<a href="https://kyzylorda-news.kz/">Kyzylorda-news.kz.</a> Қызылорда облыстық Полиция департаментінде оқушыларға арналған «Ашық есік күні» өтті.
Қазақстан Республикасы Президентімен жарияланған «Балалар жылы» және «Ашық есік күн» атты акциясы аясында бүгін Есірткі қылмысына қарсы іс-қимыл басқармасының қызметкерлерінің ұйымдастыруымен облыстық девиантты мінез-құлықты балаларға арналған интернаттың оқушылары мен тәрбиешілері департаменттің мұражайы мен жедел басқару орталығына экскурсия жасады.
Іс-шараның мақсаты – кәмелетке толмағандардың құқықтық сауаттылығын қалыптастыру, отбасылық және адамгершілік-рухани құндылықтарын насихаттау, азаматтардың ішкі істер органдарына сенімін арттыру, сондай-ақ кәмелетке толмағандарды полиция жұмысымен таныстыру және қауіпсіздік шараларына үйрету болып табылады.
Мұражай қызметкері балаларды жылы шыраймен қарсы алып, жыл сайын толығып жатқан экспонаттарымен және құқықтық тәртіпті қамтамасыз етуде аяңбай қызмет жасаған ардагерлер туралы сақталған мәліметтерімен таныстырып, мол мағлұмат берді.
Бүгінгі іс-шараға қатысқан оқушылар арасында «Полиция – дос және қорғаушы» тақырыбында әңгіме өрбіп, олар өз сауалдарын қойып, арнайы мамандардан толыққанды жауаптарын алды.
<img src="https://kyzylorda-news.kz/wp-content/uploads/2022/08/0v4a0370-scaled.jpg" alt="" />
<img src="https://kyzylorda-news.kz/wp-content/uploads/2022/08/0v4a0349-scaled.jpg" alt="" />

Полиция департаментінде оқушыларға арналған «Ашық есік күні» өтті

<a href="https://kyzylorda-news.kz/">Kyzylorda-news.kz.</a> Қызылорда обылысының әкімі Нұрлыбек Нәлібаев халық үшін аса маңызды нысандар жекешелендірілмейтінін баса айтты.
Экономиканы жаңғырту мәселелері жөніндегі мемлекеттік комиссия отырысында жекешелендірудің 2025 жылға дейінгі кешенді жоспарын қайта қаралды.
Қызылорда облысында жекешелендірудің Кешенді жоспарына сәйкес бәсекелестік ортаға беруге жататын 13 нысан енгізілген. Өткен жылы сауда-саттыққа 9 объект көзделіп, 3 нысан сатылды.
Комиссия отырысының қорытындысымен Жекешелендірудің кешенді жоспарына ұсынылған түзетулер қаралып, аймақтағы 4 нысанды жекешелендіру тізбесінен алып тастау мақұлданды.
<blockquote>
 Стратегиялық нысандар жекешелендірілмеу керек. «Қызылорда Су жүйесі», «Қызылорда жылуэлектрорталығы», «Қызылорда электр тарату тораптары компаниясы» секілді маңызды нысандар жекешелендірілмейді. Бұл нысандар мемлекеттік меншікте болуы керек. Кезінде «Су жүйесі» мекемесін 70 млн. теңгеге сатып, кейін қайта сатып алған болатынбыз. Себебі қала лас суға толып, мекеме халықты ауыз сумен қамтамасыз ете алмады. Қайтадан жекешелендіруге бергеніміз дұрыс емес, міндетті түрде өзімізде болуы тиіс. Мәдени нысандар мен демалыс паркі де мемлекеттің меншігінде болады. Сондықтан бұл бағытта халыққа кеңінен түсіндіру жұмыстарын жүргізу қажет», – деді Нұрлыбек Нәлібаев.
</blockquote>

Нұрлыбек Нәлібаев: Су жүйесі, жылуэлектрорталығы, электр тарату компаниялары жекешелендірілмейді (ВИДЕО)

<a href="https://kyzylorda-news.kz/">Kyzylorda-news.kz.</a> Биыл Қазалы ауданында 17 402 гектар жерге ауыл дақылдары егілді. Ал басты дақыл күріштің көлемі – 6361 гектарды құрады. Сонымен қатар, аймақтағы су тапшылығына байланысты егін дақылдарын әртараптандыру бағытында егіс көлемі кеңейді. Бұл туралы Өңірлік коммуникациялар қызметінде өткен брифингте Қазалы ауданының әкімі Мұхтар Оразбаев мәлімдеді.
<blockquote>
 «Өздеріңіз білетіндей, Сырдария өзеніндегі су тапшылығына байланысты күріштің көлемі қысқартылып, орнына суды аз қажет ететін дақылдардың көлемі ұлғайды. Мәселен, биыл аудандағы егіс алқаптарына жаздық бидай – 14 гектарға, арпа – 48 гектарға, мақсары дақылы – 148 гектарға, картоп – 30 гектарға, бақша дақылдары – 14 гектарға, көкеніс – 70 гектарға, жоңышқа – 53 гектарға егілді. Облыс әкімі Н.Нәлібаевтың арнайы тапсырмасына сәйкес, аудан тұрғындарына бос жатқан жерлерді игеруге және өнім көлемін көбейтуге арнайы 114 гектар жер дайындалды. Бұл жерлер бақша және көкеніс дақылдарын егу үшін 58 отбасыға бөлініп берілді. Сондай-ақ, ауданымызда егіс алқаптарын заманауи технологиялардың көмегімен суару әдісі қолға алынып жатыр. Бұл ретте «РЗА» АҚ шаруа қожалығы облыста алғашқы болып жаңбырлатып суару әдісін қолдану арқылы сүрлемдік жүгерін егуде. Айта кетейін, биыл ауданда 3539,5 тонна өнім түрі бірнеше шет мемлекеттерге экспортталды», – деді Мұхтар Оразбаев.
</blockquote>
Қазалы ауданында әлеуметтік маңызы бар азық-түлік тауарларының бағасын тұрақтандыру мақсатында 1 мың дана әлеуметтік нан 36 сауда үйлер мен дүкендерде 75-85 теңгеден сатылуда.
<blockquote>
 «Ауданда әлеуметтік маңызы бар азық-түлік тауарларының бағасын тұрақтандыруда бірқатар жұмыстар атқарылуда. Соның бірі – «Байқоңыр» ӘКК» АҚ-мен айналым схемасы арқылы 20 млн теңгені құрайтын заем алу бойынша келіссөздер жүргізіліп жатыр», – деді Қазалы ауданының әкімі Мұхтар Әуесұлы.
</blockquote>
<img src="https://kyzylorda-news.kz/wp-content/uploads/2022/08/mwhtar-2.jpg" alt="" />

Қазалыда 17 402 гектар жерге ауыл шаруашылығы дақылдары егілді

<a href="https://kyzylorda-news.kz/">Kyzylorda-news.kz.</a>&nbsp;Биыл Арал ауданында 3,7 млрд теңгеге жуық инвестиция тартылып, өткен жылмен салыстырғанда өсім 11,5%-ды құрады.
Жыл аяғына дейін ауданға 17,2 млрд.теңгеге жуық инвестиция тарту жоспарлануда. Сонымен қатар осы жылы Аралда бірнеше өндіріс орындары іске қосылады. Тиісінше мұнда жергілікті өнім түрлері көбейіп, жаңа жұмыс орындары құрылмақ. Өңірлік коммуникациялар қызметінің ақпарат алаңында Арал ауданының әкімі Серік Сермағанбетов бірінші жартыжылдықтың қорытындысын баяндады.
<blockquote>
 «Алдағы уақытта бюджет қаражатына деген тәуелділікті төмендету мақсатында тартылатын инвестицияның 75%-нан астамы жеке сектор қаражатын құрайтын болады. Ал индустриялық инновациялық даму мемлекетік бағдарламасының ІІІ бесжылдығы аясында 7 жоба жүзеге асырылады. Бұл жобалар іске қосылса 1500-ге жуық адам жұмыспен қамтылмақ. Атап айтсақ, «Балық қалдықтарын қайта өңдеу цехын салу», «Қамыс шатыр», «Түйе сүтінен құрғақ ұнтақ дайындау зауытын салу», «Титан өндіру бойынша кен байыту комбинаты», «Балық және құс өсіру» жобалары мен «Тауарлы балықты өсіру және тереңнен өңдеу кешенін кеңейту» жобасы. Аталған жоболардың жұмыстары бойынша тиісті шаралар жүргізілуде.Шағын және орта кәсіпкерлікті дамыту мақсатында ауданда 200-ге жуық тұрғынды жұмыспен қамтитын 60 жоба қамтылған», – деді Арал ауданының әкімі Серік Сермағанбетов.
</blockquote>
<img src="https://kyzylorda-news.kz/wp-content/uploads/2022/08/serik-1.jpg" alt="" />

Серік Сермағанбетов: Биыл Арал ауданына 17,2 млрд. теңге инвестиция тарту жоспарда бар

<a href="https://kyzylorda-news.kz/">Kyzylorda-news.kz.</a>&nbsp;Бүгінде Қазалы ауданының әлеуметтік-экономикалық жағдайы қарқынды дамып келеді. Айталық, өнеркәсіп өнімінің көлемі – 106,9 пайызға, ал өңдеу өнеркәсібі – 107,6 пайызға артты. Сондай-ақ, ауданда шағын және орта кәсіпкерлік нысандарының саны – 5299 бірлікті құрап, оның 95,6 пайызы тұрақты жұмыс істеуде. Өңірлік коммуникациялар қызметінде өткен брифингте Қазалы ауданының әкімі Мұхтар Оразбаев бірінші жартыжылдықтың қорытындысы бойынша атқарылған жұмыстарды баяндады.
<blockquote>
 «Қазалы ауданындағы өзекті мәселелерді шешу мақсатында көптеген жобалар іске қосылмақ. Мәселен, облыс әкімінің жанындағы Кеңес қарауына жалпы саны 27 жоба ұсынылып, оның 17-сі мақұлданды. Одан бөлек, бүгінде 14 жобаның жобалық-сметалық құжаттамасы әзірленуде. Ауданымызда шағын және орта кәсіпкерлік саласы да қарқынды дамып келеді. Биылдың өзінде 711 кәсіпкерлік субъектісі ашылып, белсенді жұмыс істеуде. Сонымен қатар индустрияландыру бағдарламасы аясында бірқатар ауқымды жобалар қолға алынды. Атап айтқанда, «Балық қалдықтарынан балық ұнын өңдіру» жобасы мен «Қамыстан экологиялық таза құрылыс материалдарын дайындауға арналған шикізат өндірісі» жобасы. Аталған жобаларды жүзеге асыруға тиісті жұмыстар атқарылуда», – деді аудан әкімі Мұхтар Оразбаев.
</blockquote>
Брифинг барысында аудан әкімі Қазалыда жүргізіліп жатқан құрылыс жұмыстарын тілге тиек етті. Айтуынша, биыл ауданда 4 нысан халық игілігіне пайдалануға беріліп, қазіргі таңда 17 нысанның құрылыс жұмыстары жүргізілуде.
<blockquote>
 «Аудандағы құрылыс саласында айтарлықтай өсім бар. Дәлірек айтқанда, осы жылы құрылыс жұмыстарның көлемі – 2,5 млрд. теңгені құрап, 11,3 пайызға артты. Нәтижесінде 17 нысанның құрылыс жұмыстары басталды. Оның 7-і өткен жылдан өтпелі болса, 10 нысан жаңадан бой көтереді», – деді аудан әкімі Мұхтар Әуесұлы.
</blockquote>
<img src="https://kyzylorda-news.kz/wp-content/uploads/2022/08/mwhtar.jpg" alt="" />

Мұхтар Оразбаев: Құрылыс саласында айтарлықтай өсім бар

<a href="https://kyzylorda-news.kz/">Kyzylorda-news.kz.</a> Аудандардың өзекті мәселелері мен әлеуметтік-экономикалық даму көрсеткіштері талданған кезекті жиында Арал ауданының әкімі Серік Сермағамбетовтың есебі тыңдалды.
Жиынға облыстық, аудандық мәслихат депутаттары, ардагерлер мен қоғамдық кеңес төрағалары және салалық басқарма басшылары қатысты.
Ауданның даму көрсеткішін 4 бағыт бойынша сараланды.
Макроэкономикалық көрсеткіштер бойынша Арал ауданы 3-орынға тұрақтап, оң динамика көрсеткен. Дегенмен, аймақ басшысы кейбір өндіріс түрлерінде қалыс қалу деректерінің анықталғанын айтып, салдарын жою бойынша нақты тапсырма берді.
Ауданның бюджеттік кірісінің жылдық жоспары да тек 57,7 пайызға орындалған. Бүгінгі күнге қалыптасқан берешек көлемі 12 млн. теңгені құрап отыр. Аймақ басшысы аталған қарызды өтеу бойынша жұмысты жандандыру қажеттігін ескертіп, 15 тамызға дейін бюджетті нақтылау барысында жылдық жоспарға әр елді мекеннің мүмкіндіктері мен ерекшеліктерін ескеріп, өзгерістер мен толықтырулар енгізуді жүктеді.
Серік Сермағамбетов 6 ай мерзімде аудан бойынша барлығы 361,8 мың тонна тұз, 141,8 мың тонна йодталған тұз, 54,3 мың шаршы метр табиғи құм қазылып, 2121 тонна балық, 156 тонна ет, 640 тонна нан және нан өнімдері өндірілгенін жеткізді. Сондай-ақ, ауданда мал шаруашылығынан алынатын өнім де көбейген. Өткен жылдың осы кезеңімен салыстырғанда ет өндіру 103,3 пайызға, сүт өндіру 102,1 пайызға, жұмыртқа өндіру 102,2 пайызға орындалған.
Облыс әкімі аудан тұрғындарының әлеуметтік мәселелеріне де ерекше мән беруді міндеттеді. Себебі жоспарланған жұмыс орындарының бүгінде тек 36,6 пайызы ғана ашылған. Жоспарланған 3 011 жаңа жұмыс орынның бар болғаны 1101 ашылса, оның ішінде тұрақтысы 256 немесе 23,3% ғана орындалған.
Аймақ басшысы ауданда жеңіл өнеркәсіпті дамытуға бағытталған жобалардың жоқтығын айтып, аудан әкімінің жұмысын сынға алды. Бірқатар ауылдарда шағын кәсіптерді дамытуда нақты нәтижелер аз екенін ашып айтты.
<blockquote>
 «Ауданда 2 мыңнан 5 мыңға дейін халқы бар 6 ауылдық округ пен кент бар, бірақ олардың біреуінде қарапайым халыққа қажетті наубайхана, тігін цехы, шаштараз, техникалық жөндеу орталықтары жоқ. Осы қызмет түрлерінің қызметін дамыту қажет», – деді Нұрлыбек Нәлібаев.
</blockquote>
Ауданға инвестиция тарту мәселесі де мардымсыз. Аймақ басшысы қолда бар ресурстардың толыққанды пайдаланылмайтынын айтып, қаржы тарту мәселесін жандандыру қажет екенін ескертті.
<blockquote>
 «Арал өңірі жер қойнауы сирек кездесетін минералдық ресурстарға бай өлке. Балық пен тұз шаруашылығына сене бермей, неге басқа салаларды дамытуға күш салмасқа? Негізгі қорларды пайдаланып, осы салаларға әлеуетті инвесторлар тарту қажет. Бүгінгі күні аудан жер қойнауын пайдалануда бар мүмкіндікті пайдаланбауда. Мұнан бөлек, басқа аудандарға қарағанда Арал өңірі мал және балық шаруашылығына көп бейімделген. Дегенмен, биылғы жылы су үнемдеу технологияларын қолдану арқылы мал азықтық және көкөніс, бақша дақылдарын егу қолға алынғанымен, алдағы уақытта олардың көлемін ұлғайу қажет. Облыс бойынша бірінші болып жаңбырлатып суару әдісінің жаңа технологиясын тәжірбиеге енгіздіңіздер. Бұл өте қажетті жоба және басқа аудандарда осындай әдістерге көшу қажет», – деді облыс әкімі.
</blockquote>
Жиында құрылыс саласынадағы өзекті мәселелер де талқыға түсті. Қазіргі таңда аудан көлемінде барлық қажетті инфрақұрылым тартылған 711 жер учаскесі әзірленген. Алайда оның 176 жер учаскесінде тұрғын үйлер бой көтерсе, қалған 535 учаске игерілмеген. Ауданды газдандыру бойынша да бірқатар мәселелер бар. Мәселен, Арал қаласында газбен жабдықтау нысандарын пайдаланушы мекеменің теңгеріміне өткізу бойынша жұмыстар атқарылмаған, елді-мекендерді газдандыру көрсеткіші де өте төмен. Аймақ басшысы жоғарыдағы көтерілген мәселелерді жеке бақылауға алып, олардың сапалы әрі мерзімінде орындалуын қамтамасыз етуді қатаң тапсырды. 
Мұнан бөлек, арнайы жиында ауданның кадрлық әлеуеті, қағамдық-саяси ахуал мен қауіпсіздік мәселесі кеңінен талқыланды.
Жиын соңында облыс әкімі Нұрлыбек Нәлібаев айтылған өзекті проблемалық мәсәлелер мен орын алған кемшіліктерді шешу, қалыпан келтіру бойынша аудан әкімі мен жауапты сала басшыларына міндеттемелер жүктеді. Бұдан былай 9 айдың қорытындысымен бұл көрсеткіштер қайта қаралып, жауапты мамандардың жұмысы сарапқа салынатынын еске салды.
<img src="https://kyzylorda-news.kz/wp-content/uploads/2022/08/serik.jpg" alt="" />
<img src="https://kyzylorda-news.kz/wp-content/uploads/2022/08/aral.jpg" alt="" />

Аймақ басшысы Аралда жеңіл өнеркәсіпті дамытуға бағытталған жобалардың жоқтығын айтты

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев солтүстік аудандардың әлеуметтік-экономикалық даму көрсеткіштерін талдауға арналған арнайы жиында Қазалы ауданының әкімі Мұхтар Оразбаевтың есебін тыңдады.
Өткен жылмен салыстырғанда ауданда макроэкономикалық көрсеткіш біршама төмендеген. Рейтингте Қазалы 7 орынды алып, төмен даму динамикасын көрсетті. Айталық, ет өндіру 23,9 пайызға, балық өңдеу 19,9 пайызға, құрылыс конструкциялары 22,4 пайызға төмендеген. 
Облыс әкімі ауданда салынған тұрғын үйлерді сату жұмыстары баяу жүргізілгенін айтып, сала басшыларын сынға алды. Айталық, пәтер сатудан түсетін түсім бойынша 382,1 млн. теңге жоспарланып, бүгінгі күнге бірде бір үй сатылмаған.
Аймақ басшысы аудан әкімі тарапынан жергілікті өндіріске тиісті талдау жасалмағандықтан, корпоративтік табыс салығы өткен жылмен салыстырғанда 22,8%-ға азайғанын жеткізді.
Ауданда жаңа жұмыс орындарын көбейту керек. Бүгінде жоспарланған 2956 жаңа жұмыс орынның 1470-і немесе 49,7% орындалған. Нұрлыбек Нәлібаев бұл бағытта ілгерілеу барын жеткізді. Әйтсе де, тұрақты жұмыс орындарын көбейту қажет.
Қазалы кәсіпкерлік саласында қарқынды әлеуетке ие аудан. Сауда-саттық дамыған өңір болғанымен, соңғы кездері шағын және бизнес саласында көрсеткіштер көңіл көншітпейді. Мәселен, жыл басынан бері кәсіпкерлер саны 135 бірлікке немесе 2,5 пайызға азайған.
<blockquote>
 «Ауданда халық саны 3 мыңға жуықтайтын Майдакөл, 2 мыңның шамасында Аранды, Майлыбас, Алға ауылдық округтерінде кәсіпкерлерінің саны 100-ге де жетпейді. Олардың қасында халық саны 1,7 мыңды құрайтын Құмжиек ауылында 142 адам кәсіп жасап, күн көріп келеді. Майдакөлде 1,5 мың тұрғын, қалған Аранды, Майлыбас, Алға ауылдарында 300-450 арасында азаматтар өзін-өзі жұмыспен қамтыған. Неліктен осы азаматтарды ресми тіркеп, кәсіпкерлікке тартпайсыздар? Бұл ауылдарда халықтың бірінші қажеттілігін өтейтін қарапайым монша, шаштараз қызметтері, наубайхана, тігін цехтары жолға қойылмаған», – деді Н.Нәлібаев.
</blockquote>
Өндірістік бағытта да жобалардың бәсеңдеуі байқалады. Индустрияландыру бағдарламасының үш бесжылдығы аясында Картаға тек 4 жоба енгізілген, оның 2-уі іске қосылған, қалған екеуі жүзеге асырылуда.
<blockquote>
 «Өзі айналдырған 2 жоба, оның біреуінің мәселесін шеше алмай отырсыздар. Жеке кәсіпкер «Игіліковтің», «Балық қалдықтарынан жасалған балық ұнын өндіру цехы» жобасы іске қосылғанымен, 1 жылдан бері газ жеткізу мәселесі шешілмеген. Бағдарлама аясында 15 жылда 4 жоба енгізілген. Бұл бағыттағы жұмыстар мардымсыз», – деді облыс әкімі.
</blockquote>
Табыс көрсеткішін еселеуде аудан бойынша 6 шет мемлекетке 2421 тонна күріш, 3 шетелге 557 тонна балық өнімі мен 561,5 тонна қамыс экспортталған. Дегенмен, азық-түлік бағаларын тұрақты ұстауда ауданның өзі өндіретін өнімдер бағасының қымбаттау фактілері де жоқ емес. Облыс әкімінің тапсырмасына сәйкес, азық-түлік қауіпсіздігін қамтамасыз ету мақсатында Қазалы ауданындағы тұрғылықты халықтың санына сәйкес өзін-өзі әлеуметтік маңызы бар бақша өнімдерімен қамтылуы үшін қосымша 450 гектар егістік жер дайындалуы тиіс. Әйтсе де, бүгінгі күнге тек 114 гектар жер дайындалып, 581 отбасына табысталған.
<blockquote>
 «Жасыратыны жоқ, азық-түлік өнімдерін кейбірін сырттан алуға мәжбүрміз. Қостанайдан сәбіз, Павлодардан картоп алдырып келеміз. Қызанақ пен қиярдың өзін көрші Түркістаннан тасимыз. Мұндай жағдайда азық-түлік бағасын тоқтату қиын. Сондықтан да бос жатқан жерлерді икемдеп, егін егуге қабілетті отбасыларға беріп, бақша дақылдарын егу туралы тапсырма бердім. Қазалы ауданында бұл үшін барлық мүмкіндік бар. Сондықтан келер жылы егілетін өнімдерді алдын ала жоспарлап, дайындықты осы кезден бастау керек», – деді Нұрлыбек Нәлібаев.
</blockquote>
Жиында инвестиция тарту мәселесі де шет қалмады. Өзге аудандар секілді Қазалыдада меже өз деңгейінде емес. Жыл қорытындысымен облыс оң нәтижеге қол жеткізу үшін Қазалы ауданына 16,5 млрд. теңге инвестиция тартылуы қажет. Бүгінгі күнге 5,7 млрд. теңге инвестиция тартылған. Бұл небәрі жоспардың 34,5 пайызын құрайды.
Арнайы отырыста ауданның кадрлық әлеуеті де сөз болды. Облыс әкімі бір орында 10-15 жылдан бері табан аудармастан қызмет атқаратын басшылардың жұмысына талдау жүргізу қажет деді. Сондай-ақ, қылмыстылық деңгейін түсіру, алаяқтылыққа жол бермеу үшін идеологиялық жұмыстарды күшейтуді тапсырды.
Айта кетейік, 9 ай қорытындысымен ауданның әлеуметтік-экономикалық даму көрсеткіштері қайта қаралып, салалар бойынша кемшілік жіберген басшылардың қызметтік жұмысына талдау жүргізіледі.
<img src="https://kyzylorda-news.kz/wp-content/uploads/2022/08/297366437_355710776750173_1207563935694942575_n.jpg" alt="" />

Қазалы ауданында тұрақты жұмыс орындарын көбейту қажет

<a href="https://kyzylorda-news.kz/">Kyzylorda-news.kz.</a> Үкімет басшысы Әлихан Смайловтың төрағалығымен санитариялық-эпидемиологиялық жағдай және «Қуатты өңірлер – ел дамуының драйвері» ұлттық жобасын іске асыру барысы қаралған жиын өтті. Отырысқа онлайн режимде бірқатар министрлер мен барлық өңірдің әкімдері қатысты.
Жиында ведомоство басшылары тарапынан ауыз су желілері бойынша Қызылорда мен Павлодар облыстары оң нәтиже көрсеткен аймақтар қатарына енгенін атап өтті.
Үкімет отырысынан кейін облыс әкімі жауапты сала басшылары мен қала, аудан әкімдеріне бірқатар нақты тапсырмалар жүктеді.
Аймақ басшысы алдымен аймақтағы эпиджағдайды қатан бақылауға алып, вирустың жаппай таралуына жол бермеу бойынша шаралар қабылдауды тапсырды. Сонымен қатар «Қуатты өңірлер – ел дамуының драйвері» ұлттық жобасына қатысты жіберілген кемшіліктерге сын айтып, қала, аудандардағы жобалардың жұмыстарына жеке-жеке тоқталып, атқарылған істің мардымсыз екенін тілге тиек етті.
Ұлттық жоба аясында Қызылорда облысына биылғы жылға республикалық бюджеттен және Ұлттық қордан 22 млрд. теңге қаржы бөлінді. 2022 жылдың 1 тамызына жылдық жоспардың игерілуі небәрі 33,8%-ы ғана құрады.
Шағын қалаларды дамыту аясында 4 жобаны іске асыруға қаралған 348,5 млн. теңгенің небәрі 72 млн. теңгесі немесе жылдық жоспардың 20,8%-ы игерілген.
Мәселен, Арал мен Қазалы аудандарындағы 3 жоба бойынша құрылыс жұмыстары әлі басталмаған. «Ауыл-Ел бесігі» жобасы бойынша да игерілу көрсеткіші төмен болуда. Жаңақорған, Шиелі, Сырдария аудандары мен Қызылорда қаласында жылдық жоспардың игерлуі жартысына да жуықтамаған. Ең төменгі көрсеткіш Жаңақорған мен Шиелі аудандарында.
<blockquote>
 «Нұрлы жол» және «Нұрлы жер» мемлекеттік бағдарламаларына бөлінген қаржының игерілуі де төмен деңгейде. Басқа өңірлермен салыстырғанда біз ең аз қаржыны алдық. 2022 жылы біздің аймағымызға бөлінген аз қаржыны игермеу не кеш игеру ол жұмысымызға үлкен сын. Құрылыс жұмыстарын жүргізу уақытына қолайлы 3 ай мерзім ғана қалды. Күн суытқаннан кейінгі жұмыстардың сапасы дұрыс болмайтындығы белгілі. Сондықтан, жауапты басқарма басшылары, қала, аудандар әкімдері жетекшілік ететін салаларыңыз бойынша құрылыс-монтаж жұмыстарын 2-3 айдың ішінде аяқтау бойынша шараларды қабылдаңыздар. Тез игеремін деп жұмыстың сапасы төмендеп кетпесін. Бақылауда ұстаңыздар», – деді Н.Нәлібаев.
</blockquote>
<img src="https://kyzylorda-news.kz/wp-content/uploads/2022/08/297238002_355654946755756_3151797501301486898_n.jpg" alt="" />

Нұрлыбек Нәлібаев: Басқа өңірлермен салыстырғанда біз ең аз қаржыны алдық

<a href="https://kyzylorda-news.kz/">Kyzylorda-news.kz.</a> Қазақстанда өткен бір тәулікте коронавирус инфекциясынан 2290 адам жазылып шықты, деп хабарлайды COVID-19 таралуына жол бермеу жөніндегі ведомствоаралық комиссия.
Өңірлер бойынша:
Нұр-Сұлтан қаласында – 860,
Алматы қаласында – 623,
Ақтөбе облысында – 44,
Алматы облысында – 95,
Жетісу облысында – 53,
Атырау облысында – 15,
Шығыс Қазақстан облысында – 18,
Абай облысында – 13,
Жамбыл облысында – 53,
Батыс Қазақстан облысында – 29,
Қарағанды облысында – 212,
Ұлытау облысында – 44,
Қостанай облысында – 33,
Қызылорда облысында – 146,
Маңғыстау облысында – 32,
Павлодар облысында – 15,
Түркістан облысында – 5.
Өткен тәулікте Қазақстанда инфекцияны 2661 адам жұқтырды.
Жалпы пандемия басталғалы елде коронавирус 1 357 276 адамнан анықталса, соның ішінде 1 316 110 адам сауығып шықты.

Covid-19: Қызылордада 146 адам індеттен айықты

<a href="https://kyzylorda-news.kz/">Kyzylorda-news.kz.</a>&nbsp;Қазақстанда 2 тамызда коронавирус инфекциясы 2661 адамнан анықталды, деп хабарлайды COVID-19 таралуына жол бермеу жөніндегі ведомствоаралық комиссия.
Өңірлер бойынша:
Нұр-Сұлтан қаласында – 949,
Алматы қаласында – 446,
Шымкент қаласында – 51,
Ақмола облысында – 101,
Ақтөбе облысында – 70,
Алматы облысында – 77,
Жетісу облысында – 57,
Атырау облысында – 44,
Шығыс Қазақстан облысында – 28,
Абай облысында – 41,
Жамбыл облысында – 25,
Батыс Қазақстан облысында – 98,
Қарағанды облысында – 344,
Ұлытау облысында – 8,
Қостанай облысында – 81,
Қызылорда облысында – 58,
Маңғыстау облысында – 47,
Павлодар облысында – 71,
Солтүстік Қазақстан облысында – 46,
Түркістан облысында – 19.
Айта кетейік, 1 тамызда инфекция 2021 адамда тіркелген болатын.
Жалпы пандемия басталғалы коронавирусты еліміз 1 357 276 адамнан анықталды.

Қызылордада тағы 58 адам коронавирус жұқтырды

<a href="https://kyzylorda-news.kz/">Kyzylorda-news.kz.</a> Қазақстан территориясының басым бөлігі атмосфералық фронттардың ықпалында болады. Фронттар солтүстіктен оңтүстікке ауыса отырып, жаңбыр жауғызады, салдарынан найзағай ойнап, екпінді жел соғады, деп хабарлайды Қазгидромет.
Күндіз орталықта, оңтүстік-шығыстың таулы аудандарында қатты жаңбыр жауады, батыста, шығыста, оңтүстік-шығыста бұршақ жаууы мүмкін. Түнде және таңертең республиканың солтүстігінде, солтүстік-батысында тұман түседі.
Еліміздің оңтүстік-батысында, солтүстігінде антициклон сілемі бар жерлерде жауын-шашын тоқтайды.
Күндіз Қарағанды облысының шығысында, орталығында, Жамбыл облысының таулы аудандарында қатты жаңбыр жауады.
Күндіз Атырау облысының басым бөлігінде қатты ыстық сақталады.
Қызылорда облысының басым бөлігінде, Абай облысының оңтүстігінде, Атырау облысының солтүстігінде төтенше өрт қаупі сақталады.

Сәрсенбі күнге арналған ауа райы болжамы

Kyzylorda-news.kz. Бүгін ішкі істер органдарында орын алған кадрлық өзгеріске байланысты облыс активі өтті. Жиынға арнайы келген ҚР Ішкі істер министрінің бірінші орынбасары Марат Қожаев Қызылорда облыстық полиция департаментінің бастығы болып тағайындалған Мұхтар Қожабаевты таныстырды.
Жиында облыстық полиция департаменті ардагерлер кеңесінің төрағасы Серікбол Тұңғышбаев жаңа басшыға қолдау білдіріп, табыс тіледі. 
Актив отырысында өңір басшысы Сыр еліне арнайы келген Марат Қожаевқа алғысын білдіріп, ішкі істер органдарының мемлекеттік биліктің қоғамда құқық тәртібін, азаматтардың қауіпсіздігін қамтамасыз ететін маңызды құрылым екенін атап өтіп, Мұхтар Аманқұлұлына жаңа қызметте сәттілік тіледі.
<blockquote>
 Асқан жауапкершілікті талап ететін күрделі салада Мұхтар Аманқұлұлының білімі мен білігі, жинақтаған мол тәжірибесі жетеді деп санаймыз және бұл кадрлық шешімді толық қолдаймыз. 
 Мұхтар Аманқұлұлы өңірдегі қоғамдық тәртіпті сақтауға және қоғамдық қауіпсіздікті қамтамасыз етуде, қоғамның және мемлекеттің мүдделерін құқыққа қарсы қолсұғушылықтан қорғауда және аймағымыздың дамуына өз тарапынан үлес қосады деп сенім артамыз,– деді Нұрлыбек Нәлібаев.
</blockquote>
Құқық бұзушылықтардың алдын алу мақсатында 2020-2022 жылдар аралығында полиция органдарының материалдық-техникалық базасын жақсартуға облыстық бюджеттен 5 млрд.теңгеден аса қаражат бөлінді. 
Биыл полиция департаменті қызметкерлеріне 92 қызметтік автокөлік табысталды. Сондай-ақ, сақшылардың қызмет барысын оңтайлы етуге мүмкіндік беретін соңғы үлгідегі бейнебақылау камералары мен жылдамдық режимін бақылау стационарлық жүйелері орнатылды. 
Кешенді шаралардың нәтижесінде биылғы жылдың 6 айында жалпы тіркелген қылмыстық құқық бұзушылықтар 5% азайған.
Мұхтар Қожабаев 1968 жылы 17 тамызда дүниеге келген. Білімі жоғары. Еңбек жолын 1987-1989 жылдары Қарулы күштер қатарында қызмет атқарды. 
1992-1993 жылдары – ІІБ МАИ жол-патрульдік қызметінің жеке батальонының жол-патрульдік полициясының инспекторы. 
1993-1997 жылдары – БӨП ЖПҚ аға инспекторы, Келесауданы ІІБ МАИ бөлімшесінің және Сарыағаш ауданы ІІБ мемлекеттік автоинспекторы; 
1997-1999 жылдары – Сарыағаш ауданы ІІБ Жол полициясы бөлімшесінің бастығы, полиция бөлімінің бастығы. 
1999-2004 жылдары – Мақтарал ауданы ІІ Бекінші полиция бөлімінің ӘПЖН бастығы. 
2004-2006 жылдары – ІІМ Жол полициясы департаменті мемлекеттік автомобиль инспекциясы басқармасының тіркеу-емтихан жұмысының бас маманы. 
2007-2008 жылдары – Оңтүстік Қазақстан облысы ІІД басқарма бастығының орынбасары, патрульдік қызмет бөлімінің бастығы, Жол полициясы басқармасының бастығы. 
2009 жылғы наурыздан қарашаға дейін – Шымкент қаласының Ішкі істер басқармасы бастығының орынбасары. 
2009-2015 жылдары – Оңтүстік Қазақстан облысы Ішкі істер департаменті тылдық қамтамасыз ету басқармасының бастығы. 
2015-2018 жылдары-Оңтүстік Қазақстан облысының Ішкі істер департаменті бастығының орынбасары. 
2018 жылдың шілде – қараша айлары-Түркістан облысының Ішкі істер департаменті бастығының орынбасары. 
2018 жылдың қараша айынан – Түркістан облысы Полиция департаменті бастығының орынбасары қызметтерін абыроймен атқарған.
<img src="https://kyzylorda-news.kz/wp-content/uploads/2022/08/fb_img_1659451864735.jpg" alt="" />
<img src="https://kyzylorda-news.kz/wp-content/uploads/2022/08/fb_img_1659451069207.jpg" alt="" />

Қазақстан және Қызылорда облысының жаңалықтары