<a href="https://kyzylorda-news.kz/">Kyzylorda-news.kz.</a> Қазақстан спортшылары Түркия елімінің Конья қаласында өтіп жатқан Ислам ынтымақтастығы ойындарына қатысып жатыр.
Халықаралық жарыста ел намысын 125 спортшы қорғап, жоғары нәтижелер көрсетуде.
Биылғы жылдың 14-15 тамыз күні өткізілген ауыр атлетикада Шиелі ауданының мақтанышы Айзада Мүптілда чемпион атанып, Бектай Асылжан қола жүлдеге ие болды.
Айта кетейік, Айзада Мүптілда +87 келі салмақта серпе көтеруден 116 келі, жұлқа көтеруден 150 келі көрсеткішпен Ислам ойындарының рекордын орнатты. Қос сайыс қорытындысы бойынша 266 келіні бағындырған Айзада алдына жан салмай, чемпиондық тұғырға көтерілді.
Бектай Асылжан 89 келі салмақ дәрежесінде өнер көрсеткен спортшыз жұлқа көтеруден 162 келі көтеріп, күміс еншілесе, серпе көтеруден 191 келі еңсеріп, қола иеленді. Қос сайыста 353 келі көтеріп жүлделі 3-орынды жеңіп алды. Осылайша ауданның қос спортшысы өзге елде ел намысын қорғады.
Атап өтсек, қос спортшының Шиелі ауданындағы алғашқы жаттықтырушысы спорт саласының ардагері Тоқбаев Қалдыбай Махмұтұлы болатын.
«Спортты дамыту дирекциясы» РМҚК-ның мәліметіне сәйкес, ауыр атлеттер Қазақстан құрамасы қоржынына 8 алтын, 15 күміс, 3 қола жүлде салды.
<img src="https://kyzylorda-news.kz/wp-content/uploads/2022/08/299802403_1374468263083629_7684350337094451963_n.jpg" alt="" />
<img src="https://kyzylorda-news.kz/wp-content/uploads/2022/08/299890103_1374468373083618_2135195946838614449_n.jpg" alt="" />

Ауыр атлет Айзада Мүптілда мен Бектай Асылжан Ислам ойындарының жеңімпазы атанды

<a href="https://kyzylorda-news.kz/">Kyzylorda-news.kz.</a> Арал ауданының әкімі Серік Сермағамбетов ауданның Сыр беткейіне жасаған сапары барысында «Жамбыл» шаруа қожалығының егістік алқабында барды.
Өткен жылы өңірдегі қуаңшылық қиындығын еңсеру мақсатында «Жамбыл» ауылшаруашылығы өндірістік кооперативіне МТЗ-80 техникасы барлық құрылғыларымен бірге алынып берілген болатын. Бұл техниканың бұған дейін шабындық алқаптарындағы шөпті ору үшін тигізген пайдасы зор болды.
Көктем мезгілінен бастап шаруақожалығы аталған техникамен 12 гектар жерді жыртып, бақша дақылдарын орналастырған болатын. Жаз бойы күтіп-баптау нәтижесінде қазір қауын-қарбыз, жуа, сәбіз, картоп, асқабақ дақылдары өнім беруде. Тағы бір айта кетерлігі егістік алқаптары трактор техникасы арқылы суарылуда. Алғашқы өнімдерін ала бастаған шаруа қожалығы алдағы уақытта жер көлемін ұлғайтуға ниетті. Егістік басында болған аудан әкіміне шаруаларға еңбегінің берекесін көруіне тілектестік білдірді.
Мұнан кейін аудан басшысы Аманөткел өңіріндегі «Ақшақыз» және Жаңақұрылыс ауылдық округіне қарасты «Ералы» каналына жүргізіліп жатқан жөндеу жұмыстарын көрді. Ақшатау көлдер жүйесін суландыру үшін маңызы зор «Ақшақыз» каналын жөндеу жұмыстары жақын арада бастау алды. Каналдың 8,6 шақырымы қазылып, тазаланып, арнасы ұлғайтылады.
Мұнымен қоса, су реттеуге арналған бір көзді су тоспасы салынатын болады.
Ал шабындық алқаптарды суландыруға арналған «Ералы» каналын тазалау жұмыстары өткен жылы басталды. Қазір каналдағы құрылыс аяқталуға таяу.
Аудан әкімі ауылдық округ әкімдеріне каналдарды тазалау жұмыстарының сапалы жүргізілуін бақылауды тапсырды.
<img src="https://kyzylorda-news.kz/wp-content/uploads/2022/08/fb_img_1660651211684.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660651207685.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660651215726.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660651220364.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660651225917.jpg" alt="" />

Серік Сермағанбетов каналдарды жөндеу жұмыстарын бақылады

Мектеп формасы: Бір балаға қанша қаржы жұмсалады?

<a href="https://kyzylorda-news.kz/">Kyzylorda-news.kz.</a> Арал ауданының әкімі Серік Сермағамбетов Сырдария өзені бойында орналасқан Жетес би, Райым, Аманөткел және Қосжар ауылдық округтерінде халықпен кездесіп, жергілікті жердегі өзекті мәселелерді тыңдады.
Ауыл тұрғындарымен өткен кездесуде аудан басшысы өлкедегі оң өзгерістерге тоқталып, алдағы жоспарлармен де бөлісті. Президент тапсырмасына сәйкес, негізгі жұмыс халықты қажетті инфрақұрылыммен, яғни ауыз су, электр энергиясы, жылу, жолмен қамтамасыз етуге бағытталғанын айтып өтті.
Аудан 2022 жылдың алты айының қорытындысымен облыс бойынша үшінші орынға тұрақтаған. Негізгі макроэкономикалық көрсеткіштер толық орындалған. Елді мекендердің сексен пайызы ауыз су мен қамтылса, Ақбасты және Абай, Тоқабай ауылдарына ауыз су құбырын тартуға арналған өтпелі негізде жүзеге асатын ірі жоба бастау алды. Сонымен бірге Бекбауыл елді мекеніне дейінгі, Қаратерең-Жаңақұрылыс, Бөген-Ақлақ, Қызылжар елді мекеніне кіре беріс, Қызылжар-Шөмішкөл бағытындағы автокөлік жолдары жөндеуден өткізіу үшін тиісті қаржы бөлініп, жақын күндері жұмыстар басталатындығын жеткізді. Мұнымен қоса, Сазды елді мекеніне кіре беріс жол жөнделіп жатса, Аманөткел елді мекеніндегі Хан көпірін жөндеуден өткізу жұмыстары биылғы жылы басталатынын білдірді. Сондай-ақ, Арал қаласындағы аспалы темір жол өткелі, кәріз су жүйесіне арналған жобалар әзірленіп, қаржыландыруға ұсынылған.
Ауылшаруашылығын дамытуға арналған Жол картасы бекітіліп, егін, егуге айрықша мән беріліп, мал және балық шаруашылығымен айналысушыларға мемлекет тарапынан белгіленген субсидия берілуде.
Білім беру саласына қатысты Жақсықылыш кенті мен Тоқабай, Бөген, Атанши елді мекендерінде жеке кәсіпкерлер тарапынан балабақша құрылысы жүргізіліп жатса, Арал қаласынан жеке мектеп салынуда.
Аудан әкімімен өткен кездесуде Жетес би ауылдық округінің тұрғындары дария суын тиімді пайдалану үшін арнайы көпір салу мен шлюз орнатуды ұсынса, ауыл маңындағы көл суларының қайтпауы себебінен пішен оруға қиындық тудыратынын айтты. Мұнымен бірге балаларға арналған үйірмелер көбірек ашылса, спорт кешені салынса деген ұсыныстарын да жеткізді.
Балаларға арналған қосымша білім беру орталықтарын ашу, спорт кешендерін салу бәсекелестік ортаға беріліп, жеке кәсіркерлер арқылы шешімін тауып жатқандығы түсіндірілді. Сонымен бірге, Сырдария өзені бойындағы барлық су тоспалары ашылып, теңізге құйылып жатқаны айтылып, дария бойынан ауылға берілетін суды реттеу үшін шлюз орнату мәселесі де назарға алынатын болды. Ал Қызылжар халқы жол мәселесі шешімін табатындығына ризашылықтарын жеткізіп, ауылды абаттандыру, көгалдандыру шараларын жандандыруды ұсынып, Шөмішкөл елді мекенінде электр тогының қуаты аз екендігін айтты.
Ауылды абаттандыру қаржыны үнемдеу арқылы жүзеге асырылатындығы жеткізіліп, ауыл әкіміне барлық мүмкіндіктерді қарастырып, тиісті жұмыстар жүргізу жүктелді.
Кездесу мұнан кейін Аманөткел ауылдық округінде жалғасты.
Мұнда тұрғындар тарапынан ауылішілік жолдарды асфальттау, Хан елді мекеніне барар жолдың сапасыздығы, электр желісінің нашарлығы айтылды.Ауылішілік жолдарға байланысты жоба әзірленіп, қаржыландырылуы үшін облыстық басқармаларға өтінім берілген, қаржы берілсе алғашқы көшелерді асфальттау басталатындығы жеткізілді. Ал Хан елді мекеніне барар жол уақытша көлік қатынасына жеңіл болуы үшін тегістелетін болды. Аудан әкімінің Сыр бойындағы ауылдарға жасаған сапары Қосжар ауылдық округінде түйінделді. Алдымен №67 орта мектебінің жылу беру маусымына дайындық барысын бақылап шықты.
Қосжарлықтар ішкі көшелерге жол салу, «Қамыстыбас» питомнигіне жөндеу жұмыстарын жүргізу, ауыл әкімшілігі ғимаратының ескіргендігін жеткізді.
Аудан басшысы ауылішілік көшелерді асфальттау үшін жоба әзірленіп, тиісті жұмыстар атқарылатынын айтты.
Ал балық питомнигі республикалық мекеме болғандықтан, басшылығына ұсыныс хат жолданатын болды. Ауылдағы әкімшілік ғимаратын жаңалау да назарға алынатындығын айтып, жеке кәсіпкерлер арқылы ғимарат құрылысын жүргізу тиімді болатындығын айтты.
Атап өтейік, бірнеше елді мекенде ток қуатының аздығы, электр желілерін жаңарту мәселелері көтерілді. Бұл бойынша барлық ауылдар толық зерделеніп, жоба-сметалық құжаттамалар әзірленуде. Қазіргі уақытта кезектілігімен жаңартылып жатқаны түсіндірілді.
Аудан әкімі ауылдық округтерге жасаған сапары барысында тұрғындарды жеке мәселелері бойынша да қабылдады. Қабылдауға жазылғандар жұмысқа орналасу мәселесімен жүгінді. Тұрғындар мәселесін тыңдаған аудан басшысы ауылдық округ әкімдері мен жауапты бөлім басшыларына заңдылыққа сәйкес жұмысқа алу тәртібімен барлық мүмкіндіктерді қарастыруды жүктеді.
<img src="https://kyzylorda-news.kz/wp-content/uploads/2022/08/fb_img_1660649469771.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660649481436.jpg" alt="" />

Арал ауданының әкімі ауыл тұрғындарының ұсыныс-пікірлерін тыңдады

<a href="https://kyzylorda-news.kz/">Kyzylorda-news.kz.</a> Бүгін Қызылорда қаласының әкімі Асылбек Шаменов Тасбөгет, Белкөл кентінің тұрғындарымен кездесіп, ондағы атқарылып жатқан ілкімді істердің барысына куә болды.
Кент және ауылдық округ тұрғындарымен кездесу бағдарламасына сәйкес, шаһар басшысы әуелі Белкөл кентіне ат басын бұрып, кенттегі жас жеткіншектерді спортқа баулу мақсатында ашылған «Белкөл» спорттық сауықтыру кешенінің жұмысымен танысты.
Мұндағы 4 жаттығу залында 8 үйірме тұрақты жұмыс жасауда. Жас өрендер еркін күрес, джиу-джитсу, қазақша күрес, дзюдо, каратэ, үстел теннисі, шахмат т.б. спорт түрлерін меңгеріп, салауатты өмір салтын ұстануда. Кешен меңгерушісінің ендігі межесі тағы бір жабық спорттық нысанның құрылысын жүргізіп, футбол алаңын ашу. Ол үшін арнайы жері белгіленген.Белкөл кентінің тұрғындарының игілігіне берілетін келесі нысан – теміржол арқылы өтетін жаяу жүргіншілер көпірі. Ұзындығы 108, биіктігі 8 метрлік көпір құрылысы биылғы жылдың ақпан айында басталған. Шойын жолдың екі бетін жағалай қоныстанған халық үшін ауадай қажет бұл көпір қазан айында пайдалануға беріледі деп жоспарлануда.
Нысандарды аралап болған соң қала басшысы Асылбек Шаменов кент тұрғындарымен жүздесті. Бұл кездесуде белкөлдіктер бірқатар ұсыныстарын жеткізді. Халықтың талап-тілегін тыңдаған қала әкімі көтерілген мәселелердің мүмкіндігінше тез шешілу жолдары қарастырылатынын атап өтті.
Тасбөгет кентінде де бірқатар әлеуметтік нысандар бой көтеріп, құрылыс қарқынды жүруде. Бұл жолғы аралауда қала әкімі алдымен «Қызылорда строй монтаж» темір-бетон өнімдері цехына барды. Александр Ким басқаратын цех 11 адамды жұмыспен қамтып отыр. Цехта бетонды құдықтар, рабица торшалары, өзге де құрылыс материалдары шығарылуда. Шаһардағы құрылыстарға кәсіпорын дайын әрі сапалы өнімдерін ұсынып, кәсіпті ілгерілетуде.
Цех жұмысына сәттілік тілеген Асылбек Өмірбекұлы ары қарай Орталық саябақ жанында жеке кәсіпкердің бастамасымен салынып жатқан биометриялық зертхананың, «Құддыс ишан» мешітінің, 53 пәтерлік бес қабатты тұрғын үйдің құрылысымен танысты. Жұмыстардың барысын бақылаған қала әкімі мердігерлерге нысандардың барлығы сапалы болуы керектігін тапсырды.
Тұрғындармен жүздесу №11 мектеп-лицейдің алдында өтті. Қала әкімімен кездесуде тұрғындар жер беру кезегі, қоғамдық көлік қатынасын реттеу, жаңа емхана салу қажеттілігі туралы өзекті мәселелерді көтерді. Шаһар басшысы талап-тілектердің ескерусіз қалмайтындығын, айтылған ұсыныстарға байланысты нақты шаралар қабылданғандығын жеткізді.
<img src="https://kyzylorda-news.kz/wp-content/uploads/2022/08/fb_img_1660650612805.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660650596069.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660650598907.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660650606538.jpg" alt="" />

Асылбек Шәменов Тасбөгет пен Белкөл кентінің тұрғындарымен кездесті

<a href="https://kyzylorda-news.kz/">Kyzylorda-news.kz.</a> Бүгін Арал ауданының әкімі Серік Сермағамбетов мемлекеттік кірістер органдарының қызметкерлерін кәсіби мерекелерімен құттықтады.
Аудан әкімі мемлекеттік кірістер органдарының қызметкерлері халықтың құқықтық білімін арттыру, қоғамдағы әлеуметтік тұрақтылықты дамытуға үлес қосуына міндетті екенін атап өтті. Сонымен қатар биылғы жылдың екінші жартыжылдығында жоспар 108 пайызға орындалғанын айтты.
<blockquote>
 «Қоғамдағы әлеуметтік тұрақтылық, халықтың құқықтық білімін арттыру, бюджетке түсетін салық түсімдерін бақылау – мұның бәрі мемлекеттік кірістер органдарының басты міндеттері. Аудандық мемлекеттік кірістер органдарының қызметкерлері де бұл мақсатты орындауға өздерінің үлестерін қосуда. Мәселен, ағымдағы жылдың екінші жартыжылдығында жергілікті бюджеттің жоспары 108 пайызға орындалып, қазынаға 2 млрд. 438 млн. теңге түскен. Әрдайым абырой биігінен көрініп, ел игілігіне қызмет ете беретіндеріңізге сенемін», – деген аудан әкімі ауданның дамуы мен өсіп-өркендеуіне, халықтың әл-ауқатының одан әрі жақсаруына тигізген еңбектерін жоғары бағалайтынын айтып өтті.
</blockquote>
Кәсіби мерекеге орай аудандық кірістер басқармасының бірқатар қызметкерлеріне аудан әкімінің құттықтауы табысталды.
<img src="https://kyzylorda-news.kz/wp-content/uploads/2022/08/fb_img_1660649029636.jpg" alt="" />

Арал ауданында салық қызмеркерлері марапатталды

<a href="https://kyzylorda-news.kz/">Kyzylorda-news.kz.</a> Жыл басынан бері аймақта алаяқтық қылмыстардың 529 дерегі тіркелген. Жалпы облыс аумағында бұл санаттағы қылмыстар азайғанмен, интернет-алаяқтық мәселесі көбеюде. Бұл туралы өңірлік коммуникациялар қызметінде өткен брифинг барысында Қызылорда облысының полиция департаментінің криминалдық полиция басқармасының аға жедел уәкілі Данияр Денесұлы мәлімдеді.
<blockquote>
 «Осы жылдың 7 айында алаяқтық қылмыстарының 529 дерегі тіркелсе, оның 288 дерегі интернет-алаяқтық қылмыстары құрайды. Бүгінде алаяқтар жиі қолданатын алдау тәсілдерінің бірі – ұялы телефонға хабарласып, өзін банк қызметкері ретінде таныстырып, жәбірленушіні әртүрлі тәсілдермен алдау арқылы атынан несие рәсімдетіп немесе есепшотындағы қаражатын бейтаныс тұлғалардың есепшоттарына аудартып алу. Осыған ұқсас жағдай, өздерін полиция қызметкері ретінде таныстырып, «жақыныңыз есірткі затымен ұсталып қалды, сотталайын деп тұр» деп алдау тәсілдері де бар. Өткен айда осындай 31 алаяқтық қылмыс жасаған күдікті құрықталып, тергеу амалдары жүргізілуде», – деді Данияр Денесұлы.
</blockquote>
Сонымен қатар, әлеуметтік желілер мен онлайн хабарландыру қосымшаларында қаражатты еселеп беру, тиімді шартпен сауда-саттық жасау тәсілдерімен қызықтыру арқылы алдау деректері де жиі кездеседі. Алаяқтық қылмыстарының, оның ішінде интернет алаяқтық қылмыстарының алдын алу мақсатында Қызылорда облысы полиция департаментімен арнайы жоспар құрылып, қажетті іс-шаралар атқарылуда.
Брифинг барысында полиция департаментінің өкілі облыс тұрғындарын қарапайым сақтық шараларын сақтауға шақырды. Сондай-ақ, тұрғындардың қаржы сауаттылығын арттыру және финанстық қауіпсіздігін қамтамасыз ету тұрғысында сақ болуы айтылды. Бұл туралы қаржы нарығын реттеу және дамыту агенттігінің Қызылорда қаласындағы өңірлік өкілдер басқармасының бас маманы Мұрат Сарманов баяндады.
<blockquote>
 «Жалған сатып алушылар өз құрбандарына телефон соғып, тауарды сатып алғысы келетінін және алдын ала төлем енгізуге әзір екенін айтады. Бұл ретте алаяқтар өздерін бухгалтерлер немесе фирмалардың дректорымыз деп таныстырып, ЖСН, картаңызбен байланыстырылған телефон нөмірін, банк картасының нөмірі секілді құпия деректемелерді сұрайды. Ақша аударымын растау үшін телефон нөміріне жіберілген хабарлама кодын айтып беруді сұрайды. Әсіресе, бұл интернет-сауда алаңдарында жиі кездеседі. Себебі сатушы мен сатып алушы арасындағы қарым-қатынасты ешкім реттемейді. Сондықтан жеке деректермен қандай да бір операция жасауда сақ болған жөн», – деді Мұрат Шахыбекұлы.
</blockquote>
<img src="https://kyzylorda-news.kz/wp-content/uploads/2022/08/fb_img_1660648265743.jpg" alt="" />

Алаяқтық қылмыстың басым бөлігі интернет арқылы жасалуда

<a href="https://kyzylorda-news.kz/">Kyzylorda-news.kz.</a> Қызылорда облысы бойынша ЗК- 169/1 мекемесінің кітапханасына Әбілда Тәжібаев атындағы облыстық әмбебап ғылыми кітапханасы 30 кітап сыйға тартты.
Бұл кітаптарды мекеме бастығының тәрбие жөніндегі орынбасары әділет майоры Қайрат Олжабаев кітапхана қорын арттыру әрі соталғандады тәрбиелеуге пайдалану мақсатында сұратқан болатын. Мекеме тарапынан жіберілген сұранысқа аз уақыт ішінде жауап берген рухани ордадан бүгінгі таңда 30 кітап алынып, мекеме кітапханасының қорына қосылды.
Әкелінген кітаптар алдымен теологтары мен ЗК-169/1 мекемесінің қызметкерлері тексерістен өткізді. Тексеру барысында, әкелінген құнды сыйлар арасынан радикалдық бағыттағы және шытырман оқиғалы туындылар мен мекеме ішіне алып өтуге тыйым салынған заттар анықталған жоқ. Бұл кітаптардың ішінде қазақ әдебиетінің класик жазушыларының қазақтың бес арысының да шығармалары бар.
<blockquote>
 «Кітаптарды сыйға тартқан кітапхана басшылықтарына алғысымызды білдіре отырып, сабырлы ұстаз саналатын кітаптың, жазасын өтеуші жандардың түзеу жолға түсуіне септігін тигізетіне сенімім &nbsp;мол», – деді майор Қайрат Олжабаев.
</blockquote>
«Кітап – ең сабырлы ұстаз! Тек кітап ғана қайырылымдылық пен айуандықтың, ақиқат пен жалғанның аражігін айнытпай танып білуге үйретеді» деп, айтылғандай бұл құнды дүниелердің сотталғандарды тәрбиелеуге игі әсері болатыны анық. Өйткені, мекемеде жазасын өтеушілер арасында « артық білім кітапта, ерінбе оқып білуге » қағидасын ұстанатындар саны жеткілікті.
<img src="https://kyzylorda-news.kz/wp-content/uploads/2022/08/kitap.png" alt="" />

Қызылордада түрме кітапханасы жаңа кітаптармен толықты

<a href="https://kyzylorda-news.kz/">Kyzylorda-news.kz.</a> Қазалы ауданында Майдакөл мен Ү.Түктібаев арасындағы автомобиль жолдары жөнделіп жатыр.
Бүгінгі таңда аудандық маңызы бар «Бекарыстан би – Майдакөл – Ү.Түктібаев» ауылдарының арасындағы автомобиль жолдары жөнделіп жатыр. Қазіргі таңда мердігер мекеме автомобиль жолының көне асфальт қабатын бұзып, негізгі қабаты күшейтуде. Сондай-ақ, жолдың кейбір бөліктеріне қиыршық тастар да төселген. Бұл жөнінде аудан әкімі Мұхтар Оразбаев түстен кейін Майдакөл және Ү.Түктібаев ауылының тұрғындарымен кездесуде айтып берді.
Аудан басшысы жақын күндері Кеңес Одағының батыры Үрмәш Түктібаев атындағы ауылда ангар типті спорт кешенінің құрылысы басталатынын қуанышпен жеткізді. Бүгінгі күні мемлекеттік сатып алу конкурсының жеңімпазы «СМП Қызылорда» ЖШС-мен келісім-шарт жасалды.
Мұхтар Әуесұлы мұнан бөлек аудан көлемінде атқарылып жатқан ауқымды істерге де тоқталып, жыл аяғына дейін бірнеше нысан пайдалануға берілетінін жеткізді.
Кездесуде аудан әкімі Мұхтар Оразбаев ІІ тоқсанның қорытындысымен өткен басқосуда көтерілген сұрақтарға ерекше тоқталып, оларды шешуге байланысты атқарылып жатқан жұмыстармен де таныстырды.
Майдакөл мен Ү.Түктібаев ауылдық клубтарында өткен кездесуде аудандық қоғамдық кеңестің төрағасы Талайлы Бөріқұлақов ауданда атқарылып жатқан жұмыстар ауқымды екенін тілге тиек етіп, елді ауызбіршілікке шақырды.
Кезек ұсыныс-пікірлерге берілгенде қос елді мекеннің тұрғындары да алдымен ауданда атқарылып жатқан жұмыстарға алғыстарын айтып, ризашылықтарын білдірді. Мұнан кейін өздерінің өтініш-тілектерін жеткізіп, сұрақтарын қойды.
Аудан әкімі Мұхтар Оразбаев халықтың тарапынан айтылған ұсыныстардың әрбіріне жеке-жеке тоқталып, сұрақтарына жауап берді. Кейбір мәселелерге байланысты тиісті бөлім басшыларына терең зерттеуге тапсырма берді.
Кездесуге аудандық мәслихат хатшысы Бақытжан Жарылқап, облыстық мәслихат депутаты Мнажадин Өтеев, Ібайдулла Тілеп, аудандық қоғамдық кеңестің төрағасы Талайлы Бөріқұлақов аудандық мәслихат депутаты Ғазиз Әліш, аудандық полиция бөлімінің бастығы Болат Кабизов және бірқатар дербес бөлім мен мекеме-кәсіпорын басшылары қатысты.
Тұрғындармен кездесулен кейін аудан әкімі Мұхтар Оразбаев Майдакөл мен Ү.Түктібаев ауылдарындағы №98, №88 мектептерге арнайы барып, білім ордаларының жаңа оқу жылына дайындығымен танысты.
<img src="https://kyzylorda-news.kz/wp-content/uploads/2022/08/fb_img_1660643892656.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643864180.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643861451.jpg" alt="" />

Майдакөл мен Ү.Түктібаев арасындағы автомобиль жолдары жөнделуде

<a href="https://kyzylorda-news.kz/">Kyzylorda-news.kz.</a> Бүгін Қазалы ауданына ҚР Парламенті Сенатының депутаттары Мұрат Бақтиярұлы мен Ақмарал Әлназарова жұмыс сапарымен келіп тұрғындармен кездесті. Сондай-ақ, әлеуметтік нысандарға барып, құрылыс жұмыстарымен танысты.
Сенаторлар аялдаған алғашқы нысан Әйтеке би кентіндегі аудандық емхана болды. Жаңадан пайдалануға берілген емхана ауысымына 250 келушіге дейін қабылдай алады. Аудан тұрғындарына жаңа заман талабына сай келетін медициналық аппараттар қызмет көрсетеді.
Мұнан соң Қазалы қаласында салынып жатқан 140 орындық балабақша мен Сырдария өзенінің «Қарлаң» учаскесіндегі темір бетон көпірінің құрылысымен танысты.
Сондай-ақ, бақшалық басында шаруалармен кездесті. Қазалы қаласының тұрғыны Сахи Татаев жыл сайын елді мекен іргесіне бақша егіп, бала-шағасын көкөніс және бақша дақылдарымен қамтамасыз етеді. Артылғанын аудан орталығына апарып, арзан бағада тұрғындарға өткізеді.
Қазалы ауданына жұмыс сапары кезінде депутаттар Жанкент ауылының тұрғындармен де кездесіп, олардың ұсыныс-пікірлерін тыңдады.Басқосуда ҚР Парламенті Сенатының депутаттары Мұрат Бақтиярұлы мен Ақмарал Әлназарова сөз сөйлеп, Парламент қабырғасында атқарылып жатқан жұмыстардың бірқатарын елге жеткізді.
Сонымен қатар, қасиетті Қазалы ауданында халықтың тұрмыс-тіршілігін жақсарту, оларға қолайлы орта туғызу мақсатында ауқымды жұмыстар атқарылып жатқанын тілге тиек етті.
Кездесуде жанкенттіктер әйелдердің зейнет жасын төмендету жөнінде ұсыныстарын айтты. Бұл сұраққа ҚР Парламенті Сенатының депутаты Мұрат Бақтиярұлы жауап беріп, айтылған мәселеге байланысты жыл соңына дейін шешім қабылданатын жеткізді.
ҚР Парламент Сенаты депутттарының Қазалы ауданына сапары кезінде аудан әкімі Мұхтар Оразбаев, аудандық мәслихат хатшысы Бақытжан Жарылқап, облыстық мәслихат депуттартары Мнажадин Өтеев, Ібайдулла Тілеп бірге жүрді.
<img src="https://kyzylorda-news.kz/wp-content/uploads/2022/08/fb_img_1660643409469.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643411742.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643429640.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643425596.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660643420696.jpg" alt="" />

Сенат депутаттары Қазалы ауданына жұмыс сапарымен барды

<a href="https://kyzylorda-news.kz/">Kyzylorda-news.kz.</a> Бүгін Үкімет басшысы Әлихан Смайловтың төрағалығымен өткен жиында биылғы жылдың қаңтар-шілде айындағы әлеуметтік-экономикалық даму қорытындысы және республикалық бюджеттің атқарылу барысы қаралды. Отырысқа онлайн режимде бірқатар министрлер мен барлық өңірдің әкімдері қатысты.
Жиында Ұлттық экономика министрі Әлібек Қуантыров, Ұлттық банк төрағасының орынбасары Ақылжан Баймағамбетов баяндама жасап, негізгі көрсеткіштерге тоқталды. Айталық, Қызылорда өңірі негізгі капиталға салған инвестиция көлемі және тұрғын үйді пайдалануға берудің көлемі бойынша алдыңғы қатарда. Әлихан Смайылов инфляцияны тежеу үшін қажетті құралдар бар, бұл ретте мемлекеттік органдар мен әкімдіктер оларды тиімді пайдалануы тиіс екенін айтты.
Үкімет отырысынан кейін аймақ басшысы Нұрлыбек Нәлібаев өңірде бірқатар әлеуметтік-экономикалық көрсеткіштер төмендегенін ескертіп, сала басшыларына жиын өткізді.
<blockquote>
 «Өңдеу саласындағы өндірісті арттыру тетіктерін анықтау міндеті тұр. Құрылыс жұмыстары қалада қызу жүргізілуде. Жүргізіліп жатқан құрылыстардың статистикалық органдарда есепке алынуын қамтамасыз ету керек. Жуырда ғана барлық аудан әкімдерін жеке-жеке қабылдап, бұл мәселелер егжей-тегжейлі қаралды. Тиісті тапсырмалар берілді. Осы тапсырмалардың сапалы орындалуын қамтамасыз ету керек. Барлық аудандар мен Қызылорда қаласының әкімдеріне экономикалық өсімді ай сайын қамтамасыз ету бойынша шаралар қабылдауды тапсырамын. Биыл пайдалануға берілуі жоспарланған әлеуметтік нысандардың мерзімінде берілуін, индустрияландыру бағдарламасы шеңберінде 2022 жылға жоспарланған жобаларды іске қосылуын қамтамасыз ету қажет. Әлеуметтік маңызы бар азық-түлік өнімдеріне бағаны тұрақтандыру бойынша жұмыстарды күшейту керек», – деді Нұрлыбек Нәлібаев.
</blockquote>
Сонымен қатар облыс бюджетінің игерілуі бойынша да атқарылған жұмыстар сөз болды.
Облыс әкімі бюджет қаражатының уақытылы игеріліп, мақсатты жұмсалуын қамтамасыз ету бойынша бірқатар тапсырма берді.
<img src="https://kyzylorda-news.kz/wp-content/uploads/2022/08/fb_img_1660641721772.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660641730185.jpg" alt="" />
<img src="https://kyzylorda-news.kz/wp-content/uploads/2022/08/fb_img_1660641726762.jpg" alt="" />

Нұрлыбек Нәлібаев: Әлеуметтік маңызы бар азық-түлік өнімдеріне бағаны тұрақтандыру бойынша жұмыстарды күшейту керек

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» мемлекеттік корпорациясы» КЕАҚ Қызылорда облысы бойынша филиалы жанынан құрылған «AMANAT» партиясының «Халық» бастауыш партия ұйымы құрамы жаңа мүшелермен толықты. Қазіргі таңда аталған партия ұйымының 235 мүшесі бар. Бастауыш партия ұйымы партияның басты міндеттерін жүзеге асырып, тұрғындарға сапалы қызмет ету мақсатында құрылған. I
2022 жылғы 1 наурызда XXII Съезде «Nur Otan» партиясы қоғамдық бірлестігі «AMANAT» партиясы деп аталуына байланысты партия билеті жаңа үлгіге өзгертілді.
Бүгінгі шарада «Халық» бастауыш партия ұйымы жаңа және бұрынғы мүшелері де жаңа куәліктерін қолына алды. Салтанатты жиында Қызылорда қалалық филиалының атқарушы хатшысы Шәріп Әбдірахман «Халық» бастауыш партия ұйымының жұмысын оң бағалап, жастарға сәттілік тіледі.
<blockquote>
 «Халық» бастауыш партия ұйымы құрылғанна бері «AMANAT» партиясы жұмысының алға басуына үлес қосып келеді. Көптеген жұмыстарды бірлесе атқарды. Бүгінде партиямыз жаңа атау иеленіп, бағытын заман талабына сай өзгертті. Партияның тәуелсіздік жылдарында мемлекет үшін қыруар қызмет атқарғанын ешкім де жоққа шығара алмайды. Бүгінде партия жауапкершілігі күшейді, беделі артты. Сондықтан, жастар біздің қасымыздан табылуы тиіс. Партия қатарына өтіп, бізбен мақсаттас болған әрбір жастың қадамына сәттілік тілеймін, – деді «AMANAT» партиясының Қызылорда қалалық филиалының атқарушы хатшысы Шәріп Әбдірахман.
</blockquote>
«Халық» бастауыш партия ұйымының төрайымы Айнұр Тобаева «AMANAT» партиясының қатарына өткен жастарды партия куәлігін алуымен құттықтап, ұйым жұмысын дамытады деген сенімін білдірді.
Шара соңында партияға қатарына өткен филиалдың жас маманы Серікболсын Маденов партия мүшесі атануды абырой санайтынын, партия беделін арттыруға білімі мен жігерін салатындығын жеткізді.
<img src="https://kyzylorda-news.kz/wp-content/uploads/2022/08/img-20220816-wa0037.jpg" alt="" />
<img src="https://kyzylorda-news.kz/wp-content/uploads/2022/08/img-20220816-wa0036.jpg" alt="" />

Қазақстан және Қызылорда облысының жаңалықтары