<a href="https://kyzylorda-news.kz/">Kyzylorda-news.kz.</a>&nbsp;Аудандық мәдениет үйінде 8 наурыз Халықаралық әйелдер күніне орай «Сіздер үшін, махаббатпен» тақырыбында мерекелік кеш өтті.Салтанатты кеште мейірімділік пен сұлулықтың, даналық пен рухани қуаттылықтың салтанат құрған күні қармақшылық аяулы аналар мен қызкеліншектер ерекше құрметке бөленді. Сондай-ақ мерекелік кеште нәзікжанды әйел қауымының мерейі еселене түскендей. Айтылған ізгі тілектер мен шырқалған әннің бәрі-бәрі бұл күні асыл ана, адал жар, аяулы апа-қарындастар тақырыбында болды.Мерекеге орай алғашқы құттықтау сөзді аудан әкімі Жандос Еркінбек алып, әйелдер қауымын көктемнің шуақты мерекесімен құттықтады.<blockquote>«Сіздерді жыл басы көктеммен бірге келген айшықты мереке – 8 наурыз Халықаралық әйелдер күнімен шын жүректен құттықтаймын. Әйел-ана – әдеміліктің символы, әлемнің тірегі. Сіздер бұл өмірге тек ізгілік пен жылылық, мейірім мен шуақ сыйлаушы жандар ғана емес, тіршілік атаулының ең асыл, абзалы деген құрметке лайықсыздар. Осы мерейлі мереке қарсаңында дендеріңізге саулық, отбасыларыңызға бақ пен береке, шаттық тілеймін» деді ол.</blockquote>Жиын барасында түрлі салада белсенділігімен, адал еңбегімен көзге түскен аналар, қыз-келіншектер аудан әкімінің алғыс хаты табысталып, кеш соңы аудан өнерпаздарының мерекелік концертіне жалғасты.&nbsp;

Қармақшыда арулар ардақталды

​<a href="https://kyzylorda-news.kz/">Kyzylorda-news.kz.</a> 8 наурыз - Халықаралық әйелдер күні Қазалы ауданында сән-салтанатымен аталып өтті. Р.Бағланова атындағы аудандық мәдениет үйінде ұйымдастырылған мерекелік шараға аудан әкімі Мұхтар Оразбаев қатысты.&nbsp;<blockquote>«Әйелмен әлем әдемі» атты салтанатты шарада аудан әкімі нәзік жандылар қауымын көктемнің шуақты мерекесімен құттықтап, ізгі лебізін білдірді. «Елдіктің жүгін ер-азаматтармен бірдей арқалап, сан түрлі салада табысты еңбек етіп, тұрақтылықты нығайтуға, елдігімізді баянды етуге бірегей үлес қосып келесіздер. Бейбіт тірлік пен берекелі бірліктің ұйытқысы болып отырған ардақты аналарымызға, апа-қарындастарымызға, барша қыз-келіншектерге шынайы ризашылығымды білдіремін», - деді аудан басшысы Мұхтар Оразбаев.&nbsp;</blockquote>Шара барысында ауылдық жерлерден келген 80-90 жастағы қарт әжелерге арнайы құрмет көрсетілді. Аудан әкімі көп балалы аналарға «Алтын алқа» мен «Күміс алқа» төсбелгілерін табыстады. Түрлі салада ер адамдармен иық тіресе жемісті еңбек етіп жүрген әйелдер қауымы облыс және аудан әкімдерінің Алғыс хаттарымен марапатталды. Олардың қатарында сауыншы, көше тазалықшысы, жол шебері, кран жүргізушісі, тігінші, азпазшы, теміржолшы сияқты түрлі салада еңбектерімен көзге түсіп жүрген қыз-келіншектер бар.Сонымен қатар, еңбек ардагері, батыр ана Әби Бибісара мен білім беру саласының үздігі, зейнеткер Садық Гүлшатқа «Қазалы ауданының құрметті азаматы» төсбелгілері табысталды.&nbsp;Мерекелік шарада аудан әкімінің арнайы шақыртуымен келген қазақ эстрадасының жарық жұлдыздары өнер көрсетті. Индира Елубаева, Гүлнұр Нұрасылова мен Ақжол Түменбай қазалылық нәзік жандылар құрметіне ән мен жырдан шашу шашып, ерекше көңіл-күй сыйлады.&nbsp;Шара соңында барлық аналар мен қыз-келіншектерге аудан әкімінің мерекелік арнайы сыйлықтары таратылып, құрмет көрсетілді.<figure class="image"><img src="https://knadmin.beoblood.kz/uploads/330147794_1321869881710238_777494027490554598_n_e793bbccb3.jpg" alt="330147794_1321869881710238_777494027490554598_n.jpg"></figure>

Қазалы ауданында халықаралық әйелдер күні аталып өтті

<a href="https://kyzylorda-news.kz/">Kyzylorda-news.kz.</a> Алғыс айту мерекесі Қазалы ауданында ерекше аталып өтті. Мәдениет үйіне жиналған көрерменге бірнеше мектеп пен колледж және аудан өнерпаздары алғыс білдірді. Олар әннен шашу шашып, мың бұрала би биледі. Сахналық көрініс ұйымдастырды. Мәнді де, маңызды қойылымды бейнелеген аудандық оқушылар үйінің ұжымы отбасындағы ата-әже, әке-ана, бауырларға отбасы құндылығы жоғары тұратындығын көрсетті.Шарада №249 мектеп-лицейінің ұстаздары мен ата-аналарға, Қазалы аграрлы-техникалық колледжі диқандар мен еңбек адамдарына, Қазалы гуманитарлық-техникалық колледжі дәрігерлерге, өрт сөндірушілер мен ішкі істер саласының қызметкерлеріне ризашылықтарын жеткізді. Әйтеке би кенттік мәдениет үйі көше тазалығына жауапты жұмысшыларға, Қазалы көлік-техникалық колледжі теміржол саласының қызметкерлері мен құрылысшыларға және аудандық мәдениет орталығы түрлі этнос өкілдеріне рахмет айтты.&nbsp;Салтанатты кеште бейбітшіліктің нышаны ретінде бір шаңырақ астына жиналған түрлі ұлт өкілдері бір тал уықтан ұстап шықты. Мерекелік басқосуда қазалылықтарды айтулы күнмен құттықтаған Қазалы ауданының әкімі Мұхтар Әуесұлы жылы лебізін жеткізді.<blockquote>«Осынау көктем мезгілінің алғашқы күнімен тұспа-тұс келген Алғыс айту күнімен шын жүректен құттықтаймын. «Төртеу түгел болса төбедегі келеді, алтау ала болса ауыздағы кетеді» деп бекер айтылмаса керек. Төртеудің түгелдігі ауызбіршілігі жарасқан береке ынтымағы ұйысқан мемлекетте болады. Араларыңызда ата-бабамыздың салып кеткен сара жолы мен дәстүрін жалғастырып, ел экономикасын көтеруде маңдай терін төккен аға-апаларымыз отыр. Барша елеулі еңбек етіп жүрген сала мамандарына шексіз алғысымды жеткіземін. Мереке құтты болсын», – деді аудан әкімі.&nbsp;</blockquote>Одан соң үрдіс бойынша марапаттау рәсіміне кезек берілді. Онда бірқатар ауданның дамуына сүбелі үлес қосып, қоғамға еңбегі сіңген бірқатар азаматқа аудан әкімінің арнайы номинациялары табысталды. Сахна төрінде «Абыз ақсақал», «Ардақты әже», «Қайсар жан», «Ұлт мұрасын ұлықтаған», «Аялы алақан», «Еңбегім еліме», «Қайырымды жан» және «Батыр бала» иегерлері көпшіліктің құрмет-қошеметіне бөленді.&nbsp;Ескере кеткен жөн, марапатқа көптің көзіне ілінбей жүргендер шықты. Аталған номинация иегерлерінің бірі – Сапарбек Оразбайұлы елдегі бейбітшілік пен тыныштық ұласа беруін тіледі. Осылайша Алғыс айту күніне орай өткізілген шара елдегі ынтымақ пен бірлікті дәріптейтін концерттік бағдарламаға ұласты.

Шаттыққа бөленген күн

<a href="https://kyzylorda-news.kz/">Kyzylorda-news.kz.</a> Ел ішінде қаржылық алаяқтардың қармауына түсіп, барлық жиған-тергенінен айырылып, сан соғып қалып жатқандар көп. Оған дәлел әлеуметтік желілерде алаяқтарға алданған азаматтардың жан-айқайына жиі көзіміз шалынатын болды. Тіпті жақын ағайын-туыстарымыздың, «Мен» деген сауатты азаматтардың да қаскөйлердің қақпанына түсіп қалғанын көзімізбен көріп жүрміз.«Байлықтың жолын көрсетеміз, тек ынтаңыз бен ниетіңіз болса жеткілікті. Хабарласыңыз!», «Ақша сал да еселеп қайтар», «Берешектен құтылуға көмектесеміз» деген іспетті жарнамаларды әр жерден көзі шалмаған адам кемде-кем шығар. Жарнама арқылы хабарласа қалсаңыз хал-жағдайыңызды біліп, қыруар ақша уәде етіп, сізбен дос болуға әлек болады. Бәрінен бас тартсаңыз, екіншісі нөміріңізді алып, хабарласа кетеді. Әрине олардың жұмысы да сол, адам шақыру арқылы пайдасын арттырады. Себебі бүгінде көбінесе адамдар тез әрі жеңіл жолмен табысты болып, бірден мол ақшаға кенелуді армандайды. Бірақ қайдан, тегін ірімшік тек қақпанда екені белгілі емес пе? Десе де өткен жылы елді шулатып, қаншама жанның көз жасына себеп болған «Гарант 24 ломбард», жақында ғана анықталған «Финико» секілді қаржылық ұйымында болған шу халықтың әлі де қаржылық алаяқтарға қарсы иммунитеті қалыптаспағанын анық көрсетті.Қаржылық алаяқтық дегеніміз не?Қаржылық алаяқтық дегеніміз – алдау, сенімге қиянат жасау және заңсыз баю мақсатында түрлі айла-амалдар арқылы ақша айналымы саласында заңсыз әрекеттер жасау. Қаржылық алаяқтықтың арасында кең тарағаны банк карталарын пайдалану арқылы алаяқтық, интернет желісіндегі алаяқтық, ұялы телефондарды пайдалану арқылы алаяқтық және қаржы пирамидаларымен жасалатын алаяқтық.&nbsp;Соңғы уақытта кең етек жайған алаяқтықтың бірі – үй немесе көлікке ақша жи-науға көмектесеміз деген арамза пиғыл¬мен адамдардың ақшасын иемдену әдісі. Әдетте мұндай қаржы ұйымдары жинақ бағдарламасына аздаған жарна енгі¬зуді сұрайды. Бағдарлама аяқталған уақытта клиент мол табысқа кенелетініне уәде береді. Мәселен, қатысушы бастапқыда 500 мың теңге салса, жарты жыл сайын 1,2 млн теңге сыйақы алады. Бұл ретте сыйақы мөлшеріне клиент шақырған адамдар саны мен олар салған ақша сомасы әсер етуі мүмкін. Осылайша белгілі бір қаржы жиналғанда алаяқ компания банкроттық жариялап, нарықтан ғайып болады. «Адамнан қулық аспайды» демекші, әккі алаяқтар өзінің арам пиғылын іске асыру үшін кез келген ақпаратты ұтымды пайдалана біледі. Сондай-ақ БАҚ пен әлеуметтік желідегі жаңалықтардан үнемі хабардар болады. Елдегі қаржы саласындағы барлық өзгерістер мен мемлкеттік бағдарламалармен танысып, тиімді талдайды. Сондықтан қаржылық сауаты төмен азамат мұндай алаяқтардың оңай олжасына айналады.Құзырлы органдар не дейді?Мемлекет басшысы Қасым-Жомарт Тоқаев Қазақстан халқына Жолдауында алаяқтық пен қаржы пирамидаларына қарсы іс-қимыл жөніндегі іс-шараларды құзырлы орындарға күшейтуді тапсырған болатын. Мәселенің өзектілігі аталған қыл-мыс түрлерін тіркеудің тұрақты өсуіне және жәбірленушілердің көптігіне байланысты екені сөзсіз. Әрине қаскүнемдерді түбегейлі жою әзірге мүмкін болмай тұр. Дегенмен әр адамның бойында қаржылық сауаттылық және қаржылық қауіпсіздік деген түсініктерге салмақты көзқарас қалыптастыру, өзінің қаржысына өзі ғана &nbsp;иелік ететін сенімділік беру, түрлі алаяқтыққа ұрынып қалу тәуекелін азайту секілді азаматтардың қаржылық сауаттылығын арттыру бойынша іс-шаралар тиісті органдар тарапынан үздіксіз жүргізілуде.&nbsp;Мәселен, Қызылорда облысы бойынша экономикалық тергеп-тексеру департаменті жастарды қаржылық алаяқтықтан сақтандыру мақсатында өткен жылдың қазан айынан бастап «Қаржылық &nbsp;сауаттылық және қаржылық қауіпсіздік негіздері» тақырыбында қала мектептері мен колледждерде семинар сабақтар өткізуді қолға алған. 2022 жылдың соңғы 3 айында 19 мектепте, 7 колледжге және университетте 29 кездесу өткізілсе, дәл осындай іс-шараларды оқу жылының аяғына дейін аудан мектептерінде өткізуді жоспарға қойып отыр.&nbsp;<blockquote>«2022 жылы қаржылық алаяқтық белгілерімен Қызылорда облысы бойынша «Rogneda», «Не работа» және «Tiens» жобаларына қатысты 3 іс тіркелді. Тергеу реттілігімен екі материал полиция органдарына, 1 материал Түркістан облысы бойынша экономикалық тергеп-тексеру департаментіне жолданды. Десе де алаяқтарды іздегеннен алдын алу тиімді және оңай екені белгілі. Сондықтан азаматтарды қаржы мәселесіне келгенде өте сақ болуға үндеймін. Мынадай кеңестер беремін. Қаржы бойынша түскен ұсынысты қабылдамас бұрын сіз тыңғылықты зерделеңіз. Сондай-ақ өзіңізден кейін адам тіркегеніңіз үшін қомақты табыс ұсынса, жылдам және үлкен пайызбен түсім уәде етсе, әлеуметтік желідегі жарнамасы өте қарқынды болса, міндетті түрде тексеріңіз. Ал күмәндансаңыз «baiqa piramida» телеграмм ботта анықтауға болады. Егер сұрақтарыңыз туындаса, жедел желі жұмыс істейді, «Call center – 1458», – дейді Қызылорда облысы бойынша экономикалық тергеп-тексеру департаментінің бас маманы Бақыт &nbsp;Орданова.</blockquote>Аталған мәселе бойынша Қазақтан Республикасы Қаржылық мониторинг агенттігінің қолға алған жаңа жобасының бірі 2022 жылдан &nbsp;бастап қаржы пирамидалары мен алаяқтық сайттарын анықтау бойынша әлеуметтік желіге мониторинг жүргізіле бастады. Сонымен қатар «Кибернадзор» ақпараттық жүйесі арқылы қаржы пирамидасы белгісі бар сайттар мен сілтемелерді бұғаттау үшін Қазақстан Республикасының цифрландыру министрлігі жанынан арнайы эксперттік топ құрылған. Өткен жылы қызылордалық мамандардың жұмысы нәтижесінде осы эксперттерге 526 сайт пен сілтемелерді бұғаттауға жолдама берілген, оның ішінде 60 сілтеме бұғатталып, 96 сілтеме эксперттің бақылауында, 333 сілтеме «қолжетімсіз» болған. Ал биыл екі айда 250 сайттың сілтемесі бақылауға алынып, 100 сілтеме эксперттермен бұғатталған.Интернет алаяқтарынан қалай қорғану керек?Заман ағымына қарай алаяқтық қылмысы сан түрленіп, мың құбылуда. Бүгінде нарық пен жарнамалауды мықты меңгеріп алғандар «аңқау елге арамза молданың» кебін киіп жүр. Қазір қаржылық алаяқтықтың кең тараған түрі – интернет арқылы алдау. Интернеттегі қаржылық алаяқтықтың түрі де саналуан. Өйткені алаяқ өзінің олжасымен тікелей байланысқа түспей, арамза ойын монитор артында отырып-ақ жүзеге асыра береді.&nbsp;Соның бірі – интернет арқылы сатып алу. Сатушы жалған немесе жарамсыз жеке куәлікті қолдана отырып, ақша аударымдары жүйесі арқылы тауарды төлеуді сұрайды. Ақша алған кезде алаяқ дереу жоғалады. &nbsp;Жұлдызнама құрастыру. Пайдаланушыға сауалнаманы толтыру ұсынылады, содан кейін электрондық поштаға жұлдыз жорамалының өзі емес, көрсетілген нөмірге SMS хабарлама жіберу туралы хат жіберіледі. Мұндай хабарламаның құны бірнеше жүз теңге болуы мүмкін.Тіркеме ретінде жасырылған вирус – файл немесе сілтеме. Оның мақсаты – төлем жүйелеріндегі сіздің шоттарыңыз бен банк карталарының деректері туралы деректерді жинау. Мұндай алаяқтықтан қорғану үшін хаттардағы сілтеме бойынша төлем жүйелерінің сайттарын ашпау қажет, мекен-жай жолағындағы URL мекен-жайын тексеріп, сілтеменің қайда апаратынын қарау маңызды. Сілтеме сенімді болып көрінсе де, мекен-жайларды ұйымдардың ресми сайттарының домендік атауларымен тексеру керек.Сондай-ақ интернет арқылы сауда жасау кезінде жеке банктік картаны тек тексерілген сайттарды ғана пайдаланған жөн. Есепшоттардың құпия сөздерін хабарламай, оларды тек төлем жүйелерінің сайттарында енгізу қажет. Құпия ақпараты бар файлдарды қолжетімді немесе сенімсіз ақпарат құралдарында сақтамай, олардың бірнеше көшірмесін жасап отыру маңызды.&nbsp; Сонымен қатар жұмыссыз жүрген азаматтарға жұмысқа орналастырамын деп ақша сұрап, алдап жатады. Мұндай жағдай орын алса, қашықтан жұмысқа орналасу кезінде ешқандай жарна төлемеген жөн.&nbsp;Түйін. «Қаржы пирамидаларын құру мен қаржылық алаяқтық ойын жүзеге асыру үшін миллиондаған қаржылық сауаты төмен азаматтар болса жеткілікті. Алаяқтар қаржыдан қысылып, қиналып жүрген адамдарды алыстан танып, өтірік аяушылық танытып, өз қақпанына тез түсіреді. Ра-сымен алаяқтардың ашкөздігі мен кей адамдардың сенгіштігі бұл мәселенің өзектілігін әлі де жоймай келеді. Сондықтан оңай жерде алтын жатпайтыны бәрімізге белгілі жайт. Ал табыс табу үшін де еңбекқорлық, табандылық, төзімділік секілді қасиеттер қажет-ақ. Тоқсан ауыз сөздің тобықтай түйіні, бақыттан бас айналдырар әңгімелерді естіп алып, бұйдасын ұстатқан бұзау секілденбей, қандай да бір іске ақша құймас бұрын оның нақты қандай компания екенін толығырақ біліп, ара-жігін ажыратып барып тіркелген дұрыс болады.

Интернет алаяқтық: 100 сілтеме бұғатталды

<a href="https://kyzylorda-news.kz/ru/">Kyzylorda-news.kz</a>. Ғ.Мүсірепов атындағы қазақ мемлекеттік академиялық балалар мен жасөспірімдер театрының актері Жомарт Зейнәбілмен сұхбатты оқырман &nbsp;назарына &nbsp;ұсынамыз.– Сіз актер болмағанда кім болар едіңіз?– Актер болмағанымда филолог немесе журналист болар едім. Мектепте қазақ тілі, қазақ әдебиеті пәндерін жақсы оқыдым. Көп адамның сөйлеген сөзінен қателік тауып отыратын әдетім бар. Біреудің жазуында жұрнақ, жалғау дұрыс қойылмаса, оны да ескеремін. Қате түзеп, бастауыш пен баяндауыштың дұрыс қолдануын қадағалау үшін филолог болар едім.– Сіз біздің жерлесіміз екенін мақтанышпен айтамыз. Сіз бізбен мақтанасыз ба?– Мен – қызылордалықпын, осында туып-өстім. Маған бұл өңір өте ыстық. Топырағына аунап өскен елді қалайша сағынбаймын, қалайша мақтамаймын?! Мен барша қызылордалықпен мақтанамын. "Жерлесім" деп алып-ұшып тұрамын. Қызылорданың өзіне тартатын бір ерекшелігі бар.– Қазір кім бар қара шаңырақта?– Өзімнен кейін Бағдат деген інім бар. Қара шаңырақтың түтінін түтетіп отырған да сол. Келіншегі Айгүл екеуі бес бала тәрбиелеп отыр. Қара шаңырақты Бағдатқа табыстадық.– Ауылға қаншалықты жиі келесіз?– Жылына бір рет бала-шағаммен қыдырып келемін. Оның үстіне келіншегім қызылордалық болғандықтан "ауылға барамыз" деген сөз жеңілдеу тиеді. Бала-шағам да Шиеліні, Байгеқұмдағы көлді аңсап тұрады. Балаларым суға түскенді, жүзгенді ұнатады.– Балаларыңыз өзін алматылықпын дей ме, әлде қызылордалықпын дей ме?– Алматыда тұрғандықтан алматылықпыз дейді. Дегенмен үлкен қызым Шиеліде туған ғой, Алматыда тұрсақ та, Шиеліні аңсап тұрады. Балаларым түбі қызылордалық екенін біледі.– Сізді танымал еткен мамандығыңызға келсек, алғаш қандай рөлді ойнадыңыз?– Мектептеоқып жүргенде Шоқан Уәлиханов жайлы пьесадан үзінді қойып, орыс патшасы Александр екіншінің рөлін ойнадым. 7 сыныптан бастап мектептің аяз атасы да, жүргізушісі де болдым. Шиелі аудандық мәдениет бөлімінде қызметте жүргендегі рөлдерім өз алдына бір төбе. Шиелі аудандық мәдениет бөліміне халық театры атағын алып бердік. Үлкен театр сахнасында алғаш ойнаған рөлім – жерлесіміз Тынымбай Нұрмағанбетовтың "Біз түріктерміз" деген пьесасындағы жас түрік жігіттің рөлі. Аты – Аллы.– Театрға қалай келдіңіз?– Темірбек Жүргенов атындағы Ұлттық өнер академиясында оқып жүргенде ықпалды адамдардың көзіне түскен болуым керек. Бас режиссер Райымбек Сейітметов пен ұстазым Нұрқанат Жақыпбай батасын беріп, жолымды ашты. 1994 жылы оқу бітірместен жұмысқа қабылдандым. &nbsp;– Сіз ойнаған рөл өте көп. Соның ішінде Иран-Ғайыптың «Қорқыттың көрінде» – Қорқыт, Оралхан Бөкейдің «Атау кересінде» – Таған бейнелері. Образды ашу қиын емес пе?– Қиын болған бір ғана қойылым бар. Ол – бақсының рөлі. Қорқыттың бақсы болатын тұсында қатты қиналдым. Өйткені автор Иран-Ғайып: "Бұл "Қорқыттың бақсылық образы бөлек болу керек. Бұрынғы Алдар көседегі Елубай Өмірзақовтың "Сары шал, кәрі шал" дейтін бақсылығы емес» деді. Шынымды айтсам, осы рөлді алып шығатыныма сенбедім. Көп іздендім, Алматыны аралап, сұрастырып жүріп, зікір салу қалай болатынын көзбен көрдім. Сол образға кіруге тырыстым. Менің дайындығым да көп болған жоқ еді, бірақ сыншылар жақсы деп бағалады.– Егер мына рөлді қайта ойнатса, мына тұсына өзгеріс енгізер едім деген сәт болды ма?– Әрине ондай рөлдер болады. Тек біраз уақыт өткеннен кейін сол рөлді берсе, мүмкін басқаша ойнар ма едім деген ойлар болады. Негізі режиссердің талабы бойынша образды алып шығамыз.– Бір рөлге қанша уақыт дайындаласыз?– Көп уақыт дайындаламыз. Ізденуге, зерттеуге уақыт беріледі. Егер зерттемей ойнаймын деген ой болса, онда образ ашылмауы мүмкін. Актерге қойылатын басты талап – образды алып шығу. Кей қойылымдарға тоғыз ай дайындалған кездер болды.– Бала тәрбиесіне көңіл бөлесіз бе?– Қыз бала анасына қарап өседі. Анасы – оқытушы, психология ғылымдарының кандидаты, доцент. Қыздар педагогикалық университетінде сабақ береді. Мен көп нәрсеге араласа қоймаймын, дегенмен кей нәрселерді назардан тыс қалдырмаймын. Қыздарым да ақылды, бір айтқан сөзді ұғады.– Қазіргі қазақ киносына көңіліңіз тола ма?– Қазақ киносы кезінде шарықтау биігінде болды. Мықты режиссерлар бар кезде әрине. Тәрбиелік мәні де керемет еді. Егер теледидардан бұрынғы киноларды көрсетіп жатса, онда міндетті түрде тамашалаймын, шынымды айтсам, қайталап көруден жалыққан емеспін. Қазіргі киноларды онша көре алмаймын. Әсіресе КВН-нен шыққан продюсерлердің киносын қабылдай алмаймын.– Актердің образдан шыға алмайтын сәттері бола ма?– Шынымды айтсам, мұндай сәт өзімде болмайды. Актер әртүрлі характерге көше алатын адам болу керек. Әрине образға кіру бар, оны сезіну бар. Психологиялық түрде дайындалып келу бар, оның барлығы сахна жабылып, артистер бірін-бірі құттықтап, көрермен берген бір шоқ гүлін алып, грим бөлмесіне кіргенге дейін. Одан соң адам өзінің қалыпты болмысына түседі. Кейде бала-шағам сезіп отырады. Дауысым өктем шығып қалса керек. Келіншегім "әкелерің бүгін Махамбетті ойнап келіпті ғой, Махамбеттің образынан шықпай отыр екен, жай сөйлеңдер" деп әзілдеп жатады. Дәл сол кезде образдан шыға алмай қалдым демеймін.– Қойылым барысынан есте қаларлықтай бір оқиға айтып беріңізші…– Әр спектакль кезінде әртүрлі оқиғалар болады.Жаңа бір сөзімде &nbsp;"Қорқыттың көрі" қойылымына дайындық аз болғанын айттым ғой. Қадірбек Демесінов деген ақсақал екеуміз ойнадық. Қызыл қанат Әзірейіл Қорқыттың жанын алуға келеді. Сахнада тастар үйіліп тұрады. Тастың үстіне мен қобызымды қойып кетемін. Ол кісі жанымды алуға келгенде сұраймын: "Қызыл қанат Әзірейіл, өлер алдында рұқсат ет. Қобызымды жылауық, әлдилейін бір ауық. Беремісің рұқсат? Қоштасайын қобызыммен, әлдилейін бір ауық, беремісің рұқсат?». Ол кісі "Рұқсат, рұқсат, абызым, міне, қобызың" деп әкеліп беру керек. Сол кезде дайындықтың аздығы әсер етті ме, әлде тасты өзгертіп қойды ма, әйтеуір қойған қобыз көзіне көрінбей қалады. Екі қобыз болады, біреуі ортасынан сынған. Сынған қобызбен мені ұру керек, ұрған кезде бөліну керек. Шыр-көбелек іздеп таппай қойды. Мен күтіп әлі отырмын. "Рұқсат, рұқсат, абызым" дейді де таппайды. Бір уақытта келіп, өлеңмен жазылған шығарманы бұзбай сұрайды: "Уа, абызым, қайда шырғай қобызың" дейді. Сол сәтте басымды бұрып көрсеттім, сосын барып әкелді. "Абызым, міне, шырғай қобызың" деп әкеліп береді. Спектакль біткен соң әріптестер құттықтап, жарайсың, бәрекелді, тамаша болды деп жатыр, Театр сыншысы Әшірбек Сығай кітабына да жазды осыны. Сондай сәттер болып тұрады. «Махамбетті» ойнап жатқан кезіміз. Образға кіріп, шықпай қалды дегеннен шығады-ау, образға кіріп шықпай қалды ма, әлде кіре алмай қалды ма, бірінші акт біткеннен кейін бір актер гримін сүртіп, кетіп қалыпты. Екінші актіде ол шығу керек. Актер ойнап жатыр, жаңағы жігіт шығар кезде "Жүсіп, әй, Жүсіп" деп іздейді. Ол шықпайды. Жан-жағына қарайды. Жұлдызбек деген актерді көреді. Ол да сол киімде тұр екен. Бұл бір сәйкестік шығар. Сосын "Әй, жұлдызды Жүсіп, бері кел" деп шақырып алады. Басқа актерге айтатын сөзін соған айта береді. Бұл да жауап береді. Бір уақытта мен бардым. Маған айтатын сөзі бар: "Мен кетемін" дейді "Неге кетесің?" деген кезде: "Ел басына күн туғанда өз бала-шағамды ойлау керек" деген сөздер бар. Оларды айта алмайды, тек "кетем, кетем" дей береді. Амал жоқ өзім құрастырып, "кете-бер, кете бер" деп итеріп шығарған сәттер болды.– Қай рөл өзіңізге жақын?– "Атау кередегі" Тағаннан жан-дүниеме ұқсастық таптым.– &nbsp;Кімді үлгі тұтасыз?– Әкемді үлгі тұтамын. Отбасымда 8 бала болдық – төрт ұл, төрт қыз. Соның барлығын жетілдіремін, жеткіземін деп арпалысты. Қиындыққа мойымай, бізге сыр бермей өткен өмірі бәрімізге үлгі-өнеге болды. Одан кейін ұстаздарымды үлгі тұтамын. Нұрмахан Жантөринді жақсы көрдім. Әлгі күнге сол кісінің киносы көрсетіліп жатса, барлық жұмысымды тастап көремін. Асанәлі Әшімовты, Досхан Жолжақсыновты үлгі тұтамын.– Соңғы оқыған кітабыңыз қандай?– Әбдіжәміл Нұрпейісовтың "Соңғы парызы".&nbsp;– Театр мен кино. Қайсысын таңдайсыз?– Бір қойылымды шығару үшін 3-4 ай уақыт кетеді. "Сең" спектакліне 9 ай дайындалыппыз. Бір актер тура 9 ай қойдық деді. Қайдан білдің десек: «Осы пьесаны қоюға бұйрық шыққан күні үйге барып, жаңа спектакль қоямыз дегенім есімде. Сол күні келіншегім менде де жақсы қуаныш бар, аяғым ауыр деп сүйіншіледі. Міне, енді сол премьераға үш күн қалғанда босанды», – дейді. Қойылымға осындай ұзақ уақыт жұмсалады. Ал кинода екі камера қойылады. Бір қателессең, қайта түсіреді, екінші қателессең, екінші камера түсіреді. Үшінші, төртінші қателескенде де басқаша жасауға болады. Бірақ жарыққа шыққаннан кейін өзіңе қате болып көрінетін болса, оны қайта өзгерте алмайсың. Ол лентаға жазылып кетті. Ал театрда сахнаға қойылғаннан кейін сыншылар қателігін айтса, кейінгі қойылымда өзгертуге болады. Театрды жақсы көрем. "Кино әлеміне сүңгіп, судағы балық сияқты жүзіп кеттім" деп айта алмаймын.– Әңгімеңізге рақмет! &nbsp;

Жомарт Зейнәбіл: Актер – қиындыққа мойымайтын, қорықпайтын адам

<a href="https://kyzylorda-news.kz/ru/">Kyzylorda-news.kz</a>. Кейінгі кезде «Ақсуат» ауылдық округіне коныстанушылар көп.&nbsp;Әсіресе қаланың шулы тіршілігінен шаршағандар «Наурыз» елді мекенінен жер алып, үй салуда.Оның үстіне биыл газ кіретінін естіген жұртшылықтың жерге сұранысы артқан.&nbsp;Сонан да мұнда жер мен үйдің бағасы қымбаттауда. Мәліметтерге сүйенсек, ауылдық округке қарасты Ж.Маханбетов ауылы және «Наурыз» саяжайында тұрғындар саны 10 мыңнан асқан. Алдағы уақытта «көгілдір отын» қосылғанда көшіп келушілер саны тағы еселенбек.Әлбетте, жаңа қоныстанушылар үшін көшелер салынып, оның инфрақұрылымында мәселе болмағаны жақсы. Алайда әлеуметтік желіде тұрғындар тарапынан жиі сын айтылып жүр. Жұртшылықтың талап-тілегін жеткізу үшін әкіммен бетпе-бет жолығуды мақсат еткен едік.Ауылға кіреберісте алдымен «Шаттық» құрылыс дүкені көзге түседі. Демек, құрылыстың қарқын алғанын аңғару қиын емес. Қап-қап көмір де осында.Қатты отынды пайдаланатын ақсуаттықтар әзірге сонымен лаждап отыр. Ал оң жақта үлкен мейрамхана менмұндалайды. Қос қабатты жаңадан салынған үйлер көптеп бой көтерген. Әрі қарай шағын дүкен, жеке балабақша, жеке мектеп, дәріхана, сұлулық салоны дейсіз бе, бәрі бар. Білуімізше, 408 жеке кәсіпкер тіркелген. Көпшілікке қызмет ететін орындар қаладан кем түспейді.Бұдан он шақты жыл бұрын осы ауылға жұмыс барысымен бір шараға келгенім есіме түсті. Сонда бір ғимарат ішінде әкімшілік, учаскелік амбулатория, кітапхана, екінші қабатында тұрмысы төмен отбасылар тұрып жатқанын көріп, таңғалғанымыз рас.Бүгінде ондай сүреңсіз көрініс жоқ. Ауылдық әкімшілік өз алдына бөлек ғимаратқа көшіпті. Бес жылдан астам ауылды басқарып келетін Мәмбетәлі Ақмырзаев осы жердің тумасы болып шықты. Демек, өз ауылының негізгі мәселесін беске білуі тиіс. Тұрғындар базынасын жеткізген бізге өзінің жұмыс істеген уақыттағы ауыз толтырып айтарлықтай тірліктерді баяндады. Ауылдық округтің тарихы сонау 1928 жылдан бастау алады. Кезінде кеңшарда ірі-ірі мал шаруашылықтары болған. Қазір де жұмыс жасап тұрған бірнеше шаруашылықтар бар. 1994 жылдан бастап құрылған «Ақсуат» ауылдық округіне Кеңес Одағының Батыры Жақыпбек Махамбетов атындағы ауыл (бұрынғы С.М.Киров атындағы совхоз) және «Наурыз» саяжайы, «Жаңадария» каналы бойында орналасқан шағын елді мекендер қарайды. Сол канал іргесіндегі «Ойшеңгел» деген жер мен дария арасында қамыс өскен алаңқай «Ақсуат» деп аталады. Дарияның табаны болған сол жерге шеңгел өспей, қамыс шыққан.Наурыз саяжайының округке келіп қосылғанына 15 жылдай уақыт болған. Жаңадан қоныстанушылардың негізгі мәселесі – жол, жарық, ауызсу, газ. 2017 жылы 1 млрд 250 миллион теңге бөлініп, ауызсу мәселесі шешілген. «Ауыл – ел бесігі» бағдарламасы аясында 550 млн теңге бөлінген. Оның 150 млн теңгесі қырық жылдай жөндеу көрмеген №43 мектепті толығымен қайта жаңғыртуға жұмсалыпты. Кезінде қыс айларында сырт киіммен сабақ оқыған оқушылар, қазір жақсы жағдайда білім алады.«Ауыл – ел бесігі» бағдарламасы бойынша 2020 жылы 19 көше жөнделген. Оның ішінде 7 көшеге асфальт, қалғанына шиыршық тас төселген. Жаңбыр жауса ми батпағы шығып, жаз шықса шаңы аспандайтын көшелер осылайша кейінгі екі-үш жылдықта ретке келіпті. Оған 350 млн теңге жұмсалған. Ауыл тұрғындарының көбісі қалаға қатынап жұмыс істейді. Сондықтан ең бірінші тұрғындарды мазалайтын да – жол мәселесі. Қоғамдық көліктерден №2, №12 бағыт қатынап тұр. Жуырда №12 бағытқа жаңа үлкен сыйымдылықтағы автобустар берілді. Сондықтан&nbsp;алдағы жоспар,&nbsp;олардың жүруіне ыңғайлы әрі кең, асфальтталған көшелер керек.Биылға жоспарланған үлкен жобалардың бірі – ауылдың электр желілерін жаңарту. Ауыл әкімі М.Ақмырзаевтың айтуынша, 1 млрд 65 млн теңгеге үлкен жоба дайындалуда. Оған 32 көшені электр желісімен қамту қарастырылып отыр. Жоба аясында 8 трансформатор құру көзделген. Жел тұрса, жылт етіп жарығы сөніп қалатын кейбір көшелер бар. Олар бұрынғы ескі бағаналарға жалғанған. Сондықтан тұрғындар «жарық сөнді» деп жиі реніш білдіріп жатады. Енді жоба іске асса, «жарықтың сөнуі орын алмайды» деп сендірді әкім. Былтыр жаңадан көшіп келген тұрғындар орналасқан 28 көшеге электр желісі тартылып, 5 трансформатор орнатылған. Одан бөлек, үлкен бес көшеге түнгі жарық шамдарын орнату және асфальттау жұмыстары жасалып, тротуар түседі. Тағы 32 көшеге электр желісін тарту қажет.Өзекті мәселенің тағы бірі – «көгілдір отын». 2018 жылдан бері ауылға газ кіргізу жайлы айтылып келеді. 2021 жылы 500 млн, өткен жылы 2 млрд 400 млн, биылға 1 млрд 800 млн теңге бөлінген. Алдағы жылу маусымы аяқталған соң, газды кіргізу жоспарлануда. Өйткені, құрылыс жұмыстарын жүргізген «Әлия» компаниясы «Қазтрансгаз» мекемесіне өткізбек. Оны қабылдап, тексеріп алу үшін де біршама уақыт қажет. Бұл процесс наурыз немесе мамыр айларына дейін жалғасуы мүмкін.Ауыл әкімінің марқайып көрсеткен жұмыстарының бірі – 28 жыл бойы іске аспай, құр қаңқасы қалған балабақша ғимаратын ауылдың меншігіне алуы. Оған дейін қалалық білім бөлімінің балансында тұрған мекеменің жекеге сатылып кетпегеніне қуанады әкім. Тоқсаныншы жылдарда жұмысын тоқтатқан балабақшаның бар дүние мүлкі тоналған. Осы ғимараттың күрделі жұмысын жасауға жоба дайындайды. Оны шымкенттік бір компания 64 млн теңгеге ұтып алып, 7-8 айдың ішінде адам танымастай жаңа кейіпке ендіріпті. Осылайша «Асылай» балабақшасы 2021 жылы пайдалануға беріледі. Онда қазір 130 бала тәрбиеленсе, 40 адам қызмет етеді.Айтпақшы, бұл ауылдық округ «Үлгілі ауыл» номинациясын иеленген. Оған бөлінген 10 миллион теңгеге ауылға орталық алаң салыныпты. Қазір &nbsp;барлық шара орталық алаңда өткізіледі. Спорттық жарыстар, концерттер, Наурыз тойы ұйымдастырылып, ауыл адамдарының ауызбіршілігін арттыратын мәдени орталыққа айналып отыр.Халық санының артуы мектеп пен балабақшаларда орын тапшылығын тудырыпты. Осылайша №268 мектепте оқушылар үш ауысыммен оқып келген. Бұл мәселе де шешімін тауып, мектеп жанынан 200 орындық бастауыш мектеп ғимараты салынып, білім берудегі бірқатар мәселе шешімін тауыпты.Жергілікті жұртшылық әзірге дәрігерлік амбулаторияға қаралады. Өйткені, екі мыңнан 10 мыңға дейін халқы бар елді мекендерге емхана салынбайды. 2014 жылдан бері типтік амбулатория пайдалануға берілген. Онда 5 дәрігер, 19 аяжан қызмет көрсетеді. Бірақ тұрғындар жетіспейтін мамандарға қаралу үшін Тасбөгет кентіндегі №4 емханаға қаралуға мәжбүр. Алдағы уақытта халық санының артуына байланысты жаңа емхана ашылуы да мүмкін.Ауылдың тазалығы, көркейту-көгалдандыру жұмыстары да жолға қойылғаны көрініп тұр. Аптасына бір рет әр үйдің алдынан қапқа жиналған қоқысты арнайы машина тиеп алып кетеді. Бірақ тәртіпке бағынғысы келмейтіндер де бар. Олар түн ауа үйінен шыққан қоқысты көшеге тастап кетуден еш қымсынбайды. Әйтпесе, түсіндірме жұмыстары ұдайы жүргізіліп тұрады екен. Айына небәрі мың теңге төлеп, тазалықшылардың қызметін пайдалануға құлықсыздардың қылығы, шынында, қынжылтады екен.Тағы бір жаңалық – ауылды көркейтуге, ондағы кәсіпкерлерді қолдауға, тұғындарды тұрақтандыруға 2,5 пайызбен берілетін несиеге 30 кәсіпкер өтініш білдіріпті. Жаңадан кәсібін бастаушылар үшін таптырмас мүмкіндік болып тұр. Оған қойылатын талап – кәсіпті енді бастаған және осы ауылдың жергілікті тұрғыны болуы керек. Ауылдың ажарын ашатын, оны гүлдендіріп, көркейтетін кәсіпкерлер. Туған жердің өркендеуіне үлес қосатындар үшін мұндай көмек керек-ақ.Бір сөзбен айтқанда, «Ақсуатта» тәп-тәуір тірлік бар. Қордаланған мәселе кезең-кезеңімен шешімін таппақ. Тек уақыт керек. Наурыз айынан бастап қоғамдық көлік пен газ іске қосылса, көптің үлкен олжасы болғалы тұр.&nbsp;&nbsp;

Ақсуатта атқарылар жұмыс көп

Kyzylorda-news.kz. 8 наурыз – Халықаралық әйелдер күні қарсаңында облыс әкімі Нұрлыбек Нәлібаев Н.Бекежанов атындағы қазақ академиялық музыкалық драма театрында өткен салтанатты шарада қыз-келіншектерді мерекемен құттықтады.Аймақ басшысы Сыр өңірінде нәзік жандарға, әсіресе көпбалалы аналарға жан-жақты қолдау көрсетілетінін атап өтті.<blockquote>«Өткен жылы «Анаға тағзым» орталығының құрылысы басталды. Биыл мамыр айында пайдалануға беріледі деп жоспарлануда. Орталықта аналарға бағытталған &nbsp;оқулар ұйымдастырылады, психологиялық көмек көрсетіліп, балаларға арналған үйірмелер жұмыс істейді. Отбасы мен аналардың жағдайын жақсартуды көздейтін шаралар атқарылады.Сонымен қатар, өңірімізде Неке сарайының, Өнер орталығының, Қан орталығының &nbsp;да құрылысы жүріп жатыр. &nbsp;Жыл ішінде 19 жаңа балабақша ашылды. Былтыр «Балалар жылы» аясында демеушілер есебінен қала және аудандарда 1,6 млрд. теңгеге 80 спорт-ойын алаңы салынды. Қызылорда қаласында көпбалалы және аз қамтылған 100 отбасыға пәтер кілті табысталды. Сол жағалаудан Оқушылар сарайын салуды қолға алдық. Бұл – жасалып жатқан жұмыстарымыздың тек бір бөлігі ғана. Осының барлығы облыс халқының тұрмыс сапасын жақсартуға және қолайлы өмір сүруіне оң әсер етеді», - деді Н.Нәлібаев.</blockquote>Салтанатты шара көрерменге мерекелік көңіл-күй сыйлайтын концертпен жалғасты. Жергілікті эстрада жұлдыздары әсем ән шырқады, мың бұралған бишілердің өнері де көктем мерекесінің ажарын аша түсті. «Бала бақыты» би композициясын орындаған бүлдіршіндер залдағы аналарға құттықтау хаттарын табыстады.Айта кетейік, Қызылорда облысында 141 мыңнан аса отбасы, 48 мыңнан астам көпбалалы ана бар. Олардың 17 мыңға жуығы – «Алтын алқа» мен «Күміс алқа» иегері.Аймақтағы мемлекеттік қызметшілердің 37,4 пайызы, медицина қызметкерлерінің 87 пайызы, педагогтардың 78,3 пайызы – әйелдер, бюджеттік сала қызметкерлерінің 62 пайызын қыз-келіншектер қ<img src="https://knadmin.beoblood.kz/uploads/FB_IMG_1678181803153_28eb1ce526.jpg" alt="FB_IMG_1678181803153.jpg"><img src="https://knadmin.beoblood.kz/uploads/FB_IMG_1678181790228_2b0b2b83ac.jpg" alt="FB_IMG_1678181790228.jpg"><img src="https://knadmin.beoblood.kz/uploads/FB_IMG_1678181798899_03c471d66d.jpg" alt="FB_IMG_1678181798899.jpg"><img src="https://knadmin.beoblood.kz/uploads/FB_IMG_1678181785243_0f5ec27149.jpg" alt="FB_IMG_1678181785243.jpg">

Аймақ басшысы қызылордалық аруларды құттықтады

<a href="https://kyzylorda-news.kz/ru/">Kyzylorda-news.kz</a>. Өнердің бұл түрімен айналысу үшін суретші асқан төзімділікпен көп еңбектенуі керек. Ал суретші әрдайым ізденіс үстінде болса, өзінің қателігін, графика өнерінің күрделі өнер екенін түсінеді. Назарларыңызға қарапайым ауылдан шығып, қазіргі таңда жұмыстары Қазақстанға ғана емес, әлем жұртшылығына танылған ҚазКСР Еңбек сіңірген өнер қайраткері, ҚР Көркемөнер академиясының академигі, белгілі суретші Қайырбай Зәкіровпен сұхбатты ұсынамыз.– Амансыз ба, аға! Алматыға қоныс аударыпсыз ғой. Құтты болсын! Жас ұлғайғанда адамдардың мұндай батылдыққа баруы некен-саяқ. Қалай тәуекел еттіңіз?– Иә…(күліп) Біріншіден менің алып шаһарға көшетінімде біраз достарым маған күлген. «Қартайғанда нең бар Алматыда?» деген секілді. Адам баласы бір нәрсені түсінуі қажет. Адамның тәні қартайса да, жаны қартаймауы керек. Менің жаным бостандықты, өзгерістерді үнемі аңсап тұрады. Сондықтан бұл мен қоныс аудару мен үшін оңай соқты.– Елді сағынасыз ба?– Сағынғанда қандай! Алғашқы Алматыға оқуға түскен жылы осы Қазалыдағы жапырайған, кішкентай қамыс үйлерін, отбасым мен достарымды қатты сағындым. Есейе келе біраз елді аралап, біраз жұртпен таныстым. Бірақ, Сыр бойының халқының болмысы тым бөлек қой, шіркін.– Аға, атыңызға студент кезден қанық болсам да, туып-өскен ауылыңыз, ата-анаңыз, бала кезіңіз жайлы сұрамаппын. Айтып беріңізші?– &nbsp;Менің әкем теміржолшы болған. Оны жас кезінде атам мен әжемді қосып Ақтөбе облысындағы Шалқар ауданына туыстарымыз алып кеткен. Әкем сол жерде үйлі-баранды болған. Бірақ менің алдымдағы үш ағам арасына күн ғана салып бірінен соң бірі шетінеп кеткен. Ол үлкен трагедия ғой, жас отбасы үшін. Сонда менің анам қыста ағаларымның қабіріне барып топырақтарының үсітіне жататын көрінеді. Әкем күнде кешке сол жерден анамды алып қайтады екен. Алланың қалуымен әке-шешеме қуаныш сыйлау үшін әпкем және мен дүниеге келіппіз. Бірақ менен де айрылып қала жаздапты(күліп). Ол былай болған. Ол кезде разъезде тұратын бала қай жерде ойнайды? Әрине пойыз жолдың бойында. Менің үш жасымда пойыз дөңгелегінің тежегішінде ойнап отырған болуым керек. Сөйтіп пойыз жүріп кетіпті. Кеш қарайған, ата-анам өздерін қоярға жер таппай жүр. Бір кезде келесі разъезден мені тапқаны жайлы хабар келіпті. Менің ең алғашқы саяхатым осылай басталған (күліп)– Адамның тұлға ретінде қалыптасуына туған жердің, өскен ортаның әсері бар деп жатады. Мәселен, сіздің суретші болуыңызға не әсер етті?– Табиғат – ең құдіретті мүсінші. Әрбір адамның туған жерінде бір тылсым күш, энергия болады. Қазақ негізі өнерге етене жақын халық. Оны дәлелдеудің де қажеті шамалы. Ал біздің елді білесің тал жоқ, көк шыға қоймайды. Бірақ киіз үйдің ішіне кірсең кішігірім сурет академиясы. Сол түстерді көріп өскен балаға міндетті түрде бояулар әсер етеді.– Қазақы ортада кәсіби суретшілер некен-саяқ. Тіпті баласының о бастағы суретшілік өнерін бағалау, дамыту ісі де кемшін сияқты. Олай болмағанның өзінде көңіл бөлу кейінірек сияқты көрінеді де тұрады. Әлде мен қателесем бе?– Қарапайым кішкентай бала қабырғаға шимақтап сурет салады ғой. Оны біз бұзықтық, еркелік деп жатамыз. Ал егер сол баланың шимақтарын ары қарай дамытып алып кетсе, міне сол кезде мықты суретшілр шығады деген үміт бар.– Сіз график-суретшісіз. Бұл сонау Алматы көркемсурет училищесінде оқып жүргенде таңдаған бағытыңыз ба?– Ол бала күнімде басталған. Себебі ол заманда сурет салатын бояу табу әсіресе ауылдық жерде қиын. Сондықтан жай ғана қаламмен сала бастадым. Уақыт өте келе басқа да жанрда сурет сала бастадым. Бірақ жаныма жақыны осы графика бағыты болды.– Жалпы көркемсурет жанрлары, әсіресе абстрактлі суреттер, мәселен, сіздің қиял мен шындық астасқан кейбір картиналарыңыз – мұның барлығы суретшінің ішкі дауысы, мені деп қабылдасақ бола ма? Әлде бір суретші бірнеше жанрда сала беруі заңды ма?– Ішкі дауысы десекте болады. Бірнеше жанрда сурет салу әр суретшінің өз еркінде. Сурет өнерінде шекара болмау қажет деп ойлаймын. Оның барлығы суретшінің шабытына байланысты.– Кейбір ақындар 40 жастан кейін жазған. Олардың бәрін «Өлең – сөздің патшасы, сөз сарасы» деген өлшемге саяды деу қиын. Суретшілерде осындай кездейсоқтық бола ма? Кенеттен сурет сала бастау…– Костка Чонтвари деген венгр суретшісі болған. Ол фармацевт болыпты. 45 жасында ол өзінің дәріханасын сатып, суретке керек құралдар сатып алып әлемді мойындатамын деп саяхатқа кетіпті. Атақты Пабло Пикассо бір көрмені аралап жүріп Костканың суретін көріп «Менен асқан шебер суретші бар екен ғой» деп мойындаған. Сондықтан өнер адамға айтып келмейді.– Мұны айтып отырған себебім, мен өзім абстрактілі суреттерді қарағанды жақсы көрем. Кейде суретші не айтқысы келді екен деп ұзағырақ тесіліп қараймын. Бірақ «түк түсініксіз» картиналар да болады. Сондайда «Бір+бір» фильміндегідей шашырата алған бояулар ма деп қалам. Суретшілер бір бірін қалай түсінеді?– Абстракция негізі түстерді ойнатудан құралады. Абстракциянизм &nbsp;адамға сурет ішінен жұмбақ әлемді іздегенмен бірдей. Өйіткені ми жұмыс істеп ойлау қабілетін жақсартады. Былай алып қарасаң абсракциянизмді біздің әжелеріміз жасаған. Киіз басу ол тұнып тұрған абстракция. Оны көбі түсіне бермейді.– Әлемге танымал 10 картинаның ішінде қазақ суретшілері неге жоқ?– Картинаның танымалдылығын өлшеп немесе топқа бөлу ол үлкен қателік. Себебі қазір картинаны үлкен суммаға сатып алады да, сол картинаны ең үздік деп есептейді. Бұл әрекетті сұлулық байқауымен салыстыруға болады. Жюри мына қыз сұлу деп есептейді және сол қыз ең сұлу боп шыға келеді. Ал ауылда ол қыздан асып түсетін бояусыз, әшекейсіз қыздар жүр. Мен бұндайды сорақылық деп атаймын және бұндай нәрсеге жол бермеуіміз қажет.– Өзіңіз суретшілердің кімді жақсы көресіз және неге?– Мен нақты мына суретшінің өнері ұнайды деп айта алмаймын. Бізге суретшілерге баға беретін тек қара халық. – Сіз АҚШ, Франция, Польша сияқты шет елдерде бірнеше көрмеге қатыстыңыз Қазақстандағы көрмеге келушілер мен шет елдердгі көрмені қызықтаушылар арасында айырмашылық бар ма?– Жоғарыда айтып өткенімдей біздің халық барлық өнер түріне бейім келеді. Бірақ біздің жұрт көрмеге келу жағынан шетелмен салыстыруға келмейді әрине. Өйіткені біздің түсінік басқа және біз халыққа кінә арта алмаймыз, қинауға да құқығымыз жоқ.– Сіздің ұлыңыз да суретші. Жолыңызды жалғағанына қуанасыз ба?– Бір балам суретші, екіншісі зергер. Жолымды қуғанынына қуанғаным рас. Бірақ бастапқыда баламның суретші емес мұнайшы болғанын қалағанмын. Әуелі Алла, одан соң өзінің өнерге деген қызығушылығының арқасында &nbsp;келді.– Ұлыңыздың картиналарын сынайсыз ба? Оның бұған көзқарасы қандай?–Жоқ. Оны неліктен сынауым қажет? Оның өнерге деген көзқарасы менікінен бөлек. Жаңа қырынан қарайды десем де болады. Оның өз ортасы бар. Қазір шүкір, жұмысының жемісін көріп жүр.– Немерелеріңіз бар ма? Олардың да суретші болғанын қалар ма едіңіз?– Немерелерім бар. Кім боламын десе де өз еріктерінде. Алла қалап суретші болса мен әрине қуанамын.– Өз картиналарыңыздың ішінде өзіңізге жақыны әрі әсерлі оқиғасы бар қайсысы?– Арал балықшыларына арнап салған картинам өзіме өте ыстық. Себебі Йеменнің Сана қаласында бас жүлдені алған болатынмын.– Әйеліңіздің де сурет өнерінен хабары бар ма?– Мені құтқарып қалған әйелім (күліп). Өйткені менің өнеріме жағаласпайды. Жағаласса маған үлкен кедергі болар еді. Сондықтан да болар өнерге қызықпайды.– Арманыңыз бар ма?– Армансыз адам болмайды ғой. Арманым, Алла қанша ғұмыр берсе сонша көрме ұйымдастырғым келеді. Жасым ұлғайса да өнерімді тоқтатқым келмейді. Себебі менің өмірім бұл менің картиналарым, өнерім.– Әңгімеңізге рақмет!

Қайырбай Зәкіров: Арал балықшыларына арнап салған картинам өзіме өте ыстық

<a href="https://kyzylorda-news.kz/">Kyzylorda-news.kz.</a>&nbsp;Мамандықтың ішіндегі ең қадірлісі – дәрігерлік. Дәрігер болу екінің бірінің қолынан келе бермейді. Ең алдымен шыдамдылықты, жауапкершілікті, мамандығына деген адалдықты қажет ететін ең абыройлы мамандық. Қазір ауыл халқы мықты дәрігерлерге мұқтаж. Жас мамандар ауылдық жерге көбіне бара бермейді. Ал біздің кейіпкеріміз – туған жерінде табан аудармастан антына адалдық танытып келе жатқан мықты маман.Гүлжан Орысбайқызы – С.Сейфулин ауылында туып өсіп, осы ауылда мектепті бітіріп, жүрек қалауымен медицина саласын таңдаған ардақты жан. Қиындықты жеңу, мықты дәрігер атану мақсатын алға қойған ауылдың қарапайым қызы Ақтөбе қаласындағы медициналық институтқа оқуға түседі. Бұл ден¬саулық сақшысы болу арманына жетуге жасаған алғашқы қадамы болатын. Қай кезде де ең қиын, әрі жауапкершілігі мол оқу орнын ойдағыдай бітіріп шығу оңай емес. Ол үшін шыдамдылық пен білімге деген құштарлық алдыңғы орында тұру керек. Міне, осындай қасиетінің арқасында Гүлжан Орысбайқызы оқу орнының тиісті сатыларынан ойдағыдай өтіп, білікті маман ретінде туған елге оралады. Алғашқы еңбек жолын аудандағы емханада балаларға кеңес беру бөлімінде балалар дәрігері болып бастайды.<blockquote>– Балалар дәрігері болып маманданған соң алған білімімді осы саладан бастадым. Балалардың арасында аурушаңдықты болдырмауға, түрлі аурулардың алдын алуға жұ¬мыс жасадық. Әрине, өзі ауырып тұрған, әлі тілі де шықпаған сәбиге дұрыс диагноз қойып, ем-шара жүргізу жауапкершілікті қажет етеді. Сондықтан жас маман болып емханаға келгенімде ақылын аямаған тәжірибелі педиатрлар Фатима Сырлыбаева, Гүлнәр Серімбетованы ұстаз тұттым. Аға буын дәрігерлерден үйренгенім көп. Тәжірибелі дәрігерлер балалардың тезірек сауығып кетуіне күш салатын. Ақылшы ұстаздарыма мың алғыс. Аналарға дәрігерлік кеңес беріп, балалардың арасындағы аурушаңдықты азайтуға атсалыстық, – дейді бүгінде тәжірибесі толысқан ақ халатты абзал жан Гүлжан Әбдірова.</blockquote>Мамандығын ұршықша үйірген маман соңғы 21 жылдан бері А.Тоқмағамбетов ауылындағы дәрігерлік амбулаторияда жалпы тәжірибелік дәрігер болып қызмет етеді. Ауыл дәрігері бүгінде ауыл тұрғындарының барлығын дерлік танып, олардың денсаулығын бақылауға алған. Әсіресе, созылмалы дерті бар науқастардың уақытылы дәрігерге келіп, тиісті ем-домын алуын қатаң бақылайды.Күрделі де, жауапкершілігі мол мамандығының арқасында ауыл тұрғындарының денсаулығын қадағалап, медициналық көмек көр¬сетіп жүрген ауыл дәрігерінің жалпы еңбек өтілі 27 жылды құрайды. Гүлжан Орысбайқызы жалпы 1415 тұрғынға медициналық көмек көр¬сетеді.<blockquote>– Дәрігер болу бала кездегі арманым еді. Қиын болса да, денсаулық сақшысы мамандығын алғаныма қуанамын. Тұрғындардан алғыс алғанға не жетсін. Дертіне шипа іздеп, алдыңа келген науқасқа жылы шырай таныту дәрігердің міндеті. Алғашқы еңбек жолымнан бастап осыны ұғындым. Адам өз денсаулығы үшін ең алдымен өзі жауапты болуы керек. Ауылда тұратын әрбір тұрғынға саламатты өмір салтын ұстану туралы кеңес беріп, спортпен шұғылдануға шақырамын. Асқар ауылына келін болып түскелі ауыл тұрғындарымен етене араласып, әр отбасын бес саусақтай білемін десем артық айтқандық болмас. Осыдан 22 жыл бұрын отбасын құрып, жолдасым Қонысбекпен үш ұл тәрбиелеп отырмыз. Ортаншы ұлымыз Бегалы жолымды қуып Алматы қаласындағы С.Асфендияров атындағы Қазақ ұлттық медицина университетінде 4-курста оқиды.</blockquote>Ауылдағы жалғыз дәрігер болған соң кейде тәулік бойы жұмыс істеуге тура келеді. Медбикелермен бірге тұрғындардың денсаулығын жақсартуға барымызды салып, ауыл халқының алғысын алып келеміз. Адал еңбек етсең, міндетті түрде алдыңнан шығады. Қанша марапат алсам да халықтың арқасы. Қиыншылықты төзіммен жеңіп шығуға деген ұмтылыс, еңбектің жемісі, – дейді Гүлжан Орысбайқызы.Бірінші санатты дәрігер көптеген марапат иесі. 2022 жылдың қорытындысымен ауданда жылдың үздік медицина қызметкері атанды. Әрине, осындай құрметке дәрігер адал қызметінің арқасында жетті. Абыройлы болу үшін адал еңбек таныту керек. Дәрігердің қызметі мезгіл таңдамайды. Тәуліктің кез келген уақытында шақыртулар келуі мүмкін. Сондықтан дәрігер сергек болуы қажет. Әсіресе, мереке күндері дәрігердің көмегіне мұқтаж жандар көбейеді.«Жұмыс қауырт, қабылдауға келген науқастар көп, барлығын көріп үлгіреуім керек» деп телефонға жауап берген ақ халатты абзал жанның біздің мерекелік құттықтауымызды қабыл алуға уақыт тапқаны үшін алғысымызды білдіреміз.Мықты дәрігер мезгіл де, мекен де таңдамайды. Нағыз дәрігер өз қызметін адал атқарады. Ауылда туып, ауылда қызмет атқаратын Гүлжанның осындай мәртебелі марапат биігінен көрінгені үшін ауыл тұрғындары да дән риза. Бұл да болса үлкен абырой, адал еңбектің жемісі.<figure class="image"><img src="https://knadmin.beoblood.kz/uploads/385a18d9_368f_4e78_8f11_841d9783bf2a_2b87fef326.jpg" alt="385a18d9-368f-4e78-8f11-841d9783bf2a.jpg"></figure>&nbsp;

Гүлжан Орысбайқызы: Адам денсаулығы үшін ең алдымен өзі жауапты 

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қасым-Жомарт Тоқаевтың «Әкімдердің халықпен кездесулерін өткізу туралы» Жарлығына сәйкес аудан әкімі Серік Сермағамбетовтың қала, кент ауылдық округтерде 2022 жылдың қорытындысы бойынша халықпен кездесулері өтуде. Кеше аудан әкімі Бөген, Қаратерең және Жаңақұрылыс ауылдық округтерінде болып, халықпен кездесті.Тұрғындармен өткен кездесуде жылдың қорытындысымен атқарылған жұмыстарды саралап шықты. Әрбір сала көрсеткіштеріне жеке-жеке тоқталып, алдағы жоспарлармен де бөлісті.<blockquote>«Былтыр ауылшаруашылығын дамытудың 2022-2024 жол картасын бекіттік. Жол картасы негізінен 3 бағытқа, яғни мал, балық және егін шаруашылығын дамытуға көзделген.&nbsp;</blockquote><blockquote>Бірінші кезекте жайылымдық, шабындық және суармалы егістік жерлерді суландыру мәселесін алға қойдық. Осы орайда, барлығы 13 су ұңғымасы қазылып, 10 канал тазартылып, 5 гидротехникалық құрылыс салынды.Екіншіден, егін шаруашылығын дамыту қолға алынды. 2021 жылға дейін ауданымызда екі елді мекенде, егін егіліп келсе, жол картасы аясында бұл көрсеткіш 11 елдімекенді қамтыды. Үшінші бағыт бойынша Қамыстыбас және Ақшатау көлдер жүйесін ретке келтіру үшін Дарияның «Бұрмақұлақ» учаскесін бөгеп, «Аспай» суағытқысын іске қостық.&nbsp;</blockquote><blockquote>Сондай-ақ білім беру саласында да қуанышты жаңалықтар жетерлік. Урбанизация және демографиялық процестерге байланысты 2025 жылға дейін 12 мектеп салу көзделіп отыр. Оның төртеуі «Жайлы мектеп» бағдарламасы аясында жүзеге асатын болады», - деді аудан әкімі.&nbsp; Ауыл тұрғындарымен есепті кездесуде аудан әкімі халық көкейіндегі сұрақтарға жауап беріп, ең алдымен елді мекендерде күнделікті тіршілік қамтамасыз ететін обьектілер мен әлеуметтік нысандардың кезектілігі бойынша салынатындығын жеткізді.&nbsp;</blockquote>Кездесуден соң аудан әкімі ауыл тұрғындарын жекелеген мәселелер бойынша қабылдады.

Арал ауданының әкімі ауылдарды аралап, халықпен кездесті

Kyzylorda-news.kz. 8 наурыз – Халықаралық әйелдер күні қарсаңында облыс әкімі Нұрлыбек Нәлібаев әйел-аналармен кездесіп, еркін форматта пікірлесті және жаңадан «Алтын алқа» иегері атанған аналарды марапаттады.Құттықтау сөзінде аймақ басшысы қоғамдағы әйел адамның жоғары рөл атқаратынын атап өтті.<blockquote>«Барша қазақтың ортақ мақтанышы, сұлулық пен ерліктің символына айналған Тұмар ханым, Ақжүніс, Қыз Жібектің, ел басына іс түскен қиын кезеңдерде басын оққа байлаған Әлия, Мәншүк, Хиуаз ұлт батырларының есімдері тарих төрінде алтын әріптермен жазылып қалды. Несібесін жерден көріп, ерен еңбектің үлгісін көрсеткен жерлестеріміз Сәлима Жұмабекова, Шырынкүл Қазанбаева, Ұлбала Алтайбаева, Жадыра Таспамбетова секілді апаларымыз бен ұлт руханиятын, мәдениетін, өнерін асқақтатқан Роза Бағланова, Сәбира Майқанова, Мәдина Ералиева сынды майталман тұлғаларымыздың Сырдың шежірелі тарихындағы орны ерекше. Аймақтың дамуына ерекше атсалысқан жандардың, оның ішінде әйел-аналарымыздың қалай құрметтесек те жарасады», - деді Н.Нәлібаев.</blockquote><img src="https://knadmin.beoblood.kz/uploads/FB_IMG_1678179850508_6249d8e34c.jpg" alt="FB_IMG_1678179850508.jpg">Айта кетейік, күні кеше облыс әкімі мереке қарсаңында ұлағатты ұстаз, Қызылорда облысының құрметті азаматы Алма Ақдәулетованы халықаралық әйелдер күнімен және мерейлі 90 жас мерейтойымен құттықтады және «Ана мен бала» орталығындағы жаңа босанған аналарды, ақ халатты абзал жандарды мерекемен құттықтап, ыстық ықыласын білдірді.Жиында «Алтын алқа» орденінің иегері, тыл ардагері,&nbsp; 10 бала тәрбиелеп, 28 немере, 26 шөберенің қызығын көріп отырған ана Раш Искакова жерлестерін құттықтап, ізгі тілегін білдірді.Қызылорда облысының құрметті азаматы, «Парасат», «Құрмет» орденінің иегері Алмагүл Божанова өз пікірімен бөліссе, «Серпер» жастар сыйлығының иегері Айтжанова Қарлығаш Ана туралы монолог оқыды.Кездесу соңында Нұрлыбек Машбекұлы 7 баланы өмірге әкеліп, Қазақстан Республикасының Президенті Қасым-Жомарт Кемелұлы Тоқаевтың Жарлығымен «Алтын алқа» иегерлеріне марапаттарын табыстады.<img src="https://knadmin.beoblood.kz/uploads/FB_IMG_1678179853219_6017bf8d36.jpg" alt="FB_IMG_1678179853219.jpg"><img src="https://knadmin.beoblood.kz/uploads/FB_IMG_1678179869530_e55b0f586e.jpg" alt="FB_IMG_1678179869530.jpg"><img src="https://knadmin.beoblood.kz/uploads/FB_IMG_1678179857975_668ce38504.jpg" alt="FB_IMG_1678179857975.jpg"><img src="https://knadmin.beoblood.kz/uploads/FB_IMG_1678179890443_b4d8ba1c88.jpg" alt="FB_IMG_1678179890443.jpg"><img src="https://knadmin.beoblood.kz/uploads/FB_IMG_1678179902824_8ab0dc8c6c.jpg" alt="FB_IMG_1678179902824.jpg">

Нұрлыбек Нәлібаев әйел-аналармен кездесіп, «Алтын алқа» иегері атанған аналарды марапаттады

<a href="https://kyzylorda-news.kz/">Kyzylorda-news.kz.</a>&nbsp; Аудан әкімі Серік Сермағамбетов 8 наурыз – Халықаралық әйелдер мерекесі қарсаңында аудандағы іскер әйелдер қауымымен кездесті. Бір топ нәзікжандылар өткен жылы жергілікті кәсіпкерлер мен ел азаматтарының қолдауымен пайдалануға берілген «Кәсіпкерлер үйінде» бас қосты. Жиынға әртүрлі кәсіпкерлік саласында жемісті еңбек етіп жүрген аяулы аналар мен қыз-келіншектер және іскер әйелдер қатысты.Бизнес көкжиегіндегі нәзік жандыларды мерекемен құттықтаған аудан әкімі: -« Сіздер тәуелсіз еліміздің дамуына зор үлес қосып, әрқашан иба мен ізеттің, парасат пен пайымның, мейірімділік пен ізгіліктің ұйытқысы болып келесіздер. Бүгінгі күні билік пен мемлекеттік қызметте, республикалық деңгейдегі басқарушы органдарда әйелдер үлесінің артуы – Сіздердің қарымды қабілеттеріңіз бен іскерліктеріңіздің дәлелі. Әйелдің жүрегі – әлемнің тірегі, көктемнің гүліндей құлпырып, әсемдіктің, әдептіліктің иесі болып, бақытты да баянды ғұмыр кешіңіздер. Осы ерекше қасиеттеріңіз мәңгілік салтанат құрып, елімізге ырыс-құт дарысын. Баршаңызға зор денсаулық, баянды бақыт тілеймін!»- деп жүрекжарды лебізін білдірді.Сондай-ақ аудан басшысы өз сөзінде ауданда кәсіпкерлерге арналған орталықтандырылған «Кәсіпкерлер үйінің» іске қосылғанын, нәтижесінде аудандағы кәсіпкерлік нысандарының саны 6 мың көбейгенін, оның ішінде әйелдер үлесі 47 пайызға жеткендігіне тоқталды. Кездесуде аудандағы белді кәсіпкер Ақыл Сәдуақасова сөз алып, бүгінгі таңда кәсіпкерлікпен айналысуға мемлекет тарапынан кең қолдаудың бар екендігін, кәсіппен айналысушыларға кедергілердің жоқтығын айтты. Сондай-ақ жаңа жобаларды бастауға ұдайы қолдау көрсетіп жүрген аудан әкімдігіне алғысын білдірді.Басқосуға қатысушы кәсіпкер әйелдер өздерінің тың бастамаларымен бөлісіп, оны жүзеге асыру барысы бойынша тоқталып өтті. Кездесу соңы жиылғандардардың пікірлесуіне ұласып, емен-жарқын əңгіме өрбіді.

Қазақстан және Қызылорда облысының жаңалықтары