<a href="https://kyzylorda-news.kz/">Kyzylorda-news.kz.</a>&nbsp; Жуырда Қоғамдық кеңестің басқосуында аудандағы қылмыс пен құқық бұзушылықтың алдын алу мәселесі талқыланды. Жиынға қоғамдық кеңестің мүшелері, Арал ауданының полиция бөлімінің бастығы Н.Шегебаев, Арал ауданының полиция бөлімі бастығының орынбасары Қ.Шүкіров, бұқаралық ақпарат құралының өкілдері қатысты. Күн тәртібіндегі мәселе бойынша аудандық полиция бөлімінің бастығы Н.Шегебаев баяндама жасап, қоғамдық қауіпсіздікті қамтамасыз ету бағытында және Арал ауданының полиция бөлімімен 2022 жылдың 12 айында атқарылған жұмыстарды қоғамдық кеңес мүшелеріне хабардар етті. Атқарылған жұмыстардың нәтижесінде 2022 жылдың 12 айында жалпы қылмыстың &nbsp;тіркелуі &nbsp;18,4 пайызға (190-155-ке) &nbsp;төмендеген.Тіркелген қылмыстарға талдау жүргізсек, ауырлығы онша емес санатымен 0,0 пайызға тең күйде болса, орташа ауыр санатындағы қылмыстардың тіркелуі 36,1 пайызға, ауыр санаттағы қылмыстар 6,8 пайызға төмендеген. Жекелеген қылмыстарға талдау жүргізсек, адам өлтіру +100,0 пайызға, қасақана дене жарақатын салу +100,0 пайызға, ұялы телефон ұрлығы +75,0 пайызға, қарақшылық +100,0 пайызға, бұзақылық қылмысы +300,0 пайызға, жасөспірімдермен жасалған қылмыстар +200 пайызға, топпен жасалған қылмыстар +90,9 пайызға, қоғамдық орында жасалған қылмыстар +9,1 пайызға, көшеде жасалған қылмыстар +66,7 пайызға өсім алып отыр.Сонымен қатар мас күйінде жасалған (22-ден 16-ға) -27,3 пайызға, бұрын сотты болғандармен жасалған қылмыстар -00,0 пайызға (38-ден 38-ге), рецидивтермен жасалған қылмыстар -100,0 пайызға (1-ден 0-ге) төмендесе, отбасы тұрмыстық саласындағы жасалған қылмыстар орын алмаған.&nbsp;Жол апаттылығына тікелей септігін тигізетін жол қозғалысы ережесін өрескел бұзушыларды анықтау бағытында «Қауіпсіз жол», «Автобус», «Құқық тәртібі», «Заңсыз тасымалдаушы», «Мас жүргізуші», «Мотоцикл», «Абайлаңыз, балалар!» арнайы іс-шаралары өткізілді. Нәтижесінде, мас күйінде көлік құралдарын басқарған (ҚР ӘҚБтК-нің 608-ші бабы) 72 жүргізуші анықталып, барлығына да аудандық сот арқылы тиісті шаралар қабылданған.Бүгінгі таңда кәмелетке толмағандардың кешкі және түнгі беймезгіл жүрістерін ырықтау, келеңсіз жайттарды олардың тарапынан қылмыс пен құқық бұзушылықтардың алдын алу мақсатында орта және кәсіптік оқу орындары мұғалімдерімен «педпатруль» кезекшіліктері ұйымдастырылып келеді.Жиын сонында Арал ауданының полиция бөлімінің бастығы Н.Шегебаевтың баяндамасын кеңес мүшелері тыңдап және талқылай келе, бірауыздан мақұлданған ұсыныстарын ортаға салды. Яғни аудан мектептерінің жанына бейнебақылау камераларын қоюды ретке келтіру және оқушылардың мектепке келіп-кету қауіпсіздігін ұйымдастыру, темір жол өткеліндегі көлік кептелісін реттеу мақсатында қарбалас уақыттарда жол патрульдік полициясының бақылауын күшейту, қала, кент және ауылдық округ әкімдерімен бірлесіп, жасөспірімдер мен жастар арасындағы құқық бұзушылық, әлеуметтік желілерде қорлау немесе қудалау әрекеттері мен заңсыз ойын орындарына тосқауыл қою бағытында жұмыстарды күшейту қажеттігін айтты. Сондай-ақ кәмелетке толмаған жасөспірімдердің автокөлік жүргізу фактілері кездесетіндіктен қатаң бақылау жұмыстарын жүргізу, Жақсықылыш кентінде құқық бұзушылықтың көптеп орын алуына байланысты бір штат полиция қызметкері мен автокөлік беру мүмкіндігін қарастыру &nbsp;туралы &nbsp;ұсыныстарды да аудандық полиция бөлімінің назарына ұсынды.

Аралда қылмыс азайған

​<a href="https://kyzylorda-news.kz/">Kyzylorda-news.kz.</a> Қызылорда қаласында 8 наурыз мерекесі қарсаңында &nbsp;А.Тоқмағамбетов атындағы мәдениет үйінде «Әйел-ана – тіршіліктің гүлі, өмірдің нұры» атты мерекелік кеш өтті. Шарада Қызылорда қаласының әкімі Асылбек Шәменов қыз-келіншектерді көктемнің шуақты мерекесімен құттықтады.<blockquote>«Ардақты аналар, аяулы арулар, сіздерді және барша қыз-келіншектерді төл мерекелеріңіз халықаралық әйелдер күнімен шын жүректен құттықтаймын. &nbsp;Елімізде әйелдер қауымының мемлекет және қоғам өміріндегі орны ерекше. Сіздер экономиканың барлық саласында нәтижелі еңбек етіп келесіздер. Ақыл-парасаттарыңызбен ерік-жігерлеріңіз қоғамды әрдайым алға жетелеп, бейбітшілікпен татулыққа, мәдениет пен сұлулыққа серпін беруде. Бар әлем сіздерді тіршіліктің бастауы, адамзаттың анасы деп құрметтеп, қошамет көрсетеді. Әйел заты – сарқылмайтын күш, тіршілігіміздің қайнар бұлағы. Тағдырдың тезінен қажымай, қиындықтарды жеңе отырып, жан-жағына мейірім шапағатын сыйлайтын барлық адамның қуанышы, әрбір отбасының берекесі, мемлекетіміздің мерейі», – деді қала әкімі.</blockquote>Мерекелік кеште көпбалалы аналарға «Алтын алқа» табысталды. Сондай-ақ, әр саланың үздік қыз-келіншектері қала әкімінің алғыс хатымен марапатталды. Оның ішінде «Қызылорда тазалығы» мекемесінің тазалықшысы Ардақ Байжанова да бар.<blockquote>«Бүгінгі концерт тамаша көңіл-күй сыйлады. Есіктен кіргеннен бастап, ерекше ықыласқа бөлендік. Бізге ұсынылған көктемнің алғашқы гүл шоқтарының өзі ғажап қой. Әсем ән тыңдап, көркем би тамашаладық. Еңбегіміз бағаланып, марапат төрінен көрініп жатырмыз. Алғысымыз шексіз», &nbsp;– дейді Ардақ Маратқызы.</blockquote>Концертке келген әр қонаққа гүл шоқтары ұсынылды. Сыр өнерпаздары ән шырқап, би билеп аналар мен қыз-келіншектерге мерекелік көңіл-күй сыйлады.

Әйел – ана, әйел – жыр

<a href="https://kyzylorda-news.kz/">Kyzylorda-news.kz.</a>&nbsp;Дүйсенбі күні Шиелі ауданы әкімдігінің ұйымдастыруымен «Заман» мейрамханасында 8 наурыз – Халықаралық әйелдер күніне арналған «Әйел күннің шуағынан жаратылған» атты мерекелік шара өтті.Айтулы кеште жарық дүниенің қасқалдағына айналған ауданның ақ жаулықты аналары, аяулы арулары мен ардақты ардагерлері бас қосты.&nbsp;Шара барысында мереке қонақтары халқымыздың салт-дәстүрлеріне қанығып, қонақжайлығымыздың озық үлгісінің куәгері болды. Келген қонақтарды ұлттық киім киген қазақтың келіндері иіліп сәлем салып, күтіп алды. Нәзік жандыларға арналған әуезді әнмен басталған мерекелік кеште әйелдер қауымына гүлдестелер таратылып, асыл әжелерге жаулықтарының киесі кетпесін деген ниетте ақ жаулықтар жабылды.&nbsp;Аудан әкімі Нұржан Ахатов мерекелік шараның алғы сөзін ­бастап, кеш қонақтарын гүл көктемнің алғашқы мерекесімен құттықтап, әйелдер қауымының елеулі істері мен қайталанбас қайсарлықтарына тоқталып өтті.&nbsp;<blockquote>«Әйелдер қауымы қай кезеңде, қай дәуірде болмасын тарих беттерінде өз есімдерін алтын әріптермен қалдыра білді. Атап айтар болсақ, ауданымызға танымал ардақты аналарымыз Шырынкүл Қазанбаева, Ұлбала ­Алтайбаева, Жадыра Таспамбетова, Зәкира ­Ержанова, Айша Меңлібаева сынды апаларымыздың еңбегі мен отаншылдық қасиеттері елдің жадында сақтаулы. Ал қазіргі қазақ әйелі қабілеті мен қарымына қарай көшбасшы бола алатынын да дәлелдеді. Соның арқасында еліміздегі шағын және орта бизнес саласында еңбек ететін әйелдердің үлесі 40 пайыздан асты. «Әйел – кәсіпкер», «Әйел – саясаткер», «Әйел – қайраткер» деген ұғымдар өмірімізге енді. Бір ғана мысал, аудандық бөлімдердің екеуін әйел кісілер басқарып отыр, – деді Нұржан Ахатов.</blockquote>Ауданы әкімінің айтуынша, соңғы жылдары аудандағы көпбалалы аналардың да есебі артқан. Бұдан бөлек «Аудандық әйелдер кеңесі», «Шиелі аудандық әйелдер бірлестігі» және әрбір ауылдық округтегі «Әйелдер кеңесінің» аудан әйелдерінің басын қосып, келелі кеңесте ізгі шаралардың ұйытқысы болып отырғанын айтпай кетуге болмас. Осының барлығы әйелдер қауымының нәзік бейнесінен бөлек, өздеріне ғана тән жасампаз болмысын көрсетеді. Бұдан кейін кеш қонақтарына аудан әкімі атынан сый-сияпаттар ұсынылды. Сонымен қатар ауданның бірқатар белгілі азаматтары мен ардагерлері мереке иелеріне жылы лебізін арнап, жүрекжарды тілектерін білдірді.&nbsp;Мерекелік шара салт-дәстүріміз бен әдет-ғұрпымыздың көркем көріністеріне толы болды. Атап айтсақ, қазақтың келіндері қонақтарға самаурыннан шай ұсынып, еліміздің әртүрлі өңірлеріндегі сәлем салу үлгісін көрсетсе, үлкен буын өкілдері өз кезегінде келіндердің басына орамал жауып, оларға ақ батасын берді. Сондай-ақ «орамал тастау», «ат тергеу» сияқты қазақ ойындары ойнатылып, ұлттық нақыштағы киім үлгілерінің шеруі көрсетілді. Әжелерден құралған ансамбль халық әндерін нақышына келтіріп орындаса, «Шиелі серілері» де өз кезегінде дәстүрлі аспаптардың сүйемелдеуімен әннен шашу шашты. Жиын барысында шежірелі Шиелінің топырағында туып, осында өсіп-өнген, еліне еңбегі сіңіп, бүгінде түрлі саланың майталманы болып жүрген нәзік жандармен таныстыру мақсатында олардың өнегелі өмірі мен қызмет жолына қатысты бейнероликтер көрсетілді. Оған сәйкес экранда ауданның ер-азаматтарының мерекелік құттықтау лебіздеріне кезек берілді. Иә, сонау заманнан тарихтың талай қиындығын еңсеріп, ел басына күн туған қиын-қыстау шақтарда ерлерінің сенімді серігіне айналып, жанына жалау, арына алау бола білген, отбасының берекесін кіргізіп, шаңырағын шырқау биікке көтеріп отырған, ұлт пен ұрпақ тәрбиесінде ойып тұрып алатын орны бар асыл жандарға айтылған тілектің ешқайсысы да артық емес. Нәзік жандарға арналған атал,ан шара да «Әлемнің мәні әйелде, әйелдер мәңгі жасасын» деген нотада жалғасын тапты.&nbsp;

Шиелі ауданында көпбалалы аналардың саны артқан

​<a href="https://kyzylorda-news.kz/">Kyzylorda-news.kz.</a> Қызылорда қаласында «Бұрымды ару – 2023» облыстық телевизиялық байқауы дәстүрлі сипат алып, биыл бесінші мәрте ұйымдастырылды. Қазақ қызына тән игі қасиеттер дәріптелетін дәстүрлі байқауға қала әкімінің орынбасары Жанмұрат Сейілов арнайы қатысып, талапкер аруларға сәттілік тіледі. Сондай-ақ, дәстүрлі байқаудың жоғары деңгейде өтуіне қолдау білдірген барлық демеушілерге қала әкімінің арнайы «Алғыс хатын» табыстады.«Бұрымды ару – 2023» облыстық телевизиялық байқауына облыс аумағынан 12 талапкер қатысып, 4 кезең бойынша бақ сынады. Байқауға облыс әкімі жанындағы әйелдер істері және отбасылық демографиялық саясат жөніндегі кеңестің хатшысы, қазылар алқасының төрайымы Қаламқас Каримова, белгілі жырау, ҚР Мәдениет қайраткері Руслан Ахметов, байқаудың бас серіктесі, «САПА КА» жеңіл өнеркәсіп орталығының құрылтайшысы Аида Керімқұлова, тәуелсіз журналист, қоғам белсендісі Үйтолған Жәрекеева және ақын, Қазақстан Жазушылар Одағының мүшесі Ақжол Түменбай қазылық жасады. Қазылар алқасының шешімімен байқау жеңімпазы қазалылық Анель Темірхан «САПА КА» жеңіл өнеркәсіп орталығында дайындалған ауыспалы күміс Тәжімен марапатталды. Ал, жүлделі бірінші орынды сырдариялық Еркінай Пазылбекқызы жеңіп алса, екінші орынды қызылордалық Айдана Алтынбекова иеленді. Үшінші орын қызылордалық Балауса Берікке бұйырды. «Көрермендер көзайымы» номинациясын қызылордалық Ақнұр Қуанышова, «Зерделі ару» номинациясын шиелілік Жанель Баймырза иеленді.&nbsp;Барлық жеңімпаздар мен жүлдегерлерге түрлі түсті әшекейленген тақия және демеушілер тарапынан түрлі сертификаттар табыс етілді.

Бұрымды ару – 2023

<a href="https://kyzylorda-news.kz/">Kyzylorda-news.kz.</a> Президент бастамасымен елімізде «Жайлы мектеп» ұлттық жобасы қолға алынғаны белгілі. &nbsp;Оқушының сапалы білім алып, жан-жақты дамуына жағдай жасайтын жоба аясында алдағы үш жылда ел бойынша 401 жаңа мектеп салынбақ. Ал Сыр өңірінде 2025 жылға дейін жаңа құрылыс стандарттарына сай 21 мектеп салу жоспарлануда. Биыл өңірде 10 білім ордасының құрылысы басталады.«Жайлы мектеп» бойынша қолға алынған жұмыстар&nbsp;жайлы құрылыс, сәулет және қала құрылысы басқармасының басшысы Ерлан Төрәлиевтің айтуынша, 2023-2025 жылдары облыста екі кезең бойынша аталған жоба толық іске асырылмақ. Биыл бірінші кезеңде іргетасы қаланатын 10 мектептің жер учаскелері нақтыланып, инженерлік желілермен қамтамасыз етілген халыққа тиімді аумақтардан «Samruk-Kazyna Construction» АҚ-ның атына рәсімделген.<blockquote>«Қызылорда қаласындағы бес мектепке тоқталатын болсам, Сырдария өзенінің сол жағалауынан 900 орындық мектептің құрылысы үшін 3,7 гектар, «Арай» және СПМК шағын ауданындағы 2000 орындық мектепке 3,8 гектар, «КБИ» шағын ауданындағы 600 орындық білім ордасына 2,04 гектар, сондай-ақ, «Қызылжарма» ауылдық округіндегі 900 орындық мектепке 2,5 гектар жер учаскелері табысталды. Ал Арал ауданындағы 2 мектепке 2,04 гектар жер, Қазалы ауданы Жанқожа батыр ауылындағы 300 орындық мектеп құрылысына 2,8 гектар жер, Жаңақорған ауданындағы 600 және 300 орындық білім ордаларына 2,2 гектар жер телімдері берілді. 2024 жылы құрылысы басталатын 11 мектептің жер телімдері нақтылануда», – деді Е.Төрәлиев.</blockquote>Өз кезегінде «Samruk-Kazyna Construction» АҚ басқарма төрағасы Мәулен Айманбетов жоба аясында атқарылып жатқан жұмыстарға оң бағасын беріп, білім ордаларының талапқа сай болуын жіті қадағалау керегін жеткізді. Сондай-ақ, оқушылардың қауіпсіздігі мен сапалы білім алуы үшін толықтай бейнебақылау камералары және жоғары жылдамдықтағы интернет желісі орнатылуы қажет екенін айтты.<blockquote>««Жайлы мектеп» ұлттық жобасы аясында салынатын білім ордалары заманауи құрал-жабдықтармен қамтамасыз етіледі. Тағы бір ерекшелігі, мектептердің өз логотипі мен ішкі және сыртқы құрал-жабдықтары бірдей толықтырылады. Сондай-ақ, бұл мектептер қай елді мекендерде салынатын болса да, халыққа ыңғайлы аумақта болуы қажет, яғни, ата-аналар мен оқушылардың мектепке баруы қиындық тудырмауы тиіс. Бұдан бөлек, мектеп орналасқан шағын аудандардағы жолдарда көше жарықтары мен бейнебақылау камералары міндетті түрде болуы керек. Ол оқушылардың қауіпсіздігі үшін аса маңызды», – деді басқарма төрағасы.</blockquote>М.Айманбетов мердігерлерге қатаң талаптар қойылатынын айтты. Құрылыста отандық өндіріс материалдарын пайдалануға басымдық берілмек. Жаңа мектептер 300, 600, 900, 1 200, 1 500, 2 000 немесе 2 500 орындық деп белгіленген жеті түрлі нұсқаның біріне сай салынуы қажет. Олардың әрқайсысында роботтехника кабинеті, бірнеше зертхана, хореография залы, үш коворкинг алаңы болуы керек. Әр сыныпқа интерактивті тақта және мұғалімге арналған компьютер қойылады.Ұлттық жобаны жүзеге асыру барысында «Samruk-Kazyna Construction» АҚ іс-шаралардың ашықтығы мен қоғамдық бақылауға ерекше көңіл бөлмек.Құрылысты қадағалау инженерлік қызметтері де ашық конкурстық негізде сатып алынады, бұл қосымша ашықтықты қамтамасыз етеді. Барлық сатып алу «Samruk-Kazyna Construction»-ның сатып алуға арналған онлайн платформасында жүзеге асырылады. Құрылыс кезінде жалпы жағдайды бақылайтын ақпараттық цифрлы платформа жұмыс істейтін болады. Ақпараттық жүйе алғаш рет осындай ірі ұлттық жобада қолданылмақ. Электронды жүйе құрылыстың барлық кезеңін ашық бақылауға мүмкіндік береді.Жүйенің ерекшелігі – тапсырыс беруші, құрылысшылар, әкімдіктердің бірнеше басқармасы, министрліктер, техникалық бақылау сарапшылары және басқалары бірлесіп жұмыс істеп, бірге тапсырма беріп, оны бақылап, мәселе туындаса, сол бойда бюрократиясыз, уақытылы шешіп отырады.Айтпақшы, мердігер компанияларға қойылатын талап та қатаң. Бұл жобаға кеше ашылып, бүгін майлы жіліктің басын ұстап отыратын бір күндік фирмалар қатыса алмайды. Ережелер жергілікті компанияларға жеңілдіктер ұсынатынын да айта кетейік, яғни, мектеп қай облыста салынса, сол өңірдің компанияларына белгілі бір деңгейде жеңілдіктер қарастырылады.&nbsp;

«Жайлы мектеп»: Мердігерлерге қойылатын талап жоғары

<a href="https://kyzylorda-news.kz/">Kyzylorda-news.kz.</a> &nbsp;Жуырда Қармақшы ауданы әкімдігінің қолдауымен Шәмшат Төлепова атындағы аудандық мәдениет үйінде жоғары санатты ұстаз, тыл ардагері Ақбалыш Жалғасованы еске алуға арналған «Аналарды ардақтайық» жобасы негізінде «Ұстаз – ана» тақырыбында облыстық жас жазба ақындар мүшәйрасы өтті.Жыр бәйгесіне аудан әкімі Жандос Еркінбек және қоғам қайраткері, Қармақшы ауданының Құрметті азаматы Ырзақұл Сәденұлы ұлағатты ұстаздың өнегелі өмір жолына тоқталып, жас ақындарға сәттілік тіледі.<blockquote>«Үш жыл қатарынан ұйымдастырылып келе жатқан жыр додасында ақындар аяулы анамыздың өмір жолы, атқарған абыройлы да өнегелі істерін өлеңмен өрнектеп келеді. Ақбалыш Жалғасова шәкірттерге өмірін, білімін арнаған ұлағатты ұстаз болды. Біліммен қатар, шәкірттерін өнерге, шығармашылыққа баулыды. Жас ұстаздардың білімін шыңдауға атсалысты. Осындай керемет жан туралы айтылар ой да, жазылар жыр да таусылмақ емес. Ардақты анамызға арналған жыр мүшәйрасы – ақын талантын шыңдайтын өнер жарысы» деді аудан әкімі өз сөзінде.</blockquote>Жыр додасында дуалы ауыз, жебе тілді жүйрік ақындар қатар шауып, ардақты ұстаздың өмір жолын, шәкірт тәрбиелеудегі озық істерін өлеңмен өрнектеп, туған жер туралы тереңнен толғап жырлады. Сөйтіп жас ақындар жыр арқылы қармақшылықтарға шадыман шаттық сыйлады.Белгілі жыршы Берік Саймағанбетов, ақын, ұстаз Зарипа Тасымова, Қазақстан Республикасы «Мәдениет саласының үздігі» төсбелгісінің иегері Арнұр Көшеней, «Әлімсақ» журналының бас редакторы, филология ғылымдарының кандидаты Нұрлан Көбегенұлы, ақын Мөлдір Айтбай жас ақындар өнерін сарапқа салды.&nbsp;Сайыс қорытындысы бойынша мүшәйрада бас жүлдесін Жалағаш ауданынан келген Серік Жасұлан жеңіп алса, І орынды қызылордалық Бексұлтан Санақұл жалғасты. Ал, жүлделі ІІ орынды екінші бір қызылордалық Айдар Сайлауов иемденсе, ІІІ орынды Жалағаш ауданының ақыны Дидар Өмірзақ пен қармақшылық ақын Диас Мустахимов олжалады. Мүшәйрада көрермен көзайымы атанған қармақшылық Мөлдір Тәңірбергенова «Бақытжамал Сәденқызы» атындағы, ал қазалылық Данабек Жанғазы «Шәмшат Төлепова» атындағы жүлдені қанжығасына байлады.Іс-шара соңында мүшәйра жүлдегерлері мен өзге де қатысушыларға диплом, алғыс хаттар табысталып, сый-құрмет көрсетілді.&nbsp;

Қармақшыда жазба ақындар жарысы өтті

<a href="https://kyzylorda-news.kz/">Kyzylorda-news.kz.</a> Жыл сайын қыстың қары еріп, көктем келген сәтте тасқынның қаупі төнетіні белгілі. Апат айтып келмейді дегендей, төтеншеліктер қауіптің алдын алуға қамданады. Себебі, күн жылынған уақытта Сырдария өзенінде мұз еріп, сең жүру қаупі басталады. Мұндайда тек төтеншеліктер ғана емес, азаматтық қорғау қызметінің күш-құралы мен техникалары сақадай сай тұрады.Жуырда осыған сай барлық аймақта Төтенше жағдайлардың алдын алу және оларды жою, сондай-ақ азаматтық қорғаудың басқару органдарын, күштері мен құралдарын көктемгі кезеңге дайындау бойынша іс-қимылдарға азаматтық қорғаудың мемлекеттік жүйесін одан әрі жетілдіру мақсатында «Көктем – 2023» республикалық командалық-штабтық оқу-жаттығу өтті. Ал ауданда азаматтық қорғау қызметінің күш-құралы мен техникалық әзірлігі пысықталды. Оқу-жаттығуға аудандық азаматтық қорғау қызметтерінің басшылары мен жауапты қызметкерлері қатыстырылды.Жағдайдың алдын алуға жауапты 15 қызмет, кентте орналасқан «ҚазАвтоЖол» мекемесінің ауласында сап түзеді. Азаматтық қорғау қызметтерінің және шұғыл әрекет ету жасақтарының техникалық әзірлігін облыстық Төтенше жағдайлар департаменті жұмылдыру жұмысы тобының аға офицері Әлімжан Қуандықов, Қармақшы ауданы әкімі аппаратының басшысы Самат Смағұлов, аудандық Төтенше жағдайлар бөлімінің бастығы, азаматтық қорғау подполковнигі Өмірбек Сақтабаев қарап, тексерді. Сонымен қатар жедел әрекет ету жасағының дайындық деңгейін бағалап, мекеме басшыларының көктемгі дайындықтары бойынша есебін тыңдады.Саптық жиын аяқталғаннан кейін көктемде туындайтын төтенше жағдайлар кезінде өзара іс-қимылдар жүйесі тексерілді. Жаттығудың практикалық бөлігі аудан аумағындағы су басу қаупі бар аумақ саналатын Сарыөзек көлінің маңайында ұйымдастырылды. Оқиға орнына азаматтық қорғау қызметкерлері жедел жетіп, құм толтырылған қаптармен бөгет қорғанысын бекітті. Жұмыс барысында жарақат алып, аяғын қайырып алған азаматқа медициналық көмек көрсетілді.&nbsp;

Қармақшы: Тасқын қаупі сейілді 

​<a href="https://kyzylorda-news.kz/">Kyzylorda-news.kz.</a> Қарап отырсаңыз, көктеммен бірге айналада жылылық, мейірім, махаббат сезіледі. Бірақ одан бұрын өмірде аналардың жұмсақ алақаны, әжелердің әлдиі әдемі емес пе… Осындай керемет сезімге толы шара қала әкімдігінің қолдауымен А.Тоқмағамбетов атындағы мәдениет үйінде өтті.Қалалық мәдениет және спорт бөлімінің ұйымдастыруымен әжелер ансамбльдерінің облыстық фестиваліне ақжаулықты аналар мен әзиз әжелер жиналды. Қоғамдағы асыл әжелердің, әйел-аналардың мәртебесін арттырып, отбасылық құндылықтарды, қазақтың тұрмыс-салт жырларын, халық әндерін насихаттауды мақсат еткен «Ұлағатты әже» атты фестивальге арнайы қатысқан қала әкімі Асылбек Шәменов ұлттық тәрбиедегі қазақ әжесінің рөліне ерекше тоқталып, облыстың түкпір-түкпірінен келген өнер ұжымдарына ризашылығын білдірді.<blockquote>«Әлімсақтан әжелер – ұлттың ұйытқысы, тәлім мен тәрбиенің тұма бастауы. Сондықтан бұл шараның келіндеріміз бен бойжеткен қыздарымыз үшін өнегесі мол. Ағайын-туманың бірлігін сақтаған, әулеттегі абысын-ажындардың ақылшысы атанған, жас келіндерге жол көрсеткен, немере-шөберелерін құндылықтардың қайнарымен сусындатқан ардақты әжелеріміздің дәл осылай халық алдына шығып, алқалаған әлеуметке бүгінгідей жаһандану дертіне қарсы тұрар күш-қуат сыйлауы – кешегі абзал аналар салып кеткен сара жолдың үзілмегенін, ғасырдан-ғасырға мұрагер ұрпақтары арқылы жалғасын таба беретінін байқатса керек», – деген қала әкімі абзал аналарымызды алда келе жатқан төл мерекелерімен құттықтады.</blockquote>Шара барысында «Алып анадан туады, текфтілік тұқым қуады» демекші, Тәуелсіз Қазақстанның гүлденуіне айрықша үлес қосып, түрлі салада абыройлы еңбек етіп жүрген елімізге белгілі тұлғалардың аналары мен жұбайларына көктемнің шуақты мейрамы қарсаңында арнайы сый-құрмет көрсетілді. Олардың арасында 2008 жылы тікұшақ апатынан қаза тапқан әріптесіміз, Сыр елінің біртуар азаматы Сахитжан Бермағанбетовтің анасы Меруерт Бақбергенқызы қала әкімінің алғыс хатымен марапатталып, сый-сияпатына ие болды.Жеңімпаздар анықталдыСонымен облыс аумағынан 10 әжелер ансамблі қатысып, Ақмешіт аспанын әнге бөлеген өнер мерекесінің нәтижесінде Қызылорда қалалық білім бөлімі жанынан құрылған «Асыл жандар» ансамблі «Көрермендер көзайымы» атанса, Қызылорда қаласы, Асқар Тоқмағамбетов атындағы мәдениет үйі жанынан құрылған «Ұлағат» ансамблі мен Жалағаш ауданы, Мөрәлі Шәменов ауылдық мәдениет үйіндегі «Асыл ана» ансамблі 3-орын, Сырдария ауданы, Асқар Тоқмағамбетов мәдениет үйі жанынан құрылған &nbsp;«Асыл ана» ансамблі 2-орын алды. &nbsp;Ал Роза Бағланова атындағы Қазалы аудандық мәдениет үйі жанынан құрылған «Өнеге» ансамблі 1 орын иеленсе, Қармақшы аудандық Шәмшәт Төлепова мәдениет үйі жанынан құрылған «Ақ әжелер» ансамблі бас жүлдеге лайық деп танылды. Барлық қатысушылар мен жеңімпаздарға арнайы алғыс хаттар мен қаржылай сыйлықтар табысталды.Асыл әжелердің, әйел-аналардың мәртебесін арттырып, отбасылық құндылықтарды, қазақтың тұрмыс-салт жырларын насихаттауды мақсат еткен «Ұлағатты әже» атты облыстық әжелер ансамбльдері фестивалі аясында ұйымдастырылған аналар форумы өз мәресіне жетті.Форумды ашып берген қала әкімінің орынбасары Жанмұрат Сейілов қазақ аналарының ұлттық тәрбиедегі рөліне, елдік мүдде жолындағы елеулі еңбегінің мән-маңызына ерекше тоқталып, бүгінгі тағылымды шараның кө¬терген жүгі жеңіл емес екендігін тілге тиек етті.<blockquote>«Ана мен баланы қолдау, отбасылық құндылықтарды нығайту және дамыту – мемлекеттің әлеуметтік саясатының басты бағыттарының бірі. Өтіп жатқан форумның ерекше мәні бар. Қазақта «Әке ұлды тәрбиелейді, ана тұтас ұлтты тәрбиелейді» деген қанатты сөз бар. Расында да, ана баласына берген тәрбиесі арқылы болашақтың қалыптасуына ықпал етеді. Еліміздің дамуы мен өркендеуіне, қоғамдық-саяси және рухани әлеуетін іске асыруға белсенді атсалысып келе жатқан аналарымызға, барша қыз-келіншектерге шынайы ризашы¬лығымды білдіргім келеді», – деді қала әкімінің орынбасары.</blockquote>Содан соң келелі бас қосуға арнайы шақырылған педагогика ғылымдарының докторы, балалар ақыны Рахат Наурызбаева, облыс әкімінің отбасы және әйелдер мәселелері жөніндегі штаттан тыс уәкілі Гүлнар Жұмашева, облыс әкімі жанындағы әйелдер істері және отбасылық-демографиялық саясат жөніндегі комиссия хатшысы Қаламқас Каримова, Қазалы ауданынан келген көпбалалы ана, өнегелі әже Набира Момбекова ел ішіндегі ене мен келіннің, ұл мен қыздың тәрбиесі жөнінде сөз өрбітіп, өмірлік тәжірибелерімен бөлісті.Сондай-ақ көптеген танымал әндердің авторы, композитор, әнші Гүлнұр Нұрасылова ана¬ларымыздың құрметіне әннен шашу шашты.Форум түйінделер тұста бірнеше келін «Үлгілі келін» номинациясымен марапатталды. Тағылымды шара «Ұлағатты әже» облыстық фестивалінің бас жүл-десін иеленген Қармақшы ауданы, Шәмшат Төлепова атындағы аудандық мәдениет үйі жанынан құрылған «Ақ әжелер» ансамблінің әнімен қорытындыланды.Аналар айтқан ақ тілекҚала әкімінің сый-құрметіне ие болған марапат иесі Меруерт Бақбергенқызы да өз лебізін білдірді.<blockquote>«Кең ауқымды шараның қонағы болғаным үшін алғысым шексіз. Биыл марқұм балам Сахитжан Бермағанбетовтің арамыздан кеткеніне 15 жыл толды. Менің ғана емес, ол Сырдың, халықтың ұлы болып қала бе¬реді. Ұлымның көзі кетсе де, мені құрметтеп жатқан билікке, халыққа аналық жүрегіммен тек жақсылық, амандық тілеймін», – деді Меруерт апа.</blockquote>Сонымен қатар әжелер ан¬самблінде бақ сынасып, бас жүлдеге ие болған қармақшылық әжелер де тілектерін жеткізді. «Ақ «әжелер» ансамблінен апалы-сіңлілі, бүгінде әдемі қос әже Талмаш пен Әлия Тойбазаровалар:<blockquote>«Осы ансамбль құрамында 30 жылдан бері өнер көрсетіп келеміз. Нәтижесі де жаман емес. Негізі өнер жас талғамайды. Ақ кимешек киген әже болсақ та белсенді, көңілді болып жүргенге не жетсін… Жастарға да, ұрпағымызға да осындай жалындаған белсенділік керек. Көпті көрген ана, әже ретінде айтарымыз, еліміз аман, тыныш, жүрген жеріміз тек той-думан болсын», – деген жылы ықыласын білдірді.</blockquote>

Аналар айтқан ақ тілек

<a href="https://kyzylorda-news.kz/">Kyzylorda-news.kz.</a> Бүгінде Ұлы отан соғысында қанды қырғын бел ортасында болған майдангерлер қатары сиреп барады. Қазіргідей бейбіт те тыныш заманды сыйлаған батырларды құрметтеу кезек күттірмейтін үрдіске айналуы қажет. Сондықтан оларға тек Жеңіс күні қарсаңында ғана көңіл бөлмей, кез келген уақытта елеп-ескерген жөн. Осы ретте көктемнің алғашқы күні һәм Алғыс айту мерекесінде үлкенін ардақтай білген Жастар ресурстық орталығы мен бірқатар ерікті жан Ұлы Отан соғысының ардагері Тілеуберген Тобабергеновтің хал-жағдайын сұрап, сәлем беріп қайтты.Жылы шыраймен қарсы алған ақсақалға белсенді жастар сый-құрмет көрсетіп, ел үшін еткен ерлігі мен әрбір қазақстандықтың бүгінгідей бейбіт күнді кешуіне бірден-бір үлес қосқанына алғаусыз алғыстарын жеткізді. Қарт жауынгер қоғамда игі іспен айналысып жүрген жас буынға ыстық ықыласқа толы тілегін айтып, ақ батасын берді.&nbsp;Айта кетейік, Тілеуберген ақсақал Қазалының топырағынан түлеп ұшып, жеңісті Берлинде қарсы алған. Танк тізгіндеген ол Польша, Чехословакия, Беларусьті басқыншылардан азат еткен. Мұнан соң жастар көмек қолын созбақ мақсатта көпбалалы және жағдайы төмен отбасыларды аралап, қайырымдылық жасады. Қоғамдағы мейірімді, ізгі жандар да осы ерікті жастар сияқты жақсылық жасауда жарысып, асықса ізгі амалдары жауапсыз қалмас еді.

Қазалыда қарт батырға құрмет көрсетілді

<a href="https://kyzylorda-news.kz/">Kyzylorda-news.kz.</a> «Ана сұлу көрінер қызыменен». Осындай тақырыпта «Балапан» балабақшасында «Қазақ тілі» қоғамдық бірлестігінің ұйымдастыруымен тәрбиешілер арасында аудандық байқау ұйымдастырылды. Кіл мықтылар басқосқан сайыс «Балапан» балабақшасының тәрбиеленушілері сахналаған «Балапан қаз» қойылымымен ашылды.Мерекелік шарада «Қазақ тілі» Қазалы ауданы бойынша қоғамы» қоғамдық бірлестігінің төрайымы Нұрбибі Әшір алғы сөз сөйледі. Ол жиналғандарды салтанатты күнмен құттықтап, жарысқа қатысушыларға сәттілік тіледі.&nbsp;Бақ пен бап қатар сыналатын додада «Айгөлек» балабақшасынан тәрбиеші Айда Оразбай мен тәрбиеленуші Аяла Нұрбекқызы, «Шұғыла» балабақшасынан Рыскүл Төлегенова мен Жанерке Ғабидолла, «Балдырған» балабақшасынан Айгүл Душанова мен Альфия Маралбек, «Балапан» балабақшасынан Гүлшат Сейітова мен Альмира Нұрмағанбетова, «Алпамыс» балабақшасынан Айсәуле Нұртай мен Әмина Қамысбай және «Ақбота» балабақшасынан Күлзада Елеева мен Мүслима Батырхан қатысты. Ауқымды байқау төрт кезеңнен тұрды. Алдымен ережеге сай талапкерлер өздерін таныстырды.&nbsp; «Өнерлі өрге жүзер» атты екінші кезеңде анасы қызымен бірге, болмаса, жеке дара өз шеберлігін көрсету талап етілді. Ал «Шебер қолдар» сайысында жеміс-жидектерден композиция құрастыру, іс тігу, ою-өрнек, құрақ құрау міндеттелді. Соңғы шарт бойынша тәрбиеге байланысты мақал-мәтел, жұмбақтың шешуін айтып, ситуациялық сұрақтарға жауап берді.&nbsp; Сайысқа түсушілердің білімі мен өнерін әділқазылар – Нұрбибі Әшір, «Өрімтал» балабақшасының меңгерушісі Рабиға Қарымсақова және «Аида ЖШС» балабақшасының меңгерушісі Әлия Мәшенбаева бағалады.&nbsp;Мазмұнды шара кезінде «Балапан» балабақшасының тәрбиеленушілері «Ана туралы жыр», «Ақ мамам» әнін орындап, «Асатаяқ» биін мың бұрала биледі. Бұдан соң «Өз анаңды тап» ойыны ойнатылды. Онда аналарды тізбектеп қойып, көзі байланған балалар өз аналарының бетін, қолын сипау арқылы табу керек болды. Қызықты ойын соңында балалар аналары мен қыздарға гүл сыйлап, керемет кештің көркін одан әрі ажарландырды.&nbsp;Жарысқа қатысқан тәрбиешілер мен қыздары «Аяулы ана» әнін ортақ орындады.&nbsp;<blockquote>«Байқау жоғары деңгейде өтті. Әсіресе, «Шұғыла» балабақшасының «Ең қымбат нәрсе» атты ана мен қызының арасындағы қойылымы мен киімдері, «Балдырған» бөбекжай-балабақшасының әшекей бұйымдары, бейнеролигі және ән шырқауы ғажап болды. Ал «Балапан» бөбекжай балабақшасының «Арманбек» сауда орталығында түсірілген бейнеролигі, «Жетімек» монологы, өзін-өзі таныстыруы, көріністері, жеміс-жидек композициясы бәрі де көрерменнің көңілінен шықты. «Ақбота» балабақшасының қатысушылары анасы мен қызының қолдан жасаған шоқ гүлдері, «Алпамыс» балабақшасының анасы мен қызының ән шырқауы, тұс киізі, бейнеролигі, ситуациялық сұрақтардан тиімді жол тауып шығуы өзгелерден ерекшелеп тұрды. «Айгөлек» балабақшасының қатысушылары өз қолдарымен дайындаған тұмарлары, ою -өрнектері өте керемет шықты», – дейді әділқазылар алқасының төрайымы Нұрбибі Әшір.&nbsp;</blockquote>Байқау қорытындысы бойынша бас жүлдені «Балапан» бөбекжай-балабақшасының қатысушылары Гүлшат Сейітова мен қызы Альмира Қуанышбекқызы жеңіп алды. Бірінші орын «Балдырған» балабақшасының қатысушылары Айгүл Душанова мен қызы Альфия Маралбекке және «Алпамыс» балабақшасынан келген Айсәуле Нұртай мен Әмина Қамысбайға бұйырды. «Шұғыла» балабақшасының қатысушылары Рыскүл Төлегенова мен қызы Жанерке Ғабидолла және «Ақбота» балабақшасының қатысушылары Күлзада Елеева мен қызы Мүслима Батырхан екінші орынды иеленді. Үшінші орын «Айгөлек» балабақшасының қатысушылары Айда Оразбай мен қызы Аяла Нұрбекқызына берілді. Жеңімпаздарға «Алғыс» хаттар, бағалы сыйлықтар табысталды. Бүлдіршіндерге арнайы дипломдар беріліп, сый-құрмет көрсетілді.

Қазалыда аналар байқауда бақ сынады

​<a href="https://kyzylorda-news.kz/">Kyzylorda-news.kz.</a> 8 наурыз – Халықаралық әйелдер күніне орай түрлі салада табысты қызмет етіп, ауданымыздың әлеуметтік-экономикалық дамуына өз үлестерін қосқан 60-қа тарта аналардың қатысуымен салтанатты кеш өтті.Салтанатты кешке аудан әкімі Нұржан Сәбитұлы Ахатов, құқық қорғау органдарының басшылары, аудандық ардагерлер кеңесі төрағасы Өркен Исмаил арнайы шақыртылды.Кеш барысында аудан әкімі Нұржан Ахатов ауданымыздың барша аналары мен қыз-келіншектерін ер азаматтардың атынан мерекемен құттықтады. Сондай-ақ, Шиелі ауданының өсіп-өркендеуіне, &nbsp;экономикалық әлеуетінің артуына әйел кісілердің сіңірген еңбегі зор екендігін тілге тиек етті.<blockquote>«Қазіргі қазақ әйелі қабілеті мен қарымына қарай көшбасшы бола алатынын да дәлелдеді. «Әйел - кәсіпкер» «Әйел - саясаткер» «Әйел - қайраткер» деген ұғымдар өмірімізге енді. Бір ғана мысал, аудандық бөлімдердің екеуін әйел кісілер басқарып отыр. Батыр аналарымыздың да есебі жылдан жылға еселеніп, бүгінде ауданымызда 2495 батыр анамыз бар. Оның ішінде «Алтын алқа» иелерінің саны – 957 ана болса, «Күміс алқа» иегерлерінің саны – 1538 анаға жетті. Осы орайда, қоғам мен мемлекет дамуына белсене араласып жүрген барша Аналарымызға, қыз-келіншектерге зор алғысымды білдіре отырып, мерейлі мерекелеріңізбен шын жүректен құттықтаймын», – деді аудан әкімі Нұржан Ахатов.</blockquote>Мұнан соң салтанатты кеш мерекелік қойылымдармен жалғасын тауып, мәдениет саласының майталмандары кештің көркін қыздырды.<figure class="image"><img src="https://knadmin.beoblood.kz/uploads/shieli_0dec681348.jpg" alt="шиели.jpg"></figure>

Нұржан Ахатов аналарға құрмет көрсетті

<a href="https://kyzylorda-news.kz/ru/">Kyzylorda-news.kz</a>. Саяхаттау жаһан жауһарына көз жүгіртіп, әлем сұлулығына сүйсінуге, сырына үңілуге, тарихын тануға, таным көкжиекті кеңейтуге мол мүмкіндік береді. Дүние жүзін дүрбімен барламай, әрбір мемлекеттің тынымсыз тіршілігіне еніп, әдет-ғұрпы һәм салт-дәстүрімен танысып, мәдениетіне мән беру мақсатында саяхаттаудың орны бөлек. Сайып келгенде әрбір елде көздің жауын аларлық сұлулық, бір-бірімен байланысқан әдемілік пен әсемдік жетіп жатыр. Олай болса, ел-елді аралап, ерекшелігін байқап, сол әдеміліктің куәсі болғанға не жетсін?! Сайып келгенде, өмірдің мәні – қозғалыс пен ізденістен, еркіндікте тыныс алып, бақыт құшағына бөленуден тұрмай ма? Ендеше, дүниетанымының діңгегін қалап, ой-өрісін кеңейтіп, тұмса табиғаттың бөлшегінен сүйіспеншілік көре білу – өмірге шексіз ғашықтықты білдіреді. Осы тұста жиһанкез әрі психолог Динара Болат өзіне де, өзгеге де бақыт пен қуаныш сыйлаудан тысқары қалған емес. Әлемнің 41 еліне саяхаттап, әр сапарынан көпшілікке пайдалы жазба ұсынып және керекті кеңес айтуда да кейін шегінбейтін жиһанкезбен әдемі әңгіме өрбітуге тырыстық.– Сәлеметсіз бе, Динара? Сіздің жыл сайын саяхаттауды жоспарлап, бірнеше елге барғаныңызды білеміз. Талғамыңызға қарай таңдау жасайсыз. Саяхатқа деген қызығушылығыңыз артпаса кемімейтін тәрізді. Жалпы, сіз үшін саяхат деген не?– Мен үшін саяхат – бұл кең дүниені, әлемді тану. Бізге берілген ғұмыр, әлем өте кең, өте үлкен. Мұның барлығы адам көрсін, зерттесін, түсінсін және ой түйсін деп жаратылған. Сондықтан, біз оны көруге, тануға ұмтылуымыз керек. Бір орында қалу, бір ауылдан, бір қаладан, бір елден шықпай кеткен адамдар көп. Меңінше, саяхат та, әлем де біз үшін қызмет етеді. Сондай-ақ, біздің ой-өрісіміздің дамуы мен тұлға болып қалыптасуымызға септігін тигізеді.– Сіздің сұлулыққа сүйсіне білуіңіз, қиын сәтте де жабырқамауыңызға сеп болады. Мұндай қасиетіңіз бала күніңізден қалыптасқан ба?– Мен ылғи жер үйде өстім. Ата-анамызбен бірге көп көштік. Бірақ, қай үйімізде де орыстардан қалған бау-бақша, үлкен ағаштар болатын. Мен қиналған сәтте немесе мұңға батқан сәтте ағаштардың жанында отырып ойланатынмын. Бала кезден көзім үйренгендіктен болар, айналадағы әрбір сұлулық қиналуыма да мұрсат бермейді.&nbsp;– Грузияға деген шексіз махаббатыңызды білеміз. Ғажап көрінісінен бөлек ол мемлекет сіз үшін несімен ерекше, қалай баурап алды?– Біріншіден, Грузия – көрші ел, қолжетімді ел. Сонымен қатар, маған халқы ұнайды. Елімізге турист келді, пайдаланып қалайық, ақшасын сыпырып алайық немесе бағаларын қымбаттатып айтайық деген арам пейілдері болмайды. Өте адамгершілігі зор халық. Қысқасы, Грузияның табиғатына, әсіресе тауларына ғашықпын.– Осы уақытқа дейін 41 елге саяхаттадыңыз. Әр сапарыңыздың көңіл көкжиегінде, жүрек түкпірінде ерекше орын алатыны белгілі. Дей тұрғанмен, есті естелігі мен қызық-шыжығымен есте қалған сапарыңыз қайсы?– Жалпы, көп саяхаттарды мерекеге, арнайы бір өзінің маусымына байланыстырып барғанды ұнатамын. Көңіл түкпірінде қалғаны – Жапонияның күзі, Үндістандағы «дивали», Франциядағы «рождество» мерекелері, Америкаға өзіміз көлік жалдап, еш тіл білместен және жол білместен оны аралауымыз, жаяу жүріп барлық жерін көруіміз соның бәрі қызық, әрине.– Табиғатпен тамырлас адамсыз. Сүйіспеншілік пен сұлулықты үйлестіруде үлесіңіз зор. Осы ретте, әсем табиғатымен әсерге бөлеген ел мен қаланың кішігірім тізімін жасасаңыз.– Табиғатпен тамырлас адам екендігім рас. Сондықтан, табиғаттың ортасында демаламын. Өзіме демалыс арнау керек болса міндетті түрде мен Оңтүстік-шығыс Азиядағы тропикалық елдерді жөн көремін. Менің сүйікті елім – Индонезия, Тайланд. Әлі Қытайды да толық аралап, көргім келеді. Себебі, жері үлкен, табиғаты алуан түрлі. Алайда, табиғаты әсем деп нақты бір қаланы атау қиын. Өйткені, табиғат тек қаланың ортасында емес, қаланың сыртында да орналасқаны болады. Мәселен, елдің ішінде белгілі бір ауылдар болуы мүмкін.– Алғаш шаршап келген саяхатыңыз Египет екен. Толығырақ тоқталып өтсеңіз.– Шынымен де алғаш ұнатпаған елім – Мысыр мемлекеті, Египет. Себебі, мен өмірде адалдықты, адамгершілікті бағалаймын. Ал, пайдакүнемдікті, табысты алға шығарып тұрған адамдардан да, елден де өзімді алыс ұстауға тырысамын. Египеттен байқағаным – осы. Ұнатпай, енді келмеспін деуімнің себебі де осы. Бұл жерде «қонақ тағы да келсін, ұнайық, барлық жағдайды жасайық, шын көңілмен қарсы алайық» деген ниет байқалмайды. Бірінші және соңғы келіп тұрған туристей қарайды да, өз қызметтерін тықпалап, не болмаса алдап, екі-үш есе бағасын қымбататып айтады. Адамның білмейтіндігін де пайдаланып қалуға тырысады.– Көпшілікке саяхаттау үшін қай елдерді ұсынар едіңіз? Жас саяхатшылар алдымен нені ескеруі керек?– Мен халықтың, адамдардың қалауын білмеймін. Сондықтан олар теңізді жақсы көре ме, танымдық саяхатты, бәлкім, экстрималдық саяхатты жақсы көретін шығар. Мүмкіндігінше, адам көбірек саяхаттау керек. Мәселен, еңбек демалысын пайдаланып, жылына саяхаттауды жоспарлауға болады. Ең бастысы ұмтылу, бір рет шығу. Одан кейін адам жыл сайын өзі-ақ шығып тұруға асығатын болады. Жылына бір рет саяхаттаған болсаңыз, келесі жылы екі рет саяхаттауға мақсат қою керек.Жас саяхатшылар жастығына орай батыл болады. Тіл білмеу – кемістік, кемшілік емес. Батыл, еркін болса, бәрібір өзіне қажеттісін сұрап-біліп алады. Жастарға айтарым, қазіргі заманның мүмкіндіктерін, түрлі пайдалы қосымшаларды меңгерген дұрыс. Интернеттен ізденіп, өзі тауып, өзі жоспарлағаны әдемі болады. Бір ескеретін жағдай, барған еліңізде еркіндікке салынып, шамадан тыс тентектік жасаудың қажеті жоқ. Барған елді сыйлау, қоғамдық тәртіпті сақтау маңызды.– Саяхат кезінде қауіптің құрсауына ілінбеу үшін қандай кеңес бересіз?– Саяхат кезінде көп жағдайда сол елдердің заңдары мен қоғамдық тәртібін сақтау керек. Конфликтке түсіп, айтысып, ұрысудың жөні жоқ. Бұл өте артық, ақымақтық нәрсе деп ойлаймын. Бәрібір, барып тұрған еліңіз туристі емес, өз азаматын қорғайды. Бір нәрсені дәлелдеймін дегеннің өзінде саяхаттан көп уақыт жоғалтасыз. Сондықтан өзімшілдікке салынбай, жұмсақ жүріп, асықпай басып, әдемі саяхат құрған дұрыс. Негізгі қауіпсіздік – әдетте бірінші барған кезде туристерге сұрақ қояды. Яғни, «алғаш келуіңіз бе?», әлде «тәжірибелі туристсіз бе?» деп соны тексереді. Көшеде жүрген адамдар да «қай қонақ үйге тоқтадыңыз?» деп сауал қойғанда жауап бермеуге, бөтен адамдармен көп сөйлеспеуге тырысу керек. Сондай-ақ, әр барған елдің қауіпті деген аудандары болады. Оны да ескеріп, ақшаңыз бен сөмкеңізге мұқият болыңыз.– Өзгелерге қуаныш сыйлап, саяхат ұйымдастыратын авторлық турыңыз бары бәріңе белгілі. Талғампаздығыңыз байқалатын турыңыз арқылы осы уақытқа дейін қанша адам саяхаттады?– Ковид жылдарын есептемегенде біз төрт жыл қатарынан шетелге адам апарып жүрміз. Карантинге дейін бір есептегенім бар, сол кезде 140-тан аса оқырман қыз-келіншектерге танымдық саяхат көрсетіп, шетелде демалдырған екенбіз.– Көптің сұранысы тур қызметінде көрсетілген 6 елдің қайсысына артты?– Ковидке байланысты шекаралардың жабылуына орай бізде көп елдер қысқарды. Ал, сұраныста алдыңғы орында көрші Өзбекстан мемлекеті тұр. Біріншіден, жақын. Екіншіден, өте қолжетімді. Көп өңірлердегі қыз-келіншектерге еліміздегі қалаларға, Елордаға, Алматыға баруға қарағанда Өзбекстанға барып келу анағұрлым қалтаға қонымды. Саяхатта талай сұлулықты көреді, тарихын біледі және ол жақта баға төмен болғандықтан жақсылап базар аралап келе алады. Сондықтан Өзбекстанға сұраныс әрдайым жоғары.– Оқырманға айтар жылы лебізіңіз.– Өмір – біреу, өкінбейтіндей өмір сүріңіздер. Әдемі ғұмырдың иесі болыңыздар.

Қазақстан және Қызылорда облысының жаңалықтары