&nbsp;<a href="https://kyzylorda-news.kz/">Kyzylorda-news.kz.</a>&nbsp; Сырдария ауданының орталығы Тереңөзек кентінде кәсіпкерлік саласы түрлі бағытта өркендеп келеді. Жаңа идеяларға иек артқан бизнес иелері жергілікті халыққа тиімді кәсіп ашуға дағдыланған. Қазіргі уақытта аудан орталығында сауда үйлері, асханалар желісі, фасфуд орталықтары, тігін шеберханалары, шағын базарлар, құрылыс заттарын сататын дүкендер, дәріханалар, автокөлік жуу мен жөндеу жұмысын жандандыру тұрақты жүргізілуде.Өткен жылы жеке кәсіпкер Нұрсұлтан Мамықовтың бастамасымен «Ыстық нан» наубайханасы өз жұмысын бастады. Бүгінде наубайхананың ыстық нанына тұрғындар тарапынан сұраныс жоғары болып отыр.«Аянат» ЖШС-нің директоры Нұрсұлтан Мамықовтың жеке кәсіппен айналаса бастағанына 8 жыл болған. Бұған дейін Қызылорда қаласынан наубайхана ашқан ол жеке бизнесін кеңейту үстінде екен. Тереңөзек кентіндегі Аманкелді Иманов көшесі бойынан пайдалануға берілген «Ыстық нан» наубайханасының ғимаратын жөндеуге 3 млн теңге қаражат кеткен. Оның ішіне нан пісіруге арналған пеш орнатылып, жұмысшыларға барлық жағдай жасалған.<blockquote>– Осы күні «Ыстық нан» наубайханасында бірнеше адам жұмыспен қамтылған. Күніне 500-ге жуық нан өнімдері өндіріледі. Сонымен бірге тұрғындарға тандыр, қатпарлы самса ұсынылып келеді. Жергілікті халық наубайхананың ыстық нанына үйренді. Мүмкіндігінше көпшілікті нанмен қамтамасыз ету жоспарда бар. Шын мәнінде шағын бизнесті дамытуға мемлекет тарапынан зор қолдау көрсетіліп келеді. Табыс табудың негізгі жолы – жергілікті тұрғындардың сұранысын қанағаттандыру екені мәлім. Қазіргі уақытта нан бағасы 140 теңге ретінде бекітілді. Алдағы уақатта тоқаш, бәліш өнімдерін сатылымға шығару жоспарымызда бар. Нан өнімдерінің бағасында өзгеріс болуы ықтимал. Бұған ұнның нарықтағы бағасының көтерілуі себеп, – дейді жас кәсіпкер Нұрсұлтан Серікұлы.</blockquote>Кент тұрғындары ыстық нанның сапасын жоғары бағалауда. Тәжірибелі мамандардың қолынан шыққан тандыр нан мен самсаны жұртшылық тапсырыспен алдыртып жататындығын көзіміз көріп жүр. Осыған байланысты кәсіпкер дүкендер мен жеке тұрғын үйлерге ыстық нанды дер кезінде жеткізу үшін тасымал қызметін қолданысқа енгізуді де жоспарлап отырған жайы бар. &nbsp;

Тереңөзек кентінде кәсіпкерлік саласы түрлі бағытта өркендеп келеді

<a href="https://kyzylorda-news.kz/">Kyzylorda-news.kz.</a>&nbsp; Бүгін Жаңақорған ауданының «Бірлік» және «Қыраш» елді мекендеріне газ құбырын қосу рәсімі өтті. Алдағы уақытта тағы да 5 ауылға «көгілдір отын» кіргізу жоспарда бар.Іс-шараға облыс әкімі Нұрлыбек Нәлібаев қатысып, ауыл тұрғындарын құттықтады.<blockquote>«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Өткен жылы 14 газдандыру жобасын жүзеге асыруға 8,7 млрд.теңге бөлініп, игерілді. Нәтижесінде 6 ауылды газға қостық. Осылайша өңірдің газдандыру деңгейі 70 пайызға жетті. Бұл – 26 елді мекен, 583 мыңға жуық тұрғын табиғи газбен қамтылды деген сөз. Биылға республикалық бюджеттен 7,4 млрд. теңге бөлініп, 2022 жылы басталған 7 жоба жалғасты және 12 жаңа жобаның құрылысы басталады. Оның ішінде, Жаңақорған ауданынының «Жайылма», «Шалқия», «Құттықожа», «Төменарық», «Кейден» ауылдарына «көгілдір отын» кіргізу жұмыстары басталады. Бұдан бөлек, өткен жылы құны 3,4 млрд. теңгені құрайтын Жаңақорған кентіндегі 10/0,4 кВ электржелілік жүйені жаңғырту жұмыстары қолға алынған. Соның арқасында кенттегі 70 шақырымға жуық электр желісі жаңарып, қосымша жаңадан 23 трансформатор орнатылады», – деді аймақ басшысы.</blockquote>Ауыл тұрғындарын қоғам қайраткері Бекмырза Еламанов құттықтады, «Ақүйік» ауылдық округінің ардагерлер кеңесінің төрағасы Сәулебек Бейсенбаев алғыс білдіріп, бата берді.Айта кетейік, «Ақүйік» ауылдық округіндегі «Бірлік» ауылына газ құбырын «Gas Energy Construction» ЖШС жүргізді. Жоба республикалық және облыстық бюджеттен қаржыландырылды, оны іске асыру нәтижесінде 440 тұрғын үй мен 5 әлеуметтік нысан газдандырылды.Мұнан әрі облыс әкімі «Қыраш» ауылын газға қосу рәсіміне қатысты. Бұл елді мекенде 124 тұрғын үй мен 6 әлеуметтік нысан «көгілдір отынға» қосылды.Салтанатты іс-шарада аймақ басшысы ауыл тұрғындарын құттықтады. Қоғам қайраткері Ибрагим Әбибуллаев сөз сөйлеп, ауылдық округтің қоғамдық кеңес төрағасы Сұлтанхан Ақылбеков бата берді. Әрі қарай Нұрлыбек Машбекұлы «Қыраш» ауылының имамы Әбдімәлік Шахановтың үйіне барып, газ тұтынған тұрғындардың қуанышына куә болды.Еске салсақ, биыл Мемлекет басшысының қолдауымен ауылдық жерлерде әлеуметтік нысандардың құрылысы қарқынды жүруде. Атап айтқанда, «Жайлы мектеп» ұлттық жобасы аясында алдағы 3 жылда облыста 15 100 орынға арналған құны 100 млрд. теңгеден асатын 21 мектептің құрылысы жүргізіледі. Биыл 10 мектептің құрылысы басталады. Оның 2-уі Жаңақорған ауданы орталығынан салынады.«Ауылда денсаулық сақтауды жаңғырту» ұлттық жобасы аясында 2023-2024 жылдары облыста 27 денсаулық сақтау нысаны салынады. Биыл дәрігерлік амбулаторияның құрылысы «Қаратөбе» ауылында, келесі жылы «Талап», Әбдіғаппар ауылдарында басталады. Ал, 2025 жылға қарай Жаңақорған ауданаралық ауруханасын «көпбейінді аурухана» деңгейіне жеткізу жұмыстары жүргізілуде.Мұнан бөлек, «Жайылма», «Өзгент» ауылдарында 150 орындық клуб, «Ақжол» ауылында денешынықтыру-сауықтыру кешенінің құрылысы жүргізілуде. Нысандар биыл шілде айында пайдалануға берілмек.<figure class="image"><img src="https://knadmin.beoblood.kz/uploads/343080553_612315317585852_2371794560092636744_n_59bb441df3.jpg" alt="343080553_612315317585852_2371794560092636744_n.jpg"></figure>&nbsp;<figure class="image"><img src="https://knadmin.beoblood.kz/uploads/343209360_205516472227596_1657189067818441419_n_3000ccd516.jpg" alt="343209360_205516472227596_1657189067818441419_n.jpg"></figure>

Жаңақорған ауданында 2 ауыл табиғи газға қосылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық сайлау комиссиясының төрағасы Әділбек Ерсұлтанов қалалық және аудандық сайлау комиссияларының төрағалары мен хатшыларына арналған кеңейтілген жиын өткізді.Басқосуда 19 наурызда өткен Парламент Мәжілісі және мәслихат депутаттарының сайлауында комиссиялардың жұмысына талдау жасалып, науқанды өткізу мәселелері қорытындыланды.Әділбек Ерсұлтанов жыл басынан бері облыстық сайлау комиссиясының кәсіби құрамы жаңа тәжірибелі мамандармен толығып, тұрақты негізде жұмыс істеуге көшкенін тілге тиек етіп, қала және барлық аудандардағы тұрғындардың сайлауға қатысу белсенділігі бойынша қорытынды жасады.Комиссия төрағасының орынбасары Болат Накипов электоралды оқыту нәтижелері мен жаңадан учаскелер құру туралы баяндаса, хатшы Аягөз Сырлыбаева сайлау процесінде хаттамалық мәселелер, байқаушылардың науқан барысында айтқан ұсыныс-пікірлерін саралап берді.Сондай-ақ, жиында қала және аудандық сайлау комиссияларының БАҚ-пен және саяси партиялармен жұмыс жүргізуі, қаржылық аударымдарды уақытылы орындау мәселелері қаралып, сұрақтарға жауап берілді.Комиссия төрағасы Әділбек Ерсұлтанов алдағы уақытта жоспарланған барлық деңгейдегі сайлаулар, оның ішінде аудан әкімдерінің тікелей сайлауын өткізу заң шеңберінде және ашықтық қағидатына сай өткізілуі керек екендігін алға тартты. Сондай-ақ, комиссия мүшелерінің кәсіби біліктілігін арттыруға ерекше басымдық берілетінін тілге тиек етті.Жиын соңында еңбегімен көзге түскен төрағалар мен хатшылар алғыс хаттармен марапатталды.<figure class="image"><img src="https://knadmin.beoblood.kz/uploads/343309666_750958433104642_6012251484262727831_n_7bc34e43d7.jpg" alt="343309666_750958433104642_6012251484262727831_n.jpg"></figure>

Қызылордадағы сайлау комиссияларының жұмысына талдау жасалды

<a href="https://kyzylorda-news.kz/">Kyzylorda-news.kz.</a> Бүгінгі бейбіт күнде Отан алдындағы парызын өтеуге ­жастар аса асыға қоймайды. Мұны жасыруға келмес. Бұрын екі немесе үш жыл әскерде болған әке, ағаларымыз, тіпті, шекара асып кеткен. Бүгінде әскери борыш мерзімі бір-ақ жыл. Оған қоса жат жердің топырағын баспайды да. Қазақстан аумағында қалады. Баяғыдай хат жазып, қиналатын да кез емес.Осы тұста әскерге барудан жалтарып жүрген жастарға жағымды жаңалығымыз бар. Яғни, биылдан бастап азаматтық борышын өтеп келген жастарға жеңілдетілген көмектің бірнеше түрі бар. Жас сарбаз, егерде сен әскерге баратын болсаң, жоғары оқу орнына тегін, анығында ҰБТ тапсырмай-ақ түсуге мүмкіндігің бар. Екінші, әскери борышыңды өтеп келсең, әскери кафедра немесе әскери институттарға түсу тегін. Ал үшіншісі, көпті толғандырған несие мәселесі. Яғни, жас азаматтың несиесін 1 жылға шегеру мүмкіндігі де қарастырылып отыр.Жуырда 19 жасар азамат Досхан Нұрланұлы әскерге барып, Отан алдындағы борышын өтеп келді. Кейіпкерімізге былтыр әскерге шақырту қағазы келеді. Ол сол сәтте, яғни 2022 жылы 20 сәуірде еш ойланбастан азаматтық борышын өтеуге Таразға аттанады. Алдымен оңтүстік өңірлік қолбасшылығы 5-ші Механикаландырылған бригадасының, Меркі аудандық 11971 әскери бөлімінде курсант болып бастайды. Кейін мамыр айының 26-нан бастап Тараз қаласы 85395 әскери бөлімі Артиллериялық дивизионына (қатардағы жауынгер) болып қабылданады. Әскердегі жақсы мінезі мен атқарған жауынгерлік-қызметтік міндетін орындауда жоғары көрсеткіштерге қол жеткізіп, үздіктер қатарынан көрінген Досхан Нұрланұлы аға-маман, аға-көздеуші лауазымына және Ефрейтор атағына қол жеткізеді.Алғашында қиындау болғанын тілге тиек қылған Досхан, әскердегі бір күндік өмірін де баяндап берді.<blockquote>– Таңертең сағат 6:30-да тұрамыз. 20 минут таңғы жаттығу болады. 7:00-ге дейін 10 минут арасында жуынып, орнымызды жинау керек. Одан соң 20 минут таңғы жаңалықтарды тыңдаймыз. Таңғы астан кейін командаға бөлініп, тапсырылған міндеттерді атқарамыз. Бастапқы айларда сапта жүруді үйреніп, ант қабылдауға дайындалдық. Дәрістер алдық. Бір сөзбен айтқанда, темірдей тәртіпке бейімделдік, – дейді ол.</blockquote>Бригада командирі подполковник Ж.Құранбеков Досханның ата-анасына жылы лебізін жолдай отырып, ұлдарын қысқы демалысқа да жіберген.&nbsp;<blockquote>– Өтпейтіндей көрінген бір жылың осылай өте шығады екен. Сонау ХХ ғасырда әскери борышты өтеу мерзімі – 2, тіпті 2,5 жыл болыпты. Оны үлкен әке-ағаларымыздан естіп отыратынбыз. «Сол уақыттың жастары әскерден келісімен отау құрып, шаңырақ болып жеке шығып кететін. Әскерден келген жігіт – абыройлы еді», – деп әкесінің сөзін еске алды жас сарбаз.</blockquote>Жастардың әскер туралы түсінігі әр қилы. Бірі міндетті, енді бірі міндетті емес дейді. Уақытың босқа кетеді дейтіндер де бар. Қару ұстап, жауға шап деп қысап жатқан ешкім жоқ. Ал алда-жалда мұндай жағдай болмасына кім кепіл? Қазақтың түсінігінде жеті қазынаның бірі – ер жігіт, екіншісі – берен мылтық дейді. Ендеше, осы екеуі бірігіп, ел шебін күзетуі керектігі айтпаса да ұғынықты.

Әскери борыш – әркімге парыз

<a href="https://kyzylorda-news.kz/">Kyzylorda-news.kz.</a> Егер жас болсаңыз, кешкілік басқосулар мен тойларға барар алдында айнаға бір қарайтыныңыз анық қой. Әсіресе қыздар қауымы. Тіпті сағаттап сәнденіп, тотыдай таранып отыратын сұлу бикештер үшін сұлулық салондары таңсық дүние емес. Оған сенімдімін. Ауданымызда ондай салондар көп емес. Бүгінде солардың қатарына қосылған «Самал» сұлулық салоны да ашылғанына көп болмағанмен, тұтынушылар талабынан шығып келеді. Самал, Мәншүк, Гүлмира және Жандос есімді қыз-жігіттердің өзара бірлесуі арқасында ашылған бұл салонда шаш қиюдан тырнақ сәндеуге дейінгі жұмыстардың барлығы қамтылған.Халқымызда «Жас келсе – іске» деген қағида бар. Бұл сөздің астарын өзіңіз де бағамдап отырған боларсыз. Бұған дейін әртүрлі салонда еңбек етіп, жылдап тәжірибе жинақтаған жас мамандардың өзара бірігуінің арқасында біз әңгімемізге арқау еткен сұлулық салоны ашылған. Енді сол бірлестік мүшесінің әрбіріне тоқтала кетсек.Самал Жұмағазиева үш жылдан бері осы салада еңбек етіп келеді. Қазіргі таңда сұлулық салонының аты осы Самалдың есімімен аталады. Бүгінде оның қызметі қас жұлу, шаш қию, бет әрлеу сынды жұмыстар. Өзі Ақтөбе қаласындағы «Эпит» салонында оқи жүріп, тәжірибе жинақтаған. Бүгінде өз ісінің маманы деуге болады. Келген әрбір тұтынушыға ерекше ықыласпен қарап, тез тіл табысып кетеді. Бәлкім, өзінің осындай болмысымен басқалардан дараланатын шығар.<blockquote>Біздің бұл салонды ашудағы мақсатымыз – халыққа сапалы қызмет көрсету. Қазір өзіңіз білесіз қызметтің бұл түріне сұраныс ерекше. Қоғамда бәсекелестік орта қалыптасқандықтан, сапалы қызметтің бәсі басқалардан жоғары болу шарт. Сондықтан біз сол талаптан шығуға тырысып келеміз. Әзірге бізге деген тұтынушылардың пікірі жақсы. Соған қарағанда сапалы қызметті ұсынып келе жатырмыз деген ойдамыз. Мүмкіндік болса, алдағы уақытта бұл жұмысымызды бірлесіп кеңейте түсеміз деген ойдамыз, – дейді заңды түрдегі кәсіп иесі Самал Жұмағазиева.</blockquote>Мәншүк Бердіңқұлқызының бұл салада еңбек еткеніне үш жыл. Ол да Ақтөбе қаласындағы «Марофен» оқу орталығында осы салон жұмыстары бойынша дәріс алған. Бүгінде аталған салонда бет әрлеу, шаш қию, қас жұлу сынды жұмыстармен айналысады. Ол да тынымсыз жандар қатарынан. Жұмыста санасу деген түсінікті саналарынан сылып тастаған. Кімнің қолы бос, сол өздеріне тиесілі жұмыстарын мүлтіксіз атқара береді. Қазіргі таңда Мәншүк те өз ісінің маманы. Содан шығар, оны әдейілеп іздеп келушілер де, арнайы шақыртумен үйіне алдыратын тұтынушылары да жоқ емес.Біз жұмыс барысымен аталған салонға кіргенімізде, әлдебір келушінің қолының тырнағын әрлеп жатқан қызметкерді бірден көзіміз шалды. Ішке еніп, салон жөнінде мәлімет сұрай бастағанымызда, жанымыздан тырнақ әрлеуші қызметкер де табылды. Ол өз қызметін әп-сәтте тиянақты орындағанға ұқсайды. Есімі – Гүлмира Бисенова. Бұл іштегі бесаспап мамандардың бірі. Тырнақ әрлеу, шаш қию сынды жұмыстарды мінсіз жасайды. Арнайы білімі де бар. Осы салада қызмет жасап келе жатқанына екі-ақ жыл болса да, көптің алғысын алған. Астана қаласындағы «Алтын әлем» оқу орталығында арнайы білім алып, өзін әр қырынан көрсетіп келеді. Бүгінде үлескер қатарында еңбек етіп, аталған салонның игілігі жолында тер төгуде.Сұлулық салонында тынбай еңбек ететіндердің бірі – Жандос Бимағанбетов. Ұлдардың да, қыздардың шашын қиып, әрлеуде кәнігі маманға айналған Жандос осы салада 10 жылдан бері еңбек етіп келеді. Кімге қандай шаш үлгісі жараса кететінін айтпай-ақ ұғына білетін ол сөздің емес, істің адамы екенін өзінің тынымсыз жұмысымен-ақ байқатты.Тынымсыз еңбек табысқа бөлейтінін әлдеқашан ұғынған мұндағы әріптестер әзірге бұл жолда жемісті жұмыс жасауда. Үнемі көңілді жүретін олар жауапкершілігі мол кәсіпкерлік салада сынала жүріп шыңдалуға бейімделуде. Әрине халықпен жұмыс жасау оңай емес қой. Сонда да әр істің қиюын тауып, жұмысын жандандыруда алда келе жатқан әріптестердің алға қойған мақсаттары айқын. Ол – көкжиегі кеңейген кәсіпкерлік саласында өзіндік орнын айшықтап, сән әлеміне лайықты қолтаңбасын қалдыру.

Кәсіптен берекелі тұрмыс кешкен жандар  

<a href="https://kyzylorda-news.kz/">Kyzylorda-news.kz.</a> Қызылорда облысы полиция департаменті бастығының орынбасары полиция полковнигі &nbsp;Өтегенов Әміржан Сермаханұлы жұмыс сапарымен Сырдария және Жалағаш аудандарында болды.Іссапар кезінде Әміржан Сермаханұлы аудандық полиция бөлімдерінің жеке құрамымен кездесті.Әміржан Сермаханұлының бастамасымен өткізілген жиында бөлім басшылары 2023 жылдың 3 айында атқарылған жұмыстар &nbsp;жөнінде есеп берді. &nbsp;Жалпы, облысымыздың бұл екі ауданында қылмыстық ахуал тұрақты. Жасөспірімдер қылмыстылығының профилактикасы ерекше бақылауда. Кәмелетке толмағандар тарапынан және оларға қатысты заңсыз әрекеттерді болдырмау және оларды ескерту бағытындағы жұмыстар тұрақты түрде жүргізілуде.Кездесу барысында жыл басынан атқарылған жұмыс нәтижесі және жеке құрам арасындағы тәртіп пен заңдылықтың сақталу мәселелері талқыланды.Сонымен қатар, аталмыш кездесу барысында полиция қызметкерлерін әлеуметтік қолдау мәселесі де қозғалды. Облыс әкімінің қолдауымен биылғы жылы полиция қызметкерлерінің жалақысы артты. Жалақысы көтеріліп, жағдайы түзелген қызметкердің жемқорлыққа бармайтыны анық. Кадрлық мәселелер, оның ішінде кезекті еңбек демалысы, шендерді иелену сынды сұрақтардың барлығы электронды форматта қаралатындығы да айтылды. Мұның барлығы полиция қатарында сыбайлас жемқорлық көріністеріне мүлдем төзбеушілік деңгейіне көтерілуге әсер етпек.Бұдан бөлек, аудандардағы жанар-жағармай материалдарының электронды карточкалық жүйеге көшіп, оны дұрыс пайдалану мәселесі де қозғалды. &nbsp;Тұрғын үйге мұқтаж қызметкерлерді қамтамасыз ету мәселесі әрдайым өзекті. Бұл ретте департамент бастығының орынбасары полиция полковнигі &nbsp;Утегенов Амиржан Сермаханұлы мұндай қызметкерлердің тұрғын үй жалдауға арналған төлемдермен қамтамасыз етіліп отырғандығын айтып өтті. Сондай-ақ, полиция қызметкерлерімен Қазақстан Республикасы Еңбек кодексі талаптарының қатаң сақталу қажеттігі де айтылды.&nbsp;Әміржан Сермаханұлы қызметкерлердің ата-аналарымен және жұбайларымен тұрақты кездесулер өткізуі, ардагерлердің тәлімгерлігі полиция қатарында қандай да бір олқылықтардың алдын алатындығын да &nbsp;баса айтты.&nbsp;<blockquote>«Жаңа Қазақстан – жаңа бағыт, жаңа міндет. Оған қол жеткізу үшін әрбір азамат өз саласында сапалы еңбек етуге тиіс. Мәселен, «полиция – халыққа жақын болу қажет» деген қағида күн тәртібінен түспейді. Өзімізге жүктелген үлкен жауапкершілік пен &nbsp;тапсырмаларды жүзеге асыру жолында жоспарлы жұмыстар жүргізудеміз. Осы бағытта полиция қызметкерлері мен қарапайым халықтың арасындағы қарым-қатынасты нығайта беру басты міндеттеріміздің бірі. Полиция үшін ең маңыздысы – ел сенімі. Ішкі істер органдарындағы жаңару жолдары өз жемісін беретіндігіне сеніміміз мол», - деді Әміржан Сермаханұлы.</blockquote>

Әміржан Өтегенов: «Полиция – халыққа жақын болу қажет» деген қағида күн тәртібінен түспейді

<a href="https://kyzylorda-news.kz/">Kyzylorda-news.kz.</a>&nbsp;&nbsp; Жалпы «кәсіп бастаймын», «кәсіпкер атанамын» деген адамға біздің елде мемлекеттік қолдаулар көп. Бастысы ізденіс арқылы тың жоба таңдап, халыққа қажетін өтейтін, сұранысы бар кәсіп түрін таңдасаңыз болғаны. Ол үшін мемлекет тарапынан жеңілдетілген пайызбен несие немесе қайтарымсыз грант беріледі.&nbsp;Осындай мүмкіндікті пайдаланып, өз ісінен береке тауып отырған жас кәсіпкердің қатарында Нағи Ілиясов ауылының тұрғыны Жанәділ Найманов та бар. Ол «Бизнестің жол картасы 2020-2025» бизнесті қолдау мен дамытудың мемлекеттік бағдарламасы бойынша «Техника жөндеу» орталығы жобасын ұсынып, құны 2 миллион теңгелік қайтарымсыз грант иегері атанды.&nbsp;Үйінің жанындағы гаражын шағын көлік жөндеу орталығына айналдырған азамат қайтарымсыз грант арқылы өз кәсібін бастауға мүмкіндік алды. Жалпы Жанәділ жастайынан техника тілін жетік меңгеріп, оны жөндеуге машықтанған. Техникаға икемі бар жігіт бұл кәсіппен айналыспас бұрын &nbsp;ұялы телефон, ноутбук, компьютер жөндеумен шұғылданды. Ауыл тұрғындары облыс орталығына бармай-ақ бұзылған заттарын ауылдағы шеберге әкеліп, жөндетіп алады. Кейін Жанәділ кәсібін кеңейту мақсатында өзінің орталығын ашты.Ж.Найманов республикаға белгілі Н.Ілиясов ауылында туып-өсті. Ауылдағы №132 Т.Айтбаев атындағы орта мектептен білім алып, одан кейін Қазақ гуманитарлық заң және техникалық колледжінде оқыды. Ол жерден «Аударма ісі» мамандығын алып шықты. Арнаулы орта оқу орнын бітірген соң 2013 жылдан бастап ауылдағы «Мағжан және К» ЖШС-де автоэлектрик болып жұмыс істейді.Қазіргі уақытта техниканың тілін жетік меңгерген жас кәсіпкер берілген қаражатты толық игерген. Ол алған қаржысына қажетті құралдарын – дәнекерлеу аппаратын, бұрғылау құралын, ауаны қысатын құрылғы, ауыр затты аз ғана биіктікке көтеру үшін қолданылатын құрал, кілттер жинағын, шарқайрақ, май ауыстыру құралдарын, диагностикалық компьютер, тағы басқа да құрал-жабдықтар сатып алып, кәсібімен айналысуда.<blockquote>– Алғашында қызығушылығым ұялы телефон жөндеуден басталды. Байқасаңыз кішкене ғана телефонның ішінде қаншама құрылғы, сымдары мен тетіктері бар. Сол қызығушылық мені көлік жөндеуге дейін алып келді. Содан кейін қолымнан келетін кәсіпті бастауға бел будым. «Көз – қорқақ, қол – батыр» деген. Бел шеше кіріссең, барлығы болады екен. Бұл ретте ауыл әкімдігінің мамандары, аудандағы кәсіпкерлік бөлімінің мамандары қолдау көрсетті. Жастарға берілген мұндай мүмкіндіктер үлкен бастамаларға жол ашатынына сенемін. Жас кәсіпкер атанып, қазіргі уақытта өз ісімнен табыс тауып отырмын, – дейді көлік жөндеудің шебері.</blockquote>Бүгінде жас кәсіпкердің көлік жөндеу шеберханасы ауыл тұрғындарының көліктерінен босамайды. Оған қоса алыс-жақын көршілес ауылдардан да көліктерін жөндетуге әкелетіндер қатары күн санап артып келеді. Халықтың көңілінен шыққан жас кәсіпкердің кәсібі берекелі болсын! &nbsp;

Нағи Ілиясов ауылының жас кәсіпкері кәсібін дөңгелетуде

<a href="https://kyzylorda-news.kz/">Kyzylorda-news.kz.</a>&nbsp;Қорқыт ата атындағы Қызылорда университетінде «Ғылым мен білімнің цифрлық трансформациясы тұрақты және инновациялық даму жолында» атты ХХV дәстүрлі студенттік &nbsp;ғылыми конференция өтті.Конференцияға Басқарма мүшесі – Ғылыми жұмыстар және халықаралық байланыстар жөніндегі проректор Майнұр Бөрібаева қатысып, жас ғалымдарға қолдау қарқынды екенін атап өтті.<blockquote>Университетте студенттерді ғылымға тарту жұмыстарына ерекше көңіл бөлініп келеді. Оларды сан-салалы инновациялық жобалар мен технологияларды игеруге, жаңа білім мен идеяларды жүзеге асыруға бейімдеу – басты мақсатымыз.&nbsp; Жыл сайын аймақ экономикасының өзекті проблемаларына арналған жастардың ғылыми ізденістеріне қолдау көрсетілуде. Өткен жылы университеттің жас ғалымдарына арнайы 6 грант (10 млн теңге) тағайындалды. Биыл осы гранттар игерілген соң, жас ғалымдарға арналған жаңа конкурс &nbsp;жарияланбақ, – деді Майнұр Әбілтайқызы.</blockquote>Шарада студенттердің шығармашылығы мен жетістіктер көрмесі таныстырылды. Ал, пленарлық мәжілісте білім алушылар ғылыми-зерттеу жұмыстарының барысын баяндады.Айталық, студент Әбекен Айбек «Dark Maze атты қазақша компьютерлік ойын түрін ойлап тапса, Айсағали Әмірғалиұлы жұмыссыздық мәселесінің шешімін ұсынды. Ал, студент Оңғар Қарақат дәрумендермен байытылған емдік «Сарысу» сусынының адам ағзасына пайдасы туралы баяндады.Сондай-ақ, білім алушылар Алмас Мирланұлы «Тригонометриялық теңдеулер мен теңсіздіктерді шешудің тиімді әдістерін интерактивті бағдарламалар арқылы үйрету», Бақытәлі Жамбыл «Қазақ тілді әдеби сайттар мен порталдар: тақырып және &nbsp;проблема» тақырыбында баяндама оқыды.&nbsp;Айта кету керек, университетте студенттерінің ғылыми-зерттеу жұмысын үйлестіру мақсатында «Зерде» студенттер ғылыми қоғамы жұмыс істейді.Өткен жылы білім алушылардың қатысуымен ҚР БжҒМ Ғылым комитетінің гранттық қаржыландыруы негізінде 9 жоба, халықаралық бағдарламалар бойынша 3 &nbsp;жоба, облыстық бюджеттен 3 жоба орындалды. Ірі бизнес-құрылымдармен өзара тиімді ынтымақтастықтың нәтижесінде «ПетроҚазақстанҚұмкөлРесорсиз» және «ҚОР» компаниялары ғылыми-зерттеу және тәжірибелік – конструкторлық жұмыстары (НИОКР) орындалды.&nbsp;Конференция соңында Басқарма мүшесі – Ғылыми жұмыстар және халықаралық байланыстар жөніндегі проректор Майнұр Бөрібаева ғылыми жетістікке жеткен білім алушыларға Басқарма Төрағасы – Ректордың марапаттарын тапсырды.<figure class="image"><img src="https://knadmin.beoblood.kz/uploads/27_2f1e37fc7b.jpg" alt="27.jpg"></figure>

Қызылордада ХХV дәстүрлі студенттік ғылыми конференция өтті

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданына қарасты ақиық ақын Асқар Тоқмағамбетовтың есімімен аталатын ауыл бар. Сатира сардарының құрметіне қойылған &nbsp;ауылдың халқы көбіне ауыл шаруашылығы саласына ден қойған. Ауданнның экономикалық-әлеуметтік жағдайын жақсартуға бағытталған жұмыстар аталған ауылда да, жалғасын табуда. Аядай ғана ауылда бірқатар жобалар жүзеге асырылуда. Кәсіп саласына көңіл бөлініп, көпшілік кәсібін дөңгелетуде. Өз кезегінде ауылдың тұрмыс-тіршілігін зерделеу мақсатында Асқар Тоқмағамбетов ауылының әкімі Ғабдолла Алданазаровпен сұхбаттасқан едік. &nbsp; &nbsp;– Ғабдолла Рүстембекұлы Асқар Тоқмағамбетов ауылдық округі жөнінде кеңінен ақпарат берсеңіз.– Қазіргі таңда, Асқар Тоқмағанбетов ауылдық округі бойынша 289 отбасында &nbsp;1565 халық тұрады. Оның ішінде: экономикалық белсенді халық саны 700 адамды құрайды. Асқар Тоқмағанбетов ауылында орта мектеп, балабақша, емхана, ауылдық клуб, кітапхана және қазпошта, ветстанса &nbsp;бөлімшелері халыққа қызмет көрсетеді. Ауылда 6 тыл ардагері, 166 зейнеткер, 65 мүмкіндігі шектеулі азамат, 19 «Алтын алқа» және 21 «Күміс алқа» иелері бар. Жалпы &nbsp;2022 &nbsp;жылы Е-лицензия порталы бойынша 19 өтініш тіркеліп, толығымен орындалды. Е-өтініш порталы бойынша 4 өтініш түсіп, заң талаптарына &nbsp;сәйкес толық орындалды. Ауылдық округі &nbsp;әкімі &nbsp;аппаратында &nbsp;жыл басынан бері 33 шешім, 100 өкім шығарылды. 109 &nbsp;нотариаттық іс жасалып, қаржысы жергілікті бюджетке өткізілді. Асқар Тоқмағанбетов ауылдық округі әкімінің аппаратының 2022 жылға арналған міндеттемелер мен төлемдер бойынша қаржыландыру жоспары 76 318 000 теңге болып бекітілді. Түзетілген бюджеті 74 969,1 теңгені құрап, қаржы толығымен 100 пайызға игерілді. 2022 жылы жеке тұлғалардың мүлкіне салынатын салық 100,1 теңгеге орындалып, 100 пайызға, жер салығы 19500 теңге болып 100 пайызға, жеке тұлғалардан &nbsp;көлік құралдарына салынатын салық &nbsp;2 594,9 &nbsp;теңгеге орындалып, &nbsp;101,1 пайызға, &nbsp;заңды тұлғалардың көлік құралдарына салынатын салық 54000 теңгеге орындалып, 100 пайызға, жер учаскесін пайдаланғаны үшін төлем 3700 теңгеге орындалып, 100 пайызға, бірыңғай жер салығы 41100 теңге болып, 100,4 пайызға орындалды. &nbsp; Нақты 12 айда жиналғаны 2813,3 теңгеге болып, 101,0 пайызға орындалып отыр.&nbsp;– Ауыл шаруашылығы саласында қандай жұмыстар атқарылуда?&nbsp;– Ауылдық округ бойынша 2022 жылы 3263 бас ірі қара, 1110 бас уақ мал, 1345 бас жылқы, 121 бас түйе және 944 бас құс тіркелді. Сонымен қатар, 2022 жылы ауылдық округі бойынша 1 ЖШС мен 7 шаруа қожалығы, &nbsp;барлығы 1025 га күріш, 79 га жаңа жоңышқа, 293 га ескі жоңышқа, 8 га қауын-қарбыз, 14 га картоп және 4 га көкөніс егіліп, ауданның орта көрсеткіші деңгейінде өнім алынды. &nbsp; Сонымен қатар &nbsp;ветеринария саласы бойынша аз-кем мәліметке тоқталып кетейін. &nbsp;Ауылда 1293 бас мүйізді ірі қара, &nbsp;297 бас уақ мал, 364 бас жылқы таңбаланып, бірдейлендірілді. &nbsp;Бруцеллез ауруына 4002 бас мүйізді ірі қара, 660 бас уақ мал тексерілді. Сібір жарасына қарсы &nbsp;екпе 2900 бас мүйізді ірі қара, 500 бас &nbsp;уақ мал, 850 бас жылқы, 50 бас түйе егілді.&nbsp;– Әлеуметттік салалалардың негізгі басымдықтарына тоқталып өтсеңіз.– Бүгінде &nbsp;№135 Асқар Тоқмағамбетов атындағы орта мектепте 276 оқушы білім алуда. &nbsp; 19 оқушы мектеп алды даярлық тобында білім алуда. &nbsp;56 мұғалім бар. Оның ішінде, &nbsp;53-і &nbsp;жоғары білімді, 3-і арнаулы орта білімді. &nbsp;Жаңа біліктілік санаты &nbsp;бойынша педагог-зерттеуші – 5, педагог-сарапшы – 15, педагог-модератор &nbsp;– 11. Мектеп екі ауысымда &nbsp;жұмыс істейді. Мектептегі &nbsp;56 &nbsp;мұғалімнің 51-і жаңартылған білім мазмұны аясында біліктілікті арттыру курстарынан &nbsp;өткен. Ал, «Балауса» бөбекжай балабақшасында &nbsp;2021-2022 оқу жылының басында тізім бойынша 3 топта 75 &nbsp;бала болды. &nbsp;Бөбекжай балабақшасында &nbsp;жалпы 27 адам қызмет етеді. Оның ішінде 11 педагог кадр бар. 2022 жылы емханада 1762 адам &nbsp;дәрігердің қабылдауында болып, шақырту бойынша 310 адам үйден қаралып, белсенді түрде ем алса, профилактикалық байқаудан 404 ауыл тұрғындары өткізілді. Ауыл бойынша 2022 жылы туылған бала саны – 29, қайтыс болғандар &nbsp; саны – 9 адам. &nbsp;1 жасқа дейінгі бала өлімі тіркелген жоқ. &nbsp;Диспансерлік есепте тұратын науқастарға тиісті көмектер көрсетілді. Облыстық денсаулық сақтау басқармасының «Сырдария аудандық ауруханасы» шаруашылық жүргізу құқығындағы коммуналдық мемлекеттік кәсіпорны Асқар Тоқмағанбетов дәрігерлік амбулаториясы 1994 жылы салынған. Дәрігерлік амбулаторияға 2010 жылы ағымдағы жөндеу жұмыстары жүргізілген. Сол жылдан бері жөндеу көрмеген. Іші өте салқын. Жылу жүйесі сын көтермейді. Көптен бері ауылдық емхана ауыл тұрғындарының, емхана қызметкерлерінің айтылып келе жатқан күрделі мәселесінің бірі болатын. Аудан әкімінің қолдауымен биыл 2023 жылдың сәуір айында күрделі жөндеу жұмыстары басталды. &nbsp;Жөндеу жұмыстарын «Ахат-ГС» ЖШС мердігер мекемесі жүргізуде. Директоры Кинибаев Нұржан күрделі жөндеу жұмыстарын келісім шарт талаптарына сәйкес, 3 ай көлемінде бітіретінін жеткізді. Күрделі жөндеу жұмыстарына терезе алмастыру, шатырды толықтай алмастыру, ішкі-сыртқы қабырғаларын түсіріп қайта қалыпқа келтіру, еденді толықтай алмастыру жұмыстарын жүргізілетінін жеткізді. Қазіргі кезде емханының ішкі сылақтарын түсіру жұмыстары жүргізуде. Ауылдық клубта 2022 жылдың 12 айының &nbsp; қорытындысы бойынша 50 &nbsp;мәдени-көпшілік іс-шара ұйымдастырылып, 4150 көрермен &nbsp;қамтылды. 2022 жыл Балалар жылына орай балаларға арналған іс-шара саны 53-і құрады. Ауылдық клуб жанынан құрылған &nbsp;6 үйірме , «Ән», «Би» «Көркемсөз» «Домбыра», «Асыл Ана» әжелер ансамблі және «Қолөнер» үйірмелері жұмыс жасайды. Үйірмеге 76 адам тартылған. Ауыл өнерпаздары &nbsp;2022 жылдың 12 айында, барлығы: 44 байқауға қатысып, нәтижесінде 10 – бас жүлде, 18 – &nbsp;І орын, 7 – ІІ орын, 5 – ІІІ орын, 17 – &nbsp;Алғыс хатпен марапатталып, 4 жолдама алды. &nbsp; Ақылы қызметтің жылдық жоспары 428 мың теңгеге бекітіліп, 100 пайызға &nbsp;орындалды. &nbsp;Асқар Тоқмағамбетов &nbsp;модельді ауылдық кітапханасында 8 орындық оқу залы, 26791 &nbsp;кітап қоры бар. Кітапхананың оқырман саны – 795. 2022 жылы берілген кітап саны –15864, келушілер саны – 9632, жаңа түскен &nbsp;әдебиеттер саны – 217. &nbsp;Жұмыспен қамту және әлеуметтік қорғау мәселесі басты назарымызда. Ауылдық округ бойынша 2022 жылы 700 экономикалық белсенді халық тіркелген. Жұмыссыздар саны – 34 (5,2%), өзін-өзі өнімді жұмыспен қамтығандар – 88. Жұмыспен қамтылғандар – 448, әскер қатарындағылар 4, студенттер 92, зейнеткерлер 166, мүгедектер 65, алғашқы жұмыс орны – 2, күміс жас – 5, қысқа мерзімді кәсіптік оқыту – 6, 3 жасқа дейінгі бала күтімімен отырғандар саны – 41. Тұрақты жұмысқа орналасқандар &nbsp;– 24. &nbsp;Жастар практикасына 10 адам тартылды. &nbsp; 2022 жылы 26 адам ақылы қоғамдық жұмысқа тартылды. Жыл басынан бері атаулы әлеуметтік көмек алатын 5 отбасы құжаттарын өткізіп, қаржыландырылды. 2022 жылы кәсіпкерлер мен ауыл мекемелері ұжымдарының демеушілігімен 278 адамға, 2 540 000 теңгенің киім-кешегі мен азық-түлігі, ауыл шаруашылық өнімдері &nbsp;берілді. Елді мекеннің санитариялық тазалық жұмыстары және көркейту көгалдандыру бойынша ауылдың ішкі аяқсу каналдары мен көшелері толығымен тазаланып, ауылішілік көшелердегі талдарды кесіп, өңдеп, әктеу жұмыстары жасалды. Елді мекенде көше тазалығы және Қызылорда-Тереңөзек тас жолының ауылдық округке қарасты бөлігі аптасына бір рет тазартылып тұрады. Жасыл белдеуге байланысты ауылдың кіре берісіне 600 шақырым жаңадан жер ашылып, қоршалып, 550 түп ағаш көшеттері егіліп, күтімге алынды. &nbsp;– Кәсіпкерлік саласы бойынша ауылдағы атқарылып жатқан жұмыстар көп шығар.&nbsp;Статистикалық көрсеткіштерге сәйкес, Асқар Тоқмағанбетов ауылы бойынша 2022 жылы 227 шағын және орта кәсіпкерлік субъектілері тіркелген. Оның &nbsp;ішінде, жұмыс жасап тұрған кәсіпкерлік субъектілерінің саны 214. Жұмыс жасап тұрған &nbsp;кәсіпкерлік субъектілерінің тіркелгендерге үлесі &nbsp;94,2 пайызды құрады. Жеке кәсіпкер – 86, шаруа қожалығы – 135, ЖШС – 6. Олардың мал шаруашылығымен – 158, егін шаруашылығымен – 21, басқалары сан түрлі кәсіппен айналысады. Кәсіпкерлік саласы бойынша бірнеше жоба қолға алынды. Мәселен, 2021-2025 жылдарға арналған кәсіпкерлікті қолдаудың ұлттық жобасы аясында &nbsp;жаңа бизнес-идеяларды іске асыруға арналған мемлекеттік грант 1 225 200 теңге бойынша бірнеше кәсіп ашты. Арнайы жобалар шеңберінде шаруа қожалықтар несие алып, техника алды.&nbsp;– Биыл Асқар Тоқмағамбетов ауылында ерекше жобалар жүзеге асырыла ма?&nbsp;– Ауылымызда бірнеше жоба қолға алынбақ. С.Ысқақов көшесінің қалған бөлігіне көше жарығын орнату, балалар ойын алаңын салу, ауыл әкімшілігін жөндеу, Жасыл белдеуге байланысты ауылдың кіре берісін тікенек сыммен қоршау, Ш.Мұнарбаев, Е.Боранбаев көшелеріне күрделі жөндеу жұмыстарын жүргізу, Айжанкеткен каналы бойындағы ағаштарға 6,0 га жерге қоршау орнату, Өндіріс және тұтыну қалдықтарын орналастыру мен жою обьектісін салу, жастар бригадасын құру, Қашқынбаев көшесіне жарық орнату жұмысы жасалады деп күтілуде. Бюджеттен қаржы бөлінген жағдай арнайы жобалар кезең-кезеңімен жүзеге асырылады.&nbsp; &nbsp;

Ақын ауылында ауқымды жобалар жүзеге асырылуда

<a href="https://kyzylorda-news.kz/">Kyzylorda-news.kz.</a> ️Жалған банкноттарды сақтау және бірнеше рет өткізу фактісімен анықталған қылмыстық істің тергеуін ҚМА Қызылорда облысы бойынша департаменті аяқтап, іс материалын сотқа жолдады.Қызылорда қаласының 28 жастағы тұрғыны номиналы 20000 теңгелік бірнеше банкноттарды сақтағаны және оларды жанар-жағар май құю бекеті мен автобөлшектер сататын дүкенге өткізгені үшін айыпталды.Заттар сатып алып, құны 20000 теңгелік банкнотты өткізе отырып, қайтарымына ҚР Ұлттық банкінің түпнұсқа банкноттарын алып отырған. &nbsp;Азамат өз &nbsp;кінәсін толық мойындады.Криминалист мамандардың зерттеуі барысында өткізілген банкноттардың Ұлттық банктің ақша белгісіне сәйкес келмейтінін және ақшалардың принтерде басып шығарылғандығы &nbsp;анықталды.Айта кетейік, ҚР ҚК-да бұл қылмыс үшін бес жылдан 10 жылға дейінгі мерзімге бас бостандығынан айыру жазасы түрінде жауаптылық көзделген.

Жалған банкноттарды сақтаған қызылордалық ұсталды

<a href="https://kyzylorda-news.kz/">Kyzylorda-news.kz.</a> &nbsp;Жалағаш аудандық ауруханасында ем алып, дертіне дауа тапқандардың ішінде алақаны аялы абзал жандарға алғыс айту мақсатында бізбен байланысқа шығатындар қатары артты. Әсіресе мұндай жағдайлар кешегі аты жаман індет белең алған шақта көбейген болатын. Ол тұста денсаулық сақтау саласында қажырлы еңбек етіп, антына адалдық танытқан жалағаштық дәрігерлердің дертпен қалай күрескенін көзімізбен көрдік. Шама-шарқымызша кейбірінің біркүндік жұмысын еңбегімізге арқау еткен кездер де болған. Қазір тәжтажалдың таралуына әзірге тосқауыл бар. Бірақ әр мезгілде адамдарды әбігерге салатын маусымдық кеселдердің барын да қаперден шығармаған дұрыс.Қазір көктем мезгілі. Әдетте бұл уақытта адамдардың көбі тұмау мен ЖРВИ-ға шалдығып, денсаулық сақтау саласы қызметкерлерінің жұмысы қайта күрделенетін. Халықтың көбісі бұл шақта салқын су ішіп, немесе желең киінудің салдарынан тұмауға шалдығып жатады. Оның үстіне көктемде адамдарды әлсіздік қысатынын айтпаса да жақсы білесіздер. Дәрігерлер де тұмауға жеңіл-желпі кесел деп қарауға болмайтынын қаперге салудан шаршаған емес. Біз барғанда бас дәрігер бөлімдерді аралап, науқастардың хал-жағдайын білуге кетіпті. Мұндағы абзал жандардан рұқсат алып, артынан біз де аттандық.&nbsp;– Абайламасақ болмайды, біз қолымыздан келгенше сіздерге емдік шара көрсетеміз, дертіңізбен күресеміз, бірақ адамдар да «сақтансақ, сақтайтынын» түсіну керек, – дейді белгісіз біреу.&nbsp;Қасымдағы медбике: – Сізге редакциядан адамдар келіп тұр, – деді.Оның Жалағаш ауданының бас дәрігері Еркебұлан Мақсұтов екенін сонда ұқтым.Аман-саулық сұрасып болғаннан кейін осында келгенше барлық палатада адамның көптігін меңзеп, Ерекеңді әңгімеге тарттым. Қолындағы баланы орынына жайғастырып: – Иә, қазір ауданда ахуал тұрақты. Ол жайында жұмыс сәл саябырсығанда дұрыстап сөйлесерміз, – деді.&nbsp;Талай науқасты дертінен айықтырған дәрігерге құлақ аспауға амал жоқ. Өз ісінің маманы, оның үстіне жұмысында, бас дәрігер емес, тура бір қарапайым медицина қызметкері сияқты. Әр науқастың күнделікті жағдайын сұрайды, маман ретінде ақылын тағы айтады. Тыңдап отырсаң, сөзінің жаны бар.&nbsp;Мұнан кейінгі Ерекеңнің жұмысы алдымыздағы науқастар жатқан бірнеше палатада жалғасты. Бұл бір кабинет төңіректейтін басшының сұрпынан емес екен. Бірақ риза болдық. Біз келгенге дейін қабақтары түнеріп отырған палатадағы науқастардың маңдайы шайдай ашылған. «Дәрігердің сөзінің өзі дертке шипа» дегенді бас дәрігер маған бүгін тура мағынасында түсіндірді. Мейлінше маман ретінде ақылын айтады, қажет деп тапса, кейбіріне емдік шарасын да көрсетіп жатыр. Басшысының өзі осындай ұжым жайлы қалай теріс ой түюге болады. Елдің мұндағы абзал жандарға алғыс айту мақсатында бізге жиі шығатындай реті бар екен.Иә, бұл – 30 мыңнан астам халықтың, яғни тұтас бір аудан жұртының тәулік бойы денсаулығын күзеткен ұжым. Антына адал абзал жандардың жұмысында жүйе бар. Бас дәрігерінің өзі «басшымын» деп кабинет төңіректемейді, керісінше күнделікті жұмысының басым бөлігін науқастар жатқан палаталарда өткізеді. Олардың жағдайы қалай, жүргізіліп жатқан емдік шараларға көңілі тола ма, күнделікті бұл сауалдарға жауап алынып отырғаннан кейін кім жұмысына сылбырлық танытады дейсіз?. Міне, жұмыстағы жүйе, оң нәтиже осындайдан қалыптасса керек.&nbsp;Айта кетейік, өткен жылы Жалағаш ауданында өлім-жітім көрсеткіші 2021 жылмен салыстырғанда 45 жағдайға төмендеген. Ал негізгі индикаторлармен жұмыс жасау нәтижесі бойынша сәби өлімі 5 жағдайға төмендеген. Негізгі индикатор жүрек қантамыр ауруларынан болатын өлім-жітім 2021 жылмен салыстырғанда 18 жағдайға азайған. Мамандар мұны Қазақстан Республикасында қанайналым жүйесі аурулары кезінде медициналық көмек көрсетуді жетілдіру жөніндегі 2022-2023 жол картасымен жұмыс жасау нәтижесімен байланыстырып отыр.Бас дәрігер Еркебұлан Мақсұтов аудандық ауруханада маусымдық аурулар бойынша, яғни балалармен ересектер арасында жедел респираторлы вирустық инфекциялар бойынша ауруханаға жедел түсу жағдайлары көбейгенін айтады. Балалар арасында пневмония, ЖРВИ диагноздарымен аурухананың балалар бөлімі мен жұқпалы аурулар бөлімінде ем қабылдағандарда болыпты. Тіпті маусымдық аурулардың көбеюіне байланысты облыстық денсаулық сақтау басқармасының бұйрығы бойынша уақытында жұқпалы аурулар бөліміне балаларға арналған қосымша 25 төсек орын берілген.– ЖРВИ &nbsp;диагнозы бойынша жүкті әйелдер, егде жастағы кісілер мен жасөспірімдер ауруханаға көптеп түсетін кездер болады. Әсіресе мұндай жағдайлар қыс мезгілінде көбейеді. Маусымдық аурулардың өршуіне байланысты ауырған жағдайда дәрігерге көрініп, дәрігер берген нұсқауларды мұқият орындау қажет. 2022 жылдың қорытындысы бойынша жұқпалы аурулар бөлімінен 1028 бала ем қабылдап шықты. Жыл басында тұмау мен ЖРВИ өршіді, – дейді Еркебұлан Мақсұтұлы. Тұмау және &nbsp;жіті респираторлық вирустық инфекция қыстың салқынында қозып, ауру тез тарай бастайды. Ауру жұқтырған адамда жөтел, жалпы әлсіздік, дене қызуының көтерілуі пайда болады. Тұмау және ЖРВИ жоғары тыныс жолдарын зақымдап, ағзаны улайды.Қазіргі таңда ЖРВИ қоздырушы 200-ден аса вирустың түрі анықталған. Бұл кесел тыныс жолдарын, жүйке жүйесін, құлақ және басқа да ағзаларды зақымдауымен қауіпті.&nbsp;Бас дәрігер балалар арасындағы сырқаттану ересек адамдарға қарағанда 4-5 есе жоғары болатынын айтады. Соның ішінде 5 жасқа дейінгі балалар арасында тұмау және ЖРВИ ауыр жағдайда өтіп, асқынулар туындауы да әбден мүмкін екен.&nbsp;– Иммунитеті әлі де жетілмеген және жүйке жүйесі толық қалыптаспағандықтан балаларда асқыну жағдайлары жиі кездеседі. Осы &nbsp;ауруларға шалдығу мүмкіндігі мектепке дейінгі балалар мекемесі және мектепке баратын балалар арасында жоғары болады. Себебі үлкен ұжымдарда инфекция тез таралады. Сондықтан оның алдын алған абзал, – дейді Еркебұлан Мақсұтұлы. Жіті респираторлық вирусты инфекциясы мен тұмау – әлемдегі ең өзекті медициналық, әлеуметтік, экономикалық мәселенің бірі. Дүниежүзілік денсаулық сақтау ұйымының мәліметіне сүйенсек, жылына әлемде 3-5 млн-ға жуық адам тұмаудың ауыр түріне шалдығып, 250-500 мың адам көз жұмады екен. Індет көбінесе 5 жасқа дейінгі балалар мен егде жастағы азаматтарда тіркеледі. Соның ішінде тұмау түрлі вирус салдарынан жоғарғы тыныс жолдарының зақымдалуымен және ағзаның улануымен сипатталады.&nbsp;Еркебұлан Мақсұтұлы ЖРВИ мен тұмауды емдеудің өз ерекшеліктері барын жасырмайды. Ол үшін уақытылы дәрігерге жүгіну маңызды рөл атқаратын көрінеді. Жалағаш ауданында жыл басында аталған дерт дендеген болатын. Қазір ахуал бірқалыпты.&nbsp; Екпе жасау тұмаудың алдын алудағы анағұрлым тиімді әдіс болып табылады. Жыл бойы ағзаны нығайту, әсіресе күз бен қыстағы инфекцияның өршу алдында қорғаушы иммундық механизмді нығайту керек. Аурудың алдын алу үшін ағзаның вирустарға қарсы тұруы үшін салауатты өмір салтын ұстану, бетперде тағу, қоғамдық орындарға барған соң қолды тазалап жуу, жөтел кезінде ауызды жабу, ғимаратты жиі тазалау мен желдету сынды санитарлық-гигиеналық режімді ұстану керек. Бетпердені ауырған адам да, қасындағы азаматтар да тағуы тиіс. Ал көкөніс, жеміс-жидек немесе құрамында жеткілікті дәрумендер бар басқа өнімдерді, әсіресе аскорбин қышқылын пайдаланудың да маңызы жоғары екен. Адам көп шоғырланған орындарға бармауға, мүмкіндігінше қоғамдық көлікпен емес, жаяу жүрген жөн. Жөтел мен түшкіру кезінде вирус 10 метр қашықтан да таралатынын &nbsp;есте &nbsp;сақтау керек.Тұмаудың өршуі кезінде вирустан қорғанудың маңызды компоненттерін, атап айтқанда, дәруменге бай азық-түлікті пайдалану, қажетті мөлшерде су ішу мен тынығу қажет екенін. Дәрігердің кеңесіне құлақ ассақ, тұмаудан сақтану &nbsp;салқын тигеннен болатын аурудың алдын алу мезгілдік тұмау індеті кезінде ғана емес, азаматтар әрқашан өз денсаулығына күтіммен қараған уақытта ғана нәтижелі жүзеге асатынын Ерекең қаперге салды. Сонымен қатар тиімді тамақтану, саламатты өмір салтын ұстану, ағзаны шынықтыру мен спортпен айналысу ағзаның иммундық дәрежесін көтереді екен.Бұл кесел адамға жөтелген, түшкірген кезде ауа тамшысы арқылы да тез жұғады. Тұмаудың алғашқы белгілерінде дене қызуы 40 градусқа дейін көтеріліп, &nbsp;қалтырау, әлсіздік, көз қарығу, буынның және бұлшық еттің, бастың ауруы, тамақтың жыбырлап, ауырсынуы, жөтелу, мұрынның бітелуі байқалады. Осыдан адам еңбекке уақытша жарамсыз болып қалады. Тұмау 5-10 күнге дейін созылады. Осы кезде дер кезінде емделмесе ауру асқынуы мүмкін. Ал асқынған ауру өкпе қабынуына, отит, гайморит кеселдеріне алып келеді. Сол себепті аурудың алғашқы белгілері байқалысымен дер кезінде медициналық көмекке жүгінудің маңызы зор.– Біздің міндет – аудан халқының денсаулығына тәулік бойы қызмет ету. Мейлінше осындағы антына адал әріптестерімді соған жұмылдырып жатырмын. Осы мақсаттағы жұмысымызда жүйе бар. Бірақ оған тоқмейілситін біз жоқ. Мейлінше елдің қажетіне жарасақ, алғысын алсақ, біз үшін одан асқан баға жоқ. Дертпен күрескеннен оның алдын алған баршамызға тиімді, – дейді бас дәрігер.Иә, оларға елдің алғысынан жоғары баға жоқ. Болмаса басшысынан бастап науқастардың ортасында жүрер ме еді. Біз бұған Ерекеңнің бір күндік жұмысында көз жеткіздік. Елдің ортасында жүріп, халықтың қажетіне жарағандардың жаман болғанын әзірге көргеніміз жоқ, көрсетпесін де.

Аудан халқынан алғыс алған ұжым

<a href="https://kyzylorda-news.kz/">Kyzylorda-news.kz.</a> Көктемгі егін жұмыстарының дәл қызған уақытында дизель бағасының өсуі дала еңбеккелерін біраз уайымға салды. Себебі «арзандатылған дизель отыны аудан шаруаларына жете ме, жетпей ме? Жеткен күннің өзінде бағасы қандай болады?» деген алаңдаушылық басым. Бірақ сала мамандары мемлекет тарапынан 1696,2 тонна арзандатылған дизель отынына сұраныс берілгендігін жеткізді. Бүгінде «РК-Мұнай» ЖШС-нен алынған мәліметке сәйкес, ауданның 49 шаруа қожалығы тарапынан өздеріне тиесілі 352,5 тоннасы алыныпты. Мұнай базаларынан дизельдік отынның литрін 212 теңгеден босатады.Еліміз өткен жылы дизель отынын шығарудың рекордтық көрсеткішіне, яғни 5,2 млн тоннаға жеткен болатын. Алайда ахуал республиканың бірақатар өңірлерінде дизель тапшылығы барын аңғартты. Жанар-жағармай қымбаттаса да, дизель отынының бағасы көктемгі егіс жұмыстары үшін нарық бағасынан 20 процент төмен болады. Бұл туралы Ауыл шаруашылығы вице-министрі Ербол Тасжүреков жеткізді.Мәселен, «Алтын дән – Шиелі» шаруа қожалығының төрағасы Асқар Бердібаев қымбатшылықтың ешқандай жақсылығы жоқ екенін айтады. Әсіресе, дені өз-өздерін жұмыспен қамтыған ауыл халқына салмақ түседі дейді. Бірақ жақсылықтан үмітін үзбеген қожалық басшысы Үкіметтің жанар-жағармай бағасын ұстап тұратынына бек сенімді. Десек те, сұйық отын бағасының артуы ауыл шаруашылығы өнімдерінің бағасына әсер етуі де мүмкін екенін жоққа шығармайды ол. Өйткені, сұйық отынның, оның ішінде ауыл шаруашылығы үшін қажетті дизель отыны қымбаттар болса, өндірілетін өнім көлеміне де әсер етуі қисынды.Егіс көлемі ұлғайғанАғымдағы жылы Шиелі ауданы бойынша 30 538 гектарға егіс егу межеленіп отыр. Бұл өткен жылғы жалпы егіс көлемімен салыстырғанда жоғары екендігін байқатты. Нақтылап айтар болсақ, биыл аудан диқандарының жұмысы 464 гектар жерге ұлғайған. Осы тұста қазақтың «Судың да сұрауы бар» деген сөзін қаперге алған абзал. Яғни, ағын судың өзін оңды-солды шашып-төкпей, ысырапқа жол бермей пайдалану маңызды. Бұл мәселе барлық диқандар мен жалпы елдің назарында болғаны да дұрыс. Өйткені, күздегі алатын өнім бүгінгі ұқыптылығыңызға байланысты болмақ. Сонымен, биыл ауданда күздік бидай – 1650, жаздық бидай – 447, тары – 240, мақсары – 1288, жаңа жоңышқа – 3410, ескі жоңышқа – 5578, мал жемдік асқабақ – 194, картоп – 1200, күнбағыс – 23, жемдік жүгері – 95, дән жүгері – 173, көкөніс – 1805, бақша өнімдері – 2400 гектар жерге егу жоспарланып отыр. Ал Сыр маржаны саналған негізгі дақыл күріштің көлемі – 12025 гектарды құрамақ.Тұқым тазалығы сақталған2023 жылдың егісіне аудан бойынша 330 тонна күздік бидай тұқымы дайындалып, егілген. Ал жоғары репродукциялы 89,4 тонна жаздық бидай, 32 тонна мақсары және 51 тонна жоңышқа тұқымдары себілуде. Негізгі дақыл күріштің 3000 тонна тұқымы құйылып, себу дәрежесіне -дайын. 3000 тонна күріш тұқымының 1 500 тоннасы жоғары сұрыпты &nbsp;I-репродукция, 1 300 тоннасы II-репродукция, 200 тоннасы III репродукциялы тұқымдарға жатады.Тыңайтқыш тапшылық тудырмайдыҚазір бұрынғыдай емес, жердің де құнарлығы азайып, күші қайтқан. Жыл өткен сайын бұрын-соңды білмеген, адам естімеген өсімдіктердің аурулары да көбейген. Адаммен малды былай қойғанда, бақшаңдағы дақылыңа да дәрі қажет. Осы орайда, биыл аудан егістігіне межеленген 14 335 тонна минералдық тыңайтқыш пен 12 045 литр гербицид қажет. Бұл бағытта атқарылған жұмыстардың нәтижесінде, қазіргі таңда шаруашылықтар тарапынан минералды тыңайтқыштардың 9336 тоннасы, яғни, 87,7% алынған. Қалған мөлшері алдағы мамыр айында толық жеткізілмек.Техника түгелАудандық ауыл шаруашылығы бөлімінің мәліметінше, 2022 жылдың қаңтар-желтоқсан айларында лизингке және өз қаржысына &nbsp;444 млн 140 мың &nbsp;444 теңгеге 14 жаңа үлгідегі техникаларын алып, техника парктерін жаңалаған. Бүгінде аталған құрылым жаңа үлгідегі МакДон, Джон Дир, Класс, Енисей, Есіл маркалы соңғы үлгідегі ауыл шаруашылық технологияларымен толыққан. 577 дана ауыл шаруашылық техникалары бар. Оның ішінде дала жұмыстарына қатысатын 331 трактор, 78 соқа, 46 тұқым сепкіш, 51 автомашина және 71 трактордың тіркемесі сақадай сай.

Қазақстан және Қызылорда облысының жаңалықтары