындарда, әсіресе сауда орталықтары, әуежай, ұшақ, теміржол вокзалдарында маска киюге кеңес береміз”, – деді министр.
</blockquote>
Айтуынша, соңғы екі айда тәулігіне орташа есеппен 10 адам егіледі. Жазғы демалысқа байланысты қазақстандықтар жиі вакцина салдыратын болған. Вакцина қоры екі млн дозаны құрайды.

Коронавирус қайта өрши бастады: Карантин енгізілуі мүмкін бе?

<a href="https://kyzylorda-news.kz/">Kyzylorda-news.kz.</a> Жуырда Бахрейн мемлекетінің астанасы – Манама қаласында өткен жасөспірімдер арасындағы Азия біріншілігінде аралдық Алпамыс Болатұлы мен Әмірмұхаммед Кабулов&nbsp; грек-рим күресінен&nbsp; Азия чемпионы атанды.
№19 Арал ауданының олимпиадалық резервтің мамандандырылған балалар-жасөспірімдер мектебінің&nbsp; спортшылары байрақты бәсекеде ел мерейін тасытты. Жастайынан спортпен айналысқан өрендер құрлықтық додадан осылайша құр қайтқан жоқ. Қос балуанның жеңіс тұғырынан көрінуіне Талғат Қожекенов, Бахтияр Төлебаев, Ардақ Таңатаров сынды бапкерлер үлес қосты. Сондай-ақ, ел құрамасының&nbsp; аға жаттықтырушысы Алмат Кебісбаевтың да еңбегі зор.
<img src="https://kyzylorda-news.kz/wp-content/uploads/2022/07/289587954_3304702399858123_5912312591977795750_n.jpg" alt="" />

Аралдық спортшылар Азия чемпионы атанды

<a href="https://kyzylorda-news.kz/">Kyzylorda-news.kz.</a> Өткен тәулікте коронавирус инфекциясын жұқтырған 187 жағдай тіркелді. Бұл туралы Денсаулық сақтау министрлігі хабарлайды.
Оның ішінде Нұр-Сұлтан қаласында – 37, Алматы қаласында – 112, Шымкент қаласында – 8, Алматы облысында – 7, Атырау облысында – 10, Жамбыл облысында – 4, Батыс Қазақстан облысында – 1, Қарағанды облысында – 7, Қызылорда облысында – 1 адамнан коронавирус анықталды.
Елімізде коронавирус инфекциясын жұқтырғандар саны 1 307 517 құрады.

Қызылордада өткен тәулікте коронавирус тіркелді

<a href="https://kyzylorda-news.kz/">Kyzylorda-news.kz.</a> Қазіргі таңда Қызылорда қалалық пробация қызметінің есебінде 600-ге жуық сотталған есепте тұр.
Аймақтағы Қылмыстық атқару жүйесі департаментінің мәліметінше, олардың ішінде кәмелет жасқа толмағандар мен әйелдер де бар. Пробация қызметінің есебіндегі сотталғандардың қоғамда өзін шет сезінбей, бейімделуі үшін ұдайы профилактикалық жұмыстар жүргізіледі. Осындай шараларға қарамастан, жазасын өтеу тәртібін өрескел бұзатын сотталғандар кездеседі.
<blockquote>
 «Есептегі азаматтар арасында сот жүктеген міндеттерді орындамай, пробация инспекторларының ескертулеріне құлақ аспаған азаматтардың істері пробация қызметінің ұсынысы негізінде сотқа жолданады. Сот қаулысымен оның жазасының өтелмеген бөлігі бас бостандығынан айыру жазасына ауыстырылып, түзеу мекемесіне жіберіледі. Жыл басынан бері Қызылорда қалалық пробация қызметі бақылауға алған 15 сотталған жазасын өтеу тәртібін қасақана бұзғаны үшін жеке іс-құжаттары сотқа жіберілді. Сот қаулысымен 6 азаматтың жазасының өтелмеген бөлігі бас бостандығын айыруға ауыстырылып, қамаққа алынды. Ал қалған сотталғандардың іс-құжаттары сотпен қаралуда», – дейді қалалық пробация қызметінің бастығы әділет майоры Жалғас Есмаханов.
</blockquote>

Қызылордада жаза өтеу тәртібін бұзған пробация есебіндегі 6 азамат түзеу мекемесіне жіберілді

<a href="https://kyzylorda-news.kz/">Kyzylorda-news.kz.</a>&nbsp; Қазақстанда жылдық мөлшерлемесі 11-12% болатын жаңа ипотекалық бағдарламаны іске қосу жоспарланып отыр. Бұл туралы “Бәйтерек” ҰБХ” АҚ басқарма төрағасы Қанат Шалапаев мәлімдеді, деп хабарлайды Sputnik Қазақстан.
Оның айтуынша, зейнетақы жинағының баспанаға жұмсауға болатын шекті мөлшерінің өсуіне және келесі жылы “7-20-25” бағдарламасының аяқталуына байланысты 500 млрд теңге ипотекаға немесе 35 мың пәтерге деген сұраныс төмендейді болжанып отыр.
<blockquote>
 “Жеке құрылыс салушылардың коммерциялық тұрғын үйді сату жылдамдығы айтарлықтай төмендеуі мүмкін. Сұраныстың өтелмеуіне жол бермеу мақсатында халық үшін екінші деңгейлі банктердің нарықтық ипотекасы бойынша сыйақы мөлшерлемесін субсидиялау тетігін іске қосу ұсынылады”, – деді Шалапаев үкімет отырысында.
</blockquote>
Қазақстан Қаржыгерлер қауымдастығы жүргізген келіссөздер нәтижесінде мынадай базалық шарттар ұсынылып отыр: 
бастапқы жарна 20 пайыздан басталады; 
кредит беру мерзімі 20 жылға дейін; 
-қарыздың ең жоғарғы сомасы 35 миллион теңгеге дейін; 
-төлем қабілеттілігін міндетті түрде растау қажет.
Шалапаевтың айтуынша, Ұлттық банктің базалық мөлшерлемесінің деңгейінен 5%-тен аспайтын ипотека бойынша сыйақы мөлшерлемесінің 7% субсидияланады.
Екінші деңгейлі банктер өз қаражаты есебінен құрылыс салушылардың бастапқы тұрғын үйіне және Қазақстан тұрғын үй компаниясының кепілдігімен қамтамасыз етілген салынып жатқан тұрғын үйге қарыз бере алады.
<blockquote>
 “Осы бағдарламаны іске қосу үшін заңнамалық өзгерістер қажет емес. Қазіргі уақытта бюджеттік өтінім қаржы министрлігінің қарауында. Бюджет мақұлданғаннан кейін, Қазақстандық тұрғын үй компаниясы осы бағдарламаны дереу іске қосуға дайын”, – деді Шалапаев.
</blockquote>
Үкімет отырысында көрсетілген слайд бойынша субсидиялау талаптары: 
субсидиялау ставкасы – 7%, 
ипотека бойынша ставка – Ұлттық банктің базалық ставкасы + 5%-ке дейін 
субсидиялау мерзімі – 10 жыл; 
қарыз алушы үшін соңғы ставка – жылдық 11-12%.

Қазақстанда жаңа ипотекалық бағдарлама іске қосылмақ

<a href="https://kyzylorda-news.kz/">Kyzylorda-news.kz.</a>&nbsp; Қaзaқтың ұлттық аспабы – дoмбыpaның мaңыздылығы epeкшe бағаланып, елімізде шiлдe айының aлғaшқы жeкceнбiсі «Ұлттық дoмбыpa күнi» болып белгіленді.
Атаулы мерекеге орай аудан орталығындағы демалыс саябағында домбыра үлгісіндегі символикалық белгінің ашылу рәсімі өтті.
<blockquote>
 «Қазақ халқымен сан ғасырдан бері егіздің сыңарындай қатар жасасқан асыл жәдігері ол – қасиетті қара домбыра. Атадан балаға аманат болған осындай асыл қазынамызды қадір тұту – бәріміздің қасиетті борышымыз. Жоралы жұртымыздың қатпар-қатпар тарихынан, асу да асу кезеңінен сыр шерткен күй-толғау, сыңғырлы сұлу ән-әуен құлағымыздан кетпесін! Әр шаңырақтан ән-күй үзілмесін! Домбыра күні мерекесі құтты болсын!» – деді мерекелік шараға қатысқан аудан әкімі С. Сермағамбетов.
</blockquote>
Шара барысында ұлы өнерді кейінгі ұрпаққа ұлықтау мақсатында аянбай еңбек етіп жүрген бірнеше белігілі күйлердің авторы, асыл мұраның жанашыры, күйші-композитор Мұрат Сыдықов пен күй қазынасын өскелең ұрпаққа мұра еткен күйші, 25-ке тарта күйді дүниеге әкелген – сазгер Жұмабай Жақып аудан әкімінің құттықтауымен марапатталып, қазақы дәстүрмен шапан жабылды.
Мерекелік жиынға арнайы келген Мәжіліс депутаты Геннадий Шиповских қазақ үшін қасиеті мол қара домбыра ұлықталған шараның маңызына тоқталып, өскелең ұрпақ үшін мәні зор игілікті іске куә болғандығына қуанышты екендігін жеткізіп, барша аралдықтарды мерекемен құттықтады. 
Одан соң, ҚР – ның Еңбек сіңірген қайраткері, ҚР ның мадениет қайраткері, Қазақстан композиторлар одағының мүшесі, «Құрмет» орденінің иегері, Арал ауданының «Құрметті азаматы», ақын – жырау, күйші – композитор Мұрат Сыдықов киелі аспаптың құдіреттілігін тарихта болған аңыз-әңгімелер арқылы жиналған жұртшылыққа мәлімдеді.
Ұлттық аспап айрықша ұлықталған тағылымды шарада «Мұраттың төкпесін» күй авторы нақышына келтіре орындаса, күйші-сазгер Жұмабай Жақып тартқан «Қара жорға» күйіне көпшілік ерекше ілтипат білдірді.
Сондай-ақ, сахна төрінде жас домбырашылар Құрманғазының «Балбырауын», «Ерке сылқым» «Адай» , Нұрғисаның «Әлқисса» күйлерін күмбірлетті.
Сонымен бірге мерекелік шарада жыршы-термешілер домбыраны әуелеген әндеріне арқау етіп, жиналған қауымға ерекше әсер сыйлады.
<img src="https://kyzylorda-news.kz/wp-content/uploads/2022/07/291918022_3306286269699736_3071074406139731176_n.jpg" alt="" />
<img src="https://kyzylorda-news.kz/wp-content/uploads/2022/07/291944514_3306286196366410_6260652010134406052_n.jpg" alt="" />
<img src="https://kyzylorda-news.kz/wp-content/uploads/2022/07/291958076_3306286649699698_6569743497893810501_n.jpg" alt="" />

Аралда домбыра үлгісіндегі символикалық белгі қойылды

<a href="https://kyzylorda-news.kz/">Kyzylorda-news.kz.</a>&nbsp; Облыс әкімі Нұрлыбек Нәлібаев балалар жылына тарту ретінде Сыр өңірінде кәсіпкерлердің демеушілігімен аймақта 80-ге жуық спорт-ойын алаңы салынатынын жеткізген еді. Оның Қызылорда қаласында 50-і, аудандарда 30-ы бой көтереді.
Бүгінде игілікті іс Қызылорда қаласынан бастау алды. Жергілікті кәсіпкерлер жаңадан салынатын ойын алаңдарының жер учаскелерін белгіледі. Мәселен, «Корпорация Алем-құрылыс» мекемесі «Бәйтерек» мөлтек ауданы, Бала-мекен елді мекеніндегі ойын алаңының жерін тегістеп, құрылыс-монтаж жұмыстарын жүргізуде. Бұл жұмыстар аудандар да жүргізілмек.
Еске салайық, өткен жылы 25 ойын алаңы пайдалануға берілді. Нысандар қаладағы көпқабатты тұрғын үйлердің аулаларына орналастырылды.
Мұнан бөлек, биыл қалалық бюджеттен қала аумағына 3 ойын алаңын салу жоспарлануда. Бұл нысандарды салуда халықтың сұранысы ескеріледі.
Айта кетейік, тұрғындардың спорт нысандарына қолжетімділігін арттыру мақсатында биыл облыста 7 дене шынықтыру-сауықтыру кешені пайдалануға беріледі.

Қызылордада 80-ге жуық спорт-ойын алаңы салынады

<a href="https://kyzylorda-news.kz/">Kyzylorda-news.kz.</a>&nbsp; Облыс әкімінің орынбасары М. Жайымбетовтің төрағалығымен ағымдағы жылдың І жартыжылдығындағы жол инфрақұрылымын дамыту саласындағы атқарылған жұмыстар қорытындыланды.
Мәжілісте жол саласына жауапты жергілікті мемлекеттік органдардың басшылары, аудан және қала әкімдерінің орынбасарлары, мердігерлер компаниялар мен авторлық және техникалық қадағалаушы мекемелердің басшылары қатысты.
Күн тәртібіндегі мәселе бойынша облыстық жолаушылар көлігі және автомобиль жолдары басқармасының басшысы П. Шамұратов баяндама жасап, саладағы өзекті мәселелерге тоқталды. 
Оның ішінде, биыл іске асырылып жатқан 118 жобаның барысы, атап айтқанда, 12 көпір құрылысы, 292 шақырым жол мен 72 елді мекендегі көшелерге жөндеу жұмыстары баяндалды.
Мәжіліс қорытындысымен облыс әкімінің орынбасары М. Жайымбетов басқарма басшысына, салаға жетекшілік ететін аудан және қала әкімдерінің орынбасарларына, сондай-ақ, мердігер мекеме басшыларына 2022 жылы жоспарланған барлық жобалар жыл аяғына дейін келісім-шартта көрсетілген мерзімде, әрі сапалы аяқталуын тапсырды.
<img src="https://kyzylorda-news.kz/wp-content/uploads/2022/07/291873827_336369905350927_4864667790393385169_n.jpg" alt="" />
<img src="https://kyzylorda-news.kz/wp-content/uploads/2022/07/292049913_336369805350937_933831407523721740_n.jpg" alt="" />
<img src="https://kyzylorda-news.kz/wp-content/uploads/2022/07/292153655_336369795350938_6234002701212670678_n.jpg" alt="" />

Жол инфрақұрылымын дамыту саласындағы жұмыстар қорытындыланды

<a href="https://kyzylorda-news.kz/">Kyzylorda-news.kz.</a>&nbsp; Синоптиктер 5 шілдеге Қазақстанның ауа райы болжамын ұсынды. Сейсенбі күні нөсер жаңбыр, найзағай, бұршақ, жел, шаңды дауыл күтіледі.
Қызылорда облысының&nbsp;басым бөлігінде төтенше өрт қаупі сақталады. +24 градус.

Сейсенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Өзбекстан прокуратурасы Қарақалпақстанда болған тәртіпсіздіктер кезінде қаза тапқан мен жараланған адамдардың санын айтты, деп хабарлайды&nbsp;<a href="https://podrobno.uz/cat/proisshestviya/v-rezultate-volneniy-v-karakalpakstane-pogibli-18-chelovek-v-bolnitsakh-nakhodyatsya-eshche-94-ranen/">Podrobno.uz</a>.
Өзбекстан прокуратурасының мәліметінше, Қарақалпақстандағы халық толқуы кезінде 18 адам қаза тауып, 94 адам жарақат алған.
Ал Қарақалпақcтан&nbsp;автономиясының Денсаулық сақтау министрлігі 243 адам жарақат алғанын, оның ішінде 38 құқық қорғау органдарының қызметкерлері барын айтқан.
Ұлттық ұлан баспасөз қызметінің басшысы Даврон Жұманазаровтың мәліметінше, 1 және 2 шілдеде Нүкүсте болған шерулер кезінде 516 адам ұсталған. Ал 110 азамат 3 шілдеден 4 шілдеге қараған түні коменданттық сағат кезінде көшеде қолға түскен.

Өзбекстан прокуратурасы Қарақалпақстандағы толқулар кезінде қаза тапқандардың санын айтты

<a href="https://kyzylorda-news.kz/">Kyzylorda-news.kz.</a> Қазақстанда онлайн құрбандық шалуға мүмкіндік беретін <a href="https://www.qurban2022.kz/kk/">qurban2022.kz</a> сайты іске қосылды.
Биыл елімізде құрбан шалу рәсімі офлайн және онлайн форматта өтеді.
<blockquote>
 “Діни басқарма ел азаматтарына, әсіресе қала тұрғындарына қолайлы жағдай жасау мақсатында құрбан шалу рәсімін қашықтан өткізуге арналған <a href="https://www.qurban2022.kz/kk/">qurban2022.kz</a> сайтын іске қосты”, – деп хабарлады Қазақстан мұсылмандары діни басқармасы.
</blockquote>
Онлайн құрбан шалғысы келетіндер сайт арқылы құрбандық малын таңдап, көрсетілген реквизитке қажетті ақшаны аудара алады. Қой мен ешкіні бір адам, ал ірі қара мен түйені бір немесе 7 адам бірігіп шалса болады.
Бұдан кейін төлем барысында хабарламаға тапсырыс нөмірі мен құрбандық шалушының аты-жөнін жазу міндетті. Құрбандық шалынған соң оның фото және бейне есебі тапсырыс беруші көрсеткен WhatsApp нөмірге жіберіледі.
Құрбандық еті мұқтаж жандарға таратылады. Сол себепті мұқтаж жандар осы сайтта етті алуға өтініш беруге тиіс.
<a href="https://www.qurban2022.kz/kk/">qurban2022.kz</a> сайтында Нұр-Сұлтан тұрғындары үшін құрбандыққа шалынатын бір қойдың бағасы 70 мың теңге. Ал ірі қара бір адамға 455 мың теңгеге шығады. Егер жеті адам бірігіп сойса, әрбіреуі 65 мың теңгеден төлеуі керек.
Алматы қаласында қой – 75 мың теңге, ешкі – 47 мың теңге, ірі қара – 392 мың теңге тұрады. 
Сайтта көрсетілген мал бағасына қасапшының еңбекақысы кіреді. Қалған қызмет түрлері (малды бөлшектеп сою, пакеттерге салып, мұқтаждарға жеткізу) – тегін.
Құрбан айт елімізде үш күн тойланады. Биыл мейрамның бірінші күні сенбі, 9 шілдеге түсіп тұр. 
Елімізде Құрбан айттың алғашқы күні демалыс болып саналады. Бірақ бұл ұлттық немесе мемлекеттік мереке болмағандықтан, демалыс күні ауыстырылмайды. Сол себепті қазақстандықтарға осы жылы қосымша демалыс берілмейді.

Қазақстан және Қызылорда облысының жаңалықтары