<a href="https://kyzylorda-news.kz/">Kyzylorda-news.kz.</a> Қызылорда облысы төтенше жағдайлар департаментіне азаматтық қорғау органдарының туын тапсыру рәсімі өтті.
Кезекті жұмыс сапарында Қазақстан Республикасы Төтенше жағдайлар вице-министрі Мереке Пішембаев департамент бастығы полковник Руслан Сламбекұлына «Ерлік, құрмет пен батылдық» символын салтанатты түрде табыстады.
Өткен жылдың қазан айында ел Президенттің Жарлығымен Ішкі істер министрлігінің құрамында болған Төтенше жағдайлар комитеті өз алдына Төтенше жағдайлар Министрлігі ретінде қайта құрылып, жалауы бекітілді. Ал азаматтық қорғау органдарының қызметкерлері үшін ту – бұл ерліктің, ар-намыстың және абыройдың символы екенін жеткізді.
Сонымен қатар жиын барысында Вице-министр Мемлекет басшысы Қасым-Жомарт Тоқаевтың жолдауындағы тапсырмас кеңінен түсіндіріп, Министрлік басшылығының жалақыны арттыру, қызметкерлердің әлеуметтік жағдайын жақсарту, өрт сөндіру және авариялық-құтқару жұмыстары қызметінің материалдық-техникалық базасын жақсарту мәселелері бойынша қабылданып жатқан шаралары туралы айтып берді.
Департамент бастығы Руслан Сламбекұлы да өз кезегінде «Егемендік алған 30 жыл ішінде өрт сөндіруші-құтқарушылардың халық қауіпсіздігін қамтамасыз ету жолындағы жан қиярлық ерліктері жетерлік. Бүгінгі салтанатты ту тапсыру рәсімі Сыр құтқарушы үшін айтулы оқиға болып табылады», – деді.
Осылайша ашық өткен диалогта Қызылорда облысы гарнизонының жеке құрамы вице министрге қызметтік іс-әрекеттегі қызықтырған проблемалық сұрақтарын жолдап, тұшымды жауап алды.
Бұдан әрі вице-министр Қызылорда облысы гарнизонының тыныс тіршілігімен танысу үшін шаһардағы өрт сөндіру бөлімдерін аралады. №1 мамандандырылған өрт сөндіру бөлімінің ауласында ұйымдастырылған көрмеде Мереке Құдайбергенұлы жедел-құтқару жасағы мен өрт сөндіру бөлімінің техникалық базасымен танысты.
<img src="https://kyzylorda-news.kz/wp-content/uploads/2022/02/274784081_1955980947944080_6554385772812752388_n.jpg" alt="" />
<img src="https://kyzylorda-news.kz/wp-content/uploads/2022/02/274730415_1955981171277391_7327042944974480184_n.jpg" alt="" />

Қызылордалық құтқарушыларға «Ерлік, құрмет пен батылдық» символы табысталды

<a href="https://kyzylorda-news.kz/">Kyzylorda-news.kz.</a> Қазақстанның қор биржасында доллардың бағамы 452 теңгеге бір-ақ жетті. Ал еліміздегі ақша айырбастау пунктерінде шетел валютасы 470 теңгемен сатылуда, деп хабарлайды <a href="https://stan.kz/">Stan.kz&nbsp;.</a>
Украинада орын алған саяси ахуалға байланысты қаржы нарығындағы теңгенің болашағы туралы сарапшылар не дейді?&nbsp;
GSB UIB бизнес мектебінің директоры, экономист Мақсат Халықтың пікірінше, доллар&nbsp; бағамы жақын арада&nbsp;500 теңгеден асып түседі.&nbsp;
<blockquote>
 «Ресейде рубль құны 89-ға жетті. Бұл теңгенің 480 теңгеден асқанын көрсетеді. 500 теңгеге жақындап тұр. Егер саяси жағдай шиеленісе берсе, Ресейге қарсы жойқын санкциялар бағытталады. АҚШ “тозақ санкцияларын” жіберемін деді. Ең қауіптісі – SWIFT деп аталатын халықаралық ақша аударымдар жүйесінен Ресейдің шығарылуы. Егер бұл орын алса, 1 доллардың рубльге шаққандағы бағамы 100 рубльден асады. Ал&nbsp;теңге 500-ден асып жығылады», –&nbsp;деді Мақсат Халық.&nbsp;
</blockquote>
Сарапшы мұнай бағасы геосаяси жағдайдың жанында&nbsp;екінші орынға түсіп қалғанын айтады. Сондықтан мұнайдың көтерілуі теңгеге әсер етпейді, дейді ол.&nbsp;
<blockquote>
 «Мұнай көтерілсе, теңге тұрақты болып тұруы керек еді. Бірақ қазір&nbsp;саяси жағдайдың ықпалы басымырақ&nbsp;болып отыр», – деп түсіндірді экономист.
</blockquote>

Доллар 500-550 теңгеге дейін жетеді: Қазақстандық сарапшылар теңгенің болашағын болжады

<a href="https://kyzylorda-news.kz/">Kyzylorda-news.kz.</a> Қызылорда облыстық мамандандырылған сәбилер үйінде «Тұзды шахта» бөлмесі ашылды.
Балаларға арналған тұзды шахта бөлмесі республика бойынша алғаш рет Сыр өңірінде ашылып отыр.
Осыған дейін «Еңбек-Жер» ЖШС төрағасы Шакизатхан Ысқақовтың туған жерге тағзым ретінде ауылында бірқатар жобаны қолға алғанын, бүгінде оның жерлестері жемісін көріп отырғанын бірнеше мәрте жазған едік. Қуантарлығы атпал азамат тапқан табысын елмен бөлісуді дәстүрге айналдырып келеді. Жуырда Еңбекте күндізгі бөлімдегі ауылдық емхана ұжымына жалпы құны 11 млн теңгені құрайтын УЗИ аппаратын төраға тарту етсе, бүгінде заманауи медициналық құрылғының игілігін ауыл халқы көріп отыр.
Кеше аймақтың бас шаһарынан тағы бір ақжолтай хабар келді. Аталған серіктестіктің төрағасы Шакизатхан Ысқақов облыс орталығындағы мамандандырылған сәбилер үйі жанынан «Тұзды шахта» бөлмесін ашуға қолғабыс етіпті. Балаларда кездесетін бірнеше дертке ем-дом жұмыстары жүргізілетін «Тұзды шахта» бөлмесінің ашылу салтанатына облыс әкімінің орынбасары Балжан Мөрәліқызы мен облыстық денсаулық сақтау басқармасының басшысы Сабит Бексейтұлы қатысты.
Айта кетейік, облыстық мамандандырылған балар үйі жанынан ашылған бөлмеде балаларда кездесетін демікпе, тыныс алу жолдарының созылмалы ауруларына қарсы ем жүргізіледі. Мұнан бөлек галотерапия, псориаз, аллергиялық дерматит, экзема және тері ауруларының алдын алуда және иммундық жүйені жақсартуда аталған орталық қызметінің маңызы зор.
«Тұзды шахтада» балалардың жас ерекшеліктері бойынша галотерапиялық ем қабылдау уақыттары да әрқалай. Мәселен, 1-2 жас аралығындағы балаларға мұнда 10 минут ем жүргізілсе, 2-3 жас аралығындағы балаларға жүргізілетін емдік шаралар 20 минутқа дейін жалғасады. Ал 3 жастан бастап 30 минут болмақ.
Галотерапияның 1 курсы 10-12 сеансты құрайды және оны жылына 3-4 курсқа дейін алуға болады. «Тұзды шахтаның» сыйымдылығы – 12 шаршы метр, яғни бір уақытта 5 балаға дейін ем алуға толық мүмкіндік бар. 
Сәбилер үйінің қызметкерлері балалар арасында кездесетін бірнеше ауруға қарсы ем жүргізілетін бөлмені ашу осыдан 2 жыл бұрын жоспарланғанын айтады. Десе де оған қаржы тапшылығы қолбайлау болған көрінеді. Бұл мәселенің шешімін табуға төрағаның жомарттығы басты себеп болып отыр. Ондағы мамандардың атпал азаматқа алғыс білдіруі де сондықтан.
<img src="https://kyzylorda-news.kz/wp-content/uploads/2022/02/whatsapp-image-2022-02-24-at-16.33.36.jpeg" alt="" />

Қызылордадағы сәбилер үйінде «Тұзды шахта» бөлмесі ашылды

<a href="https://kyzylorda-news.kz/">Kyzylorda-news.kz.</a> Экология және индустрия және инфрақұрылымдық даму министрліктері утилизациялық алымның жаңа тарифтері қашан бекітілетінін айтты, деп хабарлайды <a href="https://sputnik.kz/20220224/utilizatsiyalyq-alym-zhana-molsher-23051731.html">Sputnik Қазақстан</a>.
Экология министрлігі қалдықтарды басқару бойынша мемлекеттік саясат департаментінің директоры Мансұр Ошурбайдың айтуынша, алдымен утилизациялық төлемді есептеу әдістемесіне өзгеріс енгізу керек. Одан кейін мемлекеттік органдардың қарауына жіберіледі. Ең соңында тиісті құжат бекітіледі.
<blockquote>
 «Кешеден бері тиісті жұмыс басталды. Мен нақты датасын айта алмаймын. Алайда бұл өзекті мәселе екенін бәріміз білеміз. Оны барынша тездетіп шешу керек. Мемлекеттік органдар мен бірқатар сараптамалар бойынша, соның ішінде жемқорлыққа қарсы және ғылыми сараптаманың қорытындысын алып, барлық органдардың келісімін аламыз деп ойлаймын. Одан кейін әділет министрлігіне тіркеу үшін жібереміз. Сондықтан жақын арада барлық төлем бекітіледі деген үміт бар», – деді Ошурбай орталық коммуникациялар қызметінде өткен брифингте.
</blockquote>
Ал индустрия және инфрақұрылымдық даму вице-министрі Марат Қарабаев 1 мамырға дейін нақты дедлайның бар екенін жеткізді.
<blockquote>
 «Соған дейін барлық жұмысты бітіруіміз керек. Алайда одан да тез жасаймыз деп ойлаймын. Бәлкім, сәуірдің ортасы немесе басы болады», – деп атап көрсетті Қарабаев.
</blockquote>
Еске сала кетсек, автокөліктің барлық түрі және ауыл шаруашылығы техникасы бойынша утилизациялық алым мөлшері 50 процентке төмендетіліп отыр.

Утилизациялық алымның жаңа мөлшері қашан қабылданады

<a href="https://kyzylorda-news.kz/">Kyzylorda-news.kz.</a> Қызылордада облыстық ауыл шаруашылығы басқармасы 2020 жылы аналық мал басына арналған жем-шөп үшін субсидия алған шаруалардан қаржыны бюджетке қайтаруды талап етіп жатыр. Оған Қазақстан Республикасының Ауыл шаруашылығы министрлігі шығарған қағидадағы олқылық себеп болып отыр. Амалы қалмаған шаруалар Кәсіпкерлер палатасынан көмек сұрады.
Дәлірек айтсақ, Ауыл шаруашылығы министрлігі 2020 жылдың 17 шілдесінде «Асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларын бекіту туралы» бұйрық қабылдап, «Ауыл шаруашылығы малдарының азығына жұмсалған шығындар құнын арзандату» қолдау шарасын енгізеді.
Аталған құжатты басшылыққа алған аймақтың бірқатар кәсіпкерлері субсидия алады. Өткен жылдың қазан айында кәсіпкерлер облыстық ауыл шаруашылығы басқармасынан «Сіздің шаруашылықта субсидияланған мал басының сақталуын қамтамасыз ету бойынша міндеттемелерді сақтамағаны анықталып отыр» деген мәтінде хат алады. Ары қарай басқарма субсидия қаржысын бюджетке қайтаруды талап етеді.
Басқарманың «міндеттемені сақтамады» дегені мынадан туындап отыр. Ауыл шаруашылығы министрлігі әзірлеген қағиданың қазақша нұсқасында кәсіпкерге «Субсидияланған аналық мал басының ағымдағы жыл бойы сақталуын қамтамасыз ету» міндеттелген. Ал қағиданың орыс тіліндегі нұсқасында – «в течение года» (жыл бойы) деп жазылып, сәйкессіздік орын алған. Палатаға жүгінген кәсіпкерлер ереженің қазақ тіліндегі нұсқасын басшылыққа алғанын айтты.
<blockquote>
 «Шаруашылық иелері 2020 жылы қолданыста болған қаиғадаға сай «сол ағымдағы 2020 жылы» мал басын сатпай ұстап отырған. Тек келесі, яғни 2021 жылы ғана мал басын жаңарту және жақсарту мақсатында бір бөлігін сатып, оның орнына басқа мал алған. Әзірге Кәсіпкерлер палатасына 4 шаруа қожалығы өтініш білдіріп, құқығын қорғауды сұрап отыр. Олардан ауыл шаруашылығы басқармасы жалпы көлемі 7,2 млн теңгені бюджетке қайтаруды талап етіп отыр», – дейді Қызылорда облысы кәсіпкерлер палатасының директоры Ғалымбек Жақсылықов.
</blockquote>
Кәсіпкерлер палатасының мамандары Ауыл шаруашылығы министрлігі әзірлеген қағиданың қазақ тіліндегі нұсқасы орыс тіліндегісімен сәйкес келмейтінін алға тартып, министрліктен түсініктеме беруін сұраған еді.
Министрлік 22 ақпанда Кәсіпкерлер палатасына жауап берді. Онда құжатқа 2021 жылдың 13 шілдесінде өзгеріс енгізіліп, «ағымдағы жыл бойы» деген сөз «жыл бойы» сөзімен өзгертілгенін атап өтіп: «Осыған байланысты Қағиданың орыс тіліндегі нұсқасын басшылыққа алу қажет» деп жазылған.
<blockquote>
 «Жалпы министрліктің қабылдаған қағидасы о бастан шикі. «Жыл бойы» деген талапта да нақты қай кезден бастап есептеу керектігіне қатысты нақтылық жоқ. Бұл біріншіден. Екіншіден, кәсіпкер өзіне жауапкершілік алғанда 2020 жылы қолданыстағы құжатты басшылыққа алды. Бұл жерде ереже шығарып отырған орган – Ауыл шаруашылығы министрлігінде тұрақтылық болмай отыр. Яғни кәсіпкер министрлік қай күні ережесіне өзгеріс енгізеді екен деп күтіп отыра алмайды ғой?! Үшіншіден және бұл ең бастысы, Қазақстан Республикасының Құқықтық актілер туралы заңының 23-бабы 7-тармағында «Орыс тiлiндегi нормативтiк құқықтық актiдегi терминдер мен анықтамалар қазақ тiлiнде жазылған ретке сәйкес болуға тиiс» және 24-баптың 3-тармағы 3-абзацында «Қазақ және орыс тілдеріндегі нормативтік құқықтық актілердің мәтіндері тең түпнұсқалы болуға тиіс» деп анық көрсетілген. Ал министрліктің «қағиданың орыс тіліндегі нұсқасын басшылыққа алу қажет» деуін қалай қабылдаймыз», – дейді Палата директоры.
</blockquote>
Кәсіпкерлер палатасы жауапты мемлекеттік орган және тексеруші орган төленген субсидияларды қайтарып алу талаптарын қайта қарауы керек деген ұстанымда. Аталған мәселенің нәтижесін Кәсіпкерлер палатасы қосымша хабарлайды.

Қызылордалық кәсіпкерлер бюджетке 7 млн. теңгеден астам субсидия қаржысын қайтаруға мәжбүр

<a href="https://kyzylorda-news.kz/">Kyzylorda-news.kz.</a>&nbsp; Қазақстан Республикасы Парламенті Мәжілісінің депутаттары, «Nur Otan» партиясы депутатық фракциясының мүшелері Ғ.Әміреев, Б.Смағұл мен Г. Шиповских Сыр өңіріндегі жұмыс сапары барысында азаматтарды қабылдап, оларды толғандырған сұрақтарына жауап берді.
Депутаттардың қабылдауына 80-ше жуық қызылордалық түрлі өтініш-тілектерімен келді. Оның ішінде құқықтық, кәсіпкерлік, өңірдегі қуаңшылық, денсаулық сақтау, тұрғын үй, әлеуметтік көмек алу, жерге қатысты мәселелер бар. Фракция мүшелері олардың әрқайсысын жіті назарына алды.
Мәселен, Қызылорда қаласының тұрғыны, көп балалы ана Назерке Кадирова денсаулық, әлеуметтік, балалардың білім мәселесімен қоса аймақта шешілмей жүрген проблемалық мәселелерді де алға тартса, Сырдария ауданын келген Қайрат Жалғасов есімді азамат депутаттардан жайлымдық жер, Сырдария өзенінің тартылуы жалпы шаруалар үшін ең қажетті аяқ су мәселесін шешіп беруге ықпал етуді сұрады. Азаматтар өтінішін тыңдаған депутаттар әр сұрақ бойынша жеке-жеке жұмыс жүргізетіндерін жеткізді.
Соңғы уақытта Қызылорда қаласында 2005-2006 жылдары жер кезегіне тұрған азаматтарға жер телімдері беріле бастады. Дегенмен, өздеріне берілген жер телімінің қолайсыз жерде орналасқанын, балабақша, мектептен алыс екенін айтып, шағымданып жүргендер де бар екен. Депутаттың қабылдауына сондай жандардың бірі келді. Оған бұл қиындықтардың уақытша екені, жер телімдері берілген аудандарға инфрақұрылым желілерін апару ісі қолға алынатыны түсіндірілді.
Парламент Мәжілісінің депутаты Бақытбек Смағұл журналистерге өңірімізге сапары кезінде азаматтармен бірнеше кездесулер өткізіп, қызылордалықтарды қандай мәселелер толғандырып жүргенін айтты.
<blockquote>
 Ауыл тұрғындары мен қала тұрғындарының арыз-мұңдары арасында айырмашылықтар да бар. Ауылдықтарды, негізінен, іс бастау үшін несие алу, мал жайлымы, аяқ су мәселесі мен субсидияға қол жеткізу секілді мәселелер толғандырады. Қалалықтар баспана мәселесі, тұрмыстық сипаттағы мәселелерді шешу төңірегінде көбірек шағымданады. Ауылда да, қалада да жұмыс іздеп жүргендер бар. Біз жергілікті жерде шешімін табатын мәселелерді атқарушы органдарға ұсыныс ретінде жолдап, парламентте көтеретін мәселелердің барлығын жинақтап алдық,- деді ол.
</blockquote>
<img src="https://kyzylorda-news.kz/wp-content/uploads/2022/02/0587f0f3-dd69-4cf7-85e0-28e63d62e4d3.jpg" alt="" />
<img src="https://kyzylorda-news.kz/wp-content/uploads/2022/02/b22e6cd2-31c8-4b83-a515-6331b66a3ebc.jpg" alt="" />
<img src="https://kyzylorda-news.kz/wp-content/uploads/2022/02/ce352839-2249-4626-b19b-c21bd54417e4.jpg" alt="" />

Қызылордалық тұрғындар мәжіліс депутаттарымен кездесті

<a href="https://kyzylorda-news.kz/">Kyzylorda-news.kz.</a> Соңғы жылдары бірқатар мұнай компаниялары арасында жұмысшылардың жалақы мәселесінің аздығы туындауда. Әсіресе, салыстырмалы түрде «СНПС-АйДан Мұнай» компаниясы мен «Қуат Амлон Мұнай» БК» серіктестігінде жұмыс істейтін қызметкерлердің жалақысының төмендігінен еңбек даулары туындап, мәселелер шиеленісуде.
Осыған орай Қызылорда облысының әкімі Гүлшара Әбдіқалықова «СНПС-АйДан Мұнай» компаниясының Президенті Вэнь Цзянцзюнь мен «Қуат Амлон Мұнай» БК» серіктестігінің бас директоры Сяо Вэйді шақырып, әкімдіктің басшылығы мен құқық қорғау органдары және салалық басқарма басшыларымен бірге өзекті мәселелерге қатысты жиын өткізді.
Облыс әкімі соңғы бірнеше жылда мұнай компаниялары жұмыскерлері арасында жалақыны арттыру мәселесі жиі көтеріліп келетінін атап өтіп, бұл істе тиімді шешім шығару қажет екенін алға тартты.
<blockquote>
 «Өзге де мұнай компанияларымен салыстырмалы тұрғыда қарайтын болсақ, сіздерде жалақы мөлшерінің төмендігі байқалады. Бұл қызметкерлер арасында әлеуметтік шиеліністі туғызады. Сондықтан Сіздер өз жұмысшыларыңыздың талабын ескере отырып, оңтайлы шешім қабылдауларыңыз қажет. Себебі осы кезеңге дейін әкімдік тарапынан да бірнеше рет кездесулер өткізіліп, түсіндірмелер жүргізілді. Ал, тиімді шешімді қабылдауда сіздер тараптан нақты нәтижелер байқалмайды», – деді Гүлшара Әбдіқалықова.
</blockquote>
Жиын барысында құқық қорғау органдарының басшылары да қызметкерлердің заңды мүдделерін қорғау қажеттігін еске салды.
Облыс әкімі туындаған мәселелерді саралай келе, мұнай компанияларының басшыларына әлеуметтік шиеліністі болдырмауды қатаң түрде тапсырып, қысқа мерзім ішінде шешім қабылдау қажеттігін қаперге салып, нақты тапсырмалар берді.
<img src="https://kyzylorda-news.kz/wp-content/uploads/2022/02/274527193_249721457349106_4550019700633672802_n.jpg" alt="" />
<img src="https://kyzylorda-news.kz/wp-content/uploads/2022/02/274289032_249721444015774_4321469368192099283_n.jpg" alt="" />

Гүлшара Әбдіқалықова: Жалақы мөлшерінің төмендігі қызметкерлер арасында әлеуметтік шиеліністі туғызады

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 2566 адам коронавирустан жазылды, деп хабарлайды&nbsp;<a href="https://t.me/coronavirus2020_kz">coronavirus2020.kz</a>.
Аймақтар бойынша:
Нұр-Сұлтан қаласы – 119
Алматы қаласы – 405
Шымкент қаласы – 426
Ақмола облысы – 250
Ақтөбе облысы – 79
Алматы облысы – 222
Атырау облысы – 44
Шығыс Қазақстан облысы – 22
Жамбыл облысы – 36
Батыс Қазақстан облысы – 102
Қарағанды облысы – 66
Қостанай облысы – 78
Қызылорда облысы – 11
Маңғыстау облысы – 26
Павлодар облысы – 488
Солтүстік Қазақстан облысы – 182
Түркістан облысы – 10
Қазақстан бойынша жазылғандар саны – 1261996.

Өткен тәулікте 11 қызылордалық коронавирустан жазылды

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 566 адамның коронавируспен ауырғаны ПТР арқылы расталды, деп хабарлайды coronavirus.kz2020.kz.
Аймақтар бойынша:
Нұр-Сұлтан қаласы – 43
Алматы қаласы – 158
Шымкент қаласы – 6
Ақмола облысы – 28
Ақтөбе облысы – 6
Алматы облысы – 21
Атырау облысы – 9
Шығыс Қазақстан облысы – 36
Жамбыл облысы – 11
Батыс Қазақстан облысы – 20
Қарағанды облысы – 47
Қостанай облысы – 44
Қызылорда облысы – 6
Маңғыстау облысы – 15
Павлодар облысы – 47
Солтүстік Қазақстан облысы – 68
Түркістан облысы – 1
Жалпы ел бойынша ауырғандар саны 1300730.

Қызылордада 6 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> 24 ақпан күні Қазақстанның басым бөлігінде қар жауып, жаяу бұрқасын, көктайғақ күтіледі, деп хабарлайды Қазгидромет.
Еліміздің қалған аумағына антициклон жотасы әсерін тигізеді, осыған байланысты жауын-шашынсыз ауа райы сақталады. Республика бойынша кей жерлерде тұман түсіп, жел күшейеді.
Ал Қызылорда облысының солтүстігінде тұман болады.

Қызылордада ауа райы қандай болады?

<a href="https://kyzylorda-news.kz/">Kyzylorda-news.kz.</a> Бүгін сағат 12.10-да Арал ауданы маңына АН-2 ұшағы қону кезінде өртке оранды. Оқиға орнына 2 техника, 9 қызметкер көмекке келді. Ал, ұшақта болған 2 экипаж мүшесі мен 1 фельдшер дін аман, Арал ауданына жеткізілді. Бұл туралы бүгін Өңірлік коммуникациялар қызметінде өткен баспасөз конференциясында облыстық төтенше жағдайлар департаменті бастығының орынбасары Саид Молдақараев мәлімдеді.
«Қызылорда әуежайынан сағат 09.30-да «Тараз Жаңа Әлем» әуе компаниясына қарасты АН-2 ұшағы санавиацияның тапсырмасы бойынша ұшқан. Қалың тұман басып, көру мүмкіндігі шектелгендіктен Арал қаласынан 21 шақырым жердегі ашық алаңға қонған. Алайда, батпақты жерде ұшақ аударылды. Ішіндегі азаматтар дер кезінде сыртқа шығып үлгерген. Артынша ұшақ отқа оранған», – деді Саид Молдақараев.
Ұшақтағы борт командирі, ұшқыш көмекшісі және фельдшердің жағдайы жақсы, зардап шеккендер жоқ. Ұшақ құлау салдарынан өртке оранған деген тұжырым жасалуда.
Оқиғаны нақтылай жеткізсек, таңертеңгі сағат 08.50-де жедел жәрдемге Арал ауданынан хабарлама түскен. 16 жастағы жасөспірім І-типті қант диабетіне шалдығып, кетацидоз диагнозымен ауыр жағдайда ауруханаға жатқызылған. Дереу облыс орталығына жеткізілуі тиіс болатын.
Облыстық медициналық жедел жәрдем стансасының бас дәрігері Алмат Құрманғалидың айтуынша, бүгінде науқастың жағдайы тұрақты. Тағы бір жедел медициналық авиацияның көлігі жолға шықты. Сол автокөлікпен бала да облыстық ауруханаға жеткізілмек. 
Айта кету керек, АН-2 ұшағы 1987 жылы шығарылған. 2021 жылдың қараша айында тексерістен өткен.

Аралда өртенген ұшақ туралы тың ақпарат жарияланды

<a href="https://kyzylorda-news.kz/">Kyzylorda-news.kz.</a> Былтыр экономиканың барлық салалары бойынша өндірістің тиімді жүргізілуі және өнімдердің қауіпсіздігі шеңберінде 85 тексеріс жүргізілді. Нәтижесінде, қолдануға жарамсыз 722 дана өлшем құралдарын пайдалануға тиым салу жөнінде 16 нұсқама берілді.
Бұл туралы Өңірлік коммуникациялар қызметінде өткен брифингте ҚР Сауда және интеграция министрлігінің Техникалық реттеу және метрология комитеті Қызылорда облысы бойынша департаментінің басшысы Бауыржан Қарсақбаев хабарлады.
<blockquote>
 «2021 жылы аймақтағы тауар өндіруші және қызмет көрсетуші кәсіпорындарда, ірі сауда орталықтары мен базарларда сапа менеджмент жүйесін енгізу, стандарттау саласындағы жаңадан енгізілген нормативтік құжаттар жөнінде түсіндірме жүргізілді. Сапа менеджмент жүйесін өндірістеріне енгізген кәсіпорындарға ұдайы талдау жасалады. Қазіргі таңда облыс бойынша 489 мекеме мен кәсіпорындар халықаралық менеджмент жүйесін өз өндірістеріне енгізген. Сонымен қатар, облыс көлеміндегі сынақ базарларына талдау жасалды. Анықталғандай, аккредиттеуден өткен, түрлі сала бойынша қызмет көрсететін 25 сынақ орталықтары жұмыс атқарады, – деді Бауыржан Қарсақбаев.
</blockquote>

Қазақстан және Қызылорда облысының жаңалықтары